Ukufuma

1 Kabili aya e mashina ya bana ba kwa Israele abaile ku Egupti pamo na Yakobo; baile+ cila muntu na ba mu ng’anda yakwe: 2 Rubene,+ Simeone,+ Lebi+ na Yuda,+ 3 Isakari,+ Sebuluni,+ na Benjamini,+ 4 Dani+ na Naftali,+ Gadi+ na Ashere.+ 5 Na bantu bonse abafumine muli Yakobo bali amakumi cinelubali (70), lelo Yosefe ninshi aali kale kale mu Egupti.+ 6 Awe Yosefe asukile afwa,+ pamo na bamunyina bonse e lyo na bonse aba nkulo ilya. 7 Kabili abana ba kwa Israele balifyalishe ica kuti bafula nga nshi; kabili balefulilako fye no kulakwatilako fye amaka nga nshi, kabili basukile bakumana icalo conse.+

8 Awe kwasukile kwaima imfumu ipya mu Egupti iishaishibe Yosefe.+ 9 Kabili yatile ku bantu ba iko: “Moneni! Abena Israele nabafula kabili nabakwatisha amaka ukutucila.+ 10 Lekeni na ifwe tubapite pa mano,+ pa kutila befulisha, pantu ubulwi nga bwaima, bakailunda ku batupata kabili bakalwa na ifwe bakafume na mu calo cesu.”

11 Awe e pa kubasontela bacilolo ba kubabomfya mu mulimo wa busha pa kutila balebacusha fye mu kusenda ifisendo fyafina;+ na bo bakuuliile Farao imisumba umwali amatala, ne yi ni Pitomu na Raamsese.+ 12 Lelo ilyo balebacululusha, e lyo na bo balefyalisha no kufula, basukile abena Egupti baikatwa umwenso uukalamba pa mulandu wa bana ba kwa Israele.+ 13 Ici calengele abena Egupti ukulabomfya abana ba kwa Israele buluku buluku.+ 14 Kabili bakonkenyepo fye ukucululusha abena Israele ku mulimo wa-afya uwa kukandila iloba lye bumba,+ no wa kutama injelwa, na ku mulimo onse uwa mu mpanga,+ umulimo onse uwa busha uo bababomfeshemo buluku buluku.+

15 Mu kupita kwa nshita imfumu ya Egupti yaebele banacimbusa+ abaHebere, umo ishina lyakwe ni Shifra ne shina lya mubiye ni Pua, 16 ukuti: “Ilyo muleafwilisha banamayo abaHebere abali pa bukulu ukuti bapaape kabili ilyo bali pa mabwe ya kufyalilapo mwamona ukuti mwana umwaume, mukamwipaye; lelo nga mwanakashi, mwikamwipaya.” 17 Nangu line cali fi, aba banacimbusa baletiina Lesa+ wa cine, kabili tabakonkele ifyasosele imfumu ya Egupti,+ baleleka abana baume babe no mweo.+ 18 Yasukile mfumu ya Egupti yaita banacimbusa no kubepusha ukuti: “Cinshi ico mulelekela na bana baume ukuba no mweo?”+ 19 Banacimbusa na bo batile kuli Farao: “Pantu abanakashi abaHebere tababa nga banakashi abena Egupti. Apo bena balikosa, nacimbusa asanga fye nabaipaapila kale.”

20 Awe Lesa apaalile banacimbusa;+ kabili abantu bakonkenyepo fye ukufula no kulakoselako. 21 Nomba apo banacimbusa baali na katiina kuli Lesa wa cine, na o abapeele indupwa.+ 22 Asukile Farao aeba abantu bakwe bonse ati: “Abana baume bonse aba baHebere abafyalwa mulebapoosa mu mumana wa Naelo, lelo abana banakashi bena mulebaleka baba no mweo.”+

2 Pali ilya ine nshita, umwaume umo uwa mu mukowa wa kwa Lebi aileupa umwana mwanakashi wa kwa Lebi.+ 2 No mwanakashi alimite no kufyala umwana umwaume. Ilyo amwene ukuti umwana afyele alemoneka bwino, alimufishile+ pa myeshi itatu.+ 3 Ilyo amwene ukuti nomba ca-afya ukumufisa,+ amubuuliile umuseke wa macinda no kumasako amanenekela na sefeti+ no kubikamo umwana no kuyaubika mu matete+ mu mbali ya mumana wa Naelo. 4 Kabili, nkashi ya uyu mwana aiminine akatalamukila pa kutila alemona ifilecitika ku mwana.+

5 Pa numa ya kashita umwana mwanakashi wa kwa Farao atentemukile ku Mumana wa Naelo mu kowa, na babomfi bakwe abakashana bale-endela mu mbali ya Mumana wa Naelo. Na o amwene umuseke mu matete. Apo pene fye atumine umubomfi wakwe umwanakashi ukuti abuule umuseke.+ 6 Ilyo akupukwilepo amwenemo umwana umwaume, kabili moneni uyu mwana alelila. Awe amumfwilile uluse,+ nangu line atile: “Uyu mwana wa baHebere.” 7 E lyo inkashi ya uyu mwana yatile ku mwana mwanakashi wa kwa Farao: “Bushe njemwitila umwanakashi uuleonsha pa banakashi abaHebere pa kuti alemonseshako umwana?” 8 Umwana mwanakashi wa kwa Farao amwebele ati: “Kabiye!” Apo pene fye umukashana aileita nyina wa mwana.+ 9 E lyo umwana mwanakashi wa kwa Farao amwebele ati: “Senda umwana uyu, uleng’onseshako, na ine ndi no kukulipila.”+ Awe umwanakashi asendele umwana no kulamonsha. 10 No mwana alikulile. Kabili amutwele ku mwana mwanakashi wa kwa Farao, ukuti abe umwana wakwe;+ kabili amwinike ati Mose no kutila: “Pantu ni mu menshi namufumishe.”+

11 Nomba muli shilya nshiku, ilyo Mose alekula no kukoselako, e lyo aile kuli bamunyina ukuti amone ifisendo fyafina ifyo balesenda;+ kabili amwene umwina Egupti aleuma umuHebere uwa muli bamunyina.+ 12 Awe aloleshe uku no ku no kumona ukuti takwali nangu umo. E lyo aumine umwina Egupti ica kuti alifwile kabili amushiikile mu mucanga.+

13 Lelo, ilyo aileko ubushiku bwakonkelepo, moneni abaHebere babili balelwa. Awe atile ku wali ne cilubo: “Cinshi uleumina umunobe?”+ 14 Na o atile: “Nani akusontele ukuba cilolo kabili kapingula pali ifwe babili?+ Bushe ulefwaya ukunjipaya nga filya waipeye umwina Egupti?”+ Mose nomba e pa kwikatwa umwenso no kutila: “Ici cintu nacishibikwa!”+

15 Awe ilyashi ili lyasukile lyafika kuli Farao, kabili afwaile ukwipaya Mose;+ lelo Mose alifulumwike+ ukufuma kuli Farao ukuti ayeikala mu calo ca Midiani;+ kabili aikele mupepi ne cishima. 16 Nomba shimapepo+ wa ku Midiani ali na bana banakashi cinelubali (7), kabili baishile ku kutapa amenshi nga pe no kwitulwila mu mifoolo pa kuti banwenshe umukuni wa kwa shibo.+ 17 Kabili abacemi na bo balishile nga pe no kubatamfya. Ilyo cali fi Mose alimine no kwafwa abanakashi no kubanwenseshako umukuni.+ 18 E ico ilyo bafikile ku ng’anda kuli Reuele+ shibo, alipapile no kwipusha ati: “Nga caba shani lelo ukuti mwabwela bwangu ku ng’anda?” 19 Na bo batile: “Mwina Egupti+ wacitupususha kuli bakacema kabili e wacitutapilako na menshi ya kunwensha umukuni.” 20 Na o atile ku bana bakwe abanakashi: “Nga ali kwi? Cinshi ico mumushiliile? Kamwiteni, pa kuti ese alyeko.”+ 21 Na pa numa Mose afwaile ukwikala na ulya muntu, kabili apeele Sipora+ umwana wakwe umwanakashi kuli Mose. 22 Mu kupita kwa nshita afyele umwana mwaume kabili Mose amwinike ati Gershomu,+ pantu, atile: “Ndi mulebeshi muli cino calo.”+

23 Nomba pa numa ya nshiku shilya ishingi, imfumu ya Egupti yalifwile,+ lelo pa mulandu wa busha, abana ba kwa Israele bakonkenyepo fye ukuteta no kulilishika,+ kabili inkuuta yabo yalenina kuli Lesa wa cine pa mulandu wa busha.+ 24 Asukile Lesa aumfwa+ ukuteta+ kwabo kabili Lesa aibukishe icipangano apangene na Abrahamu, Isaki na Yakobo.+ 25 Awe Lesa aloleshe pa bana ba kwa Israele kabili Lesa alimwene ifyo balecula.

3 Mose nomba aishileba kacema wa mukuni wa kwa Yetro+ shifyala,+ shimapepo wa ku Midiani. Ilyo aletungulula umukuni ukulola ku masamba ya matololo, asukile afika ku lupili lwa kwa Lesa wa cine,+ ku Horebu.+ 2 E lyo malaika wa kwa Yehova amoneke kuli ena mu lubingu lwa mulilo mu kati ka cimpusa.+ Ilyo alelolekesha, moneni, icimpusa calebilima umulilo lelo tacalepya. 3 E lyo Mose atile: “Kanjeko fye pa kuti imone ici cinjelengwe, njishibe ico icimpusa tacilepiila.”+ 4 Ilyo Yehova amwene ukuti aya ku kumona, apo pene fye Lesa abilikishe mu cimpusa, ati: “Mose! Mose!” na o atile: “Mukwai.”+ 5 E lyo atile: “Wipalamako kuno. Fuula indyato shobe, pantu apo wiminine ni pa mushili wa mushilo.”+

6 Kabili akonkenyepo ukusosa ati: “Nine Lesa wa kwa wiso, Lesa wa kwa Abrahamu, Lesa wa kwa Isaki kabili Lesa wa kwa Yakobo.”+ Awe Mose e pa kufisa icinso cakwe, pantu atiinine ukulolesha Lesa wa cine. 7 Kabili Yehova atile: “Nimona ukucula kwa bantu bandi abali mu Egupti, kabili ning’umfwa ukulilishika kwabo pa mulandu wa babapatikisha ukubomba; pantu ninjishiba ukukalipwa balekalipwa.+ 8 Kabili ndeya ku kubapokolola mu minwe ya bena Egupti+ no kubafumya muli cilya calo no kubatwala ku calo icisuma kabili icapabuka, icalo umwaba umukaka no buci,+ mu ncende ya bena Kanaani ne ya bena Hiti ne ya bena Amore ne ya bena Perisi ne ya bena Hibi e lyo ne ya bena Yebusi.+ 9 Kabili mona! Ukulilishika kwa bana ba kwa Israele nakufika kuli ine, kabili nimona ne fyo abena Egupti balebatitikisha.+ 10 Nomba umfwa, kabiye kuli Farao, uye ufumye abantu bandi, abana ba kwa Israele, mu Egupti.”+

11 Lelo, Mose atile kuli Lesa wa cine: “Nine nani uwa kuya kuli Farao no kufumya abana ba kwa Israele mu Egupti?”+ 12 Na o atile: “Pantu ine nkaba na iwe,+ kabili ici e co ukeshibilako ukuti nine nkutumine:+ Ilyo ukafumya aba bantu mu Egupti, mukalabombela ine ne Lesa wa cine pa lupili ulu.”+

13 Na lyo line, Mose atile kuli Lesa wa cine: “Nga ca kutila nafika ku bana ba kwa Israele nabeba no kuti, ‘Lesa wa fikolwe fyenu antuma kuli imwe,’ na bo banjipusha abati, ‘Nani ishina lyakwe?’+ Nkabasuka shani?” 14 E lyo Lesa atile kuli Mose: “NKABA UO NKABA.”+ Kabili atile: “Ifi e fyo ukasose ku bana ba kwa Israele, ‘NKABA nantuma kuli imwe.’”+ 15 Awe Lesa alandile kuli Mose na kabili ati:

“E fyo ukasose ku bana ba kwa Israele, ‘Yehova Lesa wa fikolwe fyenu, Lesa wa kwa Abrahamu,+ Lesa wa kwa Isaki+ kabili Lesa wa kwa Yakobo,+ e wantuma kuli imwe.’ Ili e shina lyandi umuyayaya,+ kabili e cibukisho candi ku nkulo ne nkulo.+ 16 Kabiye, kalonganye abakalamba ba mu Israele no kubeba ukuti, ‘Yehova Lesa wa fikolwe fyenu namoneka kuli ine,+ Lesa wa kwa Abrahamu, Isaki na Yakobo, no kusosa ati: “Ukupempula+ ndemupempula no kumona ifyo balecita kuli imwe mu Egupti. 17 Kabili ndeti, nalamufumya mu bucushi+ bwa bena Egupti no kumutwala ku calo ca bena Kanaani ne ca bena Hiti ne ca bena Amore+ ne ca bena Perisi ne ca bena Hibi ne ca bena Yebusi,+ icalo umwaba umukaka no buci.”’+

18 “Na bo bakomfwa kwi shiwi lyobe,+ kabili ukaye, iwe na bakalamba ba bena Israele, ku mfumu ya Egupti, no kutila, ‘Yehova Lesa wa baHebere+ nalanda na ifwe,+ mukwai nomba kanshi tulefwaya ukuya ulwendo lwa nshiku shitatu mu matololo, no kuyaipaila Yehova Lesa wesu ilambo.’+ 19 Lelo ine, ninjishiba ukuti imfumu ya Egupti tayakamuleke ukuya kano ku kuboko kwakosa.+ 20 Kabili nkatambalika ukuboko+ kwandi no kuuma Egupti ku fipesha amano fyandi fyonse ifyo nkacita mu kati kakwe; e lyo akamuleka mukaye.+ 21 Kabili nkalenga aba bantu ukutemwikwa ku bena Egupti; kabili ilyo mukalaya, tamwakaye minwe nkutwa.+ 22 Kabili umwanakashi umo na umo akalomba ku mwina mupalamano na ku mwanakashi umulebeshi uwikala mu ng’anda yakwe ifipe fya silfere ne fipe fya golde ne fya kufwala, kabili mukafifwike abana benu abaume na bana benu abanakashi; kabili mukapoke ifyuma fya bena Egupti.”+

4 Lelo Mose ayaswike ati: “Tutile bakaana ukusumina kabili bakaana no kukutika kwi shiwi lyandi,+ pantu bakatila, ‘Yehova tamoneke kuli iwe.’” 2 E lyo Yehova amwipwishe ati: “Cinshi cili mu minwe yobe?” na o atile: “Ni nkonto.”+ 3 E lyo atile: “Ipoose pa nshi.” Awe apoosele nkonto pa nshi, na yo yasangwike insoka;+ na Mose e pa kufulumukako. 4 Yehova nomba atile kuli Mose: “Tambaliko kuboko kobe no kuikata ku mucila.” Awe atambalike ukuboko kwakwe no kwikata ku mucila wa nsoka, na yo yasangwike inkonto mu minwe yakwe. 5 “Pa kuti basumine ukuti Yehova Lesa wa fikolwe fyabo,+ Lesa wa kwa Abrahamu,+ Lesa wa kwa Isaki+ kabili Lesa wa kwa Yakobo,+ namoneka kuli iwe.”+

6 Kabili Yehova abwekeshepo ukumweba ukuti: “Shi bika ukuboko kobe mu ca kufwala, pa cifuba cobe.” Awe abikile ukuboko kwakwe mu ca kufwala, pa cifuba cakwe. Ilyo akufumishe, moneni, ku kuboko kwakwe kwali ifibashi kabili kwabuutile na tuutu!+ 7 E lyo atile: “Bwesesha ukuboko kobe mu ca kufwala, pa cifuba cobe.” Awe abwekeshe ukuboko kwakwe mu ca kufwala, pa cifuba cakwe. Ilyo akufumishe mu ca kufwala cakwe pa cifuba, moneni, kwalipolele kabili kwali fye ngo mubili onse!+ 8 “Kabili nga ca kuti tabakasumine pa numa ya kumona icipesha amano ca kubalilapo, ninshi bakacetekela icipesha amano cikakonkapo.+ 9 Na lyo line, nga ca kuti, bakaana ukusumina ifi fipesha amano fibili kabili bakaana no kukutika kwi shiwi lyobe,+ e lyo ukatape amenshi mu Mumana wa Naelo no kuyetila pa mushili apauma; kabili amenshi ayo ukatapa mu Mumana wa Naelo, yakasanguka umulopa pa mushili apauma.”+

10 Mose nomba atile kuli Yehova: “Iye mwe Yehova, ine nshilanda bwino, ukufuma fye ku kale ukufika na nomba, nangu fye ni apa pene mulelanda ku mubomfi wenu, pantu nalifina akanwa no lulimi.”+ 11 E lyo Yehova amwipwishe ati: “Nani wapeele umuntu akanwa kabili nani uulenga umuntu ukuba cibulu nelyo nkomamatwi nelyo ukumona nelyo ukuba impofu? Bushe te ine, ne Yehova?+ 12 E ico nomba kabiye, na ine nkaba na iwe kabili nkakusambilisha ifyo ufwile ukusosa.”+ 13 Lelo atile: “Iye mwe Yehova, shi tumeniko umbi, onse uo mulefwaya mwe bene.” 14 E lyo ubukali bwa kwa Yehova bwaimiine Mose kabili atile: “Bushe Aarone umwina Lebi te munonko?+ Ninjishiba ukuti ena kuti alanda bwino. Kabili mona, ali mu nshila ku kwisakukumanya. Ilyo akakumona, akasekelela mu mutima wakwe.+ 15 Kabili ukasose kuli ena no kumweba ifya kulanda;+ na ine nkaba na kanwa kobe na kanwa kakwe,+ kabili nkamusambilisha ifya kucita.+ 16 Kabili akakusoselako ku bantu; e ukaba nga kanwa kobe,+ na iwe ukaba nga Lesa kuli ena.+ 17 Kabili ukasende iyi nkonto mu minwe yobe pa kuti ukalecitilako ifipesha amano.”+

18 E ico Mose alile no kubwelelamo kuli Yetro shifyala no kumweba ati:+ “Mukwai ndefwaya ukuya no kubwelelamo kuli bamunyinane ababa mu Egupti pa kuti nkayemona nga bacili no mweo.”+ Na Yetro atile kuli Mose: “Wende umutende.”+ 19 Pa numa Yehova atile kuli Mose mu Midiani: “Kabiye, bwelela ku Egupti, pantu bonse abalefwaya umweo obe balifwa.”+

20 Awe Mose asendele umukashi wakwe na bana bakwe abaume no kubaninika pa mpunda, no kubwelela ku calo ca Egupti. Kabili, Mose asendele mu minwe yakwe inkonto ya kwa Lesa wa cine.+ 21 Kabili Yehova atile kuli Mose: “Ilyo waya no kufika ku Egupti ukacite ifipesha amano fyonse kuli Farao+ ifyo nkupeele amaka ya kucita. Lelo, nkaleka umutima wakwe ukutalama;+ kabili takaleke abantu baye.+ 22 Kabili ukatile kuli Farao, ‘E fyo Yehova asosele: “Israele mwana wandi umwaume, libeli lyandi.+ 23 Kabili ndeti kuli iwe: Leka umwana wandi umwaume ese amombele. Lelo nga wakaana ukumulekelako, mona ndeipaya umwana obe umwaume, ibeli lyobe.”’”+

24 Nomba pa cifulo ca kutubilishapo+ mu musebo e po Yehova akumene nankwe+ kabili alefwaya inshila ya kumwipailamo.+ 25 Asukile Sipora+ abuula ilibwe ilyakosa no kusembulula inkanda ya pa mpela iya ku bwaume+ iya mwana wakwe kabili alengele yakumya ku makasa yakwe e lyo atile: “Pantu uli shibwinga wa mulopa kuli ine.” 26 E lyo amulekele. E lyo Sipora atile: “Uli shibwinga wa mulopa,” pa mulandu wa kusembulula.

27 Yehova nomba aebele Aarone ati: “Kabiye ku kukumanya Mose mu matololo.”+ Awe aile no kumukumanya mu lupili lwa kwa Lesa wa cine+ no kumufyompa. 28 Awe Mose aebele Aarone fyonse ifyo Yehova, uwamutumine amwebele,+ ne fipesha amano fyonse ifyo amwebele ukucita.+ 29 Pa numa Mose na Aarone bailelonganika abakalamba bonse aba mu bana ba kwa Israele.+ 30 Kabili Aarone alandile amashiwi yonse ayo Yehova asosele kuli Mose,+ acitile ne fipesha amano+ mu menso ya bantu. 31 E lyo abantu bacetekele.+ Ilyo baumfwile ukuti Yehova napempula+ abana ba kwa Israele no kuti namona ukucula+ kwabo, e lyo bakonteme no kuwa ubukupeme.+

5 Kabili pa numa ya ifi Mose na Aarone baingile mu kati no kusosa kuli Farao abati:+ “E fyo Yehova, Lesa wa kwa Israele asosa, ‘Leka abantu bandi baye pa kuti bakayempangila umutebeto mu matololo.’”+ 2 Lelo Farao atile: “Nani uyo wine Yehova,+ uwa kuti ng’umfwe ishiwi lyakwe no kuleka Israele aye?+ Uyo Yehova ine nshamwishiba nakalya+ kabili nshaleke Israele aye.”+ 3 Lelo, bena bakonkenyepo ukusosa abati: “Lesa wa baHebere nalanda na ifwe.+ Tulefwaya ukuya mu matololo ulwendo lwa nshiku shitatu no kwipaila Yehova Lesa wesu ilambo;+ epali atwipaya ku cikuko nelyo ku lupanga.”+ 4 E lyo imfumu ya Egupti yabepwishe aiti: “Cinshi ico imwe babili Mose na Aarone mulelengela abantu ukuleka ukubomba imilimo?+ Bwelelenimo mu kusenda ifisendo fyenu!”+ 5 Kabili Farao akonkenyepo ukusosa ati: “Moneni! Aba bantu ba fye nabafula,+ kabili ni mwe mulelenga ukuti belasenda ifisendo fyabo.”+

6 Palya pene fye, bulya bwine bushiku, Farao aebele abalepatikisha abantu ukubomba, e lyo na bacilolo babo,+ ati: 7 “Tamufwile ukulonganika icani ca kupeela abantu ku kupangila injelwa+ nge fyo mwalecita. Balekeni abene baleya no kuilonganikila icani. 8 Kabili, pa mpendwa ya njelwa iyo balepanga kale, mubalundilepo. Mwibacefeshako iyo, pantu banang’ani.+ E co baleilishanishisha abati, ‘Tulefwaya ukuya, tulefwaya ukuyaipaila Lesa wesu ilambo!’+ 9 Lekeni babombeshe ukucilanapo kabili mwileka balekutika ku fya bufi.”+

10 Awe abalepatikisha abantu ukubomba+ e lyo na bacilolo babo baishile ku bantu no kubeba ati: “E fyo Farao atile, ‘Naleka ukumupeela icani. 11 Kabiyeni mwe bene, kaibuulileni icani konse uko mwalacisanga, pantu umulimo wenu tawacefiweko nakalya.’”+ 12 Awe abantu basalanganine mu calo conse ica Egupti ku kutoole cani no kuciputaula ku kupangamo injelwa. 13 Kabili abalebapatikisha ukubomba balebacincisha abati:+ “Pwisheni imilimo yenu, cila muntu apwishe umulimo wakwe, uwa bushiku no bushiku, nga filya fine cali ilyo pali icani.”+ 14 Pa numa bacilolo+ abena Israele, abo bakapitao ba kwa Farao basontele ukwangalila abena Israele banabo, balyuminwe,+ uku ninshi balebepusha abati: “Cinshi mushakumanishe mailo na lelo impendwa ya njelwa+ iyo bamupimina, filya mwalecita kale?”+

15 E lyo bacilolo+ ba bena Israele baingile mu kati no kutendeka ukulilila kuli Farao, abati: “Cinshi mulecitile fi ku babomfi benu?16 Takuli icani icilepeelwa ku basha benu lelo bena baleti kuli ifwe, ‘Pangeni injelwa!’ kabili ababomfi benu baleumwa, nelyo ca kuti bantu benu e baluba.”+ 17 Lelo Farao atile: “Mulecita fye ubunang’ani, mwe banang’ani mwe!+ E co mulesosela amuti, ‘Tulefwaya ukuya, tulefwaya ukuyaipaila Yehova ilambo.’+ 18 E ico nomba kabiyeni, kabombeni! Nangu ca kuti tabalemupeela icani, mufwile ukupanga injelwa shilya shine bamupimina.”+

19 E lyo bacilolo ba bena Israele bamwene ukuti ifintu fyababipila pa mashiwi babebele aya kuti:+ “Tamufwile nangu panono ukucefyako injelwa ukulingana ne cipimo ca muntu umo umo ica cila bushiku.”+ 20 Pa numa, basangile Mose na Aarone,+ nabeminina palya ukuti babakumanye ilyo balefuma kuli Farao. 21 Bashibamona fye batile kuli bena: “Shi Yehova aloleshe pali imwe babili no kumupingula,+ pantu mwalenga ifwe ukupatwa nga nshi+ kuli Farao na ku babomfi bakwe pa kupeela ulupanga mu minwe yabo ku kutwipaya.”+ 22 E lyo Mose apilibukile kuli Yehova+ no kutila: “Mwe Yehova, cinshi ico mwalengela ububi kuli aba bantu?+ Cinshi ico mwantumiine?+ 23 Pantu ukufuma pa nshita naingile kuli Farao ku kulandila mwi shina lyenu,+ alicita ububi kuli aba bantu,+ kabili na imwe tamwapokolola abantu benu nakalya.”+

6 E lyo Yehova atile kuli Mose: “Nomba uli no kumona ico nkacita kuli Farao,+ pantu pa mulandu wa kuboko kwandi ukwa maka akabaleka baye kabili pa mulandu wa kuboko kwandi ukwakosa akabapatikisha ukufuma mu calo cakwe.”+

2 Kabili Lesa akonkenyepo ukusosa kuli Mose no kutila: “Nine Yehova.+ 3 Ilyo nalemoneka kuli Abrahamu,+ kuli Isaki+ na kuli Yakobo,+ baishibe ukuti nine Lesa Wa Maka Yonse,+ lelo nshailengele ukwishibikwa+ kuli bena ukuti ishina lyandi nine Yehova.+ 4 Kabili napangene na bo ukubapeela icalo ca Kanaani, icalo ico baleikalamo.+ 5 Kabili ning’umfwa ukulilishika kwa bana ba kwa Israele,+ abo abena Egupti bateka ubusha, kabili naibukisha ne cipangano candi.+

6 “E ico sosa ku bana ba kwa Israele auti, ‘Nine Yehova, kabili ndi no kumulubula ku kutwikwa ifisendo fya bena Egupti no kumupokolola mu busha bamuteka,+ kabili nkamulubwila ku kuboko kwa maka na ku bupingushi bukalamba.+ 7 Kabili nkamubuula, mukaba abantu bandi+ na ine nkaba Lesa wenu;+ e lyo mukeshiba ukuti nine Yehova Lesa wenu uulemufumya mu busha bwa bena Egupti.+ 8 Kabili nkamuleta mu calo ico naimishepo ukuboko kwandi ilyo nalapile+ ukucipeela kuli Abrahamu, na kuli Isaki na kuli Yakobo; kabili nkacipeela kuli imwe ukuba icalo cenu.+ Nine Yehova.’”+

9 Pa numa Mose aebele abana ba kwa Israele aya mashiwi, lelo tabamumfwile pa mulandu wa kufuupulwa na pa mulandu wa busha ukukosa.+

10 E lyo Yehova asosele kuli Mose, ati:11 “Kabiye kuli Farao, imfumu+ ya Egupti, umwebe ukuti aleke abana ba kwa Israele bafume mu calo cakwe.”+ 12 Lelo, Mose asosele pa ntanshi ya kwa Yehova ati: “Moneni! Apo abana ba kwa Israele tabang’umfwa,+ bushe Farao ena akakutika shani kuli ine,+ ne ushilanda bwino?”*+ 13 Lelo Yehova akonkenyepo fye ukusosa kuli Mose na Aarone no kulandila muli bena icipope ku bana ba kwa Israele na kuli Farao, imfumu ya Egupti, ukuti abana ba kwa Israele bafume mu calo ca Egupti.+

14 Aba e bakalamba ba mikowa yabo: Abana baume ba kwa Rubene, ibeli+ lya kwa Israele, ni Hanoke na Palu, Hesrone na Karmi.+ Ishi e ndupwa sha kwa Rubene.+

15 Kabili abana ba kwa Simeone ni Yemuele na Yamini na Ohadi na Yakini na Sohari na Shauli umwana mwaume wa mwanakashi umwina Kanaani.+ Ishi e ndupwa sha kwa Simeone.+

16 Kabili aya e mashina ya bana baume ba kwa Lebi,+ ukulingana ne fyo bakonkene mu kufyalwa:+ Gershone na Kohati na Merari.+ Kabili imyaka Lebi ali no mweo yali umwanda umo na makumi yatatu na cinelubali (137).

17 Abana baume ba kwa Gershone ni Libna na Shimei,+ ukulingana ne ndupwa shabo.+

18 Kabili abana baume ba kwa Kohati ni Amramu na Isari na Hebrone na Usiele.+ Kabili imyaka Kohati ali no mweo yali umwanda umo na makumi yatatu na itatu (133).

19 Kabili abana baume ba kwa Merari ni Maali na Mushi.+

Ishi e ndupwa sha bena Lebi, ukulingana ne ntuntuko shabo.+

20 Nomba Amramu aupile Yokebede nkashi ya kwa wishi.+ Pa numa afyelemo Aarone na Mose.+ Kabili imyaka Amramu ali no mweo yali umwanda umo na makumi yatatu na cinelubali (137).

21 Kabili abana baume ba kwa Isari ni Kora+ na Nefege na Sikri.

22 Kabili abana baume ba kwa Usiele ni Mishaele na Elsafani na Sitri.+

23 Nomba Aarone aupile Elisheba umwana mwanakashi wa kwa Aminadabu, nkashi ya kwa Naashone.+ Na pa numa, afyelemo Nadabu na Abihu, Eleasari na Itamari.+

24 Kabili abana baume ba kwa Kora ni Asiri na Elkana na Abiasafi.+ Ishi e ndupwa sha bena Kora.+

25 Kabili Eleasari, umwana mwaume wa kwa Aarone,+ aupile umo pa bana banakashi ba kwa Putiele. Na pa numa, afyelemo Finehasi.+

Aba e bakalamba ba mu mukowa wa bena Lebi, ukulingana ne ndupwa shabo.+

26 Ulu e lupwa lwa kwa Aarone na Mose abo Yehova aebele ati:+ “Fumyeni abana ba kwa Israele mu calo ca Egupti ukulingana na mabumba yabo.”+ 27 E balelanda kuli Farao, imfumu ya Egupti, ku kufumya abana ba kwa Israele mu Egupti.+ Aba e Mose na Aarone.

28 Nomba mu bushiku Yehova alandile kuli Mose mu calo ca Egupti,+ 29 e mo Yehova akonkenyepo ukusosa kuli Mose ati: “Nine Yehova.+ Sosa kuli Farao imfumu ya Egupti fyonse ifyo ndesosa kuli iwe.” 30 E lyo Mose atile kuli Yehova: “Moneni! Nshilanda bwino, nga kanshi Farao kuti akutika shani kuli ine?”+

7 Na o Yehova atile kuli Mose: “Mona, nalenga iwe ukuba Lesa kuli Farao,+ kabili Aarone munonko akaba e kasesema obe.+ 2 Iwe—ni we ukasosa fyonse ifyo nkakweba;+ kabili Aarone munonko e ukalalanda kuli Farao,+ na Farao akaleka abana ba kwa Israele bakafume mu calo cakwe.+ 3 Na ine, nkaleka umutima wa kwa Farao ukutalama,+ kabili nkafusha ifishibilo fyandi ne fipesha amano fyandi mu calo ca Egupti.+ 4 Kabili Farao takakutike kuli imwe;+ na ine nkatambalikila ukuboko kwandi pa Egupti no kufumya amabumba yandi,+ abantu bandi,+ abana ba kwa Israele,+ mu calo ca Egupti ilyo nkaleta ubupingushi ubukalamba.+ 5 Kabili abena Egupti bakeshiba ukuti nine Yehova ilyo nkatambalika ukuboko kwandi pali Egupti,+ kabili nkafumya abana ba kwa Israele mu kati kabo.”+ 6 Awe Mose na Aarone bacitile ukulingana ne fyo Yehova abebele.+ Bacitile fye filya fine.+ 7 Kabili Mose ali ne myaka amakumi cinekonsekonse (80) na Aarone ali ne myaka amakumi cinekonsekonse na itatu (83) pa nshita balelanda kuli Farao.+

8 Yehova nomba atile kuli Mose na Aarone: 9 “Nga ca kutila Farao amweba ati, ‘Citeni icipesha amano ica kulanga amaka yenu,’+ ukebe Aarone auti, ‘Buula inkonto+ yobe no kuipoosa pa nshi pa cinso ca kwa Farao.’ Na yo ikasanguka insoka iikalamba.”+ 10 Awe Mose na Aarone baileingila kuli Farao no kucita filya fine fye Yehova asosele. Na Aarone apoosele pa nshi inkonto yakwe pa cinso ca kwa Farao na babomfi bakwe kabili yasangwike insoka iikalamba. 11 Lelo, Farao na o aitile aba mano na ba finjelengwe;+ kabili bashimapepo aba finjelengwe aba mu Egupti na bo bacitile cimo cine ku finjelengwe fyabo.+ 12 Awe cila muntu apoosele pa nshi inkonto yakwe, na sho shasangwike insoka ishikalamba; lelo inkonto ya kwa Aarone yaminine inkonto shabo. 13 Na lyo line, umutima wa kwa Farao wali fye uwatalama,+ kabili takutike kuli bena, nga mulya mwine fye Yehova asoseele.

14 E lyo Yehova atile kuli Mose: “Umutima wa kwa Farao nautalama.+ Nakaana ukuleka abantu baye.+ 15 Ukaye kuli Farao ulucelo. Mona! Akaya ku menshi!+ Na iwe ukeminine palya mukakumanina mu lulamba lwa Mumana wa Naelo,+ kabili ukasende mu minwe yobe inkonto iyasangwike insoka.+ 16 E lyo ukamwebe auti, ‘Yehova Lesa wa baHebere nantuma kuli iwe,+ ukuti nkwebe ati: “Leka abantu bandi baye pa kuti bakamombele mu matololo,”+ lelo iwe ucili taulaumfwa ukufika na nomba. 17 Yehova atila:+ “Kuli ci e ko walaishibila ukuti nine Yehova.+ Mona ndeuma amenshi ya mu Mumana wa Naelo+ ku nkonto iili mu minwe yandi, na yo yala-aluka umulopa.+ 18 Ne sabi ilya mu Mumana wa Naelo lyalafwa,+ no Mumana wa Naelo walanunka piipi,+ kabili abena Egupti tabafwaye nangu panono ukunwa amenshi mu Mumana wa Naelo.”’”+

19 E lyo Yehova atile kuli Mose: “Sosa kuli Aarone auti, ‘Buula inkonto yobe no kutambalika ukuboko kobe+ pa menshi ya mu Egupti, pa mimana yabo, pa menshi ya mu tumifoolo utwafuma mu mumana wa Naelo na pa fishiba+ fyabo na pa menshi yabo yonse ayo basunga, pa kuti yasanguke umulopa.’ Kabili mu calo conse ica Egupti na mu fipe fya kusungilamo amenshi ifya fimuti na mu fipe fya kusungilamo amenshi ifya mabwe mukaba umulopa.” 20 Ilyo line fye Mose na Aarone bacitile ifyo fine,+ mulya mwine Yehova alandiile,+ kabili aimishe inkonto no kuuma pa menshi ya mu Mumana wa Naelo ninshi Farao na babomfi bakwe balemonako,+ na menshi yonse aya mu Mumana wa Naelo ya-alwike umulopa.+ 21 Ne sabi ilyali mu Mumana wa Naelo lyalifwile,+ kabili Umumana wa Naelo watendeke ukununka; na bena Egupti bafililwe ukunwa amenshi mu Mumana wa Naelo;+ kabili mu calo conse ica Egupti mwali umulopa.

22 Lelo, bashimapepo ba finjelengwe aba mu Egupti na bo bacitile cimo cine ku finjelengwe fyabo;+ ne ci calengele ukuti umutima wa kwa Farao utwalilile fye ukutalama,+ kabili takutike kuli Mose na Aarone, nga mulya mwine Yehova alandiile.+ 23 Awe Farao alipilibwike no kuyaingila mu ng’anda yakwe, kabili ici na co cine tacibikile ku mutima wakwe.+ 24 Na bena Egupti bonse baile baleimba mu lulamba lwa Mumana wa Naelo ku kufwaya amenshi ya kunwa, pantu bafililwe ukunwa amenshi mu Mumana wa Naelo.+ 25 Kabili inshiku cinelubali (7) shalikumene ukutula apo Yehova aumiine Umumana wa Naelo.

8 E lyo Yehova atile kuli Mose: “Ingila kuli Farao, kabili umwebe ukuti, ‘E fyo Yehova atila: “Leka abantu bandi baye ku kumombela.+ 2 Kabili nga watwalilila fye ukukaana ukuti beya, mona ndeleta bacula abengi mu calo cobe conse.+ 3 Kabili mu Mumana wa Naelo mukaba bacula abengi nga nshi, kabili bakafuma mu mumana no kwingila mu ng’anda yobe na mu muputule obe uwa kulaalamo, bakanina na pa busanshi bobe, bakengila na mu mayanda ya babomfi bobe, kabili bakaba mu bantu bobe na mu fitofu fya kupangilamo umukate, na mu fya kukashilamo umufuba fyobe.+ 4 Na pali iwe na pa bantu bobe na pa babomfi bobe bonse bacula bakesapo.”’”+

5 Pa numa Yehova atile kuli Mose: “Sosa kuli Aarone, auti, ‘Tambalika ukuboko kobe ne nkonto+ yobe pa mimana, pa tumifoolo utwafuma mu mumana wa Naelo na pa fishiba no kulenga bacula bafume baye mu calo ca Egupti.’” 6 E lyo Aarone atambike ukuboko kwakwe pa menshi ya mu Egupti, kabili bacula batendeke ukufuma no kukupa icalo ca Egupti. 7 Lelo, bashimapepo ba finjelengwe na bo bacitile cimo cine ku finjelengwe fyabo kabili balengele bacula ukufuma no kuya mu calo ca Egupti.+ 8 Asukile Farao aita Mose na Aarone no kutila: “Papaata kuli Yehova+ ukuti afumye bacula pali ine na pa bantu bandi, apo ndefwaya ukuleka abantu bakayeipaila Yehova ilambo.”+ 9 E lyo Mose atile kuli Farao: “Mukwai ni mwe munjebe ilyo nkamupapaatila no kupapaatilako ababomfi benu na bantu benu pa kuti bacula bafume pali imwe na mu mayanda yenu. Lelo bakashala fye mu Mumana wa Naelo.” 10 E lyo atile: “Mailo.” Na o atile: “Nacikabe ukulingana ne fyo mwasosa, pa kuti mwishibe ukuti takwaba nangu umo uwaba nga Yehova Lesa wesu,+ 11 pantu bacula ukufuma bakafuma pali imwe na mu mayanda yenu na pa babomfi benu na pa bantu benu. Bakashala fye mu Mumana wa Naelo.”+

12 E lyo Mose na Aarone bafumine kuli Farao, kabili Mose aliliile kuli Yehova+ pa mulandu wa bacula abo abikile pali Farao. 13 Na Yehova acitile ukulingana ne fyasosele Mose,+ kabili bacula batendeke ukufwa mu mayanda, mu mansa na mu mpanga. 14 Kabili babatuulike imiina ne miina, ne calo catendeke ukununka.+ 15 Ilyo Farao amwene ukuti ifintu fyabako eyefilya, alekele umutima wakwe ukutalama;+ kabili tabomfwile, nga mulya mwine Yehova asoseele.+

16 Yehova nomba atile kuli Mose: “Sosa kuli Aarone auti, ‘Tambalika inkonto+ yobe no kuuma pa lukungu lwa pa mushili, na lo lwalasanguka ifisumi mu calo ca Egupti conse.’” 17 Awe na bo bacitile ifyo fine. E ico Aarone atambalike ukuboko kwakwe ne nkonto yakwe no kuuma pa lukungu lwa pa mushili, kabili ifisumi fyaishile pa bantu na pa nama. Ulukungu lonse ulwa pa mushili lwasangwike ifisumi mu calo ca Egupti conse.+ 18 Kabili bashimapepo ba finjelengwe baeseshe ukucita cimo cine ku finjelengwe fyabo,+ pa kuti bapangilepo ifisumi, lelo balifililwe.+ Kabili ifisumi fyali pa bantu na pa nama. 19 E lyo bashimapepo ba finjelengwe batile kuli Farao: “Munwe+ wa kwa Lesa!”*+ Lelo umutima wa kwa Farao watwalilile ukuba uwatalama,+ kabili tabomfwile, nga mulya mwine Yehova asoseele.

20 E lyo Yehova atile kuli Mose: “Ucelele ulucelo no kwiminina ku cinso ca kwa Farao.+ Mona! Alefuma ukuya ku menshi! Kabili utile kuli ena, ‘E fyo Yehova asosa: “Leka abantu bandi baye ku kumombela.+ 21 Lelo nga tawabaleke baye, mona ndetuma pali iwe na pa babomfi bobe na pa bantu bobe na mu mayanda yobe ifipobe;+ kabili amayanda ya bena Egupti yakesulamo fye ifipobe, e lyo na pa mushili wine uo bekalapo. 22 Kabili muli bulya bushiku nkalenga impanga ya Goshene iyo abantu bandi baikalamo ukupaatukako, ukuti kwiba icipobe nangu cimo;+ pa kutila wishibe ukuti nine Yehova mu kati ka calo.+ 23 Kabili nkapakula umupaka pa kati ka bantu bandi na bantu bobe.+ Mailo e lyo kukaba ici cipesha amano.”’”

24 Kabili e fyo Yehova acitile; ne fipobe ifingi nga nshi fyatendeke ukwingila mu ng’anda ya kwa Farao na mu mayanda ya babomfi bakwe na mu calo conse ica Egupti.+ Icalo calyonaike pa mulandu wa fipobe.+ 25 Mu kulekelesha Farao aitile Mose na Aarone no kutila: “Kabiyeni, kepaileni Lesa wenu ilambo muli cino cine calo.”+ 26 Lelo Mose atile: “Teti tucite fyo, pantu kuti twapeela Yehova Lesa wesu ilambo icintu ica bunani ku bena Egupti.+ Nomba nga ca kuti ilambo twatuula lya bunani ku bena Egupti kabili twacitila mu menso yabo; bushe tabakatupoole amabwe?27 Tuli no kuya ulwendo lwa nshiku shitatu mu matololo kabili tukepaila Yehova Lesa wesu ilambo nga filya fine fye asosele kuli ifwe.”+

28 E lyo Farao atile: “Nalamuleka muye,+ kabili mukayaipaila Yehova Lesa wenu ilambo mu matololo.+ Lelo mwikaya fye ukutali sana. Mpapaatilako.”+ 29 Na Mose atile: “Moneni ndefuma kuli imwe, kabili nalapapaata Yehova, ne fipobe fikafuma pali Farao, na pa babomfi bakwe na pa bantu bakwe mailo. Cikulu fye Farao ekabwekeshapo ukubepa no kukanaleka abantu baye ku kwipaila Yehova ilambo.”+ 30 Na pa numa Mose afumine kuli Farao no kuyapapaata Yehova.+ 31 Na o Yehova acitile ukulingana ne fyo Mose asosele,+ kabili ifipobe fyafumine pali Farao, na pa babomfi bakwe na pa bantu bakwe.+ Tapashele nangu cimo. 32 Lelo, Farao alekele umutima wakwe ukutalama na uno muku kabili talekele abantu baye.+

9 Yehova na o atile kuli Mose: “Kabiye kuli Farao no kumweba ukuti,+ ‘E fyo Yehova Lesa wa baHebere atila: “Leka abantu bandi baye ku kumombela. 2 Lelo nga wakonkanyapo ukubakanya ukuya kabili watwalilila fye ukubalesha,+ 3 mona! ukuboko+ kwa kwa Yehova kuleisa pa fitekwa+ fyobe ifili mu mpanga. Pali bakabalwe, pa mpunda, pa ngamila, pa ng’ombe na pa mpaanga pakaba icikuko icabipa nga nshi.+ 4 Kabili Yehova akapaatulula ifitekwa fya kwa Israele ne fya bena Egupti, kabili takwakabe nangu cimo pali fyonse ifya bana ba kwa Israele icikafwa.”’”+ 5 Kabili, Yehova alingile inshita cali no kucitikilapo, ati: “Mailo e lyo Yehova akacita ici cintu mu calo.”+

6 Awe Yehova acitile ici cintu ubushiku bwakonkelepo, kabili ifitekwa fyonse ifya mu Egupti fyatendeke ukufwa;+ lelo pa fitekwa fya bana ba kwa Israele tapafwile nangu cimo. 7 E lyo Farao atumine bamo ku kumona, kabili, moneni! tapafwilepo icitekwa ca bena Israele nangu fye cimo. Na lyo line, umutima wa kwa Farao watwalilile fye ukutalama,+ kabili talekele abantu baye.

8 E lyo Yehova atile kuli Mose na Aarone: “Buuleni imito ya mu citofu+ iya kwisula mu ndupi shenu shibili, kabili Mose aipoose mu muulu ninshi Farao alemonako. 9 Na yo ikasanguka ulufukutu pa calo conse ica Egupti, kabili ikasanguka utupute utwa kupuukauka imyoco+ pa bantu na pa nama mu calo conse ica Egupti.”

10 Awe babuulile imito ya mu citofu no kwiminina pa cinso ca kwa Farao, na Mose aipoosele mu muulu, kabili yasangwike utupute twa kupuukauka imyoco+ pa bantu na pa nama. 11 Na bashimapepo ba finjelengwe bafililwe ukuyamonekela kuli Mose pa mulandu wa tupute, pantu utupute twali pali bashimapepo ba finjelengwe na pa bena Egupti bonse.+ 12 Lelo Yehova alekele umutima wa kwa Farao ukutalama, na o tabomfwile, nga mulya mwine fye Yehova asoseele kuli Mose.+

13 E lyo Yehova atile kuli Mose: “Celela ulucelo no kwiminina ku cinso ca kwa Farao,+ utile, ‘E fyo Yehova Lesa wa baHebere atila: “Leka abantu bandi baye ku kumombela.+ 14 Pantu uno muku ndetuma ifinkunka fyandi fyonse kuli iwe na ku babomfi bobe na ku bantu bobe, pa kuti wishibe ukuti takwaba uwaba nga ine pano isonde ponse.+ 15 Pantu ukufika nomba nga nalitambalika ukuboko kwandi no kuuma iwe na bantu bobe ku cikuko kabili nga walifuma pe sonde.+ 16 Lelo, ni pali ici nakulekela ukuba no mweo,+ pa kuti umone amaka yandi kabili pa kuti ishina lyandi lishibikwe mu calo conse.+ 17 Bushe ucili uleituumika pa bantu bandi no kukanaleka baye?+ 18 Mona, mailo nga ino ine nshita nkalosha imfula ya mabwe iikalamba, iya kuti takwatala akuba iyaba nge yi mu calo ca Egupti ukutula pa bushiku icalo ca Egupti catendekele ukufika na nomba.+ 19 E ico nomba tuma aba kuyaeba ababomfi bobe ukuti batwale ifitekwa fyobe fyonse na conse icobe icili mu mpanga umwa kuuba. Kumfwa ku muntu onse ne nama ifikasangwa pa nse, imfula ya mabwe+ ikafiloka, kabili fikafwa.”’”

20 Onse uwatiinine amashiwi ya kwa Yehova pa babomfi ba kwa Farao alengele ababomfi bakwe ne fitekwa fyakwe ukubutukila mu mayanda,+ 21 lelo uushabikile amashiwi ya kwa Yehova mu mutima wakwe alekele ababomfi bakwe ne fitekwa fyakwe mu mpanga.+

22 Nomba Yehova atile kuli Mose: “Tambalika ukuboko+ kobe ukulola mu muulu, pa kuti imfula ya mabwe+ iloke pa calo ca Egupti conse, pa muntu ne nama na pa fimenwa fyonse ifya mu mpanga mu calo ca Egupti.” 23 Awe Mose atambike inkonto yakwe ukulola mu muulu; e lyo Yehova atumine ukupanta kwa nkuba ne mfula ya mabwe,+ no mulilo walapona pa nshi, kabili Yehova aloseshe imfula ya mabwe pa calo ca Egupti. 24 Awe kwali imfula ya mabwe, no mulilo uwalebyata mu mfula ya mabwe. Yali iikalamba nga nshi, ica kuti takwatala akuba iyaba nge yi mu calo conse ca Egupti ukutula ilyo cabele uluko.+ 25 Kabili imfula ya mabwe yapumine icalo conse ica Egupti. Imfula ya mabwe yaonawile conse icali mu mpanga, abantu ne nama, e lyo no musango onse uwa cimenwa ca mu mpanga; kabili yawishishe imiti yonse iya mu mpanga.+ 26 Mu mpanga fye ya Goshene, umo abana ba kwa Israele bali, e mushali imfula ya mabwe.+

27 Awe Farao atumine aba kuyaita Mose na Aarone no kubeba ukuti: “Nimembuka uno muku.+ Yehova mulungami,+ kabili ine na bantu bandi natuluba. 28 Papaateni Yehova ukuti ukupanta kwa kwa Lesa ne mfula ya mabwe fileke pantu fyafula.+ Na ine nalaleka muye, kabili tamwakokole.” 29 Na o Mose amwebele ukuti: “Ilyo fye nafuma mu musumba nalaimya amaboko yandi kuli Yehova.+ Ukupanta kwalaleka kabili imfula ya mabwe tayakonkanyepo ukuloka, pa kuti mwishibe ukuti isonde lya kwa Yehova.+ 30 Lelo imwe na babomfi benu, ninjishiba kale ukuti na lyo line tamwatiine pa mulandu wa kwa Yehova Lesa.”+

31 Kabili, kolokondwe na barle fyalyonawike, pantu barle alifumishe imitwe na kolokondwe alifumishe intombo.+ 32 Lelo ingano ne ngano shapapa+ tafyaonawilwe, pantu fyali tafilapakula. 33 Mose nomba afumine mu musumba kuli Farao no kusumbwila amaboko yakwe kuli Yehova, e fyo no kupanta ne mfula ya mabwe fyaile fileleka ne mfula na yo yalilekele ukuloka.+ 34 Ilyo Farao amwene ukuti imfula ne mfula ya mabwe no kupanta fyaleka, abwekeshepo ukubembuka no kulenga umutima wakwe ukutalama,+ ena na babomfi bakwe. 35 Kabili umutima wa kwa Farao watwalilile ukutalama, kabili talekele abana ba kwa Israele baye, nga mulya mwine Yehova alandiile muli Mose.+

10 E lyo Yehova atile kuli Mose: “Kabiye kuli Farao, pantu ine—ninenga umutima wakwe ne mitima ya babomfi bakwe ukutalama,+ pa kuti ncite ifi fipesha amano ku cinso cakwe,+ 2 na pa kuti ukebe abana bobe na bana ba bana bobe ifyo nakanda Egupti ne fipesha amano ifyo nacita pali bena;+ e lyo mukeshiba ukuti nine Yehova.”+

3 Awe Mose na Aarone baingile kuli Farao no kumweba ati: “E fyo Yehova Lesa wa baHebere asosa, ‘Kufika lilali ulekaana ukunakila?+ Leka abantu bandi baye pa kuti bakamombele. 4 Pantu nga watwalilila ukukaanya abantu bandi ukuti baye, mona mailo nkaleta makanta mu calo cobe.+ 5 Kabili akakupa umushili ica kuti tawakamoneke; kabili akalya fyonse ifyapuswike, ifyo imfula ya mabwe yashile, kabili akalya ne fimuti fyonse ifilepuuka mu mpanga.+ 6 Kabili amayanda yenu na mayanda ya babomfi benu bonse na mayanda ya mu Egupti yonse yakesulamo makanta uwa kuti bashinwe na bashibo ba bashinwe tabamwene ukutula pa bushiku bwa kubapo kwabo pe sonde ukufika kuli buno bushiku.’”+ E lyo ayalwike no kufuma kuli Farao.+

7 Pa numa ababomfi ba kwa Farao batile kuli ena: “Kufika lilali uyu muntu alaba iciteyo kuli ifwe?+ Lekeni aba bantu baye ukuti babombele Yehova Lesa wabo. Bushe tamulaishiba na nomba ukuti icalo ca Egupti naconaika?”+ 8 Awe babwekeshemo Mose na Aarone kuli Farao, na o abebele ati: “Kabiyeni, kabombeleni Yehova Lesa wenu.+ Ni bani maka maka baleya?” 9 E lyo Mose atile: “Tukaya na bana besu na bakote besu. Tukaya na bana besu abaume na bana besu abanakashi,+ ne mpaanga shesu ne ng’ombe shesu,+ pantu tuli no kucitila Yehova umutebeto.”+ 10 Na o atile kuli bena: “Ine nga naleka muye pamo no twana twenu ninshi cine cine Yehova aba na imwe!+ Moneni, pali ububi mulepanga mu mitima yenu.+ 11 Nshasuminishe imwe bonse ukuya! Nalasuminisha fye mwe baume beka beka, pantu ni mwe mulefwaya ukuyabombela Yehova.” E lyo babatamfishe pa cinso ca kwa Farao.+

12 Yehova nomba aebele Mose ati: “Tambalika+ ukuboko kobe pa calo ca Egupti pa kuti makanta ese, pa kuti ese pa calo ca Egupti no kulya ifimenwa fyonse pa calo, fyonse ifyo imfula ya mabwe yashile.”+ 13 Ilyo line fye Mose atambalike inkonto yakwe pa calo ca Egupti, na Yehova alengele umwela+ wa ku kabanga ukupuupa pa calo akasuba konse no bushiku bonse. Ilyo bwacele, umwela wa ku kabanga waletele makanta. 14 Awe makanta aishile pa calo conse ica Egupti kabili awile mu mupaka onse uwa Egupti.+ Alyafishe.+ Tabatalile abamonapo makanta uwaba ngo yu, kabili takwakabe uukaba ngo yu. 15 Kabili akupile umushili onse uwa mu calo,+ ne calo califiitile kuli makanta;+ kabili aile alelya ifimenwa fyonse ifya mu calo ne fisabo fyonse ifya ku miti ifyo imfula ya mabwe yashile;+ kabili takwashele ibula nangu limo ku fimuti nelyo ku fimenwa fya mu mpanga mu calo conse ica Egupti.+

16 E ico Farao ayangufyenye ukwita Mose na Aarone no kutila: “Nimembukila Yehova Lesa wenu pamo na imwe bene.+ 17 Ale nomba, shi njelela+ ulubembu lwandi uno wine fye umuku kabili papaateni+ Yehova Lesa wenu ukuti afumye pali ine ici cinkunka cabipa.” 18 Awe Mose afumine kuli Farao no kuyapapaata Yehova.+ 19 E lyo Yehova ayalwile umwela wa ku kabanga uwakosa icine cine, na o wasendele makanta no kumuulwila muli Bemba Wakashika. Tamwashele makanta nangu umo mu calo conse ica Egupti. 20 Lelo, Yehova alekele umutima wa kwa Farao ukutalama,+ na o talekele abana ba kwa Israele baye.

21 E lyo Yehova atile kuli Mose: “Tambalika ukuboko kobe mu muulu,+ ukuti pa calo ca Egupti pabe imfifi, imfifi iyafiita fititi.” 22 Awe ilyo line fye Mose atambalike ukuboko kwakwe mu muulu, kabili imfifi iyafiita fititi yaishile pa calo conse ica Egupti pa nshiku shitatu.+ 23 Tabalemonana, kabili takwali nangu umo uwafumine pa cifulo aali pa nshiku shitatu; lelo ukwaleikala abena Israele bonse kwali ulubuuto.+ 24 E lyo Farao aitile Mose no kutila: “Kabiyeni, kabombeleni Yehova.+ Impaanga shenu ne ng’ombe shenu fyena fyalashala. Abana benu na bo kuti baya nenu.”+ 25 Lelo Mose atile: “Ni mwe mukatupeela inama sha kupeela ilambo ne sha mituulo ya koca, pantu tufwile ukufipeela kuli Yehova Lesa wesu.+ 26 Ne fitekwa fyesu na fyo tukaya na fyo.+ Takwakashale nangu cimo, pantu pali ifi e po tukabuula fimo ukuti tukapepe Yehova Lesa wesu,+ kabili ifwe tatwishibe isho tukapeela pa kupepa kuli Yehova tukasuke atufika kulya kuntu.”+ 27 Apa na po Yehova alekele umutima wa kwa Farao ukutalama, kabili tabalekele baye.+ 28 E lyo Farao amwebele ati: “Fuma pano!+ Ucenjele! Wikesha ukumona icinso candi na kabili, pantu mu bushiku ukamona icinso candi ukafwa.”+ 29 Mose na o atile: “Nacibe ifyo fine mwasosa. Nshakabwekeshepo ukumona icinso cenu na kabili.”+

11 Kabili Yehova atile kuli Mose: “Kushele icinkunka cimo ico nalaleta pali Farao na pali Egupti. Na pa numa akaleka muye mufume pano.+ Pa nshita akamuleka muye, akamupatikisha fye ukufuma pano.+ 2 E ico nomba, eba abantu ukuti umwaume onse alombe ku mubiye no mwanakashi onse na o alombe ku mubiye ifipe fya silfere ne fipe fya golde.”+ 3 Awe Yehova na o alengele aba bantu ukutemwikwa ku bena Egupti.+ Mose na o ali muntu umucindami nga nshi mu calo ca Egupti, mu menso ya babomfi ba kwa Farao na mu menso ya bantu.+

4 Kabili Mose akonkenyepo ukusosa ati: “E fyo Yehova asosa, ‘Mupepi ne nshita ya bushiku pa kati ndefuma no kwingila mu kati ka Egupti,+ 5 kabili ibeli+ lyonse ilya mu calo ca Egupti lilefwa, ukutampila pe beli lya kwa Farao, uwikele pa cipuna cakwe ica bufumu, ukufika na kwi beli lya mubomfi mwanakashi uuli ku mpelo, ne beli lyonse ilya nama.+ 6 Kabili mu calo conse ica Egupti mukaba ukuloosha ukukalamba, ukushatala akubako, kabili ukushakatale akubako na kabili.+ 7 Lelo mu bana bonse aba kwa Israele nangu ni mbwa tayakabose umuntu nangu icinama;+ pa kuti mukeshibe ukuti ifyo Yehova acita ku bena Egupti filapusanako ne fyo acita ku bana ba kwa Israele.’+ 8 Kabili ababomfi benu bonse aba bakesa kuli ine no kuwa ubukupeme kuli ine,+ abati, ‘Kabiyeni, iwe na bantu bonse abakonka mu nkasa shobe.’ Kabili pa numa e lyo nkafuma.” E fyo Mose afumine kuli Farao ninshi nakalipa icine cine.

9 E lyo Yehova atile kuli Mose: “Farao takomfwe kuli imwe,+ pa kutila ifipesha amano fyandi fikafule mu calo ca Egupti.”+ 10 Kabili Mose na Aarone bacitile fyonse fi ifipesha amano ku cinso ca kwa Farao;+ lelo Yehova aleleka umutima wa kwa Farao ukutalama, ica kuti talekele abana ba kwa Israele baye bafume mu calo cakwe.+

12 Yehova nomba asosele kuli Mose na kuli Aarone mu calo ca Egupti ati: 2 “Uno mweshi ukaba mweshi wa ntanshi uwa myeshi kuli imwe. Ukaba kuli imwe uwa ntanshi ku myeshi ya mu mwaka.+ 3 Soseni ku lukuta lonse ulwa bena Israele, amuti, ‘Pa bushiku bwe kumi (10) ubwa mweshi uno cila muntu akabuule impaanga+ imo ukulingana na mayanda ya fikolwe fyabo, cila ng’anda impaanga imo. 4 Lelo nga ca kuti aba mu ng’anda imo impaanga yabakulila sana, e lyo uyo muntu no mwina mupalamano wakwe, uwikala mupepi ne ng’anda yakwe, bakailiile mu ng’anda yakwe ukulingana ne mpendwa ya bantu; mukakanye impaanga ukulingana ne miliile ya muntu umo umo. 5 Iyo impaanga ikabe iituntulu,+ iilume, iya mwaka umo.+ Kuti mwabuula umwana wa mpaanga nelyo umwana wa mbushi. 6 Kabili mumusunge ukufika ubushiku bwe kumi na shine (14) ubwa uno wine mweshi,+ kabili ulukuta lonse ulwa kwa Israele lukamwipaye pa cungulo cinono.+ 7 Kabili bakabuulepo umulopa no ku-usansa pa nceshi shibili isha pa mwinshi na pa mwalo wa pa mwinshi uwa ku mayanda ayo bakaliilamo.+

8 “‘Kabili pali ubu bwine bushiku e po bakalye umunofu wa iko mu nshita ya bushiku.+ Bakalye uwaocewa pa mulilo pamo no mukate uushatutumuka+ ne misalu iyalula.+ 9 Te kwesha ukulya umunofu uubishi nelyo uwabilaushiwa, uwaipikwa, kano uwaocewa pa mulilo. Kabili te kwesha ukulya umutwe wa iko na molu ya iko e lyo ne fya mu mala fya iko. 10 Kabili mwikashapo ukufika ulucelo, lelo nga yashalapo ukufika ulucelo mukayoce mu mulilo.+ 11 Ifi e fyo mukalelya, ninshi namukaka na mu misana yenu,+ namufwala ne ndyato+ ku makasa yenu ne nkonto yenu ili mu minwe yenu; kabili mukalelya lubilo lubilo. Ca kucilila ca kwa Yehova.+ 12 Kabili nalapita mu calo ca Egupti buno bushiku+ no kwipaya ibeli lyonse mu calo ca Egupti, amabeli ya bantu na ya nama;+ kabili nkakanda tulesa tonse utwa mu Egupti.+ Nine Yehova.+ 13 Kabili umulopa uleba icishibilo cenu pa mayanda umo muli; kabili ilyo namona umulopa, nalamucilila,+ ne cinkunka tacaise pali imwe ku kumonaula ilyo nalakanda icalo ca Egupti.

14 “‘Kabili muleibukisha buno bushiku, kabili mulebusefya ngo mutebeto kuli Yehova mu nkulo shenu shonse. Cipope ca muyayaya, mulebusefya. 15 Inshiku cinelubali (7) mwakulalya umukate uushatutumuka. Pa bushiku bwa ntanshi mulefumya umufuba umuli icitutumushi mu mayanda yenu, pantu onse uwalya icatutumuka, pa bushiku bwa ntanshi ukufika ku bwalenga cinelubali,+ uyo muntu akepaiwe muli Israele.+ 16 Kabili pa bushiku bwa ntanshi e po mwakulalongana ukulongana kwa mushilo, na pa bwalenga cinelubali (7) ukulongana kwa mushilo.+ Takuli umulimo ulingile ukubombwamo pali ishi nshiku.+ Kano fye ico umuntu onse alekabila ukulya, e mulimo fye weka uo mwingabomba.+

17 “‘Kabili mulesunga umutebeto wa mikate iishatutumuka,+ pantu pali buno bushiku e po nalafumya amabumba yenu mu calo ca Egupti. Na imwe mulesunga buno bushiku mu nkulo shenu shonse ukuti bube icipope ca muyayaya. 18 Mu mweshi wa ntanshi, pa bushiku bwe kumi na shine (14) ubwa uyo mweshi, mu nshita ya cungulo mukalelya imikate iishatutumuka ukufika ku bushiku bwalenga amakumi yabili na bumo (21) ubwa uyo mweshi mu cungulo.+ 19 Mwikasangwa umufuba uwatutumuka mu mayanda yenu pa nshiku cinelubali (7), pantu onse uwalya icatutumuka, nangu mulebeshi nelyo umwana calo,+ uyo muntu akepaiwe mu lukuta lwa kwa Israele.+ 20 Mwilalya conse icatutumuka. Konse uko mwakulaikala mukalelya imikate iishatutumuka.’”

21 Apo pene fye Mose aitile abakalamba bonse aba kwa Israele+ no kusosa kuli bena ati: “Buuleni no kusenda impaanga ne mbushi ukulingana ne ndupwa shenu, no kwipaya iya pa ca kucilila.+ 22 Kabili mubuule ne cipo ca esobu+ no kucitumpika mu mulopa uuli mu mbale no kusansa umulopa uuli mu mbale pa mwalo wa mwinshi na pa nceshi shibili; kabili umuntu nangu umo efuma pa mwinshi wa ng’anda yakwe mpaka ulucelo. 23 Nomba ilyo Yehova alapita ku kulofya abena Egupti kabili nga amona umulopa pa mwalo wa mwinshi na pa nceshi shibili, Yehova alacilila uyo mwinshi, kabili taleke uboni ukwisa mu mayanda yenu ku kumulofya.+

24 “Kabili mukalekonka ici icipope+ imwe na bana benu umuyayaya.+ 25 Kabili ilyo mwaingila mu calo ico Yehova akamupeela, nga mulya mwine asoseele, e lyo mukaleibukisha ici cintu.+ 26 Kabili ilyo abana benu bakamwipusha abati, ‘Nge fi mulecita e finshi?’+ 27 e lyo mukatile, ‘Lilambo lya ca kucilila kuli Yehova,+ uwacilile amayanda ya bana ba kwa Israele mu Egupti ilyo aipeye abena Egupti, lelo apokolwele aba mu mayanda yesu.’”

E lyo abantu bakonteme no kuwa ubukupeme.+ 28 Awe abana ba kwa Israele baile no kucita filya fine Yehova aebele Mose na Aarone.+ Bacitile filya fine fye.

29 Kabili ilyo ubushiku bwafikile pa kati Yehova aipeye ibeli lyonse mu calo ca Egupti,+ ukutendekela pe beli lya kwa Farao uwaikala pa cipuna cakwe ica bufumu ukufika kwi beli lya musha uwali mu cifungo, ne beli lyonse ilya cinama.+ 30 Awe Farao alimine ubushiku, pamo na babomfi bakwe bonse na bena Egupti bonse; kabili mu bena Egupti mwaishileba imisowa iikalamba,+ pantu takwali ing’anda umushali uwafwile. 31 Apo pene fye aitile+ Mose na Aarone ubushiku no kutila: “Imeni, fumeni mu bantu bandi, imwe na bana ba kwa Israele, kabili kabiyeni, kabombeleni Yehova, nga mulya mwine mwasoseele.+ 32 Sendeni impaanga shenu ne ng’ombe shenu, nga mulya mwine mwasoseele,+ no kuya. Kabili, mumpaaleko na ine.”

33 Kabili abena Egupti batendeke ukucincisha abantu ukuti babaleke baye bafume bwangu+ mu calo, batile, “pantu bonse tuli nga bafwa!”+ 34 Awe abantu basendele umufuba wabo ilyo wali taulatutumuka, pamo ne fya kukandilamo fyabo ninshi nabafikaka mu nsalu shabo pa mabeya yabo. 35 Kabili abana ba kwa Israele bacitile ukulingana ne fyo Mose abebele pantu baile balelomba ku bena Egupti ifipe fya silfere ne fipe fya golde ne fya kufwala.+ 36 Kabili Yehova alengele aba bantu ukutemwikwa ku bena Egupti,+ na bo babapeele ifyo balombele;+ awe basendele ifipe fya bena Egupti.+

37 Kabili abana ba kwa Israele balimine no kufuma ku Raamsese+ ukuya ku Sukote,+ abale-enda pa nshi bali abaume bene bene amakana imyanda mutanda (600,000), e lyo na bana abanono.+ 38 Na bantu abengi nga nshi abashali bena Israele+ baile na bo, pamo ne mpaanga ne ng’ombe, ifitekwa ifingi nga nshi. 39 Kabili umufuba uo bafumishe mu Egupti bapangilemo imikate, imikate iishatutumuka, pantu wali taulatutumuka, pantu batamfiwe mu Egupti kabili bafililwe ukushingashinga kabili tabaipekanishishe ifya kulya fya pa bulendo.+

40 Kabili inshita yonse iyo abana ba kwa Israele baikele monse umo baikele,+ ukubikako ne yo baikele mu Egupti,+ yali imyaka imyanda ine na makumi yatatu (430).+ 41 Kabili ilyo imyaka imyanda ine na makumi yatatu (430) yapwile, pali ubu bwine bushiku e po amabumba ya kwa Yehova yonse yafumine mu calo ca Egupti.+ 42 Bushiku bwa kwibukisha ifyo Yehova abafumishe mu calo ca Egupti. Bushiku ubo abana ba kwa Israele bonse bafwile ukulaibukisha mu nkulo shabo shonse ifyo Yehova abacitile.+

43 Kabili Yehova atile kuli Mose na kuli Aarone: “Ici e cipope pa ca kucilila:+ Umbi umbi te kuti alyeko.+ 44 Lelo nga kuli umusha uwashitwa mu ndalama, mukamusembulule.+ E lyo engalyako. 45 Uushili mwana calo no ubombela amalipilo te kuti balyeko. 46 Mu ng’anda e mo mukaliile. Te kwesha ukubuulapo umunofu no ku-ufumya mu ng’anda no ku-utwala pa nse. Kabili mwikafuna ifupa ililimo.+ 47 Ulukuta lonse ulwa kwa Israele lufwile ukusefyako.+ 48 Kabili nga ca kuti umulebeshi ekala pamo na imwe kabili nga alefwaya ukusefya ica kucilila kuli Yehova, umwaume onse uwa mu ng’anda yakwe akasembululwe.+ E lyo engapalama ku kusefya, kabili akabe ngo mwana calo. Lelo uushasembululwa te kuti alyeko. 49 Ifunde limo line likabe kuli bonse ku mwana calo, na ku mulebeshi uwikala na imwe.”+

50 Awe abana ba kwa Israele bonse bacitiile mulya mwine Yehova aebele Mose na Aarone. Bacitile filya fine fye.+ 51 Kabili pa bushiku bwine ubu Yehova afumishe abana ba kwa Israele pamo na mabumba+ yabo yonse mu calo ca Egupti.

13 Kabili Yehova akonkenyepo ukusosa kuli Mose, ati: 2 “Umpeele umwana mwaume onse uwabalilapo ukufyalwa mu bana ba kwa Israele, ne nama yonse iilume iyabalilapo ukufyalwa pa nama. Libeli lyandi.”+

3 Kabili Mose akonkenyepo ukusosa ku bantu ati: “Mukaleibukisha buno bushiku ubo mwafumine mu Egupti,+ mu ng’anda ya busha, pantu ni ku kuboko kwa maka e ko Yehova amufumiishe.+ E ico conse umuli icitutumushi tacilingile ukuliiwa.+ 4 Lelo mwalafuma mu mweshi wa Abibu.+ 5 Kabili ilyo Yehova akamuleta mu calo ca bena Kanaani na bena Hiti na bena Amore na bena Hibi na bena Yebusi,+ ico alapile ku fikolwe fyenu ukupeela imwe,+ icalo umwaba umukaka no buci,+ e lyo mukabomba uyu mulimo muli uno mweshi. 6 Inshiku cinelubali (7) mukalelya imikate iishatutumuka,+ kabili ubushiku bwalenga cinelubali bushiku bwa mutebeto kuli Yehova.+ 7 Mukalye imikate iishatutumuka pa nshiku cinelubali (7);+ kabili icatutumuka+ ciikasangwa muli imwe, nangu mufuba uwatutumuka mu calo cenu conse.+ 8 Kabili mukebe abana benu pali bulya bushiku, amuti, ‘Ico tulecitile fi mulandu wa fyo Yehova acitile kuli ifwe ilyo twafumine mu Egupti.’+ 9 Kabili uku kusefya kuleba kuli imwe nge cishibilo pa cisansa cenu kabili kuleba kuli imwe nge cibukisho pa kati ka menso yenu,+ pa kuti ifunde lya kwa Yehova libe mu kanwa kenu;+ pantu ku kuboko kwakosa e ko Yehova amufumishe mu Egupti.+ 10 Kabili mulesunga ici cipope pa nshita ya ciko umwaka no mwaka.+

11 “Kabili ilyo Yehova akamuleeta mu calo ca Kanaani,+ nga filya fine alapile kuli imwe na ku fikolwe fyenu,+ kabili ilyo akacipeela kuli imwe, 12 e lyo mukapeele kuli Yehova abana benu abaume ababalilapo ukufyalwa,+ ne nama shenu ishilume ishabalilapo ukufyalwa.+ Amabeli yonse ya kwa Yehova.+ 13 Kabili ibeli lyonse ilya mpunda mukalilubule pamo ne mpaanga, kabili nga tamwakalilubule, mukalifune umukoshi.+ Kabili ibeli lyonse ilya muntu ilya mu bana benu abaume mukalilubule.+

14 “Kabili nga ca kuti umwana wenu amwipusha ati,+ ‘Calola mwi ici?’ e lyo mukamwasuke ati, ‘Ni ku kuboko kwakosa e ko Yehova atufumiishe mu Egupti,+ mu ng’anda ya busha.+ 15 Awe Farao alitaleme, akeene ukutuleka tuye,+ na Yehova e pa kwipaya amabeli yonse mu calo ca Egupti,+ ukutendekela pe beli lya muntu ukufika na kwi beli lya nama.+ E co ndeipaila Yehova ilambo ilya nama yonse iilume iyabalilapo ukufyalwa,+ kabili e co tulubwila amabeli yesu yonse aya bana baume.’+ 16 Kabili cikabe nge cishibilo pa kuboko kabili nge ca kukaka pa mpumi,+ pantu ni ku kuboko kwakosa Yehova atufumishe mu Egupti.”+

17 Ilyo Farao alekele abantu baye Lesa tabatungulwile mu nshila yapita mu calo ca baPelishiti pa mulandu fye wa kuti yali mupepi, pantu Lesa atile: “Nalimo abantu bakalanguluka ilyo bakamona inkondo kabili bakabwelulukila ku Egupti.”+ 18 E ico Lesa alengele abantu ukushoka ukupita inshila iyapita ku matololo ayapalamina na Bemba Wakashika.+ Lelo abana ba kwa Israele bafumine mu calo ca Egupti mu mabumba mabumba kwati bashilika.+ 19 Kabili Mose asendele amafupa ya kwa Yosefe, pantu alengele abana ba kwa Israele ukulapa, ati: “Nangu cibe shani Lesa akamwibukisha,+ na imwe mukasende amafupa yandi ukuyafumya muno muntu mukaye na yo.”+ 20 Awe bafumine ku Sukote no kuyacita inkambi pa Etamu ku mpela ya matololo.+

21 Kabili Yehova alebatangilila akasuba mu ntumba ye kumbi ku kubatungulula mu nshila,+ na mu ntumba ya mulilo ubushiku ku kubasanikila pa kuti bale-enda akasuba no bushiku.+ 22 Intumba ye kumbi tayalefuma pa bantu akasuba nangu ni ntumba ya mulilo ubushiku.+

14 Yehova nomba asosele kuli Mose, ati: 2 “Sosa ku bana ba kwa Israele ukuti baluluke no kupanga inkambi pa kati ka Migidole na bemba apalungatana na Baali-sefone mupepi na Pihahirote.+ Mupangile nkambi mu lulamba lwa bemba apalungatana ne yi ncende. 3 E lyo Farao akasosa pa bana ba kwa Israele ati, ‘Nabafulungana bale-endauka fye mu calo. Amatololo nayabesalila.’+ 4 E fyo nkaleka umutima wa kwa Farao ukutalama,+ na o akabakonka kabili nkaicindamika pa kucimfya Farao na bashilika bakwe bonse;+ e lyo abena Egupti bakeshiba ukuti nine Yehova.”+ Awe abena Israele bacitile ifyo fine fye.

5 Pa numa imfumu ya Egupti yaebelwe ukuti abantu nababutuka. Apo pene fye Farao na babomfi bakwe bayalwile imitima yabo ukukuma kuli aba bantu,+ no kutila: “Cinshi ici twacita, apo twaleka abena Israele abasha+ besu ukuya?” 6 Awe atendeke ukupekanya amaceleta ya nkondo, kabili aile pamo na bantu bakwe.+ 7 Kabili asendele amaceleta bacetekelemo imyanda mutanda (600) na maceleta+ yambi yonse aya mu Egupti kabili pa maceleta yonse aya pali abashilika. 8 E fyo Yehova alekele umutima wa kwa Farao imfumu ya Egupti ukutalama,+ kabili aile alekonka abana ba kwa Israele, ilyo abana ba kwa Israele balefuma ninshi nabemya na maboko.+ 9 Na bena Egupti baile balebakonka, kabili bakabalwe bonse abaletinta amaceleta ya kwa Farao na baninine pali bakabalwe bakwe+ na bashilika bakwe babasangile nabapanga inkambi mu lulamba lwa bemba, mupepi na Pihahirote apalungatana na Baali-sefone.+

10 Ilyo Farao apaleme, abana ba kwa Israele bainwine amenso yabo kabili moneni abena Egupti balebakonka ulubilo; kabili abana ba kwa Israele batiinine icibi kabili batendeke ukulilila kuli Yehova.+ 11 Kabili batile kuli Mose: “Bushe mulandu wa kuti tamwaba inshiishi mu Egupti e co watuletela kuno ukwisafwila mu matololo?+ Cinshi watucitila ifi ukutufumya mu Egupti?12 Bushe te fyo twakwebele ilyo twali mu Egupti, atuti, ‘Utuleke fye fwe bene tulebombela abena Egupti’? Pantu cawamapo ukubombela abena Egupti ukucila ukwisafwila mu matololo.”+ 13 Awe Mose asosele ku bantu ati: “Mwitiina.+ Iminineni ndi no kumona ifyo Yehova alamupususha lelo.+ Pantu abena Egupti abo mulemona lelo tamwakabamone na kabili umuyayaya.+ 14 Yehova alemulwila,+ na imwe mube fye tondolo.”

15 E lyo Yehova atile kuli Mose: “Cinshi ico ulelilila kuli ine?+ Sosa ku bana ba kwa Israele ukuti bapase inkambi. 16 Lelo iwe, imya inkonto+ yobe no kutambalika ukuboko kobe pali bemba no kumwakanya pabili,+ pa kuti abana ba kwa Israele bende muli bemba apauma.+ 17 Lelo ine, mona ndeleka imitima ya bena Egupti ukutalama,+ ukuti babakonke ulubilo pa kuti njicindamike pa kucimfya Farao na mabumba ya bashilika bakwe bonse, na maceleta yakwe aya nkondo na ba pali bakabalwe bakwe.+ 18 Kabili abena Egupti balaishiba ukuti nine Yehova ilyo nalaicindamika pa kucimfya Farao, amaceleta yakwe aya nkondo na ba pali bakabalwe bakwe.”+

19 E lyo malaika+ wa kwa Lesa wa cine uwaletangilila abena Israele aimine no kuya ku numa yabo, ne ntumba ye kumbi yafumine ku ntanshi yabo no kwiminina ku numa yabo.+ 20 Awe yaishile pa kati ka bena Egupti na bena Israele.+ Lubali lumo yali likumbi pamo ne mfifi. Lubali lubiye yalepeela ulubuuto ubushiku.+ Kabili abena Egupti tabapaleme ku bena Israele ubushiku bonse.

21 Mose nomba atambulwile ukuboko kwakwe pali bemba;+ na Yehova alengele bemba ukubwelela inuma ku mwela uwakosa uwa ku kabanga ubushiku bonse no kulenga umushili wa pa nshi ya bemba ukuuma,+ na menshi ya-akanikene pabili.+ 22 Awe basukile abana ba kwa Israele baingila mu kati ka bemba pa mushili apauma,+ ninshi amenshi yali icibumba ku kulyo na ku kuso.+ 23 Kabili abena Egupti balibakonkele, kabili bakabalwe bonse aba kwa Farao, amaceleta yakwe aya nkondo na ba pali bakabalwe bakwe batendeke ukubakonka ulubilo,+ ukuya mu kati ka bemba. 24 Kabili mu nshita ya bulinde bwa lucelo Yehova atendeke ukulolesha pa bena Egupti ukufuma mu ntumba ya mulilo ne ye kumbi,+ kabili afulungenye abena Egupti.+ 25 Kabili atwalilile ukusokola imipeto ku maceleta yabo ica kuti yalabafya ukwensha;+ kabili abena Egupti batendeke ukusosa abati: “Natufulumuke ku bena Israele, pantu Yehova alebalwilako.”+

26 Mu kulekelesha Yehova atile kuli Mose: “Tambalika ukuboko kobe pali bemba,+ pa kuti amenshi yabwelele pa bena Egupti, pa maceleta yabo aya nkondo na pa ba pali bakabalwe babo.” 27 Apo pene fye Mose atambulwile ukuboko kwakwe pali bemba, kabili ilyo bwaleya buleca amenshi yatendeke ukubwela yapuminkana no kupuminkana nga filya fine yali kale. Cilya abena Egupti bamona ukuti amenshi yalabwela e pakufulumuka, na Yehova e pa kubapenwina muli bemba.+ 28 Kabili amenshi yabwelele ifyo yali.+ Yasukile yaibisha amaceleta ya nkondo na ba pali bakabalwe aba mu mabumba ya bashilika yonse aya kwa Farao na bonse abaingile muli bemba ku kukonka abena Israele.+ Kabili takwashele nangu umo.+

29 Kumfwa abana ba kwa Israele, baendele pa mushili apauma mu kati ka bemba,+ kabili amenshi yali kuli bena icibumba ku kulyo na ku kuso.+ 30 E fyo Yehova apuswishe Israele mu minwe ya bena Egupti pa bushiku bulya,+ kabili Israele amwene abena Egupti nabafwa mu lulamba lwa bemba.+ 31 Kabili Israele amwene amaka yakalamba ayo Yehova abomfeshe pa bena Egupti; na bantu batendeke ukutiina Yehova no kutetekela Yehova na Mose umubomfi wakwe.+

 3 Yehova ni mpalume ku bulwi.+ Yehova e shina lyakwe.+

 5 Amenshi ayashika yabafimba,+ baibila mu menshi ayengi kwati libwe.+

12 Mwatambulula ukuboko kwenu ukwa ku kulyo,+ isonde lyabamina.+

18 Yehova akaba imfumu umuyayaya, umuyayaya.+

20 Kabili Miriamu kasesema mwanakashi, nkashi ya kwa Aarone,+ aikete akaoma ka nyenjele mu minwe yakwe;+ na banakashi bonse balifumine balamukonka bali no tuoma twa nyenjele uku ninshi balecinda.+ 21 Kabili Miriamu aleyankula ku baume ati:+

22 Pa numa Mose alengele Israele ukufuma kuli Bemba Wakashika kabili baile mu matololo ya Shuri+ no kwenda inshiku shitatu mu mpanga, lelo tabasangile amenshi.+ 23 Awe basukile bafika ku Mara,+ lelo balifililwe ukunwa amenshi ya mu Mara pantu yali ayalula. E co akwinikile ati Mara.+ 24 Kabili abantu batendeke ukuilishanya kuli Mose,+ abati: “Tulenwa nshi?” 25 E lyo Mose aliliile kuli Yehova.+ Na o Yehova amutungulwile ku kamuti, na o akapoosele mu menshi na menshi yasangwike ayasuma.+

Palya e po abebeele ifunde ne nshila ya kupingwilamo kabili e po abeseshe.+ 26 Kabili akonkenyepo ukusosa ati: “Nga ca kutila ukumfwa mwakulaumfwa kwi shiwi lya kwa Yehova Lesa wenu kabili nga mwakulacita ne cisuma mu menso yakwe kabili mwakulaumfwa ku mafunde yakwe no kukonka ifipope fyakwe fyonse,+ nshakamuletele ubulwele ubuli bonse ubo naletele pa bena Egupti;+ pantu nine Yehova uulemucingilila.”+

27 Pa numa baile ku Elimu, ukwali utumfukumfuku twa menshi ikumi na tubili (12) no tuncindu amakumi cinelubali (70).+ Awe bapangile inkambi kulya mupepi na menshi.

16 Pa numa, bafumine ku Elimu,+ kabili ulukuta lonse ulwa bana ba kwa Israele lwasukile lwafika ku matololo ya Sini,+ ayaba pa kati ka Elimu na Sinai, ubushiku ubwalenga ikumi na shisano (15), mu mweshi wa bubili apo bafumiine mu calo ca Egupti.

2 Kabili ulukuta lonse ulwa bana ba kwa Israele lwatendeke ukuilishanya kuli Mose na kuli Aarone mu matololo.+ 3 Kabili abana ba kwa Israele baleti kuli bena: “Kanshi Yehova nga atwipaile+ fye mu calo ca Egupti ilyo twaleikala mupepi ne nongo sha nama,+ ilyo twalelya ifya kulya fya kuti twaikuta, nomba mwatuleta mu matololo pa kuti ulukuta lonse ulu lufwe ku nsala.”+

4 E lyo Yehova atile kuli Mose: “Mona ndemuponesha ifya kulya ukufuma mu muulu;+ kabili abantu balefuma no kutoola cila muntu ifya kulya fya bushiku no bushiku,+ pa kuti mbeeshe imone nga ca kuti bakakonka amafunde yandi nangu iyo.+ 5 Kabili pa bushiku bwalenga mutanda (6)+ e po bakapekanye ifya kulya ifyo bakaleta mu ng’anda, na fyo fikafule imiku ibili ukucila pa fyo batoola cila bushiku.”+

6 Awe Mose na Aarone basosele ku bana bonse aba kwa Israele abati: “Icungulo e lyo mwalaishiba ukuti Yehova e wamufumishe mu calo ca Egupti.+ 7 Kabili ulucelo mukamona ubukata bwa kwa Yehova,+ pantu naumfwa ukuilishanya kwenu pali Yehova. Kabili ni fwe bani ukuti muilishanye kuli ifwe?” 8 Kabili Mose akonkenyepo ukusosa ati: “Yehova akamupa mu cungulo inama ya kulya na mu lucelo ifya kulya ifya kuti mwikute, pantu Yehova naumfwa ukuilishanya kwenu uko muleilishanya kuli ena. Kabili ifwe ni fwe bani? Ukuilishanya kwenu te pali ifwe, lelo ni pali Yehova.”+

9 Kabili Mose atile kuli Aarone: “Sosa ku lukuta lonse ulwa bana ba kwa Israele, auti, ‘Palameni ku cinso ca kwa Yehova, pantu naumfwa ukuilishanya kwenu.’”+ 10 Kabili ilyo fye Aarone apwile ukulanda ku lukuta lonse ulwa bana ba kwa Israele, balipilibwike no kulosha ifinso ku matololo, kabili, moneni! ubukata bwa kwa Yehova bwamoneke mwi kumbi.+

11 Kabili Yehova akonkenyepo ukulanda kuli Mose, ati: 12 “Ning’umfwa ukuilishanya kwa bana ba kwa Israele.+ Sosa kuli bena, auti, ‘Pa cungulo cinono mwalalya inama kabili ulucelo mukekuta ifya kulya;+ e lyo mukeshiba ukuti nine Yehova Lesa wenu.’”+

13 Awe mu cungulo inkwale+ shatendeke ukwisa no kukupa inkambi, kabili ulucelo kwali umume ukushinguluka inkambi.+ 14 Wasukile umume wauma kabili pa mushili wa mu matololo pali utupaapaatu,+ utwacepa ngo tukalambya twa mpepo+ pa mushili. 15 Ilyo abana ba kwa Israele batumwene, e lyo balaipushanya abati: “Tunshi utu?” Pantu tabatwishibe. E lyo Mose atile kuli bena: “Fya kulya ifyo Yehova amupeele ukuti mulye.+ 16 Aya e mashiwi Yehova asosele, ‘Toolenipo, cila muntu ukulingana ne miliile yakwe. Mubuule cila muntu ulupe*+ lumo ukulingana ne mpendwa ya bantu abo cila muntu akwata mwi tenti lyakwe.’” 17 Awe e fyo bacitile abana ba kwa Israele; kabili baile baletoola, aba batoolele ifingi bambi na bo batoolele ifinono. 18 Ilyo bafipimine mu lupe, uwatoolele ifingi takwete ifyapulilepo no watoolele ifinono taabulishe.+ Batoolele ukulingana ne miliile ya muntu no muntu.

19 E lyo Mose atile kuli bena: “Umuntu eshako ifya kulya ukufika ulucelo.”+ 20 Lelo tabakutike kuli Mose. Abantu bamo balishileko ifya kulya ukufika ulucelo, na fyo fyawilemo imititi no kupimpinuka;+ ica kuti Mose alibakalipile.+ 21 Awe baletoola ifya kulya ulucelo+ no lucelo, cila muntu ukulingana ne miliile yakwe. Kabili ilyo akasuba kakaba, fyalesunguluka.

22 Kabili pa bushiku bwalenga mutanda (6) e po batoolele ifya kulya ifya miku ibili,+ indupe shibili ku muntu umo. Awe intungulushi shonse isha lukuta shaishile kuli Mose no kumweba pali uyu mulandu. 23 E lyo na o atile kuli bena: “E fyo Yehova asosele. Mailo kukaba ukusunga isabata, isabata lya mushilo kuli Yehova.+ Nga mulefwaya ukupangamo utumikate pangeni, kabili nga mulefwaya ukwipika ipikeni,+ kabili fyonse ifyashalapo mufisunge ukufika ulucelo.” 24 Awe bafisungile ukufika ulucelo, nga mulya mwine Mose abebeele; kabili tafyapimpinwike nelyo ukubamo imititi.+ 25 E lyo Mose atile: “Lyeni ifi lelo, pantu lelo lisabata+ kuli Yehova. Ubwa lelo tamwafisange mu mpanga. 26 Mwakulatoola mu nshiku mutanda (6), lelo pa bushiku bwalenga cinelubali (7) lisabata.+ Tafyakulapangwa pali ubu bushiku.” 27 Lelo, ilyo ubushiku bwalenga cinelubali (7) bwafikile abantu bamo bafumine ku kutoola, lelo tabafisangile.

28 E lyo Yehova atile kuli Mose: “Ni lilali mukaleka ukupula mu fipope fyandi na mu mafunde yandi?+ 29 Ishibeni ukuti Yehova namupeela isabata.+ E co alemupeelela ifya kulya fya nshiku shibili pa bushiku bwalenga mutanda (6). Cila muntu aleikala mu mwakwe.+ Umuntu nangu umo elafuma pa mwakwe pa bushiku bwalenga cinelubali (7).” 30 Awe abantu batendeke ukusunga isabata pa bushiku bwalenga cinelubali (7).+

31 Kabili abena Israele batendeke ukufiita ati “mana.” Kabili yali iyabuuta nge mbuto sha koriandere, kabili yaleumfwika mu kanwa ngo mukate wapaapaatala uwa buci.+ 32 E lyo Mose atile: “Aya e mashiwi Yehova asosele, ‘Isusheni mana mu lupe lumo no kuisunga, pa kuti aba mu nkulo shenu shonse,+ bakamone ifya kulya ifyo namuliishishe mu matololo ilyo nalemufumya mu calo ca Egupti.’”+ 33 Awe Mose atile kuli Aarone: “Buula umutondo kabili bikamo mana iingesula ulupe lumo no kuibika ku cinso ca kwa Yehova pa kuti isungilwe aba mu nkulo shenu shonse.”+ 34 Aarone aibikile ku cinso ca cipao ca Cipangano+ pa kuti isungwe nga filya fine fye Yehova aebele Mose. 35 Kabili abana ba kwa Israele baliile mana pa myaka amakumi yane (40),+ mpaka na lintu bafikile mu calo icaikalamo abantu.+ Balelya mana mpaka na lintu bafikile ku mupaka wa calo ca Kanaani.+ 36 Nomba mwi tepe* limo mwaleingila indupe ikumi (10).

17 Kabili ulukuta lonse ulwa bana ba kwa Israele lwafumine mu matololo ya Sini+ mu mabumba mabumba, ukulingana na mashiwi ya kwa Yehova,+ kabili bailepanga inkambi pa Refidimu.+ Lelo takwali amenshi aya kuti abantu banwe.

2 Kabili abantu batendeke ukuumanya Mose no kutila:+ “Tupeele amenshi tunwe.” Lelo Mose atile kuli bena: “Cinshi ico mulengumanishisha? Cinshi ico mwesesha Yehova?”+ 3 Awe icilaka caikete abantu kulya, kabili abantu baleilishanya fye pali Mose no kutila: “Cinshi watufumiishe mu Egupti ku kutwipaya na bana besu ne fitekwa fyesu ku cilaka?”+ 4 Awe Mose asukile alilila kuli Yehova, ati: “Ndecita shani kuli aba bantu? Nga cacila apa bakampoola amabwe!”+

5 E lyo Yehova atile kuli Mose: “Tangilila aba bantu,+ usende na bakalamba ba mu Israele bamo bamo baye nobe kabili usende ne nkonto iyo waumiineko pa Mumana wa Naelo.+ Isende mu minwe e lyo uleya. 6 Mona! ndeiminina ku ntanshi yobe palya pa cilibwe mu Horebu. Na iwe ume pa cilibwe, kabili amenshi yalefumamo, pa kutila abantu banwe.”+ Awe Mose acitile ifyo fine pa menso ya bakalamba ba mu Israele. 7 Kabili ainike palya pantu ati Masa+ na Meriba,+ pa mulandu wa kuti abana ba kwa Israele baumene na Mose na pa mulandu wa kuti baeseshe Yehova, +abati: “Bushe Yehova ali mu kati kesu nelyo talimo?”+

8 Awe abena Amaleke+ balishile no kulwa na Israele mu Refidimu.+ 9 E lyo Mose atile kuli Yoshua:+ “Tusalile abaume e lyo mufume muye+ ku kulwa na bena Amaleke. Mailo nkaba pa muulu wa lupili, ne nkonto ya kwa Lesa wa cine mu kuboko kwandi.”+ 10 Awe Yoshua acitile fye nga mulya mwine Mose asoseele kuli ena,+ pa kulwa na bena Amaleke; kabili Mose, Aarone na Huri+ baninine pa muulu wa lupili.

11 Kabili icalecitika ca kuti ilyo fye Mose aimya ukuboko kwakwe, abena Israele balekwatilako amaka;+ lelo ilyo aponya fye ukuboko, abena Amaleke e balekwatilako amaka. 12 Ilyo amaboko ya kwa Mose yanakile, babuulile ilibwe no kulibika mwi samba lyakwe, na o alikelepo; kabili Aarone na Huri baikete amaboko yakwe, umo lubali ulu umbi na o ulubali ulu, no kuleka amaboko yakwe yaba ndi mpaka ne fyo akasuba kawile. 13 E fyo Yoshua acimfishe Amaleke na bantu bakwe ku lupanga.+

14 Yehova nomba atile kuli Mose: “Lemba ici mwi buuku+ pa kutila mwikacilaba kabili ulondolwele na Yoshua, auti, ‘Nkalofya abena Amaleke bonse mwi samba lya muulu ica kuti takwakabe na wa kubebukisha.’”+ 15 Kabili Mose akuulile iciipailo no kucinika ati Yehova-nisi, 16 e kutila: “Pantu abantu baimina imitekele+ ya kwa Jah,+ Yehova akalwa na Amaleke ku nkulo ne nkulo.”+

18 Nomba Yetro shimapepo wa ku Midiani, shifyala wa kwa Mose,+ alyumfwile fyonse ifyo Lesa acitile kuli Mose na ku bena Israele abantu bakwe, ifyo Yehova afumishe abena Israele mu Egupti.+ 2 Awe Yetro, shifyala wa kwa Mose, apokelele Sipora, muka Mose, uo Mose alekele aye ku mwabo, 3 na bana bakwe abaume babili.+ Mose ainike ishina lya mwana umo ati Gershomu,+ ico atile, “pantu naba umulebeshi mu calo cimbi cimbi”; 4 ne shina lya umbi ati Eliesere,+ ico atile, “pantu Lesa wa kwa tata ni kaafwa wandi pantu ampokolwele ku lupanga lwa kwa Farao.”+

5 Awe Yetro, shifyala wa kwa Mose, na bana bakwe abaume no mukashi wakwe baishile kuli Mose mu matololo uko ali mu nkambi, pa lupili lwa kwa Lesa wa cine.+ 6 E lyo atumine amashiwi kuli Mose ati: “Ne sofyala, Yetro,+ naisa kuli iwe, kabili ndi no mukashi obe na o ali na bana baume bakwe babili.” 7 Apo pene fye Mose alifumine ku kuyasengela shifyala, kabili awile ubukupeme no kumufyompa;+ e lyo balaposhanya umutende. Na pa numa baingile mwi tenti.

8 E lyo Mose alashimikila shifyala fyonse ifyo Yehova acitile kuli Farao na ku bena Egupti pa mulandu wa kwa Israele,+ na macushi yonse ayabaponene mu nshila,+ ne fyo Yehova alebapokolola.+ 9 Awe Yetro alitemenwe pali conse icisuma ico Yehova acitiile abena Israele pantu alibapokolwele mu minwe ya bena Egupti.+ 10 E lyo Yetro atile: “Acindikwe Yehova, uwamupokolola mu minwe ya bena Egupti na mu minwe ya kwa Farao, kabili uwapokolola abantu mwi samba lya kuboko kwa bena Egupti.+ 11 Nomba naishiba ukuti Yehova alicila balesa+ bonse pa mulandu wa ici icacitike umo abena Egupti baituntumbile pa bena Israele.” 12 Awe Yetro, shifyala wa kwa Mose, apeele Lesa umutuulo wa koca na malambo;+ kabili Aarone na bakalamba bonse aba mu Israele baishile ku kulya na Yetro shifyala wa kwa Mose, pa cinso ca kwa Lesa wa cine.+

13 Kabili ubushiku bwakonkelepo Mose alikele nga pe ku kupingula abantu,+ kabili abantu baleisa kuli Mose ukufuma ulucelo ukufika icungulo. 14 E lyo shifyala wa kwa Mose amwene fyonse ifyo alecitila abantu. Na o e pa kutila: “Mulimo nshi uyu ulebombela abantu? Cinshi wikalila weka na bantu bonse ukulaisa kuli iwe ukufuma ulucelo ukufika icungulo?” 15 E lyo Mose atile kuli shifyala: “Ni co abantu besa kuli ine ku kwipusha kuli Lesa.+ 16 Nga ca kuti kwaima umulandu kuli bena,+ ufwile ukwisa kuli ine e lyo na ine napingula pa kati ka muntu no munankwe, no kulenga beshibe ifipope fya kwa Lesa wa cine na mafunde yakwe.”+

17 E lyo shifyala wa kwa Mose amwebele ati: “Taiweme imibombele yobe. 18 Ukanaka we mwine no kunasha aba bantu abali na iwe, pantu uyu mulimo naukukulila.+ Te kuti uubombe weka.+ 19 Nomba umfwa ifyo nalakweba.+ Nalakupandako amano, na Lesa akaba na iwe.+ Iwe ba uwa kulandilako aba bantu ku cinso ca kwa Lesa wa cine,+ kabili iwe ni we wakulatwala imilandu yabo kuli Lesa wa cine.+ 20 Kabili ufwile ukubebela limo ulwa fipope na mafunde,+ no kuleka beshibe imibele bali no kwendelamo ne milimo bafwile ukulabomba.+ 21 Pa bantu bonse aba, usalepo abaume abafikapo,+ abatiina Lesa,+ abaume bacetekelwa,+ abapata ubunonshi bwa mu bufumfuntungu;+ kabili ukabasonte ukuba bacilolo ba kwangalila abantu amakana,+ bambi babe bacilolo ba kwangalila abantu imyanda, bambi na bo babe bacilolo ba kwangalila abantu amakumi yasano e lyo na bacilolo ba kwangalila abantu amakumi.+ 22 Kabili bafwile ukupingula abantu mu nshita yalinga yonse; kabili umulandu onse uukalamba e o bakulaleta kuli iwe,+ lelo umulandu onse uunono kuti bapingula abene. E ico uyangushishe we mwine uyu mulimo, kabili mwafwane na bo ukusenda ici cisendo.+ 23 Nga wacite ci, kabili nga e fyo Lesa akwebele ukucita, ninshi ukaba na maka ya ku-ubomba, kabili aba bantu bakaya ku mwabo umutende.”+

24 Apo pene fye Mose akutike kwi shiwi lya kwa shifyala no kucita fyonse ifyo asosele.+ 25 Kabili Mose asalile abaume bafikapo mu bena Israele bonse no kubabika intungulushi pa bantu,+ bambi bali bacilolo ba pa bantu amakana, bacilolo ba pa bantu imyanda, bacilolo ba pa bantu amakumi yasano na bacilolo ba pa bantu amakumi. 26 Kabili bapingwile abantu mu nshita yalinga yonse. Umulandu uwakosa e o baletwala kuli Mose,+ lelo umulandu onse uunono balepingula abene. 27 Na pa numa, Mose ashindike shifyala,+ na o aile ku mwabo.

19 Mu mweshi walenga butatu ukutula apo abana ba kwa Israele bafumine mu calo ca Egupti,+ pa bushiku bwine ubu, bafikile mu matololo ya Sinai.+ 2 Kabili bafumine mu Refidimu+ no kuya mu matololo ya Sinai no kupanga inkambi mu matololo;+ e ko abena Israele bapangile inkambi apalungatana no lupili.+

3 Kabili Mose aile kuli Lesa wa cine, na Yehova abilikishe kuli Mose mu lupili,+ ati: “Sosa ku ba mu ng’anda ya kwa Yakobo, kabili webe abana ba kwa Israele, auti, 4 ‘Mwali-imwena mwe bene ifyo nacitile ku bena Egupti,+ pa kuti imusende nga pa mapindo ya kwa kapumpe no kumuleta kuli ine.+ 5 Nomba nga mwakulaumfwa+ kwi shiwi lyandi kabili nga mwakulasunga icipangano candi,+ e lyo mukaba nge cipe candi ica mutengo pa bantu na bantu bonse,+ pantu isonde lyonse lyandi.+ 6 Kabili mukaba ubufumu bwandi ubwa bashimapepo kabili uluko lwandi ulwa mushilo.’+ E fyo usose ku bana ba kwa Israele.”

7 Awe Mose alishile no kwita abakalamba+ ba mu Israele no kubeba fyonse ifyo Yehova amwebele.+ 8 Pa numa abantu bonse ba-asukile pamo no kutila: “Fyonse ifyo Yehova asosele twakulacita.”+ Apo pene fye Mose aile-eba Yehova ifyo abantu basosele.+ 9 E lyo Yehova atile kuli Mose: “Mona! ndeisa kuli iwe mwi kumbi ilyafiita,+ pa kuti abantu bomfwe ilyo ndelanda nobe,+ kabili pa kuti batetekele na muli iwe umuyayaya.”+ Na Mose aebele Yehova ifyo abantu basosele.

10 Kabili Yehova akonkenyepo ukusosa kuli Mose ati: “Kabiye ku bantu, kabili ubasangulule lelo na mailo, kabili bafwile ukucapa ifya kufwala fyabo.+ 11 Kabili bakaipekanye pa bushiku ubwalenga shitatu pantu pa bushiku ubwalenga shitatu Yehova akatentemukila pa lupili lwa Sinai ku menso ya bantu bonse.+ 12 Kabili ukacitile abantu umupaka ukushinguluka ulupili, no kutila, ‘Te kwesha ukunina ulupili, kabili te kwesha ukukumya nangu fye ni mwi samba. Umuntu onse uwalukumya ukwipaiwa akepaiwe.+ 13 Takuli uufwile ukukumya uyo muntu, pantu akapoolwa amabwe nelyo ukulaswa umufwi. Nangu ni nama nelyo umuntu, takabe no mweo.’+ Ilyo intandala+ yalila e lyo bapalame ku lupili.”

14 Awe Mose atentemwike ulupili no kuya ku bantu, no kutendeka ukusangulula abantu; na bo bacapile ifya kufwala fyabo.+ 15 E lyo atile ku bantu: “Ipekanyeni+ mu nshiku shitatu. Te kwesha mwe baume ukupalama ku mwanakashi.”+

16 Kabili pa bushiku bwalenga shitatu ulucelo e lyo kwali ukupanta ne nkuba,+ kabili ikumbi ilyafiitisha+ lyali pa lupili kabili kwaumfwikike ukulila kukalamba ukwa ntandala,+ ica kuti abantu bonse abali mu nkambi batendeke ukututuma.+ 17 Mose nomba afumishe abantu mu nkambi ku kuyakumanya Lesa wa cine, kabili baileiminina mwi samba lya lupili.+ 18 Kabili ulupili lwa Sinai lwafutumwike icushi konse konse,+ pantu Yehova atentemukile pali ulu lupili mu mulilo;+ kabili icushi ca lupili calenina fye kwati cushi ce lungu lya mulilo,+ kabili ulupili lonse lwalitentele icine cine.+ 19 Ilyo iciunda ca ntandala cacililemo ukulila, Mose atendeke ukusosa, na Lesa wa cine alamwasuka mwi shiwi.+

20 Awe Yehova atentemukile pa muulu wa Lupili lwa Sinai. E lyo Yehova aitile Mose pa muulu wa lupili, na o Mose alininine no kuya pa muulu.+ 21 Yehova nomba atile kuli Mose: “Tentemuka, soka abantu, ukuti be-esha ukupula pa mupaka ukuya kuli Yehova ku kutamba epali abengi bafwa.+ 22 Kabili uleke bashimapepo abapalama lyonse kuli Yehova baisangulule,+ e pa kuti ubukali bwa kwa Yehova bwibemina.”+ 23 E lyo Mose atile kuli Yehova: “Abantu te kuti banine ulupili lwa Sinai, pantu ni mwe mwatwebele, amuti, ‘Pakuleni umupaka ku lupili no kuleka lube ulwa mushilo.’”+ 24 Lelo, Yehova atile kuli Mose: “Kabiye, tentemuka, kabili ubwele, wise na Aarone; lelo wileka bashimapepo na bantu bapule pa mupaka ku kunina kuli Yehova, pa kuti ubukali bwakwe bwibemina.”+ 25 Awe Mose atentemukile ku bantu no kubeba.+

20 Kabili Lesa asosele amashiwi yonse aya, ati:+

2 “Nine Yehova Lesa obe,+ uwakufumishe mu calo ca Egupti, mu ng’anda ya busha.+ 3 Wilapepa balesa bambi+ pa cinso candi.

4 “Wilabasa icimpashanya nelyo conse icapala ica mu muulu ku muulu nelyo ica pe sonde pa nshi nelyo ica mu menshi mwi samba lya calo.+ 5 Wilafikontamina nelyo ukutunkwa ukufibombela,+ pantu ne Yehova Lesa obe ndi Lesa uufwaya ukupepwa fye neka,+ uukanda abana, na beshikulu, na bana ba beshikulu, pa membu sha bashibo abampata;+ 6 lelo uwaba ne cikuuku ku ba nkulo iyalenga ikana (1,000) kuli bashibo abantemwa kabili abasunga amafunde yandi.+

7 “Wilalumbula apa fye ishina lya kwa Yehova Lesa obe,+ pantu Yehova takaleke umuntu uulumbula apa fye ishina lyakwe.+

8 “Uleibukisha ubushiku bwe sabata no kubulenga ukuba ubwa mushilo,+ 9 inshiku mutanda (6) ulebomba no kucitamo imilimo yobe yonse.+ 10 Lelo ubushiku ubwalenga cinelubali (7) lisabata kuli Yehova Lesa obe.+ Wilabombamo umulimo nangu umo, iwe nelyo umwana obe umwaume nelyo umwana obe umwanakashi, umubomfi obe umwaume nelyo umubomfi obe umukashana nelyo icitekwa cobe nelyo umulebeshi obe uuli mu mpongolo shobe.+ 11 Pantu mu nshiku mutanda (6) Yehova apangilemo umuulu ne sonde, bemba na fyonse ifyabamo,+ e lyo atuushishe pa bushiku ubwalenga cinelubali (7).+ E co Yehova apaaliile ubushiku ubwalenga cinelubali no kubulenga ukuba ubwa mushilo.+

12 “Ulecindika wiso na noko+ pa kuti inshiku shobe shifule mu calo ico Yehova Lesa obe alekupeela.+

13 “Wilaipaya.+

14 “Wilacita ubucende.+

15 “Wilaiba.+

16 “Wilashinina umunobe ubunte bwa bufi.+

17 “Wilakumbwa ing’anda ya munobe. Wilakumbwa umukashi wa munobe,+ nelyo umubomfi wakwe umwaume nelyo umubomfi wakwe umukashana nelyo ing’ombe yakwe nelyo impunda yakwe nelyo conse ico umunobe akwata.”+

18 Nomba abantu bonse balemona ukupanta no kubyata no kumfwa ukulila kwa ntandala no kumona ulupili lulefutumuka icushi. Ilyo abantu bamwene, balitutwime no kwiminina akatalamukila.+ 19 E lyo balati kuli Mose: “Iwe ni we ulande na ifwe no kuleka tukutike; lelo wileka Lesa alande na ifwe pantu kuti twafwa.”+ 20 Awe Mose atile ku bantu: “Mwitiina, pantu ico Lesa eshiile ni kukumwesha,+ na pa kuti lyonse muleba na katiina kuli ena pa kuti mwibembuka.”+ 21 Kabili abantu baiminine fye akatalamukila, lelo Mose aile mupepi ne kumbi ilyafiita umwali Lesa wa cine.+

22 Kabili Yehova akonkenyepo ukusosa kuli Mose ati:+ “E fyo usose ku bana ba kwa Israele, auti, ‘Namuimwena mwe bene ukuti ni mu muulu e mo nandiile nenu.+ 23 Mwilapanga balesa ba silfere ku kubalinganya kuli ine, kabili mwilapanga balesa ba golde.+ 24 Umpangile iciipailo ce loba,+ kabili e po ulepeelela amalambo yobe aya koca na ya mutende, ukufuma pa mpaanga shobe ne ng’ombe shobe.+ Konse uko nkalenga ishina lyandi ukwibukishiwa nkesa kuli iwe no kukupaala.+ 25 Kabili nga wampangila iciipailo ca mabwe, wicikuulila na mabwe ayabaswa. Nga ca kuti wapishapo cesulo, ninshi wacisaalula.+ 26 Kabili wilaninina pa matabo pa ciipailo candi, pa kuti ifya mfwalo fyobe fimonekela pa ciipailo.’

21 “Kabili aya e mafunde ayo ufwile ukubeba:+

2 “Nga washita umuHebere ku kuba umusha,+ akaba umusha imyaka mutanda (6), lelo mu mwaka uwalenga cinelubali (7) akalubuke ukwabula ukufuta nangu kamo.+ 3 Nga ailetele fye umwine eka, no kufuma akaifumine fye eka. Nga alikwata umukashi, no mukashi wakwe wine akafumine pamo nankwe. 4 Nga ca kuti shikulu wakwe amupeela umwanakashi ukuba umukashi wakwe na o amufyalila abana abaume na bana abanakashi, umukashi wakwe na bana ba mukashi wakwe bakaba ba kwa shikulu wakwe+ na o akafuma fye eka.+ 5 Lelo ngo musha akosapo ukusosa ati, ‘Nalitemwa shikulu wandi icine cine, no mukashi wandi pamo na bana bandi; nshilefwaya ukufuma no kuba umuntungwa,’+ 6 e lyo shikulu wakwe akamupalamike kuli Lesa wa cine kabili akamupalamike na ku ciibi nelyo ku luceshi lwa pa mwinshi; kabili shikulu wakwe akamutule ukutwi ku ca kutulilako, na o akaba umusha wakwe umuyayaya.+

7 “Kabili nga ca kuti umuntu ashitisha umwana wakwe umwanakashi ku kuba umusha,+ takafume nga filya abasha abaume bafuma. 8 Nga abipa mu menso ya kwa shikulu wakwe ica kuti tamucitile ukuba kanakashi+ lelo amulenga ukulubulwa, takabe ne nsambu sha kumushitisha ku bantu bambi bambi apo alimufyengele. 9 Lelo nga amupeela ku mwana wakwe umwaume, akacita kuli ena nga filya bacita ku bana banakashi.+ 10 Nomba nga aupilapo na umbi, ifya kulya fya kwa kanakashi, ifya kufwala fyakwe+ ne cifwile ukupeelwa kuli ena mu cupo+ tafyakacefiwe. 11 Nga ca kuti afilwa ukucita ifi fintu kuli kanakashi, ninshi kanakashi akafuma fye, ukwabula ukumushitisha.

12 “Uwauma umuntu ica kuti afwa, ukwipaiwa akepaiwe.+ 13 Lelo nga ca kuti umuntu tacibelamina umunankwe pa kuti amwipaye kabili Lesa wa cine asuminisha ukuti cicitike ku kuboko kwa uyo muntu,+ ninshi mfwile ukumufwaila icifulo ukwa kubutukila.+ 14 Nga ca kuti umuntu akalipa sana ica kuti aipaya no munankwe mu bucenjeshi,+ mukamufumye na ku ciipailo candi no kumwipaya.+ 15 Kabili uwauma wishi na nyina ukwipaiwa akepaiwe.+

16 “Kabili uwaiba umuntu+ no kumushitisha+ nelyo uwasangwa ali nankwe mu minwe yakwe ukwipaiwa akepaiwe.+

17 “Kabili uwasaalula wishi na nyina ukwipaiwa akepaiwe.+

18 “Kabili nga ca kuti abaume batendeka ukuumana kabili umo alasa umunankwe ilibwe nelyo amukoma no lukasu na o tafwile lelo alaala pa busanshi bwakwe;19 nga aima no kwendako pa nse ku nkonto yakwe, e lyo uwamuumine akaba umuntungwa takakandwe; lelo akafuta fye pa nshita yaonaika iya milimo ya ulya mpaka akapolelele.

20 “Kabili nga ca kuti umuntu auma+ umusha wakwe umwaume nelyo umusha wakwe umwanakashi ku nkonto ica kuti afwila mu minwe yakwe, ukulandulwa akalandulwe.+ 21 Lelo, nga aikala ubushiku bumo nelyo shibili, ekalandulwa, pantu ashitilwe mu ndalama shakwe.

22 “Kabili nga ca kuti abaume babili balelwishanya kabili bapunka no mwanakashi uuli ne fumo ica kuti no mwana+ wakwe afuma lelo takuli uufwile, uwa mulandu akafute ukulingana ne fyo umulume wa mwanakashi akamupingula; kabili ico bamupingula akacipeelele mu bapingushi.+ 23 Lelo nga kwaba uwafwa, lyena mukapeele umweo pa mweo,+ 24 ilinso pa linso, ilino pa lino, ukuboko pa kuboko, ulukasa pa lukasa,+ 25 umoco pa moco, icilaso pa cilaso, impumo pa mpumo.+

26 “Kabili umuntu nga auma pa linso lya musha wakwe umwaume nelyo pa linso lya musha wakwe umwanakashi no kulyonaula, akamuleke aye umuntungwa pa mulandu wa linso lyakwe.+ 27 Kabili nga lino lya musha wakwe umwaume nelyo ilya musha wakwe umwanakashi akuula, akamuleke aye umuntungwa pa mulandu wa lino lyakwe.

28 “Kabili nga ca kuti ing’ombe yacena umwaume nelyo umwanakashi ku nsengo ica kuti afwa, ing’ombe ukupoolwa+ ikapoolwe amabwe, no mubili wa iko wikaliiwa; no mwine wa ng’ombe akaba umuntungwa takakandwe. 29 Lelo nga yalecena abantu lyonse no mwine alisokelwe lelo afililwe ukuisunga, kabili yaipaya umwaume atemwa umwanakashi, iyo ng’ombe ikapoolwe amabwe no mwine na o akepaiwe. 30 Nga apingulwa icifuta mulandu, e lyo akalipile umutengo wa kulubula umweo wakwe ukulingana ne co bamupingwile.+ 31 Nangu ca kuti yacena umwana mwaume nelyo umwana mwanakashi, e fyo bakacite kuli ena ukulingana na mafunde aya.+ 32 Nge ng’ombe yacena umusha umwaume nelyo umusha umwanakashi, umwine wa ng’ombe akalipile amashekele* amakumi yatatu (30)+ kuli shikulu wa musha, kabili ing’ombe ikapoolwe amabwe.

33 “Kabili ngo muntu afimbula pa cilindi, nelyo nga aimba icilindi no kukanafimbapo, e lyo ing’ombe napamo impunda yawilamo,+ 34 umwine wa cilindi akafuta.+ Indalama sha iko akatwale ku mwine wa nama, lelo inama iifwile ikaba yakwe. 35 Kabili nga ca kuti ing’ombe ya muntu yapunka ing’ombe ya muntu umbi na yo yafwa, ninshi bakashitishe ing’ombe ya mweo no kwakana indalama yashitilwapo; ne ifwile na yo bakayakane.+ 36 Nelyo nga caishibikwe ukuti ing’ombe yalecena abantu lyonse kabili umwine taleisunga,+ ukufuta akafute+ ing’ombe pa ng’ombe, lelo iyafwa ikaba yakwe.

22 “Umuntu nga aiba ing’ombe nelyo impaanga kabili aipaya atemwa aishitisha, akabweseshepo ing’ombe shisano pa ng’ombe imo kabili impaanga shine pa mpaanga imo.+

2 (“Umupuupu+ nga asangwa aleingila mu ng’anda+ kabili apumwa ica kuti no kufwa afwa, uwamwipaya takapeelwe umulandu wa mulopa.+ 3 Lelo nga aisa ninshi akasuba nakatula, ninshi umulandu wa mulopa epo uli pa wamwipaya.)

“Ukufuta akafute. Nga takwete ica kufuta, ninshi bakamushitishe pa fyo aibile.+ 4 Ica mweo ico aibile nga casangwa mu minwe yakwe, ing’ombe napamo impunda nelyo impaanga, ali no kubwesha inama shibili.

5 “Ngo muntu atwala ifitekwa fyakwe ku kulya mwi bala nangu mwi bala lya myangashi kabili aleka ne fitekwa fyakwe fyayalya na mwi bala lya muntu umbi, akapeele ifisabo ifisuma nga nshi ifya mwi ibala lyakwe nelyo imyangashi iisuma nga nshi iya mwi bala lyakwe ku kubweseshapo.

6 “Ngo mulilo waya ulepya kabili wa-ambukila ifimpusa fya myunga, ne myanshi atemwa ingano isho bashilaseepa nelyo ibala, na fyo fyapya,+ uwasonteke umulilo ukubwesha akabweseshepo icapile.

7 “Ngo muntu apeela umunankwe indalama nelyo ifipe ukuti asunge,+ kabili fyaibilwa mu ng’anda ya uyo muntu, umupuupu nga asangwa, akabweseshepo imiku ibili.+ 8 Umupuupu nga tasangilwe, ninshi umwine wa ng’anda akapalamikwe kuli Lesa+ wa cine ku kumona nga tasendele ifipe fya munankwe. 9 Kumfwa umulandu onse uwa bumpulamafunde,+ uukumine ing’ombe, impunda, impaanga, ica kufwala, na conse icaluba ico umunankwe engatila, ‘E ici cine!’ umulandu wa abo babili bakautwale kuli Lesa wa cine.+ Uo Lesa akatila e mbifi, akabweseshepo ku munankwe fibili pali cimo.+

10 “Ngo muntu apeela umunankwe impunda nelyo ing’ombe napamo impaanga atemwa icitekwa icili conse ukuti asunge, kabili na co cafwa nelyo calemana atemwa casendwa apabula uumweneko, 11 uo bapeele akalape+ pa ntanshi ya kwa Yehova ukuti tasendele ifintu fya munankwe;+ kabili umwine wa ifyo fintu akasumine umulapo, no munankwe takabweseshepo. 12 Lelo nga e waibile, akabweseshe umwine.+ 13 Nomba nga ciswango e caipeye ifitekwa,+ akalete ifyashele ku fitekwa ku kuba ubushininkisho.+ Pantu tafwile ukubweseshapo ifyo iciswango caipeye.

14 “Lelo nga ca kutila umuntu ayashima icitekwa ca munankwe,+ kabili ico ayashima calemana napamo cafwa ilyo umwine talipo, ukubwesha akabweseshepo.+ 15 Umwine nga e po ali, takabweseshepo. Nga ca kusonkela, akalipile isha kusonkela.

16 “Nomba nga ca kuti umwaume asembeleka nacisungu uushakobekelwa, kabili alaala nankwe,+ afwile ukumubuula ukuti abe umukashi wakwe nga alipila indalama sha kumusendelapo.+ 17 Nga wishi akaaninina fye ukumupeela, akalipile indalama ishilipilwa pali banacisungu.+

18 “Wikaleka umwanakashi uucita ifinjelengwe ukuba no mweo.+

19 “Onse uwalaala ne nama ukwipaiwa akepaiwe.+

20 “Uwaipaila tulesa ilambo akepaiwe, kano ukwipaila fye Yehova eka.+

21 “Kabili wilacusha umulebeshi nelyo ukumutitikisha,+ pantu mwali abalebeshi mu calo ca Egupti.+

22 “Mwilacusha mukamfwilwa onse nelyo umwana wa nshiwa.+ 23 Nga mwamucusha, na o alilila kuli ine, ukuumfwa nkomfwa ukulila kwakwe;+ 24 kabili ubukali bwandi bukema,+ kabili nkamwipaila ku lupanga, kabili abakashi benu bakaba bamukamfwilwa na bana benu bakaba abana ba nshiwa.+

25 “Nga wakongwesha indalama ku bantu bandi, ku wacula uuli pamo na iwe,+ wikalacita kwati ni balya abakongwesha abafwaya isha kulundapo. Wikamukongwesha isha kaloba.+

26 “Nga wapoka insalu ya munobe ku kuba iciikatilo,+ ufwile ukumubwesesha ilyo akasuba takalawa. 27 Pantu e ca kufimbana fye akwata.+ Ni nsalu yakwe iya kufimba umubili wakwe. Pantu cinshi engafimbana pa kulaala? Nga alilila kuli ine, ine nkomfwa, pantu ndi wa luse.+

28 “Wilapontela Lesa+ nangu ukutiipwila intungulushi ya bantu bobe.+

29 “Wilashimunuka ukupeela ifya ntanshi pa fingi ifyo walobolola no mwangashi nelyo amafuta aya mu ca kukaminamo cobe.+ Amabeli yenu ayaume mulempeela.+ 30 Ifyo wakulacita kwi beli lya ng’ombe yobe na ku mpaanga yobe ni fi:+ Inshiku cinelubali (7) lyakulaba kuli nyina.+ Pa bushiku bwalenga cinekonsekonse (8) ulelipeela kuli ine.

31 “Kabili muleba aba mushilo kuli ine;+ kabili mwilalya umunofu wa citekwa ico batakaanya mu mpanga ku ciswango.+ Mulecipoosela imbwa.+

23 “Wilatandanya ilyashi lya bufi.+ Wilaba ku lubali lwa mbifi pa kuba inte ya lufyengo.+ 2 Wilakonka icinabwingi ku fibi;+ kabili wilapeela ubunte bwa bufi mu mulandu pa kukonkelela fye icinabwingi pa kuti upondamike ubupingushi.+ 3 Kabili wilawila ku mulanda mu kulubulula kwakwe.+

4 “Nga wasanga ing’ombe ya mulwani obe nelyo impunda yakwe ilelubanta, ukubwesha ukaibweseshe kuli ena.+ 5 Nga wamona impunda ya wakupata ilele mwi samba lya cisendo ca iko, wikamusha. Ukamwafweko ukuikakula icisendo ninshi muli nankwe.+

6 “Wilafyenga umulanda pa kupingula umulandu wakwe.+

7 “Uletaluka ku lyashi lya bufi.+ Kabili wilaipaya uwa kaele no mulungami, pantu nshakatile ku mubifi nati mulungami.+

8 “Wilapoka amafisakanwa, pantu amafisakanwa yafiisha pa menso ya bamona bwino kabili kuti yafulunganya amashiwi ya balungami.+

9 “Kabili wilatitikisha umulebeshi,+ apo mwalishiba imikalile ya mulebeshi, pantu mwali abalebeshi mu calo ca Egupti.+

10 “Kabili imyaka mutanda (6) ulebyala imbuto mwi bala lyobe no kulobololamo ifisabo.+ 11 Lelo mu mwaka walenga cinelubali (7) wilalimamo, ulelekamo fye,+ pa kuti ababusu ba mu bantu bobe balelyamo; ne co bashamo inama sha mu mpanga kuti shalyamo.+ E fyo wakulacita kwi bala lyobe ilya myangashi na kwi bala lyobe ilya miolife.

12 “Ulebomba umulimo obe inshiku mutanda (6);+ lelo mu bushiku bwalenga cinelubali (7) wilabombamo, pa kutila ing’ombe yobe ne mpunda yobe fituushe e lyo no mwana mwaume wa musha mwanakashi obe no mulebeshi batuushe.+

13 “Kabili mulekonka fyonse ifyo mwebele;+ kabili mwilalumbula amashina ya tulesa tumbi. Wileka yaleumfwika mu kanwa kobe.+

14 “Mu mwaka ulesefyamo umutebeto imiku itatu kuli ine.+ 15 Mu mweshi wa Abibu,+ ilyo fye inshita yafika, ukalesefya umutebeto wa mukate uushatutumuka.+ Ukalelya umukate uushatutumuka+ inshiku cinelubali (7), ukulingana fye ne fyo nkwebele, pantu e mweshi wafumine mu Egupti. Kabili kwikaba uwa kwisa minwe nkutwa ku cinso candi.+ 16 Kabili ukalesefya umutebeto wa kuseepa, uwa fisabo+ fya kubalilapo ukupya ifya milimo yobe, ifyo watandile mwi bala;+ no mutebeto wa kulonganika pa kwaluka kwa mwaka, ilyo walonganika ifyo walimine mwi bala.+ 17 Imiku itatu mu mwaka umwaume obe onse akalemonekela ku cinso ca kwa Yehova, Shikulu wa cine.+

18 “Wilatuula umulopa we lambo lyandi pamo ne fya kulya ifyatutumuka. Na mafuta mutuula pa mutebeto wandi yelaikala ubushiku bonse ukufika ulucelo.+

19 “Ifisabo ifisuma ifyabalilapo ukupya ifya mu mushili uleleta ku ng’anda ya kwa Yehova Lesa obe.+

“Wilaipika akana ka mbushi mu mukaka wa kwa nyina.+

20 “Mona ndetuma malaika+ ukukutangilila ku kukulenga ube mu musebo no kukuleta ku cifulo nateyanya.+ 21 E ico ukaicindike pa mulandu wakwe kabili ukomfwile ishiwi lyakwe. Wikamupondokela, pantu takamwelele pa membu shenu;+ pantu aleishila mwi shina lyandi. 22 Lelo, nga ca kuti waumfwila ishiwi lyakwe no kucita fyonse ifyo nkasosa,+ e lyo nkaba umulwani ku balwani bobe kabili nkacusha abakucusha.+ 23 Pantu malaika wandi akakutangilila kabili akakutwala ku bena Amore na ku bena Hiti na ku bena Perisi na ku bena Kanaani, ku bena Hibi na ku bena Yebusi, kabili nkabalofya.+ 24 Wilakontamina balesa babo nelyo ukutunkwa ukubabombela, kabili wilapanga icili conse icapala ifilubi fyabo,+ lelo tawakafilwe ukuwisha abo balesa kabili tawakafilwe ukutobaula ifyaimikwa fyabo ifya mabwe.+ 25 Kabili mukalebombela Yehova Lesa wenu,+ na o akapaala ifya kulya fyenu na menshi yenu;+ kabili nkafumya muli imwe ubulwele.+ 26 Mu calo cobe tamwakabe ukuponya amafumo kabili tamwakabe ing’umba.+ Nkafishapo impendwa ya nshiku shobe.+

27 “Ilyo ushilafika bakomfwa ulwa ine no kuba no mwenso,+ kabili nkalenga bantu bonse abo wakumanya ukuba mu cimfulumfulu, kabili nkalenga abalwani bobe bonse bafulumuke ku cinso cobe.+ 28 Kabili nkalenga abantu ukumfwa umwenso uko uli no kuya,+ na o ukalenga abena Hibi, abena Kanaani, na bena Hiti, ukufuma ku cinso cobe.+ 29 Nshakabafumye ku cinso cobe mu mwaka umo, epali icalo casanguka amatololo ne finama fya mu mpanga fyakufulila.+ 30 Nkalabafumya ku cinso cobe panono panono, ukasuke aufula no kukwata icalo.+

31 “Kabili nkabika umupaka obe ukufuma kuli Bemba Wakashika ukufika kuli bemba wa baPelishiti kabili ukufuma ku matololo ukufika ku Mumana;*+ pantu nkapeela mu minwe yobe abekashi ba mu calo, na iwe ukabatamfya bakafume ku cinso cobe.+ 32 Wikapangana na bo icipangano nelyo na balesa babo.+ 33 Tabafwile ukwikala mu calo cobe, pa kuti bekulenga ukubembukila ine. Nga ca kutila wabombela balesa babo, cikaba citeyo kuli iwe.”+

24 Kabili atile kuli Mose: “Nina kuli Yehova, iwe na Aarone, Nadabu na Abihu+ na bakalamba ba muli Israele amakumi cinelubali (70),+ e lyo mukontamine apatali. 2 Kabili Mose eka e o apalame kuli Yehova; lelo aba bena bepalamako, kabili abantu benina pamo nankwe.”+

3 E lyo Mose aishile no kulondolwela abantu fyonse ifyo Yehova asosele e lyo no bupingushi bwakwe bonse,+ kabili abantu bonse ba-aswike mwi shiwi limo no kutila: “Fyonse ifyo Yehova asosele natuitemenwa ukuficita.”+ 4 Awe Mose alembele amashiwi yonse aya kwa Yehova.+ E lyo acelele ulucelo no kukuula iciipailo mwi samba lya lupili, aimika na mabwe ikumi na yabili (12) ukulingana ne mikowa ikumi na ibili iya kwa Israele.+ 5 Pa numa atumine abalumendo ba bana ba kwa Israele na bo batuulile umutuulo wa koca no kwipaya amalambo ya mutende,+ ing’ombe ishilume, kuli Yehova. 6 E lyo Mose abuulilepo hafu wa mulopa no ku-ubika mu mbale,+ kabili hafu wa mulopa uwashelepo ausanshile pa ciipailo.+ 7 Na mu kulekelesha abuulile ibuuku lya cipangano+ no kubelengela abantu.+ Na bo batile: “Fyonse ifyo Yehova asosele natuitemenwa ukuficita no kumfwila.”+ 8 Awe Mose abuulile umulopa no ku-usansa pa bantu+ no kutila: “Uyu e mulopa wa cipangano+ ico Yehova apangene na imwe ukulingana na mashiwi yonse aya.”

9 Kabili Mose na Aarone, Nadabu na Abihu na bakalamba ba muli Israele amakumi cinelubali (70) balininine, 10 kabili bamwene Lesa wa kwa Israele.+ Na pe samba lya makasa yakwe palemoneka nga pakambatikwa amabwe ya safiri kabili pali apalengama ngo muulu.+ 11 Kabili tatambike ukuboko kwakwe pali bashimucindikwa ba mu bana ba kwa Israele,+ lelo bamwene icimonwa ca kwa Lesa wa cine+ kabili baliliile no kunwa.+

12 Yehova nomba atile kuli Mose: “Nina wise kuli ine ku lupili no kwikala kuno, pantu ndefwaya ukukupeela amabwe ayapapaatala na mafunde ne fipope ifyo nalalemba ku kusambilisha abantu.”+ 13 Awe Mose na Yoshua umubomfi wakwe balimine kabili Mose aninine ulupili lwa kwa Lesa wa cine.+ 14 Lelo ku bakalamba atile: “Tuloleleni pano mpaka tukabwele kuli imwe.+ Kabili moneni! Aarone na Huri+ bali pamo na imwe. Onse uuli no mulandu, e ko aleya.”+ 15 E fyo Mose aninine ulupili ilyo ikumbi lyalekupa ulupili.+

16 Kabili ubukata+ bwa kwa Yehova bwatwalilile ukuba pa Lupili lwa Sinai,+ ne kumbi lyatwalilile ukufimba ulupili pa nshiku mutanda (6). Awe pa bushiku bwalenga cinelubali (7) aitile Mose mu kati ke kumbi.+ 17 Kabili mu menso ya bana ba kwa Israele ubukata bwa kwa Yehova bwalemoneka ngo mulilo+ uulepya pa muulu wa lupili. 18 Awe Mose aingile mu kati ke kumbi no kunina pa muulu wa lupili.+ Kabili Mose ali pa lupili inshiku amakumi yane (40) akasuba no bushiku.+

25 Kabili Yehova aebele Mose,+ ati: 2 “Sosa ku bana ba kwa Israele, ukuti bampaatwilepo umusangulo: Ku muntu onse uo umutima wakwe wamulenga ukuitemenwa ukusangula mukampokeleko umusangulo wandi.+ 3 Kabili ici e ca musangulo ico mukabuula pali bena: golde+ na silfere+ no mukuba,+ 4 no bushishi bwa bluu, no bushishi bwa masako ya mpaanga ubwakashikila, no bwakashika ce, no bushishi bwa kolokondwe umusuma, no bushishi bwa masako ya mbushi,+ 5 no mukupo wa mpaanga uwakashika, no mukupo wa basilu,* ne fimuti fya mushita;+ 6 amafuta ya nyali,+ amafuta ya balsamu+ aya kubomfya ku kusubila+ na mu fyanunkila;+ 7 no tumabwe twa shohamu no twa kubika pali efode+ na pali tumba wa pa cifuba.+ 8 Kabili bakampangile umwa kwikala, pantu nkekala mu kati kabo.+ 9 Icikuulwa ca mushilo ne fipe fya ciko fyonse, mukafipange ukulingana ne fyo ndekulanga.+

10 “Kabili bakapange Icipao ukubomfya ifimuti fya mushita,+ cikabe imikono ibili na hafu mu butali, kabili umukono umo na hafu mu bwipi, kabili cikalepe umukono umo na hafu. 11 Kabili ukabikeko golde iyalopololwa.+ Ukaibikeko mu kati na ku nse, kabili ku cipao cine ici, lwa pa muulu, ukashingulusheko utwaba nge mipeto utwa golde.+ 12 Kabili ukeenge ne mipeto ine iya golde no kuibika pa muulu wa makasa yane aya ciko, imipeto ibili ku lubali lumo ne mipeto ibili ku lubali lubiye.+ 13 Kabili ukapange imitembo ya fimuti fya mushita no kubikako golde.+ 14 Kabili ukapushe imitembo mu mipeto iili mu mbali ya Cipao ku kusendelako Icipao. 15 Imitembo ikaleikala mu mipeto ya Cipao. Taifwile ukufumishiwamo.+ 16 Kabili mu Cipao ukabikemo amabwe ya cipangano ayo nkakupeela.+

17 “Kabili ukapange inkupiko ya golde yalopololwa, iya mikono ibili na hafu mu butali kabili iya mukono umo na hafu mu bwipi.+ 18 Kabili ukapange bakerubi babili aba golde. Ukabomfye sando pa kubapanga kabili bakabe ku mpela shibili isha nkupiko.+ 19 Kabili ukabike kerubi umo ku mpela imo na kerubi umbi ku mpela ibiye.+ Pa nkupiko epo mukabike bakerubi pa mpela shibili isha iko. 20 Na bakerubi abo bakatambalike amapindo yabo yabili mu muulu, ukucinga inkupiko ku mapindo yabo, kabili bakaloshanye.+ Ifinso fya bakerubi fikaloshe pa nkupiko. 21 Kabili ukabike inkupiko+ pa muulu wa Cipao, kabili mu Cipao ukabikemo amabwe ya cipangano ayo nkakupeela. 22 Kabili palya e po nkamonekela kuli iwe no kulanda na iwe ukufuma pa muulu wa nkupiko,+ pa kati ka bakerubi babili abali pa cipao ca cipangano, na fyonse ifya kweba abana ba kwa Israele epo nkakwebela.+

23 “Kabili ukapange itebulo+ lya fimuti fya mushita, likabe imikono ibili mu butali no mukono umo mu bwipi kabili likalepe umukono umo na hafu. 24 Kabili ukabikeko golde iyalopololwa, no kushingulushako umutika wa golde ku mbali ye tebulo.+ 25 Kabili ukabikeko ipulanga ilya basentimita 7 mu bufumo ukushingulusha, kabili mu mbali ya liko ukashingulushemo akamutika ka golde.+ 26 Kabili ukapangileko imipeto ya golde ine no kubika imipeto pa makoona yane aya mikonso ine iye tebulo.+ 27 Imipeto ikapalame kwi pulanga ku kwikasha imitembo pa kusenda itebulo.+ 28 Kabili ukapange imitembo ya fimuti fya mushita no kubikako golde, iya kusendelako itebulo.+

29 “Kabili ukapanga imbale sha liko na makapu ya liko ne mitondo ya liko ne mbale sha liko ishafonka umwa kwitulwila umutuulo wa mwangashi. Ukafipangile kuli golde yalopololwa.+ 30 Kabili ukabike imikate ya kulanga pe tebulo ku cinso candi pe.+

31 “Kabili ukapange ica kutekapo inyali ica golde iyalopololwa. Ukabomfye sando pa kupanga ica kutekapo inyali.+ Ishinte lya ciko, imisambo ya ciko, intuntu sha ciko, ifituutu fya ciko na maluba ya ciko e mo fikeme. 32 Kabili imisambo mutanda (6) ikafume mu mbali sha ciko, imisambo itatu iya ca kutekapo inyali lubali lumo ne misambo itatu iya ca kutekapo inyali lubali lubiye.+ 33 Intuntu shitatu ishapangwa nga maluba ya mualmonde ku lubali lumo ulwa misambo, kuli ne fituutu na maluba ifilelekanina, kabili intuntu shitatu ishapangwa nga maluba ya mualmonde ku lubali lumbi ulwa misambo, kuli ne fituutu na maluba ifilelekanina.+ Ifi fine e fyo imisambo mutanda (6) ikafume mu ca kutekapo inyali. 34 Kabili pa ca kutekapo inyali pali intuntu shine ishaba nga maluba ya mualmonde, kuli ne fituutu na maluba ifilelekanina.+ 35 Ne cituutu mwi samba lya misambo ibili cikafume muli cena ne cituutu mwi samba lya misambo na imbi ibili cikafume muli cena, ku misambo mutanda (6) iyafuma mu ca kutekapo inyali.+ 36 Ifituutu ne misambo fikafume muli cena. Ukabomfye sando pa kupanga fyonse ifi kuli golde iyalopololwa.+ 37 Kabili ukacipangile inyali cinelubali (7); ukaashe ne nyali sha ciko, isha kusanika pa ncende iili pa ntanshi ya ciko.+ 38 No tulumano twa ciko ne fya kwikata umulilo fya ciko fikabe ifya golde iyalopololwa.+ 39 Kwi talanti lya golde uwalopololwa e ko cikapangilwe pamo ne fipe fyonse ifi. 40 Kabili ukashininkishe ukuti wafipanga ukulingana ne mimonekele ya fiko iyo ulangilwe mu lupili.+

26 “Kabili ukapange icikuulwa ca mushilo ica tumatenti ikumi (10),+ utwapangilwa ku bushishi bwa kolokondwe umusuma ubwapyatwa bwino ne ya bushishi bwa bluu no bushishi bwa masako ya mpaanga ubwakashikila no bwakashika ce.+ Pakabe na bakerubi,+ abapikwilwapo kuli kapikula. 2 Akalitenti kamo kamo kakalepe imikono amakumi yabili na cinekonsekonse (28) kabili mu bwipi kakabe imikono ine. Utumatenti tonse tukabe utwalingana.+ 3 Utumatenti tusano tukasuntinkane kamo ku kabiye, no tumatenti tumbi tusano tukasuntinkane kamo ku kabiye.+ 4 E lyo ukapange utumipeto twa bushishi bwa bluu pa mpela ya kalitenti ka kulekelesha mu tusuntinkene; ifyo fine e fyo ukacite na pa mpela ya kalitenti ka bubili pa mulundo umbi.+ 5 Ukapange utumipeto amakumi yasano (50) pa kalitenti kamo, no tumipeto amakumi yasano ukatubike pa mpela ya kalitenti pa mulundo umbi, utumipeto tukaloshanye.+ 6 Kabili ukapange utwa kukofyamo utwa golde amakumi yasano (50) no kulundinkanya akalitenti ku kabiye ku twa kukofyamo, pa kuti tukabe fye itenti limo ilya pa cikuulwa ca mushilo.+

7 “Kabili ukapange utumatenti twa masako ya mbushi+ utwa kufimba pa cikuulwa ca mushilo. Ukapange utumatenti ikumi na kamo (11). 8 Akalitenti kamo kamo kakalepe imikono amakumi yatatu (30),+ na mu bwipi kakabe imikono ine. Utu tumatenti ikumi na kamo (11), tonse fye tukabe utwalingana. 9 Kabili ukalundinkanye utumatenti tusano tweka no tumatenti mutanda (6) na to tweka,+ kabili akalitenti akalenga mutanda akali pa ntanshi ya tumatenti utwalundinkana ukakapetemo imiku ibili. 10 Kabili ukapange utumipeto amakumi yasano (50) pa mpela ya kalitenti, aka kulekeleshako ku tumatenti tusuntinkene, no tumipeto amakumi yasano pa mpela ya kalitenti kambi pa mulundo. 11 Kabili ukapange utwa kukofyamo utwa mukuba+ amakumi yasano (50) no kubika utwa kukofyamo mu tumipeto, e lyo ukalundanye no tumatenti pa kuti tukabe itenti limo.+ 12 Kabili itenti lyashalako ku tumatenti e likapulamo. Hafu we tenti lyashalako e likakopokela ku numa ya cikuulwa ca mushilo. 13 Kabili itenti ilyashalako mu butali bwe tenti umukono umo luno lubali no mukono umo lulya lubali likabe ica kupulamo mu mbali ya cikuulwa ca mushilo, ku kufimba luno lubali na lulya lubali.

14 “Kabili ukapange ica kufimba pe tenti ica mukupo wa mpaanga icakashika kabili ne ca kufimba pa muulu, ica mukupo ya basilu.

15 “Kabili ukapange amafulemu+ ya cikuulwa ca mushilo aya fimuti fya mushita, aya kwimika. 16 Imikono ikumi (10) e kulepa kwe fulemu limo, kabili ifulemu limo na limo likabe umukono umo na hafu mu bwipi. 17 Ifulemu limo na limo likabe no twa kushimpilako tubili utwalundanishiwa kamo ku kabiye. E fyo ukacite ku mafulemu yonse aya cikuulwa ca mushilo. 18 Kabili ukapange amafulemu ya cikuulwa ca mushilo, amafulemu amakumi yabili (20), aya ku lubali ulwalosha ku Negebu, ku kapinda ka ku kulyo.

19 “Kabili ukapange amashinte+ ya silfere amakumi yane (40) aya kuba pe samba lya mafulemu amakumi yabili (20); amashinte yabili pe samba lye fulemu limo ilili no twa kushimpilako tubili. 20 Kabili ku lubali lumbi ulwa cikuulwa ca mushilo, ku kapinda ka ku kuso, kukabe amafulemu amakumi yabili (20),+ 21 na mashinte ya silfere aya yako amakumi yane (40), na mashinte yabili pe samba lye fulemu limo na mashinte yabili pe samba lye fulemu limbi.+ 22 Kumfwa ku numa ya cikuulwa ca mushilo, ku masamba, ukapangileko amafulemu mutanda (6).+ 23 Kabili ukapange amafulemu yabili yakabe pa makoona ya cikuulwa ca mushilo,+ ku numa ya ciko uku no ku. 24 Kabili yakabe ayalingana ukufuma pa nshi kabili yakabe pamo pene ayalingana ukufika pa muulu wa limo na limo ku mupeto wa ntanshi. E fyo yakabe yonse yabili. E yakaba amakoona yabili. 25 Kabili kukabe amafulemu cinekonsekonse (8) na mashinte ya yako aya silfere, amashinte ikumi na mutanda (16), amashinte yabili pe samba lye fulemu limo kabili amashinte yabili pe samba lye fulemu limbi.

26 “Kabili ukapange imilando ya fimuti fya mushita,+ isano iya ku mafulemu iya ku lubali lumo ulwa cikuulwa ca mushilo, 27 kabili imilando isano iya ku mafulemu iya ku lubali lumo ulwa cikuulwa ca mushilo, ne milando isano iya ku mafulemu ya ku lubali lumbi ulwa ku numa ya cikuulwa ca mushilo, ku masamba.+ 28 Kabili umulando wa pa kati ukapule pa kati ka mafulemu ukufuma ku mpela ukufika ku mpela.

29 “Kabili ku mafulemu ukabikeko golde,+ ne mipeto ya yako ukapange iya golde umwa kwikala imilando; kabili ku milando ukabikeko golde. 30 Kabili ukemike icikuulwa ca mushilo ukulingana ne mipangilwe ya ciko iyo ulangilwe mu lupili.+

31 “Kabili ukapange insalu ya kucingilako+ ukubomfya ubushishi bwa bluu no bushishi bwa masako ya mpaanga ubwakashikila kabili ubwakashika ce kabili ubwa kolokondwe umusuma uwapyatwa, ubwapikwilwamo bakerubi.+ 32 Kabili ukacibike pa nceshi shine isha muti wa mushita isho babikako golde. Ishili ne nsunga sha golde. Ishiminine pa mashinte ya silfere yane. 33 Kabili ukakobeke insalu ya kucingilako ku twa kukofeshako no kuleta icipao ca cipangano+ mulya mu kati ka nsalu ya kucingilako; kabili insalu ya kucingilako ikalekanye Umuputule wa Mushilo+ ku Muputule wa Mushilo Sana.+ 34 Kabili ukabike inkupiko pa cipao ca cipangano icili mu Muputule wa Mushilo Nga Nshi.

35 “Kabili ukabike itebulo ku nse ya nsalu ya kucingilako, ne ca kutekapo inyali+ cikaloshanye ne tebulo mu mbali ya cikuulwa ca mushilo lwa ku kapinda ka ku kulyo; ne tebulo ukalibike lwa ku kapinda ka ku kuso. 36 Kabili ukabile ica kucinga+ pa mwinshi wa cikuulwa ca mushilo ukubomfya ubushishi bwa bluu no bushishi bwa masako ya mpaanga ubwakashikila no bwakashika ce no bwa kolokondwe umusuma uwapyatwa. 37 Kabili ukapange inceshi sha muti wa mushita shisano no kubikako golde ukukaba ica kucingilako. Shikabe ne nsunga isha golde. Kabili inceshi ukashipangile amashinte yasano aya mukuba.

27 “Kabili ukapange iciipailo ica fimuti fya mushita, ica mikono isano mu butali ne mikono isano mu bwipi. Iciipailo+ cikabe icalingana monse monse, kabili cikalepe imikono itatu. 2 Kabili ukabike insengo+ sha ciko pa makoona yane aya ciko. Insengo sha ciko shikasolomoke, kabili ukabikeko umukuba.+ 3 Ukapange ne ng’ungulu ya ciko iya kupoosamo imito ya mafuta, na bafosholo ba ciko, ne mbale shafonka isha ciko, ne fya kutunkwilako fya ciko, ne fya kwikata umulilo fya ciko; kabili ifipe fya ciko fyonse ukafipange ifya mukuba.+ 4 Kabili ukacipangile icapikulwa, icapangwa kwi sumbu+ lya mukuba; kabili pe sumbu ukapangilepo imipeto ine iya mukuba pa makoona yane aya ciko. 5 Ukalibike mwi samba lya kamutika ka pa muulu akashinguluka iciipailo, lwa pa nshi, kabili isumbu likabe mupepi na pa kati ka ciipailo.+ 6 Kabili ukapange imitembo ya ciipailo, iyi mitembo ikabe iya cimuti ca mushita, kabili ukabikeko umukuba.+ 7 Kabili imitembo ya ciko ikabikwe mu mipeto, kabili imitembo ikabe ku mbali shibili isha ciipailo pa kucisenda.+ 8 Ukapange icibokoshi ca mapulanga. Nga filya fine akulangile mu lupili, e fyo bakacipange.+

9 “Ukapange ulubansa+ lwa cikuulwa ca mushilo. Ku lubali lwalosha ku Negebu, ku kapinda ka ku kulyo, ulubansa lukabe ne nsalu sha kucingilako isha nsalu iisuma iyapyatwa,+ imikono umwanda umo (100) e butali bwa lubali lumo. 10 Kabili ifyaimikwa fya luko amakumi yabili (20) na mashinte ya fyaimikwa amakumi yabili fikabe ifya mukuba. Utwa kukofyamo utwa fyaimikwa ne fikakilo fya fiko fikabe ifya silfere.+ 11 Cimo cine na ku lubali lwa ku kapinda ka ku kuso mu butali, ifisalu fya kucingilako fikabe imikono umwanda umo (100) mu butali, ne fyaimikwa fya fiko amakumi yabili (20) na mashinte ya fiko amakumi yabili fikabe ifya mukuba, utwa kukofyamo utwa fyaimikwa ne fikakilo fya fiko fikabe ifya silfere.+ 12 Lelo ubwipi bwa lubansa, ku lubali lwa ku masamba lukakwate ifisalu fya kucingilako ifya mikono amakumi yasano (50), ne fyaimikwa fya fiko ikumi (10) na mashinte ya fiko ikumi.+ 13 Kabili ulubansa mu bwipi ku lubali lwa ku kabanga ukulola ukutula akasuba lukabe imikono amakumi yasano (50).+ 14 Kabili ifisalu fya kucingilako fikabe imikono ikumi na isano (15) ku lubali lumo, ifyaimikwa fya fiko fikabe fitatu na mashinte ya fiko yakabe yatatu.+ 15 Kabili ku lubali lumbi ifisalu fya kucingilako fikabe imikono ikumi na isano (15), ifyaimikwa fya fiko fikabe fitatu na mashinte ya fiko yakabe yatatu.+

16 “Kabili ku mpongolo ya mu lubansa kukabe ica kucingilako ica mikono amakumi yabili (20), icapangilwa ku bushishi bwa bluu na ku bushishi bwa masako ya mpaanga ubwakashikila no bwakashika ce no bwa kolokondwe umusuma uwapyatwa, icapangwa na kapikula,+ kabili ifyaimikwa fya luko fikabe fine na mashinte ya fiko yakabe yane.+ 17 Ifyaimikwa fyonse ifyashinguluka ulubansa fikabe ne fikakilo fya silfere, no twa kukofyamo twa fiko utwa silfere lelo amashinte ya fiko yakabe aya mukuba.+ 18 Ulubansa mu butali lukabe imikono umwanda umo (100),+ na mu bwipi lukabe imikono amakumi yasano (50), kabili ifisalu fya kucingilako ulubansa, ifya nsalu iisuma iyapyatwa fikalepe imikono isano, na mashinte ya fyaimikwa yakabe aya mukuba. 19 Kabili ifipe fyonse ifya mu cikuulwa ca mushilo ifibomfiwa ku mulimo onse mulya, ne mpopo shonse isha liko, ne mpopo shonse isha mu lubansa, fikabe ifya mukuba.+

20 “Kabili ukebe abana ba kwa Israele ukuti bakakuletele amafuta ayalengama aya muolife uwatwiwa aya cengelo, ku kusanikila inyali lyonse.+ 21 Mu cikuulwa ca mushilo, ku nse ya nsalu ya kucingilako+ iili mupepi ne cipao ca Cipangano, Aarone na bana bakwe abaume bakateyanye inyali ukuti ileaka icungulo ukufika ulucelo ku cinso ca kwa Yehova.+ Cipope ca muyayaya ku nkulo shabo,+ ico abana ba kwa Israele bakalacita.+

28 “Lelo iwe, ukapalamike Aarone munonko na bana bakwe abaume pamo nankwe ukufuma mu bana ba kwa Israele ukuti balebomba bushimapepo kuli ine,+ Aarone+ na bana bakwe abaume Nadabu na Abihu,+ Eleasari na Itamari.+ 2 Kabili ukabilile Aarone munonko ifya kufwala fya mushilo, ifya kumulenga ukucindama no kuyemba.+ 3 Kabili ukebe bonse aba mitima ya mano iyo naisushamo umupashi wa mano,+ na bo bakabilile Aarone ifya kufwala ifya kumulenga ukuba uwa mushilo, pa kutila akalebomba bushimapepo kuli ine.+

4 “Kabili ifi e fya kufwala ifyo bakabile: tumba wa pa cifuba,+ na efode+ ne ca kufwala cabula amaboko+ ne ca kufwala icapikwilwamo utubokoshi, insalu ya kupomba ku mutwe+ no mushipi;+ kabili bakabilile Aarone munonko na bana bakwe abaume ifya kufwala fya mushilo, pa kutila amombele bushimapepo. 5 Kabili bakabuule golde no bushishi bwa bluu no bushishi bwa masako ya mpaanga ubwakashikila no bwakashika ce no bwa kolokondwe umusuma.

6 “Kabili bakapange efode ukubomfya golde, no bushishi bwa bluu no bushishi bwa masako ya mpaanga ubwakashikila no bwakashika ce no bwa kolokondwe umusuma uwapyatwa, uwapangwa na kapikula.+ 7 Iyi efode ikakwate utwa pa mabeya tubili na to tukabililwe pa mpela shibili isha iko, kabili e fyo ikalundinkane.+ 8 Kabili icimushipi+ ica kukakilako efode, cikabe ica nsalu imo ine, iyapangilwa na golde, no bushishi bwa bluu no bushishi bwa masako ya mpaanga ubwakashikila no bwakashika ce no bwa kolokondwe umusuma uwapyatwa.

9 “Kabili ukabuule utumabwe twa shohamu+ tubili no kulembapo+ amashina ya bana ba kwa Israele,+ 10 amashina yabo mutanda (6) pa kalibwe kamo na mashina yambi mutanda pa kalibwe kambi ukulingana no mo bafyalilwa.+ 11 Ifyo kabasa wa mabwe, alemba pa mabwe, e fyo ukalembe pa tumabwe tubili ukulingana na mashina ya bana ba kwa Israele.+ Ukabikepo no twa kufyantikamo aya mabwe utwa golde.+ 12 Kabili ukabike amabwe yabili pa twa pa mabeya ya pali efode ukuba aya kwibukishishako abana ba kwa Israele;+ na Aarone akalasenda amashina yabo ku cinso ca kwa Yehova pa twa pa mabeya yakwe yabili ku kuba ica kwibukishishako. 13 Kabili ukapange utwa kufyantikamo amabwe utwa golde, 14 no tuminyololo tubili utwa golde yalopololwa.+ Ukatupyate kwati mwando; kabili ukekashe uto tuminyololo utwaba ngo mwando ku twa pa mabeya.+

15 “Kabili ukapange tumba wa pa cifuba uwa bupingushi+ ukulingana ne fyo kapikula apikula. Ukamubile nge nsalu ya efode. Ukubomfya golde, ubushishi bwa bluu no bwa masako ya mpaanga ubwakashikila no bwakashika ce no bwa kolokondwe umusuma uwapyatwa, e fyo ukabile.+ 16 Uyo tumba akabe ne mbali shine ishalingana ilyo apetwa, akalepe nge cisansa mu butali e lyo na mu bwipi na mo akalepe nge cisansa.+ 17 Kabili ukabikepo amabwe, mu mitande ine iya mabwe.+ Mu mutande wa ntanshi mukabe rubi,+ topasi+ na emarodi.+ 18 Kabili mu mutande wa bubili, mukabe tokwasi,+ safiri+ na yaspi.+ 19 Na mu mutande wa butatu mukabe ilibwe lya leshemu, agate+ na ametusti.+ 20 Kabili mu mutande wa cine, mukabe krusoliti+ na shohamu+ na yade. Yakabikwe mu tulindi twa golde.+ 21 Kabili amabwe yakalingane ne mpendwa ya mashina ya bana ba kwa Israele, abana ikumi na babili (12) ukulingana na mashina yabo.+ Yakalembwepo nga filya balemba pa ca kufwatikilako, cila muntu ukulingana ne shina lyakwe, ukulingana ne mikowa ikumi na ibili.+

22 “Kabili pali tumba wa pa cifuba ukapangilepo akamunyololo akapyatwa ngo mwando, aka golde iyalopololwa.+ 23 Kabili ukapange utumipeto tubili utwa golde pali tumba wa pa cifuba,+ no kutubika pa mpela shibili isha pali tumba wa pa cifuba. 24 Kabili ukapushe utumyando tubili utwa golde mu tumipeto tubili utuli pa mpela ya pali tumba wa pa cifuba.+ 25 Kabili impela shibili isha uto tumyando tubili ukashikofye pa tupaafya tubili, kabili ukatubike pa twa pa mabeya ya pali efode ku ntanshi.+ 26 Kabili ukapange utumipeto tubili utwa golde no kutubika ku mpela shibili isha pali tumba wa pa cifuba uwa pali efode lwa mu kati.+ 27 Kabili ukapange utumipeto tubili utwa golde no kutubika kwi samba lya twa pa mabeya tubili utwa pali efode, tukaloshe ku nse, mupepi na pa kulundanishisha, pa muulu wa cimushipi ca efode.+ 28 Kabili utumipeto twa kuli tumba wa pa cifuba bakatukakile ku tumipeto twa kuli efode ku mwando wa bluu, pa kuti tumba wa pa cifuba akabe lwa pa muulu wa cimushipi ca kuli efode no kuti tumba wa pa cifuba ekafuma pali efode.+

29 “Kabili Aarone akalesenda amashina ya bana ba kwa Israele pali tumba wa pa cifuba uwa bupingushi pa mutima wakwe pa kwingila mu Muputule wa Mushilo ku kuba ica kwibukisha inshiku shonse ku cinso ca kwa Yehova. 30 Kabili ukabike Urimu+ na Tumimu muli tumba wa pa cifuba uwa bupingushi, kabili fikaleba pa cifuba ca kwa Aarone ilyo aingila ku cinso ca kwa Yehova; kabili inshiku shonse Aarone akalesenda pa cifuba cakwe ifya kwishibilako ubupingushi+ pa bana ba kwa Israele ku cinso ca kwa Yehova.

31 “Kabili ukabile ica kufwala cabula amaboko ica kufwalilapo efode, ica nsalu ya bluu yeka yeka.+ 32 Cikakwate na pa kupisha umutwe pa kati ka ciko. Mu mukoshi wa ciko mukabililwe ica ku-ukosha, icapangwa na kapika. Ukabe ngo mukoshi wa ca kucinga icifuba, ukuti wikalepuka.+ 33 Kabili ku mufukilo ukabikeko amapomegranate aya bushishi bwa bluu no bwa masako ya mpaanga ubwakashikila no bwakashika ce, pa muulu wa mufukilo ukushingulusha, ne nyenjele+ sha golde pa kati ka yako; 34 inyenjele ya golde no mupomegranate pa mufukilo wa ca kufwala cabula amaboko ukushingulusha.+ 35 Kabili Aarone akacifwale pa kubomba, ne ciunda cikalafumako cikomfwike ilyo aingila mu muputule wa mushilo ku cinso ca kwa Yehova na lintu afumamo, pa kuti efwa.+

36 “Kabili ukapange akapaapaatu kabeka aka golde iyalopololwa no kulembapo nga filya balemba pa ca kufwatikilako, ukalembepo ifilembo fya kuti, ‘Bumushilo bwa kwa Yehova.’+ 37 Kabili ukakakakile ku kamwando ka bluu, kabili akapaapaatu kabeka kakaleba pa nsalu ya kupomba ku mutwe.+ Kakaleba pa ntanshi ya nsalu ya kupomba ku mutwe. 38 Kabili kakaleba pa mpumi ya kwa Aarone, kabili Aarone akashingamwa pa membu ishikacitwa ku fya mushilo,+ ifyo abana ba kwa Israele bakalenga ukuba ifya mushilo, e kuti, ifya bupe fyabo fyonse ifya mushilo; kabili kakabe pa mpumi yakwe inshiku shonse, pa kuti bakapokelelwe+ ku cinso ca kwa Yehova.

39 “Kabili ukabile ica kufwala cakwatamo utubokoshi ica nsalu iisuma, ukapange ne ca kupomba ku mutwe ica nsalu iisuma,+ ukapange no mushipi,+ uwapikulwa na kapikula.

40 “Kumfwa bamwana Aarone ukababilile ifya kufwala,+ kabili ukabapangile ne mishipi, e lyo ne fya kufwala ku mutwe+ ifya kubalenga ukucindama no kuyemba.+ 41 Ukafwike ifi Aarone munonko na bana bakwe abaume abali nankwe, kabili ukabasube+ no kubapeela amaka*+ no kubalenga ukuba aba mushilo, na bo bakabombe bushimapepo kuli ine. 42 Kabili ukababilile utuputula twa mu kati utwa nsalu ku kufiimba umubili uuli pa mbilibili.+ Tukalepe ukufuma pa musana ukufika mu matanta. 43 Kabili Aarone na bamwane bakaletufwala ilyo baingila mu cikuulwa ca kukumaninako nelyo ilyo bapalamina ku ciipailo ku kubombela mu muputule wa mushilo, epali bapeelwa umulandu no kufwa. Lifunde lya muyayaya kuli Aarone na ku bana bakwe abakakonkapo.+

29 “Kabili ifi e fyo ukacite kuli bena pa kubasangulula pa kuti bamombele bushimapepo: Ukabuule ing’ombe iilume iinono, na basukusuku babili+ abatuntulu,+ 2 no mukate uushatutumuka no mukate uwasubwako amafuta no mukate uwapaapaatala uushatutumuka uwasubwako amafuta.+ Ukapange iyi mikate ukubomfya ubuunga bwapeleka ubwa ngano. 3 Kabili ukaibike mu museke no kuituula umutuulo ninshi ili mu museke mwine,+ kabili ukatuule ne ng’ombe iilume na basukusuku babili.

4 “Kabili ukapalamike Aarone na bana bakwe abaume pa mwinshi+ wa cikuulwa ca kukumaninako, kabili ukabebe bakasambe mu menshi.+ 5 E lyo ukabuule ifya kufwala,+ kabili ukafwike Aarone ica kufwala icitali ne ca kufwala cabula amaboko ica kufwalilapo efode na efode na tumba wa pa cifuba, no kufikaka ku cimushipi ca kuli efode.+ 6 Kabili ukamupombe insalu ku mutwe no kubikako icishibilo ca kuipeela ica mushilo.+ 7 Kabili ukabuule amafuta ya kusubila+ bushimapepo no kuyapongolwela pa mutwe wakwe no kumusuba.+

8 “E lyo ukapalamike abana bakwe abaume no kubafwika ifya kufwala ifitali.+ 9 Kabili ukabakake imishipi, Aarone na bana bakwe, kabili ukabapombe ifya kufwala ku mutwe; kabili bushimapepo bukabe bwabo, ici cipope ca muyayaya.+ E fyo ukapeele Aarone amaka pamo na bana bakwe abaume.+

10 “E lyo ukapalamike ng’ombe iilume ku cikuulwa ca kukumaninako, kabili Aarone na bana bakwe abaume bakabike iminwe yabo pa mutwe wa ng’ombe.+ 11 Kabili ukepaile ing’ombe iilume ku cinso ca kwa Yehova, pa mwinshi wa cikuulwa ca kukumaninako.+ 12 E lyo ukabuulepo umulopa+ wa ng’ombe iilume no ku-ubika ku nsengo sha ciipailo ku munwe obe,+ no mulopa onse uwashala ukapongolwele pe shinte lya ciipailo.+ 13 Kabili ukabuule amafuta+ yonse ayafimba amala,+ ne nsongo ya libu,+ ne mfyo shibili na mafuta ayaliko, no kufifutumwina pa ciipailo.+ 14 Lelo umunofu wa ng’ombe ne nkanda ya iko na mafi ya iko ukoce mu mulilo ku nse ya nkambi.+ Mutuulo wa pa lubembu.

15 “Kabili ukabuule sukusuku umo,+ e lyo Aarone na bana bakwe abaume bakabike iminwe yabo pa mutwe wa kwa sukusuku.+ 16 Kabili ukepaye sukusuku no kubuula umulopa wakwe no ku-usansa ukushingulusha iciipailo.+ 17 Kabili sukusuku ukamuputaule fipimfya fipimfya, kabili ukasambe amala yakwe+ na molu yakwe no kubika pamo ifipimfya fyakwe ukufika ku mutwe wakwe. 18 Kabili sukusuku onse ukamufutumwine pa ciipailo. Mutuulo wa koca+ uwa kuli Yehova, uwa kacena kasuma.+ Mutuulo wa pa mulilo kuli Yehova.

19 “E lyo ukabuule sukusuku umbi, kabili Aarone na bana bakwe abaume bakabike iminwe yabo pa mutwe wa kwa sukusuku.+ 20 Kabili ukepaye sukusuku no kubuulapo umulopa wakwe no ku-ubika pa kalebelebe ka kutwi kwa ku kulyo ukwa kwa Aarone na pa tulebelebe twa matwi ya ku kulyo aya bana bakwe abaume na pa fikumo fyabo ifya ku maboko ya ku kulyo na pa fikondo fikalamba ifya ku makasa ya ku kulyo,+ kabili ukasanse umulopa ukushingulusha iciipailo. 21 Kabili ukabuulepo umulopa uuli pa ciipailo kabili ukabuulepo na mafuta ya kusubilako,+ no kusansa pali Aarone na pa fya kufwala fyakwe na pa bana bakwe abaume na pa fya kufwala fya bana bakwe abaume abali nankwe, ukuti Aarone ne fya kufwala fyakwe na bana bakwe abaume ne fya kufwala fya bana bakwe abaume abali nankwe babe aba mushilo.+

22 “Kabili kuli sukusuku ukabuuleko amafuta na mafuta ya ku mucila+ na mafuta ayafimba amala, ne nsongo ya libu, ne mfyo shibili na mafuta ayaliko, no kuulu kwa ku kulyo,+ pantu ni sukusuku wa pa kupeela bushimapepo;+ 23 kabili ukabuule no mukate uwabulungana no mukate uwasubwako amafuta no mukate uwapaapaatala ukufuma mu museke wa mikate iishatutumuka iili ku cinso ca kwa Yehova.+ 24 Kabili fyonse ifi ukafibike mu ndupi sha kwa Aarone na mu ndupi sha bana bakwe abaume,+ kabili ukafisunshe uku no ku, uyu mutuulo wa kusunsha ku cinso ca kwa Yehova.+ 25 Kabili ukafifumye mu minwe yabo no kufifutumwina pa ciipailo apali umutuulo wa koca uwa kacena kasuma aka kubweshamo umutima ku cinso ca kwa Yehova.+ Mutuulo wa pa mulilo kuli Yehova.+

26 “Kabili ukabuule icisao ca kwa sukusuku wa pa kupeela bushimapepo+ kuli Aarone, no kucisunsha uku no ku, ukuti cibe umutuulo wa kusunsha ku cinso ca kwa Yehova, kabili ici e cikaba icipande cobe. 27 Kabili ukasangulule icisao+ ca mutuulo wa kusunsha pamo no kuulu kwa mutuulo wa mushilo ukwasunshiwe no kusangulwa ukufuma pali sukusuku wa kupeelelapo bushimapepo,+ icipande ca kwa Aarone ne ca bana bakwe abaume. 28 Kabili cikabe ca kwa Aarone kabili ica bana bakwe abaume, kabili ici e cipope ico abana ba kwa Israele bakalekonka umuyayaya, pantu cipande ca mushilo;+ kabili e co abana ba kwa Israele bakalasangula. Cikaba e musangulo wabo kuli Yehova ukufuma pa malambo yabo aya mutende.+

29 “Kabili ifya kufwala fya mushilo+ ifya kwa Aarone fikaba fya bana bakwe abaume+ abakamukonkapo ku kubasubilamo+ no kubapeelelamo amaka ya bushimapepo.+ 30 Shimapepo uwamupyana ukufuma pa bana bakwe abaume kabili uwaingila mu cikuulwa ca kukumaninako ku kubombela mu muputule wa mushilo akafifwale inshiku cinelubali (7).+

31 “Kabili ukabuule sukusuku wa kupeelelapo bushimapepo, no kwipika iyi nama mu muputule wa mushilo.+ 32 Kabili Aarone na bana bakwe abaume bakalye+ inama ya kwa sukusuku no mukate uuli mu museke pa mwinshi wa cikuulwa ca kukumaninako. 33 Kabili bakalye umutuulo wa kwelelwapo imembu uwatuulilwe ilyo balepeelwa amaka ya bushimapepo, pa kutila babe aba mushilo.+ Lelo umweni ekalyako, pantu fya mushilo.+ 34 Kabili nga kwashalako inama ya pa kupeela bushimapepo napamo imikate ukufika ku lucelo, e lyo ukoce ifikashalako mu mulilo.+ Te kuti bafilye, pantu fya mushilo.

35 “Kabili e fyo ukacite kuli Aarone na ku bana bakwe abaume ukulingana na fyonse ifyo nakwebele.+ Cikakusendela inshiku cinelubali (7) pa kubapeela amaka ya bushimapepo.+ 36 Kabili ukaletuula cila bushiku ing’ombe iilume ukuba umutuulo wa pa lubembu uwa kufimba pa membu,+ kabili ukasangulule iciipailo ku membu pa kufimba pa membu sha ciko, kabili ukacisube+ pa kuti cikabe ica mushilo. 37 Cikakusendela inshiku cinelubali (7) ukusangulula iciipailo, kabili ukacilenge ukuba ica mushilo+ ukuti cikabe iciipailo ica mushilo nga nshi.+ Onse uwakumya ku ciipailo afwile ukuba uwa mushilo.+

38 “Kabili ifi e fyo ukatuula pa ciipailo: abana ba mpaanga babili aba mwaka umo, e bo lyonse ukalatuula cila bushiku.+ 39 Kabili ukaletuula umwana wa mpaanga umo ulucelo,+ kabili umwana wa mpaanga uwashalapo ukalemutuula pa cungulo cinono.+ 40 Kabili umwana wa mpaanga uwa pa kubala akatuulilwa pamo no lupe lwa bunga bwapeleka+ ubo basakanya na makapu yatatu aya mafuta ayafuma ku miolife iyatwiwa, no mutuulo wa mwangashi+ amakapu yatatu. 41 Kabili ukaletuula umwana wa mpaanga uwa cibili pa cungulo cinono. Ukalemutuulila pamo no mutuulo wa ngano+ ngo mutuulo wa ngano uwa lucelo uutuulilwa pamo no mutuulo wa mwangashi, pa kuti ukabe akacena kasuma aka kubweshamo umutima, uyu mutuulo wa koca kuli Yehova. 42 Mutuulo wa koca uwa lyonse+ ku nkulo shenu uukalatuulwa pa mwinshi wa cikuulwa ca kukumaninako ku cinso ca kwa Yehova, uko nkamoneka kuli imwe ku kulanda na iwe kulya.+

43 “Kabili e ko nkamoneka ku bana ba kwa Israele, na ko kukasangululwa ku bukata bwandi.+ 44 Kabili nkasangulula icikuulwa ca kukumaninako ne ciipailo; kabili nkasangulula+ Aarone na bana bakwe abaume pa kuti bamombele bushimapepo. 45 Kabili nkekala mu kati ka bana ba kwa Israele, kabili nkaba Lesa wabo.+ 46 Kabili bakeshiba ukuti nine Yehova Lesa wabo, uwabafumishe mu calo ca Egupti ukuti njikale mu kati kabo.+ Nine Yehova Lesa wabo.+

30 “Kabili ukapange iciipailo ica kufutumwinapo ifyanunkila;+ ukacipangile ku fimuti fya mushita. 2 Cikabe umukono umo mu butali no mukono umo mu bwipi, kabili cikalepe imikono ibili. Insengo sha ciko shikabe ishasaalala.+ 3 Kabili ukabikeko golde iyalopololwa, pa muulu wa ciko na mu mbali ukushingulusha na ku nsengo sha ciko; kabili mu mpela ukashingulushemo umutika wa golde.+ 4 Kabili ukapangileko imipeto ibili iya golde. Ukaibikile mwi samba lya mutika wa golde mu mbali uku no ku, mu mbali shibili ishaloshanya, e mwa kwingisha imitembo ya kucisendelako.+ 5 Kabili imitembo ukaipangile ku fimuti fya mushita no kubikako golde.+ 6 Kabili ukacibike pa ntanshi ya nsalu ya kucingilako iili mupepi ne cipao ca cipangano,+ pa ntanshi ya nkupiko iili pa muulu wa cipao ca Cipangano, uko nkamoneka kuli iwe.+

7 “Kabili Aarone akafutumwinepo+ icushi ca fyanunkila.+ Cila lucelo, ilyo awamya inyali,+ akafifutumune. 8 Kabili ilyo Aarone ayasha inyali pa cungulo cinono, akafifutumune. Cushi ca fyanunkila ica pe ku cinso ca kwa Yehova ku nkulo shenu. 9 Mwikaninikapo ifyanunkila+ fimbi nelyo umutuulo wa koca nelyo umutuulo wa ngano; kabili mwiketulwilapo umutuulo wa mwangashi. 10 Kabili Aarone akasangulule insengo sha ciko umuku umo mu mwaka.+ Akacisangulwile ku mulopa wa pa mutuulo wa pa lubembu+ umuku umo mu mwaka mu nkulo shenu. Ca mushilo nga nshi kuli Yehova.”

11 Kabili Yehova akonkenyepo ukusosa kuli Mose, ati:12 “Lyonse ilyo wapenda abana baume ba kwa Israele bonse,+ e lyo cila muntu akapeele icilubula ca mweo wakwe kuli Yehova pa kubapenda,+ pa kuti ciikesa pali bena icikuko ilyo ulebapenda.+ 13 Ifi e fyo bonse abapita ukuya ku bapendelwe bakapeela: hafu we shekele kuli shekele wa mu muputule wa mushilo.+ Amagera amakumi yabili (20) yalingene ne shekele limo. Umusangulo wa kupeela Yehova ni hafu we shekele.+ 14 Onse uwapita ukuya ku bapendelwe ukutula pa wa myaka amakumi yabili (20) no kucilapo akapeela ica musangulo ca kwa Yehova.+ 15 Aba fyuma bekapeela ifingi, kabili ababusu bekapeela ificepele pali hafu we shekele,+ pa kuti ica musangulo ca kwa Yehova cipeelwe ku kufimba pa membu shenu.+ 16 Kabili ukapoke ku bana ba kwa Israele indalama sha silfere isha kufimba pa membu no kushipeela ku milimo ya mu cikuulwa ca kukumaninako,+ ukuti shibe ku bana ba kwa Israele ica kwibukisha ku cinso ca kwa Yehova, ku kufimba pa membu shenu.”

17 Kabili Yehova akonkenyepo ukusosa kuli Mose ati:18 “Ukapange ica kubikamo amenshi ya kusamba+ ica mukuba ne ca kucitekapo ica mukuba, kabili ukacibike pa kati ka cikuulwa ca kukumaninako ne ciipailo, ukabikemo na menshi.+ 19 Kabili palya e po Aarone na bana bakwe abaume bakalasamba iminwe yabo na makasa yabo.+ 20 Pa kwingila mu cikuulwa ca kukumaninako, na lintu balepalama ku ciipailo ku kubomba pa kuti bafutumune ica mutuulo wa pa mulilo kuli Yehova+ bakasambe mu menshi pa kuti befwa. 21 Kabili bakasambe iminwe yabo na makasa yabo pa kuti befwa,+ kabili ici cikabe cipope kuli bena umuyayaya, kuli Aarone na ku bana bakwe mu nkulo shabo.”+

22 Kabili Yehova akonkenyepo ukusosa kuli Mose ati: 23 “Nomba iwe, ukabuule ifyanunkila ubusaka:+ ifinyamuti fya muri+ uwa matoni yatikama amashekele imyanda isano (500), na kinamone+ uwanunkila hafu wa cipendo ca muri,* amashekele imyanda ibili na makumi yasano (250), na kalamosi+ uwanunkila amashekele imyanda ibili na makumi yasano, 24 na kasia+ amashekele imyanda isano (500) ku kufina kwe shekele lya mu muputule wa mushilo,+ na galoni* imo iya mafuta ya miolife. 25 E lyo ukapangemo amafuta ya mushilo aya kusubilako, amafuta ayatikama, ayatobenkanamo kabili ayapangwa bwino icine cine.+ Yakabe amafuta ya mushilo aya kusubilako.+

26 “Kabili ukayasube ku cikuulwa ca kukumaninako+ na ku cipao ca cipangano, 27 kwi tebulo na ku fipe fya liko fyonse, ku ca kutekapo inyali na ku fipe fya ciko, ku ca kufutumwinapo ifyanunkila, 28 na ku ciipailo ca mutuulo wa koca na ku fipe fya ciko fyonse na ku ca kubikamo amenshi ya kusamba na ku ca kucitekapo. 29 Kabili ukafilenge ukuba ifya mushilo pa kuti fikabe ifya mushilo nga nshi.+ Onse uwafikumya akaba uwa mushilo.+ 30 Kabili ukasube Aarone+ na bana bakwe abaume,+ no kubasangulula pa kuti bamombele bushimapepo.+

31 “Kabili ukasose ku bana ba kwa Israele auti, ‘Aya yakatwalilile ukuba amafuta yandi aya mushilo aya kusubilako ku nkulo shenu.+ 32 Te ya kusuba pa mubili wa muntu, kabili mwikapanga ayapalanako. Ya mushilo. Yakabe aya mushilo kuli imwe lyonse. 33 Onse uwapanga amafuta ayatikama nga aya no kusuba umbi umbi, akepaiwe.’”+

34 Kabili Yehova akonkenyepo ukusosa kuli Mose ati: “Buula ifyanunkila ifi:+ natafu na onuki na kelebena uwanunkila na libani uwalengama.+ Fibe ifya mulingo umo wine. 35 Kabili upangemo icanunkila,+ icasakana bwino, icapangwa bwino icine cine, icalungwamo umucele,+ icasanguluka, ica mushilo. 36 Kabili utwepo cimo mpaka cibe ubuunga ubwapeleka no kubikapo bumo ku cinso ca cipao ca Cipangano mu cikuulwa ca kukumaninako,+ uko nkamoneka kuli iwe.+ Fikabe ifya mushilo nga nshi kuli imwe. 37 Kabili icanunkila ico ukapanga ku fyatobenkana ifi, mwikaipangila.+ Mukalecimona ukuti ca mushilo kuli Yehova inshiku shonse.+ 38 Onse uukapanga icaba nge ci pa kuti alenunshako akepaiwe.”+

31 Kabili Yehova akonkenyepo ukusosa kuli Mose, ati: 2 “Mona, naita Besalele+ mwi shina, mwana Uri, mwana Huri, uwa mu mukowa wa kwa Yuda.+ 3 Kabili nkamwisushamo umupashi wa kwa Lesa ku kuba na mano no mucetekanya no kwishiba no musango onse uwa kupanga ifyalekanalekana,+ 4 ku kwelenganya ifya kupangapanga, ukubomfya golde na silfere no mukuba,+ 5 no kubomfya amabwe pa kufipanga+ no kubomfya ifimuti ku mulimo onse uwa fya kupangapanga.+ 6 Kabili, mona! nabika ena pamo na Oholiabu mwana Ahisamaki uwa mu mukowa wa kwa Dani,+ na mu mutima wa muntu onse uwa mano nabikamo amano, pa kuti bapange fyonse ifyo nkwebele:+ 7 icikuulwa ca kukumaninako+ ne Cipao+ ca cipangano ne nkupiko iili pali+ cena, ne fipe fyonse ifya cikuulwa ici, 8 ne tebulo ne fipe fya liko,+ ne ca kutekapo inyali ica golde iyalopololwa ne fipe fya ciko fyonse,+ ne ca kufutumwinapo ifyanunkila,+ 9 ne ciipailo ca mutuulo wa koca ne fipe fya ciko fyonse,+ ne ca kubikamo amenshi ya kusamba ne ca kucitekapo,+ 10 ne fya kufwala ifyapikulwa bwino icine cine ne fya kufwala fya mushilo ifya kwa Aarone shimapepo ne fya kufwala fya bana bakwe abaume ifya kubombelamo bushimapepo;+ 11 na mafuta ya kusubilako ne fyanunkila ifya mu muputule wa mushilo.+ Ukulingana na fyonse ifyo nkwebele e fyo bakacite.”

12 Kabili Yehova atile kuli Mose:13 “Nomba, sosa ku bana ba kwa Israele auti, ‘Pali fyonse, mulesunga maka maka amasabata yandi,+ pantu e cishibilo cili pali ine na imwe mu nkulo shenu e pa kuti mwishibe ukuti ine ne Yehova nine ndemusangulula.+ 14 Kabili mulesunga isabata, pantu lya mushilo kuli imwe.+ Uwalisuula ukwipaiwa akepaiwe.+ Ngo muntu onse abomba umulimo pali ubu bushiku, uyo muntu akepaiwe.+ 15 Mu nshiku mutanda (6) e mo mulebomba imilimo, lelo mu bushiku bwalenga cinelubali (7) lisabata lya kutuusha kuli fyonse.+ Bushiku bwa mushilo kuli Yehova. Onse uwabomba umulimo mu bushiku bwe sabata ukwipaiwa akepaiwe. 16 Kabili abana ba kwa Israele bakalesunga isabata, pa kuti bakalelisefya mu nkulo shabo. Ici cipangano ca muyayaya.+ 17 Cishibilo ca muyayaya+ icili pali ine na pa bana ba kwa Israele, pantu mu nshiku mutanda (6) e mo Yehova alengele imyulu ne sonde na mu bushiku bwalenga cinelubali (7) e mo alekele ukubomba no kutuusha.’”+

18 Awe ilyo fye Lesa apwishishe ukulanda nankwe pa Lupili lwa Sinai, apeele Mose amabwe yapaapaatala yabili aya Cipangano,+ amabwe ayalembwapo ku munwe wa kwa Lesa.+

32 Awe abantu bamwene ukuti Mose akokola ukutentemuka ulupili.+ E ico bailelongana kuli Aarone no kumweba ati: “Ima, tupangile lesa uwa kututangilila,+ pantu uyu Mose, uwatufumishe mu Egupti,+ tatwishibe icimucitikile.” 2 E lyo Aarone atile: “Fuuleni amasikiyo+ ya golde ayali ku matwi ya bakashi benu, na yali ku matwi ya bana benu abaume na bana benu abanakashi no kuyaleta kuli ine.” 3 Awe abantu bonse bafuulile amasikiyo ya golde ayali ku matwi yabo no kuyatwala kuli Aarone. 4 Kabili apokele golde iyali mu minwe yabo, no kupangamo+ umwana wa ng’ombe uwaengwa+ ukubomfya imbaso. Na bo batile: “Uyu e Lesa obe, we Israele, uwakutungulwile ukukufumya mu calo ca Egupti.”+

5 Ilyo Aarone amwene ifi, akuulile iciipailo ku cinso ca mwana wa ng’ombe. E lyo Aarone abilikishe no kutila: “Mailo kukaba umutebeto kuli Yehova.” 6 Awe ubushiku bwakonkelepo balicelele ukubuuka, kabili batendeke ukutuula imituulo ya koca no kuleta amalambo ya mutende. E lyo abantu baikele balalya no kunwa. Kabili balimine balasangalala.+

7 E lyo Yehova aebele Mose ati: “Kabiye, tentemuka, pantu abantu bobe abo wafumishe mu calo ca Egupti bayonaula.+ 8 Bafuma bwangu mu nshila nabebele ukuyamo.+ Nabapanga umwana wa ng’ombe uwaengwa kabili balemufukamina no kumwipaila amalambo no kutila, ‘Uyu e Lesa obe, we Israele, uwakutungulwile ukukufumya mu calo ca Egupti.’”+ 9 Kabili atile kuli Mose: “Nimbamona aba bantu kabili bantu abatalama imikoshi.+ 10 E ico nomba ndeka fye, ukuti ubukali bwandi bwise pali bena pa kuti mbalofye,+ no kulenga iwe ukuba uluko ulukalamba.”+

11 Awe Mose aeseshe ukubweshamo umutima wa kwa Yehova Lesa wakwe+ no kutila: “Mwe Yehova, cinshi ico ubukali+ bwenu bwaimina abantu benu abo mwafumishe mu calo ca Egupti ku maka ayakalamba na ku kuboko ukwakosa? 12 Bushe abena Egupti+ tabakasose abati, ‘Alibapangiile ububi pa kubafumya pa kuti abepaile mu mpili no kubalofya pano isonde’?+ Bweshenimo ubukali bwenu ubupya ngo mulilo+ no kulanguluka+ pa bubi mulefwaya mucite abantu benu. 13 Ibukisheni Abrahamu, Isaki na Israele ababomfi benu, abo mwailapileko mwe bene,+ no kutila, ‘Nkafusha abana benu nge ntanda sha mu muulu,+ ne calo conse ici ico nasalile nkacipeela ku bana benu,+ ukuti cibe cabo umuyayaya.’”+

14 Awe Yehova alangulwike pa bubi ubo atile alaleta pa bantu bakwe.+

15 E lyo Mose apilibwike no kutentemuka ulupili+ na mabwe yabili ayapaapaatala aya Cipangano+ mu minwe yakwe, ayalembelwepo konse konse. Yalembelwepo uku no ku. 16 Kabili imipangilwe ya mabwe yali ya kwa Lesa, ne milembele yali milembele ya kwa Lesa iyalembelwe pa mabwe yapaapaatala.+ 17 Kabili Yoshua aumfwile icongo ca bantu pantu balepunda, kabili asosele kuli Mose ati: “Muli icongo ca bulwi+ mu nkambi.” 18 Lelo Mose atile:

“Te congo ca bantu abaleimba pa mulandu wa kucimfya,+

Kabili te congo ca baleimba pa mulandu wa kucimfiwa;

Congo ca bantu abaleimba pali fimbi fye ico ine ndeumfwa.”

19 Awe ilyo fye apaleme ku nkambi no kumona umwana wa ng’ombe+ na bantu balecinda, e lyo Mose akalipe, kabili apo pene fye apoosele amabwe ayapaapaatala ayali mu minwe yakwe no kuyatobela mwi samba lya lupili.+ 20 E lyo abuulile umwana wa ng’ombe uo bapangile no kumoca mu mulilo no kumushonaula asuka aba ulukungu,+ e lyo aulwilile ulo lukungu pa menshi+ no kulenga abana ba kwa Israele ukunwa yalya menshi.+ 21 Pa numa Mose aipwishe Aarone ati: “Cinshi ico aba bantu bacitile kuli iwe pa kuti ulete pali bena ulubembu ulukalamba?” 22 Na o Aarone atile: “Shi mwikalipa, mwe shikulu. Mwalishiba bwino aba bantu, ukuti balemenena ku bubi.+ 23 E ico batile kuli ine, ‘Tupangile lesa uwa kututangilila,+ pantu tatwishibe icacitika kuli uyu Mose, uwatufumishe mu calo ca Egupti.’24 Na ine e pa kusosa kuli bena nati, ‘Ni bani bakwete golde? Baifuule no kuileta kuli ine.’ E fyo naipoosele mu mulilo, mwafuma no yu mwana wa ng’ombe.”

25 Awe Mose alimwene ifyo abantu bailekeleshe, pantu Aarone abalekele bailekeleshe+ ku kuiseebanya ku balwani babo.+ 26 Kabili Mose aiminine pa mpongolo ya nkambi no kutila: “Nani ali ku lubali lwa kwa Yehova? Ese kuli ine!”+ Awe abana baume bonse aba kwa Lebi balongene kuli Mose. 27 E lyo abebele ati: “Ifi e fyo Yehova Lesa wa kwa Israele asosele, ‘Cila muntu abike ulupanga lwakwe pe tanta lyakwe. Piteni mu nkambi ukufuma ku mpongolo imo no kuya ku mpongolo imbi kabili umuntu onse epaye munyina, umunankwe, na lupwa lwakwe.’”+ 28 Awe abana baume ba kwa Lebi+ bacitile ukulingana ne fyo Mose abebele, ica kuti bulya bushiku abaume amakana yatatu (3,000) balifwile. 29 Kabili Mose akonkenyepo ukusosa ati: “Koseni ukubombela Yehova,+ pantu umo umo pali imwe alelwisha umwana wakwe umwaume kabili alelwisha na munyina,+ e pa kuti Lesa amupaale lelo.”+

30 Awe ubushiku bwakonkelepo Mose asosele ku bantu ati: “Namubembuka ulubembu ulukalamba,+ e ico nomba nalanina kuli Yehova. Nalimo kuti nafimba pa lubembu lwenu.”+ 31 E fyo Mose abwelele kuli Yehova no kutila: “Iye, ala aba bantu nababembuka ulubembu ulukalamba, pantu bapangile kalesa ka golde!+ 32 Nomba eleleni ulubembu lwabo,+—lelo nga mwakaana, mumfuute+ na mwi buuku+ lyenu ilyo mwalemba.” 33 Lelo, Yehova atile kuli Mose: “Uubembukile ine, e o ndefuuta mwi buuku lyandi.+ 34 Nomba, isa, tungulula abantu uko nakwebele. Mona! Malaika wandi akakutangilila,+ kabili mu bushiku bwa kukanda nkakanda abantu pa lubembu lwabo.”+ 35 Na Yehova apumine abo bantu pantu bapangile umwana wa ng’ombe, uo Aarone apangile.+

33 Kabili Yehova atile kuli Mose: “Kabiye, fuma pano, iwe na bantu abo watungulwile ukufuma mu calo ca Egupti,+ muye ku calo ico nalapile kuli Abrahamu, kuli Isaki na kuli Yakobo, nati, ‘Nkacipeela ku bana benu.’+ 2 Kabili nkatuma malaika uwa kukutangilila+ kabili nkatamfyamo abena Kanaani, abena Amore, na bena Hiti na bena Perisi, abena Hibi na bena Yebusi;+ 3 ku calo ukwaba umukaka no buci,+ pantu nshapite mu kati kenu, pantu muli bantu abatalama imikoshi,+ epali namulofesha mu nshila.”+

4 Ilyo abantu baumfwile aya mashiwi ayabi, balaloosha;+ kabili takwali nangu umo uwafwele utwa kuikobaika twakwe. 5 Kabili Yehova akonkenyepo ukusosa kuli Mose ati: “Sosa ku bana ba kwa Israele auti, ‘Muli bantu abatalama imikoshi.+ Mu nshita fye iinono+ kuti napita mu kati kenu no kumulofya. E ico nomba fuuleni utwa kuikobaika twenu, pa kuti njishibe ico nalacita kuli imwe.’”+ 6 Kanshi ukufuma fye pa lupili lwa Horebu,+ abana ba kwa Israele tabatalile na kabili abafwala utwa kuikobaika twabo.

7 Lelo Mose abuulile itenti lyakwe no kulitanika ku nse ya nkambi, ukulitalusha ku nkambi; kabili alinike ati itenti lya kukumaninako. Kabili onse uwafwaya ukwipusha+ Yehova aleya kwi tenti lya kukumaninako, ilyali ku nse ya nkambi. 8 Kabili ilyo line fye Mose afuma no kuya kwi tenti, abantu bonse baleima,+ kabili umuntu onse aiminine pa mwinshi we tenti lyakwe, no kutamba Mose uko aleya asuka aingila mwi tenti lyakwe. 9 Kabili ilyo line fye Mose aingile mwi tenti, ikumbi+ lyalikile, no kwiminina pa mwinshi we tenti na Lesa alandile+ na Mose. 10 Na bantu bonse bamwene ikumbi+ liminine pa mwinshi we tenti, kabili abantu bonse balimine no kukontama cila muntu pa mwinshi we tenti lyakwe.+ 11 Kabili Yehova alandile na Mose nabaloshanya ifinso,+ filya fine umuntu engalanda no munankwe. Ilyo abwelele ku nkambi, umubomfi+ wakwe Yoshua mwana Nuni,+ uwalemubombela, talefuma mwi tenti.

12 Nomba Mose asosele kuli Yehova ati: “Mwamona, muleti kuli ine, ‘Tungulula aba bantu,’ lelo tamundekele njishibe uo mukatuma ukuya na ine. Kabili imwe mwatile, ‘Ninkwishiba ishina+ kabili nalikutemwa.’13 Nomba, nga mwalintemwa,+ shi nengeni njishibe imibele yenu,+ ukuti imwishibe, pa kuti ntemwikwe kuli imwe. Kabili moneni ukuti ulu luko bantu benu.”+ 14 Na o atile: “Nalaya pamo nobe+ no kukulenga ukutuusha.”+ 15 E lyo amwebele ati: “Nga tamwaye pamo na ifwe, mwitufumya pano. 16 Nga nomba ni kuli cinshi cileishibikilwa ukuti ine na bantu benu, mwalitutemwa? Bushe te pa mulandu wa kuti mwenda pamo na ifwe,+ e calenga ukuti ine na bantu benu tupusaneko na bantu bonse aba pano isonde?”+

17 Kabili Yehova akonkenyepo ukusosa kuli Mose ati: “Ici na co, ico wasosa, nalacita,+ pantu nalikutemwa kabili nalikwishiba ishina.” 18 E lyo atile: “Mukwai nengeni ukumona ubukata bwenu.”+ 19 Lelo atile: “Nalalenga ukuti umone+ ubusuma bwandi bonse, no kuti wishibe ishina lya kwa Yehova;+ kabili nkapaala uo nkafwaya ukupaala, no kubelela uluse uo nkafwaya ukubelela uluse.”+ 20 Kabili atile: “Te kuti umone icinso candi, pantu takuli umuntu nangu umo uwingamona no kuba no mweo.”+

21 Kabili Yehova atile: “Pano ndi pali incende, pa cilibwe e po walaiminina. 22 Kabili ilyo ubukata bwandi bulepita ndekubika mu lucengo lwa mu cilibwe, kabili ndebika ulupi lwandi pali iwe ku kukucinga nsuke mpite. 23 E lyo nalafumyapo ulupi lwandi, kabili walamona inuma yandi. Lelo te kuti umone icinso candi.”+

34 E lyo Yehova atile kuli Mose: “Basa amabwe yabili ayapaapaatala nga ya ntanshi,+ na ine nkalemba pali aya mabwe amashiwi ayali pa mabwe ya ntanshi,+ ayo watobele.+ 2 Kabili ukaiteyanye ulucelo, pantu ulucelo ukanina ulupili lwa Sinai no kwiminina mupepi na ine pa muulu wa lupili.+ 3 Lelo umuntu nangu umo ekanina pamo na iwe, kabili, wikaleka umuntu uuli onse ukumoneka mu lupili lonse.+ Nangu ni mpaanga nelyo ing’ombe shikaliila apalungatene no lupili ulu.”+

4 Awe Mose abashile amabwe yapaapaatala nga ya ntanshi kabili acelele ulucelo no kunina ulupili lwa Sinai, nge fyo Yehova amwebele, kabili asendele amabwe yabili ayapaapaatala mu minwe yakwe. 5 Na Yehova atentemwike+ mwi kumbi no kwiminina nankwe palya no kubila ishina lya kwa Yehova.+ 6 Kabili Yehova apitile ku cinso cakwe uku ninshi alebilisha no kuti: “Yehova, Yehova, Lesa wa luse+ kabili uwa mutembo,+ uukokola ukukalipa+ kabili uwafulisha icikuuku+ ne cine,+ 7 uutwalilila ukulanga icikuuku ku ba makana,+ uwelela ifilubo na bumpulamafunde no lubembu,+ lelo uushilaba ku kukanda abafwile ukukandwa,+ abana, na beshikulu na bana ba beshikulu pa membu sha bashibo.”+

8 Awe Mose ayangufyenye ukukontamina pa nshi no kuwa ubukupeme.+ 9 E lyo atile: “Nomba mwe Yehova nga mwalintemwa, mukwai, mwende pamo na ifwe,+ pantu aba bantu balitalama imikoshi,+ kabili mutwelele pa filubo fyesu na pa membu shesu,+ no kubuula ifwe ukuba abantu benu.”+ 10 Na o atile: “Mona ndepangana na imwe icipangano: Pa ntanshi ya bantu bobe bonse nkacita ifipesha amano ifishatala aficitwa pano isonde ponse nelyo mu nko shonse;+ na bantu bonse abo uli na bo mu kati bakamona umulimo wa kwa Yehova, pantu ca kutiinya ico ndecita nobe.+

11 “Lelo iwe sunga ifyo ndekweba buno bushiku.+ Mona ndetamfya abena Amore na bena Kanaani na bena Hiti na bena Perisi na bena Hibi na bena Yebusi, abali ku ntanshi yobe.+ 12 Cenjela, wikacita icipangano na bekashi ba mu calo ico uleyako,+ epali caba iciteyo mu kati kobe.+ 13 Ifiipailo fyabo mukabongolole, ne fyaimikwa fyabo ifya mabwe mukatobaule, mukateme ne fimuti fyabo ifyaimikwa.+ 14 Pantu taufwile ukukontamina lesa umbi,+ pantu Yehova, ni Lesa uufwaya ukumupepa fye eka, ni Lesa wa bufuba;+ 15 epali wacita icipangano na bekashi ba mu calo, pantu bena bakacita bucilende na balesa babo+ no kwipaila balesa babo amalambo,+ na umo akakwita, na iwe ukalyapo ilambo lyakwe.+ 16 Ninshi ukabuulila abana bobe abaume abana babo abanakashi,+ kabili abana banakashi babo bakacita bucilende na balesa babo no kulenga abana baume bobe ukucita bucilende na balesa babo.+

17 “Wikapanga balesa abaengwa.+

18 “Ukalesefya umutebeto wa mukate uushatutumuka.+ Inshiku cinelubali (7) ukalye umukate uushatutumuka, ukulingana ne fyo nakwebele, pa nshita yalingwa mu mweshi wa Abibu,+ pantu mu mweshi wa Abibu e mo wafumine mu Egupti.

19 “Ibeli lyonse lyandi,+ ne fitekwa fyobe fyonse ifilume e kutila amabeli ya ng’ombe na ya mpaanga.+ 20 Kabili ibeli lya mpunda ukalilubwile ku mpaanga.+ Lelo nga taulilubwile, ninshi ukalifune umukoshi. Ibeli lyonse ilya bana bobe ukalilubule.+ Kabili bekamoneka kuli ine minwe nkutwa.+

21 “Inshiku mutanda (6) ukalebomba, lelo ubushiku bwalenga cinelubali (7) ukalesunga isabata.+ Mu nshita ya kulima na mu nshita ya kulobolola ukalesunga isabata.+

22 “Kabili ukalecita umutebeto obe uwa milungu ukubomfya ifisabo fyabalilapo ukupya ifya kulobolola kwa ngano,+ no mutebeto wa kulonganya pa kwaluka kwa mwaka.+

23 “Imiku itatu mu mwaka abaume bobe bonse bakalemoneka+ ku cinso ca kwa Shikulu wa cine, Yehova, Lesa wa kwa Israele. 24 Pantu nkatamfya inko ku ntanshi yobe,+ kabili nkakusha imipaka yobe;+ kabili umuntu nangu umo takakumbwe icalo cobe ilyo waya ku kumona icinso ca kwa Yehova Lesa obe imiku itatu mu mwaka.+

25 “Wikapeelela umulopa we lambo lyandi pamo ne catutumuka.+ Kabili ilambo lya mutebeto wa ca kucilila liikekala ubushiku bonse ukufika ku lucelo.+

26 “Ifyawamisha pa fisabo fyabalilapo ukupya+ ifya mu mushili ukalete ku ng’anda ya kwa Yehova Lesa obe.+

“Wikepika akana ka mbushi mu mukaka wa kwa nyina.”+

27 Kabili Yehova atile kuli Mose: “Lemba aya mashiwi,+ pantu ndecita icipangano na iwe na bana ba kwa Israele ukulingana na mashiwi aya.”+ 28 Kabili akonkenyepo ukuba na Yehova kulya kuntu inshiku amakumi yane (40) akasuba no bushiku. Talelya ifya kulya nangu ukunwa amenshi.+ Kabili alembele* amashiwi ya cipangano pa mabwe yapaapaatala, e kutila Ifyebo Ikumi (10).+

29 Nomba ilyo Mose aletentemuka ulupili lwa Sinai ninshi nasenda na mabwe yabili ayapaapaatala aya Cipangano mu minwe yakwe,+ taishibe ukuti inkanda ya cinso cakwe yalebengeshima pa mulandu wa kulanda na Lesa.+ 30 Ilyo Aarone na bana bonse aba kwa Israele bamwene Mose, moneni! inkanda ya cinso cakwe yalebengeshima na bo balitiinine ukupalama kuli ena.+

31 Kabili Mose alibetile. Awe Aarone na bacilolo bonse aba mu lukuta babwelele kuli ena, na Mose alalanda na bo. 32 Pa numa abana ba kwa Israele bonse bapaleme kuli Mose, na o alabeba fyonse ifyo Yehova amwebele mu lupili lwa Sinai.+ 33 Lyonse ilyo Mose apwisha ukulanda na bo, aleifimba icifimbo ku menso.+ 34 Lelo ilyo Mose alemonekela kuli Yehova ku kulanda nankwe, alefuula icifimbo mpaka afuma.+ Awe e fyo alefuma no kulanda ku bana ba kwa Israele ifyo aebwa.+ 35 Kabili abana ba kwa Israele bamwene icinso ca kwa Mose, ukuti inkanda ya cinso ca kwa Mose yalebengeshima;+ na Mose abweseshe icifimbo pa menso mpaka ilyo aingile na kabili ku kulanda nankwe.+

35 Pa numa Mose aitile ulukuta lonse ulwa bana ba kwa Israele no kutila kuli bena: “Aya e mashiwi ayo Yehova asosele, ukuti e yo mufwile ukulakonka:+ 2 Mu nshiku mutanda (6) kuti mwabombamo umulimo,+ lelo ubushiku bwalenga cinelubali (7) bukaleba kuli imwe ubwa mushilo, lisabata lya kutuusha kuli fyonse ilya kuli Yehova. Onse uwabombamo umulimo akepaiwe.+ 3 Mwikalakosha umulilo mu mekalo yenu yonse pa bushiku bwe sabata.”

4 Kabili Mose akonkenyepo ukusosa ku lukuta lonse ulwa bana ba kwa Israele ati: “Aya e mashiwi ayo Yehova asosele, 5 ‘Leteleni Yehova umusangulo ukufuma mu bantu benu.+ Lekeni onse uwaitemenwa+ alete umusangulo kuli Yehova, e kutila, golde na silfere no mukuba+ 6 no bushishi bwa bluu na masako ya mpaanga ayatumpikwa mu fyakashikila ne nsalu yakashika ce ne nsalu iisuma na masako ya mbushi+ 7 ne mikupo ya kwa sukusuku iyatumpikwa mu fyakashika ne mikupo ya silu ne fimuti fya mushita 8 na mafuta ya nyali na mafuta ya balsamu aya kubomfya ku kusubila na mu fyanunkila+ 9 na mabwe ya shohamu na mabwe ya kubika pali efode+ na pali tumba wa pa cifuba.+

10 “‘Kabili lekeni bonse abaishiba incito+ abali pa kati kenu bese no kupanga fyonse ifyo Yehova asosele, 11 e kutila, icikuulwa ca mushilo pamo ne tenti lya ciko ne ca kufimbapo, utwa kukofyamo twa ciko na mafulemu ya ciko, imilando ya ciko, inceshi sha ciko na mashinte ya ciko; 12 Icipao+ ne mitembo ya ciko,+ inkupiko+ ne nsalu+ ya kucingilako; 13 itebulo+ ne mitembo ya liko ne fipe fya liko fyonse no mukate wa kutuula;+ 14 ne ca kutekapo inyali+ ya kubuutusha ne fipe fya ciko ne nyali sha ciko na mafuta+ aya kusanikila; 15 ne ca kocelapo ifyanunkila+ ne mitembo ya ciko; na mafuta ya kusubilako ne fyanunkila ubusaka;+ ne ca kucinga pa mwinshi, pa mwinshi wa cikuulwa ca mushilo; 16 iciipailo+ ca kutuulilapo umutuulo wa koca ne capikulwa ca ciko ica mukuba, imitembo ya ciko ne fipe fya ciko fyonse; ica kubikamo amenshi ya kusamba+ ne ca kucitekapo; 17 insalu sha kucingilako ulubansa,+ inceshi sha fiko na mashinte ya fiko; ne ca kucingilako pa mpongolo ya lubansa; 18 impoopo sha cikuulwa ca mushilo ne mpoopo sha mu lubansa ne myando ya shiko;+ 19 ifya kufwala+ fyapikulwa ifya kufwala pa kubombela mu muputule wa mushilo, ifya kufwala fya mushilo+ ifya kwa Aarone shimapepo ne fya kufwala fya bana bakwe abaume ifya kubombelamo bushimapepo.’”

20 Awe e fyo ulukuta lonse ulwa bana ba kwa Israele lwafumine ku cinso ca kwa Mose. 21 E lyo baishile, bonse abo umutima waimishe,+ kabili bonse abo umutima walengele ukuitemenwa, baletele umusangulo wa kwa Yehova, uwa kubomfya ku mulimo wa cikuulwa ca kukumaninako na ku milimo yonse no wa kupangila ifya kufwala fya mushilo. 22 Kabili baleisa fye, abaume pamo na banakashi, bonse abaitemenwe. Baletele ifipini na masikiyo ne nindaminwe no twa kuikobaika utwa banakashi, umusango onse uwa fya golde, e kutila, umuntu onse uwaletele kuli Yehova umutuulo wa kusunsha uwa golde.+ 23 Kabili bonse abakwete ubushishi bwa bluu na masako ya mpaanga ayatumpikwa mu fyakashikila ne nsalu shakashika ce ne nsalu ishisuma na masako ya mbushi ne mikupo ya basukusuku ne mikupo ya silu, baliletele.+ 24 Bonse abalesangula umusangulo wa silfere no mukuba baletele umusangulo wa kwa Yehova, kabili bonse abakwete ifimuti fya mushita ifya kubomfya ku mulimo onse balifiletele.

25 Kabili abanakashi bonse abaishiba incito+ bapikwile ku minwe yabo, kabili baleleta ubushishi bwa bluu na masako ya mpaanga ayatumpikwa mu fyakashikila ne nsalu shakashika ce ne nsalu ishisuma. 26 Na banakashi bonse abacenjela abo imitima yabo yaimishe, bapyatile amasako ya mbushi.

27 Kabili bacilolo baletele amabwe ya shohamu na mabwe ya kubika pali efode na pali tumba wa pa cifuba,+ 28 na mafuta ayafuma ku miti na mafuta ya kusanikila na mafuta ya kusubilako na ya fyanunkila.+ 29 Umwaume onse no mwanakashi onse uo umutima wakwe wamulengele ukuitemenwa ukuleta ku mulimo onse uo Yehova aebele Mose ukubomba, aliletele; abana ba kwa Israele baletele umutuulo wa kuitemenwa kuli Yehova.+

30 E lyo Mose atile ku bana ba kwa Israele: “Moneni, Yehova naita Besalele+ mwi shina, mwana Uri, mwana Huri uwa mu mukowa wa kwa Yuda. 31 Kabili amwiswishemo umupashi wa kwa Lesa pa kuti abe na mano, no mucetekanya no kwishiba na pa kuti abe uwacenjela mu kupanga ifyalekanalekana 32 no kuti abe na mano ya kwelenganya ifya kupangapanga, pa kuti eshibe ifya kupanga muli golde na muli silfere na mu mukuba,+ 33 no kuti eshibe ifya kuputula utumabwe utwa kufyantika mu fintu ne fya kubasa ifimuti ku kupangamo ifintu ifisuma ifya musango onse.+ 34 Kabili nabika mu mutima wakwe no wa kwa Oholiabu+ mwana Ahisamaki uwa mu mukowa wa kwa Dani, amano ya kusambilisha. 35 Abapeele umutima wa mano+ ku kubomba imilimo yonse iya fya kupangapanga ne ya kuyemfya insalu+ ne ya kupikula ubushishi bwa bluu no bushishi bwa masako ya mpaanga ayatumpikwa mu fyakashikila, ubushishi ubwakashika ce no bwa kolokondwe umusuma, ne ya kupikula insalu, abaume abalebomba umulimo onse kabili abale-elenganya ifya kupangapanga.

36 “Kabili Besalele akabombe uyu mulimo, na Oholiabu+ no muntu onse uwaishiba incito uo Yehova apeela amano+ no mucetekanya+ muli fi fintu pa kuti eshibe ifya kubomba imilimo yonse iya-ampana no mulimo wa mushilo ukulingana na fyonse ifyo Yehova asosele.”+

2 Kabili Mose aitile Besalele na Oholiabu no muntu onse uwaishiba incito uo Yehova abikile amano mu mutima wakwe,+ onse uo umutima wakwe waimishe ukupalama ku mulimo ku kubomba.+ 3 E lyo bapokele kuli Mose umusangulo+ onse uo abana ba kwa Israele baletele uwa kubomfya ku mulimo wa mushilo pa kuti batampe ukubomba, kabili abana ba kwa Israele bali bacili baleleta kuli Mose umutuulo wa kuitemenwa cila lucelo.

4 Kabili bonse abaishiba incito abalebomba umulimo wa mushilo batendeke ukwisa umo umo, ukufuma ku milimo balebomba, 5 no kutila kuli Mose: “Ifyo abantu baleleta fyafula fyacila na pa filefwaikwa ku mulimo uo Yehova asosele ukuti ubombwe.” 6 E ico Mose asosele ukuti babile mu nkambi yonse imbila ya kuti: “Mwe baume na banakashi, mwiletelapo na fimbi ifya musangulo wa mushilo.” E fyo abantu babaleseshe ukuleta ifya musangulo. 7 Kabili ifyaletelwe fyali ifyalinga ku mulimo onse uwali no kubombwa, kabili fyalicililenapo.

8 Kabili bonse abaishiba incito+ pali balya abalebomba umulimo bapangile icikuulwa ca mushilo,+ utumatenti ikumi (10) utwapangilwa ku bushishi bwa kolokondwe uwapyatwa na ku bushishi bwa bluu na ku bushishi bwa masako ya mpaanga ubwatumpikwa mu fyakashikila na ku bushishi bwakashika ce; kabili apikwililemo na bakerubi. 9 Akalitenti kamo kamo kalepele imikono amakumi yabili na cinekonsekonse (28), kabili akalitenti kamo na kamo kali imikono ine mu bwipi. Utumatenti tonse twali utwalingana. 10 Kabili alundenye utumatenti tusano, kamo ku kabiye,+ no tumatenti tumbi tusano atulundenye kamo ku kabiye. 11 E lyo apangile utwa kukofyamo utwa bushishi bwa bluu pa mpela ya kalitenti aka kulekeleshako apa kwisalundanishisha. E fyo acitile na pa mpela ya kalitenti aka kuli tulya tumbi utwalundinkene.+ 12 Apangile utwa kukofyamo amakumi yasano (50) pa kalitenti kamo, kabili apangile utwa kukofyamo amakumi yasano pa mpela ya kalitenti aka pali tulya tumbi apa kwisalundanisha, kabili utwa kukofyamo twaliloshenye.+ 13 Na pa kulekelesha apangile utwa kukofeshako utwa golde amakumi yasano (50) no kulundanya utumatenti tonse ukubomfya utwa kukofeshako, pa kuti tube fye itenti limo ilya pa cikuulwa ca mushilo.+

14 Kabili apangile utumatenti ku masako ya mbushi utwa kufimba pe tenti lya pa cikuulwa ca mushilo. Utumatenti apangile twali ikumi na kamo (11).+ 15 Akalitenti kamo kamo kalepele imikono amakumi yatatu (30), kabili mu bwipi kali imikono ine. Utumatenti tonse ikumi na kamo (11) twali utwalingana.+ 16 Kabili alundenye utumatenti tusano tweka no tumatenti mutanda (6) na to tweka.+ 17 Kabili apangile utwa kukofyamo amakumi yasano (50) pa mpela ya kalitenti akalekelesheko apa kwisalundanishisha, kabili apangile utwa kukofyamo amakumi yasano pa mpela ya tumatenti tulya tumbi utwa kwisalundana ne tenti lilya limbi.+ 18 Pa numa apangile utwa kukofeshako utwa mukuba amakumi yasano (50) utwa kulundanishishako utumatenti tonse pa kuti tube itenti limo.+

19 Kabili apangile ica kufimba pe tenti ku mikupo ya basukusuku iyatumpikwa mu fyakashika ne ca kufimba pa muulu+ ku mikupo ya basilu.+

20 E lyo apangile amafulemu ya cikuulwa ca mushilo ku fimuti fya mushita,+ no kuyemika. 21 Ifulemu limo limo lyalepele imikono ikumi (10) kabili mu bwipi lyali umukono umo na hafu.+ 22 Ifulemu limo limo lyakwete utwa kushimpilako tubili utwalundanishiwe. E fyo acitile ku mafulemu yonse aya cikuulwa ca mushilo.+ 23 Awe apangile amafulemu ya cikuulwa ca mushilo, amafulemu amakumi yabili (20) aya ku lubali lwalosha ku Negebu, ku kapinda ka ku kulyo.+ 24 Kabili apangile amashinte ya silfere amakumi yane (40) aya kuba pe samba lya mafulemu amakumi yabili (20), amashinte yabili pe samba lye fulemu limo ilili no twa kushimpilako tubili.+ 25 Kabili ku lubali lumbi ulwa cikuulwa ca mushilo, ku kapinda ka ku kuso, apangile amafulemu amakumi yabili (20)+ 26 na mashinte ya yako amakumi yane (40) aya silfere, amashinte yabili pa nshi ye fulemu limo na mashinte yabili pa nshi ye fulemu ilibiye.+

27 Kabili ku numa ya cikuulwa ca mushilo ku masamba apangileko amafulemu mutanda (6).+ 28 Kabili apangile amafulemu yabili aya kutungilila icikuulwa ca mushilo pa makoona yabili aya ku numa.+ 29 Aya amafulemu yabili yalipalene imimonekele pa nshi kabili pa muulu na po ukutendekela pa mupeto wa kubalilapo, yalipalene imimonekele. E fyo acitile kuli yonse yabili, ku makoona yabili.+ 30 Awe yonse pamo yali amafulemu cinekonsekonse (8) na mashinte ya yako aya silfere yali ikumi limo na mutanda (16), amashinte yabili yabili pa nshi ye fulemu limo.+

31 Kabili apangile imipindo isano ukufuma ku cimuti ca mushita, iya kubika ku mafulemu ayali ku lubali lumo ulwa cikuulwa ca mushilo+ 32 ne mipindo isano iya kubika ku mafulemu ayali ku lubali lumbi ulwa cikuulwa ca mushilo ne mipindo isano iya kubika ku mafulemu ya ku cikuulwa ca mushilo, ku masamba ya cikuulwa ku numa.+ 33 Kabili apangile umupindo wa pa kati uwa kupulinkanya pa kati ka mafulemu ukufuma ku lutwe lumo ukufika ku lubiye.+ 34 Kabili ku mafulemu abikileko golde, no kupangilako imipeto ya golde iya kwikasha imipindo, kabili ku mipindo abikileko golde.+

35 Kabili apangile ica kucingilako+ ku bushishi bwa bluu no bwa masako ya mpaanga ayatumpikwa mu fyakashikila no bwakashika ce na ku bushishi bwa kolokondwe umusuma. Kabili apikwililemo bakerubi.+ 36 E lyo acipangiile inceshi shine isha cimuti ca mushita no kubikako golde, apangilako no twa kukobekelako utwa golde, kabili ashipangiile amashinte ya silfere yane.+ 37 Kabili apangile ica kucingilako pa mwinshi wa cikuulwa ku bushishi bwa bluu no bwa masako ya mpaanga ayatumpikwa mu fyakashikila no bwakashika ce no bushishi bwapyatwa ubwa kolokondwe umusuma, icapikulwa bwino nga nshi,+ 38 ne nceshi sha ciko shisano no twa kukobekelako twa shiko. Kabili ku muulu wa nceshi na ku fya kwikashishako fya shiko abikileko golde, lelo amashinte ya shiko yasano yali aya mukuba.+

37 Besalele+ nomba apangile Icipao+ ukubomfya icimuti ca mushita. Cali imikono ibili na hafu mu butali, no mukono umo na hafu mu bwipi, kabili calepele umukono umo na hafu.+ 2 Kabili abikileko golde uwalopololwa mu kati na ku nse no kushingulushako akamutika ka golde.+ 3 Pa numa apangiileko imipeto ya golde ine, pa muulu wa makasa ya ciko, imipeto ibili kuno lubali ne mipeto ibili ku lubali lubiye.+ 4 Kabili apangile imitembo ukubomfya icimuti ca mushita no kubikako golde.+ 5 E lyo abikile imitembo mu mipeto ku mbali ya Cipao iya kusendelako Icipao.+

6 Kabili apangile inkupiko+ iya golde iyalopololwa. Yalepele imikono ibili na hafu, kabili mu bwipi yali umukono umo na hafu.+ 7 Kabili apangile bakerubi babili aba golde. Abomfeshe sando pa kubapanga no kubabika ku mpela shibili isha nkupiko.+ 8 Kerubi umo aali kuli ino mpela, na kerubi umbi aali ku mpela ibiye. Apangile bakerubi pa nkupiko ku mpela sha iko shibili.+ 9 Kabili aba bakerubi bayanshile amapindo yabo yabili ukuyalosha mu muulu, ukucinga inkupiko ku mapindo yabo,+ kabili baliloshenye. Ifinso fya bakerubi fyaloleshe pa nkupiko.+

10 Kabili apangile itebulo ku cimuti ca mushita.+ Mu butali lyali imikono ibili, kabili mu bwipi lyali umukono umo, kabili lyalepele umukono umo na hafu.+ 11 E lyo abikileko golde iyalopololwa no kushingulushako akamutika ka golde.+ 12 Kabili apangiileko ipulanga ilya lupi lumo mu bwipi ukushingulushako no kubikako akamutika ka golde ukushingulusha itebulo.+ 13 E lyo apangiileko imipeto ya golde no kubika imipeto mu makoona yane aya mikonso ine iye tebulo.+ 14 Imipeto yali mupepi ne pulanga, yali ya kwikasha imitembo pa kusenda itebulo.+ 15 E lyo apangile imitembo ya kusendelako itebulo ku cimuti ca mushita no kubikako golde.+ 16 Pa numa apangile ifipe fya pe tebulo kuli golde iyalopololwa, imbale sha liko na makapu ya liko ne mbale sha liko ishafonka ne mitondo ya liko umwa kwitulwila umutuulo wa mwangashi.+

17 Awe apangile ica kutekapo inyali+ ica golde iyalopololwa. Abomfeshe sando pa kucipanga. Ica kutekapo inyali calikwete umukonso ne misambo, intuntu, ifituutu na maluba.+ 18 Kabili imisambo mutanda (6) yafumine mu mukonso wa ciko, imisambo itatu iya ca kutekapo inyali yafumine mu lubali lumo ulwa mukonso ne misambo itatu iya ca kutekapo inyali yafumine mu lubali lubiye.+ 19 Intuntu shitatu ishapangwa nga maluba ya mualmonde shali ku lubali lumo ulwa misambo, kabili kwali ne fituutu na maluba ifyalelekanina; ne ntuntu shitatu ishapangwa nga maluba ya mualmonde shali ku lubali lubiye ulwa misambo, kabili kwali ne fituutu na maluba ifyalelekanina. E fyali imisambo mutanda (6) iyafumine mu ca kutekapo inyali.+ 20 Kabili pa ca kutekapo inyali pali intuntu shine ishaba nga maluba ya mualmonde, ukwali ne fituutu na maluba ifyalelekanina.+ 21 Ne cituutu mwi samba lya misambo ibili cafumine muli cena, ne cituutu mwi samba lya misambo imbi ibili cafumine muli cena, pantu imisambo mutanda (6) yafumine mu ca kutekapo inyali.+ 22 Ifituutu ne misambo fyafumine muli cena. Conse capangilwe kuli golde uwalopololwa ukubomfya sando.+ 23 Kabili apangile inyali sha ciko cinelubali (7) no tulumano twa ciko utwa kumanikilako ne fya kwikata umulilo fya ciko kuli golde iyalopololwa.+ 24 Kwi talanti lya golde iyalopololwa e ko acipangiile ne fipe fya ciko fyonse.

25 Nomba apangile ica kufutumwinapo ifyanunkila+ ica fimuti fya mushita.+ Ubutali bwa ciko bwali umukono umo na mu bwipi cali umukono umo kabili cakwete amakoona yane ayalingana, kabili calepele imikono ibili. Insengo sha ciko shali ishasaalala.+ 26 Kabili abikileko golde iyalopololwa, pa muulu na mu mbali konse konse na ku nsengo sha ciko, kabili ashingulwisheko akamutika ka golde.+ 27 Kabili apangiileko imipeto ibili iya golde mwi samba lya kamutika ka golde mu mbali sha ciko, uku no ku, isha kwikata imitembo sha kucisendelako.+ 28 Pa numa apangile imitembo ya cimuti ca mushita no kubikako golde.+ 29 Kabili apangile amafuta ya mushilo+ aya kusubilako ne fyanunkila,+ ifyasanguluka, ifyapangwa bwino icine cine.

38 Kabili apangile iciipailo ku fimuti fya mushita ica kutuulilapo umutuulo wa koca. Cali imikono isano mu butali, na mu bwipi cali imikono isano, icakwete imbali shine ishalingana, kabili calepele imikono itatu.+ 2 Kabili apangile insengo+ sha ciko pa makoona ya ciko yane. Insengo sha ciko shatuntwike muli cena. Kabili abikileko umukuba.+ 3 Pa numa apangile ifipe fyonse ifya pa ciipailo, ifya kukushilapo imito na bafosholo ne mbale shafonka, ifya kutunkwilako ne fya kwikata umulilo. Ifipe fya ciko fyonse afipangile ku mukuba.+ 4 Kabili ku ciipailo apangiileko icapikulwa, isumbu lya mukuba, ilya mwi samba lye pulanga, mupepi na pa kati.+ 5 Kabili apangile imipeto ine no kuikakila pa mpela shine mupepi ne capikulwa ica mukuba, iya kupishamo imitembo. 6 Pa numa apangile imitembo ku cimuti ca mushita no kubikako umukuba.+ 7 Kabili abikile imitembo mu mipeto ku mbali ya ciipailo iya kucisendelako.+ Acipangile kwati cibokoshi ukubomfya amapulanga.+

8 Kabili apangile ica kubikamo amenshi ya kusamba ica mukuba+ ne ca kucitekapo ica mukuba, ukubomfya ifilola fya babomfi banakashi abali abaiteyanya mu mulimo balebomba pa mwinshi wa cikuulwa ca mushilo.+

9 Kabili apangile ulubansa.+ Ku lubali lwalolele ku Negebu, ku kapinda ka ku kulyo, insalu sha kucingilako ulubansa shali sha kolokondwe umusuma uwapyatwa, isha mikono umwanda umo (100).+ 10 Ifyaimikwa fya fiko amakumi yabili (20) na mashinte ya fiko amakumi yabili fyali ifya silfere.+ 11 Na ku lubali lwa ku kapinda ka ku kuso kwali insalu sha kucingilako isha mikono umwanda umo (100). Ifyaimikwa fya fiko amakumi yabili (20) na mashinte ya fiko amakumi yabili fyali ifya mukuba. Utwa kukofyamo utwa fyaimikwa ne fikakilo fya fiko fyali ifya silfere.+ 12 Lelo ku lubali lwa ku masamba ifisalu fya kucingilako fyali ifya mikono amakumi yasano (50). Ifyaimikwa fya fiko fyali ikumi (10) na mashinte ya fiko ikumi.+ Utwa kukofyamo utwa fyaimikwa ne fikakilo fya fiko fyali ifya silfere. 13 Kabili ku lubali lwa ku kabanga ukulola ukutula akasuba kwali ifisalu fya kucingilako imikono amakumi yasano (50).+ 14 Ku lubali lumo ulwa mpongolo kwali ifisalu fya kucingilako ifyalepele imikono ikumi na isano (15). Ifyaimikwa fya fiko fyali fitatu na mashinte ya fiko yali yatatu.+ 15 Kabili ku lubali lubiye, ulwa kuno no lwa uko, ulwa ku mpongolo ya mu lubansa, ifisalu fya kucingilako fyali ifya mikono ikumi na isano (15). Ifyaimikwa fya fiko fyali fitatu na mashinte ya fiko yali yatatu.+ 16 Insalu shonse isha kucingilako ulubansa shali isha kolokondwe umusuma uwapyatwa. 17 Kabili amashinte ya fyaimikwa yali ya mukuba. Utwa kukofyamo twa fyaimikwa ne fikakilo fya fiko fyali ifya silfere kabili ifyali pa muulu wa fyaimikwa fyali ifya silfere, kabili ku fyaimikwa fyonse ifya mu lubansa kwali imilundo ya silfere.+

18 Kabili ica kucingilako pa mpongolo ya mu lubansa capikwilwe kuli kapikula, cali ica bushishi bwa bluu no bwa masako ya mpaanga ayatumpikwa mu fyakashikila no bwakashika ce no bwa kolokondwe umusuma uwapyatwa,+ kabili mu butali cali imikono amakumi yabili (20), kabili conse fye calepele imikono isano nge nsalu sha kucingilako ulubansa.+ 19 Kabili ifyaimikwa fya ciko fine na mashinte ya fiko yane fyali ifya mukuba. Utwa kukofyamo twa fiko twali utwa silfere na pa muulu wa fiko ne fikakilo fya fiko fyali ifya silfere. 20 Ne mpoopo shonse isha cikuulwa ca mushilo ne sha mu lubansa ukushinguluka shali isha mukuba.+

21 Ifi e fyali mu cikuulwa ca mushilo, icikuulwa umwali icipao ca Cipangano,+ ifyo Mose atantawile, ku mulimo wa bena Lebi+ ukutungululwa na Itamari+ mwana Aarone shimapepo. 22 Kabili Besalele+ mwana Uri, mwana Huri uwa mu mukowa wa kwa Yuda acitile fyonse ifyo Yehova aebele Mose. 23 Kabili ali na Oholiabu+ mwana Ahisamaki uwa mu mukowa wa kwa Dani, uwacenjela mu fya kupangapanga kabili uwaishiba ukuyemfya kabili kapikula wa bushishi bwa bluu no bwa masako ya mpaanga ayatumpikwa mu fyakashikila no bwakashika ce no bwa kolokondwe umusuma.

24 Golde yonse iyabomfiwe ku mulimo onse uwa mu muputule wa mushilo e golde yapeelwe ukuba umutuulo wa kusunsha.+ Yali amatalanti amakumi yabili na pabula (29) na mashekele imyanda cinelubali na makumi yatatu (730) ukulingila kwi shekele+ lya mu muputule uwa mushilo.+ 25 Kabili silfere ya balembelwe aba mu lukuta yali amatalanti umwanda umo (100) na mashekele ikana limo ne myanda cinelubali na makumi cinelubali na yasano (1,775) ukulingila kwi shekele lya mu muputule wa mushilo. 26 Cila muntu aletele hafu we shekele iyalingana na hafu we shekele lya mu muputule wa mushilo, kabili abaume bonse abapendelwe ukufuma pa wa myaka amakumi yabili (20) no kucilapo,+ bali amakana imyanda mutanda na makana yatatu ne myanda isano na makumi yasano (603,550).+

27 Kabili amatalanti umwanda umo (100) aya silfere bayabomfeshe ku kupangilamo amashinte ya palya pantu apa mushilo na mashinte ya ku nceshi sha kukobekako insalu ya kucingilako. Amashinte umwanda umo yalingene na matalanti umwanda umo, italanti limo kwi shinte limo.+ 28 Kabili ku mashekele ikana limo ne myanda cinelubali na makumi cinelubali na yasano (1,775) apangiileko utwa kukofyamo ku fyaimikwa ne fya kubika pa muulu wa fyaimikwa no kufilundanya.

29 Kabili umukuba wa mutuulo wa kusunsha wali amatalanti amakumi cinelubali (70) na mashekele amakana yabili ne myanda ine (2,400). 30 Kabili apangiileko amashinte ya pa mwinshi wa cikuulwa ca mushilo ne ciipailo ca mukuba ne capikulwa ica mukuba ica ciko, ne fipe fyonse ifya ciipailo, 31 na mashinte ya mu lubansa ukushinguluka, na mashinte ya ku mpongolo ya mu lubansa, ne mpoopo shonse isha ku cikuulwa ca mushilo ne mpoopo+ shonse isha kwi tenti lya mu lubansa ukushinguluka.

39 Kabili ku bushishi bwa bluu no bushishi bwa masako ya mpaanga ubwakashikila no bwakashika ce+ bapangiileko ifya kufwala+ fya kupikula ifya kufwala pa kubombela mu muputule wa mushilo.+ E fyo bapangile ifya kufwala fya mushilo+ ifya kwa Aarone, ukulingana ne fyo Yehova aebele Mose.

2 Awe na o apangile efode+ ukubomfya golde, no bushishi bwa bluu no bushishi bwa masako ya mpaanga ubwakashikila no bwakashika ce e lyo no bwa kolokondwe umusuma uwapyatwa. 3 Kabili bafulile golde mpaka yaba ngo tumalata utwapaapaatala, kabili aputwilemo insale sha kupikwila pamo no bushishi bwa bluu no bushishi bwa masako ya mpaanga ubwakashikila no bwakashika ce no bwa kolokondwe umusuma, ifyapangwa na kapikula.+ 4 Bapangiileko utwa pa mabeya utwasuntinkene kuli yena. Ku mpela shibili isha iko e ko twasuntinkene. 5 Kabili icimushipi, icali pali yena ku kukakilako yena, cali ica nsalu imo ine ukulingana ne mipangilwe ya ciko, ica golde, ica bushishi bwa bluu, no bushishi bwa masako ya mpaanga ubwakashikila no bwakashika ce no bwa kolokondwe umusuma uwapyatwa,+ ukulingana ne fyo Yehova aebele Mose.

6 Kabili babikile amabwe ya shohamu+ mu twa kufyantikamo amabwe utwa golde, no kulembapo amashina ya bana ba kwa Israele nga filya fine balemba pa ca kufwatikilako.+ 7 Awe ayabikile pa twa pa mabeya ya pali efode ukuba aya kwibukishishako+ abana ba kwa Israele, ukulingana ne fyo Yehova aebele Mose. 8 Kabili apikwile tumba wa pa cifuba,+ nge fyo apikwile efode, kuli golde, ku bushishi bwa bluu na ku bushishi bwa masako ya mpaanga ubwakashikila na ku bwakashika ce na ku bwa kolokondwe umusuma uwapyatwa.+ 9 Nga apetwa aleba uwa mbali shine ishalingana. Bapangile tumba wa pa cifuba uwapetwa, uwalepele nge cisansa mu butali e lyo mu bwipi na mo alepele nge cisansa.+ 10 Kabili babikilepo imitande ine iya mabwe. Mu mutande wa ntanshi mwali ilibwe lya kadikode, ilya topasi ne lya emarodi.+ 11 Mu mutande wa cibili+ mwali ilibwe lya tokwasi, ilya safiri+ ne lya yaspi.+ 12 Mu mutande wa citatu+ mwali ilibwe lya leshemu, ilya agate ne lya ametusti. 13 Kabili mu mutande wa cine+ mwali ilibwe lya krusoliti ne lya shohamu+ e lyo ne lya yaspi. Yabikilwe mu twa kufyantikamo amabwe utwa golde. 14 Kabili amabwe yali ukulingana na mashina ya bana ba kwa Israele. Yali ikumi na yabili (12) ukulingana na mashina yabo, ayalembwa nga filya fine balemba pa ca kufwatikilako, ili ukulingana ne shina lya liko ne li ukulingana ne shina lya liko, ukulingana ne mikowa ikumi na ibili.+

15 Kabili pali tumba wa pa cifuba bapangiilepo utuminyololo utwapyatwa ngo mwando, utwa golde.+ 16 Kabili bapangile utwa kufyantikamo amabwe tubili utwa golde no tumipeto tubili utwa golde no kubika utumipeto tubili pa mpela shibili isha pali tumba wa pa cifuba.+ 17 E lyo babikile utumyando tubili utwa golde mu tumipeto twa pa mpela sha pali tumba wa pa cifuba.+ 18 Kabili babikile impela shibili isha tumyando tulya tubili pa tupaafya tubili. E lyo batubikile pa twa pa mabeya ya pali efode ku ntanshi.+ 19 Kabili bapangile utumipeto tubili utwa golde no kutubika pa mpela shibili isha pali tumba wa pa cifuba mu kati.+ 20 Bapangile no tumipeto tubili utwa golde no kutubika pa twa pa mabeya utwa pali efode pe samba, ku ntanshi, mupepi na pa mulundo, pa muulu wa cimushipi ca pali efode.+ 21 Na pa kulekelesha bakakile utumipeto twa kuli tumba wa pa cifuba ku tumipeto twa kuli efode ukubomfya umwando wa bluu, pa kuti abe pa muulu wa cimushipi ca kuli efode no kuti tumba wa pa cifuba efuma pa muulu wa efode, ukulingana ne fyo Yehova aebele Mose.+

22 Awe abilile ica kufwala cabula amaboko+ ica kufwalilapo efode, ukulingana no mulimo wa kwa kapikula, ica nsalu ya bluu yeka yeka. 23 Kabili umukoshi wa ca kufwala cabula amaboko wali pa kati ka ciko, ngo mukoshi wa ca kucinga icifuba. Ku mukoshi wa uko babilileko insalu pa kuti wilepuka.+ 24 Na ku mufukilo wa ca kufwala cabula amaboko babikileko amapomegranate ya nsalu ya bluu ne yakashikila ne yakashika ce, iyapyatwa pamo.+ 25 Kabili bapangile inyenjele kuli golde iyalopololwa no kubika shilya nyenjele pa kati ka mapomegranate+ ukushingulusha ku mufukilo wa ca kufwala cabula amaboko, pa kati ka mapomegranate; 26 inyenjele imo na pomegranate umo, inyenjele imo na pomegranate umo ukushingulusha ku mufukilo wa ca kufwala cabula amaboko,+ ica kubombelamo, ukulingana ne fyo Yehova aebele Mose.

27 Kabili babilile ifya kufwala ifya nsalu iisuma,+ ifya kwa Aarone na bana bakwe abaume, 28 ne citebo+ ca nsalu iisuma ne fya kufwala ku mutwe ifyo bayemfya+ no tuputula twa mu kati+ utwapangilwa kuli kolokondwe umusuma uwapyatwa, 29 no mushipi+ uwapikulwa kuli kolokondwe umusuma uwapyatwa, na ku bushishi bwa bluu no bwa masako ya mpaanga ubwakashikila no bwakashika ce, ukulingana ne fyo Yehova aebele Mose.

30 Na pa kulekelesha bapangile akapaapaatu kabeeka, icishibilo ca mushilo ica kuipeela, ukubomfya golde yalopololwa no kulembapo ifilembo nga filya fine balemba pa ca kufwatikilako, ifyaleti: “Bumushilo bwa kwa Yehova.”+ 31 Kabili babikileko akamwando ka bluu pa kuti akapaapaatu kabeeka kabe pa muulu wa nsalu ya kupombanya ku mutwe,+ ukulingana ne fyo Yehova aebele Mose.

32 Awe umulimo onse uwa pa cikuulwa ca mushilo walipwile, pantu abana ba kwa Israele baubombele ukulingana ne fyo Yehova aebele Mose.+ Bacitile fye filya fine.

33 Kabili baletele icikuulwa ca mushilo+ kuli Mose, itenti+ ne fipe fya ciko fyonse,+ utwa kukofyamo+ twa ciko na mafulemu+ ya ciko, imipindo ya ciko,+ inceshi sha ciko, na mashinte ya ciko,+ 34 ne ca kufimbapo ica mikupo ya basukusuku+ icakashika ne ca kufimbapo ica mikupo ya basilu+ ne nsalu ya kucingilako,+ 35 ne cipao+ ca cipangano ne milando+ ya ciko ne nkupiko,+ 36 itebulo,+ ifipe+ fya liko fyonse no mukate wa mutuulo, 37 ica kutekapo inyali+ ica golde iyalopololwa, inyali sha ciko, umutande wa nyali,+ ne fipe+ fya ciko fyonse na mafuta ya kusanikila,+ 38 ne ciipailo+ ca golde na mafuta ya kusubila+ ne fyanunkila+ ne ca kucinga+ pa mwinshi wa cikuulwa ca mushilo, 39 iciipailo+ ca mukuba ne capikulwa+ ca mukuba ica ciko, imitembo+ ya ciko ne fipe fya ciko fyonse,+ ica kubikamo amenshi ya kusamba+ ne ca kucitekapo,+ 40 insalu sha kucingilako+ ulubansa, ifyaimikwa+ fya luko na mashinte+ ya luko ne ca kucingilako+ pa mpongolo ya lubansa, imyando+ ya ciko ne mpoopo+ sha ciko ne fipe+ fyonse ifya kubomfya mu cikuulwa ca mushilo, e kutila mu cikuulwa ca kukumaninako, 41 ifya kufwala+ ifyapikulwa ifya kubombela mu muputule wa mushilo nga nshi, ifya kufwala fya mushilo+ ifya kwa Aarone shimapepo ne fya kufwala fya bana bakwe abaume ifya kubombelamo bushimapepo.+

42 Ukulingana na fyonse ifyo Yehova aebele Mose, e fyo abana ba kwa Israele babombele umulimo onse.+ 43 Kabili Mose amwene umulimo onse, kabili moneni! baubombele nga filya fine Yehova alandile. E fyo bacitile. E ico Mose alibapaalile.+

40 Kabili Yehova asosele kuli Mose, ati: 2 “Mu bushiku bwa kubalilapo ubwa mweshi wa ntanshi,+ e mo ukemike icikuulwa ca mushilo e kutila icikuulwa ca kukumaninako.+ 3 Kabili ukabike icipao ca cipangano+ mu kati no kucingako insalu ku Cipao.+ 4 Kabili ukengishe itebulo+ no kuliteyanya bwino, kabili ukengishe ica kutekapo inyali+ no kusanika inyali sha ciko.+ 5 Kabili ukabike iciipailo ca golde ica kufutumwinapo ifyanunkila+ pa ntanshi ya cipao ca cipangano no kukobeka ica kucinga pa mwinshi wa cikuulwa ca mushilo.+

6 “Kabili ukabike iciipailo+ ca kutuulilapo umutuulo wa koca pa ntanshi ya mwinshi wa cikuulwa ca mushilo, 7 kabili ukabike ica kubikamo amenshi ya kusamba pa kati ka cikuulwa ca mushilo ne ciipailo kabili ukabikemo na menshi.+ 8 Kabili ukateyanye ulubansa+ ukushinguluka no kukobeka ica kucinga+ pa mpongolo ya lubansa. 9 Kabili ukabuule na mafuta ya kusubila+ no kusuba icikuulwa ca mushilo na fyonse ifilimo,+ kabili ukacisangulule pamo ne fipe fya ciko fyonse, pa kuti cikabe ica mushilo. 10 Kabili ukasube iciipailo ca kutuulilapo umutuulo wa koca ne fipe fya ciko fyonse no kusangulula iciipailo,+ pa kuti iciipailo cikabe ica mushilo nga nshi.+ 11 Kabili ukasube ne ca kubikamo amenshi ya kusamba ne ca kucitekapo no kucisangulula.

12 “E lyo ukapalamike Aarone na bana bakwe abaume ku mwinshi wa cikuulwa ca mushilo no kubasamba mu menshi.+ 13 Kabili ukafwike Aarone ifya kufwala fya mushilo+ kabili ukamusube+ no kumusangulula, pa kuti abombe bushimapepo kuli ine. 14 Pa numa ukapalamike abana bakwe abaume kabili ukabafwike ifya kufwala.+ 15 Kabili ukabasube filya fine ukasuba shibo,+ pa kuti babombe bushimapepo kuli ine, no kusubwa kwabo kukaba ukwa muyayaya, e cishibilo ca bushimapepo bwa muyayaya ku nkulo shabo.”+

16 Kabili Mose acitile ukulingana na fyonse ifyo Yehova amwebele.+ Filya fine fye e fyo acitile.

17 Nomba mu mweshi wa ntanshi mu mwaka uwalenga ibili, mu bushiku bwa ntanshi muli uyo mweshi, e mo caimikwe icikuulwa ca mushilo.+ 18 Ilyo Mose aimike icikuulwa ca mushilo, abikile amashinte+ ya ciko pa nshi no kubikapo amafulemu+ ya ciko no kubikamo imipindo+ no kwimika inceshi sha ciko.+ 19 E lyo ayanshile itenti+ pa muulu wa cikuulwa ca mushilo no kubikapo ica kufimba+ pe tenti pa muulu wa liko, ukulingana ne fyo Yehova aebele Mose.

20 Pa numa abuulile amabwe ya Cipangano+ no kuyabika mu Cipao+ kabili abikile imitembo+ ku Cipao no kubika inkupiko+ pa muulu wa Cipao.+ 21 E lyo aingishe Icipao mu cikuulwa ca mushilo no kubika insalu+ ya kucingilako no kucinga ku cipao ca cipangano,+ ukulingana ne fyo Yehova aebele Mose.

22 Kabili abikile itebulo+ mu cikuulwa ca mushilo mu mbali, ku kapinda ka ku kuso, ku nse ya nsalu ya kucingilako, 23 kabili atentekenyepo imikate+ ku cinso ca kwa Yehova, ukulingana ne fyo Yehova aebele Mose.

24 Kabili abikile ica kutekapo inyali+ mu cikuulwa ca mushilo apalungatene ne tebulo, mu mbali, ku kapinda ka ku kulyo. 25 Asanike ne nyali+ ku cinso ca kwa Yehova, ukulingana ne fyo Yehova aebele Mose.

26 Kabili abikile iciipailo ca golde+ mu cikuulwa ca mushilo pa ntanshi ya nsalu ya kucingilako, 27 pa kutila alefutumwinapo ifyanunkila,+ ukulingana ne fyo Yehova aebele Mose.

28 Pa kulekelesha abikile ica kucinga+ pa mwinshi wa cikuulwa ca mushilo.

29 Kabili abikile iciipailo+ ca mutuulo wa koca pa mwinshi wa cikuulwa ca mushilo, icikuulwa ca kukumaninako, pa kuti atuule umutuulo wa koca+ no mutuulo wa ngano, ukulingana ne fyo Yehova aebele Mose.

30 Kabili abikile ica kubikamo amenshi ya kusamba pa kati ka cikuulwa ca mushilo ne ciipailo no kubikamo amenshi ya kusamba ku minwe na ku makasa.+ 31 Kabili palya e po Mose na Aarone na bana bakwe abaume balesambila ku minwe na ku makasa. 32 Ilyo baingila mu cikuulwa ca mushilo na lintu bapalama ku ciipailo balesamba,+ ukulingana ne fyo Yehova aebele Mose.

33 Na pa kulekelesha ateyenye ulubansa+ ukushinguluka icikuulwa ca mushilo ne ciipailo no kubika ica kucinga pa mpongolo ya lubansa.+

E fyo Mose apwishishe umulimo. 34 E lyo ikumbi+ lyakupile icikuulwa ca mushilo, no bukata bwa kwa Yehova bwaiswile mu cikuulwa ca mushilo. 35 Na o Mose afililwe ukwingila mu cikuulwa ca mushilo, pantu ikumbi+ lyaikele pa muulu wa ciko no bukata bwa kwa Yehova bwaiswile mu cikuulwa ca mushilo.+

36 Ilyo ikumbi lyaima ukufuma pa cikuulwa ca mushilo, ninshi abana ba kwa Israele kupasa inkambi mu nyendo shabo shonse.+ 37 Lelo, nge kumbi talimine, tabalepasa inkambi mpaka ubushiku lyaima.+ 38 Pantu ikumbi lya kwa Yehova lyaleba pa cikuulwa ca mushilo akasuba, na mu nshita ya bushiku umulilo e walebapo uo aba mu ng’anda ya kwa Israele bonse balemona mu nyendo shabo shonse.+