Impendwa

1 Kabili Yehova asosele kuli Mose mu matololo ya Sinai,+ mu cikuulwa ca kukumaninako,+ pa bushiku bwa kubalilapo ubwa mweshi wa bubili mu mwaka wa bubili ukutula apo bafumine mu calo ca Egupti,+ ati: 2 “Pendeni+ ulukuta lonse ulwa bana ba kwa Israele ukulingana ne ndupwa shabo, ukulingana na mayanda ya bashibo, mupende abaume bonse umo umo ukulingana ne mpendwa ya mashina, 3 ukutula pa wa myaka amakumi yabili (20) ukuya na pa muulu,+ onse uwingaya ku bulwi mu Israele.+ Kabili iwe na Aarone mubalembe amashina ukulingana na mabumba yabo.

4 “Kabili abaume bamo bakabe na imwe, umwaume umo ukufuma mu mukowa umo; aba baume e bakalamba ba mu mayanda ya bashibo.+ 5 Kabili aya e mashina ya baume abakalakwafwilisha: Aba muli Rubene,+ ni Elisuri+ mwana Shedeuri; 6 aba muli Simeone,+ ni Shelumiele+ mwana Surishadai; 7 aba muli Yuda,+ ni Naashone+ mwana Aminadabu; 8 aba muli Isakari,+ ni Netanele+ mwana Suari; 9 aba muli Sebuluni,+ ni Eliabu+ mwana Helone; 10 aba mu bana ba kwa Yosefe:+ ni Efraimu,+ Elishama mwana Amihudi; muli Manase+ ni Gamaliele mwana Pedasuri; 11 muli Benjamini+ ni Abidani+ mwana Gideoni; 12 aba muli Dani,+ ni Ahiesere+ mwana Amishadai; 13 aba muli Ashere,+ ni Pagiele+ mwana Okrani; 14 aba muli Gadi,+ ni Eliasafi+ mwana Deuele;+ 15 aba muli Naftali,+ ni Ahira+ mwana Enani. 16 Aba e baitilwe mu lukuta, intungulushi+ sha mikowa ya bashibo. E bakalamba ba makana ya kwa Israele.”+

17 E ico Mose na Aarone basendele aba bantu abalumbwilwe amashina. 18 Kabili pa bushiku bwa kubalilapo ubwa mweshi wa bubili, balongenye ulukuta lonse, pa kuti balembeshe ifyo bafyalwa+ ukulingana ne ndupwa shabo mu mayanda ya bashibo, ukulingana ne mpendwa ya mashina, ukutula pa wa myaka amakumi yabili (20) no kuya pa muulu,+ umuntu fye onse, 19 nga filya fine Yehova aebele Mose; kabili alibalembele+ amashina mu matololo ya Sinai.

20 Kabili abana ba kwa Rubene, ibeli lya kwa Israele,+ ukulingana no kufyalwa kwabo mu ndupwa shabo mu mayanda ya bashibo, ukulingana ne mpendwa ya mashina yabo, umuntu fye onse, abaume bonse ukutula pa wa myaka amakumi yabili (20) no kuya pa muulu, onse uwingaya ku bulwi, 21 abalembelwe amashina aba mu mukowa wa kwa Rubene, bali amakana amakumi yane na mutanda ne myanda isano (46,500).+

22 Abana ba kwa Simeone,+ abalembelwe ukulingana no kufyalwa kwabo, ukulingana ne ndupwa shabo mu mayanda ya bashibo, abalembelwe mu bantu bakwe ukulingana ne mpendwa ya mashina yabo, umuntu fye onse, abaume bonse ukutula pa wa myaka amakumi yabili (20) no kuya pa muulu, onse uwingaya ku bulwi, 23 abalembelwe aba mu mukowa wa kwa Simeone bali amakana amakumi yasano na pabula ne myanda itatu (59,300).+

24 Aba mu bana ba kwa Gadi,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 25 abalembelwe aba mu mukowa wa kwa Gadi+ bali amakana amakumi yane na yasano ne myanda mutanda na makumi yasano (45,650).+

26 Aba mu bana ba kwa Yuda,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 27 abalembelwe aba mu mukowa wa kwa Yuda bali amakana amakumi cinelubali na yane ne myanda mutanda (74,600).+

28 Aba mu bana ba kwa Isakari,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 29 abalembelwe aba mu mukowa wa kwa Isakari bali amakana amakumi yasano na yane ne myanda ine (54,400).+

30 Aba mu bana ba kwa Sebuluni,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 31 abalembelwe aba mu mukowa wa kwa Sebuluni bali amakana amakumi yasano na cinelubali ne myanda ine (57,400).+

32 Aba mu bana ba kwa Yosefe: aba mu bana ba kwa Efraimu,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 33 abalembelwe aba mu mukowa wa kwa Efraimu+ bali amakana amakumi yane ne myanda isano (40,500).+

34 Aba mu bana ba kwa Manase,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 35 abalembelwe aba mu mukowa wa kwa Manase bali amakana amakumi yatatu na yabili ne myanda ibili (32,200).+

36 Aba mu bana ba kwa Benjamini,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 37 abalembelwe aba mu mukowa wa kwa Benjamini bali amakana amakumi yatatu na yasano ne myanda ine (35,400).+

38 Aba mu bana ba kwa Dani,+ ukulingana no kufyalwa kwabo ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 39 abalembelwe aba mu mukowa wa kwa Dani bali amakana amakumi mutanda na yabili ne myanda cinelubali (62,700).+

40 Aba mu bana ba kwa Ashere,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 41 abalembelwe aba mu mukowa wa kwa Ashere bali amakana amakumi yane na limo ne myanda isano (41,500).+

42 Aba mu bana ba kwa Naftali,+ ukulingana no kufyalwa kwabo, ukulingana ne ndupwa shabo mu mayanda ya bashibo, ukulingana ne mpendwa ya mashina ukutula pa wa myaka amakumi yabili (20) no kuya pa muulu, onse uwingaya ku bulwi, 43 abalembelwe aba mu mukowa wa kwa Naftali bali amakana amakumi yasano na yatatu ne myanda ine (53,400).+

44 Aba e balembelwe, abo Mose alembele, pamo na Aarone ne ntungulushi sha mu Israele, abaume ikumi na babili (12). Cila muntu aleimininako ing’anda ya bawishi. 45 Na bonse abalembelwe aba mu bana ba kwa Israele ukulingana na mayanda ya bashibo ukutula pa wa myaka amakumi yabili (20) no kuya pa muulu, onse uwingaya ku bulwi mu Israele, 46 bonse pamo abalembelwe bali amakana imyanda mutanda na yatatu ne myanda isano na makumi yasano (603,550).+

47 Lelo abena Lebi+ bena ukulingana no mukowa wa bashibo tabalembelepo nangu umo.+ 48 Kabili Yehova asosele kuli Mose ati: 49 “Umukowa wa kwa Lebi wikaulemba, kabili wikapenda ubwingi bwabo mu kati ka bana ba kwa Israele.+ 50 E ico iwe eba abena Lebi ukulasakamana icikuulwa ca mushilo umwaba icipao ca Cipangano+ ne fipe fya ciko fyonse na fyonse ifyabamo.+ E bakalasenda icikuulwa ca mushilo ne fipe fya ciko fyonse,+ kabili e bakalabombela+ palya; kabili bakakuule inkambi ukushinguluka icikuulwa ca mushilo.+ 51 Kabili lyonse ilyo kwaba ukukuusha icikuulwa ca mushilo, abena Lebi e bakalacipangulula;+ kabili ilyo kwaba ukupanga icikuulwa ca mushilo, abena Lebi e bakalacimika; umbi umbi uwapalamako akepaiwe.+

52 “Kabili abana ba kwa Israele bakapange cila muntu itenti lyakwe, kabili umuntu onse akabe mwi bumba+ lya mikowa itatu ilyo abamo ukulingana na mabumba yabo. 53 Kabili abena Lebi bakakuule inkambi ukushinguluka icikuulwa ca mushilo umwaba icipao ca Cipangano, pa kuti ubukali+ bwikemina ulukuta lwa bana ba kwa Israele; kabili abena Lebi bakalebomba imilimo bafwile ukubomba pa cikuulwa ca mushilo umwaba icipao ca Cipangano.”+

54 Awe abana ba kwa Israele balicitile fyonse ukulingana ne fyo Yehova aebele Mose. Ifyo fine fye e fyo bacitile.+

2 Yehova nomba asosele kuli Mose na Aarone ati: 2 “Abana ba kwa Israele bakapange cila muntu itenti lyakwe, kabili umuntu onse akabe mwi bumba+ lya mikowa itatu ilyo abamo, ukulingana ne fishibilo fya mu mayanda ya bashibo. Apalungatana ne cikuulwa ca kukumaninako e po bakakuulile inkambi ukulishinguluka.

3 “Kabili abakakuulila inkambi ku kabanga, ukutulila akasuba, ba mu nkambi ya kwa Yuda iya mikowa itatu mu mabumba yabo, kabili intungulushi pa bana ba kwa Yuda ni Naashone+ mwana Aminadabu. 4 Kabili ibumba lyakwe na balembelwe pali aba, bali amakana amakumi cinelubali na yane ne myanda mutanda (74,600).+ 5 Kabili abakakuulila inkambi mupepi na ena ba mu mukowa wa kwa Isakari,+ kabili intungulushi pa bana ba kwa Isakari ni Netanele+ mwana Suari. 6 Kabili ibumba lyakwe na balembelwe bali amakana amakumi yasano na yane ne myanda ine (54,400).+ 7 E lyo pakakonke umukowa wa kwa Sebuluni; intungulushi pa bana ba kwa Sebuluni ni Eliabu+ mwana Helone. 8 Kabili ibumba lyakwe na balembelwe bali amakana amakumi yasano na cinelubali ne myanda ine (57,400).+

9 “Bonse aba mu nkambi ya kwa Yuda abalembelwe bali amakana umwanda umo na makumi cinekonsekonse na mutanda ne myanda ine (186,400) ukulingana na mabumba yabo. E ba kubalilapo ukuya.+

10 “Inkambi ya kwa Rubene+ iya mikowa itatu ikaba ku kapinda ka ku kulyo mu mabumba yabo, kabili intungulushi pa bana ba kwa Rubene ni Elisuri+ mwana Shedeuri. 11 E lyo ibumba lyakwe na balembelwe bali amakana amakumi yane na mutanda ne myanda isano (46,500).+ 12 Kabili abakakuulila inkambi mupepi na ena ba mu mukowa wa kwa Simeone, kabili intungulushi pa bana ba kwa Simeone ni Shelumiele+ mwana Surishadai. 13 Kabili ibumba lyakwe na balembelwe pali aba, bali amakana amakumi yasano na pabula ne myanda itatu (59,300).+ 14 E lyo pakakonke umukowa wa kwa Gadi; intungulushi pa bana ba kwa Gadi ni Eliasafi+ mwana Reuele. 15 Kabili ibumba lyakwe na balembelwe pali aba, bali amakana amakumi yane na yasano ne myanda mutanda na makumi yasano (45,650).+

16 “Bonse aba mu nkambi ya kwa Rubene abalembelwe bali amakana umwanda umo na makumi yasano na limo ne myanda ine na makumi yasano (151,450) ukulingana ne fyali amabumba yabo, kabili aba e ba cibili ukuya.+

17 “Pa nshita ya kukuusha icikuulwa ca kukumaninako,+ inkambi ya bena Lebi+ ikabe pa kati ka nkambi shibiye.

“Filya fine inkambi shabo shikakonkana, e fyo bakeme,+ cila muntu pa cifulo cakwe, ukulingana ne mikowa yabo itatu itatu.

18 “Inkambi ya kwa Efraimu+ iya mikowa itatu ikaba ku masamba mu mabumba yabo, kabili intungulushi pa bana ba kwa Efraimu ni Elishama+ mwana Amihudi. 19 Kabili ibumba lyakwe na balembelwe pali aba, bali amakana amakumi yane ne myanda isano (40,500).+ 20 Kabili abakakuulila inkambi mupepi na ena ba mu mukowa wa kwa Manase,+ kabili intungulushi pa bana ba kwa Manase ni Gamaliele+ mwana Pedasuri. 21 Kabili ibumba lyakwe na balembelwe pali aba, bali amakana amakumi yatatu na yabili ne myanda ibili (32,200).+ 22 E lyo pakakonke umukowa wa kwa Benjamini;+ intungulushi pa bana ba kwa Benjamini ni Abidani+ mwana Gideoni. 23 Kabili ibumba lyakwe na balembelwe pali aba, bali amakana amakumi yatatu na yasano ne myanda ine (35,400).+

24 “Bonse aba mu nkambi ya kwa Efraimu abalembelwe bali amakana umwanda umo na cinekonsekonse no mwanda umo (108,100) mu mabumba yabo, kabili aba e ba citatu ukuya.+

25 “Inkambi ya kwa Dani iya mikowa itatu ikaba ku kapinda ka ku kuso mu mabumba yabo, kabili intungulushi pa bana ba kwa Dani ni Ahiesere+ mwana Amishadai. 26 Kabili ibumba lyakwe na balembelwe pali aba, bali amakana amakumi mutanda na yabili ne myanda cinelubali (62,700).+ 27 Kabili abakakuulila inkambi mupepi na ena bakaba ba mu mukowa wa kwa Ashere, ne ntungulushi pa bana ba kwa Ashere ni Pagiele+ mwana Okrani. 28 Kabili ibumba lyakwe na balembelwe pali aba, bali amakana amakumi yane na limo ne myanda isano (41,500).+ 29 E lyo pakakonke umukowa wa kwa Naftali:+ intungulushi pa bana ba kwa Naftali ni Ahira+ mwana Enani. 30 Kabili ibumba lyakwe na balembelwe pali aba, bali amakana amakumi yasano na yatatu ne myanda ine (53, 400).+

31 “Bonse aba mu nkambi ya kwa Dani abalembelwe bali amakana umwanda umo na makumi yasano na cinelubali ne myanda mutanda (157,600). E ba kulekeleshako ukuya+—ukulingana na mabumba yabo aya imikowa itatu itatu.”

32 Aba e bana ba kwa Israele abalembelwe ukulingana na mayanda ya bashibo; bonse aba mu nkambi abalembelwe mu mabumba yabo bali amakana imyanda mutanda na yatatu ne myanda isano na makumi yasano (603,550).+ 33 Lelo abena Lebi tabalembelwe+ mu kati ka bana ba kwa Israele, nga filya fine fye Yehova aebele Mose. 34 Na bana ba kwa Israele bacitile ukulingana na fyonse ifyo Yehova aebele Mose.+ E fyo bakuulile inkambi mu mikowa+ yabo itatu itatu, kabili e fyo baile,+ cila muntu ukulingana ne ndupwa shabo mu mayanda ya bashibo.

3 Ifi e fyali ulupwa lwa kwa Aarone na Mose pa nshita Yehova alandile na Mose mu Lupili lwa Sinai.+ 2 Kabili aya e mashina ya bana baume ba kwa Aarone: Nadabu e beli, na Abihu,+ Eleasari,+ na Itamari.+ 3 Aya e mashina ya bana baume ba kwa Aarone, bashimapepo basubwa abapeelwe amaka ya kubomba bushimapepo.+ 4 Lelo Nadabu na Abihu bafwiliile pa ntanshi ya kwa Yehova ilyo baletele kuli Yehova umulilo+ uo bashasuminishiwe, mu matololo ya Sinai; kabili tabakwete abana baume. Lelo Eleasari+ na Itamari+ balebomba bushimapepo pamo na shibo Aarone.

5 E lyo Yehova aebele Mose ati: 6 “Palamika umukowa wa kwa Lebi,+ no kubemika pa ntanshi ya kwa Aarone shimapepo, pa kuti balemubombela.+ 7 Kabili bakalemubombela no kubombela ulukuta lonse pa ntanshi ya cikuulwa ca kukumaninako ilyo balebomba imilimo iya pa cikuulwa ca mushilo. 8 Kabili bakalesunga ifipe+ fyonse ifya pa cikuulwa ca kukumaninako, no kubombela abana ba kwa Israele ilyo balebomba imilimo ya pa cikuulwa ca mushilo.+ 9 Kabili ukapeele abena Lebi kuli Aarone na ku bana bakwe abaume. Bena bantu bapeelwa, bapeelwa kuli ena ukufuma pa bana ba kwa Israele.+ 10 Kabili ukabike Aarone na bana bakwe abaume pali bushimapepo, na bo bakalebomba bushimapepo bwabo;+ na umbi umbi uwapalamako akepaiwe.”+

11 Kabili Yehova akonkenyepo ukusosa kuli Mose ati:12 “Lelo ine, mona! nabuula abena Lebi mu kati ka bana ba kwa Israele ukubapyanika pa mabeli+ yonse aya bana ba kwa Israele; kabili abena Lebi bakaba bandi. 13 Pantu ibeli lyonse lyandi.+ Ubushiku naipeye amabeli yonse mu calo ca Egupti+ naibuulile amabeli yonse aya mu Israele, e kutila amabeli ya bantu na ya nama.+ Yakulaba yandi. Nine Yehova.”

14 Kabili Yehova akonkenyepo ukusosa kuli Mose mu matololo ya Sinai,+ ati:15 “Lemba abana baume ba kwa Lebi ukulingana na mayanda ya bashibo mu ndupwa shabo. Umwaume onse uuli no mweshi umo no kuya pa muulu umulembe.”+ 16 Awe Mose atendeke ukubalemba ukulingana ne fyo Yehova amukonkomeshe, acitile filya fine fye bamwebele. 17 Kabili aba e bana baume ba kwa Lebi+ ukulingana na mashina yabo: Gershone na Kohati na Merari.+

18 Amashina ya bana baume ba kwa Gershone ukulingana ne ndupwa shabo ni aya: Libni na Shimei.+

19 E lyo abana baume ba kwa Kohati+ ukulingana ne ndupwa shabo ni Amramu na Isari,+ Hebrone na Usiele.

20 Na bana baume ba kwa Merari+ ukulingana ne ndupwa shabo ni Maali+ na Mushi.+

Ishi e ndupwa sha bena Lebi ukulingana na mayanda ya bashibo.

21 Muli Gershone mwafumine ulupwa lwa bena Libni+ no lupwa lwa bena Shimei.+ Ishi e ndupwa sha bena Gershone. 22 Abantu babo abalembelwe bali ukulingana ne mpendwa ya baume bonse aba mweshi umo no kuya pa muulu.+ Abantu babo abalembelwe bali amakana cinelubali ne myanda isano (7,500).+ 23 Indupwa sha bena Gershone shali ku numa ya cikuulwa ca mushilo.+ Shapangile inkambi ku masamba. 24 Kabili Eliasafi mwana Laele e wali intungulushi ya lupwa lwa bena Gershone. 25 Kabili umulimo wa bana baume ba kwa Gershone+ mu cikuulwa ca kukumaninako, wakumine icikuulwa ca mushilo ne tenti,+ ne ca kufimbapo+ ca liko ne ca kucinga+ pa mwinshi wa cikuulwa ca kukumaninako, 26 ne nsalu sha kucingilako+ ulubansa ne ca kucinga+ pa mwinshi wa lubansa ulwashinguluka icikuulwa ca mushilo ne ciipailo, ne myando+ ya liko, e kutila conse icakumine umulimo wa ciko onse.

27 Kabili muli Kohati mwafumine ulupwa lwa bena Amramu no lupwa lwa bena Isari no lupwa lwa bena Hebrone no lupwa lwa bena Usiele. Ishi e ndupwa sha bena Kohati.+ 28 Pa baume bonse abapendelwe ukutampila pa wali no mweshi umo no kuya pa muulu pali abantu amakana cinekonsekonse ne myanda mutanda (8,600), abalebomba umulimo mu ncende ya mushilo.+ 29 Indupwa sha bana baume ba kwa Kohati shakuulile inkambi ku kapinda ka ku kulyo aka cikuulwa ca mushilo.+ 30 Kabili Elisafani mwana Usiele e wali intungulushi ya ndupwa sha bena Kohati.+ 31 Kabili umulimo+ wabo wakumine Icipao+ ne tebulo+ ne ca kutekapo+ inyali ne fiipailo+ ne fipe+ fya mu muputule wa mushilo ifyo balebomfya pa kubomba ne ca kucingilako,+ na conse icakumine uyu mulimo.

32 Kabili Eleasari+ mwana Aarone shimapepo, uwaleangalila abalebombe milimo ya mu muputule wa mushilo, e wali umukalamba wa ntungulushi sha bena Lebi.

33 Muli Merari mwafumine ulupwa lwa bena Maali+ no lupwa lwa bena Mushi.+ Ishi e ndupwa sha bena Merari.+ 34 Kabili abantu babo abalembelwe ukulingana ne mpendwa ya baume bonse aba mweshi umo no kuya pa muulu bali amakana mutanda ne myanda ibili (6,200).+ 35 Kabili Suriele mwana Abihaili e wali intungulushi pa ndupwa sha kwa Merari mu mukowa wabo. Bapangile inkambi ku kapinda ka ku kuso aka cikuulwa ca mushilo.+ 36 Kabili umulimo abana baume ba kwa Merari baleangalila wali wa mafulemu+ ya cikuulwa ca mushilo ne milando+ ya ciko ne nceshi+ sha ciko na mashinte ya ciko ne fipe+ fya ciko fyonse ne milimo ya ciko yonse,+ 37 ne fyaimikwa+ fya mu lubansa ukushinguluka, na mashinte+ ya fiko ne mpopo sha fiko ne myando ya fiko.

38 Kabili abapangile nkambi ku ntanshi ya cikuulwa ca mushilo lwa ku kabanga, ku ntanshi ya cikuulwa ca kukumaninako ukulola ukutulila akasuba, ni Mose na Aarone na bana bakwe abaume, abalebomba umulimo wa mu muputule wa mushilo,+ umulimo uo balebombela abana ba kwa Israele. Kabili umbi umbi uwapalamako akepaiwe.+

39 Bonse abalembelwe mu bena Lebi abo Mose na Aarone balembele ukulingana ne fyo Yehova abebele ukulingana ne ndupwa shabo, abaume bonse aba mweshi umo no kuya pa muulu, bali amakana amakumi yabili na yabili (22,000).

40 E lyo Yehova atile kuli Mose: “Lemba abana baume ba kwa Israele bonse amabeli ukutula pa wa mweshi umo no kuya pa muulu,+ upende ne mpendwa yabo. 41 Kabili umbuulile abena Lebi—nine Yehova—bapyane amabeli yonse aya bana ba kwa Israele,+ umbuulile ne fitekwa fya bena Lebi fipyane amabeli yonse aya fitekwa fya bana ba kwa Israele.”+ 42 Awe Mose alembele amabeli yonse aya bana ba kwa Israele, nga filya fine fye Yehova amwebele. 43 Ne mpendwa ya baume bonse amabeli ukutula pa wa mweshi umo no kuya pa muulu iya balembelwe yali amakana amakumi yabili na yabili ne myanda ibili na makumi cinelubali na batatu (22,273).

44 Kabili Yehova akonkenyepo ukusosa kuli Mose ati:45 “Buula abena Lebi ubapyanikishe pa mabeli yonse aya bana ba kwa Israele, ne fitekwa fya bena Lebi ufipyanikishe pa fitekwa fyabo; kabili abena Lebi bakaba bandi.+ Nine Yehova. 46 Kabili pa kulubula+ amabeli imyanda ibili na makumi cinelubali na yatatu (273) aya bana baume ba kwa Israele ayapula pa mpendwa ya bena Lebi,+ 47 ukababuulile ibeli limo limo indalama amashekele yasano.+ Ukabuule ayalingene ne shekele lya mu muputule wa mushilo. Ishekele limo magera amakumi yabili (20).+ 48 Kabili ukapeele Aarone na bana bakwe abaume indalama sha kulubwilamo abapula pa mpendwa ukubacila.” 49 Awe Mose apokele indalama sha kulubwila ukufuma kuli balya abacilile pa mpendwa iyo abena Lebi bali no kulubula mu ndalama sha cilubula. 50 Ku mabeli ya bana ba kwa Israele e ko apokele indalama amashekele ikana limo ne myanda itatu na makumi mutanda na yasano (1,365) ayalingene ne shekele lya mu muputule wa mushilo. 51 E lyo Mose apeele Aarone na bana bakwe abaume indalama sha kulubwila ukulingana ne cipope ca kwa Yehova, nga filya fine Yehova aebele Mose.

4 Nomba Yehova alandile kuli Mose na kuli Aarone ati: 2 “Kukaba ukupenda abana baume ba kwa Kohati+ mu kati ka bana baume ba kwa Lebi, ukulingana ne ndupwa shabo mu mayanda ya bashibo, 3 ukutula pa wa myaka amakumi yatatu (30)+ ukufika na ku wa myaka amakumi yasano (50),+ bonse abengalinga ukubomba imilimo+ ya mu cikuulwa ca kukumaninako.

4 “Uyu e mulimo wa bana baume ba kwa Kohati mu cikuulwa ca kukumaninako.+ Mulimo wa mushilo nga nshi: 5 Kabili Aarone na bana bakwe abaume bakaleingilamo pa nshita ya kukuuka, bakalekobola insalu+ ya kucingilako no kuifimba pa cipao+ ca cipangano. 6 Kabili bakafimbe imikupo ya basilu+ pa muulu wa ciko no kwanshikapo insalu ya bluu e lyo bakabikeko ne mitembo ya ciko.+

7 “Kabili bakanshike insalu ya bluu pe tebulo+ lya mukate wa kutuula, no kubikapo imbale+ na makapu ne mbale shafonka+ ne mitondo ya mwangashi wa mutuulo; kabili umukate+ wa nshiku pe ukalebapo lyonse. 8 E lyo bakafimbepo insalu yakashika ce,+ no kufimbapo imikupo ya basilu+ no kubikako imitembo ya liko.+ 9 Kabili bakabuule insalu ya bluu no kufimba pa ca kutekapo+ inyali ne nyali+ sha ciko no tumanikilo+ twa ciko ne fya kwikato mulilo+ fya ciko ne fipe+ fyonse ifya mafuta ifyo lyonse babomfya ku ca kutekapo inyali. 10 E lyo bakafimbe imikupo ya basilu+ pa ca kutekapo inyali na pa fipe fya ciko fyonse no kucibika pa cimuti ca kusendelapo. 11 Kabili bakanshike insalu ya bluu pa ciipailo ca golde,+ kabili bakacifimbe imikupo ya basilu+ no kubikako imitembo ya ciko.+ 12 Kabili bakabuule ifipe+ fyonse ifya kubomfya ifyo lyonse babomfya mu muputule wa mushilo, no kufibika mu nsalu ya bluu no kufimbapo imikupo ya basilu+ no kufibika pa cimuti ca kusendelapo.

13 “Kabili bakapyange imito ya mafuta iya pa ciipailo+ no kwanshikapo insalu yakashikila iya masako ya mpaanga. 14 Kabili bakabikepo ifipe fya ciko fyonse ifyo lyonse babomfya pa ciipailo,+ ifya kwikata umulilo, ifya kutunkwilako na bafosholo ne mbale shafonka, ifipe fyonse ifya ciipailo; kabili bakafimbepo imikupo ya basilu no kubikako imitembo ya ciko.+

15 “Kabili pa kukuusha inkambi Aarone na bana bakwe abaume bakapwishe ukufimba pa fya mu muputule wa mushilo+ na pa fipe+ fyonse ifya mu muputule wa mushilo, e lyo nomba abana baume ba kwa Kohati bakengilemo ku kufisenda,+ lelo bekakumya+ ku fya mu muputule wa mushilo epali bafwa. Ifi e fipe fya bana ba kwa Kohati mu cikuulwa ca kukumaninako.+

16 “Kabili umulimo+ wa kwa Eleasari mwana Aarone shimapepo, wa kubombela ku mafuta+ ya cengelo na ku fyanunkila+ na ku mutuulo+ wa lyonse uwa ngano na ku mafuta+ ya kusubilako, na ku cikuulwa ca mushilo conse na fyonse ifilimo, e kutila mu muputule wa mushilo ne fipe fyonse ifilimo.”

17 Awe Yehova akonkenyepo ukusosa kuli Mose na Aarone ati:18 “Mwikaleka umukowa wa ndupwa sha bena Kohati+ ukalobe mu bena Lebi. 19 Lelo mukabacitile ci pa kuti bakabe no mweo no kukanafwa ilyo balepalama ku fya mushilo nga nshi.+ Aarone na bana bakwe abaume bakengilemo, kabili bakapeele abantu umo umo umulimo wakwe ne fipe fyakwe ifya kusenda. 20 Na bo bekengilamo ku kumona ifya mushilo nangu fye pa nshita iinono, epali bafwa.”+

21 E lyo Yehova alandile kuli Mose ati:22 “Kukaba ukupenda abana baume ba kwa Gershone,+ bakapendwe ukulingana ne ndupwa shabo mu mayanda ya bashibo. 23 Bonse abengalinga ukubomba imilimo ya mu cikuulwa ca kukumaninako, ukutula pa wa myaka amakumi yatatu (30) ukufika na ku wa myaka amakumi yasano (50) ukabalembe.+ 24 Uyu e mulimo indupwa sha bena Gershone shikalabomba ne fi e fyo bakalasenda.+ 25 Bakalesenda insalu+ sha cikuulwa ca mushilo ne cikuulwa ca kukumaninako,+ ne ca kufimbapo+ ca ciko no mukupo wa basilu uwa kufimbapo+ uuli pa muulu wa ciko, ne ca kucingilako+ pa mwinshi wa cikuulwa ca kukumaninako, 26 ne nsalu sha kucingilako+ ulubansa ne ca kucinga+ pa mpongolo ya lubansa ulwashinguluka icikuulwa ca mushilo ne ciipailo, ne myando ya ciko ne fipe fya ciko fyonse ifya kubomfya pa kubomba, na fyonse ifyo babombelako imilimo lyonse. E fyo bakalebomba. 27 Ilyo Aarone na bana+ bakwe abaume basosa ukuti imilimo ibombwe, e lyo imilimo yonse iya bana ba kwa Gershone+ iya kusenda ifipe fyabo fyonse no kubomba imilimo yabo yonse ikalecitwa, kabili e bo mukapeele umulimo wa kusenda ifipe fyabo fyonse. 28 Uyu e mulimo wa ndupwa sha bana ba bena Gershone+ mu cikuulwa ca kukumaninako, kabili bakalatungululwa na Itamari+ umwana mwaume wa kwa Aarone shimapepo pa kubomba umulimo wabo.

29 “E lyo abana baume ba kwa Merari,+ ukabalembe ukulingana ne ndupwa shabo mu mayanda ya bashibo. 30 Bonse abengalinga ukubomba imilimo ya mu cikuulwa ca kukumaninako, ukutula pa wa myaka amakumi yatatu (30) ukufika na ku wa myaka amakumi yasano (50) ukabalembe.+ 31 Kabili ifi e fyo bakalasenda,+ ukulingana ne milimo yabo yonse iya mu cikuulwa ca kukumaninako: amafulemu+ ya cikuulwa ca mushilo ne mitembo+ ya ciko ne nceshi+ sha ciko na mashinte ya ciko,+ 32 ne fyaimikwa+ fya mu lubansa ukushinguluka, na mashinte+ ya fiko ne mpoopo+ sha fiko ne myando ya fiko pamo ne fibombelo fyonse no mulimo wa fiko. Kabili mukabapeele ifibombelo mwi shina ne shina ifyo bafwile ukusenda.+ 33 Uyu e mulimo wa ndupwa sha bana ba kwa Merari+ ukulingana ne milimo yabo yonse iya mu cikuulwa ca kukumaninako, kabili bakalatungululwa na Itamari umwana mwaume wa kwa Aarone shimapepo.”+

34 Kabili Mose na Aarone ne ntungulushi+ sha lukuta balembele abana baume ba bena Kohati+ ukulingana ne ndupwa shabo mu mayanda ya bashibo, 35 ukutula pa wa myaka amakumi yatatu (30)+ ukufika na ku wa myaka amakumi yasano (50),+ bonse abengalinga ukubomba imilimo ya mu cikuulwa ca kukumaninako.+ 36 Kabili abalembelwe ukulingana ne ndupwa shabo bali amakana yabili ne myanda cinelubali na basano (2,750).+ 37 Aba e balembelwe+ mu ndupwa sha bena Kohati, bonse abalebomba mu cikuulwa ca kukumaninako, abo Mose na Aarone balembele ukulingana ne cipope Yehova apeele kuli Mose.

38 Nomba abalembelwe mu bana baume ba kwa Gershone+ ukulingana ne ndupwa shabo mu mayanda ya bashibo, 39 ukutula pa wa myaka amakumi yatatu (30) ukufika na ku wa myaka amakumi yasano (50), bonse abengalinga ukubomba imilimo ya mu cikuulwa ca kukumaninako,+ 40 abalembelwe ukulingana ne ndupwa shabo, mu mayanda ya bashibo, bali amakana yabili ne myanda mutanda na makumi yatatu (2,630).+ 41 Aba e balembelwe mu ndupwa sha bana baume ba kwa Gershone, bonse abalebomba mu cikuulwa ca kukumaninako, abo Mose na Aarone balembele ukulingana ne cipope Yehova apeele Mose.+

42 Kumfwa abalembelwe mu ndupwa sha bana baume ba kwa Merari ukulingana ne ndupwa shabo, mu mayanda ya bashibo, 43 ukutula pa wa myaka amakumi yatatu (30) ukufika na ku wa myaka amakumi yasano (50), bonse abengalinga ukubomba imilimo ya mu cikuulwa ca kukumaninako,+ 44 abalembelwe ukulingana ne ndupwa shabo bali amakana yatatu ne myanda ibili (3,200).+ 45 Aba e balembelwe mu ndupwa sha bana ba kwa Merari, abo Mose na Aarone balembele ukulingana ne cipope Yehova alandiile muli Mose.+

46 Abena Lebi bonse abalembelwe abo Mose na Aarone ne ntungulushi sha kwa Israele balembele ukulingana ne ndupwa shabo mu mayanda ya bashibo, 47 ukutula pa wa myaka amakumi yatatu (30) ukufika na ku wa myaka amakumi yasano (50),+ bonse abengalinga ukubomba imilimo yakosa no mulimo wa kusenda ifipe mu cikuulwa ca kukumaninako,+ 48 abo balembele bali amakana cinekonsekonse ne myanda isano na makumi cinekonsekonse (8,580).+ 49 Mose abalembele amashina ukulingana ne cipope ca kwa Yehova, umo umo ukulingana no mulimo wakwe ne fipe alesenda; e fyo balembelwe nga filya fine fye Yehova aebele Mose.+

5 Kabili Yehova akonkenyepo ukusosa kuli Mose ati: 2 “Eba abana ba kwa Israele ukuti bakafumye mu nkambi onse uwa fibashi+ na onse uulefuma fimo ku fya mfwalo+ na onse uwakoweshiwa ku cafwa.+ 3 Abe mwaume nelyo mwanakashi mukabafumishe ku nse. Mukabafumishe ku nse ya nkambi,+ pa kuti bekakowesha+ inkambi sha bo njikalamo.”+ 4 E lyo abana ba kwa Israele bacitile ifyo fine, babafumishe na ku nse ya nkambi. Nga filya fine fye Yehova aebele Mose, e fyo abana ba kwa Israele bacitile.

5 Kabili Yehova akonkenyepo ukusosa kuli Mose ati: 6 “Sosa ku bana ba kwa Israele auti, ‘Umwaume napamo umwanakashi, nga acita ulubembu lumo pa membu shonse isho abantunse bacita isha kubembukila Yehova, ninshi uyo muntu aba uwa mulandu.+ 7 Kabili akasokolole+ ulubembu lwakwe ulo acitile, na o akafute ica pa mulandu wakwe icituntulu, no kulundapo ica pali fisano,+ no kucipeela ku o alufyenyeko. 8 Lelo uo alufyenyeko nga afwa kabili takwete lupwa wapalamisha uo engafuta ica pa mulandu, ninshi ica pa mulandu ico alebwesesha kuli Yehova cikabe ca kwa shimapepo, pamo na sukusuku wa kufutilako uo shimapepo akamufutilako.+

9 “‘Kabili umusangulo+ onse uwa bana ba kwa Israele uwa fya mushilo+ fyonse, uo bakapalamika kuli shimapepo, ukabe wakwe.+ 10 Kabili ifya mushilo fyonse ifyo umuntu asangula fikaba fya kwa shimapepo. Conse ico umuntu no muntu apeela kuli shimapepo, cikaba ca kwa shimapepo.’”

11 Kabili Yehova akonkenyepo ukusosa kuli Mose ati:12 “Sosa ku bana ba kwa Israele auti, ‘Nga ca kuti umukashi ayalukila umulume wakwe pa kucita ubupulumushi,+ 13 kabili umwaume umbi asendama nankwe no kufumya amenshi ya bwaume,+ kabili cafiswa ku menso ya mulume+ wakwe no kukanaishibikwa, kabili umwanakashi nga naikowesha lelo tapali inte ya kumushinina, kabili tasangilishiwe;14 no mulume aba no bufuba,+ kabili alatunganya umukashi wakwe ukuti nacita ubupulumushi, e lyo na o ca cine naikowesha, napamo umulume aba no bufuba, kabili atunganya umukashi ukuti nacita ubupulumushi, lelo kwena taikoweshe;15 e lyo uyo muntu akatwale umukashi wakwe kuli shimapepo,+ akamutwale pamo no mutuulo wakwe, ulupe* lumo ulwa buunga bwa barle. Eketilapo amafuta nangu ukufutumwinapo ifyanunkila,+ pantu uyu, mutuulo wa bufuba, umutuulo wa kwibukishishako ulubembu.

16 “‘Na o shimapepo akamulete pa ntanshi no kumwimika ku cinso ca kwa Yehova.+ 17 Kabili shimapepo akabuule amenshi ya mushilo mu cipe ce bumba, kabili akabuulepo ne loba ilili pa nshi mu cikuulwa ca mushilo, no kulibika mu menshi. 18 Kabili shimapepo akemike umwanakashi uyo ku cinso ca kwa Yehova no kuposolola umushishi wakwe e lyo akabike mu ndupi sha uyo mwanakashi umutuulo wa kwibukishishako, e kutila umutuulo wa bufuba,+ kabili mu minwe ya kwa shimapepo mukabe amenshi yalula ayaleta icitiipu.+

19 “‘Kabili shimapepo akamulenge ukulapa, kabili akatile ku mwanakashi: “Nga ca kuti tapaba umwaume uwasendama nobe kabili nga ca kuti ilyo wali ku mulume+ obe tawayalukile ku kuikowesha ukuli konse, ube uwa kaele ku menshi aya ayalula ayaleta icitiipu. 20 Lelo, nga walyalukila umulume+ obe ilyo ucili mu minwe yakwe kabili nga wali-ikowesha e lyo no mwaume umbi uushili mulume obe nga alyulungana na iwe,+—” 21 E lyo shimapepo akalenge umwanakashi uyo ukulapa umulapo wa citiipu,+ kabili shimapepo akatile ku mwanakashi: “Shi Yehova akulenge ukuba icitiipu kabili umulapo mu kati ka bantu bobe ilyo Yehova alalenga itanta*+ lyobe ukucepa, ne fumo lyobe ukufimba. 22 Kabili aya menshi ayaleta icitiipu yaleingila mu mala yobe pa kuti ifumo lyobe lifimbe ne tanta lyobe licepe.” E lyo umwanakashi akatile: “Cibe ifyo fine!* Ameni!”

23 “‘E lyo shimapepo akalembe ifi fitiipu mwi buuku+ no kufikuumwina+ mu menshi ayalula. 24 Kabili akalenge umwanakashi uyo ukunwa amenshi yalula ayaleta icitiipu,+ na menshi yalula ayaleta icitiipu ayo akanwa yakamulenga ukukalipwa mu mala. 25 E lyo shimapepo akabuule umutuulo+ wa bufuba uuli mu minwe ya mwanakashi uyo no ku-usunsha uku no ku, ku cinso ca kwa Yehova, no ku-upalamika ku ciipailo. 26 Kabili shimapepo akabuulepo uyo mutuulo mu lupi ku kuba ica kwibukishishako+ ca uko no ku-ufutumwina pa ciipailo, e lyo akalenge umwanakashi ukunwa amenshi ayo. 27 Ilyo amulenga ukunwa amenshi, nga ali-ikowesha pa kucita ubupulumushi no kubembukila umulume+ wakwe, amenshi ayalula ayaleta icitiipu yakengila muli ena, kabili ifumo lyakwe likafimba, ne tanta lyakwe likacepa, no yo mwanakashi akaba icitiipu mu kati ka bantu bakwe.+ 28 Lelo, nga ca kutila uyo mwanakashi taikowesha lelo alisanguluka, takakandwe;+ kabili akemita.

29 “‘Ili e funde lya pa bufuba,+ nga umwanakashi ayalukila+ umulume+ ilyo acili mu minwe yakwe, kabili aikowesha, 30 atemwa ilyo umwaume aba no bufuba, kabili atunganya ukuti umukashi wakwe nacita ubupulumushi; e fyo akalenge umukashi ukwiminina ku cinso ca kwa Yehova, na shimapepo akacite kuli ena fyonse ifya mwi funde ili. 31 No yo mwaume takashingamwe ulubembu, lelo umukashi wakwe akakandilwa pa lubembu lwakwe.’”

6 Kabili Yehova akonkenyepo ukusosa kuli Mose ati: 2 “Sosa ku bana ba kwa Israele auti, ‘Nga ca kuti umwaume nelyo umwanakashi alapa umulapo waibela uwa kuba umuNasiri+ kuli Yehova, 3 tafwile ukunwa umwangashi ne fya kunwa ifikola. Tafwile ukunwa umwangashi uwakantuka nelyo ifya kunwa ifikola ifyakantuka,+ nangu ifya kunwa fyonse ifyapangwa ku mwangashi, nangu fisabo fya mwangashi ifibishi atemwa ifyayanikwa. 4 Inshiku shonse isho akaba umuNasiri ekalya nangu cimo icapangwa ku mwangashi, ukutula pa myangashi iishilapya no kufika ku fipapa fya myangashi.

5 “‘Inshiku shonse isho akaba umuNasiri ekabeya umushishi wakwe;+ akabe uwa mushilo pa kuleka umushishi+ wa ku mutwe wakwe ukukula mpaka inshiku isho aipeela ku kuba uwa kwa Yehova shafishiwapo. 6 Inshiku shonse isho akaba uwaipeela kuli Yehova ekapalama ku citumbi.+ 7 Nangu fye ni ku citumbi ca kwa wishi nangu ica kwa nyina atemwa ica kwa munyina nangu ica nkashi yakwe ekaikoweshako ilyo aba bafwa,+ pantu icishibilo ca buNasiri bwakwe kuli Lesa caba ku mutwe wakwe.

8 “‘Inshiku shonse isha buNasiri bwakwe akaba uwa mushilo kuli Yehova. 9 Lelo nga umo apumikisha fye ukufwa+ na o e po ali kabili akowesha umutwe, ukwaba icishibilo ca buNasiri bwakwe, akabeye+ umushishi wa ku mutwe wakwe mu bushiku bwa kusangululwa kwakwe. Akabeye pa bushiku bwalenga cinelubali (7). 10 Na pa bushiku bwalenga cinekonsekonse (8) akalete utwana twa fipeele tubili nangu utwana twa nkunda tubili kuli shimapepo ku mwinshi wa cikuulwa ca kukumaninako.+ 11 Na o shimapepo akaleke kamo kakabe umutuulo+ wa pa lubembu na kambi kakabe umutuulo+ wa koca, e lyo akamufutileko, pantu nabembuka pa mulandu wa kukumya ku citumbi. E lyo umuNasiri akasangulule umutwe wakwe. 12 Kabili akabe umuNasiri+ kuli Yehova mu nshiku sha buNasiri bwakwe, kabili akalete akana ka mpaanga aka mwaka umo ku kuba umutuulo+ wa pa mulandu; ne nshiku isha ku numa tashakapendwe pa mulandu wa kuti akoweshe ubuNasiri bwakwe.

13 “‘Nomba ili e funde lya muNasiri: Mu bushiku inshiku sha buNasiri bwakwe shapwa,+ bakamulete ku mwinshi wa cikuulwa ca kukumaninako. 14 Kabili akapeele kuli Yehova umwana wa mpaanga umo umusuma uwa mwaka umo ku kuba umutuulo+ wa koca no mwana wa mpaanga umukota umo umusuma uwa mwaka umo ku kuba umutuulo+ wa pa lubembu na sukusuku umo umusuma ku kuba ilambo lya mutende,+ 15 no museke wa mikate iishatutumuka iya buunga bwapeleka,+ iyasubwako amafuta,+ no tupaapaatu twa mikate utushatutumuka utwasubwako amafuta,+ pamo no mutuulo+ wa ngano e lyo no mutuulo+ wa mwangashi. 16 E lyo shimapepo akapalamike yena ku cinso ca kwa Yehova no kutuula umutuulo wakwe uwa pa lubembu no mutuulo wakwe uwa koca.+ 17 Kabili akapeele sukusuku ku kuba ilambo lya mutende+ kuli Yehova pamo no museke wa mikate ishatutumuka; kabili shimapepo akapeele umutuulo+ wa buunga no mutuulo wa mwangashi uwa pe lambo ili.

18 “‘Kabili umuNasiri akabeye+ umushishi wa buNasiri bwakwe pa mwinshi wa cikuulwa ca kukumaninako, kabili akabuule umushishi wa buNasiri bwakwe no ku-ubika pa mulilo uuli mwi samba lye lambo lya mutende. 19 Na shimapepo akabuule ukuboko kwa kwa sukusuku ukwaipikwa+ no mukate umo uushatutumuka, ukufuma mu museke, na kapaapaatu ka mukate kamo akashatutumuka,+ no kufibika mu ndupi sha muNasiri ilyo apwa ukubeya icishibilo ca buNasiri bwakwe. 20 E lyo shimapepo akafisunshe uku no ku, ku kuba umutuulo wa kusunsha ku cinso ca kwa Yehova.+ Ca mushilo kuli shimapepo, pamo ne cisao+ ca nama ya mutuulo wa kusunsha no kulu ukwa kutuula umusangulo.+ Na pa numa umuNasiri kuti anwa umwangashi.+

21 “‘Ili e funde lya muNasiri+ uwalapa umulapo, kabili e funde lya pa mutuulo wakwe kuli Yehova pa buNasiri bwakwe, ukulunda pa co engapeela. Ukulingana no mulapo wakwe uo alapa, e fyo akacite pa mulandu we funde lya buNasiri bwakwe.’”

22 E lyo Yehova asosele kuli Mose ati:23 “Sosa kuli Aarone na ku bana bakwe abaume, auti, ‘Ifi e fyo mukapaale+ abana ba kwa Israele, mukatile kuli bena:

24 “Shi Yehova amupaale+ kabili amusunge.+

25 Shi Yehova alenge icinso cakwe ukubalikila imwe,+ no kumupaala.+

26 Shi Yehova amuloleshe+ no kumupeela umutende.”’+

27 Na bo bakabike ishina+ lyandi pa bana ba kwa Israele, pa kuti nkabapaale.”+

7 Nomba pa bushiku Mose apwile ukwimika icikuulwa ca mushilo+ e lyo acisubile+ no kucilenga ukuba ica mushilo kumo ne fipe fya ciko fyonse ne ciipailo ne fipe fya ciko fyonse. E fyo afisubile no kufilenga ukuba ifya mushilo.+ 2 E lyo intungulushi sha kwa Israele,+ abakalamba ba mu mayanda ya bashibo, baletele imituulo,+ pantu bali intungulushi sha mikowa kabili e baleangalila abalembelwe, 3 kabili baletele imituulo yabo ku cinso ca kwa Yehova, amaceleta mutanda (6) ayafimbwapo e lyo ne ng’ombe ikumi na shibili (12), intungulushi shibili shaletele iceleta limo ne ng’ombe imo imo, kabili bafipalamike pa ntanshi ya cikuulwa ca mushilo. 4 E lyo Yehova atile kuli Mose: 5 “Poke fi kuli aba, pantu fikabomfiwa mu mulimo wa pa cikuulwa ca kukumaninako, kabili ukafipeele ku bena Lebi, umo umo ukulingana no mulimo wakwe.”

6 Awe Mose apokele amaceleta ne ng’ombe no kufipeela ku bena Lebi. 7 Amaceleta yabili ne ng’ombe shine apeele ku bana baume ba kwa Gershone ukulingana no mulimo wabo,+ 8 na maceleta yane ne ng’ombe cinekonsekonse (8) apeele ku bana baume ba kwa Merari ukulingana no mulimo wabo,+ abaleangalilwa na Itamari umwana mwaume wa kwa Aarone shimapepo.+ 9 Lelo abana baume ba kwa Kohati tabapeele nangu cimo, pantu e balebomba imilimo ya mu muputule wa mushilo.+ Balesendela ifipe pa mabeya yabo.+

10 Nomba intungulushi shaletele imituulo ya shiko pa kusefya kwa kupeela+ iciipailo kuli Lesa pa bushiku bwa kusubwa kwa ciko, kabili ishi intungulushi shaletele imituulo ya shiko pa ntanshi ya ciipailo. 11 E ico Yehova atile kuli Mose: “Cila ntungulushi ikalete umutuulo wa iko pa bushiku bwa iko, umutuulo wa pa kusefya kwa kupeela iciipailo.”+

12 Nomba uwaletele umutuulo wakwe pa bushiku bwa kubalilapo ni Naashone+ mwana Aminadabu uwa mu mukowa wa kwa Yuda. 13 Atuulile imbale imo iya silfere, iyafinine amashekele umwanda umo na makumi yatatu (130) ne mbale yafonka imo iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo.+ Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 14 atuulile na kapu imo iya golde iyafinine amashekele ikumi (10), umwaiswile ifyanunkila;+ 15 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 16 aletele na kana ka mbushi kamo aka mutuulo wa pa lubembu;+ 17 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Naashone mwana Aminadabu.+

18 Pa bushiku bwa cibili Netanele+ mwana Suari, intungulushi ya kwa Isakari, e watuulile umutuulo. 19 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 20 atuulile na kapu imo iya golde iyafinine amashekele ikumi (10), umwaiswile ifyanunkila; 21 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 22 aletele na kana ka mbushi kamo aka mutuulo wa pa lubembu;+ 23 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Netanele mwana Suari.

24 Pa bushiku bwa citatu uwatuulile ni ntungulushi ya bana ba kwa Sebuluni, Eliabu+ mwana Helone. 25 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano; 26 atuulile na kapu imo iya golde iyafinine amashekele ikumi (10), umwaiswile ifyanunkila; 27 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 28 aletele na kana ka mbushi kamo aka mutuulo wa pa lubembu;+ 29 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Eliabu mwana Helone.+

30 Pa bushiku bwa cine uwatuulile ni ntungulushi ya bana ba kwa Rubene, Elisuri+ mwana Shedeuri. 31 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 32 atuulile na kapu imo iya golde iyafinine amashekele ikumi (10), umwaiswile ifyanunkila;33 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 34 aletele na kana ka mbushi kamo aka mutuulo wa pa lubembu;+ 35 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Elisuri mwana Shedeuri.+

36 Pa bushiku bwa cisano uwatuulile ni ntungulushi ya bana ba kwa Simeone, Shelumiele+ mwana Surishadai. 37 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 38 atuulile na kapu imo iya golde iyafinine amashekele ikumi (10), umwaiswile ifyanunkila;39 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 40 aletele na kana ka mbushi kamo aka mutuulo wa pa lubembu;+ 41 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Shelumiele mwana Surishadai.+

42 Pa bushiku bwa mutanda (6) uwatuulile ni ntungulushi ya bana ba kwa Gadi, Eliasafi+ mwana Deuele. 43 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 44 atuulile na kapu imo iya golde iyafinine amashekele ikumi (10), umwaiswile ifyanunkila;+ 45 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 46 aletele na kana ka mbushi kamo aka mutuulo wa pa lubembu;+ 47 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Eliasafi mwana Deuele.+

48 Pa bushiku bwa cinelubali (7) uwatuulile ni ntungulushi ya bana ba kwa Efraimu, Elishama+ mwana Amihudi. 49 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 50 atuulile na kapu imo iya golde iyafinine amashekele ikumi (10), umwaiswile ifyanunkila; 51 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 52 aletele na kana ka mbushi kamo aka mutuulo wa pa lubembu;+ 53 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Elishama mwana Amihudi.+

54 Pa bushiku bwa cinekonsekonse (8) uwatuulile ni ntungulushi ya bana ba kwa Manase, Gamaliele+ mwana Pedasuri. 55 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 56 atuulile na kapu imo iya golde iyafinine amashekele ikumi (10), umwaiswile ifyanunkila;+ 57 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 58 aletele na kana ka mbushi kamo aka mutuulo wa pa lubembu;+ 59 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Gamaliele mwana Pedasuri.+

60 Pa bushiku bwa pabula (9) uwatuulile ni ntungulushi+ ya bana ba kwa Benjamini, Abidani+ mwana Gideoni. 61 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 62 atuulile na kapu imo iya golde iyafinine amashekele ikumi (10), umwaiswile ifyanunkila;63 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 64 aletele na kana ka mbushi kamo aka mutuulo wa pa lubembu;+ 65 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Abidani mwana Gideoni.+

66 Pa bushiku bwe kumi (10) uwatuulile ni ntungulushi ya bana ba kwa Dani, Ahiesere+ mwana Amishadai. 67 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 68 atuulile na kapu imo iya golde iyafinine amashekele ikumi (10), umwaiswile ifyanunkila; 69 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 70 aletele na kana ka mbushi kamo aka mutuulo wa pa lubembu;+ 71 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Ahiesere mwana Amishadai.+

72 Pa bushiku bwe kumi na bumo (11) uwatuulile ni ntungulushi ya bana ba kwa Ashere, Pagiele+ mwana Okrani. 73 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 74 atuulile na kapu imo iya golde iyafinine amashekele ikumi (10), umwaiswile ifyanunkila;+ 75 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 76 aletele na kana ka mbushi kamo aka mutuulo wa pa lubembu;+ 77 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Pagiele mwana Okrani.+

78 Pa bushiku bwe kumi na shibili (12) uwatuulile ni ntungulushi ya bana ba kwa Naftali, Ahira+ mwana Enani. 79 Atuulile imbale imo iya silfere, iyafinine amashekele umwanda umo na makumi yatatu (130) ne mbale imo iyafonka iya silfere iyafinine amashekele amakumi cinelubali (70) ukulingana no kufina kwe shekele lya mu muputule wa mushilo. Muli ishi mbale shibili mwaiswile ubuunga bwapeleka ubwasakanamo amafuta ubwa kutuula umutuulo wa ngano;+ 80 atuulile na kapu imo iya golde iyafinine amashekele ikumi (10), umwaiswile ifyanunkila;+ 81 aletele no mwana wa ng’ombe umo umulume, sukusuku umo, akana ka mpaanga kamo akalume aka mwaka umo, ifya kutuula umutuulo wa koca;+ 82 aletele na kana ka mbushi kamo aka mutuulo wa pa lubembu;+ 83 na pe lambo lya mutende+ aletele ing’ombe shibili, basukusuku basano, basawe basano, utwana twa mpaanga tusano utwa mwaka umo utulume. Uyu e wali umutuulo wa kwa Ahira mwana Enani.+

84 Uyu e mutuulo+ wa pa kusefya kwa kupeela kwa ciipailo uo intungulushi+ sha bana ba kwa Israele shapeele pa bushiku bwa kusubwa kwa ciko: imbale sha silfere ikumi na shibili (12), imbale+ shafonka isha silfere ikumi na shibili, amakapu ya golde ikumi na yabili; 85 imbale imo imo iya silfere yafinine amashekele umwanda umo na makumi yatatu (130), ne mbale yafonka imo imo yafinine amashekele amakumi cinelubali (70), silfere onse uwa fipe ifi afinine amashekele amakana yabili ne myanda ine (2,400) ukulingana no kufina kwe shekele lya mu muputule wa mushilo;+ 86 amakapu+ ya golde ikumi na yabili (12) umwaiswile ifyanunkila, imo imo yafinine amashekele ikumi (10) ukulingana no kufina kwe shekele lya mu muputule wa mushilo, golde onse uwa aya makapu afinine amashekele umwanda umo na makumi yabili (120); 87 ing’ombe shonse isha mutuulo+ wa koca shali ikumi na shibili (12) ishilume, basukusuku bali ikumi na babili, utwana twa mpaanga utulume utwa mwaka umo twali ikumi na tubili pamo ne mituulo ya ngano,+ no twana twa mbushi ikumi na tubili utwa mutuulo wa pa lubembu;+ 88 ne ng’ombe shonse ishe lambo lya mutende+ shali amakumi yabili na shine (24) ishilume, basukusuku bali amakumi mutanda (60), basawe bali amakumi mutanda, utwana twa mpaanga utulume utwa mwaka umo twali amakumi mutanda. Uyu e mutuulo wa pa kusefya kwa kupeela+ kwa ciipailo uwatuulilwe pa numa ya kusubwa kwa ciko.+

89 Nomba lyonse ilyo Mose aingila mu cikuulwa ca kukumaninako ku kulanda nankwe,+ aleumfwa ishiwi lilelanda kuli ena pa muulu wa nkupiko+ iyali pa cipao ca cipangano, pa kati ka bakerubi+ babili; na Lesa alelanda nankwe.

8 Kabili Yehova akonkenyepo ukusosa kuli Mose ati: 2 “Sosa kuli Aarone, no kumweba ati, ‘Nga wayasha inyali, isho nyali cinelubali (7) shikalesanika pa ncende iili pa ntanshi ya ca kutekapo inyali.’”+ 3 Awe Aarone acitile ifyo fine. Ayashishe inyali ishali pa ntanshi ya ca kutekapo+ inyali, nga filya fine Yehova aebele Mose. 4 Nomba ifi e fyo ica kutekapo inyali capangilwe. Capangilwe kuli golde ukubomfya sando. Capangilwe kuli sando+ ukufika ku mukonso wa ciko na ku maluba ya ciko. Ukulingana ne cimonwa+ Yehova alangile Mose, e fyo apangile ica kutekapo inyali.

5 Kabili Yehova akonkenyepo ukusosa kuli Mose ati: 6 “Buula abena Lebi ukufuma mu bana ba kwa Israele, kabili ubasangulule.+ 7 Kabili ifi e fyo ukacite pa kubasangulula: ukabasanse amenshi ya kusangulula ulubembu,+ e lyo bakapishe aka kubeyelako pa mibili+ yabo yonse no kucapa ifya kufwala+ fyabo kabili bakaisangulule.+ 8 E lyo bakabuule ing’ombe+ iilume iinono pamo no mutuulo+ wa ngano uwa buunga bwapeleka ubwasakanamo amafuta, e lyo ukabuule ing’ombe iilume iinono na imbi ikabe umutuulo wa pa lubembu.+ 9 Kabili ukapalamike abena Lebi pa ntanshi ya cikuulwa ca kukumaninako no kulonganya ulukuta lonse ulwa bana ba kwa Israele.+ 10 E lyo ukapalamike abena Lebi ku cinso ca kwa Yehova, na bana ba kwa Israele bakabike+ iminwe yabo pa bena Lebi.+ 11 Kabili Aarone akaleke abena Lebi baleti baya ku ntanshi kabili babwelela ku numa ngo mutuulo wa kusunsha+ ku cinso ca kwa Yehova uwafuma ku bana ba kwa Israele, na bo bakalabomba umulimo wa kwa Yehova.+

12 “E lyo abena Lebi bakabike iminwe yabo pa mitwe ya ng’ombe ishilume.+ Pa numa, ukatuulepo ing’ombe imo ikabe umutuulo wa pa lubembu ne ibiye ikabe umutuulo wa koca kuli Yehova ku kufutilako+ abena Lebi. 13 Kabili ukemike abena Lebi pa ntanshi ya kwa Aarone na bana bakwe abaume no kuleka baleti baya ku ntanshi kabili babwelela ku numa ngo mutuulo wa kusunsha kuli Yehova. 14 Kabili ukapaatule abena Lebi ukufuma pa bana ba kwa Israele, na bena Lebi bakaba bandi.+ 15 Na pa numa abena Lebi bakengile ku kubomba mu cikuulwa ca kukumaninako.+ E ico ukabasangulule no kuleka baleti baya ku ntanshi kabili babwelela ku numa ngo mutuulo wa kusunsha.+ 16 Pantu bantu bapeelwa, abapeelwa kuli ine ukufuma pa bana ba kwa Israele.+ Nababuula ukuti babe bandi, ukuti bapyane pa mabeli yonse, amabeli yonse aya bana ba kwa Israele.+ 17 Pantu ibeli lyonse mu bana ba kwa Israele lyandi, ibeli lya bantu ne beli lya nama.+ Mu bushiku naipeye amabeli yonse mu calo ca Egupti+ nalibasalile ukuti babe bandi.+ 18 Kabili nkabuula abena Lebi ukuti bapyane pa mabeli yonse aya mu bana ba kwa Israele.+ 19 Kabili nkapeela abena Lebi kuli Aarone na ku bana bakwe abaume ukuti bakabe abapeelwa ukufuma pa bana ba kwa Israele,+ ku kubombela abana ba kwa Israele mu cikuulwa ca kukumaninako+ no kubafutilako pa membu, ukuti mwikaba icikuko mu kati ka bana ba kwa Israele+ pa mulandu wa kuti abana ba kwa Israele bapalama ku cifulo ca mushilo.”

20 Awe Mose na Aarone no lukuta lonse ulwa bana ba kwa Israele bacitile ifyo fine ku bena Lebi. Ukulingana na fyonse ifyo Yehova aebele Mose pa bena Lebi, e fyo abana ba kwa Israele bacitile kuli bena. 21 Awe abena Lebi bali-isangulwile+ no kucapa ifya kufwala fyabo, na pa numa Aarone alekele baleti baya ku ntanshi kabili babwelela ku numa ngo mutuulo wa kusunsha ku cinso ca kwa Yehova.+ E lyo Aarone abafutileko pa kuti abasangulule.+ 22 Pa numa ya ifi abena Lebi baingile ku kubomba imilimo yabo mu cikuulwa ca kukumaninako pa ntanshi ya kwa Aarone na bana bakwe abaume.+ Nga filya fine fye Yehova aebele Mose pa bena Lebi, e fyo bacitile kuli bena.

23 Yehova nomba asosele kuli Mose ati:24 “Ifi e fyo cikabe ku bena Lebi: Onse uuli ne myaka amakumi yabili na isano (25) no kuya pa muulu akailunde ku ba kubomba imilimo ya mu cikuulwa ca kukumaninako. 25 Lelo uwacila pa myaka amakumi yasano (50) akafume mwi bumba ili no kuleka ukubomba. 26 Kabili akaleafwako bamunyina mu cikuulwa ca kukumaninako ilyo balebomba imilimo, lelo ena ekalabombako. Ifi fine nakweba e fyo ukacite ku bena Lebi mu milimo yabo.”+

9 Kabili Yehova akonkenyepo ukusosa kuli Mose mu mpanga ya Sinai mu mwaka walenga ibili ukutula apo bafumiine mu calo ca Egupti, mu mweshi+ wa ntanshi, ati: 2 “Nomba abana ba kwa Israele bakapekanye ilambo lya ca kucilila+ pa nshita ya ciko.+ 3 Pa bushiku bwe kumi na shine (14) mu mweshi uyu pa cungulo cinono+ mukapekanye ica kucilila pa nshita ya ciko. Mukacipekanye ukulingana ne fipope fya ciko fyonse kabili ukulingana na fyonse ifikonkwa lyonse pa kucipekanya.”+

4 Awe Mose asosele ku bana ba kwa Israele ukuti bapekanye ilambo lya ca kucilila. 5 Awe bapekenye ilambo lya ca kucilila mu mweshi wa ntanshi, pa bushiku bwe kumi na shine (14) ubwa mweshi uyu pa cungulo cinono, mu mpanga ya Sinai. Ukulingana na fyonse ifyo Yehova aebele Mose, e fyo abana ba kwa Israele bacitile.+

6 Nomba kwali abaume abaikoweshe ku citumbi+ ca muntu ica kuti bafililwe ukupekanya ilambo lya ca kucilila pa bushiku ubo. Awe bailemonekela kuli Mose na Aarone pali ubo bushiku.+ 7 E lyo bamwebele ati: “Natuikowesha ku citumbi ca muntu. Nga cinshi ico balatulesesha ukuleta umutuulo+ kuli Yehova pa nshita ya uko mu kati ka bana ba kwa Israele?” 8 E lyo Mose abebele ati: “Iminineni apo, lekeni ntale ng’umfwe ifyo Yehova alanjeba pali imwe.”+

9 E lyo Yehova aebele Mose ati: 10 “Sosa ku bana ba kwa Israele ati, ‘Nga umo uwa muli imwe nelyo uwa mu nkulo shenu aikowesha ku citumbi+ nelyo nga ali pa lwendo ulutali, na o wine afwile ukupekanya ilambo lya ca kucilila kuli Yehova. 11 Mu mweshi+ wa bubili, pa bushiku bwe kumi na shine (14) pa cungulo cinono, e lyo bakapekanye ilambo lya ca kucilila. Bakaliliile pamo ne mikate ishatutumuka ne misalu iyalula.+ 12 Bekashapo nangu cimo ukufika ku lucelo,+ kabili bekatobamo ifupa nangu limo.+ Ukulingana ne fipope fyonse ifya ca kucilila e fyo bakapekanye.+ 13 Lelo ngo muntu ali uwasanguluka nelyo nga tali pa lwendo nomba tasefeshe ica kucilila, uyo muntu akepaiwe,+ pantu taletele umutuulo wa kwa Yehova pa nshita ya uko. Uyo muntu akashingamwa ulubembu lwakwe.+

14 “‘Kabili ngo mulebeshi ekala na imwe, na o wine afwile ukupekanya ilambo lya ca kucilila kuli Yehova.+ Ukulingana ne cipope ca pa ca kucilila kabili ukulingana no musango cicitilwamo lyonse e fyo akacite.+ Kukabe icipope cimo kuli imwe bonse, ku mulebeshi na ku mwana calo.’”+

15 Nomba pa bushiku bwa kwimika icikuulwa ca mushilo+ ikumbi lyafimbile icikuulwa ca mushilo umwali icipao ca Cipangano,+ lelo ku cungulo icalemoneka ngo mulilo+ catwalilile ukuba pa muulu wa ca mushilo ukufika ulucelo. 16 E fyo caleba lyonse: Ikumbi lyalefimbapo akasuba, ne calemoneka ngo mulilo calebapo ubushiku.+ 17 Kabili lyonse ilyo ikumbi lyafuma pa cikuulwa ca mushilo, ilyo line fye abana ba kwa Israele baleima no kuya,+ kabili apo ikumbi lyaiminina, e po abana ba kwa Israele balepanga inkambi.+ 18 Ilyo Yehova atila imeni, abana ba kwa Israele baleima no kuya, kabili Yehova nga atila iminineni, balepanga inkambi.+ Inshiku shonse isho ikumbi lyaleba pa muulu wa cikuulwa ca mushilo, e nshiku baleikala mu nkambi. 19 Kabili ikumbi nga lyaikala inshiku ishingi pa muulu wa cikuulwa ca mushilo, abana ba kwa Israele na bo baleumfwila Yehova kabili tabaleima no kuya.+ 20 Kabili limo limo ikumbi lyaleba pa muulu wa cikuulwa ca mushilo inshiku fye ishinono. Nga Yehova atila+ mwi-ima, baleba mu nkambi, lelo nga Yehova atila imeni, baleima no kuya. 21 Kabili limo limo ikumbi+ lyalebapo ukutula icungulo ukufika ulucelo; ne kumbi lyalefumapo ulucelo, na bo e lyo baleima no kuya. Ikumbi nga lyafumapo akasuba atemwa ubushiku, na bo kwima ifyo fine balaya.+ 22 Nampo nga ni nshiku shibili atemwa umweshi umo nelyo ni nshiku ishingi ikumbi lili pa muulu wa cikuulwa ca mushilo no kukanafumapo, abana ba kwa Israele na bo baleba fye mu nkambi, lelo nga lyafumapo na bo baleima no kuya.+ 23 Yehova nga atila mwi-ima baleba mu nkambi, kabili nga Yehova atila imeni baleima no kuya. Balekonka amashiwi+ ya kwa Yehova ayo Yehova alandiile muli Mose.+

10 Kabili Yehova akonkenyepo ukusosa kuli Mose ati: 2 “Ipangile amapenga+ yabili aya silfere. Ukabomfye sando pa kuyapanga, kabili e yo ukalebomfya pa kulonganya+ ulukuta na pa kupasa inkambi. 3 Kabili ilyo balisha yonse yabili, e lyo ulukuta lonse lukalongane kuli iwe pa mwinshi wa cikuulwa ca kukumaninako ukulingana ne cipangano.+ 4 Lelo nga balisha fye limo intungulushi sha pa makana ya bena Israele na sho shikalongane kuli iwe.+

5 “Kabili ilyo mwalisha mu musango uwaibela, e lyo abapangila inkambi ku kabanga+ bakeme no kuya. 6 Kabili ilyo mwalisha muli uyo musango uwaibela umuku wa bubili, e lyo abali mu nkambi ku kapinda ka ku kulyo+ bakeme no kuya. Bafwile ukulisha muli uyu musango waibela lyonse ilyo aba mu nkambi imo pali ishi baima no kuya.

7 “Nomba pa kulonganya ulukuta, ukulisha mukalishe,+ lelo mwikalisha mu musango waibela. 8 Kabili abana baume aba kwa Aarone, bashimapepo, bakalishe amapenga,+ kabili ifi fine namweba e fyo mukalekonka umuyayaya mu nkulo shenu.

9 “Kabili ilyo abalemutitikisha no kumucusha+ baisa mukulwa inkondo mu calo cenu, mukalishe ipenga lya bulwi,+ na Yehova akamwibukisha kabili akamupususha ku balwani benu.+

10 “Kabili mu bushiku bwa kusekelela+ kwenu na mu nshita sha mitebeto+ yenu na pa kutendeka kwa myeshi+ yenu, mukalelisha amapenga pa mituulo+ yenu iya koca na pa malambo yenu aya mutende+ kabili ilyo mwacita ifi Lesa wenu akalamwibukisha. Nine Yehova Lesa wenu.”+

11 Nomba mu mwaka wa bubili, mu mweshi wa bubili, pa bushiku bwalenga amakumi yabili (20) muli uyo mweshi,+ e lyo ikumbi lyafumine pa muulu wa cikuulwa ca mushilo+ umwali icipao ca Cipangano. 12 Awe abana ba kwa Israele baliimine no kuya ukulingana no musango baleiminamo+ ukufuma mu matololo ya Sinai, kabili ikumbi lyaileiminina mu matololo ya Parani.+ 13 No yu e muku wa ntanshi baimine no kuya, ukulingana ne fyo Yehova alandiile muli Mose.+

14 E ico aba mu nkambi ya bana ba kwa Yuda iya mikowa itatu e babalilepo ukwima mu mabumba yabo,+ kabili Nashone+ mwana Aminadabu e waletungulula ili ibumba. 15 No waletungulula ibumba lya mukowa wa bana ba kwa Isakari aali ni Netanele+ mwana Suari. 16 E lyo uwaletungulula ibumba lya mukowa wa bana ba kwa Sebuluni aali ni Eliabu mwana Helone.+

17 Awe bapangulwile+ icikuulwa ca mushilo, kabili abana ba kwa Gershone+ na bana ba kwa Merari+ abalesenda icikuulwa ca mushilo baliimine no kuya.

18 Kabili abali mu nkambi ya kwa Rubene+ iya mikowa itatu baimine mu mabumba yabo no kuya, kabili Elisuri+ mwana Shedeuri e walebatungulula. 19 Kabili uwaletungulula ibumba lya mukowa wa bana ba kwa Simeone+ aali ni Shelumiele+ mwana Surishadai. 20 E lyo uwaletungulula ibumba lya mukowa wa bana ba kwa Gadi aali ni Eliasafi+ mwana Deuele.

21 Na bena Kohati abalesenda ifipe fya mu muputule wa mushilo+ balimine no kuya, pantu ilyo bafika bali no kusanga balimika icikuulwa ca mushilo.

22 Kabili abaali mu nkambi ya bana ba kwa Efraimu+ iya mikowa itatu baliimine mu mabumba yabo, kabili Elishama+ mwana Amihudi e walebatungulula. 23 Kabili uwaletungulula ibumba lya mukowa wa bana ba kwa Manase+ aali ni Gamaliele+ mwana Pedasuri. 24 E lyo uwaletungulula ibumba lya mukowa wa bana ba kwa Benjamini+ aali ni Abidani+ mwana Gideoni.

25 E lyo abaali mu nkambi ya bana ba kwa Dani+ iya mikowa itatu baimine mu mabumba yabo no kuba ku numa ku kucingilila+ inkambi shonse, kabili Ahiesere+ mwana Amishadai e walebatungulula. 26 Kabili uwaletungulula ibumba lya mukowa wa bana ba kwa Ashere+ aali ni Pagiele+ mwana Okrani. 27 No waletungulula ibumba lya mukowa wa bana ba kwa Naftali+ aali ni Ahira+ mwana Enani. 28 Ifi e fyo abana ba kwa Israele bale-enda mu mabumba yabo ilyo inshita ya kuti baye yafika.+

29 E lyo Mose atile kuli Hobabu mwana Reuele+ umwina Midiani, shifyala wa kwa Mose ati: “Tuleya ku cifulo ico Yehova atile: ‘Nkacipeela kuli imwe.’+ Natuye nobe, na ifwe tukacita icisuma kuli iwe,+ pantu Yehova nasosa icisuma pali Israele.”+ 30 Lelo amwebele ati: “Nshaye na imwe, ndeya ku calo+ candi kabili ku bantu bandi.” 31 E lyo atile: “Shi witusha, pantu, ni we waishiba bwino uko twingapangila inkambi muli ino mpanga, ni we ukaba amenso yesu. 32 Nomba nga waya na ifwe,+ ifisuma fyonse ifyo Yehova akatucitila, e fyo na ifwe tukacita kuli iwe.”

33 Awe baimine ulwendo lwa nshiku shitatu ukufuma ku lupili lwa kwa Yehova,+ ne cipao ca cipangano+ ica kwa Yehova cali pa ntanshi yabo ulwendo lwa nshiku shitatu ku kubafwaila apa kutuusha.+ 34 Ne kumbi+ lya kwa Yehova lyali pali bena akasuba ilyo baimine ukufuma pa nkambi.

35 Kabili lyonse ilyo Icipao caima, Mose aleti: “Imeni, mwe Yehova, no kuleka abalwani benu bapaswe;+ bafulumuke na ku cinso cenu abamupata icine cine.”+ 36 Kabili ilyo caiminina, aletila: “Mwe Yehova, bweleleni ku minshipendwa ya makana aya kwa Israele.”+

11 Nomba abo bantu batendeke ukuilishanya kuli Yehova pa fibi ifyalebacitikila.+ Ilyo Yehova aumfwile, alikalipe nga nshi, no mulilo wa kwa Yehova walibocele no kwipayapo bamo abali ku mpela ya nkambi.+ 2 Ilyo abantu balilile kuli Mose, e lyo apapeete kuli Yehova,+ no mulilo walishimine. 3 Na palya pantu painikwe ati Tabera,+ pantu umulilo wa kwa Yehova walibocele.

4 Kabili abantu abashali bena Israele+ abali mu kati kabo batendeke ukukumbwa,+ kabili abana ba kwa Israele na bo batendeke ukulila no kusosa abati: “Nani walatupeela inama iya kuti tulye?+ 5 Twaibukisha isabi twalelya mu Egupti apa fye,+ ifibimbi ne fitangamenshi na liiki na kanyense na galiki! 6 Lelo moneni natufwa ulushile. Konse uko twalolesha tulemona fye mana yeka yeka.”+

7 Na kuba mana+ wine uyu aali nge mbuto sha koriandere,+ no kumoneka alemoneka nge finyamuti ifitwa bedola.+ 8 Kabili abantu balesalanganina fye konse mu kutoola+ mana kabili baleipela ukubomfya impelo nangu ukuitwa mwi bende, kabili baleipika mu mpoto+ sha kwipikilamo atemwa ukupangamo imikate yabulungana, kabili mu kanwa yaleumfwika kwati mikate yalowa iya mafuta.+ 9 Kabili ilyo umume wawa mu nkambi ubushiku, mana na yo yalewa.+

10 Awe Mose aumfwile abantu balelila mu ndupwa shabo, cila muntu pa mwinshi we tenti lyakwe. Awe Yehova akalipe nga nshi,+ kabili calibipile nga nshi mu menso ya kwa Mose.+ 11 E lyo Mose atile kuli Yehova: “Cinshi mwancushisha ifi ne mubomfi wenu, kabili cinshi ico mwandekelesesha, pa kubika icisendo ca bantu bonse aba pali ine?+ 12 Bushe nine naimite aba bantu bonse? Bushe nine nabafyele, pa kuti mutile kuli ine, ‘Basendele pa cifuba+ cobe, ifyo umuleshi asenda akana akoonka,’+ ukubatwala ku mpanga iyo mwalapile ku fikolwe fyabo?+ 13 Ni kwi nalafumya inama ya kupeela aba bantu bonse? Pantu ni kuli ine balelilila, abati, ‘Tupeele inama, uleke tulye!’14 Ine nafilwa ukusenda aba bantu bonse neka, pantu balifina icine cine te kuti nkumemo.+ 15 Kanshi ifi nga e fyo mulecita kuli ine, mukwai njipayeni fye cipwilemo,+ kabili nga mwamona ukuti cili fye bwino, mwileka mone ubucushi ubwalamponena.”

16 Yehova na o atile kuli Mose: “Unonganikile abaume amakumi cinelubali (70) pa bakalamba ba mu Israele,+ abo waishiba ukuti e bakalamba ba bantu kabili e bacilolo babo,+ ubatwale na ku cikuulwa ca kukumaninako, na bo babe kulya pamo na iwe. 17 Na ine ndetentemukila+ kulya no kulanda na iwe;+ kabili ndebuulapo umupashi+ uuli pali iwe no ku-ubika pali bena, ukuti balekwafwa ukusenda aba bantu pa kuti taubasendele weka fye.+ 18 Kabili ukatile ku bantu aba, ‘Ipekanishisheni ubushiku bwa mailo,+ pantu mukalya inama, pantu ilyo mulelila Yehova+ naumfwa uko muleti: “Nani aletupeela inama ukuti tulye, pantu mu Egupti+ ifintu fyalituwamiine?” Kabili Yehova akamupeela inama, na cine mukalya.+ 19 Tamwakalye fye pa bushiku bumo atemwa inshiku shibili nangu shisano nangu inshiku ikumi (10) atemwa amakumi yabili (20) awe, 20 lelo mukailya pa mweshi uutuntulu, mpaka ikalefumina na mu myona yenu,+ pantu mwakeene Yehova uuli mu kati kenu, kabili mwalelilila ku cinso cakwe, amuti: “Cinshi ico twafumine mu Egupti?”’”+

21 E lyo Mose atile: “Abantu abo ndi na bo bali impendwa amakana imyanda mutanda (600,000) aba pa makasa,+ nomba imwe muleti, ‘Inama nkabapeela, no kulya bakalya pa mweshi uutuntulu’!22 Bushe bakepailwe impaanga ne ng’ombe pa kuti fikabakumane?+ Nangu bushe bakekatilwe isabi lya muli bemba lyonse pa kuti likabakumane?”

23 E lyo Yehova atile kuli Mose: “Bushe ukuboko kwa kwa Yehova nakwipipa?+ Nomba walamona ifyo nalanda nga ca kutila fikacitika atemwa iyo.”+

24 Pa numa, Mose alifumine no kuyaeba abantu ifyo Yehova amwebele. Kabili alongenye abaume amakumi cinelubali (70) ukufuma pa bakalamba ba bantu kabili abebele ukuti beminine ukushinguluka icikuulwa ca kukumaninako.+ 25 E lyo Yehova aikile mwi kumbi+ no kulanda nankwe+ kabili abuulilepo umupashi+ uwali pali ena no ku-ubika pa muntu umo umo pali balya abakalamba amakumi cinelubali (70). Kabili ilyo fye umupashi waikele pali bena, e lyo na bo baalacita kwati ni bakasesema; lelo tabacitile ifyo na kabili.+

26 Nomba mu nkambi mwali abaume babili abashele pali balya. Ishina lya umo ni Eldadi, ne shina lya mubiye ni Medadi. Kabili umupashi waishileikala pali bena, pantu na bo baali pa balembelwe, lelo tabaile ku cikuulwa ca kukumaninako. Awe na bo batendeke ukucita kwati ni bakasesema mu nkambi. 27 No mulumendo umo aishile ulubilo kuli Mose no kumweba ati: “Eldadi na Medadi balecita kwati ni bakasesema mu nkambi!” 28 E lyo Yoshua mwana Nuni, uwalebombela+ Mose ukutula ku bwaice bwakwe atile: “Mwe shikulu Mose, balesheni!”+ 29 Lelo, Mose amwebele ati: “Bushe wanjikatilwa akalumwa? Wiba na kalumwa, ine kuti natemwa abantu ba kwa Yehova bonse baba bakasesema, pantu Yehova kuti abiika umupashi wakwe na pali bena!”+ 30 Pa numa, Mose abweleele mu nkambi, pamo na bakalamba ba mu Israele.

31 Awe Yehova aimishe umwela+ uwaletele inkwale ukufuma kuli bemba+ no kushiponesha mu nkambi, kuno lubali apa kwenda ubushiku bumo e lyo na kulya lubali apa kwenda ubushiku bumo ukushinguluke nkambi yonse, kabili shakupile umushili imikono ibili ukufuma pa nshi. 32 Awe abantu baliimine ubo bushiku ku kutoola inkwale akasuba konse ukufika no bushiku no bushiku bwakonkelepo. Uwalonganike utunono alonganike inkwale sha kukumana amadalamu*+ ikumi (10), kabili bashanike ukushinguluke nkambi yonse. 33 Umunani wali ucili pa kati ka meno yabo,+ ilyo bashilausheta, e lyo ubukali bwa kwa Yehova bwaimiine+ abantu, kabili Yehova aipeye abantu abengi nga nshi.+

34 Ishina lya palya pantu lyainikwe ati Kibrote-hataaba,+ pantu palya e po bashiikile abantu abafwaishe ukulya inama.+ 35 Abantu bafumine pa Kibrote-hataaba ukuya ku Haserote, uko baileikala.+

12 Nomba Miriamu na Aarone batendeke ukulanda ifibi pali Mose pa mulandu wa mwanakashi umwina Kushi uo aupile, pantu aupile umwina Kushi.+ 2 Kabili bakonkenyepo ukusosa abati: “Bushe ni muli Mose fye e mo Yehova alandila? Bushe talandila na muli ifwe?”+ Na o Yehova alekutika.+ 3 Awe uyu muntu Mose ali uwafuukisha+ pa bantu bonse abali pano isonde.

4 E lyo Yehova apo pene fye asosele kuli Mose na Aarone na Miriamu ati: “Imwe batatu, kabiyeni ku cikuulwa ca kukumaniko.” Awe bonse batatu baliile. 5 Pa numa Yehova aikiile mu ntumba ye kumbi+ no kwiminina pa mwinshi wa cikuulwa ca kukumaninako no kwita Aarone na Miriamu. Awe bonse babili baliile. 6 E lyo atile: “Umfweni ifyo ndesosa. Nga mwali kasesema wa kwa Yehova muli imwe, ni mu cimonwa+ e mo naleilengela ukwishibikwa kuli ena. Mu ciloto+ e mo nalelandila kuli ena. 7 Lelo ifyo te fyo caba ku mubomfi wandi Mose!+ E o naseekesha ing’anda yandi yonse.+ 8 Nanda nankwe mu kulungatika,+ ukwabula ukubomfya imilumbe;+ kabili ena alamona+ ne mimonekele ya kwa Yehova. Nga kanshi cinshi mushatiinine ukulanda ifibi pa mubomfi wandi Mose?”+

9 Na Yehova alikalipe nga nshi pa fyo bacitile, e lyo afuminepo. 10 Ne kumbi lyafumine pa muulu wa cikuulwa ca kukumaniko, kabili, apo pene fye, Miriamu alwele ifibashi ifyabuuta tuutu.+ Cilya Aarone alolesha Miriamu, moneni! ali ne fibashi.+ 11 Apo pene Aarone atile kuli Mose: “Ng’umfweni, mwe shikulu! Mwileka ulubembu ulo tucitile mu buwelewele lube pali ifwe!+ 12 Mwileka Miriamu abe ngo mwana uwafyelwe uwafwa+ no mubili uwaliiwa lubali!” 13 Awe Mose atendeke ukulilila kuli Yehova, ati: “Mwe Lesa, shi muundapeni!”+

14 E lyo Yehova atile kuli Mose: “Bushe nga ca kuti wishi alimufwishile+ amate pa menso, nga taseebene inshiku cinelubali (7)? Lekeni abe eka+ ku nse ya nkambi+ inshiku cinelubali, e lyo pa numa mukamubweshe.”+ 15 Awe Miriamu asungilwe eka ku nse ya nkambi pa nshiku cinelubali (7),+ na bantu tabafumine palya mpaka ilyo Miriamu abweshiwe. 16 Pa numa, e lyo abantu bafumine mu Haserote+ no kuyaikala mu mpanga ya Parani.+

13 Yehova nomba alandile kuli Mose ati: 2 “Tuma abaume ba kuyalengula icalo ca Kanaani, ico ndepeela ku bana ba kwa Israele.+ Utume umwaume umo ukufuma mu mukowa umo umo uwa bashibo, umo umo afwile ukuba intungulushi+ mu kati kabo.”

3 Awe Mose abatumine ukufuma mu mpanga ya Parani+ ukulingana ne fyo Yehova asosele. Aba bonse bali ni ntungulushi sha bana ba kwa Israele. 4 Kabili aya e mashina yabo: mu mukowa wa kwa Rubene, ni Shamua mwana Sakuri; 5 mu mukowa wa kwa Simeone, ni Shafati mwana Hori; 6 mu mukowa wa kwa Yuda, ni Kalebu+ mwana Yefune; 7 mu mukowa wa kwa Isakari, ni Igali mwana Yosefe; 8 mu mukowa wa kwa Efraimu, ni Hoshea+ mwana Nuni; 9 mu mukowa wa kwa Benjamini, ni Palti mwana Rafu; 10 mu mukowa wa kwa Sebuluni, ni Gadiele mwana Sodi; 11 mu mukowa wa kwa Yosefe,+ uwaiminineko umukowa wa kwa Manase+ ni Gaddi mwana Susi; 12 mu mukowa wa kwa Dani, ni Amiele mwana Gemali; 13 mu mukowa wa kwa Ashere, ni Seturi mwana Mikaele; 14 mu mukowa wa kwa Naftali, ni Naabi mwana Bofsi; 15 mu mukowa wa kwa Gadi, ni Geuele mwana Maki. 16 Aya e mashina ya baume Mose atumine ukuyalengula icalo. Kabili Mose aaleita Hoshea mwana Nuni ati Yehoshua.+

17 Ilyo Mose alebatuma ukuyalengula icalo ca Kanaani, abebele ati: “Pitileni apa pa kuya ku Negebu,+ e lyo mukaniine ukuya mu calo ca mpili.+ 18 Kabili mukamone ifyo icalo caba+ kabili mukamone na bantu baikalamo nampo nga ba maka nelyo nga tabakwata amaka, kabili nga banono atemwa bengi; 19 ne fyo icalo baikalamo caba, nampo nga cisuma atemwa cibi, ne fyo imisumba baikalamo yaba, nampo nga bekala mu nkambi nelyo mu misumba ya malinga; 20 ne fyo umushili waba, nampo nga wa mufundo nelyo tawakwata umufundo,+ nampo nga mwaliba imiti nelyo iyo. Mukabe abashipa+ kabili mukasendepo ifisabo fya mu calo cilya.” Nomba inshiku shilya shali ni nshiku sha kupya kwa fisabo fya ntanshi ifya myangashi.+

21 E ico balininine no kuyalengula icalo ukutula ku mpanga ya Sini+ ukuyafika ku Rehobu+ apa kwingilila mu Hamati.+ 22 Ilyo baile mu Negebu,+ bailefika ku Hebrone.+ Nomba Ahimani, Sheshai na Talmai,+ abafyelwe kuli Anaki+ bali kulya. Kabili ilyo umusumba wa Hebrone+ wakuulilwe papitile imyaka cinelubali (7) pa kuti umusumba wa Soani+ uwa mu Egupti wise ukuulwe. 23 Nomba ilyo bafikile ku mupokapoka wa Eshekole,+ e lyo baputwile umusambo uwali ne cisansangu cimo ica myangashi.+ Kabili abaume babili bacisendele pa mutembo, basendeelepo ne mipomegranate+ ne mikunyu. 24 Bainike cilya cifulo ati umupokapoka wa Eshekole,+ pa mulandu wa cisansangu ico abana ba kwa Israele baputwile palya.

25 Awe pa numa ya nshiku+ amakumi yane (40) balibwelele ukufuma mu kulengula icalo. 26 E ico bailefika kuli Mose na Aarone na ku lukuta lonse ulwa bana ba kwa Israele mu mpanga ya Parani, ku Kadeshe.+ Kabili baletele ilyashi kuli bena na ku lukuta lonse no kubalanga ifisabo fya mu calo cilya. 27 E lyo bamushimikile ati: “Twaileingila mu calo ico mwatutumineko, ca cine, calo umwaba umukaka no buci,+ ne fi e fisabo fya ciko.+ 28 Lelo kwena, ishibeni ukuti abaikala mu calo cilya bantu aba maka, ne misumba ya malinga ikalamba icine cine;+ kabili kulya e ko twamwene na bamwana Anaki.+ 29 Abena Amaleke+ bekala mu calo ca Negebu,+ e lyo abena Hiti na bena Yebusi+ na bena Amore+ bekala mu calo ca mpili, kumfwa abena Kanaani+ bena bekala mupepi na bemba kabili mu mbali ya Yordani.”

30 E lyo Kalebu+ atalalike abantu ukuti bakutike kuli Mose kabili atile: “Natunine tuleya, kabili nangu cibe shani tukapoka ici calo, pantu tukacimfya.”+ 31 Lelo abaile nankwe batile: “Te kuti tunine ku kuyalwisha balya bantu, pantu balikosa ukutucila.”+ 32 Awe e fyo bakonkenyepo ukweba abana ba kwa Israele ilyashi ilibi+ pa calo ico bailelengula, abati: “Icalo ico twapitilemo ku kucilengula, calo icilya abekashi ba ciko; kabili abantu bonse abo twamwene muli cilya calo bantu abakulu sana.+ 33 Kabili kulya e ko twamwene abaNefili, bamwana Anaki,+ abafyelwe ku baNefili; ica kuti twaleimona fye kwati fipaso, kabili na bo e fyo baletumona.”+

14 Awe ulukuta lonse lwasanswile ishiwi, na bantu batwalilile ukupunda no kulila+ ubushiku bonse bulya. 2 Kabili abana ba kwa Israele bonse batendeke ukuilishanya kuli Mose na Aarone,+ no lukuta lonse lwatile kuli bena: “Kanshi nga twafwilile fye mu calo ca Egupti, nangu kanshi nga twafwilile fye muli iyi mpanga! 3 Kabili mulandu nshi Yehova atuleteele mu calo cino ukuti tufwe ku lupanga?+ Abakashi besu na bana besu bakabekata.+ Bushe te kuti ciwame tubwelelemo fye ku Egupti?”+ 4 Bafikile fye na mu kusosa abati: “Natuisalile intungulushi, no kubwelela ku Egupti!”+

5 E lyo Mose na Aarone bawile ubukupeme+ ku cinso ca lukuta lonse ulwa bana ba kwa Israele abalongene. 6 Kabili Yoshua mwana Nuni+ na Kalebu mwana Yefune,+ abali pa balengwile icalo cilya, balepawile ifya kufwala fyabo,+ 7 no kusosa ku lukuta lonse ulwa bana ba kwa Israele abati: “Icalo ico twailelengula, calo icisuma nga nshi.+ 8 Nga Yehova alitutemwa,+ akatwingisha mu calo ici no kucipeela kuli ifwe, icalo umwaba umukaka no buci.+ 9 Cikulu fye mwipondokela+ Yehova; kabili imwe, mwitiina abantu ba mu calo+ cilya, pantu bena bali fye nge ca kulya kuli ifwe. Nacifuma pali bena icintelelwe cabo,+ kabili Yehova ali na ifwe.+ Mwibatiina.”+

10 Lelo, ulukuta lonse lwatile lwali no kubapoola amabwe.+ Kabili abana ba kwa Israele bonse bamwene ubukata bwa kwa Yehova pa cikuulwa ca kukumaninako.+

11 Yehova nomba aebele Mose ati: “Kufika lilali+ aba bantu bakulansaalula,+ kabili kufika lilali bashakantetekele pa fishibilo fyonse ifyo nacita mu kati kabo?+ 12 Leka mbapume ku cikuko no kubalofya, kabili leka nkupange uluko ulukalamba kabili ulwa maka ukubacila.”+

13 Lelo Mose atile kuli Yehova: “Nomba abena Egupti bakomfwa ukuti ni ku maka yenu mwafumishe aba bantu mu kati kabo.+ 14 Na bo bakeba abekashi ba mu calo ici umulandu uyu. Balyumfwa ukuti ni mwe Yehova uwaba mu kati ka aba bantu,+ uumoneka kuli bena icinso ne cinso.+ Ni mwe Yehova, ne kumbi lyenu liminina pali bena, kabili ni mwe mubatangilila mu ntumba ye kumbi akasuba na mu ntumba ya mulilo ubushiku.+ 15 Nga mwaipaya aba bantu bonse pa muku umo,+ inko ishaumfwa ululumbi lwenu shikasosa ashiti, 16 ‘Ni co Yehova alifililwe ukwingisha aba bantu mu calo ico alapile ukubapeela e co abepaila mu mpanga.’+ 17 E ico nomba, mwe Yehova, lekeni amaka yenu yamoneke,+ ukulingana na mashiwi musosele, amuti, 18 ‘Yehova, Lesa uukokola ukukalipa+ kabili uwafulisha icikuuku,+ uwelela ifilubo na bumpulamafunde,+ lelo ababi takabaleke ukwabula ukukandwa,+ uukanda abana, na beshikulu na bana ba beshikulu pa filubo fya bashibo.’+ 19 Shi eleleni, ifilubo fya aba bantu ukulingana ne fyo icikuuku cenu cakula, nga filya fine fye mwaelela aba bantu ukutula ku Egupti ukufika na nomba.”+

20 E lyo Yehova atile: “Nabelela ukulingana ne fyo wasosa.+ 21 Nomba, ndeti, na pali ne mwine, isonde lyonse likesulamo ubukata bwa kwa Yehova.+ 22 Lelo abantu bonse abamona ubukata+ bwandi kabili abamwene ne fishibilo+ ifyo nacitile mu Egupti na mu matololo nomba abatwalilile fye ukunjesha+ iyi miku ikumi (10), kabili abashaumfwa kwi shiwi lyandi,+ 23 tabakatale abamona icalo ico nalapile kuli bashibo, bonse fye abashincindika tabakacimone.+ 24 Lelo umubomfi wandi Kalebu,+ apo ena alipusanako kabili aalenkonka no mutima onse,+ nkamwingisha mu calo ico aileko, na bana bakwe bakacipyana.+ 25 Apo pali ino nshita abena Amaleke na bena Kanaani+ e bekala mu mpanga iyabatama, imwe mailo mukabweluluke no kulola ku matololo mu nshila yaya kuli Bemba Wakashika.”+

26 Kabili Yehova akonkenyepo ukusosa kuli Mose na Aarone ati:27 “Kufika lilali ulukuta ulu ulubi lukaleka ukuilishanya pali ine?+ Ning’umfwa ukuilishanya kwa bana ba kwa Israele uko baleilishanya pali ine.+ 28 Sosa kuli bena, auti, ‘Yehova atila, “Na pali ne mwine, nkacita kuli imwe ukulingana na mashiwi mwasosa mu matwi yandi!+ 29 Muli aya matololo e mo ifitumbi fyenu fikalambalala,+ e kutila bonse abo mwalemba, ukulingana ne mpendwa yenu yonse, ukutula pa wa myaka amakumi yabili (20) no kuya pa muulu, mwe bailishanya pali ine.+ 30 Imwe tamwakengile mu calo ico naimishepo ukuboko+ kwandi ilyo nalapile ukuti nkekala nenu, kano fye Kalebu mwana Yefune na Yoshua mwana Nuni e bakengilamo.+

31 “‘“Na bana benu abanono abo mwatile bakabekata,+ nkabengishamo, kabili bakeshiba icalo ico imwe mwakaana.+ 32 Lelo ifitumbi fyenu mu matololo aya e mo fikalambalala.+ 33 Kabili abana benu bakaba bakacema mu matololo+ pa myaka amakumi yane (40), bena e bakashingamwa pa bulalelale+ bwenu, mpaka imwe bonse mukafwile mu matololo.+ 34 Ukulingana no bwingi bwa nshiku mwalengwile icalo, inshiku amakumi yane (40),+ e fikaba inshiku mukashingamwa imembu shenu,+ ubushiku bumo bukaba umwaka umo, ubushiku bumo umwaka umo,+ pa kuti mukeshibe ifyo ciba nga nataluka kuli imwe.+

35 “‘“Ine, ne Yehova, ninsosa: ifi e fyo nkacita kuli ulu lukuta lonse ulubi,+ ulwalongana ku kundwisha: Mu matololo aya e mo bakalobela, kabili e mo bakafwila.+ 36 Kabili abaume abo Mose atumine ukuyalengula icalo kabili abalengele ulukuta lonse ukuilishanya pali ena ilyo babwelele, pa mulandu wa kuleta ilyashi libi pa calo cilya,+ 37 abo baume bakafwa ku cikuko icikafuma kuli Yehova.+ 38 Lelo Yoshua mwana Nuni na Kalebu mwana Yefune bena e bakaba no mweo, pa baume abailelengula icalo cilya.”’”+

39 Ilyo Mose alandile aya mashiwi ku bana ba kwa Israele bonse, e lyo abantu batendeke ukuloosha nga nshi.+ 40 Kabili, bacelele ulucelo ukuti banine ulupili, kabili baleti: “Natuipekanya, kabili twalaya ku cifulo uko Yehova atwebele ukuya. Pantu natubembuka.”+ 41 Lelo Mose atile: “Cinshi ico mulepulila mu cipope ca kwa Yehova?+ Ico tacamuwamine. 42 Mwiyako, pantu Yehova tali mu kati kenu, kabili abalwani benu baleyamucimfya.+ 43 Pantu abena Amaleke na bena Kanaani bali pa ntanshi yenu;+ kabili nangu cibe shani balemwipaila ku lupanga, pantu, pa mulandu wa kuti mwalekele ukukonka Yehova, Yehova takulaba na imwe.”+

44 Lelo bena bapamine ukunina pa muulu wa lupili,+ nomba icipao ca cipangano ica kwa Yehova tacafumine mu kati kabo nangu fye ni Mose wine.+ 45 E lyo abena Amaleke+ na bena Kanaani abaleikala mu lupili lulya batentemwike no kutendeka ukubakomaula no kubasalanganya mpaka bafika na ku Horma.+

15 Kabili Yehova akonkenyepo ukusosa kuli Mose ati: 2 “Sosa ku bana ba kwa Israele, ati, ‘Ilyo mukafika mu calo ico mukalaikalamo, ico ndemupeela,+ 3 kabili nga mwafwaya ukupeela umutuulo wa koca kuli Yehova,+ nampo nga mutuulo+ wa koca atemwa lilambo lya kulapilako umulapo waibela nangu ilya kuitemenwa fye+ nelyo ilya pa nshita ya mitebeto yenu,+ pa kuti mufutumwine Yehova akacena kasuma,+ ukufuma pa ng’ombe shenu atemwa pa mpaanga shenu; 4 uwaleeta umutuulo wakwe kuli Yehova afwile no kuleeta umutuulo wa ngano uwa buunga bwapeleka,+ ulupe lumo, ubwasakanamo amakapu yatatu aya mafuta. 5 Mukaleete umutuulo+ wa mwangashi, amakapu yatatu, pamo no mutuulo wa koca nelyo ilambo lya kana ka mpaanga kamo akalume. 6 Nga lilambo lya kwa sukusuku mukaleete umutuulo wa ngano uwa buunga bwapeleka, indupe shibili, ubwasakanamo amakapu yane aya mafuta. 7 Kabili mukaleete amakapu yane aya mwangashi ku kuba umutuulo wa mwangashi, uwa kuleta akacena akasuma kuli Yehova.

8 “‘Lelo nga mwafwaya ukutuula ing’ombe iilume ku kuba umutuulo+ wa koca atemwa ilambo lya kucita umulapo waibela+ nangu ukutuula amalambo ya mutende kuli Yehova,+ 9 ukulunda pa ng’ombe iilume, mukaleete umutuulo+ wa ngano uwa buunga bwapeleka, indupe shitatu, ubwasakanamo amakapu mutanda (6) aya mafuta. 10 Kabili mukatuule umutuulo wa mwangashi,+ amakapu mutanda (6), ukabe umutuulo wa pa mulilo, uwa kuleta akacena kasuma kuli Yehova. 11 Ifi e fyo mukalecita ku ng’ombe iilume imo imo atemwa kuli sukusuku umo umo nangu ku mpaanga imo imo pa twana twa mpaanga utulume nelyo pa mbushi. 12 E fyo mukalecita ku nama imo imo iyo mwatuula, nangu shifule shani. 13 Ifi e fyo umwikashi onse akalecita pa kutuula umutuulo wa pa mulilo, uwa kuleta akacena kasuma kuli Yehova.+

14 “‘Lelo mu kati kenu nga mwasangwa umulebeshi atemwa onse uuli mu kati kenu mu nkulo shenu shonse, kabili afwaya ukutuula umutuulo wa pa mulilo, uwa kuleta akacena kasuma kuli Yehova, akacite fye nga filya fine imwe mucita.+ 15 Imwe mwe lukuta pamo na balebeshi abo mwikala na bo, mukalekonka ifipope fimo fine.+ E fyo mukalecita mu nkulo shenu shonse umuyayaya. Umulebeshi akabe fye nga imwe pa ntanshi ya kwa Yehova.+ 16 Kuli imwe na ku mulebeshi uuli nenu kukabe fye ifunde limo no bupingushi bumo.’”+

17 Kabili Yehova akonkenyepo ukulanda kuli Mose ati:18 “Sosa ku bana ba kwa Israele, ati, ‘Ilyo mukengila mu calo ico ndemutwalako,+ 19 nga mwalya ifya muli cilya calo,+ mukaletuula umusangulo kuli Yehova. 20 Mukalesangula imikate iyapangwa ku buunga bwa nsembe ubwa fisabo fyabalilapo ukupya.+ Mukalesangula iyi mikate filya musangula imisangulo iifuma palya mupumina ingano. 21 Mu nkulo shenu shonse, mukalesangwilapo Yehova ubuunga bwa nsembe ubwa fisabo fyabalilapo ukupya.

22 “‘Nomba nga mwalufyanya kabili tamukonkele aya mafunde+ yonse ayo Yehova aebele Mose, 23 e kutila fyonse ifyo Yehova amwebele ukupitila muli Mose ukutula pa bushiku Yehova amupeele amafunde no kuya ku ntanshi mu nkulo shenu, 24 nga mwalufyanya fye mu kukanaishiba kabili ulukuta talwishibe, ninshi ulukuta lonse lukatuule umutuulo wa koca uwa ng’ombe iilume iinono, uwa kuleta akacena kasuma kuli Yehova, pamo no mutuulo wa ngano e lyo no mutuulo wa mwangashi ukulingana ne fyo bacita lyonse,+ e lyo no mwana wa mbushi umo ku kuba umutuulo wa pa lubembu.+ 25 Kabili shimapepo akafutileko+ ulukuta lonse ulwa bana ba kwa Israele, e lyo bakelelwa; pantu balufyenye mu kukanaishiba,+ kabili pa kulufyanya kwabo bakalete umutuulo wa koca kuli Yehova e lyo no mutuulo wa pa lubembu ku cinso ca kwa Yehova. 26 E lyo ulukuta lonse ulwa bana ba kwa Israele no mulebeshi uuli mu kati kabo, bakelelwa,+ pantu abantu bonse balufyenye fye mu kuluba.

27 “‘Kabili ngo muntu onse abembuka mu kuluba fye,+ uyo muntu akatuule imbushi iikota iya mwaka umo ku kuba umutuulo wa pa lubembu.+ 28 Kabili shimapepo akafutileko umuntu uwacitile ulubembu mu kuluba ku cinso ca kwa Yehova, pa kuti akalufute, kabili e fyo akelelwe pa lubembu ulo.+ 29 Ku muntu onse uwacita cimo mu kuluba, nampo nga mwina Israele nelyo mulebeshi uo mwikala na o, kukaba fye ifunde limo line.+

30 “‘Lelo umuntu uwacita cimo ku mufulo fye,+ abe mwana calo nelyo mulebeshi, apo asose fya kupontela Yehova,+ uyo muntu akepaiwe.+ 31 Apo asuula+ amashiwi ya kwa Yehova kabili takonkele amafunde yakwe,+ uyo muntu akepaiwe.+ Akashingamwa pa lubembu lwakwe.’”+

32 Nomba ilyo abana ba kwa Israele bali mu matololo, basangile umuntu umo aleteeba inkuni pa bushiku bwe sabata.+ 33 E lyo abamusangile aleteeba inkuni bamutwele kuli Mose na Aarone na ku lukuta lonse. 34 E ico balimulindike,+ pantu tacaishibikwe bwino bwino ico bali no kumucita.

35 E lyo Yehova atile kuli Mose: “Uyo muntu ukwipaiwa epaiwe,+ ulukuta lonse lumupoole amabwe ku nse ya nkambi.”+ 36 Awe ulukuta lonse lwamufumiishe ku nse ya nkambi no kumupoola amabwe kabili alifwile, ukulingana fye ne fyo Yehova aebele Mose.

37 Kabili Yehova akonkenyepo ukweba Mose ati:38 “Sosa ku bana ba kwa Israele, kabili ubebe ukuti bakaicitile insenkebele ku fisempe fya fya kufwala fyabo mu nkulo shabo shonse, kabili bakabike umwando wa bluu pa muulu wa nsenkebele ishili ku mpela ya cisempe,+ 39 ‘Na sho shikabe nsenkebele kuli imwe, kabili mukaleshimona no kwibukisha amafunde+ yonse aya kwa Yehova no kuyakonka, kabili mwikalakonkelela imitima yenu na menso yenu,+ ifyo mulekonka kabili ifilemulenga ukucita bucilende.+ 40 Ici ca kumwafwa ukuti muleibukisha amafunde yandi no kulayakonka pa kuti mube aba mushilo kuli Lesa wenu.+ 41 Nine Yehova Lesa wenu, uwamufumishe mu calo ca Egupti pa kuti mbe Lesa wenu.+ Nine Yehova Lesa wenu.’”+

16 Kabili Kora+ mwana Isari,+ mwana Kohati,+ mwana Lebi,+ aliimine, pamo na Datani+ na Abiramu+ abana baume ba kwa Eliabu,+ na One mwana Pelete, abana baume ba kwa Rubene.+ 2 Kabili baimiine Mose, pamo na bantu imyanda ibili na makumi yasano (250) mu bana ba kwa Israele, intungulushi sha lukuta, na baleitwa ku kukumana, abaume ba lulumbi. 3 Awe balonganiine+ Mose na Aarone no kubeba ati: “Imwe nomba capwa, pantu abantu bonse muli ulu lukuta ba mushilo+ na Yehova ali mu kati kabo.+ Nga kanshi, cinshi ico muisansabikila pa lukuta lwa kwa Yehova?”+

4 Ilyo Mose aumfwile ifi, apo pene awile ubukupeme. 5 E lyo aebele Kora no lukuta lwakwe lonse, ati: “Mailo ulucelo Yehova akalenga twishibe umuntu wakwe+ kabili uwa mushilo,+ uufwile ukupalama kuli ena,+ kabili uo akasala+ e ukapalama kuli ena. 6 Citeni ici: Buuleni ififutumwino,+ iwe Kora no lukuta lobe lonse,+ 7 kabili mailo mukabikemo umulilo ne fyanunkila, no kufileta ku cinso ca kwa Yehova, kabili umuntu uo Yehova akasala,+ ninshi e wa mushilo. Imwe nomba capwa, bamwana Lebi.”+

8 Kabili Mose akonkenyepo ukusosa kuli Kora ati: “Umfweni, mwe bana ba kwa Lebi. 9 Bushe kantu akanono ifi Lesa wa kwa Israele amusala+ mu lukuta lwa kwa Israele ukuti mulepalama kuli ena ku kubomba umulimo wa pa cikuulwa ca mushilo ica kwa Yehova no kwiminina pa ntanshi ya lukuta ku kubabombela,+ 10 no kuti apalamike iwe na bamunonko bonse abana baume ba kwa Lebi pamo nobe? Bushe mulefwaya na bushimapepo mwa?+ 11 Pali ici iwe no lukuta lobe lonse mwe balongene pamo mulelwisha Yehova.+ Kabili cinshi Aarone ali uwa kuti muleilishanyapo?”+

12 Pa numa ya ifi Mose atumine aba kuyaita Datani na Abiramu+ abana baume ba kwa Eliabu, lelo batile: “Tatwaiseko!+ 13 Bushe ukutufumya mu calo umwaba umukaka no buci ku kwisatwipaila mu matololo kantu akanono,+ kabili bushe nomba ulefwaya no kuicita cilolo pali ifwe?+ 14 Kabili tawatwingisha na mu calo umwaba umukaka no buci,+ pa kuti utupeele amabala na mabala ya myangashi yabe yesu. Bushe ulefwaya ukutonkola amenso ya aba bantu? Ifwe tatwaiseko!”

15 Pa kumfwe fi Mose akalipe nga nshi no kutila kuli Yehova: “Mwilolesha pa mutuulo+ wabo uwa ngano. Ine nshapokako kuli bena impunda iilume nangu imo, nangu ukucita ububi ku muntu nangu umo pali bena.”+

16 E lyo Mose atile kuli Kora:+ “Iwe no lukuta lobe lonse, mukabe ku cinso ca kwa Yehova,+ iwe na bena, na Aarone, mailo. 17 Kabili umuntu onse akasende icifutumwino cakwe, e lyo mukabikemo ifyanunkila kabili cila muntu akapalamike icifutumwino cakwe ku cinso ca kwa Yehova, ififutumwino imyanda ibili na makumi yasano (250), ukubikapo na iwe na Aarone, cila muntu icifutumwino cakwe.” 18 Awe basendele cila muntu icifutumwino cakwe no kubikamo umulilo kabili babikilemo ne fyanunkila no kuyaiminina pa mwinshi wa cikuulwa ca kukumaninako pamo na Mose na Aarone. 19 Ilyo Kora alongenye ulukuta+ lonse pa mwinshi wa cikuulwa ca kukumaninako ukuti lubemine, e lyo ubukata bwa kwa Yehova bwamoneke ku lukuta lonse.+

20 Yehova nomba asosele kuli Mose na Aarone, ati: 21 “Fumeni+ mu kati ka ulu lukuta, uleke mbonaule+ nomba line.” 22 Pa kumfwe fi bawile ubukupeme no kusosa abati: “Mwe Lesa, Lesa umwine wa mupashi uwaba mu fya mweo fya misango yonse,+ bushe umuntu umo nga abembuka e o alenge ubukali bwenu ukwimina ulukuta lonse?”+

23 Yehova na o ayaswike Mose, ati: 24 “Eba ulukuta, auti, ‘Talukeni ku matenti ya kwa Kora, Datani na Abiramu!’”+

25 Pa numa, Mose aimine no kuya kuli Datani na Abiramu, na bakalamba+ ba mu bena Israele baile nankwe. 26 E lyo asosele ku lukuta, ati: “Ndemupapaata ukuti talukeni ku matenti ya aba bantu imbifi kabili mwikumya ku cintu cabo nangu cimo,+ pa kuti mwisendelwa mu membu shabo shonse.” 27 Apo pene fye batalwike ku matenti ya kwa Kora, Datani na Abiramu, mu ncende shonse, kabili Datani na Abiramu balifumine, no kuyaiminina pa minshi ya matenti+ yabo, na bakashi babo, na bana babo abaume na bana babo abanono.

28 E lyo Mose atile: “Kuli ici e ko mwalaishibila ukuti Yehova alintuma ukucita ifi fintu fyonse,+ ukuti te fya mu mutima wandi fye:+ 29 Nga ca kuti aba bantu balafwa imfwa iyo abantu bonse bafwako kabili nga balakandwa ukukandwa uko abantu bonse bakandwako,+ ninshi te Yehova wantuma.+ 30 Lelo nga cintu icipya ico Yehova alacita,+ kabili umushili nga walayasamuna akanwa ka uko no kubamina+ kumo na fyonse ifyo bakwata, kabili nga batentemukila ku Nshiishi*+ aba mweo, e lyo mwalaishiba ukuti aba bantu nabasaalula Yehova.”+

31 Nomba ilyo fye apwishishe ukulanda aya mashiwi, e lyo umushili apo baiminine watendeke ukulepuka.+ 32 Ne calo cayasamwine akanwa ka ciko no kubamina kumo na ba mu mayanda yabo na bantu bonse aba kwa Kora ne fyuma fyabo fyonse.+ 33 E fyo batentemukile ku Nshiishi* aba mweo na bonse abo bali na bo, no mushili walibashiikile,+ kabili e fyo balobele mu kati ka lukuta.+ 34 Na bena Israele bonse ababashingulwike balifulumwike ilyo baumfwile ukupunda kwabo, pantu batendeke ukusosa abati: “Tuletiina epali umushili watumina!”+ 35 No mulilo wafumine kuli Yehova+ kabili waocele abantu imyanda ibili na makumi yasano (250) abaalefutumuna ifyanunkila.+

36 E lyo Yehova alandile kuli Mose ati:37 “Sosa kuli Eleasari mwana Aarone shimapepo ukuti atoole ififutumwino+ mu mulilo, umwebe no kuti, ‘Usalanganye umulilo uuli palya; pantu fya mushilo, 38 ififutumwino fya aba bantu ababembukiile imyeo+ yabo. Na muli ifi bakapangemo ifyela ifyapaapaatala ifya kubika ku ciipailo,+ pantu balifipalamike kuli Yehova, na fyo fyasangwike ifya mushilo; kabili fikabe icishibilo ku bana ba kwa Israele.’”+ 39 Na o Eleasari shimapepo abuulile ififutumwino+ fya mukuba, ifyo abapiile bapalamike, na bo bapangilemo ifya kubika ku ciipailo, 40 pa kuti cibe ica kwibukishako abana ba kwa Israele, ukuti umbi umbi+ uushili mwana wa kwa Aarone tafwile ukupalama ku kufutumuna ifyanunkila ku cinso ca kwa Yehova,+ no kuti umuntu nangu umo eba nga Kora no lukuta+ lwakwe, nga filya fine Yehova asosele kuli ena ukupitila muli Mose.

41 Kabili ubushiku fye ubwakonkelepo ulukuta lonse ulwa bana ba kwa Israele lwatendeke ukuilishanya pali Mose na Aarone,+ abati: “Ni mwe mwaipaya abantu ba kwa Yehova.” 42 Nomba ilyo ulukuta lonse lwalonganine Mose na Aarone, e lyo bapilibukile ku cikuulwa ca kukumaninako; kabili, moneni! ikumbi lyalifimbilepo, no bukata bwa kwa Yehova bwalimoneke.+

43 Awe Mose na Aarone bapaleme ku cikuulwa ca kukumaninako.+ 44 E lyo Yehova alandile kuli Mose, ati:45 “Fumeni mu kati ka lukuta ulu, uleke mbonaule nomba line.”+ Pa kumfwe fi bawile ubukupeme.+ 46 E lyo Mose atile kuli Aarone: “Buula icifutumwino, ubikemo umulilo wa pa ciipailo+ kabili ubikemo ne fyanunkila e lyo wangufyanye ukuya ku lukuta no kubafutilako,+ pantu Yehova nakalipa nga nshi.+ Icikuko nacitendeka!” 47 Apo pene fye Aarone alicibuulile, ukulingana fye ne fyo Mose asosele, no kubutukila mu kati ka lukuta; kabili, moneni! icikuko nacitendeka mu bantu. E ico abikilepo ifyanunkila no kutendeka ukufutilako abo bantu. 48 Kabili atwalilile ukwiminina pa kati ka bafwa na ba mweo.+ Casukile icikuko capwa.+ 49 Abafwile ku cikuko bali amakana ikumi na yane ne myanda cinelubali (14,700), ukufumyako abafwile pa mulandu wa kwa Kora. 50 E lyo nomba Aarone abweleele kuli Mose ku mwinshi wa cikuulwa ca kukumaninako, ninshi icikuko nacipwa.

17 Yehova nomba alandile kuli Mose ati: 2 “Sosa ku bana ba kwa Israele kabili upoke kuli bena inkonto+ imo imo mu mikowa yabo ukufuma ku ntungulushi+ shabo shonse, inkonto ikumi na shibili (12), ukulingana na mayanda ya bashibo. Ukalembe ne shina lya muntu onse pa nkonto yakwe. 3 Ukalembe ne shina lya kwa Aarone pa nkonto ya kwa Lebi, pantu umukalamba umo umo uwa mu mayanda ya bashibo nakwata inkonto. 4 Kabili ukashibike mu cikuulwa ca kukumaninako pa ntanshi ya cipao ca Cipangano,+ apo monekela lyonse kuli imwe.+ 5 Nomba umuntu uo nkasala,+ inkonto yakwe ikapuuka, e fyo nkapwisha ukuilishanya+ uko abana ba kwa Israele baleilishanya pali imwe.”+

6 E fyo Mose alandile ku bana ba kwa Israele, ne ntungulushi shabo shonse shamupeele inkonto, intungulushi imo inkonto imo, intungulushi imo inkonto imo, ukulingana na mayanda ya bashibo, inkonto ikumi na shibili (12); ne nkonto+ ya kwa Aarone yali pa nkonto shabo.+ 7 E lyo Mose atwele inkonto ku cinso ca kwa Yehova mu cikuulwa umwali icipao ca Cipangano.+

8 Nomba pa bushiku bwakonkelepo ilyo Mose aingile mu cikuulwa umwali icipao ca Cipangano, moneni! inkonto ya kwa Aarone iya ng’anda ya kwa Lebi naipuuka, kabili ilefumya intombo no kubalula amaluba no kutwala ama-almonde ayapya. 9 E lyo Mose afumiishe inkonto shonse ku bana ba kwa Israele bonse ukufuma ku cinso ca kwa Yehova, kabili umuntu onse aceeceetele no kubuula inkonto yakwe.

10 Pa numa ya ifi Yehova atile kuli Mose: “Bwesesha inkonto+ ya kwa Aarone pa ntanshi ya cipao ca Cipangano ibe icishibilo+ ku bana ba bucipondoka,+ pa kuti baleke ukuilishanya pali ine, pa kuti befwa.” 11 Apo pene Mose acitile ifyo fine Yehova amwebele. Filya fine fye e fyo acitile.

12 Nomba abana ba kwa Israele batendeke ukweba Mose ati: “Moneni, nangu cibe shani tuli no kufwa, ifwe bonse tuli no kuloba nangu cibe shani.+ 13 Onse uulepalamako,+ uulepalama ku cikuulwa ca mushilo ica kwa Yehova, alefwa!+ Bushe cine cine ifi fine fye e fyo twalaloba?”+

18 Kabili Yehova akonkenyepo ukusosa kuli Aarone ati: “Iwe na bana bobe abaume na ba mu ng’anda ya kwa wiso abali nobe mukashingamwa ulubembu lwa kukanakonka amafunde ya mu muputule wa mushilo nga nshi,+ e lyo iwe na bana bobe abaume abali nobe mukashingamwa ulubembu lwa kukanakonka amafunde ya bushimapepo bwenu.+ 2 Kabili ukapalamike na bamunonko aba mu mukowa wa kwa Lebi, umukowa wa kwa wiso, pamo nobe, pa kuti bailunde kuli iwe no kukubombela,+ iwe na bana bobe abaume abali nobe, pa ntanshi ya cikuulwa umwaba icipao ca Cipangano.+ 3 Na bo bakalebomba umulimo bafwile ukukubombela na untu bafwile ukubomba pa cikuulwa ca mushilo conse.+ Lelo ku fipe fya mu muputule wa mushilo na ku ciipailo, bekalapalamako pa kuti bekafwa,+ bena nangu ni mwe. 4 Na bo bakailunde kuli iwe kabili bakalebomba umulimo onse uwa pa cikuulwa ca kukumaninako uo bafwile ukubomba pa cikuulwa ca mushilo, kabili uushasuminishiwa ekapalama kuli imwe.+ 5 Kabili ukalebomba umulimo washingamwa ukubomba mu muputule wa mushilo+ no mulimo wa pa ciipailo,+ pa kuti kwikaba na kabili ubukali+ pa bana ba kwa Israele. 6 Na ine, moneni! nimbuula bamunyinenwe mu kati ka bana ba kwa Israele,+ pa kuti babe ica bupe kuli imwe,+ babe bantu abapeelwa kuli Yehova ku kubomba imilimo ya pa cikuulwa ca kukumaninako.+ 7 Kabili iwe na bana bobe abaume mukalebomba bwino umulimo wenu uwa bushimapepo umulimo onse uwa ku ciipailo no mulimo onse uwa mu muputule uuli ku numa ya nsalu;+ e fyo mukalebomba.+ Umulimo wenu uwa bushimapepo e ca bupe ndemupeela, kabili uushasuminishiwa nga apalamako akepaiwe.”+

8 Kabili Yehova akonkenyepo ukusosa kuli Aarone ati: “Mona! nakupeela imituulo yonse iyo abana ba kwa Israele batuula kuli ine.+ Napeela iwe na bana bobe abaume fyonse ifya mushilo ififuma ku bana ba kwa Israele, fyakulaba fyenu umuyayaya.+ 9 Ifi e fikalaba ifyobe ukufuma pa fya mushilo nga nshi, ukufuma pa mutuulo wa pa mulilo, e kutila umutuulo onse kumo no mutuulo+ wa ngano onse no mutuulo+ wa pa lubembu onse no mutuulo+ wa pa mulandu onse, ifyo bakatuula kuli ine. Fikabe ifya mushilo nga nshi kuli iwe na ku bana bobe abaume. 10 Umwa mushilo nga nshi e mo ukalefiliila.+ Umwaume onse akalelyako.+ Fikabe ifya mushilo kuli iwe.+ 11 Kabili ifi na fyo fikaba fyobe: umusangulo+ wabo uwa bupe pamo ne mituulo+ yonse iya kusunsha iya bana ba kwa Israele. Napeela iwe na bana bobe abaume na bana bobe abanakashi abali nobe,+ e fyakulaba fyenu umuyayaya. Onse uwasanguluka mu ng’anda yobe kuti alyako.+

12 “Amafuta yonse ayawamisha no mwangashi upya onse uwawamisha ne ngano shonse ishawamisha, ifisabo fyabo ifyabalilapo ukupya,+ ifyo bakapeela kuli Yehova, nafipeela kuli iwe.+ 13 Ifisabo fyabalilapo ukupya muli fyonse ifya mu mushili, ifyo baleta kuli Yehova, fikaba fyobe.+ Onse uwasanguluka mu ng’anda yobe kuti alyako.

14 “Conse icapeelwa mu Israele cikaba cobe.+

15 “Conse icabalilapo ukufyalwa,+ mu ca mweo conse, ico bakapalamika kuli Yehova, nampo nga muntu nelyo inama, cikaba cobe. Lelo ibeli lya bantu+ ne beli lya nama iyakowela ukalilubule.+ 16 Kabili ukalubule ibeli ilya mweshi umo no kucilapo mu ndalama sha kulubwila ukulingana no mutengo wapingulwa, amashekele yasano aya silfere ukulingana ne shekele lya mu muputule wa mushilo,+ e kutila amagera+ amakumi yabili (20). 17 Lelo taufwile ukulubula+ ing’ombe iilume iyabalilapo ukufyalwa nelyo akana ka mpaanga akalume akabalilapo ukufyalwa nelyo akana ka mbushi akalume akabalilapo ukufyalwa. Ifi fyena fya mushilo. Ukasanse umulopa+ wa fiko pa ciipailo, ukafutumune na mafuta ya fiko ukuti yakabe umutuulo wa pa mulilo uwa kuleta akacena kasuma kuli Yehova.+ 18 Nomba umunofu wa fiko ukabe obe. Filya fine icisao ca pa mutuulo wa kusunsha no mwendo wa ku kulyo fikaba fyobe, e fyo na o ukabe obe.+ 19 Imisangulo+ yonse iya mushilo iyo abana ba kwa Israele bakasangwila Yehova, nimpeela kuli iwe na ku bana bobe abaume na ku bana bobe abanakashi abali nobe, e fyakulaba ifyobe umuyayaya.+ Cipangano ca mucele ica muyayaya pa kati ka kwa Yehova na iwe na pa bana bobe abali nobe.”+

20 Kabili Yehova akonkenyepo ukusosa kuli Aarone ati: “Tawakakwateko impanga mu calo cabo, kabili tabakakwakanyeko icili conse.+ Nine icakaniko cobe kabili impanga yobe mu kati ka bana ba kwa Israele.+

21 “Kabili mona! nimpeela abana ba kwa Lebi ica pe kumi+ ica muli Israele ukuba icabo pa milimo yabo iyo babomba, imilimo ya mu cikuulwa ca kukumaninako. 22 Kabili abana ba kwa Israele belapalama ku cikuulwa ca kukumaninako epali babembuka no kufwa.+ 23 Lelo abena Lebi bena bakalebomba pa cikuulwa ca kukumaninako, kabili aba e bakashingamwa imembu shabo.+ Cipope ca muyayaya mu nkulo shenu ukuti bekakwata impanga+ mu kati ka bana ba kwa Israele. 24 Pantu ica pe kumi (10) ica bana ba kwa Israele, ico bakasangwila Yehova, nimpeela ku bena Lebi ku kuba icabo. E co nasosele kuli bena nati, ‘Bekakwata impanga mu kati ka bana ba kwa Israele.’”+

25 E lyo Yehova asosele kuli Mose ati:26 “Kabili usose ku bena Lebi, ubebe ati, ‘Mukapokelela ica pe kumi ico napeela kuli imwe ukufuma ku bana ba kwa Israele ku kuba icenu,+ na imwe mukalesangula ica pe kumi+ ukufuma pali ico ukuti cikabe umusangulo kuli Yehova. 27 Kabili e cikaba umusangulo wenu, nge ngano isha pa kupumina+ kabili ngo mwangashi uwingi umwa kukamina imyangashi nelyo nga mafuta ayengi mu ca kukaminamo amafuta. 28 E fyo na imwe mukalasangula umusangulo kuli Yehova ukufuma pa fya pe kumi fyonse ifyo mukapokelela ku bana ba kwa Israele, kabili pali ifi e po mukalasangwila Yehova pa kupeela umusangulo kuli Aarone shimapepo. 29 Ukufuma pa fya bupe fyonse ifyo mukapeelwa, mukalesangula imisangulo yalekanalekana kuli Yehova, mukalesalapo ifisuma nga nshi,+ ukuti fikabe ifya mushilo.’

30 “Kabili ukatile kuli bena, ‘Ilyo mwasangula ifisuma nga nshi pali ifyo,+ e lyo cikaba kwati e cibwesha ca bena Lebi ica pa kupumina ingano kabili nge cibwesha ica mu fya kukaminamo imyangashi nelyo ica mu fya kukaminamo amafuta. 31 Na imwe mukaciliile apali ponse, imwe na ba mu ng’anda yenu, pantu e cilambu cenu pa mulimo mubomba mu cikuulwa ca kukumaninako.+ 32 Kabili ilyo mwasangula icisuma nga nshi pali ifi tamwakabe na lubembu, kabili mwikasaalula ifya mushilo ifya bana ba kwa Israele, epali mwafwa.’”+

19 Kabili Yehova akonkenyepo ukusosa kuli Mose na Aarone ati: 2 “Ili e funde ilyo Yehova apeele, atile, ‘Sosa ku bana ba kwa Israele ukuti bakubuulile ing’ombe nkota iyakashika iituntulu umushaba akalema+ kabili iishatala aibikwapo ikoli.+ 3 Kabili mukaipeele kuli Eleasari shimapepo, na o akaitwale ku nse ya nkambi, kabili ikepaiwe ku cinso cakwe. 4 E lyo Eleasari shimapepo akabuulepo umulopa wa iko ku munwe wakwe no kusansa umulopa wa iko imiku cinelubali (7) uku-ulungatika ku ntanshi ya cikuulwa ca kukumaninako.+ 5 Ne ng’ombe iyo ikocewe ninshi alemonako. Umukupo wa iko no munofu wa iko no mulopa wa iko pamo na mafi ya iko fikocewe.+ 6 E lyo shimapepo akabuule icimuti ca mukedari+ na husope+ ne nsalu yakashika+ ce no kufipoosa mu kati umulepya ing’ombe iyo. 7 Kabili shimapepo akacape ifya kufwala fyakwe no kusamba mu menshi, e lyo pa numa akengile mu nkambi; lelo uyu shimapepo akabe uwakowela ukufika icungulo.

8 “‘No wayocele akacape ifya kufwala fyakwe mu menshi no kusamba mu menshi,+ kabili akabe uwakowela ukufika icungulo.

9 “‘E lyo uwasanguluka akakuse imito+ ya ng’ombe iyo no kuyaibika ku nse ya nkambi umwa busaka; kabili ikasungilwe ulukuta lwa bana ba kwa Israele ku kuibomfya ku menshi ya kusangulwilako.+ Yakaba umutuulo wa pa lubembu. 10 No wakusa imito ya ng’ombe iyo akacape ifya kufwala fyakwe no kuba uwakowela ukufika icungulo.+

“‘E fyo abana ba kwa Israele na balebeshi abo bekala na bo bakalecita umuyayaya.+ 11 Onse uwakumya ku citumbi+ ca muntu onse, na o wine akabe uwakowela nshiku cinelubali (7).+ 12 Uyo muntu akaisangulule ku menshi ayo pa bushiku bwalenga shitatu,+ e lyo pa bwalenga cinelubali (7) akaba uwasanguluka. Lelo nga taisangulwile pa bushiku bwalenga shitatu, pa bushiku bwalenga cinelubali takabe uwasanguluka. 13 Onse uwakumya ku citumbi ica muntu onse uwafwa, kabili uushakaisangulule, ninshi akowesha icikuulwa ca mushilo+ ica kwa Yehova, kabili uyo muntu akalofiwe mu Israele.+ Pa mulandu wa kuti tabamusanshile amenshi ya kusangulwila,+ acili uwakowela. Ukukowela kwakwe kucili pali ena.+

14 “‘Ili e funde lya kukonka ilyo umuntu afwila mwi tenti: Onse uwaingila mwi tenti, na onse uuli mwi tenti, akaba uwakowela inshiku cinelubali (7). 15 Kabili icipe+ conse apashili inkupiko ninshi tacisangulwike. 16 E lyo kabili onse uwakumya umuntu uo baipaya ku lupanga+ mu mpanga nelyo ku citumbi atemwa kwi fupa+ lya muntu nangu pa nshiishi, akabe uwakowela inshiku cinelubali (7). 17 Kabili bakabuulile uwakowela imito ya palya bocela umutuulo wa pa lubembu kabili imito iyo bakaibike mu cipe no kubikamo amenshi ayapita. 18 E lyo uwasanguluka+ akabuule husope+ no kuitumpika mu menshi no kusansa pe tenti na pa fipe fyonse na pa bantu bonse abalipo na pa wakumishe kwi fupa nelyo ku waipaiwa nangu ku citumbi nangu pa nshiishi. 19 No wasanguluka akasanse amenshi ayo pa wakowela pa bushiku bwalenga shitatu na pa bwalenga cinelubali (7) no kumusangulula ku lubembu pa bushiku bwalenga cinelubali;+ kabili akacape ifya kufwala fyakwe no kusamba mu menshi, e lyo icungulo akaba uwasanguluka.

20 “‘Lelo umuntu uwakowela kabili uushakaisangulule, ninshi uyo muntu akalofiwe+ mu lukuta, pantu nakowesha umwa mushilo mwa kwa Yehova. Pantu tabamusanshile amenshi ya kusangulwila. Alikowela.

21 “‘Kabili ici cikabe icipope ca muyayaya kuli bena, ukuti uulesansa amenshi ya kusangulwila akacape ifya kufwala fyakwe, kabili uwakumya amenshi ya kusangulwila na o akacite ifi fine.+ Akaba uwakowela ukufika icungulo. 22 Na conse ico uwakowela akumya cikaba icakowela,+ no wacikumya akaba uwakowela ukufika icungulo.’”+

20 Awe abana ba kwa Israele, ulukuta fye lonse, baingile mu matololo ya Sini+ mu mweshi wa kubalilapo, na bantu baikele mu Kadeshe.+ Kulya e ko Miriamu+ afwilile kabili e ko ashiikilwe.

2 Nomba ulukuta+ talwakwete amenshi, kabili balonganine Mose na Aarone.+ 3 Na bantu batendeke ukuumanya+ Mose no kutila: “Kanshi nga twafwilile fye pamo na bamunyinefwe ku cinso ca kwa Yehova!+ 4 Kabili cinshi ico muleteele ulukuta lwa kwa Yehova mu matololo aya ukuti e mo ifwe ne fitekwa fyesu ifisenda ifipe tufwile?+ 5 Kabili cinshi mwatufumishe mu Egupti no kutuleta muno muntu umwabipa?+ Tamwaba mbuto, nangu mikunyu, nangu myangashi, nangu mipomegranate,+ kabili tamwaba amenshi ya kunwa.” 6 E lyo Mose na Aarone bafumine pa lukuta no kuya ku mwinshi wa cikuulwa ca kukumaninako no kuwa ubukupeme,+ no bukata bwa kwa Yehova bwamoneke kuli bena.+

7 E lyo Yehova alandile kuli Mose ati: 8 “Buula inkonto+ e lyo ulonganye no lukuta, iwe na Aarone munonko, musose na ku cilibwe icili pa mulola wabo ukuti cifumye amenshi ya ciko; kabili mubafumishe amenshi mu cilibwe ici no kupeela amenshi ku lukuta ne fitekwa fyabo ifisenda ifipe.”+

9 Awe Mose abuulile inkonto ku cinso ca kwa Yehova,+ nga filya fine fye amwebele. 10 Pa numa, Mose na Aarone balongenye ulukuta pa ntanshi ya cilibwe, e lyo atile kuli bena: “Umfweni, nomba, mwe bacipondoka mwe!+ Bushe mulefwaya tumufumishe amenshi muli ci cilibwe?”+ 11 Apo pene Mose aimishe ukuboko kwakwe no kuuma pa cilibwe imiku ibili ku nkonto yakwe; kabili mwafumine amenshi ayengi, e lyo ulukuta lwatendeke ukunwa pamo ne fitekwa fyabo ifisenda ifipe.+

12 Pa numa, Yehova atile kuli Mose na Aarone: “Apo tamuntetekele pa kuti muncindike+ pa menso ya bana ba kwa Israele, imwe tamwakengishe ulu lukuta mu calo ico nkabapeela.”+ 13 Aya e menshi ya Meriba,+ pantu abana ba kwa Israele baumenye Yehova, kabili alengele ukuti bamucindike.

14 E lyo Mose atumine inkombe ukufuma mu Kadeshe ukuya ku mfumu ya Edomu+ no kuyeba ati: “Ifi e fyo munyinenwe Israele+ asosa, ‘Imwe mwalishiba bwino ukucula konse uko twapitamo.+ 15 Kabili bashifwe batentemukile ku Egupti,+ na mu Egupti e mo twaikele inshiku ishingi;+ kabili abena Egupti bacitile ububi kuli ifwe e lyo na kuli bashifwe.+ 16 Awe twalilile kuli Yehova+ na o aumfwile ishiwi lyesu kabili atumine malaika+ no kutufumya mu Egupti; nomba moneni, natufika mu Kadeshe, umusumba waba ku mpela ya mupaka wenu. 17 Shi lekeni tupite mu calo cenu. Tatwakapite mu mabala nangu ni mu mabala ya myangashi, kabili tatwakanwe amenshi ya mu fishima. Mu nshila ya mfumu e mo tukapita.+ Tatwakapaasukile ku kwa kulyo nangu ku kwa kuso,+ tukapita fye mu calo cenu no kufumamo.’”

18 Lelo Edomu atile: “Wikapita mu calo candi, epali nafuma no lupanga ukwisakulwisha.” 19 Abana ba kwa Israele na bo batile: “Tukapita mu nshila iikalamba, kabili ine ne fitekwa fyandi nga twanwa amenshi yenu, ninshi ukulipila nkalipila umutengo wa yako.+ Ine ndefwaya mpitemo fye pa makasa.”+ 20 Na lyo line atile: “Wipitamo.”+ E ico imfumu ya ku Edomu+ yaimine ne bumba ilikalamba na bashilika ba maka ku kuyamulwisha. 21 E fyo imfumu ya bena Edomu yaleseshe abena Israele ukupita mu calo ca iko.+ Abena Israele na bo balyalulwike no kufumako.+

22 Kabili abana ba kwa Israele, ulukuta fye lonse, baliimine ukufuma mu Kadeshe+ no kuya ku Lupili lwa Hore.+ 23 E lyo Yehova atile kuli Mose na Aarone mu Lupili lwa Hore mupepi no mupaka wa calo ca kwa Edomu, ati: 24 “Aarone akafwa nge fyafwa abantu bakwe,+ pantu takengile mu calo ico nkapeela ku bana ba kwa Israele, pantu mwatalamine icipope candi ukukuma ku menshi ya Meriba.+ 25 Senda Aarone na Eleasari umwana wakwe umwaume, ubaninike mu lupili lwa Hore. 26 Kabili ufuule Aarone ifya kufwala+ fyakwe no kufwika Eleasari+ umwana wakwe umwaume; na o Aarone akafwila kulya.”+

27 Awe Mose acitile filya fine Yehova amwebele; kabili baninine pa Lupili lwa Hore pa menso ya lukuta lonse. 28 Kabili Mose afuulile Aarone ifya kufwala fyakwe no kufwika Eleasari umwana wakwe, na pa numa Aarone afwilile kulya pa muulu wa lupili.+ E lyo Mose na Eleasari batentemwike ulupili. 29 No lukuta lonse lwamwene ukuti Aarone nafwa, kabili bonse aba mu ng’anda ya kwa Israele balooseshe Aarone inshiku amakumi yatatu (30).+

21 Nomba umwina Kanaani, imfumu ya ku Aradi,+ uwaikele mu Negebu,+ aumfwile ukuti abena Israele nabesa ukubomfya inshila ya ku Atarimu, e lyo alwile na bena Israele no kusendapo bamo muli bunkole. 2 Awe abena Israele e pa kulapa kuli Yehova no kutila:+ “Nga cine cine mwapeela aba bantu mu minwe yesu, ninshi na ifwe tukonaula imisumba yabo.”+ 3 E ico Yehova aumfwile kwi shiwi lya kwa Israele no kumupeela abena Kanaani; na bo babonawilile pamo ne misumba yabo. E co bainikile palya pantu ati Horma.+

4 Awe ilyo baleya ukufuma ku Lupili lwa Hore+ ukupita mu nshila yaya kuli Bemba Wakashika ukuti bashoke icalo ca kwa Edomu,+ e lyo abantu banakile nga nshi pa mulandu wa nshila iyi. 5 Kabili abantu bakonkenyepo ukupeela Lesa+ na Mose+ umulandu, abati: “Cinshi ico mwatufumishe mu Egupti ukuti tukesefwila mu matololo?+ Pantu tatukwete ifya kulya na menshi,+ kabili tatulefwaya nangu panono ica kulya ici icinangwa.”+ 6 Kabili Yehova atumine insoka+ sha busungu pa bantu aba, na sho shalibasumawile, ica kuti abena Israele abengi balifwile.+

7 Basukile abantu baisa kuli Mose no kusosa abati: “Natubembuka+ pa kupeela Yehova na iwe umulandu. Tupapaatileko kuli Yehova ukuti afumye pali ifwe insoka ishi.”+ E fyo Mose apapaatileko aba bantu.+ 8 E lyo Yehova atile kuli Mose: “Panga insoka ya busungu iya cimpashanya no kuibika pa cimuti caololoka. Kabili onse uwasumwa, afwile ukuloleshako pa kuti efwa.”+ 9 Apo pene Mose apangile insoka ya mukuba+ no kuibika pa cimuti caololoka;+ nomba umuntu nga asumwa kabili alolesha+ kuli iyo nsoka ya mukuba, aleba no mweo.+

10 Pa numa, abana ba kwa Israele bafumine palya no kuyapanga inkambi mu Oboti.+ 11 Kabili bafumine mu Oboti no kuyapanga inkambi mu Iye-abarimu,+ mu matololo yaba apalungatana na Moabu, ukutulila akasuba. 12 Ilyo bafumine apa bailepanga inkambi mupepi ne mpanga yabatama iya Serede.+ 13 Ilyo bafumine palya baile balepanga inkambi mu mpanga ya Arnone,+ iyaba mu matololo ayatula pa mupaka wa bena Amore; pantu uyu Arnone e mupaka wa kwa Moabu, uwapakanya Moabu na bena Amore. 14 E mulandu wine balembela mwi buuku lya Nkondo sha kwa Yehova, ukuti:

“Fahebu mu Sufa e lyo no mumana wa Arnone, 15 ne milonga ya uko, uwashokela ukwabela Ari+ kabili uwakonka umupaka wa Moabu.”

16 Ukufuma apa baile ku Beere.+ Ici e cishima ico Yehova asosele kuli Mose ati: “Longanya abantu, uleke mbapeele amenshi.”+

Kabili bafumine mu matololo no kuya ku Matana. 19 Kabili bafumine ku Matana no kuya ku Nahaliele kabili ukufuma ku Nahaliele baile ku Bamote.+ 20 Ukufuma ku Bamote baile ku mupokapoka uwaba mu mpanga ya kwa Moabu,+ pa muulu wa Pisga,+ uwaba apasansama ukulungatana na Yeshimone.+

21 Israele nomba atumine inkombe kuli Sihone+ imfumu ya bena Amore, no kutila:22 “Lekeni mpite mu calo cenu. Tatwakapaasukile mu mabala nangu ni mu mabala ya myangashi. Tatwakanwe na menshi ya mu cishima. Mu nshila ya mfumu e mo tukapita mpaka tukapite mu calo cenu no kufumamo.”+ 23 Awe Sihone talekele Israele ukupita mu calo cakwe,+ lelo Sihone alonganike abantu bakwe bonse no kwima ukuyalwisha Israele mu matololo, ayafika na ku Yahasi+ no kutendeka ukulwa na Israele. 24 E ico Israele amwipaile ku lupanga+ no kupoka icalo+ cakwe ukutula ku Arnone+ ukuyafika ku Yaboke,+ mupepi na ku bana ba kwa Amoni; pantu Yasere+ e mupaka wa bana ba kwa Amoni.+

31 Awe Israele aikele mu calo ca bena Amore.+ 32 E lyo Mose atuminepo bamo ukuyalengula Yasere.+ E ico basanshile imisumba ya uko iyali mupepi no kutamfya abena Amore abalimo.+ 33 Pa numa, balyalwike no kuya mu nshila ya ku Bashani.+ Awe Oge+ imfumu ya Bashani yafumine ku kubalwisha, pamo na bantu bakwe bonse, ku bulwi bwa ku Edrei.+ 34 Yehova nomba atile kuli Mose: “Wimutiina,+ pantu ndepeela ena na bantu bakwe bonse ne calo cakwe mu minwe yobe;+ kabili umucite ifyo wacitile kuli Sihone, imfumu ya bena Amore, uwaleikala mu Heshebone.”+ 35 E fyo bamwipeye kumo na bana bakwe abaume na bantu bakwe bonse, ica kuti takwali no wapuswike pa bantu bakwe;+ kabili bapokele icalo cakwe.+

22 E lyo abana ba kwa Israele bafumine palya no kuyapanga inkambi mu ciswebebe ca Moabu+ bushilya bwa Yordani apalungatana na Yeriko. 2 Kabili Balaki+ umwana mwaume wa kwa Sipore amwene fyonse ifyo Israele acitile ku bena Amore. 3 E ico Moabu atiinine nga nshi aba bantu, pantu bali abengi; kabili Moabu aiketwe umwenso uukalamba pa bana ba kwa Israele.+ 4 E lyo Moabu atile ku ntungulushi sha Midiani:+ “Moneni ulu lukuta lwalalya conse icatushinguluka filya ing’ombe ilya umulemfwe uuteku mu mpanga.”

Kabili Balaki+ mwana Sipore e wali imfumu ya ku Moabu pali ilya nshita. 5 E ico nomba atumine inkombe kuli Balaamu+ mwana Beore uwali ku Petore,+ umusumba wabela mupepi no Mumana+ wa mu calo ca bana ba bantu bakwe, ukuti bayemwita, abati: “Mona! Kuli abantu abafumine ku Egupti. Aba bantu bali fye mpanga yonse konse uko walolesha,+ kabili baleikala apalungatene na ine. 6 E ico nomba, shi isa; untiipileko+ aba bantu, pantu ba maka ukuncila. Nalimo kuti nabacimfya no kubatamfya muno calo; pantu nalishiba ukuti uo wapaala ninshi apaalwa no o watiipa ninshi atiipwa.”+

7 Awe intungulushi sha ku Moabu ne ntungulushi sha ku Midiani baimine ubulendo ninshi nabasenda na malipilo ya lubuko+ mu minwe yabo no kuya kuli Balaamu+ kabili bamwebele amashiwi ya kwa Balaki. 8 Na o atile kuli bena: “Sendameni kuno buno bushiku, na ine nkamweba ifyo Yehova alanjeba.”+ Awe bacilolo ba ku Moabu baikele kuli Balaamu.

9 E lyo Lesa aishile kuli Balaamu no kutila:+ “Ni bani aba bantu abali nobe?” 10 Na o Balaamu atile kuli Lesa wa cine: “Balaki+ mwana Sipore, imfumu ya ku Moabu, atumine amashiwi kuli ine, atile, 11 ‘Mona! Kuli abantu abafumine ku Egupti, kabili bali fye mpanga yonse konse uko walolesha.+ E ico nomba isa, untiipileko aba bantu.+ Nalimo kuti nabalwisha no kubatamfya muno.’” 12 Lelo Lesa atile kuli Balaamu: “Wiya na bo. Kabili witiipa aba bantu,+ pantu bantu bapaalwa.”+

13 Pa numa ya ifi Balaamu aimine ulucelo no kweba bacilolo ba kwa Balaki ati: “Kabiyeni ku calo cenu, pantu Yehova nandesha ukuya nenu.” 14 Awe bacilolo ba ku Moabu balimine no kuyafika kuli Balaki no kutila: “Balaamu nakaana ukwisa na ifwe.”+

15 Lelo, Balaki na kabili atumine bacilolo bambi abengi kabili abacindikwa ukucila balya ababalilepo. 16 Awe bafikile kuli Balaamu no kumweba ati: “Ifi e fyo Balaki mwana Sipore, atila: ‘Shi wikaana ukwisa kuli ine. 17 Pantu nkakucindamika nga nshi,+ na conse ico ukanjeba nkacita.+ E ico shi, isa. Untiipileko aba bantu.’” 18 Lelo Balaamu ayaswike ababomfi ba kwa Balaki ati: “Nangu Balaki ampeela ing’anda yakwe iyaisulamo silfere na golde, te kuti mpule mu cipope ca kwa Yehova Lesa wandi, mu kanono nangu mu cikalamba.+ 19 E ico na imwe bene, shi sendameni kuno buno bushiku pa kuti njishibe ifyo Yehova alelundapo ukusosa kuli ine.”+

20 E lyo Lesa aishile kuli Balaamu ubushiku no kumweba ati: “Nga ca kutila aba bantu beshile ku kukwita, ima, uye na bo. Lelo ifyo nkakweba e fyo ukalande.”+ 21 Pa numa, Balaamu aimine ulucelo no kunina pa mpunda yakwe iikota kabili aile na bacilolo ba ku Moabu.+

22 Kabili Lesa alikalipe nga nshi ilyo Balaamu aile; kabili malaika wa kwa Yehova aileiminina mu nshila ku kumukaanya.+ Kabili Balaamu aninine pa mpunda iikota, na babomfi bakwe babili bali nankwe. 23 E lyo impunda yamwene malaika wa kwa Yehova eminine mu nshila, ninshi naikata no lupanga mu minwe yakwe;+ kabili impunda yafumine mu nshila, yaya mu mpanga, lelo Balaamu atendeke ukuuma impunda pa kuti aibweseshe mu nshila. 24 Malaika wa kwa Yehova na o aileminina na mu kashila akali pa kati ka mabala ya myangashi, uku lubali kwali icibumba ca mabwe no ku lubali na ko icibumba ca mabwe. 25 Kabili ilyo impunda yamwene malaika wa kwa Yehova na kabili, yaileikuusa ku cibumba no kufyenenkesha ulukasa lwa kwa Balaamu ku cibumba; na o e pa kuyumisha.

26 Awe malaika wa kwa Yehova aile ku ntanshi no kuyaiminina apacepeshe apo umuntu ashingapita ukuya ku kulyo nangu ku kuso. 27 Ilyo impunda yamwene malaika wa kwa Yehova, nomba yaikele pa nshi ninshi Balaamu acili naikalapo; ica kuti Balaamu alikalipe nga nshi,+ kabili akonkenyepo ukuuma impunda ku nkonto yakwe. 28 E lyo nomba Yehova ayasamwine akanwa ka mpunda+ na yo yatile kuli Balaamu: “Cinshi ncitile kuli imwe pa kuti mungume iyi miku itatu?”+ 29 E lyo Balaamu atile ku mpunda: “Pantu nauncusha. Kabili nkwata ulupanga mu minwe yandi, nga ni kale nkwipeye!”+ 30 Ne mpunda yatile kuli Balaamu: “Bushe nshili mpunda yenu apo munina lyonse pa nshita yonse iyi mwaba no mweo ukufika na kuli buno bushiku? Bushe natala ncita ica musango yu kuli imwe?”+ Na o atile: “Iyo!” 31 E lyo Yehova ashibwile amenso ya kwa Balaamu,+ kabili amwene malaika wa kwa Yehova eminine mu nshila ali no lupanga mu minwe yakwe. Apo pene alikonteme no kuwa ubukupeme.

32 Malaika wa kwa Yehova nomba atile kuli ena: “Cinshi waumina impunda yobe imiku iyi itatu? Mona! ine njishile ukuti nkucilikile, pantu imicitile yobe naipusaninina fye no kufwaya kwandi.+ 33 Kabili impunda naimona no kupaasukila kumbi pa miku iyi itatu.+ Bushe aibula kupaasuka ukufuma ku cinso candi nga cinshi cicitike? Nga ni kale nkwipeye,+ no kuleka impunda ibe no mweo.” 34 E lyo Balaamu atile kuli malaika wa kwa Yehova: “Nimembuka,+ pantu nshacishiba ukuti ni mwe mwiminine mu nshila ku kwisankumanya. E ico nomba, nga tacili bwino kuli imwe, lekeni mbwelelemo.” 35 Lelo malaika wa kwa Yehova atile kuli Balaamu: “Kabiye na ba bantu;+ lelo ifyo nkakweba, ifyo fine e fyo ukasose.”+ Awe Balaamu akonkenyepo ukuya na bacilolo ba kwa Balaki.

36 Ilyo Balaki aumfwile ukuti Balaamu aisa, apo pene aile ku kumusengela ku musumba wa Moabu, uwaba mu lulamba lwa Arnone, ku mpela fye ya mupaka.+ 37 E lyo Balaki atile kuli Balaamu: “Bushe ine nshatumine aba kukwita? Cinshi ico ushaishiile kuli ine? Bushe uleti ine te kuti inkucindamike?”+ 38 Na o Balaamu atile kuli Balaki: “Mona ine nomba ninjisa kuli iwe.+ Nga finshi fimbi nalasosa? Ifyo Lesa akanjeba e fyo nkasosa.”+

39 E fyo Balaamu aile na Balaki bayafika na ku Kiriati-husote. 40 E lyo Balaki atuulile amalambo ya ng’ombe ne mpaanga+ no kutumapo inama shimo kuli Balaamu na bacilolo abali nankwe. 41 Nomba ulucelo Balaki asendele Balaamu no kumuninika pa Bamote-baali,+ ukuti palya e po amwene abantu bonse.+

23 E lyo Balaamu atile kuli Balaki: “Unkuulile ifiipailo+ cinelubali (7) pano kabili umpekanishishe ing’ombe ishilume cinelubali na basukusuku cinelubali pano.” 2 Apo pene fye Balaki acitile ifyo Balaamu alandile. E lyo Balaki na Balaamu batuulile ing’ombe iilume na sukusuku pa ciipailo cimo cimo.+ 3 Kabili Balaamu atile kuli Balaki: “Iminina mupepi no mutuulo+ obe uwa koca, kabili leka ine ndeya. Napamo Yehova akamoneka kuli ine no kunkumanya.+ Kabili conse ico akananga, nkakweba.” Awe aile na pa kalupili apabula akantu.

11 E lyo Balaki atile kuli Balaamu: “Cinshi wacita kuli ine? Ico nakusendeele kwisatiipa abalwani bandi, nomba mona iwe wabapaala nga nshi.”+ 12 Na o ayaswike ati: “Bushe nshifwile ukubika amano ku kusosa fyonse ifyo Yehova anjebele?”+

25 E lyo Balaki atile kuli Balaamu: “Kanshi nga wafilwa ukumutiipa, ninshi no kumupaala wimupaala.” 26 Balaamu na o ayaswike Balaki ati: “Bushe nshikwebele, nati, ‘Fyonse ifyo Yehova akalanda e fyo ine nkacita’?”+

27 E lyo Balaki atile kuli Balaamu: “Isa. Leka nkutwale na kumbi. Napamo Lesa wa cine kuti atemwa ukuti kulya e ko untiipile aba bantu.”+ 28 Awe Balaki atwele Balaamu pa muulu wa Peore, uwaba apalungatana na Yeshimone.+ 29 E lyo Balaamu+ atile kuli Balaki: “Nkuulila ifiipailo cinelubali (7) pano kabili umpekanishishe ing’ombe ishilume cinelubali na basukusuku cinelubali pano.”+ 30 E ico Balaki acitile ifyo Balaamu alandile, kabili atuulile ilambo lya ng’ombe iilume na sukusuku pa ciipailo cimo cimo.+

24 Ilyo Balaamu amwene ukuti Yehova alefwaya fye ukupaala Israele, taile ifyo aleya inshiku+ shimbi ku kuyafwaya ifya kuleta ishamo,+ lelo aloseshe icinso cakwe ku matololo. 2 Ilyo Balaamu ainwine amenso no kumona Israele napanga inkambi ukulingana ne mikowa yakwe,+ e lyo umupashi wa kwa Lesa waishile pali ena.+ 3 E ico alandiile mu mapinda+ ati:

 5 Ifyo yawama imimonekele ya matenti yobe, we Yakobo, amekalo yobe, we Israele!+

10 Pali ici, Balaki akalipile nga nshi Balaamu, atoota ne ndupi,+ e lyo Balaki akonkenyepo ukusosa kuli Balaamu ati: “Ico nakwitiile, kutiipa+ abalwani bandi, lelo mona! naubapaala nga nshi iyi miku itatu. 11 E ico nomba fulumukila ku mobe. Ine natile nkakucindamika,+ lelo mona! Yehova nakaana ukuti ucindamikwe.”

25 Pa numa ya ifi Balaamu aliimine no kuya kabili abwelele ku mwakwe.+ Balaki na o aile mu nshila yakwe.

25 Nomba abena Israele baleikala mu Shitimu.+ E lyo abantu batendeke ukucita ubulalelale na bana banakashi abena Moabu.+ 2 Na banakashi baitile abantu ku malambo ya tulesa twabo,+ na bo batendeke ukulya no kukontamina tulesa twabo.+ 3 E fyo abena Israele batampile ukupepa Baali wa ku Peore;+ na Yehova alikalipe pa fyalecita abena Israele.+ 4 E ico Yehova atile kuli Mose: “Buula ifitumbi fya baali pa ntanshi+ mu kucita ici no kufikobeka pa lwalaala pa kuti fimoneke kuli Yehova, pa kuti ubukali bwa kwa Yehova ubupya ngo mulilo bufume pali Israele.” 5 E lyo Mose atile ku bapingushi ba kwa Israele:+ “Cila muntu epaye+ abantu bakwe abapepeleko Baali wa ku Peore.”

6 Nomba, moneni! kwaishile umwaume+ uwa mu bana ba kwa Israele, aletele umwanakashi+ umwina Midiani kuli bamunyina ninshi Mose no lukuta lonse ulwa bana ba kwa Israele balemonako, ilyo bali pa mwinshi wa cikuulwa ca kukumaninako baleloosha. 7 Finehasi+ mwana Eleasari umwana wa kwa Aarone shimapepo pa kumona ici, apo pene aimine mu kati ka lukuta no kusenda ifumo mu minwe yakwe. 8 Akonkele uyo umwina Israele mwi tenti no kubapushamo ifumo bonse babili, umwaume umwina Israele no mwanakashi mu fya mfwalo fyakwe. E fyo ne cikuko ico cafumine pa bana ba kwa Israele.+ 9 Na bafwile kuli ico cikuko bali amakana amakumi yabili na yane (24,000).+

10 E lyo Yehova alandile kuli Mose ati:11 “Finehasi+ mwana Eleasari umwana wa kwa Aarone shimapepo nabwesha icipyu+ candi pa bana ba kwa Israele pa kukanatekelesha ulubembu,+ alenga nakaana ukulofya abana ba kwa Israele abo naciba no kulofya pa mulandu wa kufwaya ukupepwa fye neka.+ 12 E ico usose auti, ‘Moneni ndemupeela icipangano ca mutende. 13 Na co cikaba kuli ena, na ku bana bakwe abakamukonkapo,+ icipangano ca bushimapepo ica muyayaya, pantu tatekeleshe abafwaya ukucimfyanya na Lesa+ wakwe kabili afutilako abana ba kwa Israele.’”+

14 Awe caishilesangwa ukuti ishina lya mwaume umwina Israele uo baipaile pamo no mwanakashi umwina Midiani, ni Simri umwana mwaume wa kwa Salu, intungulushi+ ya mukowa wa kwa Simeone. 15 Ne shina lya mwanakashi umwina Midiani uwaipaiwe ni Kosbi umwana wa kwa Suri;+ uwali umukalamba wa mikowa ya bena Midiani.+

16 Pa numa, Yehova alandile kuli Mose ati:17 “Mulecusha abena Midiani, kabili mulebepaya,+ 18 pantu bena balemucusha ku fya bucenjeshi+ fyabo ifyo bacitile kuli imwe mu bucenjeshi mu mulandu wa kwa Peore+ na mu mulandu wa kwa Kosbi+ umwana mwanakashi wa ntungulushi ya ku Midiani, inkashi yabo iyaipaiwe+ mu bushiku kwali icikuko pa mulandu wa kwa Peore.”+

26 Nomba pa numa ya cikuko ici,+ e lyo Yehova atile kuli Mose na Eleasari mwana Aarone shimapepo: 2 “Pendeni ulukuta lonse ulwa bana ba kwa Israele ukutendekela pa wa myaka amakumi yabili (20) no kucilapo, ukulingana na mayanda ya bashibo, bonse abengaya ku bulwi mu Israele.”+ 3 E lyo Mose na Eleasari+ shimapepo balandile kuli bena mu ciswebebe ca Moabu+ mupepi na Yordani ku Yeriko,+ abati: 4 “Bapendeni ukutula pa wa myaka amakumi yabili (20) no kucilapo, ukulingana fye ne fyo Yehova aebele Mose.”+

E ico abana ba kwa Israele abafumine mu calo ca Egupti ni aba: 5 Rubene, ibeli+ lya kwa Israele; abana baume ba kwa Rubene ni aba: Muli Hanoke+ e mwafumine ulupwa lwa bena Hanoke; muli Palu+ e mwafumine ulupwa lwa bena Palu; 6 muli Hesrone+ e mwafumine ulupwa lwa bena Hesrone; muli Karmi+ e mwafumine ulupwa lwa bena Karmi. 7 Ishi e ndupwa sha bena Rubene, kabili abo balembele bafikile ku makana amakumi yane na yatatu ne myanda cinelubali na makumi yatatu (43,730).+

8 No mwana mwaume uwa kwa Palu ni Eliabu. 9 Na bana baume ba kwa Eliabu ni aba: Nemuele na Datani na Abiramu. Uyu Datani+ na Abiramu+ e baitilwe ukufuma mu lukuta, abalelwisha Mose na Aarone ukufuma mu lukuta lwa kwa Kora,+ ilyo balwishishe Yehova.

10 Awe umushili wayasamwine akanwa ka uko no kubamina.+ Lelo Kora afwiliile pamo no lukuta ilyo umulilo waocele abantu imyanda ibili na makumi yasano (250).+ Kabili baishileba icishibilo.+ 11 Lelo bamwana Kora tabafwile.+

12 Abana baume aba kwa Simeone+ ukulingana ne ndupwa shabo ni aba: Muli Nemuele*+ e mwafumine ulupwa lwa bena Nemuele; muli Yamini+ e mwafumine ulupwa lwa bena Yamini; muli Yakini+ e mwafumine ulupwa lwa bena Yakini; 13 muli Sera* e mwafumine ulupwa lwa bena Sera; muli Shauli+ e mwafumine ulupwa lwa bena Shauli. 14 Ishi e ndupwa sha bena Simeone abali amakana amakumi yabili na yabili ne myanda ibili (22,200).+

15 Abana baume aba kwa Gadi+ ukulingana ne ndupwa shabo ni aba: Muli Sefone* e mwafumine ulupwa lwa bena Sefone; muli Hagi e mwafumine ulupwa lwa bena Hagi; muli Shuni e mwafumine ulupwa lwa bena Shuni; 16 muli Osni* e mwafumine ulupwa lwa bena Osni; muli Eri e mwafumine ulupwa lwa bena Eri; 17 muli Arodi e mwafumine ulupwa lwa bena Arodi; muli Areli+ e mwafumine ulupwa lwa bena Areli. 18 Ishi e ndupwa sha bana baume ba kwa Gadi, isha bantu babo abalembelwe abali amakana amakumi yane ne myanda isano (40,500).+

19 Abana baume aba kwa Yuda+ ni: Ere+ na Onani.+ Lelo Ere na Onani bafwiliile mu calo ca Kanaani.+ 20 Kabili abana baume ba kwa Yuda, ukulingana ne ndupwa shabo ni aba: Muli Shela+ e mwafumine ulupwa lwa bena Shela; muli Perese+ e mwafumine ulupwa lwa bena Perese; muli Sera+ e mwafumine ulupwa lwa bena Sera. 21 Kabili abana baume ba kwa Perese ni aba: Muli Hesrone+ e mwafumine ulupwa lwa bena Hesrone; muli Hamuli+ e mwafumine ulupwa lwa bena Hamuli. 22 Ishi e ndupwa sha kwa Yuda,+ isha bantu babo abalembelwe abali amakana amakumi cinelubali na mutanda ne myanda isano (76,500).+

23 Abana baume aba kwa Isakari+ ukulingana ne ndupwa shabo ni aba: Muli Tola+ e mwafumine ulupwa lwa bena Tola; muli Puba e mwafumine ulupwa lwa bena Puba; 24 muli Yashubu* e mwafumine ulupwa lwa bena Yashubu; muli Shimrone+ e mwafumine ulupwa lwa bena Shimrone. 25 Ishi e ndupwa sha kwa Isakari, isha bantu babo abalembelwe abali amakana amakumi mutanda na yane ne myanda itatu (64,300).+

26 Abana baume aba kwa Sebuluni+ ukulingana ne ndupwa shabo ni aba: muli Serede e mwafumine ulupwa lwa bena Serede; muli Elone e mwafumine ulupwa lwa bena Elone; muli Yaaleele+ e mwafumine ulupwa lwa bena Yaaleele. 27 Ishi e ndupwa sha kwa Sebuluni, isha bantu babo abalembelwe abali amakana amakumi mutanda ne myanda isano (60,500).+

28 Abana baume aba kwa Yosefe+ ukulingana ne ndupwa shabo ni Manase na Efraimu.+ 29 Abana baume ba kwa Manase+ ni aba: Muli Makiri+ e mwafumine ulupwa lwa bena Makiri. Kabili Makiri afyele Gileadi.+ Muli Gileadi e mwafumine ulupwa lwa bena Gileadi. 30 Aba e bana baume ba kwa Gileadi: Muli Yesere+ e mwafumine ulupwa lwa bena Yesere; muli Heleke e mwafumine ulupwa lwa bena Heleke; 31 muli Asriele e mwafumine ulupwa lwa bena Asriele; muli Shekemu e mwafumine ulupwa lwa bena Shekemu; 32 muli Shemida+ e mwafumine ulupwa lwa bena Shemida; muli Hefere+ e mwafumine ulupwa lwa bena Hefere. 33 Lelo Selofehadi umwana mwaume wa kwa Hefere takwete abana baume, akwete fye abana banakashi,+ na mashina ya bana banakashi ba kwa Selofehadi ni Maala na Noa, Hogla, Milika na Tesa.+ 34 Ishi e ndupwa sha kwa Manase, kabili abantu babo abalembelwe bali amakana amakumi yasano na yabili ne myanda cinelubali (52,700).+

35 Aba e bana baume aba kwa Efraimu+ ukulingana ne ndupwa shabo: Muli Shutela+ e mwafumine ulupwa lwa bena Shutela; muli Bekere e mwafumine ulupwa lwa bena Bekere; muli Tahani+ e mwafumine ulupwa lwa bena Tahani. 36 Kabili aba e bana baume ba kwa Shutela: Muli Erani e mwafumine ulupwa lwa bena Erani. 37 Ishi e ndupwa sha bana baume ba kwa Efraimu,+ isha bantu babo abalembelwe abali amakana amakumi yatatu na yabili ne myanda isano (32,500). Aba e bana baume ba kwa Yosefe ukulingana ne ndupwa shabo.+

38 Abana baume aba kwa Benjamini+ ukulingana ne ndupwa shabo ni aba: Muli Bela+ e mwafumine ulupwa lwa bena Bela; muli Ashbele+ e mwafumine ulupwa lwa bena Ashbele; muli Ahiramu* e mwafumine ulupwa lwa bena Ahiramu; 39 muli Shefufamu* e mwafumine ulupwa lwa bena Shufamu; muli Hufamu*+ e mwafumine ulupwa lwa bena Hufamu. 40 Abana baume ba kwa Bela bali ni Ardi na Naamani:+ Muli Ardi e mwafumine ulupwa lwa bena Ardi; muli Naamani e mwafumine ulupwa lwa bena Naamani. 41 Aba e bana baume ba kwa Benjamini+ ukulingana ne ndupwa shabo, kabili abantu babo abalembelwe bali amakana amakumi yane na yasano ne myanda mutanda (45,600).+

42 Aba e bana baume aba kwa Dani+ ukulingana ne ndupwa shabo: Muli Shuhamu* e mwafumine ulupwa lwa bena Shuhamu. Ishi e ndupwa sha kwa Dani+ ukulingana ne ndupwa shabo. 43 Indupwa shonse isha bena Shuhamu, abantu babo abalembelwe, bali amakana amakumi mutanda na yane ne myanda ine (64,400).+

44 Abana baume aba kwa Ashere+ ukulingana ne ndupwa shabo ni aba: Muli Imna+ e mwafumine ulupwa lwa bena Imna; muli Ishbi+ e mwafumine ulupwa lwa bena Ishbi; muli Beria e mwafumine ulupwa lwa bena Beria; 45 pa bana baume ba kwa Beria: Muli Heberi e mwafumine ulupwa lwa bena Heberi; muli Malkiele+ e mwafumine ulupwa lwa bena Malkiele. 46 Kabili ishina lya mwana mwanakashi wa kwa Ashere ni Sera.+ 47 Ishi e ndupwa sha bana baume ba kwa Ashere;+ isha bantu babo abalembelwe abali amakana amakumi yasano na yatatu ne myanda ine (53,400).+

48 Abana baume aba kwa Naftali+ ukulingana ne ndupwa shabo ni aba: Muli Yaaseele+ e mwafumine ulupwa lwa bena Yaaseele; muli Guni+ e mwafumine ulupwa lwa bena Guni; 49 muli Yesere+ e mwafumine ulupwa lwa bena Yesere; muli Shilemu+ e mwafumine ulupwa lwa bena Shilemu. 50 Ishi e ndupwa sha kwa Naftali+ ukulingana ne ndupwa shabo, kabili abantu babo abalembelwe bali amakana amakumi yane na yasano ne myanda ine (45,400).+

51 Aba e balembelwe mu bana ba kwa Israele: amakana imyanda mutanda ne kana limo ne myanda cinelubali na makumi yatatu (601,730).+

52 Pa numa ya ifi Yehova alandile kuli Mose ati: 53 “Aba e bo ukaakanye icalo ukuti cikabe icabo ukulingana ne mpendwa ya mashina yabo.+ 54 Ukakushe incende ya muntu ukulingana no bukulu bwe bumba lyakwe, kabili ibumba lyakwe nga linono ne ncende+ yakwe ikabe iinono. Cila muntu akapeelwe incende ukulingana no bwingi bwa bantu bakwe abalembwa. 55 Ni ku kupendula+ epela e ko icalo cikaakanishiwe. Ukulingana na mashina ya mikowa ya bashibo e fyo abantu bakapeelwe incende. 56 Ukulingana ne fyo ukupendula kukaba e fyo umo akapeelwa incende ukulingana ne fyo abantu bafula nangu ifyo bacepa.”

57 Nomba aba e balembelwe mu bena Lebi+ ukulingana ne ndupwa shabo: Muli Gershone+ mwafumine ulupwa lwa bena Gershone; muli Kohati+ mwafumine ulupwa lwa bena Kohati; muli Merari+ mwafumine ulupwa lwa bena Merari. 58 Ishi e ndupwa sha bena Lebi: ulupwa lwa bena Libni,+ ulupwa lwa bena Hebrone,+ ulupwa lwa bena Mahli,+ ulupwa lwa bena Mushi,+ ulupwa lwa bena Kora.+

Kabili Kohati+ afyele Amramu.+ 59 Ne shina lya mukashi wa kwa Amramu aali ni Yokebede,+ umwana mwanakashi wa kwa Lebi, uo Lebi afyele mu Egupti. Mu kuya kwa nshita, afyele Aarone, Mose na Miriamu inkashi yabo kuli Amramu.+ 60 Kabili Aarone afyele Nadabu, Abihu,+ Eleasari na Itamari.+ 61 Lelo Nadabu na Abihu bafwiliile pa kutuulila Yehova umutuulo wa pa mulilo uo bashasuminishiwe.+

62 Na bantu babo abalembelwe bali amakana amakumi yabili na yatatu (23,000) abaume beka beka abali ne myaka ukutula pa wa mweshi umo no kucilapo.+ Bena e bashalembelwe mu bena Israele,+ pantu tabali no kupeelwa incende mu bana ba kwa Israele.+

63 Aba e bo Mose na Eleasari shimapepo balembele ilyo balelemba abana ba kwa Israele mu ciswebebe ca Moabu mupepi na Yordani ku Yeriko.+ 64 Lelo pali aba tapali uwalembelwe na Mose na Aarone ilyo balelemba abana ba kwa Israele mu matololo ya Sinai.+ 65 Pantu Yehova atile: “Bakafwila mu matololo.”+ E ico pali bena tapashele muntu nangu umo kano fye Kalebu mwana Yefune na Yoshua mwana Nuni.+

27 Nomba abana banakashi ba kwa Selofehadi+ mwana Hefere umwana wa kwa Gileadi mwana Makiri umwana wa kwa Manase,+ uwa mu ndupwa sha kwa Manase mwana Yosefe, balishile. Kabili aya e mashina ya bana bakwe abanakashi: Maala, Noa, Hogla, Milika na Tesa.+ 2 Awe baiminine pa ntanshi ya kwa Mose na Eleasari+ shimapepo na pa ntanshi ya ntungulushi no lukuta lonse pa mwinshi wa cikuulwa ca kukumaninako, no kutila: 3 “Shifwe afwiliile mu matololo,+ kabili tasangilwe mu kati ka lukuta, e kutila, ulukuta lwa kwa Kora+ ulwaimiine Yehova, lelo afwiliile pa lubembu lwakwe;+ kabili tafyele abana baume nangu bamo. 4 Nga kanshi cinshi ico ishina lya kwa shifwe lyalalobela mu kati ka lupwa lwakwe pa mulandu fye wa kuti takwete umwana mwaume?+ Mukwai tupeeni impanga pa kati ka bamunyina ba kwa shifwe.”+ 5 Awe Mose atuulile umulandu wabo kuli Yehova.+

6 E lyo Yehova atile kuli Mose: 7 “Ico abana banakashi ba kwa Selofehadi balelanda ca cine. Ubapeele impanga mu kati ka bamunyina ba kwa shibo, kabili ukabapeele impanga ya kwa shibo.+ 8 Usose na ku bana ba kwa Israele, auti, ‘Umuntu nga afwa ukwabula ukufyala umwana mwaume, abana bakwe abanakashi bakapyane impanga. 9 Lelo nga takwata no mwana mwanakashi, mukapeele impanga yakwe kuli bamunyina. 10 Kabili nga takwata bamunyina, mukapeele impanga yakwe kuli bamunyina ba kwa wishi. 11 Kabili wishi nga takwata bamunyina, mukapeele impanga yakwe ku muntu wakwe uwapalamisha kuli ena mu lupwa lwakwe,+ na o akapyane iyo mpanga. Ifi napingula e cipope ico abana ba kwa Israele balingile ukulakonka, ukulingana ne fyo Yehova ebele Mose.’”

12 E lyo Yehova atile kuli Mose: “Nina ulupili ulu ulwa Abarimu+ no kumona icalo ico nkapeela abana ba kwa Israele.+ 13 Nga wacimona, ukafwa nge fyafwa abantu bobe,+ nga filya fine fye Aarone munonko afwa,+ 14 pantu tamwaumfwilile ifyo namwebele mu matololo ya Sini ilyo ulukuta lwaleumana na ine,+ apo tamwancindike+ pa menso yabo pa menshi yalya. Aya e menshi ya pa Meriba+ pa Kadeshe+ mu matololo ya Sini.”+

15 E lyo Mose asosele kuli Yehova ati: 16 “Lekeni Yehova Lesa umwine wa mupashi+ uwaba mu fya mweo+ ifya misango yonse asale umuntu uwa kutungulula ulukuta+ 17 uukalabatungulula mu milimo yabo,+ pa kuti ulukuta lwa kwa Yehova lwiba nge mpaanga ishishaba na kacema.”+ 18 E ico Yehova atile kuli Mose: “Buula Yoshua mwana Nuni, umwaume wafikapo,+ na iwe ubike ukuboko kobe pali ena;+ 19 kabili umwiminike pa ntanshi ya kwa Eleasari shimapepo na pa ntanshi ya lukuta lonse, no kumucita intungulushi pa menso yabo.+ 20 Kabili ubike no bukata bobe bumo pali ena,+ pa kuti ulukuta lonse ulwa bana ba kwa Israele lulemumfwila.+ 21 Kabili pa ntanshi ya kwa Eleasari shimapepo e po akalaiminina, na o akalamwipushishako+ kuli Yehova ifyapingulwa muli Urimu.+ Nga atila fumeni bakalafuma kabili nga atila ingileni bakalaingila, ena na bana ba kwa Israele bonse abali nankwe no lukuta lonse.”

22 Awe Mose acitile filya fine fye Yehova amwebele. E fyo asendele na Yoshua no kumwiminika pa ntanshi ya kwa Eleasari+ shimapepo na pa ntanshi ya lukuta lonse 23 no kubika amaboko yakwe pali ena no kumucita intungulushi,+ nga filya fine fye Yehova alandiile muli Mose.+

28 Kabili Yehova akonkenyepo ukusosa kuli Mose ati: 2 “Eba abana ba kwa Israele, kabili utile kuli bena, ‘Mukalebika amano ku kupalamika kuli ine umutuulo wandi, umukate+ wandi pa nshita ya uko,+ ukuti ukabe imituulo yandi iya pa mulilo iya kuleta akacena kasuma kuli ine.’+

3 “Kabili ukatile kuli bena, ‘Uyu e mutuulo wa pa mulilo uo mukalaleeta kuli Yehova: utwana twa mpaanga tubili utulume utwa mwaka umo kabili utusuma e mutuulo wa koca uo mukalatuula lyonse cila bushiku.+ 4 Akana ka mpaanga kamo akalume mukalatuula ulucelo, e lyo akana ka mpaanga kambi akalume mukalatuula pa nshita ya cungulo cinono,+ 5 pamo no lupe+ lumo ulwa buunga ubwapeleka, ubwasakanamo amakapu yatatu aya mafuta yatwiwa+ e mutuulo wa ngano;+ 6 e mutuulo+ wa koca uwa lyonse, uwatuulilwe pa Lupili lwa Sinai ku kuba umutuulo wa pa mulilo kuli Yehova uwa kuleta akacena kasuma,+ 7 pamo no mutuulo+ wa uko uwa makapu yatatu aya mwangashi, umutuulo wa pali cila kana ka mpaanga akalume.+ Umwa mushilo e mo ukapongolwele umwangashi+ uukola kuli Yehova. 8 Kabili ukatuule akana ka mpaanga kambi akalume pa nshita ya cungulo cinono. Ukakatuulile pamo no mutuulo wa ngano umo wine nga ulya uwa lucelo pamo no mutuulo wa uko umo wine uwa mwangashi ukuti ukabe umutuulo wa pa mulilo, uwa kuleta akacena kasuma kuli Yehova.+

9 “‘Lelo, pa bushiku bwe sabata+ pakaleba utwana twa mpaanga tubili utulume utwa myaka ibili kabili utusuma e lyo no mutuulo wa ngano uwa buunga bwapeleka ubwa ndupe shibili ubwasakanamo amafuta, pamo no mutuulo wa mwangashi, 10 ukaleba umutuulo wa koca uwa pe sabata ne sabata, pamo no mutuulo+ wa koca uwa lyonse no mutuulo wa mwangashi.+

11 “‘Kabili lyonse ilyo mwatendeka umweshi uupya mukaletuula umutuulo wa koca kuli Yehova abana ba ng’ombe babili na sukusuku umo, utwana twa mpaanga cinelubali (7) utulume utwa mwaka umo kabili utusuma,+ 12 ne ndupe shitatu isha mutuulo wa ngano+ uwa buunga bwapeleka ubwasakanamo amafuta uwa pali cila ng’ombe ne ndupe shibili isha mutuulo wa ngano uwa buunga bwapeleka ubwasakanamo amafuta uwa pali ulya sukusuku umo,+ 13 no lupe lumo ulwa mutuulo wa ngano uwa buunga bwapeleka ubwasakanamo amafuta uwa pa kana ka mpaanga akalume kamo kamo, ukabe umutuulo wa koca, umutuulo wa pa mulilo uwa kuleta akacena kasuma+ kuli Yehova. 14 Kabili pa mituulo yabo iya myangashi bakalebikapo na hafu+ ya galoni iya mwangashi pa ng’ombe imo na makapu yane+ aya mwangashi pali sukusuku umo na makapu yatatu+ aya mwangashi pa kana ka mpaanga kamo akalume. Uyu e mutuulo wa koca uwa kutuula cila mweshi mu myeshi yonse iya mu mwaka.+ 15 Kabili akana+ ka mbushi kamo kakaletuulwa kuli Yehova ku kuba umutuulo wa pa lubembu ukulunda pa mutuulo wa koca uwa lyonse pamo no mutuulo wa uko uwa mwangashi.+

16 “‘Kabili mu mweshi wa kubalilapo, ubushiku bwalenga ikumi na shine (14) bukaleba bushiku bwa ca kucilila ubwa kwa Yehova.+ 17 Kabili pa bushiku bwalenga ikumi na shisano (15) muli uyo mweshi pakaleba umutebeto. Kukalaba ukulya imikate iishatutumuka pa nshiku cinelubali (7).+ 18 Ubushiku bwa kubalilapo bukaleba bushiku bwa kulongana kwa mushilo.+ Mwikalabombapo umulimo uuli onse uwakosa.+ 19 Kabili mukaletuula umutuulo+ wa koca kuli Yehova, ing’ombe shibili ishilume na sukusuku umo no twana twa mpaanga cinelubali (7) utulume utwa mwaka umo.+ Fikaleba ifisuma.+ 20 Kabili pa ng’ombe iinono iilume imo mukaletuula indupe shitatu isha mutuulo wa ngano+ uwa buunga bwapeleka ubwasakanamo amafuta e lyo pali sukusuku umo mukaletuula indupe shibili+ isha mutuulo wa ngano. 21 Ukatuule ulupe lumo+ ulwa mutuulo wa ngano pa kana kamo kamo aka mpaanga akalume pali tulya cinelubali (7); 22 ne mbushi imo iya mutuulo wa pa lubembu ku kumufutilako.+ 23 Ukulunda pa mutuulo+ wa koca uwa lucelo, uutuulwa lyonse,+ mukaletuula ne fi fine. 24 Kabili ifi fine e fyo mukaletuula no mukate+ cila bushiku pa nshiku cinelubali (7), umutuulo wa pa mulilo, uwa kuleta akacena kasuma kuli Yehova.+ Ukaletuulilwa pamo no mutuulo wa koca uwa lyonse, no mutuulo wa mwangashi. 25 E lyo pa bushiku bwalenga cinelubali (7) mukalelongana ukulongana kwa mushilo.+ Mwikalabombapo umulimo uuli onse uwakosa.+

26 “‘Kabili pa bushiku bwa fisabo fyabalilapo ukupya,+ ilyo mwaleta umutuulo wa ngano kuli Yehova, mu mutebeto wenu uwa milungu+ mukalelongana ukulongana kwa mushilo. Mwikalabombapo umulimo uuli onse uwakosa.+ 27 Kabili mukatuule ing’ombe ishilume shibili ishinono, sukusuku umo, utwana twa mpaanga utulume cinelubali (7) utwa mwaka umo, ku kuba umutuulo wa koca uwa kuleta akacena kasuma kuli Yehova;+ 28 kabili pa ng’ombe iinono iilume imo imo mukaletuula indupe shitatu isha mutuulo wa ngano wa buunga bwapeleka ubwasakanamo amafuta, e lyo pali ulya sukusuku umo mukaletuula indupe shibili,+ 29 mukatuule ulupe lumo+ pa kana ka mpaanga akalume kamo kamo pali tulya cinelubali (7); 30 mukatuule akana ka mbushi kamo aka kumufutilako.+ 31 Ukulunda pa mutuulo wa koca uutuulwa lyonse no mutuulo wa uko uwa buunga, ifi na fyo mukalefituula.+ Fikaleba ifisuma,+ pamo ne mituulo ya fiko iya mwangashi.+

29 “‘Kabili mu mweshi walenga cinelubali (7), pa bushiku bwa kubalilapo, mukalelongana ukulongana kwa mushilo.+ Mwikalabombapo umulimo uuli onse uwakosa.+ Bukaleba bushiku bwa kulila kwe penga kuli imwe.+ 2 Kabili mukaletuula umutuulo wa koca uwa kuleta akacena kasuma kuli Yehova, ing’ombe iinono iilume iisuma, sukusuku umo umusuma, utwana twa mpaanga utulume cinelubali (7) utwa mwaka umo utusuma;+ 3 pamo no mutuulo wa ngano uwa buunga bwapeleka ubwasakanamo amafuta, indupe shitatu pa ng’ombe imo iilume, indupe shibili pali sukusuku,+ 4 e lyo no lupe lumo pa kana ka mpaanga kamo kamo akalume pali tulya cinelubali (7);+ 5 mukatuule na kana ka mbushi kamo akalume ku kuba umutuulo wa pa lubembu uwa kumufutilako;+ 6 ukulunda pa mutuulo+ wa koca uwa cila mweshi kumo no mutuulo+ wa ngano e lyo no mutuulo+ wa koca uwa lyonse kumo no mutuulo+ wa uko uwa ngano, pamo ne mituulo+ ya mwangashi iya pali ifi, mukalefituula ukulingana ne fyo fituulwa lyonse, fikabe umutuulo wa pa mulilo uwa kuleta akacena kasuma kuli Yehova.+

7 “‘Kabili pa bushiku bwalenga ikumi (10) ubwa mweshi wa cinelubali (7) mukalelongana ukulongana kwa mushilo,+ kabili mukalecusha imyeo yenu.+ Mwikabombapo umulimo nangu umo.+ 8 Kabili mukaleete kuli Yehova, ing’ombe imo iilume iinono, sukusuku umo, utwana twa mpaanga utulume cinelubali (7) utwa mwaka umo,+ ku kuba umutuulo wa koca, uwa kuleta akacena kasuma kuli ena. Ifi fikabe ifisuma.+ 9 Kabili pa ng’ombe imo iilume, mukaletuula indupe shitatu isha mutuulo wa ngano uwa buunga bwapeleka ubwasakanamo amafuta, ne ndupe shibili pali sukusuku,+ 10 ulupe lumo pa kana ka mpaanga akalume pali tulya cinelubali (7);+ 11 mukaletuula akana ka mbushi kamo ku kuba umutuulo wa pa lubembu, ukulunda pa mutuulo wa kufutilako+ no mutuulo wa koca uutuulwa lyonse pamo no mutuulo wa uko uwa buunga, kumo ne mituulo ya mwangashi.+

12 “‘Kabili pa bushiku bwalenga ikumi na shisano (15) mu mweshi+ wa cinelubali (7) mukalelongana ukulongana kwa mushilo.+ Mwikabombapo umulimo uuli onse uwakosa,+ kabili mukalesefya umutebeto wa nshiku cinelubali kuli Yehova.+ 13 Kabili mukalete kuli Yehova, ing’ombe ishinono ikumi na shitatu (13) ishilume, basukusuku babili, utwana twa mpaanga utulume ikumi na tune (14) utwa mwaka umo, ku kuba umutuulo+ wa koca, umutuulo wa pa mulilo uwa kuleta akacena kasuma kuli ena. Ifi fikaleba ifisuma.+ 14 Kabili pa ng’ombe imo imo iilume shilya ikumi na shitatu, mukaletuula indupe shitatu isha mutuulo wa ngano uwa buunga bwapeleka ubwasakanamo amafuta, ne ndupe shibili pali sukusuku umo umo pali balya babili,+ 15 kabili pa kana ka mpaanga kamo kamo akalume pali tulya ikumi na tune (14) mukaletuula ulupe lumo;+ 16 mukaletuula na kana ka mbushi kamo ku kuba umutuulo wa pa lubembu, ukulunda pa mutuulo wa koca uutuulwa lyonse, pamo no mutuulo wa ngano no mutuulo wa mwangashi.+

17 “‘Kabili pa bushiku bwalenga shibili mukaletuula ing’ombe ikumi na shibili (12) ishinono ishisuma ishilume, basukusuku babili abasuma, utwana twa mpaanga utulume ikumi na tune (14) utwa mwaka umo utusuma;+ 18 kabili umutuulo+ wa fiko uwa ngano ne mituulo+ ya fiko iya mwangashi iya kutuula pa ng’ombe ishilume, na pali basukusuku na pa twana twa mpaanga utulume mukaletuula ukulingana ne mpendwa ya fiko kabili ukulingana ne fyo fituulwa lyonse,+ 19 mukaletuula na kana ka mbushi kamo ku kuba umutuulo wa pa lubembu,+ ukulunda pa mutuulo wa koca uutuulwa lyonse no mutuulo wa uko uwa ngano, pamo ne mituulo ya mwangashi.+

20 “‘Kabili pa bushiku bwalenga shitatu mukaletuula ing’ombe ishilume ikumi na imo (11) ishisuma, basukusuku babili abasuma, utwana twa mpaanga utulume ikumi na tune (14) utwa mwaka umo utusuma;+ 21 kabili umutuulo+ wa ngano ne mituulo+ ya mwangashi iya kutuula pa ng’ombe ishilume, na pali basukusuku na pa twana twa mpaanga utulume mukaletuula ukulingana ne mpendwa ya fiko kabili ukulingana ne fyo fituulwa lyonse; 22 mukaletuula ne mbushi imo ku kuba umutuulo+ wa pa lubembu, ukulunda pa mutuulo wa koca uutuulwa lyonse no mutuulo wa ngano pamo no mutuulo wa mwangashi.

23 “‘Kabili pa bushiku bwalenga shine mukaletuula ing’ombe ishilume ikumi (10) ishisuma, basukusuku babili abasuma, utwana twa mpaanga utulume ikumi na tune (14) utwa mwaka umo utusuma;+ 24 kabili umutuulo+ wa ngano ne mituulo+ ya mwangashi iya kutuula pa ng’ombe ishilume, na pali basukusuku na pa twana twa mpaanga utulume mukaletuula ukulingana ne mpendwa ya fiko kabili ukulingana ne fyo fituulwa lyonse;+ 25 mukaletuula na kana ka mbushi kamo ku kuba umutuulo+ wa pa lubembu, ukulunda pa mutuulo+ wa koca uutuulwa lyonse no mutuulo wa uko uwa buunga no mutuulo wa uko uwa mwangashi.+

26 “‘Kabili pa bushiku bwalenga shisano mukaletuula ing’ombe ishilume pabula (9) ishisuma, basukusuku babili abasuma, utwana twa mpaanga utulume ikumi na tune (14) utwa mwaka umo, utusuma;+ 27 kabili umutuulo+ wa ngano ne mituulo+ ya mwangashi iya kutuula pa ng’ombe isho ishilume, na pali basukusuku na pa twana twa mpaanga utulume, mukaletuula ukulingana ne mpendwa ya fiko kabili ukulingana ne fyo fituulwa lyonse;+ 28 mukaletuula ne mbushi imo ku kuba umutuulo+ wa pa lubembu, ukulunda pa mutuulo wa koca uutuulwa lyonse no mutuulo wa uko uwa buunga pamo no mutuulo wa uko uwa mwangashi.+

29 “‘Kabili pa bushiku bwalenga mutanda (6) mukaletuula ing’ombe ishilume cinekonsekonse (8) ishisuma, basukusuku babili abasuma, utwana twa mpaanga utulume ikumi na tune (14), utusuma;+ 30 kabili umutuulo+ wa ngano ne mituulo+ ya mwangashi iya kutuula pa ng’ombe isho ishilume, na pali basukusuku na pa twana twa mpaanga utulume, mukaletuula ukulingana ne mpendwa ya fiko kabili ukulingana ne fyo fituulwa lyonse;+ 31 mukaletuula ne mbushi imo ku kuba umutuulo+ wa pa lubembu, ukulunda pa mutuulo wa koca uutuulwa lyonse, no mutuulo wa uko uwa buunga pamo no mutuulo wa uko uwa mwangashi.+

32 “‘Kabili pa bushiku bwalenga cinelubali (7) mukaletuula ing’ombe ishilume cinelubali (7) ishisuma, basukusuku babili abasuma, utwana twa mpaanga utulume ikumi na tune (14) utwa mwaka umo, utusuma;+ 33 kabili umutuulo+ wa ngano ne mituulo+ ya mwangashi iya kutuula pa ng’ombe isho ishilume, na pali basukusuku na pa twana twa mpaanga utulume, mukaletuula ukulingana ne mpendwa ya fiko kabili ukulingana ne fyo fituulwa lyonse;+ 34 mukaletuula ne mbushi imo ku kuba umutuulo+ wa pa lubembu, ukulunda pa mutuulo wa koca uutuulwa lyonse, no mutuulo wa uko uwa buunga pamo no mutuulo wa uko uwa mwangashi.+

35 “‘Kabili pa bushiku bwalenga cinekonsekonse (8) mukalelongana ukulongana kwacindamisha.+ Mwikabombapo umulimo uuli onse uwakosa.+ 36 Kabili mukalete kuli Yehova ing’ombe imo iilume iisuma, sukusuku umo umusuma, utwana twa mpaanga utulume cinelubali (7) utwa mwaka umo utusuma ku kuba umutuulo wa koca, umutuulo wa pa mulilo uwa kuleta akacena kasuma kuli ena;+ 37 kabili umutuulo+ wa ngano ne mituulo+ ya mwangashi iya kutuula pa ng’ombe iilume, na pali sukusuku na pa twana twa mpaanga utulume, mukaletuula ukulingana ne mpendwa ya fiko kabili ukulingana ne fyo fituulwa lyonse;+ 38 mukaletuula ne mbushi imo ku kuba umutuulo+ wa pa lubembu, ukulunda pa mutuulo wa koca uutuulwa lyonse no mutuulo wa uko uwa ngano pamo no mutuulo+ wa uko uwa mwangashi.

39 “‘Ifi e fyo mukalatuula kuli Yehova pa nshita ya mitebeto yenu,+ ukulunda pa mituulo+ yenu iya milapo ne mituulo+ yenu iya kuitemenwa, e kutila imituulo+ ya koca ne mituulo+ ya ngano ne mituulo+ ya mwangashi na malambo ya mutende.’”+ 40 Awe Mose alandile ku bana ba kwa Israele ukulingana na fyonse ifyo Yehova amwebele.+

30 E lyo Mose alandile ku bakalamba+ ba mikowa ya bana ba kwa Israele, ati: “Aya e mashiwi Yehova asosele: 2 Umuntu nga alapa umulapo+ kuli Yehova nangu nga alapa umulapo+ wa kuipusula,+ afwile ukucita ifyo alapile.+ Akacite ukulingana na fyonse ifyo asosele.+

3 “Kabili umwanakashi nga alapa umulapo kuli Yehova+ nelyo nga alapa umulapo wa kuipusula ilyo ali umwaice mu ng’anda ya kwa wishi, 4 kabili wishi aumfwa umulapo wakwe no mulapo wa kuipusula lelo tamwebele nangu cimo, imilapo yakwe yonse akaifishepo, no mulapo wakwe onse uwa kuipusula+ akaufishepo. 5 Lelo wishi nga amukaanya pa bushiku bwine aumfwa imilapo yakwe yonse kumo ne milapo ya kuipusula, ninshi iyo milapo takaifishepo, lelo Yehova akamweleela, pantu wishi alimukeenye.+

6 “Lelo nga alikwata umulume, kabili alapa umulapo+ nangu nga ca kutila alaya ukwabula ukutontonkanyapo bwino, 7 no mulume wakwe aumfwa uyo mulapo lelo tamwebele nangu cimo pa bushiku aumfwa umulapo, imilapo yakwe kumo ne milapo ya kuipusula iyo alapile akaifishapo.+ 8 Lelo nga ca kutila umulume wakwe pa bushiku aumfwa iyo milapo amukaanya,+ ninshi afulunganya umulapo wakwe nangu ubulayo ubo alaile ukwabula ukutontonkanyapo bwino, na Yehova akamweleela.+

9 “Nga ni mukamfwilwa atemwa umwanakashi uwalekwa uwalapa umulapo, fyonse ifyo alapile akafifishepo.

10 “Lelo nga ni mu ng’anda ya mulume wakwe e mo alapila umulapo atemwa alapa umulapo wa kuipusula,+ 11 kabili umulume wakwe naumfwa uyo mulapo no kukanamweba nangu cimo, ninshi tamukeenye; ne milapo yakwe yonse atemwa umulapo wa kuipusula akaifishepo. 12 Lelo nga ca kutila umulume wakwe nafulunganya iyo milapo yonse pa bushiku aumfwa fyonse ifyo alapile atemwa aumfwa umulapo wa kuipusula, iyo milapo takaifishepo.+ Ninshi umulume wakwe nafulunganya iyi milapo, na Yehova akamweleela.+ 13 Umulume wakwe e u kakosha nangu ukufulunganya umulapo onse atemwa umulapo onse uwa kuipusula uwa kucusha umweo+ wakwe. 14 Lelo nga ca kutila inshiku shileya fye ukwabula ukuti umulume wakwe amwebe nangu cimo, ninshi nakosha imilapo yakwe yonse atemwa imilapo ya kuipusula iyo alapa.+ Ninshi nakosha iyi milapo pantu tamwebele nangu cimo pa bushiku aumfwile iyo milapo. 15 Kabili nga afulunganya iyo milapo yonse pa numa ya kuyumfwa, na o ninshi akaba uwa mulandu pa cilubo ca mukashi.+

16 “Ifi e fipope ifyo Yehova aebele Mose ifya pa kati ka mulume no mukashi,+ ifya pa kati ka kwa wishi no mwana mwanakashi wakwe mu nshita ya bukashana bwakwe ilyo ali mu ng’anda ya kwa wishi.”+

31 Yehova nomba aebele Mose ati: 2 “Landwila+ abena Israele pa bena Midiani.+ Pa numa ukafwa nge fyafwa abantu bobe.”+

3 E ico Mose aebele abantu ati: “Pangasheni abantu aba kuya ku bulwi, pa kuti bayelwa na bena Midiani no kuleta icilandushi ca kwa Yehova pa bena Midiani.+ 4 Mutume abantu ikana limo (1,000) ku bulwi ukufuma mu mukowa umo umo mu mikowa yonse iya kwa Israele.” 5 Awe mu bena Israele abali amakana na makana+ basalilemo abantu amakana ikumi na yabili (12,000), abantu ikana limo (1,000) ukufuma mu mukowa umo umo, abaipangeshe ukuya ku bulwi.+

6 Awe Mose abatumine ku bulwi, atumine abantu ikana limo (1,000) ukufuma mu mukowa umo umo, abatumine pamo na Finehasi+ mwana Eleasari shimapepo ukuya ku bulwi, ninshi ne fipe fya mushilo na mapenga+ ya kulisha pa kwita abantu fili mu kuboko kwakwe. 7 Na bo bailelwisha abena Midiani, nga filya fine fye Yehova aebele Mose, kabili baipeye umwaume onse.+ 8 Kabili ishamfumu sha Midiani bashipaile pamo na bambi, e kutila, Ebi, Rekemu, Suri, Huri na Reba, ishamfumu shisano isha Midiani;+ kabili baipeye na Balaamu+ mwana Beore ku lupanga. 9 Lelo abana ba kwa Israele basendele bunkole abanakashi ba ku Midiani kumo na bana babo;+ bapokele ne fitekwa fyabo fyonse ne mikuni yabo yonse na fyonse ifyo balesangilamo ubwikalo. 10 Baocele ne misumba yabo yonse iyo baleikalamo ne nkambi shabo shonse isha malinga.+ 11 Basendele na bantu bonse ne fitekwa fyonse ne fyuma ifyo bapokele.+ 12 E ico baletele kuli Mose na kuli Eleasari shimapepo na ku lukuta lwa bana ba kwa Israele, bankole ne fyuma ne fyo bapokele, bafitwele ku nkambi, mu ciswebebe ca Moabu,+ icabela mupepi na Yordani ku Yeriko.

13 Kabili Mose na Eleasari shimapepo ne ntungulushi sha lukuta shonse baile ku kubakumanya ku nse ya nkambi. 14 Kabili Mose afuliilwe abaume ba bulwi,+ bacilolo ba pa bantu amakana na bacilolo ba pa bantu imyanda abalebweluluka ukufuma ku bulwi. 15 E ico Mose atile kuli bena: “Bushe abanakashi bonse mwabaleka ukuba no mweo?+ 16 Moneni! Aba bene, e bo Balaamu aebele ukubeleleka abana baume ba kwa Israele ukubembukila+ Yehova pa mulandu wa kwa Peore,+ icalengele no kuti icikuko ciise pa lukuta lwa kwa Yehova.+ 17 E ico nomba ipayeni abana bonse abaume, ipayeni no mwanakashi onse uwalaalapo no mwaume.+ 18 Na bakashana bonse abashabala abalaalapo no mwaume muleke babe no mweo.+ 19 Lelo imwe, ikaleni ku nse ya nkambi inshiku cinelubali (7). Onse uwaipeye umuntu+ na onse uwakumishe ku waipaiwe,+ mukaisangulule+ pa bushiku bwalenga shitatu na pa bwalenga cinelubali (7), imwe na bankole benu. 20 Mukaisangulwile ifya kufwala fyonse ne fipe fyonse ifya mpapa na conse icapangwa ku masako ya mbushi ne fipe fyonse ifya cimuti ukuti mwikaba na lubembu.”+

21 E lyo Eleasari shimapepo atile ku baume ba bulwi abaile ku kulwa: “Ili e funde ilyo Yehova aebele Mose, 22 ‘Ni golde fye na silfere, no mukuba, ne cela, na kapotwe no mutofwe, 23 fyonse ifilopololwa mu mulilo,+ e fyo mukapishe mu mulilo, e lyo fikasanguluka. Kabili ni ku menshi ya kusangulwila epela e ko fikasangulwilwe.+ Na fyonse ifishilopolwelwa mu mulilo mukafipishe mu menshi.+ 24 Kabili mukacape ifya kufwala fyenu pa bushiku bwalenga cinelubali (7) no kuba abasanguluka, e lyo mwingengila mu nkambi.’”+

25 E lyo Yehova asosele kuli Mose ati: 26 “Penda fyonse ifyo bapokele, na bankole kumo ne fitekwa, iwe na Eleasari shimapepo na bakalamba ba mikowa aba lukuta. 27 Kabili wakanye pabili ifyo bapokele no kufipeela ku baile ku bulwi abalwileko inkondo na ku lukuta lonse ulwashala.+ 28 Kabili upoke umusonko+ ukufuma ku baume abaile ku bulwi abalwileko inkondo uwa kupeela kuli Yehova, pa bantu imyanda isano (500) ubuulepo umuntu umo, na pa ng’ombe imyanda isano ubuulepo imo na pa mpunda imyanda isano ubuulepo imo e lyo na pa mpaanga imyanda isano ubuulepo imo. 29 Pali hafu wabo e po mubuule umusonko no kuupeela kuli Eleasari shimapepo pa kuti ube umusangulo wa kwa Yehova.+ 30 Kabili pali hafu wa bana ba kwa Israele ubuulepo umo pa bantu amakumi yasano (50), ing’ombe imo pa ng’ombe amakumi yasano, impunda imo pa mpunda amakumi yasano ne mpaanga imo pa mpaanga amakumi yasano, no musango onse uwa fitekwa, ufipeele ku bena Lebi,+ ababombela pa cikuulwa ca mushilo ica kwa Yehova.”+

31 Awe Mose na Eleasari shimapepo bacitile filya fine fye Yehova aebele Mose. 32 Kabili ifyo abantu abaile ku bulwi bapokele, ni mpaanga amakana imyanda mutanda na makumi cinelubali na yasano (675,000), 33 ne ng’ombe amakana amakumi cinelubali na yabili (72,000), 34 ne mpunda amakana amakumi mutanda ne kana limo (61,000). 35 E lyo abanakashi+ abashatalile abalaalapo no mwaume,+ bonse bali amakana amakumi yatatu na yabili (32,000). 36 na hafu wa mpaanga ishapeelwe ku baile ku bulwi ni mpaanga amakana imyanda itatu na makana amakumi yatatu na cinelubali ne myanda isano (337,500). 37 No musonko+ uwapeelwe kuli Yehova pa mpaanga ishi wali imikuni imyanda mutanda na makumi cinelubali na isano (675). 38 Ne ng’ombe ishalipo shali amakana amakumi yatatu na mutanda (36,000) no musonko uwapeelwe kuli Yehova pali ishi wali ing’ombe amakumi cinelubali na shibili (72). 39 Ne mpunda shali amakana amakumi yatatu ne myanda isano (30,500) no musonko uwapeelwe kuli Yehova pali ishi wali impunda amakumi mutanda na imo (61). 40 Na bantu bali amakana ikumi na mutanda (16,000), no musonko uwapeelwe kuli Yehova pali aba wali abantu amakumi yatatu na babili (32). 41 E lyo Mose apeele umusonko kuli Eleasari shimapepo+ ku kuba umusonko wa kuli Yehova, nga filya fine fye Yehova aebele Mose.+

42 Kabili hafu wa fipe ifyali fya bena Israele, ifyo Mose ayakenye ukufuma pali filya ifya baume abalwile ubulwi aali ifi: 43 Hafu wa mikuni uo ulukuta lwapeelwe aali amakana imyanda itatu na makana amakumi yatatu na cinelubali ne myanda isano (337,500), 44 ne ng’ombe shali amakana amakumi yatatu na makana mutanda (36,000), 45 ne mpunda shali amakana amakumi yatatu ne myanda isano (30,500), 46 na bantu bali amakana ikumi na mutanda (16,000). 47 E lyo Mose abuulilepo cimo pa makumi yasano (50) aya bantu na ya fitekwa, no kufipeela ku bena Lebi,+ abalebombela+ pa cikuulwa ca mushilo ica kwa Yehova, nga filya fine fye Yehova aebele Mose.

48 Na baume abasalwa abali pa makana ya baume ba bulwi,+ bacilolo ba pa bantu amakana na bacilolo ba bantu imyanda+ abalebweluluka bapaleme kuli Mose, 49 kabili batile kuli Mose: “Ababomfi benu nabapenda abaume ba bulwi abali mu minwe yesu kabili tapabulile umuntu nangu umo pali ifwe.+ 50 Kanshi natupeele kuli Yehova umutuulo+ wa conse ico cila muntu asangile, ifipe fya golde, amakoosa ya ku molu, amakoosa, inindaminwe+ sha kufwatikilako, amasikiyo, no twa kuiyemfeshako+ utwa banakashi, pa kuti tufutile imyeo yesu kuli Yehova.”

51 Awe Mose na Eleasari shimapepo bapokele golde kuli bena,+ no tubeekobeeko tonse. 52 Kabili golde yonse iyo basangwilile Yehova yali amashekele amakana ikumi na mutanda ne myanda cinelubali na makumi yasano (16,750), ukufuma kuli bacilolo ba pa bantu amakana na kuli bacilolo ba pa bantu imyanda. 53 Pa fipe fyonse ifyo abaume ba bulwi bapokolwele, cila muntu alibuulilepo.+ 54 E ico Mose na Eleasari shimapepo bapokele golde ukufuma kuli bacilolo ba pa bantu amakana na ku ba pa bantu imyanda no kuleta mu cikuulwa ca kukumaninako pa ntanshi ya kwa Yehova ku kuba ica kwibukisha+ ku bana ba kwa Israele.

32 Nomba abana ba kwa Rubene+ na bana ba kwa Gadi+ bali ne fitekwa ifingi, ifingi nga nshi. Awe bamwene icalo ca Yasere+ ne calo ca Gileadi, kabili, moneni! yali ni mpanga iisuma ku fitekwa. 2 E ico abana ba kwa Gadi na bana ba kwa Rubene baishile no kweba Mose na Eleasari shimapepo ne ntungulushi sha lukuta abati: 3 “Atarote,+ Dibone,+ Yasere, Nimra,+ Heshebone,+ Eleale,+ Sebamu, Nebo+ na Beone,+ 4 icalo ico Yehova acimfishe+ pa menso ya lukuta lwa kwa Israele, calo icisuma ku fitekwa, kabili moneni ababomfi benu bali ne fitekwa.”+ 5 Kabili bakonkenyepo ukusosa abati: “Nga cawama kuli imwe, lekeni ici calo cipeelwe ku babomfi benu ku kube mpanga yabo. Mwileka twabuke Yordani.”+

6 E lyo Mose atile ku bana ba kwa Gadi na bana ba kwa Rubene: “Bushe bamunyinenwe bakaye ku bulwi e lyo imwe mukashale namwikala pano?+ 7 Kabili cinshi ico muletompwela imitima ya bana ba kwa Israele ukuti beyabukila ku calo ico Yehova akabapeela? 8 E fyo bashinwe bacitile+ ilyo nabatumine ukufuma ku Kadeshe-barnea+ ukuyalengula ico calo. 9 Ilyo baile ku muulu wa mumana wa Eshekole+ no kuyalengula icalo, e lyo batompwele imitima ya bana ba kwa Israele, ukuti beingila mu calo ico Yehova aali no kubapeela.+ 10 Kabili Yehova alikalipe ubo bushiku ica kuti, alapile,+ ati, 11 ‘Abaume abafumine mu Egupti ukutendekela pa wa myaka amakumi yabili (20) no kucilapo+ tabakamone impanga iyo nalapile kuli Abrahamu, kuli Isaki na kuli Yakobo,+ pantu tabankonka no mutima onse, 12 kano fye Kalebu+ mwana Yefune umwina Kenisi na Yoshua+ mwana Nuni, pantu bena bakonkele Yehova no mutima onse.’ 13 E ico Yehova akalipile abena Israele kabili abalengele ukululumba mu matololo pa myaka amakumi yane (40),+ mpaka inkulo yonse iya bantu abalecita ifibi mu menso ya kwa Yehova yaloba.+ 14 Moneni na imwe mwakonka imicitile ya bashinwe mwe bana ba bantu ababembu pa kuti mulundeko ku bukali bwa kwa Yehova+ ubupya ngo mulilo ubuli pali Israele. 15 Nga mwaleka ukumukonka,+ na o akabwekeshapo ukulenga aba bantu ukwikala mu matololo+ inshiku ishingi, ninshi mwaonaula aba bantu bonse.”+

16 E lyo pa numa, bailemukumanya no kutila: “Lekeni tukuulile ifitekwa fyesu pano amacinka ya mabwe e lyo ne misumba ya bana besu. 17 Nomba ifwe tukaya natuipangasha abaiteyanya ukulwa+ ukutangilila abana ba kwa Israele mpaka tukabafishe ku mpanga yabo, lelo abana besu bakekale mu misumba ya malinga ukutali na bekashi ba mu calo cilya. 18 Tatwakabwelele ku mayanda yesu mpaka abana ba kwa Israele baikwatila impanga, cila muntu impanga yakwe.+ 19 Pantu ifwe tatwakapoke impanga pamo na bo kulya bushilya bwa Yordani no kucilapo, pantu impanga yesu ili kuno lubali lwa Yordani ku kabanga.”+

20 E lyo Mose atile kuli bena: “Nga mukacite ci cintu, nga mukaipangasha pa ntanshi ya kwa Yehova ukuya ku bulwi,+ 21 kabili nga onse uwaipangasha muli imwe ayabuka Yordani pa ntanshi ya kwa Yehova, mpaka atamfya abalwani bakwe pa ntanshi yakwe,+ 22 ne calo ico cacimfiwa pa ntanshi ya kwa Yehova,+ e lyo pa numa mwabweluluka,+ ninshi na imwe tamwakabe aba mulandu kuli Yehova na kuli Israele; ne calo ici cikaba icenu pa ntanshi ya kwa Yehova.+ 23 Lelo nga tamwakacite fi, ninshi mwabembukila Yehova.+ Kabili ishibeni ukuti ulubembu lwenu lukamusanga.+ 24 Kuulileni abana benu imisumba e lyo mukuulile ne fitekwa fyenu amacinka ya mabwe, kabili ico mwasosa e co mukacite.”+

25 E lyo abana ba kwa Gadi na bana ba kwa Rubene batile kuli Mose: “Fwe babomfi benu tukacita ifyo fine fye mwatweba, mwe shikulu.+ 26 Abanono besu, abakashi besu, ifitekwa fyesu ne nama shesu shonse fikashala kulya mu misumba ya mu Gileadi,+ 27 lelo fwe babomfi benu tukaabuka, tukaba abaipangasha ukulwa,+ pa ntanshi ya kwa Yehova, ukulingana fye ne fyo mwasosa, mwe shikulu.”

28 Awe Mose na o apeele icipope pali aba bantu kuli Eleasari shimapepo na kuli Yoshua mwana Nuni na ku ntungulushi sha mikowa ya bana ba kwa Israele. 29 E lyo Mose atile kuli bena: “Nga ca kuti abana ba kwa Gadi na bana ba kwa Rubene bayabuka Yordani pamo na imwe, umuntu onse uwaipangasha ukulwa,+ pa ntanshi ya kwa Yehova, ne calo cacimfiwa pa ntanshi yenu, e lyo mukabapeele icalo ca Gileadi ku kuba icabo.+ 30 Lelo nga tabaabwike pamo na imwe abaipangasha, mukabalenge ukwikala mu kati kenu mu calo ca Kanaani.”+

31 E lyo abana ba kwa Gadi na bana ba kwa Rubene bayaswike, abati: “Ifyo Yehova asosele kuli ifwe fwe babomfi benu e fyo tukacita.+ 32 Ifwe tukaabukila ku calo ca Kanaani+ abaipangasha pa ntanshi ya kwa Yehova, ne mpanga yesu iya bupyani ikaba kuno lubali lwa Yordani.”+ 33 E lyo Mose apeele kuli bena, e kutila, ku bana ba kwa Gadi+ na ku bana ba kwa Rubene+ na kuli hafu wa mukowa wa kwa Manase+ mwana Yosefe, ubufumu bwa kwa Sihone+ imfumu ya bena Amore no bufumu bwa kwa Oge+ imfumu ya ku Bashani, e kutila impanga ya mu misumba iyi ne mipaka e lyo ne misumba iyashingulwike icalo ici.

34 Kabili abana ba kwa Gadi bakuulile Dibone+ na Atarote+ na Aroere,+ 35 na Aterote-shofani na Yasere+ na Yogebea,+ 36 na Bete-nimra+ na Bete-harani,+ imisumba iyali na malinga,+ na macinka ya mikuni aya mabwe.+ 37 Na bana ba kwa Rubene bakuulile Heshebone+ na Eleale+ na Kiriataimu,+ 38 na Nebo+ na Baali-meone+—kabili bayalwile amashina ya iyi misumba—na Sibma; kabili bainike imisumba iyo bakuulile amashina yabo.

39 Kabili abana ba kwa Makiri+ mwana Manase baile no kuyapoka Gileadi no kutamfyamo abena Amore abaleikalamo. 40 E fyo Mose apeele Gileadi kuli Makiri mwana Manase, na o aikele mulya.+ 41 Na Yairi mwana Manase aile no kuyapoka imishi yabo iya matenti, no kuinika ati Haboteyairi.+ 42 Noba na o aile no kuyapoka Kenati+ ne mishi ya uko; kabili awinike ishina lyakwe umwine ilya kuti Noba.

33 Ifi e fyo abana ba kwa Israele abafumine mu calo ca Egupti+ bale-enda mu mabumba+ yabo ilyo baletungululwa na Mose na Aarone.+ 2 Kabili Mose alelemba amashina ya ncende bafumapo ukulingana ne fyo bale-enda ilyo Yehova abeba ukucita ifyo; kabili ifi e fyo bale-enda ilyo bafuma pa ncende imo ukuya pa ncende imbi:+ 3 Awe bafumine pa Raamsese+ mu mweshi wa kubalilapo,+ pa bushiku bwalenga ikumi na shisano (15) ubwa mu mweshi wa kubalilapo. Pa bushiku fye bwakonkele pa ca kucilila,+ abana ba kwa Israele bafumine nabemya na maboko kabili abena Egupti bonse balemonako.+ 4 Ilyo abena Egupti baleshiika abo Yehova aipeye mu kati kabo, e kutila, amabeli yonse;+ Yehova aletele ubupingushi na pali tulesa twabo.+

5 Awe abana ba kwa Israele bafumine pa Raamsese+ no kuyapanga inkambi ku Sukote.+ 6 Kabili bafumine ku Sukote no kuyapanga inkambi ku Etamu,+ umusumba waba ku mpela ya matololo. 7 Ukufuma ku Etamu balibwelulwike no kulungama ku Pi-hahirote,+ umusumba uwalungatana na Baali-sefone;+ no kuyapanga inkambi pa ntanshi ya Migidole.+ 8 Pa numa, bafumine ku Pi-hahirote no kupita mu kati ka bemba+ ukuya ku matololo+ kabili baendele ulwendo lwa nshiku shitatu mu matololo ya Etamu+ no kuyapanga inkambi ku Mara.+

9 Kabili bafumine ku Mara no kuyafika ku Elimu.+ Nomba mu Elimu mwali utumfukumfuku twa menshi ikumi na tubili (12) ne miti ya tuncindu amakumi cinelubali (70). E ico bapangile inkambi kulya. 10 Kabili bafumine ku Elimu no kuyapanga inkambi mupepi na Bemba Wakashika. 11 Pa numa, bafumine kuli Bemba Wakashika no kuyapanga inkambi mu matololo ya Sini.+ 12 Kabili bafumine mu matololo ya Sini no kuyapanga inkambi ku Dofka. 13 Kabili bafumine ku Dofka no kuyapanga inkambi ku Alushi. 14 Ilyo bafumine ku Alushi bailepanga inkambi ku Refidimu.+ Lelo kulya takwali amenshi ya kuti abantu balenwa. 15 Pa numa, bafumine ku Refidimu no kuyapanga inkambi mu matololo ya Sinai.+

16 Awe bafumine mu matololo ya Sinai no kuyapanga inkambi ku Kibrote-hataaba.+ 17 Kabili bafumine ku Kibrote-hataaba no kuyapanga inkambi ku Haserote.+ 18 Pa numa, bafumine ku Haserote no kuyapanga inkambi ku Ritma. 19 Kabili bafumine ku Ritma no kuyapanga inkambi ku Rimone-perese. 20 Ilyo bafumine ku Rimone-perese bailepanga inkambi ku Libna. 21 Pa numa, bafumine ku Libna no kuyapanga inkambi ku Risa. 22 Kabili bafumine ku Risa no kuyapanga inkambi ku Kehelata. 23 Kabili bafumine ku Kehelata no kuyapanga inkambi ku lupili lwa Shefere.

24 Pa numa, bafumine ku lupili lwa Shefere no kuyapanga inkambi+ ku Harada. 25 Ilyo bafumine ku Harada bailepanga inkambi ku Makelota. 26 Kabili bafumine+ ku Makelota no kuyapanga inkambi ku Tahati. 27 Pa numa, bafumine ku Tahati bailepanga inkambi ku Tera. 28 Ilyo bafumine ku Tera bailepanga inkambi ku Mitka. 29 Pa numa, bafumine ku Mitka no kuyapanga inkambi ku Hashimona. 30 Kabili bafumine ku Hashimona no kuyapanga inkambi ku Moserote. 31 Ilyo bafumine ku Moserote bailepanga inkambi ku Bene-yaakani.+ 32 Pa numa, bafumine ku Bene-yaakani no kuyapanga inkambi ku Hore-hagidigadi. 33 Kabili bafumine ku Hore-hagidigadi no kuyapanga inkambi ku Yotebata.+ 34 Pa numa, bafumine ku Yotebata no kuyapanga inkambi ku Abrona. 35 Ilyo bafumine ku Abrona bailepanga inkambi ku Esione-gebere.+ 36 Pa numa, bafumine ku Esione-gebere no kuyapanga inkambi mu matololo ya Sini,+ e kutila, ku Kadeshe.

37 Pa numa, bafumine ku Kadeshe no kuyapanga inkambi ku lupili lwa Hore,+ ku mupaka wa calo ca Edomu. 38 Awe Aarone shimapepo aninine ulupili lwa Hore ilyo Yehova amwebele ukucita ifyo kabili afwilile palya mu mwaka walenga amakumi yane (40) ukutula apo abena Israele bafumiine mu calo ca Egupti, mu mweshi walenga isano, pa bushiku bwa kubalilapo mu mweshi uyu.+ 39 Kabili Aarone aali ne myaka umwanda umo na makumi yabili na itatu (123) ilyo afwile pa lupili lwa Hore.

40 Nomba imfumu ya ku Aradi,+ ku Kanaani, yaumfwile ukuti abana ba kwa Israele nabesa, pantu yaleikala mu Negebu,+ mu calo ca Kanaani.

41 Basukile bafuma ku lupili lwa Hore+ no kuyapanga inkambi ku Salmona. 42 Pa numa, bafumine ku Salmona no kuyapanga inkambi ku Punone. 43 Kabili bafumine ku Punone no kuyapanga inkambi ku Oboti.+ 44 Ilyo bafumine ku Oboti bailepanga inkambi ku Iye-abarimu ku mupaka wa Moabu.+ 45 Pa numa, bafumine ku Iyimu* no kuyapanga inkambi ku Dibone-gadi.+ 46 Pa numa, bafumine ku Dibone-gadi no kuyapanga inkambi ku Almone-diblataimu. 47 Kabili bafumine ku Almone-diblataimu+ no kuyapanga inkambi ku mpili sha Abarimu+ ishalungatana na Nebo.+ 48 Na pa kulekelesha bafumine ku mpili sha Abarimu no kuyapanga inkambi mu ciswebebe ca Moabu+ mupepi na Yordani ku Yeriko. 49 Kabili baikele mu nkambi mupepi na Yordani ukutula ku Bete-yeshimote+ ukuyafika ku Abele-shitimu+ mu ciswebebe ca Moabu.

50 E lyo Yehova alandile kuli Mose mu ciswebebe ca Moabu mupepi na Yordani ku Yeriko,+ ati: 51 “Sosa ku bana ba kwa Israele, utile kuli bena, ‘Mwalayabuka Yordani no kwingila mu calo ca Kanaani.+ 52 Mukatamfye abekashi ba mu calo cilya kabili mukonaule ifyabaswa fyabo fyonse ifya mabwe,+ mukonaule ne filubi fyabo fyonse ifyaengululwa ku cela,+ e lyo mukonaule ne fifulo fyabo ifya kupepelapo fyonse.+ 53 Na imwe mukapoke icalo cilya no kwikalamo, pantu nkapeela icalo ici kuli imwe ukuti cikabe icenu.+ 54 Kabili mukaakane ici calo umo mubelele ukulingana ne ndupwa+ shenu kabili ukulingana ne fyo mukapendula.+ Ulupwa ulukalamba e lo mukapeele impanga iikalamba, lelo ulunono mukalupeele impanga iinono.+ Uko icipendwilo cikaponena, e kukaba impanga ya ulo lupwa.+ Mukaakane impanga ukulingana ne mikowa ya bashinwe.+

55 “‘Lelo, nga tamwakatamfye abekashi ba mu calo ico,+ ninshi abo mukashapo bakaba nge fya kulasaula mu menso yenu kabili nge myunga mu mbafu shenu, kabili cine cine bakamucushisha pa calo ico mukekalamo.+ 56 Ninshi ico napangile ukucita kuli bena e co nkacita kuli imwe.’”+

34 Kabili Yehova akonkenyepo ukusosa kuli Mose ati: 2 “Eba abana ba kwa Israele, utile kuli bena, ‘Muleingila mu calo ca Kanaani.+ Ici e calo cenu ico mulepyana,+ icalo ca Kanaani conse.+

3 “‘Umupaka wa ku kapinda ka ku kulyo ukatendekele mu matololo ya Sini lubali ku Edomu,+ kabili umupaka wa ku kapinda ka ku kulyo ukatendekele ku mpela ya Bemba wa Mucele+ ku kabanga. 4 Kabili umupaka ukalole kumbi ukufuma ku kapinda ka ku kulyo aka pa Akrabimu+ apa kuninina no kuyafika ku Sini, kabili ukayepwila ku kapinda ka ku kulyo aka Kadeshe-barnea;+ e lyo ukalole ku Hasari-adari+ no kuyafika ku Asmone. 5 Nomba umupaka ukalole kumbi ukufuma ku Asmone ukulungama ku mumana wa Egupti,+ kabili ukayefika na kuli Bemba.*+

6 “‘Kumfwa umupaka wa ku masamba,+ ukaba ni Bemba Mukalamba no lulamba. Uyu e ukaba umupaka wa ku masamba.

7 “‘Nomba uyu e ukaba umupaka wa ku kapinda ka ku kuso: Mukapakule umupaka ukutula kuli Bemba Mukalamba ukuyafika ku Lupili lwa Hore.+ 8 Ukutula ku lupili lwa Hore mukapakule umupaka ukuyafika apatendekela Hamati,+ kabili umupaka ukayepwila ku Sedadi.+ 9 Kabili umupaka ukalole ku Sifrone, no kuyapwila ku Hasari-enani.+ Uyu e ukaba umupaka wa ku kapinda ka ku kuso.

10 “‘Kabili mukaipakwile umupaka wa ku kabanga ukutula ku Hasari-enani ukuyafika ku Shefamu. 11 Kabili umupaka ukatentemuke ukutula ku Shefamu ukufika ku Ribla ku kabanga ka Aini, e lyo uyu mupaka ukatentemuke no kuyashinta mu matelo yabela ku kabanga ka bemba wa Kinerete.*+ 12 Kabili umupaka ukatentemukile ku Yordani, no kuyapwila kuli Bemba wa Mucele.+ Ici e cikaba icalo+ cenu ukulingana ne mipaka ya ciko yonse.’”

13 Awe Mose aebele abana ba kwa Israele ati: “Ici e calo ico mukaakanina mu kupendula+ ukuti cikabe icenu, ukulingana ne cipope ca kwa Yehova ica kupeela icalo ku mikowa pabula (9) na kuli hafu wa mukowa wa kwa Manase.+ 14 Pantu umukowa wa bana ba kwa Rubene ukulingana na mayanda ya bashibo no mukowa wa bana ba bena Gadi ukulingana na mayanda ya bashibo, na hafu wa mukowa wa kwa Manase balipokelela impanga yabo kale.+ 15 Iyo mikowa ibili na hafu balipokelela kale impanga yabo ukutula ku Yordani mupepi na Yeriko ukulola ku kabanga ukutulila akasuba.”+

16 Kabili Yehova akonkenyepo ukusosa kuli Mose ati: 17 “Amashina ya bantu abakaakanya icalo kuli imwe ukuti cikabe icenu ni aya: Eleasari+ shimapepo na Yoshua mwana Nuni.+ 18 Kabili muli cila mukowa mukasalemo intungulushi ya kwakanya icalo.+ 19 Na ya e mashina ya abo bantu: Mu mukowa wa kwa Yuda,+ ni Kalebu mwana Yefune;+ 20 na mu mukowa wa bana ba kwa Simeone,+ ni Shemuele mwana Amihudi; 21 mu mukowa wa kwa Benjamini,+ ni Elidadi mwana Kislone; 22 na mu mukowa wa bana ba kwa Dani,+ mukasale Buki intungulushi mwana Yogli; 23 pa bana ba kwa Yosefe,+ aba mu mukowa wa bana ba kwa Manase,+ mukasale Haniele intungulushi umwana wa kwa Efode; 24 kabili mu mukowa wa bana ba kwa Efraimu,+ mukasale Kemuele intungulushi mwana Shifitani; 25 na mu mukowa wa bana ba kwa Sebuluni,+ mukasale Elsafani intungulushi mwana Parnaki; 26 e lyo mu mukowa wa bana ba kwa Isakari,+ mukasale Paltiele intungulushi mwana Asani; 27 na mu mukowa wa bana ba kwa Ashere,+ mukasale Ahiudi intungulushi mwana Shelomi; 28 kabili mu mukowa wa bana ba kwa Naftali,+ mukasale Pedahele intungulushi mwana Amihudi.” 29 Aba e bo Yehova aebele ukuti baakanye abana ba kwa Israele impanga mu calo ca Kanaani.+

35 Kabili Yehova akonkenyepo ukusosa kuli Mose mu ciswebebe ca Moabu mupepi na Yordani+ ku Yeriko ati: 2 “Eba abana ba kwa Israele ukuti bakapeeleko abena Lebi imisumba+ ya kwikalamo, kabili bakapeele abena Lebi impanga ya mulemfwe iya mu misumba yonse iyabashinguluka.+ 3 Kabili iyo misumba ya kuti bakaleikalamo, lelo impanga ya mulemfwe ikaba ya fitekwa fyabo ne fipe fyabo ne nama shabo shonse isha mu mpanga. 4 Kabili impanga ya mulemfwe iili mu misumba yonse, iyo mukapeela abena Lebi, ikatendekele pe linga lya musumba ukuya na ku nse imikono ikana limo (1,000) ukushinguluka. 5 Kabili mukapime imikono amakana yabili (2,000) ukuya ku nse ya musumba ku kabanga ne mikono amakana yabili ukuya ku kapinda ka ku kulyo ne mikono amakana yabili ukuya ku masamba ne mikono amakana yabili ukuya ku kapinda ka ku kuso, ukusha umusumba pa kati. Iyi e ikaba impanga yabo iya mulemfwe muli iyo misumba.

6 “Iyi e misumba iyo mukapeela abena Lebi: imisumba mutanda (6) iya kufulumukilako,+ e yo mukapeela iya kuti uwaipaya umuntu afulumukilako,+ kabili ukulunda pali iyi mukapeele imisumba amakumi yane na ibili (42). 7 Imisumba yonse pamo iyo mukapeela abena Lebi ikabe amakumi yane na cinekonsekonse (48), kumo ne mpanga ya mulemfwe iilimo.+ 8 Imisumba iyo mukapeela ikafume pa mpanga ya bana ba kwa Israele.+ Ku bakwata iikulu mukapokeko iikulu, na ku bakwata iinono mukapokeko iinono.+ Ukulingana ne mpanga iyo cila muntu akakwata, e fyo umuntu akapeelepo imisumba yakwe imo ku bena Lebi.”

9 Kabili Yehova akonkenyepo ukusosa kuli Mose ati: 10 “Sosa ku bana ba kwa Israele, utile kuli bena, ‘Muleabuka Yordani ukuya ku calo ca Kanaani.+ 11 E ico musale imisumba pa ncende iingamuwamina. Na yo ikabe imisumba yenu iya kufulumukilako, kabili uwaipaya umuntu mu kukanaishiba akafulumukileko.+ 12 Kabili imisumba iyo ikaba iya kufulumukilako ku kucingililwa ku wa kulandula umulopa,+ pa kuti uwaipaya umuntu eipaiwa mpaka ayamonekela ku lukuta ku kupingulwa.+ 13 Kabili imisumba iyo mukapeela, e kutila ilya misumba mutanda (6) iya kufulumukilako, e yo mukalafulumukilako. 14 Mukapeele imisumba itatu kuno bushilya bwa Yordani,+ ne misumba itatu mukapeele mu calo ca Kanaani.+ Iyi ikaba misumba ya kufulumukilako. 15 Iyi misumba mutanda (6) ikaba ya kufulumukilako abana ba kwa Israele na balebeshi+ na baikala mu kati kabo, ya kufulumukilako onse uwaipaya umuntu mu kukanaishiba.+

16 “‘Nomba nga ni ku cela amuumina no kufwa afwa, uyo muntu ni kepaya.+ Kabili uyo kepaya ukwipaiwa akepaiwe.+ 17 Kabili nga ni ku libwe ilinono ilingamwipaya e ko amuumina kabili afwa, uyo muntu ni kepaya. Kabili uyo kepaya ukwipaiwa akepaiwe. 18 Kabili nga ni ku kacanso ka cimuti akengamwipaya e ko amuumina kabili afwa, uyo muntu ni kepaya. Kabili uyo kepaya ukwipaiwa akepaiwe.

19 “‘Uwa kulandula umulopa+ e ukepaya uwaipaya umuntu. Ilyo akamusanga e ukamwipaya. 20 Kabili nga ni mu lupato amusunkiile+ nangu ukumulasa cimo ilyo amubelamine+ pa kuti afwe, 21 nangu nga ni mu bulwani amuumina ku kuboko kwakwe pa kuti afwe, uwaipaya umuntu afwile ukwipaiwa. Pantu ni kepaya. Uwa kulandula umulopa akepaye uyo kepaya ilyo akamusanga.+

22 “‘Lelo nga ni mu kukanaishiba amusunkila ukwabula ubulwani nelyo amulasa cimo ukwabula ukumubelamina,+ 23 nangu amulasa ilibwe ilingamwipaya apo tamumwene nangu nga alenga lyamuponena, no kufwa afwa, nomba taali na bulwani kuli ena kabili taalemupangila ukumucita icibi, 24 ulukuta lukapingule pa kati ka waipaya umuntu no wa kulandula umulopa ukulingana na mafunde aya.+ 25 E lyo ulukuta+ lukapokolole uwaipaya umuntu mu minwe ya wa kulandula umulopa, kabili ulukuta lukamubweseshe ku musumba wakwe uwa kufulumukilako uko afulumukiile, na o akekale kulya mpaka shimapepo mukalamba uwasubwa amafuta ya mushilo akafwe.+

26 “‘Lelo nga ca kutila uwaipaya umuntu aciluka umupaka wa musumba wakwe uwa kufulumukilako uo engafulumukilako, 27 no wa kulandula umulopa+ amusanga ku nse ya mupaka wa musumba wakwe uo afulumukiileko, kabili uwa kulandula umulopa aipaya uwaipeye umuntu, ena wa kaele ku mulopa. 28 Pantu afwile ukwikala mu musumba wakwe uwa kufulumukilako mpaka shimapepo mukalamba akafwe,+ na pa numa ya mfwa ya kwa shimapepo mukalamba e lyo uwaipaya umuntu engabwelela ku calo cakwe. 29 Kabili ifi e fipope ifyo mukalekonka pa kupingula mu nkulo shenu shonse konse uko mukekala.

30 “‘Onse uwaipaya umuntu akepaiwe pa muntu aipaya+ ilyo inte+ shamushinina, lelo inte imo te kuti ishinine umuntu ukuti epaiwe. 31 Kabili mwikapoka icilubula ca kulubula umweo wa waipaya umuntu pantu ena alingile ukufwa,+ kabili afwile fye ukwipaiwa.+ 32 Kabili mwikapoka icilubula ca kulubula umuntu uwafulumukila ku musumba wakwe uwa kufulumukilako, pa kuti abwelele ku kwikala mu calo ilyo shimapepo mukalamba ashilafwa.

33 “‘Kabili mwikakowesha icalo umo mwaikala; pantu umulopa e ukowesha icalo,+ kabili tamwingafutilako icalo pa mulopa uwasuuminamo kano fye ku mulopa wa muntu uwausuumya.+ 34 E ico mwikakowesha icalo umo mwaikala, icalo umo ine naikala; pantu ine ne Yehova njikala pa kati ka bana ba kwa Israele.’”+

36 E lyo abakalamba ba mu lupwa lwa bana ba kwa Gileadi mwana Makiri+ mwana Manase aba mu ndupwa sha bana ba kwa Yosefe bapaleme mupepi no kusosa kuli Mose na kuli bacilolo, intungulushi sha mikowa ya bana ba kwa Israele, 2 abati: “Yehova aebele shikulu ukupendula+ pa kwakanya abana ba kwa Israele impanga; kabili shikulu Yehova amwebele ukupeela impanga ya kwa Selofehadi munyinefwe ku bana bakwe abanakashi.+ 3 Nomba abana baume aba mu mikowa imbi iya bana ba kwa Israele nga e baboopa, ninshi impanga babapeele aba abanakashi iya bashifwe ikaba ya mukowa uo bakoopwako, ninshi yapokwa yaleka ukuba impanga yesu iyo twapeelwe ukupitila mu kupendula.+ 4 Lelo ilyo Umwaka wa Buntungwa+ wafika ku bana ba kwa Israele, impanga iyo bapeele abanakashi ikalundwa pa mpanga ya mukowa uo bakoopwako; ninshi impanga yabo ikapokwa ukufuma pa mpanga ya mukowa wa bashifwe.”

5 E lyo Mose aebele abana ba kwa Israele ifyo Yehova amwebele, ati: “Ico umukowa wa bana ba kwa Yosefe ulesosa ca cine. 6 Aya e mashiwi Yehova alandile pa bana banakashi aba kwa Selofehadi,+ ati, ‘Lekeni bopwe ku o abene batemenwe. Lelo balingile ukuupwa fye ku lupwa lwa mu mukowa wa bashibo.+ 7 Kabili impanga ya bana ba kwa Israele taifwile ukufuma ku mukowa umo no kuya ku mukowa umbi, pantu abana ba kwa Israele bafwile ukusunga cila muntu impanga ya mu mukowa wa fikolwe fyakwe. 8 No mwana mwanakashi onse uwakwata impanga ya mu mukowa wa bana ba kwa Israele, akoopwe ku wa mu lupwa lumo ulwa mu mukowa wa kwa wishi,+ pa kuti abana ba kwa Israele bakakwate cila muntu impanga ya fikolwe fyakwe. 9 Kabili takwakabe impanga iikafuma ku mukowa umo no kuya ku mukowa umbi, pantu cila mukowa uwa bana ba kwa Israele ufwile ukusungilila impanga yabo.’”

10 Filya fine fye Yehova aebele Mose, e fyo abana banakashi aba kwa Selofehadi bacitile.+ 11 E ico Mahla, Tesa na Hogla, Milika na Noa, abana banakashi ba kwa Selofehadi,+ baupilwe ku bana baume abafyelwe muli bamunyina ba kwa shibo. 12 Baupilwe ku ba mu ndupwa shimo isha bana baume aba kwa Manase mwana Yosefe, pa kuti impanga yabo ikatwalilile ukuba mu mukowa wa lupwa lwa kwa shibo.

13 Aya e mafunde+ no bupingushi ifyo Yehova aebele abana ba kwa Israele ukupitila muli Mose mu ciswebebe ca Moabu mupepi na Yordani ku Yeriko.+