Amalango

1 Aya e mashiwi Mose asosele ku bena Israele bonse ilyo bali mu matololo ya mu citungu ca Yordani,+ mu ciswebebe icalungatana na Sufi, ayabela pa kati ka Parani+ na Tofele na Labani na Haserote+ na Di-sahabu, 2 pa bushiku bwalenga ikumi na bumo (11) ukutula apo bafumiine ku Horebu no kupita inshila ya ku Lupili lwa Seiri ukufika ku Kadeshe-barnea.+ 3 Kabili mu mwaka walenga amakumi yane (40),+ mu mweshi we kumi na umo (11), pa bushiku bwa kubalilapo mu mweshi, Mose aebele abana ba kwa Israele fyonse ifyo Yehova amwebele, 4 pa numa ya kucimfya Sihone+ imfumu ya bena Amore, uwaleikala mu Heshebone, na Oge+ imfumu ya Bashani, uwaleikala mu Ashitarote,+ mu Edrei.+ 5 Mu citungu ca Yordani, mu calo ca Moabu, e mo Mose alondolwelele aya mafunde,+ ati:

6 “Yehova Lesa wesu atwebele mu Horebu,+ ati, ‘Mwaikala sana muli cino calo ca mpili.+ 7 Alukeni muye mu calo ca mpili ica bena Amore+ na mu bena mupalamano babo bonse aba mu Araba,+ mu calo ca mpili+ na ba mu Shefela na mu Negebu+ na ba mu lulamba lwa bemba,+ mu calo ca bena Kanaani,+ na ba mu Lebanone,+ ukufika ku mumana ukalamba, umumana wa Yufrate.+ 8 Moneni, ici e calo ndemupeela. Ingilenimo no kupoka icalo ico Yehova alapile kuli bashinwe, kuli Abrahamu, kuli Isaki+ na kuli Yakobo,+ ukuti akacipeela kuli bena na ku bana babo abakakonkapo.’+

9 “Na ine nasosele ici kuli imwe mu nshita ilya, nati, ‘Nafilwa ukumusenda neka.+ 10 Yehova Lesa wenu namufusha, kabili moneni mufulile nge ntanda.+ 11 Shi Yehova Lesa wa fikolwe fyenu amufushe+ imiku ikana limo (1,000), no kumupaala+ nga filya fine amulaile.+ 12 Nga kuti nasenda shani neka icisendo cenu ne cipe cenu e lyo no kuumana kwenu?+ 13 Leteni abaume ba mu mikowa yenu aba mano kabili abashilimuka+ kabili abaishibisha imilimo,+ ukuti mbasonte ukuba intungulushi pali imwe.’+ 14 Na imwe mwanjaswike ati, ‘Ico wasosa ukuti tucite cili fye bwino.’15 Na ine nabuulile intungulushi sha mu mikowa yenu, abaume ba mano kabili abaishibisha imilimo, no kubasonta ukuba intungulushi pali imwe, bacilolo ba pa bantu amakana na bacilolo ba pa bantu imyanda na bacilolo ba pa bantu amakumi yasano na bacilolo ba pa bantu amakumi kabili intungulushi sha mu mikowa yenu.+

16 “Kabili naebele abapingushi benu mu nshita ilya, nati, ‘Ilyo mulekutika ku milandu ya bamunyinenwe, mulepingula mu bulungami+ pa kati ka muntu na munyina nelyo no mulebeshi wakwe.+ 17 Mwilaba na kapaatulula mu bupingushi.+ Mulekutika ku mupiina na ku mukankaala mu musango umo wine.+ Mwilatiina umuntu,+ pantu ubupingushi bwa kwa Lesa;+ kabili umulandu uwamukosela, muleleta kuli ine, na ine nkaumfwa.’+ 18 Kabili namwebele mu nshita ilya fyonse ifyo mufwile ukulacita.

19 “E lyo twafumine pa Horebu no kwenda mu matololo+ yonse yalya ayakalamba kabili aya kutiinya, ayo mwamwene, mu nshila ya mu calo ca mpili ica bena Amore,+ nga mulya mwine Yehova Lesa wesu atwebele; kabili twasukile twafika ku Kadeshe-barnea.+ 20 E lyo nasosele kuli imwe nati, ‘Mwaisa mu calo ca mpili ica bena Amore, ico Yehova Lesa wesu aletupeela.+ 21 Moneni, Yehova Lesa wenu namushiila icalo.+ Kabiyeni no kwikalamo, nga mulya mwine Yehova Lesa wa fikolwe fyenu asosele kuli imwe.+ Mwitiina, nelyo ukututuma.’+

22 “Lelo, imwe bonse mwapaleme kuli ine no kutila, ‘Leka tutume aba kututangilila ukuti batulengwile impanga e lyo bese batwebe inshila ya kuyamo ne misumba iyo tukayako.’+ 23 Ici cintu caliweme kuli ine, ica kuti nabuulilepo abaume ikumi na babili (12) pali imwe, umo umo ukufuma mu mukowa umo.+ 24 Na bo balimine no kuya mu citungu ca mpili+ kabili bafikile ku mupokapoka wa Eshekole+ kabili bailelengula icalo. 25 Kabili basendeleko ifisabo fya muli cilya calo+ no kubwelela kuli ifwe, kabili batuleteele amashiwi ya kuti, ‘Icalo ico Yehova Lesa wesu aletupeela cisuma.’+ 26 Lelo tamwafwaile ukuyako,+ kabili mwakeene ifyo Yehova Lesa wenu amwebele.+ 27 Kabili mwaleing’wing’winsha mu matenti yenu no kutila, ‘Ni co Yehova alitupata+ e co atufumiishe mu calo ca Egupti+ ku kutupeela mu minwe ya bena Amore, ukuti batulofye.+ 28 Ni kwi uko tuleya? Bamunyinefwe nabasungulula+ imitima yesu pa kutweba ati: “Aba bantu bakalamba kabili batali ukutucila,+ imisumba yabo ikulu kabili yalikwata na malinga ayafika mu muulu+ kabili twamweneko na bana ba kwa Anaki.”’+

29 “Na ine nasosele kuli imwe nati, ‘Mwibatutuma nelyo ukubatiina.+ 30 Yehova Lesa wenu alemutangilila. Akamulwila+ nga filya fine amucitiile mu Egupti ifyo mwaimwenene,+ 31 na mu matololo,+ umo mwamwene ifyo Yehova Lesa wenu amusendele+ nga filya umuntu asenda umwana wakwe, mu nshila yonse iyo mwaendelemo mpaka ne fyo mwafikile kuno.’+ 32 Lelo te mulandu ne fyo nasosele tamwatetekele Yehova Lesa wenu,+ 33 uwalemutangilila ku kumulengwila icifulo ca kupangapo inkambi,+ ku mulilo ubushiku pa kuti mumone inshila ya kuyamo na kwi kumbi akasuba.+

34 “Inshita yonse ilya Yehova alyumfwile ifyo mwalesosa. Na o e pa kufulwa no kulapa+ ati, 35 ‘Takuli nangu umo pa nkulo ino iibifi uukamona icalo cisuma ico nalapile ukupeela kuli bashinwe,+ 36 kano fye Kalebu mwana Yefune.+ Ena akacimona, kabili nkapeela ena na bana bakwe, icalo ico aendelemo, pantu akonkele Yehova no mutima onse.+ 37 (Na ine Yehova alinkalipile pa mulandu wenu, no kunjeba ati, ‘Na iwe wine tawakengilemo.+ 38 Yoshua mwana Nuni, uwiminina ku cinso cobe, e ukengilamo.’+ Lesa namukosha,+ pantu akalenga Israele ukupoka icalo.)39 Kumfwa abana benu abo mwasosele amuti: “Bakaba nge fipe ifyo bapoka!”+ kabili abana benu abashaishiba lelo icisuma nangu icibi, e bakengilamo, kabili nkacipeela kuli bena, na co cikaba cabo. 40 Lelo imwe, alukileni kumbi kabili imeni no kuya mu matololo mu nshila ya kuli Bemba Wakashika.’+

41 “Na imwe mwa-aswike ati, ‘Natubembukila Yehova.+ Twalayako no kuyalwa nga mulya mwine Yehova Lesa wesu atwebele!’ Awe cila muntu akakile ifyanso fyakwe ifya bulwi. Kabili mwamwene kwati cintu ca-anguka ukunina ukuya mu lupili.+ 42 Lelo Yehova atile kuli ine, ‘Ubebe ukuti: “Mwiya ku kulwa, pantu nshili mu kati kenu;+ pa kuti abalwani benu bemucimfya.”’+ 43 Na ine nasosele kuli imwe, lelo tamwakutike kabili tamwaumfwilile+ ifyo Yehova alandile kabili pa mulandu wa cilumba cenu, bonse mwalininine no kuya mu lupili.+ 44 E lyo abena Amore abaleikala muli lulya lupili bafumine ku kumukumanya no kumufulumuna,+ filya fine inshimu shicita, no kumusalanganishisha mu Seiri ukufika ku Horma.+ 45 Awe mwalibwelele no kutendeka ukulila ku cinso ca kwa Yehova, lelo Yehova taumfwile kwi shiwi lyenu,+ kabili takutike kuli imwe.+ 46 E fyo mwakonkenyepo ukwikala inshiku ishingi mu Kadeshe, ukulingana ne nshiku mwaikelemo.+

2 “E lyo twayalwike no kulola ku matololo mu nshila ya kuli Bemba Wakashika, ukulingana ne fyo Yehova anjebele;+ kabili twapoosele inshiku ishingi pa kushinguluka ulupili lwa Seiri. 2 Asukile Yehova asosa kuli ine ati, 3 ‘Shafula inshiku isho mwashinguluka ulu lupili.+ Alukileni ku kapinda ka ku kuso. 4 Kabili eba abantu auti: “Muli no kupita mu mupaka wa bamunyinenwe,+ abana ba kwa Esau,+ abekala mu Seiri;+ na bo bakamutiina,+ kabili mukacenjele sana. 5 Mwikalwa na bo, pantu nshakapeele kuli imwe icalo cabo nangu apa kunyanta ulukasa; pantu napeele Esau Ulupili lwa Seiri ukuba icalo cakwe.+ 6 Ifya kulya ifyo mukashita mu ndalama, e fyo mukalye; na menshi ayo mukashita mu ndalama, e yo mukanwe.+ 7 Pantu Yehova Lesa wenu napaala imwe mu micitile yonse iya kuboko kwenu.+ Naishiba bwino bwino imyendele yenu muli aya matololo yakalamba. Yehova Lesa wenu aba na imwe pali iyi myaka amakumi yane (40).+ Tamwabulwa nangu cimo.”’+ 8 Awe e fyo twapitile ukufuma pali bamunyinefwe, abana ba kwa Esau,+ abekala mu Seiri, twasha inshila yaya ku Araba,+ ku Elati na ku Esione-gebere.+

“Kabili twalyalwike no kupita inshila ya mu matololo ya Moabu.+ 9 E lyo Yehova atile kuli ine, ‘Wicena Moabu nelyo ukulwa nankwe, pantu nshakakupeelepo icalo cakwe, pantu abana ba kwa Lote+ e bo napeele Ari+ ukuba icalo cabo. 10 (AbaEmi+ e baikelemo kale, abantu aba maka kabili abengi nga nshi, abatali nga baAnaki.+ 11 Kumfwa abena Refa,+ na bo balemonwa nga baAnaki,+ kabili abena Moabu balebeta ati abaEmi. 12 E lyo mu Seiri mwaikele abena Hore+ kale, kabili abana ba kwa Esau+ babapokele icalo no kubalofya no kwikala mu calo cabo,+ nga filya fine abena Israele bakacita ku calo cabo, ico Yehova akabapeela.)13 Nomba imeni, akuyeni mucilinganye umupokapoka wa Serede.’ E fyo twacilingenye umupokapoka wa Serede.+ 14 Ne nshiku twaendele ukufuma ku Kadeshe-barnea ukufika ilyo twacilingenye umupokapoka wa Serede shali imyaka amakumi yatatu na cinekonsekonse (38), yasukile yaloba inkulo yonse iya bantu ba bulwi mu nkambi, nga filya fine Yehova alapile kuli bena.+ 15 Kabili ukuboko+ kwa kwa Yehova kwali pali bena ku kubonaula ukubafumya mu nkambi basukile baloba bonse.+

16 “Kabili ilyo fye abaume ba bulwi bonse bapwile ukufwa,+ 17 Yehova alandile na kabili kuli ine ati, 18 ‘Lelo walapita mu ncende ya bena Moabu, e kutila mu Ari,+ 19 kabili upalame pa ntanshi ya bana ba kwa Amone. Wibacusha nelyo ukulwa na bo, pantu nshakakupeele icalo ca bana ba kwa Amone ukuba icalo cobe, pantu nacipeele ku bana ba kwa Lote.+ 20 Na co cali calo ca bena Refa.+ (Abena Refa baikelemo kale, kabili abena Amone balebeta ati abaSamisumi. 21 Bali bantu aba maka kabili abengi nga nshi kabili abatali kwati fye baAnaki;+ na Yehova abalofeshe+ ku cinso cabo, pa kuti babapoke icalo no kwikala mu calo cabo;22 nga filya fine acitiile abana ba kwa Esau, abekala mu Seiri,+ ilyo alofeshe abena Hori+ ku cinso cabo, pa kuti babapoke icalo no kwikala mu cifulo cabo ukufika no bwa lelo. 23 Kumfwa abaAbi,+ abaleikala mu mishi ukufika ku Gasa,+ abaKaftore+ abafumine ku Kaftore,+ balibalofeshe, pa kutila bekale mu calo cabo.)

24 “‘Imeni, kabiyeni no kucilinganya umupokapoka wa Arnone.+ Moneni, napeela mu minwe yenu Sihone+ imfumu ya Heshebone, umwina Amore. E ico tendekeni ukupoka icalo cakwe, kabili lweni nankwe. 25 Buno bushiku ndelenga abantu na bantu aba mwi samba lya muulu onse abakomfwa ilyashi pali imwe ukumutiina no kuba no mwenso; kabili pa mulandu wa imwe bakatutuma no kucula nga filya umwanakashi acula pa kupaapa.’+

26 “Kabili natumine inkombe ukufuma mu matololo ya Kedemote+ kuli Sihone+ imfumu ya Heshebone ukutwala amashiwi ya mutende,+ ashiti, 27 ‘Leka mpite mu calo cobe. Nkapita fye mu musebo. Nshakaalukile ku kulyo nelyo ku kuso.+ 28 Ifya kulya ifyo ukanshitisha mu ndalama, e fyo nkalya; na menshi ukanshitisha mu ndalama, e yo nkanwa. Leka fye mpitemo ku makasa yandi,+ 29 nga filya fine abana ba kwa Esau abekala mu Seiri+ na bena Moabu+ abekala mu Ari bacitile kuli ine, nsuke njabuke Yordani no kwingila mu calo ico Yehova Lesa wesu aletupeela.’+ 30 Lelo Sihone imfumu ya Heshebone tatusuminishe ukupitamo, pantu Yehova Lesa wenu alekele umutima wakwe ukutalama+ kabili umutima wakwe walikosele, pa kutila amupeele mu minwe yenu, nge fyo cili lelo.+

31 “E lyo Yehova asosele kuli ine ati, ‘Mona, napeela Sihone ne calo cakwe kuli iwe. Poka icalo cakwe.’+ 32 Ilyo Sihone afumine pamo na bantu bakwe, ku kwisalwa na ifwe pa Yahasi,+ 33 e lyo Yehova Lesa wesu amupeele kuli ifwe,+ ica kuti twalimucimfya+ na bana bakwe na bantu bakwe bonse. 34 Kabili twapokele imisumba yakwe yonse pali ilya nshita no konaula umusumba onse,+ kumo na baume na banakashi na bana abanono. Tatwashilepo nangu umo uwa kupusuka. 35 Twabapokolwele fye ifitekwa, e lyo ne fya mu misumba iyo twacimfishe.+ 36 Ukufuma ku Aroere,+ uwaba pa mbali ya mumana wa Arnone, no mushi uuli mu mupokapoka, ukufika ku Gileadi takwali umusumba uwatucilile amaka.+ Yehova Lesa wesu apeele yonse kuli ifwe. 37 Ku calo ca bana ba kwa Amone+ ceka e ko mushapaleme, ku lulamba lonse ulwa mumana wa Yaboke,+ ne misumba ya mu calo ca mpili, na konse uko Yehova Lesa wesu abindile.

3 “Kabili twalyalwike no kuya mu nshila ya ku Bashani. Awe Oge+ imfumu ya Bashani aishile pamo na bantu bakwe bonse ku kwisalwa na ifwe pa Edrei.+ 2 E lyo Yehova anjebele ati, ‘Wimutiina,+ pantu ndepeela ena na bantu bakwe bonse ne calo cakwe mu minwe yobe; kabili umucite ifyo wacitile kuli Sihone+ imfumu ya bena Amore, uwaleikala mu Heshebone.’ 3 E fyo Yehova Lesa wesu apeele mu minwe yesu na Oge imfumu ya Bashani na bantu bakwe bonse, na ifwe twalimuumine mpaka takwashele nangu umo uwapuswike.+ 4 Kabili twapokele imisumba yakwe yonse pali ilya nshita. Takwali umushi nangu umo uo tushapokele mu misumba yonse amakumi mutanda (60),+ iya mu citungu conse ica Argobe,+ mu bufumu bwa kwa Oge mu calo ca Bashani.+ 5 Iyi yonse yali misumba ya malinga ayatali, iyakwete ifiibi ne mipindo, ukubikako ne mishi iingi nga nshi iyabula amalinga. 6 Na lyo line, twaliyonawile,+ nga filya fine twacitile kuli Sihone imfumu ya Heshebone, ukonaula imisumba yonse, kumo na baume, abanakashi na bana banono.+ 7 Lelo ifitekwa fyonse na fyonse ifya misumba twalifipokele.+

8 “Kabili muli ilya nshita twapokele icalo ca shamfumu shibili isha bena Amore+ ishali mu citungu ca Yordani, ukufuma ku mumana wa Arnone+ ukufika ku Lupili lwa Hermone;+ 9 (abena Sidone balelwita ati Hermone Sirione,+ na bena Amore balelwita ati Seniri,)+ 10 imisumba yonse iyaba apabatama e lyo na Gileadi onse na Bashani onse ukufika ku Saleka+ na ku Edrei,+ imisumba ya mu bufumu bwa kwa Oge mu Bashani. 11 Pantu ni Oge fye imfumu ya Bashani e washelepo pa bena Refaimu.+ Moneni! amacila yakwe macila ya cela. Bushe tayaba mu Raba+ wa bana ba kwa Amone? Yalepa imikono pabula (9), kabili mu bwipi yaba imikono ine, ukulingana no mukono babomfya konse. 12 Kabili mu nshita ilya twapokele cino calo; ukufuma ku Aroere,+ mupepi no mumana wa Arnone, na hafu wa calo ca mpili ica Gileadi, ne misumba ya calo ici napeele ku bena Rubene na ku bena Gadi.+ 13 Kabili ulubali lwashala ulwa Gileadi+ na Bashani+ onse uwa bufumu bwa kwa Oge napeele kuli hafu wa mukowa wa kwa Manase. Icitungu conse ica Argobe+ wa Bashani onse, bushe taciitwa icalo ca bena Refa?+

14 “Yairi+ mwana Manase abuulile icitungu conse ica Argobe+ ukufika ku mupaka wa bena Geshuri+ na bena Maakati,+ kabili ainike ilya mishi ya mu Bashani ishina lyakwe ati, Habote-yairi,+ ukufika no bwa lelo. 15 Kabili Gileadi+ naipeele kuli Makiri.+ 16 Kabili abena Rubene+ na bena Gadi nabapeele ukufuma ku Gileadi+ ukufika ku mumana wa Arnone, pa kati ka mumana uyo e paba umupaka, no kufika ku Yaboke, umumana e mupaka wa bana ba kwa Amone;+ 17 na mu Araba na mu mumana wa Yordani na mu lulamba lwa uko, ukufuma ku Kinerete*+ ukufika kuli bemba wa mu Araba, Bemba wa Mucele,+ mwi samba lya matelo ya mulundu wa Pisga+ lwa ku kabanga.

18 “E ico naebele imwe muli ilya nshita nati, ‘Yehova Lesa wenu namupeela cino calo. Mukapita abaipangasha ukutangilila bamunyinenwe, abana ba kwa Israele, imwe bonse mwe baume ba maka.+ 19 Abakashi benu fye na bana benu ne fitekwa fyenu (Ninjishiba ukuti mwakwata ifitekwa ifingi nga nshi) e bakashala baleikala mu misumba yenu iyo mupeele,+ 20 mpaka Yehova akapeele bamunyinenwe ukutuusha, pamo na imwe, mpaka na bo bakakwate icalo ico Yehova Lesa wenu alebapeela bushilya bwa Yordani; na pa numa e lyo mukabwela, cila muntu ku mpanga yakwe iyo namupeele.’+

21 “Kabili naebele Yoshua+ muli ilya nshita, nati, ‘Amenso yobe nayamona ico Yehova acitile kuli ishi shamfumu shibili. Yehova akacita cimo cine ku mabufumu yonse ayo muleabukilako.+ 22 Mwikabatiina, pantu Yehova Lesa wenu e ukamulwila.’+

23 “Kabili mu nshita ilya napapaatile Yehova ukuti ambelele uluse, kabili natile, 24 ‘Mwe Yehova Shikulu Mulopwe, mwatendeka ukulenga umubomfi wenu ukumona ubukulu+ bwenu no kuboko kwenu ukwa maka,+ pantu ni lesa nshi mu muulu nelyo pano isonde uucita imilimo nge yenu ne fya bumpalume nge fyenu?+ 25 Lekeni mpite no kumona icalo cisuma+ icili bushilya bwa Yordani, ici calo ca mpili+ icisuma na Lebanone.’+ 26 Kabili Yehova alimfulilwe pa mulandu wa imwe+ kabili takutike kuli ine; lelo Yehova atile kuli ine, ‘Fyafula ifyo wasosa! Wibwekeshapo ukulanda kuli ine pali uyu mulandu. 27 Nina pa muulu wa Pisga+ sansula na menso yobe ukulola ku masamba na ku kapinda ka ku kuso na ku kapinda ka ku kulyo na ku kabanga kabili umone na menso yobe, pantu tawakabuke uyu Yordani.+ 28 Peela umulimo+ kuli Yoshua kabili mukoseleshe kabili mukoshe, pantu ena akaabukila+ pa ntanshi ya aba bantu kabili e ukabalenga ukwingila mu calo ico walamona.’+ 29 Ifi fyonse fyacitike ilyo twaleikala mu mupokapoka apalungatana na Bete-peore.+

4 “Nomba mwe bena Israele, umfweni amafunde no bupingushi ifyo ndemusambilisha ukulacita, pa kuti mube no mweo+ na pa kuti mwingile mu calo ico Yehova Lesa wa fikolwe fyenu alemupeela. 2 Mwilundako ku mashiwi ayo ndemweba, nangu ukufumyako,+ pa kuti mulesunga amafunde ya kwa Yehova Lesa wenu ayo ndemweba.

3 “Amenso yenu yalimwene ifyo Yehova acitile kuli Baali wa ku Peore,+ ukuti umuntu onse uwakonkele Baali wa ku Peore e o Yehova Lesa wenu aipeye.+ 4 Lelo imwe mwe balambatila+ kuli Yehova Lesa wenu muli aba mweo bonse lelo. 5 Moneni, nimusambilisha amafunde+ no bupingushi,+ nga filya fine Yehova Lesa wandi anjebele, pa kuti muleficita mu calo ico muleingilamo ukuti cibe cenu. 6 Mulefikonka no kulaficita, pantu nga mwacita ifi mukalanga pa menso ya bantu na bantu abakomfwa amafunde aya yonse ukuti muli ba mano+ kabili muleluka,+ na bo bakatila, ‘Cine cine uluko ulu ulukalamba bantu ba mano kabili abeluka.’+ 7 Pantu luko+ nshi ulukalamba ulwakwata balesa ababa mupepi nge fyaba Yehova Lesa wesu lyonse ilyo tulilila kuli ena?+ 8 Kabili luko nshi ulukalamba ulwakwata ifipope fyalungama no bupingushi ifyalingana na mafunde aya yonse ayo ndemupeela lelo?+

9 “Cikulu fye mucenjele kabili musakamane imyeo yenu,+ pa kuti mwikalaba ifintu ifyo amenso yenu yamwene+ no kuti fikafuma mu mitima yenu inshiku shonse isha mweo wenu;+ kabili mukalondolwele abana benu na beshikulu benu,+ 10 ubushiku ilyo mwaiminine ku cinso ca kwa Yehova Lesa wenu mu Horebu,+ ilyo Yehova atile kuli ine, ‘Longanya abantu kuli ine ukuti bomfwe amashiwi yandi,+ pa kuti basambilile ukuntiina+ inshiku shonse isha myeo yabo pano nse na pa kuti basambilishe abana babo.’+

11 “E fyo mwapaleme no kwiminina mwi samba lya lupili, no lupili lwalepya umulilo ukufika mu kati ka muulu; kwali imfifi, ikumbi ne mfifi iyafiita fititi.+ 12 Na Yehova atendeke ukulanda na imwe ukufuma mu kati ka mulilo.+ Iciunda ca mashiwi e co mwaleumfwa, lelo tamwamwenepo icipasho+ icili conse, mwaleumfwa fye ishiwi.+ 13 Na o amulondolwelele icipangano cakwe,+ ico amwebele ukulakonka, e kutila Amashiwi Ikumi (10),+ na pa numa ayalembele pa mabwe yabili ayapaapaatala.+ 14 Kabili nine Yehova aebele mu nshita ilya ukusambilisha imwe amafunde no bupingushi, ifyo mukalakonka mu calo ico muleabukilako ukuti cibe cenu.+

15 “Kabili mukasakamane imyeo yenu,+ pantu tamwamwene icipasho+ icili conse bulya bushiku Yehova alelanda kuli imwe mu Horebu mu kati ka mulilo, 16 pa kuti mwikacita ifya kumonaula+ na pa kuti mwikabasa icimpashanya ica musango uuli onse, icimpashanya ca mwaume napamo ica mwanakashi,+ 17 icimpashanya ca nama yonse iya pano isonde,+ icimpashanya conse ica cuni icipupuka mu muulu,+ 18 icimpashanya conse ica cintu icenda pa mushili, icimpashanya conse ice sabi+ ilili mu menshi pa nshi ya calo; 19 no kuti mwikenuna amenso yenu ku muulu no kumona akasuba no mweshi ne ntanda, ifintu fyonse ifya mu muulu, no kubelelekwa ukufifukamina no kufibombela,+ ifyo Yehova Lesa wenu apeela ku bantu na bantu bonse aba mwi samba lya muulu.+ 20 Lelo ni mwe Yehova abuulile ukuti amufumye mu mpanga iyabatama iya kwengulwilamo ifyela,+ ukumufumya mu Egupti, ku kuba abantu bakwe,+ nge fi cili pali buno bushiku.

21 “Kabili Yehova afuliilwe ine pa mulandu wa imwe,+ ica kuti alapile ukuti nshakaabuke Yordani nelyo ukwingila mu calo cisuma ico Yehova Lesa wenu alemupeela ukuti cibe icalo cenu.+ 22 Pantu ndefwila muli cino calo.+ Nshakaabuke Yordani, lelo imwe mukaabuka, kabili mukengila muli ici calo cisuma. 23 Cenjeleni ukuti tamulabile icipangano ca kwa Yehova Lesa wenu ico apangene na imwe+ no kuti tamupangile icimpashanya cabaswa, ica musango onse ico Yehova Lesa wenu amubindile.+ 24 Pantu Yehova Lesa wenu mulilo uonaula,+ ni Lesa uufwaya ukupepwa fye eka.+

25 “Ilyo mukakwata abana na beshikulu kabili mwaikalamo ne myaka iingi mu calo, mwacita ne fya kuyonaula,+ mwapanga ne cimpashanya cabaswa,+ icimpashanya ca musango onse, kabili mwacita no bubi mu menso ya kwa Yehova Lesa+ wenu ku kumukalifya, 26 nalenga umuulu ne calo+ ukuba inte pali imwe lelo, ukuti ukuloba mukaloba bwangu mu calo ico muleabukilapo Yordani ku kwikalamo. Tamwakekalemo inshiku ishingi, pantu mukalofiwa.+ 27 Kabili Yehova akamusalanganishisha mu bantu na bantu,+ kabili mukashala fye impendwa iinono+ mu nko isho Yehova akamutamfishako. 28 Kabili kulya e ko mukabombela balesa,+ abapangwa ku minwe ya bantu, aba cimuti na ba mabwe,+ abashingamona nelyo ukumfwa nelyo ukulya nelyo ukununsha.+

29 “Nga mwafwaya Yehova Lesa wenu kulya kuntu, ukumusanga mukamusanga,+ pantu mukamufwaya ne mitima yenu yonse ne myeo yenu yonse.+ 30 Ilyo mukaba mu bwafya ubukalamba ne fi fyonse namweba fyamucitikila ku mpela ya nshiku, e lyo mukabwelela kuli Yehova Lesa+ wenu no kukutika kwi shiwi lyakwe.+ 31 Pantu Yehova Lesa wenu ni Lesa wa nkumbu.+ Takamupoose nelyo ukumonaula nelyo ukulaba icipangano+ ca fikolwe fyenu ico alapile kuli bena.

32 “Nomba shi ipusheni pa nshiku sha ku kale+ ishaliko ilyo mushilabako, ukufuma pa bushiku Lesa abumbile umuntu pano isonde+ kabili ukufuma ku mpela imo iya muulu ukufika ku mpela imbi iya muulu, Bushe kwacitikeko icikulu nge ci nelyo bushe kwaumfwikike icaba nge ci?+ 33 Bushe kwalibako abantu bambi abaumfwapo ishiwi lya kwa Lesa alelanda mu kati ka mulilo mu musango uo imwe mwaumfwililemo, no kutwalilila aba mweo?+ 34 Nelyo bushe Lesa alyeseshepo ukusenda uluko ukulufumya mu luko lumbi ku fya kwesha,+ ku fishibilo,+ na ku fipesha amano+ na ku bulwi+ na ku kuboko kwakosa+ na ku kuboko ukwatambululwa+ na ku fya kutiinya ifikalamba+ nga filya fyonse ifyo Yehova Lesa wenu amucitiile mu Egupti ifyo mwaimwenene? 35 Imwe alimulangile, pa kuti mwishibe ukuti Yehova e Lesa wa cine;+ takwaba na umbi.+ 36 Ukufuma mu muulu amulengele ukumfwa ishiwi lyakwe ku kumulungika; na pe sonde amulengele ukumona umulilo wakwe uukalamba, na mashiwi yakwe mwayomfwile ukufuma mu kati ka mulilo.+

37 “Na lyo line mucili abomi, pantu atemenwe ifikolwe fyenu no kusala abana babo abakonkapo+ no kufumya imwe mu Egupti ku maka yakwe ayakalamba uku ninshi amenso yakwe yali pali imwe,+ 38 ku kutamfya ku cinso cenu inko ishikalamba kabili isha maka ukucila imwe, ku kwingisha imwe, ku kumupeela icalo cabo ukuti cibe cenu, nge fyo cili lelo.+ 39 Kabili lelo namwishiba bwino, kabili mukebukishe mu mitima yenu ukuti Yehova e Lesa wa cine mu muulu ku muulu na pe sonde pa nshi.+ Takwaba na umbi.+ 40 Kabili lyonse mukalekonka ifipope+ fyakwe na mafunde yakwe ayo ndemweba lelo, pa kuti ifintu fiwamine imwe+ na bana benu abakakonkapo, na pa kuti mukekale inshiku ishingi mu calo ico Yehova Lesa wenu alemupeela.”+

41 Pali ilya nshita Mose apaatwilepo imisumba itatu kwi shilya lya Yordani iyabela ukutulila akasuba,+ 42 ukwa kufulumukila uwaipaya umunankwe mu kukanaishiba,+ uo ashapatile;+ kabili akabutukile kuli umo pali iyi misumba no kuba no mweo,+ 43 ne yi misumba ni, Besere+ mu matololo mu calo cabatama uwa bena Rubene, na Ramote+ mu Gileadi uwa bena Gadi, na Golani+ mu Bashani uwa bena Manase.+

44 Awe aya e mafunde+ ayo Mose apeele abana ba kwa Israele. 45 Aya e mafunde+ ne fipope+ no bupingushi+ ifyo Mose asosele ku bana ba kwa Israele ilyo balefuma mu Egupti, 46 mupepi no mumana wa Yordani, mu mupokapoka apalungatana na Bete-peore,+ mu calo ca kwa Sihone imfumu ya bena Amore, uwaleikala mu Heshebone,+ uo Mose na bana ba kwa Israele bacimfishe ilyo balefuma mu Egupti.+ 47 Kabili bapokele icalo cakwe ne calo ca kwa Oge+ imfumu ya Bashani, ishamfumu shibili isha bena Amore ishaleikala mu citungu ca Yordani, ukutulila akasuba, 48 ukufuma ku Aroere,+ uuli mu mbali ya mumana wa Arnone, ukufika ku Lupili lwa Sione, e kutila, Hermone,+ 49 na Araba+ onse mu citungu ca Yordani ku kabanga, no kufika kuli bemba wa mu Araba+ mwi samba lya matelo ya Pisga.+

5 Kabili Mose aitile abena Israele+ bonse no kubeba ati: “Umfweni mwe bena Israele, amafunde no bupingushi+ ifyo ndemweba lelo, ukuti mufisambilile no kulafikonka bwino bwino.+ 2 Yehova Lesa wesu apangene icipangano na ifwe mu Horebu.+ 3 Yehova tapangene icipangano na bashifwe, lelo apangene na ifwe, fwe bali aba mweo pano lelo. 4 Yehova alandile na imwe icinso ne cinso mu lupili ukufuma mu kati ka mulilo.+ 5 Naiminine pa kati ka kwa Yehova na imwe mu nshita+ ilya ku kumweba amashiwi ya kwa Yehova, (pantu mwali no mwenso pa mulandu wa mulilo kabili tamwaninine ulupili,)+ nati,

6 “‘Nine Yehova Lesa obe,+ uwakufumishe mu calo ca Egupti, mu ng’anda ya basha.+ 7 Wilaba na balesa bambi pa cinso candi.+

8 “‘Wilabasa icimpashanya+ ica musango onse+ icapala icili conse icaba mu muulu ku muulu nelyo ica pe sonde pa nshi nelyo ica mu menshi mwi samba lya calo. 9 Wilafikontamina nelyo ukufibombela,+ pantu ne Yehova Lesa obe ndi Lesa uufwaya ukupepwa fye neka,+ uukanda abana, na beshikulu, na bana ba beshikulu, pa membu sha bashibo abampata;+ 10 lelo uwaba ne cikuuku ku ba nkulo yalenga amakana na makana kuli abo abantemwa kabili abakonka amafunde yandi.+

11 “‘Wilalumbula ishina lya kwa Yehova Lesa obe apa fye,+ pantu Yehova takaleke fye umuntu uulumbula apa fye ishina lyakwe.+

12 “‘Ulesunga isabata ku kulilenga ilya mushilo, nga filya fine Yehova Lesa obe akwebele,+ 13 ukalebomba no kucita imilimo yobe yonse mu nshiku mutanda (6).+ 14 Lelo ubushiku bwalenga cinelubali (7) lisabata kuli Yehova Lesa obe.+ Wikalabombamo umulimo onse,+ iwe nangu umwana obe umwaume nelyo umwana obe umwanakashi nangu umubomfi obe umwaume nelyo umubomfi obe umwanakashi nangu ni ng’ombe yobe nelyo impunda yobe nelyo icitekwa cobe conse nangu mulebeshi obe uuli mu mpongolo shobe,+ pa kuti umubomfi obe umwaume no mubomfi obe umwanakashi atuushe nga iwe.+ 15 Kabili ukaleibukisha ukuti wali umusha mu calo ca Egupti+ na Yehova Lesa obe akufumishe mulya ku kuboko ukwakosa na ku kuboko ukwatambululwa.+ E co Yehova Lesa obe akwebele ukulasunga isabata.+

16 “‘Ulecindika wiso na noko,+ nga mulya mwine Yehova Lesa obe akwebele; pa kuti inshiku shobe shifule no kuti ifintu fikuwamine+ mu calo ico Yehova Lesa obe alekupeela.

17 “‘Wilaipaya.+

18 “‘Kabili wilacita bucende.+

19 “‘Kabili wilaiba.+

20 “‘Kabili wilashinina umunobe ubunte bwa bufi.+

21 “‘Kabili wilakumbwa umukashi wa munobe.+ Kabili wilakumbwa ing’anda ya munobe, ibala lyakwe nelyo umubomfi wakwe umwaume nelyo umubomfi wakwe umwanakashi, ing’ombe yakwe nelyo impunda yakwe nangu conse ico umunobe akwata.’+

22 “Aya e Mashiwi Yehova alandile ku lukuta lwenu lonse mu lupili mu kati ka mulilo+ na mwi kumbi na mu mfifi iyafiita fititi, kwi shiwi likalamba, kabili talundilepo iyo; na pa numa ayalembele pa mabwe yabili ayapaapaatala no kuyapeela kuli ine.+

23 “Kabili ilyo fye mwaumfwile ishiwi ukufuma mu kati ka mfifi, ilyo ulupili lwalepya umulilo,+ mwapaleme kuli ine, intungulushi shonse isha mikowa yenu na bakalamba benu. 24 E lyo mwatile, ‘Mona, Yehova Lesa wesu atulanga ubukata bwakwe no bukulu bwakwe, kabili natuumfwa ishiwi lyakwe mu kati ka mulilo.+ Buno bushiku natumona ukuti Lesa kuti alanda no muntu na o umuntu ukwabula ukufwa.+ 25 Lelo cinshi tulefwila? Pantu umulilo uyu uukalamba kuti watupwisha.+ Nga twakonkanyapo fye ukumfwa ishiwi lya kwa Yehova Lesa wesu, twalafwa.+ 26 Pantu nani pa bantunse bonse uwaumfwa ishiwi lya kwa Lesa+ wa mweo alelanda mu kati ka mulilo nge fyo twacumfwa kabili no kutwalilila uwa mweo?27 Kabiye upalameko no kumfwa fyonse ifyo Yehova Lesa wesu akasosa; e lyo ukeselanda na ifwe fyonse ifyo Yehova Lesa akakweba,+ na ifwe tukomfwa no kucita ifyo fine.’

28 “Awe Yehova aumfwile amashiwi yenu ilyo mwasosele kuli ine, na Yehova atile kuli ine, ‘Ning’umfwa amashiwi ya aba bantu, ayo basosele kuli iwe. Fili fye bwino fyonse ifyo basosele.+ 29 Nga bakwata umutima uyu uwa kuntiina+ no kusunga amafunde+ yandi yonse inshiku shonse, ifintu kuti fyabawamina, bena na bana babo umuyayaya!+ 30 Kabiye ubebe ukuti: “Bweleleni ku matenti yenu.” 31 Lelo iwe iminina pano na ine, na ine ndekweba amafunde yonse ne fipope no bupingushi ifyo ukabasambilisha+ pa kuti bakalefikonka mu calo ico ndebapeela ukuti cikabe cabo.’32 Kabili mukalebika amano ku kucita ifyo Yehova Lesa wenu amwebele.+ Mwila-alukila ku kwa kulyo nelyo ku kwa kuso.+ 33 Mu mibele yonse iyo Yehova Lesa wenu amwebele e mo mule-enda+ pa kuti mube no mweo no kuti ifintu fimuwamine+ kabili pa kutila mukekale inshiku ishingi mu calo ico mukekalamo.

6 “Nomba aya e mafunde ne fipope no bupingushi ifyo Yehova Lesa wenu atile nkamusambilishe,+ pa kuti mukalefikonka mu calo ico muleyabukilako ukuti cikabe icalo cenu; 2 pa kuti muletiina+ Yehova Lesa wenu pa kulakonka ifipope fyakwe fyonse na mafunde yakwe ayo ndemweba, imwe na bana benu na beshikulu benu,+ inshiku shonse isha mweo wenu, pa kuti inshiku sha mweo wenu shifule.+ 3 E ico umfweni mwe bana ba kwa Israele, kabili mubike amano ku kuficita,+ pa kuti ifintu fimuwamine+ kabili pa kuti mufule nga nshi, nga mulya mwine Yehova Lesa wa fikolwe fyenu amulaile,+ ukukuma ku calo umwaba umukaka no buci.

4 “Umfweni mwe bana ba kwa Israele: Yehova Lesa wesu ni Yehova umo.+ 5 Kabili muletemwa Yehova Lesa wenu no mutima+ wenu onse no mweo+ wenu onse na maka yenu yonse.+ 6 Kabili amashiwi ayo ndemweba lelo yabe mu mitima yenu;+ 7 kabili muleyasambilisha ku bana+ benu no kuyalandapo ilyo mwikele mu mayanda yenu na lintu mule-enda mu musebo na pa kulaala+ na pa kubuuka. 8 Kabili yaleba nge cishibilo icakakilwa pa kuboko,+ kabili yaleba nge ca kukaka pa mpumi;+ 9 kabili mukayalembe pa nceshi sha pa miinshi isha mayanda yenu na pa mpongolo sha mu musumba wenu.+

10 “Kabili ilyo Yehova Lesa wenu akamwingisha mu calo ico alapile ku fikolwe fyenu, kuli Abrahamu, Isaki na Yakobo ukuti akamupeela,+ imisumba iikalamba kabili iimoneka bwino iyo mushakuulile,+ 11 na mayanda ayaisulamo ifisuma ayo mushaiswishemo, ne fya kusungilamo amenshi ifyafukulwa ifyo mushafukwile, imyangashi ne miolife iyo mushalimbile, na imwe mwalya no kwikuta,+ 12 mukacenjele epali mwalaba+ Yehova, uwamufumishe mu calo ca Egupti, mu ng’anda ya busha. 13 Yehova Lesa wenu e o muletiina,+ kabili e o mulebombela,+ kabili mulelapila mwi shina lyakwe.+ 14 Mwilakonka balesa bambi, balesa bonse aba bantu bamushinguluka,+ 15 (pantu Yehova Lesa wenu uuli mu kati kenu ni Lesa uufwaya ukupepwa fye eka,)+ epali Yehova Lesa wenu akalipa pali imwe+ kabili amulofya pano calo.+

16 “Mwilaesha Yehova Lesa wenu,+ nga filya mwamweseshe pa Masa.+ 17 Mulesunga amafunde ya kwa Yehova Lesa+ wenu ne fya kushimika+ fyakwe ne fipope+ fyakwe ifyo amwebele.+ 18 Kabili mulecita icalungama kabili icisuma mu menso ya kwa Yehova, pa kuti ifintu filemuwamina+ no kuti mwingile no kukwata icalo cisuma ico Yehova alapile ku fikolwe fyenu,+ 19 pa kutamfya abalwani benu bonse ku cinso cenu, nga mulya mwine Yehova alaile.+

20 “Nga ca kuti umwana obe akwipusha ku ntanshi+ ati, ‘Bushe amafunde ne fipope no bupingushi ifyo Yehova Lesa wesu amupeele, fya nshi?’ 21 e lyo ukasuke umwana obe ati, ‘Twali abasha kuli Farao mu Egupti, lelo Yehova atufumishe mu Egupti ku kuboko ukwakosa.+ 22 Yehova alecita ifishibilo ne fipesha amano,+ ifikalamba kabili ifya kuleta ubonaushi, pali Egupti, pali Farao na pa ba mu ng’anda yakwe yonse kabili twali-imwenene ifi fintu.+ 23 Kabili atufumishe mulya ukuti atulete kuno ku kutupeela icalo ico alapile kuli bashifwe.+ 24 E fyo Yehova atwebele ukulaumfwila aya mafunde+ yonse, ku kutiina Yehova Lesa wesu ukuti tulemwenamo+ lyonse, ukuti tube aba mweo ifyo tuli ubwa lelo.+ 25 Kabili tukaba abalungami,+ nga twabika amano ku kucita amafunde yonse aya ku cinso ca kwa Yehova Lesa wesu, nga filya atwebele.’+

7 “Ilyo Yehova Lesa wenu akamwingisha mu calo ico muleingilamo pa kuti cikabe icenu,+ akafumyapo ne nko ishingi ku cinso cenu,+ abena Hiti+ na bena Gegashi+ na bena Amore+ na bena Kanaani+ na bena Perisi+ na bena Hibi+ na bena Yebusi,+ inko cinelubali (7) ishikalamba kabili isha maka ukucila imwe.+ 2 Kabili Yehova Lesa wenu akashipeela kuli imwe, na imwe mukashicimfye.+ Mukashonaule.+ Mwikacita na bo icipangano nangu ukuba no luse kuli bena.+ 3 Kabili mwikofishanya na bo. Abana benu abanakashi mwikabapeela ku bana babo abaume, kabili abana babo abanakashi mwikabuulila abana benu abaume.+ 4 Pantu bakalenga abana benu abaume ukuleka ukunkonka,+ kabili bakabombela balesa bambi; no bukali bwa kwa Yehova bukesa pali imwe, na o akamulofya bwangu.+

5 “Lelo ifi e fyo mukacite kuli bena: Mukabongolole ifiipailo fyabo,+ mukatobaule ne fyaimikwa fyabo ifya mabwe,+ mukaputule+ ne fimuti fyabo ifyaimikwa,+ ne fimpashanya fyabo ifyabaswa mukoce mu mulilo.+ 6 Pantu muli bantu ba mushilo kuli Yehova Lesa wenu.+ Ni mwe Yehova Lesa wenu asala ukuba abantu bakwe, ukuba nge cipe cakwe ica mutengo, ukufuma mu bantu na bantu aba pano isonde.+

7 “Te pa mulandu wa kuti mwalifulishe ukucila abantu na bantu e co Yehova amutemenenwe no kumusala,+ na kuba mwali abacepesha mu bantu na bantu bonse.+ 8 Lelo ni pa mulandu wa kuti Yehova alimutemenwe,+ na pa mulandu wa kusunga umulapo uo alapile ku fikolwe fyenu,+ e co Yehova amufumishe ku kuboko ukwakosa,+ ukuti amulubule mu ng’anda ya busha,+ mu minwe ya kwa Farao imfumu ya Egupti. 9 Kabili mwalishiba bwino bwino ukuti Yehova Lesa wenu e Lesa wa cine,+ e Lesa wa cishinka,+ uusunga icipangano+ kabili uwaba ne cikuuku ku bamutemwa na basunga amafunde yakwe ukufika ku ba nkulo yalenga ikana limo (1,000),+ 10 lelo onse uwamupata alalolenkana nankwe no kumonaula.+ Takashingashinge ukonaula umuntu uwamupata; akalolenkana nankwe. 11 Kabili mulesunga amafunde ne fipope no bupingushi ifyo ndemweba lelo kabili muleficita.+

12 “Kabili nga mwatwalilila ukumfwa ubu bupingushi kabili mulebusunga no kulabucita,+ na o Yehova Lesa wenu akulasunga icipangano+ no kuba ne cikuuku kuli imwe ifyo alapile ku fikolwe fyenu.+ 13 Kabili akamutemwa no kumupaala+ no kumufusha+ no kupaala abana abakafuma mu mafumo+ yenu ne fisabo fya mu mushili wenu,+ ingano shenu no mwangashi wenu na mafuta yenu, abana ba ng’ombe shenu na bana ba mpaanga shenu,+ mu calo ico alapile ku fikolwe fyenu ukumupeela.+ 14 Mukaba abapaalwa ukucila abantu na bantu bonse.+ Muli imwe tamwakabemo umwaume nelyo umwanakashi uwabula abana, nangu ni mu fitekwa fyenu.+ 15 Kabili Yehova akafumya pali imwe ubulwele bonse; kabili na malwele yonse ayabipa aya mu Egupti ayo mwaishiba,+ takayalete pali imwe, lelo akayaleta pali bonse abapata imwe. 16 Kabili mukalofye abantu na bantu bonse abo Yehova Lesa wenu alemupeela.+ Amenso yenu yekabomfwila ubulanda;+ kabili mwikabombela balesa babo,+ pantu e bakaba iciteyo kuli imwe.+

17 “Nga ca kutila mu mutima obe watila, ‘Inko ishi shankulila. Nkashitamfya shani?’+ 18 wikashitiina.+ Lyonse ukaleibukisha ifyo Yehova Lesa obe acitile kuli Farao na kuli Egupti onse,+ 19 ifya kwesha ifikalamba ifyo amenso yobe yamwene,+ ne fishibilo ne fipesha amano+ no kuboko ukwakosa+ no kuboko ukwatambululwa+ uko Yehova Lesa wenu amufumiisheko.+ E fyo Yehova Lesa wenu akacita ku bantu na bantu bonse abo muletiina.+ 20 Kabili Yehova Lesa wenu akatuma no mwenso+ muli bena, bakasuke abaloba abasheleko+ na balefisama ku cinso cenu. 21 Mwikatiina pa mulandu wabo, pantu Yehova Lesa wenu ali mu kati kenu,+ Lesa umukulu kabili uwa kutiinya.+

22 “Kabili Yehova Lesa wenu akatamfya ishi nko ku cinso cenu panono panono.+ Tamwakasuminishiwe ukushilofya bwangu, epali ifinama fya mu mpanga fyafula pali imwe. 23 Kabili Yehova Lesa wenu akabapeela kuli imwe no kubalenga ukubwelela inuma mu cimfulunganya icikalamba, bakasuke abaloba.+ 24 Kabili akapeela ishamfumu shabo mu minwe yenu,+ kabili mukalofye amashina ya shiko mwi samba lya muulu.+ Takuli nangu umo uukeminina kuli imwe,+ mukasuke amushilofya.+ 25 Ifimpashanya fyabaswa ifya balesa babo mukoce mu mulilo.+ Mwikakumbwa silfere na golde iili pali fyena,+ nangu kuibuula yaba iyenu,+ epali mwaikatwako mu citeyo;+ pantu ca bunani+ kuli Yehova Lesa wenu. 26 Kabili mwikengisha ica bunani mu ng’anda yenu epali mwaonaulwa nge co cine. Mukacimone ukuti ca bunani kabili cikamuselaushe,+ pantu cintu icifwile ukonaulwa.+

8 “Amafunde yonse ayo ndemweba lelo mulebikako amano ukuyasunga,+ pa kuti mube no mweo+ kabili mufule nga nshi, mwingile na mu calo ico Yehova alapile ku fikolwe fyenu.+ 2 Kabili muleibukisha inshila yonse iyo Yehova Lesa wenu amwenseshemo iyi myaka amakumi yane (40) mu matololo,+ pa kuti amuceefye,+ ukumwesha+ pa kutila eshibe icali mu mitima yenu,+ nga kuti mwasunga amafunde yakwe napamo iyo. 3 E fyo amuceefeshe no kumuleka ne nsala+ no kumuliisha mana,+ uo mushaishibe kabili uo ne fikolwe fyenu fishaishibe; pa kuti mwishibe ukuti te ku fya kulya fyeka umuntu ekalila no mweo lelo ku mashiwi yonse ayafuma mu kanwa ka kwa Yehova e ko umuntu ekalila no mweo.+ 4 Ifya kufwala fyenu tafyasapwike, na makasa yenu tayafimbile iyi myaka amakumi yane (40).+ 5 Kabili mwalishiba bwino bwino mu mitima yenu ukuti filya fine umuntu alungika umwana wakwe umwaume, e fyo Yehova Lesa wenu alemulungika.+

6 “Kabili mukalesunga amafunde ya kwa Yehova Lesa wenu pa kwenda mu nshila shakwe+ na pa kumutiina.+ 7 Pantu Yehova Lesa wenu alemwingisha mu calo icisuma,+ icalo ca mimana, ica tumfukumfuku na menshi ayengi ifyafuma mu mpanga iyabatama+ na mu mpili, 8 icalo ca ngano na barle ne myangashi ne mikunyu ne mipomegranate,+ icalo ca miolife ya mafuta no buci,+ 9 icalo ico tamwakalyemo ifya kulya ifinono, umo mushakabulwe nangu cimo, icalo icakwata amabwe ya cela na mu mpili sha ciko mukembamo umukuba.

10 “Ilyo mwalya no kwikuta,+ mukaletasha+ na Yehova Lesa wenu pa calo icisuma ico amupeele.+ 11 Cenjeleni ukuti tamulabile+ Yehova Lesa wenu pa kukanasunga amafunde yakwe no bupingushi bwakwe ne fipope fyakwe ifyo ndemweba lelo;+ 12 epali mwalya no kwikuta, mwakuula na mayanda ayasuma no kwikalamo,+ 13 ne ng’ombe shenu ne mpaanga shenu fyasanda, na silfere na golde yenu yafula, na fyonse ifyo mwakwata fyasanda;14 ne mitima yenu yaisansabalika+ kabili mwalaba na Yehova Lesa wenu, uwamufumishe mu calo ca Egupti, mu ng’anda ya busha;+ 15 uwamulengele ukwenda mu matololo ayakalamba kabili aya kutiinya,+ umwali insoka sha busungu+ na bakaling’ongo no mushili wa cilaka umushali menshi, uwamufumiishe amenshi mu cilibwe icakosa nga nshi;+ 16 uwamuliishishe mana+ mu matololo, iyo ifikolwe fyenu fishaishibe, pa kuti amuceefye+ kabili amweshe pa kuti akamucitile ifisuma ku ntanshi;+ 17 kabili mwatila mu mitima yenu, ‘Amaka yandi no kukosa kwa kuboko kwandi e fyandetela ifi fyuma.’+ 18 Kabili muleibukisha Yehova Lesa wenu, pantu e umupeela amaka ya kunonka icuma;+ pa kuti afishepo icipangano cakwe ico alapile ku fikolwe fyenu, ifyo cili lelo.+

19 “Kabili nga ca kuti mukalaba Yehova Lesa wenu no kukonka balesa bambi no kubabombela no kubafukamina, ndemweba icine cine lelo nati ukuloba mukaloba.+ 20 Mukaloba nge nko isho Yehova alelofya ku cinso cenu, pantu tamwakakutike kwi shiwi lya kwa Yehova Lesa wenu.+

9 “Umfweni, mwe bena Israele, lelo muleabuka uyu Yordani+ pa kuti mwingile no kupoka icalo ku nko ishikalamba kabili isha maka ukucila imwe,+ imisumba iikalamba kabili iya malinga ayatali icine cine,+ 2 abantu amapaka kabili abatali, bamwana Anaki,+ abo mwaishiba kabili abo mwaumfwile abantu balelandapo ati, ‘Nani engeminina ku bana ba kwa Anaki?’ 3 Kabili namwishiba bwino lelo ukuti Yehova Lesa wenu e ulemutangilila pa kwabuka.+ Lesa wenu mulilo uonaula.+ Akabalofya,+ kabili akabacimfisha pa ntanshi yenu; kabili mukabapoke icalo no kubalofya bwangu, nga filya fine Yehova asosele kuli imwe.+

4 “Ilyo Yehova Lesa wenu akabatamfya ku cinso cenu, mwikasosa mu mitima yenu amuti, ‘Mulandu wa bulungami bwesu e co Yehova atupeelela icalo ici,’+ pantu ni pa mulandu wa fyabipa ificita ishi nko e co Yehova aleshitamfisha ku cinso cenu.+ 5 Te pa mulandu wa bulungami+ bwenu nelyo bukaele bwa mitima yenu+ e co mulepokela icalo ca shiko; ni pa mulandu wa fyabipa ificita ishi nko e co Yehova Lesa wenu aleshitamfisha ku cinso cenu,+ kabili ni pa mulandu wa kuti Yehova afishepo ifyo alapile ku fikolwe fyenu, kuli Abrahamu,+ kuli Isaki+ na kuli Yakobo.+ 6 Kabili mwishibe ukuti te mulandu wa bulungami bwenu e co Yehova Lesa wenu alemupeelela ici calo icisuma; pantu imwe muli bantu abatalama imikoshi.+

7 “Ibukisheni ici: Mwikalaba ifyo mwakalifye Yehova Lesa wenu mu matololo.+ Ukutula pa bushiku mwafumine mu calo ca Egupti mpaka ne lyo mwafikile kuno kuntu, mwaba fye abatalama kuli Yehova.+ 8 Na mu Horebu mwalengele Yehova ukukalipa ica kuti Yehova afuliilwe imwe icine cine kabili apene amulofye.+ 9 Ilyo naninine ulupili ku kupoka amabwe ayapaapaatala,+ aya cipangano ico Yehova apangene na imwe,+ naikele mu lupili inshiku amakumi yane (40) akasuba no bushiku,+ (nshalelya nelyo ukunwa amenshi,) 10 e lyo Yehova ampeele amabwe yabili ayapaapaatala ayalembwapo ku munwe wa kwa Lesa;+ kabili pali amashiwi yonse ayo Yehova asosele kuli imwe mu lupili mu kati ka mulilo mu bushiku mwalongene.+ 11 Kabili ilyo shapwile nshiku amakumi yane (40) akasuba no bushiku Yehova ampeele amabwe yabili ayapaapaatala, aya cipangano;+ 12 kabili Yehova atile kuli ine, ‘Ima, tentemuka bwangu ukufuma pano, pantu abantu bobe abo wafumishe mu Egupti nabayonaula.+ Bafuma bwangu mu nshila iyo nabebele. Nabaipangila icimpashanya icaengwa.’+ 13 Kabili Yehova akonkenyepo ukusosa kuli ine ati, ‘Nimona aba bantu, kabili mona! bantu abatalama imikoshi.+ 14 Leka mbalofye+ mpase ne shina lyabo mwi samba lya muulu,+ kabili leka nenge iwe ukuba uluko lwakosa kabili ulukalamba ukubacila.’+

15 “Awe nalyalwike no kutentemuka ulupili, ilyo ulupili lwalepya umulilo;+ na mabwe yabili ayapaapaatala aya cipangano yali mu minwe yandi.+ 16 Kabili naliloleshe, kabili moneni mwabembukile Yehova Lesa wenu! Mwaipangiile umwana wa ng’ombe uwaengwa.+ Mwafumine bwangu mu nshila iyo Yehova amwebele.+ 17 Na ine nabuulile amabwe yabili ayapaapaatala ayali mu minwe yandi no kuyapoosa pa nshi no kuyatoba ninshi mulemonako.+ 18 Awe nawile ubukupeme ku cinso ca kwa Yehova, nga pa kubala, inshiku amakumi yane (40) akasuba no bushiku. Nshalelya nangu ukunwa amenshi,+ pa mulandu wa lubembu lwenu lonse ulo mwabembwike pa kucita icabipa mu menso ya kwa Yehova ku kumukalifya.+ 19 Pantu nalitiinine pa mulandu wa fyo Yehova akalipe pa co mwacitile ica kuti apene amulofye.+ Lelo, Yehova akutike kuli ine na pa nshita ilya.+

20 “Yehova afulilwe icibi na pali Aarone ica kuti apene amulofye;+ lelo na o nalimupapaatileko+ muli ilya nshita. 21 Kabili ulubembu lwenu ulo mwacitile, e kuti umwana wa ng’ombe uo mwapangile,+ nalimubuulile no kumoca mu mulilo no kumushonaula, ukumupela asuka aba ngo lukungu; kabili napoosele no bo ubungululu mu mumana uwatentemuka ulupili.+

22 “Kabili, ku Tabera+ na ku Masa+ na ku Kibrote-hataaba+ e ko mwalengele Yehova ukukalipa.+ 23 Kabili ilyo Yehova amufumishe ku Kadeshe-barnea,+ ati, ‘Kabiyeni no kuyapoka icalo ico nalamupeela!’ mwakeene ukukonka icipope ca kwa Yehova Lesa wenu,+ kabili tamwamutetekele+ nangu kumfwa kwi shiwi lyakwe.+ 24 Ukufuma fye pa bushiku namwishibe, imicitile yenu kuli Yehova ilanga fye ukuti mwalitalama.+

25 “Awe naleele ubukupeme ku cinso ca kwa Yehova inshiku amakumi yane (40) akasuba no bushiku,+ naleele ubukupeme muli uyu musango pantu Yehova atile akamulofya.+ 26 Kabili natendeke ukupapaata+ kuli Yehova no kutila, ‘Mwe Shikulu Mulopwe Yehova, mwionaula abantu benu, ababa nge cipe cenu icaibela,+ abo mwalubwile ku maka yenu ayakalamba, abo mwafumishe mu Egupti+ ku kuboko ukwakosa.+ 27 Ibukisheni ababomfi benu Abrahamu, Isaki na Yakobo.+ Mwibika amano ku bumankonso bwa aba bantu na ku fyabipa ifyo bacita na ku lubembu lwabo,+ 28 epali aba mu calo+ ico mwatufumishemo batila: “Pantu Yehova alifililwe ukubengisha mu calo ico abalaile, kabili pantu alibapatile, e co abatwalile mu matololo ku kubepaya.”+ 29 Na imwe bene bantu benu kabili baba nge cipe icaibela+ kuli imwe, abantu abo mwafumishe ku maka yakalamba na ku kuboko kwenu ukwatambululwa.’+

10 “Mu nshita ilya Yehova atile kuli ine, ‘Basa amabwe yabili ayapaapaatala nga ya ntanshi,+ kabili unine kuli ine mu lupili, kabili upange ne cipao ca cimuti.+ 2 Na ine nkalemba pa mabwe yapaapaatala amashiwi ayali pa mabwe ya ntanshi, ayo watobele, kabili ukayabike mu cipao.’ 3 Awe napangile icipao ku cimuti ca mushita no kubasa amabwe yabili ayapaapaatala nga ya pa kubala+ no kunina mu lupili, na mabwe yabili yali mu minwe yandi. 4 Kabili alembele pa mabwe yapaapaatala ifilembo fimo fine nge fya pa kubala,+ Amashiwi Ikumi (10),+ ayo Yehova asosele kuli imwe mu lupili ukufuma mu kati ka mulilo+ mu bushiku mwalongene;+ na pa numa Yehova ayapeele kuli ine. 5 Awe nalyalwike no kutentemuka ulupili+ no kubika amabwe yapaapaatala mu cipao ico napangile, ukuti yekale mulya, nga filya fine Yehova anjebele.+

6 “Kabili abana ba kwa Israele bafumine ku Beerote Bene-yaakani+ no kuya ku Mosera. Kulya e ko Aarone afwilile, kabili e ko ashiikilwe;+ na Eleasari umwana wakwe umwaume alimupyene pali bushimapepo.+ 7 Bafumine kulya no kuya ku Gudigoda, kabili ukufuma ku Gudigoda baile ku Yotebata,+ icalo ca mimana.

8 “Muli ilya nshita Yehova apaatwile umukowa wa kwa Lebi+ ukuti e wakulasenda icipao ca cipangano ca kwa Yehova,+ no kwiminina ku cinso ca kwa Yehova, ku kumubombela+ no kulapaalila mwi shina lyakwe ukufika na lelo.+ 9 E co Lebi ashakwatila impanga nangu ubupyani+ pamo na bamunyina. Yehova e bupyani bwakwe, nga filya fine Yehova Lesa wenu asosele kuli ena.+ 10 Lelo ine, naikele mu lupili inshiku nga shilya isha pa kubala, inshiku amakumi yane (40) akasuba no bushiku,+ kabili Yehova abwekeshepo ukukutika kuli ine muli ilya nshita.+ Yehova tafwaile ukumonaula.+ 11 Kabili Yehova atile kuli ine, ‘Ima, kabiye ku bantu ukuti beme baye, bengile no kupoka icalo ico nalaile kuli bashibo ukuti nkabapeela.’+

12 “Nomba mwe bena Israele, cinshi Yehova Lesa wenu alefwaya kuli imwe?+ Yehova Lesa wenu alefwaya ukuti mulemutiina,+ pa kuti mule-enda mu nshila+ shakwe shonse no kumutemwa+ no kubombela Yehova Lesa wenu no mutima wenu onse no mweo wenu onse;+ 13 ukuti mulekonka amafunde ya kwa Yehova ne fipope+ fyakwe ifyo ndemweba lelo, pa kuti ifintu filemuwamina.+ 14 Moneni, imyulu ya kwa Yehova Lesa wenu,+ ne myulu ya myulu, pamo ne sonde+ na fyonse ifyabapo. 15 Ku fikolwe fyenu fye e ko Yehova apaleme pa kuti abatemwe, ica kuti asalile abana babo abali no kukonkapo,+ e kutila imwe bene, pa bantu bonse, nge fyo cili lelo. 16 E ico sembululeni inkanda ya pa mpela ya mitima+ yenu no kukanatalamika imikoshi yenu na kabili.+ 17 Pantu Yehova Lesa wenu ni Lesa uwacila balesa+ bonse kabili ni Shikulu uwacila bashikulu bonse,+ Lesa mukulu, uwa maka kabili uwa kutiinya,+ taba na kapaatulula+ kabili tapoka amafisakanwa,+ 18 apingwila umwana wa nshiwa na mukamfwilwa+ kabili atemwa umulebeshi+ ku kumupeele ifya kulya ne fya kufwala. 19 Na imwe bene muletemwa umulebeshi,+ pantu mwali abalebeshi mu calo ca Egupti.+

20 “Muletiina Yehova Lesa wenu.+ E o mulebombela,+ kabili kuli ena e ko mulelambatila,+ na mwi shina lyakwe e mo mulelapila.+ 21 Ena eka e o mulelumbanya,+ kabili e Lesa wenu, uwamucitiile ifintu ifikalamba kabili ifya kutiinya ifyo amenso yenu yamwene.+ 22 Ilyo ifikolwe fyenu fyaile ku Egupti+ bali fye abantu amakumi cinelubali (70), lelo nomba Yehova Lesa wenu amulenga ukufula nge ntanda sha mu muulu.+

11 “Kabili muletemwa Yehova Lesa+ wenu no kulamumfwila, mulekonka ne fipope fyakwe no bupingushi+ bwakwe na mafunde yakwe, inshiku shonse. 2 Kabili namwishiba bwino lelo (pantu nshile-eba abana benu abashaishiba kabili abashamona ukusalapula kwa kwa Yehova+ Lesa wenu, ubukulu bwakwe,+ ukuboko kwakwe ukwakosa+ no kuboko kwakwe ukwatambululwa,+ 3 nelyo ifishibilo fyakwe ne milimo yakwe iyo acitile mu Egupti+ kuli Farao imfumu ya Egupti na ku calo cakwe conse; 4 nelyo ifyo acitile ku bashilika ba ku Egupti, kuli bakabalwe babo na ku maceleta yabo, ifyo alengele amenshi ya muli Bemba Wakashika ukubunsha balya bantu ilyo balebafulumuna,+ kabili Yehova alibonawile ica kuti ukufika na lelo tababa nge fyo bali;+ 5 nelyo ifyo amucitiile mu matololo mwasuka mwafika kuno kuntu; 6 nelyo ifyo acitile kuli Datani na Abiramu+ bamwana Eliabu mwana Rubene, ilyo umushili wayasamwine akanwa ka uko no kubamina pamo na ba mu mayanda yabo na matenti yabo na babomfi babo bonse ababakonkele pamo ne fitekwa fyabo fyonse mu kati ka kwa Israele onse);+ 7 pantu mwali-imwenene na menso yenu imilimo yonse iikalamba iyo Yehova acitile.+

8 “Kabili mulesunga amafunde+ yonse ayo ndemweba lelo, pa kuti mukose no kwingila ku kukwata icalo ico muleabukilako ukuti cibe cenu,+ 9 kabili pa kuti mwikale inshiku+ ishingi mu calo ico Yehova alapile ukupeela ifikolwe fyenu na bana babo,+ icalo umwaba umukaka no buci.+

10 “Pantu icalo ico muleya mu kupoka tacili nge calo ca Egupti ico mwafuminemo, umo mwaletanda imbuto no kutapilila ku makasa yenu, nge bala lya musalu. 11 Lelo icalo ico muleya mu kupoka calo ca mpili kabili ica nika.+ Amenshi cinwa ni mfula ya mu muulu; 12 icalo ico Yehova Lesa wenu abikako amano. Amenso+ ya kwa Yehova Lesa wenu yalolesha pali ici calo inshita pe, ukutula pa kutendeka kwa mwaka no kufika ku kupwa kwa mwaka.

13 “Kabili nga mukomfwila amafunde+ yandi ayo ndemweba lelo pa kuti muletemwa Yehova Lesa wenu no kumubombela no mutima wenu onse no mweo wenu onse,+ 14 na ine nkamupeela imfula ku kutapilila icalo cenu pa nshita ya iko,+ imfula ya kubangilila ne mfula ya kulekelesha,+ kabili mukalonganika ingano shenu ne myangashi yenu na mafuta yenu. 15 Kabili nkamesha umulemfwe mu mpanga yenu uwa fitekwa fyenu,+ na imwe mukalya no kwikuta.+ 16 Cenjeleni ukuti imitima yenu ikabelelekwa,+ ica kuti mwafuma mu nshila mwalapepa na balesa bambi no kubakontamina,+ 17 na Yehova aba no bukali pali imwe, aisala ne myulu pa kutila kwiba imfula+ no mushili wakaana ukufumya ubulimi bwa uko na imwe mwaloba bwangu mu calo icisuma ico Yehova alemupeela.+

18 “Kabili mubike amashiwi yandi aya mu mitima+ yenu na ku myeo yenu kabili yabe nge cishibilo cakakilwa pa kuboko, kabili yabe nge ca kukaka pa mpumi.+ 19 Kabili mulesambilisha abana benu aya mashiwi, muleyasosa ilyo mwikele mu mayanda yenu na lintu mule-enda mu nshila na pa kulaala na pa kubuuka.+ 20 Kabili mukayalembe pa nceshi sha pa miinshi isha mayanda yenu na pa mpongolo shenu,+ 21 pa kuti mukekale inshiku ishingi+ imwe na bana benu mu calo ico Yehova alapile ku fikolwe fyenu ukubapeela,+ lyonse ilyo imyulu ikaba pa muulu we sonde.+

22 “Pantu nga mwakulasunga amafunde+ yonse aya ayo ndemweba no kuyakonka, ukutemwa Yehova Lesa+ wenu, ukwenda mu nshila shakwe shonse+ no kulambatila kuli ena,+ 23 Yehova na o akatamfya inko shonse ishi pa mulandu wenu,+ kabili mukapoka icalo ca nko ishi ishikalamba kabili ishafula ukucila imwe.+ 24 Ponse apakanyanta ulukasa lwenu pakaba penu.+ Ukutula ku matololo ukufika ku Lebanone, ukutula pa Mumana, umumana wa Yufrate, ukufika kuli bemba wa ku masamba e kukaba umupaka wenu.+ 25 Takuli nangu umo uukeminina pa ntanshi yenu.+ Yehova Lesa wenu akalenga aba mu calo+ conse ico mwanyantapo ukumutiina no kuba no mwenso, nga filya fine amulaile.

26 “Moneni, ndebika pali imwe lelo ipaalo ne citiipu:+ 27 mukapaalwa nga ca kutila mukomfwila amafunde ya kwa Yehova Lesa+ wenu ayo ndemweba lelo;28 kabili mukatiipwa+ nga ca kutila tamwakomfwile amafunde ya kwa Yehova Lesa+ wenu kabili nga mwafuma na mu nshila iyo ndemweba lelo, no kukonka balesa bambi abo mushaishiba.

29 “Kabili ilyo Yehova Lesa wenu amwingisha mu calo ico muli no kupoka,+ mukabike ne paalo pa Lupili lwa Gerisimu+ ne citiipu pa Lupili lwa Ebali.+ 30 Bushe tashili bushilya bwa Yordani ukulola ukuwila akasuba, mu calo ca bena Kanaani abekala mu Araba,+ apalungatana na Gilgali,+ mupepi ne miti ikalamba iya kwa More?+ 31 Pantu muleabuka uyu Yordani ku kwingila no kupoka icalo ico Yehova Lesa wenu alemupeela, kabili mukacipoke no kwikalamo.+ 32 Kabili mulebika amano ku kucita ifipope fyonse no bupingushi+ ifyo ndemweba lelo.+

12 “Aya e mafunde+ no bupingushi+ ifyo mulingile ukubikako amano ukukonka+ mu calo ico Yehova Lesa wa fikolwe fyenu akamupeela, inshiku shonse isho mukaba no mweo pano nse.+ 2 Mukonaule+ ififulo fyonse umo inko mulepoka icalo shalebombela balesa ba shiko, pa mpili shasansuka na pa tupili na mwi samba lya muti onse uwalelema.+ 3 Kabili mukabongolole ifiipailo+ fyabo no kutobaula ifyaimikwa fyabo ifya mabwe,+ kabili mukoce mu mulilo ifimuti fyabo ifyaimikwa+ no kuputaula balesa babo ababaswa,+ kabili mukalofye ne shina lyabo mulya muntu.+

4 “Mwikacita ifyo kuli Yehova Lesa wenu,+ 5 lelo mukafwaye icifulo ico Yehova Lesa wenu akasala mu mikowa yenu yonse no kubikapo ishina lyakwe, pa kuti likale palya, na imwe e ko mukaye.+ 6 Kabili e ko mukaletwala imituulo yenu iya koca+ na malambo yenu ne fya pe kumi+ fyenu no musangulo wa mu minwe yenu+ ne mituulo+ ya mulapo wenu ne mituulo+ yenu iya kuitemenwa na mabeli ya ng’ombe shenu na ya mpaanga shenu.+ 7 Kabili mukaleliila kulya kuntu ku cinso ca kwa Yehova Lesa+ wenu no kusekelela mu mulimo wenu onse,+ imwe na ba mu mayanda yenu, pantu Yehova Lesa wenu namupaala.

8 “Mwikacita fyonse ifyo tulecita pano lelo, cila muntu ukulacita ifyo alemona ukuti e fyalungama,+ 9 pantu mucili tamulaingila umwa kutuushisha,+ mu calo ico Yehova Lesa wenu alemupeela. 10 Kabili mukaabuke Yordani+ no kwikala mu calo ico Yehova Lesa wenu alemupeela ukuti cibe cenu,+ kabili akamulenga ukutuusha ku balwani benu bonse abamushinguluka, kabili mukekala umutelelwe.+ 11 Kabili icifulo+ ico Yehova Lesa wenu akasala pa kuti ishina lyakwe likale mulya e ko mukaletwala fyonse ifyo ndemweba, imituulo+ yenu iya koca na malambo yenu, ifya pe kumi+ fyenu no musangulo+ wa mu minwe yenu na fyonse ifyo mwasala ukuti fibe imituulo ya mulapo+ wenu uo mukalapa kuli Yehova. 12 Kabili mukasekelele ku cinso ca kwa Yehova Lesa wenu,+ imwe na bana benu abaume na bana benu abanakashi na babomfi benu abaume na babomfi benu abanakashi no mwina Lebi uuli mu kati ka mpongolo shenu, pantu takwata impanga nelyo ubupyani pamo na imwe.+ 13 Cenjeleni epali mwatuula imituulo ya koca mu cifulo conse ico mwamona.+ 14 Lelo mu cifulo Yehova akasala, mu mukowa wenu umo, e mo mukaletuulila imituulo yenu iya koca, kabili e mo mukalecitila fyonse ifyo ndemweba.+

15 “Ilyo mwafuluka ukulya inama e lyo mwingaipaya,+ kabili mukalelya inama ukulingana ne paalo lya kwa Yehova Lesa wenu ilyo amupeela, mu kati ka mpongolo shenu. Uwakowela+ no wasanguluka kuti ailya, pamo nge mpombo ne nsebula.+ 16 Umulopa wena mwikalalya.+ Mukaupongolole pa nshi nga menshi.+ 17 Tamwakasuminishiwe ukuliila mu kati ka mpongolo shenu ica pe kumi ica ngano+ nelyo ica mwangashi nelyo ica mafuta yenu nelyo amabeli ya ng’ombe shenu na ya mpaanga shenu+ nelyo imituulo yonse iya mulapo wenu uo mukalapa nelyo imituulo+ yenu iya kuitemenwa nelyo umusangulo wa mu minwe yenu.+ 18 Lelo ku cinso ca kwa Yehova Lesa wenu e ko mukafiliile, mu cifulo ico Yehova Lesa wenu akasala,+ imwe na bana benu abaume na bana benu abanakashi na babomfi benu abaume na babomfi benu abanakashi na bena Lebi abali mu kati ka mpongolo shenu; kabili mukasekelele+ ku cinso ca kwa Yehova Lesa wenu mu mulimo wenu onse. 19 Cenjeleni ukuti tamulekeleshe abena Lebi+ inshiku shenu shonse isha pano calo.

20 “Ilyo Yehova Lesa wenu akakusha icalo cenu,+ nga filya fine amulaile,+ na imwe mukatila, ‘Lekeni tulye inama,’ pantu twafuluka ukulya inama, ilyo lyonse mwafuluka ukulya inama kuti mwalya.+ 21 Nga ca kuti icifulo ico Yehova Lesa wenu akasala ukubikapo ishina+ lyakwe cikaba ukutali kuli imwe, mukepayepo ing’ombe shenu shimo nelyo impaanga shenu shimo isho Yehova amupeela, nge fyo namwebele, kabili mukaliile mu kati ka mpongolo shenu ilyo lyonse mwafuluka ukulya inama.+ 22 Lelo filya fine mulya impombo ne nsebula, e fyo mukalye+ ne shi shine: abakowela+ na basanguluka bonse pamo kuti balyako. 23 Mukapampamine fye pa kukanalya umulopa,+ pantu umulopa e mweo+ kabili mwikaliila umweo kumo ne nama. 24 Mwikaulya. Mukaupongolwele pa mushili kwati menshi.+ 25 Mwikaulya, pa kuti ifintu fikamuwamine+ pamo na bana benu abakakonkapo, pantu mukacita icalungama mu menso ya kwa Yehova.+ 26 Ifya mushilo+ fyenu ifikaba ifyenu, ne mituulo+ yenu iya mulapo mukasende, kabili mukese ku cifulo uko Yehova akasala.+ 27 Kabili mukaletuula imituulo ya koca,+ umunofu no mulopa,+ pa ciipailo ca kwa Yehova Lesa wenu; kabili umulopa wa malambo yenu mukaleupongolwela ku ciipailo ca kwa Yehova Lesa wenu,+ lelo umunofu wena mukalelya.

28 “Cenjeleni, kabili mukaleumfwila amashiwi yonse aya ayo ndemweba,+ pa kuti ifintu fikamuwamine+ pamo na bana benu abakakonkapo umuyayaya, pantu mukacita icalungama mu menso ya kwa Yehova Lesa wenu.+

29 “Ilyo Yehova Lesa wenu akalofya inko isho muleya mu kupoka icalo,+ mukashipoke icalo no kwikalamo.+ 30 Cenjeleni epali na imwe mwaikatwa mu citeyo cabo,+ pa numa ya kulofiwa kwa shiko ku cinso cenu, kabili epali mwaipusha pali balesa ba shiko, amuti, ‘Bushe ishi nko shalebombela shani balesa ba shiko? Na ifwe bene e fyo tukacita.’31 Mwikacita ifyo kuli Yehova Lesa wenu,+ pantu conse ica bunani kuli Yehova ico apata e co shacita kuli balesa ba shiko, pantu na bana babo abaume na bana babo abanakashi lyonse baboca mu mulilo kuli balesa ba shiko.+ 32 Amashiwi yonse ayo ndemweba e yo mukabikeko amano ukucita.+ Mwikalundako nangu ukufumyako.+

13 “Nga kasesema+ nelyo uulota ifiloto+ aima mu kati kenu kabili amupeela icishibilo nelyo asesema,+ 2 kabili icishibilo nelyo ica kusesema ico asosele kuli imwe,+ ati, ‘Natuye tukonke balesa bambi, abo mushaishibe, no kubabombela,’ caisacitika, 3 mwikakutika ku mashiwi ya kwa kasesema uyo nelyo aya walotele iciloto,+ pantu Yehova Lesa wenu alemwesha+ ukumona nga mwalitemwa Yehova Lesa wenu no mutima wenu onse no mweo wenu onse.+ 4 Mulekonka Yehova Lesa wenu, kabili e o muletiina, kabili muleumfwila na mafunde yakwe, mulekutika na kwi shiwi lyakwe, kabili e o mulebombela, kabili e o mulelambatilako.+ 5 Kabili kasesema+ ulya nelyo uulota ifiloto akepaiwe,+ pantu asosa ifya kupondokela Yehova Lesa wenu, uwamufumishe mu calo ca Egupti no kumulubula mu ng’anda ya busha, no kumufumya mu nshila iyo Yehova Lesa wenu amwebele ukwendamo;+ e ico mukafumye icabipa mu kati kenu.+

6 “Nga munonko, umwana mwaume wa kwa noko, nelyo umwana mwaume obe nelyo umwana mwanakashi obe nelyo umukashi obe uo watemwa nelyo umunobe uuli kuli iwe ngo mweo obe,+ akutunka mu bumfisolo ati, ‘Natuye tubombele balesa bambi,’+ abo iwe nelyo ifikolwe fyobe mushaishiba, 7 aba muli balesa ba bantu na bantu abashinguluka imwe, ababa mupepi na imwe nelyo ababa ukutali, ukufuma ku mpela ya calo no kufika ku mpela ya calo, 8 wikanakila ku kufwaya kwakwe+ nelyo ukukutika kuli ena, kabili ilinso lyobe likamumfwila ubulanda,+ kabili wikamubelela uluse, nelyo ukumucingilila; 9 lelo ukamwipaye.+ Ukuboko kobe e ko kukabalilepo ukuba pali ena pa kuti afwe, na maboko ya bantu bonse yakakonkepo.+ 10 Kabili ukamupoole amabwe, mpaka akafwe,+ pantu afwaile ukukufumya kuli Yehova Lesa obe, uwakufumishe mu calo ca Egupti, mu ng’anda ya busha.+ 11 Kabili abena Israele bonse bakomfwa no kutiina, kabili tabakabwekeshepo ukucita icabipa nge ci mu kati kenu.+

12 “Nga waumfwa mu musumba umo uo Yehova Lesa obe alekupeela ukwikalamo abantu balesosa ati, 13 ‘Abaume ifinangwa nabafuma mu kati+ kenu kabili baleongola abekashi ba mu musumba wabo,+ abati: “Natuye tubombele balesa bambi,” abo mushaishiba,’14 mukafwaye no kuceeceeta no kwipukisha;+ kabili nga cashininkishiwa ukuti ca cine, icintu ca bunani calicitwa mu kati kenu, 15 mukepaye abekashi ba mu musumba uyo ku lupanga.+ Mukaonaule na conse icilimo, ne fitekwa fya uko, mukafyonawile+ ku lupanga. 16 Kabili ifipe fyonse ifya muli uyo musumba ifyo mwapoka mukafilonganye pa kati ka lubansa lwa uko, kabili mukoce uyo musumba+ ne fipe fyonse fya uko ifyo mwapoka fikabe ngo mutuulo uutuntulu kuli Yehova Lesa wenu, kabili umusumba ulya ukabe ifitantaala umuyayaya.+ Wikakuulwa na kabili. 17 Kabili mwikekatilila icili conse icifwile ukonaulwa,+ pa kuti Yehova abweshemo ubukali+ bwakwe ubupya ngo mulilo no kuba ne nkumbu kuli imwe no kumubelela uluse+ no kumufusha, nga filya fine alapile ku fikolwe fyenu.+ 18 Pantu mufwile ukulakutika kwi shiwi lya kwa Yehova Lesa wenu pa kulakonka amafunde+ yakwe yonse ayo ndemweba lelo, pa kuti mulecita icalungama mu menso ya kwa Yehova Lesa wenu.+

14 “Muli bana baume ba kwa Yehova Lesa wenu.+ Mwilaiteeta+ nelyo ukuibeya ulupala+ pa mpumi shenu pa mulandu wa muntu uwafwa. 2 Pantu muli ba mushilo+ kuli Yehova Lesa wenu, kabili Yehova alimusala ukuba abantu bakwe, ukuba nge cipe cakwe ica mutengo,+ pa bantu na bantu bonse aba pano isonde.

3 “Mwilalya conse ica bunani.+ 4 Ishi e nama isho mwingalya:+ ing’ombe, impaanga ne mbushi, 5 insebula ne mpombo+ na sele ne mbushi ya mu mpanga ne mpelembe ne mpaanga ya mu mpanga ne cibushi mabwe; 6 ne nama yonse iyalepuka amabondo kabili iyapanduka pabili amabondo, iibukula insaku.+ Yena kuti mulelya. 7 Isha mu shibukula umulemfwe isho mushifwile ukulya nelyo ishalepuka amabondo ayapanduka ni shi: ingamila+ na kalulu+ na pati,+ pantu shilabukula umulemfwe lelo tashalepuka amabondo. Muleshimona ukuti shalikowela. 8 E lyo ne nkumba,+ pantu yalilepuka amabondo lelo taibukula. Muleimona ukuti yalikowela. Mwilalyako umunofu wa shiko, kabili mwilakumyako na ku fitumbi fya shiko.+

9 “Ifya mu menshi ifyo mwingalya ni fi: Conse icakwata utulebelebe na mamba mulelya.+ 10 Kabili conse icishakwata utulebelebe na mamba mwilalya.+ Mulecimona ukuti calikowela.

11 “Icuni conse icasanguluka mulelya. 12 Lelo ifi fyena mwilalya: kapumpe ne cikoshi icilye sabi, ne kubi,+ 13 na pungwa wakashika na pungwa wafiita+ ne misango yonse iya bapungwa;14 ne misango yonse iya bamwankole;+ 15 na mwakatala+ ne cipululu na petrele no lukoshi mu musango wa luko;16 akapululu ne cipululu+ ca matwi ayatali ne shipi, 17 na mukanga+ ne kubi ne nondo, 18 na kabaso ne misango yonse iya nkoba, na pupute na kasusu.+ 19 Kabili tonse utupupuka mu mabumba yakalamba muletumona ukuti twalikowela.+ Mwilalya. 20 Icipupuka conse icasanguluka mulelya.

21 “Mwilalya conse icaifwila.+ Kuti mwacipeela ku mulebeshi uuli mu mpongolo shenu, ukuti alye; nelyo kuti mwacishitisha kuli umbi umbi, pantu muli bantu ba mushilo kuli Yehova Lesa wenu.

“Mwilaipikila akana ka mbushi mu mukaka wa kwa nyina.+

22 “Mulepeela ica pe kumi pa mbuto shonse isho mwasombola mwi bala umwaka no mwaka.+ 23 Kabili mukaleliila ku cinso ca kwa Yehova Lesa wenu, mu cifulo akasala ukuti ishina lyakwe likale mulya, ica pe kumi ca ngano shenu,+ ica mwangashi wenu ne ca mafuta yenu na mabeli ya ng’ombe shenu na ya mpaanga shenu;+ pa kuti musambilile ukutiina Yehova Lesa wenu inshiku shonse.+

24 “Lelo ngo lwendo lwamulepela,+ pantu mwafilwa ukucisenda, apo icifulo ico Yehova Lesa wenu akasala ukubikapo ishina+ lyakwe cikaba ukutali sana kuli imwe, (pantu Yehova Lesa wenu akamupaala,)+ 25 mukacishitishe, kabili mukafumbate indalama mu minwe yenu no kuya ku cifulo Yehova Lesa wenu akasala. 26 Kabili mukabomfye indalama ukushitamo icili conse ico mwafuluka,+ nampo nga ni ng’ombe, impaanga, imbushi, umwangashi ne fya kunwa ifikola+ fimbi na conse ico mwafwaya; kabili kulya e ko mukaliile pa cinso ca kwa Yehova Lesa wenu no kusekelela,+ imwe na ba mu ng’anda yenu. 27 Kabili abena Lebi abali mu kati ka mpongolo shenu, mwikabalekelesha,+ pantu tabakwata impanga nelyo ubupyani pamo na imwe.+

28 “Pa mpela ya myaka itatu mukafumyepo conse ica pe kumi ica pali fyonse ifyo mwasombola muli uyo wine mwaka,+ no kucibika mu mpongolo shenu. 29 Kabili abena Lebi,+ apo tabakwata impanga nelyo ubupyani pamo na imwe, no mulebeshi+ no mwana wa nshiwa na mukamfwilwa,+ abali mu kati ka mpongolo shenu, bakese, bakalye no kwikuta; pa kuti Yehova Lesa wenu amupaale+ mu mulimo+ onse uwa minwe yenu uo mukalabomba.

15 “Lyonse ilyo imyaka cinelubali (7) yapwa mukalesuulako ku nkongole. 2 Kabili ifi e fyo mukalecita:+ onse uwakongweshe umunankwe akasuuleko ku co umunankwe akongwele. Ekapinda umunankwe nelyo munyina ukubwesha,+ pantu ni Yehova e upingwile ukulasuulako kuli ishi nkongole.+ 3 Umbi umbi+ ena kuti wamupinda; lelo fyonse ifyo wakongweshe munonko ukasuuleko. 4 Na lyo line, takuli nangu umo pali imwe uukaba umupiina, pantu Yehova akamupaala+ mu calo ico Yehova Lesa wenu alemupeela ukuti cibe cenu,+ 5 nga mwaumfwa fye kwi shiwi lya kwa Yehova Lesa wenu no kubika amano ku mafunde yonse ayo ndemweba lelo.+ 6 Pantu Yehova Lesa wenu akamupaala nga filya fine amulaile, kabili mukashimisha+ inko ishingi, lelo imwe tamwakaashime; kabili mukateka inko ishingi, lelo imwe tashakamuteke.+

7 “Nga munyinenwe aba umupiina mu kati kenu mu musumba wenu umo, mu calo cenu ico Yehova Lesa wenu alemupeela, mwikatalamika imitima yenu nelyo ukuba abatani kuli munyinenwe umupiina.+ 8 Pantu mufwile ukumufumbatwila iminwe+ no kumwashimisha conse ico alekabila, ico abulwa, ilyo asha iciikatilo. 9 Cenjeleni epali mu mitima+ yenu mwaba itontonkanyo lyabipa, no kutila, ‘Umwaka walenga cinelubali (7), umwaka wa kusuulako inkongole, wapalama,’+ na menso yenu yaba ayatani kuli munyinenwe umupiina,+ kabili mwamutana, na o alilila kuli Yehova pa mulandu wenu,+ kabili caba ulubembu kuli imwe.+ 10 Mukamupeele,+ kabili mwikaleka imitima yenu ukuba na kaso pa kumupeela, pantu pali uyu mulandu Yehova Lesa wenu akamupaala mu micitile yenu yonse na mu mulimo wenu onse.+ 11 Pantu mu calo tamwakabale amubulwa umupiina.+ E co ndemwebela nati, ‘Mulefumbatule minwe yenu kuli munyinenwe uwacula kabili umupiina uuli mu calo cenu.’+

12 “Nga munonko ashitishiwa kuli iwe, umuHebere umwaume nelyo umuHebere umwanakashi,+ kabili akubombela imyaka mutanda (6), mu mwaka walenga cinelubali (7) ukamuleke akafume kuli iwe akabe umuntungwa.+ 13 Kabili nga wamuleka afuma kuli iwe umuntungwa, wikamuleka aye minwe nkutwa.+ 14 Ukamupeeleko impaanga sha mu mukuni ne fya pa kupumina ingano pobe na mafuta ne fya mu ca kukaminamo umwangashi. Filya fine Yehova Lesa obe akupaala, e fyo ukamupeko.+ 15 Kabili ukaleibukisha ukuti wali umusha mu calo ca Egupti na Yehova Lesa obe alikulubwile.+ E co ndemwebela ifi fintu lelo.

16 “Kabili nga atila kuli iwe, ‘Nshafumeko kuli imwe!’ pantu alikutemwa pamo na ba mu ng’anda yobe, pantu ifintu fyalimuwamine ilyo ali na iwe,+ 17 e lyo ukabuule ica kutulilako no kumushintilisha ukutwi ku ciibi no kutula ukutwi kwakwe ukufisha na mu ciibi, na o akabe umusha obe umuyayaya.+ E fyo ukacite na ku mubomfi obe umwanakashi. 18 Cikakukosela ukumuleka afume kuli iwe umuntungwa;+ pantu pa myaka mutanda (6) akubombeele icilambu ca miku ibili ica walembwa fye ncito,+ kabili Yehova Lesa obe alikupaalile muli conse ico walecita.+

19 “Ibeli lyonse ililume ilyafyalwa mu ng’ombe shenu na mu mpaanga shenu mukalipeele kuli Yehova Lesa wenu.+ Mwikabomfya amabeli ayalume aya ng’ombe shenu ukubomba imilimo, nangu ukubeya amabeli ayalume aya mpaanga shenu.+ 20 Ku cinso ca kwa Yehova Lesa obe e ko ukaleliliila umwaka no mwaka mu cifulo ico Yehova akasala,+ iwe na ba mu ng’anda yobe. 21 Lelo nga mwaba iya kalema, iisunta nelyo impofu, akalema akali konse akabipa, wikalipaila Yehova Lesa obe.+ 22 Ukaliliile mu kati ka mpongolo shobe, ilyakowela ne lyasanguluka pamo,+ filya fine ulya impombo ne nsebula.+ 23 Umulopa wa liko wena mwikalya.+ Mukaupongolwele pa mushili nga menshi.+

16 “Mukaleibukisha umweshi wa Abibu,+ no kusefya ica kucilila kuli Yehova Lesa wenu,+ pantu ni mu mweshi wa Abibu e mo Yehova Lesa wenu amufumishe mu Egupti ubushiku.+ 2 Kabili mukalepeela ilambo lya ca kucilila kuli Yehova Lesa wenu,+ impaanga ne ng’ombe,+ mu cifulo umo Yehova akasala ukuti ishina lyakwe likale.+ 3 Mwikaliliila pamo no mukate uwatutumuka. Pa nshiku cinelubali (7)+ mukalye umukate uushatutumuka, umukate wa bucushi, pantu mwafumine lubilo lubilo mu calo ca Egupti.+ Mukalecita ifi pa kuti muleibukisha ubushiku mwafumine mu calo ca Egupti inshiku shonse isho muli aba mweo.+ 4 Kabili mwikasangwa muli no mufuba wa citutumushi mu calo cenu conse pa nshiku cinelubali (7),+ no munofu onse, uwa nama iyo mukepaya ilambo icungulo pa bushiku bwa ntanshi, wikekala ubushiku bonse ukufika ulucelo.+ 5 Tamwakasuminishiwe ukupeela ilambo lya ca kucilila muli imo iya misumba yenu iyo Yehova Lesa wenu alemupeela. 6 Lelo mu cifulo ico Yehova Lesa wenu akasala ukuti ishina lyakwe likale,+ e mo mukapeelele ilambo lya ca kucilila mu cungulo ilyo fye akasuba kawa,+ ukulingana ne nshita ilya ine mwafumiinepo mu calo ca Egupti. 7 Kabili mukaleocela no kuliila+ mu cifulo ico Yehova Lesa wenu akasala,+ kabili ulucelo mukalebwelelamo ku matenti yenu. 8 Inshiku mutanda (6) mukalelya umukate uushatutumuka; kabili pa bushiku bwalenga cinelubali (7) mukalelongana ukulongana kwacindamisha* kuli Yehova Lesa wenu.+ Mwikabombamo umulimo.

9 “Mukalependa imilungu cinelubali (7). Mukaletendeka ukupenda imilungu cinelubali ilyo icikwakwa capita mu ngano shaiminina umuku wa kubalilapo.+ 10 E lyo mwingasefya umutebeto wa milungu kuli Yehova Lesa wenu,+ ukulingana no mutuulo wa kuitemenwa uwa mu minwe yenu uo mukapeela, ukulingana ne fyo Yehova Lesa wenu amupaala.+ 11 Kabili mukalesekelela ku cinso ca kwa Yehova Lesa wenu,+ imwe na bana benu abaume na bana benu abanakashi na babomfi benu abaume na babomfi benu abanakashi na bena Lebi abali mu mpongolo* shenu na balebeshi+ na bana ba nshiwa+ na bamukamfwilwa,+ abali mu kati kenu, mu cifulo ico Yehova Lesa wenu akasala ukuti ishina lyakwe likale.+ 12 Kabili muleibukisha ukuti mwali abasha mu Egupti,+ kabili mulesunga ifipope ifi no kufikonka.+

13 “Mukalesefya umutebeto wa nsakwe+ inshiku cinelubali (7) nga mwalonganika ifilefuma palya mupumina ingano, mwalonganika na mafuta ne fifuma umo mukamina imyangashi. 14 Kabili mukalesekelela mu mutebeto wenu,+ imwe na bana benu abaume na bana benu abanakashi na babomfi benu abaume na babomfi benu abanakashi na bena Lebi na balebeshi na bana ba nshiwa na bamukamfwilwa, abali mu mpongolo shenu. 15 Mukasefye umutebeto+ kuli Yehova Lesa wenu inshiku cinelubali (7) mu cifulo akasala, pantu Yehova Lesa wenu akamupaala+ muli fyonse ifya mwi bala lyenu na mu mulimo onse uwa minwe yenu, na imwe mukabe fye abasangalala.+

16 “Imiku itatu mu mwaka abaume benu bonse bakalemonekela ku cinso ca kwa Yehova Lesa wenu ku cifulo akasala:+ mu mutebeto wa mukate ushatutumuka,+ mu mutebeto wa milungu,+ na mu mutebeto wa nsakwe,+ kabili kwikaba uwa kumoneka ku cinso ca kwa Yehova minwe nkutwa.+ 17 Ica bupe ca muntu onse cikabe ukulingana ne fyo Yehova Lesa wenu amupaala.+

18 “Mukaisontele abapingushi+ na bacilolo+ mu kati ka mpongolo shenu isho Yehova Lesa wenu alemupeela ukulingana ne mikowa yenu, na bo bakalepingula abantu ubupingushi bwalungama. 19 Mwikalanyonganya ubupingushi.+ Mwikaba na kapaatulula+ nelyo ukupoka amafisakanwa, pantu amafisakanwa yalapofwisha amenso ya ba mano+ no kupondamika amashiwi ya balungami. 20 Umulinganya—umulinganya e o mukaleba na o,+ pa kuti mube no mweo no kwikala mu calo ico Yehova Lesa wenu alemupeela.+

21 “Mwikemika umusango onse uwa cimuti ukuba ica kupepa mupepi ne ciipailo ca kwa Yehova Lesa wenu ico mukapanga.+

22 “Kabili mwikemika icaimikwa ca mabwe,+ ico Yehova Lesa wenu apata icine cine.+

17 “Mwikepaila Yehova Lesa wenu ilambo lya ng’ombe iilume nelyo impaanga iyaba na kalema akali konse; pantu ca bunani kuli Yehova Lesa wenu.+

2 “Nga ca kuti mu kati kenu, mu musumba wenu umo pa misumba iyo Yehova Lesa wenu alemupeela, mwasangwa umwaume nelyo umwanakashi uwacita icabipa mu menso ya kwa Yehova Lesa wenu pa kupula mu cipangano cakwe,+ 3 kabili aleya na ku kupepa balesa bambi no kubakontamina nelyo ukukontamina akasuba atemwa umweshi nelyo ifya mu muulu,+ ico nshasosele ukuti mulecita,+ 4 kabili bamweba na imwe mwaumfwa no kufwailisha mwafwailisha, kabili moneni! casangwa ukuti ca cine,+ ica bunani nacicitwa mu Israele! 5 mukafumishe uyo mwaume nelyo umwanakashi uwacita icabipa ici ku nse ya mpongolo shenu, uyu mwaume atemwa umwanakashi, mukamupoole amabwe mpaka akafwe.+ 6 Akepaiwe nga ashininwa ne nte+ shibili nelyo shitatu. Ekepaiwa nga ashininwa fye ne nte imo.+ 7 Iminwe ya nte e yo ikabalilepo ukuba pali ena ku kumwipaya, ne minwe ya bantu bonse pa numa;+ e fyo mukafumye icabipa mu kati kenu.+

8 “Ngo mulandu wa bupingushi wamupesha amano,+ umulandu wa kusumya umulopa,+ uuletelwe ku cilye,+ nelyo umo nga bamucena, nelyo imilandu ya kukansana,+ mu mpongolo shenu, mukeme no kuya ku cifulo ico Yehova Lesa wenu akasala,+ 9 mukaye kuli bashimapepo,+ abena Lebi,+ na ku mupingushi uukabapo mu nshiku isho, kabili mukepushe, na bo bakamweba ifya kupingula.+ 10 E lyo mukakonke ifyo bakamweba ukufuma kuli cilya cifulo ico Yehova akasala; kabili mukacite ukulingana fye na fyonse ifyo bakamweba. 11 Ukulingana na mafunde bakamweba, kabili ukulingana no bupingushi bakamweba, e fyo mukakonke.+ Mwikafuma ku mashiwi ayo bakamweba, ukuya ku kwa kulyo nangu ku kwa kuso.+ 12 Kabili umuntu uukaituntumba no kukanakutika kuli shimapepo uwiminina ku kubombela Yehova Lesa wenu nelyo ku mupingushi,+ uyo muntu akafwe;+ e fyo mukafumye ububi muli Israele.+ 13 Kabili abantu bonse bakomfwa no kutiina,+ kabili tabakabwekeshepo ukuituntumba.

14 “Ilyo mukafika mu calo ico Yehova Lesa wenu alemupeela, no kucipoka no kwikalamo,+ kabili mwatila, ‘Natusonte imfumu ya kututeka nge fyo caba ku nko shonse ishatushinguluka’;+ 15 mukasonte uo Yehova Lesa wenu akasala ukuba imfumu.+ Mukasonte imfumu ukufuma pali bamunyinenwe. Tamwakasuminishiwe ukusonta umbi umbi uushili munyinenwe ukumuteka. 16 Cikulu fye ikaifushisha bakabalwe,+ nangu ukulenga abantu ukubwelela ku Egupti pa kuti ifushe bakabalwe;+ pantu Yehova asosele kuli imwe ati, ‘Mwikabwekeshapo ukubwelela mu nshila iyi.’17 Kabili ikaifushisha abakashi, ukuti umutima wa iko wikafuma kuli ine;+ kabili ikaifushisha nga nshi silfere na golde.+ 18 Kabili ilyo yaikala pa cipuna ca bufumu bwa iko, ikakopolwele mwi buuku amafunde ayasungwa na bashimapepo, abena Lebi.+

19 “Kabili ikasunge ilyo ibuuku, no kulabelengamo inshiku shonse ilyo ili no mweo,+ pa kuti isambilile ukutiina Yehova Lesa wa iko pa kulakonka amashiwi yonse aya mafunde aya ne fipope ifi pa kulaficita;+ 20 ukuti umutima wa iko wi-ituumika pali bamunyina+ no kuti ifuma ku mafunde ukuya ku kwa kulyo nelyo ku kwa kuso,+ pa kuti ikale inshiku ishingi pa bufumu,+ pamo na bana ba iko muli Israele.

18 “Bashimapepo abena Lebi, no mukowa onse uwa kwa Lebi,+ tabakakwate impanga nelyo ubupyani pamo na Israele. Imituulo ya pa mulilo wa kwa Yehova, e kutila ifyatuulwa kuli ena, e fyo bakalelya.+ 2 E ico takakwateko ubupyani muli bamunyina. Yehova e bupyani bwakwe,+ nga mulya mwine asosele kuli ena.

3 “Ifi e fyo abantu bakalapeela bashimapepo, ilyo baipaya ilambo lya ng’ombe iilume nelyo impaanga: Bafwile ukupeela bashimapepo ukuboko, inshetelo, ne cifu. 4 Mukalemupeela ifya ntanshi pa ngano shenu, pa mwangashi wenu, pa mafuta yenu, na pa masako ya mpaanga shenu.+ 5 Pantu e o Yehova Lesa wenu asala mu mikowa yenu yonse ukubombela mwi shina lya kwa Yehova, pamo na bana bakwe abaume inshiku shonse.+

6 “Kabili ngo mwina Lebi afuma mu misumba yenu iya mu Israele, umo atubilisha,+ kabili aya ku cifulo ico Yehova akasala pa mulandu wa kuti afuluka ukuyako,+ 7 akabombele mwi shina lya kwa Yehova Lesa wakwe ificita bamunyina bonse abena Lebi, abeminina kulya pa ntanshi ya kwa Yehova.+ 8 Akalye ifilingene ne fyo balyako,+ ukulunda pa fyo asanga mu fyo ashitisha ifyashiile ifikolwe fyakwe.

9 “Ilyo mukengila mu calo ico Yehova Lesa wenu alemupeela, mwikasambilila ukucita ifya bunani ifyo isho nko shicita.+ 10 Ekasangwa muli imwe onse uoca umwana wakwe umwaume nelyo umwana wakwe umwanakashi mu mulilo,+ onse uubuka imbuko,+ uucita ifinjelengwe+ nelyo onse uusobela ifya ku ntanshi+ nelyo ing’anga,+ 11 nelyo uulowa+ nelyo uwipusha ku umfwana ne mipashi+ nelyo ku waishibisha ifya kusobela+ nelyo onse uwipusha ku bafwa.+ 12 Pantu onse uucita ifi fintu wa bunani kuli Yehova, kabili ni pa fya bunani fine ifi Yehova Lesa wenu aletamfisha inko ku cinso cenu.+ 13 Mukaleba ababula akabi kuli Yehova Lesa wenu.+

14 “Pantu ishi nko mulepyana shalekutika ku ba finjelengwe+ na ku babuka imbuko;+ lelo imwe, Yehova Lesa wenu tamusuminishe ukucita ifya musango yu.+ 15 Kasesema uuli mu kati kenu, muli bamunyinenwe, uwaba nga ine, e o Yehova Lesa wenu akamwimisha—e o mukomfweko+— 16 ukulingana ne fyo mwaebele Yehova Lesa wenu mu Horebu pa bushiku mwalongene,+ amuti, ‘Wileka tubwekeshepo ukumfwa ishiwi lya kwa Yehova Lesa wesu, kabili wileka tubwekeshepo ukumona umulilo uyu uukalamba, epali twafwa.’+ 17 Na o Yehova atile kuli ine, ‘Bacita fye bwino ukusosa ifi basosa.+ 18 Nkabemisha kasesema muli bamunyinabo, uwaba nga iwe;+ kabili nkabika amashiwi yandi mu kanwa kakwe,+ na o akabeba fyonse ifyo nkamweba.+ 19 Kabili umuntu uushakomfwile amashiwi yandi ayo akasosela mwi shina lyandi, nkamulubulwisha.+

20 “‘Lelo, kasesema uwaitunga ukusosela mwi shina lyandi amashiwi ayo nshamwebele ukusosa+ nelyo uwasosela mwi shina lya balesa bambi,+ uyo kasesema akafwe.+ 21 Kabili nga mwatila mu mitima yenu: “Nga tukeshiba shani amashiwi ayo Yehova ashisosele?”+ 22 ilyo kasesema alandila mwi shina lya kwa Yehova na yo mashiwi tayacitike nelyo tayali aya cine, ayo te mashiwi Yehova asosele. Uyo kasesema aituntumbile fye ukusosa ayo mashiwi.+ Mwikamutiina.’+

19 “Ilyo Yehova Lesa wenu akalofya inko+ isho Yehova Lesa wenu alemupeela icalo ca shiko, na imwe mwashifumyamo kabili mwaikala na mu misumba ya shiko na mu mayanda ya shiko,+ 2 mukaipaatwilepo imisumba itatu mu kati ka calo cenu ico Yehova Lesa wenu alemupeela ukuba icenu.+ 3 Mukalesunga bwino imisebo, kabili mukakanye icalo ico Yehova Lesa alemupeela mu fiputulwa fitatu, kabili eko onse uwaipaya umuntu akabutukila.+

4 “Nomba ifi e fyo cakulaba ku waipaya umuntu uwingabutukila kulya no kuba no mweo: Umuntu nga auma umunankwe mu kukanaishiba kabili tamupatile kale;+ 5 nelyo nga aya no munankwe mu mpanga ku kuteba inkuni, kabili aimya isembe ku kuboko kwakwe ukuti ateme umuti, ne sembe lyasokoka mu mupini,+ kabili lyakoma umunankwe na o afwa, akabutukile ku musumba umo pali iyi misumba no kuba no mweo.+ 6 Lelo nga te ifyo, uwa kulandula+ umulopa, pa mulandu wa kuti umutima wakwe naukalipa, kuti afulumuna uyu kepaya no kumusanga, pantu umusebo utali; kabili kuti amumina imfwila, nangu ca kuti uyu muntu takwete umulandu wa kupingwilwa ukufwa,+ apo tamupatile kale. 7 E co ndemwebela nati, ‘Mukaipaatwilepo imisumba itatu.’+

8 “Kabili nga Yehova Lesa wenu akusha impanga yenu ukulingana ne fyo alapile ku fikolwe fyenu,+ kabili amupeela ne calo conse ico alaile ukupeela ifikolwe fyenu,+ 9 pantu mukalasunga amafunde yonse ayo ndemweba lelo ku kuyacita, ku kutemwa Yehova Lesa wenu na pa kwenda mu nshila shakwe inshiku shonse,+ e lyo mukalundeko imisumba na imbi itatu kuli iyi itatu,+ 10 pa kuti umulopa+ wa kaele wikasuuma mu calo cenu ico Yehova Lesa wenu alemupeela ukuba icalo cenu, no kuti pekaba umulandu wa mulopa pali imwe.+

11 “Lelo ngo muntu alipata+ umunankwe, kabili amubelamina no kumwimina no kumumina imfwila na o afwa,+ no yu muntu abutukila ku musumba umo pali iyi misumba, 12 abakalamba ba mu musumba wakwe bakatuma abakuyamubuula, kabili bakamupeele mu minwe ya wa kulandula umulopa, ukuti akafwe.+ 13 Ilinso lyobe liikamumfwila ubulanda,+ kabili mukafumye umulandu wa mulopa wa kaele mu Israele,+ pa kuti ifintu fikamuwamine.

14 “Mwikasesesha ku numa umupaka wa munenu,+ uo ifikolwe fyapakwile mu mpanga yenu iyo mukakwata mu calo ico Yehova Lesa wenu alemupeela.

15 “Inte imo teti ishinine umuntu pa cili conse ico abifya nelyo pa lubembu lonse,+ nga ca kuti acita ulubembu ululi lonse. Inte shibili nelyo shitatu e shikashininkisha umulandu.+ 16 Inte nga yapangila umuntu no kumupeela umulandu wa bucipondoka,+ 17 abo bantu babili abalekansana bakeminine ku cinso ca kwa Yehova, pa ntanshi ya bashimapepo na bapingushi abakabapo mu nshiku isho.+ 18 Kabili abapingushi bakafwailishe,+ kabili ngo yo muntu ni nte ya bufi kabili aleshinina munyina umulandu wa bufi, 19 mukacite kuli ena ukulingana no kupanga kwakwe kuli munyina,+ kabili mukafumye icabipa mu kati kenu.+ 20 Awe abashalapo bakomfwa no kuba no mwenso, kabili tabakatale abacita icabipa nge ci mu kati kenu.+ 21 Kabili amenso yenu yekomfwa ubulanda:+ umweo pa mulandu wa mweo, ilinso pa linso, ilino pa lino, iminwe pa minwe, ulukasa pa lukasa.+

²0 “Nga mwafuma mwaya mu kulwa na balwani benu kabili mwamona bakabalwe na maceleta,+ abantu abengi ukumucila, mwikabatiina; pantu Yehova Lesa wenu ali na imwe,+ uwamufumishe mu calo ca Egupti.+ 2 Kabili ilyo mwapalama ku bulwi, shimapepo na o akapalame no kulanda ku bantu.+ 3 Kabili akabebe ati, ‘Umfweni, mwe bena Israele, lelo mulepalama ku bulwi ku kulwa na balwani benu. Mwileka imitima yenu ibe no mwenso.+ Mwitiina no kubutauka nelyo ukututuma pa mulandu wabo,+ 4 pantu Yehova Lesa wenu aleya na imwe ku kumulwila ku balwani benu ukuti amupusushe.’+

5 “Bacilolo+ na bo bakasose ku bantu, abati, ‘Nani uukuulile ing’anda ipya nomba talati aisule? Abwelele ku ng’anda yakwe, epali afwila mu bulwi no muntu umbi aisula.+ 6 Kabili nani uwalima ibala lya myangashi nomba talati alyeko? Abwelele ku ng’anda, epali afwila mu bulwi no muntu umbi alyako.+ 7 Nani uwakobekela umwanakashi nomba talati amusende? Abwele ku ng’anda,+ epali afwila mu bulwi no muntu umbi amusenda.’ 8 Kabili bacilolo bakakonkanyepo ukusosa ku bantu abati, ‘Nani uuletiina kabili uuli no mwenso?+ Abwelele ku ng’anda, pa kuti elenga imitima ya bamunyina ukutompoka ngo mutima wakwe.’+ 9 Kabili ilyo bacilolo bapwisha ukulanda ku bantu, bakasonte na bakalamba ba mabumba ya bashilika aba kutungulula abantu.

10 “Nga mwapalama ku musumba ku kulwa na o, mukatume amashiwi ku bena musumba ukuti mulefwaya umutende.+ 11 Kabili na bo bene nga batila balefwaya umutende kabili bamwiswila ne mpongolo, ninshi abantu bonse abasangwamo bakaba benu aba kubomba umulimo wa kupatikisha, kabili bakamubombele.+ 12 Lelo abena musumba nga bakaana umutende,+ kabili bamulwisha, e lyo mukaushinguluke, 13 na Yehova Lesa wenu akaupeela mu minwe yenu, kabili mukepaye umwaume onse uulimo ku lupanga.+ 14 Mukasheko fye abanakashi na bana abanono+ ne fitekwa+ na conse icili mu musumba, fyonse ifipe ifyo mwapoka mukasende;+ kabili mukalye ifya kulya ifyo mukapoka ku balwani benu, abo Yehova Lesa wenu amupeela.+

15 “E fyo mukacite ku misumba yonse iyatalukisha kuli imwe iishili iya pa misumba ya nko ishi. 16 Mu misumba ya aba bantu iyo Yehova Lesa wenu alemupeela ukuti ibe yenu mwena mwikaleka fyonse ifipema ukuba no mweo,+ 17 pantu mufwile ukubonaula, abena Hiti na bena Amore, abena Kanaani na bena Perisi, abena Hibi na bena Yebusi,+ nga filya fine Yehova Lesa wenu amwebele;18 pa kuti bekasambilisha imwe ukucita ukulingana ne fya bunani fyabo fyonse, ifyo bacita kuli balesa babo, na imwe mwabembukila Yehova Lesa wenu.+

19 “Nga mwashinga umusumba pa nshiku ishingi pa kulwa na o ukuti mu-upoke, mwikonaula imiti ya uko pa kuitema+ kwi sembe; pantu kuti mwalyako, e ico mwikaitema, nga kuti mwashinga shani umuti wa mu mpanga kwati muntu? 20 Kano fye umuti uo mwishibe ukuti te muti wa fya kulya, wena e o mukonaule, kabili mukauteme no kukuulilako ica kucandilila+ umusumba uulelwa na imwe, mpaka wawa.

21 “Nga mwasanga umuntu nabamwipaya mu calo ico Yehova Lesa wenu alemupeela ukuti cibe cenu, nalaala mu mpanga, no umuumiine imfwila teshibikwe,+ 2 abakalamba muli imwe na bapingushi+ benu bakafumine ku misumba iishingulwike uwipaiwe no kupima; 3 kabili bakafwailishe ukumona umusumba uuli mupepi no muntu uwipaiwe. E lyo abakalamba ba uyo musumba bakabuule umwana wa ng’ombe umukota uwa pa ng’ombe uo bashabomfyapo ku milimo kabili uushakulikwapo kwi koli; 4 kabili abakalamba ba musumba uyo bakatentemushishe umwana wa ng’ombe umukota ku mupokapoka uupitamo amenshi uushalimwamo nangu ukubyalwamo imbuto, kabili bakafune umukoshi wa mwana wa ng’ombe mu mupokapoka uyo.+

5 “E lyo bashimapepo abana baume ba kwa Lebi bakapalame, pantu e bo Yehova Lesa wenu asala ku kumubombela+ na ku kupaalila+ mwi shina lya kwa Yehova kabili e bakupingula umulandu onse uwa fikansa no wa mpumo.+ 6 Kabili abakalamba bonse aba uyo musumba abali mupepi no wipaiwe bakasambile iminwe+ yabo pa mwana wa ng’ombe umukota, uwafunwa mukoshi mu mupokapoka; 7 kabili bakaasuke no kutila, ‘Iminwe yesu tayasuumishe uyu mulopa, na menso yesu tayamweneko ulesuuma.+ 8 Mwishingamika abantu benu abena Israele, abo mwalubwile,+ mwe Yehova, kabili mwibika umulandu wa mulopa+ mu kati ka bantu benu abena Israele.’ Kabili umulandu wa mulopa wikaba pali bena. 9 Na imwe—mukafumya umulandu wa mulopa mu kati kenu,+ pantu mukacita icalungama mu menso ya kwa Yehova.+

10 “Nga mwafumina ku kulwa na balwani benu na Yehova Lesa abapeela mu minwe+ yenu kabili mwabasenda bunkole;+ 11 kabili pali bankole wamona umwanakashi umusuma, kabili wamutemwa+ no kumubuula pa kuti abe umukashi obe, 12 ukamwingishe mu kati ka ng’anda yobe. Nomba akabeye umutwe+ wakwe onse no kusemba amaala yakwe, 13 kabili akafuule ica kufwala ca bunkole no kwikala mu ng’anda yobe no kuloosha wishi na nyina umweshi uutuntulu;+ e lyo wingakumana nankwe, no kumubuula ukuti abe nabwinga obe, kabili akabe umukashi obe. 14 Kabili nga waleka ukumutemwa, ukamuleke akaye+ uko atemenwe, lelo wikamushitisha mu ndalama. Wikaba no buluku+ kuli ena pa numa ya kumuseebanya.

15 “Ngo muntu akwata abakashi babili, umo uwatemwikwa na umbi uwapatwa, kabili uwatemwikwa no wapatwa, bamufyalila abana abaume, kabili umwana mwaume ibeli afyalwa ku wapatwa,+ 16 mu bushiku bwa kupyanika abana bakwe abaume pa fyo akwata, takasuminishiwe ukucita umwana mwaume wa watemwikwa ibeli pa ntanshi ya mwana mwaume wa wapatwa, uuli ibeli.+ 17 Pantu umwana mwaume wa wapatwa e o afwile ukumona ukuti e beli, no kumupeela ifiputulwa fibili muli fyonse ifyo akwata,+ pantu uyu e ntendekelo ya maka ya bufyashi bwakwe.+ Insambu sha bubeli shakwe.+

18 “Ngo muntu ali no mwana cintomfwa kabili uwatalama,+ uushumfwa kwi shiwi lya kwa wishi nelyo kwi shiwi lya kwa nyina,+ kabili bamulungika lelo talebomfwila,+ 19 bawishi na banyina bakamwikate no kumutwala ku bakalamba ba mu musumba ku mpongolo ya ku mwabo,+ 20 e lyo bakasose ku bakalamba ba uyo musumba abati, ‘Umwana wesu uyu ni cintomfwa kabili alitalama; tomfwa kwi shiwi lyesu,+ muliili+ kabili ni cakolwa.’+ 21 E lyo abaume bonse aba mu musumba bakamupoole amabwe, mpaka akafwe. E fyo mukafumye icabipa mu kati kenu, kabili Israele onse akomfwa no kutiina.+

22 “Kabili ngo muntu acita ulubembu lwa kufwilapo,+ kabili aipaiwa, kabili mwamukulika pa cimuti,+ 23 icitumbi cakwe tacifwile ukulaala ubushiku bonse pa cimuti;+ lelo mukamushiike ubo bwine bushiku, pantu uwakulikwa pa cimuti untu watiipwa kuli Lesa;+ kabili mwikakowesha impanga yenu, iyo Yehova Lesa wenu alemupeela ukuti ibe yenu.+

22 “Nga wamona ing’ombe ya kwa munonko nelyo impaanga yakwe ilelubanta taufwile ukuisha ku mufulo.+ Lelo ukaibweseshe kuli munonko.+ 2 Kabili munonko nga tali mupepi na iwe kabili tawamwishiba, ukaisende ku mobe, kabili ukaisunge ku mobe mpaka munonko akaifwaye. Na iwe ukamubweseshe.+ 3 E fyo ukacite na ku mpunda, kabili e fyo ukacite na ku fya kufwala fyakwe, kabili e fyo ukacite kuli conse ico munonko alufya, ico wasanga. Wikalasuulako fye.

4 “Nga wamona impunda ya kwa munonko nelyo ing’ombe yakwe iwilile mu nshila wikaisha fye ifyo fine ku mufulo. Ukamwafwe ukuimya.+

5 “Umwanakashi onse elafwala ifya kufwala fya mwaume, kabili umwaume onse elafwala ifya kufwala fya mwanakashi;+ pantu onse uucita ifi fintu wa bunani kuli Yehova Lesa wenu.

6 “Nga wasanga icinsa ca cuni mu nshila, ku muti onse nelyo pa mushili muli no twana+ nelyo amani, na nyina ali pa twana twakwe nelyo pa mani yakwe, wikasenda nyina pamo no twana.+ 7 Ukatamfyepo fye nyina, no kusenda utwana; pa kuti ifintu fikuwamine, e lyo wingekala inshiku ishingi.+

8 “Nga wakuula ing’anda, ukabikepo ica kucingilila pa mutenge,+ pa kuti taubikile umulandu wa mulopa pa ng’anda yobe pantu umo kuti aponapo.

9 “Wilabyala imisango ibili iya mbuto+ mwi bala lyobe ilya myangashi, epali ifisabo fyonse ifya myangashi ne fisabo fya mbuto shimbi isho wabyele fyapeelwa ku mulimo wa mwa mushilo.

10 “Pa kulima wilakaka ing’ombe ne mpunda mwi koli limo line.+

11 “Wilafwala ica kufwala icapikulwa no bushishi bwa misango ibili, ubwa masako ya mpaanga no bwa kolokondwe.+

12 “Ku mpela shine isha ca kufwala ico ufimbana ukabikeko insenkebele.+

13 “Ngo muntu aupa umwanakashi kabili akumana nankwe e lyo amupata,+ 14 kabili amupeela umulandu wa bucintomfwa, amubifisha ne shina+ lyakwe atila no kuti, ‘Uyu e mwanakashi naupile, kabili ilyo nasendeme nankwe, nshasangile ubushininkisho bwa kuti ni nacisungu’;+ 15 wishi wa mukashana na nyina bakabuule no kutwala ubushininkisho bwa bunacisungu bwa mukashana ku bakalamba ba musumba pa mpongolo ya uko;+ 16 kabili wishi wa mukashana akatila ku bakalamba, ‘Napeele umwana wandi umwanakashi kuli uyu mwaume ukuba umukashi wakwe, na o alimupata.+ 17 Nomba alemupeela umulandu wa bucintomfwa,+ aleti: “Ninsanga ukuti umwana wenu umwanakashi takwata ubushininkisho bwa bunacisungu.”+ Nomba ubu e bushininkisho bwa bunacisungu bwa mwana wandi umwanakashi.’ Kabili bakaanshike insalu ku cinso ca bakalamba ba musumba. 18 Na bakalamba+ ba musumba uyo bakabuule uyo mwaume no kumukanda.+ 19 Kabili bakamupingule amashekele* ya silfere umwanda umo (100) kabili akayapeele kuli wishi wa mukashana, pantu aletele ishina ilibi pali nacisungu wa mu Israele;+ kabili akatwalilila ukuba umukashi wakwe. Takasuminishiwe ukumuleka inshiku shonse isha mweo wakwe.

20 “Lelo nge ci cintu casangwa ukuti ca cine, ubushininkisho bwa bunacisungu tabwasangilwe mu mukashana,+ 21 bakafumishe umukashana pa mwinshi wa ng’anda ya kwa wishi, na baume ba mu musumba wakwe bakamupoole amabwe mpaka akafwe, pantu acita ubupumbu+ mu Israele pa kucita bucilende mu ng’anda ya kwa wishi.+ E fyo mukafumye ubo bubi mu kati kenu.+

22 “Ngo muntu asangwa nasendama no mukashi wa mwine,+ bonse babili bakepaiwe pamo, umwaume uwasendama no mwanakashi no mwanakashi wine uyo.+ E fyo mukafumye icabipa mu Israele.+

23 “Nga kuli umukashana nacisungu uwakobekelwa,+ no mwaume amusanga mu musumba no kulaala nankwe,+ 24 bonse mukabafumishe ku mpongolo ya uyo musumba no kubapoola amabwe, mpaka bakafwe, umukashana pa mulandu wa kuti tapundile mu musumba, no mwaume pa mulandu wa kuti acendele umukashi wa munankwe.+ E fyo mukafumye ububi mu kati kenu.+

25 “Lelo nga ni mu mpanga umwaume asangile umukashana uwakobekelwa, no mwaume alimwikete no kulaala nankwe, umwaume uwaleele nankwe akafwa eka, 26 kabili mwikacita nangu cimo ku mukashana. Umukashana tacitile ulubembu lwa kufwilapo, pantu filya fine umwaume emina umwaume munankwe no kumwipaya,+ e fyo cili na kuli uyu mulandu. 27 Pantu ni mu mpanga amusangile. Umukashana uwakobekelwa alipundile, lelo takwali nangu umo uwa kumupokololako.

28 “Ngo muntu asanga umukashana, nacisungu uushakobekelwa, na o amwikata no kulaala nankwe,+ kabili basangwa,+ 29 umwaume uwaleele nankwe akapeele amashekele+ ya silfere amakumi yasano (50) kuli wishi wa mukashana, na o akaba umukashi wakwe pantu namucenda. Takasuminishiwe ukumuleka inshiku shonse isha mweo wakwe.+

30 “Umuntu nangu umo ekasendama na muka wishi, pantu ninshi aseebanya wishi.+

23 “Umwaume onse uwatungulwa+ nelyo uwaputulwa ubwaume ekengila mu lukuta lwa kwa Yehova.

2 “Umwana mwaume onse uwa kupula+ ekengila mu lukuta lwa kwa Yehova. Ukufika na ku ba mu nkulo yakwe iyalenga ikumi (10), takuli nangu umo uukengila mu lukuta lwa kwa Yehova.

3 “Umwina Amone onse nelyo umwina Moabu ekengila mu lukuta lwa kwa Yehova.+ Ukufika na ku ba mu nkulo yabo iyalenga ikumi (10), bekengila mu lukuta lwa kwa Yehova umuyayaya, 4 pantu bamutanine+ ifya kulya na menshi mu nshila ilyo mwalefuma mu Egupti,+ kabili bamwimiishe Balaamu mwana Beore ukufuma ku Petore wa mu Mesopotamia ukuti amutiipe.+ 5 Awe Yehova Lesa wenu takutike kuli Balaamu;+ lelo Yehova Lesa wenu ayalwile icitiipu ukuba ipaalo+ kuli imwe, pantu Yehova Lesa wenu alimutemenwe.+ 6 Mwikababombela pa kuti bakwate umutende nangu icuma inshiku shonse isho mukaba no mweo umuyayaya.+

7 “Wikamona umwina Edomu nge ca bunani, pantu ni munonko.+

“Wikamona umwina Egupti nge ca bunani, pantu wali umulebeshi mu calo cakwe.+ 8 Abana baume abakafyalwa mu beshikulu babo kuti baingila mu lukuta lwa kwa Yehova.

9 “Nga mwapangila abalwani benu inkambi, mwikacita icili conse icabipa.+ 10 Nga mwasangwa muli imwe umwaume uushili uwasanguluka, pa mulandu wa kukowela ukwacitika ubushiku,+ akafumine ku nse ya nkambi. Ekengila mu kati ka nkambi.+ 11 Kabili ilyo caba icungulo akasambe mu menshi, kabili ilyo akasuba kawa akengile mu kati ka nkambi.+ 12 Kabili ku nse ya nkambi kukabe incende iyabelama, kabili e ko mukaleya. 13 Kabili mukabomfye ica kwimbilako pamo ne fisolobelo fyenu, nomba ilyo mwasunsumana ku nse, mukembe ne cilindi no kupilibuka no kushiika pa busali.+ 14 Pantu Yehova Lesa wenu ale-endauka mu nkambi yenu ku kumupususha+ no kumupeela abalwani benu;+ kabili inkambi yenu ifwile ukuba iya mushilo,+ pa kuti emona muli imwe icili conse icishawama no kuleka ukumukonka.+

15 “Wikapeela umusha kuli shikulu wakwe ilyo afyuka shikulu wakwe ukwisa kuli iwe.+ 16 Akatwalilila ukwikala pamo na imwe ponse apo akasala mu musumba umo pa misumba yenu,+ konse uko akatemwa. Wikamucusha.+

17 “Umwana mwanakashi onse uwa mu Israele ekaba cilende+ wa pe tempele, kabili kwikaba cilende wa pe tempele uwa mu bana baume ba kwa Israele.+ 18 Wikatwala mu ng’anda ya kwa Yehova Lesa obe indalama+ sha muli bucilende nelyo umutengo wa mbwa+ ku kulapa umulapo onse, pantu fya bunani kuli Yehova Lesa obe, fyonse fibili.

19 “Ilyo wakongwesha munonko fimo, wilafwaya ica kulundapo,+ pa ndalama, pa fya kulya,+ nangu pali conse ico umuntu engafwailapo ica kulundapo. 20 Umwina fyalo+ ena kuti wamulomba ica kulundapo, lelo munonko wilamulomba ica kulundapo;+ pa kutila Yehova Lesa obe akupaale mu mulimo obe onse mu calo ico uleingilamo ukuti cibe cobe.+

21 “Nga walapa umulapo kuli Yehova+ Lesa obe, taufwile ukushingashinga uku-ufisha,+ pantu Yehova Lesa obe akafwaya ukuti ufishe, lelo nga wafilwa ninshi wabembuka.+ 22 Lelo nga taulapile umulapo, ninshi taubembwike.+ 23 Ulecita ifyo wasosa,+ kabili ulecita ukulingana no mulapo obe kuli Yehova Lesa obe, uuli ngo mutuulo wa kuitemenwa uo waisosele fye we mwine.+

24 “Nga waingila mwi bala lya myangashi ilya munobe, ufwile ukulyamo fye imyangashi yalinga ukwikusha umweo obe, lelo taufwile ukubika nangu imo mu cipe cobe.+

25 “Nga waingila mu ngano shaiminina isha munobe, ufwile ukutimpulamo fye imitwe yapya ku kuboko kobe, lelo taufwile ukupisha icikwakwa ku ngano shaiminina isha munobe.+

24 “Ngo mwaume abuula umwanakashi no kumuupa ukuba umukashi wakwe, e lyo nga tawame mu menso yakwe pantu asangamo icishawama muli ena,+ akalembe kalata wa kumulekelapo+ no kumupeela no kumutamfya mu ng’anda yakwe.+ 2 Kabili akafume mu ng’anda yakwe no kuyaupwa ku mwaume umbi.+ 3 Ngo mwaume wa pa numa amupata kabili amulembela kalata ya kumulekelapo, amupeela no kumutamfya pa ng’anda yakwe, nelyo nga ca kuti umwaume wa pa numa uwamuupile afwa, 4 umulume wakwe uwa ntanshi uwamutamfishe takasuminishiwe ukumuupa na kabili pa numa ya kumucenda;+ pantu ca bunani ku cinso ca kwa Yehova, kabili mwikaleka icalo ico Yehova Lesa wenu alemupeela cibe mu lubembu.

5 “Ngo muntu aupa umwanakashi,+ ekaya ku bulwi, kabili ekashingamikwa icili conse. Akabe uwa kuyendela fye ku ng’anda yakwe umwaka umo, kabili akalenge umukashi wakwe uo aupile ukusekelela.+

6 “Umuntu nangu umo ekabuula impelo nangu umwana wa mpelo nge ciikatilo,+ pantu ninshi abuula ico umunankwe aliilamo ukuba iciikatilo.

7 “Ngo muntu asangwa aleiba+ umuntu wa muli bamunyina uwa mu bana ba kwa Israele, kabili amucusha no kumushitisha,+ uyu muntu afwile ukufwa. E fyo mukafumye ububi mu kati kenu.+

8 “Cenjeleni ku cikuko ca fibashi+ no kubika amano ku kucita fyonse ifyo bashimapepo, abena Lebi, bakamweba.+ Ifyo nabebele, e fyo mukabikeko amano+ ukucita. 9 Mukaleibukisha ifyo Yehova Lesa wenu acitile kuli Miriamu mu nshila ilyo mwalefuma mu Egupti.+

10 “Nga wa-ashimisha umunobe ica kwashima ica musango onse,+ wikengila mu ng’anda yakwe ku kubuula ico atila e ciikatilo.+ 11 Ukeminine ku nse, no yo muntu uo wayashimishe akalete iciikatilo ku nse kuli iwe. 12 Kabili ngo muntu ali mu bwafya, wikaya mu kulaala uli ne ciikatilo cakwe.+ 13 Ukamubweseshe iciikatilo ilyo fye akasuba kawa,+ kabili akaye mu kulaala ninshi nafwala ica kufwala cakwe,+ na o akakupaala;+ na Yehova Lesa obe akakumona ukuti uli mulungami.+

14 “Wilacenjesha uubombela amalipilo uuli mu bwafya kabili umupiina, abe wa muli bamunonko nelyo uwa mu balebeshi benu abali mu calo cenu, mu kati ka mpongolo shenu.+ 15 Mu bushiku afwile ukupoka amalipilo yakwe ulemupeela,+ kabili akasuba kelawa ucili na yo, pantu ali mu bwafya kabili alefwaisha amalipilo yakwe; ukuti elilila kuli Yehova pa co wamucita,+ pantu nga caba ifi ninshi wabembuka.+

16 “Bashibo bekafwila pa mulandu wa bana, na bana bekafwila pa mulandu wa bashibo.+ Lelo umo umo akafwila pa mulandu wakwe.+

17 “Wilanyonganya ubupingushi ku mulebeshi+ nelyo ku mwana wa nshiwa,+ kabili wilapoka ica kufwala ca kwa mukamfwilwa nge ciikatilo.+ 18 Kabili uleibukisha ukuti wali umusha mu Egupti, kabili Yehova Lesa obe akulubwile mulya.+ E co ndekwebela ukucita ifi fintu.

19 “Nga walobolola mwi bala lyobe,+ kabili walabila umwanshi mwi bala, wikabwelelamo ku ku-usenda. Ukaba wa mulebeshi, uwa mwana wa nshiwa no wa kwa mukamfwilwa;+ pa kuti Yehova Lesa obe akupaale mu mulimo wa minwe yobe yonse.+

20 “Nga wakunta imiolife yobe, wikabwelela ku misambo ya uko. Ikabe ya mulebeshi, iya mwana wa nshiwa ne ya kwa mukamfwilwa.+

21 “Nga walonganya imyangashi ya mwi bala lyobe, wilalonganya iyashalamo. Ileba ya mulebeshi, iya mwana wa nshiwa ne ya kwa mukamfwilwa. 22 Kabili uleibukisha ukuti wali umusha mu calo ca Egupti.+ E co ndekwebela ukucita ifi fintu.+

25 “Nga bantu+ babili balekansana, kabili baitwala ku kupingulwa,+ bakapingula na bo bakabapingule no kweba uwa kaele ukuti wa kaele e lyo bakebe uwa mulandu ukuti nasangwa no mulandu.+ 2 Kabili nga casangwa ukuti uwa mulandu alingile ukufopaulwa,+ umupingushi akamupingule ukuti bamulaalike ubukupeme no kumufopaula ifikoti+ pa cinso cakwe ifya kulingana no mulandu wakwe. 3 Kuti amufopaula ifikoti amakumi yane (40). Tafwile ukulundapo, epali akonkanyapo fye ukumufopaula ifikoti ifingi ukulunda pali fi+ na munonko aseebana ku menso yobe.

4 “Wilakaka ing’ombe ku kanwa ilyo ilenyantaula ingano pa kushisokola.+

5 “Nga bamunyina bekala pamo kabili umo afwa ukwabula ukufyala umwana, umukashi wa ufwile ekoopwa ku mwaume umbi umbi uushili wa muli ulo lupwa. Mulamu wakwe akaye kuli ena, kabili akamubuule ku kubo mukashi no kumuupa icupo ca pali bumulamu.+ 6 Kabili ibeli akafyala e likapyana ishina lya kwa munyina uwafwa,+ ukuti ishina lyakwe liloba mu Israele.+

7 “Nomba umuntu nga tatemenwe ukubuula muka munyina, uyo mukamfwilwa akaye ku mpongolo ku bakalamba+ no kutila, ‘Munyina wa mulume wandi nakaana ukusungilila ishina lya kwa munyina mu Israele. Tasumine ukungupa icupo ca pali bumulamu.’ 8 Kabili abakalamba ba mu musumba bakamwite no kulanda nankwe, kabili akeminine no kutila, ‘Nshilefwaya ukumuupa.’+ 9 Nga cabe fyo muka munyina akapalame kuli ena ku cinso ca bakalamba no kumufuula indyato ku makasa+ no kumufwishila amate pa menso+ e lyo akatile, ‘E fyo cikacitwe ku muntu uushakafyalile munyina umwana.’+ 10 Kabili ishina lyakwe mu Israele liketwe ‘Ing’anda ya wafuulilwe indyato.’

11 “Nga baume babili balelwa, kabili umukashi wa mwaume umo apalama ku kupokolola umulume wakwe mu minwe ya ulemuuma, kabili umukashi afungulula ukuboko no kufyambata ifya mfwalo fya mwaume,+ 12 ukamuputule ukuboko. Amenso yobe yekamumfwila ubulanda.+

13 “Wilaba ne fya kupiminako ukufina ifya misango ibili mu mufuko obe,+ icikalamba ne cinono. 14 Wilaba ne misango ibili iya matepe+ mu ng’anda yobe, ilikalamba ne linono. 15 Uleba ne ca kulingilako ukufina icalungama. Ufwile ukukwata itepe* ilyalinga, pa kutila wikale inshiku ishingi mu calo ico Yehova Lesa obe alekupeela.+ 16 Pantu onse uulecita ifi fintu, onse uufyenga, wa bunani kuli Yehova Lesa wenu.+

17 “Mukaleibukisha ifyo Amaleke acitile kuli imwe mu nshila ilyo mwalefuma mu Egupti,+ 18 ifyo akumene na imwe mu nshila no kuuma bonse abali ku numa yenu abaleshalila, ilyo mwanakile no kutompoka; na o tatiinine Lesa.+ 19 Kabili ilyo Yehova Lesa wenu amupeela ukutuusha ku balwani benu bonse abamushinguluka mu calo ico Yehova Lesa wenu alemupeela ukuti mwingilemo,+ mukalofye abena Amaleke bonse ica kuti no kulabwa bakalabwe mwi samba lya muulu.+ Mwikalaba ukucita ici.

26 “Nomba ilyo ukengila mu calo ico Yehova Lesa obe alekupeela ukuti wingilemo, na iwe wacipoka no kwikalamo,+ 2 ukabuulepo ne fisabo fyabalilapo ukupya+ pa fisabo fyonse ifya mu mushili, ifyo ukafumya mu mpanga iyo Yehova Lesa obe alekupeela, kabili ukafibike mu museke no kuya ku cifulo uko Yehova Lesa obe akasala ukuti ishina lyakwe likekale.+ 3 Kabili ukaye kuli shimapepo+ uukabapo mu nshiku isho no kutila kuli ena, ‘Ndesosa lelo kuli Yehova Lesa obe ukuti nalingila mu calo ico Yehova alapile ku fikolwe fyesu ukupeela kuli ifwe.’+

4 “Kabili shimapepo akapoke umuseke mu minwe yobe no ku-ubika ku ciipailo ca kwa Yehova Lesa obe. 5 Kabili ukatile ku cinso ca kwa Yehova Lesa obe auti, ‘Tata ali mwina Siria uwali mupepi no kufwa;+ kabili aile ku Egupti+ no kuba umulebeshi kulya, ali na bantu fye abanono;+ lelo kulya e ko asangwike uluko ulukalamba, ulwa maka kabili ulwabamo abantu abengi.+ 6 Na bena Egupti baletucita ububi no kutucusha no kututeka ubusha ubwa-afya.+ 7 Awe twalilile kuli Yehova Lesa wa fikolwe fyesu,+ na Yehova aumfwile ishiwi+ lyesu no kulolesha pa kucula kwesu na pa bwafya bwesu na pa fyo twatitikishiwe.+ 8 Asukile Yehova atufumya mu Egupti ku kuboko kwakosa+ kabili ku kuboko ukwatambululwa+ na ku fya kutiinya+ ifikalamba na ku fishibilo na ku fipesha amano.+ 9 Kabili atuletele kuno kuntu no kutupeela cino calo, icalo umwaba umukaka no buci.+ 10 Awe nomba naleta ifisabo fyabalilapo ukupya pa fisabo fya mu mushili ifyo Yehova ampeele.’+

“Na iwe ukafibike pa ntanshi ya kwa Yehova Lesa obe no kufukama ku cinso ca kwa Yehova Lesa obe.+ 11 Kabili ukasekelele+ pa busuma bonse ubo Yehova Lesa obe akupeela na ba mu ng’anda yobe, iwe no mwina Lebi no mulebeshi uuli mu kati kobe.+

12 “Ilyo wapwisha ukulonganika ifya pe kumi,+ ifya pe kumi fyonse ifya fisabo fyobe mu mwaka wa citatu,+ umwaka wa kupeelelamo ica pe kumi, e lyo ukafipeele ku mwina Lebi, ku mulebeshi, ku mwana wa nshiwa na kuli mukamfwilwa, na bo bakafiliile mu kati ka mpongolo shobe kabili bakekute.+ 13 Kabili ukatile ku cinso ca kwa Yehova Lesa obe auti, ‘Nimfumya ica mushilo mu ng’anda kabili ncipeele ku mwina Lebi na ku mulebeshi, ku mwana wa nshiwa na kuli mukamfwilwa,+ ukulingana na mafunde yenu yonse ayo mwanjebele. Nshipulile mu mafunde yenu, kabili nshilabile.+ 14 Nshaliilepo ilyo naleloosha, kabili nshafumishepo ilyo nali uwakowela, kabili nshapeelepo uwafwa. Nakutike kwi shiwi lya kwa Yehova Lesa wandi. Nacitile ukulingana na fyonse ifyo mwanjebele. 15 Lolesheni pa nshi ukufuma ku bwikalo+ bwenu ubwa mushilo, ku muulu, no kupaala abantu benu abena Israele+ pamo ne calo ico mwatupeela, ukulingana ne fyo mwalapile ku fikolwe fyesu,+ icalo umwaba umukaka no buci.’+

16 “Buno bushiku Yehova Lesa obe alekweba ukulakonka ifipope ifi no bupingushi ubu;+ kabili ulefibaka no kufikonka no mutima+ obe onse no mweo obe onse.+ 17 Yehova e o waeba lelo ukuti akaba Lesa obe ilyo ule-enda mu nshila shakwe na lintu ulesunga ifipope+ fyakwe na mafunde+ yakwe no bupingushi+ bwakwe na lintu ulekutika kwi shiwi lyakwe.+ 18 Yehova na o amweba lelo ukuti mukaba abantu bakwe, ababa nge cipe cakwe ica mutengo,+ nga mulya mwine amulaile,+ no kuti mukasunga amafunde yakwe yonse, 19 no kuti akamubika pa muulu wa nko shonse isho apanga,+ ica kuti mukatashiwa no kupeelwa ululumbi no kucindama, ilyo muli aba mushilo kuli Yehova Lesa wenu,+ nga mulya mwine alaile.”

27 Kabili Mose pamo na bakalamba ba mu Israele baebele abantu, abati: “Mulekonka amafunde yonse ayo ndemweba lelo.+ 2 Kabili mu bushiku mukaabuka Yordani+ ukwingila mu calo ico Yehova Lesa wenu alemupeela, mukaimikile na mabwe yakalamba no kushingulako impemba. 3 Kabili mukalembepo amashiwi yonse aya mafunde+ aya ilyo mukaabuka,+ pa kutila mwingile mu calo ico Yehova Lesa wenu alemupeela, icalo umwaba umukaka no buci, ukulingana ne fyo Yehova Lesa wa fikolwe fyenu amwebele.+ 4 Kabili ilyo mwa-abuka Yordani, mukemike aya mabwe, ukulingana ne fyo ndemweba lelo, mu Lupili lwa Ebali,+ kabili mukashinguleko impemba.+ 5 Mukakuule ne ciipailo kulya kuli Yehova Lesa wenu, iciipailo ca mabwe. Mwikapishapo imbaso ya cela.+ 6 Amabwe ayatuntulu e yo mukakuulile iciipailo ca kwa Yehova Lesa wenu, kabili mukaletuulapo imituulo ya koca kuli Yehova Lesa wenu.+ 7 Kabili mukaletuula amalambo ya mutende+ no kuyaliila palya,+ kabili mukalesekelela ku cinso ca kwa Yehova Lesa wenu.+ 8 Kabili mukalembe pa mabwe amashiwi yonse aya ili funde,+ ukuyalemba ica kuti yalemonekesha.”+

9 E lyo Mose na bashimapepo, abena Lebi, basosele kuli Israele onse, abati: “Ikala tondolo no kumfwa, we Israele. Buno bushiku mwasanguka abantu ba kwa Yehova Lesa wenu.+ 10 Kabili muleumfwila ishiwi lya kwa Yehova Lesa wenu no kukonka amafunde+ yakwe ne fipope+ fyakwe, ifyo ndemweba lelo.”

11 Awe Mose akonkenyepo ukweba abantu bulya bushiku, ati:12 “Aba e bakeminina ku kupaala abantu pa Lupili lwa Gerisimu+ ilyo mwa-abuka Yordani: Simeone na Lebi na Yuda na Isakari na Yosefe na Benjamini. 13 Kabili aba e bakeminina pa Lupili lwa Ebali+ ku kutiipa:+ Rubene, Gadi na Ashere na Sebuluni, Dani na Naftali. 14 E lyo abena Lebi bakaankule no kutila ku baume bonse aba kwa Israele kwi shiwi ilyasansuka, abati:+

15 “‘Abe uwatiipwa umuntu uwabasa icimpashanya+ nelyo uwaenga icimpashanya,+ ica bunani kuli Yehova,+ icapangwa kuli kabasa kabili kafula,+ no kucifisa.’ (E lyo abantu bonse bakaankule no kutila, ‘Ameni!’)+

16 “‘Abe uwatiipwa uwasaalula wishi nelyo nyina.’+ (E lyo abantu bonse bakatile, ‘Ameni!’)

17 “‘Abe uwatiipwa uwabwesesha umupaka wa munankwe ku numa.’+ (E lyo abantu bonse bakatile, ‘Ameni!’)

18 “‘Abe uwatiipwa uwalenga impofu ukuluba mu nshila.’+ (E lyo abantu bonse bakatile, ‘Ameni!’)

19 “‘Abe uwatiipwa uunyonganya+ ubupingushi+ bwa mulebeshi,+ ubwa mwana wa nshiwa no bwa kwa mukamfwilwa.’+ (E lyo abantu bonse bakatile, ‘Ameni!’)

20 “‘Abe uwatiipwa uwalaala no mukashi wa kwa wishi, pantu aseebanya wishi.’+ (E lyo abantu bonse bakatile, ‘Ameni!’)

21 “‘Abe uwatiipwa uwalaala ne nama ili yonse.’+ (E lyo abantu bonse bakatile, ‘Ameni!’)

22 “‘Abe uwatiipwa uwalaala na nkashi yakwe, umwana mwanakashi wa kwa wishi nelyo umwana mwanakashi wa kwa nyina.’+ (E lyo abantu bonse bakatile, ‘Ameni!’)

23 “‘Abe uwatiipwa uwalaala na nafyala.’+ (E lyo abantu bonse bakatile, ‘Ameni!’)

24 “‘Abe uwatiipwa uwaumina imfwila umunankwe mu bumfisolo.’+ (E lyo abantu bonse bakatile, ‘Ameni!’)

25 “‘Abe uwatiipwa uwapoka amafisakanwa pa kuti omine imfwila umunankwe, ilyo uyo mulopa wa kaele.’+ (E lyo abantu bonse bakatile, ‘Ameni!’)

26 “‘Abe uwatiipwa uwakaana ukukonka amashiwi ya mafunde aya.’+ (E lyo abantu bonse bakatile, Ameni!’)

28 “Kabili nga mukomfwa kwi shiwi lya kwa Yehova Lesa wenu pa kubika amano ku kukonka amafunde yakwe yonse ayo ndemweba lelo,+ Yehova Lesa wenu na o akamubika pa muulu wa nko shimbi isha pano isonde.+ 2 Kabili amapaalo yonse aya yakesa pali imwe no kumusanga,+ pantu mulakutika kwi shiwi lya kwa Yehova Lesa wenu:

3 “Mukaba abapaalwa mu musumba,+ kabili mukaba abapaalwa na mu mpanga.+

4 “Bakapaalwa abakafyalwa kuli imwe+ ne fikafuma mu mushili wenu ne fikafyala ifitekwa fyenu,+ abana ba ng’ombe shenu na bana ba mpaanga shenu.+

5 “Ukapaalwa umuseke+ wenu ne ca kukandawilamo cenu.+

6 “Mukapaalwa ilyo mwaingila, kabili mukapaalwa ilyo mwafuma.+

7 “Yehova akalenga abalwani benu abamwimina ukucimfiwa ku cinso cenu.+ Bakeshila mu nshila imo ku kumwimina, lelo bakafulumuka ku cinso cenu mu nshila cinelubali (7).+ 8 Yehova akamupeela icipope ce paalo pa matala+ yenu na pa mulimo wenu onse,+ kabili akamupaala mu calo ico Yehova Lesa wenu alemupeela. 9 Yehova akamulenga ukuba abantu bakwe aba mushilo,+ ukulingana ne fyo amulaile,+ pantu mulasunga amafunde+ ya kwa Yehova Lesa wenu, kabili mwenda mu nshila shakwe. 10 Kabili abantu na bantu aba pano isonde bakamona ukuti ishina lya kwa Yehova lyainikwa pali imwe,+ kabili bakamutiina.+

11 “Kabili Yehova akamufushisha ubusuma mu bakafyalwa mu mafumo+ yenu na mu nama ishikafyalwa mu fitekwa fyenu na mu fisabo fya mu mushili wenu,+ mu calo ico Yehova alapile ku fikolwe fyenu ukuti akamupeela.+ 12 Yehova akamwiswila ubutala bwakwe ubusuma, imyulu, ku kupeela umushili wenu imfula mu nshita+ ya iko no kupaala umulimo onse uwa minwe yenu;+ kabili mukaashimisha inko ishingi, lelo imwe tamwakaashime.+ 13 Kabili Yehova akamubika ku mutwe te ku mucila iyo; mukaba fye pa muulu,+ kabili tamwakabe pa nshi, pantu mulomfwila amafunde ya kwa Yehova Lesa wenu,+ ayo ndemweba lelo ukusunga no kukonka. 14 Kabili mwikaleka ukukonka amashiwi yonse ayo ndemweba lelo, ukupaasukila ku kulyo nelyo ku kuso,+ ku kukonka balesa bambi ku kubabombela.+

15 “Lelo nga tamwakomfwile ishiwi lya kwa Yehova Lesa wenu pa kubika amano ku kukonka amafunde yakwe yonse ne fipope fyakwe ifyo ndemweba lelo, ifitiipu fyonse ifi fikesa pali imwe no kumusanga:+

16 “Mukaba abatiipwa mu musumba,+ kabili mukaba abatiipwa mu mpanga.+

17 “Fikabe ifyatiipwa imiseke+ yenu ne fya kukandawilamo fyenu.+

18 “Bakatiipwa abana abo mukafyala+ ne fisabo fya mu mushili wenu,+ na bana ba ng’ombe shenu na bana ba mpaanga shenu.+

19 “Mukatiipwa ilyo mwaingila, kabili mukatiipwa ilyo mwafuma.+

20 “Yehova akatuma pali imwe icitiipu,+ icimfulumfulu+ no kumukanda+ mu mulimo wenu onse uo mwafwaya ukucita, mukasuke amulofiwa no konaulwa bwangu, pa mulandu wa micitile yenu iyabipa pantu ninshi mwalinsuula.+ 21 Yehova akalenga icikuko ukukakatila pali imwe mpaka akamulofye pa calo ico muleingilamo ukuti cibe cenu.+ 22 Yehova akamulwalika icifuba ca TB*+ no kukaba umubili no kufiimba no kukaba ukukalamba no lupanga+ no kubabula+ no kufufuma,+ kabili fikamusanga mukasuke amuloba. 23 Umuulu wenu uuli pa muulu wa mitwe yenu ukaba umukuba, no mushili uuli mwi samba lyenu ukaba icela.+ 24 Yehova akamupeela ulufukutu no lukungu nge mfula ya calo cenu. Lukafuma mu muulu ukuponena pali imwe mpaka mukalobe. 25 Yehova akalenga abalwani benu ukumucimfya.+ Mukaya mu nshila imo ku kubakumanya, lelo mu nshila cinelubali (7) e mo mukafulumukila ku cinso cabo; kabili mukaba ica kupapusha amabufumu yonse aya pano isonde.+ 26 Kabili ifitumbi fyenu fikaba e fya kulya fya fipupuka fyonse ifya mu muulu kabili fikaba fya kulya fya nama sha mu mpanga, apabula no wa kushitiinya.+

27 “Yehova akamulwalika ifipute fya ku Egupti+ na fimumena pabi ne mpele ne fya kufuluma, ifya kuti tamwakondapwe. 28 Yehova akamulwalika ubushilu+ kabili akamusangula impofu+ no kumufulunganya amano.+ 29 Kabili mukalapampanta ilyo akasuba kali pa kati, ifyo impofu ipampanta umwafiita fititi,+ kabili tamwakalenge inshila shenu shitunguluke; kabili mukaba fye abafyengwa lyonse kabili abapokwa, ukwabula no wa kumupususha.+ 30 Mukakobekela umwanakashi, lelo umwaume umbi akamucenda.+ Mukakuula ing’anda, lelo tamwakekalemo.+ Mukalima ibala lya myangashi, lelo tamwakalyemo.+ 31 Ing’ombe ikepaiwa pa menso yenu—lelo tamwakalyeko. Impunda shenu shikapokwa pa cinso cenu—lelo imwe tamwakashipokolole. Impaanga shenu shikapeelwa ku balwani benu—lelo no wa kumupususha akabula.+ 32 Abana benu abaume na bana benu abanakashi bakapeelwa ku bantu+ bambi ninshi na imwe mulemonako no kubafuluka akasuba konse—lelo amaboko yenu yakabulwa amaka.+ 33 Ifisabo fya mu mushili wenu na fyonse ifya mu mulimo wenu abantu abo mushaishiba bakafilya;+ kabili mukaba fye abafyengwa kabili abatitikishiwa inshiku shonse.+ 34 Kabili ifyo amenso yenu yakamona fikamupenya.+

35 “Yehova akamulwalika ifipute ifyabipisha pa makufi yenu na ku molu yenu yonse, ifishakapole, ukufuma ku makasa yenu ukufika ku mutwe.+ 36 Yehova akatwala imwe+ ne mfumu+ iyo mukasonta ukumuteka, ku luko ulo mushaishiba, imwe ne fikolwe fyenu; kabili kulya e ko mukabombela balesa bambi, aba fimuti na ba mabwe.+ 37 Kabili abantu bonse abo Yehova akamutwalako bakalamupapa,+ bakalamulandapo mu nsoso sha manshoko+ kabili bakalamuseka.

38 “Mukabyala imbuto ishingi mwi bala, lelo mukalobololamo utunono,+ pantu makanta akalya.+ 39 Mukalimba imyangashi lelo tamwakanwe umwangashi, mukalima amabala lelo tamwakalobolole,+ pantu ifishimu fikalya.+ 40 Mukakwata imiolife mu calo cenu, lelo tamwakakwate amafuta ya kusuba, pantu imiolife yenu ikapona.+ 41 Mukafyala abana abaume na bana abanakashi, lelo tabakatwalilile ukuba abenu, pantu bakaya muli bunkole.+ 42 Imiti yenu yonse ne fisabo fya mu mushili wenu makanta akafyonaula. 43 Umulebeshi uuli mu kati kenu akalacindaminako fye, lelo imwe mukalasaalukilako.+ 44 E ukalamukongwesha, lelo imwe tamwakamukongweshepo.+ Akaba ngo mutwe, na imwe mukaba ngo mucila.+

45 “Kabili ifitiipu+ fyonse ifi fikesa pali imwe no kumukonka no kumusanga mpaka mukalobe,+ pantu tamwaumfwile kwi shiwi lya kwa Yehova Lesa wenu no kusunga amafunde yakwe ne fipope fyakwe ifyo amwebele.+ 46 Kabili fikatwalilila ukuba pali imwe na pa bana benu nge cishibilo kabili nge cilangililo umuyayaya,+ 47 pa mulandu wa kuti tamwabombele Yehova Lesa wenu no kusekelela+ no kwanga ku mutima ilyo ifintu fyamufuliile.+ 48 Kabili mukabombela abalwani+ benu abo Yehova akamwimisha, mu nsala+ na mu cilaka na mu kusapula na mu kubulwa ifintu fyonse; kabili akabika ikoli lya cela mu mikoshi yenu mpaka akamulofye.+

49 “Yehova akamwimisha uluko ulwa kutali,+ ulwa ku mpela ye sonde, abakesamufookela nga kapumpe,+ uluko ulo tamwakomfwe ululimi lwa luko,+ 50 uluko ulumoneka ulwa kutiinya,+ ulushakalangulukile umukote nelyo ukutemwa umulumendo.+ 51 Kabili bakalya utwana twa fitekwa fyenu ne fisabo fya mu mushili wenu mpaka mukalobe,+ kabili tabakamushilepo ingano, umwangashi nelyo amafuta, nangu abana ba ng’ombe shenu nelyo utwana twa mpaanga shenu, mpaka bakamulofye.+ 52 Kabili bakamushinga mu mpongolo shenu shonse yakasuke amalinga yenu ayatali ayo mwacetekelamo yakawe mu calo cenu conse, ico Yehova Lesa wenu amupeela.+ 53 Kabili pa mulandu wa kutitikishiwa no bucushi ifyo abalwani benu bakamubikamo, mukalya abana ba mu mafumo yenu, imibili ya bana benu abaume na bana benu abanakashi,+ abo Yehova Lesa wenu amupeela.

54 “Kabili amenso+ ya mwaume uwanakilila nga nshi kabili umusuma mu kati kenu, yakalola ku kucita ububi kuli munyina na ku mukashi wakwe uo atemwisha na ku bana bakwe abo ashala na bo, 55 pa kuti ekapeelapo nangu umo pali bena umunofu wa bana bakwe abo akalya, pantu tapali nangu cimo ico ashele na co pa mulandu wa kutitikishiwa no bucushi ubo abalwani benu bakamubikamo mu mpongolo shenu shonse.+ 56 Kumfwa amenso ya mwanakashi uwanakilila kabili umusuma mu kati kenu uushatalile esha ukunyanta ulukasa lwakwe pa mushili pa mulandu wa kuyemba no kunakilila,+ yakalola ku kucita ububi ku mulume wakwe uo atemwisha na ku mwana wakwe umwaume na ku mwana wakwe umwanakashi, 57 na ku cisa cine icikafuma pa kati ka molu yakwe na ku bana bakwe abo afyala,+ pantu akabalya mu bumfisolo pa mulandu wa kubulwa fyonse na pa mulandu wa kutitikishiwa no bucushi abalwani benu bakamubikamo mu kati ka mpongolo shenu.+

58 “Nga tamwakabike amano ku kukonka amafunde ayalembwa mwi buuku+ ili pa kutiina ili shina lya lulumbi+ kabili ilya kutiinya,+ ilya kuti Yehova,+ Lesa wenu, 59 Yehova kabili akalenga ifikuko fyenu ne fikuko+ fya bana benu fibipishe, fikule kabili fikakokola, akalenga na malwele yabipisha kabili ayakokola.+ 60 Kabili akabwesesha pali imwe amalwele yonse aya mu Egupti ayo mwaletiina, na yo yakaba pali imwe.+ 61 Kabili, ubulwele bonse ne cikuko conse ifishalembwa mwi buuku lya mafunde aya, Yehova akafileta pali imwe mukasuke amuloba. 62 Kabili mukashala abanono sana,+ nangu ca kuti mwaba nge ntanda sha mu muulu ku bwingi,+ pantu tamwaumfwile kwi shiwi lya kwa Yehova Lesa wenu.

63 “Kabili nga filya fine Yehova afwaishe ukumucitila ifisuma no kumufusha,+ e fyo Yehova akafwaisha ukumonaula no kumulofya;+ kabili mukafumpulwa mu calo ico muleingilamo ukuti cibe icenu.+

64 “Kabili Yehova akamusalanganishisha mu bantu na bantu bonse ukufuma ku mpela ye sonde ukufika ku mpela ye sonde,+ kabili kulya e ko mukabombela balesa bambi abo mushaishibe nangu abo ifikolwe fyenu fishaishibe, aba fimuti na ba mabwe.+ 65 Kabili tamwakekale umutende mu nko isho,+ na makasa yenu tayakasange apa kutuusha; kabili kulya e ko Yehova akamupeelela umutima+ wa mwenso na menso+ ayanaka no kubulwa isubilo. 66 Kabili mukaba mu kapoosa mweo kakalamba kabili mukaba mu mwenso ubushiku na kasuba, kabili tamwakeshibe nga mukaba no mweo.+ 67 Ulucelo mukalati, ‘Kanshi nga cungulo!’ ne cungulo mukalati, ‘Kanshi nga lucelo!’ pa mulandu wa mwenso wa mutima wenu uo mukabamo kabili pa mulandu wa co amenso yenu yakamona.+ 68 Kabili Yehova akamubwesesha ku Egupti mu ngalaba mu nshila iyo nasosele kuli imwe nati, ‘Tamwakaimone na kabili,’+ kabili kulya e ko mukalafwaya ukulaishitisha ku balwani benu ku kuba abasha baume no kuba ababomfi abanakashi,+ lelo takwakabe uwa kumushita.”

29 Aya e mashiwi ya cipangano ayo Yehova aebele Mose ukupangana na bana ba kwa Israele mu calo ca Moabu ukulunda pa cipangano apangene na bo mu Horebu.+

2 Kabili Mose aitile abena Israele bonse no kubeba ati: “Ni mwe mwalemona fyonse ifyo Yehova acitile pa menso yenu mu calo ca Egupti kuli Farao na ku babomfi bakwe bonse na ku calo cakwe conse,+ 3 ifya kwesha ifikalamba ifyo amenso yenu yamwene,+ filya ifishibilo+ fikalamba ne fipesha amano.+ 4 Kabili Yehova tamupeela umutima wa kwishiba na menso ya kumona na matwi ya kumfwa ukufika no bwa lelo.+ 5 ‘Ilyo nalemutungulula imyaka amakumi yane (40) mu matololo,+ ifya kufwala fyenu tafyalepwike, kabili indyato shenu tashapwile.+ 6 Tamwaliile ifya kulya,+ no mwangashi nangu ifya kunwa fimbi ifikola tamwanwene, pa kuti mwishibe ukuti nine Yehova Lesa wenu.’ 7 Mwasukile mwafika kuno kuntu, kabili Sihone imfumu ya ku Heshebone+ na Oge+ imfumu ya ku Bashani baishile ku kulwa na ifwe, lelo twalibacimfishe.+ 8 Kabili twapokele ne calo cabo no kucipeela ku bena Rubene ukuti cibe icalo cabo na ku bena Gadi na kuli hafu wa mukowa wa bena Manase.+ 9 E ico mulesunga amashiwi ayaba muli ici cipangano no kulayakonka, pa kuti fyonse ifyo mulecita file-enda bwino.+

10 “Imwe bonse mwiminine ku cinso ca kwa Yehova Lesa wenu ubwa lelo, intungulushi sha mikowa yenu, abakalamba benu na bacilolo benu, umwaume onse uwa kwa Israele,+ 11 abana benu abanono, abakashi benu,+ na balebeshi benu,+ abali mu kati ka nkambi yenu, ukutula pa ba kumutebela inkuni ukufika ku ba kumutapila amenshi,+ 12 pa kuti mupangane icipangano+ na Yehova Lesa wenu no kulapa umulapo, ico Yehova Lesa wenu alepangana na imwe lelo;+ 13 pa kuti amulenge ukuba abantu+ bakwe no kuti ailange ukuti ni Lesa wenu,+ ukulingana ne fyo amulaile kabili ukulingana ne fyo alapile ku fikolwe fyenu, Abrahamu,+ Isaki+ na Yakobo.+

14 “Nomba nshilepangana ici cipangano no mulapo na imwe mweka,+ 15 lelo ndepangana na bonse abeminine pano pamo na ifwe lelo, ku cinso ca kwa Yehova Lesa wesu na ku bashili na ifwe pano lelo;+ 16 (pantu mwalishiba bwino ifyo twaikele mu Egupti ne fyo twapitile mu kati ka nko isho mwapitilemo.+ 17 Kabili mwalemona ifintu fyabo ifya bunani no tulubi twabo utwa bunani,+ ifya fimuti ne fya mabwe, ifya silfere ne fya golde, ifyo shakwete;)18 pa kuti kwiba pali imwe umwaume nelyo umwanakashi nelyo ulupwa nelyo umukowa abo imitima yabo ilealuka lelo ukufuma kuli Yehova Lesa wesu ukuyabombela balesa ba isho nko;+ pa kuti kwiba pali imwe umushila uuletwala icisabo ca cimenwa ca busungu ne fyalula.+

19 “Kabili ngo muntu aumfwa amashiwi ya mulapo yu,+ kabili aitakisha mu mutima wakwe, no kutila, ‘Nkekala umutende,+ nangu naenda mu bumankonso bwa mutima wandi,’+ lelo ali na mapange ya kulofya bonse kwati konaula impanga yatapililwa bwino ne mpanga iyauma, 20 Yehova takamwelele,+ lelo ubukali+ bwa kwa Yehova ne cipyu+ cakwe fikaba pali uyo muntu,+ kabili ifitiipu fyonse ifyalembwa mwi buuku+ ili fikaba pali ena, kabili Yehova akafuuta ishina lyakwe mwi samba lya muulu. 21 Awe Yehova akamonaula+ ukumufumya mu mikowa yonse iya kwa Israele ukulingana ne fitiipu fyonse ifya cipangano ifyalembwa mwi buuku ili ilya mafunde.

22 “Kabili aba mu nkulo ya ku ntanshi, e kutila abana benu abakema pa numa yenu, e lyo na bena fyalo abakafuma ku calo ca kutali, ilyo bakamona ifikuko fya cilya calo na malwele ya ciko ayo Yehova acilwalika,+ 23 na mabwe ya mingu no mucele+ no kupya,+ ica kuti icalo conse tacakabyalwemo, nangu ukumenamo, nangu umulemfwe onse ukumenamo, ngo kuwishiwa kwa Sodomu na Gomora,+ Adma+ na Seboyimu,+ iyo Yehova awishishe mu cipyu cakwe na mu bukali bwakwe;+ 24 bena pamo ne nko shonse, bakatila, ‘Cinshi Yehova acitila ici cintu ku calo ici?+ Cinshi akalipile mu musango uyu?’ 25 E lyo bakatila, ‘Ni co balishiile icipangano+ ca kwa Yehova Lesa wa fikolwe fyabo, ico apangene na bo ilyo abafumishe mu calo ca Egupti.+ 26 Kabili baile no kubombela balesa bambi no kubakontamina, balesa abo bashaishibe kabili abo ashabasuminishe ukupepa.+ 27 E lyo Yehova akalipe pa bekashi ba muli cilya calo no kubaletela ifitiipu fyonse ifyalembwa mwi buuku ili.+ 28 E fyo Yehova abanukwile mu calo cabo mu bukali+ na mu cipyu na mu cifukushi cikalamba no kubapoosa mu calo cimbi ifyo cili ubwa lelo.’+

29 “Ifyafiswa+ fya kwa Yehova Lesa wesu, lelo ifyasokololwa+ fyesu na bana besu umuyayaya, pa kuti tulekonka amafunde yonse aya.+

30 “Kabili ilyo ifi fyonse ifyo nalanda fikesa pali imwe, e kutila amapaalo+ ne fitiipu,+ ifyo nabika ku cinso cenu, na imwe mwafibukisha+ mu nko shonse umo Yehova Lesa wenu akamusalanganishisha,+ 2 kabili mwabwelela kuli Yehova Lesa+ wenu no kumfwa kwi shiwi lyakwe ukulingana na fyonse ifyo ndemweba lelo, pamo na bana benu, no mutima wenu onse no mweo wenu onse,+ 3 e lyo Yehova Lesa wenu akamubwesesha bankole+ no kumubelela uluse+ kabili akamulonganya na kabili ukufuma mu nko shonse isho Yehova Lesa amupashiilemo.+ 4 Nga abantu benu abasalanganishiwe bakaba ku mpela ya muulu, kulya kwine e ko Yehova Lesa wenu akamulonganya kabili e ko akamufumya.+ 5 Yehova Lesa wenu akamuleta ku calo ico ifikolwe fyenu fyapokele, kabili cikaba cenu; kabili akamucitila ubusuma no kumufusha ukucila ifikolwe fyenu.+ 6 Kabili Yehova Lesa wenu akamusembulula imitima+ ne mitima ya bana benu,+ pa kuti mutemwe Yehova Lesa wenu no mutima wenu onse no mweo wenu onse pa kuti mube no mweo.+ 7 Kabili Yehova Lesa wenu akabika ifitiipu fyonse ifi pa balwani benu na pa bamupata, abamucushishe.+

8 “Na imwe, mukapilibuka no kumfwila ishiwi lya kwa Yehova no kukonka amafunde yakwe yonse ayo ndemweba lelo.+ 9 Kabili Yehova Lesa wenu akamupeela ifingi nga nshi mu milimo yenu yonse iyo mukalabomba,+ akamupeela na bana abengi ne fitekwa+ ifingi ne fisabo fya mu mushili wenu ifingi,+ pa kuti mukabe abakankaala;+ pantu Yehova akabwekeshapo ukufwaisha ukumucitila ifisuma, nga filya afwaishe ukucitila ifikolwe fyenu;+ 10 pantu mukomfwila ishiwi lya kwa Yehova Lesa wenu pa kulakonka amafunde yakwe ne fipope fyakwe ifyalembwa mwi buuku ili ilya mafunde,+ pantu mukabwelela kuli Yehova Lesa wenu no mutima wenu onse no mweo wenu onse.+

11 “Pantu ili ifunde ndemweba lelo talikosele sana kuli imwe ukulikonka, kabili talili ukutali.+ 12 Talili mu muulu, ica kuti mwatila, ‘Nani akatuninina mu muulu no kulileta kuli ifwe, pa kuti tulyumfwe no kulikonka?’+ 13 Kabili talili bushilya bwa bemba, ica kuti mwatila, ‘Nani alatwabukila bushilya bwa bemba no kulileta kuli ifwe, pa kuti tulyumfwe no kulikonka?’ 14 Pantu icebo ici cili fye mupepi na imwe, cili mu kanwa kenu na mu mitima yenu,+ pa kuti mulecikonka.+

15 “Moneni, nabika ku cinso cenu lelo umweo no busuma, kabili imfwa no bubi.+ 16 Nga mwakulaumfwila amafunde ya kwa Yehova Lesa wenu, ayo ndemweba lelo, pa kuti muletemwa Yehova Lesa wenu,+ pa kwenda mu nshila shakwe no kukonka amafunde+ yakwe ne fipope fyakwe no bupingushi bwakwe,+ mukaba no mweo+ kabili mukafula, na Yehova Lesa wenu akamupaala mu calo ico muleingilamo ukuti cibe cenu.+

17 “Lelo imitima yenu nga yatalukako kabili mwakaana ukumfwa,+ kabili nga mwabepwa mwakontamina na balesa bambi no kubabombela,+ 18 ndemweba lelo nati ukuloba mukaloba.+ Tamwakekale inshiku ishingi mu calo ico muleyabukilapo Yordani ku kwingilamo ukuti cibe icalo cenu. 19 Nalenga umuulu ne sonde ukuba inte pali imwe lelo,+ ukuti nimbika pa ntanshi yenu umweo ne mfwa,+ ipaalo+ ne citiipu;+ e ico saleni umweo pa kuti mube no mweo,+ imwe na bana benu,+ 20 pa kulatemwa Yehova Lesa wenu,+ pa kulaumfwila ishiwi lyakwe na pa kulambatila kuli ena,+ pantu ena e mweo wenu kabili e ukalenga ukuti mwikale inshiku ishingi,+ pa kuti mwikale mu calo ico Yehova alapile ukupeela ku fikolwe fyenu, Abrahamu, Isaki na Yakobo.”+

31 Kabili Mose aile no kusosa amashiwi aya ku bena Israele bonse 2 no kubeba ati: “Ine lelo ndi ne myaka umwanda umo na makumi yabili (120).+ Capwa, nshakasuminishiwe ukufuma no kwingila,+ ukulingana ne fyo Yehova anjebele, ati, ‘Tawakaabuke Yordani uyu.’+ 3 Yehova Lesa wenu e ulemutangilila pa kwabuka.+ E ukalofya ishi nko ku cinso cenu, na imwe mukashitamfyemo.+ Yoshua e ulemutangilila pa kwabuka,+ nge fyo Yehova asosele. 4 Kabili filya fine Yehova acitile kuli Sihone+ na kuli Oge,+ ilyo abalofeshe, e fyo akacita na ku shamfumu sha bena Amore, na ku fyalo fyabo.+ 5 Kabili Yehova nabapeela kuli imwe,+ kabili mukacite kuli bena ukulingana na mafunde yonse ayo namweba.+ 6 Shipeni kabili koseni.+ Mwitiina nelyo ukufwa umutombo ku cinso cabo,+ pantu Yehova Lesa wenu e uleya pamo na imwe. Takamushe nelyo ukumulekelesha.”+

7 Kabili Mose aitile Yoshua no kumweba pa menso ya bena Israele bonse ati: “Shipa kabili kosa,+ pantu ni we ukengisha aba bantu mu calo ico Yehova alapile ku fikolwe fyabo ukubapeela, kabili ni we ukabapeela ukuti cibe cabo.+ 8 Kabili Yehova e ulekutangilila.+ Akulaba na iwe. Takakushe nangu ukukulekelesha. Witiina kabili witutuma.”+

9 Kabili Mose alembele ili funde+ no kulipeela kuli bashimapepo abana baume ba kwa Lebi,+ abasenda icipao ca cipangano ica kwa Yehova,+ na ku bakalamba bonse aba kwa Israele. 10 Kabili Mose akonkenyepo ukubeba ati: “Pa mpela ya myaka cinelubali (7) yonse, ilyo inshita ya mwaka wa kusuulako inkongole yafika,+ pa nshita ya mutebeto wa nsakwe,+ 11 ilyo abena Israele bonse baisa ku kumona icinso ca kwa Yehova+ Lesa wenu pa cifulo apo akasala,+ e lyo mukabelenge ili funde ku cinso ca bena Israele bonse mu matwi yabo.+ 12 Longanyeni abantu,+ abaume na banakashi na banono na balebeshi benu abali mu mpongolo shenu, pa kutila bakutike kabili basambilile,+ pantu bafwile ukulatiina Yehova Lesa+ wenu no kubika amano ku kukonka fyonse ifyalembwa muli ili funde. 13 Kabili abana babo abashaishiba bafwile ukukutika,+ kabili bafwile ukusambilila ukutiina Yehova Lesa wenu inshiku shonse isho muli no mweo mu calo ico muleabukilamo ukuti cibe cenu.”+

14 Pa numa Yehova atile kuli Mose: “Mona! Inshiku shapalama isha kuti ufwe.+ Ita Yoshua, kabili mwiminine mu cikuulwa ca kukumaninako, ukuti mpeele ena umulimo.”+ Awe Mose na Yoshua baile no kwiminina mu cikuulwa ca kukumaninako.+ 15 E lyo Yehova amoneke pa cikuulwa ca kukumaninako mu ntumba ye kumbi, ne ntumba ye kumbi yaiminine pa muulu wa mwinshi wa cikuulwa ca kukumaninako.+

16 Yehova nomba atile kuli Mose: “Mona! Walalaala nge fyalaala ifikolwe fyobe;+ kabili aba bantu bakema+ no kucita bucilende na balesa bambi bambi aba mu calo ico baleyako,+ mu kati kabo, kabili bakansuula+ no kupula mu cipangano candi ico napangana na bo.+ 17 Na ine nkakalipa pa mulandu wa micitile yabo muli ubo bushiku,+ kabili nkabalekelesha+ no kufisa icinso candi kuli bena,+ kabili bakaba ica konaula; kabili ifibi no bwafya fikesa pali bena,+ kabili bakatila muli ubo bushiku, ‘Bushe te mulandu wa kuti Lesa tali mu kati kesu e co ifibi fi fyaishila pali ifwe?’+ 18 Na ine nkafisa icinso candi mu bushiku bulya pa mulandu wa fyabipa ifyo bacita, pantu bayalukila kuli balesa bambi.+

19 “Nomba ilembeleni ulu lwimbo+ no kusambilisha abana ba kwa Israele.+ Lubikeni mu tunwa twabo pa kuti lube inte yandi ku bana ba kwa Israele.+ 20 Pantu nkabaleta ku calo ico nalapile ku fikolwe fyabo,+ umwaba umukaka no buci,+ kabili bakalya+ no kwikuta kabili bakena+ no kwalukila kuli balesa bambi,+ no kubabombela kabili bakansuula no kupula mu cipangano candi.+ 21 Kabili ilyo ifibi ifingi na mafya fikabaponena,+ ulu lwimbo lukaba nge nte iya kubashinina, pantu talwakalabwe mu tunwa twa bana babo, pantu ninjishiba bwino lelo uko umutima+ wabo uleya ilyo nshilabengisha mu calo ico nalapile ukubapeela.”

22 Awe Mose alembele ulu lwimbo muli bulya bushiku, ukuti asambilishe abana ba kwa Israele.+

23 Kabili apeele Yoshua mwana Nuni+ umulimo no kutila kuli ena: “Shipa kabili kosa,+ pantu ni we ukengisha abana ba kwa Israele mu calo ico nalapile ukubapeela,+ na ine nkatwalilila ukuba na iwe.”

24 Awe ilyo fye Mose apwishishe ukulemba amafunde ya muli ili ibuuku yonse,+ 25 Mose aebele abena Lebi, aba kusenda icipao ca cipangano+ ica kwa Yehova, ati: 26 “Buuleni ibuuku ili ilya mafunde,+ libikeni lubali ku cipao+ ca cipangano ica kwa Yehova Lesa wenu, kabili lyakulaba inte pali imwe.+ 27 Pantu ine, nalishiba bwino bucipondoka+ bwenu no kutalama kwa mikoshi yenu.+ Pantu nga ca kutila muletalamina Yehova+ ilyo ncili uwa mweo pali lelo, cikaba shani nga nafwa? 28 Longanyeni kuli ine abakalamba bonse aba mikowa yenu na bacilolo+ benu, pa kuti mbebe amashiwi aya, pa kuti nenge umuulu ne sonde ukube nte pali bena.+ 29 Pantu ninjishiba ukuti ilyo nkafwa mukayonaula,+ kabili mukafuma mu nshila iyo namweba; no bubi+ bukamuponena ku mpela ya nshiku, pantu mukacita icabipa mu menso ya kwa Yehova ku kumukalifya ku micitile yenu.”+

30 Kabili Mose aebele ulukuta lonse ulwa kwa Israele amashiwi yonse aya ulu lwimbo:+

44 E fyo Mose aishile no kusosa amashiwi yonse aya ulu lwimbo mu matwi ya bantu,+ ena na Hoshea mwana Nuni.+ 45 Ilyo Mose apwile ukusosa amashiwi yonse aya ku bena Israele bonse, 46 abebele ati: “Bikeni imitima yenu pa mashiwi yonse ayo ndemweba lelo ku kumusoka,+ pa kuti mwebe abana benu ukubika amano ku kukonka aya mafunde yonse.+ 47 Pantu te mashiwi ya fye ndemweba,+ lelo mweo wenu,+ kabili kuli aya mashiwi kuti mwalenga inshiku shenu ukufula mu calo ico muleabukila Yordani ukuti cibe cenu.”+

48 Kabili Yehova asosele kuli Mose pa bushiku bwine ubu, ati:49 “Nina ulupili lwa mu Abarimu+ ulu, Ulupili lwa Nebo,+ ulwa mu calo ca Moabu, ulwalungatana na Yeriko, no kumona icalo ca Kanaani, ico ndepeela ku bana ba kwa Israele ukuba icalo cabo.+ 50 Kabili ulefwila pa lupili ulo ulenina, nge fyafwa abantu bobe,+ filya fine Aarone munonko afwile pa Lupili lwa Hore+ nge fyafwa abantu bakwe;51 pantu mwacitile ico nshamwebele+ mu kati ka bana ba kwa Israele pa menshi ya Meriba+ ku Kadeshe mu matololo ya Sini; pantu tamwancindike mu kati ka bana ba kwa Israele.+ 52 Pantu ukamwena icalo akatalamukila, lelo tawakengile mu calo ico ndepeela ku bana ba kwa Israele.”+

22 Na kuli Dani atile:+

28 Kabili Israele akekala umutelelwe,+

34 E lyo Mose aninine Ulupili lwa Nebo+ mu ciswebebe ca Moabu, ukuyafika pa muulu wa pa Pisga,+ apalungatana na Yeriko.+ Kabili Yehova amulangile icalo conse, ukufuma ku Gileadi ukufika ku Dani,+ 2 na Naftali onse ne calo ca kwa Efraimu na Manase ne calo conse ica kwa Yuda ukufika kuli bemba wa ku masamba,+ 3 na mu Negebu+ na mu Citungu+ ca Yordani, impanga iyabatama iya mu Yeriko, umusumba wa tuncindu,+ ukufika ku Soari.+

4 Kabili Yehova akonkenyepo ukusosa kuli Mose ati: “Ici e calo ico nalapile kuli Abrahamu, kuli Isaki na kuli Yakobo, ukuti, ‘Nkapeela ku bana bobe.’+ Nalenga ukuti ucimone na menso, pantu tawakaabukileko.”+

5 E lyo Mose umubomfi wa kwa Yehova+ afwilile kulya mu calo ca Moabu ukulingana ne fyo Yehova asosele.+ 6 Kabili amushiikile mu mupokapoka wa mu calo ca Moabu apalungatana na Bete-peore,+ nomba takuli nangu umo uwaishiba inshiishi yakwe ukufika na lelo.+ 7 Kabili Mose ali ne myaka umwanda umo na makumi yabili (120) ilyo afwile.+ Lelo amenso yakwe tayanakile,+ na maka yakwe yali tayalapwa.+ 8 Kabili abana ba kwa Israele balooseshe Mose mu ciswebebe ca Moabu inshiku amakumi yatatu (30).+ Awe shasukile shapwa inshiku sha kuloosha Mose.

9 Kabili Yoshua mwana Nuni aiswilemo umupashi wa mano,+ pantu Mose abikile iminwe yakwe pali ena;+ na bana ba kwa Israele baumfwile kuli ena no kucita ukulingana ne fyo Yehova aebele Mose.+ 10 Lelo takwatalile akwima kasesema mu Israele nga Mose,+ uo Yehova aishibe icinso ne cinso,+ 11 ku fishibilo fyonse na ku fipesha amano ifyo Yehova amutumine ukuyacita mu calo ca Egupti kuli Farao na ku babomfi bakwe bonse na ku calo cakwe conse,+ 12 kabili ku kuboko konse ukwakosa na ku fya kutiinya fyonse ifikalamba ifyo Mose acitile ku menso ya bena Israele bonse.+