Yoshua

1 Nomba ilyo Mose umubomfi wa kwa Yehova afwile, Yehova asosele kuli Yoshua+ mwana Nuni, umubomfi+ wa kwa Mose ati: 2 “Mose umubomfi wandi nafwa;+ e ico nomba ima, abuka umumana wa Yordani uyu, iwe na bantu bonse aba, no kwingila mu calo ico ndepeela abana ba kwa Israele.+ 3 Ponse apakanyanta amakasa yenu, nkamupeela, nga filya fine nalaile Mose.+ 4 Ukufuma ku matololo na ku Lebanone uyu ukufika ku mumana ukalamba, umumana wa Yufrate, icalo conse ica bena Hiti,+ no kufika kuli Bemba Mukalamba ukulola ku kabanga, e ko icalo cenu cikafika.+ 5 Takuli nangu umo uukakucimfya inshiku shonse isha mweo obe.+ Filya fine nali na Mose e fyo nkaba na iwe.+ Nshakakushe kabili nshakakulekeleshe.+ 6 Shipa kabili kosa,+ pantu ni we ukalenga aba bantu ukupyana+ icalo ico nalapile ku fikolwe fyabo ukuti nkabapeela.+

7 “Ushipe fye kabili ukose sana pa kuti upoose amano ku kulakonka amafunde yonse ayo Mose umubomfi wandi akwebele.+ Wilayalukila ku kwa ku kulyo nangu ku kwa ku kuso,+ ulekonka fye amafunde, pa kuti ube na mano konse uko uleya.+ 8 Ibuuku ili ilya mafunde wileka lifume mu kanwa kobe,+ kabili ulebelenga ifyalembwa muli ili buuku no kwetetulapo akasuba no bushiku, pa kuti ubike amano ku kulakonka fyonse ifyalembwamo;+ pantu e lyo ukatunguluka kabili e lyo ukaba uwa mano.+ 9 Bushe nshikwebele?+ Shipa kabili kosa. Witutuma kabili witiina,+ pantu Yehova Lesa obe ali na iwe konse uko uleya.”+

10 Awe Yoshua aebele bacilolo ba bantu, ati: 11 “Piteni mu kati ka nkambi no kweba abantu, amuti, ‘Pekanyeni ifya kusenda pa bulendo, pantu kwashala inshiku shitatu ukufuma lelo, mukaabuka uyu Yordani pa kuti mwingile no kupoka icalo ico Yehova Lesa wenu alemupeela pa kuti cibe cenu.’”+

12 Kabili ku bena Rubene na bena Gadi na hafu wa mukowa wa kwa Manase, Yoshua atile: 13 “Muleibukisha amashiwi ayo Mose umubomfi wa kwa Yehova amwebele,+ ati, ‘Yehova Lesa wenu alemulenga ukutuusha kabili alimupeela ici calo. 14 Abakashi benu, abana benu abanono pamo ne fitekwa fyenu bakekala mu calo ico Mose amupeele, kuno kwi shilya lya Yordani;+ lelo imwe, mwe mpalume,+ mukaye namuiteyanya ku kulwa+ no kutangilila bamunyinenwe, kabili mukabaafwe. 15 Ilyo Yehova alenga bamunyinenwe ukutuusha nge fyo akalenga na imwe ukutuusha kabili na bo bakwata icalo ico Yehova Lesa wenu alebapeela,+ e lyo na imwe mukabwelele ku calo cenu no kwikalamo,+ icalo ico Mose umubomfi wa kwa Yehova amupeele kwi shilya lya Yordani ku kabanga.’”+

16 Na bo bayaswike Yoshua, abati: “Fyonse ifyo watweba tukacita, na konse uko watweba ukuya, tukaya.+ 17 Filya fine twaumfwilile Mose muli fyonse, e fyo na iwe wine tukakumfwila. Shi Yehova Lesa obe abe na iwe+ ifyo ali na Mose.+ 18 Umuntu onse uwakaana ukukonka icipope+ cobe no kukanaumfwa ku mashiwi yobe muli fyonse ifyo wamweba, akepaiwa.+ Shipa fye kabili kosa.”+

2 E lyo Yoshua mwana Nuni atumine abaume babili inengu mu bumfisolo ukufuma mu Shitimu,+ no kubeba ati: “Kabiyeni, kamoneni icalo no musumba wa Yeriko.” Awe na bo baliile, baingile na mu ng’anda ya mwanakashi cilende ishina lyakwe ni Rahabu,+ no kutubilisha mulya. 2 Ne mfumu ya Yeriko yaebelwe ukuti: “Moneni! Abaume ba mu bana ba kwa Israele nabengila muno ubushiku ku kulengula icalo.” 3 Awe imfumu ya Yeriko e pa kutuma bamo kuli Rahabu, aiti: “Fumya abaume abeshile kuli iwe, abengile mu ng’anda yobe, pantu beshile ku kulengula icalo.”+

4 Mu nshita ilya Rahabu asendele balya baume babili no kubafisa. Kabili atile: “Ca cine, abaume bacisa kuli ine, lelo nshacishiba uko bacifuma. 5 Nomba pa nshita ya kwisala impongolo+ ilyo kwacifiita, e lyo aba baume bacifuma. Nshishibe uko bele. Bakonkeni bwangu bwangu, pantu mwalabasanga.” 6 (Nangu alandile ifi, ninshi nabaninika pa mutenge,+ no kubafisa mu tumuti twa kolokondwe uto abikile pa mutenge.) 7 Na bo babakonkele ukulola ku fyabu+ fya Yordani, kabili baisele impongolo ilyo fye abalebakonka bafumine.

8 Lelo ilyo bashilasendama, alininine aya kuli bena pa mutenge. 9 Kabili atile ku baume balya: “Ninjishiba ukuti nangu cibe shani Yehova akamupeela cino calo,+ kabili tulemutiina,+ na bekashi bonse aba muli cino calo nabanenuka pa mulandu wenu.+ 10 Pantu twalyumfwa ifyo Yehova akamishe amenshi ya muli Bemba Wakashika pa ntanshi yenu ilyo mwafumine mu Egupti,+ ne fyo mwacitile ku mfumu shibili isha bena Amore ishali bushilya bwa Yordani, Sihone+ na Oge,+ isho mwalofeshe.+ 11 Ilyo twaumfwile, imitima yesu yaiketwe umwenso,+ na nomba tapali uwaba na maka pa mulandu wenu,+ pantu Yehova Lesa wenu e Lesa mu muulu na pano isonde.+ 12 Nomba lapeni kuli ine mwi shina lya kwa Yehova+ ukuti, apo ndi ne cikuuku kuli imwe, na imwe mukaba ne cikuuku ku ba mu ng’anda ya kwa tata,+ no kumpeela icishibilo ca cishinka.+ 13 Kabili mukaleke batata+ na bamayo bakabe aba mweo, na bandume yandi na bankashi nandi, na bantu babo bonse, kabili mukatupusushe ku mfwa.”+

14 Na balya baume bamwebele ati: “Ni fwe tukafwilamo te imwe iyo!+ Nga tamushimike ili lyashi lyesu, ninshi ilyo Yehova akatupeela cino calo, na ifwe tukaba ne cikuuku kuli imwe kabili tukaba aba cishinka kuli imwe.”+ 15 Awe abekishishe ku ntambo pe windo, pantu ing’anda yakwe yali pe linga, kabili aleikala pa muulu we linga.+ 16 Na o abebele ati: “Kabiyeni ku calo ca mpili, pa kuti abalemukonka bemusanga; kabili mukabelame kulya inshiku shitatu, mpaka abalemukonka bakabwele, e lyo nomba mukaye.”

17 Na baume bamwebele ati: “Tuli aba kaele kuli uyu mulapo obe uo watulenga ukulapa.+ 18 Mona! Tukesa mu calo. Ukakake iyi ntambo yakashika pe windo apo uletwikishisha, kabili bawiso, na banoko, na bamunonko na ba mu ng’anda ya bawiso bonse ukabalonganike mu ng’anda yobe.+ 19 Kabili onse uwafumina ku nse ya fiibi fya ng’anda yobe,+ umulopa wakwe ukaba pa mutwe wakwe, kabili tukaba aba kaele; na onse uukaba na iwe mu ng’anda, umulopa wakwe ukaba pa mitwe yesu nga ca kutila ukuboko kwesu kwaisa pali ena. 20 Kabili nga wasokolola ilyashi lyesu ili,+ na ifwe tukaba aba kaele ku mulapo obe uyu watulenga ukulapa.” 21 Na o atile: “Cibe ukulingana ne fyo mwalanda.”

Awe abalekele baye, na bo baliile. E lyo akakile umwando wakashika pe windo. 22 E ico baliile bayafika na ku calo ca mpili no kwikala kulya inshiku shitatu, mpaka ilyo abalebakonka babwelele. Na balebakonka babafwaile mu nshila shonse, lelo tababasangile. 23 Na balya baume babili batentemwike na kabili ukufuma ku calo ca mpili no kwabuka umumana ukwisa kuli Yoshua mwana Nuni, kabili bamushimikile fyonse ifyabacitikile. 24 Na bo batile kuli Yoshua: “Yehova napeela icalo conse mu minwe yesu.+ Na bekashi bonse aba muli cilya calo nabanenuka pa mulandu wesu.”+

3 Awe Yoshua aimine lucelocelo, kabili ena na bana ba kwa Israele bafumine ku Shitimu+ no kuya ku Yordani; kabili e ko baleele ilyo tabala-abuka.

2 Nomba pa mpela ya nshiku shitatu,+ bacilolo+ baile mu kati ka nkambi 3 no kweba abantu, abati: “Ilyo mukamona fye icipao ca cipangano ica kwa Yehova Lesa wenu, na bashimapepo abena Lebi nabasenda icipao,+ mukafume apo muli, no kucikonka, 4 —lelo pa kati ka imwe na cena pakabe nalimo imikono amakana yabili (2,000);+ mwikapalamako iyo—pa kuti mukeshibe inshila umo mufwile ukuya, pantu tamwatala amupitamo.”

5 Na Yoshua atile ku bantu: “Ipekanyeni,+ pantu mailo Yehova akacita ifipesha amano mu kati kenu.”+

6 E lyo Yoshua aebele bashimapepo ati: “Sendeni icipao ca cipangano+ no kutangilila abantu.” Awe baimishe icipao ca cipangano no kutangilila abantu.

7 Kabili Yehova atile kuli Yoshua: “Buno bushiku nalakucindamika mu menso ya bena Israele bonse,+ pa kuti beshibe ukuti filya fiine nali na Mose+ e fyo nkaba na iwe.+ 8 Na iwe webe+ bashimapepo abasendele icipao ca cipangano, auti, ‘Nga mwafika fye mu mbali ya menshi ya Yordani, mwiminine+ mulya mwine mu Yordani.’”

9 Awe Yoshua atile ku bana ba kwa Israele: “Palameni kuno no kumfwa ifyo Yehova Lesa wenu asosele.” 10 E lyo Yoshua atile: “Kuli ici e ko mukeshibila ukuti Lesa wa mweo ali mu kati kenu,+ no kuti akatamfya ku cinso cenu abena Kanaani na bena Hiti na bena Hibi na bena Perisi na bena Gegashi na bena Amore na bena Yebusi.+ 11 Moneni! Icipao ca cipangano ica kwa Shikulu we sonde lyonse cilemutangilila ukwingila mu Yordani. 12 Nomba saleni abantu ikumi na babili (12) mu mikowa ya kwa Israele, umuntu umo mu mukowa umo.+ 13 Kabili ilyo amakasa ya bashimapepo abasendele icipao ca kwa Yehova, Shikulu we sonde lyonse, yanyanta mu menshi ya Yordani, amenshi ya Yordani ayalefuma ku muulu yakaleka ukupita, kabili yakeminina nga menshi ya mu cishiba.”+

14 Nomba ilyo abantu bafumine mu matenti yabo, ilyo bashilayabuka Yordani, ninshi na bashimapepo nabasenda icipao+ ca cipangano bali ku ntanshi ya bantu, 15 kabili cilya abasendele Cipao bafika ku Yordani, na makasa ya bashimapepo abasendele Icipao yanyanta mu mbali ya menshi (pantu umumana wa Yordani ulapoosa mu lulamba+ lwa uko monse mu nshiku shonse isha kulobolola), 16 e lyo amenshi ayalefuma lwa ku muulu yaiminine pamo ku musumba wa Adamu uwabela ku mbali ya Saretani,+ ukutali nga nshi. Kabili kulya e ko yatulumene kwati cishiba,+ na menshi ayaleya kuli bemba wa Araba, e kutila kuli Bemba wa Mucele,+ yalikamine. Yalekele ukupita kabili abantu bayabwike apalungatana na Yeriko. 17 Na bashimapepo abasendele icipao ca cipangano ca kwa Yehova baiminine ukwabula ukusunkana pa mushili uwauma,+ pa kati ka Yordani, uku ninshi abena Israele bonse baleyabuka apauma,+ mpaka uluko lonse lwayabuka umumana wa Yordani.

4 Nomba ilyo fye uluko lonse lwa-abwike umumana wa Yordani,+ Yehova atile kuli Yoshua: 2 “Saleni abantu ikumi na babili (12), cila mukowa umuntu umo,+ 3 no kubeba amuti, ‘Mubuule amabwe ikumi na yabili+ pa kati na nkati ka Yordani, apaciminina bashimapepo shilili,+ mwabuke na yo no kuyabika uko muleyasendama+ lelo.’”

4 E ico Yoshua aitile abaume ikumi+ na babili abo asontele pa bana ba kwa Israele, cila mukowa umwaume umo; 5 kabili Yoshua abebele ati: “Mutangilile icipao ca kwa Yehova Lesa wenu, muye pa kati ka Yordani, kabili musende cila muntu ilibwe pa kubeya, ukulingana ne mpendwa ya mikowa ya bana ba kwa Israele, 6 pa kuti ici cikabe icishibilo kuli imwe.+ Ilyo abana benu bakamwipusha abati, ‘Cinshi mwasungila aya mabwe?’+ 7 Mukabebe ati, ‘Pantu amenshi ya Yordani yalipatukene pa ntanshi ya cipao ca cipangano ica kwa Yehova.+ Ilyo capitile mu menshi ya Yordani, amenshi ya Yordani yalipatukene, na ya mabwe cibukisho ca muyayaya ku bana ba kwa Israele.’”+

8 Awe abana ba kwa Israele bacitile ifyo fine, ukulingana ne fyo Yoshua abebele, babuulile na mabwe ikumi na yabili pa kati ka Yordani, ifyo Yehova aebele Yoshua, ukulingana ne mpendwa ya mikowa ya bana ba kwa Israele;+ kabili baliyasendele no kuyabika uko basendeme.+

9 Kwali na mabwe ikumi na yabili (12) ayo Yoshua abikile pa kati ka Yordani apaiminine+ bashimapepo abasendele icipao ca cipangano, kabili e po yaba ukufika na lelo.

10 Na bashimapepo abasendele Icipao baiminine pa kati+ ka Yordani mpaka bacita fyonse ifyo Yehova aebele Yoshua ukweba abantu, ukulingana na fyonse ifyo Mose aebele Yoshua.+ Na bantu balyangufyenye+ ukwabuka. 11 Awe ilyo abantu bonse bapwile ukwabuka, e lyo bashimapepo bayabwike ne cipao+ ca kwa Yehova, ninshi abantu balebamona. 12 Na bana ba kwa Rubene na bana ba kwa Gadi na hafu wa mukowa wa kwa Manase+ balyabwike ninshi nabaiteyanya ukulwa+ ukutangilila abana ba kwa Israele, filya fine Mose abebele.+ 13 Abaipangeshe abali nalimo amakana amakumi yane (40,000) bayabwike ku cinso ca kwa Yehova no kuya ku nkondo mu ciswebebe ca Yeriko.

14 Mu bushiku bulya Yehova acindamike Yoshua pa cinso ca bana ba kwa Israele bonse,+ kabili batendeke ukumutiina inshiku shonse isha bumi bwakwe nga filya fine baletiina Mose.+

15 E lyo Yehova atile kuli Yoshua:16 “Eba bashimapepo abasendele icipao ca cipangano+ ukuti bafume mu Yordani.” 17 E ico Yoshua aebele bashimapepo ati: “Fumeni mu Yordani.” 18 Nomba ilyo bashimapepo abasendele icipao+ ca cipangano ica kwa Yehova bafumine pa kati ka Yordani kabili ilyo bafumiine+ ku mulundu, e lyo amenshi ya Yordani yatendeke ukubwela no kulapoosa+ mu lulamba lonse nga kale.

19 Na bantu bafumine mu Yordani pa bwalenga ikumi (10) mu mweshi wa ntanshi no kupanga inkambi pa Gilgali+ ku kabanga ka mupaka wa Yeriko.

20 Kabili amabwe ikumi na yabili (12) ayo bafumishe mu Yordani, Yoshua ayabikile pa Gilgali.+ 21 E lyo atile ku bana ba kwa Israele: “Ilyo abana benu bakepusha bashibo, abati, ‘Nga aya mabwe yanshi?’+ 22 Mukalondolwele abana benu, amuti, ‘Ni pa mushili uwauma e po Israele ayabwike Yordani uyu,+ 23 ilyo Yehova Lesa wenu akamishe amenshi ya Yordani pa menso yabo mpaka bayabuka, filya fine Yehova Lesa wenu acitile na kuli Bemba Wakashika ilyo amukamishe pa ntanshi yesu mpaka twayabuka;+ 24 pa kuti abantu bonse aba pano isonde beshibe ukuti ukuboko kwa kwa Yehova,+ kwalikosa;+ pa kuti na imwe bene muletiina Yehova Lesa wenu lyonse.’’’+

5 Nomba ilyo ishamfumu shonse isha bena Amore,+ ishali bushilya bwa Yordani ku masamba, ne shamfumu shonse isha bena Kanaani,+ ishali mupepi na bemba, shaumfwile fye ukuti Yehova akamishe Yordani pa ntanshi ya bena Israele mpaka bayabuka, imitima ya shiko yaiketwe umwenso,+ kabili tashali na maka pa mulandu wa bana ba kwa Israele.+

2 Pa nshita ilya Yehova atile kuli Yoshua: “Upange imyele ku mabwe ayakosa no kusembulula+ abana ba kwa Israele na kabili, umuku walenga bubili.” 3 Na Yoshua apangile imyele ya mabwe ayakosa kabili asembulwile abana ba kwa Israele pa Gibeati-haaralote.+ 4 Kabili umulandu Yoshua abasembulwilile ni uyu: abaume bonse abafumine mu Egupti, abaume bonse aba bulwi, bafwilile+ mu matololo mu nshila pa numa ya kufuma mu Egupti. 5 Pantu abantu bonse abafumine bali abasembululwa, lelo abantu bonse abafyalilwe mu nshila mu matololo ilyo balefuma mu Egupti tababasembulwile. 6 Pantu abana ba kwa Israele baendele imyaka amakumi yane (40)+ mu matololo, mpaka uluko lonse ulwa baume ba bulwi abafumine mu Egupti abashaumfwilile ishiwi lya kwa Yehova lwapwa ukufwa, abo Yehova alapileko ukuti tali na kubaleka ukumona icalo+ ico Yehova alapile ku fikolwe fyabo ukuti akatupeela,+ icalo umwaba mukaka no buci.+ 7 Kabili alekele abana babo ukubapyana.+ Aba e bo Yoshua asembulwile, pantu bali abashasembululwa, pantu tababasembulwile mu nshila.

8 Nomba ilyo bapwishishe ukusembulula uluko lonse, baikele umo bali mu nkambi mpaka bapolelela.+

9 E lyo Yehova atile kuli Yoshua: “Ubwa lelo nafumyapo umuseebanya wa ku Egupti pali imwe.”+ E co bainikile ilya ncende ati Gilgali+ ukushinta na lelo.

10 Na bana ba kwa Israele baikele mu nkambi mu Gilgali, kabili pa bushiku bwalenga ikumi na shine (14) mu mweshi+ basefeshe ica kucilila icungulo mu ciswebebe ca Yeriko. 11 Pa numa ya bushiku bwa ca kucilila, e lyo batendeke ukulya ifisabo fya mu calo, no mukate ushatutumuka+ ne ngano shasalulwa, mu bushiku bulya bwine. 12 Ilyo baliile ifisabo fya muli cilya calo, mana tayamoneke ubushiku bwakonkelepo, e fyo mana yalekelele ukumoneka ku bana ba kwa Israele,+ kabili batendeke ukulya ifisabo fya mu calo ca Kanaani mu mwaka ulya.+

13 Nomba ilyo Yoshua ali mupepi na Yeriko, ainwine amenso yakwe kabili moneni, kwali umuntu+ naiminina ku ntanshi ali no lupanga mu minwe.+ Na Yoshua aile kuli ena no kumwipusha ati: “Bushe uli kuli ifwe nangu uli ku balwani besu?” 14 Na o ayaswike ati: “Iyo, ndi mukalamba wa mabumba ya kwa Yehova e co naishila.”+ Awe Yoshua awile ubukupeme pa nshi, alatoota,+ no kumweba ati: “Nga cinshi shikulu alesosa ku musha wakwe?” 15 No yo mukalamba wa mabumba ya kwa Yehova asosele kuli Yoshua ati: “Fuula indyato ku makasa yobe, pantu apo wiminine pa mushilo.” Awe ilyo line fye Yoshua acitile ifyo bamwebele.+

6 Nomba umusumba wa Yeriko waliseelwe bwino bwino pa mulandu wa bana ba kwa Israele, takwali wa kufumamo nangu wa kwingilamo.+

2 Kabili Yehova asosele kuli Yoshua ati: “Mona, nimpeela Yeriko ne mfumu ya uko, ne mpalume shabo, mu minwe yobe.+ 3 Na imwe bonse mwe baume ba bulwi mukashinguluke umusumba, uku-ushinguluka umuku umo. E fyo mukacite inshiku mutanda (6). 4 Na bashimapepo cinelubali (7) bakasende intandala cinelubali, ukutangilila Icipao, na pa bushiku bwa cinelubali mukashinguluke umusumba imiku cinelubali na bashimapepo bakalishe intandala.+ 5 Nomba ilyo balisha intandala, na imwe mwaumfwa ukulila kwa ntandala, abantu bonse bakaweleshe ukuwelesha kwa bulwi ukukalamba;+ ne linga lya musumba likabongoloka,+ na bantu bakaye cila umuntu apalungatene nankwe.”

6 Na Yoshua mwana Nuni aitile bashimapepo+ no kubeba ati: “Sendeni icipao ca cipangano,+ na bashimapepo cinelubali (7) basende intandala cinelubali no kutangilila icipao+ ca kwa Yehova.” 7 E lyo aebele abantu ati: “Kabiyeni mushinguluke umusumba, ne bumba lya bashilika abaipangasha+ litangilile icipao ca kwa Yehova.” 8 Nomba ifyo Yoshua aebele abantu e fyo cali; kabili bashimapepo cinelubali abasendele intandala cinelubali ku cinso ca kwa Yehova baile no kulisha intandala, ne cipao ca cipangano ca kwa Yehova calebakonka. 9 Ne bumba lya bashilika abaipangasha lyatangilile bashimapepo abalelisha intandala, na ba ku numa+ balekonka Icipao, ninshi intandala shilelila.

10 Kabili Yoshua aebele abantu+ ati: “Mwipunda nangu kuleka amashiwi yenu yomfwike, kabili mu tunwa twenu mwifuma ishiwi nangu limo mpaka ubushiku nkamweba nati: ‘Pundeni!’ E lyo mukapunde.”+ 11 Kabili alengele icipao ca kwa Yehova ukushinguluka umusumba umuku umo, e lyo baile ku nkambi no kutubilisha ubushiku mu nkambi.

12 Awe Yoshua acelele ulucelo,+ na bashimapepo abasendele icipao+ ca kwa Yehova, 13 na bashimapepo cinelubali (7) abasendele intandala cinelubali bali pa ntanshi ya cipao ca kwa Yehova, bale-enda, balelisha intandala, ne bumba lya bashilika abaipangasha bali pa ntanshi yabo, na ba ku numa balekonka icipao ca kwa Yehova ninshi ne ntandala shilelila.+ 14 Awe bashingulwike umusumba umuku umo pa bushiku bwalenga shibili, e lyo babweleele ku nkambi. E fyo bacitile pa nshiku mutanda (6).+

15 Nomba pa bushiku bwalenga cinelubali (7) baimine lucelocelo, lilya fye caba ku maca, kabili bashingulwike umusumba mu musango uyu wine imiku cinelubali. Ni pali ubu bushiku bweka fye bashingulwike umusumba imiku cinelubali.+ 16 Nomba umuku walenga cinelubali e lyo bashimapepo balishishe intandala, na Yoshua atile ku bantu: “Pundeni;+ pantu Yehova namupeela umusumba.+ 17 Monaule umusumba;+ pantu umusumba na fyonse ifyabamo fya kwa Yehova. Ni Rahabu+ fye cilende e ulepusuka pamo na bali nankwe mu ng’anda, pantu afishile inkombe isho twatumine.+ 18 Lelo imwe, mutalukeko ku filingile ukonaulwa,+ epali mwafikumbwa+ no kubuulapo fimo pa filingile ukonaulwa+ no kulenga abena Israele ukonaulwa no kubaletelela.+ 19 Lelo silfere yonse na golde yonse ne fintu fyonse ifya mukuba ne fya cela fyonse, fya mushilo kuli Yehova.+ Mu cipao ca kwa Yehova e mo fikabikwe.”+

20 Awe na bantu balipundile, ilyo balishishe intandala.+ Nomba ilyo fye abantu baumfwile ukulila kwa ntandala kabili ilyo abantu bapundile ukupunda kwa bulwi ukukalamba, e lyo icibumba cabongolweke.+ Na bantu baninine ukuya mu musumba, umo umo apalungatene nankwe no kupoka umusumba. 21 Baonawile na fyonse ifyali mu musumba ku lupanga, umwaume no mwanakashi, umulumendo no mukote, ne ng’ombe ne mpaanga ne mpunda.+

22 E lyo Yoshua aebele abaume babili abalengwile icalo ati: “Kabiyeni mu ng’anda ya mwanakashi cilende, no kumufumyamo na bantu bakwe bonse, filya fine mwalapile kuli ena.”+ 23 Na balumendo abaile ku kulengula icalo balingile no kufumya Rahabu na bawishi na banyina na bamunyina na bantu bakwe bonse, bafumishe balupwa bakwe bonse;+ bababikile na ku nse ya nkambi ya kwa Israele.

24 Awe baocele no musumba na fyonse ifyalimo.+ Ni silfere fye na golde ne fya mukuba ne fya cela e fyo babikile mu cipao ca ng’anda ya kwa Yehova.+ 25 Kabili Rahabu cilende na ba mu ng’anda ya kwa wishi na bonse abantu bakwe, Yoshua alekele babe no mweo;+ kabili ekala mu kati ka kwa Israele ukufika na lelo,+ pantu afishile inkombe isho Yoshua atumine ku kulengula Yeriko.+

26 E lyo Yoshua alapile umulapo pa nshita ilya, ati: “Abe uwatiipwa ku cinso ca kwa Yehova umuntu uwaima no kukuula uyu musumba, Yeriko. Akafwilwa ibeli lyakwe ilyaume pa kupanga umufula wa kukuulapo uwa uko, kabili akafwilwa kasuli wakwe pa kubika ifiibi fya uko.”+

27 Awe Yehova ali na Yoshua,+ no lulumbi lwakwe lwakumene isonde lyonse.+

7 Kabili abana ba kwa Israele tabaumfwilile ifyo Lesa abebele ukukuma ku fyali no konaulwa pantu Akani+ mwana Karmi, mwana Sabdi, mwana Sera, uwa mu mukowa wa kwa Yuda, abuulilepo ifyali no konaulwa.+ No bukali bwa kwa Yehova bwaishile pa bana ba kwa Israele.+

2 Awe Yoshua atumine abaume ukufuma mu Yeriko ukuya ku musumba wa Ai,+ uwali mupepi na Bete-abene,+ ku kabanga ka Betele,+ no kubeba ati: “Kabiyeni, kalenguleni icalo.” Awe abaume balile no kuyalengula Ai.+ 3 Ilyo babwelele kuli Yoshua, bamwebele ati: “Mwileka abantu bonse baye. Muleke fye abantu nalimo amakana yabili (2,000) atemwa abantu nalimo amakana yatatu (3,000) bayeuma Ai. Mwicusha abantu bonse ukubaleka baye kulya, pantu aba muli ulya musumba banono.”

4 E ico abantu nalimo amakana yatatu (3,000) e baile, lelo bafulumwike abena Ai.+ 5 Kabili abena Ai baipeye abantu nalimo amakumi yatatu na mutanda (36), kabili babakonkele+ ukufuma pa mpongolo ukufika na ku Shebarimu kabili bakonkenyepo ukubepaya na ku mutentemuko. Awe imitima ya bantu yaiketwe umwenso no kusunguluka yaba nga menshi.+

6 E lyo Yoshua alepwile ifya kufwala fyakwe no kuwa pa nshi+ ubukupeme pa ntanshi ya cipao ca kwa Yehova ukufika icungulo, pamo na bakalamba ba kwa Israele, balekuba no lukungu pa mitwe yabo.+ 7 Kabili Yoshua atile: “Iye, mwe Shikulu Mulopwe Yehova, nga cinshi mwaletele aba bantu ukubafumya konse kulya no kubabusha Yordani, ku kutupeela mu minwe ya bena Amore ukuti batonaule? Kanshi fwe bene nga twaikele fye bushilya bwa Yordani!+ 8 Mwe Yehova, nga kuti natila shani apo Israele nafulumuka abalwani bakwe? 9 Na bena Kanaani na bonse abekala mu calo bakomfwa ulwa ici, kabili bakatushinguluka no kulofya ishina lyesu pano isonde;+ mukacita shani pe shina lyenu ilikalamba?”+

10 E lyo Yehova atile kuli Yoshua: “Iwe, ima! Nga cinshi ico uwilile ubukupeme?11 Israele nabembuka, kabili nabapula mu cipangano candi+ ico nabebele; nababuulapo ne cali no konaulwa+ kabili nabeeba+ no kufisa,+ bacibikile na mu fipe fyabo.+ 12 Kabili abana ba kwa Israele tabakacimfye abalwani babo.+ Bakafulumuka abalwani babo, pantu bali no konaulwa. Nshakabe na imwe na kabili kano mukonaule icilingile ukonaulwa mu kati kenu.+ 13 Ima! Teyanya abantu,+ kabili usose auti, ‘Mailo mukaipekanye, pantu Yehova Lesa wa kwa Israele asosa ati: “Icilingile ukonaulwa cili mu kati kobe, we Israele.+ Tamwakacimfye abalwani benu mpaka mukafumye icilingile ukonaulwa mu kati kenu. 14 Kabili mukapalame ulucelo, umukowa no mukowa, kabili umukowa uo Yehova aikata ukapalame,+ ulupwa no lupwa, no lupwa ulo Yehova aikata lukapalame, ing’anda ne ng’anda, ne ng’anda iyo Yehova aikata ikapalame, umuntu no muntu. 15 Nomba uukasangwa ne cifwile ukonaulwa mukamoce mu mulilo,+ pamo na bantu bakwe bonse, pantu napula mu cipangano+ ca kwa Yehova kabili pantu nacita ica nsoni muli Israele.”’”+

16 Awe Yoshua acelele ulucelo no kupalamika Israele, umukowa no mukowa, kabili umukowa wa kwa Yuda e waiketwe. 17 Kabili apalamike indupwa sha kwa Yuda no kwikata ulupwa lwa bena Sera,+ e lyo kabili apalamike ulupwa lwa bena Sera, umuntu no muntu, kabili Sabdi aliketwe. 18 Na mu kulekelesha apalamike aba mu ng’anda yakwe, umuntu no muntu, kabili Akani mwana Karmi, mwana Sabdi, mwana Sera, uwa mu mukowa wa kwa Yuda, e waiketwe.+ 19 E lyo Yoshua atile kuli Akani: “Mwana wandi, peela ubukata kuli Yehova Lesa wa kwa Israele+ no kuyebelela kuli ena,+ kabili njeba,+ Cinshi ucitile? Wimfisa.”+

20 Na o Akani ayaswike Yoshua no kutila: “Kwena ukubembuka nimembukila Yehova Lesa wa kwa Israele,+ kabili ifi e fyo ncitile. 21 Ilyo namwene+ pa fipe ifyashele pali ica kufwala caibela ica ku Shinari,+ icalemoneka bwino, na mashekele ya silfere imyanda ibili (200) ne cipimfya ca golde, icafina amashekele amakumi yasano (50), nalifikumbilwe,+ no kufibuula;+ kabili, moneni! fishiikilwe mwi tenti lyandi pa nshi ne ndalama shili pa nshi ya ca kufwala.”+

22 Awe Yoshua atumine inkombe ilyo line, kabili shabutukiile kwi tenti, kabili, moneni! ica kufwala cafishilwe mwi tenti lyakwe ne ndalama pa nshi ya ca kufwala. 23 E ico bafifumishe mu kati ke tenti no kufileta kuli Yoshua na ku bana ba kwa Israele bonse, no kufifukumwina ku cinso ca kwa Yehova. 24 Nomba Yoshua pamo na bena Israele bonse, babuulile Akani+ mwana Sera na silfere ne ca kufwala caibela ne cipimfya ca golde+ na bana bakwe abaume na bana bakwe abanakashi no kubatwala mu mpanga iyabatama iya Akore,+ pamo ne ng’ombe shakwe ne mpunda shakwe ne mpaanga shakwe ne tenti lyakwe na fyonse ifyakwe. 25 E lyo Yoshua atile: “Nga cinshi ico watuletelela?+ Yehova aleleta ububi pali iwe lelo.” Awe abena Israele bonse bamupoolele amabwe,+ e lyo babocele mu mulilo.+ E fyo babapoolele amabwe. 26 Kabili batuulike pali ena umwina wa mabwe uukalamba, ukufika na lelo.+ No bukali bwa kwa Yehova bwalibwelele.+ E mulandu wine palya pantu petilwa Ilungu lya Akore,+ ukufika na lelo.

8 E lyo Yehova atile kuli Yoshua: “Witiina, kabili witutuma.+ Senda abantu bonse aba bulwi, ima, no kuya ku Ai. Mona, nimpeela imfumu ya ku Ai na bantu ba iko no musumba wa iko ne calo ca iko mu minwe yobe.+ 2 Kabili filya wacitile ku musumba wa Yeriko ne mfumu ya uko e fyo ukacite na ku musumba wa Ai ne mfumu ya uko.+ Kabili kuti mwabuula ifipe fya uko ne fitekwa fya uko.+ Mubike aba kubelamina umusumba ku numa ya uko.”+

3 Awe Yoshua na bantu bonse aba bulwi+ balimine no kuya ku Ai, kabili Yoshua asalile abaume amakana amakumi yatatu (30,000), impalume,+ no kubatuma ubushiku. 4 Kabili abebele ati: “Moneni, mwalabelamina+ umusumba, ku numa ya uko. Mwitaluka sana ku musumba, kabili bonse mube abaiteyanya. 5 Kabili ine pamo na bantu bonse abali na ine, tukapalama ku musumba. Nomba nga bafuma ku kutukumanya filya bacitile ntanshi,+ tukafulumuka. 6 Na bo bakafuma no kutukonka mpaka tukabafumye ku musumba, pantu bakatila, ‘Bafulumuka na kabili.’+ Na ifwe tukafulumuka. 7 Na imwe mukeme uko mubeleme, no kupoka umusumba; kabili Yehova Lesa wenu akaupeela mu minwe yenu.+ 8 Nomba ilyo mwapoka fye umusumba, mukoce umusumba ku mulilo.+ Ukulingana na mashiwi ya kwa Yehova e fyo mukacite. Ifi fine namweba e fyo mukacite.”+

9 E lyo Yoshua abatumine na bo balungeme ukwa kubelama no kwikala pa kati ka Betele na Ai ku masamba ya Ai, kabili Yoshua ena atubilishe ubushiku mu kati ka bantu.

10 Kabili Yoshua aimine lucelocelo+ no kuceeceeta abantu no kuya, pamo na bakalamba ba kwa Israele, balatangilila abantu ukulola ku Ai. 11 Na bantu bonse aba bulwi+ abali nankwe balimine balaya, pa kuti bapalame pa ntanshi ya musumba, bacitile ne nkambi ku kapinda ka ku kuso aka Ai, kabili umupokapoka wali pa kati kabo na Ai. 12 Awe abuulile na baume nalimo amakana yasano (5,000) no kubabika ukuti babelame+ pa kati ka Betele+ na Ai, ku masamba ya musumba. 13 E ico abantu bapangile inkambi iikalamba ku kapinda ka ku kuso kabili ku numa ya musumba.+ Kabili iyi ncende ya ku numa yali ku masamba ya musumba.+ Yoshua aendele ubushiku muli iyi impanga iyabatama.

14 Nomba cilya fye imfumu ya Ai yamona ifi, abaume ba mu musumba e pa kwangufyanya ukwima ulucelocelo no kufuma ku kuyakumanya Israele ku kulwa nankwe, pamo na bantu ba iko bonse, pa nshita iyalingilwe, pa ntanshi ya ciswebebe. Lelo yena tayaishibe ukuti kwali abaibelamine ku numa ya musumba.+ 15 Ilyo Yoshua na bena Israele bacitile kwati nababacimfya,+ bafulumukile mu nshila ya kwi lungu.+ 16 Na bantu bonse abali mu musumba balibetile ukuti babakonke, na bo bakonkele Yoshua, kabili e fyo bafumine mu musumba.+ 17 Kabili takwashele umwaume nangu umo mu Ai na mu Betele uushafumine no kukonka Israele, ica kuti bashile umusumba uwaisuka, no kukonka Israele.

18 E lyo Yehova atile kuli Yoshua: “Tambalika ifumo ilili mu kuboko kobe no kulilosha ku Ai,+ pantu ndepeela wena mu minwe yobe.”+ Awe Yoshua atambalike ifumo ilyali ku kuboko kwakwe ukulosha ku musumba. 19 Na babeleme balimine bwangu bwangu apo bali, batendeke no kubutuka ilyo line fye atambalike ukuboko kwakwe, baingile na mu musumba no ku-upoka.+ Kabili balyangufyenye no koca umusumba ku mulilo.+

20 Na baume ba mu Ai bapilibukile ku numa, kabili moneni, icushi mu musumba cilefutumuka cileya mu muulu, kabili tabakwete amaka ya kufulumukila uku nelyo uku. Na bantu abalefulumukila kwi lungu bayalukiile abalebakonka. 21 Kabili ilyo Yoshua na bena Israele bonse bamwene ukuti ababeleme+ nabapoka umusumba, no kuti icushi ca mu musumba cilefutumuka, na bo e pa kupilibuka balapuma abena Ai. 22 Na bambi bafumine mu musumba ku kubakumanya, ica kuti baishileba pa kati ka bena Israele, aba ulu lubali na bambi kulya lubali, kabili baile balebepaya mpaka tapashele nelyo umo uwapuswike nelyo uwafulumwike.+ 23 Lelo imfumu+ ya Ai baikete iya mweo no kuitwala kuli Yoshua.

24 Nomba ilyo abena Israele balepwishishisha ukwipaya abekashi bonse aba mu Ai mu mpanga yabatama umo babakonkele, balewa fye bonse ku lupanga mpaka bonse bapwa. E lyo abena Israele bonse babwelele ku Ai no kwipaya aba mu musumba ku lupanga. 25 Na bonse abafwile mu bushiku bulya, ukutendekela ku mwaume no kufika ku mwanakashi, bali amakana ikumi na yabili (12,000), abena Ai bonse. 26 Kabili Yoshua tabweseshe ukuboko kwakwe uko atambalikiileko ifumo+ mpaka abekashi bonse aba mu Ai baonaulwa.+ 27 Fitekwa fye ne fipe ifya mu musumba ulya e fyo abena Israele bapokolwele, ukulingana ne fyo Yehova aebele Yoshua.+

28 Kabili Yoshua aocele Ai no ku-usangula umupili umuyayaya,+ kabili icibolya ukufika na lelo. 29 Akulike imfumu ya Ai+ pa cimuti ukufika icungulo; kabili ilyo akasuba kali mupepi no kuwa,+ Yoshua asosele ukuti bekishe icitumbi ca iko+ pa cimuti no kucipoosa pa mwinshi wa mpongolo ya musumba no kutuulikapo umwina wa mabwe uukalamba pali yena, uwabapo ukufika na lelo.

30 Mu nshita ilya e mo Yoshua akuuliile Yehova Lesa wa kwa Israele iciipailo,+ mu Lupili lwa Ebali,+ 31 nge fyo Mose umubomfi wa kwa Yehova aebele abana ba kwa Israele, nge fyo calembwa mwi buuku lya mafunde+ ya kwa Mose aciti: Ukapange “iciipailo ca mabwe ayatuntulu, ayo bashapishapo icela”;+ kabili bapeelelepo imituulo ya koca kuli Yehova no kupeela amalambo ya mutende.+

32 E lyo alembele pa mabwe ifyali+ mu mafunde ya kwa Mose ifyo alembele ku cinso ca bana ba kwa Israele.+ 33 Kabili abena Israele bonse na bakalamba+ babo na bacilolo na bakapingula babo baiminine uku no ku, ku mbali ya Cipao pa ntanshi ya bashimapepo,+ abena Lebi, abasendele icipao ca cipangano ca kwa Yehova,+ umulebeshi e lyo no mwina Israele,+ hafu bali pa ntanshi ya Lupili lwa Gerisimu+ na hafu umbi bali pa ntanshi ya Lupili lwa Ebali,+ (ifyo Mose umubomfi wa kwa Yehova abebele,)+ ku kupaala+ intanshi abena Israele. 34 Kabili pa numa abelengele amashiwi yonse ayali mu mafunde,+ ipaalo+ ne citiipu,+ ukulingana na fyonse ifyalembelwe mwi buuku lya mafunde. 35 Tapali nangu cimo pali fyonse ifyo Mose asosele ico Yoshua ashabelengele pa ntanshi ya lukuta lwa bena Israele,+ pamo na banakashi+ na bana banono+ na balebeshi+ abali mu kati kabo.

9 Nomba ishamfumu shonse+ ishali kwi shilya lya Yordani mu calo ca mpili na mu Shefela na mu lulamba lonse ulwa Bemba Mukalamba+ ne shali pa ntanshi ya Lebanone,+ abena Hiti+ na bena Amore, abena Kanaani,+ abena Perisi,+ abena Hibi na bena Yebusi,+ pa kumfwa fye ifi, 2 shalongene shonse pamo no mutima umo ku kulwa na Yoshua na Israele.+

3 Kabili abekashi ba mu Gibeone+ baumfwile ifyo Yoshua acitile kuli Yeriko+ na kuli Ai.+ 4 Awe bena balibomfeshe amano+ kabili balongele ifya kulya fya pa lwendo, basendele ne mifuko yalepauka pa mpunda, ne nyambi ishaonaika kabili ishatulika kabili isho bakambika,+ 5 kabili indyato bafwele shali ishalepauka kabili isha fikamba, bafwele ne fya kufwala fyalepauka, no mukate onse uo basendele wali uwauma kabili uwafungauka. 6 E lyo baile kuli Yoshua pa nkambi yali ku Gilgali+ no kutila kuli ena na ku bena Israele: “Tufumine ku calo ca kutali. Nomba panganeni na ifwe icipangano.”+ 7 Na bena Israele batile ku bena Hibi:+ “Nalimo ni lwa mupepi fye mwikala. Nga kuti twapangana shani na imwe icipangano?”+ 8 Na bo batile kuli Yoshua: “Tuli babomfi benu.”+

Na o Yoshua atile: “Ni mwe bani, kabili mufumine kwi?” 9 Na bo bamwebele ati: “Ni ku calo ca kutali+ fwe babomfi benu tufumine, pa mulandu we shina+ lya kwa Yehova Lesa wenu, pantu twalyumfwa ululumbi lwakwe na fyonse ifyo acitile mu Egupti,+ 10 na fyonse ifyo acitile ku shamfumu sha bena Amore shibili ishali kwi shilya lya Yordani, kuli Sihone+ imfumu ya ku Heshebone na Oge+ imfumu ya ku Bashani, iyali mu Ashitarote.+ 11 E ico intungulushi shesu na bekashi bonse aba mu calo cesu batwebele abati,+ ‘Sendeni ifya kulya fya pa bulendo no kuyabakumanya, kabili mukabebe amuti: “Tuli babomfi benu.+ Panganeni na ifwe icipangano.”’+ 12 Uyu mukate wali uwakaba mu mayanda yesu ilyo twausendele ku kulya pa lwendo mu bushiku twaimine ukwisa kuno kuli imwe, nomba, moneni! nauma kabili naufungauka.+ 13 Kabili ishi e nyambi sha mwangashi isho twaiswishe ninshi shili ishipya, lelo, moneni! shalitulika,+ ne fya kufwala fyesu ifi ne ndyato ishi fyalilepauka pa mulandu wa kulepesha kwa bulendo.”

14 Awe abaume na bo babuulilepo ifya kulya fyabo no kuficeeceeta ukwabula ukwipusha Yehova pa kuti abebe ifya kucita.+ 15 Na Yoshua apangile umutende na bo+ no kupangana na bo icipangano ica kubaleka babe no mweo, na bacilolo+ ba lukuta balapile kuli bena.+

16 Nomba pa numa ya nshiku shitatu, pa numa ya kupangana na bo icipangano, baumfwile ukuti bena mupalamano babo kabili baleikala fye mupepi. 17 E lyo abana ba kwa Israele baimine no kuya ku misumba yabo pa bushiku bwalenga shitatu, ne misumba yabo yali ni Gibeone+ na Kefira+ na Beerote+ na Kiriati-yearimu.+ 18 Kabili abana ba kwa Israele tabaipeye abena Gibeone, pantu intungulushi sha lukuta shalilapile+ Yehova Lesa wa kwa Israele kuli bena.+ No lukuta lonse lwailishenye ku ntungulushi.+ 19 Ne ntungulushi shonse shaebele ulukuta lonse ati: “Ifwe twalilapa Yehova Lesa wa kwa Israele kuli bena, kabili te kuti tubacene iyo.+ 20 Ifi e fyo twalabacita no kubaleka babe aba mweo, pa kuti ubukali bwa kwa Lesa bwi-isa pali ifwe pa mulandu wa mulapo uo twalapa kuli bena.”+ 21 E ico intungulushi shabebele ati: “Balekeni babe no mweo lelo bakulateba inkuni no kutapila ulukuta lonse amenshi,+ ifyo intungulushi shabalaile.”+

22 Nomba Yoshua alibetile no kulanda na bo ati: “Nga cinshi ico mwatubepele amuti, ‘Ifwe twaba ukutali sana,’+ kanshi mwikala fye mu kati kesu?+ 23 Nomba mwatiipwa,+ kabili lyonse mukalaba abasha+ no kuteba inkuni no kutapa amenshi ya mu ng’anda ya kwa Lesa wandi.”+ 24 Na bo bayaswike abati: “Ni co fwe babomfi benu balitwebele apabuuta ukuti Yehova Lesa wenu aebele Mose umubomfi wakwe ukumupeela icalo conse no kulofya abekashi bonse aba mu calo abali pa ntanshi yenu,+ na ifwe twalitiinine+ ukuti mwalalofya imyeo yesu. E co twacitiile ici cintu.+ 25 Nomba tuli pano mu minwe yenu. Conse ico mwalamona ukuti e cisuma kabili e calungama ukucita kuli ifwe, e fyo mucite.”+ 26 Awe e fyo acitile kuli bena no kubapokolola mu minwe ya bana ba kwa Israele, na bo tababepeye.+ 27 Kabili Yoshua mu bushiku bulya abapeele umulimo+ wa kuteba inkuni no kutapa amenshi ya lukuta+ na ya ku ciipailo ca kwa Yehova, pa cifulo ico asala, ukufika na buno bushiku.+

10 Nomba ilyo Adoni-sedeke imfumu ya Yerusalemu aumfwile fye ukuti Yoshua napoka umusumba wa Ai+ no kuonaula,+ no kuti filya acitile kuli Yeriko+ ne mfumu ya uko,+ e fyo acitile na kuli Ai ne mfumu ya uko,+ no kuti abekashi ba mu Gibeone bacitile mutende na bena Israele+ kabili baleikala pamo na bo, 2 alyumfwile umwenso nga nshi,+ pantu Gibeone wali musumba uukalamba, kwati ni umo uwa misumba ya bufumu, na pa mulandu wa kuti walikulile ukucila Ai,+ kabili bonse abaume ba uko bali ni mpalume. 3 E ico Adoni-sedeke, imfumu ya Yerusalemu+ atumine amashiwi kuli Hohamu imfumu ya Hebrone+ na kuli Piramu imfumu ya Yarimuti+ na kuli Yafia imfumu ya Lakishi+ na kuli Debiri imfumu ya Egelone,+ ati, 4 “Iseni kuno no kungafwa, muleke tuume Gibeone, pantu nacita umutende na Yoshua na bana ba kwa Israele.”+ 5 Awe shalongene pamo no kuya, ishamfumu shisano isha bena Amore,+ imfumu ya Yerusalemu, imfumu ya Hebrone, imfumu ya Yarimuti, imfumu ya Lakishi, imfumu ya Egelone, shena na bashilika ba shiko bonse, kabili shapangiile abena Gibeone inkambi no kubalwisha.

6 Awe abaume ba ku Gibeone batumine amashiwi kuli Yoshua ku nkambi ya ku Gilgali,+ abati: “Mwilekelesha fwe basha benu.+ Iseni bwangu no kutupususha no kutwafwa, pantu ishamfumu shonse isha bena Amore ishaikala mu calo ca mpili nashitulonganina.” 7 E ico Yoshua afumine ku Gilgali no kuya pamo na baume bonse aba bulwi abali nankwe+ ne mpalume shonse.+

8 E lyo Yehova atile kuli Yoshua: “Wibatiina,+ pantu nimbapeela mu minwe yobe.+ Tapali umwaume nangu umo pali bena uukakucimfya.”+ 9 Kabili Yoshua alibasanshile mu kupumikisha. Aendele ubushiku bonse ukufuma ku Gilgali. 10 Kabili Yehova alibafulungenye pa ntanshi ya bena Israele,+ kabili baipeye abengi nga nshi pa Gibeone+ kabili babafulumwinine ku nshila yaya ku Bete-horone uwaba pa lupili no kubepaya ukufika na ku Aseka+ na Makeda.+ 11 Nomba ilyo balefulumuka ku cinso ca bena Israele kabili ilyo bali pa mutentemuko wa Bete-horone, Yehova aloseshe pali bena imfula ya mabwe ayakalamba+ ukufuma ku muulu, ukufika fye na ku Aseka, ica kuti balifwile. Abafwile ku mfula ya mabwe bali abengi ukucila abo abana ba kwa Israele baipeye ku lupanga.

13 Awe akasuba kaiminine shilili, umweshi na o waiminine shilili, mpaka uluko lwalandula abalwani+ ba luko. Bushe tafyalembwa mwi buuku lya kwa Yashari?+ Na kasuba kaiminine shilili pa kati ka muulu kabili takawile bwangu pa bushiku nalimo bumo ubutuntulu.+ 14 Kabili takwatalile akuba ubushiku ubwali ngo bu, kabili ukutula lilya takwatala akuba na bumbi, ubwa kuti Yehova akutike kwi shiwi lya muntu,+ pantu Yehova e walelwila Israele.+

15 E lyo Yoshua na bena Israele bonse babwelele ku nkambi ku Gilgali.+

16 Mu nshita ilya ishamfumu shilya shisano shalifulumwike+ no kuyabelama mu lucengo mu Makeda.+ 17 Kabili baebele Yoshua abati: “Ishamfumu shisano nashisangwa shibeleme mu lucengo mu Makeda.”+ 18 Na o Yoshua atile: “Kunkulusheni amabwe ayakalamba yafike na pa mwinshi wa lucengo no kubikapo abaume ba kushilinda. 19 Lelo imwe mwi-iminina. Fulumuneni abalwani benu, kabili mubapume ukufumina ku numa.+ Mwileka bengile mu misumba yabo, pantu Yehova Lesa wenu nabapeela mu minwe yenu.”+

20 Nomba ilyo Yoshua na bana ba kwa Israele bapwishishe fye ukwipaya abantu abengi nga nshi, mpaka baloba,+ kabili na bapuswike pali bena bafulumuka no kwingila mu misumba ya malinga,+ 21 e lyo abantu bonse batendeke ukubwelela ku nkambi, kuli Yoshua, ku Makeda, mu mutende. Tapali nangu umo uwalepontela abana ba kwa Israele.+ 22 Kabili Yoshua atile: “Isuleni pa mwinshi wa lucengo no kufumya ishamfumu isho shisano ishili mu lucengo mushilete kuno.” 23 Awe e fyo bacitile no kufumisha kuli ena ishamfumu ishi shisano mu lucengo, imfumu ya Yerusalemu,+ imfumu ya Hebrone,+ imfumu ya Yarimuti, imfumu ya Lakishi,+ ne mfumu ya Egelone.+ 24 Nomba ilyo fye bafumishe ishi shamfumu kuli Yoshua, Yoshua aitile abaume bonse aba kwa Israele no kweba abakalamba ba bashilika abaile nankwe, ati: “Iseni kuno. Nyanteni pa numa ya mikoshi ya shamfumu ishi.”+ Na bo balishile no kunyanta pa numa ya mikoshi ya shiko.+ 25 Na Yoshua abebele ati: “Mwitiina nangu kututuma.+ Shipeni kabili koseni, pantu ifi e fyo Yehova akacita ku balwani benu bonse abo mulelwa na bo.”+

26 E lyo Yoshua ashikomene no kushipaya, ashikulike na pa fimuti fisano, kabili shakulikwe pa fimuti ukufika icungulo.+ 27 Nomba ilyo akasuba kawile Yoshua atumine bamo ukuti bayeikisha ishamfumu pa fimuti,+ na bo balishikishe no kushipoosa mu lucengo umo shabeleme. E lyo babikile amabwe ayakalamba pa mwinshi wa lucengo—kabili e po yaba ukufika na lelo.

28 Kabili pa bushiku bulya Yoshua apokele umusumba wa Makeda+ no kwipaya abantu abalimo ku lupanga. Aipeye ne mfumu ya uko, pamo na bantu bonse abalimo.+ Talekele nangu umo ukupusuka. Awe acitile ku mfumu ya Makeda+ filya acitile ku mfumu ya Yeriko.

29 E lyo Yoshua na bena Israele bonse pamo nankwe bafumine ku Makeda baya ku Libna kabili balwile na bena Libna.+ 30 Kabili Yehova apeele na Libna ne mfumu ya uko mu minwe ya kwa Israele, na bo baipeye abena Libna no muntu onse uwalimo ku lupanga. Tabalekele nangu umo ukupusuka. E ico bacitile ku mfumu ya uko filya bacitile ku mfumu ya Yeriko.+

31 Kabili Yoshua na bena Israele bonse bafumine ku Libna baya ku Lakishi+ kabili baupangiile inkambi no kulwa na o. 32 Awe Yehova apeele Lakishi mu minwe ya kwa Israele ica kuti baupokele mu bushiku bwalenga shibili, kabili bakomene no muntu onse uwalimo ku lupanga,+ ukulingana na fyonse ifyo bacitile kuli Libna.

33 E lyo Horamu imfumu ya Gesere+ aile ku kuya-afwa Lakishi. E ico Yoshua aipeye iyi imfumu pamo na bantu ba iko kabili talekele nangu umo pa bantu ba iko ukupusuka.+

34 Kabili Yoshua na bena Israele bonse abali pamo nankwe bafumine ku Lakishi baya ku Egelone+ kabili baupangiile inkambi no kulwa na o. 35 Kabili baliupokele mu bushiku bulya kabili batendeke ukwipaya abantu abalimo ku lupanga, kabili baipeye umuntu onse uwalimo mu bushiku bulya, nga filya fine fye bacitile ku musumba wa Lakishi.+

36 Kabili Yoshua na bena Israele bonse abali pamo nankwe bafumine ku Egelone no kuya ku Hebrone,+ kabili balwile na ulya musumba. 37 Kabili bapokele Hebrone no ku-uma ne mfumu ya uko ne misumba ya uko yonse no muntu onse uwalimo ku lupanga. Talekele nangu umo ukupusuka, filya fine fye acitile kuli Egelone. E ico aonawile umusumba no kwipaya abantu bonse abalimo.+

38 Na pa kulekelesha, Yoshua na bena Israele bonse abali nankwe babwelele ku Debiri,+ kabili balwile na ulya musumba. 39 Kabili aliupokele ne mfumu ya uko ne misumba ya uko yonse, babakomene na ku lupanga no kwipaya abantu bonse abalimo.+ Talekele nangu umo ukupusuka.+ Filya acitile kuli Hebrone, e fyo acitile na kuli Debiri ne mfumu ya uko, nga filya acitile na kuli Libna ne mfumu ya uko.+

40 Kabili Yoshua aipeye abali mu calo conse ica mpili+ na mu Negebu+ na mu Shefela+ na mu mikunkuluko+ ne shamfumu shabo shonse. Talekele nangu umo ukupusuka, kabili na conse ica mweo+ alyonawile,+ nga filya fine Yehova Lesa wa kwa Israele asosele.+ 41 Kabili Yoshua alibepeye ukufuma ku Kadeshe-barnea+ no kuya ku Gasa+ ne calo conse ica Goshene+ no kufika ku Gibeone.+ 42 Kabili Yoshua acimfishe ishi shamfumu shonse ne calo ca shiko mu nshita imo,+ pantu ni Yehova Lesa wa kwa Israele e walelwila Israele.+ 43 E lyo nomba Yoshua na bena Israele bonse abali pamo nankwe babwelele ku nkambi ku Gilgali.+

11 Awe Yabini imfumu ya Hasore ilyo aumfwile ifi, atumine amashiwi kuli Yobabu imfumu ya Madone+ na ku mfumu ya Shimrone na ku mfumu ya Akishafi,+ 2 na ku shamfumu shali ku kapinda ka ku kuso mu calo ca mpili ne shali mu ciswebebe ku kapinda ka ku kulyo aka Kinerete*+ ne shali mu Shefela+ na mu mpili sha Dore+ ku masamba, 3 na ku bena Kanaani+ ku kabanga na ku masamba, na ku bena Amore+ na ku bena Hiti+ na ku bena Perisi+ na ku bena Yebusi+ mu calo ca mpili na ku bena Hibi+ mwi samba lya Hermone+ mu calo ca Mispa.+ 4 Na bo balifumine, pamo na bashilika babo bonse, abali abengi ngo mucanga wa ku lulamba lwa bemba,+ na bakabalwe+ abengi na maceleta ya nkondo. 5 E lyo ishamfumu shonse ishi shakumene nge fyo shapangene, kabili shaishile no kupanga inkambi pamo ku menshi ya Meromu ku kulwa na Israele.+

6 Na o Yehova e pa kusosa kuli Yoshua ati: “Wibatiina,+ pantu mailo ino ine nshita nkapeela aba bonse kuli Israele abaipaiwa. Mukalemanike+ bakabalwe babo, kabili mukoce amaceleta yabo mu mulilo.”+ 7 Awe Yoshua na bantu bonse aba bulwi abali nankwe babemine ku mbali ya menshi ya Meromu mu kupumikisha no kubasansa. 8 Na Yehova abapeele mu minwe ya bena Israele,+ na bo balibomine no kubakonka ukufika fye na ku Sidone+ na ku Misirefotemaimu+ ukwaikele abantu abengi na ku mpanga iyabatama iya Mispa+ ku kabanga; kabili balibomine ica kuti tapali nangu umo uo balekele apusuke.+ 9 E lyo Yoshua abacitile ifyo Yehova amwebele: alemanike+ bakabalwe babo, na maceleta yabo ayocele mu mulilo.+

10 Yoshua na kabili alipilibwike mu nshita ilya+ no kupoka umusumba wa Hasore;+ aipeye ne mfumu ya uko ku lupanga,+ pantu kale Hasore e wali umusumba uukalamba uwa mabufumu yonse yalya. 11 Kabili bakomene na bantu bonse abalimo ku lupanga, no kubepaya.+ Tapali icipeema nangu cimo icashele,+ aocele na Hasore ku mulilo. 12 Kabili Yoshua alipokele no kukoma ku lupanga imisumba yonse iya ishi shamfumu ne shamfumu sha iko shonse.+ Aonawile imisumba ne shamfumu,+ ifyo Mose umubomfi wa kwa Yehova amwebele.+ 13 Lelo imisumba yonse iyali pa tupili Israele tayocele, kano Hasore eka e o Yoshua aocele. 14 Na bana ba kwa Israele basendele ifipe fyonse ifyali mu misumba ilya ne fitekwa.+ Kano fye abantu bonse e bo baipeye ku lupanga mpaka balofya bonse.+ Tabashilepo nangu umo uwalepeema.+ 15 Ifyo Yehova aebele Mose umubomfi wakwe, e fyo Mose aebele Yoshua,+ kabili e fyo Yoshua acitile. Tafumishepo nangu cimo pali fyonse ifyo Yehova aebele Mose.+

16 Kabili Yoshua apokele cilya calo conse, icalo ca mpili na Negebu+ yonse ne calo conse ica Goshene+ na Shefela+ na Araba+ ne calo ca mpili ica kwa Israele ne ncende ya tupili iya Shefela,+ 17 ukufuma ku Lupili lwa Halaki,+ ulwafika ku Seiri,+ no kufika ku Baali-gadi+ mu mpanga iyabatama iya Lebanone mwi samba lya Lupili lwa Hermone,+ kabili acimfishe ishamfumu shabo shonse, alishikomene no kushipaya.+ 18 Yoshua alwile inkondo inshiku ishingi ne shamfumu shonse ishi. 19 Takwali umusumba nangu umo uwacitile icipangano ca mutende na bana ba kwa Israele kano fye abena Hibi+ abaikele mu Gibeone.+ Pa kupoka yonse iyi iyashala balilwile inkondo.+ 20 Pantu cafumine kuli Yehova ukuti batalame imitima+ pa kuti balwe na Israele no konaulwa, pa kuti ebomfwila uluse,+ lelo pa kuti abalofye, nge fyo Yehova aebele Mose.+

21 Na kabili, Yoshua mu nshita ilya aile no kulofya abena Anaki+ abaleikala mu calo ca mpili, mu Hebrone, mu Debiri, mu Anabu+ na mu calo conse ica mpili ica kwa Yuda na mu calo conse ica mpili ica kwa Israele.+ Yoshua abonawilile pamo ne misumba yabo.+ 22 Takwali umwina Anaki uwashele mu calo ca bana ba kwa Israele. Kano fye mu Gasa,+ mu Gati+ na mu Ashdode+ e mo bashele.+ 23 Awe Yoshua apokele icalo conse, ukulingana na fyonse ifyo Yehova alaile Mose,+ kabili Yoshua acipeele ku bena Israele mu fiputulwa ku kuba ubupyani, ukulingana ne mikowa yabo.+ Na mu calo mwali tondolo umwabula inkondo.+

12 Kabili ishi e shamfumu sha calo isho abena Israele bacimfishe no kupoka icalo ca shiko bushilya bwa Yordani lwa ku kabanga,+ ukufuma pa mumana wa Arnone+ ukufika na ku Lupili lwa Hermone+ na ku Araba+ konse lwa ku kabanga: 2 Sihone+ imfumu ya bena Amore, uwaikele mu Heshebone,+ uwaleteka ukufuma ku musumba wa Aroere,+ uwali mu mbali ya mumana wa Arnone,+ na pa kati ka mumana, na hafu wa Gileadi ukufika fye na ku mumana wa Yaboke,+ umupaka wa bana ba kwa Amone, 3 na Araba+ ukufika fye na kuli bemba wa Kinerete*+ lwa ku kabanga no kufika na kuli bemba wa Araba, Bemba wa Mucele,+ na ku kabanga ukulola ku Bete-yeshimote,+ na lwa ku kapinda ka ku kulyo mwi samba lya mikunkuluko ya Pisga.+

4 Kabili impanga ya kwa Oge+ imfumu ya Bashani, iyashelepo mu bena Refaimu,+ uwaikele mu Ashitarote+ na mu Edrei,+ 5 kabili uwaleteka mu Lupili lwa Hermone+ na mu Saleka na monse mu Bashani,+ ukufika fye na ku mupaka wa bena Geshuri+ na bena Maakati,+ na hafu wa Gileadi, ukufika ku mupaka wa kwa Sihone+ imfumu ya Heshebone.+

6 Ni Mose umubomfi wa kwa Yehova na bana ba kwa Israele e babacimfishe,+ e lyo nomba Mose umubomfi wa kwa Yehova apeele calo ukuba impanga ya bena Rubene+ na bena Gadi+ na hafu wa mukowa wa kwa Manase.+

7 Kabili ishi e shamfumu sha mu calo isho Yoshua na bana ba kwa Israele bacimfishe bushilya bwa Yordani lwa ku masamba, ukufuma ku Baali-gadi+ mu mpanga iyabatama iya Lebanone+ ukufika fye na ku Lupili lwa Halaki,+ ulwafika ku Seiri,+ na pa numa Yoshua ayakenye ifyalo fya ishi shamfumu ukulingana ne mikowa ya kwa Israele,+ 8 mu calo ca mpili na mu Shefela na mu Araba na pa mikunkuluko na mu matololo na mu Negebu+—mu bena Hiti, abena Amore+ na bena Kanaani, abena Perisi, abena Hibi na bena Yebusi:+

ishamfumu shonse pamo shali amakumi yatatu na imo (31).+

13 Awe Yoshua alikotele, ali ne myaka iingi.+ E ico Yehova amwebele ati: “Naukota kabili nawikala imyaka iingi, kabili kucili nakushala icalo icikalamba nga nshi icifwile ukupokwa.+ 2 Icalo icisheleko ni ci:+ ifitungu fyonse ifya baPelishiti+ na bena Geshuri+ bonse 3 (impanga yatendekele pa mumana wafuma mu Naelo uwalungatana na Egupti no kufika ku mupaka wa Ekrone ku kapinda ka ku kuso,+ baleipendela ku bena Kanaani);+ bakateka basano+ aba baPelishiti, abena Gasa+ na bena Ashidode,+ abena Ashikelone,+ abena Giti+ na bena Ekrone;+ na bena Abi.+ 4 Ku kapinda ka ku kulyo icalo conse ica bena Kanaani; na Meara uwa bena Sidone,+ ukufika ku Afeke, no kufika ku mupaka wa bena Amore; 5 ne calo ca bena Gebali+ na Lebanone onse lwa ku kabanga, ukufuma ku Baali-gadi+ mwi samba lya Lupili lwa Hermone ukufika apa kwingilila ku Hamati;+ 6 abekashi bonse aba mu calo ca mpili, ukufuma ku Lebanone+ ukufika ku Misirefotemaimu,+ abena Sidone+ bonse; ine nkabacimfya pa ntanshi ya bana ba kwa Israele.+ Ukacakanye pa kuti cikabe ubupyani bwa kwa Israele, ifyo ine nakwebele.+ 7 Nomba akanya icalo ici cibe ubupyani bwa mikowa pabula (9) na hafu uwa mukowa wa kwa Manase.”+

8 E lyo hafu umbi uwa mukowa na bena Rubene na bena Gadi babuulile impanga iyo Mose abapeele bushilya bwa Yordani lwa ku kabanga, ifyo Mose umubomfi wa kwa Yehova abapeele,+ 9 ukufuma ku Aroere,+ uwaba mu mbali ya mumana wa Arnone,+ no musumba uwaba pa kati ka mumana, na pabatama ponse mu Medeba+ ukufika fye na ku Dibone;+ 10 ne misumba yonse iya kwa Sihone imfumu ya bena Amore, uwaleteka mu Heshebone, ukufika na ku mupaka wa bana ba kwa Amone;+ 11 na Gileadi no mupaka wa bena Geshuri+ na bena Maakati no Lupili lwa Hermone+ lonse na Bashani+ onse ukufika fye na ku Saleka;+ 12 no bufumu bonse ubwa kwa Oge+ mu Bashani, uwaleteka mu Ashitarote na mu Edrei+—uwashelepo mu bena Refaimu+—kabili Mose alibepeye no kubacimfya.+ 13 Kabili abana ba kwa Israele tabatamfishe+ abena Geshuri na bena Maakati, lelo Geshuri+ na Maakati baikala mu kati ka Israele ukufika na lelo.

14 Kano fye umukowa wa bena Lebi e o ashapeeleko ubupyani.+ Imituulo ya koca+ iya kwa Yehova Lesa wa kwa Israele e bupyani bwabo,+ ukulingana ne fyo umwine abalaile.+

15 E lyo Mose apeele ubupyani bwa mpanga ku bana ba kwa Rubene ukulingana ne ndupwa shabo, 16 no mupaka wabo wafumine ku Aroere,+ uwaba mu mbali ya mumana wa Arnone, no musumba waba pa kati ka mumana, na pabatama ponse lwa ku Medeba;+ 17 Heshebone+ ne misumba+ ya uko yonse iyaba apabatama, Dibone+ na Bamote-baali+ na Bete-baali-meone,+ 18 na Yahasi+ na Kedemote+ na Mefaati,+ 19 na Kiriataimu+ na Sibma+ na Sereteshahari mu lupili lwa mu mpanga iyabatama, 20 na Bete-peore no mukunkuluko wa Pisga+ na Bete-yeshimote,+ 21 ne misumba yonse iyaba apabatama+ no bufumu bonse ubwa kwa Sihone imfumu ya bena Amore, uwaleteka mu Heshebone,+ kabili uo Mose apumine,+ pamo na bakalamba ba mu Midiani, Ebi na Rekemu na Suri na Huri na Reba,+ bacilolo ba kwa Sihone, abaikele mu calo. 22 Kabili Balaamu mwana Beore,+ uwalebuka,+ e o abana ba kwa Israele baipeye ku lupanga pamo na bantu babo abaipaiwe. 23 No mupaka wa bana ba kwa Rubene wali ni Yordani; kabili iyi e mpanga abana ba kwa Rubene+ bapyene ukulingana ne ndupwa shabo, ne misumba ne mishi ya iko.

24 Kabili Mose apeele umukowa wa kwa Gadi impanga, abana ba kwa Gadi ukulingana ne ndupwa shabo,+ 25 no mupaka wabo wali ni Yasere+ ne misumba yonse iya mu Gileadi+ na hafu wa calo ca bana ba kwa Amone+ ukufika fye na ku Aroere,+ uwalungatana na Raba;+ 26 no kufuma ku Heshebone+ ukufika ku Ramati-mispe na Betonimu, no kufuma ku Mahanaimu+ ukufika ku mupaka wa Debiri;+ 27 kabili mu mpanga iyabatama, Bete-haramu+ na Bete-nimra+ na Sukote+ na Safone, iyasheleko ku bufumu bonse ubwa kwa Sihone imfumu ya Heshebone,+ kabili Yordani e wali umupaka ukufika fye na ku mpela ya bemba wa Kinerete*+ bushilya bwa Yordani lwa ku kabanga. 28 Ubu e bupyani bwa bana ba kwa Gadi+ ukulingana ne ndupwa shabo, pamo ne misumba ne mishi ya iko.

29 Kabili Mose apeele impanga kuli hafu wa mukowa wa kwa Manase, kabili iyi mpanga yali ya hafu wa mukowa wa bana ba kwa Manase ukulingana ne ndupwa shabo.+ 30 Kabili umupaka wabo wafumine ku Mahanaimu+ na Bashani onse, ubufumu bonse ubwa kwa Oge imfumu ya Bashani,+ ne mishi ya matenti yonse iya kwa Yairi+ iyaba mu Bashani, imishi amakumi mutanda (60). 31 Kabili hafu wa Gileadi, na Ashitarote+ na Edrei,+ imisumba ya bufumu bwa kwa Oge mu Bashani, yapeelwe ku bana ba kwa Makiri+ mwana Manase, yapeelwe kuli hafu wa bana ba kwa Makiri ukulingana ne ndupwa shabo.

32 Iyi e mpanga Mose abapeele ukuti ibe ubupyani bwabo, mu ciswebebe ca Moabu kwi shilya lya Yordani, ku Yeriko, lwa ku kabanga.+

33 Kabili Mose tapeele ku mukowa wa bena Lebi impanga.+ Yehova Lesa wa kwa Israele e bupyani bwabo, ukulingana ne fyo umwine abalaile.+

14 Nomba iyi e mpanga abana ba kwa Israele bapeelwe mu calo ca Kanaani,+ iyo Eleasari shimapepo na Yoshua mwana Nuni ne ntungulushi sha mikowa ya bana ba kwa Israele babapeele.+ 2 Pa kwakanya impanga ku mikowa pabula (9) na hafu wa mukowa+ balipendwile,+ ukulingana ne fyo Yehova aebele Mose. 3 Pantu Mose apeele impanga ku mikowa ibili imbi na hafu wa mukowa umbi bushilya bwa Yordani;+ na bena Lebi tabapeeleko impanga.+ 4 Pantu abana ba kwa Yosefe bali mikowa ibili,+ Manase+ na Efraimu;+ kabili bena tabapeele abena Lebi impanga mu calo, kano imisumba+ ya kwikalamo ne mpanga ya mulemfwe wa fitekwa fyabo e lyo ne fipe fyabo.+ 5 Ifyo Yehova aebele Mose, e fyo abana ba kwa Israele bacitile; kabili bayakenye icalo.

6 E lyo abana ba kwa Yuda baile kuli Yoshua mu Gilgali,+ na Kalebu+ mwana Yefune umwina Kenisi+ amwebele ati: “Iwe walishiba bwino amashiwi ayo Yehova alandile+ kuli Mose umuntu wa kwa Lesa wa cine+ pali ine na pali iwe pa Kadeshe-barnea.+ 7 Nali ne myaka amakumi yane (40) ilyo Mose umubomfi wa kwa Yehova antumine ukufuma ku Kadeshe-barnea ku kuyalengula icalo,+ kabili nabwelele no kuleta amashiwi filya fine yali mu mutima wandi.+ 8 Kabili bamunyinane abaile na ine bafuupwile abantu;+ lelo ine, nakonkele Yehova Lesa wandi no mutima onse.+ 9 E ico Mose alapile mu bushiku bulya ati, ‘Icalo umo ulukasa lobe lunyantile+ e cikaba ubupyani bobe no bwa bana bobe umuyayaya, pantu naukonka Yehova Lesa wandi no mutima onse.’+ 10 Na nomba Yehova alinsunga uwa mweo,+ ifyo alaile,+ iyi myaka amakumi yane na isano (45) ukutula apo Yehova alaile ici kuli Mose ilyo abena Israele baendawike mu matololo,+ kabili nomba ndi ne myaka amakumi cinekonsekonse na isano (85). 11 Kabili na lelo ncili uwakosa nge fyo nali mu bushiku Mose antumine.+ Ifyo nali na maka lilya, e fyo ndi na maka ya kulwa inkondo na nomba, aya kuya ku nkondo no kubwela.+ 12 E ico mpeela icalo ici ica mpili ico Yehova alaile pa bushiku bulya,+ pantu iwe walyumfwile pa bushiku bulya ukuti kwali abena Anaki+ kulya ne misumba iikalamba iya malinga.+ Ninjishiba ukuti Yehova akaba na ine,+ kabili nkabacimfya, ukulingana ne fyo Yehova alaile.”+

13 Awe Yoshua alimupaalile no kupeela Hebrone kuli Kalebu mwana Yefune ukuba ubupyani+ bwakwe. 14 E mulandu wine ukufika na lelo, Hebrone bupyani bwa kwa Kalebu mwana Yefune umwina Kenisi, pantu akonkele Yehova Lesa wa kwa Israele no mutima onse.+ 15 Ishina lya Hebrone kale lyali ni Kiriati-arba+ (uyu Arba+ ali muntu uwacilile bonse mu bena Anaki). Ne calo cali tondolo umwabula inkondo.+

15 Kabili impanga+ iyapendwilwe iya mukowa wa bana ba kwa Yuda ukulingana ne ndupwa shabo yafikile ku mupaka wa Edomu,+ amatololo ya Sini,+ ukufika ku mpela ya kapinda ka ku kulyo aka Negebu.+ 2 No mupaka wabo uwa ku kapinda ka ku kulyo wafumine ku mpela ya Bemba wa Mucele,+ apashoka bemba apalosha ku kapinda ka ku kulyo. 3 Kabili waile ku kapinda ka ku kulyo ku nshila yaninika ukuya ku Akrabimu+ no kuyafika ku Sini+ kabili wafumine ku kapinda ka ku kulyo ukuya ku Kadeshe-barnea+ no kuyafika ku Hesrone kabili waile ku Adari no kwalukila ku Karka. 4 Kabili wapitile ku Asmone+ no kuya ku mumana wa mu Egupti;+ no mupaka wapelele kuli bemba. Uyu wali e mupaka wabo uwa ku kapinda ka ku kulyo.

5 Kabili umupaka wa ku kabanga wali ni Bemba wa Mucele ukufika napapelela Yordani, kabili umupaka wa pa koona ya ku kapinda ka ku kuso wali pa cinshoko ca bemba, apapelela Yordani.+ 6 Kabili umupaka waile ku Bete-hogla+ no kuya ku kapinda ka ku kuso aka Bete-araba,+ kabili umupaka waile ku libwe lya kwa Bohani,+ mwana Rubene. 7 Kabili umupaka waile ku Debiri mu mpanga iyabatama iya Akore+ no kulola ku kapinda ka ku kuso ku Gilgali,+ uwalungatana ne nshila yaninika ukuya ku Adumimu, ku kapinda ka ku kulyo aka mumana; kabili umupaka wapitile mu menshi ya Ene-shemeshe,+ kabili wapelele pa Ene-rogele.+ 8 Kabili umupaka wailefika ku mupokapoka wa mwana wa kwa Hinomu+ ku mukunkuluko wa bena Yebusi+ ku kapinda ka ku kulyo, e kutila, ku Yerusalemu;+ no mupaka wapitile pa mupokapoka wa Hinomu ku masamba, uwaba ku mpela ya mpanga yabatama iya Refaimu+ ku kapinda ka ku kuso. 9 Kabili umupaka watendekele pa muulu wa lupili no kuya ku kamfukumfuku ka menshi ya Nefitoa,+ no kuya ku misumba ya Lupili lwa Efrone; no mupaka wapelele ku Baala,+ e kutila, Kiriati-yearimu.+ 10 Kabili umupaka washingulwike ukufuma ku Baala lwa ku masamba ukuya ku Lupili lwa Seiri no kuya ku mukunkuluko wa Lupili lwa Yearimu ku kapinda ka ku kuso, e kutila, ku Kesalone; kabili watentemukile ku Bete-shemeshe+ no kuya ku Timuna.+ 11 Kabili umupaka waile ku mukunkuluko wa Ekrone+ ku kapinda ka ku kuso, kabili umupaka waile ku Shikerone no kuya ku Lupili lwa Baala no kuya ku Yabineele; kabili umupaka wapelele pali bemba.

12 Kabili umupaka wa ku masamba wali kuli Bemba Mukalamba+ no lulamba lwa uko. Uyu e wali umupaka ukushinguluka konse, uwa bana ba kwa Yuda ukulingana ne ndupwa shabo.

13 Kabili apeele Kalebu+ mwana Yefune impanga mu kati ka bana ba kwa Yuda ukulingana ne fyo Yehova aebele Yoshua, e kutila, Kiriati-arba (uyu Arba ali e wishi wa kwa Anaki), e kutila, Hebrone.+ 14 E ico Kalebu atamfishemo abana ba kwa Anaki batatu,+ e kutila Sheshai+ na Ahimani na Talmai,+ abafyelwe kuli Anaki.+ 15 E lyo afumine kulya no kuya ku bekashi ba ku Debiri.+ (Debiri kale yaleitwa ati Kiriati-sefere.)+ 16 Kabili Kalebu atile: “Uulesansa umusumba wa Kiriati-sefere no ku-ucimfya, ndemupeela Aksa,+ umwana wandi umwanakashi ukuba umukashi wakwe.” 17 Awe Oteniele+ mwana Kenasi, munyina Kalebu,+ aliucimfishe. Na o amupeele Aksa+ umwana wakwe umwanakashi ukuba umukashi. 18 Nomba ilyo Aksa aleya ku ng’anda, aikalile fye ukupamfya umulume wakwe ukuti alombe impanga kuli wishi. E lyo atootele amapi ilyo ali pa mpunda. Na o Kalebu atile kuli Aksa: “Cinshi ulefwaya?”+ 19 Na o Aksa atile: “Mpaaleni, pantu mumpeele fye impanga iyabela ku kapinda ka ku kulyo, kabili ndefwaya mumpeele na Gulote-maimu.” Awe amupeele Gulote wa pa Muulu na Gulote wa mwi Samba.+

20 Iyi e yali mpanga+ ya mukowa wa bana ba kwa Yuda+ ukulingana ne ndupwa shabo.

21 Kabili imisumba ya mukowa wa bana ba kwa Yuda iyali ku mpela, ku mupaka wa Edomu+ ku kapinda ka ku kulyo yali ni Kabseele+ na Edere na Yaguri, 22 na Kina na Dimona na Adada, 23 na Kedeshe na Hasore na Itinani, 24 na Sifi na Telemu+ na Bealote, 25 na Hasore-hadata na Keriote-heserone, e kutila, Hasore, 26 Amamu na Shema na Molada,+ 27 na Hasari-gada na Heshemone na Bete-pelete,+ 28 na Hasari-shauli+ na Beere-sheba+ na Bisiotia, 29 Baala+ na Imu na Esemu,+ 30 na Eletoladi na Kesili na Horma,+ 31 na Siklagi+ na Madimana na Sansana, 32 na Lebaote na Shilihimu na Aini+ na Rimone;+ imisumba yonse yali amakumi yabili na pabula (29), ne mishi ya iko.

33 Mu Shefela+ mwali Esh-taole+ na Sora+ na Ashina, 34 na Sanoa+ na Ene-ganimu, Tapua na Enamu, 35 Yarimuti+ na Adulamu,+ Soko+ na Aseka,+ 36 na Shaaraimu+ na Aditaimu na Gedera na Gederotaimu; imisumba ikumi na ine (14) ne mishi ya iko.

37 Senani na Hadasha na Migdaligadi, 38 na Dileani na Mispa na Yoketeele, 39 Lakishi+ na Bosekati+ na Egelone,+ 40 na Kabone na Lamamu na Kitilishi, 41 na Gederote, Bete-dagone na Naama na Makeda;+ imisumba ikumi na mutanda (16) ne mishi ya iko.

42 Libna+ na Etere+ na Ashani, 43 na Ifta na Ashina na Nesibu, 44 na Keila+ na Aksibu+ na Maresha;+ imisumba pabula (9) ne mishi ya iko.

45 Ekrone+ ne misumba ya uko ne mishi ya uko. 46 Ukufuma ku Ekrone lwa ku masamba, ne ncende yonse iya ku Ashidode ne mishi ya iko.

47 Ashidode,+ imisumba ya uko ne mishi ya uko; Gasa,+ imisumba ya uko ne mishi ya uko, ukufika na ku mumana wa mu Egupti, na Bemba Mukalamba ne citungu cabela mupepi.+

48 Kabili mu calo ca mpili, Shamiri na Yatiri+ na Soko, 49 na Dana na Kiriati-sana, e kutila, Debiri, 50 na Anabu na Eshetemo+ na Animu, 51 na Goshene+ na Holone na Gilo,+ imisumba ikumi na umo (11) ne mishi ya iko.

52 Arabia na Duma na Eshani, 53 na Yanimu na Bete-tapua na Afeka, 54 na Humita na Kiriat-arba, e kutila, Hebrone,+ na Siore; imisumba pabula (9) ne mishi ya iko.

55 Maone,+ Karmele na Sifi+ na Yuta, 56 na Yesreele na Yokedeamu na Sanoa, 57 Keni, Gibea na Timuna;+ imisumba ikumi (10) ne mishi ya iko.

58 Halihuli, Betsuri na Gedore, 59 na Maarati na Bete-anote na Eletekone; imisumba mutanda (6) ne mishi ya iko.

60 Kiriati-baali,+ e kutila, Kiriati-yearimu,+ na Raba; imisumba ibili ne mishi ya iko.

61 Mu matololo mwali Bete-araba,+ Midini na Sekaka, 62 na Nibishani no Musumba wa Mucele na Ene-gedi;+ imisumba mutanda (6) ne mishi ya iko.

63 Lelo abena Yebusi+ abaleikala mu Yerusalemu,+ tababatamfishemo ku bana ba kwa Yuda;+ kabili abena Yebusi baikala na bana ba kwa Yuda mu Yerusalemu ukufika na lelo.

16 Kabili impanga iyo bapendwilile+ abana ba kwa Yosefe+ yatendekele ku Yordani+ pa Yeriko yafikile na ku menshi ya ku Yeriko lwa ku kabanga, ku matololo ayafuma ku Yeriko no kwingila mu mpili sha Betele.+ 2 Kabili yafumine ku Betele uwali mu Lusi+ no kuya ku mupaka wa bena Ariki+ mu Atarote, 3 yatentemwike na lwa ku masamba ku mupaka wa bena Yafleti ukufika fye na ku Bete-horone+ wa mwi Samba na Gesere,+ kabili wapelele kuli bemba.+

4 Kabili abana ba kwa Yosefe,+ e kutila Manase na Efraimu,+ baikele muli iyi mpanga.+ 5 No mupaka wa bana ba kwa Efraimu ukulingana ne ndupwa shabo, umupaka wa mpanga yabo lwa ku kabanga yali ni Atarote-adari,+ ukufika na kuli Bete-horone wa pa Muulu;+ 6 no mupaka wafikile kuli bemba. Mikimetati+ yali ku kapinda ka ku kuso, no mupaka washingulwike lwa ku kabanga waya ku Taanati-shilo, no kuya lwa ku kabanga ku Yanoa. 7 Kabili watentemwike ukufuma ku Yanoa no kuya ku Atarote na Naara no kufika ku Yeriko+ kabili waile ku Yordani. 8 Ukufuma ku Tapua+ umupaka waile lwa ku masamba ukufika ku mumana wa Kana,+ kabili wapelele pali bemba.+ Iyi e mpanga ya mukowa wa bana ba kwa Efraimu ukulingana ne ndupwa shabo. 9 Na bana ba kwa Efraimu bali ne misumba+ imbi iyali mu kati ka bupyani bwa bana ba kwa Manase, imisumba yonse ne mishi ya iko.

10 Lelo tabatamfishe abena Kanaani+ abaleikala mu Gesere,+ na bena Kanaani bekala mu kati ka bena Efraimu ukufika na lelo+ kabili babapeele umulimo wa kupatikishiwa.+

17 Nomba ilyo bapendwile,+ bapeele impanga ku mukowa wa kwa Manase,+ pantu ali e beli lya kwa Yosefe,+ kuli Makiri+ ibeli lya kwa Manase, wishi wa kwa Gileadi,+ pantu ali mwaume ku bulwi;+ kabili icitungu ca Gileadi+ ne ca Bashani fyali fyakwe. 2 Kabili abana ba kwa Manase abasheleko balibapendwilile no kubapeela impanga ukulingana ne ndupwa shabo, iya bana ba kwa Abiesere+ na bana ba kwa Heleke+ na bana ba kwa Asriele na bana ba kwa Shekemu+ na bana ba kwa Hefere na bana ba kwa Shemida.+ Aba e bana ba kwa Manase mwana Yosefe, abaume, ukulingana ne ndupwa shabo. 3 Lelo Selofehadi,+ mwana Hefere, mwana Gileadi, mwana Makiri, mwana Manase, ena takwete abana baume, kano abana banakashi, kabili aya e mashina ya bana bakwe abanakashi: Maala na Noa, Hogla, Milka na Tesa.+ 4 E ico baile kuli Eleasari+ shimapepo na Yoshua mwana Nuni na bacilolo, no kulanda abati: “Ni Yehova e waebele Mose ukutupeela ubupyani mu kati ka bamunyinefwe.”+ Awe na o alibapeele ubupyani mu kati ka bamunyina ba kwa shibo, ifyo Yehova asosele.+

5 E lyo kwali incende ikumi (10) ishali isha kwa Manase ukufumyako fye icitungu ca Gileadi ne ca Bashani, ifyali bushilya bwa Yordani;+ 6 pantu abana banakashi aba kwa Manase bapeelwe ubupyani mu bana bakwe abaume; ne calo ca Gileadi e cali impanga ya bana baume aba kwa Manase abasheleko.

7 Kabili umupaka wa kwa Manase wafumine ku Ashere no kuya ku Mikimetati,+ uwalungatana na Shekemu,+ kabili umupaka waile ku kulyo ku bekashi ba ku Ene-tapua. 8 Icalo ca Tapua+ cali ca kwa Manase, lelo umusumba wa Tapua uwali pa mupaka wa kwa Manase wali wa bana ba kwa Efraimu. 9 No mupaka waile ku mumana wa Kana, ku kapinda ka ku kulyo ku mumana wa ilya misumba+ ya kwa Efraimu, kabili umupaka wa kwa Manase wali ku kapinda ka ku kuso aka mumana, kabili wapelele pali bemba.+ 10 Impanga ya ku kapinda ka ku kulyo yali ya kwa Efraimu, ne ya ku kapinda ka ku kuso yali ya kwa Manase, kabili bemba ali e mupaka wakwe;+ na ku kapinda ka ku kuso bapakene na Ashere, e lyo ku kabanga bapakene na Isakari.

11 Kabili iya kwa Manase+ muli Isakari na muli Ashere ni Bete-sheani+ ne mishi ya uko, na Ibleamu+ ne mishi ya uko, na bekashi ba mu Dore+ ne mishi ya uko, na bekashi ba mu En-dore+ ne mishi ya uko, na bekashi ba mu Taanaki+ ne mishi ya uko, na bekashi ba mu Megido+ ne mishi ya uko, ifitungu fitatu umwali sana impili.

12 Kabili abana ba kwa Manase balifililwe ukupoka iyi misumba,+ lelo abena Kanaani bakakatile fye muli ici calo.+ 13 Nomba ilyo abana kwa Israele bakosele,+ baingishe abena Kanaani ukulabomba umulimo wa kupatikishiwa,+ kabili tababafumishemo bonse.+

14 E lyo abana ba kwa Yosefe batile kuli Yoshua: “Nga cinshi ico wampendwilila ubupyani bumo,+ impanga fye imo, apo ine ndi luko ulukalamba pantu Yehova alimpaala ukufika na lelo?”+ 15 Na o Yoshua abebele ati: “Iwe nga uli luko ulukalamba, kabiye mu mutengo, uteme miti mu calo ca bena Perisi+ na bena Refa,+ pantu icalo ca mpili+ ica Efraimu nacikucepela nga nshi.” 16 E lyo abana ba kwa Yosefe batile: “Icalo ca mpili te kuti citukumane, kabili mwaba amaceleta+ ayakwata ifyela ifyatwa mu kati ka bena Kanaani abaikala mu mpanga yabatama, balya baba mu Bete-sheani+ ne mishi ya uko na baba mu mpanga yabatama iya Yesreele.”+ 17 E ico Yoshua aebele aba mu ng’anda ya kwa Yosefe, e kutila Efraimu na Manase ati: “Imwe muli bengi, kabili muli ba maka sana.+ Tamufwile ukupoka ica kupendula cimo iyo,+ 18 kanshi icalo ca mpili cili no kuba icenu.+ Apo ici calo mutengo, mukateme imiti iyabamo, kabili e ukaba umupaka wenu. Mukatamfyemo abena Kanaani, nangu baba na maceleta ayakwata ifyela ifyatwa kabili balikosa.”+

18 E lyo nomba ulukuta lonse ulwa bana ba kwa Israele lwalongene ku Shilo,+ kabili baimike ne cikuulwa ca kukumaninako,+ pantu nomba balicimfishe icalo.+ 2 Lelo kwalishele bamo mu bana ba kwa Israele abo bashayakenye impanga, kabili bali imikowa cinelubali (7). 3 E ico Yoshua atile ku bana ba kwa Israele: “Bushe mukaleka lilali ukukaana ukwingila mu calo+ no kucipoka, icalo ico Yehova Lesa wa bashinwe amupeela?+ 4 Saleni abaume batatu mu mukowa umo umo, muleke mbatume, baye bapite mu calo no kushila imipaka ukulingana no bupyani bwabo, kabili muleke bese kuli ine.+ 5 E lyo bakacakanye mu fiputulwa cinelubali (7).+ Yuda akaba mu citungu cakwe ku kapinda ka ku kulyo,+ na ba mu ng’anda ya kwa Yosefe bakaba mu citungu cabo ku kapinda ka ku kuso.+ 6 Kabili imwe mushile imipaka ya calo mu fiputulwa cinelubali (7), e lyo mulete kuli ine, kabili ndeisamupendwila ifipendwilo+ pa ntanshi ya kwa Yehova Lesa wesu. 7 Pantu abena Lebi tabakwata ubupyani mu kati kenu,+ pantu bushimapepo bwa kwa Yehova e bupyani bwabo;+ kabili Gadi na Rubene+ na hafu wa mukowa wa kwa Manase+ balibuula ubupyani bwabo bushilya bwa Yordani lwa ku kabanga, ubo Mose umubomfi wa kwa Yehova abapeela.”+

8 Awe abaume balimine ukuti baleya, kabili Yoshua aebele+ abaleya mu kushila imipaka mu calo ati: “Kabiyeni, mupite mu calo no kushila imipaka, e lyo mubwele kuli ine, kabili kuno e ko nkesamupendwila ifipendwilo+ pa ntanshi ya kwa Yehova mu Shilo.”+ 9 Awe abaume baliile no kupita mu calo no kushila+ mwi buuku imipaka ukulingana ne misumba, mu fiputulwa cinelubali (7). Kabili babweleele kuli Yoshua ku nkambi mu Shilo, 10 na Yoshua abapendwilile ifipendwilo mu Shilo pa ntanshi ya kwa Yehova.+ E fyo Yoshua ayakenye abana ba kwa Israele icalo no kubapeela impanga.+

11 E lyo nomba inshita yafikile iya kupendwila+ umukowa wa bana ba kwa Benjamini+ ukulingana ne ndupwa shabo, no mupaka wa mpanga yabo wapitile pa kati ka bana ba kwa Yuda+ na bana ba kwa Yosefe.+ 12 No mupaka wabo wali pa koona ya ku kapinda ka ku kuso ukufuma ku Yordani, kabili umupaka wailefika ku mateelo ya Yeriko+ ku kapinda ka ku kuso no kunina pa lupili lwa ku masamba, wapelele na mu matololo ya Bete-abene.+ 13 Kabili umupaka wafumine kulya waya ku Lusi,+ ku mukunkuluko wa ku kapinda ka ku kulyo uwa ku Lusi, e kutila, ku Betele;+ kabili umupaka watentemukile ku Atarote-adari+ pa lupili lwaba ku kapinda ka ku kulyo aka Bete-horone wa mwi Samba.+ 14 Kabili umupaka washingulwike ku masamba waya ku kapinda ka ku kulyo ukufuma ku lupili ulwalungatana na Bete-horone ku kapinda ka ku kulyo; kabili wapelele ku Kiriati-baali, e kutila, ku Kiriati-yearimu,+ umusumba wa bana ba kwa Yuda. Uku e ku masamba.

15 Kabili lwa ku kapinda ka ku kulyo wafumine ku mpela ya Kiriati-yearimu, kabili umupaka waile lwa ku masamba no kuya ku kamfukumfuku ka menshi aka Nefitoa.+ 16 Kabili umupaka watentemukile ku mpela ya lupili ulwalungatana no mupokapoka wa mwana wa kwa Hinomu,+ uwaba mu mpanga iyabatama iya Refaimu+ ku kapinda ka ku kuso, kabili watentemukile ku mupokapoka wa Hinomu, ku mukunkuluko wa Yebusi+ ku kapinda ka ku kulyo, waile na ku Ene-rogele.+ 17 Kabili wapitile lwa ku kapinda ka ku kuso no kuya ku Ene-shemeshe kabili waile ku Gelilote, uwalungatana ne nshila yaninika ukuya ku Adumimu;+ waile na ku libwe+ lya kwa Bohani+ mwana Rubene. 18 Waile na ku mukunkuluko wa ku kapinda ka ku kuso, ukulungatana na Araba, watentemukile na ku Araba. 19 Kabili umupaka waile ku mukunkuluko wa ku kapinda ka ku kuso uwa Bete-hogla,+ kabili wapelele pa cinshoko cabela ku kapinda ka ku kuso aka Bemba wa Mucele,+ ku mpela ya kapinda ka ku kulyo aka Yordani. Uyu e wali umupaka wa ku kapinda ka ku kulyo. 20 Kabili Yordani ali e mupaka wa uko lwa ku kabanga. Ubu e bwali ubupyani bwa bana ba kwa Benjamini ukulingana ne ndupwa shabo, mu mipaka yabo iyashingulwike konse.

21 Kabili imisumba ya mukowa wa bana ba kwa Benjamini ukulingana ne ndupwa shabo yali ni Yeriko+ na Bete-hogla na Emeke-kesisi, 22 na Bete-araba+ na Semaraimu na Betele,+ 23 na Avimu na Para na Ofra,+ 24 na Kefari-amone na Ofni na Geba;+ imisumba ikumi na ibili (12) ne mishi ya iko.

25 Gibeone+ na Rama na Beerote, 26 na Mispa+ na Kefira+ na Mosa, 27 na Rekemu na Iripeele na Tarala, 28 na Sela,+ Ha-elefe, na Yebusi, e kutila Yerusalemu,+ Gibea+ na Kiriati; imisumba ikumi na ine (14) ne mishi ya iko.

Iyi e yali impanga ya bana ba kwa Benjamini ukulingana ne ndupwa shabo.+

19 E lyo nomba bapendwile umuku wa bubili kabili icipendwilo+ caponene pali Simeone, pa mukowa wa bana ba kwa Simeone+ ukulingana ne ndupwa shabo. Kabili babapeele impanga mu kati ka mpanga ya bana ba kwa Yuda.+ 2 Kabili impanga yabo yali ni Beere-sheba+ na Sheba, na Molada,+ 3 na Hasari-shauli+ na Bala na Esemu,+ 4 na Eletoladi+ na Betuli na Horma, 5 na Siklagi+ na Bet-markabote na Hasari-susa,+ 6 na Bete-lebaote+ na Sharuhene; imisumba ikumi na itatu (13) ne mishi ya iko. 7 Aini,+ Rimone+ na Etere na Ashani;+ imisumba ine ne mishi ya iko, 8 ne mishi yonse iyashingulwike ilya misumba ukufika fye na ku Baalati-beere,+ Rama+ uwabelele ku kapinda ka ku kulyo. Iyi e yali mpanga ya mukowa wa bana ba kwa Simeone ukulingana ne ndupwa shabo. 9 Impanga ya bana ba kwa Simeone yafumine mu mpanga ya bana ba kwa Yuda, pantu impanga ya bana ba kwa Yuda yalibakulile sana.+ E ico abana ba kwa Simeone balikwete impanga mu kati ka mpanga yabo.+

10 E lyo bapendwile umuku walenga butatu kabili icipendwilo+ caponene pa bana ba kwa Sebuluni+ ukulingana ne ndupwa shabo, kabili umupaka wa mpanga yabo wafikile fye na ku Saridi. 11 Kabili umupaka wabo waile lwa ku masamba na ku Marala no kufika ku Dabeshete, wafikile na ku mumana uwalungatana na Yokeneamu.+ 12 Kabili wabwelele ku Saridi lwa ku kabanga ukutula akasuba no kuya ku mupaka wa Kisilote-tabore, waile na ku Daberati+ no kunina ukuya ku Yafia. 13 Kabili wafumine kulya wapita lwa ku kabanga, waya ku Gati-hefere,+ ku Ete-kasini, no kuya ku Rimone kabili wapelele ku Nea. 14 No mupaka wapitile ku mbali ya uko ku kapinda ka ku kuso no kuya ku Hanatone, kabili wapelele mu mupokapoka wa Ifitahele, 15 na Katati na Nahalali na Shimrone+ na Idala na Betelehemu;+ imisumba ikumi na ibili (12) ne mishi ya iko. 16 Iyi yali impanga+ ya bana ba kwa Sebuluni ukulingana ne ndupwa shabo.+ Iyi e yali imisumba ne mishi ya iko.

17 Nomba ilyo bapendwile umuku walenga bune, icipendwilo caponene pali Isakari,+ pa bana ba kwa Isakari ukulingana ne ndupwa shabo. 18 Kabili umupaka wabo wafikile ku Yesreele+ na Kesulote na Shunemu,+ 19 na Hafaraimu na Shione na Anaharati, 20 na Rabiti na Kishione na Ebese, 21 na Remete na Ene-ganimu+ na Ene-hada na Bete-pasese. 22 Kabili umupaka wafikile ku Tabore+ na Shahasuma na Bete-shemeshe, no mupaka wabo wapelele ku Yordani; imisumba ikumi na mutanda (16) ne mishi ya iko. 23 Iyi e yali impanga ya mukowa wa bana ba kwa Isakari ukulingana ne ndupwa shabo,+ imisumba ne mishi ya iko.

24 E lyo bapendwile umuku walenga busano kabili icipendwilo+ caponene pa mukowa wa bana ba kwa Ashere+ ukulingana ne ndupwa shabo. 25 Kabili umupaka wabo wali ni Helkati+ na Hali na Betene na Akishafi,+ 26 na Alamaleke na Amadi na Mishali.+ Kabili wafikile lwa ku masamba ku Karmele+ na ku Shihore-libinati, 27 kabili wabwelele lwa ku kabanga ka Bete-dagone no kufika ku Sebuluni+ no mupokapoka wa Ifitahele ku kapinda ka ku kuso, ku Bete-emeke na ku Neiele, kabili waile ku Kabuli ku kuso, 28 na ku Ebrone na Rehobu na Hamone na Kana ukufika fye na ku Sidone+ ukwaikele abantu abengi. 29 Kabili umupaka wabwelele ku Rama no kufika fye na ku musumba wa malinga uwa Turi.+ Kabili umupaka wabwelele ku Hosa, wapelele na pali bemba mu citungu ca Aksibu,+ 30 na Uma na Afeke+ na Rehobu;+ imisumba amakumi yabili na ibili (22) ne mishi ya iko. 31 Iyi e yali mpanga ya mukowa wa bana ba kwa Ashere ukulingana ne ndupwa shabo.+ Iyi e yali imisumba ne mishi ya iko.

32 Kabili bapendwile umuku walenga mutanda (6) kabili icipendwilo+ caponene pa bana ba kwa Naftali,+ ukulingana ne ndupwa sha bana ba kwa Naftali. 33 No mupaka wabo wafumine ku Helefe, ukufuma pa muti ukalamba mu Saananimu,+ na Adamu-nekebu na Yabineele ukufika fye na ku Lakumu; kabili wapelele pa Yordani. 34 Kabili umupaka wabwelele lwa ku masamba ku Asinote-tabore no kufuma kulya waya ku Hukoke no kufika kuli Sebuluni+ ku kapinda ka ku kulyo, kabili kuli Ashere+ wafikile ku masamba e lyo kuli Yuda+ wafikile ku Yordani lwa ku kabanga. 35 Ne misumba ya malinga yali ni Sidimu, Sere na Hamati,+ Rakati na Kinerete,+ 36 na Adama na Rama na Hasore,+ 37 na Kedeshe+ na Edrei na Ene-hasore, 38 na Irone na Migdalele, Horemu na Bet-anati na Bete-shemeshe;+ imisumba ikumi na pabula (19) ne mishi ya iko. 39 Iyi e yali impanga+ ya mukowa wa bana ba kwa Naftali ukulingana ne ndupwa shabo,+ imisumba ne mishi ya iko.

40 E lyo bapendwile umuku walenga cinelubali (7) kabili icipendwilo+ caponene pa mukowa wa bana ba kwa Dani+ ukulingana ne ndupwa shabo. 41 No mupaka wa mpanga yabo wapelele mu Sora+ na mu Esh-taole na mu Irishemeshe, 42 na mu Shaalabini+ na mu Ayalone+ na mu Itla, 43 na mu Elone na mu Timuna+ na mu Ekrone,+ 44 na mu Elteke na mu Gibetone+ na mu Baalati,+ 45 na mu Yehudi na mu Bene-beraki na mu Gati-rimone,+ 46 na mu Meyarkone na mu Rakone, no mupaka walungatene na Yopa.+ 47 Kabili impanga ya bana ba kwa Dani yalibacepeele nga nshi.+ E ico abana ba kwa Dani baile mu kulwa na Leshemu+ no ku-upoka no kukoma abali mu musumba ku lupanga. E lyo baupokele no kwikalamo, kabili bainike Leshemu ati Dani, ukulingana ne shina lya cikolwe cabo, Dani.+ 48 Iyi e yali impanga ya mukowa wa bana ba kwa Dani iyo bapyene ukulingana ne ndupwa shabo. Iyi e yali imisumba ne mishi ya iko.

49 Awe bapwishishe ukwakanya icalo ukulingana ne mipaka kabili bonse bali ne mpanga yabo. E lyo abana ba kwa Israele bapeele Yoshua mwana Nuni impanga mu kati kabo. 50 Ukulingana ne fyasosele Yehova, bamupeele umusumba untu alombele,+ e kutila, Timnati-sera,+ mu calo ca mpili ica kwa Efraimu; kabili atendeke ukukuula umusumba no kwikalamo.

51 Ishi e mpanga isho Eleasari shimapepo na Yoshua mwana Nuni ne ntungulushi sha mikowa ya bana ba kwa Israele bayakenye+ ukupitila mu kupendula pa kuti bonse bakwate impanga mu Shilo+ pa ntanshi ya kwa Yehova, pa mwinshi wa cikuulwa ca kukumaninako.+ Awe e fyo bapwile ukwakanya icalo.

20 E lyo Yehova asosele kuli Yoshua ati: 2 “Eba abana ba kwa Israele auti, ‘Saleni imisumba ya kufulumukilako+ iyo namwebele ukupitila muli Mose, 3 ukwa kubutukila uwaipaya umuntu+ mu kuluba, ukwabula ukwishiba; kabili ikaba ya kubutukilako uwaipaya umuntu nga bamukonka ku wa kulandula umulopa.+ 4 Na o akabutukile+ ku musumba umo pali iyi misumba no kwiminina pa mwinshi wa mpongolo+ ya musumba no kulondolwela abakalamba+ ba uyo musumba; na bo bakamupokelele mu musumba no kumupeela ukwa kwikala, na o akekale na bo. 5 Kabili uwa kulandula umulopa nga amukonka ulubilo pa numa, bekapeela uwaipeye umuntu mu minwe yakwe;+ pantu aipeye umunankwe ukwabula ukwishiba, kabili tamupatile iyo.+ 6 Kabili akekale mu musumba ulya mpaka akeminine pa menso ya lukuta pa kuti bamupingule,+ kabili mpaka shimapepo mukalamba+ uukabapo muli iyo nshita akafwe. E lyo nomba uwaipeye umuntu akabwelelamo,+ akengile na mu musumba wakwe na mu ng’anda yakwe, mu musumba umo abutwike.’”

7 Awe basalile Kedeshe+ mu Galili mu calo ca mpili ica kwa Naftali, na Shekemu+ mu calo ca mpili ica kwa Efraimu, na Kiriati-arba,+ e kutila, Hebrone, mu calo ca mpili ica kwa Yuda. 8 Na mu citungu ca Yordani, mu Yeriko, lwa ku kabanga, basalile Besere+ mu matololo mu ncende yabatama mu mukowa wa kwa Rubene,+ na Ramote+ mu Gileadi uwa mu mukowa wa kwa Gadi, na Golani+ mu Bashani uwa mu mukowa wa kwa Manase.

9 Iyi e misumba basaliile abana ba kwa Israele bonse no mulebeshi uwaleikala mu kati kabo, pa kuti onse uwaipaya umuntu ukwabula ukwishiba abutukileko+ pa kuti bemwipaya ku wa kulandula umulopa mpaka akeminine pa ntanshi ya lukuta.+

21 E lyo intungulushi sha mukowa wa bena Lebi shaile kuli Eleasari+ shimapepo na Yoshua+ mwana Nuni ne ntungulushi sha mikowa ya bana ba kwa Israele, 2 kabili shabebele mu Shilo+ mu calo ca Kanaani, ati: “Yehova alandile ukupitila muli Mose ukuti bakatupeele imisumba ya kwikalamo, pamo ne mpanga sha iko isha mulemfwe isha fitekwa fyesu.”+ 3 E ico abana ba kwa Israele bapeele abena Lebi+ imisumba iyi ne mpanga sha iko isha mulemfwe ukufuma mu bupyani bwabo,+ ukulingana ne fyalandile Yehova.

4 Awe balipendwilile indupwa sha bena Kohati,+ kabili bapeele imisumba ikumi na itatu (13) ku bana ba kwa Aarone shimapepo, uwa mu bena Lebi, ukufuma mu mukowa wa kwa Yuda+ na mu mukowa wa kwa Simeone+ na mu mukowa wa kwa Benjamini.+

5 Kabili abana ba kwa Kohati+ abasheleko babapeele, pa numa ya kupendula, imisumba ikumi (10), iyali mu ndupwa sha mukowa wa kwa Efraimu+ na mu mukowa wa kwa Dani+ na muli hafu wa mukowa wa kwa Manase.+

6 Na kabili balipendwile, na bana ba kwa Gershone+ babapeele imisumba ikumi na itatu (13) iyali mu ndupwa sha mukowa wa kwa Isakari+ na mu mukowa wa kwa Ashere+ na mu mukowa wa kwa Naftali+ na muli hafu wa mukowa wa kwa Manase mu Bashani.+

7 Kabili abana ba kwa Merari+ ukulingana ne ndupwa shabo babapeele imisumba ikumi na ibili (12) iyali mu mukowa wa kwa Rubene+ na mu mukowa wa kwa Gadi+ na mu mukowa wa kwa Sebuluni.+

8 E fyo abana ba kwa Israele bapeele abena Lebi iyi misumba ne mpanga sha iko isha mulemfwe,+ pa numa ya kupendula,+ ukulingana ne fyo Yehova asoseele muli Mose.+

9 E ico babapeele iyi misumba iyaleitwa mu mashina+ ya iko iyali mu mukowa wa bana ba kwa Yuda na mu mukowa wa bana ba kwa Simeone, 10 kabili yabele ya bana ba kwa Aarone aba mu ndupwa sha bena Kohati aba mu bana ba kwa Lebi, pantu icipendwilo ca ntanshi caponene pali bena.+ 11 E ico babapeele Kiriat-arba+ (uyu Arba ali wishi kwa Anaki),+ e kutila, Hebrone,+ mu calo ca mpili ica kwa Yuda,+ ne mpanga ya mulemfwe iyashingulwike cena;12 kabili impanga ya uyu musumba ne mishi ya uko bapeele Kalebu mwana Yefune.+

13 Kabili abana ba kwa Aarone shimapepo babapeele umusumba wa kufulumukilako+ uwaipaya umuntu,+ e kutila, Hebrone+ ne mpanga ya uko iya mulemfwe, na Libna+ ne mpanga ya uko iya mulemfwe, 14 na Yatiri+ ne mpanga ya uko iya mulemfwe, na Eshtemoa+ ne mpanga ya uko iya mulemfwe, 15 na Holone+ ne mpanga ya uko iya mulemfwe, na Debiri+ ne mpanga ya uko iya mulemfwe, 16 na Aini+ ne mpanga ya uko iya mulemfwe, na Yuta+ ne mpanga ya uko iya mulemfwe, na Bete-shemeshe+ ne mpanga ya uko iya mulemfwe; imisumba pabula (9) ukufuma mu mikowa iyi ibili.

17 Kabili mu mukowa wa kwa Benjamini, babapeelemo Gibeone+ ne mpanga ya uko iya mulemfwe, Geba+ ne mpanga ya uko iya mulemfwe, 18 Anatote+ ne mpanga ya uko iya mulemfwe, na Alimone+ ne mpanga ya uko iya mulemfwe; imisumba ine.

19 Imisumba yonse iya bana ba kwa Aarone,+ bashimapepo, yali ikumi na itatu (13) ne mpanga sha iko isha mulemfwe.+

20 Kabili ku ndupwa sha bana ba kwa Kohati, abena Lebi basheleko mu bana ba kwa Kohati, pa numa ya kupendula bapeelwe imisumba mu mukowa wa kwa Efraimu.+ 21 Awe babapeele umusumba wa kufulumukilako+ uwaipaya umuntu,+ e kutila, Shekemu,+ ne mpanga ya uko iya mulemfwe+ mu calo ca mpili ca kwa Efraimu, na Gesere+ ne mpanga ya uko iya mulemfwe, 22 na Kibsaimu+ ne mpanga ya uko iya mulemfwe, na Bete-horone+ ne mpanga ya uko iya mulemfwe; imisumba ine.

23 Kabili mu mukowa wa kwa Dani, babapeelemo Elteke ne mpanga ya uko iya mulemfwe, Gibetone+ ne mpanga ya uko iya mulemfwe, 24 Ayalone+ ne mpanga ya uko iya mulemfwe, Gati-rimone+ ne mpanga ya uko iya mulemfwe; imisumba ine.

25 Kabili muli hafu wa mukowa wa kwa Manase, babapeelemo Taanaki+ ne mpanga ya uko iya mulemfwe, na Gati-rimone ne mpanga ya uko iya mulemfwe; imisumba ibili.

26 Imisumba yonse ne mpanga sha iko isha mulemfwe iyo abana ba kwa Kohati abasheleko bakwete yali ikumi (10).

27 Kabili abana ba kwa Gershone,+ aba mu ndupwa sha bena Lebi, bapeelwe umusumba wa kufulumukilako uwaipaya umuntu, muli hafu wa mukowa wa kwa Manase,+ e kutila, Golani,+ mu Bashani, ne mpanga ya uko iya mulemfwe, na Beeshetera+ ne mpanga ya uko iya mulemfwe; imisumba ibili.

28 Kabili mu mukowa wa kwa Isakari,+ babapeelemo Kishione+ ne mpanga ya uko iya mulemfwe, Daberati+ ne mpanga ya uko iya mulemfwe, 29 Yarimuti+ ne mpanga ya uko iya mulemfwe, Ene-ganimu+ ne mpanga ya uko iya mulemfwe; imisumba ine.

30 Kabili mu mukowa wa kwa Ashere,+ babapeelemo Mishali+ ne mpanga ya uko iya mulemfwe, Abdone+ ne mpanga ya uko iya mulemfwe, 31 Helkati+ ne mpanga ya uko iya mulemfwe, na Rehobu+ ne mpanga ya uko iya mulemfwe; imisumba ine.

32 Kabili mu mukowa wa kwa Naftali,+ babapeelemo umusumba wa kufulumukilako+ uwaipaya umuntu,+ umusumba wa Kedeshe+ mu Galili, ne mpanga ya uko iya mulemfwe, babapeele na Hamote-dore+ ne mpanga ya uko iya mulemfwe, na Kartani ne mpanga ya uko iya mulemfwe; imisumba itatu.

33 Imisumba yonse iya bena Gershone ukulingana ne ndupwa shabo yali ikumi na itatu (13) ne mpanga sha iko isha mulemfwe.

34 Kabili indupwa sha bana ba kwa Merari,+ abena Lebi abasheleko, bapeelwe mu mukowa wa kwa Sebuluni,+ Yokeneamu+ ne mpanga ya uko iya mulemfwe, Karta ne mpanga ya uko iya mulemfwe, 35 Dimna+ ne mpanga ya uko iya mulemfwe, Nahalali+ ne mpanga ya uko iya mulemfwe; imisumba ine.

36 Kabili mu mukowa wa kwa Rubene,+ babapeelemo Besere+ ne mpanga ya uko iya mulemfwe, na Yahasi+ ne mpanga ya uko iya mulemfwe, 37 Kedemote+ ne mpanga ya uko iya mulemfwe, na Mefaati+ ne mpanga ya uko iya mulemfwe; imisumba ine.

38 Kabili mu mukowa wa kwa Gadi,+ babapeelemo umusumba wa kufulumukilako uwaipaya umuntu, umusumba wa Ramote mu Gileadi,+ ne mpanga ya uko iya mulemfwe, babapeele na Mahanaimu+ ne mpanga ya uko iya mulemfwe, 39 na Heshebone+ ne mpanga ya uko iya mulemfwe, e lyo na Yasere+ ne mpanga ya uko iya mulemfwe; imisumba yonse yali ine.

40 Pa numa ya kupendula, imisumba yonse iya bana ba kwa Merari+ abasheleko mu ndupwa sha bena Lebi, ukulingana ne ndupwa shabo, yali imisumba ikumi na ibili (12).

41 Imisumba yonse iya bena Lebi mu kati ka mpanga sha bana ba kwa Israele yali amakumi yane na cinekonsekonse (48)+ pamo ne mpanga sha iko isha mulemfwe.+ 42 Imisumba yonse iyi yashingulwikwe ne mpanga ya iko iya mulemfwe—e fyo imisumba yonse iyi yali.+

43 E fyo Yehova apeele Israele icalo conse ico alapile ukuti ali no kupeela ifikolwe fyabo,+ kabili balipokele+ ici calo no kwikalamo. 44 Kabili Yehova abalekele ukuti batuushe+ konse konse, ukulingana na fyonse ifyo alapile+ ku fikolwe fyabo, kabili takwali umulwani wabo nangu umo uwabacimfishe.+ Abalwani babo bonse Yehova abapeele mu minwe yabo.+ 45 Takwali ubulayo nangu bumo ubushafishiwepo pa malayo yonse ayasuma ayo Yehova alaile aba mu ng’anda ya kwa Israele; fyonse fyalifishiwepo.+

22 Pali ilya nshita Yoshua aitile abena Rubene na bena Gadi na hafu wa mukowa wa kwa Manase+ 2 no kubeba ati: “Imwe mwalikonka fyonse ifyo Mose umubomfi wa kwa Yehova amwebele,+ kabili mwalyumfwilile ishiwi lyandi muli fyonse ifyo namwebele.+ 3 Tamwalekelesha bamunyinenwe inshiku ishi ishingi+ ukufika na lelo, kabili mwalikonka ifyo amafunde ya kwa Yehova Lesa wenu yalanda.+ 4 Kabili Yehova Lesa wenu nomba naleka bamunyinenwe ukuti batuushe, ukulingana ne fyo abalaile.+ E ico nomba alukeni no kuya ku matenti yenu mu calo ca bupyani bwenu, ico Mose umubomfi wa kwa Yehova amupeele bushilya bwa Yordani.+ 5 Bikeniko amano sana ku kumfwila ifipope+ na mafunde ifyo Mose umubomfi wa kwa Yehova amwebele pa kutemwa Yehova Lesa wenu+ no kwenda mu nshila+ shakwe shonse no kuumfwila amafunde+ yakwe no kulambatila+ kuli ena no kumubombela+ no mutima wenu onse+ no mweo wenu onse.”+

6 E lyo Yoshua abapaalile+ no kubaleka baye ku matenti yabo. 7 Kabili Mose apeele impanga ya mu Bashani+ kuli hafu wa mukowa wa kwa Manase, e lyo hafu wa mukowa umbi wena, Yoshua aupeele impanga bushilya bwa Yordani ku masamba+ pamo na bamunyinabo. E ico ilyo Yoshua abalekele ukuti baye ku mwabo, alibapaalile. 8 Kabili abebele ati: “Bweleleni ku mwenu ne fyuma ifingi ne fitekwa ifingi, na silfere na golde no mukuba ne cela ne fya kufwala ifingi nga nshi.+ Sendeni ifyuma fyenu+ ifyo imwe na bamunyinenwe mwapokele abalwani benu.”

9 Awe abana ba kwa Rubene na bana ba kwa Gadi na hafu wa mukowa wa kwa Manase balibwelelemo, kabili bafumine pa bana ba kwa Israele, ku Shilo, uwaba mu calo ca Kanaani, pa kuti baye ku calo ca Gileadi,+ ku calo ca bupyani bwabo umo baikele ukulingana na mashiwi ya kwa Yehova ayo asosele ukupitila muli Mose.+ 10 Ilyo bafikile ku fitungu fya Yordani ifyali mu calo ca Kanaani, e lyo nomba abana ba kwa Rubene na bana ba kwa Gadi na hafu wa mukowa wa kwa Manase bakuulile iciipailo mupepi na Yordani, iciipailo+ icikalamba nga nshi. 11 Nomba abana ba kwa Israele baumfwile+ ukuti: “Moneni! Abana ba kwa Rubene na bana ba kwa Gadi na hafu wa mukowa wa kwa Manase nabakuula iciipailo pa mupaka wa calo ca Kanaani mu fitungu fya Yordani ku lubali lwa bana ba kwa Israele.” 12 Ilyo abana ba kwa Israele baumfwile ici, ulukuta lonse ulwa bana ba kwa Israele+ lwalongene pa Shilo+ pa kuti luye mu kulwa na bo.+

13 E lyo abana ba kwa Israele batumine+ Finehasi+ mwana Eleasari shimapepo ku bana ba kwa Rubene na bana ba kwa Gadi na hafu wa mukowa wa kwa Manase abali mu calo ca Gileadi, 14 pamo ne ntungulushi ikumi (10), intungulushi imo iya mu ng’anda imo imo iya mu mikowa ya kwa Israele yonse, kabili umo umo ali intungulushi ya ng’anda ya bashibo aba makana ya kwa Israele.+ 15 Awe bafikile ku bana ba kwa Rubene na ku bana ba kwa Gadi na kuli hafu wa mukowa wa kwa Manase ku calo ca Gileadi, balalanda na bo+ abati:

16 “Ulukuta lonse ulwa kwa Yehova+ lwasosa aluti: ‘Nga cinshi mwapondokela+ Lesa wa kwa Israele pa kuleka+ ukukonka Yehova kabili mwaikuulila ne ciipailo,+ pa kuti mupondokele Yehova lelo?17 Bushe ulubembu twacitile pa Peore+ lwalicepele? Pantu na kuba tatwasangululwa kuli lulya lubembu ukufika na lelo, nangu line icinkunka caliponene ulukuta lwa kwa Yehova.+ 18 Na imwe, mwaleka ukukonka Yehova lelo; nomba imwe nga mwapondokela Yehova lelo, ninshi mailo akafulilwa ulukuta lwa kwa Israele lonse.+ 19 Lelo nga ni mpanga yenu e ikowele,+ abukileni ku mpanga+ ya kwa Yehova ukwaba icikuulwa ca mushilo ica kwa Yehova, no kwikala na ifwe;+ kabili mwipondokela Yehova kabili mwilenga tupondoke pa mulandu wa kuti mwaikuulila iciipailo na cimbi, ilyo kuli iciipailo ca kwa Yehova Lesa wesu.+ 20 Bushe ilyo Akani+ mwana Sera aibile ifyali no konaulwa, te lukuta lonse ulwa bena Israele ubukali bwaishile?+ Kabili tafwile eka pa lubembu lwakwe.’”+

21 Awe abana ba kwa Rubene na bana ba kwa Gadi na hafu wa mukowa wa kwa Manase bayaswike+ no kulanda ne ntungulushi sha makana ya kwa Israele+ abati:22 “Lesa wa maka,+ Yehova, Lesa+ wa maka, Yehova,+ umwine naishiba,+ kabili na Israele na o akeshiba.+ Kwena uku nga kupondoka+ nangu nga kubembukila Yehova,+ mwituleka fye buno bushiku. 23 Nga twakuulile iciipailo ukuti tuleke ukukonka Yehova, kabili nga kutuula imituulo ya koca ne mituulo ya ngano pali cena,+ kabili nga kupeelelapo amalambo ya mutende, Yehova umwine apingule;+ 24 nelyo nga te mwenso wa cintu cimbi uulengele tucite ici, atuti, ‘Ku ntanshi abana benu kuti batila ku bana besu: “Bushe mulomfwana na Yehova Lesa wa kwa Israele?25 Kabili Yehova alibika umupaka pa kati ka ifwe na imwe, mwe bana ba kwa Rubene na bana ba kwa Gadi, kabili umupaka ni Yordani. Tamwaba ku lubali lwa kwa Yehova.”+ Na bana benu bakalenga abana besu ukuleka ukutiina Yehova.’+

26 “Na ifwe twatile, ‘Natucitepo cimo, tukuule iciipailo, te ca mituulo ya koca nelyo amalambo, 27 lelo ica kuba inte pa kati ka ifwe na imwe ne nkulo shikakonkapo pali ifwe+ ukuti tukalabombela Yehova ku cinso cakwe no kupeela imituulo yesu iya koca na malambo yesu kabili na malambo yesu aya mutende,+ pa kuti ku nshita ileisa abana benu bekatila ku bana besu: “Imwe tamubombela Yehova.”’28 E ico twatile, ‘Nomba nga basosa ifi kuli ifwe na ku nkulo shikesa ku ntanshi, na ifwe tukatila: “Moneni icipasho ca ciipailo ca kwa Yehova ico bashifwe bapangile, te ca mituulo ya koca nangu ica malambo iyo, lelo ni nte pa kati ka ifwe na imwe.”’29 Ifwe te kuti tupondokele Yehova ku mufulo no kuleka ukukonka Yehova+ pa kukuula iciipailo ca mituulo ya koca, imituulo ya ngano na malambo ilyo kwaliba ne ciipailo ca kwa Yehova Lesa wesu icaba pa ntanshi ya cikuulwa cakwe ica mushilo!”+

30 Awe ilyo Finehasi+ shimapepo ne ntungulushi sha lukuta+ ne ntungulushi sha makana ya kwa Israele abali nankwe baumfwile amashiwi ayo abana ba kwa Rubene na bana ba kwa Gadi na bana ba kwa Manase balandile, balitemenwe. 31 E lyo nomba Finehasi mwana Eleasari shimapepo asosele ku bana ba kwa Rubene na ku bana ba kwa Gadi na ku bana ba kwa Manase ati: “Lelo twaishiba ukuti Yehova aba mu kati kesu,+ pantu tamupondokele Yehova. Nomba mwapokolola abana ba kwa Israele mu minwe ya kwa Yehova.”+

32 E fyo Finehasi mwana Eleasari shimapepo ne ntungulushi bafumine+ ku bana ba kwa Rubene na ku bana ba kwa Gadi mu calo ca Gileadi no kuya ku calo ca Kanaani ku bana ba kwa Israele abashele no kubashimikila ifyo cali.+ 33 Awe abana ba kwa Israele batemenwe ifyo babashimikile; na bana ba kwa Israele bacindike Lesa,+ kabili tabalandile na kabili ulwa kunina ukuyabalwisha ku konaula icalo umwaikele abana ba kwa Rubene na bana ba kwa Gadi.

34 Kabili abana ba kwa Rubene na bana ba kwa Gadi bainike cilya ciipailo ishina,* pantu “e nte pa kati ka ifwe ukuti Yehova Lesa ni Lesa wa cine.”+

23 Ilyo papitile inshiku ishingi apo Yehova alengeele abena Israele ukutuusha+ ku balwani babo bonse ababashingulwike, lintu Yoshua akotele no kwikala imyaka iingi nga nshi,+ 2 e lyo Yoshua aitile abena Israele bonse,+ abakalamba babo ne ntungulushi shabo na bapingushi babo na bacilolo babo,+ no kubeba ati: “Ine ninkota, ninjikala imyaka iingi. 3 Na imwe mwalimona fyonse ifyo Yehova Lesa wenu acitile ku nko shonse ishi pa mulandu wenu,+ pantu Yehova Lesa wenu e walemulwila.+ 4 Moneni, napendwilile+ imwe inko ishi ishashala ku kuba ubupyani bwa mikowa yenu, ne nko shonse isho naonawile,+ ukufuma ku Yordani ukufika kuli Bemba Mukalamba ku masamba.+ 5 Kabili Yehova Lesa wenu e walebatamfya ukufuma ku cinso cenu,+ kabili alibacimfishe pa mulandu wa imwe, kabili mwapyene icalo cabo, ifyo Yehova Lesa wenu amulaile.+

6 “Kabili mufwile ukukosa+ sana pa kuti mulekonka no kucita fyonse ifyalembwa mwi buuku+ lya mafunde ya kwa Mose pa kukana-alukila ku kulyo nelyo ku kuso,+ 7 pa kukanaingila mu nko ishi,+ ishashala na imwe. Kabili mwilalumbula amashina ya tulesa+ twabo nangu kulapa twena,+ nangu kutubombela nangu kutukontamina.+ 8 Lelo ni kuli Yehova Lesa wenu e ko mulelambatila,+ ifyo mwaacita ukufika na lelo. 9 Kabili Yehova akatamfya pa ntanshi yenu inko ishikalamba kabili isha maka.+ (Lelo imwe, takwaba umuntu nangu umo uwamucimfya ukufika na lelo.)+ 10 Umuntu fye umo pali imwe e ukakonka ulubilo abantu ikana limo (1,000),+ pantu Yehova Lesa wenu e ulemulwila,+ ifyo amulaile.+ 11 Kabili mulebika imitima+ ku kutemwa Yehova Lesa wenu.+

12 “Lelo nga mwapilibuka+ no kulambatila ku bashala mu nko+ ishi, ishashala na imwe, no kuupana nabo+ no kwingila muli bena, na bena muli imwe, 13 mwishibe ukuti Yehova Lesa wenu takatwalilile ukumucimfisha inko ishi;+ kabili shikaba kuli imwe iciteyo kabili ulukose kabili icikoti ca kumuuma mu mbafu+ kabili nge myunga mu menso yenu mpaka mukalobe muli ici calo icisuma ico Yehova Lesa wenu amupeela.+

14 “Kabili, moneni! lelo ndeya ku nshiishi ukuya aba pano isonde bonse,+ kabili namwishiba bwino ne mitima yenu yonse ne myeo yenu yonse ukuti tapali amashiwi nangu yamo pa mashiwi yonse ayasuma ayo Yehova amwebele ayashacitika. Fyonse fyalicitika. Tapali nangu cimo icishacitika.+ 15 Nomba, filya fine Yehova Lesa wenu amucitile amashiwi yonse ayasuma ayo amwebele,+ e fyo Yehova akaleta pali imwe amashiwi yonse ayabipa mpaka akamulofye muli ici calo cisuma ico Yehova Lesa wenu amupeela,+ 16 pa mulandu wa kuti mwapula mu cipangano ca kwa Yehova Lesa wenu ico amwebele, na pa mulandu wa kuti mwaya ku kubombela balesa bambi no kubakontamina.+ No bukali bwa kwa Yehova bukesa pali imwe,+ kabili mukaloba bwangu bwangu muli ici calo icisuma ico amupeela.”+

24 Kabili Yoshua alongenye imikowa yonse iya kwa Israele pa Shekemu+ no kwita abakalamba ba bena Israele+ ne ntungulushi na bakapingula babo na bacilolo babo, kabili baiminine pa ntanshi ya kwa Lesa wa cine.+ 2 Awe Yoshua alandile ku bantu bonse ati: “Yehova Lesa wa kwa Israele atila, ‘Ifikolwe+ fyenu fyaikele kale bushilya bwa Mumana+ wa Yufrate, Tera wishi wa kwa Abrahamu kabili wishi wa kwa Nahore,+ kabili balebombela tulesa tumbi.

3 “‘Lelo ilyo papitile inshita nafumishe icikolwe cenu Abrahamu+ bushilya bwa Mumana+ wa Yufrate no kumuleka endauke monse mu calo ca Kanaani, nafushishe na bana bakwe.+ E ico namupeele Isaki.+ 4 Kabili napeele Yakobo na Esau kuli Isaki.+ Kabili napeele ulupili lwa Seiri kuli Esau;+ kabili Yakobo na bana bakwe baile ku Egupti.+ 5 Kabili natumine Mose na Aarone,+ naumine na Egupti ku fyo nacitile mu kati ka uko;+ kabili pa numa nalimufumishemo.+ 6 Ilyo nalefumya bashinwe mu Egupti+ na lintu mwaishile kuli bemba, e lyo abena Egupti bakonkele+ bashinwe pa maceleta na ba pali bakabalwe ukufika kuli Bemba Wakashika. 7 Na bo batendeke ukulilila kuli Yehova.+ E ico abikile imfifi pa kati ka imwe na bena Egupti+ no kubwesesha bemba pali bena no kubafimba,+ na menso yenu yamwene ifyo nacitile mu Egupti;+ kabili mwaikele inshiku ishingi mu matololo.+

8 “‘Kabili namuletele ku calo ca bena Amore abaleikala bushilya bwa Yordani, na bo balwile na imwe.+ Awe na ine nabapeele mu minwe yenu ukuti mupyane icalo cabo, kabili nalibonawile no kubafumya pa ntanshi yenu.+ 9 E lyo Balaki mwana Sipore,+ imfumu ya Moabu, aimine no kulwa na Israele.+ Awe aitile na Balaamu mwana Beore pa kuti amutiipe.+ 10 Kabili nakeene ukukutika kuli Balaamu.+ E ico apaalile imwe imiku iingi.+ E fyo namupokolwele mu minwe yakwe.+

11 “‘Kabili mwayabwike Yordani+ no kwisa ku Yeriko.+ Na bekashi ba mu Yeriko, abena Amore na bena Perisi na bena Kanaani na bena Hiti na bena Gegashi, abena Hibi na bena Yebusi batendeke ukulwa na imwe; lelo nabapeele mu minwe yenu.+ 12 E ico nasalangenye umwenso ku ntanshi yenu, kabili umwenso e watamfishe ku ntanshi yenu+ ishamfumu shibili isha bena Amore, te lupanga lwenu lwabatamfishe kabili te buta bwenu iyo.+ 13 E ico namupeele icalo ico mushaculile ne misumba iyo mushakuulile,+ kabili mwatendeke ukwikalamo. Kabili mulelya imyangashi ne miolife ifyo mushalimbile.’+

14 “E ico tiineni Yehova+ no kumubombela mu cishinka na mu cine,+ kabili mufumye balesa abo ifikolwe fyenu fyabombele bushilya bwa Mumana na mu Egupti,+ kabili bombeleni Yehova. 15 Nomba nga tamulefwaya ukubombela Yehova, salenipo mwe bene lelo uo mwakulabombela,+ nampo nga ni balesa abo bashinwe abaali bushilya bwa Mumana wa Yufrate balebombela+ nelyo balesa ba bena Amore abene ba calo muleikalamo.+ Lelo ine na ba mu ng’anda yandi twakulabombela Yehova.”+

16 Awe abantu bayaswike abati: “Teti tushe Yehova no kuyabombela balesa bambi. 17 Pantu ni Yehova Lesa wesu e watufumishe pamo na bashifwe mu calo ca Egupti,+ mu ng’anda ya busha,+ kabili e wacitile ifipesha amano filya ifikalamba pa ntanshi yesu+ kabili e waletulinda mu nshila monse umo twaendele na mu bantu bonse abo twapitilemo.+ 18 Na Yehova atamfishe abantu bonse,+ e kutila, abena Amore, abaleikala mu calo no kubafumya pa ntanshi yesu. E ico na ifwe bene twakulabombela Yehova, pantu e Lesa wesu.”+

19 E lyo Yoshua atile ku bantu: “Te kuti mubombele Yehova iyo, pantu ni Lesa wa mushilo;+ ni Lesa uufwaya abantu ukupepa ena fye eka.+ Takamubelele uluse pa kupondoka kwenu na pa membu shenu.+ 20 Nga mwasha Yehova+ kabili mwabombela balesa bambi bambi,+ na o akaaluka no kumuletela ubucushi no kumulofya nangu ca kuti kale alemucitila ifisuma.”+

21 Awe abantu batile kuli Yoshua: “Iyo, ni Yehova e o twakulabombela!”+ 22 Na o Yoshua atile ku bantu: “Mwe bene muli nte+ ukuti namuisalila Yehova, ukuti mwa kulamubombela.”+ Na bo batile: “Tuli nte.”

23 “E ico fumyeni balesa bambi bambi abali mu kati kenu,+ no kwalwila imitima yenu kuli Yehova, Lesa wa kwa Israele.” 24 Na bantu batile kuli Yoshua: “Yehova Lesa wesu e o twakulabombela, no kukutika kwi shiwi lyakwe!”+

25 Kabili Yoshua apangene icipangano na bantu mu bushiku bulya no kubapeela icipope no bupingushi+ mu Shekemu. 26 E lyo Yoshua alembele aya mashiwi mwi buuku lya mafunde ya kwa Lesa,+ abuulile ne libwe ilikalamba+ no kulibika palya mwi samba lya muti ukalamba+ uwaba mupepi ne ncende ya mushilo iya kwa Yehova.

27 Kabili Yoshua akonkenyepo ukusosa ku bantu ati: “Moneni! Ilibwe ili e likaba inte kuli ifwe,+ pantu nalyumfwa amashiwi yonse ayo Yehova alanda kuli ifwe, kabili likaba inte kuli imwe, pa kuti mwikakaana Lesa wenu.” 28 Awe Yoshua aebele abantu ukuti baye, cila muntu ku mpanga yakwe.+

29 Nomba pa numa ya ifi Yoshua mwana Nuni, umubomfi wa kwa Yehova, alifwile ninshi ali ne myaka umwanda umo ne kumi (110).+ 30 Bamushiikile na mu mpanga yakwe mu Timnati-sera,+ iyaba mu calo ca mpili ica kwa Efraimu, ku kapinda ka ku kuso aka Lupili lwa Gaashi. 31 Kabili Israele atwalilile ukubombela Yehova mu nshiku shonse isha kwa Yoshua na mu nshiku shonse isha bakalamba abashele aba mweo ilyo Yoshua+ afwile kabili abaishibe umulimo onse uwa kwa Yehova uo abombeele Israele.+

32 Kabili amafupa ya kwa Yosefe,+ ayo abana ba kwa Israele bafumishe mu Egupti, bayashiikile mu Shekemu mu mpanga iyo Yakobo ashitile ku bana ba kwa Hamore,+ wishi wa kwa Shekemu, mu ndalama umwanda umo (100);+ kabili iyi mpanga yaishileba ya bana ba kwa Yosefe.+

33 Kabili Eleasari mwana Aarone na o alifwile.+ Bamushiikile na mu kapili ka kwa Finehasi umwana wakwe,+ ako amupeele mu calo ca mpili ica kwa Efraimu.