Abapingushi

1 Nomba pa numa ya mfwa+ ya kwa Yoshua, abana ba kwa Israele baipwishe+ kuli Yehova, abati: “Nani pali ifwe akabalilapo ukuya ku bena Kanaani ku kulwa na bo?” 2 E lyo Yehova atile: “Yuda e ukabalilapo.+ Moneni! nkapeela icalo mu minwe yakwe.” 3 Kabili Yuda atile kuli Simeone munyina: “Tuleya bonse mu mpanga iyo bampendwila,+ pa kuti tuyelwa na bena Kanaani, kabili na ine nkaya na iwe mu mpanga bakupendwila.”+ Awe Simeone aile nankwe.+

4 E ico aba mu mukowa wa kwa Yuda balile, Yehova na o apeele abena Kanaani na bena Perisi mu minwe yabo,+ ica kuti bacimfishe abaume amakana ikumi (10,000) mu Beseke. 5 Ilyo basangile Adoni-beseke mu Beseke, balimulwishishe, bacimfya na bena Kanaani+ e lyo na bena Perisi.+ 6 Ilyo Adoni-beseke afulumwike, balimukonkele no kumwikata no kumuputula ifikumo ne fikondo fikalamba. 7 E lyo Adoni-beseke atile: “Kwali ishamfumu amakumi cinelubali (70) ishaputwilwe ifikumo ne fikondo fikalamba ishaletoola ifya kulya mwi samba lye tebulo lyandi. Nga filya fine nacitile, e fyo Lesa na ine ancita.”+ E lyo bamuletele ku Yerusalemu+ na o afwilile kulya kwine.

8 Kabili, abana ba kwa Yuda balwishishe umusumba wa Yerusalemu+ no ku-ucimfya, kabili bakomene aba muli uyu musumba ku lupanga, no koca uyu musumba. 9 E lyo pa numa abana ba kwa Yuda batentemukile ku kulwisha abena Kanaani abaikele mu calo ca mpili na mu Negebu+ na mu Shefela.+ 10 E ico Yuda aile ku kulwisha abena Kanaani abaikele mu Hebrone+ (ishina lya Hebrone kale lyali ni Kiriati-arba),+ kabili baipeye Sheshai na Ahimani na Talmai.+

11 Awe ilyo bafumine kulya, bailelwisha abekashi ba mu Debiri.+ (Nomba ishina lya Debiri kale lyali ni Kiriati-sefere.)+ 12 E lyo Kalebu+ atile: “Onse uwasansa umusumba wa Kiriati-sefere no ku-ucimfya, ine nkamupeela Aksa+ umwana wandi umwanakashi ukuba umukashi wakwe.”+ 13 Awe Oteniele+ mwana Kenasi,+ umwaice+ wa kwa Kalebu, aliucimfishe. E ico amupeele Aksa umwana wakwe umwanakashi ukuba umukashi wakwe.+ 14 Nomba ilyo aleya ku ng’anda, Aksa aikalile fye ukupamfya Oteniele pa kuti alombe impanga kuli Kalebu wishi. E lyo Aksa atootele ilyo ali pa mpunda.+ Kabili Kalebu amwipwishe ati: “Cinshi ulefwaya?” 15 E lyo amwaswike ati: “Mpaaleni,+ pantu mwampeela fye impanga ya ku kapinda ka ku kulyo, nomba ndefwaya mumpeele na Gulote-maimu.” Awe Kalebu amupeele Gulote+ wa pa muulu na Gulote wa mwi samba.

16 Kabili abana ba mwina Keni,+ shifyala Mose,+ bafumine mu musumba wa tuncindu+ pamo na bana ba kwa Yuda no kuya ku matololo ya kwa Yuda, ayabela ku kapinda ka ku kulyo aka Aradi.+ Awe baile kulya no kutendeka ukwikala na balya bantu.+ 17 Lelo Yuda aile na Simeone munyina, kabili baipeye abena Kanaani abaikele mu musumba wa Sefati no kuonaula.+ E co bainikile ulya musumba ati Horma.+ 18 Pa numa Yuda apokele Gasa+ ne mpanga ya uko na Ashkelone+ ne mpanga ya uko na Ekrone+ ne mpanga ya uko. 19 Awe Yehova atwalilile ukuba na Yuda, ica kuti apokele icalo ca mpili, lelo tatamfishemo abekashi ba mu mpanga iyabatama, pantu bakwete amaceleta+ ya fyela.+ 20 Ilyo bapeele Kalebu icalo ca Hebrone, nge fyo Mose alaile,+ atamfishemo abana batatu aba kwa Anaki.+

21 Kabili abana ba kwa Benjamini tabatamfishe abena Yebusi abaikele mu Yerusalemu;+ lelo abena Yebusi baikala na bana ba kwa Benjamini mu Yerusalemu ukufika na lelo.+

22 Awe aba mu ng’anda ya kwa Yosefe+ na bo baile ku kulwisha Betele,+ na Yehova ali na bo.+ 23 Na ba mu ng’anda ya kwa Yosefe balengwile+ Betele (kabili ishina lya uyu musumba kale lyali ni Lusi),+ 24 kabili inengu shamwene umuntu alefuma mu musumba. E ico shamwebele ati: “Shi tulange inshila ya kwingilila mu musumba, kabili tukakubelela uluse.”+ 25 Awe uyu muntu abalangile inshila ya kwingilila mu musumba; kabili baipeye aba mu musumba ku lupanga,+ lelo uyu muntu no lupwa lwakwe lonse balibalekele baya.+ 26 Kabili uyu mwaume aile ku calo ca bena Hiti+ no kukuula umusumba no kwinika ishina lya uko Lusi. Ili e shina lya uko ukufika na lelo.

27 Kabili Manase+ alifililwe ukupoka Bete-sheani+ ne mishi ya uko na Taanaki+ ne mishi ya uko na bekashi ba mu Dore+ ne mishi ya uko na bekashi ba mu Ibleamu+ ne mishi ya uko na bekashi ba mu Megido+ ne mishi ya uko, e ico abena Kanaani bakakatile fye muli cilya calo.+ 28 Nomba ilyo abena Israele bakosele,+ bapeele abena Kanaani umulimo wa kupatikishiwa,+ kabili tababatamfishemo bonse.+

29 Abena Efraimu na bo balifililwe ukutamfya abena Kanaani abaikele mu Gesere, lelo abena Kanaani balitwalilile ukulaikala na bena Efraimu mu Gesere.+

30 Sebuluni+ alifililwe ukutamfya abekashi ba mu Kitrone na bekashi ba mu Nahalole,+ lelo abena Kanaani balitwalilile ukulaikala na bena Sebuluni+ kabili balebomba umulimo wa kupatikishiwa.+

31 Ashere+ alifililwe ukutamfya abekashi ba mu Ako na bekashi ba mu Sidone+ na mu Alabu na mu Aksibu+ na mu Helba na mu Afiki+ na mu Rehobu.+ 32 Kabili abena Ashere batwalilile ukwikala na bena Kanaani abaikele mu calo, pantu balifililwe ukubatamfyamo.+

33 Naftali+ alifililwe ukutamfya abekashi ba mu Bete-shemeshe na bekashi ba mu Bet-anati,+ lelo balitwalilile ukulaikala na bena Kanaani abaikele mu calo;+ kabili abekashi ba mu Bete-shemeshe na ba mu Bet-anati basangwike aba kubabombela umulimo wa kupatikishiwa.+

34 Kabili abena Amore baletamfisha abana ba kwa Dani+ mu mpili, pantu tabalefwaya ukuti bese mu kwikala mu mpanga iyabatama.+ 35 E ico, abena Amore balikene ukufuma mu Lupili lwa Herese na mu Ayalone+ na mu Shaalibimu.+ Lelo aba mu ng’anda ya kwa Yosefe balikwete amaka nga nshi ica kuti babapatikishe ukulabomba umulimo wakosa.+ 36 Kabili umupaka wa bena Amore watampile pa nshila iyaninika ukuya ku Akrabimu,+ ukufuma ku Sela no kuya pa muulu.

2 Kabili malaika+ wa kwa Yehova afumine ku Gilgali+ no kuya ku Bokimu+ no kutila: “Namufumishe mu Egupti no kumuleta mu calo ico nalapile ku fikolwe fyenu.+ Kabili, natile, ‘Nshakatobe icipangano candi na imwe.+ 2 Na imwe, mwikapangana na bekashi ba muli cino calo.+ Kabili mukabongolole ifiipailo fyabo.’+ Lelo imwe tamwaumfwa kwi shiwi lyandi.+ Cinshi mwacitila ifi?+ 3 E ico na ine ndeti, ‘Nshakabatamfye ku ntanshi yenu,+ kabili bakaba iciteyo cenu, na balesa babo bakaba iciteyo kuli imwe.’”+

4 Nomba ilyo fye malaika wa kwa Yehova alandile aya mashiwi ku bana ba kwa Israele bonse, abantu batendeke ukupunda no kulila.+ 5 E co bainikile ilya ncende ati Bokimu. Kabili kulya e ko bapeelele ilambo kuli Yehova.

6 Ilyo Yoshua asalangenye abantu, abana ba kwa Israele baile cila muntu ku ncende yakwe, ku kuyaikala mu calo.+ 7 Kabili abantu balebombela Yehova inshiku shonse isha kwa Yoshua ne nshiku shonse isha bakalamba abaliko pa numa ya mfwa ya kwa Yoshua kabili abamwene imilimo yonse iikalamba iya kwa Yehova iyo acitiile abena Israele.+ 8 E lyo Yoshua mwana Nuni, umubomfi wa kwa Yehova, afwile ninshi ali ne myaka umwanda umo ne kumi (110).+ 9 E ico bamushiikile mu mpanga yakwe mu Timnati-herese+ mu calo ca mpili ica kwa Efraimu, ku kapinda ka ku kuso aka Lupili lwa Gaashi.+ 10 Kabili bonse aba muli ilya nkulo bafwile nge fyafwile bashibo,+ kabili kwaishile inkulo imbi iishaishibe Yehova nelyo imilimo iyo acitiile Israele.+

11 Kabili abana ba kwa Israele batendeke ukucita ifyabipa mu menso ya kwa Yehova+ no kulabombela baBaali.+ 12 E ico bapondokele Yehova Lesa wa bashibo uwabafumishe mu calo ca Egupti+ no kulakonka balesa bambi aba bantu babashingulwike+ kabili batendeke ukubakontamina, ica kuti bakalifye Yehova.+ 13 Awe bashile Yehova no kutendeka ukubombela Baali na baAstarte.+ 14 E ico ubukali bwa kwa Yehova bwaishile pa bena Israele,+ ica kuti abapeele* mu minwe ya balesansa, na bo batendeke ukubapoka ifipe;+ kabili abapeele mu minwe ya balwani babo ababashingulwike,+ kabili bafililwe ukucimfya abalwani babo.+ 15 Konse uko baya, ukuboko kwa kwa Yehova kwalebalwisha pa kuti bacule,+ nge fyo Yehova alandile kabili nge fyo Yehova alapile kuli bena;+ kabili baliculile nga nshi.+ 16 E ico Yehova alebemisha abapingushi,+ kabili balebapususha mu minwe ya balebasansa.+

17 Awe tabaumfwile na ku bapingushi babo bene, lelo bacitile bucilende+ na balesa+ bambi kabili balebakontamina. Bapaaswike bwangu bwangu ukufuma mu nshila ifikolwe fyabo fyaendelemo iya kumfwila amafunde ya kwa Yehova.+ Bena tabacitile fyo iyo. 18 Kabili ilyo Yehova abemiishe abapingushi,+ Yehova aleba no yo mupingushi, kabili abalubwile mu minwe ya balwani babo inshiku shonse isha mupingushi uyo; pantu Yehova alelanguluka+ pa kuteta kwabo pa mulandu wa balebatitikisha+ na balebacusha.

19 Nomba ilyo umupingushi afwa balealuka no kucita ifyabipisha ukucila ifyalecita bashibo pa kukonka balesa bambi ku kubabombela no kubakontamina.+ Tabalekele imicitile yabo ne mibele yabo iya bucintomfwa.+ 20 Awe ubukali bwa kwa Yehova bwasukile bwaisa+ pa bena Israele kabili atile: “Apo ulu luko lwapula mu cipangano+ candi ico naebele ifikolwe fyabo kabili talumfwa kwi shiwi lyandi,+ 21 na ine, nshakatamfye na kabili pa ntanshi yabo uluko nangu lumo pa nko isho Yoshua ashile ilyo afwile,+ 22 ku kwesha+ Israele kuli shena, nampo nga bakakonka inshila ya kwa Yehova pa kwenda muli yena nge fyo bashibo bakonkele, nelyo iyo.” 23 E ico Yehova alekele ishi nko ukwikala mu calo pa kukanashitamfyamo bwangu,+ kabili tashipeele mu minwe ya kwa Yoshua.

3 Nomba ishi e nko+ isho Yehova alekele ukuti shishale pa kuti esesheko+ abena Israele, e kutila, bonse abashasangilweko ku nkondo shonse isha mu Kanaani;+ 2 pa kuti fye inkulo sha bana ba kwa Israele shishibe, pa kuti basambilile ifya kulwa inkondo, e kutila, balya fye abashaishibe ukulwa inkondo: 3 Bakateka basano+ aba baPelishiti,+ na bena Kanaani+ bonse, pamo na bena Sidone+ na bena Hibi+ abaikele mu Lupili lwa Lebanone+ ukufuma ku Lupili lwa Baali-hermone+ ukufika na apa kwingilila mu Hamati.+ 4 Kabili bali ba kweseshako+ abena Israele ukwishiba nga bali no kuumfwila amafunde ya kwa Yehova ayo aebele bashibo muli Mose.+ 5 Kabili abana ba kwa Israele baikele na bena Kanaani,+ abena Hiti na bena Amore na bena Perisi na bena Hibi na bena Yebusi.+ 6 Kabili baupile abana abanakashi ba aba bantu,+ na bana babo abanakashi baufishe ku bana abaume ba aba bantu,+ kabili batendeke ukubombela balesa babo.+

7 E ico abana ba kwa Israele bacitile ifyabipa mu menso ya kwa Yehova, kabili balabile Yehova Lesa wabo+ no kupepa baBaali+ ne fimuti ifyaimikwa.+ 8 E ico ubukali bwa kwa Yehova bwaishile pa bena Israele,+ ica kuti abapeele*+ mu minwe ya kwa Kushani-rishataimu imfumu ya ku Mesopotamia;+ kabili abana ba kwa Israele balebombela Kushani-rishataimu imyaka cinekonsekonse (8). 9 E lyo abana ba kwa Israele batendeke ukulilila kuli Yehova.+ Kabili Yehova aimiishe abana ba kwa Israele umupusushi+ uwa kuti abapusushe, e kuti Oteniele+ mwana Kenasi,+ umwaice wa kwa Kalebu.+ 10 Umupashi+ wa kwa Yehova nomba waishile pali ena, kabili atendeke ukupingula Israele. Ilyo aile ku kulwa inkondo, e lyo Yehova apeele Kushani-rishataimu imfumu ya Siria mu minwe yakwe ica kuti acimfishe+ Kushani-rishataimu. 11 Na pa numa ya ifi mu calo mwali tondolo pa myaka amakumi yane (40). Umuye nshiku Oteniele mwana Kenasi alifwile.

12 Awe na kabili abana ba kwa Israele bacitile ifyabipa mu menso ya kwa Yehova.+ E ico Yehova alekele Egelone imfumu ya ku Moabu+ ukukosa ukucila abana ba kwa Israele,+ pantu bacitile ifyabipa mu menso ya kwa Yehova.+ 13 Kabili, abalonganikiile abana ba kwa Amone+ na bana ba kwa Amaleke+ pa kuti babalwishe. Kabili balile no kusansa abena Israele no kupoka umusumba wa tuncindu.+ 14 Awe abana ba kwa Israele babombeele Egelone imfumu ya ku Moabu pa myaka ikumi na cinekonsekonse (18).+ 15 Kabili abana ba kwa Israele balilile kuli Yehova.+ E ico Yehova abemiishe umupusushi, Ehudi+ mwana Gera, umwina Benjamini,+ umwaume walebomfya ukuboko kwa ku kuso.+ Umuye nshiku abana ba kwa Israele batumine umutuulo kuli Egelone imfumu ya ku Moabu ukupitila muli Ehudi. 16 Nomba Ehudi afulile ulupanga, kabili lwali ulwatwa konse konse,+ ulwalepele umukono umo. Kabili alukakile mu ca kufwala cakwe pe tanta+ lya ku kulyo. 17 Awe apeele umutuulo kuli Egelone imfumu ya Moabu.+ Nomba Egelone ali uwaina nga nshi.

18 Nomba ilyo apwishishe ukupeela umutuulo,+ ilyo line fye aebele abantu ukuya, e kuti abasendele umutuulo. 19 Awe ena abwelulukile apo baleimba amabwe mu Gilgali,+ no kuyaeba imfumu ati: “Ndefwaya ukumwebako ilyashi lya nkama, mwe mfumu.” Na yo yatile: “Talaleni!” E lyo bonse abaiminine mupepi na yo bafuminepo.+ 20 Awe Ehudi aishile kuli yena ilyo yaikele mu muputule wa iko uwa pa muulu umwatalala. E lyo Ehudi atile: “Nimukwatila amashiwi ayafumine kuli Lesa.” Awe yalimine pa cipuna ca iko ica bufumu. 21 E lyo Ehudi apishishe ukuboko kwakwe ukwa ku kuso no kubuula ulupanga pe tanta lyakwe ilya ku kulyo no kupusha mwi fumo lya iko. 22 Ne citubo calingile ukukonka icilimi ica kuti amafuta yafimbile pa cilimi, pantu tafumishe ulupanga mwi fumo lya iko, kabili mwalafuma no busali. 23 Awe Ehudi afumiine pa windo, lelo ifiibi fya muputule wa pa muulu fyena ashile aisala no kufikoma. 24 Kabili e fyo afumine.+

Nomba ababomfi ba mfumu balishile no kulolesha, kabili bamwene ukuti ifiibi fya mu muputule wa pa muulu fyalikomenwe. E ico batile: “Ilepemwina fye mu nda,+ mu cimbusu mu muputule wa mu kati umuli umwela watalala.” 25 Awe balelolela basuka baiseka, kabili moneni! takwali uwaleisula ifiibi fya muputule wa pa muulu. E lyo babuulile amakii no kufiisula, kabili, moneni! shikulwibo nawa pa nshi, nafwa!

26 Ehudi ena, afyukile ilyo balewayawaya, kabili apitile apo baleimba amabwe+ no kufulumukila ku Seira. 27 Kabili ilyo afikile kulya atendeke ukulisha ipenga+ mu calo ca mpili ica Efraimu;+ na bana ba kwa Israele baile nankwe ukufuma mu calo ca mpili, na o ali pa ntanshi yabo. 28 E lyo abebele ati: “Nkonkeni,+ pantu Yehova napeela abalwani benu, abena Moabu, mu minwe yenu.”+ Awe balimukonkele no kupoka ifyabu+ fya Yordani pa kuti balwishe bwino abena Moabu, kabili tabasuminishe nangu umo ukwabuka. 29 Kabili ilya nshita bacimfishe abena Moabu, nalimo abaume amakana ikumi (10,000),+ bonse abakosa+ kabili bonse aba maka; kabili takwali uwapuswike.+ 30 Kabili abena Moabu balicimfiwe pali bulya bushiku ku bena Israele; kabili icalo cali tondolo pa myaka amakumi cinekonsekonse (80).+

31 Kabili pa numa yakwe kwali Shamigari+ mwana Anati, kabili na o alicimfishe abaPelishiti,+ abaume imyanda mutanda (600), ku ca kusonkwelako ing’ombe; kabili na o alilubwile abena Israele.+

4 Awe abana ba kwa Israele na kabili batendeke ukucita ifyabipa mu menso ya kwa Yehova pantu nomba Ehudi alifwile.+ 2 E ico Yehova abapeele*+ mu minwe ya kwa Yabini imfumu ya ku Kanaani, uwaleteka mu Hasore;+ kabili umukalamba wa bashilika bakwe ali ni Sisera,+ kabili aleikala mu Haroshete+ ya nko. 3 Kabili abana ba kwa Israele baliliile kuli Yehova,+ pantu Yabini akwete amaceleta ya fyela ifyatwa imyanda pabula (900),+ kabili acushishe nga nshi abana ba kwa Israele+ pa myaka amakumi yabili (20).

4 Nomba, Debora, kasesema mwanakashi,+ umukashi wa kwa Lapidote, e walepingula abena Israele ilya nshita. 5 Kabili aleikala mwi samba lya kancindu kakwe pa kati ka Rama+ na Betele+ mu calo ca mpili ica Efraimu; na bana ba kwa Israele baleya kuli ena pa kuti abapingule. 6 Kabili atumine aba kwita Baraki+ mwana Abinoamu ku Kedeshe-naftali+ no kumweba ati: “Yehova Lesa wa kwa Israele nasosa ati: ‘Kabiye no kusalanganya abashilika pa lupili lwa Tabore,+ kabili usende abaume amakana ikumi (10,000) aba kuya na iwe, ubafumye mu bana ba kwa Naftali+ na mu bana ba kwa Sebuluni.+ 7 Kabili nkakuletela+ Sisera+ umukalamba wa bashilika ba kwa Yabini+ na maceleta yakwe na bali nankwe pa mumana wa Kishone,+ kabili nkamupeela mu minwe yobe.’”+

8 Na o Baraki amwebele ati: “Nga ukaya na ine, ninshi nkaya; lelo nga tawakaye na ine, nshakaye.” 9 Awe Debora atile: “Ukuya tukaya na iwe. Lelo, te iwe bakacindika, pantu ni mu minwe ya mwanakashi+ e mo Yehova akapeela Sisera.” E lyo Debora aimine no kuya na Baraki ku Kedeshe.+ 10 Kabili Baraki alonganike abena Sebuluni+ na bena Naftali pamo ku Kedeshe, kabili abaume amakana ikumi (10,000) baliile kabili balimukonkele;+ na Debora aile nankwe.

11 Nomba Heberi+ umwina Keni alipaatukene na bena Keni,+ abana ba kwa Hobabu, shifyala Mose,+ kabili ashimpile itenti lyakwe mupepi no muti ukalamba mu Saananimu, uwaba mu Kedeshe.

12 E lyo bashimikile Sisera ukuti Baraki mwana Abinoamu+ alininine ukuya ku Lupili lwa Tabore.+ 13 Ilyo line fye Sisera alonganike amaceleta yakwe yonse, amaceleta ya fyela fyatwa imyanda pabula (900),+ na bantu bonse abali nankwe, ukufuma mu Haroshete ya nko, ukufika na ku mumana wa Kishone.+ 14 Debora nomba aebele Baraki ati: “Ima, pantu buno e bushiku Yehova alepeela Sisera mu minwe yobe. Bushe te Yehova ali pa ntanshi yobe?”+ Awe Baraki atentemwike Ulupili lwa Tabore pamo na baume amakana ikumi (10,000). 15 Kabili Yehova afulungenye+ Sisera na maceleta yakwe yonse na bashilika bonse no kuleka Baraki na bashilika bakwe babepaye ku lupanga. Sisera asukile aika pe celeta lyakwe no kufulumuka na makasa. 16 Awe Baraki akonkele+ amaceleta ya nkondo+ na bashilika ukufika na ku Haroshete ya nko, ica kuti abashilika bonse aba kwa Sisera balifwile ku lupanga. Tapashele nangu umo.+

17 Sisera+ ena, afulumwike na makasa no kuya kwi tenti lya kwa Yaele+ umukashi wa kwa Heberi umwina Keni,+ pantu pali umutende pali Yabini imfumu ya Hasore+ na pa ba mu ng’anda ya kwa Heberi umwina Keni. 18 E lyo Yaele afumine ku kukumanya Sisera no kutila kuli ena: “Iseni kuno, mwe shikulu, iseni kuno kuli ine. Mwitiina.” Awe na o aile kuli ena mwi tenti. E lyo amufimbile ica kufimbana. 19 E lyo amwebele ati: “Shi mpeelako utumenshi twa kunwa, pantu ndi ne cilaka.” Na o aiswile inyambi+ ya mukaka no kumupeela pa kuti anwe,+ e lyo amufimbile. 20 Kabili Sisera amwebele ati: “Iminina pa mwinshi we tenti, kabili nga kwaisa umuntu kabili akwipusha ati, ‘Bushe pali umuntu pano?’ utile, ‘Iyo!’”

21 Awe Yaele umukashi wa kwa Heberi abuulile ulupoopo lwe tenti no kwikata sando. Kabili aile kuli ena alebendelela no kushimpa ulupoopo mu nsensematwi+ shakwe no kupampaminapo lwafika na pa nshi, ninshi napona mu tulo pantu alinakile sana. E fyo afwile.+

22 Kabili, moneni! Baraki aisa alekonka Sisera. Yaele nomba aishile ku kumukumanya no kutila: “Iseni kabili nalamulanga uo mulefwaya.” E ico aingile mu mwakwe, kabili, moneni! Sisera nalala pa nshi nafwa, no lupoopo mu nsensematwi shakwe.

23 E fyo Lesa acimfishe+ Yabini imfumu ya Kanaani pa menso ya bana ba kwa Israele bulya bushiku. 24 Kabili ukuboko kwa bana ba kwa Israele kwalekoselako ukucila Yabini imfumu ya Kanaani,+ mpaka baipaya Yabini imfumu+ ya Kanaani.

6 E lyo abana ba kwa Israele batendeke ukucita ifyabipa mu menso ya kwa Yehova.+ E ico Yehova abapeele mu minwe ya bena Midiani+ pa myaka cinelubali (7). 2 Kabili Midiani acimfishe Israele.+ Pa mulandu wa bena Midiani abana ba kwa Israele baipangiile amatala ya pa nshi ayali mu mpili, ne ncengo ne ncende ishayafishe ukufikako.+ 3 Nomba, abena Israele nga babyala imbuto,+ abena Midiani na bana Amaleke+ na bena Kabanga+ baleya ku kubalwisha. 4 Kabili balepanga inkambi pali bena no konaula ifisabo fya mu calo ukufika na ku Gasa, kabili tabalesha ifya kulya nangu fimo nelyo ni mpaanga nelyo ni ng’ombe nelyo ni mpunda mu Israele.+ 5 Pantu bena ne fitekwa fyabo baleya, basenda na matenti yabo. Baleisa abengi nga makanta,+ kabili bena ne ngamila shabo bali iminshipendwa;+ kabili ico baleishila mu calo ni mu kuconaula.+ 6 Awe abena Israele baliculile nga nshi pa mulandu wa bena Midiani; kabili abana ba kwa Israele batendeke ukulilila kuli Yehova.+

7 Nomba ico abana ba kwa Israele balelilila kuli Yehova pa mulandu wa kwa Midiani,+ 8 Yehova atumine umwaume, kasesema,+ ku bana ba kwa Israele no kubeba ati: “E fyo Yehova Lesa wa kwa Israele atila, ‘Nine namufumishe mu Egupti+ no kumufumya mu ng’anda ya busha.+ 9 E ico namulubwile mu minwe ya bena Egupti na mu minwe ya balya bonse abalemucusha no kubatamfya ku ntanshi yenu no kumupeela icalo cabo.+ 10 Kabili, namwebele ukuti: “Ine, nine Yehova Lesa wenu.+ Mwilatiina balesa ba bena Amore+ abene ba calo muleikalamo.”+ Lelo tamwaumfwile kwi shiwi lyandi.’”+

11 Pa numa, malaika wa kwa Yehova alishile+ no kwikala mwi samba lya muti ukalamba uwali mu Ofra, uwali wa kwa Yoashi umwina Abiesere,+ ninshi Gideone+ umwana wakwe alepuula ingano umwa kukamine myangashi pa kuti ashifumye bwangu bwangu pa kuti abena Midiani beshimona. 12 Kabili malaika wa kwa Yehova amoneke kuli ena no kumweba ati: “Yehova ali na iwe,+ we mpalume.” 13 E lyo Gideone amwebele ati: “Iye, mwe shikulu, lelo nga Yehova ali na ifwe, mulandu nshi ifi fyonse fyatuponena,+ kabili ifipesha amano fyakwe fyonse fili kwi+ ifyo ifikolwe fyesu fyatushimikile,+ afiti, ‘Bushe te mu Egupti umo Yehova atufumishe?’+ Nomba Yehova natulekelesha,+ kabili atupeela mu minwe ya bena Midiani.” 14 Awe Yehova alimuloleshe no kutila: “Kabiye na maka yobe,+ kabili ukapususha Israele mu minwe ya bena Midiani.+ Pantu nine nkutumine.”+ 15 Na o amwebele ati: “Iye, mwe Yehova. Bushe cinshi nkapusushishako Israele?+ Moneni! Ulupwa* lwandi e lwacepesha mu mukowa wa kwa Manase, kabili nine nacepesha mu ng’anda ya kwa tata.”+ 16 Lelo Yehova amwebele ati: “Pantu nkaba na iwe,+ kabili ukucimfya ukacimfya Midiani+ kwati muntu fye umo.”

17 E lyo amwebele ati: “Nga nine mwasala ukuti mombe uyu mulimo,+ munange icishibilo ukuti ni mwe mulelanda na ine.+ 18 Shi mwisela pano mpaka njise kuli imwe+ no kufumya ubupe bwandi no kububika pa ntanshi yenu.”+ Na o atile: “Nalaikala pano pene mpaka ubwele.” 19 Awe Gideone alingiile no kupekanya umwana wa mbushi+ no kubuula itepe* lya buunga apangamo imikate ishatutumuka.+ Inama abikile mu museke, no muto abikile mu mpoto, e lyo amutwalile mwi samba lya muti ukalamba, no kumupekanishisha.

20 Malaika wa kwa Lesa wa cine nomba amwebele ati: “Senda inama no mukate ushatutumuka no kufibika pa cilibwe icikalamba palya,+ kabili witilepo no muto.” Awe acitile ifyo fine. 21 E lyo malaika wa kwa Yehova atambike inkonto yali mu minwe yakwe no kukumya inama ne mikate ishatutumuka, kabili umulilo waimine ukufuma mu cilibwe no koca inama ne mikate ishatutumuka.+ Na po pene malaika wa kwa Yehova, alilubile. 22 E lyo Gideone ailwike ukuti ali ni malaika wa kwa Yehova.+

E lyo Gideone atile: “Iye, mwe Shikulu Mulopwe Yehova, pantu natumonana na malaika wa kwa Yehova pa menso!”+ 23 Lelo Yehova amwebele ati: “Umutende ube na iwe.+ Witiina.+ Tawafwe iyo.”+ 24 E ico Gideone akuuliile Yehova iciipailo+ kulya, kabili ciitwa+ ati Yehova-shalomu ukufika na lelo. Caba mu Ofra+ wa bena Abiesere.

25 Kabili lilya line ubushiku Yehova amwebele ati: “Senda ing’ombe iilume iinono, ing’ombe ya kwa wiso, e kuti, ing’ombe iyalenga bubili iya myaka cinelubali (7), kabili ubongolole iciipailo ca kwa Baali+ ica kwa wiso, no kuputula icimuti caimikwa icili mupepi ne ci ciipailo.+ 26 Kabili ukuule iciipailo kuli Yehova Lesa obe pa muulu wa ici cilibwe, utantike bwino bwino amabwe pa kucikuula, kabili usende ing’ombe iilume iinono iya bubili no kuipeela ilambo pa nkuni sha cimuti caimikwa ico uleputula.” 27 Awe Gideone asendele abantu ikumi (10) pa babomfi bakwe no kubomba ukulingana na fyonse ifyo Yehova amwebele;+ nomba, tacitile ifi akasuba, pantu aletiina nga nshi aba mu ng’anda ya kwa wishi na baume ba mu musumba, e ico acitile ifi ubushiku.+

28 Ilyo abaume ba mu musumba bashibwike ulucelocelo nga pe, moneni! iciipailo ca kwa Baali calibongolweke ne cimuti caimikwa+ icali mupepi ne ciipailo caliputwilwe, kabili ing’ombe iilume iinono iya bubili e yo bapeele ilambo pa ciipailo icakuulilwe. 29 E lyo batendeke ukwipushanya abati: “Nani acitile ici cintu?” Awe baile baleipusha no kufwailisha. Basukile batila: “Ni Gideone mwana Yoashi e ucitile ici cintu.” 30 E lyo abaume ba mu musumba batile kuli Yoashi: “Fumya umwana obe pa nse pa kuti afwe,+ pantu nabongolola iciipailo ca kwa Baali, kabili pantu naputula icimuti caimikwa icali mupepi ne ciipailo.” 31 E lyo Yoashi+ aebele bonse abamwimiine+ ati: “Bushe ni mwe mulepokolola Baali ukumona nga kuti mwamupususha? Onse uulemupokolola alaipaiwa luno lucelo.+ Baali nga ni Lesa,+ mulekeni aipokolole umwine,+ pantu umuntu nabongolola iciipailo cakwe.” 32 Kabili uyu muntu amwinike ati Yerubaali+ bulya bwine ubushiku, pantu atile: “Lekeni Baali aipokolole umwine, pantu umuntu nabongolola iciipailo cakwe.”+

33 Kabili abena Midiani+ bonse na bena Amaleke+ na ba ku Kabanga+ balilongene pamo+ no kwabuka no kupanga inkambi mu mpanga iyabatama iya Yesreele.+ 34 Awe umupashi+ wa kwa Yehova wawilile pali Gideone ica kuti alishishe intandala,+ na bena Abiesere+ balongene pamo ku kumukonka. 35 Kabili atumine inkombe+ ku bena Manase bonse, kabili na bo balitilwe bonse ku kumukonka. Atumine ne nkombe monse mu Ashere na Sebuluni na Naftali, kabili shaile mu kumukumanya.

36 E lyo Gideone atile kuli Lesa wa cine: “Nga mulepusushisha Israele muli ine, nge fyo mwalaya,+ 37 moneni ndebika amasako ya mpaanga apa kupumina ingano. Umume nga waikala fye ku masako yeka e lyo pa mushili pashala apauma, e lyo nalaishiba ukuti mukapusushisha Israele muli ine, nge fyo mwalaya.” 38 Kabili filya fine e fyacitike. Ilyo ashibwike ulucelo lwakonkelepo no kukama amasako, akamineko amenshi ayengesula mu mbale yafonka iikalamba. 39 Lelo, Gideone atile kuli Lesa wa cine: “Shi mwipuuka mu bukali pali ine, lelo lekeni nande na kabili umuku fye umo. Shi lekeni njeshe umuku fye na umbi na masako ya mpaanga. Shi lekeni amasako ya mpaanga yeka yome, na pa mushili ponse pabe umume.” 40 E ico Lesa acitile filya fine pali bulya bwine bushiku; na masako ya mpaanga yalyumine yeka, na pa mushili ponse pali umume.

7 Kabili Yerubaali,+ e kuti, Gideone,+ na bantu bonse abo ali na bo, baimine lucelocelo no kuyapanga inkambi pa cishima ca Harode; e lyo inkambi ya bena Midiani yena yali ku kapinda ka ku kuso kwa kwa Gideone, pa kapili ka More, mu mpanga iyabatama. 2 E lyo Yehova atile kuli Gideone: “Abantu abali nobe bafulisha aba kuti mpeele Midiani mu minwe yabo.+ Nalimo Israele kuti aitakisha+ kuli ine, no kutila, ‘Ukuboko kwandi e kwampuswishe.’+ 3 E ico nomba bila mu matwi ya bantu bonse auti, ‘Nani uuletiina kabili uuletutuma? Aleya.’”+ Awe Gideone alibeseshe. Awe balibwelelemo abantu amakana amakumi yabili na babili (22,000), kabili kwashele amakana ikumi limo (10,000).

4 Na lyo line Yehova atile kuli Gideone: “Abantu bacili nabafula.+ Batwale ku menshi uleke mbeshe kulya kwine. Kabili umuntu onse uo nakweba ati, ‘Uyu uleya nankwe,’ e o ukaya nankwe, lelo umuntu onse uo nakweba ati, ‘Uyu tawaye nankwe,’ e ushakaye.” 5 E ico atwele abantu ku menshi.+

E lyo Yehova atile kuli Gideone: “Onse uulekabaula amenshi ku lulimi lwakwe filya imbwa ikabaula, umubike eka, na onse uulefukama pa kunwa na o abe eka.”+ 6 Kabili abalekabaula mu lupi pa kunwa bali abaume imyanda itatu (300). Lelo abantu bonse abashala, balifukeme pa kunwa amenshi.

7 E lyo Yehova atile kuli Gideone: “Kuli aba bantu imyanda itatu (300) abacikabaula amenshi e ko nkamupusushisha, kabili nkapeela Midiani mu minwe yobe.+ Kumfwa aba bambi bonse, baleke babwelelemo umuntu onse ku mwakwe.” 8 E ico babuulile ifya kulya fya bantu mu minwe yabo, na mapenga yabo,+ na baume bonse aba mu Israele abalekele babwelelemo umuntu onse ku mwakwe; kabili ashele na baume imyanda itatu (300). Inkambi ya bena Midiani yena, yali mwi samba mu mpanga iyabatama.+

9 Nomba bulya bwine ubushiku+ Yehova amwebele ati: “Ima, kabiye ku nkambi, pantu ninjipeela mu minwe yobe.+ 10 Lelo, nga uletiina ukuyako, kabiye ku nkambi, uye na Pura umubomfi obe.+ 11 Kabili uyeumfwa ifyo balesosa,+ e lyo pa numa amaboko yobe yalakosa,+ kabili walayasansa inkambi.” Awe ena na Pura umubomfi wakwe baile ku mpela ya baipekenye ukulwa abali mu nkambi.

12 Nomba abena Midiani na bena Amaleke na bonse abena Kabanga+ abali abengi nga makanta,+ basendeme mu mpanga iyabatama; kabili ingamila+ shabo shali iminshipendwa, ishingi ngo mucanga wa pa lulamba lwa bemba. 13 Awe Gideone aliileko, kabili, moneni! kwali umuntu uwaleshimikila umunankwe iciloto, kabili atile: “Umfwa ifyo ndotele.+ Awe, mona! kwaciba umukate wabulungana uwa barle ulekunkulukila mu nkambi ya bena Midiani. Kabili wacifika kwi tenti no kulipuma ica kuti lyawa,+ kabili wacilipilibula, ne tenti lyabongoloka.” 14 E lyo umunankwe amwaswike+ no kutila: “Ici te cimbi iyo, lelo lupanga lwa kwa Gideone+ mwana Yoashi, umwaume wa mu Israele. Lesa+ wa cine napeela Midiani ne nkambi yonse mu minwe yakwe.”+

15 Awe Gideone ashumfwa fye iciloto no kulondololwa kwa ciko,+ atendeke ukupepa.+ E lyo abwelele ku nkambi ya bena Israele no kutila: “Imeni,+ pantu Yehova napeela inkambi ya bena Midiani mu minwe yenu.” 16 Kabili ayakenye abaume imyanda itatu (300) mu mabumba yatatu no kubapeela bonse amapenga+ ne mitondo ikalamba umushali fintu, kabili mu kati ka mitondo mwali ifyenge. 17 E lyo abebele ati: “Musambilile pa kumona ifyo ndecita, na imwe e fyo mucite. Kabili ilyo nafika ku mpela ya nkambi, filya fine ndecita, e fyo na imwe mucite. 18 Ilyo nalalisha ipenga, ine pamo na bonse abo ndi nabo, na imwe mulishe amapenga, ukushinguluka inkambi yonse,+ kabili mutile, ‘Ulupanga lwa kwa Yehova+ no lwa kwa Gideone!’”

19 Gideone asukile afika na baume umwanda umo (100) abali nankwe, ku mpela ya nkambi pa kutendeka kwa bulinde bwa pa kati ka bushiku.*+ E lyo fye bapwishishe ukubika abalinshi pa fifulo fyabo. Kabili balishishe amapenga+ no kutobaula imitondo ikalamba iya menshi iyali mu minwe yabo.+ 20 Kabili amabumba yatatu yalishishe amapenga+ no kutobaula imitondo ikalamba no kwikata ifyenge ku maboko yabo aya ku kuso na ya ku kulyo baikatileko amapenga pa kuti bayalishe, e lyo balapunda abati: “Ulupanga lwa kwa Yehova+ no lwa kwa Gideone!” 21 Ili lyonse baiminine umo umo pa cifulo cakwe ukushinguluka inkambi yonse, kabili bonse abali mu nkambi balibutwike no kutendeka ukupunda no kufulumuka.+ 22 Kabili aba myanda itatu (300)+ bakonkenyepo ukulisha amapenga,+ na Yehova alengele ulupanga lwa muntu umo umo ukukoma umunankwe mu nkambi yonse;+ kabili abali mu nkambi balifulumwike ukufika na ku Bete-shita, ukuya ku Serera, ukufika fye na ku nse ya Abele-mehola+ iyali lwa ku Tabati.

23 Nomba abaume ba mu Israele bena balilonganikwe pamo, aba mu mukowa wa kwa Naftali+ no wa kwa Ashere+ e lyo na bonse aba mu mukowa wa kwa Manase,+ kabili bakonkele+ abena Midiani. 24 Kabili Gideone atumine inkombe mu calo ca mpili conse ica kwa Efraimu,+ ati: “Kabiyeni, kakumanyeni abena Midiani no kubacilikila pa mumana ukufika fye na ku Bete-bara na ku Yordani.” Awe abaume bonse aba muli Efraimu balilongene, kabili babapokolwele ne mimana+ ukufika na ku Bete-bara na ku Yordani. 25 Kabili baikete na bacilolo babili aba ku Midiani, e kuti, Orebu na Seebu;+ kabili baipaile Orebu pa cilibwe ca Orebu,+ kabili baipaile Seebu apo balekamina imyangashi pa Seebu. Kabili bakonkenyepo ukukonka abena Midiani,+ kabili baletele umutwe wa kwa Orebu no wa kwa Seebu kuli Gideone mu citungu ca Yordani.+

8 Kabili abaume abena Efraimu bamwebele abati: “Cinshi watucitila ifi, ukwabula ukutwitako ilyo waile ku kulwisha abena Midiani?”+ Kabili baeseshe nga nshi ukuti batendeke ukuumana nankwe.+ 2 Asukile abasuka ati: “Nga kanshi cinshi nacita icacila pa co imwe mwacita?+ Bushe imyangashi abena Efraimu+ basotele tayacila imyangashi abena Abiesere balonganike?+ 3 Ni mu minwe yenu e mo Lesa apeele bacilolo ba kwa Midiani, Orebu na Seebu,+ kabili cinshi nacita icacila pa co imwe mwacita?” Awe ilyo asosele aya mashiwi, e lyo imitima yabo yaikele.+

4 Gideone asukile afika ku mumana wa Yordani no kwabuka pamo na bantu imyanda itatu (300) abo ali na bo, ninshi nabanaka lelo baletwalilila ukubakonka. 5 E lyo atile ku bena Sukote:+ “Shi peeleni abantu abo ndi na bo umukate,+ pantu nabanaka kabili ndekonka Seba+ na Salimuna,+ imfumu sha ku Midiani.” 6 Nomba bacilolo ba bena Sukote batile: “Bushe nawikata kale Seba na Salimuna mu minwe yobe pa kuti abashilika bobe tubapeele umukate?”+ 7 E lyo Gideone atile: “E mulandu wine ilyo Yehova akapeela Seba na Salimuna mu minwe yandi, nkamufopawila ku myunga ya mu matololo na kuli ficilasa.”+ 8 Awe atwalilile ukwenda ukufuma palya ukuya ku Penuele+ no kuyalomba fimo fine, lelo abena Penuele na bo bamwaswike filya fine abena Sukote bamwaswike. 9 E ico aebele na baume ba ku Penuele ati: “Nga nabwela umutende, nkesabongolola ulu lupungu.”+

10 Nomba Seba na Salimuna+ bali mu Karkore, pamo na bashilika babo, nalimo amakana ikumi na makana yasano (15,000) bonse abasheleko ku bashilika ba bena Kabanga;+ kabili abafwile kale bali abashilika amakana umwanda umo na makana amakumi yabili (120,000) abaishibe ukulwa no lupanga.+ 11 Kabili Gideone aleya fye mu nshila ya baleikala mu matenti ku kabanga ka Noba na Yogebea+ no kutendeka ukukoma abashilika ninshi bena tabebukile.+ 12 Ilyo Seba na Salimuna bafulumwike, ilyo line fye alibakonkele no kwikata imfumu shibili isha ku Midiani, e kuti Seba na Salimuna;+ kabili alengele ibumba lya bashilika lyonse ukututuma.

13 Kabili Gideone umwana wa kwa Yoashi atendeke ukubweluluka ukufuma ku nkondo mu mupata uwaya ku Herese. 14 Mu nshila aikete umulumendo umwina Sukote+ no kumwipusha.+ Awe na o amulembeele amashina ya bacilolo+ ba mu Sukote ne ntungulushi sha uko, abaume amakumi cinelubali na cinelubali (77). 15 E lyo aile ku bena Sukote no kutila: “Moneni Seba na Salimuna abo mwalentumfishapo, amuti: ‘Bushe nawikata kale Seba na Salimuna mu minwe yobe pa kuti abantu bobe abanakile tubapeele umukate?’”+ 16 E lyo asendele abakalamba ba mu musumba ne myunga ya mu matololo na ficilasa, kabili afopawilileko abena Sukote.+ 17 Kabili abongolwele+ ulupungu lwa ku Penuele,+ kabili aipeye abaume ba muli uyu musumba.

18 Nomba atile kuli Seba na Salimuna:+ “Bushe bantu ba musango nshi mwaipeye mu Tabore?”+ Na bo batile: “Ifyo ulemoneka, e fyo na bo balemoneka, bonse balemoneka nga bana ba mfumu.” 19 E lyo atile: “Ni bamunyinane, abana ba kwa mayo. Na pali Yehova, nga tamwabepeye, na ine nga nshimwipeye.”+ 20 E lyo atile kuli Yetere ibeli lyakwe: “Ima, bepaye.” Awe umulumendo tasomwene ulupanga lwakwe, aletiina, pantu ali mwaice.+ 21 E ico Seba na Salimuna batile: “Nga uli mwaume, ima we mwine no kutwipaya.”+ Awe Gideone aliimine no kwipaya+ Seba na Salimuna no kubuula utubekobeko utwakobekwe mu mikoshi ya ngamila shabo.

22 E lyo abena Israele batile kuli Gideone: “Ututeke,+ iwe no mwana obe no mwishikulu obe, pantu nautupususha mu kuboko kwa bena Midiani.”+ 23 Lelo Gideone abebele ati: “Ine nshakamuteke, nangu mwana wandi.+ Yehova e ukamuteka.”+ 24 Kabili Gideone akonkenyepo ukubeba ati: “Lekeni imulombeko icintu cimo: Bonse mpeeleni utumipeto twa ku myona+ utuli mu fyo mwapokolwele.” (Pantu bakwete utumipeto twa ku myona utwa golde, ico bali bena Ishmaele.)+ 25 Na bo batile: “Twalakupeela.” Awe bayanshile insalu no kupoosapo bonse utumipeto twa ku myona utwa mu fyo bapokolwele. 26 Kabili utumipeto twa ku myona utwa golde uto alombele twafinine amashekele ya golde ikana limo ne myanda cinelubali (1,700), pamo no tubekobeko+ na masikiyo ne fya kufwala fya nsalu yakashikila+ ifyo imfumu sha ku Midiani shalefwala pamo no tuminyololo utwali mu mikoshi ya ngamila.+

27 Kabili Gideone apangiilemo efode+ no kumubika mu musumba wakwe, mu Ofra;+ kabili abena Israele bonse batendeke ukupepa* uyu efode,+ ica kuti cali citeyo kuli Gideone na ba mu ng’anda yakwe.+

28 E fyo abena Midiani+ babacimfishe ku bana ba kwa Israele, kabili tababwekeshepo ukwimya imitwe nakalya; kabili icalo cali tondolo pa myaka amakumi yane (40) mu nshiku isha kwa Gideone.+

29 Kabili Yerubaali+ mwana Yoashi aliile no kukonkanyapo ukwikala mu ng’anda yakwe.

30 Kabili Gideone akwete abana baume amakumi cinelubali (70),+ pantu aupile abanakashi abengi. 31 Na kanakashi wakwe uwali mu Shekemu amufyalile umwana mwaume. E ico amwinike ati Abimeleke.+ 32 Umuye nshiku Gideone mwana Yoashi alifwile pa mushinku uukalamba nga nshi no kushiikwa mu nshiishi ya kwa Yoashi wishi mu Ofra, umusumba wa bena Abiesere.+

33 Nomba ilyo fye Gideone afwile abana ba kwa Israele na kabili batendeke ukupepa* baBaali,+ ica kuti babikile Baali-beriti ukuba lesa wabo.+ 34 Awe abana ba kwa Israele tabaibukishe Yehova Lesa wabo,+ uwabapokolwele mu minwe ya balwani babo bonse ababashingulwike;+ 35 kabili tabali ne cikuuku+ ku ba mu ng’anda ya kwa Yerubaali, e kuti Gideone, pa fisuma fyonse ifyo acitile ku bena Israele.+

9 Umuye nshiku Abimeleke+ mwana Yerubaali aile ku Shekemu+ kuli banalume no kutendeka ukulanda na bo pamo na ba mu lupwa lonse ulwa kwa wishi wa kwa nyina, ati: 2 “Shi soseni ku bekashi bonse aba mu Shekemu, amuti, ‘Cinshi cingamuwamina, abaume amakumi cinelubali (70),+ abana bonse aba kwa Yerubaali, ukumuteka nelyo umwaume umo ukumuteka? Kabili mwibukishe no kuti ndi fupa lyenu kabili umunofu wenu.’”+

3 E ico banalume batendeke ukulanda aya mashiwi yonse pali ena ku bekashi bonse aba mu Shekemu ica kuti imitima yabo yali pali Abimeleke,+ pantu batile: “Ni munyinefwe.”+ 4 Kabili bamupeele indalama sha silfere amakumi cinelubali (70) isho bafumishe mu ng’anda ya kwa Baali-beriti,+ kabili Abimeleke ashibomfeshe ku kulipila abaume abashakwata ifya kucita kabili ifinangwa,+ pa kuti bamushindike. 5 E lyo aile ku ng’anda ya kwa wishi ku Ofra+ no kwipaya bamunyina bonse,+ abana ba kwa Yerubaali, abaume amakumi cinelubali (70), pa libwe limo line, lelo Yotamu umwana munono uwa kwa Yerubaali alishele, pantu alibeleme.

6 Awe abekashi bonse aba mu Shekemu na bonse aba mu ng’anda ya kwa Milo+ balongene pamo kabili bailebika Abimeleke pa bufumu,+ mupepi no muti uukalamba,+ lwa mupepi no luceshi ulwali mu Shekemu.+

7 Ilyo bashimikile Yotamu, ilyo line fye aileiminina pa muulu wa Lupili lwa Gerisimu+ no kusansula ishiwi lyakwe no kubilikisha kuli bena, ati: “Ng’umfweni, mwe bekashi ba mu Shekemu, kabili lekeni Lesa omfwe kuli imwe:

8 “Kale imiti yaile ku kusuba imfumu ya kuiteka. E ico yatile ku muolife,+ ‘Ube imfumu yesu.’+ 9 Lelo umuolife watile ku miti, ‘Bushe ndeke amafuta yandi ayasuma ayo bacindikilako+ Lesa na bantu, no kuya mu kupungila pa miti imbi?’+ 10 E lyo imiti yatile ku mukunyu,+ ‘Isa, ube imfumu yesu.’ 11 Lelo umukunyu waebele imiti auti, ‘Bushe ndeke ukulowa nalowa ne fisabo fyandi ifisuma, no kuya mu kupungila pa miti imbi?’+ 12 E lyo imiti yatile ku mwangashi, ‘Isa, niwe ube imfumu yesu.’ 13 Umwangashi na o watile ku miti, ‘Bushe ndeke umwangashi wandi uupya uulenga Lesa na bantu ukusekelela,+ no kuya mu kupungila pa miti?’ 14 Na pa kulekelesha imiti yonse yatile kuli kalanangwa,+ ‘Isa, niwe ube imfumu yesu.’ 15 E lyo kalanangwa na o atile ku miti, ‘Nga cishinka mulensuba ukuba imfumu yenu, iseni, ubeni mu cintelelwe candi.+ Lelo nga te ifyo, lekeni umulilo+ ufume muli kalanangwa no koca imikedari+ ya mu Lebanone.’+

16 “Nomba nga ni mu cine na mu cishinka mucitiile ifi kabili emo mubikiile Abimeleke pa bufumu,+ kabili nga cisuma mucitile kuli Yerubaali na ku ba mu ng’anda yakwe, kabili nga mucitile kuli ena iciyene imilimo ya minwe yakwe, 17 ilyo tata alemulwila+ no kubika umweo+ wakwe mu busanso ku kumulubula mu minwe ya bena Midiani;+ 18 nomba imwe, mwaimina aba mu ng’anda ya kwa tata lelo pa kuti mwipaye abana bakwe abaume,+ abantu amakumi cinelubali (70),+ pa libwe limo line, kabili mwabika Abimeleke, umwana wa mubomfi wakwe umwanakashi,+ ukuba imfumu+ pa bekashi bonse aba mu Shekemu pantu fye ni munyinenwe;19 kwena, nga ni mu cine na mu cishinka mucitile ifi kuli Yerubaali na ku ba mu ng’anda yakwe, sekeleleni pali Abimeleke kabili lekeni na o asekelele pali imwe.+ 20 Lelo nga te ifyo, lekeni umulilo+ ufume kuli Abimeleke no koca abekashi ba mu Shekemu na ba mu ng’anda ya kwa Milo,+ kabili lekeni umulilo+ ufume mu bekashi ba mu Shekemu na ba mu ng’anda ya kwa Milo no koca Abimeleke.”+

21 Kabili Yotamu+ alifulumwike no kubutukila ku Beere, kabili atendeke ukwikala kulya pa mulandu wa kwa Abimeleke munyina.

22 Kabili Abimeleke aipeele bucilolo pa bena Israele pa myaka itatu.+ 23 Kabili Lesa alekele umupashi+ ubi ukuba pali Abimeleke na pa bekashi ba mu Shekemu, kabili abekashi ba mu Shekemu babepele+ Abimeleke, 24 pa kuti ifibi ifyacitilwe ku bana ba kwa Yerubaali amakumi cinelubali (70) fise+ pali bena no kuti abike umulopa wabo pali Abimeleke munyinabo pantu alibepeye,+ na pa bekashi ba mu Shekemu pantu bakoseshe amaboko yakwe+ pa kuti epaye bamunyina. 25 E ico abekashi ba mu Shekemu basontele abaume ba kumubelamina pa muulu wa mpili, kabili baleibila onse uwapita apo bali mu musebo. Awe abantu basukile baeba Abimeleke.

26 E lyo Gaali+ umwana wa kwa Ebede na bamunyina baileingila mu Shekemu,+ na bekashi ba mu Shekemu balimucetekele.+ 27 Awe baile mu mabala filya balecita lyonse no kulonganika imyangashi no kuikama no kupanga umutebeto wa kusekelela,+ e lyo baingile mu ng’anda ya kwa lesa+ wabo no kulya no kunwa+ no kutiipwila+ Abimeleke. 28 E lyo Gaali umwana wa kwa Ebede atile: “Nani Abimeleke,+ kabili nani Shekemu uwa kuti tumubombele? Bushe te mwana Yerubaali,+ kabili bushe Sebuli+ te mulashi wakwe? Lelo imwe bonse, bombeleni abaume ba kwa Hamore,+ wishi Shekemu, nga cinshi ico ifwe tulebombela ena?29 Kabili aba bantu ababa fye mu minwe yandi!+ Ninshi kuti nafumyapo Abimeleke.” Kabili akonkenyepo ukusosa kuli Abimeleke ati: “Fusha abashilika bobe no kufumina pa nse pamo nabo no kulwa na ine.”+

30 Awe Sebuli cilolo wa musumba aumfwile amashiwi ya kwa Gaali mwana Ebede.+ Awe akalipe nga nshi. 31 E ico atumine inkombe shakwe mu bucenjeshi kuli Abimeleke, ati: “Moneni! Gaali mwana Ebede na bamunyina nomba baleisa ku Shekemu,+ kabili balelonganika abantu ba mu musumba pa kuti bamulwishe. 32 Nomba mwime ubushiku,+ imwe na bantu abali na imwe, no kuyabelama+ mu mpanga. 33 Kabili ulucelo ilyo fye akasuba katula mukacelele, no kusansa umusumba; kabili ilyo ena na bantu abali nankwe balefuma ku kumulwisha, mukamucite fyonse ifyo ukuboko kwenu kwingacita.”

34 Awe Abimeleke na bantu bonse abali nankwe baimine ubushiku, no kuyabelamina Shekemu mu mabumba yane. 35 Pa numa ya ifyo Gaali+ mwana Ebede alifumine no kwiminina pa mwinshi wa mpongolo ya musumba. E lyo Abimeleke na bantu abali nankwe baimine ukufuma pa cifulo apo babeleme. 36 Ilyo fye Gaali amwene abantu, asosele kuli Sebuli ati: “Mona! Abantu baletentemuka ukufuma pa muulu wa mpili.” Lelo Sebuli amwebele ati: “Finshingwa fya mpili e fyo ulemona kwati bantu.”+

37 Inshita imbi Gaali asosele na kabili ati: “Mona! Abantu baleisa ukufuma pa kati ka mpanga, kabili ibumba limo lileisa mu nshila ya muti ukalamba uwa Meonenimu.” 38 E lyo Sebuli amwebele ati: “Bushe te iwe wasosele+ ati ‘Nani Abimeleke uwa kuti tumubombele?’+ Bushe aba te bantu abo wakeene?+ Ale kabiye nomba no kubalwisha.”

39 Awe Gaali atangilile abekashi ba mu Shekemu no kulwisha Abimeleke. 40 Kabili Abimeleke alimukonkele, na o alifulumwike; kabili baipeye abengi ica kuti ifitumbi fyabo fyafikile na ku mpongolo.

41 Kabili Abimeleke atwalilile ukulaikala mu Aruma, na Sebuli+ atamfishe Gaali+ na bamunyina ukuti beikala mu Shekemu.+ 42 Nomba ubushiku bwakonkelepo abantu batendeke ukuya mu mpanga. E ico baebele Abimeleke.+ 43 Na o abuulile abantu no kubaakanya mu mabumba yatatu+ no kubelama mu mpanga. E lyo aloleshe, awe abantu balefuma mu musumba. Awe alibemiine no kubasansa. 44 Kabili Abimeleke na mabumba yakwe balibutwike pa kuti beminine pa mpongolo ya musumba, ninshi amabumba yabili yalesansa bonse abali mu mpanga, kabili balibepeye.+ 45 Kabili Abimeleke alwile no musumba akasuba konse no kupoka umusumba; kabili aipeye abantu abalimo,+ e lyo abongolwele+ umusumba no kusansapo umucele.+

46 Ilyo abekashi bonse aba mu lupungu lwa Shekemu baumfwile, ilyo line fye baile mu muputule wa pa nshi ya ng’anda ya kwa Elberiti.+ 47 Kabili bashimikile Abimeleke ukuti abekashi bonse aba mu lupungu lwa Shekemu balongene pamo. 48 E lyo Abimeleke aninine Ulupili lwa Salmone,+ pamo na bonse abali nankwe. Abimeleke nomba abuulile isembe no kutema umusambo ku muti no kuwimya no kuubika pa kubeya kwakwe no kutila ku bantu abali nankwe: “Ifyo mwamona nacita, angufyanyeni, na imwe citeni cimo cine!”+ 49 E ico abantu bonse na bo batemene cila muntu umusambo no kukonka Abimeleke. Kabili baituulike pa muputule wa pa nshi, kabili pa muulu wabo bakoseshe umulilo pa muputule wa pa nshi, ica kuti abantu bonse abali mu lupungu lwa Shekemu na bo balifwile, nalimo abaume na banakashi ikana limo (1,000).+

50 E lyo Abimeleke aile ku Tebese+ no kupanga inkambi ku Tebese no kupoka uyu musumba. 51 Apo mwali ulupungu lwakosa mu musumba, e mo bonse abaume na banakashi na bekashi bonse aba mu musumba balefulumukila, e lyo baisele ifiibi no kunina pa mutenge wa lupungu. 52 Awe Abimeleke aile ku lupungu no kutendeka ukululwisha, kabili apaleme ku mwinshi wa lupungu pa kuti aloce no mulilo.+ 53 Kabili umwanakashi umo asukwise umwana wa mpelo pa mutwe wa kwa Abimeleke no kutoba icipanga cakwe.+ 54 E ico bwangu bwangu aitile umubomfi uwasendele ifyanso fyakwe no kutila kuli ena: “Somona ulupanga lobe no kunjipaya,+ pantu ndetiina epali abantu balasosa pali ine abati, ‘Mwanakashi amwipeye.’” Ilyo line fye umubomfi wakwe alimulashile ulupanga, na o alifwile.+

55 Ilyo abaume ba mu Israele bamwene ukuti Abimeleke nafwa, cila muntu aile ku mwakwe. 56 E fyo Lesa alengele ububi bwa kwa Abimeleke ubo acitile kuli wishi pa kwipaya bamunyina amakumi cinelubali (70) ukumubwelela.+ 57 No bubi bonse ubwa baume ba mu Shekemu Lesa alengele bubwelele pa mitwe yabo, pa kuti icitiipu+ ca kwa Yotamu+ mwana Yerubaali+ cibeshile.+

10 Nomba ilyo Abimeleke afwile kwaishile Tola mwana Pua, mwana Dodo, umwina Isakari, ku kupususha Israele,+ kabili aleikala mu Shamiri mu calo ca mpili ica kwa Efraimu.+ 2 Awe apingwile Israele pa myaka amakumi yabili na itatu (23), e lyo afwile no kushiikwa mu Shamiri.

3 Ilyo afwile kwaishile Yairi umwina Gileadi,+ kabili na o apingwile Israele imyaka amakumi yabili na ibili (22). 4 Kabili akwete abana baume amakumi yatatu (30) abale-endela pa mpunda shikalamba amakumi yatatu,+ kabili bakwete imisumba amakumi yatatu. Iyi misumba baita ati Habote-yairi+ ukufika na lelo; yaba mu calo ca Gileadi. 5 E lyo Yairi afwile kabili bamushiikile ku Kamone.

6 Awe abana ba kwa Israele na kabili bacitile ifyabipa mu menso ya kwa Yehova,+ kabili batendeke ukubombela baBaali+ na baAstarte+ na balesa ba ku Siria+ na balesa ba ku Sidone+ na balesa ba kwa Moabu+ na balesa ba bana ba kwa Amone+ na balesa ba baPelishiti.+ E fyo basangukile Yehova no kuleka ukumubombela.+ 7 E lyo Yehova akalipile nga nshi abena Israele,+ ica kuti abapeele*+ mu minwe ya baPelishiti+ na mu minwe ya bana ba kwa Amone.+ 8 E ico bafwantawile no kucusha nga nshi abana ba kwa Israele muli ulya mwaka—pa myaka ikumi na cinekonsekonse (18) abana ba Israele bonse abali kwi shilya lya Yordani mu calo ca bena Amore icali mu Gileadi. 9 Kabili abana ba kwa Amone baleabuka Yordani pa kuti bayelwa na Yuda na Benjamini e lyo na ba mu ng’anda ya kwa Efraimu; kabili abena Israele baliculile nga nshi.+ 10 Na bana ba kwa Israele batendeke ukulilila kuli Yehova,+ abati: “Natumubembukila,+ pantu natupondokela imwe, mwe Lesa wesu, no kulabombela baBaali.”+

11 E lyo Yehova atile ku bana ba kwa Israele: “Bushe te ku bena Egupti+ na ku bena Amore+ na ku bana ba kwa Amone+ na ku baPelishiti+ 12 na ku bena Sidone+ na kuli Amaleke+ na kuli Midiani+ uko namupuswishe mu minwe yabo, ilyo bamucushishe+ na imwe mwalilile kuli ine?13 Lelo imwe, mwalimpondokele+ no kutendeka ukubombela balesa bambi.+ E co nshakamupusushishe na kabili.+ 14 Kabiyeni no kulilila kuli balesa+ abo mwasala.+ Lekeni bamupusushe mu nshita ya kucula kwenu.” 15 Lelo abana ba kwa Israele batile kuli Yehova: “Natubembuka.+ Citeni kuli ifwe ukulingana na conse iciweme mu menso yenu.+ Mutulubuleko fye buno bushiku.”+ 16 Kabili batendeke ukufumya balesa bambi bambi mu kati kabo+ no kubombela Yehova,+ ica kuti umweo+ wakwe watendeke ukulunguluka pa mulandu wa bwafya bwa bena Israele.+

17 Umuya inshiku abana ba kwa Amone+ balongene pamo no kupanga inkambi mu Gileadi.+ Awe abana ba kwa Israele na bo balongene pamo no kupanga inkambi mu Mispa.+ 18 Kabili abantu na bacilolo ba mu Gileadi batendeke ukulaipushanya abati: “Nani akatutungulula mu kulwisha abana ba kwa Amone?+ Lekeni abe intungulushi ya bekashi bonse aba mu Gileadi.”+

11 Nomba Yefta+ umwina Gileadi+ ali uwa maka kabili uwakosa,+ kabili ali mwana wa kwa cilende,+ e lyo Gileadi e wali wishi wa kwa Yefta. 2 Awe umukashi wa kwa Gileadi alemufyalila abana. Ilyo abana ba mukashi bakulile, batamfishe Yefta no kumweba ati: “Taufwile ukukwata ubupyani mu ng’anda ya kwa shifwe,+ pantu uli mwana wa mwanakashi umbi.” 3 E ico Yefta alibutwike pa mulandu wa bamunyina no kuyaikala mu calo ca Tobu.+ Kabili abaume abashakwete fya kucita baleileta fye abene kuli Yefta, kabili baleya nankwe mu kusansa.+

4 Nomba ilyo papitile inshita abana ba kwa Amone batendeke ukulwa na Israele.+ 5 Nomba ilyo abana ba kwa Amone balelwa na Israele,+ abakalamba ba mu Gileadi apo pene baile ku kubuula Yefta ku calo ca Tobu.+ 6 E lyo batile kuli Yefta: “Isa, ube umukalamba we bumba lyesu ilya bashilika, kabili natulwe na bana ba kwa Amone.” 7 Lelo Yefta atile ku bakalamba+ ba mu Gileadi: “Bushe te imwe mwampatile ica kuti mwantamfishe mu ng’anda ya kwa tata?+ Nga cinshi mwaishila kuli ine nomba ilyo mwacula?”+ 8 E lyo abakalamba ba mu Gileadi batile kuli Yefta: “E mulandu wine nomba twabwelela+ kuli iwe, kabili ufwile ukuya na ifwe no kulwa na bana ba kwa Amone, kabili uleba intungulushi yesu fwe bekashi bonse aba mu Gileadi.”+ 9 E ico Yefta atile ku bakalamba ba mu Gileadi: “Nga ico mulembwesesha kuyalwa na bana ba kwa Amone, kabili Yehova abapeela+ kuli ine, ninshi ine nkaba intungulushi yenu!” 10 Awe abakalamba ba mu Gileadi batile kuli Yefta: “Yehova nabe nte pali ifwe+ nga ca kuti ifyo tukacita tafyakabe ukulingana ne fyo wasosa.”+ 11 E lyo Yefta aile na bakalamba ba mu Gileadi na bantu bamulengele ukuba intungulushi yabo kabili umukalamba wa bashilika.+ Na Yefta alandile amashiwi yakwe yonse pa cinso ca kwa Yehova+ mu Mispa.+

12 E lyo Yefta atumine inkombe ku mfumu ya bana ba kwa Amone,+ ati: “Cinshi waishila kuli ine+ ku kulwa na ine mu calo candi?” 13 E ico imfumu ya bana ba kwa Amone yatile ku nkombe sha kwa Yefta: “Ni pa mulandu wa kuti abena Israele bapokele impanga yandi ilyo bafumine mu Egupti,+ ukufuma pa Arnone+ ukufika na ku Yaboke kabili ukufika na ku Yordani.+ Kabili nomba ibwesheni mu mutende.” 14 Lelo Yefta na kabili atumine inkombe ku mfumu ya bana ba kwa Amone 15 no kuyeba ati:

“Ifi e fyo Yefta alanda, ‘Israele tapokele impanga ya kwa Moabu+ ne mpanga ya bana ba kwa Amone.+ 16 Pantu ilyo abena Israele bafumine mu Egupti baendele mu matololo ukufika na kuli Bemba Wakashika+ no kwisa ku Kadeshe. + 17 E lyo Israele atumine inkombe ku mfumu ya ku Edomu, + ati: “Leka mpiteko mu calo cobe,” ne mfumu ya ku Edomu yalikene. Kabili na ku mfumu ya Moabu+ na ko balitumineko, lelo tayalefwaya. Kabili abena Israele baleikala mu Kadeshe. + 18 Ilyo baendele mu matololo, bashokele icalo ca Edomu+ ne calo ca Moabu, ica kuti baile ku kabanga ka calo ca Moabu+ no kukuula inkambi mu citungu ca Arnone; kabili tabaingile mu calo ca kwa Moabu,+ pantu Arnone wali e mupaka wa kwa Moabu.+

19 “‘E lyo Israele atumine inkombe kuli Sihone imfumu ya bena Amore, imfumu ya ku Heshebone,+ kabili abena Israele bayebele ati: “Leka tupiteko mu calo cobe, pa kuti tuye ku mwesu.”+ 20 Kabili Sihone aletwishika ico abena Israele balefwaila ukupita mu calo cakwe, e ico Sihone alonganike abantu bakwe bonse no kuyakuula inkambi mu Yahasi+ no kulwa na bena Israele.+ 21 E lyo Yehova Lesa wa kwa Israele apeele Sihone na bantu bakwe bonse mu minwe ya kwa Israele, ica kuti balibacimfishe kabili Israele apokele icalo conse ica bena Amore abaikele muli cilya calo.+ 22 E fyo bapokele impanga yonse iya bena Amore ukufuma pa Arnone ukufika na ku Yaboke no kufuma ku matololo ukufika fye na ku Yordani.+

23 “‘Nomba Yehova Lesa wa bena Israele e watamfishe abena Amore ku ntanshi ya bantu bakwe abena Israele,+ kabili imwe mulefwaya ukubatamfya. 24 Bushe te onse uo Kemoshe+ lesa obe akulenga ukucimfya e o ucimfya? Kabili onse uo Yehova Lesa wesu acimfya e o tukacimfya.+ 25 Kabili nomba bushe wacila Balaki mwana Sipore, imfumu ya ku Moabu?+ Bushe alibalile acita ifikansa ku bena Israele, nelyo bushe alilwile na bo? 26 Ilyo abena Israele baleikala mu Heshebone ne mishi ya uko+ na mu Aroere+ ne mishi ya uko na mu misumba yonse iyaba mu lulamba lwa Arnone pa myaka imyanda itatu (300), cinshi ushaipokele iyi nshita yonse?+ 27 Lelo ine, nshabembuka kuli iwe, nomba iwe ulendufyanya pa kulwa na ine. Leka Yehova Umupingushi+ apingule lelo pa bana ba kwa Israele na pa bana ba kwa Amone.’”

28 Awe imfumu ya bana ba kwa Amone yalikene ukumfwa ku mashiwi ya kwa Yefta ayo aitumiine.+

29 Nomba umupashi wa kwa Yehova waishile pali Yefta,+ kabili apitile mu Gileadi na mu Manase no kupita mu Mispe wa mu Gileadi, kabili ukufuma mu Mispe wa mu Gileadi+ aile ku bana ba kwa Amone.

30 E lyo Yefta alapile umulapo+ kuli Yehova no kutila: “Ukupeela nga mwapeela abana ba kwa Amone mu minwe yandi, 31 ninshi uukafuma pa mwinshi wa ng’anda yandi no kunsengela ilyo nabwela umutende+ ukufuma mu kulwa na bana ba kwa Amone, akaba uwa kwa Yehova,+ kabili nkamupeela ngo mutuulo wa koca.”+

32 E ico Yefta aile ku bana ba kwa Amone pa kuti alwe na bo, na Yehova abapeele mu minwe yakwe. 33 Kabili alibacimfishe ukufuma pa Aroere ukuyafika fye na ku Miniti,+ imisumba amakumi yabili (20), no kuyafika ku Abele-keramimu no kwipaya abengi nga nshi. E fyo abana ba kwa Amone bacimfiwe ku bana ba kwa Israele.

34 Yefta asukile afika ku Mispa+ ku mwakwe, kabili, moneni! umwana wakwe umwanakashi aleisa ku kumusengela na kaoma ka nyenjele kabili alecinda no kucinda!+ Uyu mukashana e mwana fye akwete. Takwete umwana umbi umwaume nelyo umwanakashi. 35 Nomba ilyo amumwene, alepwile ica kufwala+ cakwe no kutila: “Yangu, we mwana wandi! Ala wanenga ubulanda, kanshi ni we nalecusha. Nomba ine nalilaya kuli Yehova, kabili te kuti ngalule.”+

36 Lelo amwebele ati: “Tata, nga mwalilaya kuli Yehova, citeni kuli ine ukulingana ne fyo mwalandile,+ apo Yehova namulandwilako abalwani benu, abana ba kwa Amone.” 37 Kabili atile kuli wishi: “Lekeni ici cicitwe kuli ine: Ndekeni mbe neka pa myeshi ibili, kabili ndekeni ndeya, kabili nkaya ku mpili, kabili ndekeni ndooshe bunacisungu+ bwandi, pamo na bakashana banandi.”

38 E lyo atile: “Kabiye!” E ico amulekele aya imyeshi ibili; kabili aliile, pamo na bakashana banankwe, no kuloosha bunacisungu bwakwe mu mpili. 39 Nomba ilyo imyeshi ibili yapwile, alibwelelemo kuli wishi, e lyo afikilishe umulapo wakwe uo alapile pali ena.+ Awe na o, tabalile akumana no mwaume. Kabili apa e patulile ulutambi lwa mu Israele ulwa kuti: 40 Cila mwaka abana banakashi abena Israele baleya ku kutasha umwana mwanakashi wa kwa Yefta umwina Gileadi, inshiku shine mu mwaka.+

12 Awe abaume ba mu Efraimu balongene pamo no kwabukila ku kapinda ka ku kuso no kutila kuli Yefta: “Cinshi ico wayabukile no kuyalwa na bana ba kwa Amone, lelo ifwe tawatwitile pa kuti tuye nobe?+ Tulekocela mu ng’anda yobe.”+ 2 Lelo Yefta abaswike ati: “Nakansene nga nshi na bana ba kwa Amone,+ ine na bantu bandi. Kabili nalilile kuli imwe, na imwe tamwampuswishe mu minwe yabo. 3 Ilyo namwene ukuti tamwali na kumpususha, natile kanjibike fye mu kapoosa mweo+ no kuya ku kulwisha abana ba kwa Amone.+ E lyo Yehova abapeele mu minwe yandi. Nga kanshi cinshi mwaishila kuli ine lelo ku kulwa na ine?”

4 Ilyo line fye Yefta alonganike abaume bonse aba mu Gileadi+ no kulwa na Efraimu; kabili abaume ba mu Gileadi bacimfishe abena Efraimu, pantu abena Efraimu batile: “Imwe mwe bena Gileadi mwafyukile fye ukufuma muli Efraimu na muli Manase.” 5 Kabili Gileadi apokele ifyabu fya Yordani+ ukucilikila Efraimu; kabili ilyo abena Efraimu abalefyuka batila: “Lekeni njabuke,” e lyo abena Gileadi baleipusha umo umo abati: “Bushe uli mwina Efraimu?” Nga atila: “Awe!” 6 e lyo balemweba abati “Kanshi sosa auti Shibolete.”+ Na o atile: “Sibolete,” ico afililwe ukushikimika bwino ishiwi. Kabili balemwikata no kumwipaila pa fyabu fya Yordani. E ico abafwile ilya nshita bali amakana amakumi yane na makana yabili (42,000) ukufuma muli Efraimu.+

7 Awe Yefta akonkenyepo ukupingula Israele pa myaka mutanda (6). Kabili Yefta umwina Gileadi alifwile kabili bamushiikile mu musumba wakwe mu Gileadi.

8 Kabili ilyo afwile, Ibsani uwa ku Betelehemu+ atendeke ukupingula abena Israele.+ 9 Kabili akwete abana baume amakumi yatatu (30) na bana banakashi amakumi yatatu. Atumine aba kuyaleta abana banakashi amakumi yatatu aba kuupwa ku bana bakwe abaume. Kabili apingwile abena Israele pa myaka cinelubali (7). 10 Awe Ibsani alifwile no kushiikwa mu Betelehemu.

11 Kabili ilyo afwile Elone umwina Sebuluni+ atendeke ukupingula abena Israele. Kabili na o apingwile Israele imyaka ikumi (10). 12 Awe Elone umwina Sebuluni alifwile no kushiikwa mu Ayalone mu calo ca kwa Sebuluni.

13 Kabili ilyo afwile Abdone mwana Hilele umwina Piratone+ atendeke ukupingula abena Israele. 14 E lyo afyele abana baume amakumi yane (40) na beshikulu abaume amakumi yatatu (30) abale-endela pa mpunda+ amakumi cinelubali (70). Kabili apingwile Israele imyaka cinekonsekonse (8). 15 Awe Abdone mwana Hilele umwina Piratone alifwile no kushiikwa mu Piratone mu calo ca kwa Efraimu mu lupili lwa bena Amaleke.+

13 Kabili abana ba kwa Israele babwekeshepo ukucita ifyabipa mu menso ya kwa Yehova,+ kabili Yehova abapeele mu minwe ya baPelishiti+ pa myaka amakumi yane (40).

2 Nomba kwali umuntu wa ku Sora+ uwa mu lupwa lwa bena Dani,+ kabili ishina lyakwe ni Manoa.+ Umukashi wakwe ali ni ng’umba kabili tabalile afyala.+ 3 Umuye nshiku malaika wa kwa Yehova amoneke ku mwanakashi+ kabili amwebele ati: “Mona, nomba, uli ng’umba kabili tawabala aufyala. Lelo ukemita no kufyala umwana umwaume.+ 4 E co kanshi uisakamane, kabili wilanwa mwangashi nelyo ifya kunwa ifikola,+ kabili wilalya fyonse ifyakowela.+ 5 Pantu, mona! ukemita, kabili ukafyala umwana umwaume, kabili wikesha ukumubeya umushishi,+ pantu akaba umuNasiri+ wa kwa Lesa ilyo fye akafuma mwi fumo;+ kabili e ukatampa ukupususha abena Israele mu minwe ya baPelishiti.”+

6 E lyo uyu mwanakashi aile ku mulume wakwe no kumweba ati: “Kwaciba umuntu wa kwa Lesa wa cine uwaciisa kuli ine, kabili acilamoneka nga malaika wa kwa Lesa wa cine,+ uwa kutiinya nga nshi.+ Kabili nshacimwipusha uko acifuma, na o tacinjeba ishina lyakwe.+ 7 Lelo acitila kuli ine, ‘Mona! Ukemita, kabili ukafyala umwana umwaume.+ Kabili nomba wilanwa umwangashi nelyo ifya kunwa fikola, kabili wilalya conse icakowela, pantu umwana akaba umuNasiri wa kwa Lesa ilyo akafuma fye mwi fumo ukufika pa bushiku bwa mfwa yakwe.’”+

8 Kabili Manoa atendeke ukupapaata Yehova no kutila: “Mwe Yehova.+ Umuntu wa kwa Lesa wa cine uo mwacituma, mukwai lekeni ese na kabili kuli ifwe no kutweba+ ifyo tufwile ukucita ku mwana uukafyalwa.”+ 9 Awe Lesa wa cine aumfwile kwi shiwi lya kwa Manoa,+ e lyo malaika wa kwa Lesa wa cine aishile kabili ku mwanakashi ilyo aikele mwi bala, lelo Manoa umulume wakwe tali nankwe. 10 Umwanakashi apo pene alyangufyenye no kubutuka no kuyaeba umulume+ wakwe ati: “Moneni! Ulya muntu uwaishile kuli ine bulya bushiku aisa na kabili.”+

11 Awe Manoa aliimine no kuya pamo no mukashi kabili afikile kuli uyu mwaume no kumwipusha ati: “Bushe ni mwe mwalandile kuli uyu mwanakashi?”+ na o atile: “Nine.” 12 E lyo Manoa atile: “Nomba lekeni ifyo mwalanda fikacitike. Bushe tukamukushe shani umwana, kabili mulimo nshi akalabomba?”+ 13 E ico malaika wa kwa Yehova atile kuli Manoa: “Fyonse ifyo naebele umwanakashi afwile ukuibakako.+ 14 Tafwile ukulya fyonse ififuma ku mwangashi, tafwile ukunwa umwangashi nelyo ifya kunwa ifikola,+ kabili elalya fyonse ifyakowela.+ Alekonka fyonse ifyo namwebele.”+

15 Manoa nomba atile kuli malaika wa kwa Yehova: “Mukwai ikaleni tumupekanishisheko umwana wa mbushi.”+ 16 Lelo malaika wa kwa Yehova atile kuli Manoa: “Nga wanteka, nshalye umukate obe; lelo nga ulefwaya ukutuula umutuulo wa koca kuli Yehova,+ kuti watuula.” Pantu Manoa taishibe ukuti ali ni Malaika wa kwa Yehova. 17 E lyo Manoa atile kuli malaika wa kwa Yehova: “Ni mwe bani ishina,+ pa kuti ilyo ifyo mwasosa fikacitika tukamucindike?” 18 Lelo malaika wa kwa Yehova amwebele ati: “Nga cinshi uleipushisha ishina lyandi, pantu lishina lya kupapusha?”

19 Kabili Manoa abuulile umwana wa mbushi no mutuulo wa ngano no kutuula pa cilibwe kuli Yehova.+ Kabili Lesa alecita icipesha amano ninshi Manoa no mukashi wakwe balemonako. 20 Nomba, ilyo ulubingu lwaimine ukufuma pa ciipailo lwaya na mu muulu, e lyo malaika wa kwa Yehova aninine mu lubingu lwa pa ciipailo ninshi Manoa no mukashi wakwe balemonako.+ Awe ilyo line fye bawile pa nshi ubukupeme.+ 21 Kabili malaika wa kwa Yehova tamoneke na kabili kuli Manoa no mukashi wakwe. E lyo Manoa aishibe ukuti kanshi ni malaika wa kwa Yehova.+ 22 E ico Manoa atile ku mukashi wakwe: “Ukufwa twalafwa,+ pantu ni Lesa tumwene.”+ 23 Lelo umukashi wakwe amwebele ati: “Yehova nga alefwaya ukutwipaya, nga tapokelele umutuulo wa koca no mutuulo wa ngano mu minwe yesu,+ kabili nga tatulangile fyonse ifi, kabili nga tatulekele ukufika na nomba ukuumfwa ne fi fyonse.”+

24 Awe uyu mwanakashi afyele umwana mwaume no kumwinika ati Samsone;+ kabili umwana alekula, na Yehova alemupaala.+ 25 Umuye nshiku umupashi+ wa kwa Yehova watendeke ukumucincisha ninshi ali mu Mahane-dani+ pa kati ka Sora+ na Eshtaole.+

14 Na Samsone aile ku Timuna+ no kumona umwanakashi mu Timuna uwa mu bana banakashi aba baPelishiti. 2 Awe aliile no kuyaeba wishi na nyina no kutila: “Kuli umwanakashi uo mwene mu Timuna uwa mu bana banakashi ba baPelishiti, nomba mumbuulile uyu wine ukuti abe umukashi wandi.”+ 3 Lelo wishi na nyina bamwebele ati: “Bushe tapali umwanakashi pa bana banakashi ba bamunonko na pa bantu bandi bonse,+ pa kuti uye ku kubuula umukashi pa baPelishiti abashasembululwa?”+ Lelo Samsone atile kuli wishi: “Mbuulileni fye uyu wine, pantu e o ntemenwe.” 4 Wishi na nyina bena tabaishibe ukuti ici cafumine kuli Yehova,+ ukuti alefwaya apa kulwila na baPelishiti, pantu ilya nshita abaPelishiti e baleteka abena Israele.+

5 Awe Samsone aile ku Timuna+ pamo na wishi na nyina. Ilyo afikile mu mabala ya myangashi aya mu Timuna, moneni! umusepela wa nkalamo walimubulumine pa kumukumanya. 6 E lyo umupashi wa kwa Yehova waishile pali ena,+ ica kuti alepwile umusepela wa nkalamo pa kati, nga filya fine umuntu alepula umwana wa mbushi, kabili takwete nangu cimo mu minwe yakwe. Lelo taebeleko wishi nelyo nyina ico acitile. 7 Kabili alikonkenyepo ukwenda no kutendeka ukulanda no mwanakashi; kabili umwanakashi ali fye bwino mu menso ya kwa Samsone.+

8 Nomba ilyo papitile inshita alibwelele pa kuti amusende ku mwakwe.+ E lyo apaaswike ku kuyamona pa citumbi ca nkalamo, kabili mwali inshimu ishingi mu citumbi ca nkalamo, no buci.+ 9 E ico alibufumishe, aya alelya.+ Ilyo asangile wishi na nyina, bwangu bwangu alibapeeleko, na bo batendeke ukulya. Kabili tabebele ukuti ni mu citumbi ca nkalamo akompwele ubuci.

19 Kabili umupashi wa kwa Yehova waishile pali ena,+ ica kuti aile ku Ashkelone+ no kwipaya abaume babo amakumi yatatu (30) no kusenda ifya kufwala ifyo abafuulile no kupeela ifi ifya kufwala ku bailwile ubwile.+ Awe ena ali fye no bukali, kabili e fyo aile no kuya ku ng’anda kuli wishi.

20 Kabili umukashi+ wa kwa Samsone aishileba uwa nshindishi+ yakwe.

15 Nomba ilyo papitile inshita, mu nshiku sha kuseepa ingano, e lyo Samsone aile ku kutandalila umukashi wakwe kabili asendele no mwana wa mbushi.+ E ico atile: “Ndeya ku mukashi wandi mu muputule wa mu kati.”+ Lelo wishi wa mukashana tamusuminishe ukwingila. 2 E lyo wishi atile: “Ine naleti, ‘Ufwile walimupata.’+ E co namupeelele ku nshindishi yobe.+ Bushe umwaice wakwe tawama ukumucila? E o upilemo.” 3 Lelo Samsone abebele ati: “Uno muku nshakabe na mulandu wa mulopa ku baPelishiti nga nabacita ububi.”+

4 Awe Samsone aile no kuyaikata bamumbwe+ imyanda itatu (300) no kubuula ifyenge no kukakanya imicila ibili ibili no kubika icenge cimo pa kati ka micila ibili, pa kati pene. 5 E lyo ayashishe ifyenge no kuleka bamumbwe baye mu mabala ya ngano ishaiminine isha baPelishiti. E fyo aocele fyonse ukutendekela ku myanshi ukufika na ku ngano ishaiminine na mabala ya myangashi na ya miolife.+

6 Kabili abaPelishiti batampile ukulaipushanya ati: “Nani acitile ifi?” E lyo batile: “Ni Samsone shifyala wa mwina Timuna, pantu abuulile umukashi wakwe no kumupeela ku nshindishi yakwe.”+ Awe abaPelishiti baliile no kuyaoca ulya mukashana na wishi ku mulilo.+ 7 E lyo Samsone abebele ati: “Apo mwacite ci, tapali ico ine ningacita kano ukuilandwila pali imwe,+ nga nacita ifi e lyo nkaleka.” 8 Kabili alibakomene, alonganike imikonso pa matanta pa numa ya kwipayaula kukalamba, e lyo aile no kutendeka ukwikala mu lucengo lwa mu Etamu.+

9 Pa numa abaPelishiti+ baliile no kupanga inkambi mu Yuda+ no kulashinguluka mu Lehi.+ 10 E lyo abaume ba mu Yuda batile: “Nga cinshi ico mwaishila ku kulwa na ifwe?” na bo batile: “Twishile mu kukaka Samsone, no kumucita nge fyo atucitile.” 11 E ico abaume amakana yatatu (3,000) aba mu Yuda baile ku lucengo lwa mu Etamu+ no kutila kuli Samsone: “Bushe tawaishiba ukuti abaPelishiti e batuteka?+ Nga cinshi ici wacita kuli ifwe?” E lyo abebele ati: “Ifyo bacitile kuli ine e fyo na ine mbacitile.”+ 12 Lelo bamwebele abati: “Twishile kuno ku kukukaka, pa kuti tukupeele mu minwe ya baPelishiti.” E lyo Samsone abebele ati: “Lapeni ukuti imwe tamwancene.” 13 E ico bamwebele ati: “Iyo, lelo tulekukaka fye, no kukupeela mu minwe yabo; kabili tatwakwipaye nakalya.”

Awe balimukakile ne myando ibili+ iipya no kumufumya mu cilibwe. 14 Kabili afikile ku Lehi, na baPelishiti na bo balipundile no kusekelela ilyo bamumwene.+ Kabili umupashi+ wa kwa Yehova waishile pali ena, ne myando yali ku maboko yakwe yasangwike nge nsalu iyapya ku mulilo,+ ica kuti ifikakilo fyakwe fyalisungulwike ku maboko yakwe. 15 Nomba asangile umubango ubishi uwa mpunda no kutambulula ukuboko kwakwe no kuusenda no kuuminako abantu ikana limo (1,000).+ 16 E lyo Samsone atile:

“Ku mubango wa mpunda—umwina umo, imiina ibili!

Ku mubango wa mpunda napuminako abaume ikana limo (1,000).”+

17 Nomba ilyo apwishishe ukulanda, apoosele umubango uwali mu minwe yakwe no kwinika ilya ncende ati Ramatilehi.+ 18 Nomba e lyo aumfwile icilaka nga nshi, kabili alilile kuli Yehova no kutila: “Ni mwe mwalenga ne mubomfi wenu ukupususha nga nshi abantu benu,+ kabili nomba bushe mfwe ku cilaka kabili bushe mponene mu minwe ya bashasembululwa?”+ 19 E ico Lesa alepwile apafonka apali mu Lehi, na menshi+ yatendeke ukufuma, kabili alinwene, e lyo amaka+ yakwe yabwelelemo na o alipuupuutwike. + E co ainikile palya pantu ati En-hakore, apaba mu Lehi ukufika na lelo.

20 Kabili apingwile abena Israele mu nshiku sha baPelishiti imyaka amakumi yabili (20).+

16 Awe Samsone aile ku Gasa+ no kumona umwanakashi cilende kulya no kuya ku mwakwe.+ 2 Kabili bamo bashimikile abena Gasa, abati: “Samsone naisa kuno.” Awe e pa kumushinguluka+ no kumubelamina ubushiku bonse mu mpongolo ya musumba.+ Awe baikele fye tondolo ubushiku bonse, abati: “Nga bwaca fye, twalamwipaya.”+

3 Lelo, Samsone alisendeme ukufika ubushiku pa kati kabili pa kati ka bushiku alimine no kwikata ifiibi fya ku mpongolo+ ya musumba ne nceshi shibili isha mpongolo no kufinukwila pamo no mupindo no kufibika pa mabeya yakwe no kufisenda+ pa muulu wa lupili ulwaba ku ntanshi ya Hebrone.+

4 Nomba pa numa atemenwe umwanakashi wa ku mumana wa Soreke, ishina lyakwe ni Delila.+ 5 Kabili bakateka+ ba baPelishiti baishile ku mwanakashi no kumweba abati: “Musembeleke+ no kumona ni kwi kwaba amaka yakwe ayafule ifi ne co twingamwanshishako ne co twingamukakilako pa kuti tumunashe; kabili ifwe cila muntu tukakupeela indalama sha silfere ikana limo no mwanda umo (1,100).”+

6 Pa numa Delila atile kuli Samsone: “Njebeni, Ni mwi mwaba amaka yenu ayafula ifi kabili cinshi mwingakakilwako pa kuti umuntu amunashe?”+ 7 Awe Samsone amwebele ati: “Nga bankaka ne nshinga ishibishi cinelubali (7) ishishauma, kuti nanaka no kuba nge fyaba abantu bonse.” 8 E ico bakateka+ ba baPelishiti bamuleteele inshinga ishibishi cinelubali (7) ishishauma. E lyo amukakile na sho. 9 Nomba abamubelamine baikele mu muputule wakwe uwa mu kati,+ kabili umwanakashi atile: “Samsone, wafwa abaPelishiti+ abo baisa!” E lyo aputwile inshinga, filya umwando wabola uputuka ilyo wakumya ku mulilo.+ Kabili tabaishibe ukwalefuma amaka yakwe.+

10 E lyo Delila+ atile kuli Samsone: “Moneni! Mwantumfya pa kumbepa ubufi.+ Nomba njebeni ico bengamukakilako.” 11 E ico amwebele ati: “Nga bankaka sana ne myando ipya iishatala aibomfiwa, kuti nanaka no kuba ngo muntu onse.” 12 E ico Delila abuulile imyando ipya no kumukaka no kutila: “Samsone, wafwa abaPelishiti abo baisa!” Ili lyonse ninshi abamubelamine bekele mu muputule wa mu kati.+ E lyo aputwile imyando ku maboko yakwe kwati bushishi.+

13 E lyo Delila atile kuli Samsone: “Ukufika na nomba mulentumfya fye ukulambepa ubufi.+ Njebeni ico mwingakakwako.”+ Na o amwebele ati: “Nga wanduka ifikuti cinelubali (7) ifya ku mutwe wandi no bushishi.”+ 14 Awe afikakiile ku lupoopo, e lyo atile: “Samsone, wafwa abaPelishiti abo baisa!”+ Na o ashibwike mu tulo no kufumya ulupoopo no bushishi.

15 Nomba umwanakashi atile: “Kuti mwatila shani, ‘Nalikutemwa,’+ apo umutima wenu tawaba na ine? Iyi miku itatu mulantumfya no kukananjeba umwaba amaka yenu ayafula ifi.”+ 16 Nomba apo alimupatikishe+ ku mashiwi yakwe inshita yonse no kumupamfya, alicushiwe cikanga ne mfwa.+ 17 Asukile amweba fyonse ifyali mu mutima+ wakwe no kutila: “Nshatalabeya umushishi,+ pantu ndi muNasiri wa kwa Lesa ukufuma fye mwi fumo lya kwa mayo.+ Nga bambeya umushishi, amaka yandi na yo kuti yafuma muli ine, kabili kuti nanaka no kuba nge fyaba abantu bonse.”+

18 Ilyo Delila amwene ukuti alimusokolwelele fyonse ifyali mu mutima wakwe, apo pene fye atumine aba kwita bakateka ba baPelishiti,+ ati: “Iseni uno muku, pantu nanjeba fyonse ifyaba mu mutima wakwe.”+ Kabili bakateka ba baPelishiti baile kuli ena ukuti bamupeele indalama.+ 19 Kabili amulengele ukulaala utulo pa makufi yakwe. E lyo aitile umwaume kabili amubeyele ifikuti cinelubali (7) ifya ku mutwe wakwe, e lyo amunashishe, na maka yakwe yalipwile. 20 Nomba umwanakashi atile: “Samsone, wafwa abaPelishiti abo baisa!” Awe alishibwike mu tulo twakwe no kutila: “Nalafuma nga filya ncita lyonse+ no kuipususha.” Lelo taishibe ukuti Yehova alimushile.+ 21 E ico abaPelishiti balimwikete no kumutonkola amenso+ no kumuleta ku Gasa+ no kumukaka iminyololo ya mukuba; + kabili alebomba umulimo wa kupela+ mu cifungo.+ 22 Nomba umushishi wakwe watendeke ukumena bwino bwino ilyo fye bamubeyele.+

23 Bakateka ba baPelishiti balongene pamo pa kuti bapeele ilambo likalamba kuli Dagone+ lesa wabo no kuti basekelele, kabili baleti: “Lesa wesu napeela mu minwe yesu Samsone umulwani wesu!”+ 24 Ilyo abantu bamumwene, apo pene batendeke ukulumbanya lesa wabo,+ baleti “pantu lesa wesu napeela mu minwe yesu umulwani+ wesu kabili uwaleonaula icalo+ cesu kabili uwaipeye abantu besu abengi.”+

25 Nomba ico imitima yabo yalesekelela,+ balasosa abati: “Iteni Samsone uleke atusansamusheko.”+ E ico baitile Samsone ukufuma mu cifungo ukuti acite ifyangalo ku cinso cabo;+ kabili bamwimike pa kati ka nceshi shibili. 26 E lyo Samsone atile ku mulumendo wamwikete ku kuboko: “Leka njikate ku nceshi isho ino ng’anda yaikalapo kabili leka nshintilileko.” 27 (Nomba, mu ng’anda mwaiswile abaume na banakashi na bakateka bonse aba baPelishiti e mo bali;+ kabili pa mutenge pali abaume na banakashi nalimo amakana yatatu (3,000) abaletamba ilyo Samsone alebasekesha.)+

28 Samsone+ nomba alilile kuli Yehova+ no kutila: “Shikulu Mulopwe Yehova, napapaata njibukisheni+ no kunkosha+ uno muku fye, mwe Lesa wa cine, no kuleka njilandule pa baPelishiti pa linso lyandi limo.”+

29 E lyo Samsone ashintilile ku nceshi shibili isha pa kati apo ing’anda yaikele, no kwikata lumo ku kuboko kwa ku kulyo na lumbi ku kwa ku kuso. 30 Kabili Samsone atile: “Lekeni mfwile+ pamo na baPelishiti.” E lyo asunkile na maka, ne ng’anda yawilile bakateka na bantu bonse abalimo,+ ica kuti abafwile abo aipeye pa mfwa yakwe balifulile ukucila abo aipeye ilyo ali uwa mweo.+

31 Pa numa bamunyina na bonse aba mu ng’anda ya kwa wishi balishile no kumwimya e lyo bamusendele no kuyamushiika pa kati ka Sora+ na Eshtaole+ mu nshiishi ya kwa Manoa+ wishi. Kabili apingwile abena Israele pa myaka amakumi yabili (20).+

17 Nomba kwali umuntu wa mu calo ca mpili ica kwa Efraimu+ ishina lyakwe ni Mika. 2 Awe atile kuli nyina: “Indalama sha silfere ikana limo no mwanda umo (1,100) isho bamubuulile kabili isho mwatiipilepo+ uwabuulile no kuyumfwila ndeyumfwila—moneni! ishi isha silfere nine nkwete. Nine nasendele.”+ E lyo nyina atile: “Apaalwe kuli Yehova umwana wandi.”+ 3 Awe abweseshe indalama sha silfere ikana limo no mwanda umo (1,100) kuli nyina;+ kabili nyina atile: “Ukupeela ndepeela ishi ndalama sha silfere kuli Yehova pa kuti ciwamine umwana wandi, pa kuti icimpashanya icabaswa+ ne cimpashanya icaengululwa fipangwe;+ kabili nomba ndekubwesesha.”

4 E ico abweseshe isha silfere kuli nyina, kabili nyina abuulile indalama sha silfere imyanda ibili (200) no kupeela kafula wa silfere.+ Kabili apangile icimpashanya icabaswa+ ne cimpashanya icaengululwa;+ kabili cali mu ng’anda ya kwa Mika. 5 Uyu muntu Mika, alikwete ing’anda ya tulesa,+ kabili abilile ica kufwala ca efode+ no kupanga akalubi+ no kupeela umwana wakwe umo amaka,+ ukuti e o abe shimapepo wakwe.+ 6 Muli shilya nshiku tamwali imfumu mu Israele.+ Awe umuntu onse alecita icawama mu menso yakwe.+

7 Nomba kwali umulumendo wa mu Betelehemu+ mu Yuda uwa mu lupwa lwa kwa Yuda, kabili ali mwina Lebi.+ Kabili aleikala kulya inshita iinono. 8 Kabili uyu muntu afumine ku musumba wa Betelehemu mu Yuda ku kuyaikala inshita inono konse uko engasanga incende. Pa lwendo lwakwe asukile afika mu calo ca mpili ica kwa Efraimu ukufika na ku ng’anda ya kwa Mika.+ 9 E lyo Mika amwipwishe ati: “Ni kwi wafuma?” Na o ayaswike ati: “Ndi mwina Lebi, nafuma ku Betelehemu mu Yuda, kabili ndeya ku kulebela konse uko ningasanga incende.” 10 E lyo Mika atile: “Ikala na ine kabili ube tata+ kabili shimapepo+ wandi, na ine nkalakupeela indalama sha silfere ikumi (10) cila mwaka ne fya kufwala fyalinga ne fya kulya.” Awe umwina Lebi alingiile. 11 E ico umwina Lebi apingwilepo ukwikala na ulya muntu, kabili uyu mulumendo ali fye ngo mwana wakwe. 12 Kabili, Mika alaashike+ umwina Lebi, pa kuti uyu mulumendo abe shimapepo+ wakwe no kwikala mu ng’anda ya kwa Mika. 13 E ico Mika atile: “Nomba naishiba ukuti Yehova akancitila ubusuma, pantu umwina Lebi naba shimapepo wandi.”+

18 Muli shilya nshiku tamwali mfumu mu Israele.+ Kabili mu nshiku shilya umukowa wa kwa Dani+ walefwaya impanga ya bupyani iya kwikalamo; pantu ukufika pali bulya bushiku tabakwete impanga ya bupyani mu mikowa ya kwa Israele.+

2 Abana ba kwa Dani basukile batuma abaume basano aba mu lupwa lwabo, abantu babo, abantu abali aba maka, abafumine mu Sora+ na mu Eshtaole,+ ukuti bayelengula+ icalo no kucibebeta. E lyo babebele abati: “Kabiyeni, kabebeteni icalo.” Awe bafikile mu calo ca mpili ica kwa Efraimu+ ku ng’anda ya kwa Mika+ kabili e ko balele ubushiku. 3 Ilyo bapaleme ku ng’anda ya kwa Mika, baishibe ishiwi lya mulumendo, umwina Lebi, e pa kuyako. E lyo bamwipwishe abati: “Nani akuletele kuno, kabili cinshi ulecita kuno, kabili cinshi ulefwaya kuno?” 4 Na o abaswike ati: “Ifi ne fi e fyo Mika ancitiile ukuti ndemubombela,+ no kuti mbe shimapepo+ wakwe.” 5 E lyo bamwebele ati: “Ipusha+ kuli Lesa+ pa kuti twishibe nga tukenda bwino pa lwendo lwesu.” 6 E ico shimapepo amwebele ati: “Kabiyeni umutende. Yehova napaala ulwendo lwenu.”

7 Awe abaume basano baleya fye mpaka bafika na ku Laishi+ no kumona ifyo abantu abali kulya baikele bwino ukwabula ukushintilila pali bambi ukulingana no lutambi lwa bena Sidone, bali tondolo kabili umutelelwe,+ kabili takwali uwa mutitikisha uwalecusha abantu mu calo, pantu bali ukutali ukufuma ku bena Sidone+ kabili tabaleumfwana na bantu bambi.

8 Basukile bafika kuli bamunyinabo pa Sora+ na pa Eshtaole,+ kabili bamunyinabo batendeke ukubepusha abati: “Mwaendele shani?” 9 E lyo batile: “Imeni, kabili natuyebalwisha; pantu natumona icalo, kabili, moneni! cisuma nga nshi.+ Nomba cinshi muleshingashingila? Mwishimunuka ukuyapoka icalo.+ 10 Ilyo mwaingila, mukasanga abantu aba mutelelwe,+ kabili icalo cikulu; pantu Lesa nacipeela mu minwe yenu,+ icalo umushabula kantu nangu kamo akaba pano isonde.”+

11 E lyo abaume imyanda mutanda (600) abaipangeshe ne fyanso fya bulwi, ukufuma mu lupwa lwa kwa Dani,+ bafumine kulya, e kuti, ku Sora na ku Eshtaole.+ 12 Kabili baliile no kuyapanga inkambi pa Kiriati-yearimu+ mu Yuda. E mulandu wine bainikila ilya ncende Mahane-dani+ ukufika na lelo. Moneni! Yaba ku masamba ya Kiriati-yearimu. 13 Kabili bafumine kulya no kuya ku calo ca mpili ica kwa Efraimu no kufika ku ng’anda ya kwa Mika.+

14 E lyo abaume basano abaile mu kulengula+ icalo ca Laishi+ baebele bamunyinabo ati: “Bushe mwalishiba ukuti muli aya mayanda mwaba ica kufwala ica efode na kalubi+ ne cimpashanya icabaswa+ ne cimpashanya icaengululwa?+ Nomba tontonkanyeni ico mwalacita.”+ 15 E ico baile kulya no kufika pa ng’anda ya mulumendo, umwina Lebi,+ pa ng’anda ya kwa Mika, no kutendeka ukumuposha.+ 16 Inshita yonse iyi abaume imyanda mutanda abaipangeshe ne fyanso fyabo ifya bulwi,+ aba mu bana ba kwa Dani,+ baiminine fye pa mpongolo. 17 Abaume basano abaile ku kulengula icalo+ nomba baliile, ukuti bengile no kusenda icimpashanya icabaswa+ ne ca kufwala ca efode+ na kalubi+ ne cimpashanya icaengululwa.+ (Kabili shimapepo+ aiminine pa mpongolo na baume imyanda mutanda [600] abaipangeshe ne fyanso fya bulwi.) 18 Kabili aba baingile mu ng’anda ya kwa Mika no kubuula icimpashanya icabaswa, ica kufwala ca efode na kalubi ne cimpashanya icaengululwa.+ E lyo shimapepo+ abepwishe ati: “Cinshi mulecita?” 19 Lelo bamwebele ati: “Talala. Bika ulupi pa kanwa, kabili natuleya pa kuti ube shifwe+ kabili shimapepo wesu.+ Bushe icisuma ni cili kwi, iwe ukutwalilila ukuba shimapepo wa ng’anda ya muntu umo+ nelyo ukuba shimapepo wa mukowa kabili ulupwa lwa mu Israele?”+ 20 Awe umutima wa kwa shimapepo walisekelele,+ kabili abuulile ica kufwala ca efode na kalubi ne cimpashanya icabaswa+ no kuya pamo na aba bantu.

21 Awe balyalwike no kuya no kutangisha abaice ne fitekwa ne fipe fya mutengo.+ 22 Kabili baendele akatalamukila ukufuma ku ng’anda ya kwa Mika ilyo abantu abali mu mayanda yali mupepi ne ng’anda ya kwa Mika+ balongene pamo no kwesha ukukonka abana ba kwa Dani. 23 Ilyo balebilikisha ku bana ba kwa Dani, balipilibwike no kutila kuli Mika: “Cinshi ulefwaya+ ifi walonganika aba bantu pamo?” 24 E ico atile: “Tulesa+ uto napangile+ namubuula, pamo na shimapepo,+ kabili muleya, bushe ine cinshi ico nalashala na co?+ Nomba kuti mwanjipusha shani amuti, ‘Cinshi ulefwaya?’” 25 E lyo abana ba kwa Dani bamwebele abati: “Wileka ishiwi lyobe lyumfwike kuli ifwe, epali abaume abankalwe+ bamusansa, kabili wafwa pamo na ba mu ng’anda yobe.” 26 Kabili abana ba kwa Dani batwalilile fye ukwenda; e lyo Mika amwene ukuti balikosele ukumucila,+ awe alyalwike no kubwelelamo ku ng’anda yakwe.

27 Lelo bena babuulile ifyo Mika apangile e lyo na shimapepo+ wakwe, kabili baleya ukulola ku Laishi,+ ku bantu abali tondolo kabili aba mutelelwe.+ Kabili babakomene ku lupanga,+ no koca umusumba ku mulilo.+ 28 Awe takwali wa kubapokolola, pantu kwali ukutali na ku Sidone,+ kabili tabaleumfwana na bantu bambi; kabili mwali ni mu mpanga iyabatama iya mu Beterehobo.+ Kabili bakuulile umusumba no kutendeka ukwikalamo.+ 29 Kabili, bainike ulya musumba ati Dani, ilyali e ishina lya kwa shibo, Dani,+ uwafyelwe kuli Israele.+ Lelo, kale umusumba waleitwa ati Laishi.+ 30 E lyo abana ba kwa Dani baimike icimpashanya icabaswa;+ na Yonatani+ mwana Gershomu,+ mwana Mose, pamo na bana bakwe e bali bashimapepo mu mukowa wa bana ba kwa Dani ukufika ilyo basendele abantu ba muli ici calo muli bunkole.+ 31 Awe basungile icimpashanya icabaswa ica kwa Mika, ico apangile, no kucimiika kulya inshiku shonse isho ing’anda+ ya kwa Lesa wa cine yali mu Shilo.+

19 Nomba mu nshiku shilya tamwali imfumu mu Israele.+ Kabili umwina Lebi umo ali umulebeshi mu ncende yali ukwalepesha iya mu calo ca mpili ica kwa Efraimu.+ Awe uyu muntu umuya inshiku aupile kanakashi+ uwa ku Betelehemu+ mu calo ca Yuda. 2 Awe kanakashi wakwe atendeke ukucita ubulalelale.+ Asukile uyu umwanakashi afuma kuli ena no kuya ku ng’anda ya kwa wishi mu Betelehemu mu Yuda kabili aikele kulya imyeshi ine iituntulu. 3 E lyo umulume wakwe aimine no kumukonkela ukuti alande nankwe amashiwi ayasuma pa kuti amubweshe; kabili ali no mubomfi+ wakwe ne mpunda ishilume shibili. E ico uyu mwanakashi amwingishe mu ng’anda ya kwa wishi. Ilyo wishi wa mukashana amumwene, apo pene alisekelele pa kumumona. 4 Awe shifyala, wishi wa mukashana, alimutekele, ica kuti aikele nankwe inshiku shitatu; kabili balelya no kunwa, na o alesendama kulya kwine ubushiku.+

5 Nomba pa bushiku bwalenga shine, ilyo baimine ulucelo nga pe, aliimine nomba ukuti aleya, lelo wishi wa mukashana atile kuli shifyala: “Tala ulye umukate+ unono, ukwate amaka e lyo pa numa kuti mwaya.” 6 Awe balikele, kabili bonse babili batendeke ukulya no kunwa; e lyo wishi wa mukashana atile kuli uyu muntu: “Wiya, usendame kuno ubushiku,+ kabili leka umutima obe usansamuke.”+ 7 Ilyo uyu muntu aimine ukuti aleya, shifyala alemupapaata, ica kuti asendeme kulya kwine na kabili.+

8 Ilyo aimine ulucelocelo ubushiku bwalenga shisano ukuti aleya, wishi wa mukashana atile: “Senda ifya kulya ifya kumupeela amaka.”+ Kabili baleshingashinga mpaka na kasuba kayaluka. Kabili bonse babili balelya. 9 Umwaume+ nomba alimine ukuti aleya, pamo na kanakashi+ wakwe no mubomfi+ wakwe; lelo shifyala, wishi wa mukashana, atile: “Mona, nomba! Akasuba kaya kalewa. Sendama kuno.+ Akasuba nomba kalawa. Sendama kuno ubushiku, kabili leka umutima obe usansamuke.+ Kabili mailo mukema ulucelo no kutendeka ulwendo lwenu, e lyo ukaye kwi tenti lyobe.” 10 Awe, uyu mwaume tasumine ukusendama kulya, lelo aliimine no kutendeka ulwendo no kufika apalungatana na Yebusi,+ e kuti, Yerusalemu;+ kabili ali ne mpunda ishilume shibili ishakwete ne fya kwikalapo, na kanakashi wakwe no mubomfi wakwe.

11 Ilyo bali mupepi na ku Yebusi, ninshi bwaya buleila,+ umubomfi atile kuli shikulu wakwe: “Iseni twalukile kuli uyu musumba wa bena Yebusi+ e ko tuyesendama.” 12 Lelo shikulu wakwe amwebele ati: “Twiyalukila ku musumba wa bambi bambi+ abashaba pa bana ba kwa Israele; lelo tufwile ukwenda ukufika ku Gibea.”+ 13 Kabili aebele umubomfi wakwe ukuti: “Isa uleke tufike pa musumba umo, umusumba wa Gibea nelyo uwa Rama,+ kabili kulya e ko twalasendama.” 14 E ico balipitile no kutwalilila ulwendo lwabo, kabili akasuba kabawilile mupepi na ku Gibea, umusumba uwaba mu Benjamini.

15 Awe e ko bayalukile pa kuti basendame mu Gibea. Kabili balingile no kwikala mu lubansa lwa musumba, kabili takwali uwabasendele ku ng’anda pa kuti basendame.+ 16 Awe, moneni! umuntu umukote alefuma mu kubomba mwi bala icungulo,+ kabili uyu muntu ali wa ku calo ca mpili ica kwa Efraimu,+ kabili aleikala mu Gibea; lelo abaume ba muli iyi ncende bali bena Benjamini.+ 17 Ilyo ainwine amenso amwene umwaume, umulendo, mu lubansa lwa mu musumba. E ico uyu mukote amwipwishe ati: “Ni kwi uleya, kabili ni kwi wafuma?”+ 18 Na o ayaswike ati: “Tulepita fye ukufuma ku Betelehemu mu calo ca Yuda ukuya ku ncende shaba ukwalepesha isha mu calo ca mpili ica kwa Efraimu.+ E ko nafumine, lelo naile ku Betelehemu mu Yuda;+ kabili ni ku ng’anda yandi ndebwelela, lelo takuli uunsendele ku ng’anda yakwe.+ 19 Kabili natukwata impimbili ne fya kulya+ fya mpunda shesu, kabili ine no musha wenu umwanakashi+ no mubomfi+ uuli no musha wenu natukwata umukate+ no mwangashi. Tapali ico tushikwete.” 20 Lelo, umukote atile: “Shi naube no mutende!+ Leka nkupeele conse ico ushikwete.+ Lelo wisendama mu lubansa.” 21 E lyo amwingishe mu ng’anda+ no kupoosela impunda+ icani. Kabili basambile amakasa+ yabo no kutendeka ukulya no kunwa.

22 Ilyo balesansamusha imitima yabo,+ moneni! abaume ba mu musumba, ifinangwa fye,+ bashingulwike ing’anda,+ balesunkana no kupuma ku ciibi; kabili baleti ku mukote, umwine wa ng’anda: “Fumya umwaume uwishile mu ng’anda yobe, pa kuti tulaale nankwe.”+ 23 E lyo umwine wa ng’anda afumiine kuli bena no kubeba ati:+ “Iyo, bamunyinane,+ mwicita icabipa, pantu uyu mwaume eshile mu ng’anda yandi. Mwicita ici cintu ca museebanya.+ 24 Moneni, pali umwana wandi umukashana nacisungu na kanakashi wa uyu mwaume. Shi lekeni mbafumishe pa nse na imwe mulaale na bo+ no kucita ifyo mulefwaya kuli bena. Lelo kuli uyu mwaume mwicita ici cintu ca museebanya, ica buwelewele.”

25 Awe abaume tabafwaile ukukutika ku fyo alesosa. E ico umuntu abuulile kanakashi+ wakwe no kumufumisha pa nse kuli bena; kabili batendeke ukuulungana nankwe,+ no kumucenda+ ubushiku bonse mpaka ulucelo, e lyo bamulekele aya ku macaca. 26 Kabili kanakashi aishile ilyo kwaleyaluka ulucelo, no kuwila pa mwinshi wa ng’anda ya ulya mukote umwali shikulu wakwe,+—mpaka bwaca. 27 Pa numa shikulu wakwe aliimine ulucelo no kwisula iciibi ca ng’anda no kufuma ukuti atendeke ulwendo lwakwe, kabili moneni! umwanakashi, kanakashi+ wakwe, nawa pa mwinshi wa ng’anda ninshi na maboko yakwe yali pa mwinshi! 28 E ico amwebele ati: “Ima, natuleya.” Lelo taleyasuka.+ E lyo amubuulile no kumubika pa mpunda kabili aliimine no kuya ku mwakwe.+

29 E lyo aingile mu ng’anda yakwe no kubuula umwele no kwikata kanakashi wakwe no kumuputaula cilundwa cilundwa mu fiputulwa ikumi na fibili (12)+ no kufituma mu fitungu fyonse ifya mu Israele.+ 30 Nomba onse uwamona aleti: “Ica musango yu tacabala acicitika nelyo ukumoneka ukufuma pa bushiku abana ba kwa Israele bafumine mu Egupti ukufika na lelo. Tontonkanyeni pali ici, mupandane amano+ no kulandapo.”

20 E ico abana ba kwa Israele bonse balifumine+ no lukuta lonse lwalilongene pamo ngo muntu umo+ kuli Yehova pa Mispa,+ ukufuma ku Dani+ ukufika ku Beere-sheba+ pamo ne calo ca Gileadi.+ 2 E ico abakalamba ba mu bantu bonse kabili aba mu mikowa yonse iya kwa Israele baiminine mu lukuta lwa bantu ba kwa Lesa wa cine,+ abaume amakana imyanda ine (400,000) abale-enda pa makasa abaishiba ukulwa no lupanga.+

3 Kabili abana ba kwa Benjamini baumfwile ukuti abana ba kwa Israele baliile ku Mispa.+

E lyo abana ba kwa Israele batile: “Soseni. Bushe icintu cabipa ifi cicitike shani?”+ 4 E lyo umwina Lebi,+ umulume wa mwanakashi baipeye, ayaswike no kutila: “Ni ku Gibea,+ iya mu Benjamini, e ko naile, ine na kanakashi+ wandi, pa kuti tusendame kulya. 5 Kabili abekashi ba mu Gibea balinjimine no kushinguluka ing’anda umo nali ubushiku. Nine balefwaya ukwipaya, lelo baulungene+ na kanakashi wandi, mpaka asuka afwa no kufwa.+ 6 E ico nabuulile kanakashi wandi no kumuputaula no kutuma ifipimfya mu fitungu fyonse ifya calo ca kwa Israele,+ pantu bacitile ica nsoni+ kabili ica bunani mu Israele.+ 7 Moneni! Imwe bonse mwe bana ba kwa Israele, landenipo kabili pandaneni amano.”+

8 Awe abantu bonse balimine ngo muntu umo,+ abati: “Takuli nangu umo pali ifwe uwalaya kwi tenti lyakwe, nangu ku ng’anda yakwe.+ 9 Nomba ici e co tulecita kuli Gibea. Natupendule,+ tusale aba kuyalwa nankwe. 10 Kabili pa baume umwanda umo (100) mu mikowa yonse iya kwa Israele tulebuulapo abaume ikumi (10), kabili pa baume ikana limo (1,000) tulebuulapo abaume umwanda umo na pa baume amakana ikumi (10,000) tulebuulapo abaume ikana limo, aba kufwaila abantu ifya kulya, pa kuti bayelwa na Gibea wa kwa Benjamini, pa mulandu wa ca museebanya+ conse ico bacitile mu Israele.” 11 E ico abaume bonse aba mu Israele balilongene ku kulwa no musumba ngo muntu umo, abaikatana.

12 Awe imikowa ya mu Israele yatumine abantu ku baume ba mu mukowa wa kwa Benjamini,+ abati: “Bushe ici cintu cabipa ifi cacitika shani mu kati kenu?+ 13 Nomba, tupeeni abo baume,+ ifinangwa,+ abali mu Gibea,+ ukuti tubepaye,+ kabili natufumye ifyabipa mu Israele.”+ Awe abana ba kwa Benjamini tabafwaile ukuumfwa ku fyo bamunyinabo, abana ba kwa Israele balelanda.+

14 Kabili abana ba kwa Benjamini balilongene ku nse ya misumba ku Gibea pa kuti bayelwa na bana ba kwa Israele. 15 E ico abana ba kwa Benjamini balilongene bulya bushiku ukufuma mu misumba yabo, abaume amakana amakumi yabili na makana mutanda (26,000) abaishibe ukulwa no lupanga,+ ukufumyako abekashi ba mu Gibea, umo bafumishe abaume imyanda cinelubali (700). 16 Pa bantu bonse aba, pali abaume abacenjela imyanda cinelubali (700) abalebomfya amaboko yabo aya ku kuso.+ Onse pali aba alesukusa ilibwe+ ku kantu akali ngo mushishi ubunono no kupusa iyo.

17 Kabili abaume ba kwa Israele balilongene ukufumyako Benjamini, abaume amakana imyanda ine (400,000) abaishibe ukulwa no lupanga.+ Bonse bali baume ba bulwi. 18 Awe baliimine no kuya ku Betele no kwipusha kuli Lesa.+ E lyo abana ba kwa Israele batile: “Nani pali ifwe uwalaba pa ntanshi mu kulwa na bana ba kwa Benjamini?”+ E lyo Yehova atile: “Yuda e walaba pa ntanshi.”+

19 E lyo abana ba kwa Israele baimine ulucelo no kupanga inkambi pa Gibea.

20 Abaume ba kwa Israele nomba baile ku kulwa na Benjamini; kabili abaume ba kwa Israele baipekenye ukulwa na bo pa Gibea. 21 E ico abana ba kwa Benjamini bafumine mu Gibea+ no kwipaya abaume ba mu Israele amakana amakumi yabili na makana yabili (22,000) bulya bushiku.+ 22 Lelo, abaume ba mu Israele, balishipile no kuya na kabili ku kuipekanishisha ukulwa pa ncende baiteyanishishepo pa bushiku bwa kubalilapo. 23 Kabili abana ba kwa Israele baliile no kulilila+ kuli Yehova ukufika icungulo no kwipusha kuli Yehova, abati: “Bushe ndeya na kabili mu kulwa na bana ba kwa Benjamini munyinane?”+ E lyo Yehova atile: “Kabiye.”

24 Awe abana ba kwa Israele baile ku bana ba kwa Benjamini pa bushiku bwa bubili.+ 25 Benjamini na o afumine ku Gibea pa kuti alwe na bo pa bushiku bwalenga shibili kabili aipeye abaume ba kwa Israele na bambi amakana ikumi na makana cinekonsekonse (18,000),+ bonse abaishibe ukulwa no lupanga.+ 26 Awe abana ba kwa Israele bonse,+ abantu bonse, baile ku Betele no kulila+ no kwikala pa ntanshi ya kwa Yehova no kuleka ukulya+ pa bushiku bulya ukufika icungulo no kutuula imituulo ya koca+ ne mituulo ya mutende+ pa ntanshi ya kwa Yehova. 27 Kabili abana ba kwa Israele baipwishe kuli Yehova,+ pantu kulya e kwali icipao ca cipangano+ ica kwa Lesa wa cine muli shilya nshiku. 28 Nomba Finehasi+ mwana Eleasari, mwana Aarone, aiminine ku ntanshi ya ciko muli shilya nshiku,+ no kutila: “Bushe ndeya na kabili ku kulwa na bana ba kwa Benjamini munyinane nelyo ndeke?”+ E lyo Yehova atile: “Kabiye, pantu mailo nkamupeela mu minwe yobe.”+ 29 E lyo Israele abikile aba kubelamina+ abena Gibea konse konse.

30 Kabili abana ba kwa Israele baile ku kulwa na bana ba kwa Benjamini pa bushiku bwalenga shitatu, no kuiteyanishisha ukulwa na Gibea nge fyo bacitile pa nshita imbi.+ 31 Ilyo abana ba kwa Benjamini baile ku kulwa na ba bantu, bakulilwe ukufuma ku musumba.+ Kabili, nge fyo cali pa nshita imbi, baipeyepo abaume aba mu Israele+ nalimo amakumi yatatu (30) no kubacenaula mu misebo, umo uwaya ku Betele+ na umbi ku Gibea,+ mu mpanga. 32 E ico abana ba kwa Benjamini batile: “Tulebacimfya nga filya twabacimfishe pa kubala.”+ Abana ba kwa Israele, batile: “Natufulumuke,+ kabili tulebakula ukufuma ku musumba ukuya mu misebo.” 33 Kabili abaume bonse aba kwa Israele baimine ukufuma mu fifulo bali no kuiteyanya ukulwa pa Baali-tamari, ninshi aba mu Israele ababeleme+ balefuma umo bali mupepi na Gibea.+ 34 E ico abaume bacenjela ukufuma mu Israele onse abali amakana ikumi (10,000) baishile ku ntanshi ya musumba wa Gibea, kabili ubulwi bwalikosele; na bena Benjamini tabaishibe ukuti ubucushi+ bwalaswa bubaponene.

35 Kabili Yehova acimfishe Benjamini+ pa cinso ya bena Israele, ica kuti abana ba kwa Israele pali bulya bushiku baipeye abaume abena Benjamini amakana amakumi yabili na yasano no mwanda umo (25,100), bonse abaishibe ukulwa no lupanga.+

36 Lelo, abana ba kwa Benjamini baleti balecimfya abaume ba kwa Israele ilyo bafulumwike+ kuli Benjamini pantu abaume ba kwa Israele bacetekele ababeleme abo babikile pa Gibea. 37 Ababeleme bena, babombele bwangu bwangu no kuya ku Gibea.+ Kabili ababeleme+ balisalangene no kwipaya aba mu musumba bonse ku lupanga.+

38 Nomba abaume ba mu Israele bapangene na babeleme ukuti bacite icishibilo ca kufutumune cushi mu musumba.+

39 Ilyo abana ba kwa Israele babwelele mu bulwi, Benjamini atendeke ukukoma no kucena abaume nalimo amakumi yatatu (30) pa baume ba kwa Israele,+ pantu batile: “Cine cine tulebacimfya filya cali na mu bulwi bwa kubalilapo.”+ 40 Kabili icishibilo+ catendeke ukwima mu musumba ica ntumba ya cushi.+ E ico ilyo Benjamini aloleshe ku numa, moneni! icushi mu musumba onse caleya mu muulu.+ 41 Awe abaume ba mu Israele balipilibwike,+ kabili abaume ba kwa Benjamini balifulungene,+ pantu balimwene ukuti ubucushi bwabaponena.+ 42 E ico bayalwike ku ntanshi ya baume ba kwa Israele ukulola ku matololo, kabili abashilika balebakonka mupepi, ninshi abaume abafumine mu misumba balebepaya mu kati kabo. 43 Bashingulwike Benjamini.+ Balimukonkele ukwabula no kutuusha.+ Balimunyantawile apalungatene na Gibea+ lwa ku kabanga. 44 Awe abaume ba kwa Benjamini amakana ikumi na cinekonsekonse (18,000) balifwile, bonse aba bali baume ba maka.+

45 E ico balyalwike no kuya balefulumukila ku matololo ku cilibwe ca Rimone.+ Kabili baipeye abaume na bambi amakana yasano (5,000) abashelepo mu misebo,+ kabili balebakonka mupepi ukufika na ku Gidomu no kwipailapo abaume na bambi amakana yabili (2,000). 46 Kabili abena Benjamini bonse abafwile bulya bwine bushiku bali abaume amakana amakumi yabili na yasano (25,000) abaishibe ukulwa no lupanga,+ bonse aba bali baume ba maka. 47 Lelo abaume imyanda mutanda (600) balyalwike no kufulumukila ku matololo ku cilibwe ca Rimone, kabili baikele ku cilibwe ca Rimone+ imyeshi ine.

48 Kabili abaume abena Israele babwelele ku kulwa na bana ba kwa Benjamini no kukoma ku lupanga aba mu musumba, ukutendekela pa bantu ukufika ku fitekwa na fyonse ifyasangilwe.+ Kabili, imisumba yonse iyasangilwe bayocele ku mulilo.+

21 Nomba abaume ba kwa Israele balilapile ku Mispa,+ abati: “Takuli umuntu pali ifwe uukapeela umwana wakwe umwanakashi ku bena Benjamini ukuba umukashi.”+ 2 E ico abantu baishile ku Betele+ no kwikala kulya pa ntanshi ya kwa Lesa wa cine+ ukufika icungulo no kulasansula amashiwi yabo no kulila icine cine.+ 3 Kabili baleti: “Cinshi, mwe Yehova Lesa wa kwa Israele, ico ici cacitikila mu Israele, ukuti umukowa umo wabulila lelo mu Israele?”+ 4 Nomba ubushiku bwakonkelepo abantu balimine ulucelo no kukuula iciipailo kulya no kupeela umutuulo wa koca+ no mutuulo wa mutende.+

5 Kabili abana ba kwa Israele batile: “Nani pa mikowa yonse iya kwa Israele uushishile ku kulongana pamo kuli Yehova, pantu natulapa umulapo ukalamba+ ukukuma ku ushishile kuli Yehova ku Mispa, uwa kuti, ‘Afwile fye ukufwa.’”+ 6 Kabili abana ba kwa Israele batendeke ukulanguluka pali munyinabo Benjamini. E ico batile: “Lelo umukowa umo nauputulwa mu Israele. 7 Cinshi twalacita ku bashele pa kuti tubasangile abakashi, apo twalilapa+ kuli Yehova ukuti tatwakapeele abana besu abakashana ukuba abakashi babo?”+

8 Kabili batile: “Nani pa mikowa ya mu Israele uushishile kuli Yehova ku Mispa?”+ Kabili, moneni! takuli uwaishile mu nkambi ukufuma ku Yabeshe-gileadi+ ku kulongana. 9 Ilyo abantu bapendelwe, moneni! tapali nangu umo uwaishile ukufuma ku Yabeshe-gileadi. 10 E ico ulukuta lwatumine abaume aba maka nga nshi amakana ikumi na yabili (12,000) kulya no kubeba ati: “Kabiyeni muyekoma abekashi ba mu Yabeshe-gileadi ku lupanga, kumo na banakashi na baice.+ 11 Kabili mukacite ifi: Umwaume onse no mwanakashi onse uwalaalapo no mwaume, mwipaye.”+ 12 Lelo, basangile pa bekashi ba mu Yabeshe-gileadi+ abakashana imyanda ine (400), banacisungu,+ abashabalile abalaala no mwaume. E ico babaletele mu nkambi pa Shilo,+ iyaba mu calo ca Kanaani.

13 Kabili ulukuta lonse nomba lwatumine aba kuyalanda ku bana ba kwa Benjamini abali ku cilibwe ca Rimone+ no kupanga na bo umutende. 14 Awe abena Benjamini balibwelele pali ilya nshita. Kabili babapeele abanakashi abo bashaipeye pa banakashi ba mu Yabeshe-gileadi;+ lelo tabasangile abengabakumana.+ 15 Awe abantu balangulukile Benjamini+ pantu Yehova alimupaatwile ku mikowa ya kwa Israele. 16 E ico abakalamba ba lukuta batile: “Twalacita shani ku baume abashele ukwabula abakashi, pantu abanakashi baliloba mu bena Benjamini?” 17 E lyo batile: “Kufwile ukuba ubupyani ku bapuswike muli Benjamini,+ pa kuti umukowa wiloba mu Israele. 18 Ifwe kwena, tatusuminishiwe ukubapeela abakashi pa bana besu, pantu abana ba kwa Israele balilapa, abati: ‘Alitiipwa uwapeela umukashi kuli Benjamini.’”+

19 Awe batile: “Moneni! Kulaba umutebeto wa kwa Yehova cila mwaka ku Shilo,+ uwabela ku kapinda ka ku kuso aka Betele, ku kabanga ka musebo ukalamba uwafuma ku Betele ukuya ku Shekemu+ na ku kapinda ka ku kulyo aka Lebona.” 20 E ico baebele abana ba kwa Benjamini, abati: “Kabiyeni, kabili kabelameni mu mabala ya myangashi. 21 Kabili muloleshe, nomba ilyo abana banakashi aba ku Shilo bafuma ku kucinda+ baleshinguluka, mufume mu mabala ya myangashi no kuisendela ku maka onse umukashi pa bana banakashi aba mu Shilo, kabili mukaye ku calo ca Benjamini. 22 Kabili nga bashibo nelyo bamunyinabo batulubulwisha, ifwe tukabeba ati: ‘Mubabelele uluse pali ifi baibuulila abene cila muntu umukashi, pantu twafililwe ukubasangila abakashi ilyo twaile ku bulwi,+ kabili apo te imwe mwabapeela aba banakashi tamukwete umulandu pa mulapo twalapile.’”+

23 Awe abana ba kwa Benjamini bacitile ifyo fine, kabili babuulile abakashi ukulingana ne mpendwa+ yabo pa banakashi balecinda+ baleshinguluka, abo basompwele; e lyo baile no kubwelela ku mpanga yabo iya bupyani no kukuula imisumba+ no kwikalamo.

24 Kabili abana ba kwa Israele batendeke ukusalangana ukufuma palya pali ilya nshita, umuntu onse ku mukowa wakwe na ku lupwa lwakwe; kabili bafumine kulya no kuya, cila muntu ku mpanga yakwe iya bupyani.+

25 Muli shilya nshiku tamwali imfumu mu Israele.+ Umuntu onse alecita icawama mu menso yakwe.+