Ibuuku lya Cibili Ilya kwa Samwele

1 Nomba ilyo Shauli afwile, kabili ilyo Davidi abwelele ukufuma ku kwipaya abena Amaleke,+ Davidi aikele mu Siklagi inshiku shibili.+ 2 Nomba pa bushiku ubwalenga shitatu, moneni! kwaishile umuntu+ uwafumine mu nkambi, uwafumine kuli Shauli, uwafwele ifya kufwala ifyalepuka+ kabili ali ne loba pa mutwe;+ kabili ilyo fye afikile kuli Davidi, awile pa nshi+ alatoota.

3 E lyo Davidi amwipwishe ati: “Ni kwi wafuma?” na o ayaswike ati: “Ku nkambi ya bena Israele e ko napusuka.” 4 E lyo Davidi amwipwishe ati: “Bushe ifintu fili shani? Shi njeba.” Na o atile: “Abantu nabafulumuka ku bulwi kabili abengi nabawa no kufwa,+ kabili Shauli+ na Yonatani+ umwana wakwe nabafwa.” 5 Davidi aipwishe umulumendo uwalemweba ati: “Waishiba shani ukuti cine cine Shauli no mwana wakwe Yonatani nabafwa?”+ 6 E lyo umulumendo uwalemweba atile: “Cali fye nkuma, nali pa Lupili lwa Gilboa,+ kabili namwene Shauli ashintilile pe fumo lyakwe;+ kabili, moneni! aba pa maceleta na ba pali bakabalwe balepalamina kuli ena.+ 7 Ilyo apilibukile ku numa, amona ine, alinjitile, na ine nalyaswike ati, ‘Mukwai!’ 8 E lyo anjipwishe ati, ‘Ni wani?’ na ine natile, ‘Ndi mwina Amaleke.’+ 9 E lyo anjebele ati, ‘Isa, unjipaye, pantu ninjikatwa icifungalashi, lelo umweo+ wandi ucili muli ine.’ 10 E ico napaleme apo ali no kumwipaya,+ pantu nalishibe ukuti ilyo awile tali no kuba no mweo kabili. E lyo nabuulile icisote ca bufumu+ icali pa mutwe wakwe ne koosa ilyali ku kuboko kwakwe, ukuti mfilete kuno kuli shikulu.”

11 E lyo Davidi aikete ifya kufwala fyakwe no kufilepula,+ na bantu abali nankwe na bo bacitile ifyo fine. 12 Kabili batampile ukuloosha no kulila+ kabili balekele ukulya+ mpaka icungulo pa mulandu wa kwa Shauli no mwana wakwe Yonatani na pa mulandu wa bantu ba kwa Yehova na pa mulandu wa ba mu ng’anda ya kwa Israele,+ pantu balipaiwe ku lupanga.

13 E lyo Davidi aipwishe umulumendo uwamushimikile ifi fintu ati: “Bushe uli wa kwi?” na o atile: “Ndi mwana wa mulebeshi, umwina Amaleke.”+ 14 Kabili Davidi amwipwishe ati: “Bushe cinshi ushatiinine+ ukubika iminwe pa wasubwa+ wa kwa Yehova no kumwipaya?” 15 E lyo Davidi aitile umulumendo wakwe umo no kutila: “Palama. Mukome.” Awe alimukomene na o alifwile.+ 16 Na Davidi atile: “Umulopa obe ube pa mutwe obe,+ pantu akanwa kobe kakushinina+ akati, ‘Nine naipeye uwasubwa wa kwa Yehova.’”+

23 Shauli na Yonatani,+ abatemwikwa kabili abasuma imitima mu bumi bwabo,

2 Nomba pa numa ya ifi, Davidi aipwishe Yehova+ ati: “Bushe nje mu musumba umo uwa kwa Yuda?” Yehova amwebele ati: “Kabiye.” E lyo Davidi aipwishe ati: “Ni kwi uko ndeya?” Na Lesa atile: “Ku Hebrone.”+ 2 Awe Davidi aileko pamo na bakashi bakwe babili, Ahinoamu+ umwina Yesreele na Abigaili+ uwali umukashi wa kwa Nabali umwina Karmele. 3 Kabili Davidi alisendele na baume+ ali na bo, cila muntu na ba mu ng’anda yakwe; na bo baikele mu mishi ya mu ncende ya Hebrone. 4 E lyo abaume ba kwa Yuda+ baishile no kusuba+ Davidi kulya ku kuba imfumu pa ng’anda ya kwa Yuda.+

Kabili baebele Davidi abati: “Abena Yabeshe-gileadi e bashiikile Shauli.” 5 E ico Davidi atumine inkombe ku ba ku Yabeshe-gileadi+ no kubeba ati: “Yehova amupaale,+ pantu mwali ne cikuuku+ kuli shikulwinwe, kuli Shauli, no kumushiika.+ 6 Nomba Yehova abe ne cikuuku+ ne cishinka kuli imwe, na ine nkamucita icisuma ici, pantu mwacitile ici cintu.+ 7 Nomba amaboko yenu nayakose kabili beni aba maka,+ pantu shikulwinwe Shauli alifwa, kabili nine aba mu ng’anda ya kwa Yuda basuba ukuba imfumu+ ya kubateka.”

8 Lelo Abnere+ mwana Nere umukalamba wa bashilika ba kwa Shauli, abuulile Ishiboshete,+ umwana wa kwa Shauli no kumutwala ku Mahanaimu,+ 9 no kumusonta ukuba imfumu pali Gileadi+ na pa bena Ashere na pali Yesreele+ na pali Efraimu+ na pali Benjamini+ na pali Israele onse. 10 Ishiboshete mwana Shauli, ali ne myaka amakumi yane (40) ilyo atendeke ukuteka Israele, kabili atekele pa myaka ibili. Lelo aba mu ng’anda ya kwa Yuda+ beka e balekonka Davidi. 11 Kabili imyaka Davidi ali imfumu mu Hebrone pa ng’anda ya kwa Yuda yali imyaka cinelubali (7) ne myeshi mutanda (6).+

12 Mu kuya kwa nshita, Abnere mwana Nere na babomfi ba kwa Ishiboshete, mwana Shauli, bafumine ku Mahanaimu+ no kuya ku Gibeone.+ 13 Kumfwa Yoabu+ mwana Seruya+ na babomfi ba kwa Davidi, baile ku Hebrone kabili bakumanine pa cishiba ca Gibeone; awe balikele, aba ku lubali luno ulwa cishiba na balya kwi shilya lya cishiba. 14 Abnere asukile aeba Yoabu ati: “Shi leka beme abalumendo, no kuleka bacimfyanye pa menso yesu.” Na o Yoabu atile: “Nabeme.” 15 Awe balimine. Ibumba limo na limo lyasalile impendwa ya bantu ba kucimfyanya kabili balyabwike. Basalile abena Benjamini ikumi na babili (12) ukufuma mwi bumba lya kwa Ishiboshete+ mwana Shauli na bantu ikumi na babili ukufuma mu babomfi ba kwa Davidi. 16 Kabili batampile ukwikatana ku mitwe, kabili umuntu no muntu alashile ulupanga lwakwe mu lubafu lwa munankwe, kabili bafwilile capamo. Kabili cilya cifulo cainikwe ati Helkati-hasurimu, icaba mu Gibeone.+

17 Kabili ubulwi bwalikosele bulya bushiku, na Abnere+ na bena Israele basukile bacimfiwa ku babomfi ba kwa Davidi. 18 Nomba abana ba kwa Seruya+ batatu e ko bali, Yoabu+ na Abishai+ na Asaele;+ kabili Asaele ali wa lubilo nge mpombo+ sha mu mpanga. 19 Awe Asaele aile alekonka Abnere, kabili tapaatukile ku kwa kulyo atemwa ku kwa kuso mu kukonka Abnere. 20 E lyo Abnere acebukile ku numa no kutila: “Bushe ni we Asaele?” na o atile “Nine.” 21 E lyo Abnere amwebele ati: “Paatukila ku kulyo kobe atemwa ku kuso, wikate umo uwa mu balumendo, upoke ne fyo akwete+ fibe fyobe.” Lelo Asaele tafwaile ukupaatuka no kuleka ukumukonka. 22 E ico Abnere aebele Asaele na kabili ati: “Bwelelamo, leka ukunkonka. Bushe ulefwaya nkwipaye?+ Nga nakwipaya kuti nayalolenkana shani na Yoabu munonko?” 23 Lelo alekaana ukuleka ukumukonka; e ico Abnere amulashile cimfutyanuma kwi fumo pa lufumo,+ ica kuti ifumo lyafumine na ku numa; kabili awile palya no kufwila apo pene. Nomba onse uwaishile apali icitumbi ca kwa Asaele, aleiminina shilili.+

24 Lelo Yoabu na Abishai bakonkele Abnere. Ilyo akasuba kalewa, bafikile pa kapili ka Ama, akaba pa ntanshi ya Gia mu nshila ya ku matololo ya Gibeone.+ 25 Na bana ba kwa Benjamini balongene kuli Abnere, baba ibumba limo, baiminina na pa muulu wa kapili kamo. 26 E lyo Abnere abilikishe kuli Yoabu ati: “Bushe mwakulalwa fye ifi fine ku lupanga inshiku pe?+ Bushe tawishibe ukuti pakasuka pakakonke ifyabipa?+ Bushe kufika ku nshita nshi ulekaana ukweba abantu ukuleka ukukonka bamunyinabo?”+ 27 Na o Yoabu atile: “Na pali Lesa wa cine,+ aubula ukusosa,+ abantu nga tabalekele ukukonka bamunyinabo ukufika no lucelo.” 28 E lyo Yoabu alishishe intandala,+ na bantu bonse baliminine no kuleka ukukonka abena Israele, kabili tabwekeshepo ukulwa na kabili.

29 Lelo Abnere na bantu bakwe baendele ukupita mu Araba+ ubushiku bulya bonse no kwabuka Yordani,+ e lyo bapitile na mu mukonko monse basukile bafika ku Mahanaimu.+ 30 Yoabu ena alekele ukukonka Abnere no kubwelelamo, atampile no kulonganya abantu. Kabili pa babomfi ba kwa Davidi, pabulile abantu ikumi na pabula (19) na Asaele. 31 Lelo ababomfi ba kwa Davidi bena, baipeyepo abena Benjamini na bantu ba kwa Abnere imyanda itatu na makumi mutanda (360).+ 32 Awe basendele Asaele+ no kumushiika mu nshiishi ya kwa wishi,+ iyaba mu Betelehemu.+ E lyo Yoabu na bantu bakwe baendele ubushiku bonse, kabili bwabacelele mu Hebrone.+

3 Nomba ubulwi pa ba mu ng’anda ya kwa Shauli na ba mu ng’anda ya kwa Davidi bwalikokwele;+ na Davidi aleya alekoselako,+ lelo aba mu ng’anda ya kwa Shauli baleya balenaka.+

2 Muli iyo nshita, Davidi afyele abana baume+ mu Hebrone+, kabili ibeli lyakwe ali ni Amnone+ muli Ahinoamu+ umwina Yesreele. 3 Kabili uwa cibili ali ni Kiliabu+ muli Abigaili+ uwali umukashi wa kwa Nabali umwina Karmele, no wa citatu ali ni Abishalomu+ umwana wa kwa Maaka, umwana mwanakashi wa kwa Tolmai+ imfumu ya Geshuri. 4 No wa cine ali ni Adoniya+ umwana mwaume uwa kwa Hagiti,+ no wa cisano ali ni Shefatia+ umwana mwaume uwa kwa Abitali. 5 No wa mutanda (6) ali ni Itreamu+ muli Egla umukashi wa kwa Davidi. Aba e bana Davidi afyalile mu Hebrone.

6 Nomba ilyo ubulwi pa ba mu ng’anda ya kwa Shauli ne ng’anda ya kwa Davidi bwatwalilile, Abnere+ alekoselako fye mu ng’anda ya kwa Shauli. 7 Nomba Shauli ali na kanakashi ishina lyakwe Rispa,+ mwana Aya.+ Kabili Ishiboshete+ atile kuli Abnere: “Nga cinshi wasendamine na kanakashi+ wa kwa tata?” 8 Awe Abnere afulilwe+ icibi pa mashiwi ya kwa Ishiboshete kabili asosele ati: “Bushe ndi mbwa+ ya mu calo ca Yuda? Ukutula kale ukufika na lelo naliba ne cikuuku ku ba mu ng’anda ya kwa Shauli wiso, kuli bamunyina na ku banankwe, kabili nshaleka ukuti wikatwe kuli Davidi; e lyo lelo ulendubulwisha pa mwanakashi? 9 Lesa nakande Abnere kabili alundenapo,+ nga nshakacite kuli Davidi+ ifyo Yehova alapile kuli ena, 10 ku kukuusha ubufumu ukufuma ku ng’anda ya kwa Shauli no kupampamika icipuna ca bufumu ica kwa Davidi pali Israele na pali Yuda ukufuma ku Dani ukufika na ku Beeresheba.”+ 11 Na o afililwe ukwasuka Abnere na fimbi pantu alemutiina.+

12 Awe Abnere atumine inkombe kuli Davidi ilyo line, ati: “Bushe ca kwa nani icalo?” asosele no kuti: “Natupangane icipangano, kabili moneni! ukuboko kwandi kukaba na imwe, ukwalwila Israele onse kuli imwe.”+ 13 Na o atile: “Cawama! Nalapangana icipangano na iwe. Cintu fye cimo e co ndefwaya kuli iwe: ‘Te kuti tumonane+ kano waleta Mikali,+ umwana mwanakashi wa kwa Shauli ilyo ukesa mu kumonana na ine.’” 14 Davidi atumine ne nkombe kuli Ishiboshete,+ mwana Shauli, ati: “Mpeela umukashi wandi Mikali, uo nakobekelele mu nkanda sha pa mpela ya bwaume+ isha baPelishiti umwanda umo (100).” 15 Awe Ishiboshete atumine aba kuyamubuula ukufuma ku mulume wakwe, Paltiele+ mwana Laishi. 16 Lelo umulume wakwe aile nankwe, aile alelila, alemukonka ukufika fye na ku Bahurimu.+ E lyo Abnere amwebele ati: “Kabiye, bwelelamo!” Na o alibwelelemo.

17 Abnere alitumine amashiwi ku bakalamba ba kwa Israele ati: “Ku numa uku+ mwalefwaya Davidi ukuba imfumu pali imwe. 18 Aleni nomba, citenipo cimo, pantu Yehova umwine asosele kuli Davidi ati, ‘Ku kuboko kwa kwa Davidi+ umubomfi wandi e ko nkapusushisha abantu bandi abena Israele mu minwe ya baPelishiti na mu minwe ya balwani babo bonse.’” 19 E lyo Abnere asosele na ku bena Benjamini,+ kabili Abnere aile no kusosa kuli Davidi mu Hebrone fyonse ifyo abena Israele na bena Benjamini balefwaya ukucita.

20 Ilyo Abnere afikile kuli Davidi ku Hebrone, na bantu amakumi yabili (20), Davidi acitiile Abnere umutebeto+ na bantu abali nankwe. 21 E lyo Abnere aebele Davidi ati: “Lekeni njime, ndeya mu kwita abena Israele bonse balongane kuli shikulu imfumu, pa kuti bapangane icipangano na imwe, na imwe mukaba imfumu pali conse ico umutima wenu ufwaya.”+ Awe Davidi alekele Abnere ukuya, kabili aile umutende.+

22 E lyo ababomfi ba kwa Davidi na Yoabu babwelele ukufuma mu kusansa, kabili baletele ifipe+ ifyo bapokele ifingi. Lelo Abnere tali na Davidi mu Hebrone, pantu alimulekele aye, kabili aleya umutende. 23 Na Yoabu+ ne bumba lyonse ilya bashilika ilyali nankwe balifikile, e lyo bashimikile Yoabu, abati: “Abnere+ mwana Nere+ aishile ku mfumu, na yo naimuleka ukuti aye, kabili naya umutende.” 24 E lyo Yoabu aingile ku mfumu no kutila: “Cinshi ico mwacita?+ Moneni! Abnere aishile kuli imwe. Cinshi ico mwamulekela aya umutende?25 Mwalimwishiba Abnere mwana Nere, ni ku kumubepa aishiile, no kwishiba ukufuma kwenu no kwingila kwenu+ no kwishiba conse ico mulecita.”+

26 Awe Yoabu afumine kuli Davidi kabili atumine inkombe sha kukonka Abnere, na sho shailemubwesesha+ pa cishima ca Sira; lelo Davidi taishibe fyonse ifi. 27 Ilyo Abnere abwelele ku Hebrone,+ Yoabu amusendele ku mbali mu kati ka mpongolo pa kuti alande nankwe mu nkama.+ Lelo, kulya kwine amulashile ulupanga mwi fumo,+ ica kuti afwilile pa mulandu wa mulopa wa kwa Asaele+ munyina. 28 Ilyo Davidi aumfwile, atile: “Ukulingana ne fyo Yehova amona ifintu, ine no bufumu bwandi tuli ba kaele umuyayaya ku mulopa+ wa kwa Abnere mwana Nere. 29 Naube pa mutwe+ wa kwa Yoabu na pa ba mu ng’anda ya kwa wishi bonse, kabili mu ng’anda ya kwa Yoabu,+ mwikatala amubulwa umwaume uuli ne filesuuma+ ku fya mfwalo no wa fibashi+ no mwaume uwa kubombela ku mupeto wa kupyatilako+ no wa kwipaiwa ku lupanga no wa nsala!”+ 30 Lelo Yoabu na Abishai+ munyina baipeye Abnere+ pa mulandu wa kuti aipeye Asaele munyinabo mu Gibeone mu bulwi.+

35 Pa numa abantu bonse baishile ku kupeela Davidi ifya kulya+ fya cisansamushi muli bulya bwine bushiku, lelo Davidi alilapile ati: “Lesa ankande+ kabili alundenapo, nga nalalyapo ifya kulya ilyo akasuba takalawa!”+ 36 Na bantu bonse balimwene, kabili caliweme mu menso yabo. Nga filya conse ico imfumu yalecita caleba icisuma, e fyo ne ci cintu cali icisuma mu menso ya bantu bonse.+ 37 Kabili abantu ba kwa Davidi bonse na bena Israele bonse balishibe muli bulya bushiku ukuti tacali kupanga kwa mfumu ukwipaya Abnere mwana Nere.+ 38 Kabili Imfumu yatile ku babomfi ba iko: “Bushe tamwishibe ukuti ni cilolo kabili umukalamba wa mu Israele e wawa buno bushiku mu Israele?+ 39 Kabili buno bushiku ndi uwanaka sana nangu nasubwa+ ukuba imfumu, kabili aba bantu, abana baume ba kwa Seruya,+ bankalwe.+ Shi Yehova nacite ku wacita ububi ukulingana no bubi bwakwe.”+

4 Ilyo mwana+ Shauli aumfwile ukuti Abnere nafwa mu Hebrone,+ alyumfwile umwenso nga nshi+ na bena Israele bonse balisakamene. 2 Nomba kwali abaume babili, abakalamba ba fipondo+ fya kwa mwana Shauli, ishina lya umo ni Baana ne shina lya munankwe ni Rekabu, abana baume ba kwa Rimone umwina Beerote, uwa mu bana ba kwa Benjamini; pantu umusumba wa Beerote+ na o walependelwa kuli Benjamini. 3 Kabili abena Beerote balifyukile no kuya ku Gitaimu,+ e ko baileba abalebeshi ukufika na ku bwa lelo.

4 Nomba Yonatani,+ mwana Shauli, ali no mwana mwaume uwalemana amakasa.+ Ali ne myaka isano ilyo ilyashi lya mfwa ya kwa Shauli na Yonatani lyaishile ukufuma ku Yesreele;+ no walemusunga alimusendele no kufulumuka. Nomba ilyo alefulumuka mu mwenso, aliponene no kulemana. Ne shina lyakwe ni Mefiboshete.+

5 Awe abana ba kwa Rimone umwina Beerote, Rekabu na Baana, baile no kuyaingila mu ng’anda ya kwa Ishiboshete,+ pa nshita akasuba kakabile sana, kabili ali nasendama ninshi akasuba kali pa kati ka mutwe. 6 Kabili basokelele mu kati ka ng’anda kwati balefwaya ingano, kabili bamulashile mu lufumo;+ kabili Rekabu na Baana+ munyina balibutwike, tapali no wabamwene. 7 Ilyo bafikile mu ng’anda, asendeme pa ca kusendamapo cakwe mu muputule wakwe uwa kusendamamo, e lyo bamulashile no kumwipaya,+ bamuputwile no mutwe+ bausenda no kwenda mu musebo ubushiku bonse ukuya ku Araba. 8 Basukile bafisha umutwe wa kwa Ishiboshete+ kuli Davidi ku Hebrone no kutila ku mfumu: “Moneni umutwe wa kwa Ishiboshete mwana Shauli umulwani+ wenu uwalefwaya umweo+ wenu; lelo Yehova buno bushiku nalandwila+ shikulu imfumu pali Shauli na bana bakwe.”

9 Lelo Davidi ayaswike Rekabu na Baana munyina, abana ba kwa Rimone umwina Beerote, no kubeba ati: “Na pali Yehova+ uwapuswishe+ umweo+ wandi ku kucula konse,+ 10 ilyo umo anshimikile+ ati, ‘Moneni Shauli nafwa,’ kabili umwine aimwene kwati aleta imbila nsuma, lelo nalimwikete no kumwipaya+ mu Siklagi ilyo nalingile ukumupeela icilambu ca nkombe;11 nga cileba shani ku bantu ababifi+ abaipaya umulungami mu ng’anda yakwe pa busanshi bwakwe? Bushe te kuti mfwaye umulopa wakwe ku minwe yenu,+ kabili bushe nshilingile no kumufumya pano isonde?”+ 12 E lyo Davidi aebele abalumendo ukuti babepaye na bo balibepeye+ no kubaputula ifisansa na makasa no kukobeka+ ifitumbi fyabo mupepi ne cishiba mu Hebrone; kabili babuulile umutwe wa kwa Ishiboshete, baushiikile na mu nshiishi ya kwa Abnere mu Hebrone.+

5 Mu kuya kwa nshita imikowa yonse iya kwa Israele yaile kuli Davidi+ ku Hebrone+ no kutila: “Moneni! Ifwe tuli bamunyinenwe.+ 2 Ukufuma fye na kale+ ilyo Shauli ali imfumu yesu, ni mwe mwaletungulula Israele mu bulwi.+ Na Yehova atile kuli imwe, ‘Ni we ukacema+ abantu bandi abena Israele, kabili iwe ukaba intungulushi+ pa bena Israele.’” 3 E ico abakalamba+ bonse aba mu Israele baile ku mfumu ku Hebrone, kabili Imfumu Davidi yapangene icipangano+ na bo mu Hebrone ku cinso ca kwa Yehova; e lyo basubile+ Davidi ukuba imfumu ya bena Israele.+

4 Davidi ali ne myaka amakumi yatatu (30) ilyo atendeke ukuteka. Atekele pa myaka amakumi yane (40).+ 5 Mu Hebrone atekele imyaka cinelubali (7) ne myeshi mutanda (6)+ pali Yuda; na mu Yerusalemu+ atekele imyaka amakumi yatatu na itatu (33) pali Israele onse na Yuda. 6 Awe imfumu na bantu ba iko baile ku Yerusalemu ku kulwa na bena Yebusi+ abaikele muli cilya calo, kabili batile kuli Davidi: “Tawaingilemo muno, kabili impofu na balemana e balakutamfya,”+ pantu bena baleti: “Davidi taingilemo muno.” 7 Na lyo line, Davidi apokele Sione, umusumba uwayafya ukufikako,+ e kutila, Umusumba wa kwa Davidi.+ 8 E ico Davidi muli bulya bushiku atile: “Onse uuleipaya abena Yebusi,+ apite umupita amenshi,+ no kusansa abalemana ne mpofu, abo Davidi apata!” E co basosela abati: “Impofu na balemana te kuti bengile muli cino cifulo.” 9 Kabili Davidi aikele mu ncende iyayafya ukufikako, kabili yainikwe ati Umusumba wa kwa Davidi; kabili Davidi atampile ukukuula konse konse ukutula Apalundumana+ no kwingila mu kati. 10 Awe Davidi aile alekoselako,+ na Yehova Lesa wa mabumba+ ali nankwe.+

11 Kabili Hiramu+ imfumu ya Turi atumine inkombe+ kuli Davidi, ne fimuti fya mikedari+ na bakabasa na baishiba ukuputula amabwe, na bo bakuuliile Davidi ing’anda.+ 12 E lyo Davidi aishibe ukuti Yehova namupampamika ukuba imfumu pali Israele+ no kuti nasansabika+ ubufumu bwakwe pa mulandu wa bantu bakwe abena Israele.+

13 E lyo Davidi abuulile bakanakashi+ na bambi no kuupilapo abanakashi+ na bambi mu Yerusalemu ilyo afumine ku Hebrone; kabili afyele abana baume na bana banakashi na bambi. 14 Kabili amashina ya bo afyalile mu Yerusalemu ni aya: Shamua+ na Shobabu+ na Natani+ na Solomone,+ 15 Ibhari na Elishua+ na Nefege+ na Yafia,+ 16 na Elishama+ na Eliada na Elifelete.+

17 Na baPelishiti balyumfwile ukuti nabasuba Davidi ukuba imfumu ya bena Israele.+ E lyo abaPelishiti bonse baile ku kufwaya Davidi. Ilyo Davidi aumfwile, atentemukile ku ncende iya-afishe ukufikako.+ 18 Na baPelishiti balishile no kulalulumba mu mpanga yabatama iya Refaimu.+ 19 E ico Davidi aipwishe+ Yehova ati: “Bushe njelwisha abaPelishiti? Bushe mulebapeela mu minwe yandi?” Na o Yehova atile kuli Davidi: “Kabiye, pantu nalapeela abaPelishiti mu minwe yobe.”+ 20 Awe Davidi afikile ku Baali-perasimu,+ e ko Davidi abepaile. E lyo atile: “Yehova nampongwelako abalwani+ bandi kwati menshi.” E co ainikile ilya ncende ati Baali-perasimu.+ 21 E ico bashile utulubi+ twabo kulya, na Davidi na bantu bakwe balitusendele.+

22 Pa numa abaPelishiti balishile na kabili+ no kulapitana mu mpanga yabatama iya Refaimu.+ 23 E lyo Davidi aipwishe+ kuli Yehova, lelo amwaswike ati: “Wiyako. Pitila ku numa yabo, no kubasanshila ku ntanshi ya fimpusa fya bakha.+ 24 Nomba, ilyo walaumfwa inshindo mu muulu wa fimpusa fya bakha, ilyo line ucincile,+ pantu iyo nshita ninshi Yehova alekutangilila ku kusansa inkambi ya baPelishiti.”+ 25 Awe Davidi acitile ifyo fine ifyo Yehova amwebele,+ kabili aipeye+ abaPelishiti ukufuma ku Geba+ ukufika na ku Gesere.+

6 E lyo Davidi alonganike na kabili abaume bene bene aba mu Israele,+ amakana amakumi yatatu (30,000). 2 E lyo Davidi na bantu bonse abali nankwe baimine no kuya ku Baale-yuda+ ku kuyasenda icipao+ ca kwa Lesa wa cine, apaba ishina, ishina+ lya kwa Yehova wa mabumba,+ uwaikala pali bakerubi.+ 3 Lelo, batekele icipao ca kwa Lesa wa cine pe celeta ilipya,+ ukucifumya ku ng’anda ya kwa Abinadabu,+ iyali pa muulu wa kapili; kabili Usa na Ahio,+ abana baume ba kwa Abinadabu, e balekumba ing’ombe ishaletinta iceleta ilipya.

4 Awe bacisendele ukufuma ku ng’anda ya kwa Abinadabu, iyali pa muulu wa kapili—ne cipao ca kwa Lesa wa cine; na Ahio ali pa ntanshi ya Cipao. 5 Kabili Davidi na ba mu ng’anda ya kwa Israele bonse balesefya ku cinso ca kwa Yehova balelisha ifilimba fya misango yonse ifyapangwa ku mbao sha mukupri na bansango+ ne filimba fya nsale+ no tuoma+ na malangu na malimba.+ 6 Kabili basukile bafika apa kupumina ingano apa kwa Nakone, e lyo Usa+ atambike ukuboko ku cipao ca kwa Lesa wa cine no kucikata,+ pantu ing’ombe shapene shiciponye. 7 E lyo ubukali bwa kwa Yehova+ bwaishile pali Usa kabili Lesa wa cine alimwipeye+ palya pene pa kupama kwakwe, na o afwilile palya pene ku mbali ya cipao ca kwa Lesa wa cine.+ 8 Kabili Davidi alifulilwe pantu Yehova akalipe nga nshi pa co Usa acitile, na ilya ncende yainikwe ati Perese-usa ukufika kuli buno bushiku.+ 9 Kabili Davidi atiinine Yehova+ pali bulya bushiku no kusosa ati: “Bushe icipao ca kwa Yehova cikesa shani ku mwandi?”+ 10 Kabili Davidi tafwaile ukutwala icipao ca kwa Yehova uko aleikala ku Musumba wa kwa Davidi.+ E ico atile bacitwale ku ng’anda ya kwa Obed-edomu+ umwina Giti.+

11 Kabili icipao ca kwa Yehova caikele mu ng’anda ya kwa Obed-edomu umwina Giti pa myeshi itatu; na Yehova alepaala+ Obed-edomu na ba mu ng’anda yakwe bonse.+ 12 Ilyashi lyasukile lyafika kuli Davidi ati: “Yehova napaala ing’anda ya kwa Obed-edomu pa mulandu wa cipao ca kwa Lesa wa cine.” E lyo Davidi aile ku kusenda icipao ca kwa Lesa wa cine ukufuma mu ng’anda ya kwa Obed-edomu ukucitwala ku Musumba wa kwa Davidi ninshi balesekelela.+ 13 Nomba ilyo abasendele+ icipao ca kwa Yehova batampwile intampulo mutanda (6), ilyo line fye aipeye ing’ombe iilume na kana ka ng’ombe akaina.+

14 Kabili Davidi alecinda nasamwa pa cinso ca kwa Yehova, alecinda na maka yakwe yonse, ninshi nafwala efode+ wapangilwa ku bushishi bwa kolokondwe. 15 Kabili Davidi na ba mu ng’anda ya kwa Israele bonse baletwala icipao+ ca kwa Yehova ninshi baleaula+ no kulisha intandala.+ 16 Nomba ilyo icipao ca kwa Yehova cafikile mu Musumba wa kwa Davidi, Mikali,+ umwana mwanakashi wa kwa Shauli, alengeele pe windo no kumona Imfumu Davidi ilecilauka no kucinda pa cinso ca kwa Yehova; ali-isuulile+ mu mutima wakwe.+ 17 Awe baingishe icipao ca kwa Yehova no kucibika pa ncende ya ciko mwi tenti ilyo Davidi acipangiile;+ e lyo Davidi atuulile amalambo ya koca+ na malambo ya mutende+ kuli Yehova. 18 Ilyo Davidi apwishishe ukutuula amalambo ya koca na malambo ya mutende, apaalile+ abantu mwi shina lya kwa Yehova+ wa mabumba. 19 Kabili, ayakenye+ abantu bonse, ibumba lyonse ilya kwa Israele, abaume na banakashi, cila muntu umukate umo no mukate wapangilwa ku fisabo fya tuncindu ne fimama fya myangashi,+ e lyo abantu baile cila muntu ku mwakwe.

20 Nomba ilyo Davidi aile ku kupaala aba mu ng’anda yakwe,+ na Mikali,+ umwana mwanakashi wa kwa Shauli, afumiine ku kusengela Davidi, e lyo atile: “Ifyo yaicindamika lelo imfumu ya kwa Israele+ ilyo yacilafuula pa menso ya babomfi ba iko abanakashi, ifyo umuwelewele aifuula umubili onse!”+ 21 Na o Davidi atile kuli Mikali: “Ni ku cinso ca kwa Yehova nacilasamwa, kabili ndesefya ku cinso ca kwa Yehova,+ uwansalile+ ukuba intungulushi pa bantu ba kwa Yehova abena Israele ukucila wiso na ba mu ng’anda yakwe bonse. 22 Kabili nkailenga ukusuulwa ukucila ne fyo nacicita,+ kabili nalailenga uwa fye mu menso yandi; kabili na ku babomfi banakashi abo ulumbwile, nalaicindamikila+ mu menso yabo.” 23 E ico, Mikali,+ umwana mwanakashi wa kwa Shauli, tali no mwana ukufika na ku bushiku bwa mfwa yakwe.

7 Nomba ilyo imfumu yaikele mu ng’anda+ ya iko na Yehova ailengele ukutuusha ku balwani ba iko konse konse,+ 2 e lyo imfumu yaebele Natani+ kasesema aiti: “Mona, ine ndeikala mu ng’anda ya mbao+ sha mikedari ilyo icipao ca kwa Lesa wa cine caba mu matenti.”+ 3 Na o Natani atile ku mfumu: “Conse icili mu mutima wenu, citeni,+ pantu Yehova ali na imwe.”

4 Nomba mu nshita ya bushiku pali bulya bwine bushiku, icebo+ ca kwa Yehova caishile kuli Natani, aciti: 5 “Kabiye, kebe umubomfi wandi Davidi auti, ‘Yehova asosa ati: “Bushe iwe kuti wankuulila ing’anda ya kwikalamo?+ 6 Pantu nshatala njikala mu ng’anda ukutula fye pa bushiku nafumishe abana ba kwa Israele mu Egupti ukufika na buno bushiku,+ lelo nale-endauka+ fye mu matenti,+ e kutila mu cikuulwa ca mushilo.+ 7 Inshita yonse iyo naenda mu bana ba kwa Israele+ bonse, bushe nalyebapo umukowa umo pa mikowa ya kwa Israele+ uo naebele ukucema abantu bandi nati, ‘Cinshi ico mushankuulile ing’anda ya fimuti fya mikedari?’”’ 8 Nomba ifi e fyo ukebe umubomfi wandi Davidi auti, ‘E fyo Yehova wa mabumba asosa: “Ine nakubuulile ukufuma mu mpanga ya mulemfwe umo walesakamana impaanga+ pa kuti wise ube intungulushi+ ya bantu bandi abena Israele. 9 Kabili nakulaba na iwe konse uko waya,+ kabili nkalofya abalwani bobe bonse pa ntanshi yobe;+ kabili nkakulenga ukulumbuka,+ nge fyalumbuka abalumbuka ababa pe sonde. 10 Kabili nkasalila abantu bandi abena Israele icifulo+ no kubalimba,+ na bo bakekala mu cifulo cabo, kabili takwakabe na wa kubafulunganya na kabili; na babifi tabakabacushe na kabili nge fyo babacushishe kale,+ 11 ukutula pa nshiku nasontele abapingushi+ ukulatungulula abantu bandi abena Israele; kabili nkamuleka mukatuushe ku balwani bobe bonse.+

“‘“Kabili Yehova nakweba ukuti Yehova akakukuulila ing’anda.+ 12 Ilyo inshiku shobe shikapwa,+ kabili ukalaale no kwalaala ifikolwe fyobe,+ e lyo nkemya umwana obe uukakukonkapo, uukafuma mu nda yobe; kabili nkapampamika ubufumu bwakwe.+ 13 E ukakuulila ishina lyandi ing’anda,+ kabili nkapampamika icipuna ca bufumu bwakwe umuyayaya.+ 14 Ine nkaba wishi,+ na o akaba umwana wandi.+ Nga alufyanya, nkamulimuna ku nkonto+ ya bana ba bantu, na ku mpumo sha bana ba bantunse.*15 Kumfwa icikuuku candi, tacakafume pali ena filya nacifumishe pali Shauli,+ uo nafumishepo pa kuti mbikepo iwe. 16 Kabili ing’anda yobe no bufumu bobe fikatwalilila umuyayaya; icipuna cobe ica bufumu cikapampamikwa umuyayaya.”’”+

17 Natani aebele Davidi ukulingana ne fyali amashiwi yonse aya kabili ukulingana ne cimonwa ici conse.+

18 E lyo Imfumu Davidi yaingile no kwikala pa ntanshi ya kwa Yehova no kutila: “Nine ani,+ mwe Shikulu Mulopwe Yehova? Kabili bushe ing’anda yandi yalicindama apo mwancitila fyonse ifi fintu? 19 Mwe Shikulu Mulopwe Yehova, ifyo mwalanda ukuncitila kale kale fingi, lelo mwalanda no kuti ing’anda ya mubomfi wenu ikafika na ku nshita ya ku ntanshi sana; kabili ili e funde ilyapeelwa ku bantunse,+ mwe Shikulu Mulopwe Yehova.+ 20 Kabili finshi fimbi Davidi engasosa kuli imwe, apo mwe bene mwalishiba bwino umubomfi wenu,+ mwe Shikulu Mulopwe Yehova? 21 Pa mulandu wa mashiwi+ yenu kabili ukulingana ne fya mu mutima+ wenu mwacita ifi fintu fyonse ifikalamba kabili mwasokolwela umubomfi wenu.+ 22 E mulandu wine mwabela abakalamba,+ mwe Shikulu Mulopwe Yehova; pantu takwaba uwaba nga imwe,+ kabili takwaba Lesa umbi pali balesa bonse abo twaumfwa na matwi yesu, kano fye imwe mweka.+ 23 Kabili luko nshi lumbi pe sonde ulwaba nga bantu benu abena Israele,+ abo Lesa aileilubwila ukuba abantu+ bakwe no kuipangila ishina+ no kubacitila ifya maka kabili ifya kutiinya+—ku kutamfya inko na balesa ba shiko, pa mulandu wa bantu benu, abo mwailubwilile+ ukufuma mu Egupti? 24 Kabili mwalengele abantu benu abena Israele+ ukuba abantu benu umuyayaya; na imwe, mwe Yehova mwaba Lesa wabo.+

25 “Nomba, mwe Yehova Lesa, amashiwi ayo musosele pa mubomfi wenu na pa ba mu ng’anda yakwe yafikilisheni umuyayaya kabili citeni ifyo musosele.+ 26 Kabili ishina lyenu libe ilikalamba umuyayaya,+ pa kuti abantu bakatile, ‘Yehova wa mabumba ni Lesa wa bena Israele,’+ kabili ing’anda ya mubomfi wenu Davidi ipampamikwe ku cinso cenu.+ 27 Pantu mwe Yehova wa mabumba, Lesa wa kwa Israele, mwasokolwela umubomfi wenu, amuti, ‘Nkakukuulila ing’anda.’+ E co umubomfi wenu akwatila amaka ya kupepa kuli imwe ili pepo.+ 28 Nomba, mwe Shikulu Mulopwe Yehova, ni mwe Lesa wa cine; kabili amashiwi yenu, lekeni yabe aya cine,+ apo mwalaya umubomfi wenu icisuma ici.+ 29 Nomba, paaleni+ ing’anda ya mubomfi wenu pa kuti itwalilile umuyayaya ku cinso cenu;+ pantu imwe, mwe Shikulu Mulopwe Yehova, namulaya, kabili pa mulandu we paalo lyenu ing’anda ya mubomfi wenu ikapaalwa umuyayaya.”+

8 Nomba pa numa ya ifi, Davidi akomene abaPelishiti+ no kubacimfya,+ kabili Davidi apokele Mateg-amma mu minwe ya baPelishiti.

2 Kabili akomene abena Moabu+ no kubapimina ku ntambo, ukubalaalika pa nshi, pa kuti apime imitande ibili aba kwipaya, no mutande umo pa kuti babe no mweo;+ na bena Moabu baishileba ababomfi ba kwa Davidi+ aba kuleta imituulo.+

3 Kabili Davidi akomene Hadadesere+ mwana Rehobu imfumu ya ku Soba+ ilyo aleya ku kuyapokolola incende ya ku mumana wa Yufrate ukuti ibe mu minwe yakwe na kabili.+ 4 Davidi amupokele aba pali bakabalwe ikana limo ne myanda cinelubali (1,700) na ba pa makasa amakana amakumi yabili (20,000);+ kabili Davidi alemanike+ bakabalwe bonse aba kutinta amaceleta,+ lelo ashileko fye bakabalwe aba kutinta amaceleta umwanda umo (100).

5 Ilyo abena Siria aba ku Damaseke+ baile ku kwafwa Hadadesere imfumu ya ku Soba, Davidi aipeyepo abena Siria amakana amakumi yabili na yabili (22,000).+ 6 Kabili, Davidi abikile inkambi ya bashilika+ mu musumba wa Damaseke uwa mu Siria; kabili abena Siria baishileba ababomfi ba kwa Davidi aba kuleta umutuulo.+ Kabili Yehova alepususha Davidi konse uko aleya.+ 7 Kabili, Davidi apokele ne nkwela sha golde+ ishali ku babomfi ba kwa Hadadesere no kushisenda ku Yerusalemu. 8 Kabili mu Beta na mu Berotai, imisumba ya kwa Hadadesere, Imfumu Davidi yapokele umukuba uwingi nga nshi.+

9 Nomba Toi imfumu ya ku Hamati+ yaumfwile ukuti Davidi naipaya abashilika bonse aba kwa Hadadesere.+ 10 E ico Toi atumine umwana wakwe Yoramu ku Mfumu Davidi ku kuiposha+ no kuitasha pantu yalwile na Hadadesere no kumucimfya (pantu Hadadesere alelwa libili libili na Toi); kabili asendele ifipe fya silfere ne fya golde ne fya mukuba.+ 11 Ifi na fyo Imfumu Davidi yafipeele kuli Yehova, filya fine yapeele silfere na golde ifyo yapokele ku fyalo fyonse ifyo yacimfishe,+ 12 ku bena Siria na ku bena Moabu+ na ku bana ba kwa Amone na ku baPelishiti+ na kuli Amaleke+ na mu fintu bapokele kuli Hadadesere mwana Rehobu imfumu ya ku Soba.+ 13 Kabili ishina lya kwa Davidi lyalilumbwike ilyo afumine ku kucimfya abena Edomu mu Mupokapoka wa Mucele,+ amakana ikumi na cinekonsekonse (18,000).+ 14 Kabili apangile inkambi ya bashilika mu Edomu.+ Monse mu Edomu apangilemo inkambi, kabili abena Edomu bonse baishileba ababomfi ba kwa Davidi;+ kabili Yehova alepususha Davidi konse uko aya.+

15 Kabili Davidi aleteka Israele onse;+ kabili Davidi alepingula no mulinganya no bulungami+ lyonse ku bantu bakwe bonse.+ 16 Kabili Yoabu+ mwana Seruya e wali umukalamba wa bashilika; na Yehoshafati+ mwana Ahiludi e wali kebukisha. 17 Sadoke+ mwana Ahitubu na Ahimeleke+ mwana Abiatari e bali bashimapepo, e lyo Seraya e wali kalemba. 18 Benaya+ mwana Yehoyada e wali intungulushi ya bena Kerete+ na bena Pelete.+ Kumfwa abana ba kwa Davidi e bali bacilolo bakalamba.+

9 Kabili Davidi atile: “Bushe kuli uwashalako ku ba mu ng’anda ya kwa Shauli, ukuti mbe ne cikuuku+ kuli ena pa mulandu wa kwa Yonatani?”+ 2 Nomba mu ng’anda ya kwa Shauli mwali umubomfi ishina lyakwe ni Siba.+ E ico balimwitile ukuti aye kuli Davidi, e lyo imfumu yamwipwishe ati: “Bushe ni we Siba?” na o atile: “E ine wine ne mubomfi wenu.” 3 Ne Mfumu yatile: “Bushe takuli uwashalapo mu ba mu ng’anda ya kwa Shauli, ukuti mbe ne cikuuku ca kwa Lesa kuli ena?”+ Siba atile ku mfumu: “Kuli umwana wa kwa Yonatani, uwalemana amolu.”+ 4 E lyo Imfumu yaipwishe ati: “Ali kwi?” Na o Siba atile ku mfumu: “Moneni! Ali mu ng’anda ya kwa Makiri+ mwana Amiele mu Lo-debari.”+

5 Apo pene Imfumu Davidi yatumine bamo ku kumubuula ukufuma mu ng’anda ya kwa Makiri mwana Amiele mu Lo-debari. 6 Ilyo Mefiboshete mwana Yonatani mwana Shauli afikile kuli Davidi, ilyo line awile ubukupeme alatoota.+ E lyo Davidi atile: “Mefiboshete!” na o atile: “Ndi pano ne mubomfi wenu.” 7 E lyo Davidi amwebele ati: “Witiina, pantu ndeba ne cikuuku+ kuli iwe pa mulandu wa kwa Yonatani wiso;+ kabili nalakubwesesha impanga yonse+ iya kwa Shauli sokulu, na iwe ukalalya ifya kulya pe tebulo lyandi pe.”+

8 E lyo atootele no kutila: “Nine ani ne mubomfi wenu, pa kuti munsakamane, ine ne mbwa iyafwa?”+ 9 Nomba imfumu yaitile Siba, umubomfi wa kwa Shauli, no kumweba ati: “Fyonse ifyali fya kwa Shauli ne fya ba mu ng’anda yakwe bonse napeela+ umwishikulu wa kwa sokulu. 10 Kabili iwe na bana bobe abaume na babomfi bobe mukalemulimina, mukalelonganika ifya kulya, e fyo bakalalya bonse aba mu ng’anda ya mwishikulu wa kwa sokulu, lelo Mefiboshete, umwishikulu wa kwa sokulu, ena akalalya ifya kulya pe tebulo lyandi pe.”+

Kabili Siba aali na bana abaume ikumi na basano (15) na babomfi amakumi yabili (20).+ 11 E lyo Siba atile ku mfumu: “Umubomfi wenu alecita ukulingana na fyonse ifyo shikulu imfumu yaeba umubomfi wa iko; lelo Mefiboshete+ alelya pe tebulo lyandi nga umo uwa mu bana baume ba mfumu.” 12 Kabili Mefiboshete aali no mwana mwaume umwaice ishina lyakwe ni Mika,+ kabili bonse abaleikala mu ng’anda ya kwa Siba bali babomfi ba kwa Mefiboshete. 13 Na Mefiboshete aleikala mu Yerusalemu, pantu alelya pe tebulo lya mfumu pe;+ kabili ali uwalemana amolu.+

10 Nomba pa numa ya ifi, imfumu ya bana ba kwa Amone+ yalifwile, kabili Hanuni umwana wa iko ali-ipyene no kutendeka ukuteka.+ 2 E lyo Davidi atile: “Nalaba ne cikuuku kuli Hanuni mwana Nahashi, ifyo wishi ali ne cikuuku kuli ine.”+ Awe Davidi atumine ababomfi bakwe ku kuyamusansamusha pa mfwa ya kwa wishi, kabili ababomfi ba kwa Davidi+ bafikile mu calo ca bana ba kwa Amone. 3 Lelo, bacilolo ba bana ba kwa Amone batile kuli Hanuni shikulwibo: “Bushe imwe muleti Davidi alecindika shinwe ifi atumine aba kumusansamusha? Bushe te ku kufwayafwaya mu musumba ku ku-ulengula+ na ku ku-uwisha e co Davidi atumiine ababomfi bakwe kuli imwe?”+ 4 E ico Hanuni abuulile ababomfi ba kwa Davidi, ababeyele imyefu lubali+ no kuputula ifya kufwala fyabo ukufika pa matako, e lyo abalekele baya.+ 5 Pa numa abantu baileeba Davidi, na o apo pene atumine aba kubakumanya, pantu abo bantu baliseebene nga nshi; kabili imfumu yatile: “Ikaleni mu Yeriko+ mpaka imyefu yenu ikamene. E lyo mukabwele.”

6 Umuya inshiku abana ba kwa Amone bamwene ukuti Davidi nabapata,+ batumine aba kuyaobola abena Siria aba ku Bete-rehobu+ na bena Siria aba ku Soba,+ aba pa makasa amakana amakumi yabili (20,000), ne mfumu ya ku Maaka,+ abantu ikana limo (1,000), na ba ku Ishtobu, amakana ikumi na yabili (12,000). 7 Ilyo Davidi aumfwile, atumine Yoabu na bashilika bonse ne mpalume.+ 8 E lyo abana ba kwa Amone bafumine no kuiteyanishisha ukulwa pa mpongolo, na bena Siria aba ku Soba na ba ku Rehobu,+ na bena Ishtobu na bena Maaka na bo baiteyanishishe ukulwa mu mpanga.+

9 Ilyo Yoabu amwene ukuti balemusansa icabipisha ku ntanshi na ku numa, ilyo line asalile abaume ba maka+ aba mu Israele no kubateyanya ukuti bakumanye abena Siria. 10 Na bantu abashalako abapeele kuli Abishai+ munyina, pa kuti abateyanishishe ukulwa na bana ba kwa Amone.+ 11 Kabili atile: “Nga ca kuti abena Siria bancila amaka, wise unjafwe; lelo nga ca kuti abana ba kwa Amone bakucila amaka, na ine nalaisa ku kukwafwa.+ 12 Kosa, pa kuti tushipe+ ukwafwa abantu besu ne misumba ya kwa Lesa wesu;+ kabili Yehova, alacita icawama mu menso yakwe.”+

13 E lyo Yoabu na bantu abali nankwe bapalamine ku kulwa na bena Siria, na bo bafulumwike ku cinso cakwe.+ 14 Lelo abana ba kwa Amone bena, ilyo bamwene ukuti abena Siria bafulumuka, na bo bafulumwike Abishai kabili baingile mu musumba.+ Pa numa ya ifyo, Yoabu abwelele ukufuma ku bana ba kwa Amone no kufika mu Yerusalemu.+

15 Ilyo abena Siria bamwene ukuti abena Israele babacimfya, balongene capamo. 16 Kabili Hadadesere+ atumine abantu aba kuyasenda abena Siria abali mu ncende ya Mumana wa Yufrate;+ e lyo bafikile ku Helamu, na Shobaki+ umukalamba wa bashilika ba kwa Hadadesere e walebatungulula.

17 Ilyo bashimikile Davidi, ilyo line fye alongenye abena Israele bonse no kwabuka Yordani no kufika ku Helamu. Abena Siria nomba baiteyanishishe ukulwa ku kukumanya Davidi kabili batendeke ukulwa nankwe.+ 18 Awe abena Siria balifulumwike+ ku cinso ca bena Israele; na Davidi aipeyepo abena Siria aba pa maceleta imyanda cinelubali (700)+ na ba pali bakabalwe amakana amakumi yane (40,000), akomene na Shobaki umukalamba wa bashilika babo, na o afwilile palya pene.+ 19 Ilyo imfumu+ shonse ishalebombela Hadadesere, shamwene ukuti nabashicimfya ku bena Israele,+ ilyo line shapangile umutende na bena Israele no kutampa ukubabombela;+ na bena Siria balitiinine ukwesha ukupususha abana ba kwa Amone na kabili.+

11 Nomba ku kutendeka kwa mwaka,+ ilyo ishamfumu shiya ku kulwa,+ Davidi atumine Yoabu na babomfi bakwe na bena Israele bonse, ukuti bakayelofya abana ba kwa Amone+ no kushinga Raba,+ lelo Davidi ena ashele mu Yerusalemu.

2 Nomba ku nshita ya cungulo Davidi alimine ukufuma pa busanshi bwakwe, aile ale-endaukako pa mutenge+ wa ng’anda ya mfumu; ilyo ali palya, amwene+ umwanakashi alesamba, kabili umwanakashi ali umusuma nga nshi.+ 3 E lyo Davidi atumine aba kuyaipusha pali uyo mwanakashi,+ e lyo umo atile: “Bushe uyu te Bati-sheba+ mwana Eliamu,+ umukashi wa kwa Uria+ umwina Hiti?”+ 4 Pa numa ya ifyo, Davidi atumine inkombe ku kumubuula.+ Awe alishile,+ na o asendeme nankwe,+ ninshi Bati-sheba aleisangulula ku kukowela kwakwe.+ E lyo abwelele ku mwakwe.

5 Awe umwanakashi alimite. E lyo atumine amashiwi no kweba Davidi ati: “Ndi ne fumo.” 6 E ico Davidi atumine amashiwi kuli Yoabu ati: “Eba Uria umwina Hiti ese kuno.” Na o Yoabu atumine Uria kuli Davidi. 7 Ilyo Uria aishile, Davidi amwipwishe nga Yoabu ali umutende, na bantu nga bali umutende ne fyo ubulwi bwale-enda. 8 E lyo Davidi aebele Uria ati: “Kabiye ku mobe, usambeko na ku makasa.”+ Awe Uria afumine mu ng’anda ya mfumu, kabili imfumu yamutumiine no bupe. 9 Lelo Uria asendeme pa mwinshi wa ng’anda ya mfumu na babomfi ba kwa shikulu wakwe bonse, na ku ng’anda yakwe taileko iyo. 10 E ico baebele Davidi abati: “Uria taile ku ng’anda yakwe.” E lyo Davidi aipwishe Uria ati: “Bushe taufumine pa lwendo? Nga cinshi ushiliile ku ng’anda yobe?” 11 Lelo Uria atile kuli Davidi: “Icipao+ na Israele na Yuda baikala mu nsakwe, kabili shikulu Yoabu na babomfi ba kwa shikulu+ bapanga inkambi pa nse pa mpanga, e lyo ine ndeya mu ng’anda yandi ku kulya no kunwa no kulaala no mukashi wandi?+ Na pali imwe bene,+ nshacite ici cintu!”

12 E lyo Davidi aebele Uria ati: “Ikala pano no bwa lelo, mailo e lyo nkaleka uye.” Awe Uria aikele mu Yerusalemu muli bulya bushiku no bwakonkelepo. 13 Kabili, Davidi alimwitile ukuti alye no kunwa nankwe. Asuka amulenga ukukolwa.+ Na lyo line, ilyo afumineko icungulo, ailesendama pa busanshi bwakwe pamo na babomfi ba kwa shikulu wakwe, na ku ng’anda yakwe taileko iyo. 14 Nomba ulucelo Davidi alembele kalata+ kuli Yoabu no kupeela Uria ukuti atwale. 15 Alembele muli kalata ati:+ “Bikeni Uria ku ntanshi uko ubulwi bukoseshe,+ e lyo imwe mubwelele ku numa, muleke bamukome afwe.”+

16 Nomba ilyo Yoabu alelinda umusumba abikile Uria apo aishibe ukuti e pali abantu ba maka.+ 17 Awe ilyo aba mu musumba bafumine no kulwisha Yoabu, e lyo abantu bamo, ababomfi ba kwa Davidi, bafwilepo na Uria umwina Hiti na o alifwile.+ 18 E lyo Yoabu atumine umuntu kuli Davidi ku kumweba imilandu yonse iya bulwi. 19 Kabili aebele iyo nkombe ati: “Ilyo wapwa ukusosa imilandu yonse iya bulwi ku mfumu, 20 e lyo imfumu nga yakalipa, kabili yatila kuli iwe, ‘Nga cinshi ico mwailile mupepi sana ku musumba ku kulwa? Bushe tamwaishibe ati kuti balasa imifwi ukufuma pa cibumba?21 Nani aipeye Abimeleke+ mwana Yerubeshete?+ Bushe te mwanakashi uwamupooseele umwana wa mpelo+ ukufuma pa cibumba no kumwipaya mu Tebese?+ Cinshi mwailile mupepi sana ku cibumba?’ e lyo ukasose auti, ‘Umubomfi wenu Uria umwina Hiti na o nafwa.’”+

22 E ico inkombe yaliile, yafikile no kweba Davidi fyonse ifyo Yoabu ayebele. 23 E lyo inkombe yatile kuli Davidi: “Abo bantu balitucilile amaka, ica kuti balitukonkele na mu mpanga; lelo twalibakonkele ukufika na pa mpongolo. 24 E lyo abalelasa imifwi balashile ababomfi benu ukufuma pa cibumba,+ ica kuti ababomfi ba mfumu bamo nabafwa; no mubomfi wenu Uria umwina Hiti na o nafwa.”+ 25 Na o Davidi atile ku nkombe: “Ifi e fyo ukebe Yoabu auti, ‘Wileka uyu mulandu ukusakamike, pantu ulupanga talusala+ pa kwipaya. Kosha ubulwi ku kulwisha umusumba no ku-ucimfya.’+ Kabili umukoseleshe.”

26 Awe umukashi wa kwa Uria aumfwile ukuti Uria umulume wakwe nafwa, kabili atampile ukuloosha+ umulume wakwe.+ 27 Ilyo yapwile inshita ya kuloosha,+ bwangu bwangu Davidi atumine aba kuyamubuula no kumutwala ku ng’anda yakwe, na o aishileba umukashi wakwe.+ Mu kuya kwa nshita amufyalile umwana umwaume, lelo ici cintu Davidi acitile calibipile+ mu menso+ ya kwa Yehova.

12 Kabili Yehova atumine Natani+ kuli Davidi. Na o aile kuli Davidi+ no kutila: “Kwali abantu babili abali mu musumba umo, umo uwa fyuma e lyo umbi umupiina. 2 Uwa fyuma ali ne mpaanga ishingi ne ng’ombe;+ 3 lelo umupiina akwete fye akana ka mpaanga akakota kamo, ako ashitile.+ Alekasakamana, kabili kalekulila pamo nankwe na bana bakwe capamo. Kalelyako ubufungau bwa fya kulya fyakwe, kalenwako ne fya muli kapu yakwe, kalesendama pa cifuba cakwe, kabili kali fye ngo mwana umwanakashi kuli ena. 4 Awe uyu muntu wa fyuma apokelele umweni, kabili tabuulile impaanga ne ng’ombe ukufuma pa mikuni yakwe ukuti apekanishishe umweni wakwe. Lelo abuulile akana ka mpaanga akakota aka mupiina no kupekanishisha umuntu uwamufikiile.”+

5 E lyo Davidi akalipe sana pa fyo uyo muntu acitile,+ kabili atile kuli Natani: “Na pali Yehova,+ umuntu uwacita ico afwile ukufwa!+ 6 E lyo pa kana ka mpaanga akakota afwile ukubweseshapo+ imiku ine,+ pa mulandu wa kuti acitile ici cintu kabili tali na luse.”+

7 E lyo Natani atile kuli Davidi: “Uyo muntu ni mwe! E fyo Yehova Lesa wa kwa Israele asosa ati, ‘Ine nakusubile+ ukuba imfumu pali Israele, kabili nakupokolwele+ mu minwe ya kwa Shauli. 8 Nakupeele ing’anda ya kwa sokulu+ na bakashi ba kwa sokulu+ pa cifuba cobe, no kukupeela ing’anda ya kwa Israele na Yuda.+ Kabili nga fyalicepele, nga nalundilepo na fimbi ifyaba nge fi pamo ne fintu fimbi.+ 9 Nga cinshi wasuulile icebo ca kwa Yehova no kucita icabipa+ mu menso yakwe? Uria umwina Hiti waipaya ku lupanga,+ no mukashi wakwe wabuula ku kuba umukashi obe,+ no mwine wamwipaisha ku lupanga lwa bana ba kwa Amone. 10 E ico nomba ulupanga+ talwakafume mu ng’anda yobe umuyayaya,+ pa mulandu wa kuti walinsuulile wabuula no mukashi wa kwa Uria umwina Hiti ku kuba umukashi obe.’11 E fyo Yehova atila, ‘Mona nkalenga ubucushi ukwisa pali iwe ukufuma mu ng’anda yobe;+ kabili nkasenda abakashi bobe pa menso yobe no kubapeela ku munobe,+ kabili akasendama na bakashi bobe pa lwalaala.+ 12 Iwe wacitile mu bumfisolo,+ lelo ine nkacita ici cintu pa menso ya kwa Israele onse+ kabili pa lwalaala.’”+

13 E lyo Davidi atile+ kuli Natani: “Nimembukila Yehova.”+ Na o Natani atile kuli Davidi: “Yehova na o namubelela uluse pa lubembu lwenu.+ Tamwakafwe.+ 14 Nomba, apo mwasaalula Yehova pali ici mwacita,+ umwana uukafyalwa kuli imwe, ukufwa akafwa.”+

15 E lyo Natani aile ku mwakwe.

Na Yehova apumine+ umwana uo umukashi wa kwa Uria afyalile Davidi, na o alilwele. 16 E ico Davidi apapaatileko umwana kuli Lesa wa cine, kabili Davidi alekele ukulya,+ aingile no kulambalala pa nshi ubushiku bonse.+ 17 E lyo abakalamba ba mu ng’anda yakwe baiminine apo ali ku kumwimya pa nshi, lelo alikeene kabili taliile ifya kulya+ na bo. 18 Nomba mu bushiku bwalenga cinelubali (7) umwana asukile afwa. Na babomfi ba kwa Davidi balitiinine ukumweba ati umwana nafwa; pantu baleti: “Moneni! Ilyo umwana ali no mweo twalilandile nankwe, kabili taumfwile ku mashiwi yesu; nomba kuti twamweba shani ukuti, ‘Umwana nafwa’? Kuti acita icabipa.”

19 Ilyo Davidi amwene ukuti ababomfi bakwe baletepeleshanya, e lyo ailwike ukuti umwana nafwa. E ico aipwishe ababomfi bakwe ati: “Bushe nafwa umwana?” Na bo batile: “Nafwa.” 20 E lyo Davidi aimine pa nshi, asamba no kusuba amafuta,+ afwala ne fya kufwala fimbi no kwingila mu ng’anda+ ya kwa Yehova no kupepa;+ e lyo aile ku ng’anda yakwe no kulomba ifya kulya, na bo bwangu bwangu bamutekeele ifya kulya, na o aliliile. 21 E lyo ababomfi bakwe bamwipwishe abati: “Calola mwi ici cintu mwacita? Ilyo umwana aali uwa mweo, mwalekele ukulya kabili mwaleloosha pa mulandu wakwe; nomba ilyo fye umwana afwa mwaima no kulya ifya kulya.” 22 Na o atile: “Ilyo umwana aali uwa mweo nalekele ukulya+ kabili naleloosha,+ pantu naleti, ‘Nani eshibe nga Yehova kuti ambelelako uluse, no mwana kuti aba no mweo?’+ 23 Nomba apo nafwa, cinshi ndelekela ukulya? Bushe kuti namubwesha?+ Nkaya ku manda uko ali,+ lelo ena, takabwele kuli ine.”+

24 E lyo Davidi alasansamusha Bati-sheba umukashi wakwe.+ Kabili aingile kuli ena no kusendama nankwe. Mu kuya kwa nshita, afyele umwana umwaume,+ kabili ainikwe ati Solomone.+ Kabili Yehova alimutemenwe.+ 25 E ico atumine amashiwi ukupitila muli kasesema Natani+ no kumwinika ati Yedidia, pantu Yehova alimutemenwe.

26 Kabili Yoabu+ akonkenyepo ukulwa no musumba wa Raba+ uwa bana ba kwa Amone no kupoka umusumba wa bufumu. 27 E lyo Yoabu atumine inkombe kuli Davidi no kutila: “Nindwa na Raba.+ Kabili nimpoka umusumba wa menshi. 28 Nomba longanikeni abantu abashalapo no kupangila umusumba inkambi, no ku-upoka; epali nine napoka umusumba, ne shina lyandi lyainikwapo.”

29 Awe Davidi alonganike abantu bonse no kuya ku Raba, alwishishe umusumba wa Raba no ku-upoka. 30 Kabili afuulile Malkamu* icisote ca bufumu ku mutwe,+ icafinine amakilogramu nalimo 34, pamo na mabwe ayauma umutengo; kabili bacifwikile ku mutwe wa kwa Davidi. Ne fyo apokolwele+ mu musumba ifyo asendele fyali ifingi nga nshi. 31 Na bantu abalimo alibasendele ukuti abapeele umulimo wa kuputula amabwe no kupanga ifyela ifyatwa+ na masembe ya cela, kabili alebabomfya ukupanga injelwa. E fyo acitile ku misumba yonse iya bana ba kwa Amone. E lyo Davidi na bantu bonse babweleele ku Yerusalemu.

13 Nomba Abishalomu+ mwana Davidi ali na nkashi yakwe uwayemba ishina lyakwe ni Tamari.+ Kabili pa numa ya ifi fintu, Amnone+ mwana Davidi alimutemenwe.+ 2 Ici cintu calicushishe Amnone ica kuti alilwele+ pa mulandu wa kwa Tamari nkashi yakwe, pantu ali ni nacisungu, kabili calyafishe kuli Amnone+ ukumucita icintu.+ 3 Nomba Amnone alikwete umunankwe ishina lyakwe ni Yehonadabu,+ mwana Shimea,+ munyina Davidi; kabili Yehonadabu ali muntu uwa mano nga nshi. 4 E ico alimwipwishe ati: “Cinshi ico we mwana wa mfumu, ubelele no bulanda ifi, ulucelo no lucelo? Bushe tawanjebe?”+ Na o Amnone amwaswike ati: “Tamari, nkashi+ ya kwa Abishalomu munyinane nalimutemwa.”+ 5 E lyo Yehonadabu amwebele ati: “Sendama pa busanshi bobe, ubepe ukuti naulwala.+ Kabili wiso aleisa ku kukumona, e lyo umwebe ati, ‘Shi lekeni Tamari nkashi yandi ese ampeele ica kulya ca mulwele, kabili apekanye ifya kulya fya cisansamushi ndemonako no kumonako, kabili andishe.’”+

6 Awe Amnone alisendeme no kubepa ukuti nalwala,+ ne mfumu yalingile ku kumumona. E lyo Amnone atile ku mfumu: “Shi lekeni Tamari nkashi yandi ese apange utumikate tubili ndemonako no kumonako pa kuti andishe ica kulya ca mulwele.” 7 E lyo Davidi atumine amashiwi kuli Tamari ku ng’anda ati: “Shi kabiye ku ng’anda ya kwa Amnone ndume yobe no kumupekanishisha ifya kulya fya cisansamushi.” 8 Awe Tamari aile ku ng’anda ya kwa Amnone+ ndume yakwe ninshi nasendama. Abuulile umufuba no kupangamo utumikate ninshi Amnone alemonako, no kutusalula. 9 E lyo abuulile ica kusalwilapo no kufukumwina pa mbale ninshi alemonako, lelo Amnone alikeene ukulya no kutila: “Lekeni abantu bonse bafumine pa nse!”+ E lyo bonse bafumine apo ali.

10 Nomba Amnone atile kuli Tamari: “Leta ica kulya ca cisansamushi ku muputule wa mu kati, pa kuti undiishe ne mulwele.” Awe Tamari abuulile utumikate uto apekenye no kutwalila Amnone ndume yakwe mu muputule wa mu kati. 11 Ilyo apaleme pa kuti amupeele alye, e lyo amwikete+ no kumweba ati: “Isa, sendama na ine,+ we nkashi yandi.”+ 12 Lelo amwaswike ati: “Iyo, we ndume yandi! Wincenda;+ pantu tatucita ifi mu Israele.+ Wicita ici cintu ca bupumbu.+ 13 Nga ine ni kwi nkatwala umuseebanya wandi? Na iwe, ukaba ngo mupumbu mu Israele. Shi nomba sosa ku mfumu; pantu te kuti ikaane ukumpeela kuli iwe.” 14 Lelo alikene ukumfwa kwi shiwi lyakwe, kabili alimucilile amaka, amucenda+ no kusendama nankwe.+ 15 E lyo Amnone amupatile nga nshi, ulupato amupatile lwacilile pa kutemwa uko amutemenwe kale, e ico Amnone amwebele ati: “Ima, kabiye!” 16 Na o atile: “Iyo, we ndume yandi; pantu ububi ubu ubwa kuntamfya bwakula ukucila ubo wacita kuli ine!” Lelo alikene ukumfwa.

17 Awe aitile umubomfi wakwe uwalemubombela no kumweba ati: “Shi fumya uyu muntu pano, umutwale pa nse, no kukomako ilyo afuma.” 18 (Tamari afwele ica kufwala ca mindoloshi;+ pantu e fyo abana banakashi ba mfumu, banacisungu, balefwala ifya kufwala fyabula amaboko.) E fyo umubomfi wakwe amufumishe pa nse, no kukoma ku ciibi. 19 E lyo Tamari akubile imito pa mutwe,+ alepwile ne ca kufwala ca mindoloshi ico afwele; abikile ne ndupi pa mutwe,+ no kuya alelila.

20 E lyo Abishalomu+ ndume yakwe amwipwishe ati: “Bushe Amnone+ ndume yobe e wacita ici cintu? Nomba, talala we nkashi yandi. Ni ndume yobe.+ Wibika ici cintu ku mutima.” Awe Tamari aikele mu ng’anda ya kwa Abishalomu ndume yakwe, ukwabula ukuba pamo na bantu. 21 Imfumu Davidi na yo yalyumfwile ifi fyonse,+ kabili yalifulilwe sana.+ 22 Kabili Abishalomu talandilepo na Amnone icibi atemwa icisuma; pantu Abishalomu apatile+ Amnone pa mulandu wa kuti acendele Tamari nkashi yakwe.

23 Nomba ilyo papitile imyaka ibili iituntulu, Abishalomu ali na ba kubeya impaanga+ mu musumba wa Baali-hasore uwaba mupepi na Efraimu;+ kabili Abishalomu aitile abana baume aba mfumu bonse.+ 24 E lyo Abishalomu aile ku mfumu no kutila: “Moneni, umubomfi wenu ali na ba kubeya amasako ya mpaanga! Shi lekeni imfumu na babomfi ba iko baye no mubomfi wenu.” 25 Lelo imfumu yatile kuli Abishalomu: “Iyo, we mwana wandi! Shi twiya bonse, epali twaba icisendo kuli iwe.” Nangu aleipatikisha,+ yalikene ukuya lelo yalimupaalile.+ 26 E lyo Abishalomu asukile atila: “Nga tamwaise, shi lekeni Amnone munyinane aye na ifwe.”+ Imfumu yamwipwishe ati: “Cinshi ico aleila na iwe?” 27 Kabili Abishalomu ali-ipatikishe,+ ica kuti yalekele Amnone na bana ba mfumu bonse baye nankwe.

28 E lyo Abishalomu aebele ababomfi bakwe ati: “Shi mumone, ilyo fye umutima wa kwa Amnone walasekelela ku mwangashi,+ kabili nalatila kuli imwe, ‘Umeni Amnone!’ E lyo mumwipaye. Mwitiina.+ Bushe te ine mwebele? Koseni no kuba na maka.” 29 Na babomfi ba kwa Abishalomu bacitile kuli Amnone ukulingana ne fyo Abishalomu abebele;+ na bana ba mfumu bonse balimine no kunina cila muntu pa mfalashi yakwe no kufulumuka. 30 Nomba ilyo baleya mu nshila, ilyashi lyalifikile kuli Davidi ati: “Abishalomu naipaya abana baume aba mfumu bonse, kabili takushelepo nangu umo.” 31 Awe imfumu yalimine no kulepula ifya kufwala fya iko+ no kulaala pa nshi,+ na babomfi ba iko bonse baliminine apo yali ne fya kufwala ifyalepulwa.+

32 Lelo Yehonadabu+ mwana Shimea+ munyina Davidi alyaswike no kutila: “Bashikulu betila nabepaiwa abalumendo bonse abana ba mfumu, pantu ni Amnone eka e ufwile,+ pantu ni Abishalomu wacisosa kwati cintu apangile kale+ ukutula pa bushiku acendelemo+ Tamari nkashi yakwe.+ 33 Nomba bashikulu imfumu bebika ku mutima amashiwi ya kutila, ‘Abana ba mfumu bonse nabafwa’; lelo ni Amnone eka e ufwile.”

34 Lelo Abishalomu alifulumwike.+ E lyo umulumendo, kalinda+ ainwine amenso yakwe no kumona, kabili, moneni! kwali abantu abengi abaleisa mu musebo wa ku mbali ya lupili ku numa yakwe. 35 E lyo Yehonadabu+ atile ku mfumu: “Moneni! Abana ba mfumu baisa. Filya fine fye umubomfi wenu acisosa, e fyo caba.”+ 36 Nomba, ilyo fye apwile ukusosa, na bana ba mfumu balingile, basanswile na mashiwi yabo balalila; ne mfumu ine na babomfi ba iko bonse balilile nga nshi. 37 Lelo Abishalomu, alifyukile no kuya kuli Talmai+ mwana Amihudi imfumu ya Geshuri.+ Na Davidi alaloosha+ umwana wakwe inshiku shonse. 38 Lelo Abishalomu, alifyukile no kuya kuli Geshuri;+ kabili aileikalako imyaka itatu.

39 E lyo umutima wa kwa Davidi imfumu watendeke ukufuluka Abishalomu; pantu alisansamwike ilyo ubulanda pa mfwa ya kwa Amnone bwapwile, pantu alifwile.

14 Nomba Yoabu+ mwana Seruya+ alishibe ukuti imfumu ilefuluka Abishalomu.+ 2 E lyo Yoabu atumine abantu ku Tekoa+ no kubuulako umwanakashi uwa mano,+ e lyo amwebele ati: “Shi ucite kwati uleloosha, ufwale ne fya kufwala fya kuloosha, kabili wisuba amafuta;+ kabili ube ngo mwanakashi uwaloosha umuntu uwafwa inshiku ishingi.+ 3 Kabili wingile ku mfumu no kuyasosa aya mashiwi.” E lyo Yoabu amwebele ifya kuyasosa.+

4 Awe umwanakashi umwina Tekoa aile ku mfumu, awile pa nshi ubukupeme,+ atoota, no kusosa ati: “Mwe mfumu, njafweni!”+ 5 Imfumu yamwipwishe aiti: “Cili shani?” Na o atile: “Nine mukamfwilwa,+ umulume wandi alifwa. 6 Kabili umubomfi wenu ali na bana babili abaume, kabili batampile ukulwa mu mpanga+ nomba takwali uwa kubalamununa.+ E lyo umo aumine umunankwe no kumwipaya. 7 Kabili nomba ulupwa lonse lwaimina umubomfi wenu no kutila, ‘Leta uwaipeye munyina, ukuti tumwipaile pa mulandu wa mweo wa kwa munyina+ uo aipeye,+ twipaye impyani!’ Kabili bakashimya umulilo wa malasha yandi uwashala, no mulume wandi tabakamushile ishina nelyo abana* pano calo.”+

8 Imfumu yatile ku mwanakashi: “Kabiye ku ng’anda yobe, na ine nalakulandilako.”+ 9 E lyo umwanakashi wa ku Tekoa aebele imfumu ati: “Mwe shikulu imfumu, umulandu ube pali ine na pa ba mu ng’anda ya kwa tata,+ lelo imwe na bakamukonkapo pa bufumu mukaba aba kaele.” 10 E lyo imfumu yatile: “Nga kuli uulesosa kuli iwe, umulete kuli ine, kabili takabwekeshepo ukukukalifya.” 11 Lelo atile: “Shi lekeni imfumu ibukishe Yehova Lesa+ wa iko, ukuti kalandula wa mulopa+ ekonkanyapo ukonaula epali alofya umwana wandi.” Na yo yatile: “Na pali Yehova,+ takwakaponepo pa nshi umushishi nangu umo+ uwa mwana obe.” 12 E lyo umwanakashi atile: “Shi lekeni umubomfi+ wenu asose amashiwi+ na yambi kuli shikulu imfumu.” Na yo yatile: “Sosa!”+

13 E lyo umwanakashi asosele kabili ati: “Nga cinshi mwatontonkanishisha ifi+ ifishilewamina abantu ba kwa Lesa?+ Apo mwalitamfya umwana wenu kabili mwalifilwa ukumubwesha,+ amashiwi mwalanda yalanga ukuti muli no mulandu.+ 14 Pantu ukufwa tuli no kufwa+ no kuba nga menshi ayalepongolwelwa pa nshi ayo bashingakusa. Lelo Lesa takepaye umuntu,+ kabili alitontonkanya ico uwatamfiwa talingile ukwikalilila uko bamutamfisha. 15 Nomba ico naishila ku kusosa amashiwi aya kuli shikulu imfumu, ni co abantu balintiinya. E ico umubomfi wenu atile, ‘Shi kanande ku mfumu. Nalimo imfumu ikacita ico umubomfi wa iko alomba. 16 Apo imfumu ikomfwa no kupokolola umubomfi wa iko mu minwe ya muntu uulefwaya ukunjipaya no kwipaya umwana wandi e lyo apoke ubupyani Lesa atupeela,’+ 17 e lyo umubomfi wenu atile, ‘Shi lekeni amashiwi ya kwa shikulu imfumu yantekeko umutima.’ Pantu shikulu imfumu aba fye nga malaika+ wa kwa Lesa wa cine, ku kulekanya ubusuma no bubi,+ kabili Yehova Lesa wenu abe na imwe.”

18 E lyo imfumu yayaswike umwanakashi aiti: “Shi wimfisa ico nalakwipusha.”+ Na o umwanakashi atile: “Shi nabasose bashikulu imfumu.” 19 Ne mfumu yatile: “Bushe tamuli na Yoabu+ muli ifi fyonse ulelanda?”+ Na o umwanakashi ayaswike no kutila: “Na pali imwe,+ mwe shikulu imfumu, ifyo fine mwalanda e fyo cili; pantu mubomfi wenu Yoabu e wanjeba, kabili e webele umubomfi wenu ukusosa amashiwi yonse aya.+ 20 Yoabu acitile ici cintu pa kuti umulandu umoneke fimbi, lelo shikulu wa mano nga mano ya kwa malaika+ wa kwa Lesa wa cine ku kwishiba fyonse ificitika pano isonde.”

21 E lyo imfumu yatile kuli Yoabu: “Mona, ndecita ici cintu.+ E ico kabiye, kabweshe umulumendo Abishalomu.”+ 22 Awe Yoabu awile ubukupeme pa nshi, atoota no kupaala imfumu;+ kabili Yoabu atile: “Buno bushiku umubomfi wenu aishiba ukuti mwalimutemwa,+ mwe shikulu imfumu, pantu imfumu yacita ico umubomfi wa iko alomba.” 23 E lyo Yoabu aimine, aile ku Geshuri+ no kubwesha Abishalomu ku Yerusalemu.+ 24 Lelo imfumu yatile: “Aye ku ng’anda yakwe, tafwile ukumona icinso candi.”+ Awe Abishalomu aile ku ng’anda yakwe, ne cinso ca mfumu tacimwene iyo.

25 Nomba mu Israele monse tamwali umuntu uwatashiwa ku kuyemba nga Abishalomu.+ Ukufuma pa nyantilo sha lukasa lwakwe ukufika ku mutwe, tamwali kalema muli ena. 26 Nga abeya umushishi ku mutwe wakwe (kabili alebeya pa mpela ya mwaka umo na umo; pantu walefina+ ku mutwe wakwe, e co aleubeyela), alepima ukufina kwa mushishi wakwe, waleba nalimo ukucilako panono pa makilogramu yabili, ukulingana ne libwe lya mfumu ilya kupiminako. 27 Kabili Abishalomu afyele abana abaume batatu+ no mwana umwanakashi umo ishina lyakwe ni Tamari. Ali umwanakashi uwayemba nga nshi.+

28 Kabili Abishalomu aikele mu Yerusalemu imyaka ibili iituntulu, ne cinso ca mfumu tacimwene.+ 29 E lyo Abishalomu atumine aba kuyaita Yoabu pa kuti amutume ku mfumu, lelo alikene ukwisa. Awe alibatumine na kabili umuku walenga ibili, na o alikene ukwisa. 30 Asukile aeba ababomfi bakwe ati: “Moneni, ibala lya kwa Yoabu lyaba ku mbali ye bala lyandi, kabili mwaba barle. Kabiyeni mocemo umulilo.”+ Awe ababomfi ba kwa Abishalomu baocelemo umulilo.+ 31 E lyo Yoabu aimine no kuya kuli Abishalomu ku ng’anda no kumwipusha ati: “Cinshi ico ababomfi bobe baocela umulilo mwi bala lyandi?” 32 E lyo Abishalomu atile kuli Yoabu: “Mona! Natumine abantu ba kukwita, nati ‘Isa kuno nkutume ku mfumu, ukuyayeba ati: “Cinshi ico nafumiine ku Geshuri?+ Kuti cawama nga naba kulya na nomba. Nomba leka monane ne mfumu, kabili nga mwaba ububifi muli ine,+ injipaye.”’”

33 Na o Yoabu aile ku mfumu no kuyeba. E lyo aitile Abishalomu, na o alishile ku mfumu no kutoota, awa pa nshi ubukupeme pa ntanshi ya mfumu; e lyo imfumu yatomwene Abishalomu.+

15 Nomba pa numa ya ifi, Abishalomu aebele bamo ukumuteyanishisha iceleta na bakabalwe na baume amakumi yasano (50) aba kubutukila pa ntanshi yakwe.+ 2 Awe Abishalomu alecelela+ no kuyaiminina pa mbali ya musebo wa ku mpongolo.+ Nomba nga kwaisa umuntu onse uwali no mulandu wa kuleta ku mfumu ku kupingulwa,+ Abishalomu alemwita no kutila: “Ni ku musumba nshi ufumine?” na o aleti: “Umubomfi wenu afumine ku mukowa umo uwa kwa Israele.” 3 Abishalomu alemweba ati: “Umulandu obe usuma kabili walilungama; lelo takuli ku mfumu uwa kukumfwa.”+ 4 E lyo Abishalomu aletila: “Iye, nga nasontelwe ukuba umupingushi mu calo,+ no muntu onse uuli no mulandu nangu uulefwaya ukupingulwa nga aleisa kuli ine! Kuti nabapingula no mulinganya.”+

5 Kabili ilyo umuntu apalama ukuti atoote kuli ena, aletambika ukuboko kwakwe no kumwikata+ e lyo amutomona. 6 Awe Abishalomu alecita ifi ku bena Israele bonse abaisa ku mfumu ku kupingulwa; na Abishalomu aleongola imitima ya bena Israele.+

7 Nomba pa mpela ya myaka amakumi yane (40),* Abishalomu atile ku mfumu: “Shi lekeni nje ku Hebrone,+ no kufikilisha umulapo wandi uo nalapile kuli Yehova.+ 8 Pantu umubomfi wenu alapile umulapo+ ilyo aikele mu Geshuri+ mu Siria, ati, ‘Nga Yehova ambwesesha ku Yerusalemu, e lyo nkapeela Yehova ilambo.’”+ 9 Ne mfumu yamwebele ati: “Kabiye umutende.”+ Na o alimine aya na ku Hebrone.

10 E lyo Abishalomu atumine inengu+ mu mikowa yonse iya kwa Israele, ati: “Ilyo fye mwalaumfwa ukulila kwa ntandala, e lyo mutile, ‘Abishalomu naba imfumu+ mu Hebrone!’”+ 11 Kwali na bantu imyanda ibili (200) abaile na Abishalomu ukufuma ku Yerusalemu, abo asendele, tabaletunganya nangu cimo+ kabili tabaishibepo akantu iyo. 12 Kabili, ilyo Abishalomu atuulile amalambo, atumine aba kuyaita Ahitofele+ umwina Gilo,+ impanda mano ya kwa Davidi,+ ukufuma ku musumba wa ku mwakwe uwa Gilo.+ Kabili abaleilunda+ kuli Abishalomu baleya balefulilako,+ na bantu baleya balefula kuli Abishalomu.

13 E lyo kwaishile uwa kweba Davidi ati: “Imitima+ ya bena Israele itemenwe Abishalomu.” 14 Ilyo line fye Davidi aebele ababomfi bakwe bonse abo ali na bo mu Yerusalemu ati: “Imeni, natubutuke;+ pantu tatwapusuke kuli Abishalomu! Angufyanyeni ukuya, epali aendesha no kutusanga no kutucita icabipa no kukoma umusumba ku lupanga!”+ 15 E lyo ababomfi ba mfumu baebele imfumu ati: “Ukulingana na fyonse ifyo shikulu imfumu apanga, e po tuli fwe babomfi benu.”+ 16 Awe imfumu yalifumine na ba mu ng’anda ya iko bonse baleikonka,+ kabili yashile abanakashi ikumi (10), bakanakashi,+ ukuti balelinda ing’anda. 17 Ne mfumu yakonkenyepo fye ukuya na bantu bonse baleikonka; kabili baileiminina pa Bete-merhaki.

18 Na babomfi ba iko bonse baleabuka pa ntanshi ya iko; na bena Kerete bonse, na bena Pelete+ bonse na bena Giti+ bonse, abaume imyanda mutanda (600) abamukonkele ukufuma ku Gati,+ baleabuka pa ntanshi ya mfumu. 19 E lyo imfumu yatile kuli Itai+ umwina Giti: “Cinshi ico na iwe uletukonkela? Bwelelamo+ uleikala ne mfumu; pantu uli wa ku calo cimbi, kabili wafulumuka fye mu calo ca ku mwenu. 20 Waishile fye mailo kabili lelo nkusende ulelulumba+ na ifwe, ukuya apo ndeya na konse fye uko ndeya? Bwelelamo, senda na bamunonko bonse, kabili Yehova abe ne cikuuku+ ne cishinka kuli iwe!”+ 21 Lelo Itai ayaswike imfumu no kutila: “Na pali Yehova na pali shikulu imfumu,+ ukukaba shikulu imfumu, uko kwine e kukaba umubomfi wenu, ninjiteyanya no kufwila pamo na imwe!”+ 22 E lyo Davidi atile kuli Itai:+ “Akuya, abuka.” Awe Itai umwina Giti alyabwike, na bantu bakwe bonse na baice bonse abali nankwe.

23 Na bantu ba mu calo bonse balelila imisowa iikalamba,+ na bantu bonse baleabuka, ne mfumu yaiminine mu mbali ya mumana wa Kidrone,+ na bantu bonse baleabuka balelola ku musebo uwapabuka uwa ku matololo. 24 Kabili kwali na Sadoke+ na bena Lebi+ bonse nabasenda+ icipao+ ca cipangano ica kwa Lesa wa cine; batekele icipao ca kwa Lesa wa cine mupepi na Abiatari+ mpaka abantu bonse aba mu musumba bapwa ukwabuka. 25 Lelo imfumu yatile kuli Sadoke: “Bwesesha icipao+ ca kwa Lesa wa cine ku musumba.+ Yehova nga asekelela muli ine, akambwesha no kuleka nkacimone pamo ne cifulo ca ciko.+ 26 Lelo nga asosa ati, ‘Nshilesekelela muli iwe,’ e po ndi, ancite ifyo alefwaya.”+ 27 E lyo imfumu yakonkenyepo ukusosa kuli Sadoke shimapepo ati: “Bushe te iwe we umona ifimonwa?+ Bweleleni ku musumba umutende, na Ahimaasi umwana obe na Yonatani+ mwana Abiatari, abana benu babili abali na imwe. 28 Moneni ndeshingashinga mu fyabu fya mu matololo mpaka nkomfwe amashiwi ukufuma kuli imwe aya kunjishibisha.”+ 29 Awe Sadoke na Abiatari babweseeshe icipao ca kwa Lesa wa cine ku Yerusalemu, kabili e ko baikele.

30 E lyo Davidi aninine apa kuninina ulupili lwa Miolife,+ alelila ilyo alenina, nafimba ku mutwe;+ ale-enda na makasa ayabulako indyato, na bantu bonse abali nankwe bafimbile umuntu onse ku mutwe, kabili balelila ilyo balenina.+ 31 Awe bamo baebele Davidi ati: “Ahitofele ali mu baumana akapi+ na Abishalomu.”+ E lyo Davidi atile:+ “Mwe Yehova,+ shi lengeni ukupanda amano ukwa kwa Ahitofele bakumone ngo kupanda amano ukwa muwelewele!”+

32 Nomba ilyo Davidi afikile pa muulu apo abantu balekontamina kuli Lesa, moneni Hushai+ umwina Ariki+ alimukumenye, ne fya kufwala fyakwe nafilepulwa kabili ali ne loba pa mutwe.+ 33 Lelo, Davidi amwebele ati: “Nga wayabuka pamo na ine, uli no kuba icisendo kuli ine.+ 34 Lelo nga wabwelela ku musumba no kutila kuli Abishalomu, ‘Ndi mubomfi wenu, mwe mfumu. Nali umubomfi wa kwa shinwe kale, nomba ndi mubomfi wenu,’+ e lyo ukamfulunganishisheko+ ukupanda amano ukwa kwa Ahitofele. 35 Kabili kulya ukaba na Sadoke na Abiatari bashimapepo.+ Nomba conse ico ukomfwa mu ng’anda ya mfumu ulingile ukweba Sadoke na Abiatari bashimapepo.+ 36 Mona! Kulya bali na bana babo babili, Ahimaasi+ uwa kwa Sadoke na Yonatani+ uwa kwa Abiatari; e bo mwingatuma ukwisanjeba fyonse ifyo mukomfwa.” 37 Awe Hushai cibusa wa kwa Davidi+ afikile ku musumba. Lelo Abishalomu+ aingile mu Yerusalemu.

16 Ilyo Davidi acilile panono pa muulu wa lupili,+ moneni, Siba+ umubomfi wa kwa Mefiboshete+ aishilemukumanya ne mpunda+ shibili apali imikate imyanda ibili (200)+ ne fimamantwa fya myangashi ya kukanika umwanda umo (100)+ ne mikate umwanda umo iyo bapangila ku fisabo fya mu lusuba+ no mutondo uukalamba uwa mwangashi.+ 2 E lyo imfumu yaipwishe Siba ati: “Cinshi wacitila ifi fintu?”+ Na o Siba atile: “Impunda, sha ba mu ng’anda ya mfumu ukuti baleninapo, e lyo imikate ne fisabo fya mu lusuba fya kulya abalumendo,+ no mwangashi wa kunwa abanaka+ mu matololo.”+ 3 Kabili imfumu yaipwishe ati: “Nga ali kwi umwana wa kwa sokulu?”+ Na o Siba atile ku mfumu: “Aikala fye mu Yerusalemu; pantu atile, ‘Lelo aba mu ng’anda ya kwa Israele balembwesesha ubufumu bwa kwa tata.’”+ 4 E lyo imfumu yatile kuli Siba: “Mona! Fyonse ifya kwa Mefiboshete fyobe.”+ Na o Siba atile: “Ndi pa nshi ndetoota.+ Lyonse mulesekelela muli ine, mwe shikulu imfumu.”

5 Awe imfumu Davidi yafikile ku Bahurimu,+ kabili moneni! kwafumine umuntu uwa mu lupwa lwa ba mu ng’anda ya kwa Shauli, ne shina lyakwe ni Shimei,+ mwana Gera, aleisa alelapisha.+ 6 Alesukushila Davidi na babomfi bonse aba Mfumu Davidi amabwe; na bantu bonse ne mpalume shonse shali ku kulyo kwa iko na ku kuso kwa iko. 7 Ifi e fyo Shimei alesosa ilyo alelapisha: “Fuma apa, fuma apa, we muntu wa mulopa,+ we cinangwa ca muntu we!+ 8 Yehova alekukanda pa fyo waipaya bonse aba mu ng’anda ya kwa Shauli, uo wapoka ubufumu; na Yehova napeela ubufumu mu minwe ya mwana obe Abishalomu. Kabili uli mu bwafya, pantu uli no mulandu wa mulopa!”+

9 E lyo Abishai mwana Seruya+ asukile atila ku mfumu: “Cinshi ico iyi mbwa yafwa+ ilelapishisha shikulu imfumu?+ Shi lekeni njeko, mputule no mutwe wakwe.”+ 10 Lelo imfumu yatile: “Cimukumine shani+ ici bamwana Seruya?+ Mulekeni alapishe,+ pantu Yehova namweba+ ati, ‘Lapisha Davidi!’ E ico nani wingatila, ‘Cinshi ico wacitila ifi?’”+ 11 Kabili Davidi atile kuli Abishai na ku babomfi bakwe bonse: “Moneni, umwana wandi, uwa kuifyalila, alefwaya umweo wandi;+ pali bufi uyu umwina Benjamini!+ Mulekeni alelapisha, pantu Yehova e fyo amwebele!12 Napamo Yehova ali no kumona+ ku menso yakwe, kabili Yehova akambwesesha ubusuma pa fitiipu ifyo Shimei antiipa buno bushiku.”+ 13 Awe Davidi aleya na bantu bakwe mu nshila, na Shimei aleya mu mbali ya lupili ukulungatana nankwe ukuti alemulapisha;+ akonkenyepo fye ukusukusa amabwe ilyo ale-enda, no kukuba ulukungu ulwingi.+

14 E lyo imfumu na bonse abantu abali na yo bafikile nabanaka. E lyo bapembeswike.+

15 Kabili Abishalomu na bantu bonse, abaume ba kwa Israele, baingile mu Yerusalemu;+ na Ahitofele+ ali nankwe. 16 Nomba ilyo umunankwe Davidi,+ Hushai+ umwina Ariki+ afikile kuli Abishalomu, Hushai atile kuli Abishalomu: “Kalebalika mwe mfumu!+ Kalebalika mwe mfumu!” 17 E lyo Abishalomu atile kuli Hushai: “Bushe ici e cikuuku ku munobe? Cinshi ico tawaila no munobe?”+ 18 Hushai atile kuli Abishalomu: “Iyo; lelo uo Yehova na aba bantu na bena Israele bonse basalile, nkaba uwakwe, kabili e o nkekala nankwe. 19 Na kabili ndeti, Nani ndi no kubombela? Bushe te mwana wakwe? Ifyo nabombeele shinwe, e fyo nkabombela na imwe.”+

20 E lyo Abishalomu atile kuli Ahitofele: “Tupandeni amano.+ Twalacita shani?” 21 Na o Ahitofele atile kuli Abishalomu: “Sendameni na bakanakashi ba kwa shinwe,+ abo ashile ku kulinda ing’anda.+ Kabili Israele onse akomfwa ukuti namupatwa+ kuli shinwe,+ na maboko+ ya bantu bonse abali na imwe yakakosa.” 22 Awe bapoopeele Abishalomu itenti pa mutenge,+ na Abishalomu atampile ukusendama na bakanakashi ba kwa wishi+ pa menso ya kwa Israele onse.+

23 Kabili ukupanda amano ukwa kwa Ahitofele uko apandile muli shilya nshiku kwali ngo kwa muntu uwaipusha kuli Lesa wa cine. E fyo ukupanda amano+ ukwa kwa Ahitofele+ kwali kuli Davidi na kuli Abishalomu.

17 Kabili Ahitofele aebele Abishalomu ati: “Mukwai lekeni nsale abaume amakana ikumi na yabili (12,000), njime no kukonka Davidi buno bushiku.+ 2 Ndeyamusanga nanaka icine cine kabili natompoka amaboko,+ kabili ndeyamutiinya; na bantu bonse abo ali na bo balafulumuka, e lyo nalaipaya imfumu yeka.+ 3 Kabili nalabwesesha abantu bonse kuli imwe. Ukubwela kwa bantu bonse kushintilile pa cili no kucitikila umuntu uo mulefwaya; kabili abantu bonse bakaba umutende.” 4 Awe Abishalomu+ na bakalamba ba bena Israele bonse balitemenwe aya mashiwi.

5 Lelo Abishalomu atile: “Shi iteni na Hushai+ umwina Ariki, no kuleka tumfwe ico na o alasosa.” 6 Hushai aishile kuli Abishalomu. E lyo Abishalomu amwebele ati: “Ifi ne fi e fyo Ahitofele asosele. Bushe tucite ifyo asosele? Nga te ifyo, sosa ni we.” 7 E lyo Hushai atile kuli Abishalomu: “Ukupanda amano ukwa kwa Ahitofele uno muku takuweme!”+

8 Kabili Hushai atile: “Imwe mwalishiba ukuti shinwe na bantu bakwe, ba maka,+ kabili bakalipa imitima+ nga bere umukota uwalufya abana bakwe mu mpanga;+ kabili shinwe muntu uwa bulwi,+ kabili tasendame ukuli abantu bakwe ubushiku. 9 Moneni! Nomba nafisama+ mu cilindi nangu kumbi; nga e wabalilapo ukubasansa, amashiwi ayakasalangana ya kuti, ‘Abantu abalekonka Abishalomu babacimfya!’ 10 Nangu fye muntu uwa maka uwaba no mutima nge nkalamo+ amaka yakapwa ku kunaka;+ pantu abena Israele bonse balishiba ukuti shinwe ni mpalume,+ pamo na baume ba maka abo ali na bo.+ 11 Lelo ine ndemupanda amano nati: Nabalonganikwe kuli imwe abena Israele bonse, ukutendekela ku Dani ukufika ku Beere-sheba,+ ngo mucanga wa mu lulamba lwa bemba ku bwingi,+ e lyo imwe bene muye mu bulwi.+ 12 Kabili tukamusansa apo engasangwa,+ kabili tukamuwapo ifyo umume+ uwa pa mushili; kabili takwakashale umuntu nangu umo kuli ena na ku bantu bonse abo ali na bo. 13 Kabili nga ni mu musumba e mo akaya, tukaye na bena Israele bonse no konaula uyo musumba no ku-ukulila mu mumana ku ntambo. Takwakashale nangu kalibwe muli uyo musumba.”+

14 E lyo Abishalomu na baume bonse aba kwa Israele batile: “Ukupanda amano ukwa kwa Hushai umwina Ariki kusuma+ ukucila ukupanda amano ukwa kwa Ahitofele!” Yehova e walengele+ ukuti bekonka ukupanda amano+ ukwa kwa Ahitofele nangu kwali ukusuma,+ pa kuti Yehova alete ububi+ pali Abishalomu.

15 E lyo Hushai atile kuli Sadoke+ na Abiatari bashimapepo: “Ifi ne fi e fyo Ahitofele apandile amano Abishalomu na bakalamba ba kwa Israele; kabili ifi ne fi e fyo ine mpandile amano. 16 Nomba tumeni abantu bwangu bwangu ku kweba Davidi+ amuti, ‘Buno bushiku mwitubilisha mu ciswebebe ca mu matololo, lelo mwabuke,+ epali imfumu na bantu bonse abali na yo baloba.’”+

17 Ilyo Yonatani+ na Ahimaasi+ baiminine mu Ene-rogele,+ umubomfi umo aliile no kubeba. E ico balimine, apo bali no kweba Imfumu Davidi; pantu tabalefwaya ukumonwa baleingila mu musumba. 18 Lelo, umulumendo umo alibamwene, kabili aebele Abishalomu. E lyo bonse babili balibutwike no kufika ku ng’anda ya muntu umo mu Bahurimu,+ uwali ne cishima mu lubansa lwakwe; kabili e mo baingile. 19 Pa numa ya ifi, umukashi wa uyo muntu abuulile ica kukupikapo, ayanshile na pa kanwa ka cishima no kubikapo ifyo atwile;+ kabili takwaishibikwe kantu nangu kamo. 20 Nomba ilyo ababomfi ba kwa Abishalomu bafikile ku mwanakashi pa ng’anda pa mwakwe, baipwishe abati: “Ahimaasi na Yonatani bali kwi?” Umwanakashi abaswike ati: “Nabapita pano balungama na ku mumana.”+ Awe balibafwaile kabili tababasangile,+ e ico babweleele ku Yerusalemu.

21 Nomba ilyo balya bantu baile, e lyo bafumine mu cishima no kuyaeba Imfumu Davidi kabili batile kuli Davidi: “Imeni, mwabuke umumana bwangu; pantu ifi e fyo Ahitofele apandile amano+ pali imwe.” 22 Ilyo line Davidi alimine na bantu bonse abo ali na bo, bayabwike Yordani mpaka ilyo bwacele ulucelo,+ kabili takwashele nangu umo uushayabwike Yordani.

23 Lelo ilyo Ahitofele amwene ukuti tabakonkele ukupanda amano kwakwe,+ ateyenye impunda yakwe, alimine aile na ku ng’anda yakwe mu musumba wakwe.+ E lyo aebele aba mu ng’anda yakwe+ ifya kucita no kuyaikulika,+ e fyo afwile.+ Ashiikilwe+ mu nshiishi ya fikolwe fyakwe.

24 Davidi ena afikile ku Mahanaimu,+ e lyo Abishalomu ashele ayabuka Yordani, ena pamo na baume bonse aba kwa Israele abo ali na bo. 25 Kabili Amasa+ e o Abishalomu abikile mu cifulo ca kwa Yoabu+ ukwangalila abashilika; Amasa ali mwana mwaume wa muntu uwe shina lya Itra+ umwina Israele, uwasendeme na Abigaili+ umwana mwanakashi uwa kwa Nahashi, nkashi nankwe Seruya, nyina wa kwa Yoabu. 26 Kabili abena Israele na Abishalomu bapangile inkambi mu calo ca Gileadi.+

27 Nomba ilyo Davidi afikile fye ku Mahanaimu, Shobi mwana Nahashi uwa ku Raba+ umo pa bana ba kwa Amone,+ na Makiri+ mwana Amiele+ uwa ku Lo-debari, na Barsilai+ umwina Gileadi uwa ku Rogelimu+ 28 baletele ifya kusendamapo no mwa kusambila ne mitondo, ne ngano na barle no buunga bwa ngano+ ne fyasalulwa+ na cilemba+ ne landa+ ne ngano ishauma;29 no buci+ ne mpaanga no mukaka uwatikama,+ baleteele Davidi na bantu abo ali na bo ukuti balye,+ pantu batile: “Abantu bali ne nsala kabili nabanaka, kabili bali ne cilaka mu matololo.”+

18 E lyo Davidi apendele abantu abo ali na bo kabili asontele aba kuba bacilolo ba pa bantu amakana pali bena e lyo na ba kuba bacilolo ba pa bantu imyanda.+ 2 Kabili Davidi atumine bamo+ ukutungululwa na Yoabu+ na bambi ukutungululwa na Abishai+ mwana Seruya, munyina Yoabu,+ e lyo bambi baletungululwa na Itai+ umwina Giti. E lyo imfumu yatile ku bantu: “Na ine wine ukuya ndeya na imwe.” 3 Lelo abantu batile: “Tamufwile ukuya,+ pantu nga twafulumuka, tababike amano kuli ifwe;+ kabili nga hafu pali ifwe twafwa, tababikeko amano, pantu imwe mwalingana na makana ikumi (10,000) aya pali ifwe;+ nomba kuti cawama nga muletwafwa+ ilyo muli mu musumba.” 4 Ne mfumu yatile kuli bena: “Ico mutemenwe e co nalacita.”+ E lyo imfumu yaiminine mu mbali ya mpongolo,+ na bantu bonse balifumine mu mabumba ya myanda na mu mabumba ya makana.+ 5 E lyo imfumu yaebele Yoabu na Abishai na Itai aiti: “Musunge bwino+ umulumendo Abishalomu pa mulandu wandi.” Na bantu bonse fye balyumfwile uko imfumu yale-eba bonse abakalamba ba bashilika pali Abishalomu.

6 E fyo abantu baile mu mpanga ku kuyakumanya Israele; no bulwi bwali mu mutengo wa Efraimu.+ 7 Kabili abena Israele+ basukile bacimfiwa+ kulya ku babomfi ba kwa Davidi, kabili abaipaiwe bulya bushiku bali abengi, abaume amakana amakumi yabili (20,000). 8 Kabili ubulwi kulya bwafikile mu mpanga yonse. Kabili, umutengo waipeye abengi ukucila abo ulupanga lwaipeye muli bulya bushiku.

9 Caishileba fye nkuma ukuti Abishalomu akumene na babomfi ba kwa Davidi. Abishalomu ali pa mfalashi, ne mfalashi yapitile mwi samba lya misambo iyapikana iya cimuti icikalamba, ica kuti ilyo imfalashi anininepo yapitile mwi samba umutwe wakwe waliketwe mu cimuti icikalamba, kabili alepeelela fye mu lwelele.+ 10 Awe umuntu umo alimwene no kuyaeba Yoabu+ ati: “Moneni! Namona Abishalomu alepeelela ku cimuti icikalamba.” 11 Na o Yoabu atile ku muntu walemweba: “Cine cine naumumona, nga cinshi ico taumwipaile waleka aponena na pa nshi? Na ine nga nakupeela indalama sha silfere ikumi (10) no mushipi.”+ 12 Lelo uyo muntu atile kuli Yoabu: “Nelyo napeelwa mu lupi lwandi isha silfere ikana limo (1,000), te kuti mbike iminwe yandi pa mwana wa mfumu; pantu twalyumfwile na matwi yesu ilyo imfumu yakonkomeshe imwe na Abishai na Itai, aiti, ‘Sungeni bwino umulumendo Abishalomu.’+ 13 Nga te ifyo nga nacicita icibi ku mweo wakwe no mulandu onse nga tawishibikwe ku mfumu,+ na imwe nga mwanjalukila.” 14 E lyo Yoabu atile: “Ndepoosa fye inshita ukulanda nobe!” Asendele no tumafumo tutatu mu minwe yakwe no kupusha+ mu mutima wa kwa Abishalomu ninshi acili no mweo alepeelela ku cimuti+ icikalamba. 15 E lyo ababomfi ba kwa Yoabu ikumi (10) abasenda ifyanso fyakwe balishile no kukoma Abishalomu pa kuti bamwipaye.+ 16 E lyo Yoabu alishishe intandala+ pa kuti abantu bonse baleke ukukonka abena Israele; pantu Yoabu alileseshe abantu. 17 E lyo babuulile Abishalomu, bamupoosele mu mutengo mu cilindi icikalamba no kutuulikapo umwina wa mabwe uukalamba.+ Kumfwa abena Israele bonse, bafulumukile cila muntu ku mwakwe.

18 Nomba Abishalomu, ilyo ali no mweo, abuulile icilibwe no kuimikila,+ kabili caba mwi Lungu lya Mfumu,+ pantu atile: “Nshakwata umwana mwaume uwa kulenga ishina lyandi lileibukishiwa.”+ E ico ainike ici icilibwe ishina lyakwe,+ kabili ciitwa Ica Kwibukishishako Abishalomu ukufika na lelo.

19 Nomba Ahimaasi+ mwana Sadoke atile: “Mukwai lekeni mbutuke no kutwala imbila ku mfumu, pantu Yehova napingula imfumu ukuti aipokolole ku minwe ya balwani ba iko.”+ 20 Lelo Yoabu amwebele ati: “Tauli wa mbila iwe lelo, ukatwala imbila ubushiku bumbi; buno bushiku taufwile ukutwala imbila, pantu umwana wa mfumu nafwa.”+ 21 E lyo Yoabu aebele umwina Kushi+ ati: “Kabiye, kebe imfumu ifyo umwene.” Awe umwina Kushi atootele kuli Yoabu no kutampa ukubutuka. 22 Ahimaasi mwana Sadoke na kabili atile kuli Yoabu: “Te mulandu ne fyalacitika, lekeni mbutuke na ine nkonke pa numa ya mwina Kushi.” Lelo Yoabu atile: “Cinshi ico ulebutukila, we mwana wandi, ilyo takuli imbila ya kuti iwe utwale lelo?” 23 Na lyo line atile: “Te mulandu ne fyalacitika, lekeni mbutuke.” Na o Yoabu atile: “Butuka!” Na Ahimaasi atampile ukubutuka mu nshila iyapita mu Citungu,+ ailecila no mwina Kushi.

24 Nomba Davidi aikele pa kati ka mpongolo shibili.+ Ninshi kalinda+ aile pa mutenge wa pa mpongolo pa cibumba. Ainwine amenso no kumona, kabili moneni! umuntu alebutuka eka. 25 Kalinda alibilikishe no kweba imfumu, na yo imfumu yatile: “Nga ali eka, ninshi ali ne mbila mu kanwa kakwe.” Kabili aleisa alepalama. 26 E lyo kalinda amwene umuntu na umbi alebutuka. E ico kalinda alibilikishe ku wa pa mpongolo ati: “Moneni! Umuntu na umbi alebutuka eka!” E lyo imfumu yatile: “Uyu na o wa mbila.” 27 Kabili kalinda akonkenyepo ati: “Ndemona imibutukile ya wa ntanshi ili nge mibutukile+ ya kwa Ahimaasi+ mwana Sadoke.” Ne mfumu yatile: “Uyu muntu musuma,+ afwile aisa ne mbila nsuma.”+ 28 E lyo Ahimaasi abilikishe no kutila ku mfumu: “Kuli umutende!” E lyo atootele ku mfumu ashiba ne cinso pa nshi. Kabili atile: “Acindikwe+ Yehova Lesa wenu, uwamupeela+ abantu abaimiine shikulu imfumu!”

29 Lelo imfumu yatile: “Bushe umulumendo Abishalomu ali umutende?” Ahimaasi atile: “Nacimona impasase iikalamba ilyo Yoabu acituma umubomfi wa mfumu no mubomfi wenu na ine, kabili tatwacishiba umulandu.”+ 30 Ne Imfumu yatile: “Sela, iminina apa.” Na o aliselele no kwiminina shilili.

31 Kabili umwina Kushi+ alingile, no mwina Kushi atile: “Shikulu imfumu nasumine imbila alaumfwa, pantu Yehova napingula ukumupokolola ku minwe ya balemwimina.”+ 32 Lelo imfumu yaipwishe umwina Kushi aiti: “Bushe umulumendo Abishalomu ali umutende?” E lyo umwina Kushi atile: “Abalwani ba kwa shikulu imfumu na bonse abamwimina ku kucita ububi babe ngo yo mulumendo.”+

33 Awe imfumu yaumfwile ububi, yalanina ku ng’anda ya pa mutenge+ pa mpongolo no kulila; ne fi e fyo yalesosa ilyo yaleya: “Mwana wandi Abishalomu, mwana wandi, mwana wandi+ Abishalomu! Iye kanshi nga nine nafwa ukucila iwe, Abishalomu mwana wandi, we mwana wandi!”+

19 Pa numa ya ifi, cashimikwe kuli Yoabu ukuti: “Moneni! Imfumu ilelila no kuloosha Abishalomu.”+ 2 E ico ukucimfya kwa bulya bushiku kwasangwike ukuloosha ku bantu bonse, pantu abantu balyumfwile bulya bwine bushiku ukuti: “Imfumu nayumfwa ububi pa mwana wa iko.” 3 Awe abantu basokelele mu musumba+ muli bulya bushiku, kwati ni filya abantu abaseebana basokelela nga bafulumuka ku bulwi. 4 Awe imfumu yafimbene ku menso, kabili yalelila ilebilikisha aiti: “We mwana wandi Abishalomu! Abishalomu mwana wandi, mwana wandi!”+

5 E lyo Yoabu aingile ku mfumu mu ng’anda no kutila: “Buno bushiku mwalenga ababomfi benu bonse insoni. Ababomfi benu abapuswishe umweo wenu buno bushiku+ ne myeo ya bana benu abaume+ na bana benu abanakashi+ ne myeo ya bakashi benu+ ne myeo ya bakanakashi benu,+ 6 pantu mwatemwa abamupata no kupata abamutemwa; pantu lelo mwalanga ukuti abakalamba ba bashilika na babomfi tababa kantu kuli imwe, pantu ninjishiba ukuti Abishalomu aba uwa mweo lelo na ifwe bonse atufwa, nga cawama kuli imwe. 7 Nomba imeni, fumeni no kusosa ifya kuteka imitima+ ya babomfi benu, pantu ndelapa mwi shina lya kwa Yehova nati, nga tamwafume, ninshi takwabe umuntu uwalatubilisha nenu ubushiku;+ ne ci calabipa ukucila ifibi fyonse ifyaisa pali imwe ukutula ku bwaice bwenu ukufika na nomba.” 8 Awe imfumu yalimine no kwikala mu mpongolo,+ kabili baebele abantu bonse abati: “Imfumu naikala mu mpongolo.” Na bantu bonse batampile ukwisa ku mfumu.

Ninshi abena Israele balifulumwike cila muntu ku ng’anda yakwe.+ 9 Nomba abantu bonse balekansana mu mikowa yonse iya kwa Israele abati: “Imfumu yalitupokolwele ku minwe ya balwani besu,+ kabili e yatupuswishe ku minwe ya baPelishiti; kabili nomba yafulumuka mu calo ukufuma kuli Abishalomu.+ 10 Kabili Abishalomu, uo twasubile ukuti akatuteka,+ nafwila mu bulwi.+ Nomba cinshi mwikalile fye ukwabula ukubwesha imfumu?”+

11 Lelo Imfumu Davidi yatumine amashiwi kuli Sadoke+ na Abiatari+ bashimapepo aiti: “Soseni ku bakalamba ba bena Yuda+ amuti, ‘Cinshi mwalakokwela ukubwesesha imfumu ku ng’anda ya iko, ilyo amashiwi ya bena Israele bonse nayafika ku mfumu ku ng’anda ya iko?12 Imwe ni mwe bamunyinane; ni mwe ifupa lyandi no munofu wandi.+ Nga cinshi mwalakokwela ukubwesha imfumu?’13 Kabili kuli Amasa musose amuti,+ ‘Bushe tauli ifupa lyandi kabili umunofu wandi? Lesa ankande kabili alundenapo+ nga tawakabe umukalamba wa bashilika ku cinso candi inshiku shonse ukupyana pali Yoabu.’”+

14 E lyo ayalwile imitima ya bantu bonse aba kwa Yuda baba ngo muntu umo,+ ica kuti abantu batumine amashiwi ku mfumu abati: “Bweleni, pamo na babomfi benu bonse.”

15 E fyo imfumu yabwelele no kufika na ku Yordani. Na bena Yuda, baile ku Gilgali+ ku kupokelela imfumu, no kuyabusha Yordani. 16 E lyo Shimei+ mwana Gera+ umwina Benjamini, uwa ku Bahurimu,+ alyangufyenye no kuya pamo na baume ba kwa Yuda ku kupokelela Imfumu Davidi. 17 Kabili ali na baume ikana limo (1,000) aba kwa Benjamini. (Na Siba+ umubomfi wa mu ng’anda ya kwa Shauli na bana bakwe abaume ikumi na basano (15)+ na babomfi bakwe amakumi yabili (20) bali nankwe, kabili bafikile ku Yordani ilyo imfumu tailafika. 18 Kabili ayabwike pa cabu+ no kwabusha aba mu ng’anda ya mfumu no kucita ifisuma mu menso yakwe.) Lelo Shimei mwana Gera, aliwile ku cinso ca mfumu ilyo yalesungamina ukwabuka Yordani.+ 19 E lyo atile ku mfumu: “Bashikulu bambelele uluse pa bubi nacitile, kabili mwi-ibukisha ifyo umubomfi wenu alufyenye+ pa bushiku bashikulu imfumu bafumine mu Yerusalemu, imfumu icibiika ku mutima.+ 20 Pantu ne mubomfi wenu ninjishiba ukuti nine nabembwike; e ico moneni, ndi uwa ntanshi pali bonse aba mu ng’anda ya kwa Yosefe+ ukwisa ku kupokelela shikulu imfumu.”

21 Ilyo line Abishai+ mwana Seruya+ ayaswike no kutila: “Bushe Shimei taipaiwe, apo alapishe uwasubwa wa kwa Yehova?”+ 22 Lelo Davidi atile: “Cimukumine shani+ ici bamwana Seruya, pa kuti mulencincintila+ lelo? Bushe kwipaiwe umuntu mu Israele buno bushiku?+ Bushe nshishibe lelo ukuti nine mfumu ya bena Israele?” 23 E lyo imfumu yatile kuli Shimei: “Tawafwe.” Kabili imfumu yalilapile kuli ena.+

24 Kabili Mefiboshete+ umwishikulu wa kwa Shauli aishile ku kupokelela imfumu; kabili tasambile amakasa*+ yakwe nangu kubeya umwefu+ wakwe kabili tacapile ifya kufwala fyakwe ukutula pa bushiku imfumu yaile ukufika pa bushiku yabwelele umutende. 25 Nomba ilyo afikile ku Yerusalemu ku kupokelela imfumu, imfumu yamwipwishe ati: “Cinshi ico ushankonkeele Mefiboshete?” 26 Na o atile: “Mwe shikulu imfumu, umubomfi wandi alimbepa.+ Pantu ine ne mubomfi wenu natile, ‘Leka nteyanye impunda pa kuti nyendelepo no kuya ne mfumu,’ pantu umubomfi wenu alilemana.+ 27 Kabili abepeeshe+ umubomfi wenu kuli shikulu imfumu. Lelo bashikulu imfumu baba nga malaika+ wa kwa Lesa wa cine, kanshi citeni icawama mu menso yenu. 28 Pantu shikulu imfumu nga apingwile aba mu ng’anda ya kwa tata bonse ukufwa, lelo mwabikile umubomfi wenu pali abo abalya pe tebulo lyenu.+ E ico bushe ncili ne nsambu ya kuilishanya+ na kabili ku mfumu?”

29 Lelo imfumu yamwipwishe ati: “Cinshi ico uletwalilila ukusosa? Ndetila, Iwe na Siba muleakana ibala.”+ 30 Na o Mefiboshete atile ku mfumu: “Lekeni asende fye lyonse,+ apo shikulu imfumu abwela umutende ku ng’anda yakwe.”

31 Kabili Barsilai+ umwina Gileadi atentemwike ukufuma ku Rogelimu pa kuti abuke Yordani ne mfumu ukuti aishindike ku Yordani. 32 Barsilai ali mukote nga nshi, ali ne myaka amakumi cinekonsekonse (80);+ kabili e waleliisha imfumu ilyo yaikele ku Mahanaimu,+ pantu ali muntu uwa fyuma nga nshi.+ 33 Kabili imfumu yatile kuli Barsilai: “Wabuke na ifwe, kabili ndi no kulakuliisha ku mwandi mu Yerusalemu.”+ 34 Lelo Barsilai atile ku mfumu: “Myaka inga iyashalako kuli ine iya kuba no mweo pa kuti nje ne mfumu ku Yerusalemu?35 Nomba ndi ne myaka amakumi cinekonsekonse (80).+ Bushe kuti nailuka icisuma ne cibi, nangu bushe umubomfi wenu kuti asonda ifya kulya ne fya kunwa,+ nangu bushe kuti naumfwa+ amashiwi ya bakemba abaume na banakashi?+ E ico cinshi ico umubomfi wenu alebela icisendo+ kabili kuli shikulu imfumu?36 Umubomfi wenu ashindika fye imfumu ukufika ku Yordani, e ico cinshi imfumu ilenambwila icilambu ici?+ 37 Shi lekeni umubomfi wenu abwelelemo, lekeni nkafwile+ mu musumba wandi umwaba inshiishi ya kwa tata na mayo.+ Lelo kuli umubomfi wenu Kimhamu.+ Lekeni abuke na shikulu imfumu; kabili mumucite icawama mu menso yenu.”

38 Awe imfumu yatile: “Kimhamu aleabuka na ine, na ine nalamucita icawama mu menso yobe; kabili conse ico wanjeba nkakucitila.” 39 E lyo abantu bonse bayabwike Yordani, ne mfumu na yo yalyabwike; kabili imfumu yatomwene+ Barsilai no kumupaala,+ e lyo abwelelemo ku mwakwe. 40 Ilyo imfumu ya-abukile ku Gilgali,+ Kimhamu ayabukile pamo na yo, na bena Yuda bonse, na hafu wa bena Israele, pa kuti babweshe imfumu.

41 Kabili moneni! abaume bonse aba kwa Israele baleisa ku mfumu, e lyo batile ku mfumu: “Nga cinshi+ bamunyinefwe abaume ba kwa Yuda bamufyushisha ukuti babushe imfumu na ba mu ng’anda ya iko na baume bonse aba kwa Davidi pa Yordani?”+ 42 E lyo abaume bonse aba kwa Yuda bayaswike abaume ba kwa Israele abati: “Pantu imfumu yapalama sana kuli ifwe;+ nga cinshi ico mwafulilwa pali uyu mulandu? Bushe twalililepo ifya mfumu, napamo ukupeelwapo akantu?

43 Lelo, abaume ba kwa Israele bayaswike abaume ba kwa Yuda no kutila: “Ifwe natukwatilapo insambu pa mfumu imiku ikumi (10)+ ukucila imwe, ica kuti muli Davidi twalifula ukumucila. Nga kanshi cinshi ico mushalekele ni fwe twabalilapo+ ukubwesha imfumu? Nga cinshi ico mwatusuulila?” Lelo amashiwi ya baume ba kwa Yuda yalilumine ukucila aya baume ba kwa Israele.

20 Nomba kwali icinangwa ca muntu,+ ishina lyakwe ni Sheba,+ mwana Bikri umwina Benjamini, kabili alishishe intandala+ no kutila: “Tatuli bantu ba kwa Davidi, kabili tatuli na bupyani muli mwana Yese.+ Cila muntu alole kuli balesa+ bakwe, we Israele!” 2 Awe abaume ba kwa Israele bonse bafumine kuli Davidi no kutampa ukukonka Sheba mwana Bikri;+ lelo abaume ba kwa Yuda bena balambatile fye ku mfumu yabo ukufuma ku Yordani ukufika ku Yerusalemu.+

3 Awe Davidi afikile ku ng’anda yakwe ku Yerusalemu.+ E lyo imfumu yabuulile abanakashi ikumi (10),+ bakanakashi abo yashile ku kulinda ing’anda, no kubabika mu ng’anda beka, lelo yalebapeela ifya kulya. Kabili tayasendeme na bo,+ lelo bali abaisalilwa mpaka no bushiku bwa mfwa yabo, bali nga bamukamfwilwa nangu ca kuti umulume wabo ali no mweo.

4 E lyo imfumu yaebele Amasa+ ati: “Ita abaume ba kwa Yuda bese kuli ine mu nshiku shitatu, na iwe ukabe pano.” 5 Awe Amasa aile ku kwita abena Yuda; lelo taishile pa nshita bamupimiine. 6 E ico Davidi asosele kuli Abishai+ ati: “Uyu Sheba+ mwana Bikri akacita icibi kuli ifwe ukucila Abishalomu.+ Buula ababomfi+ ba kwa sokulu no kumukonka pa numa, epali asanga imisumba ya malinga no kutufyuka tulelolesha.” 7 Awe abaume ba kwa Yoabu+ na bena Kerete+ na bena Pelete+ ne mpalume shonse balimukonkele pa numa; bafumine mu Yerusalemu ku kukonka Sheba mwana Bikri. 8 Ilyo bapaleme ku libwe likalamba ilyaba mu Gibeone,+ Amasa+ alishile ku kubakumanya. Nomba Yoabu afwele ilaya lya bulwi; afwele ifya kufwala fya bulwi no lupanga mu musana, mu cikwama ca luko. Ilyo aseleleko, ulupanga lwalisomweke no kupona.

9 E lyo Yoabu aipwishe Amasa ati: “Bushe uli umutende munyinane?”+ Iminwe ya kwa Yoabu iya ku kulyo yaikete Amasa ku mwefu pa kuti amutomone.+ 10 Lelo Amasa, tabikileko amano ku lupanga ulwali mu minwe ya kwa Yoabu; na o amulashile+ mu lufumo kuli ulo lwine lupanga, na mala yakwe yapongolokele pa nshi, kabili tabwekeshepo ukumulasa iyo. Na o alifwile. E lyo Yoabu na Abishai munyina bakonkele Sheba mwana Bikri.

11 Kabili umulumendo umo uwa kwa Yoabu aiminine apali Amasa no kutila: “Onse uwatemwa Yoabu kabili onse uwaba kuli Davidi,+ akonke Yoabu!” 12 Ninshi Amasa ali fye mu mulopa+ pa kati ka musebo ukalamba. Ilyo uyo muntu amwene ukuti abantu bonse baleiminina, aseseshe Amasa ukufuma mu musebo amubika mu mpanga. Asukile amufimba ica kufwala, pantu amwene ukuti onse uwafika apo ali aleiminina.+ 13 Ilyo fye amufumishe mu musebo, abantu bonse balepita no kukonka Yoabu pa kufulumuna Sheba+ mwana Bikri.

14 Kabili Sheba apitile mu mikowa yonse iya kwa Israele ukuya ku Abele wa mu Bete-maaka.+ Na bena Bikri balilongene na bo no kumukonka.

15 Awe Yoabu na bantu bakwe baishileshinga Sheba mu Abele wa mu Bete-maaka no kutuulikila uyu musumba+ amaloba nge cibumba, apo na o washingulwikwe na maloba yatuulikwa nge cibumba. Na bantu bonse abali na Yoabu balenenuna ilinga, pa kuti baliwishe. 16 E lyo umwanakashi wa mano+ abilikishe ukufuma mu musumba ati: “Umfweni, umfweni mwe bantu! Shi soseni kuli Yoabu amuti, ‘Palamina kuno, no kuleka nande nobe.’” 17 Na o alipalamineko, e lyo umwanakashi atile: “Bushe ni we Yoabu?” na o atile: “Nine.” E lyo amwebele ati: “Umfwa amashiwi ya mubomfi obe umwanakashi.”+ Na o atile: “Ndeumfwa.” 18 E lyo atile: “Abena kale balesosa abati, ‘Lekeni bepushe mu Abele, kabili e fyo bakapwisha umulandu.’19 Ndeimininako abantu ba mutende+ kabili aba cishinka+ aba kwa Israele. Mulefwaya ukonaula umusumba+ kabili nyina muli Israele. Cinshi ico mulefwaila ukulofya+ ubupyani+ bwa kwa Yehova?” 20 E lyo Yoabu ayaswike ati: “Ine te kuti ndofye no konaula umusumba. 21 Umulandu te ifyo uli, lelo umuntu wa mu calo ca mpili ica kwa Efraimu,+ ishina lyakwe Sheba,+ mwana Bikri, aimishe ukuboko kwakwe ukulwisha Imfumu Davidi.+ Mutupeele fye uyo wine muntu,+ e lyo nalaya no kuleka uno musumba.”+ No mwanakashi atile kuli Yoabu: “Mona! Nalakupoosela umutwe+ wakwe ukufuma pa cibumba!”

22 Ilyo line umwanakashi aile ku bantu bonse no kulanda na bo mu mano yakwe,+ kabili baputwile umutwe wa kwa Sheba mwana Bikri, baupoosele kuli Yoabu. E lyo alishishe intandala+ no kuleka basalangane ukufuma ku musumba, cila muntu aile ku mwakwe; na o Yoabu abweleele ku Yerusalemu ku mfumu.

23 Kabili Yoabu ali mukalamba wa bashilika+ bonse aba kwa Israele; na Benaya+ mwana Yehoyada+ ali umukalamba wa bena Kerete+ na bena Pelete.+ 24 Adoramu+ ali mukalamba wa balembelwe ukubomba umulimo wa kupatikishiwa; na Yehoshafati+ mwana Ahiludi ali ni kebukisha. 25 Sheva+ ali ni kalemba,+ Sadoke+ na Abiatari+ bali ni bashimapepo. 26 Kabili Ira umwina Yairi na o ali ni cilolo mukalamba+ uwa kwa Davidi.

21 Nomba kwali icipowe+ mu nshiku sha kwa Davidi pa myaka itatu, umwaka no mwaka; e lyo Davidi aipwishe Yehova. Na o Yehova atile: “Kuli Shauli na ku ba mu ng’anda yakwe kuli umulandu wa mulopa, pantu aipeye abena Gibeone.”+ 2 Awe imfumu yaitile abena Gibeone+ no kulanda na bo. (Nomba abena Gibeone tabali bana ba kwa Israele, lelo bali abashalapo ba mu bena Amore;+ kabili abana ba kwa Israele balilapile kuli bena,+ lelo Shauli alefwaya ukubepaya+ pa mulandu wa kumfwilako abana ba kwa Israele na ba kwa Yuda ubufuba.+) 3 E lyo Davidi aipwishe abena Gibeone ati: “Cinshi nalamucitila, kabili cinshi nalamupeela ku kuba icifuta mulandu+ no kuleka mupaale ubupyani+ bwa kwa Yehova?” 4 Abena Gibeone bayaswike ati: “Te silfere nangu golde+ tulefwaya muli uyu mulandu wesu na Shauli na ba mu ng’anda yakwe, kabili tatwakwata insambu sha kwipaya umuntu mu Israele.” E lyo Davidi atile: “Conse ico mwalasosa ndemucitila.” 5 Na bo batile ku mfumu: “Umuntu uwatupwishishe+ kabili uwacitile amapange ya kutulofya+ ukuti twi-ikala mu citungu ca Israele conse, 6 tupeeleni abana bakwe abaume cinelubali (7);+ na ifwe tukakulika ifitumbi fyabo pa ntanshi+ ya kwa Yehova mu Gibea+ wa kwa Shauli, uwasalwa wa kwa Yehova.”+ Imfumu yatile: “Nalamupeela.”

7 Lelo, imfumu yaumfwilile uluse Mefiboshete+ mwana Yonatani mwana Shauli pa mulandu wa mulapo+ uo Davidi na Yonatani mwana Shauli balapile mwi shina lya kwa Yehova. 8 Lelo imfumu yabuulile abana baume babili aba kwa Rispa+ umwana mwanakashi wa kwa Aya abo afyaliile Shauli, Armoni na Mefiboshete, na bana baume basano aba kwa Mikali*+ umwana mwanakashi wa kwa Shauli abo afyele kuli Adriele+ mwana Barsilai umwina Mehola. 9 E lyo abapeele mu minwe ya bena Gibeone na bo babakulikile mu lupili pa ntanshi ya kwa Yehova,+ bonse cinelubali (7) bafwilile pamo; kabili baipaiwe mu nshiku sha ntanshi isha kulobolola, ku kutendeka kwa kuseepa barle.+ 10 Kabili Rispa umwana mwanakashi wa kwa Aya+ abuulile icisalu+ no kuyanshikila pa cilibwe e po alaikala ukutula pa kutendeka kwa kuseepa mpaka imfula+ yalokele pali bena; kabili talekele ifyuni+ fya mu lwelele ukwikala pali bena akasuba nangu ifiswango+ fya mu mpanga ubushiku.

11 Mu kuya kwa nshita amashiwi+ yafikile kuli Davidi pa co Rispa mwana Aya, kanakashi wa kwa Shauli acitile. 12 E lyo Davidi aile no kubuula amafupa ya kwa Shauli+ na mafupa ya kwa Yonatani umwana wakwe ukufuma ku bena Yabeshe-gileadi+ abayebile ukufuma pa lubansa lwa Bete-shani,+ uko abaPelishiti babakulikile+ mu bushiku abaPelishiti baipeye Shauli pa Gilboa.+ 13 Kabili aletele amafupa ya kwa Shauli na mafupa ya kwa Yonatani umwana wakwe; kabili, balonganike amafupa ya baume abakulikwe.+ 14 E lyo bashiikile amafupa ya kwa Shauli na ya kwa Yonatani umwana wakwe mu calo ca kwa Benjamini mu Sela+ mu nshiishi ya kwa Kishi+ wishi, pa kuti bacite conse ico imfumu yasosele. Pa numa ya ifi, Lesa akutike ku kupapaata kwabo pa mulandu wa calo.+

15 Nomba abaPelishiti+ na kabili balwile na Israele. Awe Davidi na babomfi bakwe baliile no kulwa na baPelishiti; kabili Davidi alinakile. 16 E lyo Ishibi-benobe, uwa mu bafyelwe ku bena Refa,+ uwali ne fumo+ ilyalefina nalimo amakilogramu yatatu na hafu* kabili uwakakile ulupanga ulupya mu musana, apangile ukwipaya Davidi. 17 Ilyo line Abishai+ mwana Seruya aishilemwafwa,+ aumine umuPelishiti no kumwipaya. E lyo abantu ba kwa Davidi balapile kuli ena abati: “Mwikaya na ifwe ku kulwa kabili,+ pa kuti mwikashimya+ inyali+ ya kwa Israele!”

18 Nomba pa numa ya ifi kwaimine inkondo na kabili na baPelishiti ku Gobe. E lyo Sibekai+ umwina Husha+ aipeye Safi, uwafyelwe mu bena Refa.+

19 Na kabili kwali ubulwi na baPelishiti ku Gobe, e lyo Elhanani+ mwana Yairi-oregimu umwina Betelehemu aipeye Galyati umwina Giti, uo umusako we fumo lyakwe wali ngo mulando wa bakapikula ba nsalu.+

20 Na kabili kwali ubulwi mu Gati,+ ilyo kwali umuntu ipaka nga nshi, uwali ne minwe mutanda (6) ku maboko yonse yabili ne fikondo mutanda ku makasa yonse yabili, e kuti amakumi yabili na fine (24) fyonse pamo; na o wine afyelwe mu bena Refa.+ 21 Kabili alepontela Israele.+ Awe Yonatani+ mwana Shimei,+ munyina Davidi, asukile amwipaya.

22 Aba bane bafyelwe mu bena Refa mu Gati;+ kabili Davidi na babomfi bakwe e babepeye.+

8 Aya e mashina ya mpalume+ sha kwa Davidi: Yoshebu-bashebete+ umwina Hakmone, umukalamba wa aba batatu. Aimishe ifumo lyakwe no kwipaya abantu imyanda cinekonsekonse (800) pa muku umo. 9 Uwakonkapo ali ni Eleasari+ mwana Dodo+ mwana Ahohe uwali pa mpalume shitatu ishali na Davidi ilyo basonsombele abaPelishiti. Balilongene ku kulwa, e lyo abaume ba kwa Israele babwelelemo.+ 10 E waimine alauma abaPelishiti mpaka no kuboko kwakwe kwanaka sana lelo iminwe yakwe yali nge yakakatile ku lupanga,+ ica kuti muli bulya bushiku Yehova apuswishe nga nshi abantu bakwe;+ na bantu bakonkele mu numa yakwe ku kusenda ifipe ifya baipaiwe.+

11 No wamukonkelepo ali ni Shama mwana Age umwina Harari.+ E lyo abaPelishiti balongene ku Lehi, ukwali ibala ilyaiswilemo ilanda;+ kabili abantu bafulumwike ku cinso ca baPelishiti. 12 Lelo ena alishangile no kwiminina pa kati ke bala no kulipususha kabili aipeye abaPelishiti abengi, ica kuti Yehova apuswishe nga nshi abantu bakwe.+

13 Kabili abakalamba batatu aba pa bantu amakumi yatatu (30)+ batentemwike no kufika pa nshita ya kulobolola, bafikile kuli Davidi ku lucengo lwa Adulamu;+ ne nkambi ya baPelishiti yali mu mpanga iyabatama iya Refaimu.+ 14 Inshita ilya Davidi ali ku ncende iyayafishe ukufikako;+ ne nkambi+ ya baPelishiti ninshi yali mu Betelehemu. 15 Ilyo papitile inshita Davidi e pa kufuluka ati: “Iye, nga ninganwako amenshi ya mu cishima ca mu Betelehemu icabela ku mpongolo!”+ 16 Awe impalume ishi shitatu shaileingila ku maka mu nkambi ya baPelishiti no kutapa amenshi mu cishima ca mu Betelehemu icaba mu mpongolo, shaliyasendele, shayatwala na kuli Davidi;+ lelo akene ukunwa, kabili ayetile+ kuli Yehova. 17 Kabili atile: “Te kuti ncite ici cintu,+ mwe Yehova! Bushe inwe umulopa+ wa bantu abaibikile mu kapoosa mweo pa kuya mu kutapa amenshi?” E fyo akene ukunwa yalya menshi.

Ifi e fyacitile ishi mpalume shitatu.

18 Abishai+ munyina Yoabu mwana Seruya,+ ena ali umukalamba wa bantu amakumi yatatu (30), kabili aimishe ifumo lyakwe no kwipaya abantu imyanda itatu (300), kabili na o aishibikwe nga balya batatu.+ 19 Nangu ca kuti ali uwacindikwa ukucila abashala amakumi yatatu (30), kabili aishileba intungulushi yabo, kuli balya batatu tafikileko.+

20 Benaya+ mwana Yehoyada+ umwana wa muntu wa maka, uwacitile ifingi mu Kabseele,+ aipeye abana babili aba kwa Ariele uwa ku Moabu; kabili alitentemwike no kuyaipaya inkalamo+ mu cilindi pa bushiku kwali imfula ya bungululu bwabuuta.+ 21 E waipeye umwina Egupti ipaka.+ Nangu ca kuti mu minwe ya mwina Egupti mwali ifumo, aile kuli ena ne nkonto no kusompola ifumo mu minwe ya mwina Egupti no kumwipaila kwi fumo lyakwe line.+ 22 Ifi e fyo Benaya+ mwana Yehoyada acitile; kabili na o aishibikwe nga shilya mpalume shitatu.+ 23 Nangu ca kuti ali uwacindikwa sana ukucila balya amakumi yatatu (30), tafikileko kuli balya batatu; lelo Davidi e o abuulile ukuti abe uwa kumulinda.+

24 Asaele+ munyina Yoabu ali pa ba makumi yatatu (30); Elhanani+ mwana Dodo uwa ku Betelehemu, 25 Shama+ uwa ku Herode, Elika uwa ku Herode, 26 Helese+ uwa ku Pelete, Ira+ mwana Ikeshe+ umwina Tekoa, 27 Abiesere+ umwina Anatote,+ Mebunai umwina Husha,+ 28 Salmone umwina Ahohe,+ Maharai+ umwina Netofa, 29 Helebu+ mwana Baana umwina Netofa, Itai+ mwana Ribai umwina Gibea uwa mu bana ba kwa Benjamini, 30 Benaya+ umwina Piratone, Idai uwa ku mimana ya Gaashi,+ 31 Abialiboni umwina Araba, Asimabete+ umwina Bahurimu, 32 Eliaaba umwina Shaalibimu, abana ba kwa Yashene, Yonatani,+ 33 Shama umwina Harari, Ahiamu+ mwana Sharari umwina Harari, 34 Elifelete mwana Ahasibai umwana wa mwina Maaka, Eliamu mwana Ahitofele+ umwina Gilo, 35 Hesero+ umwina Karmele, Paarai umwina Arbi, 36 Igali mwana Natani+ uwa ku Soba, Bani umwina Gadi, 37 Seleke+ umwina Amone, Naharai umwina Beerote, abalesenda ifyanso fya kwa Yoabu mwana Seruya, 38 Ira umwina Itri,+ Garebu+ umwina Itri, 39 Uria+ umwina Hiti—bonse pamo amakumi yatatu na cinelubali (37).

24 Na kabili+ ubukali bwa kwa Yehova bwaishile pali Israele, ilyo umo* atunkile Davidi ati: “Kabiye, kapende+ abena Israele na bena Yuda.” 2 E ico imfumu yaebele Yoabu+ umukalamba wa bashilika uo yali na o ati: “Kabiyeni mu mikowa ya kwa Israele yonse, ukutendekela ku Dani ukufika ku Beere-sheba,+ kabili mupende abantu,+ no kuleka njishibe impendwa ya bantu.”+ 3 Lelo Yoabu aebele imfumu ati: “Yehova Lesa wenu afushe abantu imiku umwanda ukucila ifyo bali ino nshita ilyo shikulu imfumu ilemonako no kumona. Lelo cinshi shikulu imfumu alefwaila ukucita icintu ca musango yu?”+

4 Awe amashiwi ya mfumu yasukile yanasha+ Yoabu na bakalamba ba bashilika. E ico Yoabu na bakalamba ba bashilika bafumine ku cinso ca mfumu ku kuyapenda+ abena Israele. 5 Bayabwike Yordani no kupanga inkambi pa Aroere+ ku kulyo kwa musumba uwaba pa kati ka mupokapoka, lwa ku bena Gadi,+ no kufika ku Yasere.+ 6 E lyo bafikile ku Gileadi+ na ku calo ca bena Tatimu-hodeshe no kupita ukuya ku Dani-yaani no kufika ku Sidone.+ 7 E lyo bafikile ku musumba we linga uwa Turi+ ne misumba yonse iya bena Hibi+ ne ya bena Kaanani no kufika ku Beere-sheba,+ umusumba uwaba mu Negebu+ wa kwa Yuda. 8 E fyo baendawike mu calo conse no kubwelela ku Yerusalemu pa mpela ya myeshi pabula (9) ne nshiku amakumi yabili (20). 9 E lyo Yoabu apeele imfumu impendwa+ ya bantu abalembelwe; kabili muli Israele mwali abaume ba maka amakana imyanda cinekonsekonse (800,000) abengaya ku bulwi, na baume ba kwa Yuda bali amakana imyanda isano (500,000).+

10 Nomba umutima wa kwa Davidi watampile ukumucusha+ pa numa ya kupenda abantu. E lyo Davidi asosele kuli Yehova ati: “Nimembuka+ nga nshi pa co ncitile. E ico nomba mwe Yehova, mbeleleni uluse ne mubomfi wenu napapaata pa membu shandi;+ pantu nincita ica bupumbu.”+ 11 Ilyo Davidi abuukile ulucelo, icebo ca kwa Yehova calishile kuli Gadi+ kasesema, uwalemwenako Davidi ifimonwa,+ no kutila: 12 “Kabiye, kasose kuli Davidi auti, ‘Yehova atila: “Ndetambika kuli iwe ifintu fitatu.+ Usalepo cimo, e co ndekucita.”’”+ 13 Awe Gadi aile kuli Davidi, no kumwipusha ati:+ “Bushe ulefwaya imyaka cinelubali (7) iya cipowe ise mu calo cobe,+ nelyo imyeshi itatu iya kufulumuka ku balwani bobe,+ na bo balekukonka, nelyo kube icikuko inshiku shitatu mu calo cobe?+ Nomba tontonkanyapo bwino no kunjeba ico ndi no kuyaeba uuntumine.” 14 E ico Davidi atile kuli Gadi: “Ici cintu cansakamika nga nshi. Leka tuwile mu minwe ya kwa Yehova,+ pantu alifulisha uluse;+ lelo niwila mu minwe ya bantu.”+

15 Awe Yehova aletele icikuko+ mu Israele ukufuma ulucelo ukufika ku nshita yapiminwe, ica kuti abantu amakana amakumi cinelubali (70,000) e bafwile+ ukutendekela ku Dani ukufika ku Beere-sheba.+ 16 Na malaika+ atambike ukuboko kwakwe ku Yerusalemu pa kuti onaule umusumba; e lyo Yehova alangulwike+ pali ubo bubi, atile na kuli malaika uwaleipaya abantu ati: “Capwa! Nomba bwesha ukuboko kobe.” Kabili uyo malaika wa kwa Yehova ali mupepi na pa kupumina ingano apa kwa Arauna+ umwina Yebusi.+

17 Na o Davidi, ilyo amwene malaika uwalekanda abantu, e lyo atile kuli Yehova: “Moneni, ine, nine nabembuka kabili nine ncitile ici cilubo; lelo ishi mpaanga+—cinshi shicitile? Lekeni ukuboko kwenu kube pali ine+ na pa ba mu ng’anda ya kwa tata.”

18 Kabili Gadi aile kuli Davidi muli bulya bushiku no kumweba ati: “Kabiyeni, kapangileni Yehova iciipailo apa kupumina ingano apa kwa Arauna umwina Yebusi.”+ 19 Awe Davidi aliile ukulingana na mashiwi Gadi amwebele, nga fintu Yehova asosele.+ 20 Ilyo Arauna aloleshe no kumona imfumu na babomfi ba iko balelungama uko ali, e lyo Arauna apo pene afumine no kuyatoota+ ku mfumu, ashiba ne cinso cakwe pa nshi.+ 21 E lyo Arauna atile: “Nga cinshi ico mwe shikulu mwe mfumu yandi mwaishila ku mubomfi wenu?” Na o Davidi atile: “Njishile ku kushita+ apa kupumina ingano kuli iwe ukuti nkuulilepo Yehova iciipailo, pa kuti icikuko+ cifume pa bantu.” 22 Lelo Arauna atile kuli Davidi: “Mwe shikulu mwe mfumu yandi cibuuleni+ no kupeelelapo ilambo ilyo mulefwaya. Moneni, ing’ombe sha kupeela ilambo ne ca kupuminako ne fibombelo fya ng’ombe ifya kubomfya nge nkuni.+ 23 Mwe mfumu, fyonse fye Arauna apeela ku mfumu.” Kabili Arauna atile ku mfumu: “Shi Yehova Lesa wenu asekelele muli imwe.”+

24 Lelo, imfumu yatile kuli Arauna: “Iyo, ndeshita kuli iwe mu ndalama;+ kabili nshatuule kuli Yehova Lesa wandi amalambo ya koca ukwabula ukupoosapo icili conse.”+ Awe Davidi ashitile+ apa kupumina ingano ne ng’ombe pa mashekele ya silfere amakumi yasano (50). 25 Kabili palya e po Davidi akuuliile Yehova iciipailo+ no kutuula amalambo ya koca na malambo ya mutende, na Yehova akutike ku kupapaata+ kwabo, e fyo icikuko cafumine pa bena Israele.