Ibuuku lya Ntanshi Ilya kwa Samwele

1 Awe kwali umuntu umo uwa ku Ramataimu-sofimu+ uwa mu calo ca mpili ica kwa Efraimu,+ ishina lyakwe ni Elkana,+ mwana Yehoramu, mwana Elihu, mwana Tohu, mwana Sufi,+ umwina Efraimu. 2 Ali na bakashi babili, umo ishina lyakwe ni Hana, na umbi ishina lyakwe ni Penina. Kabili Penina alikwete abana, lelo Hana takwete abana iyo.+ 3 Kabili ulya muntu aleya ukufuma mu musumba wa ku mwabo cila mwaka ku kuyapepa+ no kutuula amalambo kuli Yehova wa mabumba ku Shilo.+ Kabili kulya e kwali abana baume babili aba kwa Eli, Hofini na Finehasi,+ abali bashimapepo ba kwa Yehova.+

4 Nomba bwalifikile ubushiku ilyo Elkana alepeela ilambo, kabili apeele Penina umukashi wakwe na bana bakwe abaume bonse na bana bakwe abanakashi ifipimo fyabo;+ 5 lelo Hana amupeele icipimo cimo. Nangu cali fyo Hana e o atemenwe,+ lelo Yehova tamupeele ubufyashi.+ 6 Kabili umukashi munankwe alemucusha+ sana pa kuti amukalifye pantu Yehova tamupeele ubufyashi. 7 Kabili e fyo alecita cila mwaka,+ lyonse ilyo baleya ku ng’anda ya kwa Yehova.+ E fyo alemucusha, ica kuti alelila no kulya iyo. 8 E lyo Elkana umulume wakwe amwipwishe ati: “Hana, cinshi ulelila, kabili cinshi ico tauleliila ifya kulya, kabili cinshi umutima obe ubelele no bulanda?+ Bushe nshawama kuli iwe ukucila abana baume ikumi (10)?”+

9 Nomba ilyo baliile no kunwa mu Shilo, Hana alimine, ninshi Eli shimapepo ekele pa cipuna mupepi ne nceshi sha pa mwinshi we tempele+ lya kwa Yehova. 10 Awe umutima wakwe walecula,+ kabili atampile ukupepa kuli Yehova+ no kulila nga nshi.+ 11 Alapile no mulapo+ ati: “Mwe Yehova wa mabumba, nga mukalolesha pa kucula kwa musha wenu+ no kunjibukisha,+ kabili nga tamwakalabe umusha wenu no kumupeela umwana umwaume, nkapeela uyo mwana kuli Yehova inshiku shonse isha mweo wakwe, kabili takabeye umushishi wakwe.”+

12 Kabili ilyo apepele pa nshita yalepa+ pa cinso ca kwa Yehova, Eli alemulolekesha pa kanwa. 13 Na o Hana, alesosela mu mutima;+ imilomo yakwe fye e yaletenta, ne shiwi lyakwe talyaleumfwika iyo. Lelo Eli ena aleti nakolwa.+ 14 E ico Eli amwipwishe ati: “Bushe iwe wakulakolwa fye lyonse?+ Kabiye, ubwele nga wakololoka.” 15 E lyo Hana ayaswike no kutila: “Iyo, mwe shikulu! Ndi mwanakashi uulecula no mutima; kabili nshinwenepo umwangashi nangu ifya kunwa fikola, lelo ndelondolola ifya mu mutima wandi ku cinso ca kwa Yehova.+ 16 Mwimona umusha wenu nge cinangwa,+ pantu ukufika pali nomba ndesosa ukulingana no bwingi bwa masakamika yandi no bucushi bwandi.”+ 17 E lyo Eli ayaswike no kutila: “Kabiye umutende,+ kabili Lesa wa kwa Israele akupeele ico wamulomba.”+ 18 Na o atile: “Shi beleleni umubomfi wenu umwanakashi uluse.”+ No mwanakashi alifuminepo no kuyalya,+ ne cinso cakwe tacamoneke ica bulanda na kabili.+

19 Kabili bacelele ulucelo no kupepa ku cinso ca kwa Yehova, e lyo babwelelemo ku ng’anda yabo ku Rama.+ Nomba Elkana asendeme+ no mukashi wakwe Hana, na Yehova alimwibukishe.+ 20 Nomba pa kwaluka kwa mwaka, Hana alimite no kufyala umwana mwaume kabili amwinike+ ati Samwele, atile, pantu “namulombele+ kuli Yehova.”

21 Mu kuya kwa nshita Elkana alimine pamo na ba mu ng’anda yakwe bonse ukuya ku kupeela Yehova ilambo+ lya pa mwaka no mutuulo+ wa pa mulapo wakwe. 22 Lelo Hana, ena taile,+ pantu aebele umulume wakwe ati: “Ilyo fye umwana akasumuka,+ nkamuleta, kabili akesamonekela ku cinso ca kwa Yehova no kwikala kulya pe.”+ 23 Na Elkana umulume+ wakwe amwebele ati: “Cita icawama mu menso yobe.+ Shala pa ng’anda mpaka ukamusumune. Shi Yehova acite ico asosele.”+ E ico uyu mwanakashi ashele pa ng’anda no kukonkanyapo ukoonsha umwana wakwe mpaka ilyo amusumwine.+

24 Awe ilyo fye amusumwine, alimusendele, asendele ne ng’ombe iilume iya myaka itatu ne tepe* limo ilya buunga no mutondo uukalamba uwa mwangashi,+ e lyo aingile mu ng’anda ya kwa Yehova mu Shilo.+ No mwana aali pamo nankwe. 25 Kabili baipeye ing’ombe iilume no kutwala umwana kuli Eli.+ 26 E lyo atile: “Mwe shikulu! Ndelapa pa cinso cenu,+ mwe shikulu, e ine mwanakashi uwaiminine pamo nenu pano pene ndepepa kuli Yehova.+ 27 Ni pali uyu mwana nalepepela ukuti Yehova ampeele+ ico namulombele.+ 28 E ico na ine, namwashimisha kuli Yehova.+ Inshiku shonse isha mweo wakwe, akaba wa kwa Yehova.”

Na o Elkana akonteme ku cinso ca kwa Yehova palya pene.+

11 E lyo Elkana aile ku ng’anda ku mwakwe ku Rama; lelo umwaice ali mubomfi+ wa kwa Yehova pa cinso ca kwa Eli shimapepo.

12 Nomba abana baume ba kwa Eli bali finangwa fya bantu;+ balisuulile Yehova.+ 13 Ifi e fyo balecita ku nama iyo abantu balingile ukupeela bashimapepo:+ baleti ilyo umuntu onse alepeela ilambo, umubomfi wa kwa shimapepo aleisa ne ca kutunkwilako ica meno yatatu ku minwe yakwe, ilyo inama ileipikwa,+ 14 no kushimpa ica kutunkwilako mu cilongo nelyo mu mpoto iyakwata ifya kwikatilako fibili atemwa mu mpoto iikalamba nangu mu mpoto iyakwata ica kwikatilako cimo. Conse ico ica kutunkwilako ca-abula, shimapepo aleibuulila. E fyo balecita ku Shilo ku bena Israele bonse abaleisako.+ 15 Kabili, ilyo bashilaoca amafuta ukuti yafutumune icushi,+ umubomfi wa kwa shimapepo aleisa no kweba uulepeela ilambo ati: “Mpeelako inama ya kocela shimapepo pantu alefwaya ukupoka iibishi, te yaipikwa iyo.”+ 16 No yo muntu nga amweba ati: “Leka batale bafutumune icushi ca mafuta.+ E lyo uibuulile we mwine conse ico umutima obe ulefwaya,”+ aleasuka ati: “Iyo, lelo leta nomba line; nga te ifyo, nalapoka ku maka!”+ 17 No lubembu lwa babomfi lwalikulile nga nshi mu menso ya kwa Yehova;+ pantu aba bantu basuulile umutuulo wa kuli Yehova.+

18 Na Samwele alebombela+ Yehova, ninshi ali umwaice, kabili alefwala efode wa nsalu.+ 19 Kabili nyina alemubilila ica kufwala icabula amaboko ico alemutwalila cila mwaka ilyo aya no mulume wakwe ukuyapeela ilambo lya pa mwaka.+ 20 Na o Eli apaalile+ Elkana no mukashi wakwe no kutila: “Shi Yehova akupeele abana muli uyu mukashi obe aba kupyana pa mwana mwa-ashimisha, uo mwa-ashimisha Yehova.”+ Na bo babwelele ku mwabo. 21 E lyo Yehova aumfwilile Hana uluse,+ na o alimite kabili afyele abana baume batatu na banakashi babili.+ No mwaice Samwele alekula na Yehova.+

22 Nomba Eli ali umukote nga nshi, kabili alyumfwile+ fyonse ifyo abana bakwe balecita+ kuli Israele onse ne fyo balelaala na banakashi+ abalebombela pa mwinshi wa cikuulwa ca kukumaninako.+ 23 Kabili alebepusha ati:+ “Cinshi mucitila ifintu fya musango yu?+ Pantu ifyo ndeumfwa pali imwe ku bantu bonse fibi.+ 24 Awe+ bana bandi, pantu ilyashi ndeumfwa, ilyo abantu ba kwa Yehova balesalanganya, taliweme.+ 25 Ngo muntu abembukila umuntu,+ Lesa akamulubulwila;+ lelo ngo muntu abembukila Yehova,+ nani wingamupepelako?”+ Lelo tabaleumfwa ifyo shibo+ alebeba, pantu Yehova alefwaya ukubepaya.+ 26 Muli yo nshita umwaice Samwele alekula kabili Yehova alimutemenwe na bantu na bo balimutemenwe.+

27 Nomba umuntu wa kwa Lesa+ aishile kuli Eli no kumweba ati: “E fyo Yehova asosa ati, ‘Bushe nshaisokolwele ku ba mu ng’anda ya fikolwe fyobe ilyo bali abasha mu Egupti ku ba mu ng’anda ya kwa Farao?+ 28 Kabili namusalile ukufuma mu mikowa yonse iya kwa Israele ukuti abe wandi,+ ukuba shimapepo no kunina pa ciipailo candi,+ pa kuti alefutumuna icushi ca malambo, ku kusenda efode pa cinso candi, ukuti mpeele ku ng’anda ya cikolwe cobe imituulo yonse iya pa mulilo iya bana ba kwa Israele.+ 29 Cinshi ico musaalwila amalambo yandi+ ne mituulo iyo namweba ukuti mulepeela mu cikuulwa candi ica mushilo,+ kabili ucindika abana bobe ukucila ine pa kuti muleina+ pa mulandu wa kulya ifyawamisha ifya mituulo yonse iya bantu bandi abena Israele?+

30 “‘E co Yehova, Lesa wa kwa Israele asosela ukuti: “Nasosele nati, Aba mu ng’anda yobe na ba mu ng’anda ya kwa wiso, bakabombela ine umuyayaya.”+ Lelo nomba Yehova asosa ati: “Ca kutali kuli ine, pantu abancindika+ nkabacindika,+ na bansuula nkabamona nga bashili kantu.”+ 31 Mona! Inshiku shileisa ilyo nkaputula amaka yobe na maka ya ba mu ng’anda ya kwa wiso, ica kuti tamwakabe umukote mu ng’anda yobe.+ 32 Kabili ukamona fye umulwani mu cikuulwa candi ica mushilo ilyo kuli ifisuma ifilecitwa mu Israele;+ kabili tamwakatale amuba umukote mu ng’anda yobe. 33 Lelo kuli umuntu obe umo uo nshakepaye ukufuma pa ciipailo candi pa kuti amenso yobe yakashibantukile no mweo obe ukanakuke; lelo abengi aba mu ng’anda yobe bakafwa ku lupanga lwa bantu.+ 34 Ne ci e cishibilo kuli iwe icikesaponena abana bobe babili abaume, Hofini na Finehasi.+ Bonse babili bakafwa mu bushiku bumo.+ 35 Kabili nkaifwaila shimapepo wa cishinka.+ Akacita ukulingana ne fili mu mutima wandi ne fyo mfwaya; kabili nkamukuulila ing’anda iibelelela, kabili akabombela uwasubwa wandi+ inshiku shonse. 36 Kabili onse uukashalako+ ku ba mu ng’anda yobe akesamukontamina ukuti alipilwe indalama no mukate, kabili akatila: “Shi munundeko kuli bushimapepo pa kuti ndelyako akamokolwa ka mukate.”’”+

3 Pali iyo nshita umwaice Samwele alebombela+ Yehova ku cinso ca kwa Eli, kabili muli isho nshiku Yehova+ alelanda fye limo limo;+ ifimonwa+ tafyaseekele.

2 Nomba muli ubo bushiku Eli alileele mu muputule wakwe, kabili amenso yakwe yatendeke ukushibantukila;+ alefilwa ukumona. 3 Ne nyali ya kwa Lesa yali tailashima, na Samwele aleele mwi tempele+ lya kwa Yehova, umwali icipao ca kwa Lesa. 4 Awe Yehova aitile Samwele. Na o ayaswike ati: “Ndi pano mukwai.”+ 5 E lyo abutukile kuli Eli no kutila: “Ndi pano mukwai, nacumfwa mwanjita.” Lelo atile: “Nshikwitile. Bwelelamo kalaale.” Awe alibwelelemo no kuyalaala. 6 Na Yehova abwekeshepo ukwita ati: “Samwele!”+ Na o Samwele alimine no kuya kuli Eli no kutila: “Ndi pano mukwai, nacumfwa mwanjita.” Lelo atile: “Iyo nshikwitile mwana wandi.+ Bwelelamo kalaale.” 7 (Nomba Samwele ninshi talaishiba Yehova, ne cebo ca kwa Yehova ninshi tacilatendeka ukusokololwa kuli ena.)+ 8 E lyo Yehova abwekeshepo ukwita umuku walenga itatu ati: “Samwele!” Na o alimine no kuya kuli Eli no kutila: “Ndi pano mukwai, pantu kwena mwacinjita.”

E lyo Eli ailwike ukuti ni Yehova aleita uyu mwaice. 9 E ico Eli aebele Samwele ati: “Kabiye kalaale, nomba nga akwita na kabili, utile, ‘Soseni, mwe Yehova, pantu umubomfi wenu alekutika.’” E fyo Samwele abwelelemo no kuyalaala pa ncende yakwe.

10 Na Yehova alishile no kwiminina, e lyo alaita ifyo amwitile mu nshita shimbi ati: “Samwele, Samwele!” Na o Samwele atile: “Soseni, pantu umubomfi wenu alekutika.”+ 11 E lyo Yehova asosele kuli Samwele ati: “Mona! Ndecita+ icintu mu Israele ica kuti onse uwacumfwa, cikamupesha amano.+ 12 Muli ubo bushiku nkacita kuli Eli conse ico nasosa pa ba mu ng’anda yakwe, ukufuma pa kutendeka ukufika pa mpela.+ 13 Kabili ufwile ukumweba ati ndepingula aba mu ng’anda yakwe+ umuyayaya pa filubo fyakwe. Alishiba+ ukuti abana bakwe abaume balesaalula Lesa,+ lelo tabakalipila.+ 14 E mulandu wine nalapila ku ba mu ng’anda ya kwa Eli ukuti nkabakanda pa filubo fyabo kabili takwakabe ilambo nelyo umutuulo uwingafuta pa filubo fyabo umuyayaya.”+

15 Awe Samwele alileele mpaka ulucelo. E lyo aiswile ifiibi fya ng’anda ya kwa Yehova.+ Kabili Samwele alitiinine ukweba Eli pa lwa cimonwa.+ 16 Lelo Eli aitile Samwele ati: “Samwele, mwana wandi!” Na o ayaswike ati: “Mukwai.” 17 E lyo atile: “Finshi akwebele? Wimfisa.+ Lesa nakukande, alundenapo+ nga ca kuti wamfisapo cimo pa mashiwi yonse ayo akwebele.” 18 E ico Samwele amwebele amashiwi yonse, kabili tamufishilepo nangu cimo. E lyo atile: “Kufwaya kwa kwa Yehova. Nacite icawama mu menso yakwe.”+

19 Awe Samwele alekula, kabili Yehova ali nankwe+ kabili talekele amashiwi nangu yamo ayo alesosa ukukanafikilishiwa.+ 20 Na bena Israele bonse ukufuma ku Dani ukufika ku Beere-sheba+ baishibe ukuti Samwele e o balaashile ukuba kasesema wa kwa Yehova.+ 21 Awe Yehova amoneke na kabili+ mu Shilo, pantu Yehova aisokolwele kuli Samwele mu Shilo mu cebo ca kwa Yehova.+

4 Na Samwele alelanda ku bena Israele bonse amashiwi ya kwa Lesa.

E lyo Israele aile ku kuyalwa na baPelishiti; kabili apangile inkambi pa Eben-esere,+ na baPelishiti bapangile inkambi mu Afeke.+ 2 Kabili abaPelishiti balitanteme+ ku kukumana na bena Israele, kabili ubulwi bwalibipile, ica kuti abena Israele balibacimfishe ku baPelishiti,+ baipeyepo na bantu nalimo amakana yane (4,000) mu cibansa ca bulwi. 3 Ilyo abantu babwelele ku nkambi abakalamba ba mu bena Israele batile: “Cinshi ico Yehova atucimfisha lelo ku cinso ca baPelishiti?+ Natuyesenda icipao ca cipangano ica kwa Yehova+ ku Shilo, ukuti ciise pa kati kesu no kuleka citupusushe mu minwe ya balwani besu.” 4 E ico abantu batumine bamo ukuya ku Shilo no kuyasenda icipao ca cipangano ica kwa Yehova wa mabumba, uwaikala pali bakerubi.+ Na bana ba kwa Eli babili, e kutila Hofini na Finehasi,+ e ko bali pamo ne cipao ca cipangano ica kwa Lesa wa cine.

5 Nomba ilyo icipao ca cipangano ica kwa Yehova cafikile fye mu nkambi, abena Israele bonse bapundile ukupunda kukalamba,+ ica kuti pa calo pali icimfulumfulu. 6 Na baPelishiti balyumfwile uku kuwelesha kabili batile: “Nga ico icongo ca kupunda+ kukalamba mu nkambi ya baHebere canshi?” Basukile baishiba ukuti icipao ca kwa Yehova calishile mu nkambi. 7 Na baPelishiti balitiinine, batile: Pantu “Lesa naisa mu nkambi!”+ E ico batile: “We bulanda kuli ifwe, pantu ica musango yu tacatala acicitika! 8 We bulanda kuli ifwe! Nani aletupususha mu minwe ya kwa Lesa uyu umukatami? Uyu e Lesa uwaumine abena Egupti no kubepayaula mu matololo.+ 9 Koseni mwe baPelishiti no kuba abaume, ukuti mwikabombela abaHebere nga fintu bena bamubombela,+ kabili mube abaume no kulwa!” 10 Awe abaPelishiti balilwile na Israele alicimfiwe,+ kabili bafulumukile cila muntu kwi tenti lyakwe;+ na baipaiwe bali abengi icine cine,+ ica kuti mu bena Israele, aba pa makasa abaipaiwe bali amakana amakumi yatatu (30,000).+ 11 Ne cipao ca kwa Lesa calisendelwe,+ na bana ba kwa Eli babili, Hofini na Finehasi, balifwile.+

12 E lyo umwina Benjamini umo abutwike ukufuma ku bulwi no kufika ku Shilo bulya bwine bushiku ne fya kufwala fyakwe ifyalepulwa+ ne loba pa mutwe.+ 13 Ilyo afikile, Eli alikele pa cipuna ku mpongolo, alepembelela, pantu umutima wakwe waletutuma pa cipao ca kwa Lesa wa cine.+ No yo muntu aingile mu musumba ku kushimika ifyacitike, na ba mu musumba bonse batendeke ukuloosha. 14 Na o Eli aumfwile imisowa. E ico atile: “Ca nshi icimpungili ici?”+ No yo mwaume alyangufyenye pa kuti aye-eba Eli. 15 (Nomba Eli ali ne myaka amakumi pabula na cinekonsekonse (98), na menso yakwe yalipofwile ica kuti taalemona.)+ 16 No yo mwaume aebele Eli ati: “Nine nafuma ku bulwi, kabili ine ni ku bulwi nafulumuka lelo.” E lyo atile: “Cinshi cacitika, mwana wandi?” 17 No waletele imbila atile: “Israele nafulumuka ku cinso ca baPelishiti, kabili abantu nababacimfya icibi;+ na bana benu babili—Hofini na Finehasi+—nabafwa, ne cipao ca kwa Lesa wa cine nabacisenda.”+

18 Nomba ilyo uyo muntu alumbwile icipao ca kwa Lesa wa cine, e lyo Eli awile ubuseneme pa cipuna mu mbali ya mpongolo, no mukoshi walifunike no kufwa afwa, pantu ali mukote kabili uwafina; kabili apingwile Israele pa myaka amakumi yane (40). 19 Kabili nafyala, muka Finehasi, ali ne fumo ne nshita ya kupaapa yali mupepi, kabili aumfwile imbila ya kuti nabasenda icipao ca kwa Lesa wa cine no kuti shifyala no mulume wakwe nabafwa. E lyo akonteme no kutampa ukupaapa, pantu ukucululuka kwa pa kupaapa kwalimupumikishe.+ 20 Kabili pa nshita alefwa, abanakashi abalemwafwa bamwebele abati: “Witiina, pantu wafyala umwana umwaume.”+ Lelo ta-aswike kabili tabikileko amano. 21 Awe ainike umwana Ikabode,+ ati: “Ubukata nabufuma mu Israele ukuya muli bunkole,”+ pa mulandu wa kuti icipao ca kwa Lesa wa cine balicisendele na pa mulandu wa kwa shifyala no mulume wakwe.+ 22 E ico atile: “Ubukata nabufuma mu Israele ukuya muli bunkole,+ pantu icipao ca kwa Lesa wa cine nabacisenda.”+

5 Lelo abaPelishiti basendele icipao+ ca kwa Lesa wa cine ukucifumya ku Eben-sere no kucitwala ku Ashdode.+ 2 E lyo abaPelishiti babuulile icipao ca kwa Lesa wa cine no kucitwala mu ng’anda ya kwa Dagone no kucibika mupepi na Dagone.+ 3 Awe ilyo abena Ashdode bacelele ubushiku bwakonkelepo, moneni basangile Dagone nawa ubukupeme pa ntanshi ya cipao ca kwa Yehova.+ Awe babuulile Dagone no kumubwesesha pa cifulo cakwe.+ 4 Ilyo bacelele ulucelo ubushiku bwakonkelepo, moneni basangile Dagone nawa ubukupeme pa ntanshi ya cipao ca kwa Yehova no mutwe wakwe ne fisansa nafiputuka, fili pa mwinshi.+ Dagone ashele fye icimubili* ceka ceka. 5 E co bashimapepo ba kwa Dagone na bonse abengila mu ng’anda ya kwa Dagone bashinyantila pa mwinshi wa kwa Dagone mu Ashdode ukufika na kuli buno bushiku.

6 No kuboko kwa kwa Yehova+ kwafininine abena Ashdode, kabili abalengele ukuba no mwenso no kubalwalika ifipute,*+ e kutila, aba mu Ashdode na ba mu ncende shapalamineko. 7 Ilyo abena Ashdode bamwene ukuti e fyo caba, batile: “Mwileka icipao ca kwa Lesa wa bena Israele ciikale kuno ku mwesu, pantu ukuboko kwakwe kwatutitikisha kabili kwatitikisha na lesa wesu Dagone.”+ 8 E ico batumine amashiwi no kulonganya bakateka ba baPelishiti bonse no kutila: “Cinshi twalacita ku cipao ca kwa Lesa wa kwa Israele?” Basukile batila: “Ku Gati+ e ko tutwale icipao ca kwa Lesa wa kwa Israele.” E ico batwele icipao ca kwa Lesa wa kwa Israele kulya.

9 Nomba ilyo bacitwele kulya, ukuboko kwa kwa Yehova+ kwaishile pali ulya musumba no kuleta icimfundawila icikalamba, kabili aumine aba muli ulya musumba, ukufuma ku baice ukufika ku bakalamba, na bonse balwele ifipute.+ 10 E ico batwele icipao ca kwa Lesa wa cine ku Ekrone.+ Nomba ilyo fye icipao ca kwa Lesa wa cine cafikile ku Ekrone, abena Ekrone balibilikishe abati: “Nabaleta icipao ca kwa Lesa wa kwa Israele kuli ifwe pa kuti batwipaile pamo na bantu besu!”+ 11 Awe batumine amashiwi no kulonganika bakateka ba baPelishiti bonse no kutila: “Bwekeshenimo icipao ca kwa Lesa wa kwa Israele pa kuti cibwelele uko cikala pa kuti ine na bantu bandi twifwa.” Pantu mwali icimfulunganya ca kutiina ukufwa mu musumba onse;+ ukuboko kwa kwa Lesa wa cine kwalifinine sana kulya,+ 12 kabili abashafwile balilwele ifipute.+ Na ba mu musumba baloleshe ku muulu no kulomba ubwafwilisho.+

6 Ne cipao+ ca kwa Yehova caikele mu calo ca baPelishiti imyeshi cinelubali (7). 2 E lyo abaPelishiti baitile bashimapepo babo na bakabuka,+ abati: “Twalacita shani ku cipao ca kwa Yehova? Lekeni twishibe ifyo twalacibwekesha uko caleikala.” 3 E lyo batile: “Nga muletwala icipao ca kwa Lesa wa kwa Israele, mwicitwala ukwabula umutuulo, pantu pa kutwala mumutwalile no mutuulo wa pa mulandu.+ E lyo mukondapwa, kabili mukeshiba ico ukuboko kwakwe kushafumiine pali imwe.” 4 E lyo batile: “Mutuulo wa musango nshi uwa pa mulandu uo tufwile ukumutwalila?” Na bo batile: “Ukulingana ne mpendwa ya bakateka+ ba baPelishiti, ifipute fisano ifya golde ne mpuku shisano isha golde, pantu imwe bonse na bakateka wenu muli ne cikuko cimo cine. 5 Kabili mukapange ifimpashanya fya fipute fyenu ne fimpashanya fya mpuku+ shenu ishileonaule calo, kabili mufwile ukupeela Lesa wa kwa Israele ubukata.+ Napamo kuti ayangushako ukuboko kwakwe pali imwe na pali lesa wenu na pa calo cenu.+ 6 Nga cinshi ico muletalamikila imitima yenu ifyo abena Egupti na Farao batalamike imitima yabo?+ Bushe te lintu abakandile+ e lyo balekele abena Israele baye, kabili na bo baliile?+ 7 Nomba buuleni ifibombelo no kupanga iceleta ilipya,+ ne ng’ombe shibili ishileonsha, ishishabikwapo ikoli,+ e lyo mukake ing’ombe kwi celeta, no kubwesha abana ba shiko ukuti beshikonka. 8 E lyo mubuule icipao ca kwa Yehova no kucibika pe celeta, ne fimpashanya fya golde+ ifyo mufwile ukumutwalila ukuti e mutuulo wa pa mulandu+ mufibike mu mbokoshi mu mbali ya ciko. E lyo mucitume, na co cileya. 9 Kabili mufwile ukumona: nga caya mu musebo waya ku citungu ca ciko, ku Bete-shemeshe,+ ninshi e watucitile ububi ubu ubukalamba, lelo nga te ko caya, ninshi twaishiba ukuti te kuboko kwakwe kwatukumishe; ninshi ifyatuponene fya mankumanya fye.”+

10 Na bo bantu bacitile ifyo fine. E ico babuulile ing’ombe shibili ishaleonsha no kushikakila kwi celeta, na bana ba shiko balibesalile. 11 Awe babikile icipao ca kwa Yehova pe celeta,+ babikilepo ne mbokoshi ne mpuku sha golde ne fimpashanya fya fipute fyabo. 12 Ne ng’ombe shalimine no kulungama ku musebo waya ku Bete-shemeshe.+ Shaile mu musebo ukalamba, shaleya shilelila no kulila, kabili tashapaatukile ku kulyo nangu ku kuso. Na bakateka+ ba baPelishiti balekonka pa numa ukufika na ku mupaka wa Bete-shemeshe. 13 Kabili abena Bete-shemeshe baleseepa ingano+ mwi lungu. Ilyo basanswile amenso no kumona Icipao, balisekelele pa kucimona. 14 Ne celeta lyaishile mwi bala lya kwa Yoshua umwina Bete-shemeshe no kwiminina mulya, na mo mwali ilibwe ilikalamba. E lyo balepawile ifimuti fye celeta, kabili batuulile isho ng’ombe+ ukuba umutuulo wa koca kuli Yehova.+

15 Kabili abena Lebi+ baikishe icipao ca kwa Yehova ne mbokoshi yali mu mbali ya ciko, umwali ifimpashanya fya golde, bacitekele na pa libwe ilikalamba. Na bena Bete-shemeshe+ baocele imituulo, kabili balepeela amalambo kuli Yehova muli bulya bushiku.

16 Na bakateka basano+ aba baPelishiti bali-imwenene e lyo babwelelemo ku Ekrone bulya bwine bushiku. 17 Nomba ifi e fipute fya golde ifyo abaPelishiti babweseshe ukuti e mutuulo wa pa mulandu kuli Yehova:+ ica kwa Ashdode+ cimo, ica kwa Gasa+ cimo, ica kwa Ashkelone+ cimo, ica kwa Gati+ cimo, ica kwa Ekrone+ cimo. 18 Ne mpuku sha golde shalingene impendwa ne misumba yonse iya baPelishiti iyaletekwa na ba bakateka basano, imisumba ya malinga ne mishi iya ca nsale.

Ne cilibwe icikalamba apo batekele icipao ca kwa Yehova caba ni nte ukufika na ku bushiku bwa lelo mwi bala lya kwa Yoshua umwina Bete-shemeshe. 19 Kabili aipeye abena Bete-shemeshe,+ pantu baletamba icipao ca kwa Yehova. E ico aipeyepo abantu amakumi cinelubali (70) [[na bantu amakana amakumi yasano (50,000)]] kabili abantu batendeke ukuloosha pantu Yehova aipeye abantu abengi nga nshi.+ 20 Kabili abena Bete-shemeshe basosele abati: “Nani wingeminina pa cinso ca kwa Yehova uyu Lesa wa mushilo?+ Kwena kuti cawama nga ca kuti afuma kuli ifwe ayako kuli bambi!”+ 21 Basukile batuma intumi ku bekashi ba ku Kiriati-yearimu,+ abati: “AbaPelishiti nababwesha icipao ca kwa Yehova. Mwise, mucisende ku mwenu.”+

7 Awe abena Kiriati-yearimu+ baliileko no kuninika icipao ca kwa Yehova ukucitwala ku ng’anda ya kwa Abinadabu+ pa kapili, na Eleasari umwana wakwe e o basalile ukuti alelinda icipao ca kwa Yehova.

2 Nomba ukufuma pa bushiku Icipao caishile ku Kiriati-yearimu inshiku shaile shilefula, mpaka shaisaba imyaka amakumi yabili (20), na ba mu ng’anda ya kwa Israele bonse baleloosha, balefwayafwaya Yehova.+ 3 E lyo Samwele asosele ku ba mu ng’anda ya kwa Israele bonse ati: “Nga mulebwelela kuli Yehova+ ne mitima yenu yonse, pooseni+ balesa bambi bambi na baAstarte+ abo muli nabo no kubika imitima yenu pali Yehova ukwabula ukunenuka kabili e o mulebombela eka fye,+ na o akamupokolola ku baPelishiti.”+ 4 Na bana ba kwa Israele bapoosele baBaali+ na baAstarte+ abo bali nabo no kutampa ukubombela Yehova eka.

5 E lyo Samwele atile: “Longanikeni abena Israele bonse+ ku Mispa,+ pa kuti imupepele+ kuli Yehova.” 6 Awe bonse balongene ku Mispa, kabili batapile amenshi no kulayetila pa ntanshi ya kwa Yehova no kuleka ukulya muli bulya bushiku.+ Kabili balesosa abati: “Natubembukila Yehova.”+ Na Samwele atendeke ukupingula+ abana ba kwa Israele ku Mispa.

7 Ilyo abaPelishiti baumfwile ukuti abana ba kwa Israele nabalongana ku Mispa, e lyo bakateka+ ba baPelishiti baimine ukuti baye balwishe Israele. Kabili ilyo abana ba kwa Israele baumfwile, batiinine abaPelishiti.+ 8 E ico abana ba kwa Israele baebele Samwele ati: “Mwileka ukutupapaatilako kuli Yehova Lesa wesu ukuti atwafwilishe,+ pa kuti atupusushe ku baPelishiti.” 9 E lyo Samwele abuulile umwana wa mpaanga uonka no kutuula umutuulo wa koca+ kuli Yehova; kabili Samwele atendeke ukulililako abena Israele+ kuli Yehova ukuti abafwilishe, na Yehova alimwaswike.+ 10 Kabili ilyo Samwele aletuula umutuulo wa koca, abaPelishiti balipaleme ukuti balwe na Israele. Na o Yehova pali bulya bushiku alengele icibulukutu cikalamba+ ukubulukutila abaPelishiti, ukuti abafulunganye,+ kabili balicimfiwe ku bena Israele.+ 11 E lyo abena Israele bafumine ku Mispa no kukonka abaPelishiti kabili baile balebepaya ukufika na ku kapinda ka ku kulyo aka Beti-ka. 12 Awe Samwele abuulile ilibwe+ no kulibika pa kati ka Mispa na Yeshana no kulinika ati Eben-esere. E lyo atile: “Ukufika na nomba Yehova acili alatwafwa.”+ 13 E fyo abaPelishiti bacimfiwe, kabili tababwekeshepo ukwisa mu calo ca bena Israele+ na kabili, no kuboko kwa kwa Yehova kwatwalilile ukulwisha abaPelishiti mu nshiku shonse isha kwa Samwele.+ 14 Ne misumba iyo abaPelishiti bapokele kuli Israele yalebweshiwa kuli Israele ukufuma ku Ekrone ukufika ku Gati, ne fitungu fya iko Israele alipokolwele ukufuma ku baPelishiti.

Kabili kwaishileba umutende pa kati ka kwa Israele na bena Amore.+

15 Na Samwele ali umupingushi mu Israele inshiku shonse isha mweo wakwe.+ 16 Kabili umwaka no mwaka aleshinguluka ukuya ku Betele+ na ku Gilgali+ na ku Mispa+ no kupingula Israele+ mu fifulo ifi fyonse. 17 Lelo alebwelela ku Rama,+ pantu e kwali ing’anda yakwe, kabili e ko alepingwila Israele. Kabili kulya e ko akuuliile Yehova iciipailo.+

8 Nomba ilyo Samwele akotele asontele+ abana bakwe abaume ukuba abapingushi mu Israele. 2 Ishina lye beli lyakwe ni Yoele,+ ne shina lya kwa cikonkebeli ni Abiya;+ bali abapingushi mu Beere-sheba. 3 Na bana bakwe abaume tabaendele mu mibele yakwe,+ lelo batemenwe ubunonshi bwa mu bucenjeshi+ kabili balepoka amafisakanwa+ no kunyonganya ubupingushi.+

4 Mu kuya kwa nshita abakalamba bonse aba kwa Israele+ balongene pamo no kuya kuli Samwele ku Rama 5 no kumweba ati: “Moneni! Imwe namukota, lelo abana benu tabacita nge fyo mwalecita. E ico tusonteleni imfumu+ iya kutupingula nge fyo caba ku nko shonse.” 6 Lelo ici cintu basosele, ica kuti: “Tupeni imfumu ya kutupingula,” calibipile mu menso ya kwa Samwele, na Samwele atampile ukupepa kuli Yehova.+ 7 Na o Yehova aebele Samwele ati:+ “Umfwa ishiwi lya bantu muli fyonse ifyo bakweba;+ pantu te iwe bakaana ukuba imfumu+ pali bena, lelo nine bakaana. 8 Ukulingana ne micitile yabo yonse iyo bacita ukutula pa bushiku nabafumishe mu Egupti+ mpaka buno bushiku, e fyo balecita na kuli iwe, pantu lyonse balefuma kuli ine+ no kubombela balesa bambi.+ 9 Ale nomba umfwa kwi shiwi lyabo. Lelo ubasoke, kabili ufwile ukubeba ifyo imfumu iikabateka ikalafwaya kuli bena.”+

10 Samwele na o aebele abantu abalombele imfumu kuli ena amashiwi ya kwa Yehova yonse. 11 E lyo abebele ati: “Ifi e fyo imfumu iikateka pali imwe ikalafwaya+ kuli imwe: Ikabuula abana benu abaume+ no kubabika mu maceleta+ ya iko na mwi bumba lya ba pali bakabalwe ba iko,+ na bambi bakalabutuka ku ntanshi ya maceleta ya iko;+ 12 kabili ikaisontela bacilolo ba pa makana+ na bacilolo ba pa makumi yasano,+ na bamo aba kuilimina+ no kusombola ifisabo+ fya iko na ba kupanga ifyanso+ fya iko ifya bulwi ne fipe fya maceleta+ ya iko. 13 Kabili ikasenda abana benu abanakashi aba kupanga amafuta no kwipika no kupanga imikate.+ 14 Kabili amabala yenu ne myangashi+ yenu ne miolife,+ ifyawamisha, ikafibuula no kupeela ababomfi ba iko. 15 Na pa ngano sha mu mabala yenu na pa myangashi yenu ikabuulapo ica pe kumi,+ no kupeela bacilolo ba iko aba kwi sano+ na babomfi ba iko. 16 Na babomfi benu abaume na babomfi benu abanakashi ne mikuni yenu iyawamisha, ne mpunda ikafibuula, pa kuti fikalebomba imilimo ya iko.+ 17 Pa mikuni+ yenu ikabuulapo iya pe kumi, na imwe mukaba ababomfi ba iko. 18 Kabili muli ubo bushiku mukalila pa mulandu wa mfumu yenu,+ iyo mwaisalila mwe bene, lelo Yehova takamwasuke muli ubo bushiku.”+

19 Lelo, abantu bakeene ukumfwa kwi shiwi lya kwa Samwele+ kabili batile: “Iyo, imfumu e yo tulefwaya ukututeka. 20 Tulefwaya ukuba nge nko shonse,+ kabili imfumu yesu ikalatupingula no kututungulula no kutulwila ubulwi.” 21 Na Samwele alyumfwile amashiwi yonse aya bantu; e lyo aebele Yehova.+ 22 Na o Yehova aebele Samwele ati: “Umfwa kwi shiwi lyabo, kabili ukabasontele imfumu ya kubateka.”+ E ico Samwele asosele ku bena Israele ati: “Kabiyeni cila muntu ku musumba ku mwakwe.”

9 Awe kwali umwina Benjamini, ishina lyakwe ni Kishi,+ mwana Abiele, mwana Serore, mwana Bekorati, mwana Afia, umwina Benjamini,+ umuntu wa fyuma icine cine.+ 2 Kabili ali no mwana ishina lyakwe ni Shauli,+ umulumendo kabili uwayemba, kabili takwali umuntu uwa mu bana ba kwa Israele uwayembele ukumucila; ukufuma pa mabeya yakwe ali umutali ukucila abantu bonse.+

3 Awe impunda ishikota+ isha kwa Kishi, wishi wa kwa Shauli, shalilubile. E ico Kishi aebele Shauli umwana wakwe ati: “Sendapo umubomfi umo uye nankwe, muye ku kufwaya impunda.” 4 Kabili apitile pa kati ka calo ca mpili ica kwa Efraimu+ no kupita mu calo ca Shalisha,+ lelo tabashisangile. E lyo bapitile mu calo ca Shaalimu, lelo tashaliko. Kabili acilingenye mu calo ca bena Benjamini, no kushisanga nakalya.

5 E lyo bafikile ku calo ca Sufi; kabili Shauli atile ku mubomfi wakwe uwali nankwe: “Natubwelelemo, epali tata aleka ukusakamana pa mpunda kabili asakamana pali ifwe.”+ 6 Lelo amwebele ati: “Moneni! Muli uno musumba mwaba umuntu wa kwa Lesa,+ kabili uyu muntu alicindikwa. Conse ico asosa, cilacitika.+ Nomba lekeni tuyeko. Napamo kuti atweba inshila tufwile ukuyamo.” 7 E lyo Shauli aebele umubomfi wakwe ati: “Nomba nga twayako, cinshi twalatwalila uyo muntu?+ pantu ifya kulya nafipwa mu mifuko yesu, kabili tapali ica bupe+ ica kutwalila umuntu wa kwa Lesa wa cine. Finshi tukwete?” 8 Awe umubomfi ayaswike Shauli na kabili no kutila: “Moneni! Ninkwata hafu wa hafu we shekele+ lya silfere, ndi no kupeela umuntu wa kwa Lesa wa cine, pa kuti atwebe ukwa kulola.” 9 (Kale mu Israele e fyo umuntu pa kuya ku kwipusha kuli Lesa alesosa ati: “Natuye ku umona ifimonwa.”+ Pantu uyu twaishiba lelo ati kasesema, kale balemwita ati uumona ifimonwa.) 10 E lyo Shauli atile ku mubomfi wakwe: “Walanda bwino.+ Enda, natuleya.” Awe baile mu musumba umwali umuntu wa kwa Lesa wa cine.

11 Ilyo baleya mu nshila yanina ukuya ku musumba, basangile abakashana balefuma mu musumba baleya ku kutapa amenshi.+ E ico babepwishe abati: “Bushe e ko ali uumona ifimonwa+ kuno kuntu?” 12 Na bo babaswike ati: “E ko ali. Moneni! Namutangilila. Endesheni, lelo naisa mu musumba, pantu kuli ilambo+ lya bantu lelo ku cifulo ca mapepo.+ 13 Ilyo mwaingila fye mu musumba, mwalamusanga ilyo ashilaya ku cifulo ca mapepo ku kulya; pantu abantu te kuti balye mpaka afika, pantu e upaala ilambo,+ na pa numa e lyo abetilwe balya. E ico nomba kabiyeni, pantu nomba line mwalamusanga.” 14 Awe baliile mu musumba. Ilyo balepalama pa kati ka musumba, moneni, Samwele aleisa ku kubakumanya pa kuti baye ku cifulo ca mapepo.

15 Lelo pa bushiku bwa kuti mailo Shauli akesa, Yehova alisokolwelele+ Samwele ati: 16 “Mailo inshita ino ine nkakutumina umuntu ukufuma ku calo ca kwa Benjamini,+ kabili ukamusube+ ukuba intungulushi pa bantu bandi abena Israele; kabili akapususha abantu bandi ku baPelishiti,+ pantu nimona ukucululuka kwa bantu bandi, pantu ukulila kwabo nakufika kuli ine.”+ 17 Ilyo Samwele amwene Shauli, Yehova amwebele ati: “E uyu muntu nakwebelepo nati, ‘Uyu e uli no kutungulula abantu bandi.’”+

18 E lyo Shauli apalamine kuli Samwele mu kati ka mpongolo no kutila: “Shi njebeni, Ni kwi kuli ing’anda ya umona ifimonwa?” 19 E lyo Samwele ayaswike Shauli ati: “Nine ne umona ifimonwa. Tangilako uye ku cifulo ca mapepo, kabili mwalalya na ine lelo,+ kabili nkakuleka ukaye ulucelo, na fyonse ifili mu mutima obe ndi no kukweba.+ 20 Kumfwa impunda ishalubile inshiku shitatu ishapita,+ wisakamana,+ pantu nashimoneka. Kabili bushe ifisuma fyonse ifya mu Israele fya bani?+ Bushe te fyobe na ba mu ng’anda ya kwa wiso bonse?” 21 E lyo Shauli ayaswike no kutila: “Bushe nshili mwina Benjamini uwacepesha+ mu mikowa ya kwa Israele,+ no lupwa lwandi, bushe te lwacepesha mu ndupwa shonse isha mu mukowa wa kwa Benjamini?+ Nga kanshi cinshi mwasosela kuli ine ifya musango yu?”+

22 E lyo Samwele abuulile Shauli no mubomfi wakwe no kubengisha mu ng’anda ya kuliilamo no kubapeela incende yacindamisha+ pali bonse abaitilwe abali napamo amakumi yatatu (30). 23 E lyo Samwele aebele kepika ati: “Leta icipimfya nakupeele, ico nakwebele nati, ‘Bika.’” 24 Na o kepika aimishe umwendo, no ku-uteka apali Shauli. E lyo atile: “Ici e casungilwe. Cibike pa ntanshi yobe. Lya, pantu casungilwa ino nshita ukuti uliile pamo na betilwe.” Awe muli bulya bushiku Shauli aliliile pamo na Samwele. 25 Basukile bafuma ku cifulo ca mapepo+ batentemukila mu musumba, na o akonkenyepo fye ukulanda na Shauli pa mutenge.+ 26 E lyo bacelele ulucelo, kabili ilyo fye cali ku macaca Samwele aitile Shauli pa mutenge, ati: “Buuka, pa kuti nkuleke uleya.” Na o Shauli alibuukile kabili bonse babili, ena na Samwele, bafumine pa nse. 27 Ilyo baletentemuka lwa ku mpela ya musumba, Samwele aebele Shauli ati: “Eba umubomfi+ obe atangileko”—na o umubomfi alipitile alaya—“lelo iwe, iminina uleke nkwebe ifyo Lesa asosele.”

10 E lyo Samwele abuulile umusashi+ wa mafuta no kupongolwela pa mutwe wa kwa Shauli no kumutomona+ no kusosa ati: “Yehova cine cine nakusuba ukuba intungulushi+ pa bupyani bwakwe.+ 2 Ilyo walalekana na ine lelo walasanga abaume babili mupepi ne nshiishi ya kwa Rakele+ mu citungu ca kwa Benjamini mu Selesa, na bo balakweba ati, ‘Impunda mwaile ku kufwaya shalisangwa, lelo nomba wiso naleka ukusakamana pa mpunda,+ asakamene pali imwe, ati: “Ndecita shani pa mwana wandi?”+ 3 Upitilile no kwenda ukuyafika na ku cimuti ca Tabore, kabili kulya e ko abaume batatu abaleya mu kupepa Lesa wa cine ku Betele+ balakukumanya, umo nasenda abana ba mbushi batatu,+ umbi na o nasenda imikate itatu+ na umbi nasenda umutondo ukalamba uwa mwangashi.+ 4 Na bo balamuposha+ no kumupako imikate ibili, na imwe mupoke. 5 Pa numa ya ifyo e lyo mwalafika ku lupili lwa kwa Lesa wa cine,+ uko mwalasanga inkambi ya bashilika+ iya baPelishiti. Nomba ilyo walafika kulya ku musumba, walakumanya ibumba lya bakasesema+ balefuma ku cifulo ca mapepo,+ na ku ntanshi yabo kuli abalelisha icilimba ca nsale+ na kaoma+ ne cimpeeta+ na nsango,+ ilyo balesesema. 6 E lyo umupashi+ wa kwa Yehova walatendeka ukubomba muli iwe, na iwe walasesema+ pamo na bo kabili walasanguka umuntu umbi. 7 Nomba ilyo ifi fishibilo+ fyakucitikila, cita ico iminwe yobe ingacita,+ pantu Lesa wa cine ali na iwe.+ 8 Kabili ukantangilile ukuya ku Gilgali,+ kabili mona, nkesa kuli iwe ku kutuula amalambo ya koca,+ ku kupeela amalambo ya mutende. Ukalolele pa nshiku cinelubali (7)+ nkasuke nkese, kabili nkakweba ifyo ufwile ukucita.”

9 Nomba ilyo afutatile fye Samwele, Lesa atendeke ukwalula umutima wakwe;+ ne fishibilo+ ifi fyonse fyalicitike muli bulya bushiku. 10 E ico bafumine kulya no kuya ku lupili, kabili kulya kwali ibumba lya bakasesema abaishile ukuti bakumane nankwe; ilyo line umupashi wa kwa Lesa waishile pali ena,+ na o atampile ukusesema+ pa kati kabo. 11 Kabili ilyo bonse abamwishibe kale bamumwene, moneni! alesesema pamo na bakasesema. E lyo abantu balaipushanya abati: “Cinshi cacitika kuli mwana Kishi? Bushe Shauli na o wa muli bakasesema?”+ 12 E lyo umo uwa uko kuntu ayaswike no kutila: “Nga shibo nani?” E co kwabela ipinda+ ilitila: “Bushe Shauli na o wa muli bakasesema?”

13 Asukile apwa ukusesema no kufika ku cifulo ca kupepelapo. 14 E lyo munyina wa kwa wishi wa kwa Shauli aipwishe Shauli no mubomfi wakwe ati: “Mwaile kwi?” Na o atile: “Ku kufwaya impunda,+ twaile tuleshifwaya, lelo tatwashisangile. E ico twaile kuli Samwele.” 15 E lyo munyina wa kwa wishi wa kwa Shauli atile: “Shi njeba, Cinshi Samwele amwebele?” 16 Na o Shauli aebele lupwa lwa kwa wishi ati: “ Atwebele ukuti impunda nashimoneka.” Lelo ulwa mulandu wa bufumu uo Samwele asosele, tamwebele iyo.+

17 Kabili Samwele alongenye abantu bonse kuli Yehova ku Mispa+ 18 no kusosa ku bana ba kwa Israele ati: “Yehova Lesa wa kwa Israele asosa ati,+ ‘Nine nafumishe Israele mu Egupti+ no kumupokolola mu minwe ya bena Egupti na mu minwe ya mabufumu yonse ayalemutitikisha.+ 19 Nomba imwe—ubwa lelo namukaana Lesa wenu+ uwali umulubushi wenu uwamulubwile ku fyabipa fyonse na mu kucululuka kwenu, kabili mwatile: “Iyo, lelo mutupeele imfumu ya kututeka.” Aleni nomba iminineni ku cinso ca kwa Yehova ukulingana ne mikowa yenu+ kabili mu mabumba ya bantu amakana.’”

20 E lyo Samwele aebele imikowa yonse iya kwa Israele ukupalama,+ no mukowa wa kwa Benjamini e o basobwele.+ 21 Kabili aebele umukowa wa kwa Benjamini ukupalama, no lupwa lwa bena Matri e lo basobwele.+ Na mu kulekelesha Shauli mwana Kishi e o basobwele.+ E lyo batampile ukumufwaya, lelo tabamusangile. 22 E ico baipwishe+ na kabili kuli Yehova abati: “Bushe uyu muntu naisa kale kuno?” Na o Yehova atile: “E po ali, nabelama+ mu fipe.” 23 E ico balibutwike no kuyamubuula. Ilyo aishileiminina pa kati ka bantu, ukufuma pa mabeya yakwe ali umutali ukucila abantu bonse.+ 24 E lyo Samwele aebele abantu bonse ati: “Bushe mwamona uo Yehova asalile,+ ukuti tapali uwalingana nankwe pa bantu bonse?” Na bantu bonse batendeke ukubilikisha abati: “Kalebalika mwe mfumu!”+

25 E lyo Samwele aebele abantu ifyo imfumu ikalafwaya+ kuli bena no kufilemba mwi buuku no kubika ku cinso ca kwa Yehova. Kabili Samwele aebele abantu bonse ukuti cila muntu aye ku ng’anda yakwe. 26 Kumfwa Shauli, ena aile ku mwakwe ku Gibea,+ na baume ba maka abo Lesa anashishe imitima baile nankwe.+ 27 Lelo ifinangwa fya bantu,+ fyena fyasosele afiti: “Kuti atupususha shani uyu?”+ Awe balimusuulile,+ kabili tabamuleteele ica bupe nangu cimo.+ Lelo atalele fye nga cibulu.+

11 E lyo Nahashi umwina Amone+ aile no kupanga inkambi pa kuti alwishe Yabeshe+ mu Gileadi. Na baume ba mu Yabeshe bonse batile kuli Nahashi: “Pangana na ifwe icipangano pa kuti tulekubombela.”+ 2 Na o Nahashi umwina Amone abebele ati: “Nalapangana na imwe nga mwaitonkola+ bonse ilinso lya ku kulyo, e fyo nkabika umuseebanya pali Israele onse.”+ 3 E lyo abakalamba ba ku Yabeshe bamwebele ati: “Tuloleleko inshiku cinelubali (7), kabili tuli no kutuma inkombe mu Israele monse, kabili nga tatwakakwate umupusushi,+ tuli no kwisa kuli iwe.” 4 Mu kuya kwa nshita, inkombe shafikile ku Gibea+ wa kwa Shauli no kweba abantu ifyo abena Yabeshe basosele, na bo batampile ukulila imisowa no kuloosha.+

5 Lelo moneni Shauli aleisa alekonka umukuni pa numa ukufuma ku mabala, kabili Shauli atile: “Cinshi cacitika ku bantu, ica kuti balelila?” Na bo bamushimikile ifyo abena Yabeshe balandile. 6 No mupashi+ wa kwa Lesa waishile pali Shauli ilyo aumfwile aya mashiwi, kabili alikalipe nga nshi.+ 7 E ico abuulile ing’ombe ishilume shibili no kushiputaula ifipimfya fipimfya no kupeela inkombe ukutwala mu fitungu fyonse ifya Israele+ no kutila: “Uushafume ukukonka Shauli na Samwele, e fyo bakacita ku ng’ombe shakwe!”+ Kabili umwenso+ uwafuma kuli Yehova+ waikete abantu ica kuti bafumine abaikatana ngo muntu umo.+ 8 E lyo abapendele+ mu Beseke, kabili abana ba kwa Israele bafikile ku mpendwa amakana imyanda itatu (300,000), na bena Yuda bali amakana amakumi yatatu (30,000). 9 E lyo baebele inkombe ishaishile abati: “Ifi e fyo mwebe abena Yabeshe mu Gileadi amuti, ‘Mailo mukapusuka ilyo akasuba kakafika pa kati.’”+ Ne nkombe shaliile no kuyaeba abena Yabeshe, na bo balisekelele. 10 E lyo abena Yabeshe baebele Nahashi ati: “Mailo tukesa kuli imwe, kabili mukatucite conse ico mulefwaya.”+

11 Awe ubushiku bwakonkelepo Shauli+ abikile abantu mu mabumba yatatu;+ kabili baingile mu nkambi mu bulinde bwa lucelo+ no kwipaya abena Amone+ mpaka akasuba kafika pa kati. Na bashelepo, balibasalangenye kabili takwashele abantu abali babili pamo.+ 12 E lyo abantu batendeke ukusosa kuli Samwele abati: “Nani aleti,—‘Bushe Shauli kuti aba imfumu yesu?’+ Baleteni, no kuleka tubepaye.”+ 13 Lelo Shauli atile: “Tapali uufwile ukwipaiwa pali buno bushiku,+ pantu lelo Yehova napususha abena Israele.”+

14 Pa numa, Samwele aebele abantu ati: “Iseni, natuleya ku Gilgali,+ e ko tubwekeshepo ukumubika pa bufumu.”+ 15 Awe abantu bonse baile ku Gilgali, e ko babikile Shauli pa bufumu pa cinso ca kwa Yehova mu Gilgali. E lyo bapeele amalambo ya mutende ku cinso ca kwa Yehova,+ kabili Shauli na baume bonse aba kwa Israele balisekelele nga nshi.+

12 E lyo Samwele asosele ku bena Israele bonse ati: “Moneni, ning’umfwa kwi shiwi lyenu pali fyonse ifyo mwasosele kuli ine,+ ukuti nkamusontele imfumu ya kumuteka.+ 2 Nomba moneni, imfumu iilemutungulula!+ Ine ninkota,+ kabili ndi ne mfwi,+ e lyo abana bandi na bo, muli na bo,+ kabili ine nalibombela Lesa kabili nalimutungulula ukutula ku bwaice bwandi ukufika na ku bwa lelo.+ 3 Ndi pano. Nshinineni pa menso ya kwa Yehova na pa menso ya wasubwa+ wakwe. Ni ng’ombe ya kwa nani napokele nelyo ni mpunda ya kwa nani napokele+ atemwa nani uo nafyenga atemwa nani uo natitikisha nangu ni kuli nani napokele indalama sha mafisakanwa ukuti nsuuleko ku cintu acita?+ Ndemubwesesha.”+ 4 E lyo batile: “Tamwatufyengele, kabili tamwatutitikishe, kabili tamwapokele kantu nangu kamo ku minwe ya muntu.”+ 5 Na o abebele ati: “Yehova ni nte pali imwe, no wasubwa wakwe+ ni nte buno bushiku ukuti tamusangile nangu cimo mu kuboko kwandi.”+ E lyo na bo batile: “Ni nte.”

6 Kabili Samwele asosele ku bantu ati: “Inte ni Yehova, uwabomfeshe Mose na Aarone kabili uwafumishe ifikolwe fyenu mu calo ca Egupti.+ 7 E ico nomba iminineni, na ine nalamupingula pa cinso ca kwa Yehova no kumulondolwela imilimo yalungama+ yonse iya kwa Yehova iyo amucitila ne yo acitiile ifikolwe fyenu.

8 “Ilyo fye Yakobo afikile mu Egupti+ ne fikolwe fyenu fyatendeke ukulilila kuli Yehova ukuti afyafwe,+ Yehova atumine Mose+ na Aarone, ukuti batungulule ifikolwe fyenu ukufuma mu Egupti pa kuti bekale muli cino cifulo.+ 9 Kabili balabile Yehova Lesa wabo,+ na o abapeele*+ mu minwe ya kwa Sisera+ umukalamba wa bashilika ba kwa Hasore na mu minwe ya baPelishiti+ na mu minwe ya mfumu ya kwa Moabu,+ kabili balelwa na bo. 10 Kabili batampile ukulilila kuli Yehova ukuti abaafwe+ kabili batile, ‘Natubembuka,+ pantu natupondokela Yehova no kubombela baBaali+ na baAstarte;+ nomba tupokololeni+ mu minwe ya balwani besu, pa kuti tumubombele.’11 Yehova na o atumine Yerubaali+ na Bedani na Yefta+ na Samwele+ no kumupokolola ku minwe ya balwani benu abamushingulwike, pa kuti mwikale umutende.+ 12 Ilyo mwamwene ukuti Nahashi+ imfumu ya bana ba kwa Amone amwimina, mwakoselepo fye ukunjeba amuti, ‘Iyo, kano imfumu e yo tulefwaya ukututeka!’+ nangu ca kuti Yehova Lesa e wali Imfumu yenu.+ 13 E ico nomba moneni imfumu iyo mwasala, iyo mwalombele;+ kabili moneni Yehova namupeela imfumu ya kumuteka.+ 14 Nga mwakulatiina Yehova+ no kumubombela+ no kumfwa kwi shiwi lyakwe,+ no kukanasuula+ ifipope fya kwa Yehova, imwe ne mfumu iikamuteka, e lyo Yehova Lesa wenu akaba na imwe. 15 Lelo nga tamwakomfwe kwi shiwi lya kwa Yehova+ kabili nga mukasuula ifipope fya kwa Yehova,+ ninshi ukuboko kwa kwa Yehova kukemina imwe ne fikolwe fyenu.+ 16 E ico nomba iminineni no kumona ici cintu icikalamba ico Yehova alecita ku menso yenu. 17 Bushe ubushiku bwa lelo te bwa kuseepamo ingano?+ Nalalilila+ kuli Yehova ukuti alete ukubulukuta ne mfula;+ e lyo mwishibe no kumona ukuti ububi mwacita bukulu+ mu menso ya kwa Yehova pa kulomba ukuti amupeele imfumu.”

18 Awe Samwele alilile kuli Yehova,+ na o Yehova aletele ukubulukuta ne mfula muli bulya bushiku,+ ica kuti abantu bonse batiinine sana Yehova na Samwele. 19 E lyo abantu bonse batendeke ukusosa kuli Samwele abati: “Pepeleniko+ ababomfi benu kuli Yehova Lesa wenu, pantu tatulefwaya ukufwa; pantu ku membu shesu shonse natulundako ububi bumbi ubwa kuilombela imfumu.”

20 E ico Samwele aebele abantu ati: “Mwitiina.+ Imwe mwalicita ubu bubi bonse. Lelo mwileka ukukonka Yehova+ kabili mufwile ukubombela Yehova ne mitima yenu yonse.+ 21 Kabili tamufwile ukuleka ukumukonka no kutampa ukukonka ifilubi fya fye+ ifishingaafwa kantu+ kabili ifishingamupokolola, pantu fya fye. 22 Pantu Yehova takaleke+ abantu bakwe pa mulandu we shina lyakwe ilikulu,+ pantu Yehova aitemenwe fye ukumulenga ukuba abantu bakwe.+ 23 Kabili ine, ca kutali fye ukuleka ukumupepelako+ pantu ninshi nabembukila Yehova; kabili mfwile ukumusambilisha+ inshila isuma+ kabili iyatambalala. 24 Lelo muletiina+ Yehova, kabili mulemubombela mu cishinka ne mitima yenu yonse;+ pantu moneni ifikalamba ifyo amucitila.+ 25 Lelo nga mukalacita ububi ku mufulo, mukonaulwa,+ imwe ne mfumu yenu kumo.”+

13 Shauli ali ne myaka . . .* ilyo atendeke ukuteka,+ kabili atekele Israele pa myaka ibili. 2 Kabili Shauli asalile abaume amakana yatatu (3,000) muli Israele; na makana yabili (2,000) bali na Shauli ku Mikmashi+ na mu calo ca mpili ica Betele, ne kana limo (1,000) bali na Yonatani+ ku Gibea+ wa kwa Benjamini, na bashala abebele cila muntu ukuya kwi tenti lyakwe. 3 Kabili Yonatani acimfishe abashilika mu nkambi+ ya baPelishiti+ iyali mu Geba;+ na baPelishiti balyumfwile. Na o Shauli aebele aba kulisha intandala+ mu calo conse no kutila: “AbaHebere bomfwe!” 4 Na Israele onse alyumfwile casoswa ati: “Shauli nacimfya abashilika pa nkambi ya baPelishiti, kabili nomba Israele nabamupata+ ku baPelishiti.” E ico balonganike abantu ukuti bakonke Shauli ku Gilgali.+

5 AbaPelishiti na bo balilongene ukuti balwe na Israele, kabili bakwete amaceleta ya nkondo amakana amakumi yatatu (30,000)+ na ba pali bakabalwe amakana mutanda (6,000) kabili bali na bantu abengi abali ngo mucanga wa ku lulamba lwa bemba;+ kabili balininine no kupanga inkambi mu Mikmashi ku kabanga ka Bete-abene.+ 6 Ilyo abena Israele bamwene ukuti baba mu bwafya ubukalamba,+ pantu abantu balibatitikisha; e lyo abantu bafiseme mu ncengo+ na mu filindi na mu fimabwe na mu mimba na mu fishima. 7 AbaHebere ba-abwike na Yordani+ ukuya ku calo ca kwa Gadi+ na Gileadi. Lelo Shauli ali mu Gilgali, na bantu bonse baletutuma ilyo balemukonka.+ 8 E lyo akonkenyepo ukupembela pa nshiku cinelubali (7) ukufika ku nshita iyo Samwele amwebele ukuti eyo ali no kwisamo;+ na Samwele tafikile ku Gilgali, na bantu batampile ukusalangana. 9 E ico Shauli atile: “Leteni ilambo lya koca na malambo ya mutende.” Awe atuulile ilambo lya koca.+

10 Nomba ilyo line fye apwile ukutuula ilambo lya koca, moneni, Samwele aliishile. E ico Shauli alifumine ku kumukumanya no kumupaala.+ 11 E lyo Samwele atile: “Cinshi ico ucitile?”+ Na o Shauli atile: “Nacimona ukuti abantu basalangana,+ e lyo na imwe tamwishile pa nshiku mwali no kwishilapo,+ na baPelishiti na bo balebungana ku Mikmashi,+ 12 e ico ntile,+ ‘Nomba abaPelishiti balansansa ku Gilgali, kabili nshinashishe umutima wa kwa Yehova.’ E ico naci-ipatikisha+ no kutuula ilambo lya koca.”

13 E lyo Samwele aebele Shauli ati: “Ico wacita ca buwelewele.+ Taukonkele ifunde+ lya kwa Yehova Lesa obe ilyo akwebele,+ pantu aukonka, Yehova nga apampamika ubufumu bobe pali Israele umuyayaya. 14 Nomba ubufumu bobe tabwakabelelele.+ Yehova akaifwaila umuntu uo umutima wakwe ukatemwa;+ kabili Yehova akamulenga ukuba intungulushi+ ya bantu bakwe, pantu iwe taukonkele ifyo Yehova akwebele.”+

15 E lyo Samwele aimine no kufuma ku Gilgali ukuya ku Gibea wa kwa Benjamini, na Shauli apendele abantu abo ali na bo, bali abaume napamo imyanda mutanda (600).+ 16 Kabili Shauli na Yonatani umwana wakwe na bantu abo bashele na bo baikele mu Geba+ wa kwa Benjamini. AbaPelishiti bena bapangile inkambi mu Mikmashi.+ 17 Ne bumba lya ba kupokolola ifipe lyalefuma mu nkambi ya baPelishiti mu mabumba yatatu.+ Ibumba limo lyayalukile ku musebo wa ku Ofra,+ ku calo ca Shuali, 18 ne bumba limbi lyayalukile ku musebo wa ku Bete-horone,+ ne bumba lya butatu lyayalukile ku musebo wa ku mupaka uwalungatana no mupokapoka wa Bacimbwi, ukulola ku matololo.

19 Kabili takwali kafula nangu umo mu calo ca Israele conse, pantu abaPelishiti batile: “Pa kuti abaHebere bepanga ulupanga nelyo ifumo.”+ 20 E ico abena Israele bonse baleya ku baPelishiti ku kuyanoona cila muntu plao yakwe nelyo ica kuliminako umushili nelyo isembe lyakwe atemwa icikwakwa.+ 21 No mutengo pa kunoona wali amagramu cinekonsekonse (8) aya silfere pa kunoona plao ne fya kuliminako umushili ne mitunkulo ya meno yatatu na masembe no koolola ifya kusonkwelako ing’ombe.+ 22 E ico mu bushiku bwa bulwi takwali mu bantu abali na Shauli na Yonatani uwakwete ulupanga+ nangu lifumo; lelo Shauli+ na Yonatani umwana wakwe bena balikwete.

23 Nomba ibumba+ lya baPelishiti lyaleisa no kupita pa mupata wa pa Mikmashi.+

14 Nomba bushiku bumo, Yonatani+ mwana Shauli aebele umubomfi uwalemusendela ifyanso ati: “Isa twabukile ku nkambi ya baPelishiti abali kwi shilya.” Lelo taebeleko wishi.+ 2 Na Shauli aikele ku mpela ya Gibea+ mwi samba lya muti wa mapomegranate uwaba pa Migrone; na bantu bali nankwe bali nalimo imyanda mutanda (600).+ 3 (Na Ahiya mwana Ahitubu,+ munyina Ikabode,+ mwana Finehasi,+ mwana Eli,+ shimapepo wa kwa Yehova mu Shilo,+ e walesenda efode.)+ Na bantu tabaishibe ukuti Yonatani naya. 4 Nomba pa kati ka mipata iyo Yonatani afwaile ukwabukilapo ku kuyalwisha ibumba+ lya baPelishiti, pali icilibwe kuli luno lubali ne cilibwe kuli lulya lubali, kabili ishina lya cimo lyali ni Bosese ne shina lya cinankwe lyali ni Sene. 5 Icilibwe cimo cabelele ku kapinda ka ku kuso ukulungatana na Mikmashi,+ na cimbi cabelele ku kapinda ka ku kulyo ukulungatana na Geba.+

6 E ico Yonatani aebele umubomfi uwalemusendela ifyanso ati: “Isa, natuye twabukile ku nkambi ya aba bantu bashasembululwa.+ Napamo Yehova kuti atwafwa, pantu takuli icingalesha Yehova ukupususha ukubomfya abantu abengi nangu abanono.”+ 7 E lyo uwalemusendela ifyanso amwebele ati: “Citeni icili mu mutima wenu. Kabiyeni uko mulefwaya ukuya. Moneni, ine ndi na imwe muli fyonse ifili mu mutima wenu.”+ 8 E lyo Yonatani atile: “Mona, tuleyabukila kuli aba bantu, kabili tuleisokolwela kuli bena. 9 Nga batila kuli ifwe, ‘Iminineni shilili tusuke tufike kuli imwe!’ ninshi twalaiminina apo tuli, kabili tatwaye kuli bena iyo. 10 Lelo nga batila, ‘Iseni mutulwishe!’ ninshi twalaya, pantu Yehova nangu cibe shani alebapeela kuli ifwe, ne ci calaba e cishibilo kuli ifwe.”+

11 Awe bonse babili baisokolwele ku ba pa nkambi ya baPelishiti. E lyo abaPelishiti batile: “Moneni abaHebere balefuma mu filindi umo bafiseme.”+ 12 E lyo abaume ba pa nkambi baebele Yonatani no walemusendela ifyanso abati: “Iseni kuno, kabili mwalacimona!”+ Apo pene Yonatani aebele uwalemusendela ifyanso ati: “Natuleya, akunkonka, pantu Yehova nangu cibe shani alebapeela kuli Israele.”+ 13 Na Yonatani aile aleninina ku minwe+ na ku makasa, no walemusendela ifyanso alemukonka pa numa; kabili Yonatani+ alibasanshile, no walemusendela ifyanso alekonka mu numa alebepaya.+ 14 Kabili abo Yonatani no walemusendela ifyanso baipeye intanshi bali abaume amakumi yabili (20) mu mpanga ukulingana na hafu wa hekita.

15 Kabili kwali ukutenta+ mu nkambi mu mpanga na pa bantu bonse abali pa nkambi; na ba kupokolola ifipe+ balitutwime na bo bene, ne sonde lyalitenkene,+ kabili kwasukile kwasanguka kutenta ukwafumine kuli Lesa.+ 16 Na bakalinda ba kwa Shauli mu Gibea+ wa muli Benjamini balimwene, kabili moneni! kwali icimfulunganya mpanga yonse mu nkambi.+

17 E lyo Shauli atile ku bantu abali nankwe: “Shi pendeni abantu, no kumona uufuminepo.” Ilyo bapendele, moneni! Yonatani no walemusendela ifyanso tabalipo. 18 Shauli nomba atile kuli Ahiya:+ “Shi palamika icipao ca kwa Lesa wa cine!”+ (Pantu icipao ca kwa Lesa wa cine pali bulya bushiku cali na bana ba kwa Israele.)+ 19 Nomba ilyo Shauli alelanda na shimapepo,+ icimfulunganya icali mu nkambi ya baPelishiti calitwalilile, caleya cilekulilako fye. E lyo Shauli aebele shimapepo ati: “Leka.” 20 E ico Shauli na bantu bonse abali nankwe balilongene.+ Awe baile ukufika na ku bulwi, kabili basangile abaPelishiti nabepayana ku lupanga;+ no kubwelela inuma mu cimfulunganya icikalamba. 21 Kabili abaHebere abali ku baPelishiti+ ku kale kabili abaile na bo mu nkambi monse, na bo bene bayalukile ku bena Israele abali na Shauli na Yonatani. 22 Na bonse abaume ba mu bena Israele abafiseme+ mu calo ca mpili ica kwa Efraimu ilyo baumfwile ukuti abaPelishiti nabafulumuka, balibakonkele mu bulwi. 23 Na muli bulya bushiku Yehova apuswishe+ Israele, no bulwi bwafikile na ku Bete-abene.+

24 Kabili abena Israele balinakile nga nshi muli bulya bushiku, na lyo line Shauli alengele abantu ukulapa umulapo,+ ati: “Abe uwatiipwa umuntu uulelya ifya kulya ilyo icungulo tacilaisa kabili ilyo nshilacita icilandushi+ pa balwani bandi!” Kabili takwali umuntu nangu umo uwalilepo ifya kulya.+

25 Na bantu ba mu calo bonse baishile mu mutengo, ilyo kwali ubuci+ pa mushili onse mu mpanga. 26 Ilyo abantu bafikile mu mutengo, moneni! mwali ubuci ubwingi,+ lelo tapali uwatwele umunwe pa kanwa, pantu abantu baletiina umulapo.+ 27 Lelo Yonatani, taumfwileko ilyo wishi alengele abantu ukulapa umulapo,+ e ico atambike inkonto iyali mu minwe yakwe no kuitumpa mu buci no kubwesesha iminwe yakwe ku kanwa, na pa menso palicelebwike.+ 28 E lyo umo uwa mu bantu asosele no kutila: “Wiso nalenga abantu ukulapa, ati, ‘Abe uwatiipwa umuntu uulelya ifya kulya lelo!’”+ (Kabili abantu batendeke ukunaka.)+ 29 Lelo, Yonatani atile: “Tata naleta ubucushi+ mu calo. Moneni ifyo pa menso pacelebuka pantu ninsonda ubu buci bunono.+ 30 Abantu lelo abalyapo+ ifyapokololwa ku balwani babo ifyo basangile,+ nga twacimfya sana! Lelo nomba abaPelishiti tabepaiwe abengi.”+

31 Kabili muli bulya bushiku baile baleipaya abaPelishiti ukufuma ku Mikmashi+ ukufika ku Ayalone,+ na bantu balinakile icine cine.+ 32 E lyo abantu basampile bufunushi bufunushi ifyo bapokele+ no kusenda impaanga ne ng’ombe no twana twa ng’ombe no kushiipaila pa nshi, kabili abantu baliliile kumo no mulopa.+ 33 E ico baebele Shauli ati: “Moneni! Abantu balebembukila Yehova pantu balelya inama kumo no mulopa.”+ Na o atile: “Mwabifya. Taleni kunkulushisheni ilibwe ilikalamba kuli ine.” 34 E lyo Shauli atile: “Kabiyeni mu bantu, kabili mubebe amuti, ‘Palamikeni kuli ine, cila muntu ing’ombe yakwe ilume, kabili cila muntu, impaanga yakwe, kabili mwipaile pano no kulya e po muliile, kabili mwibembukila Yehova pa kuliila kumo no mulopa.’”+ Awe abantu bonse bapalamike cila muntu ing’ombe yakwe ilume iyo akwete bulya bushiku no kuipaila kulya. 35 Na Shauli akuuliile Yehova iciipailo. E ciipailo+ ca kubalilapo akuuliile Yehova.+

36 Pa numa ya ifyo, Shauli atile: “Natutentemukile ku baPelishiti ubushiku no kupokolola ifyuma mpaka busuke buce ulucelo,+ kabili twishapo umuntu nangu umo muli bena.”+ E lyo abantu na bo batile: “Conse icawama mu menso yenu citeni.” Nomba shimapepo atile: “Natupalamine kuli Lesa wa cine pano.”+ 37 E lyo Shauli aipwishe Lesa ati: “Bushe ntentemukile ku baPelishiti?+ Bushe mulebapeela ku bena Israele?”+ Lelo Lesa tamwaswike muli bulya bushiku.+ 38 E ico Shauli atile: “Palameni kuno,+ mwe bakalamba bonse aba mu bantu,+ pa kuti mufwaye no kumona uucitile ulu lubembu lelo. 39 Pantu, na pali Yehova, Umupusushi wa kwa Israele, uucitile ulu lubembu ukufwa alefwa, nangu fye nga ni Yonatani umwana wandi.”+ Lelo takwali nangu umo mu bantu bonse uwamwaswike. 40 E lyo atile ku bena Israele bonse: “Imwe mwalaba ku lubali lumo, na ine na Yonatani umwana wandi—twalaba ku lubali lumbi.” Na bo abantu batile kuli Shauli: “Icawama mu menso yenu citeni.”+

41 E lyo Shauli atile kuli Yehova: “Mwe Lesa wa kwa Israele, asukeni ukupitila muli Tumimu!”+ Awe Yonatani na Shauli balisalilwe, na bantu balifumineko.+ 42 Nomba Shauli atile: “Penduleni+ pali ine na Yonatani umwana wandi.” Na Yonatani aliiketwe. 43 E lyo Shauli atile kuli Yonatani: “Unjebe, Cinshi ucitile?”+ Awe Yonatani amwebele ati: “Cine cine nindyapo ubuci ubunono ubuli ku mpela ya nkonto iili mu minwe yandi.+ Ndi pano! Lekeni mfwe!”

44 E lyo Shauli atile: “Shi Lesa akukande, alundenapo,+ pantu ukufwa walafwa+ Yonatani.” 45 Lelo abantu batile kuli Shauli: “Bushe afwe Yonatani, uupuswishe abena Israele muli uyu musango?+ Ca kutali fye!+ Na pali Yehova,+ tapali umushishi wa ku mutwe wakwe nangu umo+ uuli no kuponena pa nshi; pantu abombele na Lesa ubushiku bwa lelo.”+ Awe abantu bapokolwele+ Yonatani, na o tafwile.

46 E fyo Shauli alekele ukukonka abaPelishiti, na bo abaPelishiti baile ku mwabo.+

47 Kabili Shauli aleteka Israele+ no kulwa na balwani bakwe bonse abamushingulwike, alwishishe abena Moabu+ na bana ba kwa Amone+ na bena Edomu+ ne shamfumu sha Soba+ na baPelishiti;+ kabili konse uko ayalukila alecimfya.+ 48 Kabili alecita ifya maka+ no kwipaya abena Amaleke+ no kupokolola Israele ku balepokolola ifipe fyabo.

49 Kabili abana ba kwa Shauli bali ni Yonatani+ na Ishibi na Malkishua,+ na mashina ya bana bakwe abanakashi babili, ishina lya mukalamba ni Merabu+ ne shina lya mwaice ni Mikali.+ 50 Ne shina lya mukashi wa kwa Shauli ni Ahinoamu mwana Ahimaasi, ne shina lya mukalamba wa bashilika bakwe ni Abnere+ mwana Nere, munyina wa kwa wishi kwa Shauli. 51 Na Kishi+ e wali wishi wa kwa Shauli, kabili Nere+ wishi wa kwa Abnere ali ni mwana Abiele.

52 Kabili ubulwi bwalekosela abaPelishiti inshiku shonse isha kwa Shauli.+ Na Shauli aleti nga amona umuntu impalume nangu uwa maka, alemulunda ku bo ali na bo.+

15 E lyo Samwele aebele Shauli ati: “Nine Yehova atumine ku kukusuba+ ukuba imfumu pa bantu bakwe abena Israele, e ico nomba umfwa kwi shiwi lya kwa Yehova.+ 2 Yehova wa mabumba+ asosa ati, ‘Nkakanda+ Amaleke pa fyo acitile ku bena Israele ilyo abalwishishe lintu balefuma mu Egupti.+ 3 Nomba, kabiye, kabili kepaye abena Amaleke+ no kubonaula+ na fyonse ifyo bakwata, kabili wikabomfwila uluse, kabili ukepaye+ umwaume pamo no mwanakashi, umwana pamo no onka,+ ing’ombe pamo ne mpaanga, ingamila pamo ne mpunda.’”+ 4 Awe Shauli aitile abantu no kubapenda mu Telemu,+ bali amakana imyanda ibili (200,000) abenda pa makasa na makana ikumi (10,000) abaume ba kwa Yuda.+

5 Kabili Shauli afikile na ku musumba wa bena Amaleke no ku-ubelamina lwa ku mumana. 6 Lelo Shauli aebele abena Keni+ ati: “Kabiyeni,+ paatukeniko, fumeni mu kati ka bena Amaleke, pantu kuti namonawila pamo na bo. Pantu imwe, mwacitile uluse ku bana ba kwa Israele+ bonse ilyo balefuma mu Egupti.”+ E ico abena Keni balifumine mu kati ka bena Amaleke. 7 Pa numa e lyo Shauli aipeye abena Amaleke+ ukufuma ku Habila+ ukufika na ku Shuri+ uwaba ku kabanga ka Egupti. 8 Kabili aikete Agagi+ imfumu ya kwa Amaleke umutuntulu, na bantu bonse abepeye ku lupanga.+ 9 Lelo Shauli na bantu baumfwilile Agagi uluse, tabaipeye ne fitekwa fyawamisha, impaanga ne ng’ombe+ ne fitekwa fyaina na basukusuku kabili basungile fyonse ifisuma, tabafwaile ukufyonaula.+ Lelo ifipe fyonse ifyasuulwa ne fya fye, e fyo baonawile.

10 Nomba icebo ca kwa Yehova caishile kuli Samwele, no kutila:11 “Ninanguluka+ apo nalengele Shauli ukuba imfumu, pantu naleka ukunkonka,+ ne fyo nasosa taficita.”+ Kabili ici calengele Samwele+ ubulanda, kabili alilile kuli Yehova ubushiku bonse.+ 12 E lyo Samwele acelele ulucelo ku kuyakumanya Shauli. Lelo bamo baebele Samwele ati: “Shauli aile ku Karmele,+ kabili moneni! aleikuulila ica kumwibukishishako,+ kabili alyabwike no kuya ku Gilgali.” 13 Awe Samwele aile kuli Shauli, na Shauli atile kuli Samwele: “Mube abapaalwa+ kuli Yehova. Nincita ifyo Yehova asosele.”+ 14 Lelo Samwele atile: “Nga uko kulila kwa mpaanga uko ndeumfwa mu matwi yandi, no kulila kwa ng’ombe?”+ 15 E lyo Shauli atile: “Ni ku bena Amaleke e ko abantu bafifumishe, pantu abantu tabafwaile+ ukwipaya impaanga shawamisha ne ng’ombe, pantu balefwaya ukupeela ilambo kuli Yehova Lesa+ wenu; lelo ifyashala natonaula.” 16 E lyo Samwele atile kuli Shauli: “Talala! Kabili ndekweba ico Yehova anjebele ubushiku.”+ Na o atile: “Soseni mukwai!”

17 E lyo Samwele atile: “Bushe te lintu we mwine waleimona uwacepesha+ e lyo wali intungulushi ya mikowa ya kwa Israele, na Yehova akusubile+ ku kuba imfumu pali Israele?18 Na Yehova akutumine no kutila, ‘Kabiye, konaule ababembu,+ abena Amaleke, kabili ukabalwishe mpaka ukabalofye.’+ 19 Nomba cinshi ushaumfwilile kwi shiwi lya kwa Yehova lelo wasendele bufunushi bufunushi ifyapokelwe+ no kucita icabipa mu menso ya kwa Yehova?”+

20 Lelo, Shauli ayaswike Samwele ati: “Lelo ning’umfwila+ ishiwi lya kwa Yehova pantu naile uko Yehova antumine kabili nasendele Agagi+ imfumu ya kwa Amaleke, na bena Amaleke nalibonawile.+ 21 Na bantu+ babuulilepo ifyo twapokolwele, impaanga ne ng’ombe, ifyawamisha ifyalingile ukonaulwa, pa kuti bapeele ilambo+ kuli Yehova Lesa wenu mu Gilgali.”+

22 E lyo Samwele atile: “Bushe Yehova alitemwa imituulo ya koca+ na malambo ukucila ukunakila ishiwi lya kwa Yehova? Mona! Ukunakila+ kwawama ukucila ilambo,+ ukumfwila kwawama ukucila amafuta+ ya basukusuku; 23 pantu bucipondoka+ cimo cine no lubembu lwa kubuka,+ no kuitutumuna cimo cine no kucita ifinjelengwe no kupepa utulubi twa terafimu.+ Apo naukaana icebo ca kwa Yehova,+ na o nakukaana ukuba imfumu.”+

24 E lyo Shauli atile kuli Samwele: “Nimembuka;+ pantu nimpula mu cipope ca kwa Yehova na mu mashiwi yenu, pantu natiinine abantu+ no kumfwa kwi shiwi lyabo. 25 Nomba, shi njeleleni+ pa lubembu lwandi no kubwelela na ine pa kuti nje mpapaate+ Yehova.” 26 Lelo Samwele aebele Shauli ati: “Nshabwele pamo na iwe, pantu naukaana icebo ca kwa Yehova, kabili Yehova nakukaana ukuba imfumu pali Israele.”+ 27 Ilyo Samwele alepilibuka ukuti aye, apo pene Shauli aikete ku cisempe ca ku ca kufwala cakwe icabula amaboko, lelo calilepwike no kususuka.+ 28 E lyo Samwele amwebele ati: “Lelo Yehova nafumpula+ ubufumu bwa kwa Israele ukufuma kuli iwe, kabili akabupeela ku munobe uwaba bwino ukukucila.+ 29 Kabili, Uwapulamo wa kwa Israele+ takabepe ubufi,+ kabili takalanguluke, pantu te muntunse uwa kuti alelanguluka.”+

30 Na o atile: “Nimembuka. Nomba ncindikeni+ mukwai pa menso ya bakalamba ba mu bantu bandi na pa menso ya kwa Israele kabili natubwelelemo pamo, kabili nalapapaata Yehova Lesa wenu.”+ 31 E ico Samwele alibwelelemo alekonka Shauli, na o Shauli apapeete Yehova. 32 Pa numa ya ifyo, Samwele atile: “Palamikeni Agagi imfumu ya bena Amaleke kuli ine.” E lyo Agagi aile kuli Samwele aleshimunuka, kabili alaisosha ati: “Cine cine tabanjipaye nomba.” 33 Lelo, Samwele atile: “Ifyo ulupanga lobe+ lwalenga abanakashi ukufwilwa abana, e fyo na noko+ akafwilwa sana abana ukucila abanakashi bambi.”+ E fyo Samwele aputawile Agagi pa cinso ca kwa Yehova mu Gilgali.+

34 E lyo Samwele aile ku Rama, na Shauli aile ku mwakwe ku Gibea+ wa kwa Shauli. 35 Kabili Samwele tamwene Shauli na kabili mpaka fye no bushiku bwa mfwa yakwe, pantu Samwele aile ku kuloosha+ Shauli. Lelo Yehova alilangulwike pantu acitile Shauli ukuba imfumu pa bena Israele.+

16 Mu kuya kwa nshita Yehova aebele Samwele ati: “Ni lilali ukaleka ukuloosha Shauli,+ ilyo ine nimukaana ukuba imfumu pa bena Israele?+ Isusha amafuta+ mu lusengo lobe no kuya. Ndekutuma kuli Yese+ umwina Betelehemu, pantu mu bana bakwe ninsangamo uo ningacita imfumu.”+ 2 Lelo Samwele atile: “Nga kuti naya shani? Shauli nga aumfwa, nangu cibe shani akanjipaya.”+ E lyo Yehova akonkenyepo ati: “Usende ing’ombe iikota iinono, e lyo utile, ‘Njishiile ku kwipaila Yehova ilambo.’+ 3 Kabili ukete Yese kwi lambo; na ine nkakulenga wishibe ifyo ufwile ukucita,+ kabili ukansubile+ uo nkakweba.”

4 Awe Samwele acitile ifyo Yehova asosele. Ilyo afikile ku Betelehemu,+ abakalamba ba mu musumba batampile ukututuma+ ilyo bamukumenye, e ico batile: “Bushe ukwisa kobe kwa mutende?”+ 5 Na o atile: “Kwa mutende. Njishile ku kwipaila Yehova ilambo. Muisangulule,+ kabili mwise kwi lambo.” Awe asangulwile Yese na bana bakwe, e lyo abetile kwi lambo. 6 Nomba ilyo baleingila, amwene Eliabu+ kabili apo pene atile: “Cine cine uyu eminine pa cinso ca kwa Yehova e wasubwa wakwe.” 7 Lelo Yehova atile kuli Samwele: “Wimona ifyo alemoneka no butali bwa ciimo cakwe+, pantu nimukaana. Pantu ifyo umuntu amona te fyo Lesa amona,+ pantu umuntunse amona fye ifimoneka ku menso;+ lelo Yehova ena, amona mu mutima.”+ 8 E lyo Yese aitile Abinadabu+ no kumupisha ku cinso ca kwa Samwele, lelo atile: “No yu Yehova tamusalile.” 9 E lyo Yese apishishe Shama,+ lelo Samwele atile: “No yu wine Yehova tamusalile.” 10 Awe Yese apishishe abana bakwe cinelubali (7) ku cinso ca kwa Samwele; na lyo line Samwele atile kuli Yese: “Yehova tasalilepo pali aba.”

11 Samwele asukile aipusha Yese ati: “Bushe bapwa abana bobe abaume?” Na o ayaswike ati: “Kushele fye umwaice pali bonse,+ kabili moneni! aleliisha impaanga.”+ E lyo Samwele asosele kuli Yese ati: “Tuma aba kuyamuleta, pantu tatwaikale tutampe ukulya mpaka ese pano.” 12 Awe atumine abantu na bo balimuletele. Nomba ali mulumendo uwakashikila,+ uwayemba amenso kabili alemoneka bwino. E lyo Yehova atile: “Ima, umusube, pantu e uyu wine!”+ 13 Awe Samwele abuulile ulusengo lwa mafuta+ no kumusuba pa kati ka bamunyina. No mupashi wa kwa Yehova watampile ukubomba pali Davidi ukutula pali bulya bushiku.+ Pa numa ya ifyo Samwele alimine no kuya ku Rama.+

14 Nomba umupashi wa kwa Yehova wafumine+ pali Shauli, no mupashi+ ubi ukufuma kuli Yehova walemucusha. 15 E lyo ababomfi ba kwa Shauli bamwebele ati: “Moneni, umupashi ubi ukufuma kuli Lesa ulemucusha. 16 Mukwai shikulwifwe ebe ababomfi bakwe bafwaye umuntu uwacenjela+ ukulisha nsango.+ Nomba ilyo umupashi ubi uwa kwa Lesa wawila pali imwe, akalalisha ku minwe yakwe, e lyo na imwe kuti muleumfwako bwino.” 17 Na o Shauli aebele ababomfi bakwe ati: “Shi mfwaileni umuntu uwaishibisha ukulisha, mumulete kuno.”+

18 E lyo umo uwa mu babomfi bakwe ayaswike no kutila: “Moneni mukwai nalimona ifyo mwana Yese umwina Betelehemu acenjela ukulisha,+ kabili mwaume wa maka, impalume,+ kabili umuntu uwaishibisha ifya nkondo+ kabili uwacenjela ukulanda+ kabili uwayemba,+ na Yehova ali nankwe.”+ 19 E ico Shauli atumine inkombe kuli Yese no kutila: “Tuma kuli ine Davidi umwana obe, uucema impaanga.”+ 20 Na o Yese abuulile impunda, umukate ne nyambi+ ya mwangashi no mwana wa mbushi alaishe na Davidi umwana wakwe ukutwalila Shauli.+ 21 E fyo Davidi afikile kuli Shauli no kulamubombela;+ na Shauli amutemenwe nga nshi, kabili amucitile ukuba uwa kumusendela ifyanso fyakwe.+ 22 E lyo Shauli atumine amashiwi kuli Yese ati: “Shi leka Davidi akonkanyepo ukumombela, pantu nimutemwa.” 23 Nomba lyonse ilyo umupashi wa kwa Lesa waba pali Shauli, Davidi alebuula nsango no kulisha ku minwe yakwe; na Shauli aleumfwako bwino, no mupashi ubi walefuma pali ena.+

17 Nomba abaPelishiti+ balonganike amabumba ya bashilika babo capamo ukuti balwe inkondo. Ilyo balongene pamo mu Soko,+ uwa kwa Yuda, e lyo bapangile inkambi pa kati ka Soko na Aseka,+ mu Efese-damimu.+ 2 Shauli ena na bena Israele, balongene capamo no kupanga inkambi mu mupokapoka wa Ela,+ kabili baipekanishishe ubulwi pa kuti balwe na baPelishiti. 3 AbaPelishiti baiminine pa lupili kuno lubali, na bena Israele baiminine pa lupili kulya lubali, kabili pa kati kabo pali umupokapoka.

4 E lyo kwafumine ipaka mu nkambi ya baPelishiti, ne shina lya liko ni Galyati+ uwa ku Gati,+ alepele nalimo amamita yatatu.+ 5 Ali ne cisote ca mukuba ku mutwe wakwe, kabili afwele ica kucinga icifuba ica mamba ya tufyela, no kufina kwa mukuba wa kuli ici ca kucinga icifuba+ kwali nalimo amakilogramu 57. 6 Ali ne fya kucinga imikonso ifya mukuba ku molu na kalifumo+ ka mukuba pa mabeya yakwe. 7 Umusako we fumo lyakwe wali ngo mulando wa bakapikula ba nsalu,+ ne cilimi ce fumo lyakwe cali cela icafinine amakilogramu napamo 7; no wa kusenda inkwela yakwe aleba pa ntanshi yakwe. 8 Kabili aliminine no kutendeka ukubilikisha ku bashilika ba bena Israele+ ati: “Cinshi muleishila namuipekanishisha ukulwa ubulwi? Naisa mu kulwilako abaPelishiti. Imwe muli babomfi+ ba kwa Shauli. Kanshi saleni umuntu uwa kuti tulwe nankwe. 9 Nga ali na maka ya kulwa na ine kabili anjipaya, ninshi tuli no kuba ababomfi benu. Lelo ine nga namucimfya no kumwipaya, ninshi muli no kuba ababomfi besu, kabili mwakulatubombela.”+ 10 Kabili uyu muPelishiti akonkenyepo fye ukutila: “Ine ndeseebanya+ abashilika ba kwa Israele lelo. Mpeeleni umuntu wa kuti tulwe nankwe!”+

11 Ilyo Shauli+ na bena Israele bonse baumfwile aya mashiwi ya muPelishiti, balinenwike no kutiina nga nshi.+

12 Nomba Davidi ali mwana wa mwina Efrata+ umo uwa ku Betelehemu wa muli Yuda, uo ishina lyakwe ni Yese. Kabili ali na bana baume cinekonsekonse (8).+ Kabili mu nshiku sha kwa Shauli, Yese ali mukote. 13 Na bana baume ba kwa Yese batatu abakalamba baliile. Bakonkele Shauli ku bulwi,+ na mashina ya bana bakwe abaume abaile ku bulwi ni Eliabu+ ibeli, na cikonkebeli Abinadabu+ no wa citatu Shama.+ 14 Davidi ali e mwaice,+ na ba batatu abakalamba bakonkele Shauli.

15 Nomba Davidi aleya ku kucema impaanga+ sha kwa wishi ku Betelehemu no kubwelela kuli Shauli. 16 Kabili umuPelishiti aleisa lyonse ulucelocelo ne cungulo pa nshiku amakumi yane (40) no kwiminina pa cifulo cimo cine.

17 E lyo Yese atile kuli Davidi umwana wakwe: “Shi buulila bamunonko itepe lya fyasalulwa+ ne mikate ikumi (10), ubutukile na ku nkambi no kubatwalila. 18 Ne fi ikumi (10) ifyapangilwa ku mukaka utwalile umukalamba wabo uwa bashilika ikana (1,000);+ kabili umone bamunonko nga bali umutende,+ kabili ulete ubushininkisho bwa kuti bali umutende.” 19 Lelo Shauli na bakalamba ba kwa Davidi na bena Israele bonse bali mu mupokapoka wa Ela,+ balelwa na baPelishiti.+

20 Awe Davidi aimine ulucelocelo no kusha impaanga ku mulinshi no kusenda ifya kulya, aya no kuya nga fintu Yese amwebele.+ Ilyo afikile ku fya kucingilila inkambi,+ abashilika balefuma ukuya ku cibansa ca bulwi,+ kabili baweleshe ukuwelesha kwa kuya mu kulwa. 21 Kabili abena Israele na baPelishiti balatantama pa kuti abashilika balungatane na bashilika. 22 Apo pene Davidi ashiile ifipe+ mu minwe ya mulinshi wa fipe+ no kubutukila ku bashilika. Ilyo afikile, atampile ukwipusha bamunyina nga bali umutende.+

23 Ilyo alelanda na bo, moneni, ipaka lyalishile, ishina lya liko ni Galyati+ umuPelishiti wa ku Gati,+ lyafumine mu mitande ya baPelishiti, no kutampa ukulanda amashiwi yamo yene nga lyonse,+ na o Davidi alyumfwile. 24 Lelo ilyo abaume ba kwa Israele bonse bamwene uyu muntu, balifulumwike no kutiina icibi.+ 25 Kabili abaume ba kwa Israele batile: “Bushe namumona uyu muntu uuleisa? Ni ku kuseebanya+ Israele aleishila. Nomba umuntu uukamwipaya, imfumu ikamucindamika ku fyuma ifingi, kabili ikamupeela umwana wa iko umwanakashi,+ na ba mu ng’anda ya kwa wishi ikabacita abantungwa muli Israele.”+

26 Na o Davidi aipwishe abantu abaiminine mupepi nankwe ati: “Cinshi ico bakacita ku muntu uukepaya ulya muPelishiti+ no kufumya umuseebanya pali Israele?+ Pantu cinshi ali uyu muPelishiti uushasembululwa+ pa kuti aleseebanya+ abashilika ba kwa Lesa wa mweo?”+ 27 Na bo bamwebele amashiwi yamo yene, abati: “Ifi ne fi e fyo bakacita ku muntu uukamwipaya.” 28 Na Eliabu+ umukalamba wakwe alyumfwile uko alelanda na bantu, e lyo Eliabu afuliilwe Davidi+ no kumweba ati: “Cinshi waishila kuno? Kabili ni kuli nani washa impaanga shilya isha mpendwa fye mu matololo?+ Naliishiba ukuitutumuna kobe no bubi bwa mutima obe,+ pantu wishile fye ku kutamba ubulwi.”+ 29 E lyo Davidi atile: “Nga cinshi nacita? Ndeipusha fye.”+ 30 E lyo ayalwike aya kuli umbi no kumwipusha amashiwi yamo yene,+ na bantu na bo bamwaswike fimo fine nga pa kubala.+

31 Awe amashiwi Davidi asosele yalyumfwikike, kabili baebeleko na Shauli. Na o asosele ukuti bamulete. 32 Na Davidi atile kuli Shauli: “Mwileka umutima wa muntu nangu umo utompoke.+ Umubomfi wenu alaya no kulwa no yu muPelishiti.”+ 33 Lelo Shauli atile kuli Davidi: “Te kuti uye ku kulwa no yu muPelishiti,+ pantu uli mwaice,+ kabili ena muntu wa bulwi ukufuma ku bwaice bwakwe.” 34 Na Davidi akonkenyepo ukusosa kuli Shauli ati: “Umubomfi wenu ali mucemi wa mpaanga sha kwa wishi, kabili kwaishile inkalamo,+ na bere, kabili cimo na cimo casendele impaanga ukufuma mu mukuni. 35 Kabili nalicikonkele no kucuma+ no kuipokolola ku kanwa ka ciko. Ilyo canjimiine, naciikete pa mukoshi no kucuma pa nshi no kucipaya. 36 Umubomfi wenu aipeye inkalamo na bere; no yu muPelishiti ushasembululwa+ alaba nga cimo pali ifi, pantu naseebanya+ abashilika+ ba kwa Lesa wa mweo.”+ 37 E lyo Davidi asosele no kuti: “Yehova uwampokolwele ku maala ya nkalamo na ku maala ya kwa bere, e uli no kumpokolola kuli uyu muPelishiti.”+ E lyo Shauli atile kuli Davidi: “Kabiye, kabili Yehova abe nobe.”+

38 Nomba Shauli afwikile Davidi ifya kufwala fyakwe, no kumufwika icisote ca mukuba, kabili amufwikile ica kucinga icifuba ica cela. 39 E lyo Davidi akakiile ulupanga lwakwe pa fya kufwala fyakwe no kwesha ukwenda lelo alifililwe, pantu tafibeleshe. Davidi asukile atila kuli Shauli: “Nafilwa ukwenda ne fi, pantu nshafibelesha.” Awe Davidi alififuulile.+ 40 E lyo asendele inkonto yakwe mu minwe no kusala amabwe yatelela sana yasano mu mumana no kuyabika mu kacola ka kwa kacema, na mu minwe yakwe mwali icisukushilo cakwe.+ Aile alepalama na ku muPelishiti.

41 Na o umuPelishiti atampile ukwisa, alepalama kuli Davidi, no walemusendela inkwela iikalamba alemutangilila. 42 Ilyo umuPelishiti aloleshe no kumona Davidi, alimusuulile+ pantu ali mwaice+ kabili uwakashikila+ kabili uwayemba.+ 43 E ico umuPelishiti atile kuli Davidi: “Bushe ndi mbwa,+ iya kuti uleishila ne nkonto?” Awe umuPelishiti alapiishe Davidi mwi shina lya balesa bakwe.+ 44 Kabili umuPelishiti atile kuli Davidi: “Fika kuli ine, kabili ndepeela umubili obe ku fyuni fya mu lwelele na ku finama fya mu mpanga.”+

45 Na o Davidi atile ku muPelishiti: “Iwe uleisa kuli ine no lupanga ne fumo na kalifumo,+ lelo ine ndeisa kuli iwe mwi shina lya kwa Yehova wa mabumba,+ Lesa wa bashilika ba kwa Israele, uo waseebanya.+ 46 Buno bushiku Yehova alekupeela mu minwe yandi,+ ndekuuma, nkuputule no mutwe; kabili buno bushiku ndepeela ifitumbi fya bashilika ba baPelishiti ku fyuni fya mu lwelele na ku finama fya mu mpanga;+ na bantu ba pe sonde bonse baleishiba ukuti mwaba Lesa muli Israele.+ 47 No lukuta lonse ulu lwalaishiba ukuti Yehova tapusushisha ku lupanga nangu kwi fumo,+ pantu ubulwi bwa kwa Yehova,+ kabili alapeela imwe mu minwe yesu.”+

48 Nomba umuPelishiti alimine no kulapalama ku kukumanya Davidi, na Davidi alyangufyenye no kubutukila ku cibansa ca bulwi ku kukumanya umuPelishiti.+ 49 E lyo Davidi apishishe iminwe yakwe mu kacola no kubuulamo ilibwe no kulisukushila ku cisukushilo, no kutoba+ umuPelishiti pa mpumi ne libwe lyaingile pa mpumi, na o awile ubukupeme pa nshi.+ 50 E fyo Davidi acimfishe umuPelishiti ku cisukushilo ne libwe, aumine umuPelishiti no kumwipaya; lelo Davidi takwete ulupanga mu minwe yakwe.+ 51 E lyo Davidi abutukileko no kuyaiminina pa muPelishiti. Abuulile ulupanga+ lwakwe no kulusomona mu cikwama ca luko no kumwipailila ilyo amuputwileko umutwe.+ Nomba ilyo abaPelishiti bamwene ukuti impalume yabo yafwa, balifulumwike.+

52 E lyo abena Israele na bena Yuda baimine no kuwelesha no kukonka+ abaPelishiti ukufika ku mupokapoka+ no kufika ku mpongolo ya Ekrone,+ na balashilwe mu baPelishiti balewa mu nshila ukufuma ku Shaarimu,+ ukufika ku Gati, kabili ukufika na ku Ekrone. 53 E lyo abana ba kwa Israele bafumine ku kukonka abaPelishiti cipyu cipyu, kabili basendele+ ne fipe fya mu nkambi shabo shonse.

54 Kabili Davidi asendele umutwe+ wa muPelishiti no ku-utwala ku Yerusalemu, ne fyanso fyakwe abikile mwi tenti lyakwe.+

55 Nomba ilyo Shauli amwene Davidi aleya ku kukumanya umuPelishiti, atile kuli Abnere+ umukalamba wa bashilika: “Abnere, mwana wa kwa nani+ uyu mulumendo?”+ Na o Abnere atile: “Mwe mfumu, ndelapa na pali imwe, nshishibe nakalya!” 56 E ico imfumu yatile: “Wipusheipushe nga mwana wa kwa nani uyu mulumendo.” 57 Kabili ilyo Davidi afumine ku kuuma umuPelishiti, Abnere alimusendele no kumutwala kuli Shauli, ali no mutwe+ wa muPelishiti mu minwe yakwe. 58 E lyo Shauli amwipwishe ati: “Iwe mulumendo, bushe uli mwana wa kwa nani?” na o Davidi atile: “Ndi mwana wa mubomfi wenu Yese+ umwina Betelehemu.”+

18 Nomba ilyo fye Davidi apwile ukulanda na Shauli, umutima wa kwa Yonatani+ waikatene+ no mutima wa kwa Davidi, na Yonatani amutemenwe ngo mweo wakwe.+ 2 Awe Shauli bulya bwine ubushiku alimubuulile, tamusuminishe no kubwelela ku ng’anda ya kwa wishi.+ 3 Kabili Yonatani na Davidi bapangene icipangano,+ pantu amutemenwe ngo mweo wakwe.+ 4 Awe, Yonatani afuulile ica kufwala cabula amaboko ico afwele no kupeela Davidi, amupeele ne fya kufwala fyakwe fimbi, no lupanga lwakwe no buta bwakwe no mushipi wakwe. 5 Na Davidi alafuma ukuya ku bulwi. Konse uko Shauli amutuma alebomba mano mano,+ ica kuti Shauli amulashike pa baume ba bulwi;+ kabili caliweme mu menso ya bantu bonse na mu menso ya babomfi ba kwa Shauli.

6 Nomba ilyo balebwela, lintu Davidi alebwela ku kwipaya umuPelishiti, abanakashi bafumine mu misumba yonse iya Israele baleimba+ no kucinda ku kukumanya Shauli imfumu, bali no tuoma,+ balesekelela+ ne filimba fya nsale shitatu. 7 Kabili abanakashi balesefya baleankulana no kutila:

“Shauli aipaya abalwani amakana,

Na Davidi aipaya abalwani amakana amakumi.”+

8 Awe Shauli akalipe nga nshi,+ kabili aya mashiwi yalibipile kuli ena, ica kuti mu mutima atile: “Baleti Davidi aipaya amakana amakumi, e lyo ine baleti aipaya fye amakana, kwashala fye ukumupeela ubufumu!”+ 9 Kabili Shauli aletunganya Davidi ukufuma pali bulya bushiku no kuya ku ntanshi.+

10 Nomba ubushiku bwakonkelepo+ umupashi ubi uwa kwa Lesa waishile pali Shauli,+ na o alecita kwati ni kasesema+ mu ng’anda, ilyo Davidi alelisha inyimbo ku minwe yakwe,+ nga filya alecita inshiku shonse; kabili mwali ne fumo mu minwe ya kwa Shauli.+ 11 E lyo Shauli apoosele ifumo+ no kutila: “Nalapampamina Davidi ku cibumba!”+ lelo Davidi alewike ukufuma kuli ena, imiku ibili.+ 12 Kabili Shauli atendeke ukutiina+ Davidi pantu Yehova ali nankwe,+ lelo kuli Shauli alifumineko.+ 13 E ico Shauli afumishe Davidi mwi bumba lyakwe+ no kumulenga ukuba cilolo wa pa bantu ikana limo (1,000); kabili aletungulula abantu mu bulwi.+ 14 Kabili Davidi alebomba imilimo yakwe yonse mano mano,+ na Yehova ali nankwe.+ 15 Shauli na o alemona ukuti alebomba mano mano,+ kabili alemutiina. 16 Abena Israele bonse na bena Yuda balitemenwe Davidi, pantu alebatungulula mu bulwi.

17 Shauli asukile atila kuli Davidi: “Mona umwana wandi umwanakashi umukalamba Merabu.+ E o ndekupeela ku kuba umukashi obe.+ Lelo ube uwa maka no kulwa ubulwi bwa kwa Yehova.”+ Nomba Shauli atile mu mutima: “Iminwe yandi tayakamucite akantu, kano iminwe ya baPelishiti e ikamucita akantu.”+ 18 Na o Davidi atile kuli Shauli: “Nine nani kabili balupwa bandi na balupwa ba kwa tata, ni bani muli Israele, pa kuti ine imbe shifyala wa mfumu?”+ 19 Nomba, ilyo inshita ya kupeela Merabu, umwana wa kwa Shauli, kuli Davidi yafikile, basangile ukuti alipeelwe kale kuli Adriele+ umwina Meholati+ ku kuba umukashi.

20 Kabili Mikali,+ umwana mwanakashi wa kwa Shauli, atemenwe Davidi, kabili baebele Shauli, na o alitemenwe ici cintu. 21 Awe Shauli atile: “Ndemupeela umwana wandi umwanakashi pa kuti e mo nkamwikatile,+ e lyo abaPelishiti bakamwipaye.” E ico Shauli atile kuli Davidi: “Walaupilamo uyu umwana mwanakashi wandi lelo.” 22 E lyo, Shauli aebele ababomfi bakwe ati: “Soseni kuli Davidi mu nkama, amuti, ‘Mona! Imfumu naikutemwa sana, na babomfi ba iko bonse nabakutemwa. Kanshi upa umwana wa mfumu.’” 23 Na babomfi ba kwa Shauli baebele Davidi aya mashiwi, lelo Davidi atile: “Bushe mulemona kwati cintu cayanguka ukuupa umwana wa mfumu, ne muntu yawe yawe+ kabili uwasuulwa?”+ 24 E lyo ababomfi ba kwa Shauli bamwebele abati: “Davidi acisosa mwa kuti na mwa kuti.”

25 E lyo Shauli atile: “E fyo muyesosa kuli Davidi amuti, ‘Impango imfumu ilefwaya te ndalama+ iyo, lelo ilefwaya inkanda+ umwanda umo (100) isha pa mpela ya ku bwaume bwa baPelishiti, ku kulandula+ abalwani ba mfumu.’” Lelo Shauli alepanga ukuti abaPelishiti e bo bepaye Davidi. 26 E ico ababomfi bakwe baebele Davidi aya mashiwi, na o Davidi alitemenwe ico cintu, ukucita icipangano ca cupo+ ne mfumu. Awe ilyo ne nshiku tashilapwa, 27 Davidi alimine kabili ena na bantu bakwe baliile no kwipayapo+ abaPelishiti imyanda ibili (200), kabili Davidi aletele inkanda shabo isha pa mpela ya ku bwaume+ no kushipeela shonse fye ku mfumu, pa kuti acite icipangano ca cupo ne mfumu. Na o Shauli amupeele Mikali umwana wakwe ukuba umukashi.+ 28 Na Shauli alimwene no kwishiba ukuti Yehova ali na Davidi.+ Kabili Mikali, mwana Shauli, alimutemenwe.+ 29 E lyo Shauli acililemo ukutiina Davidi, kabili Shauli ali mulwani wa kwa Davidi inshiku shonse.+

30 Na bacilolo+ ba baPelishiti baleya ku kulwa, kabili lyonse ilyo baya ku bulwi, Davidi alebomba mano mano+ pa babomfi ba kwa Shauli bonse; ne shina lyakwe lyaishileba ilyatemwikwa nga nshi.+

19 Awe Shauli asukile aeba Yonatani umwana wakwe na babomfi bakwe bonse ulwa kwipaya Davidi.+ 2 Lelo Yonatani, mwana Shauli, alitemenwe Davidi icine cine.+ E ico Yonatani aebele Davidi ati: “Shauli tata alefwaya ukukwipaya. E ico ulucelo ukacenjele, kabili ukekale umufiseme no kubelama.+ 3 Ine nkafuma no kwiminina mupepi na tata mu mpanga umo ukaba, kabili nkakulandilako kuli tata, e lyo nkamona icikacitika, kabili nkakweba.”+

4 Awe Yonatani asosele ifisuma+ pali Davidi kuli Shauli wishi no kumweba ati: “Imfumu ibembuka+ ku mubomfi wa iko Davidi, pantu tabembwike kuli imwe ne fyo acita kuli imwe fisuma.+ 5 Kabili aibikile mu kapoosa mweo+ ilyo aipeye umuPelishiti,+ kabili Yehova apuswishe ukupususha kukalamba+ muli Israele onse. Mwalimwene, kabili mwalisekelele. Nga cinshi mulebembukila ku mulopa wa kaele pa kwipaya Davidi+ apabula umulandu?”+ 6 Na o Shauli aumfwile kwi shiwi lya kwa Yonatani, kabili Shauli alapile ati: “Na pali Yehova,+ Davidi takepaiwe.” 7 Pa numa Yonatani aitile Davidi kabili Yonatani amwebele aya mashiwi yonse. E lyo Yonatani atwele Davidi kuli Shauli, na o alamubombela nga kale.+

8 Mu kuya kwa nshita kwaimine ubulwi na kabili, na Davidi aile ku kuyalwa na baPelishiti no kuboma no kubepayaula ukwipaya ukukalamba,+ kabili balifulumwike ku cinso cakwe.+

9 E lyo umupashi+ ubi uwa kwa Yehova waishile pali Shauli ilyo aikele mu mwakwe ne fumo mu minwe yakwe, ninshi Davidi alelisha icilimba ku minwe. 10 Awe Shauli alefwaya ukupampamina Davidi ku cibumba+ kwi fumo, lelo alilewike+ ku cinso ca kwa Shauli, ica kuti alashile ifumo mu cibumba. Kabili Davidi alifulumwike no kufyuka ubushiku.+ 11 E lyo Shauli atumine inkombe+ ku ng’anda ya kwa Davidi ku kuilinda pa kuti bamwipaye ulucelo;+ lelo Mikali umukashi wakwe aebele Davidi ati: “Nga tawafyuke ubushiku, mailo ukaba icitumbi.” 12 Ilyo line Mikali aishishe Davidi pa windo, ukuti aleya, afulumuke pa kuti apusuke.+ 13 Kabili Mikali abuulile icilubi+ no kucibika pa ca kusendamapo, abikile ne candaluwa ca masako ya mbushi ku mitwe, e lyo acifimba insalu.

14 Shauli nomba atumine inkombe mu kubuula Davidi, lelo Mikali atile: “Nalwala.”+ 15 Awe Shauli atumine inkombe mu kumona Davidi no kusheba ati: “Mumulete kuli ine pa ca kusendamapo cakwe pa kuti mwipaye.”+ 16 Ilyo inkombe shaingile, moneni, pali icilubi pa ca kusendamapo ne candaluwa ca masako ya mbushi ku mitwe. 17 E lyo Shauli atile kuli Mikali: “Cinshi ico wambepela ifi,+ waleka no mulwani wandi+ aya pa kuti apusuke?” Na o Mikali atile kuli Shauli: “Umwine e wanjebele ati, ‘Leka nje! Cinshi ico ndekwipaila?’”

18 Davidi ena, alifyukile no kufulumuka+ kabili aile kuli Samwele ku Rama.+ Amushimikile na fyonse ifyo Shauli amucitile. E lyo basendene na Samwele, baileikala mu Nayote.+ 19 Mu kuya kwa nshita, Shauli aebelwe ati: “Moneni! Davidi ali ku Nayote mu Rama.” 20 Ilyo line fye Shauli atumine inkombe ku kuyabuula Davidi. Ilyo shamwene ibumba lya bakasesema abakalamba, balesesema, na Samwele naiminina alebatungulula, umupashi+ wa kwa Lesa waishile pa nkombe sha kwa Shauli, na sho shatendeke ukulacita nga bakasesema.+

21 Ilyo baebele Shauli pali ici, apo pene atumine inkombe shimbi, na sho shatendeke ukucita nga bakasesema. E ico Shauli atumine inkombe na shimbi, umuku walenga itatu, kabili na sho shine shatendeke ukucita nga bakasesema. 22 Pa kulekelesha na o wine aile ku Rama. Ilyo afikile ku cishima icikalamba ica mu Seku, aipwishe no kutila: “Bushe Samwele na Davidi bali kwi?” Na bo batile: “Bali ku Nayote+ mu Rama.” 23 Awe atwalilile ukuya ku Nayote mu Rama, no mupashi+ wa kwa Lesa waishile pali ena, na o aleya alecita nga kasesema mpaka afika ku Nayote mu Rama. 24 Kabili afuulile ne fya kufwala no kucita nga kasesema pa cinso ca kwa Samwele, awile na pa nshi no kulaala ubwamba akasuba konse no bushiku bonse.+ E co kwabela insoselo batila: “Bushe Shauli na o wa muli bakasesema?”+

20 Kabili Davidi afyukile+ ukufuma ku Nayote mu Rama. Lelo, alishile no kusosa kuli Yonatani ati: “Cinshi ncitile?+ Cinshi ndufyenye, kabili lubembu nshi ncitile kuli wiso, apo alefwaya ukunjipaya?” 2 Na o amwebele ati: “Awe nakalya!+ Tawakepaiwe. Mona! Tata tacita icintu icikalamba nangu akantu akanono ukwabula ukunsokolwela;+ nga mulandu nshi tata engamfishila ici cintu?+ Tacite fi.” 3 Lelo Davidi alilapile+ no kulapa ati: “Wiso ukwishiba naishiba ukuti walintemwa,+ e ico kuti atila, ‘Mwileka Yonatani eshibe ici pantu kuti camukalipa.’ Lelo cine cine, na pali Yehova+ kabili na pali iwe wine,+ ndi fye mupepi no kufwa!”+

4 E lyo Yonatani atile kuli Davidi: “Conse ico umutima obe ulefwaya kuti nakucitila.” 5 Na o Davidi atile kuli Yonatani: “Mona! Mailo umweshi ninshi waikala,+ kabili ine mfwile ukwikala ne mfumu pa kuti tulye na yo; lelo iwe uleke nje, nkafisame+ mu mpanga mpaka icungulo, ubushiku bwalenga shitatu. 6 Nga wiso amona ukuti nshilipo, e lyo ukatile, ‘Davidi alimpamfishe ukulomba cuti ukuti abutukile ku Betelehemu+ ku musumba wakwe, pantu kuli ilambo lya pa mwaka ilya lupwa lwabo lonse.’+ 7 Nga atila, ‘Cisuma!’ ninshi kuli umutende ku mubomfi obe. Lelo nga akalipa, ishibo kuti alipanga ukucita ububi.+ 8 E ico naulanga umubomfi obe icikuuku,+ pantu wapangana icipangano+ na ine pa ntanshi ya kwa Yehova. Lelo nga nalilufyanya,+ njipaya iwe wine, pantu cinshi ico wingantwalila kuli wiso?”

9 Yonatani atile: “Awe nakalya! Lelo bushe teti nkwebe nga naishiba ukuti tata napanga ukuti ububi bwise pali iwe?”+ 10 E lyo Davidi atile kuli Yonatani: “Nani akanjeba nga wiso akaasuka ifya bukali?” 11 Na o Yonatani atile kuli Davidi: “Isa, natuye mu mpanga.” Awe bonse babili baile mu mpanga. 12 Na Yonatani akonkenyepo ukusosa kuli Davidi ati: “Yehova Lesa wa kwa Israele+ abe ni nte+ ukuti nkatempa tata nga ino nshita mailo, atemwa bulya bushiku, nge fintu fili bwino kuli Davidi, nkatuma kuli iwe no kukusokolwela. 13 Nga tata alefwaya ukukucita ububi, e lyo nga nshikwebele pa kuti uye, nobe tawile umutende, ninshi Yehova akakande Yonatani, akalundenapo.+ Kabili Yehova abe nobe,+ ifyo ali na tata.+ 14 Kabili nga ncili uwa mweo,+ bushe tawakabe ne cikuuku ca kwa Yehova kuli ine, ukuti nikepaiwa?+ 15 Kabili tawakafumye icikuuku cobe pa ba ng’anda yandi umuyayaya.+ Kabili ilyo Yehova akalofya abalwani ba kwa Davidi, bonse bene ukubafumya pano isonde, 16 ishina lya kwa Yonatani talyakalobe pa ba mu ng’anda ya kwa Davidi.+ Kabili Yehova akakandilapo abalwani ba kwa Davidi pali ici cipangano.” 17 E lyo Yonatani alapile kuli Davidi na kabili pa mulandu wa kutemwa amutemenwe; pantu amutemenwe ifyo aitemenwe umwine.+

18 E lyo Yonatani amwebele ati: “Mailo umweshi ninshi waikala,+ kabili bakamona ukuti taulipo, pantu tapakabe muntu pa ca kwikalapo cobe. 19 Na pa bushiku bwalenga shitatu e lyo cikamonekesha ukuti taulipo; kabili ukese palya pene wafiseme+ muli bulya bushiku,* kabili ukekale mupepi ne li libwe apa. 20 Na ine nkapoosa imifwi itatu mupepi, nkapoosa kwati ndelasa pa ca kulasapo. 21 Kabili mona! Nkatuma umubomfi wandi, nkatila, ‘Kabiye, kasende imifwi.’ Kabili nga nkeba umubomfi wandi ati, ‘Mona! Imifwi ili uku ku lubali lobe, toola,’ e lyo ukese, pantu ninshi mutende kuli iwe kabili tapali mulandu, ndelapa na pali Yehova.+ 22 Lelo nga nasosa ku mulumendo nati, ‘Mona! Imifwi ili uko ku ntanshi yobe,’ ninshi ukaye, pantu Yehova nakweba ukuya. 23 Kabili ifi twasosa,+ iwe na ine, shi Yehova abe pa kati ka ine na iwe umuyayaya.”+

24 Awe Davidi afiseme mu mpanga.+ Kabili kwali ukusefya umweshi uupya, ne mfumu yalikele ku kulya ifya kulya.+ 25 Kabili imfumu yaikele pa ca kwikalapo ca iko nga pe, ica kwikalapo icali ku cibumba, na Yonatani alungatene na yo, e lyo Abnere+ aikele ku mbali ya kwa Shauli, lelo apekala Davidi tapali muntu. 26 Shauli tasosele kantu pali bulya bushiku, pantu atile: “Pali icicitike icilengele ukuti abe uushasanguluka,+ pantu tali uwasanguluka.” 27 Nomba pa bushiku bwakonkele pa bushiku umweshi waikele, ubushiku bwalenga shibili, apekala Davidi na lyo line tapali muntu. Na Shauli atile kuli Yonatani umwana wakwe: “Mulandu nshi mwana Yese+ teshiile ku kulya lelo, nangu ni mailo?” 28 Na Yonatani ayaswike Shauli ati: “Davidi alimpamfishe ukulomba cuti ukuti aye ku Betelehemu.+ 29 Atile, ‘Shi leka nje, pantu kuli ilambo lya lupwa lwesu mu musumba, kabili munyinane e wanjebele ukuti nkasangweko. E ico nomba nga nauntemwa, shi leka nje, ukuti nkamone bamunyinane.’ E co teshiile kwi tebulo lya mfumu.” 30 E lyo ubukali+ bwa kwa Shauli bwaishile pali Yonatani kabili amwebele ati: “We cipondoka we,*+ bushe nshaishiba ukuti walitemwa mwana Yese, ku kuilenga insoni no kulenga ubwamba bwa kwa noko insoni?+ 31 Pantu inshiku shonse isho mwana Yese ali no mweo pano isonde, ubufumu bobe tabwakapampamikwe.+ Nomba tuma aba kuyamuleta kuli ine, pantu afwile ukufwa.”+

32 Lelo Yonatani ayaswike Shauli wishi ati: “Nga mulandu nshi alefwila?+ Cinshi acitile?”+ 33 E lyo Shauli apoosele ifumo ukuti amulase;+ e lyo Yonatani aishibe ukuti wishi apangile ukwipaya Davidi.+ 34 Apo pene Yonatani aimine ukufuma kwi tebulo nakalipa,+ kabili taliile ifya kulya mu bushiku bwalenga shibili ukutula apo umweshi waikalile, pantu ali no bulanda pali Davidi,+ pa mulandu wa kuti wishi alimuseebenye.+

35 Nomba ulucelo Yonatani aile mu mpanga palya pene bapangene+ na Davidi, ali no mubomfi wakwe umulumendo. 36 Kabili aebele umubomfi wakwe ati: “Butuka, katoole imifwi iyo ndepoosa.”+ Umubomfi wakwe alibutwike, e lyo ena apoosele umufwi na o wamucila. 37 Ilyo umubomfi wakwe afikile apali umufwi uo Yonatani apoosele, Yonatani abilikishe ku numa ya mubomfi wakwe ati: “Imifwi ili kulya ku ntanshi yobe.”+ 38 Kabili Yonatani abilikishe ku numa ya mubomfi wakwe ati: “Endesha! Angufyanya! Wi-iminina!” Awe umubomfi wa kwa Yonatani atoolele imifwi no kuleta kuli shikulu wakwe. 39 Lelo umubomfi wakwe taishibe nangu kamo; Yonatani na Davidi abene e baishibe uyu mulandu. 40 E lyo Yonatani apeele ifyanso fyakwe ku mubomfi wakwe no kumweba ati: “Kabiye, twala ku mushi.”

41 Awe umubomfi wakwe aliile. Lelo Davidi alimine ukufuma mupepi lwa ku kapinda ka ku kulyo. Awile ubukupeme pa nshi+ no kukontama imiku itatu; kabili batampile ukuitomona+ no kulila, mpaka Davidi alila ukucishamo.+ 42 E lyo Yonatani atile kuli Davidi: “Kabiye umutende,+ apo natulapa+ bonse babili mwi shina lya kwa Yehova, atuti, ‘Yehova umwine abe pa kati ka ine na iwe na pa kati ka bana bandi na bana bobe umuyayaya.’”+

E lyo Davidi aimine, aya, na Yonatani abwelele ku musumba.

21 E lyo Davidi afikile ku Nobu+ kuli Ahimeleke shimapepo; na Ahimeleke+ alitutwime pa kumona Davidi no kumwipusha ati: “Nga cinshi ubelele weka, ukwabula ukuba na umbi?”+ 2 Awe Davidi atile kuli Ahimeleke shimapepo: “Imfumu e yantumine ukukuma ku mulandu umo,+ kabili yanjebele ati, ‘Wileka umuntu nangu umo eshibe umulandu ndekutumina nelyo ico nakweba ukucita.’ Kabili nimpangana na balumendo ukukumana kwa kuti na kwa kuti. 3 Nomba nga namukwata imikate isano, mpeeleni, atemwa conse icilipo.”+ 4 Lelo shimapepo ayaswike Davidi no kutila: “Nshikwete umukate wa fye, lelo umukate+ wa mushilo e ulipo; kulila fye abalumendo balitaluka ku banakashi.”+ 5 E ico Davidi ayaswike shimapepo no kumweba ati: “Abanakashi balitaluka kuli ifwe nge fyo batalwike kuli ifwe ilyo twaleya ku bulwi,+ kabili imibili ya balumendo ili iya mushilo nelyo bali pa lwendo lwa fye. Bushe lelo imibili yabo tayacilenapo ukuba iya mushilo?” 6 E lyo shimapepo amupeele ifya mushilo,+ pantu tapali umukate kano imikate ya mutuulo iyo baseseshe ukufuma ku cinso ca kwa Yehova+ ku kupyanikapo imikate ipya pa bushiku bwa kuifumyapo.

7 Kabili kwali umo uwa mu babomfi ba kwa Shauli kulya, uwalindikwe+ ku cinso ca kwa Yehova, ne shina lyakwe ni Doege+ umwina Edomu,+ umukalamba wa bacemi ba kwa Shauli.+

8 Na Davidi atile kuli Ahimeleke: “Bushe takuli ifumo nangu lupanga kuno? Pantu nshisendele nangu lupanga lwandi nangu fyanso, pantu umulandu wa mfumu walipamfishe.” 9 Shimapepo atile: “Kuli ulupanga lwa kwa Galyati+ umuPelishiti, uo waipeye mwi lungu lya Ela,+ ulu, lwafungwa mu nsalu, ku numa ya efode.+ Nga ulefwaya ukulusenda, lusende pantu e lulipo fye, tapali lumbi.” Na o Davidi atile: “Tapali ulwaba ngo lu. Mpeeni.”

12 Davidi asungile aya mashiwi mu mutima wakwe, kabili atiinine icibi+ Akishi imfumu ya Gati. 13 Awe ali-ifungushenye+ pa menso yabo+ no kuilenga ukuba nge shilu mu minwe yabo, alashilaula na pa fiibi fya mpongolo no kuponesha ululenda ku mwefu wakwe. 14 E lyo Akishi atile ku babomfi bakwe: “Moneni, uyu muntu lishilu. Cinshi mwamuletela kuli ine?15 Bushe ine ndekabila amashilu pa kuti mundetele uyu muntu ku kucita ifya bushilu kuli ine? Bushe e muntu ningengisha mu ng’anda yandi uyu?”

22 E lyo Davidi afumineko+ no kufyukila+ ku lucengo+ lwa Adulamu;+ kabili bamunyina na ba mu ng’anda ya kwa wishi bonse balyumfwile no kumukonka. 2 Na bonse abali no bwafya+ na bonse abali ne nkongole+ na onse uo cakalipe mu mutima+ balongene kuli ena,+ na o aishileba intungulushi yabo;+ kabili ali na bantu nalimo imyanda ine (400).

3 Kabili Davidi afumine kulya no kuya ku Mispe muli Moabu no kusosa ku mfumu ya Moabu+ ati: “Shi lekeni tata na mayo+ bekale na imwe mpaka nkeshibe ico Lesa akancita.” 4 Awe abatwele ku mfumu ya Moabu, na bo baikele nankwe inshiku shonse isho Davidi ali umwa kufisama.+

5 Mu kuya kwa nshita, Gadi+ kasesema atile kuli Davidi: “Witwalilila ukwikala umwa kufisama. Kabiye, kabili ukengile mu calo ca Yuda.”+ E ico Davidi aliile, aingile na mu mutengo wa Herete.

6 Kabili Shauli aumfwile ukuti Davidi na bantu ali na bo nabamoneka, ninshi Shauli naikala mu Gibea mwi samba lya muti wa mutamariski+ apasansama, ali ne fumo+ mu minwe yakwe na babomfi bakwe bonse nabeminina apo ali. 7 E lyo Shauli atile ku babomfi bakwe abaiminine apo ali ati: “Shi umfweni, mwe bena Benjamini. Bushe mwana Yese+ akapeela imwe bonse amabala na mabala ya myangashi?+ Bushe akacita imwe bonse ukuba bacilolo ba pa bantu amakana+ na bacilolo ba pa bantu imyanda? 8 Pantu imwe bonse namupangana ukulwisha ine; kabili tapali uwasokolwele kuli ine+ ilyo umwana wa kuifyalila acitile icipangano+ na mwana Yese, kabili tapali nangu umo uunangulukile no kunsokolwela ukuti umwana wa kuifyalila naimya umubomfi wandi ukumbelamina fintu cili ubwa lelo.”

9 E lyo Doege+ umwina Edomu, uwabikilwe ukuba umukalamba pa babomfi ba kwa Shauli ayaswike no kutila: “Namwene mwana Yese afika ku Nobu kuli Ahimeleke+ mwana Ahitubu.+ 10 Na o amwipushisheko+ kuli Yehova; amupeele ne fya kulya,+ no kumupeela ulupanga+ lwa kwa Galyati umuPelishiti.” 11 Apo pene imfumu yatumine aba kuyaita Ahimeleke mwana Ahitubu shimapepo na ba mu ng’anda ya kwa wishi bonse, bashimapepo ba ku Nobu.+ Na bo baliishile ku mfumu bonse.

12 E lyo Shauli atile: “Shi umfwa, we mwana wa kwa Ahitubu!” na o atile: “Ndi pano, mwe shikulu.” 13 Na Shauli amwipwishe ati: “Cinshi ico mwapanganina ukulwisha ine,+ iwe na mwana Yese, pa kumupeela ifya kulya no lupanga, kabili wamwipushisha na kuli Lesa, ku kwimina ine no kumbelamina fintu cili lelo?”+ 14 Na o Ahimeleke ayaswike imfumu ati: “Kabili nani uwa mu babomfi benu uwaba nga Davidi,+ uwa cishinka,+ kabili shifyala+ wa mfumu kabili umukalamba wa balinshi benu kabili uwacindikwa mu ng’anda yenu?+ 15 Bushe ni lelo natendeka ukumwipushisha+ kuli Lesa? Ine te kuti mwimine iyo! Imfumu iibika umulandu pa mubomfi wa iko na pa ba ng’anda ya kwa tata bonse, pantu umubomfi wenu taishibe nangu cimo, icinono atemwa icikalamba.”+

16 Lelo imfumu yatile: “Ukufwa walafwa+ Ahimeleke, pamo na bonse aba mu ng’anda ya kwa wiso.”+ 17 E lyo imfumu yaebele aba kubutuka+ abaiminine apo yali ati: “Alukeni no kwipaya bashimapepo ba kwa Yehova, pantu na bo bene bali kuli Davidi kabili balishibe ukuti nafyuka no kunsokolwela iyo!”+ Lelo ababomfi ba mfumu bakeene ukutambika amaboko yabo ku kwipaya bashimapepo ba kwa Yehova.+ 18 Imfumu yasukile yaeba Doege+ ati: “Aluka ni we no kwipaya bakasesema!” Apo pene Doege umwina Edomu+ alyalwike, awile pali bakasesema no kubepaya,+ kabili muli bulya bushiku aipeye abantu amakumi cinekonsekonse na basano (85) abafwele efode+ wa nsalu. 19 Nangu fye ba mu musumba wa bashimapepo uwa Nobu+ alibepeye ku lupanga, aipeye abaume pamo na banakashi, abana pamo na bonka ne ng’ombe ne mpunda ne mpaanga.

20 Lelo, umwana umo uwa kwa Ahimeleke mwana Ahitubu, ishina lyakwe Abiatari,+ alifyukile no kubutukila kuli Davidi. 21 Awe Abiatari aebele Davidi ati: “Shauli naipaya bashimapepo ba kwa Yehova.” 22 E lyo Davidi atile kuli Abiatari: “Nalishibe bulya bwine bushiku,+ pantu Doege umwina Edomu e po ali, nalishibe ukuti ali no kweba Shauli.+ Nine naletelela aba mu ng’anda ya kwa wiso bonse. 23 Ikala na ine. Witiina, pantu onse uulefwaya umweo wandi ninshi alefwaya no mweo obe, pantu kuno, nine ndi no kukucingilila.”+

23 Mu kuya kwa nshita, abantu baileshimikila Davidi abati: “Moneni, abaPelishiti balelwa na Keila,+ kabili balepokolola ne fya kulya fyabo.”+ 2 E lyo Davidi aipwishe+ Yehova ati: “Bushe nje, no kuyauma abaPelishiti aba?” Na o Yehova ayaswike Davidi ati: “Kabiye, kabili ukome abaPelishiti no kupususha Keila.” 3 E lyo abantu ba kwa Davidi bamwebele ati: “Moneni! Apo muno mu Yuda+ tuletiina, cikacila nga twaya ku Keila ku kulwisha abashilika ba baPelishiti!”+ 4 E ico Davidi abwekeshepo ukwipusha kuli Yehova.+ Yehova na o amwaswike no kutila: “Ima, kabiye ku Keila, pantu ndepeela abaPelishiti kuli iwe.”+ 5 Awe Davidi aile na bantu bakwe ku Keila no kulwa na baPelishiti no kupokolola ifitekwa fyabo, no kwipaya abengi; e fyo Davidi apuswishe abekashi ba ku Keila.+

6 Nomba ilyo Abiatari+ mwana Ahimeleke afyukiile kuli Davidi ku Keila, asendele na efode+ mu minwe yakwe. 7 Mu kuya kwa nshita, baebele Shauli ukuti: “Davidi ali ku Keila.”+ E lyo Shauli atile: “Lesa namupeela* mu minwe yandi,+ pantu naisalila umwine pa kwingila mu musumba uwaba ne fiibi kabili uo babikako imipindo.” 8 Awe Shauli aitile abantu bonse ku kulwa, ukuya ku Keila, ku kuyashinga Davidi na bantu bakwe. 9 Na Davidi aishibe ukuti Shauli alepanga ukumucita ububi.+ E ico aebele Abiatari shimapepo ati: “Palamika efode kuno.”+ 10 E lyo Davidi atile: “Mwe Yehova Lesa wa kwa Israele,+ umubomfi wenu aumfwa ukuti Shauli alefwaya ukwisa ku Keila ku konaula umusumba pa mulandu wandi.+ 11 Bushe abena Keila bakampeela mu minwe yakwe? Bushe Shauli ali no kwisa nga mulya umubomfi wenu omfwilile? Mwe Yehova Lesa wa kwa Israele, shi ebeni umubomfi wenu.” Na o Yehova atile: “Akesa.”+ 12 E lyo Davidi atile: “Bushe abena Keila bali no kupeela ine na bantu bandi mu minwe ya kwa Shauli?” Yehova atile: “Bali no kumupeela mu minwe yakwe.”+

13 Ilyo line fye Davidi aimine na bantu bakwe, abali napamo imyanda mutanda (600),+ no kufuma mu Keila no kuya bale-endauka konse uko bengendauka. Ilyo bashimikile Shauli ati Davidi nafyuka mu Keila, alekele ukumukonka. 14 E lyo Davidi aikele mu matololo ukwafisama, kabili aikele mu calo ca mpili mu matololo ya Sifi.+ Na Shauli alemufwayafwaya fye inshiku shonse,+ lelo Lesa tamupeele mu minwe yakwe.+ 15 Kabili Davidi aleikala fye uwa mwenso pantu Shauli aile ku kumusokota ilyo Davidi ali mu matololo ya Sifi mu Horesha.+

16 Nomba Yonatani mwana Shauli aimine no kuya kuli Davidi ku Horesha, ku kumukoselesha+ ukuti atetekele sana Lesa.+ 17 Kabili amwebele ati: “Witiina;+ pantu Shauli tata takakwikate, na iwe ukaba imfumu+ pali Israele, na ine nkaba inkonkani yobe; kabili Shauli tata alishiba ifi.”+ 18 Awe bapangene icipangano+ bonse babili pa ntanshi ya kwa Yehova; kabili Davidi akonkenyepo ukwikala mu Horesha, na Yonatani aile ku ng’anda yakwe.

19 E lyo abena Sifi+ baile kuli Shauli ku Gibea,+ abati: “Davidi afiseme+ lwa mupepi na ifwe ukwafisama mu Horesha,+ pa kapili ka Hakila,+ akali ku kulyo kwa Yeshimone.+ 20 Nomba ukulingana na fyonse ifyo umutima wenu ulefwaya,+ mwe mfumu, mukonkeni na ifwe tuli no kumupeela mu minwe ya mfumu.”+ 21 E lyo Shauli atile: “Mube abapaalwa kuli Yehova,+ pantu mwanangulukila. 22 Shi kabiyeni, kafwailisheni na kabili, no kumona umo apita—onse uwamumwene kulya—pantu balinjeba ati alicenjela.+ 23 Kabili mukamone no kufwailisha monse umo afisama; e lyo mukesenjeba ifyo mukayamona, na ine nkaya na imwe; nomba nga aba mu calo, nkamufwayafwaya mu ndupwa*+ sha kwa Yuda.”

24 E lyo baimine no kuya ku Sifi+ ukutangilila Shauli, ninshi Davidi na bantu bakwe bali mu matololo ya Maone+ mu Araba+ ku kapinda ka ku kulyo aka Yeshimone. 25 Awe Shauli aileko na bantu bakwe ku kumufwaya.+ Ilyo baebele Davidi ulwa ici, apo pene atentemukile ku cilibwe+ no kwikala mu matololo ya Maone. Ilyo Shauli aumfwile, akonkele+ Davidi mu matololo ya Maone. 26 Asukile Shauli afika ku lubali lumbi ulwa lupili, na Davidi na bantu bakwe ku lubali lubiye ulwa lupili. E ico Davidi alyangufyenye ukufulumuka+ pa mulandu wa kwa Shauli; lelo Shauli na bantu bakwe balepalamina kuli Davidi na bantu bakwe ukuti babekate.+ 27 E lyo kwaishile inkombe kuli Shauli, aiti: “Angufyanyeni, kabiyeni, pantu abaPelishiti nabasansa icalo!” 28 E fyo Shauli alekele ukukonka Davidi+ no kuya ku kulwa na baPelishiti. E co bainikila palya pantu ati Icilibwe Casumbuka ica Malekano.

29 E lyo Davidi afumineko no kuyaikala ukwafisama ku En-gedi.+

24 Nomba ilyo Shauli abwelele fye ukufuma mu kukonka abaPelishiti,+ bamushimikile ati: “Moneni! Davidi ali mu matololo ya En-gedi.”+

2 E lyo Shauli abuulile abantu amakana yatatu (3,000) abasalwa+ mu bena Israele bonse no kuya ku kufwayafwaya Davidi+ na bantu bakwe mu fimabwe umwikala ifibushimabwe.+ 3 Afikile na ku macinka ya mpaanga aya mabwe mu nshila, ukwali no lucengo. E lyo Shauli aingilemo ku kupemwina mu nda,+ ninshi Davidi na bantu bakwe bali muli ulu lwine lucengo+ mu kati sana, nabekala. 4 E lyo abantu ba kwa Davidi bamwebele ati: “Buno e bushiku Yehova amweba ati, ‘Mona! Napeela umulwani obe mu minwe yobe,+ kabili umucite fyonse ifyo ulefwaya.’”+ Awe Davidi aliimine panono panono no kuputula icisempe ku ca kufwala cabula amaboko ica kwa Shauli. 5 Nomba pa numa ya kucita ifi umutima wa kwa Davidi watampile ukumucusha+ pantu aputwile icisempe ca ku ca kufwala cabula amaboko ica kwa Shauli. 6 E lyo atile ku bantu bakwe: “Ukulingana ne fyo Yehova amona ifintu, te kuti ncite ici cintu kuli shikulu nangu panono, uwasubwa+ wa kwa Yehova, pa kutambika ukuboko kwandi pali ena, pantu e wasubwa wa kwa Yehova.”+ 7 Davidi aleseshe abantu bakwe ilyo alandile aya yene mashiwi, kabili tabasuminishe ukwimina Shauli.+ Awe Shauli alimine ukufuma mu lucengo aya no kuya.

8 E lyo Davidi aimine no kufuma mu lucengo no kubilikisha kuli Shauli, ati: “Mwe shikulu+ imfumu!” E lyo Shauli acebukile ku numa, na Davidi aineme pa nshi+ no kutoota. 9 Kabili Davidi atile kuli Shauli: “Cinshi muumfwila ku mashiwi ya bantu,+ abatila, ‘Moneni! Davidi afwaya ukumucita ububi’? 10 Moneni buno bushiku namumona na menso yenu Yehova amupeele mu minwe yandi mu lucengo; kabili umuntu umo acitila tumwipaye,+ lelo nacumfwa uluse no kutila, ‘Nshatambike ukuboko kwandi pali shikulu, pantu e wasubwa+ wa kwa Yehova.’11 Kabili mwe tata,+ moneni, moneni ne cisempe ca ku ca kufwala cenu icabula amaboko icili mu minwe yandi, pantu ilyo mputwile icisempe ku ca kufwala cenu icabula amaboko nshimwipeye iyo. Ishibeni no kumona ukuti nshapanga ukumucita ububi+ nangu kumupondokela, kabili nshamubembukila, nangu ca kuti mulembelamina ukuti munjipaye.+ 12 Yehova napingule pali ine na imwe;+ kabili Yehova akanandwila+ pali imwe, lelo iminwe yandi tayakabe pali imwe.+ 13 Nge fyo ipinda lya ba kale lisosa, ‘Mu babifi e mufuma ifyabipa,’+ lelo iminwe yandi tayakabe pali imwe. 14 Nani uo imfumu ya Israele yafumina? Nani mulekonka? Bushe nshaba fye nge mbwa iyafwa?+ Bushe nshaba fye ngo lupantila?+ 15 Yehova e ukapingula, kabili akapingula pali ine na imwe, akamona kabili akandubulwila no kumpingula+ ukuti akandubule ukufuma mu minwe yenu.”

16 Nomba ilyo Davidi apwile ukulanda aya mashiwi kuli Shauli, Shauli atile: “Bushe lishiwi lyobe ndeumfwa, we mwana wandi Davidi?”+ Awe Shauli asanswile ishiwi lyakwe, alalila.+ 17 E lyo atile kuli Davidi: “Iwe uli mulungami ukuncila,+ pantu ni we wancitila icisuma,+ na ine nakucitila ububi. 18 Na iwe walanga lelo ubusuma wancitila, pantu Yehova ampeele mu minwe yobe+ na iwe taunjipeye. 19 Nomba umuntu nga asanga umulwani wakwe, bushe kuti amuleka ukuya umutende?+ E ico Yehova akakulambula icisuma,+ pantu buno bushiku wancitila icisuma. 20 Nomba mona! Nalishiba ukuti cine cine ukaba imfumu,+ no kuti ubufumu bwa kwa Israele bukapampamikwa mu minwe yobe. 21 E ico nomba lapa mwi shina lya kwa Yehova+ kuli ine ukuti tawakalofye abana ba bana bandi abakankonkapo no kuti tawakalofye ishina lyandi mu ng’anda ya kwa tata.”+ 22 Awe Davidi alapile kuli Shauli, na Shauli aile ku mwakwe.+ Lelo Davidi na bantu bakwe, balininine baile ukwafisama.+

25 Mu kuya kwa nshita Samwele+ alifwile; na bena Israele bonse balilongene no kumuloosha+ kabili bamushiikile pa ng’anda yakwe mu Rama.+ E lyo Davidi aimine no kuya ku matololo ya Parani.+

2 Mu Maone+ mwali umuntu uwalebombela ku Karmele.+ No yu muntu ali umukankaala, ali ne mpaanga amakana yatatu (3,000) ne mbushi ikana limo (1,000); kabili alebeya amasako ya mpaanga+ shakwe ku Karmele. 3 Kabili ishina lya uyu muntu ni Nabali,+ ne shina lya mukashi wakwe ni Abigaili.+ Kabili umukashi ali uwacenjela+ kabili uwayemba, lelo umulume ali umunkalwe kabili umubi mu micitile yakwe;+ kabili ali mwina Kalebu.+ 4 Awe Davidi aumfwile mu matololo ati Nabali alebeya+ impaanga shakwe. 5 E ico Davidi atumine abalumendo ikumi (10) no kubeba ati: “Kabiyeni ku Karmele, mufike na kuli Nabali no kumuposesha mwi shina lyandi.+ 6 Kabili muyesosa kuli munyinane ati, ‘Ube no mutende+ na ba mu ng’anda yobe babe no mutende na fyonse ifyobe fibe umutende. 7 Ning’umfwa ukuti uli na ba kubeya impaanga. Nomba abacemi bobe bali na ifwe ilyo twali mu mpanga.+ Tatwabacushishe,+ kabili tabalufishe kantu nangu kamo inshiku shonse bali mu Karmele. 8 Ipusha abalumendo bobe, na bo balekweba, pa kuti usekelele abalumendo bandi, pantu ni pa bushiku busuma twishile. Shi peela icili conse wingakwata ku babomfi bobe na ku mwana obe Davidi.’”+

9 Awe abalumendo ba kwa Davidi bafikile kuli Nabali no kusosa aya mashiwi yonse mwi shina lya kwa Davidi e lyo balapembelela. 10 Lelo Nabali ayaswike ababomfi ba kwa Davidi ati: “Nani Davidi,+ kabili nani mwana Yese? Muno nshiku abasha abafyuka kuli bashikulu wabo nabafula sana.+ 11 Kabili bushe mbuule ifya kulya fyandi+ na menshi yandi ne nama isho njipaile abalebeya impaanga shandi no kupeela ku bantu abo nshishibe no ko bafumine?”+

12 Awe abalumendo ba kwa Davidi balyalwike no kubwela kabili bamwebele aya mashiwi yonse. 13 Ilyo line Davidi aebele abantu bakwe ati: “Cila muntu akake ulupanga lwakwe!”+ Awe bakakile umuntu no muntu ulupanga lwakwe na Davidi na o akakile ulupanga lwakwe; kabili bakonkele Davidi, abantu napamo imyanda ine (400), ne myanda ibili (200) bashele balelinda ifipe.+

14 Lelo, umo pa balumendo ashimikile Abigaili, muka Nabali, ati: “Moneni! Davidi atumine inkombe ukufuma mu matololo ku kuposha* shikulwifwe, lelo ena acikalipa no kubasaalula.+ 15 Lelo aba bantu bali bwino kuli ifwe, kabili tabatucushishe, kabili tatwalufishe kantu nangu kamo inshiku shonse twaendawike na bo ilyo twali mu mpanga.+ 16 Bali kwati lilinga+ kuli ifwe ubushiku na kasuba, inshiku shonse twali na bo tulecema impaanga. 17 E ico ishibeni no kumona ifyo mwalacita, pantu shikulwifwe na bonse aba mu ng’anda yakwe, nababapangila ukubacita ifibi,+ pantu shikulwifwe cinangwa,+ te wa kusosako.”

18 Ilyo line Abigaili+ alyangufyenye no kubuula imikate imyanda ibili (200) ne mitondo iikalamba ibili iya mwangashi+ ne mpaanga shisano ishapekanishiwa+ na magaloni* yasano aya fyasalulwa+ ne fimamantwa fya myangashi iya-anikwa+ umwanda umo (100) ne fimamantwa fya makunyu+ imyanda ibili no kufibika pa mpunda. 19 E lyo aebele abalumendo bakwe ati: “Ntangilileni.+ Moneni! Ndeisa ndemukonka.” Lelo umulume wakwe Nabali tamwebele nangu cimo.

20 Nomba ilyo ali pa mpunda+ kabili aletentemuka ulupili mu bumfisolo, moneni, Davidi na bantu bakwe baleisa. E lyo akumene na bo. 21 Davidi ena alisosele ati: “Kanshi ca fye apo nacingilile ifintu fyonse ifya ulya muntu mu matololo kabili talufishe kantu nangu kamo muli fyonse ifyakwe,+ nomba ambwesesha ububi pa busuma.+ 22 Lesa nakande abalwani ba kwa Davidi, alundenapo+ nga nashapo umwaume+ pali bonse abakwe ukufika ulucelo.”+

23 Ilyo Abigaili amwene Davidi, ilyo line alyangufyenye no kwika pa mpunda no kuwa ubukupeme+ ku cinso ca kwa Davidi, alatoota. 24 E lyo awile pa makasa yakwe+ no kutila: “Mwe shikulu, ici cilubo cibe pali ine;+ kabili shi lekeni umubomfi wenu asose mu matwi yenu,+ kabili umfweni amashiwi ya mubomfi wenu. 25 Shi shikulu ebika umutima pali uyu muntu icinangwa+ Nabali, pantu ifyo ishina lyakwe lyaba, e fyo no mwine aba. Nabali e shina lyakwe, kabili ubupumbu bwaba muli ena.+ Lelo ine, ne mubomfi wenu, nshacibamona abalumendo ba kwa shikulu abo mwacituma. 26 Nomba, mwe shikulu, na pali Yehova+ na pali imwe bene,+ Yehova namulesha+ ukusuumya umulopa+ pa kuti muipusushe mwe bene.+ E ico icikacitikila Nabali cikacitikile na balwani benu na bafwaya ukucita shikulu ububi.+ 27 Nomba ubu bupe*+ ubo umubomfi wenu aleta kuli shikulu, bupeelwe ku balumendo abakonka konse uko shikulu aya.+ 28 Shi beleleni umubomfi wenu uluse pa bupulumushi bwakwe,+ pantu Yehova cine cine akacitila shikulu ing’anda iibelelela,+ pantu shikulu alelwa ubulwi bwa kwa Yehova;+ kabili ububi tabwakasangwe muli imwe inshiku shenu shonse.+ 29 Nga bantu baima ku kumukonka no kufwaya umweo wenu, Yehova Lesa+ wenu akamucingilila ifyo umuntu acingilila ifyuma fyakwe no kufibika mu mufuko;+ lelo, imyeo ya balwani benu, akaisukusa kwati libwe ukufuma mu cisukushilo.+ 30 Nomba, apo Yehova akacita kuli shikulu icisuma ukulingana na conse ico asosa, cine cine akamubika ukuba intungulushi pali Israele.+ 31 Kabili tamwakabe no mulandu wa kulanguluka no kucula mu mutima, pa mulandu wa kusuumya umulopa apabula umulandu+ na pa mulandu wa kuleka ukuboko kwenu mwe shikulu kumulandwile.+ Kabili Yehova akacitila shikulu icisuma, kabili mukebukishe+ umusha wenu.”

32 E lyo Davidi atile kuli Abigaili: “Acindikwe Yehova Lesa wa kwa Israele,+ uwakutuma buno bushiku mu kunkumanya!33 Kabili yabe ayapaalwa amano yobe,+ kabili ube uwapaalwa we wandesha lelo ukusumya umulopa+ no kuilandwila ku minwe yandi.+ 34 Ukuba kwena, na pali Yehova Lesa wa kwa Israele, uwandesha lelo ukukucita ububi,+ aubulayangufyanya ku kwisa mu kunkumanya,+ nga tapashele umwaume pali bonse aba kwa Nabali pa kuca ulucelo.”+ 35 E lyo Davidi apokele ifyo amuleteele, kabili amwebele ati: “Kabiye umutende+ ku mobe. Mona, ning’umfwa kwi shiwi lyobe kabili nalacita ifyo usosele.”+

36 Pa numa ya ifyo, Abigaili aishile kuli Nabali, kabili Nabali alecita umutebeto mu ng’anda yakwe ngo mutebeto wa mfumu;+ no mutima wakwe wali nausekelela mu nda, kabili alikolelwe+ sana; e ico tamwebeleko nangu kamo, mpaka no lucelo. 37 Nomba ulucelo, ilyo Nabali akololweke, e lyo umukashi amwebele ifi fintu. No mutima wakwe+ mu nda walifwile, kabili aishileba kwati libwe. 38 Pa numa ya ico papitile inshiku nalimo ikumi (10) e lyo Yehova apumine+ Nabali, na o alifwile.

39 Ilyo Davidi aumfwile ukuti Nabali nafwa, atile: “Abe uwacindikwa Yehova, uwanandwila+ ku museebanya wandi+ ku kumpokolola ku kuboko kwa kwa Nabali no kulesha umubomfi wakwe ukuti ecita ububi,+ kabili ububi bwa kwa Nabali Yehova abwesesha pa mutwe wakwe!”+ E lyo Davidi atumine aba kumulanshishako Abigaili ukuti amubuule abe umukashi wakwe.+ 40 E ico ababomfi ba kwa Davidi baile kuli Abigaili ku Karmele no kumweba abati: “Davidi atutuma kuli imwe ku kumubuula mube umukashi wakwe.” 41 Ilyo line alimine no kukontama pa nshi,+ no kutila: “Moneni umusha wenu, umubomfi uwa kusamba amakasa+ ya babomfi ba kwa shikulu.”+ 42 E lyo Abigaili+ ayangufyenye no kwima, aninine+ na pa mpunda na bakashana bakwe basano balemukonka; kabili aile pamo ne nkombe sha kwa Davidi no kuba umukashi wakwe.

43 Davidi abuulile na Ahinoamu+ wa mu Yesreele;+ na ba banakashi bonse babili bali bakashi bakwe.+

44 Lelo Shauli, apeele Mikali+ umwana wakwe, umukashi wa kwa Davidi, kuli Palti,+ mwana Laishi, uwa ku Galimu.+

26 Mu kuya kwa nshita, abena Sifi+ baile kuli Shauli ku Gibea,+ abati: “Davidi afiseme mu lupili lwa Hakila,+ ulwalungatana na Yeshimone.”+ 2 Awe Shauli alimine+ no kutentemukila ku matololo ya Sifi, ali na bantu amakana yatatu (3,000),+ abashilika abacenjela aba mu Israele, ku kufwaya Davidi mu matololo ya Sifi. 3 Kabili Shauli apangile inkambi mu lupili lwa Hakila, ulwalungatana na Yeshimone, lwa ku nshila, lelo Davidi aikele mu matololo. Kabili amwene ukuti Shauli namukonka mu matololo. 4 E ico Davidi atumine inengu+ ukuti eshibe nga cine cine Shauli nafika. 5 Awe Davidi alimine no kuya uko Shauli apangile inkambi, na Davidi amwene apaleele Shauli na Abnere+ mwana Nere umukalamba wa bashilika; kabili Shauli aleele mu ca kucinga inkambi+ na bantu bapangile inkambi ukumushinguluka. 6 E lyo Davidi asosele kuli Ahimeleke umwina Hiti+ na Abishai+ mwana Seruya,+ munyina Yoabu ati: “Nani nalatentemuka nankwe ukuya kuli Shauli mu nkambi?” E lyo Abishai atile: “Ine nalaya na imwe.”+ 7 Awe Davidi na Abishai baile kuli balya bantu ubushiku; kabili moneni! Shauli alileele utulo mu ca kucinga inkambi ne fumo lyakwe lishimpilwe pa nshi ku mitwe, na Abnere na bantu nabalaala ukumushinguluka.

8 E lyo Abishai atile kuli Davidi: “Buno bushiku Lesa napeela umulwani wenu mu minwe yenu.+ Nomba shi lekeni imulase ifumo lilase na pa nshi umuku fye umo, nshamulase imiku ibili.” 9 Lelo Davidi aebele Abishai ati: “Wimwipaya iyo, pantu nani uwingabika iminwe pa wasubwa wa kwa Yehova+ no kuba uwa kaele?”+ 10 Kabili Davidi atile: “Na pali Yehova,+ Yehova umwine akamupuma;+ atemwa akafwa nga filya abantu bonse bafwa,+ napamo ni mu bulwi+ e mo akafwila no kuloba.+ 11 Ukulingana ne fyo Yehova amona ifintu,+ te kuti+ ntambike ukuboko kwandi+ pa wasubwa wa kwa Yehova!+ Nomba, shi buula ifumo ilili ku mitwe no mutondo wa menshi, natuleya.” 12 Awe Davidi abuulile ifumo no mutondo wa menshi ku mitwe ya kwa Shauli, e lyo baile no kuya; kabili takwali uwabamwene+ nelyo ukwishiba nangu uwa kushibuka, pantu bonse bali mu tulo, pantu twali tulo utwine twine+ utwafumine kuli Yehova. 13 E lyo Davidi aile ku lubali lumbi no kwiminina pa muulu wa lupili ukutali, pa kati kabo pali impanga iikalamba.

14 E lyo Davidi abilikishe ku bantu na kuli Abnere mwana Nere ati: “Bushe tawayasuke Abnere?” Na Abnere+ ayaswike no kutila: “Ni we nani we ulebilikisha ku mfumu?” 15 E lyo Davidi asosele kuli Abnere ati: “Bushe tauli mwaume? Kabili nani waba nga iwe mu Israele? Nga cinshi ico taulindile sokulu imfumu? Pantu umo uwa mu bantu acingila mu nkambi ukuti epaye imfumu sokulu.+ 16 Ici cintu wacita taciweme. Na pali Yehova,+ imwe mufwile ukufwa,+ pantu tamulindile+ shikulwinwe, uwasubwa wa kwa Yehova.+ Nomba mona ukuli ifumo no mutondo+ wa menshi ifyaciba ku mitwe yakwe.”

17 Na Shauli aishibe ishiwi lya kwa Davidi no kutila: “Bushe lishiwi lyobe ili, Davidi mwana wandi?”+ Na o Davidi atile: “Lishiwi lyandi, mwe shikulu imfumu.” 18 Kabili atile: “Nga cinshi shikulu alekonkela umubomfi wakwe,+ kanshi cinshi ico nacita, kabili bubi nshi buli mu minwe yandi?+ 19 Nomba shi lekeni shikulu imfumu omfwe amashiwi ya mubomfi wenu: Nga ni Yehova wamubalamuna ukuti mundwishe, lekeni anunshe umutuulo wa ngano.+ Lelo nga bana ba bantunse,+ babe abatiipwa kuli Yehova,+ pantu nabantamfya lelo no kunengo kumfwa kwati nshakumako ku bupyani bwa kwa Yehova,+ abati, ‘Kabiye, kabombele balesa bambi!’+ 20 Nomba mwileka umulopa wandi witikile pa nshi ku cinso ca kwa Yehova;+ pantu imfumu ya Israele naifumina ku kufwaya ulupantila,+ kwati muntu uulelunga inkwale mu mpili.”+

21 E lyo Shauli atile: “Nimembuka.+ Bwela, we mwana wandi Davidi, pantu nshakakucite ububi kabili, pantu umweo wandi waba uwacindama+ mu menso yobe buno bushiku. Mona! Nacita ifya bupumbu kabili nalufyanya nga nshi.” 22 E lyo Davidi ayaswike no kutila: “Ifumo lya mfumu ili, lekeni umo pa balumendo ese abuule. 23 Kabili Yehova akalambula umo umo pa bulungami+ bwakwe ne cishinka cakwe, pantu lelo Yehova acimupeela mu minwe yandi, na ine nshacifwaya ukutambika ukuboko kwandi pa wasubwa wa kwa Yehova.+ 24 Kabili moneni! ifyo umweo wenu waciba uwa mutengo mu menso yandi buno bushiku, e fyo ube uwa mutengo umweo wandi mu menso ya kwa Yehova,+ ukuti ampokolole mu kucula konse.”+ 25 Na o Shauli atile kuli Davidi: “Lesa akupaale mwana wandi Davidi. Ukabomba e lyo no kucimfya ukacimfya.”+ E lyo Davidi aile; na Shauli abwelele ku mwakwe.+

27 Lelo Davidi mu mutima wakwe atile: “Bushiku bumo Shauli akasuka akanjipaye. Takuli icisuma cimbi ica kucita kano ukufyukila+ ku calo ca baPelishiti;+ na Shauli akanaka ukumfwaya mu calo conse ica Israele,+ e fyo nkapusuka mu minwe yakwe.” 2 Awe Davidi aliimine, pamo na bantu abo ali na bo imyanda mutanda (600)+ baile na kuli Akishi+ mwana Maoke, imfumu ya Gati. 3 Na Davidi aikele na Akishi mu Gati, pamo na bantu bakwe, umuntu onse na ba mu ng’anda yakwe,+ Davidi na bakashi bakwe babili, Ahinoamu+ umwina Yesreele na Abigaili+ umwina Karmele uwali umukashi wa kwa Nabali. 4 Mu kuya kwa nshita, cashimikwe kuli Shauli ukuti Davidi nafyukila ku Gati, e ico tabwekeshepo kabili ukumufwaya.+

5 E lyo Davidi atile kuli Akishi: “Nga namuntemwa, lekeni bampeele icifulo mu mushi umo mu mpanga, ukuti e mo njikale; pantu cinshi ico umubomfi wenu ekalile mu musumba wa mfumu pamo na imwe?” 6 Awe Akishi amupeele Siklagi muli bulya bushiku. E co Siklagi+ abela ku shamfumu sha kwa Yuda ukufika na lelo.

7 Inshiku Davidi aikele mu mpanga ya baPelishiti shali umwaka umo ne myeshi ine.+ 8 Kabili Davidi na bantu bakwe balimine ukuti bayesansa abena Geshuri+ na bena Gisiri na bena Amaleke,+ pantu baleikala mu calo ukutula ku Telamu+ ukuya ku Shuri,+ no kufika ku calo ca Egupti. 9 Na Davidi aipeye aba mu calo, lelo talekele umwaume nelyo umwanakashi ukushala uwa mweo;+ kabili asendele impaanga ne ng’ombe ne mpunda ne ngamila ne fya kufwala, e lyo abwelele no kufika kuli Akishi. 10 E lyo Akishi atile: “Ni kwi mwasansa buno bushiku?” Na o Davidi atile:+ “Ku kapinda ka ku kulyo aka Yuda+ na ku kapinda ka ku kulyo aka bena Yeraameele+ na ku kapinda ka ku kulyo aka bena Keni.”+ 11 Kabili Davidi taleleka umwaume nelyo umwanakashi ukushala uwa mweo pa kuti abasende ku Gati, ico aleti: “Pa kuti betusoselela, abati, ‘E fyo Davidi acitile.’”+ (Kabili ifi e fyo alecita inshiku shonse isho aikele mu mpanga ya baPelishiti.)12 Na o Akishi atetekele+ Davidi, ati: “Balimupata nga nshi ku bantu bakwe abena Israele;+ kabili akaba umubomfi wandi umuyayaya.”

28 Nomba muli shilya nshiku abaPelishiti batampile ukulonganya abashilika babo ukuti balwe na Israele.+ E lyo Akishi atile kuli Davidi: “Nawishiba ukuti ufwile ukuya na ine ku nkondo, pamo na bantu bobe.”+ 2 Na o Davidi atile kuli Akishi: “Mwalishiba ico umubomfi wenu ali no kucita.” E lyo Akishi atile kuli Davidi: “E co ndekubikila ukuba uwa kulinda umweo wandi inshiku shonse.”+

3 Nomba Samwele alifwile, na bena Israele bonse balimulooseshe no kumushiika mu Rama, mu musumba wakwe.+ Ninshi Shauli alifumishe mu calo abaleumfwana ne mipashi na baishibishe ukusobela ifyali no kucitika.+

4 Awe abaPelishiti balongene capamo no kupanga inkambi mu Shunemu.+ Na o Shauli alongenye abena Israele bonse no kupanga inkambi mu Gilboa.+ 5 Ilyo Shauli amwene abashilika ba baPelishiti alitiinine, no mutima wakwe walitutwime nga nshi.+ 6 Nangu Shauli aipwishe kuli Yehova,+ Yehova tamwaswike,+ nangu ni mu filoto+ atemwa muli Urimu+ nelyo ni muli bakasesema.+ 7 E lyo Shauli aebele ababomfi bakwe ati: “Mfwaileni umwanakashi uumfwana ne mipashi,+ nalayako ku kumwipusha.” E lyo ababomfi bakwe bamwebele ati: “Moneni! Kwaba umwanakashi wa mipashi mu En-dore.”+

8 Awe Shauli ali-ifungushenye+ no kufwala ifya kufwala fimbi, aile pamo na bantu babili; bafikile na kuli uyo mwanakashi ubushiku.+ E lyo atile: “Mbukilako+ ku mipashi kabili unjimishe no muntu uo ndekweba.” 9 Lelo umwanakashi atile: “Mona, walishiba ifyo Shauli acitile, ifyo alofeshe mu calo abaleumfwana ne mipashi na baishibishe ukusobela ifyali no kucitika.+ Nga cinshi ico uleteyela umweo wandi mu citeyo pa kuti mfwe?”+ 10 Apo pene Shauli alilapile Yehova ku mwanakashi, ati: “Na pali Yehova,+ tawakapeelwe umulandu pali ici cintu!” 11 E ico umwanakashi atile: “Nani nalakwimisha?” Na o atile: “Unjimishe Samwele.”+ 12 Ilyo umwanakashi amwene “Samwele”*+ alipundile nga nshi; e lyo umwanakashi atile kuli Shauli: “Cinshi wambepela? Kanshi ni we Shauli!” 13 Lelo imfumu yatile: “Witiina, cinshi wamona?” Umwanakashi atile kuli Shauli: “Ndemona lesa+ alefuma mu mushili.” 14 Apo pene amwipwishe ati: “Alemoneka shani?” na o atile: “Mukote e uleima, kabili nafimbana ica kufwala cabula amaboko.”+ Awe Shauli aishibe ukuti ni “Samwele,”+ kabili akonteme pa nshi no kutoota.

15 E lyo “Samwele” atile kuli Shauli: “Cinshi ico wansunkanishisha no kunjimya?”+ Na Shauli atile: “Ndi mu bwafya ubukalamba,+ pantu abaPelishiti balelwa na ine, e lyo Lesa alifuma+ kuli ine kabili alileka ukunjasuka, nangu ni muli bakasesema, nangu ni mu filoto;+ e co namwitila pa kuti njishibe ico nalacita.”+

16 Na “Samwele” atile: “Nga cinshi uleipushisha ine ilyo Yehova alifuma kuli iwe+ no kuba umulwani obe?+ 17 Kabili Yehova akacita nge fyo asoseele muli ine, kabili Yehova akafumpula ubufumu ukufuma mu minwe yobe+ no kubupeela ku munobe Davidi.+ 18 Apo tawaumfwilile ishiwi lya kwa Yehova,+ kabili tawacitile kuli Amaleke ukulingana no bukali bwakwe ubupya ngo mulilo,+ e co Yehova alecitila ici cintu kuli iwe ubwa lelo. 19 Kabili Yehova ali no kupeela Israele na iwe wine mu minwe ya baPelishiti,+ kabili mailo iwe+ na bana bobe abaume+ mukaba na ine. Na bashilika ba kwa Israele Yehova akabapeela mu minwe ya baPelishiti.”+

20 Bwangu bwangu Shauli awile pa nshi no kulambalala kabili alitiinine nga nshi pa mashiwi ya kwa “Samwele.” Kabili amaka yalipwile, pantu taliile ifya kulya akasuba konse no bushiku bonse. 21 Umwanakashi nomba aishile kuli Shauli no kumona ukuti nasakamana sana. E ico amwebele ati: “Moneni umubomfi wenu naumfwila ishiwi lyenu, kabili naci-itwala mu busanso+ no kumfwila amashiwi ayo musosele kuli ine. 22 Nomba shi umfweni na imwe kwi shiwi lya mubomfi wenu; kabili lekeni nteke ku cinso cenu akamokolwa ka mukate, mulye, pa kuti mube na maka, pantu mwalabwelelamo.” 23 Lelo alikeene no kutila: “Nshalye iyo.” Lelo, ababomfi bakwe no mwanakashi balimupatikishe. Asukile aumfwa ku mashiwi yabo, aimine pa nshi no kwikala pa ca kusendamapo. 24 Nomba umwanakashi alikwete umwana wa ng’ombe uwaina+ mu ng’anda. E ico ayangufyenye ukumwipaya,*+ abuulile no buunga, akasa no kupangamo utumikate utushatutumuka. 25 E lyo apeele Shauli na babomfi bakwe, na bo baliliile. E lyo baimine balaya ubushiku bulya.+

29 AbaPelishiti+ balongenye abashilika babo bonse ku Afeke, na bena Israele bapangile inkambi pa kamfukumfuku ka mu Yesreele.+ 2 Na bakateka ba baPelishiti+ balepita imyanda ne myanda, na makana na makana, kabili Davidi na bantu bakwe balikonkelepo balepita pamo na Akishi.+ 3 E lyo bacilolo ba baPelishiti batile: “Nga ba abaHebere+ ba nshi wasenda?” Na o Akishi atile kuli bacilolo ba baPelishiti: “Bushe uyu te Davidi umubomfi wa kwa Shauli imfumu ya Israele, uwaikala na ine pa mwaka umo napamo ibili,+ kabili nshasanga+ kantu muli ena ukutula pa bushiku afulumukile kuli ine mpaka na lelo?” 4 Na bacilolo ba baPelishiti balimukalipile; kabili bacilolo ba baPelishiti bamwebele ati: “Tamfya uyu muntu,+ leka abwelele ku cifulo wamupeela; kabili wileka atukonke ku bulwi, epali aya mu kutucincintila+ mu bulwi. Kabili ni kuli cinshi engayalenga shikulu wakwe ukumutemwa? Bushe te ku mitwe ya bantu besu? 5 Bushe uyu te Davidi uo balecindila abati, ‘Shauli aipaya abalwani amakana, na Davidi aipaya abalwani amakana amakumi’?”+

6 E ico Akishi+ aitile Davidi no kumweba ati: “Na pali Yehova,+ uli mulungami, kabili nintemwa sana ukuti naunkonka+ ukwisalwa ubu bulwi;+ pantu nshasanga ububi muli iwe ukutula pa bushiku waishile kuli ine mpaka na lelo.+ Lelo mu menso ya bakateka tauli musuma.+ 7 Nomba bwelelamo kabili uye umutende, ukuti wicita icibi mu menso ya bakateka ba baPelishiti.” 8 Lelo Davidi aipwishe Akishi ati: “Nga cinshi ncitile,+ kabili cinshi mwasanga mu mubomfi wenu ukufuma pa bushiku naishile kuli imwe mpaka na lelo,+ ica kuti nshilingile no kukonka ku kulwisha abalwani ba kwa shikulu imfumu?” 9 Na o Akishi ayaswike Davidi ati: “Ninjishiba ukuti uli musuma mu menso yandi, kwati ni malaika wa kwa Lesa.+ Ni co fye bakateka ba baPelishiti e batile, ‘Tafwile ukutukonka mu bulwi iyo.’ 10 E ico ucelele ulucelo na babomfi ba kwa sokulu abaishile na iwe; mucelele ulucelo ilyo kwalabuuta. E lyo muleya.”+

11 Awe Davidi alicelele ulucelo,+ pamo na bantu bakwe, ukuti abwelele ku calo ca baPelishiti; na baPelishiti baile ku Yesreele.+

30 Nomba ilyo Davidi na bantu bakwe bafikile ku Siklagi+ pa bushiku bwalenga shitatu, basangile abena Amaleke+ balisansa Negebu na Siklagi; kabili basanshile umusumba wa Siklagi no kuoca ku mulilo, 2 kabili basendele muli bunkole abanakashi+ na bonse abalimo, ukufuma pa munono ukufika ku mukalamba. Tabaipeyepo nangu umo, lelo balibasendele bonse no kuya. 3 Ilyo Davidi na bantu bakwe bafikile mu musumba, moneni, nabaoca ku mulilo, kumfwa abakashi babo na bana babo abaume na bana babo abanakashi, balibasendele bunkole. 4 E lyo Davidi na bantu abali nankwe basanswile amashiwi yabo, balalila,+ mpaka amaka ya kulila yapwa. 5 Na bakashi ba kwa Davidi babili, Ahinoamu+ umwina Yesreele, na Abigaili+ uwali umukashi wa kwa Nabali umwina Karmele na bo balibasendele bunkole. 6 Kabili ici cacushishe Davidi+ nga nshi, pantu abantu basosele ukuti bali no kumupoola amabwe;+ pantu imitima ya bantu bonse yalikalipe,+ cila muntu pa bana bakwe abaume na bana bakwe abanakashi. E ico Davidi alombele amaka ukufuma kuli Yehova Lesa wakwe.+

7 E ico Davidi atile kuli Abiatari+ shimapepo, mwana Ahimeleke ati: “Palamika efode+ kuli ine.” Na o Abiatari apalamike efode kuli Davidi. 8 Na Davidi aipwishe kuli Yehova+ ati: “Bushe nkonke ifi fipondo? Bushe ndefisanga?” Na o amwaswike+ ati: “Bakonke, pantu walabasanga, kabili walapokolola ifyo basendele.”+

9 Ilyo line Davidi alimine, pamo na bantu imyanda mutanda (600)+ abali nankwe, bafikile na ku mumana wa Besore, na bali no kushala e ko bashele. 10 Davidi ena alikonkenyepo ukubakonka,+ pamo na bantu imyanda ine (400), lelo abantu imyanda ibili (200) abanakile nga nshi ica kuti bafililwe ukwabuka umumana wa Besore,+ balishele.

11 E lyo basangile umuntu, umwina Egupti+ mu mpanga. Bamutwele kuli Davidi no kumupeela ifya kulya na menshi ya kunwa. 12 Bamupeele ne ciputusha ca cimamantwa ca makunyu ne fimamantwa fibili ifya myangashi ya kukanika.+ Ilyo aliile alipuupuutwike;+ pantu taliile ifya kulya nelyo ukunwa amenshi pa nshiku shitatu akasuba no bushiku. 13 E lyo Davidi amwipwishe ati: “Uli wa kwa nani, kabili uli wa kwi?” na o atile: “Ndi mubomfi umwina Egupti, umusha wa mwina Amaleke, lelo shikulu alinshile, pantu nalilwele pa nshiku shitatu ishapita.+ 14 Ni fwe twasanshile incende ya ku kapinda ka ku kulyo aka bena Kerete+ ne calo ca kwa Yuda na ku kapinda ka ku kulyo aka kwa Kalebu;+ na Siklagi twaocele ku mulilo.” 15 E lyo Davidi amwipwishe ati: “Bushe kuti wantungulula kuli ili bumba?” Na o atile: “Lapeni+ Lesa kuli ine ukuti tamwanjipaye, no kuti tamwampeele mu minwe ya kwa shikulu,+ ninshi nalamutungulula kuli ili bumba.”

16 Awe alimutungulwile,+ kabili moneni, nabailekelesha mpanga yonse balelya no kunwa balesefya+ pa fintu fyonse bapokolwele mu calo ca baPelishiti ne calo ca kwa Yuda.+ 17 Davidi alibakomene ukufuma ku macaca mpaka icungulo, ukuti abepaye; kabili takwali nangu umo uwapuswike+ kano fye abalumendo imyanda ine (400) abaninine pa ngamila no kufulumuka. 18 Kabili Davidi apokolwele fyonse ifyo abena Amaleke basendele,+ na bakashi bakwe babili Davidi alipokolwele. 19 Takwali uwashelepo nangu umo, ukufuma pa munono ukufika ku mukalamba na bana baume na bana banakashi nangu fipe ifyo babapokele, ne fintu fyonse ifyo basendele.+ Fyonse fye Davidi alibweseshe. 20 Awe Davidi abuulile impaanga shonse ne ng’ombe shonse, ifyo balekumba pa ntanshi ya fitekwa fimbi. E lyo batile: “Ifi e fipe ifyo Davidi apokolwele.”+

21 E lyo Davidi afikile ku bantu imyanda ibili (200)+ abanakile bafilwa no kukonka Davidi, abo batekele ku mumana wa Besore; kabili bafumine ku kusengela Davidi no kusengela abantu bali nankwe. Ilyo Davidi apaleme ku bantu, atampile ukubepusha ifyo bali. 22 Lelo, bonse ababi kabili ifinangwa fya bantu+ abaile na Davidi bayaswike no kutila: “Pa mulandu wa kuti aba tabaile na ifwe, tatwabapeelepo ifipe ifyo tupokolwele, cila muntu alasenda fye umukashi wakwe na bana bakwe, e bo balasenda baleya no kuya.” 23 Lelo Davidi atile: “Mwicita ifyo bamunyinane ku fintu Yehova atupeele,+ apo natucingilila+ no kupeela mu minwe yesu ibumba lyaishiletusansa.+ 24 Kabili nani walaumfwa ifyo mulelanda? Pantu ifyalapeelwa ku waile ku kulwa, e fyalapeelwa na ku waikele alelinda ifipe.+ Bonse balepeelwako.”+ 25 Nomba ukufuma bulya bwine bushiku ukuya ku ntanshi, ifyo Davidi alandile fyasangwike e cipope kabili ubupingushi+ mu Israele ukufika na buno bushiku.

26 Ilyo Davidi afikile ku Siklagi, abuulile ifipe fimo ifyo apokolwele no kutumina abakalamba ba mu Yuda, abanankwe,+ no kubeba ati: “Namutumina ubupe*+ ukufuma pa fyo twapokolwele ku balwani ba kwa Yehova.” 27 Ku ba mu Betele,+ na ba mu Ramote+ mu Negebu, na ku ba mu Yatiri,+ 28 na ku ba mu Aroere, na ku ba mu Shifmote, na ku ba mu Eshtemoa,+ 29 na ku ba mu Rakali, na ku ba mu misumba ya bena Yeraameele,+ na ba mu misumba ya bena Keni,+ 30 na ku ba mu Horma,+ na ku ba mu Borashani,+ na ku ba mu Ataki, 31 na ku ba mu Hebrone,+ na mu fifulo fyonse umo Davidi aendawike, pamo na bantu bakwe.

31 Nomba abaPelishiti balelwa na bena Israele,+ na bena Israele bafulumwike abaPelishiti, kabili baile balebepaya+ mu Lupili lwa Gilboa.+ 2 Kabili abaPelishiti bali mupepi nga nshi na Shauli na bana bakwe; awe abaPelishiti basukile baipaya Yonatani+ na Abinadabu+ na Malkishua,+ abana baume ba kwa Shauli. 3 Awe ubulwi bwakoseele Shauli, abalepoosa imifwi basukile bamusanga, kabili abalelasa imifwi balimucenene icabipisha.+ 4 E lyo Shauli aebele uwalesenda ifyanso fyakwe ati: “Somona ulupanga+ lobe no kundasa, pa kuti aba bantu bashasembululwa+ beisandasamo ulupanga no kunsaalula.” Lelo uwalemusendela ifyanso alikene,+ pantu ali no mwenso nga nshi. E ico Shauli abuulile ulupanga no kuwilapo.+ 5 Ilyo uwalesenda ifyanso fyakwe amwene ukuti Shauli afwa,+ e lyo na o awilile pa lupanga lwakwe no kufwila pamo nankwe.+ 6 E fyo Shauli na bana bakwe abaume batatu, no walesenda ifyanso fyakwe, na bantu bakwe bonse, bafwile muli bulya bushiku.+ 7 Ilyo abena Israele abali mu citungu ca mwi lungu na bali mu citungu ca Yordani bamwene ukuti abena Israele bafulumuka, no kuti Shauli na bana bakwe abaume nabafwa, e lyo batendeke ukufuma mu misumba no kufulumuka,+ na pa numa abaPelishiti balishile no kutendeka ukwikalamo.+

8 Nomba ubushiku bwakonkelepo, ilyo abaPelishiti baishile mu kusenda ifya bantu abo baipeye,+ basangile Shauli na bana bakwe abaume batatu nabafwa mu Lupili lwa Gilboa.+ 9 E lyo bamuputwile umutwe+ no kumufuula ifya kufwala fyakwe ifya bulwi, batumine ne mbila mu calo conse ica baPelishiti pa kuti beshibishe+ amayanda ya tulubi+ twabo na bantu. 10 Awe basukile babika ifya kufwala fyakwe ifya bulwi+ mu ng’anda ya baAstarte,+ ne citumbi cakwe bapoopele pa cibumba ca Bete-shani.+ 11 Na bena Yabeshe-gileadi+ balyumfwile ico abaPelishiti bacitile kuli Shauli. 12 Ilyo line abaume bonse aba maka baliimine kabili baendele ubushiku bonse, bafumishe ne citumbi ca kwa Shauli ne fitumbi fya bana bakwe abaume ku cibumba ca Bete-shani no kubwelelamo ku Yabeshe e ko bailefyocela.+ 13 E lyo babuulile amafupa+ yabo no kuyashiika+ mwi samba lya muti wa mutamariski+ mu Yabeshe, e lyo balekele ukulya pa nshiku cinelubali (7).+