Ibuuku lya Ntanshi Ilya Ishamfumu

1 Awe Imfumu Davidi yalikotele,+ yali ne myaka iingi; kabili baleifimba ifya kufimbana, lelo tayaleumfwa ukukaba. 2 E ico ababomfi ba iko bayebele ati: “Mwe shikulu, mwe mfumu yandi, lekeni bamufwaile umukashana, nacisungu,+ kabili alebombela+ imfumu, pa kuti aleisakamana;+ kabili alesendama pa cifuba cenu,+ na shikulu imfumu akomfwa ukukaba.”+ 3 Awe baile mu kufwaya umukashana uwayemba mu calo conse ica Israele, kabili basukile basanga Abishagi+ umwina Shunemu,+ no kumuleta ku mfumu. 4 Kabili umukashana ali uwayemba nga nshi;+ kabili e watendeke ukusakamana imfumu, no kulaibombela imilimo. Lelo imfumu tayakumenepo nankwe ukukumana kwa mu cupo.

5 Awe Adoniya+ mwana Hagiti+ aleituntumba,+ aleti: “Nine nkaba imfumu!”+ Kabili aipangiile iceleta no kufwaya aba pali bakabalwe na baume amakumi yasano (50) aba kubutuka ku ntanshi yakwe.+ 6 Kabili wishi tatalile amukalifya umutima nangu panono. Tatalile amulungika nangu ukumwipusha ati: “Nga cinshi wacitila ifi?”+ E lyo kabili ali uwayemba nga nshi,+ kabili e o nyina akonkeshe pali Abishalomu. 7 Kabili atendeke ukumfwana na Yoabu mwana Seruya na Abiatari+ shimapepo. Na bo balekonka Adoniya+ no kulamwafwa. 8 Lelo Sadoke+ shimapepo na Benaya+ mwana Yehoyada na Natani+ kasesema na Shimei+ na Rei ne mpalume+ sha kwa Davidi, bena tabakonkele+ Adoniya.

9 Awe Adoniya apeele ilambo+ lya mpaanga ne ng’ombe ne nama ishaina mupepi ne libwe lya Sohelete, ilyali mu mbali ya Ene-rogele,+ aitile na bamunyina bonse abana+ ba mfumu na bonse abaume aba muli Yuda abali ababomfi ba mfumu; 10 lelo taitileko Natani kasesema na Benaya ne mpalume na Solomone munyina. 11 E lyo Natani+ aebele Bati-sheba,+ nyina Solomone+ ati: “Bushe taumfwile ukuti Adoniya mwana Hagiti+ nomba e mfumu, kabili shikulu Davidi teshibe? 12 Nomba isa nkupande amano.+ Kabili ipusushe pamo no mwana obe, Solomone.+ 13 Kabiye ku Mfumu Davidi, no kuyeba ati, ‘Bushe te imwe, mwe shikulu mwe mfumu yandi, mwalapile kuli ine ne mubomfi wenu amuti: “Solomone umwana obe e ukampyana no kuba imfumu, kabili e ukekala pa cipuna candi ica bufumu”?+ Nomba cinshi ico Adoniya abela imfumu?’ 14 Mona! Ilyo ucili ulelanda ku mfumu, e lyo na ine nalaingila nkukonke pa numa, kabili nalaisanande ukuti amashiwi ulelanda ya cine.”+

15 Awe Bati-sheba aile ku mfumu mu muputule wa mu kati,+ ninshi imfumu yalikota nga nshi,+ na Abishagi+ umwina Shunemu alesakamana imfumu. 16 E lyo Bati-sheba afukeme no kutoota+ ku mfumu, na yo imfumu e pa kumwipusha ati: “Cinshi ulefwaya?”+ 17 Na o ayaswike ati: “Mwe shikulu,+ ni mwe mwalapile Yehova Lesa wenu ku mubomfi wenu umwanakashi amuti, ‘Solomone umwana obe e ukampyana no kuba imfumu, kabili e ukekala pa cipuna candi ica bufumu.’+ 18 Nomba moneni! Adoniya+ naba imfumu, na imwe mwe shikulu mwe mfumu yandi tamwishibe.+ 19 Kabili napeela ilambo lya ng’ombe ne nama ishaina ne mpaanga ishingi, kabili naita na bana ba mfumu+ bonse na Abiatari+ shimapepo na Yoabu+ umukalamba wa bashilika; lelo tetileko Solomone umubomfi wenu.+ 20 Na imwe, mwe shikulu mwe mfumu yandi, amenso+ ya bena Israele bonse yali pali imwe, ukuti mubeebe uukekala pa cipuna ca bufumu ica kwa shikulu imfumu yandi no kumupyana.+ 21 Kabili ilyo shikulu imfumu akalaala ukwalaala ifikolwe fyakwe,+ ine no mwana wandi Solomone tukaba aba mulandu.”

22 Kabili, moneni! ilyo acili alelanda ne mfumu, Natani kasesema alingiile.+ 23 Awe baebele imfumu, abati: “Moneni, Natani kasesema aisa!” Na o aishile ku cinso ca mfumu, ainama no kuwa pa nshi ku cinso ca mfumu ubukupeme.+ 24 E lyo Natani atile: “Mwe shikulu imfumu, bushe mwatile, ‘Adoniya e ukampyana no kuba imfumu, kabili e ukekala pa cipuna candi ica bufumu’?+ 25 Pantu lelo Adoniya naya ku kwipaya ilambo+ lya ng’ombe ne nama ishaina ne mpaanga ishingi, no kwita abana ba mfumu bonse na bakalamba ba bashilika na Abiatari shimapepo;+ kabili balelya no kunwa pa cinso cakwe, balesosa abati, ‘Kalebalika mwe Mfumu Adoniya!’+ 26 Lelo ine ne mubomfi wenu, ine na Sadoke+ shimapepo na Benaya+ mwana Yehoyada na Solomone umubomfi wenu, tatwitileko.+ 27 Nga ca kuti ici cintu cifumine kuli shikulu, imfumu yandi, ninshi ne mubomfi wenu tamwanjebeleko+ uukekala pa cipuna ca bufumu ica kwa shikulu imfumu yandi no kupyana pali ena.”

28 E lyo Imfumu Davidi ya-aswike aiti: “Njitileni Bati-sheba.”+ Na o aishile ku mfumu, no kwiminina pa ntanshi ya mfumu. 29 Ne mfumu yalapile+ aiti: “Na pali Yehova+ uwapuswishe+ umweo+ wandi mu kucula konse,+ 30 filya fine nalapile Yehova Lesa wa kwa Israele, nati, ‘Solomone, umwana obe e ukampyana no kuba imfumu, kabili e ukekala pa cipuna candi ica bufumu ukukonka pali ine!’ e fyo nalacita lelo.”+ 31 E lyo Bati-sheba akontamine pa nshi no kutoota+ ku mfumu no kutila: “Mwe shikulu mwe Mfumu yandi, Davidi kalebalika umuyayaya!”+

32 E lyo Imfumu Davidi yatile: “Njitileni Sadoke+ shimapepo na Natani kasesema na Benaya mwana+ Yehoyada.” Na bo baishile ku mfumu. 33 Ne mfumu yatile: “Sendeni ababomfi+ ba kwa shikulwinwe e bo muye na bo, kabili muninike Solomone umwana wandi pa mfalashi yandi,+ mumutwale na ku Gihone.+ 34 Kabili kulya Sadoke shimapepo na Natani kasesema bamusube+ ukuba imfumu ya Israele; kabili mulishe intandala+ no kutila, ‘Kalebalika mwe Mfumu Solomone!’+ 35 Kabili mulemukonka pa numa, na o ese engile no kwikala pa cipuna candi ica bufumu; kabili e ukampyana no kuba imfumu, kabili e o nkasonta ukuba intungulushi ya kwa Israele na Yuda.” 36 Awe Benaya mwana Yehoyada ayaswike imfumu no kutila: “Ameni!+ Yehova Lesa wa kwa shikulu imfumu acite ifi fine.+ 37 Filya fine Yehova ali na shikulu imfumu,+ e fyo abe na Solomone,+ no kulenga icipuna cakwe ica bufumu ukuba icikalamba+ ukucila icipuna ca bufumu ica kwa shikulu Imfumu Davidi.”

38 Kabili Sadoke+ shimapepo na Natani+ kasesema na Benaya+ mwana Yehoyada na bena Kerete+ na bena Pelete+ baile no kuninika Solomone pa mfalashi ya Mfumu Davidi,+ no kumuleta ku Gihone.+ 39 Na Sadoke shimapepo abuulile ulusengo lwa mafuta+ ukufuma mwi tenti+ no kusuba+ Solomone; kabili batendeke ukulisha intandala, na bantu bonse babilikishe abati: “Kalebalika mwe Mfumu Solomone!”+ 40 E lyo abantu bonse balamukonka pa numa, na bantu balelisha ifimpeeta+ no kusekelela nga nshi,+ ica kuti icongo balepanga capene cilepule isonde.+

41 Awe Adoniya na bonse abaitilwe abali nankwe baumfwile icongo, ninshi bena nabapwisha ukulya.+ Ilyo Yoabu aumfwile ukulila kwa ntandala, asosele ati: “Nge co congo+ icili mu musumba calola mwi?” 42 Ilyo acili alelanda, moneni Yonatani+ mwana Abiatari shimapepo alishile. Na Adoniya atile: “Ingila, pantu iwe uli mwaume uwa cishinka, uleta imbila nsuma.”+ 43 Lelo Yonatani ayaswike Adoniya ati: “Iyo! Shikulwifwe imfumu Davidi nasonta Solomone ukuba imfumu.+ 44 Kabili imfumu yaceba Sadoke shimapepo na Natani kasesema na Benaya mwana Yehoyada na bena Kerete na bena Pelete ukuya na Solomone, kabili bacimuninika pa mfalashi ya mfumu.+ 45 Kabili Sadoke shimapepo na Natani kasesema bacimusubila mu Gihone ukuba imfumu;+ e lyo bacibwelako ninshi balesekelela, kabili mu musumba mukabile na se. E cilya icongo mumfwile.+ 46 Kabili Solomone naikala na pa cipuna ca bufumu.+ 47 Na babomfi ba mfumu nabaya ku kupaala shikulu Imfumu Davidi, abati, ‘Lesa wenu nacite ishina lya kwa Solomone ukuba ilyayemba ukucila ishina lyenu, kabili nacite icipuna cakwe ica bufumu ukuba icikalamba ukucila icipuna cenu ica bufumu!’+ E lyo nomba imfumu yacikontama pa busanshi bwa iko.+ 48 Kabili ifi e fyo imfumu yacisosa, aiti, ‘Nacindikwe+ Yehova Lesa wa kwa Israele, uupeele ubushiku bwa lelo uwa kwikala pa cipuna candi ica bufumu, na menso yandi yaimwena!’”+

49 Awe bonse abaitilwe abali na Adoniya balatutuma fye, bonse e pa kwima basalangana fye umo umo.+ 50 Kabili Adoniya alitiinine pa mulandu wa kwa Solomone. E ico alimine no kuyaikata ku nsengo sha ku ciipailo.+ 51 Awe amashiwi yalifikile kuli Solomone, aya kuti: “Moneni Adoniya aletiina Imfumu Solomone; kabili naikata ku nsengo sha ku ciipailo, aleti, ‘Lekeni Imfumu Solomone ilape kuli ine intanshi ukuti tayanjipaye ne mubomfi wa iko ku lupanga.’” 52 Na o Solomone atile: “Nga ni mpalume, tapabe umushishi+ wakwe nangu umo uuleponena pa nshi; nomba icabipa nga casangwa muli ena,+ ninshi alefwa.”+ 53 E ico Solomone atumine aba kumufumya pa ciipailo, kabili balimuletele. Na o alishile no kukontama ku Mfumu Solomone. E lyo Solomone amwebele ati: “Kabiye ku mobe.”+

2 Nomba inshita yalipaleme iya kuti Davidi afwe;+ kabili aebele umwana wakwe Solomone ati: 2 “Ine ndeya ku nshiishi ukuya aba pano isonde bonse,+ e ico ukose+ kabili ube ngo mwaume.+ 3 Kabili uleumfwila Yehova Lesa obe pa kwenda mu nshila shakwe,+ ukusunga ifipope fyakwe na mafunde yakwe no bupingushi bwakwe+ ne fya kushimika fyakwe, ukulingana ne fyalembwa mu mafunde ya kwa Mose,+ pa kuti ube uwa mano muli fyonse ifyo ulecita na konse uko waya; 4 pa kuti Yehova akafikilishe amashiwi ayo asosele pali ine,+ ukutila ‘Nga ca kuti abana bobe+ bakaba ne mibele iisuma pa kuba+ aba cishinka+ kuli ine umutima+ wabo onse no mweo wabo onse, takwakabulwe umuntu obe uwa kwikala pa cipuna ca bufumu ica kwa Israele.’+

5 “Kabili iwe walishiba ifyo Yoabu mwana Seruya acitile kuli ine,+ pa kucita filya ku bakalamba ba bashilika ba kwa Israele, Abnere+ mwana Nere na Amasa+ mwana Yetere,+ ilyo abepeye no kusuumya umulopa+ wa mu nkondo mu nshita ya mutende no kushinga umulopa wa mu nkondo ku mushipi wakwe uwa mu musana na ku ndyato shakwe ishali ku makasa yakwe. 6 Kabili ukacite ukulingana na mano+ yobe, kabili wikaleka imfwi shakwe shikaye ku Nshiishi*+ mu mutende.+

7 “Kabili ukabe ne cikuuku ku bana ba kwa Barsilai+ umwina Gileadi, kabili bakabe pa bakalalya pe tebulo lyobe;+ pantu e fyo na bo bapalamine+ kuli ine ilyo nabutwike ku cinso ca kwa munonko Abishalomu.+

8 “Kabili, mona, uli na Shimei+ mwana Gera umwina Benjamini uwa ku Bahurimu,+ kabili e wantiipile icabipisha+ pa bushiku naleya ku Mahanaimu;+ kabili e waishile ku kunkumanya pa Yordani,+ ica kuti nalapile Yehova, nati, ‘Nshakwipaye ku lupanga.’+ 9 E ico wikamuleka fye ukwabula ukumukanda,+ pantu uli muntu uwa mano,+ nawishiba ifyo ukamucita, kabili ukatwale imfwi+ shakwe mu mulopa ku Nshiishi.”*+

10 E lyo Davidi alele ukwalele ifikolwe fyakwe+ kabili ashiikilwe mu Musumba wa kwa Davidi.+ 11 Ne myaka Davidi atekele Israele yali amakumi yane (40).+ Mu Hebrone+ atekelemo imyaka cinelubali (7),+ e lyo mu Yerusalemu atekelemo imyaka amakumi yatatu na itatu (33).+

12 Kabili Solomone aikele pa cipuna ca bufumu ica kwa Davidi wishi;+ no bufumu bwakwe bwalikosele icine cine.+

13 Awe Adoniya mwana Hagiti aishile kuli Bati-sheba,+ nyina Solomone. Na o atile: “Bushe ukwisa kobe kwa mutende?”+ na o asosele ati: “Kwa mutende.” 14 Kabili atile: “Pali ico ndefwaya ukumweba.” Na o atile: “Landa.”+ 15 Kabili akonkenyepo ati: “Mwalishiba ukuti ubufumu bwali no kuba bwandi, kabili ni kuli ine abena Israele bonse balelolesha amenso ukuti nkabe imfumu;+ lelo ubufumu bwalyalwike bwaisaba ubwa kwa munyinane, pantu Yehova e wafwaile ukuti bube bwakwe.+ 16 Nomba pali cimo ico ndelomba kuli imwe. Mwinkaanina.”+ E lyo amwebele ati: “Landa.” 17 Na o atile: “Napapaata ebeni imfumu Solomone (pantu tamukaanine) ampeele Abishagi+ umwina Shunemu+ ukuti abe umukashi wandi.” 18 Na o Bati-sheba atile: “Cisuma! Nalayakulandilako ku mfumu.”

19 Awe Bati-sheba aile ku mfumu Solomone ku kulandilako Adoniya.+ Imfumu yalimine+ ukuti imusengele kabili yalimukontamine.+ Kabili yaikele pa cipuna ca iko ica bufumu, yatekele ne cipuna ca bufumu ica kwa nyina wa mfumu ukuti ekale ku kwa kulyo kwa iko.+ 20 E lyo atile: “Pali akantu kamo ako ndelomba kuli iwe. Winkaanina.” Ne mfumu yamwebele ati: “Lombeni, mayo; pantu nshamukaanine.” 21 Na o atile: “Leka Abishagi umwina Shunemu apeelwe kuli Adoniya munonko ukuti abe umukashi wakwe.” 22 E lyo imfumu Solomone ya-aswike nyina aiti: “Nga cinshi mulelombela Abishagi umwina Shunemu ukuti abe umukashi wa kwa Adoniya? Kanshi mulombeleni no bufumu+ (pantu e mukalamba pali ine).+ Mulombeleni na Abiatari+ shimapepo na Yoabu+ mwana Seruya.”+

23 E ico Imfumu Solomone yalapile Yehova, aiti: “Lesa ankande, kabili alundenapo,+ nga Adoniya tailetelele fye umwine pa kusosa aya mashiwi.+ 24 Kabili ndelapa na pali Yehova+ uwampampamike+ no kundeka njikale pa cipuna ca bufumu ica kwa Davidi tata+ kabili uwampangiile ing’anda+ ifyo asosele,+ ndeti buno bushiku Adoniya alefwa.”+ 25 Apo pene Imfumu Solomone yatumine amashiwi muli Benaya+ mwana Yehoyada; kabili alimusangile no kumwipaya.+

26 E lyo imfumu yaebele Abiatari+ shimapepo ati: “Kabiye ku Anatote+ ku mpanga yobe! Pantu ufwile ukufwa;+ lelo nshakwipaye buno bushiku, pa mulandu wa kuti wasendele icipao ca kwa Shikulu Mulopwe Yehova+ ku cinso ca kwa Davidi tata,+ kabili pantu waliculile pa nshita yonse iyo tata na o alecula.”+ 27 E ico Solomone atamfishe Abiatari pali bushimapepo bwa kwa Yehova, pa kuti amashiwi yafikilishiwe ayo asosele pa ng’anda ya kwa Eli+ mu Shilo.+

28 Awe ili lyashi lyasukile lyafika na kuli Yoabu+—pantu Yoabu akonkele Adoniya+ nangu ca kuti takonkele+ Abishalomu. Kabili Yoabu afulumukile kwi tenti+ lya kwa Yehova, no kwikata ku nsengo sha ku ciipailo.+ 29 E lyo baebele Imfumu Solomone ati: “Yoabu nafulumukila mwi tenti lya kwa Yehova, kabili ali ku mbali ya ciipailo.” E ico Solomone atumine Benaya mwana Yehoyada, no kutila: “Kabiye, kamwipaye!”+ 30 Awe Benaya aile mwi tenti lya kwa Yehova no kumweba ati: “E fyo imfumu yatila, “Fuma muno!” Lelo atile: “Iyo! Pantu ni muno+ mwine ndefwila.” Na o Benaya atwele amashiwi ku mfumu, ati: “Ifi e fyo Yoabu asosa, kabili ifi e fyo anjasuka.” 31 Ne mfumu yamwebele ati: “Cite fyo umwine alanda, kamwipaye; kabili umushiike no kufumya pali ine na pa ba mu ng’anda ya kwa tata umulopa+ uo Yoabu asuumishe apabula umulandu.+ 32 Kabili Yehova akaleta umulopa wakwe pa mutwe wakwe,+ pantu aipeye abaume babili abalungama kabili abasuma ukumucila,+ kabili abepeye ku lupanga, ninshi Davidi tata taishibe,+ na bo aipeye ni Abnere+ mwana Nere umukalamba wa bashilika ba kwa Israele+ na Amasa+ mwana Yetere umukalamba wa bashilika ba kwa Yuda.+ 33 No mulopa wabo ukabwelela pa mutwe wa kwa Yoabu na pa mitwe ya bana bakwe umuyayaya;+ lelo kuli Davidi+ na ku bana bakwe na ku ba mu ng’anda yakwe na ku cipuna cakwe ica bufumu kukaba umutende umuyayaya ukufuma kuli Yehova.”+ 34 E lyo Benaya mwana Yehoyada aile+ kumusanga no kumwipaya;+ kabili ashiikilwe pa ng’anda yakwe mu matololo. 35 Kabili imfumu yasontele Benaya+ mwana Yehoyada ukuba umukalamba wa bashilika ukupyana Yoabu;+ kabili imfumu yasontele Sadoke pali bushimapepo ukupyana Abiatari.+

36 E lyo imfumu yatumine aba kuyaita Shimei,+ kabili yamwebele aiti: “Ukuule ing’anda yobe mu Yerusalemu, e mo uleikala, kabili wilafumamo ukuya ukuli konse. 37 Kabili ubushiku ukafumamo no kupita ukucila pa mumana wa Kidrone,+ wishibe ukuti ukufwa ukafwa.+ Umulopa obe ukaba pa mutwe obe.”+ 38 Na o Shimei atile ku mfumu: “Aya mashiwi mwalanda yasuma. Ifyo shikulu imfumu asosa e fyo umubomfi wenu akacita.” Kabili Shimei aikele inshiku ishingi mu Yerusalemu.

39 Nomba ilyo papitile imyaka itatu, abasha+ ba kwa Shimei babili babutukile kuli Akishi+ mwana Maaka imfumu ya ku Gati.+ Kabili abantu balishile no kweba Shimei abati: “Mona! Abasha bobe bali ku Gati.” 40 Awe apo pene Shimei alimine no kunina pa mpunda yakwe no kuya ku Gati kuli Akishi ku kufwaya abasha bakwe. E ico Shimei aliile no kuyabwesha abasha bakwe ukufuma ku Gati. 41 Kabili baebele Solomone ati: “Shimei acifuma mu Yerusalemu aya ku Gati, kabili nabwela.” 42 E lyo imfumu yatumine aba kuyaita+ Shimei, kabili yamwebele aiti: “Bushe nshakulengele ukulapa pa kulapa Yehova ukuti nkusoke+ ukuti, ‘Ubushiku ukafuma no kuya uku nangu uku wishibe ukuti ukufwa ukafwa,’ kabili bushe tawanjebele auti, ‘Amashiwi aya naumfwa yawama’?+ 43 Nomba cinshi ico tawasungile umulapo walapile pa ntanshi ya kwa Yehova+ kabili ico ushasungile ifunde ilyo nakupeele?”+ 44 Kabili imfumu yatile kuli Shimei: “Nawishiba ububi ubo wacitile kuli Davidi tata, ububi ubo no mutima obe wishibe bwino;+ kabili Yehova alebwesesha ububi ubo wacitile pa mutwe obe.+ 45 Lelo imfumu Solomone ikapaalwa,+ ne cipuna ca bufumu ica kwa Davidi cikapampamikwa ku cinso ca kwa Yehova umuyayaya.”+ 46 Awe imfumu yaebele Benaya mwana Yehoyada, na o aliile no kumusanga, no kumwipa, kabili alifwile.+

Kabili ubufumu bwalipampamikwe mu minwe ya kwa Solomone.+

3 Kabili Solomone apangene icipangano ca cupo+ na Farao imfumu ya ku Egupti, kabili abuulile umwana umwanakashi uwa kwa Farao+ no kumuleta ku Musumba wa kwa Davidi,+ mpaka ilyo apwishishe ukukuula ing’anda yakwe+ ne ng’anda ya kwa Yehova+ ne linga lya Yerusalemu ukushinguluka konse.+ 2 Lelo abantu balepeelela amalambo pa fifulo fya kupepelapo,+ pantu ukufika na mu nshiku shilya, bali tabalakuulila ishina lya kwa Yehova ing’anda.+ 3 Kabili Solomone atwalilile ukutemwa+ Yehova pa kwenda mu fipope fya kwa Davidi wishi.+ Lelo ni pa fifulo fya kupepelapo+ e po alepeelela amalambo no kuyafutumuna.

4 Awe imfumu yaile ku Gibeone+ pa kuti ipeele amalambo kulya, pantu e kwali icifulo ca kupepelapo icikalamba.+ Kabili Solomone apeele amalambo ya koca ikana limo (1,000) pa ciipailo.+ 5 Mu Gibeone Yehova amoneke+ kuli Solomone mu ciloto+ ubushiku; kabili Lesa atile: “Lomba ifyo ulefwaya nkupeele.”+ 6 Na o Solomone atile: “Imwe mwaliba ne cikuuku nga nshi+ ku mubomfi wenu Davidi tata ukulingana ne fyo aendele na imwe mu cishinka na mu bulungami+ na mu kutambalala kwa mutima; kabili mwatwalilile ukuba ne cikuuku ici icikalamba, ica kuti mwamupeele umwana uwa kwikala pa cipuna cakwe ica bufumu fino cili buno bushiku.+ 7 Nomba, mwe Yehova Lesa wandi, ni mwe mwasonta umubomfi wenu ukuba imfumu, ukupyana Davidi tata, kabili ine ndi mwaice.+ Nshaishiba ifya kuteka.+ 8 Kabili umubomfi wenu ali mu kati ka bantu benu abo mwasala,+ abantu abafula abashingapendwa ku bwingi.+ 9 E ico mupeele umubomfi wenu umutima wa cumfwila pa kuti alepingula+ abantu benu, na pa kuti aleiluka ubusuma no bubi;+ pantu nani uwingapingula+ aba bantu benu abayafya ifi?”+

10 Awe ici caliweme mu menso ya kwa Yehova, pa mulandu wa kuti Solomone alombele ici cintu.+ 11 Kabili Lesa amwebele ati: “Pantu walomba ici cintu kabili taulombele ukwikala inshiku ishingi nangu ifyuma+ nangu umweo wa balwani bobe, lelo walomba ukuti ube no mucetekanya wa kumfwa imilandu,+ 12 mona! nkacita ukulingana ne fyo walanda.+ Mona! Nkakupeela umutima wa mano kabili uwa mucetekanya,+ ica kuti takwatala akuba uwaba nga iwe, kabili takwakabe uukaba nga iwe na pa numa yobe.+ 13 Kabili ifyo ushilombele na fyo ndekupeela,+ ifyuma+ no bucindami, ica kuti takwakabe uukaba nga iwe, inshiku shobe shonse.+ 14 Kabili nga wakulaenda mu nshila shandi pa kusunga ifipope+ fyandi na mafunde yandi, ifyo na Davidi wiso aendele,+ nkafusha inshiku shobe.”+

15 Ilyo Solomone ashibwike,+ moneni, cali ciloto. E lyo aile ku Yerusalemu no kwiminina ku cipao+ ca cipangano ica kwa Yehova no kupeela amalambo ya koca no mutuulo wa mutende+ kabili apekanishishe ababomfi+ bakwe bonse umutebeto.+

16 Pa nshita ilya, abanakashi babili bacilende+ baishile ku mfumu no kwiminina pa ntanshi ya iko.+ 17 E lyo umwanakashi umo atile: “Mwe shikulu,+ ine no yu mwanakashi twikala ing’anda imo, kabili ilyo napaapile, nali nankwe mu ng’anda. 18 Kabili ilyo papitile inshiku shitatu ukutula apo napaapiile, uyu mwanakashi na o alipaapile. Kabili twali pamo. Tamwali umuntu umbi mu ng’anda, twalimo fye babili. 19 E lyo nomba umwana wa uyu mwanakashi alifwile ubushiku, pantu alimwilikishe. 20 E ico alimine pa kati ka bushiku no kubuula umwana wandi ukumufumya apo nali, ninshi umubomfi wenu ali mu tulo, amubikile na pa cifuba cakwe, no mwana wakwe uwafwa e o abikile pa cifuba candi. 21 Ilyo nashibwike ulucelo ukuti ng’onshe+ umwana wandi, moneni, nafwa. Na ine nalimulolekeshe bwino ulucelo, kabili moneni! te mwana wandi uo napaapile.” 22 Lelo umwanakashi umbi aleti: “Awe, uyu umutuntulu e mwana wandi, no wafwa e mwana obe!” Kabili uyu umwanakashi na o aleti: “Awe, uyu uwafwa e mwana obe, no mutuntulu e mwana wandi.” E fyo balelanda pa cinso ca mfumu.+

23 Awe imfumu yasukile yasosa aiti, ‘Uyu aleti, uyu umutuntulu e mwana wandi, no wafwa e mwana obe!’ no yu aleti, ‘Uyu uwafwa e mwana obe, no mutuntulu e mwana wandi!’” 24 E lyo imfumu yatile:+ “Ndeteleni ulupanga.” Awe baletele ulupanga ku mfumu. 25 Kabili imfumu yatile: “Akanyeni umwana umutuntulu pa kati no kupeela icipimfya cimo kuli umo ne cipimfya cimbi ku munankwe.” 26 E lyo umwanakashi umwine wa mwana umutuntulu aebele imfumu ati (pantu aumfwile ubulanda+ pa mwana wakwe,+ ica kuti atile): “Panono fye mwe shikulu!+ Mupeleni umwana umutuntulu. Mwimwipaya.” Lelo umwanakashi umbi ena aleti: “Tabe umwana wandi nangu umwana obe iyo. Mwakanyeni fye!”+ 27 E lyo imfumu yasosele aiti: “Peni uyu umbi umwana umutuntulu, kabili mwimwipaya. Pantu e nyina.”

28 Awe abena Israele bonse baumfwile imipingwile+ ya mulandu iyo imfumu yapingwile; kabili batendeke ukutiina imfumu,+ pantu bamwene ukuti yali na mano+ ya kwa Lesa aya kupingula umulandu.

4 Kabili Imfumu Solomone yaleteka Israele onse.+ 2 Kabili aba e bali bacilolo+ ba iko: Asaria mwana Sadoke,+ e wali shimapepo; 3 Elihorefe na Ahiya bamwana Shisha, e bali bakalemba;+ Yehoshafati+ mwana Ahiludi, e wali kebukisha; 4 na Benaya+ mwana Yehoyada e wali umukalamba wa bashilika,+ na Sadoke na Abiatari+ e bali bashimapepo; 5 na Asaria mwana Natani+ e waleangalila bacilolo, na Sabudi mwana Natani ali shimapepo, cibusa+ wa mfumu; 6 na Ahishari e waleangalila ing’anda, na Adoniramu+ mwana Abda, e waleangalila abalebomba umulimo wa kupatikishiwa.+

7 Kabili Solomone ali ne nkonkani ikumi na babili (12) pali Israele onse, kabili balepekanishisha imfumu na ba mu ng’anda ya iko ifya kulya. Ne nkonkani imo na imo yalepekanya ifya kulya umweshi umo cila mwaka.+ 8 Kabili aya e mashina yabo: Mwana Huri, mu calo ca mpili ica kwa Efraimu;+ 9 mwana Dekere, mu Makasi na mu Shaalibimu+ na Bete-shemeshe+ na Elone-betehanani; 10 mwana Hesede, mu Arubote (aleangalila Soko ne calo conse ica kwa Hefere);+ 11 mwana Abinadabu, impili shonse isha Dore+ (Tafati, mwana Solomone ali e mukashi wakwe); 12 Baana mwana Ahiludi, mu Taanaki+ na Megido+ na Bete-sheani+ yonse, uwaba mupepi na Saretani+ mwi samba lya Yesreele,+ ukutula ku Bete-sheani ukufika ku Abele-mehola,+ ukufika ku citungu ca Yokemeamu;+ 13 mwana Gebere, mu Ramote-gileadi+ (ali ne mishi ya matenti iya kwa Yairi+ mwana Manase, iyaba mu Gileadi;+ akwete icitungu ca Argobe,+ icaba mu Bashani:+ imisumba ikalamba amakumi mutanda (60) iyali na malinga ne mipindo ya mukuba); 14 Ahinadabu mwana Ido, mu Mahanaimu;+ 15 Ahimaasi, muli Naftali+ (na o aupile Basemati mwana Solomone);+ 16 Baana mwana Hushai, mu Ashere+ na Bealote; 17 Yehoshafati mwana Parua, muli Isakari;+ 18 Shimei+ mwana Ela, muli Benjamini;+ 19 Gebere mwana Uri, mu calo ca Gileadi,+ icalo ca kwa Sihone+ imfumu ya bena Amore,+ ne calo ca kwa Oge+ imfumu ya Bashani,+ kabili kwali inkonkani imo iyaleangalila inkonkani shonse ishali mu calo conse.

20 Abena Yuda na bena Israele bali abengi, kwati mucanga wa mu lulamba lwa bemba ku bwingi,+ kabili balelya no kunwa no kusekelela.+

21 Kabili Solomone aleteka amabufumu yonse ukutula pa Mumana+ ukufika ku calo ca baPelishiti na ku mupaka wa Egupti. Balemuletela ifya bupe kabili balebombela Solomone inshiku shonse isha bumi bwakwe.+

22 Kabili ifya kulya fya kwa Solomone pa bushiku bumo lyonse fyaleba ubuunga ubwapeleka bwino amadalamu*+ amakumi yatatu (30), e lyo no buunga fye bwaleba amadalamu amakumi mutanda (60), 23 ing’ombe ishaina ikumi (10), ing’ombe ishalelya umulemfwe shaleba amakumi yabili (20), impaanga umwanda umo (100), ne nsebula+ ne mpombo+ na basele ne fyuni ifyaina. 24 Kabili aleteka ifyalo fyonse ifyali kuli luno lubali ulwa Mumana,+ ukutula ku Tafisa ukufika ku Gasa,+ ne mfumu shonse ishali kuno lubali lwa Mumana;+ kabili ali no mutende+ mu citungu cakwe conse, ukushinguluka konse. 25 Kabili abena Yuda+ na bena Israele baikele mu mutelelwe,+ umuntu onse mwi samba lya mwangashi wakwe na mwi samba lya mukunyu wakwe,+ ukufuma ku Dani ukufika ku Beere-sheba,+ inshiku shonse isha kwa Solomone.

26 Kabili Solomone akwete amatanga amakana amakumi yane (40,000)+ aya bakabalwe aba kutinta amaceleta+ yakwe na ba pali bakabalwe amakana ikumi na makana yabili (12,000).

27 Kabili ishi inkonkani+ shaleleta ifya kulya fya Mfumu Solomone ne fya bonse abalepalama kwi tebulo lya Mfumu Solomone, cila muntu mu mweshi wakwe. Tapali ifyalebulila. 28 Kabili baleleta barle ne mpimbili ifya kulya bakabalwe na bakabalwe+ ba kubomfya mu nkondo, konse uko fyalefwaikwa, cila muntu ukulingana ne fyo bamwebele ukubomba.+

29 Kabili Lesa atwalilile ukupeela sana Solomone amano+ no mucetekanya,+ no mutima wa mano,+ ngo mucanga wa mu lulamba lwa bemba.+ 30 Na mano ya kwa Solomone yacilile+ amano ya bena Kabanga+ bonse na mano ya bena Egupti bonse.+ 31 Kabili ali na mano ukucila abantu bonse, ukucila Etani+ umwina Esera na Hemani+ na Kalikole+ na Darda abana ba kwa Mahole; no lulumbi lwakwe lwaile mu nko shonse ishamushingulwike.+ 32 Kabili alelanda amapinda amakana yatatu (3,000),+ ne nyimbo+ shakwe shali ikana limo na shisano (1,005). 33 Kabili alelanda pa miti, ukutendekela ku muti wa mukedari uwa mu Lebanone+ ukufika kuli husope+ uutabilila pa cibumba; kabili alelanda pa nama+ na pa fyuni+ na pa fikulika+ na pe sabi.+ 34 Kabili abantu baleisa ukufuma mu bantu na bantu bonse mu kumfwa amano ya kwa Solomone,+ kabili balefuma ku shamfumu shonse ishaumfwile pa mano yakwe.+

5 Kabili Hiramu+ imfumu ya ku Turi+ atumine ababomfi+ bakwe kuli Solomone, pantu alyumfwile ukuti Solomone e o basubile ukuba imfumu no kuti e o apyane wishi; pantu Hiramu alitemenwe Davidi.+ 2 Na o Solomone atumine amashiwi kuli Hiramu, ati:+ 3 “Walishiba ukuti Davidi tata alifililwe ukukuulila ishina lya kwa Yehova Lesa wakwe ing’anda pa mulandu wa kuti abalwani balelwa inkondo+ nankwe, mpaka Yehova abika abalwani ukuba apa kunyanta amakasa yakwe. 4 Nomba Yehova Lesa wandi nanenga ukutuusha konse konse.+ Takuli uuletulwisha, takuli no bubi ubuletuponena.+ 5 Kabili, mona, ine ndefwaya ukukuulila ishina lya kwa Yehova Lesa wandi ing’anda,+ ukulingana ne fyo Yehova alaile Davidi tata, ati, ‘Umwana obe uo nkabika pa cipuna cobe ica bufumu ukukupyana, e ukakuulila ishina lyandi ing’anda.’+ 6 Nomba eba aba kuntemena imiti ya mukedari ku Lebanone;+ kabili ababomfi bandi bakabombela pamo na babomfi bobe, kabili nkalipila amalipilo ya babomfi bobe ukulingana na fyonse ifyo walalanda, pantu walishiba ukuti tapaba muli ifwe uwaishiba ukutema imiti nga bena Sidone.”+

7 Nomba ilyo Hiramu+ aumfwile fye amashiwi ya kwa Solomone, alisekelele nga nshi, kabili asosele ati: “Acindikwe+ Yehova buno bushiku pantu apeela Davidi umwana wa mano+ uwa kuteka aba bantu abafula ifi!”+ 8 Awe Hiramu atumine amashiwi kuli Solomone aya kuti: “Ning’umfwa amashiwi utumine kuli ine. Ine nkacita fyonse ifyo ulefwaya ifikumine imbao sha mukedari ne mbao sha mukupri.+ 9 Ababomfi bandi bakaleta imbao ukushifumya ku Lebanone+ no kushileta kuli bemba; na ine nkashikaka no kushituma shikaye shile-elela pali bemba shikesefika ku cifulo ico ukanjeba.+ Kabili nkashiputawila kulya kwine, e lyo na iwe ukashisende. Na iwe ukacite ifyo ndefwaya pa kupeela aba mu ng’anda yandi ifya kulya.”+

10 Awe Hiramu apeele Solomone imbao sha mukedari ne mbao sha mukupri ukulingana ne fyo alefwaya. 11 Na o Solomone apeele Hiramu ingano amadalamu+ amakana amakumi yabili (20,000) ifya kulya fya ba mu ng’anda yakwe, na mafuta ayafuma ku miolife iyo batwa*+ amadalamu amakumi yabili (20). Ifi e fyo Solomone alepeela Hiramu cila mwaka.+ 12 Kabili Yehova apeele Solomone amano, nge fyo amulaile;+ kabili pali umutende pa kati ka kwa Hiramu na Solomone, kabili bapangene icipangano.

13 Ne Mfumu Solomone yalembele aba kubomba umulimo wa kupatikishiwa ukufuma mu bena Israele bonse; kabili abalembelwe umulimo wa kupatikishiwa+ bafikile amakana amakumi yatatu (30,000). 14 Alebatuma ku Lebanone mu mabumba ya bantu amakana ikumi (10,000) umweshi umo. Umweshi umo baleba ku Lebanone, kabili imyeshi ibili baleba ku mwabo;+ na Adoniramu+ e waleangalila abalembelwe+ umulimo wa kupatikishiwa.+ 15 Kabili Solomone akwete+ aba kusenda ifipe+ amakana amakumi cinelubali (70,000) na ba kuputula amabwe+ mu mpili bali amakana amakumi cinekonsekonse (80,000),+ 16 pamo na bakapitao+ abaleangalila imilimo, kwali bakangalila amakana yatatu ne myanda itatu (3,300) abaleangalila+ abantu abalebomba imilimo. 17 Kabili imfumu yasosele ukuti bembe amabwe ayakalamba, amabwe aya mutengo,+ pa kuti babike umufula+ wa ng’anda na mabwe ayaputulwa bwino.+ 18 E ico bakakuula ba kwa Solomone na ba kwa Hiramu na bena Gebali+ e baleputula amabwe, kabili balepekanya imbao na mabwe ifya kukuulila ing’anda.

6 Kabili mu mwaka walenga imyanda ine na makumi cinekonsekonse (480), ukutula apo abana ba kwa Israele bafumiine mu calo ca Egupti,+ mu mwaka walenga bune,+ mu mweshi wa Sivu,+ e kutila, umweshi wa bubili,+ apo Solomone abelele imfumu pali Israele, e lyo atendeke ukukuula ing’anda ya kwa Yehova.+ 2 Ne ng’anda iyo Solomone akuuliile+ Yehova yali imikono amakumi mutanda (60)+ mu butali, kabili mu bwipi yali imikono amakumi yabili (20), kabili yalepele imikono amakumi yatatu (30).+ 3 No muputule wa kwingililapo+ pa ntanshi ye tempele, wali imikono amakumi yabili (20) mu butali kabili wabelele mu bwipi bwa ng’anda. Wali imikono ikumi (10) mu bwipi, ku ntanshi ya ng’anda.

4 Kabili ku ng’anda apangiileko amawindo ayakwete amafulemu ayakulu ku nse lelo ayacepa mu kati.+ 5 Kabili ku cibumba ca ng’anda akuuliileko icikuulwa mu mbali shonse. Kabili icikuulwa cali ku mbali ya fibumba fya ng’anda ukushinguluka konse ku fibumba fye tempele no muputule wa mu kati na nkati.+ Kabili apangile imiputule ya mu mbali+ ukushinguluka konse. 6 Umuputule wa mu mbali uwa pa nshi sana wali imikono isano mu bwipi, no wa pa kati wali imikono mutanda (6) mu bwipi, no walenga butatu wali imikono cinelubali (7) mu bwipi; pantu ku ng’anda alipangileko apa kushintilila imyalo+ ku nse konse, pa kuti imyalo taipitile mu cibumba.+

7 Kabili ilyo balekuula ing’anda, balebomfya amabwe ya kwimba+ ayaishile yaliputwilwa kabela. Kabili sando nangu lisembe nangu ifibombelo fya cela tafyaumfwikike mu ng’anda+ ilyo yalekuulwa. 8 Kabili umwinshi+ wa muputule wa mu mbali uwa pa nshi sana wali lwa ku kulyo kwa ng’anda, kabili pali amatabo aya kunina pa kuya pa muputule wa pa kati, no kufuma pa muputule wa pa kati ukuya pa muputule walenga butatu. 9 Awe akonkenyepo ukukuula ing’anda pa kuti aipwishe,+ kabili ku fibumba fya mu kati ka ng’anda abikileko imyalo ne fipampa ifya muti wa mukedari.+ 10 Akuulile ne miputule ya mu mbali+ ku ng’anda yonse, iyalepele imikono isano mu butali. Kabili yaikashiwe ku ng’anda ku mbao+ sha mukedari.

11 Mu nshita ilya, icebo ca kwa Yehova caishile kuli Solomone,+ no kutila:+ 12 “Pali iyi ng’anda ulekuula, nga wakulaenda mu fipope+ fyandi no kulakonka ubupingushi+ bwandi no kusunga amafunde yandi yonse pa kwenda muli yena,+ na ine ninshi nkafikilisha amashiwi ayo naebele Davidi wiso;+ 13 kabili nkekala mu kati ka bana ba kwa Israele,+ kabili nshakashe abantu bandi abena Israele.”+

14 Awe Solomone akonkenyepo ukukuula ing’anda pa kuti aipwishe.+ 15 Kabili ku fibumba fya mu kati ka ng’anda abikileko imbao sha mukedari. Abikileko imbao ukufuma pa nshi ya ng’anda mu kati ukufika na mu nsonta sha kuli palafu; kabili pa nshi ya ng’anda ponse abikilepo imbao sha mukupri.+ 16 Kabili ku numa ya ng’anda apangiileko umuputule wa mikono amakumi yabili (20) ukubomfya imbao sha mukedari, ukufuma pa nshi ukufika mu nsonta, kabili mu kati apangilemo umuputule wa mu kati na nkati,+ Uwa Mushilo Nga Nshi.+ 17 Ne ng’anda, e kutila itempele,+ ku ntanshi ya Muputule wa Mushilo Nga Nshi+ yali imikono amakumi yane (40). 18 Na pa mbao sha mukedari mu kati ka ng’anda pabashiilwe ifyayemba ifyaba nge nkombo+ na maluba.+ Konse kwali imbao sha mukedari; kabili tapali ne libwe ilyalemoneka.

19 Kabili apekenye umuputule wa mu kati na nkati+ uwali mu kati ka ng’anda, uwa kubikamo icipao+ ca cipangano+ ica kwa Yehova. 20 Kabili umuputule wa mu kati na nkati wali imikono amakumi yabili (20) mu butali, kabili wali imikono amakumi yabili mu bwipi,+ kabili walepele imikono amakumi yabili; kabili abikileko golde wine wine,+ na ku ciipailo+ abikileko imbao sha mukedari. 21 Kabili Solomone abikile+ golde wine wine mu kati ka ng’anda,+ no kupisha umunyololo+ wa golde pa ntanshi ya muputule wa mu kati na nkati,+ kabili abikileko golde. 22 Na mu ng’anda yonse abikilemo golde,+ mpaka ing’anda yonse yapwa; na ku ciipailo+ konse icabelele lwa ku muputule wa mu kati na nkati abikileko golde.+

23 Kabili mu muputule wa mu kati na nkati apangiilemo bakerubi+ babili aba mbao sha fimuti ifya mafuta, kabili umo umo alepele imikono ikumi (10).+ 24 Kabili ipindo lya kwa kerubi umo lyalepele imikono isano, ne pindo limbi ilya kwa uyu kerubi lyalepele imikono isano. Ukufuma pa mpela ye pindo lyakwe limo ukufika pa mpela ye pindo limbi palepele imikono ikumi (10).+ 25 Na kerubi umbi alepele imikono ikumi (10). Bakerubi bonse babili balilingene ubutali kabili balemoneka fimo fine. 26 Kerubi umo alepele imikono ikumi (10), kabili e fyo na kerubi umbi ali. 27 E lyo abikile bakerubi mu kati ka ng’anda ya mu kati, kabili amapindo ya ba kerubi yalifungulwilwe.+ Kabili ipindo lya kwa kerubi umo lyafikile ku cibumba cimo ne pindo lya kwa kerubi umbi lyafikile ku cibumba icibiye. Na mapindo yabo yaile lwa pa kati ka ng’anda, kabili amapindo yalikumene.+ 28 Abikile na golde kuli bakerubi.+

29 E lyo pa fibumba fyonse ifya ng’anda abashiilepo bakerubi+ no tuncindu+ na maluba,+ mu muputule wa mu kati no wa ku nse; 30 na pa nshi+ ponse mu ng’anda abikilepo golde, mu muputule wa mu kati no wa ku nse. 31 Na ku mwinshi wa ku muputule wa mu kati na nkati apangiileko ifiibi+ ifya mbao sha fimuti fya mafuta:+ inceshi sha mu mbali, inceshi sha pa mwinshi ne ciputulwa calenga busano ica cibumba. 32 Ne fiibi fyali ifya mbao sha fimuti ifya mafuta, kabili abashiilepo bakerubi, utuncindu na maluba, kabili abikileko golde. Kabili kuli bakerubi no tuncindu abikileko golde. 33 Kabili ifi e fyo apangile no mwinshi wa kwi tempele, abikilepo inceshi sha pa mwinshi isha mbao sha fimuti fya mafuta, shonse ishakwata imbali shine ishalingana. 34 Ne fiibi fibili fyali ifya mbao sha mukupri.+ Ne fipandwa fibili ifya ciibi cimo fyaleisukila ku mainceshi, ne fipandwa fibili ifya ciibi cimbi na fyo fyaleisukila ku mainceshi.+ 35 Kabili abashiilepo bakerubi, utuncindu na maluba ayabalula, no kubika golde ku fyabashilwe.+

36 Kabili apangile ulubansa lwa mu kati+ no kukuulilako icibumba icali ne mitande itatu+ iya mabwe ayaputulwa no kubikapo umutande umo uwa mbao sha mukedari pa muulu.

37 Mu mwaka walenga ine umufula+ wa ng’anda ya kwa Yehova walibikilwe, mu mweshi wa Sivu;+ 38 kabili mu mwaka walenga ikumi na umo (11), mu mweshi wa Buli, umweshi walenga cinekonsekonse (8), ing’anda yalipwile,+ ukulingana na fyonse ifyo yali no kukuulwa;+ kabili apwishishe ukukuula mu myaka cinelubali (7).

7 Kabili Solomone akuulile ing’anda yakwe mu myaka ikumi na itatu (13),+ kabili e fyo apwishishe ing’anda yakwe yonse.+

2 Akuulile ne ng’anda iyaleitwa ati Umutengo wa Lebanone+ iyali imikono umwanda umo (100) mu butali, ne mikono amakumi yasano (50) mu bwipi, kabili yalepele imikono amakumi yatatu (30). Yali pa muulu wa nceshi sha mbao sha mukedari ishali mu mitande ine; kabili pa muulu wa nceshi pali imyalo+ ya mbao sha mukedari. 3 Kabili babikilepo imbao sha mukedari+ pa muulu wa myalo ishali pa nceshi amakumi yane na shisano (45). Mu mutande umo mwali nceshi ikumi na shisano (15). 4 Na mawindo yali mu mitande itatu, kabili mwali ne fipunda fyalepusha ulubuuto+ ifyalungatene ne fipunda fimbi ifyalepusha ulubuuto, mu mitande itatu. 5 Kabili amafulemu ya pa minshi yonse ne nceshi sha pa minshi yonse fyali ifya makoona yane,+ ne fipunda ifyalepusha ulubuuto ifyalungatene ne fipunda fimbi na fyo fyali na mafulemu ya makoona, mu mitande itatu.

6 Kabili akuulile Akamutenge ka pa Nceshi, akali imikono amakumi yasano (50) mu butali, na mu bwipi imikono amakumi yatatu (30). Akamutenge na kambi kali ku ntanshi ya shilya nceshi kabili aka na ko kali ne nceshi na kamutenge, ku ntanshi ya kako.

7 Apangile na kamutenge umwa kupingwila, e kutila, Akamutenge ka pa Cipuna ca Bufumu+ umo ali no kulapingwila.+ Kabili babikileko konse imbao sha mukedari ukufuma pa nshi ukufika ku myalo yali mu muulu.+

8 Kabili ing’anda yakwe umo ali no kulaikala, mu lubansa lumbi,+ yalitalwike ku Kamutenge ka pa Cipuna ca Bufumu. Yalipalene mu mipangilwe. Kabili kwali ing’anda iyapalana na ka Kamutenge ka pa Cipuna ca Bufumu iyo apangiile umwana mwanakashi wa kwa Farao,+ uo Solomone aupile.

9 Kabili yonse yapangilwe na mabwe aya mutengo,+ ayaputulwa kuli basoo aba kuputwilako amabwe ukulingana ne fyo yapiminwe, ku nse na mu kati, kabili ukufuma pa mufula ukufika na pa muulu, na ku nse ukufika fye na mu lubansa ulukalamba.+ 10 Kabili amabwe aya mu mufula yali ayakalamba, yali amabwe aya mikono ikumi (10), e lyo na mabwe aya mikono cinekonsekonse (8). 11 Kabili pa muulu pali amabwe ya mutengo, ayaputulwa, ukulingana ne fyo yapiminwe, e lyo ne mbao sha mukedari. 12 Kumfwa ku lubansa ulukalamba, akuulileko icibumba ica mitande itatu+ iya mabwe ayaputulwa kabili abikilepo no mutande umo uwa mbao sha mukedari; e fyo acitile na ku lubansa lwa mu kati+ ka ng’anda+ ya kwa Yehova, na ku kamutenge+ ka ku ng’anda.

13 Kabili Imfumu Solomone yatumine bamo kabili bailesenda Hiramu+ ku Turi. 14 Ali mwana wa kwa mukamfwilwa mu mukowa wa kwa Naftali, kabili wishi ali mwina Turi,+ kafula wa mukuba;+ kabili ali na mano no mucetekanya+ kabili alishibe ukubomba imilimo yonse iya fya mukuba. Awe aishile kuli Solomone no kutendeka ukubomba imilimo yakwe yonse.

15 Na o apangile inceshi shibili isha mukuba,+ kabili uluceshi lumo lwalepele imikono ikumi na cinekonsekonse (18), kabili intambo iyalepa imikono ikumi na ibili (12), e yaleshinguluka uluceshi lumo na lumo pali shilya nceshi shibili.+ 16 Kabili apangile ifitebo fibili ifya mukuba+ no kufibika pa muulu wa fyaimikwa. Icitebo cimo cali ubutali imikono isano, ne citebo cimbi cali ubutali imikono isano. 17 Kwali ne fyapikulwa ifyapikwilwe mu munyololo,+ ifya ku fitebo ifyali pa muulu wa nceshi;+ ku citebo cimo fyaliko cinelubali (7), na ku citebo cimbi fyaliko cinelubali. 18 E lyo nomba apangile ifyapala ifisabo fya mupomegranate ne mitande ibili ukushinguluka konse pa fyapikulwa ku kufimba pa fitebo ifyali pa muulu wa nceshi; kabili e fyo acitile na ku citebo cimbi.+ 19 Kabili ifitebo ifyali pa muulu wa nceshi lwa ku cikuulwa ca kwingililapo, fyapangilwe kwati maluba,+ kabili fyali imikono ine. 20 Kabili ifitebo fyali pa muulu wa fyaimikwa fibili, na mupepi ne cabulungana icali ku capikulwa. Kabili kwali ne fisabo fya mapomegranate+ imyanda ibili (200) mu mitande mu mitande ukushinguluka icitebo cimo na cimo.

21 Kabili aimike ne nceshi+ sha cikuulwa ca kwingililapo+ ice tempele. Awe aimike no luceshi lwa ku kulyo no kulwinika ati Yakini, kabili aimike no lwa ku kuso no kulwinika ati Boasi. 22 Na pa muulu wa fyaimikwa pali ifyapangilwe kwati maluba. No mulimo wa kupanga ifyaimikwa wasukile wapwa.

23 E lyo nomba apangile icishiba+ icaengwa icali imikono ikumi (10) ukufuma ku lubali lumo ulwa mulomo wa ciko ukucilinganya ukufika ku lubali lumbi ulwa mulomo, kabili cali icashinguluka konse; kabili mu butali calepele imikono isano, kabili umwando uwalepa amakumi yatatu (30), e walecishinguluka konse.+ 24 Kabili kwali ne fyayemba+ ifyaba nge nkombo+ ifyabashilwe mwi samba lya mulomo wa cishiba conse, ukucishinguluka,+ mu mukono umo fyalimo ikumi (10), ukushinguluka icishiba conse, kabili kwali imitande ibili iya fyaba nge nkombo, bafipangiile mu cikombola. 25 Cabikilwe pa ng’ombe ishilume ikumi na shibili (12),+ shitatu shaloseshe ku kapinda ka ku kuso, na shitatu shaloseshe ku masamba, kabili shitatu shaloseshe ku kapinda ka ku kulyo, e lyo shitatu shaloseshe ku kabanga; ne cishiba catekelwe pali shena. Kabili inuma sha shiko shonse shalolele mu kati.+ 26 No mutika wa ciko wali ngo lupi mu bwipi;+ no mulomo wa ciko wali ngo mulomo wa kapu, kwati liluba lyabalula.+ Mwaleingila imbeketi*+ sha menshi amakana yabili (2,000).+

27 E lyo apangile ne fya kusendelapo+ ikumi (10), ifya mukuba, cimo na cimo ica kusendelapo cali imikono ine mu butali, na mu bwipi cali imikono ine, kabili calepele imikono itatu. 28 Kabili ifi e fyo ifya kusendelapo fyapangilwe: fyali ne fya mu mbali, kabili ifya mu mbali fyali pa kati ka nshimbi. 29 Na pa fya mu mbali ifyali pa kati ka nshimbi babashiilepo inkalamo,+ ing’ombe ishilume+ na bakerubi,+ kabili ifi e fyali na pa nshimbi. Pa muulu na pa nshi ya nkalamo na pa nshi ya ng’ombe ishilume pali amaluba+ ayapikulwa ayaleseleela. 30 Kabili ica kusendelapo cimo na cimo cali ne mipeto ine iya mukuba, ne fya kushingulukako imipeto ifya mukuba; ne mikonso ine mu makoona iya kufikata. Pa nshi ya ca kubikamo amenshi ya kusamba pali ifya kutekapo, ifyaliko na maluba ayapikulwa ponse ukufuma pali cimo na cimo. 31 Na kanwa ka ciko ukufuma mu kati ukuya ku muulu kali imikono . . . ;* kabili akanwa ka ciko kali akashinguluka, imipangilwe ya kako yali umukono umo na hafu, kabili pa kanwa ka ciko pali ifyabashilwapo. Ne fya mu mbali fyali ifya makoona yane, te fyashinguluka iyo. 32 Kabili imipeto ine yali mwi samba lya fya mu mbali, ne mikonso iyaikete imipeto yali ku ca kusendelapo. No mupeto umo walepele umukono umo na hafu. 33 Kabili imipangilwe ya mipeto yali kwati mipangilwe ya mipeto ya kwi celeta.+ Ne mikonso iyaikeshe imipeto, ifingolongolo, na mashipoko na mahabu fyonse fyaengelwe mu cikombola. 34 Kabili ku makoona yane kwali imikonso ine iya kwikata ku ca kusendelapo cimo na cimo; ifya kwikata ne ca kusendelapo fyali pamo. 35 Na pa muulu wa ca kusendelapo pali ica kutekapo icalepele umukono umo, ukushinguluka konse; kabili pa muulu mu mbali ya ca kusendelapo e lyo ne fya mu mbali fyali pamo. 36 Kabili mu mbali ya fipaapaatu fya ca kutekapo e lyo ne fya mu mbali alengelepo+ bakerubi, inkalamo no tuncindu ukulingana ne ncende ya cimo na cimo, na maluba ayapikulwa ukushinguluka konse.+ 37 Ifi e fyo apangile ifya kusendelapo ikumi (10);+ fyonse fyapangilwe cimo cine,+ fyalilingene, kabili fyalemoneka cimo cine.

38 Kabili apangile ifya kubikamo amenshi ya kusamba+ ikumi (10) ifya mukuba. Mu ca kubikamo amenshi ya kusamba cimo mwaleingila imbeketi sha menshi amakumi yane (40). Ica kubikamo amenshi ya kusamba cimo na cimo cali imikono ine. Pa ca kusendelapo cimo na cimo pali ica kubikamo amenshi ya kusamba cimo, pali fyonse ifya kusendelapo ikumi (10). 39 E lyo nomba abikile ifya kusendelapo fisano ku kulyo kwa ng’anda, na fisano ku kuso kwa ng’anda;+ ne cishiba acibikile ku kulyo kwa ng’anda lwa ku kabanga, ukulola ku kapinda ka ku kulyo.+

40 Kabili Hiramu+ apangile ifya kubikamo amenshi ya kusamba+ na bafosholo+ ne mbale ishafonka.+ Awe Hiramu apwishishe+ imilimo yonse iyo abombeele Imfumu Solomone iyakumine ing’anda ya kwa Yehova: 41 Inceshi shibili+ ne fitebo+ ifyapala imbale shafonka ifyali pa muulu wa nceshi shibili, ne fyapikulwa+ fibili ifya kufimba pa fitebo fibili ifyabulungana ifyali pa muulu wa nceshi, 42 na mapomegranate+ imyanda ine (400) aya ku fyapikulwa fibili, imitande ibili iya mapomegranate ku capikulwa cimo cimo, aya kufimba ifitebo fibili ifyapala imbale shafonka ifyali pa nceshi shibili; 43 ne fya kusendelapo ikumi (10)+ ne fya kubikamo amenshi ya kusamba ikumi+ ifyali pa fya kusendelapo, 44 ne cishiba+ cimo ne ng’ombe ishilume ikumi na shibili (12) ishali mwi samba lya cishiba;+ 45 ne fya kukushilapo imito na bafosholo ne mbale shafonka ne fipe fyonse,+ ifyo Hiramu apangiile Imfumu Solomone ifya mu ng’anda ya kwa Yehova, ifyali ifya mukuba usuma. 46 Mu Citungu ca Yordani+ e mo imfumu yafipangiile mu fikombola fye loba pa kati ka Sukote+ na Saretani.+

47 Kabili Solomone tapimine ifipe+ pa mulandu wa kuti fyalifulile nga nshi.+ Ukufina kwa mukuba takwaishibikwe.+ 48 Awe Solomone apangile ifipe fyonse ifya mu ng’anda ya kwa Yehova, iciipailo+ ca golde ne tebulo+ ilya golde apali umukate wa mutuulo, 49 ne fya kutekapo inyali,+ fisano ku kulyo na fisano ku kuso ku ntanshi ya muputule wa mu kati na nkati, ifya golde iisuma icine cine,+ na maluba+ ne nyali+ ne fya kumanikilako,+ ifya golde, 50 ne fya kubikamo amenshi ya kusamba ne fya kushimishako umulilo+ ne mbale shafonka+ na makapu+ ne fifutumwino,+ ifya golde iisuma, na mainceshi ya fiibi+ fya ku ng’anda ya mu kati, e kutila, mu Muputule wa Mushilo Nga Nshi, ne fiibi+ fya kwi tempele,+ ifya golde.

51 Awe imilimo yonse iyo Imfumu Solomone ali no kubomba iyakumine ing’anda ya kwa Yehova yalipwile.+ Kabili Solomone atendeke ukuletelamo ifintu ifyo Davidi wishi apeele;+ silfere na golde ne fipe kabili afibikile umwa kusungila ifipe fya mu ng’anda ya kwa Yehova.+

8 E lyo nomba Solomone+ alonganike+ abakalamba+ ba kwa Israele, intungulushi shonse isha mikowa,+ intungulushi sha ndupwa,+ isha bana ba kwa Israele, ukuti bese ku Mfumu Solomone mu Yerusalemu, pa kuti balete icipao ca cipangano+ ica kwa Yehova ukucifumya mu Musumba wa kwa Davidi,+ e kutila, mu Sione.+ 2 E ico abaume bonse aba bena Israele balongene ku Mfumu Solomone mu mweshi wa Etanimu mu mushita ya mutebeto,+ e kutila, umweshi walenga cinelubali (7).+ 3 Awe abakalamba ba bena Israele bonse balishile, na bashimapepo basendele+ Icipao.+ 4 Kabili baletele icipao ca kwa Yehova ne cikuulwa+ ca kukumaninako+ ne fipe fyonse ifya mushilo ifyali muli ici cikuulwa; kabili bashimapepo na bena Lebi+ balifiletele.+ 5 Kabili Imfumu Solomone no lukuta lonse ulwa kwa Israele, abalongene kuli yena, bali pa ntanshi ya Cipao, baletuula amalambo+ ya mpaanga ne ng’ombe ayashingapendwa ku bwingi.+

6 E lyo bashimapepo baletele icipao+ ca cipangano ica kwa Yehova ku cifulo ca ciko,+ mu muputule wa mu kati na nkati uwa ng’anda, e kutila mu Muputule wa Mushilo Nga Nshi, mwi samba lya mapindo ya bakerubi.+

7 Bakerubi bafungulwile amapindo yabo pa muulu wa paikele Icipao, kabili bakerubi bafimbile Icipao pa muulu icali ne mitembo.+ 8 Lelo imitembo+ yalilepele, ica kuti nga uli mu Muputule wa Mushilo kuti wamona impela ya mitembo iili mu muputule wa mu kati na nkati, lelo ku nse kwena tayalemoneka. Kabili yaba mulya mwine ukufika na buno bushiku.+ 9 Tamwali nangu kamo mu Cipao, kano fye amabwe yabili ayapapaatala+ ayo Mose abikilemo+ ku Horebu, ilyo Yehova apangene icipangano+ na bana ba kwa Israele ilyo balefuma mu calo ca Egupti.+

10 Awe ilyo bashimapepo bafumine mu muputule wa mushilo, ikumbi+ lyaiswile mu ng’anda ya kwa Yehova. 11 Kabili pa mulandu we kumbi bashimapepo+ bafililwe ukwiminina pa kuti babombe,+ pantu ubukata+ bwa kwa Yehova bwaiswile mu ng’anda ya kwa Yehova.+ 12 E lyo Solomone atile: “Yehova umwine atile akekala mwi kumbi ilyafiita.+ 13 Nimukuulila ing’anda apasansuka,+ icifulo icibelelela+ ico mukalaikalamo umuyayaya.”+

14 E lyo imfumu yapilibwike no kutendeka ukupaala+ ulukuta lonse ulwa bena Israele, ninshi ulukuta lonse ulwa kwa Israele nalwiminina. 15 Kabili yatile: “Acindikwe Yehova+ Lesa wa kwa Israele, uwasosele kuli Davidi+ tata, kabili ku kuboko kwakwe nafikilisha ifyo alaile,+ ati, 16 ‘Ukutula pa bushiku nafumishe abantu bandi abena Israele mu Egupti, nshasala+ umusumba mu mikowa yonse iya kwa Israele umwa kukuulila ishina+ lyandi ing’anda+ pa kuti libe mulya pe; lelo nkasala Davidi ukuti akaletungulula abantu bandi abena Israele.’+ 17 Kabili Davidi tata alefwaisha sana ukukuulila ishina lya kwa Yehova Lesa wa kwa Israele ing’anda.+ 18 Lelo Yehova atile kuli Davidi tata, ‘Pa mulandu wa kuti walefwaisha sana ukukuulila ishina lyandi ing’anda, walicita bwino, pantu e co walefwaisha.+ 19 Nomba te iwe ukakuula ing’anda, lelo umwana obe uukafuma muli iwe* e ukakuulila ishina lyandi ing’anda.’+ 20 Kabili Yehova afikilishe amashiwi+ asosele, aya kuti mpyane Davidi tata no kwikala pa cipuna ca bufumu ica kwa Israele,+ ifyo Yehova asosele, no kuti nkuulile ishina lya kwa Yehova Lesa wa kwa Israele ing’anda,+ 21 no kuti mpekanye apa kubika Icipao umwaba icipangano+ ca kwa Yehova ico apangene ne fikolwe fyesu ilyo alebafumya mu calo ca Egupti.”

22 E lyo Solomone aiminine pa ntanshi ya ciipailo+ ca kwa Yehova, pa ntanshi ya lukuta lonse ulwa bena Israele, kabili aimishe amaboko yakwe mu muulu;+ 23 kabili atile: “Mwe Yehova, Lesa wa kwa Israele,+ takwaba Lesa uwaba nga imwe+ mu muulu monse nangu pano isonde ponse, uusunga icipangano kabili uwaba ne cikuuku+ ku babomfi+ benu abacita ifyo mufwaya ne mitima yabo yonse,+ 24 mwe bacitila umubomfi wenu Davidi tata ifyo mwamulaile, kabili ku kanwa kenu ni mwe mwamulaile, kabili mwafikilisha ku kuboko kwenu, nga pali buno bushiku.+ 25 E ico nomba mwe Yehova, Lesa wa kwa Israele, citileni umubomfi wenu Davidi tata ico mwamulaile, amuti, ‘Takwakatale akubula umuntu obe ku cinso candi uwa kwikala pa cipuna ca bufumu ica bena Israele,+ nga ca kuti fye abana bobe bakabika amano ku mibele yabo pa kwenda ku cinso candi nge fyo waenda.’ 26 E ico nomba, mwe Lesa wa kwa Israele, lekeni ubulayo+ bwenu ubo mwalaile umubomfi wenu Davidi tata bufikilishiwe.

27 “Lelo bushe cine cine Lesa kuti aikala pano isonde?+ Moneni! Umuulu,+ nangu fye muulu wa myulu+ te kuti umukumane;+ pali bufi ing’anda+ iyi iyo nkuulile! 28 Kabili umfweni ipepo+ lya mubomfi wenu no kulomba kwakwe ukwa kuti mumutemwe,+ mwe Yehova Lesa wandi. Umfweni ukupapaata kwakwe ne pepo ilyo umubomfi wenu alepepa kuli imwe buno bushiku;+ 29 pa kuti amenso yenu yalelolesha+ pa ng’anda ino ubushiku na kasuba, pa cifulo ico mwatile, ‘Ishina lyandi likaba mulya,’+ ku kumfwa kwi pepo ilyo umubomfi wenu alepepa nalosha kuli cino cifulo.+ 30 Kabili mulekutika ku kulomba kwa mubomfi wenu ukuti mulemupaala+ na ku kulomba kwa bantu benu abena Israele ilyo balepepa ninshi nabalosha kuli cino cifulo. Kabili muleumfwa uko mwaikala, ku muulu,+ no kutubelela uluse.+

31 “Umuntu nga abembukila umunankwe,+ kabili alapa no mulapo wa citiipu,+ kabili aisa pa ntanshi ya ciipailo cenu muli ino ng’anda ninshi alilapa umulapo, 32 na imwe ukumfwa mukomfwe mu muulu, kabili mukacitepo cimo no kupingula ababomfi benu pa kupingula umubifi ukuti mubifi no kubika imicitile yakwe pa mutwe wakwe,+ no kupingula umulungami ukuti mulungami+ pa kumulambula ukulingana no bulungami bwakwe.+

33 “Abantu benu abena Israele nga babacimfya ku balwani,+ pa mulandu wa kuti balebembukila imwe,+ kabili babwelela kuli imwe+ no kulumbanya ishina+ lyenu no kupepa+ no kulomba ninshi nabalosha kuli imwe kuli ino ng’anda ukuti mubabelele uluse,+ 34 na imwe mukomfwe mu muulu, kabili mukelele ulubembu lwa bantu benu abena Israele+ no kubabwesesha+ ku calo ico mwapeele ifikolwe fyabo.+

35 “Umuulu nga waisalwa ica kuti ne mfula tailokele,+ pa mulandu wa kuti balemubembukila,+ kabili nga bapepa nabalosha kuli cino cifulo+ no kulumbanya ishina lyenu kabili bayaluka ukufuma ku lubembu lwabo pantu mwabacusha,+ 36 na imwe mukomfwe mu muulu, no kwelela ulubembu lwa babomfi benu, ulwa bantu benu abena Israele, pantu mulabasambilisha+ inshila iisuma iyo bafwile ukwendamo;+ kabili mukaloshe imfula+ pa calo cenu ico mwapeela abantu benu ukuba ubupyani bwabo.

37 “Nga mu calo mwapona icipowe,+ nangu icikuko,+ nangu nga mwaba ukubabuka kwa mabula, ukufufuma kwa mabula,+ nelyo kwaba makanta+ ne mpemfu;+ nga abalwani babo babashinga mu misumba yabo—nelyo nga kwapona icikuko ca musango onse, no bulwele bwa musango onse— 38 ipepo lyonse,+ ukulomba konse ukwa kubelelwa uluse+ ukwa muntu onse nangu ukwa bantu benu bonse abena Israele,+ pantu cila muntu alishiba icikalipa mu mutima wakwe,+ kabili nga baimya amaboko yabo nabalosha kuli ino ng’anda,+ 39 na imwe mukomfwe mu muulu,+ mu cifulo cenu icibelelela,+ kabili mukababelele uluse+ no kucitapo cimo+ no kupeela umuntu onse ukulingana ne mibele yakwe yonse,+ pantu mwalishiba umutima wakwe+ (pantu ni mwe mweka mwaishiba bwino imitima ya bana ba bantu bonse);+ 40 pa kutila balemutiina+ inshiku shonse isho bali abomi pa calo ico mwapeele ifikolwe fyesu.+

41 “Kabili uwa ku calo cimbi,+ uushili wa mu bantu benu abena Israele kabili uwafuma ku calo ca kutali pa mulandu we shina lyenu+ 42 (pantu bakomfwa ifyo ishina+ lyenu lyaba ilikalamba ne fyo ukuboko kwenu kwakosa+ e lyo ne fyo ukuboko kwenu kwatambalikwa), nga aisa no kupepa ninshi nalosha kuli ino ng’anda,+ 43 na imwe mukomfwe mu muulu, mu bwikalo bwenu ububelelela,+ kabili mukacite ukulingana na fyonse ifyo uwa ku calo cimbi akamulomba;+ pa kuti aba pano isonde bonse batiine ishina+ lyenu na pa kuti batiine imwe nge fyo abantu benu abena Israele bamutiina, kabili pa kuti beshibe ukuti ishina lyenu lyainikwa pa ng’anda ino iyo nakuula.+

44 “Nga abantu benu baya ku nkondo+ ku kulwa na balwani babo mu nshila umo mwabatumamo,+ kabili bapepa+ kuli Yehova nabalosha kuli uno musumba uo mwasala+ kabili nabalosha ku ng’anda iyo nakuulila ishina lyenu,+ 45 imwe mukomfwe mu muulu ipepo lyabo no kulomba kwabo ukwa kuti mubaafwe, kabili mukabakandileko abalwani babo.+

46 “Nga bamubembukila+ (pantu takwaba umuntu uushibembuka),+ kabili mwabafulilwa no kubapoosa ku balwani, kabili aba kubasenda bunkole babasenda ku calo ca balwani ica kutali nelyo ica mupepi;+ 47 kabili nga bailuka ilyo bali mu calo umo babasendele bunkole,+ kabili babwela+ no kulomba+ ukuti mubabelele uluse ilyo bali mu calo umo babasendele bunkole,+ abati, ‘Natubembuka,+ natulufyanya+ kabili natubifya’;+ 48 kabili babwelela kuli imwe ne mitima yabo yonse+ ne myeo yabo yonse ilyo bali mu calo ca balwani babo ababasendele bunkole, kabili nga bapepa kuli imwe nabalosha ku calo cabo ico mwapeele ku fikolwe fyabo, umusumba uo mwasala ne ng’anda iyo nakuulila ishina lyenu;+ 49 na imwe mu muulu, mu bwikalo bwenu ububelelela,+ mukomfwe ipepo lyabo no kulomba kwabo ukwa kubabelela uluse, kabili mukabapingwileko,+ 50 kabili mukelele+ abantu benu abamubembukile+ ne membu+ isho bacitile kuli imwe;+ kabili mukaleke ababasendele muli bunkole bakomfwe uluse+ no kubabelela uluse 51 (pantu bantu benu kabili bupyani bwenu,+ ubo mwafumishe mu Egupti,+ mu kati ke lungu lya cela),+ 52 pa kuti amenso yenu yaloleshe pa kulomba kwa mubomfi wenu ukwa kuti mumubelele uluse no kulomba kwa bantu benu abena Israele ukuti mubabelele uluse,+ pa kumfwa kuli bena muli fyonse ifyo balilila kuli imwe.+ 53 Pantu, mwe Shikulu Mulopwe Yehova, ni mwe mwabapaatwile ukuti babe abantu benu ukufuma mu bantu bonse aba pano isonde,+ ifyo mwasoseele muli Mose+ umubomfi wenu ilyo mwalefumya ifikolwe fyesu mu Egupti.”

54 Nomba ilyo Solomone apwishishe fye ukupepa kuli Yehova ipepo lyonse no kulomba ukuti alebapaala, alimine ku cinso ca ciipailo ca kwa Yehova, apo afukeme+ naimya amaboko yakwe mu muulu;+ 55 awe aliminine,+ alapaala+ ulukuta lonse ulwa kwa Israele ne shiwi likalamba, ati: 56 “Abe uwacindikwa Yehova,+ uwapeela abantu bakwe abena Israele icifulo ca kutuushishapo ukulingana na fyonse ifyo alaile.+ Tapashele icebo nangu cimo+ pa fintu ifisuma fyonse ifyo alaile muli Mose umubomfi wakwe.+ 57 Yehova abe na ifwe+ ifyo ali ne fikolwe fyesu.+ Kabili etusha nangu kutulekelesha,+ 58 pa kuti imitima yesu+ ibe kuli ena ku kwenda mu nshila+ shakwe shonse no kusunga amafunde+ yakwe ne fipope+ fyakwe no bupingushi bwakwe+ ifyo aebele ifikolwe fyesu. 59 Kabili aya mashiwi nalombelamo ipaalo ku cinso ca kwa Yehova yaleibukishiwa+ kuli Yehova Lesa wesu akasuba no bushiku pa kuti apingwileko umubomfi wakwe na bantu bakwe abena Israele, ukulingana ne filefwaikwa cila bushiku;+ 60 pa kuti abantu na bantu bonse aba pano isonde beshibe+ ukuti Yehova e Lesa wa cine.+ Takwaba na umbi.+ 61 Kabili imitima yenu ibe iya cishinka+ kuli Yehova Lesa wesu pa kwenda mu fipope fyakwe no kusunga amafunde yakwe, nge fyo mulecita buno bushiku.”

62 Kabili imfumu na bena Israele bonse batuulile ilambo ilikalamba ku cinso ca kwa Yehova.+ 63 Kabili Solomone atuulile amalambo ya mutende+ ayo ali no kutuula kuli Yehova, ing’ombe amakana amakumi yabili na yabili (22,000), ne mpaanga amakana umwanda umo na makana amakumi yabili (120,000),+ pa kuti imfumu na bana ba kwa Israele bonse bapeele+ ing’anda ya kwa Yehova. 64 Pa bushiku bulya imfumu yapekenye pa kati ka lubansa lwa ku ntanshi ya ng’anda ya kwa Yehova,+ pantu e po yali no kupeelela ilambo lya koca no mutuulo wa ngano ne fyanona ifya malambo ya mutende; pantu iciipailo ca mukuba+ icali ku ntanshi ya kwa Yehova calicepele sana ku kubikapo ilambo lya koca no mutuulo wa ngano ne fyanona+ ifya malambo ya mutende. 65 Kabili pa nshita ilya, Solomone acitile umutebeto+ ku cinso ca kwa Yehova Lesa wesu, ena na bena Israele bonse, ulukuta+ ulukalamba ukufuma ku mupaka wa Hamati+ ukufika ku mumana wa Egupti,+ inshiku cinelubali (7) ne nshiku na shimbi cinelubali,+ shonse pamo inshiku ikumi na shine (14). 66 Pa bushiku bwalenga cinekonsekonse (8) alekele abantu baye;+ na bo bapaalile imfumu, kabili baile ku mwabo, balesekelela,+ kabili bali ne nsansa+ pa busuma bonse+ ubo Yehova acitiile Davidi umubomfi wakwe na bantu bakwe abena Israele.

9 Nomba ilyo Solomone apwishishe fye ukukuula ing’anda+ ya kwa Yehova ne ng’anda ya mfumu+ na fyonse ifisuma ifyo Solomone alefwaya ukukuula,+ 2 Yehova amoneke umuku wa bubili kuli Solomone, ifyo amoneke kuli ena mu Gibeone.+ 3 Kabili Yehova amwebele ati: “Ning’umfwa ipepo+ lyobe no kulomba kobe ukwa kufwaya ukupaalwa uko walombele kuli ine. Ninenga ing’anda ino ukuba iya mushilo+ iyo wakuulile pa kubikamo ishina+ lyandi umuyayaya; kabili amenso+ yandi no mutima wandi fikalaba mulya pe.+ 4 Na iwe nga wakulacita+ ifyo mfwaya, nga filya Davidi+ wiso alecita, no mutima wa cishinka+ no bololoke+ ukulingana na fyonse ifyo nakweba,+ kabili nga wakulasunga ifipope+ fyandi no kukonka ubupingushi bwandi,+ 5 na ine nkapampamika icipuna cobe ica bufumu pali Israele umuyayaya, ifyo nalaile Davidi wiso, nati, ‘Takwakabulwe umuntu obe uwa kwikala pa cipuna ca bufumu ica kwa Israele.’+ 6 Nga ca kuti imwe na bana benu mwaleka ukunkonka+ kabili tamusungile amafunde yandi ne fipope fyandi ifyo namupeela, kabili mwaya na ku kubombela balesa bambi+ no kubakontamina, 7 na ine nkalofya Israele ukufuma pa calo ico nabapeela;+ ne ng’anda iyo nabuulila ishina lyandi nkaipoosa ukufuma ku cinso candi,+ kabili abantu bonse bakalalanda pali Israele insoso sha manshoko+ kabili bakalamuseka. 8 Kabili iyi ng’anda ikashala ifitantaala.+ Na onse uulepita akalolesha no kupapa + kabili bakalisha iminsoli no kutila, ‘Nga cinshi Yehova acitiile ifi kuli ici calo na kuli iyi ng’anda?’+ 9 Kabili bakatila, ‘Ni co bashile Yehova Lesa wabo uwafumishe ifikolwe fyabo mu calo ca Egupti,+ kabili baikatilile kuli balesa bambi+ no kubakontamina no kubabombela. E mulandu wine Yehova aletele ububi bonse ubu pali bena.’”+

10 Nomba pa mpela ya myaka amakumi yabili (20), iyo Solomone akuulilemo amayanda yabili, ing’anda ya kwa Yehova+ ne ng’anda ya mfumu,+ 11 (Hiramu+ imfumu ya ku Turi yapeele Solomone+ imbao sha mukedari ne mbao sha mikupri ishingi na golde iingi ukulingana na po alefwaila,)+ kabili pa nshita ilya Imfumu Solomone yapeele Hiramu imisumba amakumi yabili (20) mu calo ca Galili.+ 12 Awe Hiramu afumine ku Turi ku kuyamona misumba iyo Solomone amupeele, kabili tayaweme mu menso yakwe.+ 13 E ico atile: “Misumba ya musango nshi iyi wampeela munyinane?” Kabili yainikwe Icalo ca Kabuli ukufika na buno bushiku.

14 Na Hiramu atumine ku mfumu amatalanti ya golde umwanda umo na makumi yabili (120).+

15 Nomba ili e lyashi lya balembelwe umulimo wa kupatikishiwa+ abo Solomone aitile ku kukuula ing’anda ya kwa Yehova+ ne ng’anda yakwe na palundumana+ ne linga+ lya Yerusalemu na Hasore+ na Megido+ na Gesere.+ 16 (Farao imfumu ya Egupti yalishile no kuyapoka umusumba wa Gesere no kuoca ku mulilo, kabili aipeye na bena Kanaani+ abaleikalamo. E ico apeele uyu musumba ngo bupe ku mwana wakwe,+ uwali umukashi wa kwa Solomone, ilyo aleya.) 17 Na o Solomone ailekuula Gesere na Bete-horone wa mwi Samba,+ 18 na Baalati+ na Tamari wa mu matololo ya muli cilya calo, 19 ne misumba yonse iya matala+ iyali ya kwa Solomone ne misumba ya maceleta+ ne misumba ya ba pali bakabalwe, ne fintu ifisuma ifya kwa Solomone+ ifyo alefwaisha ukukuula mu Yerusalemu na mu Lebanone na mu calo conse ico aleteka. 20 Na bantu bonse abashele aba mu bena Amore,+ abena Hiti,+ abena Perisi,+ abena Hibi+ na bena Yebusi,+ abashali bena Israele,+ 21 abana babo abashele pa numa yabo mu calo, abo abena Israele bashaipeye,+ Solomone alebeta ku kubomba umulimo wa kupatikishiwa uwa busha ukufika na lelo.+ 22 Kabili tapali nangu bamo pa bana ba kwa Israele abo Solomone acitile abasha;+ pantu bali e bashilika kabili ababomfi bakwe, na bacilolo bakwe, ne ntungulushi shakwe isha bashilika, ne ntungulushi sha ba kwensha amaceleta na bale-endela pali bakabalwe.+ 23 Aba e bali abakalamba ba nkonkani ishaleangalila umulimo wa kwa Solomone, imyanda isano na makumi yasano (550), bakapitao ba bantu abalebomba umulimo.+

24 Lelo, umwana mwanakashi uwa kwa Farao+ afumine ku Musumba wa kwa Davidi+ no kuya ku ng’anda yakwe iyo amukuuliile. E nshita akuulile Apalundumana.+

25 Awe Solomone alepeela amalambo ya koca na malambo ya mutende pa ciipailo ico akuuliile Yehova,+ imiku itatu+ mu mwaka, kabili kwaleba ukufutumuna pa ciipailo,+ icali ku cinso ca kwa Yehova; kabili apwishishe ing’anda.+

26 Kabili kwali na maato ayo imfumu Solomone yapangile mu Esione-gebere,+ uwaba lwa ku Elote,+ pa lulamba lwa Bemba Wakashika mu calo ca Edomu.+ 27 Kabili Hiramu aletuma ababomfi+ bakwe mu mato, abaume ba kwensha ifimato, abaishibe bemba bwino, pamo na babomfi ba kwa Solomone. 28 Kabili baile ku Ofiri+ no kusendako amatalanti ya golde+ imyanda ine na makumi yabili (420) no kuleta ku Mfumu Solomone.

10 Awe namfumu wa ku Sheba+ aleumfwa ululumbi lwa kwa Solomone pa mulandu we shina lya kwa Yehova.+ E ico aishile mu kumwesha na mepusho ayayafya.+ 2 Afikile na ku Yerusalemu ne bumba lya bantu ilikulu,+ ne ngamila+ ishasendele amafuta ya balsamu+ na golde iingi nga nshi na mabwe ayauma umutengo; kabili aliingile no kuya kuli Solomone no kutendeka ukumweba fyonse ifyali mu mutima wakwe.+ 3 Na o Solomone amulondolwelele fyonse ifyo aipwishe.+ Takuli nangu cimo ico imfumu ishamulondolwelele.+

4 Ilyo namfumu wa ku Sheba amwene amano yonse aya kwa Solomone+ ne ng’anda iyo akuulile,+ 5 ne fya kulya fya pe tebulo+ lyakwe ne mikalile ya babomfi bakwe ne mibombele ya ba kupekanya ifya kulya, ne mifwalile yabo, ne fya kunwa Solomone alenwa,+ na malambo ayo aletuula lyonse pa ng’anda ya kwa Yehova, awe namfumu alipeshiwe amano nga nshi.+ 6 E ico atile ku mfumu: “Ya cine amashiwi naumfwile ku calo ku mwandi pali iwe na pa mano yobe.+ 7 Na ine nshasumine aya mashiwi mpaka ne mwine naisa no kuimwena na menso yandi; kabili, mona! Ifyo banjebele tafifikile na kuli hafu.+ Amano ne cuma ifyo wakwata naficila ululumbi ulo naumfwile.+ 8 Balipaalwa abantu bobe;+ kabili balipaalwa+ ababomfi bobe aba abeminina pa ntanshi yobe lyonse, no kukutika ku mano yobe!+ 9 Yehova Lesa obe acindikwe,+ uwakutemenwe+ pa kukubika pa cipuna ca bufumu ica kwa Israele;+ pantu Yehova alitemwa Israele umuyayaya,+ ica kuti akusontele ukuba imfumu+ ku kupingula+ mu bulungami.”+

10 E lyo nomba apeele+ imfumu amatalanti ya golde+ umwanda umo na makumi yabili (120) na mafuta ya balsamu+ ayengi nga nshi na mabwe ayauma umutengo. Takwatalile akuletwa na kabili amafuta ya balsamu ayengi nga yalya ayo namfumu wa ku Sheba apeele Imfumu Solomone.

11 Kabili amato+ ya kwa Hiramu ayalesenda golde ukufuma ku Ofiri,+ yaletele imbao sha fimuti fya mialgumi+ ishingi na mabwe ayauma umutengo.+ 12 Ne mfumu yapangile ku mbao sha fimuti fya mialgumi, ifya kushintililapo ing’anda ya kwa Yehova+ ne ng’anda ya mfumu, e lyo na bansango+ ne filimba fya nsale+ ifya bakemba. Imbao sha fimuti fya mialgumi ishafula ifi tashatala ashisapo nangu ukumonwa ukufika na buno bushiku.

13 Kabili Imfumu Solomone yapeele namfumu wa ku Sheba fyonse ifyo alombele, ukufumyako fye ifyo amupeele ukulingana na bukapekape+ bwa Mfumu Solomone. E lyo nomba apilibwike no kuya ku calo cakwe, pamo na babomfi bakwe.+

14 Kabili golde+ iyaishile kuli Solomone mu mwaka umo yafinine amatalanti ya golde imyanda mutanda na makumi mutanda na mutanda (666),+ 15 ukufumyako iyafumine ku baume ba pa lwendo ne cibwesha ca bashimakwebo ne shamfumu+ shonse isha bena Arabia+ na balashi ba calo.

16 Kabili Imfumu Solomone yapangile inkwela ishikalamba imyanda ibili (200) isha golde iya kufula+ (yabikile na mashekele ya golde imyanda mutanda (600) pa nkwela imo na imo iikalamba),+ 17 ne nkwela ishinono isha golde iya kufula imyanda itatu (300) (yabikile na bamaina* batatu pa nkwela imo na imo iinono).+ E lyo nomba imfumu yafibikile mu ng’anda iitwa ati Umutengo wa Lebanone.+

18 Kabili imfumu yapangile icipuna ca bufumu+ ica meno ya nsofu+ no kubikako golde iisuma nga nshi.+ 19 Kabili pali amatabo mutanda (6) aya kunininapo ukuya pa cipuna ca bufumu, kabili icipuna calikwete no mutenge ku numa. Kabili pa cipuna pali ne fya kushintilishapo amaboko uku no ku, ne nkalamo+ shibili shaiminine ku mbali ya fya kushintilishapo amaboko.+ 20 Kabili pali inkalamo ikumi na shibili (12) pa matabo mutanda (6), ishali uku no ku. Takwali ubufumu ubwapangile icipuna ca bufumu nga ici.+

21 Ne fya kunwenamo fyonse ifya Mfumu Solomone fyali ifya golde, ne fipe fyonse ifya mu ng’anda iitwa ati Umutengo wa Lebanone+ fyali ifya golde iisuma nga nshi.+ Tamwali ica silfere nangu cimo; silfere tayali kantu mu nshiku sha kwa Solomone. 22 Pantu imfumu yalikwete ifimato fya ku Tarshishi+ pali bemba pamo ne fimato fya kwa Hiramu. Umuku umo lyonse nga papita imyaka itatu ifimato fya ku Tarshishi fyaleleta golde+ na silfere, na meno ya nsofu,+ na fikolwe na bapikoko.

23 Kabili Imfumu Solomone yali ne fyuma+ e lyo na mano+ ukucila imfumu shonse shimbi isha pano isonde. 24 Na ba pano isonde bonse balefwaya ukumona Solomone pa kuti bomfwe amano ayo Lesa abikile mu mutima wakwe.+ 25 Kabili cila muntu aleleta ubupe,+ ifipe fya silfere+ ne fipe fya golde ne fya kufwala ne fyanso fya bulwi+ na mafuta ya balsamu, bakabalwe ne mfalashi,+ e fyo balecita cila mwaka.+

26 Kabili Solomone alelonganika amaceleta na yambi na bakabalwe. Kabili akwete amaceleta ikana limo ne myanda ine (1,400) na bakabalwe+ amakana ikumi na yabili (12,000), ifyo abikile mu musumba wa maceleta, kabili mupepi ne mfumu mu Yerusalemu.+

27 Kabili imfumu yalengele silfere mu Yerusalemu ukuba kwati mabwe,+ ne mbao sha fimuti fya mukedari yalengele shaba kwati fimuti fya mukunyu ifyaba mu Shefela pantu fyalifulishe.+

28 Kabili kwali na bakabalwe abo Solomone alefumya ku Egupti, kabili ibumba lya bashimakwebo ba mfumu balepokelela bakabalwe abengi no kubashita.+ 29 Kabili kwaleisa lyonse iceleta ukufuma ku Egupti ilyaleshitwa pa ndalama sha silfere imyanda mutanda (600), na kabalwe aleshitwa pa ndalama umwanda umo na makumi yasano (150); kabili e fyo cali ku shamfumu shonse isha bena Hiti+ ne shamfumu sha bena Suria. Ukupitila muli shena e mo ifi fyaleishila.

11 Kabili Imfumu Solomone yatemenwe abanakashi abengi aba ku fyalo fimbi+ kumo no mwana mwanakashi uwa kwa Farao,+ na banakashi abena Moabu,+ abena Amone,+ abena Edomu,+ abena Sidone+ na bena Hiti,+ 2 abafumine mu nko isho Yehova asosele ku bana ba kwa Israele ukuti: “Mwikaya mu kati kabo,+ e lyo na bo bekesa mu kati kenu; pantu nangu cibe shani bakalula imitima yenu mukatampe no kukonka balesa babo.”+ Aba e banakashi abo Solomone+ atemenwe nga nshi. 3 Kabili akwete abakashi, banamfumu imyanda cinelubali (700), na bakanakashi imyanda itatu (300); na bakashi bakwe bayalwile+ umutima wakwe. 4 Nomba ilyo Solomone akotele,+ ninshi abakashi bakwe balyalula+ umutima wakwe ukulakonka balesa bambi;+ no mutima wakwe tawalolele onse+ kuli Yehova Lesa wakwe ngo mutima wa kwa Davidi wishi. 5 Kabili Solomone atendeke ukukonka Astarte+ lesa mwanakashi uwa bena Sidone, no kukonka Milkomu,+ ica bunani ica bena Amone. 6 Kabili Solomone atendeke ukucita ifyabipa+ mu menso ya kwa Yehova, kabili takonkele Yehova no mutima onse nga Davidi wishi.+

7 E lyo Solomone akuuliile Kemoshe+ icifulo ca kumupepelapo,+ ica bunani+ ica kwa Moabu pa lupili+ ulwalungatene+ na Yerusalemu, akuuliile na Moleke, ica bunani ica bana ba kwa Amone. 8 Kabili e fyo acitiile abakashi bakwe bonse aba ku fyalo fimbi+ abalefutumuna icushi ca malambo no kwipaila balesa babo amalambo.+

9 Awe Yehova afuliilwe+ Solomone, pa mulandu wa kuti umutima wakwe wafumine kuli Yehova Lesa wa kwa Israele,+ uwamoneke kuli ena imiku ibili.+ 10 Yehova alimwebele ukukanakonka balesa bambi;+ lelo taumfwilile. 11 E lyo Yehova atile kuli Solomone: “Pa mulandu wa kuti ifi e fyo wacita kabili tausungile icipangano candi ne fipope fyandi ifyo nakwebele, nkakupoka ubufumu, nkabupeela na ku mubomfi obe.+ 12 Lelo nshakacite ici mu nshiku shobe,+ pa mulandu wa kwa Davidi wiso.+ Nkabupoka mu minwe ya mwana obe.+ 13 Kwena te bufumu bonse nkapoka.+ Nkapeela umwana obe umukowa umo, pa mulandu wa kwa Davidi umubomfi+ wandi na pa mulandu wa Yerusalemu uo nasala.”+

14 Kabili Yehova aimishe umuntu uwa kulwisha+ Solomone,+ ishina lyakwe ali ni Hadadi umwina Edomu uwa mu bana ba mfumu. Ali mu Edomu.+ 15 Nomba ilyo Davidi acimfishe abena Edomu,+ ilyo Yoabu aishile ku kushiika abaipaiwe, aeseshe ukwipaya umwaume onse mu Edomu.+ 16 (Pantu imyeshi mutanda (6) Yoabu na bena Israele bonse baikele mulya mpaka aipeye abaume bonse mu Edomu.) 17 Kabili Hadadi alifulumwike, pamo na baume bamo abena Edomu aba mu babomfi ba kwa wishi no kuya ku Egupti, ninshi Hadadi acili umwaice. 18 E ico baimine ukufuma ku Midiani+ baya ku Parani no kusenda abaume ku Parani+ no kuya ku Egupti kuli Farao imfumu ya ku Egupti, na o amupeele ing’anda. Kabili amupeele ifya kulya, kabili amupeele ne mpanga. 19 Kabili Farao alitemenwe+ Hadadi, ica kuti amupeele umwanakashi wa kuupa,+ inkashi inankwe iya mukashi wakwe, inkashi inankwe iya kwa Tahipenese, uwali namfumu. 20 Umuya inshiku inkashi nankwe ya kwa Tahipenese amufyalile Genubati umwana umwaume, kabili Tahipenese amusumwinine+ mu ng’anda ya kwa Farao. Kabili Genubati aleikala mu ng’anda ya kwa Farao pamo na bana ba kwa Farao.

21 Kabili Hadadi aumfwile mu Egupti ukuti Davidi alilaala+ ukwalaala ifikolwe fyakwe no kuti Yoabu umukalamba wa bashilika alifwa.+ E ico Hadadi atile kuli Farao: “Lekeni ndeya+ ku calo candi.” 22 Lelo Farao amwipwishe ati: “Nga cinshi ushikwete pa kuti ufwaye ukuya ku calo cobe?” Na o amwebele ati: “Tapali; lelo muleke fye ndeya.”

23 Kabili Lesa amwimiishe uwa kumulwisha na umbi,+ ishina lyakwe ni Resone mwana Eliada, uwafulumwike kuli shikulu wakwe Hadadesere,+ imfumu ya ku Soba.+ 24 Alonganike na baume kabili aishileba umukalamba wa fipondo ifibelamina, ilyo Davidi aipeye abena Soba.+ E ico baile ku Damaseke+ no kwikala kulya no kutendeka ukuteka mu Damaseke. 25 Kabili alelwisha Israele inshiku shonse isha kwa Solomone,+ kabili uku na ko ninshi Hadadi alebalwisha. Kabili Resone apatile+ Israele nga nshi ilyo aleteka Siria.

26 Kwali na Yeroboamu+ mwana Nebati, umwina Efraimu uwa ku Sereda, uwali umubomfi wa kwa Solomone,+ ne shina lya kwa nyina lyali ni Serua, mukamfwilwa. Na o apondokele imfumu.+ 27 Kabili uyu e mulandu apondokele imfumu: Solomone akuulile apalundumana.+ Alisele icipunda icali mwi linga lya mu Musumba wa kwa Davidi wishi.+ 28 Kabili Yeroboamu ali mwaume wa bulamba, uwa maka.+ Ilyo Solomone amwene ukuti uyu mulumendo ali mubomfi wacincila,+ amusontele ukuba kangalila+ wa mulimo onse uwa kupatikishiwa+ uwa mu ng’anda ya kwa Yosefe.+ 29 Kabili pa nshita ilya Yeroboamu afumine mu Yerusalemu, na Ahiya+ kasesema umwina Shilo+ amusangile pa musebo, kabili Ahiya ali ne ca kufwala icipya; na aba babili bali beka mu mpanga. 30 Awe Ahiya abuulile ica kufwala icipya ico afwele no kucilepula+ mu fipimfya ikumi na fibili (12).+ 31 Kabili atile kuli Yeroboamu:

“Buula ifi fipimfya ikumi (10); pantu e fyo Yehova Lesa wa kwa Israele atila, ‘Mona, ndepoka ubufumu mu maboko ya kwa Solomone, kabili ndekupeela imikowa ikumi.+ 32 Kabili umukowa umo+ e ukaba wakwe pa mulandu wa mubomfi wandi Davidi+ na pa mulandu wa Yerusalemu,+ umusumba uo nasala mu mikowa yonse iya kwa Israele. 33 Umulandu cabela ifi ni co balinsha+ no kutendeka ukukontama kuli Astarte+ lesa mwanakashi uwa bena Sidone, na kuli Kemoshe+ lesa wa kwa Moabu, na kuli Milkomu+ lesa wa bana ba kwa Amone. Kabili tabale-enda mu nshila shandi pa kucita icalungama mu menso yandi ne fipope fyandi no bupingushi bwandi nga filya Davidi wishi alecita. 34 Lelo nshapoke ubufumu bonse mu minwe yakwe, pantu nkamucita ukuba umukalamba inshiku shonse isha bumi bwakwe, pa mulandu wa kwa Davidi umubomfi wandi uo nasalile,+ pantu alisungile amafunde yandi ne fipope fyandi. 35 Kabili nkapoka ubufumu mu minwe ya mwana wakwe no kubupeela kuli iwe, nkakupeela imikowa ikumi (10).+ 36 Kabili umwana wakwe nkamupeela umukowa umo, pa kuti umubomfi wandi Davidi akabe lyonse ne nyali mu Yerusalemu,+ umusumba uo naisalila ne mwine pa kuti mbikemo ishina lyandi.+ 37 Kabili ni we ndebuula, kabili ukateka pali fyonse ifyo umutima obe wafwaya,+ kabili ukaba imfumu pali Israele. 38 Kabili nga waumfwila fyonse ifyo nakweba, no kwenda mu nshila shandi no kucita icalungama mu menso yandi pa kusunga ifipope fyandi na mafunde yandi, nge fyo Davidi umubomfi wandi acitile,+ na ine nkaba na iwe,+ kabili nkakukuulila ing’anda ya pe, ifyo nakuulila Davidi,+ nkakupeela na Israele. 39 Kabili nkaseebanya abana ba kwa Davidi pa mulandu wa ici,+ lelo te nshiku shonse.’”+

40 Awe Solomone alafwaya ukwipaya Yeroboamu.+ E ico Yeroboamu alimine no kubutukila+ ku Egupti kuli Shishaki+ imfumu ya Egupti, aikele na mu Egupti mpaka imfwa ya kwa Solomone.

41 Kabili imilandu imbi iya kwa Solomone na fyonse ifyo acitile na mano yakwe, bushe tafyalembwa mwi buuku lya milandu ya kwa Solomone? 42 Kabili imyaka iyo Solomone atekele mu Yerusalemu pali Israele onse yali amakumi yane (40).+ 43 E lyo Solomone aleele ukwalaala ifikolwe fyakwe,+ kabili bamushiikile mu Musumba wa kwa Davidi+ wishi. Kabili Rehoboamu+ umwana wakwe alimupyene no kutendeka ukuteka.

12 Kabili Rehoboamu+ aile ku Shekemu, pantu ku Shekemu+ e ko abena Israele bonse bamubikiile pa bufumu. 2 Nomba ilyo fye Yeroboamu+ mwana Nebati aumfwile ifi, ninshi acili mu Egupti (pantu Yeroboamu alibutwike pa mulandu wa Mfumu Solomone, no kuyaikala mu Egupti),+ 3 e pa kutuma bamo ku kuyamwita. E lyo Yeroboamu no lukuta lonse ulwa kwa Israele baishile no kutendeka ukulanda kuli Rehoboamu abati:+ 4 “Wiso ena alengele ikoli lyesu ukuba ilyafina. Nomba iwe angushako+ umulimo wa kwa wiso ne koli+ ilyafina ilyo abikile pali ifwe, na ifwe tukalakubombela.”+

5 Na o abebele ati: “Kabiyeni kabili mukabwele pa numa ya nshiku shitatu.”+ Awe abantu baliile. 6 Kabili Imfumu Rehoboamu yatendeke ukupandana amano na bakalamba+ abalebombela Solomone wishi ilyo ali uwa mweo, aiti: “Bushe batini nkabasuke shani aba bantu?”+ 7 Na bo basosele kuli ena abati: “Nga buno bushiku imwe mwaba umubomfi wa aba bantu no kubabombela,+ mubasuke no kubeba amashiwi ayasuma;+ ninshi bakaba ababomfi benu inshiku shonse.”+

8 Lelo yalisuulile ifyo abakalamba baipandile amano, yatendeke no kupandana amano na balumendo abo yakulile na bo,+ abaleibombela.+ 9 Kabili yabepwishe ati: “Bushe batini mano nshi mwalampandako+ pa fyo tukasuka aba bantu abanjebele abati, ‘Angusheniko ikoli ilyo shinwe abikile pali ifwe’?”+ 10 Na balumendo abakulile na yo bayaswike ati: “Aba bantu abacilanda na imwe abati, ‘Wiso ena alengele ikoli lyesu ukufina, lelo iwe ulyangusheko,’ mukabebe+ amuti, ‘Ine nkamucusha ukucila ifyo tata amucushishe.*+ 11 Tata ena abikile ikoli ilyafina pali imwe; nomba ine nkalilenga ukufininako.+ Tata amufopawile ifikoti, lelo ine nkamufopaula ifikoti ifyatapata nga bakaling’ongo.’”+

12 Awe Yeroboamu na bantu bonse baishile kuli Rehoboamu pa bushiku bwalenga shitatu, nga mulya mwine imfumu yasosele aiti: “Mukabwele pa numa ya nshiku shitatu.”+ 13 Kabili imfumu yalalanda na bantu bukali bukali,+ no kusuula ukupanda amano kwa bakalamba uko baipandile.+ 14 Kabili yalandile na bo ukulingana no kupanda amano ukwa balumendo,+ aiti: “Tata ena abikile ikoli ilyafina pali imwe; lelo ine ndelundako kwi koli lyenu. Tata amufopawile ifikoti, lelo ine nkamufopaula ifikoti ifyatapata nga bakaling’ongo.”+ 15 Awe imfumu tayakutike ku bantu,+ pantu ukwaluka kwa fintu ukwacitike kwafumine kuli Yehova,+ pa kuti afikilishe amashiwi+ ayo Yehova asoseele muli Ahiya+ umwina Shilo kuli Yeroboamu mwana Nebati.

16 Ilyo abena Israele bonse bamwene ukuti imfumu yakaana ukumfwa kuli bena, e lyo bayaswike imfumu abati: “Bushe balatwakanyako ifya kwa Davidi?+ Tapali ubupyani bwesu muli mwana Yese. Natuleya kuli balesa besu,+ mwe bena Israele. Nomba uimwene ing’anda yobe, we Davidi!”+ E lyo abena Israele baile ku matenti yabo. 17 Lelo abana ba kwa Israele abaleikala mu misumba ya kwa Yuda, bena Rehoboamu e walebateka.+

18 E lyo Imfumu Rehoboamu yatumine Adoramu,+ uwaleangalila abalebomba umulimo wa kupatikishiwa,+ kabili abena Israele bonse bamupoolele amabwe,+ na o alifwile. Ne Mfumu Rehoboamu yaninine mwi celeta no kufulumukila ku Yerusalemu. 19 Kabili abana ba kwa Israele batwalilile ukusangukila+ aba mu ng’anda ya kwa Davidi ukufika na buno bushiku.+

20 Nomba ilyo abena Israele bonse baumfwile fye ukuti Yeroboamu nabwela, apo pene batumine bamo aba kuyamwita ukwisa ku lukuta kabili bamubikile ukuba imfumu pali Israele onse.+ Takwali uwalekonka aba mu ng’anda ya kwa Davidi kano fye umukowa wa kwa Yuda.+

21 Ilyo Rehoboamu afikile mu Yerusalemu,+ apo pene alonganike bonse aba mu ng’anda ya kwa Yuda no mukowa wa kwa Benjamini,+ abaume bene bene aba bulwi amakana umwanda umo na makana cinekonsekonse (180,000), pa kuti ayelwisha aba mu ng’anda ya kwa Israele, pa kuti babweseshe ubufumu kuli Rehoboamu mwana Solomone. 22 E lyo nomba amashiwi ya kwa Lesa wa cine yaishile kuli Shemaya+ umuntu wa kwa Lesa wa cine,+ ayati: 23 “Sosa kuli Rehoboamu mwana Solomone imfumu ya kwa Yuda na kuli bonse aba mu ng’anda ya kwa Yuda na Benjamini na bantu abashala, auti, 24 ‘Yehova atila: “Mwiya mu kulwisha bamunyinenwe abana ba kwa Israele.+ Bweleleni cila muntu ku mwenu, pantu ici cifumine kuli ine.”’”+ Awe baumfwilile amashiwi ya kwa Yehova,+ kabili babwelele ku mwabo nge fyo Yehova abebele.+

25 Kabili Yeroboamu akuulile Shekemu+ mu calo ca mpili ica kwa Efraimu no kwikala mulya. Kabili ukufuma kulya ailekuula Penuele.+ 26 Na Yeroboamu atendeke ukulanda mu mutima+ wakwe ati: “Nomba ubufumu bukabwelela ku ng’anda ya kwa Davidi.+ 27 Aba bantu nga bakonkanyapo ukuya ku kupeela amalambo mu ng’anda ya kwa Yehova mu Yerusalemu,+ ne mitima yabo na yo ikabwelela kuli shikulwibo, Rehoboamu imfumu ya kwa Yuda. Kabili bakanjipaya+ no kubwelela kuli Rehoboamu imfumu ya kwa Yuda.” 28 Awe imfumu yalitontonkenyepo+ kabili yapangile abana ba ng’ombe+ babili aba golde no kweba abantu aiti: “Mulecula sana ukuya ku Yerusalemu. We Israele, mona, Lesa obe+ uyu uwakufumishe mu calo ca Egupti.”+ 29 E ico abikile umwana wa ng’ombe umo mu Betele,+ na umbi mu calo ca kwa Dani.+ 30 Kabili ici cabalengele ukubembuka,+ na bantu baleya ku mwana wa ng’ombe uwali mu calo ca kwa Dani.

31 Kabili atendeke ukupanga ing’anda pa fifulo fya kupepelapo+ no kulenga abantu yaweyawe ukuba bashimapepo, abashali ba mu bana ba kwa Lebi.+ 32 Kabili Yeroboamu apekenye umutebeto mu mweshi walenga cinekonsekonse (8) pa bushiku bwalenga ikumi na shisano (15) mu mweshi, kwati mutebeto uwali mu Yuda,+ pa kuti kube ukutuula amalambo pa ciipailo ico apangile mu Betele, ku kupeela amalambo ku bana ba ng’ombe abo apangile. Kabili abikile bashimapepo ba kubombela ku fifulo fya kupepelapo ifyo apangile mu Betele.+ 33 Kabili atendeke ukutuula imituulo pa ciipailo ico apangile mu Betele pa bushiku bwalenga ikumi na shisano (15), mu mweshi walenga cinekonsekonse (8), umweshi uo apangile umwine.+ Kabili apekanishishe abana ba kwa Israele umutebeto no kutuula imituulo pa ciipailo ku kufutumuna amalambo.+

13 Kabili kwali umuntu+ wa kwa Lesa uwafumine ku Yuda, nge fyo Yehova amwebele,+ aile na ku Betele, ninshi Yeroboamu naiminina ku ciipailo+ ku kufutumuna icushi ce lambo.+ 2 E lyo abilikishe ku ciipailo, nge fyo Yehova amwebele ati: “We ciipailo, we ciipailo, e fyo Yehova atila, ‘Mona! Kuli umwana uukafyalwa mu ng’anda ya kwa Davidi, ishina lyakwe ni Yoshia!+ Kabili akepaya bashimapepo aba pa fifulo fya kupepelapo abalefutumwina icushi ce lambo pali iwe no kubatuula nga malambo pali iwe, na mafupa ya bantu akayocela pali iwe.’”+ 3 Kabili apeele icishibilo+ pa bushiku bulya, ica kuti: “Ici e cishibilo ico Yehova asosa: Mona! Iciipailo nacilepuka, kabili imito ya pa ciipailo yalasalangana.”

4 Awe ilyo imfumu Yeroboamu yaumfwile fye amashiwi ya muntu wa kwa Lesa wa cine ayo abilikishe ku ciipailo mu Betele, ilyo line yafumishe ukuboko kwa iko pa ciipailo, no kusosa ati: “Mwikateni!”+ Na apo pene ukuboko kwa iko uko yatambike kwalyumine, yafililwe no kukubwesha.+ 5 Ne ciipailo calilepwike pa kati ica kuti imito yalisalangene ukufuma pa ciipailo, ukulingana ne cishibilo ico umuntu wa kwa Lesa wa cine apeele nge fyo Yehova amwebele.+

6 E lyo imfumu yaebele umuntu wa kwa Lesa wa cine aiti: “Shi nashako ubukali bwa kwa Yehova Lesa obe no kumpepelako ukuti ukuboko kwandi kube ukutuntulu.”+ Awe umuntu wa kwa Lesa wa cine anashishe+ ubukali bwa kwa Yehova, ica kuti ukuboko kwa mfumu kwalipolele, kwaba nge fyo kwali kale.+ 7 Kabili imfumu yaebele umuntu wa kwa Lesa wa cine aiti: “Natuleya ku mwandi, uye ulye ifya kulya,+ nkupeele no bupe.”+ 8 Lelo umuntu wa kwa Lesa wa cine atile ku mfumu: “Nangu wampeela hafu wa ng’anda+ yobe te kuti nje nobe+ no kulya ifya kulya nelyo ukunwa amenshi kuno kuntu. 9 Pantu Yehova anjebele ukuti, ‘Wilya ifya kulya+ nelyo ukunwa amenshi, kabili wibwelela mu nshila iyo wacipitamo.’” 10 Kabili apitile inshila imbi, tabwelele mu nshila iyo aishilemo ku Betele.

11 Kwali na kasesema+ umukote uwaleikala mu Betele kabili abana bakwe balishile no kumushimikila fyonse ifyo umuntu wa kwa Lesa wa cine acitile pali bulya bushiku mu Betele na mashiwi ayo aebele imfumu, kabili bashimikile shibo ifi fyonse. 12 E lyo shibo abepwishe ati: “Ni nshila nshi apitile?” Awe abana bakwe bamulangile inshila iyo umuntu wa kwa Lesa wa cine uwafumine ku Yuda apitile. 13 Na o e pa kweba abana bakwe ati: “Mpekanishisheni impunda.” Na bo bamupekanishishe impunda,+ kabili alinininepo, alaya.

14 Awe akonkele umuntu wa kwa Lesa wa cine kabili amusangile naikala mwi samba lya muti uukalamba.+ Amwipwishe ati: “Bushe e iwe we muntu wa kwa Lesa wa cine uufumine ku Yuda?”+ Na o atile: “Nine wine.” 15 E lyo amwebele ati: “Natuleya ku mwandi, uye ulye ifya kulya.” 16 Lelo atile: “Te kuti mbweluluke no kuya na iwe nangu kwingila mu mobe. Kabili te kuti ndye ifya kulya nelyo ukunwa amenshi kuno kuntu.+ 17 Pantu e fyo Yehova+ asosele kuli ine, ati, ‘Wilya ifya kulya nelyo ukunwa amenshi kulya. Kabili wibwelela mu nshila iyo wacipitamo.’”+ 18 Na o amwebele ati: “Na ine ndi kasesema nga iwe, kabili malaika+ acinjeba ifyo Yehova alandile, ukutila: “Leka abwele nobe ku mobe pa kuti alye ifya kulya no kunwa amenshi.’” (Amubepele fye.)+ 19 Awe abwelulwike nankwe pa kuti alye ifya kulya ku mwakwe no kunwa amenshi.+

20 Kabili ilyo bali pa tebulo, amashiwi+ ya kwa Yehova yaishile kuli kasesema uwamubweseshe; 21 na o alabilikisha ku muntu wa kwa Lesa wa cine uwafumine ku Yuda, ati: “Yehova atila, ‘Pa mulandu wa kuti taumfwilile+ icipope ca kwa Yehova kabili tausungile ifunde lya kwa Yehova Lesa obe ilyo akwebele,+ 22 lelo naubwela ku kulya ifya kulya no kunwa amenshi ku cifulo uko akwebele ati: “Wilyako ifya kulya nelyo ukunwako amenshi,” icitumbi cobe tacakaye ku nshiishi sha fikolwe fyobe.’”+

23 Nomba ilyo apwile ukulya ifya kulya no kunwa amenshi, apo pene fye amupekanishishe impunda, e kutila, ukupekanishisha kasesema uo abweseshe. 24 Na o alimine alaya. E lyo inkalamo+ yamusangile mu musebo no kumwipaya,+ ne citumbi cakwe capooselwe mu musebo. Ne mpunda yaiminine mupepi na co, kabili inkalamo yaiminine mupepi ne citumbi. 25 Kabili, moneni, abaume balepita, kabili bamwene icitumbi nacipooswa pa musebo ne nkalamo naiminina mupepi ne citumbi. E lyo baile no kushimika mu musumba umwaleikala kasesema umukote.

26 Ilyo kasesema uwamubweseshe mu nshila aumfwile ici, asosele apo pene fye ati: “Muntu wa kwa Lesa wa cine uushaumfwilile icipope ca kwa Yehova;+ e ico Yehova amupeele ku nkalamo, ukuti imutakanye no kumwipaya, nge fyo Yehova amwebele.”+ 27 Aebele na bana bakwe ati: “Mpekanisheni impunda.” Na bo bamupekanishishe impunda.+ 28 Awe alimine aya no kusanga icitumbi pa musebo, ne mpunda ne nkalamo nafiminina mupepi ne citumbi. Inkalamo tayaliile icitumbi nangu ukutakaanya impunda.+ 29 Kabili kasesema aimishe icitumbi ca muntu wa kwa Lesa wa cine no kucibika pa mpunda no kucibwesha. Aishile na mu musumba wa kwa kasesema umukote pa kuti amulooshe no kumushiika. 30 Abikile ne citumbi cakwe mu nshiishi yakwe; kabili alemuloosha ati:+ “Awe cabipa, munyinane!” 31 Kabili ilyo amushiikile, aebele abana bakwe ati: “Nga nafwa, mukanshiike umo bashiikile umuntu wa kwa Lesa wa cine. Mukabike amafupa yandi mupepi na mafupa yakwe.+ 32 Pantu nangu cibe shani amashiwi ayo abilishe nge fyo Yehova amwebele pa ciipailo+ icili mu Betele na pa mayanda yonse aya pa fifulo fya kupepelapo+ mu misumba ya Samaria,+ yakafikilishiwa.”+

33 Pa numa ya ifi, Yeroboamu talekele imibele yakwe iyabipa, lelo abwekeshepo ukulenga abantu yaweyawe ukuba bashimapepo ba pa fifulo fya kupepelapo.+ Na onse uwafwaya, alemusonta,+ ati: “Mulekeni na o abe shimapepo wa pa cifulo ica kupepelapo.” 34 Kabili ici calengele ukuti aba mu ng’anda ya kwa Yeroboamu+ babembuke kabili calengele bonaulwe no kuloba.+

14 Kabili pa nshita ilya Abiya mwana Yeroboamu alilwele.+ 2 E ico Yeroboamu aebele umukashi wakwe ati: “Ima, kabili uifungushanye+ pa kuti beishiba ukuti uli mukashi wa kwa Yeroboamu, uye na ku Shilo. Mona! Kulya e kuli kasesema Ahiya.+ E walandile pali ine ati nkaba imfumu ya aba bantu.+ 3 Usende ne mikate+ ikumi (10) ne mikate yalowa no mutondo+ wa buci, no kuya kuli ena.+ E walayakweba ifikacitika ku mwana.”+

4 Awe umukashi wa kwa Yeroboamu acitile ifyo fine. Kabili alimine no kuya ku Shilo+ no kufika ku ng’anda ya kwa Ahiya. Na o Ahiya talemona, pantu amenso yakwe tayalelolesha pa mulandu wa bukote.+

5 Kabili Yehova aebele Ahiya ati: “Mona, muka Yeroboamu aleisa ku kwipusha iwe pa mwana wakwe; pantu nalwala. Ifi ne fi e fyo umwebe. Nomba ilyo alefika fye, aleilufyanya.”+

6 Awe ilyo Ahiya aumfwile fye inshindo sha makasa yakwe pa kwingila pa mwinshi, alasosa ati: “Ingila, we muka Yeroboamu.+ Nga cinshi ico uleilufyanishisha ilyo ine nintumwa kuli iwe no bukombe ubukali? 7 Kabiye, webe Yeroboamu, auti, ‘Yehova Lesa wa kwa Israele atila: “Pa mulandu wa kuti nakwimishe mu kati ka bantu bobe ukuti nkusonte ukuba intungulushi ya bantu bandi abena Israele,+ 8 kabili napokele+ ubufumu ku ng’anda ya kwa Davidi no kukupeela, na iwe tauli ifyali umubomfi wandi Davidi, uwaleumfwila amafunde yandi kabili uwalenkonka no mutima wakwe onse pa kulacita lyonse icalungama mu menso yandi,+ 9 lelo iwe watendeke ukucita ifyabipa ukucila abakutangilile bonse, kabili waileipangila lesa+ umbi ne fimpashanya ifyaengwa+ pa kuti unkalifye,+ kabili ine walimfutatila;+ 10 e mulandu wine nkaletela ububi pa ba mu ng’anda ya kwa Yeroboamu, kabili nkepaya umwaume+ onse uwa muli Yeroboamu, uwapeleelwa no mulanda mu Israele.+ Nkapyanga na monse mu ng’anda ya kwa Yeroboamu,+ ifyo umuntu apyanga amafi mpaka yapwa yonse.+ 11 Umuntu onse uwa muli Yeroboamu uwafwila mu musumba, imbwa shikamulya;+ no wafwila mu mpanga, ifyuni fya mu lwelele fikamulya,+ pantu Yehova nasosa.”’

12 “Na iwe ima, kabiye ku mobe. Ilyo amakasa yobe yanyanta fye mu musumba, umwana alefwa. 13 Na bena Israele bonse bakamuloosha+ no kumushiika, pantu uyu eka fye mu ba mu ng’anda ya kwa Yeroboamu e ukashiikwa mu nshiishi; pantu Yehova nasangamo ubusuma muli ena mu ba mu ng’anda ya kwa Yeroboamu.+ 14 Kabili Yehova akaimisha imfumu+ iya kuteka abena Israele iikalofya aba mu ng’anda ya kwa Yeroboamu mu bushiku bulya, kabili nga alefwaya kuti acite fyo nomba line.+ 15 Kabili Yehova akooma Israele, ifyo itete lisunkana mu menshi.+ Akanukula+ na Israele ukufuma pa mushili+ uno uusuma uo apeele ifikolwe fyabo. Kabili akabasalanganishisha+ bushilya bwa Mumana,+ pa mulandu wa kuti bapangile ifimuti fyaimikwa,+ no kukalifya+ Yehova. 16 Kabili akalekelesha+ Israele pa mulandu wa membu isho Yeroboamu abembwike ne sho alengele Israele ukubembuka.”+

17 Awe muka Yeroboamu alimine no kuya, kabili afikile ku Tesa.+ Ilyo afikile pa mwinshi wa ng’anda yakwe, umwana alifwile. 18 Kabili balimushiikile, na bena Israele bonse balimulooseshe nge fyo Yehova asoseele mu mubomfi wakwe Ahiya kasesema.

19 Awe imilandu iyashalako iya kwa Yeroboamu, ifyo alwile+ ne fyo atekele, moneni, yalilembwa mwi buuku+ lya milandu ya shamfumu sha kwa Israele. 20 Kabili inshiku isho Yeroboamu atekele shali imyaka amakumi yabili na ibili (22), e lyo aleele ukwalaala ifikolwe fyakwe;+ kabili Nadabu+ umwana wakwe alimupyene no kutendeka ukuteka.

21 Rehoboamu+ mwana Solomone, ena atendeke ukuteka muli Yuda. Kabili Rehoboamu ali ne myaka amakumi yane na umo (41) ilyo atendeke ukuteka, kabili atekele imyaka ikumi na cinelubali (17) mu Yerusalemu, umusumba+ uo Yehova asalile mu mikowa+ yonse iya kwa Israele ku kubikamo ishina lyakwe.+ Ne shina lya kwa nyina ni Naama umwina Amone.+ 22 Kabili Yuda acitile ifyabipa mu menso ya kwa Yehova,+ ica kuti bamulengele ukuba no bufuba+ ukucila ifyo ifikolwe fyakwe fyonse fyacitile ku membu isho babembwike.+ 23 Na bo baleipangila ififulo fya kupepelapo+ ne fyaimikwa ifya mabwe+ ne fimuti fyaimikwa+ pa kapili+ konse na mwi samba lya muti onse uwalelema.+ 24 Mu calo mwali na bacilende abaume aba pe tempele.+ Bacitile fyonse ifya bunani ifyo inko isho Yehova atamfishe ku cinso ca bana ba kwa Israele shacitile.+

25 Kabili mu mwaka walenga busano ukutula apo Rehoboamu atendekele ukuteka, Shishaki+ imfumu ya ku Egupti yaishile ku kulwisha Yerusalemu. 26 Kabili yasendele ifipe fya mu ng’anda ya kwa Yehova ne fipe fya mu ng’anda ya mfumu;+ yasendele fye fyonse.+ Yasendele ne nkwela sha golde shonse isho Solomone apangile.+ 27 E ico Rehoboamu apangiilepo inkwela sha mukuba, ashipeele na mu minwe ya bakalamba abaleangalila inkombe,+ abalinshi abalelonda pa mwinshi wa ng’anda ya mfumu.+ 28 Kabili lyonse imfumu nga yaisa ku ng’anda ya kwa Yehova, inkombe shalesenda inkwela, kabili shaleshibwesesha ku muputule wa balinshi uwa nkombe.+

29 Imilandu iyashalako iya kwa Rehoboamu na fyonse ifyo acitile, bushe tafyalembwa mwi buuku+ lya milandu ya shamfumu sha kwa Yuda? 30 Kabili lyonse Rehoboamu na Yeroboamu balelwa inkondo.+ 31 Kabili Rehoboamu asukile alaala ukwalaala ifikolwe fyakwe, ashiikilwe ukwashiikwa ifikolwe fyakwe mu Musumba wa kwa Davidi.+ Ne shina lya kwa nyina lyali ni Naama umwina Amone.+ Na Abiyamu+ umwana wakwe alimupyene no kutendeka ukuteka.

15 Kabili mu mwaka walenga ikumi na cinekonsekonse (18) uwa kuteka kwa Mfumu Yeroboamu+ mwana Nebati,+ Abiyamu atendeke ukuteka mu calo ca Yuda.+ 2 Atekele imyaka itatu mu Yerusalemu; kabili ishina lya kwa nyina ni Maaka+ umwishikulu wa kwa Abishalomu.+ 3 Kabili alecita imembu shonse isha kwa wishi isho acitile ku numa; no mutima wakwe onse+ tawali kuli Yehova Lesa wakwe, ngo mutima wa kwa Davidi icikolwe cakwe.+ 4 Pantu, pa mulandu wa kwa Davidi,+ Yehova Lesa wakwe amupeele inyali+ mu Yerusalemu pa kupyanikapo umwana wakwe pali ena pa kuti Yerusalemu atwalilile ukubako,+ 5 pantu Davidi acitile ifyalungama mu menso ya kwa Yehova, kabili talekele ukucita fyonse ifyo Lesa amwebele inshiku shonse isha bumi bwakwe,+ kano fye mu mulandu wa kwa Uria umwina Hiti.+ 6 Kabili Rehoboamu alelwa na Yeroboamu inshiku shakwe shonse.+

7 Kabili imilandu yashalako iya kwa Abiyamu na fyonse ifyo acitile, bushe tafyalembwa mwi buuku+ lya milandu ya shamfumu sha kwa Yuda? Kabili Abiyamu na Yeroboamu na bo balelwa inkondo.+ 8 Kabili Abiyamu asukile alaala ukwalaala ifikolwe fyakwe, ashiikilwe na mu Musumba wa kwa Davidi;+ no mwana wakwe Asa+ alimupyene no kutendeka ukuteka.

9 Ilyo Yeroboamu imfumu ya Israele akumenye imyaka amakumi yabili (20) pa bufumu bwakwe, e lyo Asa atendeke ukuteka mu Yuda. 10 Kabili atekele imyaka amakumi yane na umo (41) mu Yerusalemu. Ishina lya kwa nakulu ni Maaka+ umwishikulu wa kwa Abishalomu.+ 11 Awe Asa acitile ifyalungama mu menso ya kwa Yehova, nga filya Davidi icikolwe cakwe alecita.+ 12 Afumishe na mu calo bacilende abaume aba pe tempele+ no kufumyamo ifilubi+ fya bunani ifyo ifikolwe fyakwe fyapangile.+ 13 Kabili afumishe na Maaka+ nakulu, pali bunamfumu,+ pantu alipangile akalubi ka bunani ako alebomfya pa kupepa icimuti caimikwa; kabili Asa aonawile akalubi+ kakwe aka bunani no kukocela+ mu mupokapoka wa Kidrone.+ 14 Ififulo fya kupepelapo+ fyena tafyonawile.+ Lelo umutima wa kwa Asa onse wali kuli Yehova inshiku shakwe shonse.+ 15 Atendeke no kuleta mu ng’anda ya kwa Yehova ifipe ifyo wishi alengele ukuba ifya mushilo ne fipe ifyo umwine Asa alengele ukuba ifya mushilo, e kutila, silfere na golde ne fipe fimbi.+

16 Kabili Asa na Baasha+ imfumu ya Israele balelwa inkondo inshiku shabo shonse. 17 E ico Baasha imfumu ya Israele alile mu kulwisha Yuda no kutendeka ukukuula umusumba wa Rama,+ ukuti umuntu nangu umo elaya nelyo ukufuma kuli Asa imfumu ya kwa Yuda.+ 18 Awe Asa na o e pa kubuula silfere na golde yonse iyashele mu cipao ca ng’anda ya kwa Yehova ne cipao ca ng’anda ya mfumu no kupeela ababomfi bakwe. E lyo Imfumu Asa yabatumine kuli Ben-hadadi+ mwana Tabrimone mwana Heseyone, imfumu ya ku Siria,+ uwaleikala mu Damaseke,+ aiti: 19 “Paliba icipangano pali ine na iwe, e lyo na pali tata na wiso. Mona, nakutumina ica bupe+ ca silfere na golde. Toba icipangano wapangene na Baasha imfumu ya Israele, pa kuti afume pali ine.”+ 20 Na o Ben-hadadi akutike ku Mfumu Asa no kutuma abakalamba ba bashilika bakwe ku kulwisha imisumba ya kwa Israele, no kuuma Iyone+ na Dani+ na Abele-bete-maaka+ na Kinerete, ukufika fye na mu calo conse ica kwa Naftali.+ 21 Nomba ilyo Baasha aumfwile fye ifi, alekele ukukuula Rama+ apo pene, aikele na mu Tesa.+ 22 Kabili Imfumu Asa yaitile abena Yuda bonse,+ takwashele nangu umo, kabili basendele amabwe ne mbao ifyali muli Rama ifyo Baasha alekuulila; ne Mfumu Asa yakuulileko Geba+ muli Benjamini, na Mispa.+

23 Nomba imilandu yashalako iya kwa Asa na bumpalume bwakwe bonse na fyonse ifyo acitile ne misumba iyo akuulile, bushe tafyalembwa mwi buuku+ lya milandu ya shamfumu sha kwa Yuda? Ni mu bukote+ fye e mo alwele amakasa.+ 24 Awe Asa aleele ukwalaala ifikolwe fyakwe,+ kabili ashiikilwe ukwashiikwa ifikolwe fyakwe mu Musumba wa kwa Davidi icikolwe cakwe.+ No mwana wakwe Yehoshafati+ alimupyene no kutendeka ukuteka.

25 Nomba Nadabu+ mwana Yeroboamu ena atendeke ukuteka mu Israele mu mwaka walenga bubili uwa kwa Asa imfumu ya kwa Yuda; kabili atekele Israele imyaka ibili. 26 Kabili acitile ifyabipa+ mu menso ya kwa Yehova no kwenda mu nshila sha kwa wishi+ na mu lubembu lwakwe ulo alengele Israele ukubembuka.+ 27 Kabili Baasha+ mwana Ahiya uwa mu ng’anda ya kwa Isakari atendeke ukumupangila. Kabili Baasha amwipaile mu Gibetone,+ uwali wa baPelishiti, ninshi Nadabu na Israele onse balesansa Gibetone. 28 E ico Baasha amwipeye mu mwaka walenga butatu uwa kuteka kwa kwa Asa imfumu ya kwa Yuda kabili alimupyene no kutendeka ukuteka.+ 29 Nomba ilyo fye atendeke ukuteka, aipeye bonse aba mu ng’anda ya kwa Yeroboamu. Talekele nangu umo ukushalapo uwa mweo muli Yeroboamu ukufikila abepaya, nge fyo Yehova asoseele mu mubomfi wakwe Ahiya umwina Shilo,+ 30 pa mulandu wa membu isho Yeroboamu abembwike+ ne sho alengele Israele ukubembuka, na pa mulandu wa fyo akalifye Yehova Lesa wa kwa Israele.+ 31 Nomba imilandu yashalako iya kwa Nadabu na fyonse ifyo acitile, bushe tafyalembwa mwi buuku+ lya milandu ya shamfumu sha kwa Israele? 32 Kabili Asa na Baasha imfumu ya kwa Israele balelwa inkondo inshiku shabo shonse.+

33 Mu mwaka walenga butatu uwa kuteka kwa kwa Asa imfumu ya kwa Yuda, Baasha mwana Ahiya ali imfumu ya kwa Israele onse mu Tesa pa myaka amakumi yabili na ine (24).+ 34 Kabili acitile ifyabipa mu menso ya kwa Yehova+ no kwenda mu nshila sha kwa Yeroboamu+ na mu lubembu lwakwe ulo alengele Israele ukubembuka.+

16 Icebo ca kwa Yehova caishile kuli Yehu+ mwana Hanani+ pali Baasha aciti: 2 “Pa mulandu wa kuti nakwimishe mu lukungu+ ukuti nkusonte ukuba intungulushi pa bantu bandi abena Israele,+ lelo iwe waendele mu nshila sha kwa Yeroboamu+ no kulenga abantu bandi abena Israele ukubembuka pa kunkalifya ku membu shabo,+ 3 mona, nkalofya Baasha na ba mu ng’anda yakwe, kabili nkacita aba mu ng’anda yakwe kwati ba mu ng’anda ya kwa Yeroboamu mwana Nebati.+ 4 Umuntu onse uwa muli Baasha uwafwila mu musumba, imbwa shikamulya; no wafwila mu mpanga, ifyuni fya mu lwelele fikamulya.”+

5 Kabili imilandu yashalako iya kwa Baasha ne fyo acitile na bumpalume bwakwe, bushe tafyalembwa mwi buuku+ lya milandu ya shamfumu sha kwa Israele? 6 Kabili Baasha aleele ukwalaala ifikolwe fyakwe, ashiikilwe na mu Tesa;+ no mwana wakwe Ela alimupyene no kutendeka ukuteka. 7 Kabili muli kasesema Yehu mwana Hanani, e mwaishiile amashiwi ya kwa Yehova pali Baasha na pa ba mu ng’anda yakwe,+ pa mulandu wa bubi bonse ubo acitile mu menso ya kwa Yehova pa kumukalifya+ ku milimo ya minwe yakwe,+ pa kuti ibe nge ng’anda ya kwa Yeroboamu, kabili pantu aipeye Nadabu.+

8 Mu mwaka walenga amakumi yabili na mutanda (26) ukutula apo Asa imfumu ya Yuda atendekele ukuteka, e mo Ela mwana Baasha atendekele ukuteka Israele mu Tesa kabili atekeleko fye imyaka ibili. 9 Awe umubomfi wakwe Simri+ umukalamba wa bashilika uwaleangalila hafu wa maceleta atendeke ukumupangila, ilyo ali mu Tesa alenwa+ fye mu ng’anda ya kwa Arsa, uwaleangalila aba mu ng’anda+ mu Tesa. 10 Awe Simri alingiile, amupuma no kumwipaya+ mu mwaka walenga amakumi yabili na cinelubali (27) uwa kuteka kwa kwa Asa imfumu ya kwa Yuda, kabili alimupyene no kutendeka ukuteka. 11 Kabili ilyo atendeke ukuteka, ilyo aikele fye pa cipuna cakwe ica bufumu, aipeye bonse aba mu ng’anda ya kwa Baasha. Tashilepo umwaume+ nangu umo atemwa aba kulandula umulopa+ wakwe nangu ifibusa fyakwe. 12 E fyo Simri alofeshe bonse aba mu ng’anda ya kwa Baasha,+ nge fyo Yehova+ asosele pali Baasha muli Yehu kasesema,+ 13 pa mulandu wa membu shonse isha kwa Baasha ne membu sha mwana wakwe Ela+ isho babembwike ne sho balengele Israele ukubembuka pa kukalifya Yehova Lesa wa kwa Israele ku tulubi twabo utwa fye.+ 14 Kabili imilandu yashalako iya kwa Ela na fyonse ifyo acitile, bushe tafyalembwa mwi buuku+ lya milandu ya shamfumu sha kwa Israele?

15 Mu mwaka walenga amakumi yabili na cinelubali (27) ukutula apo Asa imfumu ya Yuda atendekele ukuteka, e mo Simri abele imfumu pa nshiku fye cinelubali (7)+ mu Tesa, ilyo abantu bapangile inkambi ku kulwisha Gibetone,+ umusumba wa baPelishiti. 16 Na bantu abapangile inkambi baumfwile ukuti: “Simri napangila imfumu no kuipaya naipaya.” E ico abena Israele bonse basontele Omri+ uwali umukalamba wa bashilika ukuba imfumu ya Israele pa bushiku bulya mu nkambi. 17 E lyo Omri na bena Israele bonse bafumine ku Gibetone no kuyashinga+ Tesa. 18 Awe Simri ashimona fye ukuti umusumba wapokwa, aingile mu lupungu lwa kwikalamo ulwa ng’anda ya mfumu, aocele ne ng’anda ya mfumu no kupiila mulya mwine, kabili alifwile,+ 19 pa membu isho abembwike pa kucita ifyabipa mu menso ya kwa Yehova,+ pa kwenda mu nshila sha kwa Yeroboamu na mu lubembu lwakwe ulo acitile pa kulenga Israele ukubembuka.+ 20 Nomba imilandu yashalako iya kwa Simri ne fyo apangiile imfumu, bushe tafyalembwa mwi buuku+ lya milandu ya shamfumu sha kwa Israele?

21 E lyo abena Israele bapaatukene mu mabumba yabili.+ Kwali ibumba limo ilyakonkele Tibni mwana Ginati, ku kumubika pa bufumu, ne bumba limbi ilyakonkele Omri. 22 Kabili abalekonka Omri bacimfishe abalekonka Tibni mwana Ginati ica kuti Tibni alifwile, kabili Omri atendeke ukuteka.

23 Mu mwaka walenga amakumi yatatu na umo (31) uwa kuteka kwa kwa Asa imfumu ya kwa Yuda, Omri atendeke ukuteka Israele, kabili atekele pa myaka ikumi na ibili (12). Mu Tesa atekele imyaka mutanda (6). 24 Ashitile no lupili lwa Samaria kuli Shemere pa matalanti yabili aya silfere, no kutendeka ukukuula pa lupili, ainike no musumba uo akuulile ati Samaria,+ ukulingana ne shina lya kwa Shemere umwine wa lupili. 25 Kabili Omri alecita ifyabipa mu menso ya kwa Yehova ukucila bonse abamutangilile.+ 26 Ale-enda na mu nshila shonse isha kwa Yeroboamu mwana Nebati+ na mu lubembu lwakwe ulo alengele abena Israele ukubembuka pa kukalifya Yehova Lesa wa kwa Israele ku tulubi twabo utwa fye.+ 27 Kabili imilandu yashalako iya kwa Omri ne fyo acitile e lyo na bumpalume bwakwe, bushe tafyalembwa mwi buuku+ lya milandu ya shamfumu sha kwa Israele? 28 Kabili Omri aleele ukwalaala ifikolwe fyakwe, ashiikilwe na mu Samaria; na Ahabu+ umwana wakwe alimupyene no kutendeka ukuteka.

29 Kabili Ahabu mwana Omri ali imfumu ya kwa Israele mu mwaka walenga amakumi yatatu na cinekonsekonse (38) uwa kuteka kwa kwa Asa imfumu ya kwa Yuda; kabili Ahabu mwana Omri atekele Israele mu Samaria+ pa myaka amakumi yabili na ibili (22). 30 Kabili Ahabu mwana Omri acitile ifyabipa mu menso ya kwa Yehova ukucila bonse abamutangilile.+ 31 Kabili kwati wali mulandu uunono+ sana kuli ena ukwenda mu membu sha kwa Yeroboamu+ mwana Nebati, alundilepo no kuupa+ Yesebele+ mwana Etibaali imfumu ya bena Sidone,+ aya na mu kubombela Baali+ no kumukontamina. 32 Apangile na Baali iciipailo pa ng’anda+ ya kwa Baali mu Samaria. 33 Kabili Ahabu apangile ne cimuti caimikwa.+ Awe Ahabu acitile na fimbi ifingi ifya kukalifya+ Yehova Lesa wa kwa Israele ukucila ishamfumu shonse isha kwa Israele ishamutangilile.

34 Mu nshiku shakwe, Hiele umwina Betele akuulile Yeriko. Ilyo apangile umufula, Abiramu ibeli lyakwe alifwile, kabili ilyo abikile ifiibi, Segubu kasuli wakwe alifwile, nge fyo Yehova asosele muli Yoshua mwana Nuni.+

17 Kabili Eliya+ umwina Tishbe uwa mu bekashi ba mu Gileadi+ aebele Ahabu ati: “Na pali+ Yehova Lesa wa kwa Israele uo njiminina pa ntanshi yakwe,+ mu myaka iyi tamwakabe umume nangu ni mfula,+ kano fye nga nasosa ukuti fibeko!”+

2 E lyo amashiwi+ ya kwa Yehova yaishile kuli ena ayati: 3 “Fuma kuno, walukile ku kabanga no kufisama+ ku mumana wa Keriti, uwaba ku kabanga ka Yordani. 4 Kabili ukalenwa amenshi muli uyo mumana,+ kabili nkeba bamwankole+ ukulakuletela ifya kulya.”+ 5 Awe apo pene alimine no kucita ukulingana ne fyo Yehova amwebele,+ aileikala na ku mumana wa Keriti uwaba ku kabanga ka Yordani. 6 Na bamwankole ulucelo balemuletela umukate ne nama, ne cungulo na co balemuletela umukate ne nama, kabili alenwa amenshi mu mumana.+ 7 Lelo ilyo papitile inshiku, umumana walikamine,+ pa mulandu wa kuti takwali imfula pano isonde.

8 Nomba icebo ca kwa Yehova caishile kuli ena no kutila:+ 9 “Ima, kabiye ku Sarefati+ uwa ku Sidone, no kwikala kulya. Mona! Nde-eba umwanakashi kulya, mukamfwilwa, ukuti alekupeela ifya kulya.” 10 Na o alimine no kuya ku Sarefati no kufika ku mwinshi wa musumba; kabili, moneni! umwanakashi, mukamfwilwa, ali kulya aleteba inkuni. E ico abilikishe kuli ena ati: “Ndetelako utumenshi muli kapu uleke nwe.”+ 11 Ilyo aleya ku kuleta amenshi, abilikishe kabili kuli ena ati: “Undeteleko na kamukate.”+ 12 Na o atile: “Na pali Yehova Lesa obe,+ ine nshikwete umukate nangu umo,+ nkwete fye utubuunga+ mu mutondo uukalamba no tumafuta+ mu mutondo uunono. Kabili, moneni, njishile ku kuteba utukuni pa kuti njipikilepo ifya kulya ine no mwana wandi, no kuleka tulye no kufwa.”+

13 E lyo Eliya amwebele ati: “Witiina.+ Kabiye, kacite ifyo ulandile. Utale umpangileko akapapatu kanono aka mukate+ no kuleta kuli ine, e lyo nomba uipangile we mwine no mwana obe. 14 Pantu Yehova Lesa wa kwa Israele atila, ‘Ubuunga tabwakapwe mu mutondo uukalamba, na mafuta mu mutondo uunono tayakapwe ukufikila ubushiku Yehova akalosha imfula pa mushili.’”+ 15 Awe aliile no kucita ukulingana ne fyo Eliya amwebele; kabili mukamfwilwa na Eliya na ba mu ng’anda yakwe, balelya pa nshiku ishingi.+ 16 Ubuunga mu mutondo uukalamba tabwapwile, na mafuta mu mutondo uunono tayapwile,+ ukulingana na mashiwi Yehova asoseele muli Eliya.

17 Nomba pa numa ya ifi, umwana wa mwanakashi ulya, umwine wa ng’anda, alilwele, no bulwele bwakwe bwalicililemo ica kuti alifwile.+ 18 Na o e pa kweba Eliya ati: “Bushe tulomfwana na iwe,+ we muntu wa kwa Lesa wa cine? Waisa kuli ine ku kunjibukisha+ ifilubo fyandi kabili no kwipaya umwana wandi.” 19 Lelo amwebele ati: “Leta umwana obe.” E lyo nomba amubuulile ukufuma pa cifuba cakwe, amusenda ku muputule wa pa muulu+ umo aleikala no kumulaalika pa ca kusendamapo cakwe.+ 20 Kabili aliliile kuli Yehova ati: “Mwe Yehova Lesa wandi,+ bushe na pali mukamfwilwa uo ndeikalako mwaletapo ububi pa kwipaya umwana wakwe?” 21 Awe alambalele pa mwana+ imiku itatu, alelilila na kuli Yehova, aleti: “Mwe Yehova Lesa wandi, lekeni umweo+ wa uyu mwana ubwelele muli ena.” 22 Awe Yehova aumfwile ishiwi lya kwa Eliya,+ ica kuti umweo wa mwana walibwelele muli ena kabili aishileba umutuntulu.+ 23 E lyo Eliya abuulile umwana no kumuleta ukufuma mu muputule wa pa muulu, amuletele mu ng’anda no kumutwala kuli nyina. E lyo Eliya amwebele ati: “Mona, umwana obe ali uwa mweo.”+ 24 Na o umwanakashi atile kuli Eliya: “Nomba naishiba icine cine ukuti uli muntu wa kwa Lesa+ na mashiwi ya kwa Yehova ayaba mu kanwa kobe ya cine.”+

18 Kabili pa numa ya nshiku ishingi+ amashiwi ya kwa Yehova yaishile kuli Eliya mu mwaka walenga butatu, ayati: “Kabiye, kailange kuli Ahabu, pantu ndeleta imfula pa calo.”+ 2 Awe Eliya ailemonekela kuli Ahabu, ninshi mwali icipowe icibi+ mu Samaria.

3 E lyo Ahabu aitile Obadia, uwaleangalila ing’anda.+ (Nomba Obadia aletiina+ sana Yehova. 4 E ico ilyo Yesebele+ aipeye bakasesema ba kwa Yehova,+ Obadia abuulile bakasesema umwanda umo (100) no kubabika mu mabumba yabili, mwi bumba limo limo mwali abantu amakumi yasano (50), kabili abafishile mu lucengo. Kabili alebapeela umukate na menshi.)+ 5 Kabili Ahabu aebele Obadia ati: “Kabiye mu calo conse ku tumfukumfuku twa menshi tonse na ku mimana yonse. Limbi kuti twasangako icani iciteku+ pa kuti tusunge bakabalwe ne mfalashi fibe ifya mweo, ukuti inama na shimbi shiifwa.”+ 6 E ico bayakene impanga umwa kuyapita. Ahabu aile eka mu nshila imo, na Obadia aile eka mu nshila imbi.+

7 Kabili ilyo Obadia aleya mu nshila, moneni, Eliya alimukumenye.+ Na o apo pene alimwishibe, awile no bukupeme+ no kutila: “Bushe ni mwe, mwe shikulu+ Eliya?” 8 Na o amwebele ati: “Nine. Kabiye, kasose kuli sokulu+ auti: “Moneni, Eliya aisa.’” 9 Lelo atile: “Nga kanshi lubembu+ nshi ncitile ulwa kuti mubike ne mubomfi wenu mu minwe ya kwa Ahabu ukuti anjipaye? 10 Na pali Yehova Lesa wenu,+ takuli uluko nangu bufumu uko shikulu tatuma aba kufwaya imwe. Na lintu batile, ‘Taliko,’ alengele ubufumu no luko ukulapa ukuti balifililwe ukumusanga.+ 11 E lyo nomba na imwe muleti, ‘Kabiye, kasose kuli sokulu auti: “Moneni, Eliya aisa.”’ 12 Kabili ilyo nafuma pali imwe, umupashi+ wa kwa Yehova ulemusenda uko ine nshaishibe. Kabili nga nayaeba Ahabu, tamusange, na o alanjipaya,+ pantu umubomfi wenu alatiina Yehova ukufuma ku bwaice bwakwe.+ 13 Bushe shikulu taebwa ifyo nacitile ilyo Yesebele aipeye bakasesema ba kwa Yehova, ifyo nafishile bakasesema ba kwa Yehova bamo, abali umwanda umo (100), ukubafisa ibumba limo limo amakumi yasano (50) mu lucengo+ no kulabatwalila umukate na menshi?+ 14 E lyo nomba na imwe muleti, ‘Kabiye, kasose kuli sokulu auti: “Moneni Eliya aisa.”’ Kabili alanjipaya fye.”+ 15 Lelo, Eliya atile: “Na pali+ Yehova wa mabumba+ uo njiminina pa ntanshi yakwe, buno bushiku ndeyamoneka kuli ena.”

16 Awe Obadia aile ku kukumanya Ahabu no kumweba; na o Ahabu aile ku kukumanya Eliya.

17 Nomba ilyo fye Ahabu amwene Eliya, Ahabu amwebele ilyo line ati: “Bushe ni we, we waleta ubucushi pali Israele?”+

18 Na o atile: “Nshaleta ubucushi+ pali Israele, lelo ni we na ba mu ng’anda ya kwa wiso mwaleta ubucushi,+ pantu imwe mwalisha amafunde ya kwa Yehova,+ kabili mwakonka baBaali.+ 19 Kabili tuma amashiwi no kunonganikila abena Israele bonse pa Lupili lwa Karmele+ na bakasesema ba kwa Baali+ imyanda ine na makumi yasano (450) na bakasesema ba fimuti fyaimikwa+ imyanda ine (400), abalya pe tebulo lya kwa Yesebele.”+ 20 E lyo Ahabu atumine bamo ku bana ba kwa Israele bonse kabili alonganike bakasesema+ bonse pa Lupili lwa Karmele.

21 E lyo Eliya apaleme ku bantu bonse, no kutila: “Bushe kufika lilali mukaba aba mitima ibili?+ Nga Yehova e Lesa wa cine, mukonkeni;+ nga ni Baali, mukonkeni.” Na bantu tabamwaswike nangu cimo. 22 Kabili Eliya aebele abantu ati: “Nine fye neka kasesema wa kwa Yehova+ uwashalapo, lelo bakasesema ba kwa Baali bena bali imyanda ine na makumi yasano (450). 23 Nomba lekeni batupeele ing’ombe shibili, kabili lekeni baisalile ing’ombe iilume imo no kuiputaula no kuibika pa nkuni, lelo bebikapo umulilo. Na ine ndeipaya no kupekanya ing’ombe iilume imbi, no kuibika pa nkuni, lelo nshabikepo umulilo. 24 Kabili mulilile kwi shina lya kwa lesa wenu,+ na ine ndelilila kwi shina lya kwa Yehova; kabili Lesa uuleyasukila ku mulilo,+ e Lesa wa cine.”+ Na bantu bonse bayaswike abati: “Amashiwi ayo yaumfwika bwino.”

25 E lyo Eliya asosele kuli bakasesema ba kwa Baali ati: “Saleni ing’ombe iilume imo kabili mubalilepo ukuipaya, pantu imwe muli bengi; mulilile na kwi shina lya kwa lesa wenu, lelo mwibikapo umulilo.” 26 Awe babuulile ing’ombe iilume iyo abapeele. Kabili bali-ipeye, kabili balelilila kwi shina lya kwa Baali ukufuma ulucelo ukufika icungulo, baleti: “Mwe Baali, twasukeni!” Lelo takwali ishiwi,+ kabili takwali na wa kwasuka.+ Balecilauka no kushinguluka iciipailo ico bapangile. 27 Nomba ilyo akasuba kafikile pa kati ka mutwe, e lyo Eliya alabapumya+ no kusosa ati: “Bilikisheni, pantu ni lesa;+ nalimo aletontonkanya, nalimo naumfwa mu mala+ kabili naya ku cimbusu.+ Nalimo nalaala utulo kabili alekabila ukumushibusha!”+ 28 Na bo balabilikisha no kuitetaula+ ku myele yabo na mafumo, ifyaba ulutambi lwabo, mpaka umulopa walakonkoloka pa mibili yabo. 29 Ilyo fye akasuba kayalwike takwali ishiwi, kabili batwalilile fye ukulacita nga bakasesema+ mpaka inshita ya mutuulo wa ngano, na lyo line takwali ishiwi nangu uwaleasuka nangu uwa kubikako amano.+

30 E lyo nomba Eliya aebele abantu ati: “Palameni kuli ine.” E ico abantu bonse balimupaleme. Kabili awemye iciipailo ca kwa Yehova icabongolweke.+ 31 Kabili Eliya abuulile amabwe ikumi na yabili (12) ukulingana ne mpendwa ya bana ba kwa Yakobo, uo icebo ca kwa Yehova caishileko,+ aciti: “Ishina lyobe likaba Israele.”+ 32 Akuulile ne ciipailo ku mabwe+ mwi shina lya kwa Yehova+ no kwimba umukolwa ukushingulushe ciipailo, kabili umukolwa walepele nge ncende ya kutandamo amagaloni* yabili aya mbuto. 33 Pa numa atantike inkuni+ bwino bwino no kuputaula ing’ombe iilume no kuibika pa nkuni. Kabili atile: “Isusheni amenshi mu mitondo ine no kuyetila pa mutuulo wa koca na pa nkuni.” 34 E lyo nomba atile: “Itilenipo na kabili.” E ico balitilepo na kabili. Na kabili atile: “Itilenipo umuku walenga butatu.” E ico balibwekeshepo umuku walenga butatu. 35 Awe amenshi yashingulwike iciipailo conse, no mukolwa waiswilemo amenshi.

36 Nomba pa nshita+ ya kutuula umutuulo wa ngano, e lyo Eliya apaleme ku ciipailo no kutila: “Mwe Yehova, Lesa wa kwa Abrahamu,+ Isaki+ na Israele,+ buno bushiku lekeni cishibikwe ukuti ni mwe Lesa mu Israele+ no kuti ine ndi mubomfi wenu no kuti nacita fyonse ifi ukulingana na mashiwi yenu.+ 37 Njasukeni, mwe Yehova, njasukeni, ukuti aba bantu beshibe ukuti imwe, Yehova,+ ni mwe Lesa wa cine kabili ni mwe mwalwile imitima yabo.”+

38 Awe umulilo+ wa kwa Yehova waliponene no koca umutuulo wa koca+ ne nkuni na mabwe no lukungu, wakamishe na menshi ayali mu mukolwa.+ 39 Ilyo abantu bamwene ifi, apo pene bawile ubukupeme+ no kusosa abati: “Yehova e Lesa wa cine! Yehova e Lesa wa cine!” 40 E lyo Eliya abebele ati: “Ikateni bakasesema ba kwa Baali! Mwileka nangu umo afulumuke!” Awe ilyo line fye balibekete, na Eliya abatwele ku mupokapoka wa Kishone+ no kubepaila kulya kwine.+

41 Nomba Eliya aebele Ahabu ati: “Nina, kabiye, ulye+ no kunwa;+ pantu kuli ukubulukuta kwa mfula.” 42 Na o Ahabu alile no kuyalya no kunwa. Lelo Eliya aninine pa muulu wa Karmele, alakontamina pa nshi+ no kubika umutwe wakwe pa kati ka makufi yakwe.+ 43 E lyo atile ku mubomfi wakwe: “Nina. Lolesha lwa kuli bemba.” Na o alile no kulolesha, no kutila: “Takuli nangu fimo.” Kabili Eliya asosele imiku cinelubali (7)+ ati: “Bwelelako.” 44 Nomba pa muku walenga cinelubali (7), umubomfi atile: “Moneni! Kuli ikumbi ilinono ngo lupi lwa muntu lilefuma muli bemba.”+ Na o atile: “Nina, kebe Ahabu auti: “Kulika iceleta kuli bakabalwe!+ Kabili kabiye, epali imfula yakucilikila!’” 45 Awe umuulu walifiitile ku makumbi, kabili kwali umwela+ ne mfula iikalamba yatendeka ukuloka.+ Na Ahabu aleya fye pali kabalwe, afika na ku Yesreele.+ 46 Kabili ukuboko kwa kwa Yehova kwali pali Eliya+ kabili ali-ipekenye,*+ alibutwike no kutangilila Ahabu mpaka fye afika ku Yesreele.+

19 E lyo Ahabu+ aebele Yesebele+ fyonse ifyo Eliya acitile kabili amwebele fyonse pa fyo aipeye bakasesema bonse ku lupanga.+ 2 Awe Yesebele atumine inkombe kuli Eliya ati: “Balesa bankande,+ kabili balundenapo,+ nga ca kuti mailo ino ine nshita nshakacite umweo obe nge fyo ucitile imyeo ya bakasesema balya bonse!” 3 Na o alitiinine. E ico alimine no kubutuka ukuti apusushe umweo+ wakwe no kuya ku Beere-sheba,+ umusumba uwali mu Yuda.+ Awe ashile umubomfi wakwe kulya kwine. 4 Kabili ena aile mu matololo, ubulendo bwa bushiku bumo, asukile afika no kwikala mwi samba lya cimpusa ca cifuti.+ Atendeke no kuilombela ukufwa, ati: “Capwa! Nomba mwe Yehova lekeni fye mfwe,+ pantu ine nshili musuma ukucila ifikolwe fyandi.”

5 Kabili asendeme mwi samba lya cimpusa ca cifuti+ no kupona mu tulo. Kabili, moneni! nomba malaika+ alimukumishe.+ E lyo atile: “Ima, ulye.” 6 Ilyo aloleshe, moneni, ku mitwe yakwe kwali umukate+ pa mabwe ayakaba no mutondo wa menshi. Na o alalya no kunwa, e lyo asendeme na kabili. 7 Awe malaika+ wa kwa Yehova alibwelele umuku wa bubili no kumukumya, ati: “Ima, ulye, pantu ulwendo nalukulepela sana.”+ 8 E ico alimine, alya no kunwa. Kabili ifya kulya aliile fyamupeele amaka ya kwenda inshiku amakumi yane (40)+ akasuba no bushiku ukufika ku lupili lwa kwa Lesa wa cine, ku Horebu.+

9 Kabili kulya aingile mu lucengo,+ ukuti asendame ubushiku mulya. Kabili moneni! icebo ca kwa Yehova caishile kuli ena, camwipwishe no kuti: “Cinshi ulecita kuno, Eliya?”+ 10 Na o atile: “Ninjikatilwa Yehova Lesa wa mabumba ubufuba;+ pantu abana ba kwa Israele nabasha icipangano cenu,+ ifiipailo fyenu nababongolola,+ na bakasesema benu nababepaya ku lupanga,+ kabili nine fye neka nshelepo;+ kabili balemfwaya ukuti banjipaye.”+ 11 Lelo icebo casosele ukuti: “Fuma, keminine pa lupili ku cinso ca kwa Yehova.”+ Kabili, moneni! Yehova alepita,+ no mwela uukalamba kabili uukali walelepaula impili no kutobaula amabwe ayasansuka pa ntanshi ya kwa Yehova.+ (Yehova tali mu mwela.) Na pa numa ya mwela kwali icinkukuma.+ (Yehova tali mu cinkukuma.) 12 Kabili pa numa ya cinkukuma kwali umulilo.+ (Yehova tali mu mulilo.) Na pa numa ya mulilo kwaishile ishiwi ilyanakilila, kabili ilyafuuka.+ 13 Nomba ilyo Eliya aumfwile fye ishiwi, apo pene aifimbile ica kufwala cakwe icaibela ku menso,+ no kufuma, aiminina na pa mwinshi wa lucengo. Kabili, moneni! ishiwi lyaishile kuli ena, aliti: “Cinshi ulecita kuno, Eliya?”+ 14 Na o atile: “Ningumfwila Yehova Lesa wa mabumba ubufuba; pantu abana ba kwa Israele nabasha icipangano cenu,+ ifiipailo fyenu nababongolola, na bakasesema benu nababepaya ku lupanga, kabili ni ne fye neka nshelepo; kabili balemfwaya pa kuti banjipaye.”+

15 Nomba Yehova amwebele ati: “Kabiye, bwelela ku matololo ya Damaseke;+ kabili usube+ Hasaele+ ukuba imfumu mu Siria. 16 Na Yehu+ umwishikulu wa kwa Nimshi+ umusube ukuba imfumu ya Israele; na Elisha+ mwana Shafati uwa ku Abele-mehola+ umusube ukuba kasesema uwa kukupyana.+ 17 Kabili onse uwafulumuka ku lupanga lwa kwa Hasaele,+ Yehu akamwipaya;+ kabili uwafulumuka ku lupanga lwa kwa Yehu, Elisha akamwipaya.+ 18 Lelo nalishapo aba muli Israele amakana cinelubali (7,000),+ bonse abashapepeleko Baali,+ kabili abashatomweneko+ Baali.”

19 Awe Eliya aile ukufuma kulya, asangile na Elisha mwana Shafati alelima+ ne ng’ombe shibili shibili mu makoli ikumi na yabili (12), kabili ena alelima ne shalenga ikumi na shibili. Awe Eliya alimupalamine no kupoosa pali ena ica kufwala cakwe icaibela.+ 20 Na o ashile ing’ombe ishilume no kubutukila kuli Eliya no kutila: “Lekeni nje ntomone tata na mayo.+ E lyo njise ndemukonka.” Na o amwebele ati: “Kabiye, e lyo ubwele; pantu nga cinshi ncitile kuli iwe?” 21 Awe alibwelele, aleka ukumukonka, ayabuula ne ng’ombe she koli limo, no kutuula ilambo,+ na ku fya kuliminako+ ifya mbao ifyali ku ng’ombe e ko aipikile iminofu ya shiko, no kupeela abantu, na bo baliliile. E lyo aimine, alakonka Eliya, no kulamubombela.+

20 Nomba Ben-hadadi+ imfumu ya ku Siria, ena alonganike abashilika bakwe bonse ne shamfumu amakumi yatatu na shibili (32) pamo nankwe+ na bakabalwe+ na maceleta,+ kabili aile no kuyashinga+ umusumba wa Samaria+ no ku-ulwisha. 2 E lyo atumine inkombe+ kuli Ahabu imfumu ya Israele mu musumba. Kabili amwebele ati: “Ben-hadadi atila, 3 ‘Silfere na golde fyandi, na bakashi bobe na bana bobe abaume abasuma sana bandi.’”+ 4 Ne mfumu ya Israele ya-aswike aiti: “Ine ndi wenu na fyonse ifyandi fyenu, ukulingana ne fyo mwalanda, mwe shikulu imfumu.”+

5 Awe inkombe shalibwelele ashiti: “Ben-hadadi atila: ‘Natumine amashiwi kuli iwe nati: “Umpeele silfere na golde obe na bakashi bobe na bana bonse. 6 Lelo mailo ino ine nshita nkatuma ababomfi bandi kuli iwe, kabili bakafwayafwaya mu ng’anda yobe na mu mayanda ya babomfi bobe; na fyonse ifisuma+ mu menso yobe bakafibika mu minwe yabo no kufisenda.”’”

7 Kabili imfumu ya kwa Israele yaitile abakalamba bonse aba mu calo+ no kusosa aiti: “Cenjeleni, no kumona ukuti ico uyu muntu alefwaya bubi;+ pantu atumine ukuti alefwaya abakashi bandi na bana bandi abaume na silfere wandi na golde wandi, na ine nshimukenye.” 8 Na bakalamba bonse na bantu bonse bayebele ati: “Mwimumfwila, kabili mwisumina.” 9 E ico yaebele inkombe sha kwa Ben-hadadi aiti: “Kebeni shikulu imfumu amuti, ‘Fyonse ifyo mwatumine ku kweba umubomfi wenu pa kubala, ndecita; lelo ici cena nshacite.’” Awe inkombe shakwe shaliile no kutwala aya amashiwi.

10 E lyo Ben-hadadi atumine bamo kuli ena, ati: “Balesa+ bankande, kabili balundenapo,+ nga ca kuti ulukungu lwa mu Samaria lukakumana abantu bonse abakankonka!”+ 11 Ne mfumu ya kwa Israele ya-aswike aiti: “Mwebeni, amuti, ‘Mwileka uulefwala ifya bulwi+ aitakishe ngo ulefuula.’”+ 12 Nomba ilyo aumfwile fye aya mashiwi, ninshi alenwa+ ne shamfumu mu nsakwe, aebele ababomfi bakwe apo pene ati: “Ipekanyeni!” Nabo batendeke ukuipekanya ku kuyalwisha umusumba.

13 Kabili, moneni! kasesema umo aile kuli Ahabu imfumu ya kwa Israele+ no kutila: “Yehova atila,+ ‘Bushe naumona ili ibumba ilikalamba lyonse? Mona, buno bushiku ndelipeela mu minwe yobe, kabili ukeshiba ukuti nine Yehova.’”+ 14 E lyo Ahabu aipwishe ati: “Mulelipeelela muli bani?” Na o atile: “Yehova atila, ‘Ku balumendo bacilolo ba fitungu fya bulashi.’” Kabili aipwishe ati: “Ni bani bakatendekelapo ukulwa?” Na o ayaswike ati: “Ni we!”

15 Apendele na balumendo bacilolo ba fitungu fya bulashi, nabo bali imyanda ibili na makumi yatatu na babili (232);+ kabili pa numa apendele na bantu bonse, abana ba kwa Israele bonse, nabo bali amakana cinelubali (7,000). 16 Awe bafumine akasuba pa kati, ninshi Ben-hadadi alenwa ukuti akolwe+ mu nsakwe, pamo ne shamfumu ishali amakumi yatatu na shibili (32) ishalemwafwa. 17 Ilyo abalumendo+ bacilolo ba fitungu fya bulashi babalilepo ukufuma, Ben-hadadi atumine abantu bakwe; kabili baishilemweba abati: “Kuli abaume abafumine ku Samaria.” 18 Na o atile: “Nga mutende beshiile, mubekate aba mweo; nelyo nga kulwa beshiile, mubekate aba mweo.”+ 19 Kabili aba e bafumine mu musumba, abalumendo bacilolo ba fitungu fya bulashi ne bumba lya bashilika ilyali ku numa yabo. 20 Kabili batendeke ukwipaya cila muntu uwamulungama. Awe abena Siria+ balifulumwike,+ na bena Israele balibakonkele ulubilo, lelo Ben-hadadi imfumu ya bena Siria yafulumukile pali kabalwe pamo na ba pali bakabalwe. 21 Ne mfumu ya kwa Israele yalifumine, yalauma bakabalwe na maceleta,+ kabili yaipeye abena Siria abengi.

22 Pa numa kasesema+ aile ku mfumu ya kwa Israele no kuyeba ati: “Kabiye, kaikoshe+ kabili wishibe no kumona ifyo walacita;+ pantu pa kwaluka kwa mwaka imfumu ya Siria ikesa mu kukulwisha.”+

23 Kabili ababomfi ba mfumu ya Siria, bayebele abati: “Lesa wabo ni Lesa wa mu mpili.+ E mulandu wine baakosele ukutucila. E ico tulwe nabo apabatama no kumona nga tatwakose ukubacila. 24 Kabili ifi e fyo mucite: Mufumyepo ishamfumu,+ imo na imo ifume pa bufumu bwa iko, no kupyanikapo abalashi.+ 25 Kabili imwe mupende impendwa ya bashilika no kuilinganya ku mpendwa ya bashilika benu abafwile, kabalwe alingane na kabalwe, ne celeta lilingane ne celeta kabili tulwe nabo apabatama no kumona nga tatwakose ukubacila.”+ Awe yaumfwile amashiwi yabo no kucita ifyo fine.

26 Kabili pa kwaluka kwa mwaka Ben-hadadi alonganike abena Siria+ no kuya ku Afeke+ ku kulwa na Israele. 27 Na bena Israele balilongene kabili babateyanishishe+ ifya kulya, baile na ku kubakumanya. Kabili abana ba kwa Israele bapangile inkambi ukulungatana na bo, kwati mikuni inono ibili iya mbushi. Lelo abena Siria bakumene pano isonde.+ 28 E lyo umuntu wa kwa Lesa wa cine+ apaleme no kweba imfumu ya bena Israele ati: “Yehova atila, ‘Pa mulandu wa kuti abena Siria batile: “Yehova ni Lesa wa mu mpili, kabili te Lesa wa mwi lungu,” ndepeela ibumba lyonse ili ilikalamba mu minwe yobe,+ kabili mukeshiba ukuti nine Yehova.’”+

29 Awe bapangile inkambi inshiku cinelubali (7), aba balungatene na banabo.+ Kabili pa bushiku bwalenga cinelubali inkondo yalitendeke; na bana ba kwa Israele baipeye abena Siria abale-enda pa makasa amakana umwanda umo (100,000) mu bushiku bumo. 30 Na bashelepo bafulumukile ku Afeke,+ ku musumba; ne cibumba caponeene abashelepo amakana amakumi yabili na makana cinelubali (27,000). + Ben-hadadi ena alifulumwike+ no kwingila mu musumba no kuyafisama mu muputule wa mu kati na nkati.+

31 E ico ababomfi bakwe bamwebele ati: “Moneni, twalyumfwa ukuti imfumu sha ba mu ng’anda ya kwa Israele ni mfumu sha cikuuku.+ Natufwale insamu*+ mu misana+ yesu no kukaka imyando ku mitwe yesu, tuye na ku mfumu ya kwa Israele. Nalimo kuti aleka mube no mweo.”+ 32 Awe bafwele insamu mu misana yabo, no kukaka imyando ku mitwe yabo, baile na ku mfumu ya kwa Israele abati: “Umubomfi wenu Ben-hadadi atila, ‘Lekeni mbe no mweo.’” Nayo yatile: “Bushe acili no mweo? Ni munyinane.” 33 E ico abaume+ bamwene ukuti cali cishibilo icisuma kabili apo pene bamwene ati e fyo imfumu yapingilwe, kabili batile: “Ben-hadadi ni munyinenwe.” E lyo atile: “Kabiyeni, kamubuuleni.” E lyo Ben-hadadi aile kuli ena; na po pene amuninike mwi celeta.+

34 E lyo Ben-hadadi amwebele ati: “Nalabwesha imisumba+ iyo tata apokele kuli wiso. Kabili ukasale we mwine imisebo mu Damaseke ifyo na tata asalile mu Samaria.”

Na o Ahabu atile: “Lelo ine ndepanga icipangano+ no kukuleka uleya.”

Kabili apangene icipangano nankwe no kumuleka aye.

35 Awe umuntu umo uwa mu bana ba bakasesema+ asosele ku munankwe amashiwi+ ya kwa Yehova ati: “Ale, nguma.” Na o akeene ukumuuma. 36 E ico amwebele ati: “Pa mulandu wa kuti taumfwile kwi shiwi lya kwa Yehova, mona, walafuma pali ine ne nkalamo ilekusansa.” Awe alifumine pali ena, ne nkalamo+ yalimusangile no kumusansa.+

37 Kabili asangile umuntu na umbi no kusosa ati: “Ale nguma.” No yo muntu alimumine, alimumine no kumucena.

38 E lyo kasesema aileiminina mu mbali ya musebo ku kulolela imfumu, kabili ali-ifungushenye+ pa kuikaka insalu pa menso. 39 Nomba ilyo imfumu yalepita, abilikishe ku mfumu no kutila:+ “Umubomfi wenu aile mu bulwi ninshi nabukosa; kabili moneni! umwaume alefuma mu bulwi, kabili aletele umwaume kuli ine, no kusosa ati, ‘Akulinda uyu mwaume. Nga afyuka fye, ni we ukafwilamo,+ nga te ifyo ukalipila italanti limo ilya silfere.’+ 40 Nomba ilyo umubomfi wenu aleshingashinga, moneni, umwaume aliile.” Ne mfumu ya kwa Israele yamwebele ati: “E fyo ubupingushi bobe bukaba. We mwine nauipingula.”+ 41 Na o bwangu bwangu akakwile insalu akakile pa menso, ne mfumu ya kwa Israele e pa kumwishiba ukuti wa muli bakasesema.+ 42 Kabili ayebele ati: “Yehova atila, ‘Pa mulandu wa kuti waleka afume mu mwine yobe umwaume uwalingile ukwipaiwa,+ ni we ukafwilamo,+ na bantu bobe e bakafwilamo, te bantu bakwe iyo.’”+ 43 Awe imfumu ya Israele yalolele ku ng’anda ya iko, iya bulanda kabili iya nkumbabulili,+ yafikile na ku Samaria.+

21 Nomba kwali ibala lya myangashi ilya kwa Nabote umwina Yesreele, ilyali mu Yesreele,+ mupepi ne sano lya kwa Ahabu imfumu ya Samaria. 2 E ico Ahabu aebele Nabote ati: “Mpeela+ ibala lyobe ilya myangashi,+ pa kuti libe ibala+ lyandi ilya musalu,+ pantu lyabela mupepi ne ng’anda yandi; kabili leka nkupeelelemo ibala lya myangashi ilisuma ukucila ili. Kabili nga cawama mu menso yobe,+ kuti nakupeelelamo indalama umutengo wa liko. 3 Na o Nabote atile kuli Ahabu: “Te kuti ciwame+ kuli ine, nga kukonka ukufwaya kwa kwa Yehova,+ ukuti ine mpeele imwe impanga ya bupyani iya fikolwe fyandi.”+ 4 Awe Ahabu aingile mu mwakwe, ali no bulanda kabili uwa nkumbabulili pa mulandu wa fyo Nabote umwina Yesreele amwaswike, ilyo atile: “Nshamupeele impanga ya fikolwe fyandi.” Kabili aleele pa ca kusendamapo no kulosha icinso kumbi,+ kabili talile ne fya kulya.

5 Kabili Yesebele+ umukashi wakwe alishile no kumwipusha ati: “Nga cinshi ico umutima obe ubelele no bulanda,+ taulelya ne fya kulya?” 6 Na o ayaswike ati: “Pantu nacilanda na Nabote umwina Yesreele, no kumweba ati, ‘Nshitisha ibala lyobe ilya myangashi nkupeele indalama. Nelyo nga ulefwaya, leka nkupeelelemo ibala lya myangashi limbi.’ Lelo acitila, ‘Nshamupeele ibala lyandi ilya myangashi.’”+ 7 E lyo Yesebele umukashi wakwe amwipwishe ati: “Bushe te iwe uleteka Israele?+ Ima, ulye ifya kulya kabili leka umutima obe ube ne nsansa. Ine ndekupeela ibala lya myangashi ilya kwa Nabote umwina Yesreele.”+ 8 Awe Yesebele alembele bakalata+ mwi shina lya kwa Ahabu no kufwatikapo icifwati cakwe,+ no kutuma bakalata ku bakalamba+ na bakankaala abali mu musumba umwaleikala Nabote. 9 Kabili Yesebele alembele muli bakalata ati:+ “Bilisheni ukuti kube ukuleka ukulya, muleke na Nabote ekale ku ntanshi ya bantu. 10 Muleke na baume babili,+ ifinangwa,+ bekale ku ntanshi yakwe kabili muleke bamushinine,+ basose abati, ‘Wapontela Lesa ne mfumu!’+ Kabili mumufumishe ku nse no kumupoola amabwe mpaka afwe.”+

11 E ico abaume ba mu musumba, abakalamba na bakankala ba mu musumba aleikala, bacitile ifyo Yesebele abatumiine, filya fine fyalembelwe muli bakalata abatumiine+. 12 Nabo babilishe ukuti kube ukuleka ukulya+ kabili batekele Nabote ku ntanshi ya bantu. 13 E lyo nomba abaume babili, ifinangwa, baishile no kwikala ku ntanshi yakwe; kabili balya baume ifinangwa batendeke ukushinina Nabote pa bantu abati: “Nabote apontela Lesa ne mfumu!”+ Pa numa ya ifi, bamufumiishe ku nse ya musumba no kumupoola amabwe, kabili alifwile.+ 14 Batumine na kuli Yesebele abati: “Nabote napoolwa amabwe kabili nafwa.”+

15 Nomba ilyo Yesebele aumfwile fye ukuti Nabote napoolwa amabwe kabili nafwa, aebele Ahabu apo pene ukuti: “Ima, bula ibala lya myangashi ilya kwa Nabote umwina Yesreele,+ ibala ilyo akeene ukukushitisha; pantu Nabote tali no mweo, nafwa.” 16 Na o Ahabu pa kumfwa ukuti Nabote nafwa, alimine apo pene aya kwi bala lya myangashi ilya kwa Nabote umwina Yesreele, ukuti alibuule.+

17 Kabili icebo ca kwa Yehova+ caishile kuli Eliya+ umwina Tishbe ati:18 “Ima, kabiye ukumanye Ahabu imfumu ya kwa Israele iyaba mu Samaria.+ Ali mwi bala lya myangashi ilya kwa Nabote, e ko ele ukuti alibuule. 19 Kabili umwebe auti, ‘Yehova atila, ‘Bushe waipaya+ umuntu kabili wabuula ne bala lyakwe?”’+ Kabili umwebe auti, ‘Yehova atila, “Kulya kwine+ imbwa shamyangiile umulopa wa kwa Nabote, e ko imbwa shikamyangila no mulopa obe wine.”’”+

20 E lyo Ahabu atile kuli Eliya: “Bushe wansanga we mulwani wandi?”+ Na o ayaswike ati: “Nakusanga. ‘Pa mulandu wa kuti waipoosa mu kucita ububi mu menso ya kwa Yehova,+ 21 mona, nkaleta ububi pali iwe;+ kabili nkepaya onse uwa muli iwe+ no kulofya umwaume+ onse uwa muli Ahabu no wapelelwa, no mulanda mu Israele. 22 Kabili nkalenga ing’anda yobe ukuba nge ng’anda ya kwa Yeroboamu+ mwana Nebati, kabili nge ng’anda ya kwa Baasha+ mwana Ahiya, pa mulandu wa fyo wankalifya no kulenga Israele ukubembuka.’+ 23 Lelo pali Yesebele pena, Yehova atile, ‘Imbwa shikalya Yesebele mu mpanga ya Yesreele.+ 24 Umuntu onse uwa muli Ahabu uwafwila mu musumba, imbwa shikamulya; no wafwila mu mpanga, ifyuni fya mu lwelele fikamulya.+ 25 Kabili takwabala akuba nangu umo uwali nga Ahabu,+ uwaipoosele ku kucita icabipa mu menso ya kwa Yehova, uo umukashi wakwe Yesebele+ atunkile.+ 26 Kabili acitile ifya bunani pa kukonka utulubi twa bunani,+ filya fine fye abena Amore bacitile, abo Yehova atamfishe ku cinso ca bana ba kwa Israele.’”+

27 Awe ilyo Ahabu aumfwile fye aya mashiwi, alepawile ifya kufwala fyakwe no kufwala insamu;*+ kabili alekele ukulya, kabili aleele fye ninshi nafwala insamu kabili ale-enda fye bulanda bulanda.+ 28 Ne cebo ca kwa Yehova caishile kuli Eliya umwina Tishbe aciti:29 “Bushe naumona ifyo Ahabu aicefeshe pa mulandu wandi?+ Pantu aicefya pa mulandu wa ine, nshakalete ububi mu nshiku shakwe.+ Mu nshiku sha mwana wakwe e mo nkaleta ububi pa ng’anda yakwe.”+

22 Kabili pa myaka itatu baikele fye ukwabula inkondo pa kati ka bena Siria na bena Israele. 2 Na mu mwaka walenga butatu, Yehoshafati+ imfumu ya kwa Yuda aile ku mfumu ya kwa Israele. 3 E lyo imfumu ya kwa Israele yaebele ababomfi ba iko ukuti: “Bushe mwalishiba ukuti umusumba wa Ramote-gileadi+ wesu? Nomba tuleshingashinga uku-upoka ku mfumu ya Siria.” 4 Kabili yaebele Yehoshafati aiti: “Bushe uleya na ine mu kulwa ku Ramote-gileadi?”+ Na o Yehoshafati atile ku mfumu ya kwa Israele: “Ine cimo na iwe. Abantu bandi cimo na bantu bobe.+ Bakabalwe bandi cimo na bakabalwe bobe.”

5 Na o Yehoshafati atile ku mfumu ya kwa Israele: “Tala ipusha+ tumfwe ifyo Yehova alasosa.” 6 E ico imfumu ya kwa Israele yalonganike bakasesema,+ abaume nalimo imyanda ine (400), no kubepusha aiti: “Bushe ndeya ku kulwisha Ramote-gileadi, nangu niyako?” Na bo batile: “Kabiyeni,+ kabili Yehova alepeela uyu musumba mu minwe ya mfumu.”

7 Lelo Yehoshafati asosele ukuti: “Bushe takuli kasesema wa kwa Yehova na umbi kuno? Lekeni twipushishe muli ena.”+ 8 Kabili imfumu ya kwa Israele yatile kuli Yehoshafati: “Umuntu umbi umo twingepushisha kuli Yehova+ ni Mikaya mwana Imla; lelo nalimupata,+ pantu tasesema ifisuma pali ine kano ifibi.”+ Lelo Yehoshafati atile: “Imfumu iisosa icintu ca musango yo.”+

9 Awe imfumu ya kwa Israele yaitile cilolo wa kwi sano+ no kusosa aiti: “Leta Mikaya mwana Imla bwangu bwangu.”+ 10 Kabili imfumu ya kwa Israele na Yehoshafati imfumu ya kwa Yuda baikele cila muntu pa cipuna cakwe ica bufumu, nabafwala ne fya kufwala fya mfumu,+ bali pa ca kupuminapo ingano ica pa mwinshi wa musumba wa Samaria; kabili bakasesema bonse balecita ku cinso cabo nga filya fine bakasesema bacita.+ 11 E lyo Sidekia mwana Kenaana aipangiile insengo sha cela no kusosa ukuti: “Ifi e fyo Yehova asosa,+ ‘Kuli ishi nsengo e ko ukasunkila abena Siria mpaka ukabalofye.’”+ 12 Na bakasesema bambi bonse balesesema fimo fine, abati: “Kabiyeni ku Ramote-gileadi no kucimfya; kabili Yehova alepeela uyu musumba mu minwe ya mfumu.”+

13 Kabili inkombe iyo batumine ku kwita Mikaya yamwebele aiti: “Nomba, mona! Amashiwi ayo bakasesema bonse balandile ku mfumu nayawama. Na iwe ulande amashwi yamo yene nge fyo balandile, kabili ulande ifisuma.”+ 14 Lelo Mikaya asosele ati: “Na pali Yehova,+ ifyo Yehova alenjeba, e fyo nalalanda.”+ 15 E lyo aile ku mfumu, ne mfumu yamwebele aiti: “Mikaya, bushe tuleya ku Ramote-gileadi nangu twiya?” Na o apo pene asosele ati: “Kabiyeni no kucimfya; na Yehova aleupeela mu minwe ya mfumu.”+ 16 Ne mfumu yamwebele aiti: “Bushe miku inga nkakulenga ukulapa ukuti taufwile ukunjeba cimbi kano icishinka mwi shina lya kwa Yehova?”+ 17 Na o atile: “Ndemona abena Israele bonse nabasalangana+ pa mpili, kwati ni mpaanga ishabula kacema.+ Na Yehova asosele ukuti: ‘Aba tabakwata bashikulwibo. Lekeni babwelelemo umutende cila muntu ku mwakwe.’”+

18 E lyo imfumu ya kwa Israele yaebele Yehoshafati aiti: “Bushe nshacikweba ukuti tansesemene ifisuma kano fye ifibi’?”+

19 Na o akonkenyepo ukusosa ukuti: “E ico umfweni ifyo Yehova asosa:+ Ndemona Yehova naikala pa cipuna cakwe ica bufumu+ ne bumba lya mu muulu naliminina, ku kulyo kwakwe na ku kuso kwakwe.+ 20 Na Yehova atile: “Nani alayabepa Ahabu, no kuleka aleya pa kuti ayeipaiwa ku Ramote-gileadi?’ Awe uyu alasosa ifi, no yu alasosa ifi.+ 21 E lyo umupashi+ umo waishile no kwiminina ku cinso ca kwa Yehova, auti, ‘Ine nalayamubepa.’ Na o Yehova awipwishe ati, ‘Walayamubepa shani?’+ 22 Na o watile, ‘Nalaya, kabili ndeyaba umupashi wa bufi mu tunwa twa bakasesema bakwe bonse.’+ E ico Lesa atile, ‘Walayamubepa, kabili no kucimfya ulecimfya.+ Kabiye, kacite ifyo fine.’+ 23 Nomba, moneni, Yehova nabika umupashi wa bufi mu tunwa twa bakasesema benu bonse aba;+ lelo Yehova nalanda ukuti ububi buleisa pali imwe.”+

24 E lyo Sidekia mwana Kenaana apaleme no kuuma Mikaya pe saya,+ no kutila: “Bushe umupashi wa kwa Yehova upitile shani ukufuma pali ine no kusosa kuli iwe?”+ 25 Na o Mikaya atile: “Mona! Iwe ukamona ifyo umupashi upitile mu bushiku bulya ilyo ukengila mu muputule wa mu kati na nkati+ ku kufisama.”+ 26 E lyo imfumu ya kwa Israele yatile: “Sendeni Mikaya mumutwale kuli Amone umukalamba wa musumba na kuli Yoashi umwana wa mfumu.+ 27 Kabili mutile, ‘Imfumu yatila:+ “Bikeni uyu muntu mu cifungo,+ no kulamupeela ifya kulya+ ifinono na menshi ayanono mpaka nkabwele umutende.”’”+ 28 Na o Mikaya atile: “Nga cine cine mwabwela umutende, ninshi Yehova talandile na ine.”+ Asosele no kuti: “Umfweni, mwe bantu bonse.”+

29 Awe imfumu ya kwa Israele na Yehoshafati imfumu ya kwa Yuda baile ku Ramote-gileadi.+ 30 E lyo imfumu ya Israele yaebele Yehoshafati ukuti: “Ine ndeifungushanya no kuya ku bulwi,+ lelo iwe ufwale fye ifya kufwala fyobe ifya bufumu.”+ Ne mfumu ya kwa Israele yali-ifungushenye+ no kuya ku bulwi.+ 31 Nomba imfumu ya Siria, yena yaebele abakalamba ba bashilika+ ba iko aba maceleta abali amakumi yatatu na babili (32) aiti: “Mwilwa no muntu uushacindama nelyo uwacindama, kano fye ne mfumu ya kwa Israele.”+ 32 Nomba ilyo abakalamba ba maceleta bamwene Yehoshafati, batile: “Uyu e mfumu ya kwa Israele.”+ E ico balipilibwike ukuti balwe nankwe; na o Yehoshafati e pa kupunda mutuule.+ 33 Kabili ilyo fye abakalamba ba maceleta bamwene ukuti te mfumu ya kwa Israele, apo pene balekele ukumukonka.+

34 Lelo umuntu umo apoosele umufwi ukwabula ukwishiba, kabili alashile imfumu ya kwa Israele apalundanina ica kucinga icifuba, kabili imfumu yaebele uwale-ensha iceleta ati:+ “Alula ukuboko kobe, no kumfumya mu nkambi; pantu nabancena icibi.” 35 Kabili ubulwi bwalekoselako fye bulya bushiku, ne mfumu yabikilwe fye mwi celeta, naiminina ukulungatana na bena Siria, kabili yalifwile+ mu cungulo, no mulopa uwalefuma pa cilonda walepongolokela mwi celeta lya nkondo.+ 36 Kabili lilya akasuba kaya kalewa babilile mu nkambi abati: “Umuntu onse aye ku musumba wakwe, kabili umuntu onse aye ku calo cakwe!”+ 37 E fyo imfumu yafwile. Ilyo bailetele ku Samaria, bashiikile imfumu ku Samaria.+ 38 Kabili basamfishe iceleta lya nkondo mu cishiba ca Samaria, ne mbwa shamyangile umulopa wa iko+ (na bacilende balesamba mulya), nge fyo Yehova asosele.+

39 Kabili imilandu yashalako iya kwa Ahabu na fyonse ifyo acitile ne ng’anda ya meno ya nsofu+ iyo apangile ne misumba yonse iyo akuulile, bushe tafyalembwa mwi buuku+ lya milandu ya shamfumu sha kwa Israele? 40 Kabili Ahabu aleele ukwalaala ifikolwe fyakwe;+ e lyo Ahasia+ umwana wakwe amupyene no kutendeka ukuteka.

41 Nomba Yehoshafati+ mwana Asa ena atendeke ukuteka Yuda mu mwaka walenga bune uwa kuteka kwa kwa Ahabu imfumu ya kwa Israele. 42 Yehoshafati ali ne myaka amakumi yatatu na isano (35) ilyo atendeke ukuteka, kabili atekele mu Yerusalemu imyaka amakumi yabili na isano (25). Ne shina lya kwa nyina ni Asuba mwana Shilhi. 43 Kabili ale-enda mu nshila shonse isha kwa Asa wishi. Tafuminemo, alecita ifyalungama mu menso ya kwa Yehova.+ Kano fye ififulo fya kupepelapo e fyashele. Abantu bali bacili baleipaila amalambo pa fifulo fya kupepelapo no kufutumwinapo amalambo.+ 44 Kabili Yehoshafati aleumfwana ne mfumu ya kwa Israele.+ 45 Imilandu yashalako iya kwa Yehoshafati ne fya maka ifyo acitile ne nkondo isho alwile, bushe tafyalembwa mwi buuku+ lya milandu ya shamfumu sha kwa Yuda?46 Kabili bacilende abaume+ aba pe tempele abashelepo mu nshiku sha kwa Asa wishi, Yehoshafati alibalofeshe mu calo.+

47 Mu Edomu+ mwena tamwali imfumu; inkonkani e yaleteka.+

48 Kabili Yehoshafati atumine amato ya ku Tarshishi+ ukuya ku Ofiri ku kuleta golde; lelo tayaile pantu amato yaonaikile ku Esione-gebere.+ 49 Na Ahasia mwana Ahabu atile kuli Yehoshafati: “Lekeni ababomfi bandi baye na babomfi benu.” Lelo Yehoshafati alikeene.+

50 Awe Yehoshafati aleele ukwalaala ifikolwe fyakwe+ kabili bamushiikile ukwashiikwa ifikolwe fyakwe mu Musumba wa kwa Davidi+ icikolwe cakwe; no mwana wakwe Yehoramu+ alimupyene no kutendeka ukuteka.

51 Ahasia+ mwana Ahabu, atendeke ukuteka Israele mu Samaria mu mwaka walenga ikumi na cinelubali (17) uwa kwa Yehoshafati imfumu ya kwa Yuda, kabili atekele Israele imyaka ibili. 52 Kabili alecita ifyabipa+ mu menso ya kwa Yehova no kwenda mu nshila sha kwa wishi+ na mu nshila sha kwa nyina+ na mu nshila sha kwa Yeroboamu+ mwana Nebati, uwalengele Israele ukubembuka.+ 53 Kabili alebombela Baali+ no kumukontamina, kabili alekalifya+ Yehova Lesa wa kwa Israele filya fine wishi alecita.