Ibuuku lya Bubili Ilya Ishamfumu

1 Kabili ilyo Ahabu afwile,+ Moabu+ atendeke ukupondokela+ Israele.

2 Awe Ahasia aliponene+ ukupula mu cafimbile pa mutenge wa muputule wakwe uwa pa muulu+ mu Samaria, e fyo atampile no kulwala. E ico atumine inkombe no kusheba ukuti: “Kabiyeni, kepusheni+ kuli Baali-sebubi+ lesa wa ku Ekrone+ nga nkapola ku bulwele ubu.”+ 3 Lelo malaika+ wa kwa Yehova aebele Eliya umwina Tishbe+ ati: “Ima, kabiye kakumanye inkombe sha mfumu ya ku Samaria no kusheba ukuti, ‘Bushe ni pa mulandu wa kuti tamwaba Lesa+ muli Israele e co muleila mu kwipushisha kuli Baali-sebubi lesa wa ku Ekrone? 4 E ico Yehova atila: “Tawakeme pa busanshi bobe apo uleele, pantu ukufwa kwena ukafwa.”’”+ Awe Eliya aliimine no kuya.

5 Ilyo inkombe shabwelele, apo pene ashipwishe ati: “Cinshi mwabwelela?” 6 Na sho shamwebele ati: “Kuli umuntu uwacisatukumanya, kabili acitweba ati, ‘Bwelelenimo ku mfumu iimutumine, kabili muyebe amuti: “Yehova atila,+ ‘Bushe ni pa mulandu wa kuti tamwaba Lesa muli Israele e co uletumina aba kuyaipusha kuli Baali-sebubi lesa wa ku Ekrone? E ico tawakeme pa busanshi apo uleele, pantu ukufwa kwena ukafwa.’”’”+ 7 Na o aipwishe inkombe ati: “Bushe umuntu uwaishile ku kumukumanya alemoneka shani?” 8 Na sho shayaswike ashiti: “Afwele ica kufwala ca masako,+ no mushipi wa mpapa mu musana.”+ Ne mfumu apo pene yatile: “Ni Eliya umwina Tishbe.”

9 E lyo yatumine umukalamba waleangalila abaume amakumi yasano (50), na o aile na bantu bakwe abali amakumi yasano.+ Ilyo afikile kuli Eliya, amusangile naikala pa lupili. Kabili amwebele ati: “We muntu wa kwa Lesa wa cine,+ imfumu yasosa aiti, ‘Ika.’” 10 Lelo Eliya ayaswike no kweba umukalamba waleangalila abaume amakumi yasano (50) ati: “Cisuma, kanshi nga ndi muntu wa kwa Lesa, umulilo+ naufume ku muulu no koca iwe na baume bobe abali amakumi yasano.” No mulilo wafumine ku muulu no kumoca na baume amakumi yasano abo ali na bo.+

11 Kabili yatumine umukalamba na umbi uwaleangalila abaume amakumi yasano (50) na o aile na bantu bakwe abali amakumi yasano.+ E lyo amwebele ukuti: “We muntu wa kwa Lesa wa cine, imfumu yasosa aiti, ‘Ika bwangu.’”+ 12 Lelo Eliya ayaswike no kubeba ukuti: “Cisuma, kanshi nga ndi muntu wa kwa Lesa, umulilo naufume ku muulu no koca iwe na baume bobe abali amakumi yasano (50).” No mulilo wa kwa Lesa wafumine ku muulu no kumoca na baume amakumi yasano abo ali na bo.

13 Kabili yatumine umukalamba na umbi uwa butatu uwaleangalila abaume amakumi yasano (50) na o aile na bantu bakwe abali amakumi yasano.+ Lelo ena ailefukama+ pa ntanshi ya kwa Eliya, alamupapaata+ ukuti amupaale, no kumweba ati: “We muntu wa kwa Lesa wa cine, leka umweo+ wandi ne myeo ya babomfi bobe aba abali amakumi yasano ibe iyacindama+ mu menso yobe. 14 Mona, umulilo ufumine ku muulu no koca+ abakalamba babili aba kubalilapo abaleangalila abaume amakumi yasano (50) na bantu babo amakumi yasano, nomba leka umweo wandi ube uwacindama mu menso yobe.”

15 E lyo malaika wa kwa Yehova aebele Eliya ati: “Ika kabiye nankwe. Wimutiina iyo.”+ E ico alimine, aika no kuya nankwe ku mfumu. 16 Kabili atile ku mfumu: “Yehova atila, ‘Bushe ni pa mulandu wa kuti tamwaba Lesa wa kwipushako muli Israele, e co watumine inkombe+ sha kuyaipusha kuli Baali-sebubi lesa wa ku Ekrone?+ E ico tawakeme pa busanshi apo uleele, pantu ukufwa kwena ukafwa.’” 17 Kabili umuya inshiku alifwile,+ ukulingana na mashiwi+ ya kwa Yehova ayo Eliya asosele; na Yehoramu+ alimupyene no kutendeka ukuteka, mu mwaka walenga bubili uwa kwa Yehoramu+ mwana Yehoshafati imfumu ya kwa Yuda, pantu takwete umwana umwaume.

18 Ne fyashala ifyo Ahasia+ acitile, bushe tafyalembwa mwi buuku+ lya milandu ya shamfumu isha mu Israele?

2 Nomba ilyo Yehova ali mupepi no kusenda Eliya+ mu cikuuku ca mwela ukuya mu muulu,+ Eliya na Elisha+ bafumine ku Gilgali.+ 2 Kabili Eliya aebele Elisha ati: “Ikala pano, pantu Yehova nantuma ukuya ku Betele.” Lelo Elisha atile: “Na pali fye Yehova+ e lyo na pali imwe bene,+ ndelapa nati, nshalekane na imwe.”+ E ico baile ku Betele.+ 3 E lyo abana ba bakasesema+ abali ku Betele bafumine no kuya kuli Elisha no kumweba abati: “Bushe nawishiba ukuti buno bushiku Yehova alesenda sokulu ukufuma kuli iwe kabili tabe intungulushi yobe?”+ Na o atile: “Na ine ninjishiba.+ Talaleni.”

4 Kabili Eliya aebele Elisha ukuti: “Elisha, ikala pano, pantu Yehova nantuma ku Yeriko.”+ Na o atile: “Na pali fye Yehova e lyo na pali imwe bene, ndelapa nati, nshalekane na imwe.” E ico baile ku Yeriko. 5 E lyo abana ba bakasesema abali ku Yeriko baile kuli Elisha no kumweba abati: “Bushe nawishiba ukuti buno bushiku Yehova alesenda sokulu ukufuma kuli iwe kabili tabe intungulushi yobe?” Na o atile: “Na ine ninjishiba. Talaleni.”+

6 Eliya nomba aebele Elisha ati: “Ikala pano, pantu Yehova nantuma ku Yordani.”+ Na o atile: “Na pali fye Yehova e lyo na pali imwe bene, ndelapa nati, nshalekane na imwe.”+ E ico baile bonse babili. 7 Kabili kwali abaume amakumi yasano (50) aba mu bana ba bakasesema abaiminine akatalamukila balemona;+ lelo Eliya na Elisha baiminine mu lulamba lwa Yordani. 8 E lyo Eliya abuulile ica kufwala cakwe icaibela,+ acifunga no kuuma pa menshi, na menshi yapaatukene uku no ku, kabili bonse babili bayabwike apauma.+

9 Kabili ilyo fye bayabukile kwi shilya, Eliya aebele Elisha ati: “Lomba ifyo ulefwaya nkucitile ilyo nshilasendwa ukufuma pali iwe.”+ Na o Elisha atile: “Lekeni ifiputulwa fibili+ ifya mupashi+ wenu fise pali ine.”+ 10 Na o atile: “Cayafya ico walomba.+ Nga walamonako uko ndesendwa ukufuma pali iwe, ninshi calaba ifyo fine; nomba nga tawamoneko, ninshi te fyo cileba.”

11 Awe ilyo bale-enda uku ninshi balelanda, moneni! kwaishile iceleta+ lya nkondo ilya mulilo na bakabalwe ba mulilo, kabili bapaatukenye balya babili; na Eliya asendelwe muli kankungwe mu muulu.+ 12 Elisha alemona fyonse ifi, kabili alebilikisha ati: “Tata, tata,+ iceleta lya nkondo ilya kwa Israele na ba pali bakabalwe bakwe!”+ Kabili Elisha tamumwene na kabili. Awe abuulile ne ca kufwala cakwe no kulepulamo fibili.+ 13 E lyo nomba atoolele ica kufwala caibela+ ica kwa Eliya ico aponeshe, kabili alibwelelemo no kuyaiminina pa lulamba lwa Yordani. 14 Awe abuulile ica kufwala caibela ica kwa Eliya ico aponeshe, aumine na pa menshi+ no kusosa ati: “Ali kwi Yehova, Lesa wa kwa Eliya?”+ Ilyo aumine pa menshi, yapaatukene uku no ku, kabili Elisha alyabwike.

15 Ilyo abana ba bakasesema abali ku Yeriko bamumwene akatalamukila, batile: “Umupashi+ wa kwa Eliya uli pali Elisha.” Kabili baishile ku kumukumanya, bamufukamina+ na pa nshi. 16 Bamwebele abati: “Moneni, ababomfi benu bali na baume amakumi yasano (50), abaume ba maka. Lekeni baye ku kufwaya shikulwinwe. Nalimo umupashi+ wa kwa Yehova naumwimya no kumupoosa pa lupili lumo nangu mu mupokapoka umo.” Lelo atile: “Mwibatuma iyo.” 17 Na bo balemupatikisha fye mpaka aumfwa insoni, no kusosa ati: “Batumeni.” Kabili batumine abaume amakumi yasano (50); na bo baile balemufwaya pa nshiku shitatu, lelo tabamusangile. 18 Ilyo babwelele kuli ena, aleikala mu Yeriko.+ E lyo abepwishe ati: “Bushe nshamwebele nati, ‘Mwiya’?”

19 Kabili aba mu musumba baebele Elisha abati: “Kwena, uno musumba waliwama,+ nge fyo na imwe shikulu mulemona; nomba fye amenshi+ e yabipa ne calo cilenga amafumo ukupona.”+ 20 Na o atile: “Ndeteleni imbale yafonka iinono iipya, mubikemo no mucele.” Na bo balimuleteele. 21 Kabili alifumine no kuya ku ntulo ya menshi no kupoosamo umucele+ no kusosa ati: “Yehova atila, ‘Nalenga amenshi aya ukuba ayasuma.+ Tamwakafume na kabili imfwa nangu kulenga amafumo ukupona.’” 22 Awe ukufika na buno bushiku,+ amenshi yaba fye ayasuma, nge fyo Elisha asosele.

23 Kabili afumine kulya no kuya ku Betele.+ Nomba ilyo aleya mu nshila, kwali utulumendo+ utwafumine mu musumba kabili twalemuseka+ no kulamweba ati: “Kabiye, uba ipala!+ Kabiye, uba ipala!” 24 Na o alipilibwike no kutumona, kabili alitutiipile+ mwi shina lya kwa Yehova. Na babere+ babili abakota bafumine mu mutengo no kulepaulapo abana amakumi yane na babili (42).+ 25 Kabili ukufuma kulya akonkenyepo ukuya ku Lupili lwa Karmele,+ kabili ilyo afumine kulya abwelelemo ku Samaria.

3 Yehoramu+ mwana Ahabu, atendeke ukuteka Israele mu Samaria mu mwaka walenga ikumi na cinekonsekonse (18) uwa kuteka kwa kwa Yehoshafati imfumu ya kwa Yuda, kabili atekele pa myaka ikumi na ibili (12). 2 Kabili alecita ifyabipa mu menso ya kwa Yehova,+ lelo tacitile nga filya wishi+ nangu nyina balecita, kabili afumishe icilibwe icaimikwe+ ica kwa Baali ico wishi apangile.+ 3 Nomba alecita imembu ishalecitako Yeroboamu+ mwana Nebati, isho alengele na Israele ukubembuka.+ Tatalwikeko ku membu shilya.

4 Nomba Mesha+ imfumu ya kwa Moabu aleteka impaanga, kabili apeele ubupe ku mfumu ya kwa Israele, abana ba mpaanga amakana umwanda umo (100,000) ne mpaanga ishilume isho bashabeya amasako amakana umwanda umo. 5 Lelo ilyo fye Ahabu afwile,+ imfumu ya ku Moabu yatendeke ukupondokela+ imfumu ya ku Israele. 6 Awe mu bushiku bulya Imfumu Yehoramu yafumine ku Samaria no kulonganika+ abena Israele bonse. 7 Kabili yatumine bamo kuli Yehoshafati, aiti: “Imfumu ya ku Moabu naimpondokela. Bushe kuti twaya nobe ku Moabu ku kulwa?” Na o atile: “Nalaya.+ Ine cimo na iwe; abantu bandi cimo na bantu bobe;+ na bakabalwe bandi cimo na bakabalwe bobe.” 8 Kabili asosele no kuti: “Ni nshila nshi tukapita?” Na o atile: “Iya ku matololo ya Edomu.”+

9 Awe e fyo imfumu ya ku Israele ne mfumu ya ku Yuda ne mfumu ya ku Edomu+ baimine no kuya, kabili baile balefwayafwaya mu nshila inshiku cinelubali (7). Nomba takwali amenshi ya kunwa abashilika ne fitekwa ifyo basendele. 10 Kabili imfumu ya ku Israele yasukile yatila: “Yangu ifyo cabipa ukuti Yehova aita ishi mfumu shitatu ku kushipeela kuli Moabu!”+ 11 E lyo Yehoshafati atile:+ “Bushe kuno takwaba kasesema wa kwa Yehova?+ Kanshi e o natwipushishemo kuli Yehova.”+ E ico uwa mu babomfi ba mfumu ya ku Israele atile: “Kuno kwaliba Elisha+ mwana Shafati, uwaleitulwila amenshi ku minwe ya kwa Eliya.”+ 12 E lyo Yehoshafati atile: “Icebo ca kwa Yehova caba muli ena.” Awe imfumu ya ku Israele na Yehoshafati ne mfumu ya ku Edomu baile kuli ena.

13 Na o Elisha aebele imfumu ya ku Israele ukuti: “Bushe tulomfwana na iwe?+ Kabiye kuli bakasesema+ ba kwa wiso na bakasesema ba kwa noko.” Lelo imfumu ya ku Israele yatile kuli ena: “Iyo, pantu Yehova naita ishi mfumu shitatu ku kushipeela kuli Moabu.”+ 14 Na o Elisha atile: “Na pali Yehova+ wa mabumba uo mombela ndelapa nati, ni co nacindika Yehoshafati pa mulandu wa kuti e po ali,+ nga nshikuloleshe nangu fye ukukumona.+ 15 Aleni ndeteleni kalisha wa cilimba ca nsale.”+ Nomba ilyo kalisha wa cilimba ca nsale atendeke fye ukulisha, ukuboko+ kwa kwa Yehova kwaishile pali Elisha. 16 Na o atile: “Yehova atila, ‘Muli uyu mupokapoka mube ifilindi;+ 17 pantu Yehova atila: “Tamwakamone umwela, kabili tamwakamone imfula; lelo ulya mupokapoka ukesulamo amenshi,+ kabili e mo mukanwa,+ imwe ne nama shenu ne fitekwa fyenu.”’ 18 Kabili kakaba kantu akanono mu menso ya kwa Yehova,+ kabili akapeela Moabu kuli imwe.+ 19 Kabili mukonaule umusumba onse uwe linga+ no musumba onse uusuma, mukateme+ no muti onse uusuma+ no kucilika utumfukumfuku twa menshi tonse, kabili mukonaule impanga yonse iisuma ku mabwe.”

20 Awe ulucelo,+ pa nshita ya kutuula umutuulo wa ngano,+ moneni! amenshi yalefumina ku Edomu, ne calo caiswilemo amenshi.

21 Kabili abena Moabu bonse baumfwile ukuti imfumu nashisa mu kulwa na bo. E ico balongenye abaume ukutula pa balefwala+ umushipi mu musana no kucilapo, kabili baiminine na pa mupaka. 22 Ilyo baimine lucelocelo, akasuba kasanike pa menshi, ica kuti abena Moabu abali bushilya bamwene amenshi nayakashika kwati mulopa. 23 Na bo balati: “Mulopa uyu! Imfumu nashifwa ku lupanga, nashi-ipaya ishine sheka. E ico we Moabu kabiye ku kusenda ifipe!”+ 24 Ilyo baingile mu nkambi ya bena Israele, na bo abena Israele+ apo pene baliimine no kutendeka ukuuma abena Moabu ica kuti balifulumwike ku cinso cabo.+ E ico baingile mu Moabu, kabili pa kwingila baleuma abena Moabu. 25 Baonawile ne misumba,+ kabili balepoosa umo na umo amabwe mu mpanga yonse iisuma no kwisushamo amabwe; kabili balecilika utumfukumfuku twa menshi tonse,+ batemene no muti onse uusuma,+ mpaka bashamo fye amabwe ya mu Kiri-haresete;+ na ba kulasa amabwe baliushingulwike no ku-ucimfya.

26 Ilyo imfumu ya ku Moabu yamwene ukuti ubulwi bwaikosela, apo pene yasendele abaume imyanda cinelubali (700) abalelwa ukubomfya ulupanga ukuti bengile no kuyafika ku mfumu ya ku Edomu;+ lelo balifililwe. 27 Yasukile yabuula umwana wa iko umwaume ibeli uwali no kuipyana no kulateka, yamutuulile+ nge lambo lya koca pa cibumba. E lyo nomba abena Moabu bakalipe nga nshi pa bena Israele, ica kuti abena Israele bafumine kuli yena no kuleka ukuilwisha, babweleele na ku calo ku mwabo.

4 Awe kwali umwanakashi umo uwali umukashi wa mwana+ wa bakasesema uwaliliile kuli Elisha, ati: “Umubomfi wenu uwali umulume wandi alifwa. Kabili mwalishiba ukuti umubomfi wenu lyonse aletiina+ Yehova, nomba uwa nkongole+ naisa ku kusenda abana bandi babili ukuti babe abasha bakwe.” 2 Na o Elisha amwipwishe ati: “Cinshi ulefwaya nkucitile?+ Njeba; finshi ukwete mu ng’anda?” Na o atile: “Umubomfi wenu umwanakashi takwete nangu cimo, kano fye umutondo wa mafuta.”+ 3 E lyo atile: “Kabiye washime kumbi imitondo, ku bena mupalamano bobe bonse, imitondo umushili kantu. Washime iingi. 4 Kabili wingile na bana bobe mu ng’anda no kwisalako iciibi, kabili witulule amafuta mu mitondo yonse, ne yaisula uibike yeka.” 5 Awe afumine kuli Elisha no kuya.

Ilyo aingile na bana bakwe no kwisalako iciibi, bena balepalamika imitondo, na o aleitulwilamo.+ 6 Nomba ilyo imitondo yaiswile, aebele umwana wakwe ati: “Palamika kuno umutondo na umbi.”+ Lelo umwana atile: “Tapali umutondo na umbi.” Awe e fyo amafuta yalekele ukupongoloka.+ 7 Kabili aile-eba umuntu wa kwa Lesa wa cine, na o atile: “Kabiye, kashitishe amafuta no kubwesha inkongole,+ ne shileshalako uleliilamo pamo na bana bobe.”+

8 Nomba, bushiku bumo Elisha alepita aleya ku Shunemu,+ ukwali umwanakashi uwalumbuka, na o amupatikishe+ ukulya ifya kulya. Kabili lyonse ilyo alepita, aleshokelako mu kulya ifya kulya. 9 No mwanakashi asukile aeba umulume+ wakwe ati: “Moneni, ninjishiba nomba ukuti, uyu muntu uupita pano lyonse muntu wa mushilo uwa kwa Lesa.+ 10 Natupange umuputule wa pa muulu+ pa cibumba no kumubikilamo ica kusendamapo ne tebulo ne cipuna na pa kuteka inyali;+ kabili alecita nga aisa lyonse kuli ifwe, e mo aleya.”+

11 Awe bushiku bumo alishile filya fine aleisa lyonse, aya na mu muputule wa pa muulu no kusendama. 12 Kabili aebele Gehasi+ umubomfi wakwe ati: “Ita umwanakashi ulya umwina Shunemu.”+ Na o alimwitile ukuti ese no kwiminina ku cinso cakwe. 13 E lyo atile kuli Gehasi: “Mwebe auti, ‘Mona, wali-ipusula ifintu no kutusakamana muli fyonse nga fino.+ Cinshi twingakucitila?+ Bushe kuli ifya kukulandilako ku mfumu+ nelyo ku mukalamba+ wa bashilika?’” Na o atile: “Ine njikala mu bantu bandi.”+ 14 Kabili Elisha atile: “Nomba cinshi twingamucitila?” Na o Gehasi atile: “Takwata umwana,+ no mulume wakwe na o nakota.” 15 Na o apo pene atile: “Mwite.” E lyo amwitile, no mwanakashi aiminine pa mwinshi. 16 E lyo atile: “Uyu mwaka uleisa nga ino ine nshita ukafukatila umwana mwaume.”+ Na o atile: “Awe, shikulu, we muntu wa kwa Lesa! Wilabepa umubomfi obe.”

17 Awe umwanakashi alimite no kufyala umwana umwaume+ pali ilya ine nshita, umwaka wakonkelepo, nga filya fine fye Elisha amwebele.+ 18 No mwana aile alekula, kabili bushiku bumo, aile kuli wishi pamo na ba kulobolola,+ nge fyo alecita lyonse. 19 Kabili ale-eba wishi ati: “Nafwa umutwe, iye umutwe!”+ Na wishi asukile aeba umubomfi wakwe ati: “Mutwale kuli nyina.”+ 20 Na o alimusendele no kumutwala kuli nyina. Kabili aikele pa molu ya kwa nyina ukufika akasuba kaba pa kati, asuka umulumendo afwa.+ 21 E lyo aninine no kumulaalika pa ca kusendamapo+ ca muntu wa kwa Lesa+ wa cine, asha aisalako no kufumako. 22 Aitile no mulume wakwe no kusosa ukuti: “Ntumineniko umubomfi wenu umo ne mpunda imo, kabili lekeni mbutukile ku muntu wa kwa Lesa wa cine, nalabwela.”+ 23 Lelo atile: “Nga cinshi uleila kuli ena lelo? Buno bushiku te mweshi upya+ kabili te sabata iyo.” Na o atile: “Cili fye.” 24 E ico aninine pa mpunda+ no kweba umubomfi wakwe ukuti: “Natuleya. Wileka ukwendesha pa mulandu wandi kano nga nakweba nati nashako.”

25 Kabili umwanakashi aliile no kuyafika ku muntu wa kwa Lesa wa cine pa Lupili lwa Karmele. Nomba ilyo umuntu wa kwa Lesa wa cine amumwene fye akatalamukila, apo pene aebele Gehasi umubomfi+ wakwe ati: “Mona! Umwanakashi umwina Shunemu uyo. 26 Nomba butukilako no kuyamukumanya, umwebe auti, ‘Bushe uli fye bwino? Bushe ali fye bwino umulume obe? Bushe ali fye bwino umwana?’” Na o atile: “Tuli fye bwino.” 27 Ilyo umwanakashi afikile ku muntu wa kwa Lesa wa cine pa lupili, amwikete ku makasa.+ Na Gehasi alipaleme ukuti amufumyeko,+ lelo umuntu wa kwa Lesa+ wa cine atile: “Muleke,+ pantu ali no bulanda+ mu mutima; kabili Yehova namfisa+ kabili tanjebele nakalya.” 28 E lyo umwanakashi atile: “Bushe nalilombele umwana umwaume ukupitila muli shikulu? Bushe nshatile, ‘Mwileka ncetekele ifya bufi’?”+

29 Na o Elisha apo pene aebele Gehasi ati:+ “Ipekanye,*+ buula ne nkonto+ yandi usende mu kuboko, kabiye. Nga wakumanya umuntu, wimuposha;+ kabili ngo muntu akuposha, wimwasuka. Kabili uyebika inkonto yandi pa menso ya mwana.”+ 30 Na nyina wa mwana atile: “Na pali Yehova+ na pali iwe wine,+ ndelapa nati, nshakushe.”+ E ico aliimine no kuya nankwe. 31 Awe Gehasi alibatangilile, ailebika ne nkonto pa menso ya mwana, lelo takwali ishiwi nelyo icishibilo ca kuti umwana ali umumi.+ E ico abwelele ku kumukumanya, no kumweba ukuti: “Umwana tabukile.”+

32 Kabili Elisha asukile aingila mu ng’anda, kabili moneni, umwana nafwa, nabamulaalika pa ca kusendamapo ca kwa Elisha.+ 33 Awe aliingile no kwisalako iciibi,+ kabili atendeke ukupepa kuli Yehova.+ 34 Kabili aliile no kulambalala pa mwana,+ abikile akanwa kakwe pa kanwa ka mwana, na menso pa menso yakwe, ne ndupi pa ndupi shakwe, nakontamina pali ena, wasukile umubili wa mwana wakaba. 35 E lyo atendeke ukwenda na kabili mu ng’anda, aya uku umuku umo no ku umuku umo, kabili pa numa alile no kukontamina pali ena. Awe umwana atendeke ukutesemuna nalimo imiku cinelubali (7), e lyo umwana aloleshe.+ 36 Kabili aitile Gehasi no kusosa ati: “Ita umwanakashi ulya umwina Shunemu.”+ Na o alimwitile, kabili aishile kuli ena. E lyo atile: “Senda umwana obe.”+ 37 Kabili umwanakashi aliingile, awa ku makasa yakwe no kukontamina kuli ena pa nshi,+ e lyo asendele umwana wakwe no kufuma.+

38 Awe Elisha abwelele ku Gilgali,+ na mu calo mwali icipowe.+ Ilyo abana+ ba bakasesema baikele ku cinso cakwe,+ aebele umubomfi wakwe, ati:+ “Tekapo impoto iikalamba no kwipikila abana ba bakasesema ifya kulya.”+ 39 Awe umuntu umo aile mu mpanga ku kusaba umusalu,+ kabili asangile umwangashi wa mu mpanga, e pa kuswako imyungu ya mpanga aisusha mu ca kufwala cakwe, kabili aileiputawila mu mpoto, pantu tabaishibe bwino ilya myungu. 40 Bapungwilile na bantu ukuti balye. Nomba ilyo fye baliilepo, bapundile abati: “Muli imfwa mu mpoto,+ we muntu wa kwa Lesa wa cine.”+ Kabili bafililwe ukulya. 41 E ico atile: “Kanshi leteni ubuunga.” Ilyo apooselemo ubuunga mu mpoto, asosele ati: “Pungwileni abantu balye.” Awe nomba mu mpoto tamwali na kabili ifingakola abantu.+

42 Kabili kwali umuntu uwafumine ku Baali-shalisha,+ kabili aleteele+ umuntu wa kwa Lesa wa cine umukate wapangilwa ne fisabo fyabalilapo ukupya,+ imikate ya barle amakumi yabili (20),+ ne ngano ishipya mu cola cakwe ica mukate. Kabili atile: “Peela abantu balye.”+ 43 Lelo umubomfi wakwe atile: “Kuti napeela shani ifi ku baume abali umwanda umo (100)?”+ Na o atile: “Peela abantu balye, pantu e fyo Yehova atila, ‘Balelya no kusha bashepo.’”+ 44 Na o alibapeele, balalya, kabili bashilepo na fimo nge fyo Yehova asosele.+

5 Awe kwali umuntu umo, ishina lyakwe ni Naamani,+ umukalamba wa bashilika ba mfumu ya ku Siria. Ali muntu uwacindama kuli shikulu wakwe kabili alicindikwe, pantu ni muli ena e mo Yehova apusushishe Siria;+ kabili ali uwa bulamba, kabili uwa maka, nangu ca kuti ali ne fibashi. 2 Kabili abena Siria balifumine no kuyabelama nge fipondo,+ kabili basendele bunkole umukashana umunono+ ukufuma mu calo ca Israele, na o aishileba uwa kubombela muka Naamani. 3 Umuya inshiku aebele+ nakulu ati: “Iye, nga shikulu aile kuli kasesema+ wa ku Samaria! Kuti amuposha ifibashi alwala.”+ 4 Awe umuntu umo aile-eba shikulu wakwe ati: “Ni fi ne fi e fyo umukashana uwafuma ku calo ca Israele asosele.”+

5 E lyo imfumu ya ku Siria yatile: “Kabiye! Wishingashinga, kabili leka ntume kalata ku mfumu ya ku Israele.” Kabili ailebuula+ amatalanti ya silfere ikumi (10) ne ndalama sha golde+ amakana mutanda (6,000) ne fya kufwala+ ikumi. 6 Na o atwele kalata+ ku mfumu ya ku Israele, umwalembelwe ukuti: “Nomba pa nshita kalata uno alefika kuli iwe, mona, nintuma Naamani umubomfi wandi, ukuti umuposhe ifibashi.” 7 Awe imfumu ya ku Israele yatile ishibelenga fye kalata, apo pene yalepwile+ ifya kufwala fya iko no kusosa aiti: “Bushe ndi Lesa,+ uwa kuti nenge umuntu ukufwa nelyo ukuba no bumi?+ Pantu uyu muntu atuma kuli ine ukuti mposhe umuntu wa fibashi; pantu lolesheni, kabili shi moneni ifyo alefwaya ukuti tuleumana.”+

8 Nomba ilyo Elisha umuntu wa kwa Lesa wa cine aumfwile fye ukuti imfumu ya Israele nailepula ifya kufwala fya iko,+ apo pene atumine amashiwi ku mfumu, no kutila: “Nga cinshi mwalepwila ifya kufwala fyenu? Lekeni ese kuli ine pa kuti eshibe ukuti mwaliba kasesema mu Israele.”+ 9 E ico Naamani aile na bakabalwe bakwe na maceleta yakwe aya nkondo, aiminine na pa mwinshi wa ng’anda ya kwa Elisha. 10 Lelo Elisha atumine inkombe kuli ena ati: “Kabiye, usambe+ imiku cinelubali (7)+ mu Yordani pa kuti inkanda yobe ipole;+ kabili walasanguluka.” 11 Na o Naamani alikalipe,+ afumapo alaya, alesosa no kuti: “Moneni, ine nacilati,+ ‘Alafuma ese na kuli ine e lyo eminine no kwita pe shina lya kwa Yehova Lesa wakwe, apishe no kuboko kwakwe pa fibashi, no kumposha ifibashi.’ 12 Bushe imimana ya ku Damaseke,+ Abana na Paripari, tayawama ukucila amenshi yonse+ aya kwa Israele? Bushe te kuti ngowemo no kupola?”+ E fyo apilibwike no kuya icipyu.+

13 Nomba ababomfi bakwe balipaleme no kumwipusha ati: “Tata,+ bushe nga cintu icikalamba ico kasesema amwebele, bushe nga tamucicitile? Pali bufi apo amwebele fye ati, ‘Owa no kusanguluka’?” 14 Awe aliile no kuitumpika mu Yordani imiku cinelubali (7) nge fyo umuntu wa kwa Lesa wa cine amwebele;+ ne nkanda yakwe yalipolele no kuba bwino kwati ya mwaice+ kabili alisangulwike.+

15 E lyo nomba abweleele ku muntu wa kwa Lesa wa cine,+ pamo na bonse abali nankwe, kabili aiminine pa ntanshi yakwe no kusosa ukuti: “Moneni, nomba naishiba ukuti takwaba Lesa kumbi pano isonde kano mu Israele.+ Nomba pokeni ubupe+ ubu ku mubomfi wenu.” 16 Lelo amwebele ati: “Na pali Yehova+ uo mombela, ndelapa nati, nshapoke.”+ Kabili alamupatikisha ukuti apoke, lelo alikaaninine fye. 17 Na Naamani asukile asosa ukuti: “Kanshi peeleniko umubomfi wenu iloba,+ ilyo imfalashi shibili shingasenda; pantu umubomfi wenu takatuule na kabili umutuulo wa koca nangu lilambo kuli balesa bambi kano fye kuli Yehova.+ 18 Kuli ici cintu e ko Yehova elele umubomfi wenu: Ilyo shikulu aingila mu ng’anda ya kwa Rimone+ ukuti akontame mulya, nashintilila+ na pa kuboko kwandi, kabili nga nashinshimuna+ mu ng’anda ya kwa Rimone, no kukontama mu ng’anda ya kwa Rimone, Yehova abelele umubomfi wakwe uluse pali ici cintu.”+ 19 Na o amwebele ati: “Kabiye umutende.”+ Kabili afumine pali ena no kwenda ukufika apatali.

20 E lyo Gehasi+ umubomfi wa kwa Elisha umuntu wa kwa Lesa+ wa cine atile: “Moneni, shikulu aleka fye Naamani+ umwina Siria aya ukwabula ukupokako icili conse ico acileta. Na pali Yehova,+ ndelapa nati, ndemukonka ulubilo no kuyapokako fimo kuli ena.”+ 21 Awe Gehasi akonkele Naamani ulubilo. Ilyo Naamani amwene umuntu alemukonka ulubilo, apo pene aikile mwi celeta lyakwe ku kuyamukumanya, kabili atile: “Bushe kuli umutende uko wafuma?”+ 22 Na o atile: “Kwa mutende. Shikulu+ antuma+ ati, ‘Mona! Nomba line fye kwaisa abalumendo babili abafumine ku citungu ca mpili ica kwa Efraimu, aba mu bana ba bakasesema.+ Bapeeleko italanti limo ilya silfere ne fya kufwala fibili.’”+ 23 E lyo Naamani atile: “Buulapo amatalanti yabili.” Kabili alemucincisha,+ asukile akakile mu mifuko ibili amatalanti yabili aya silfere, ne fya kufwala fibili, apeele na babomfi bakwe babili, ukuti basende pa ntanshi yakwe.

24 Ilyo afikile ku Ofele, apo pene alibapokele no kufibika mu ng’anda,+ alekele na baume baye. Awe na bo e fyo baile. 25 Kabili alingile no kwiminina pali shikulu wakwe.+ E lyo Elisha amwipwishe ati: “Wafuma kwi, Gehasi?” Na o atile: “Umubomfi wenu tele nangu kumo.”+ 26 Kabili amwipwishe ati: “Bushe umutima wandi tawacikonka ilyo ulya muntu acipilibuka fye ukuti ekile mwi celeta lyakwe ku kwisakukumanya? Bushe ino e nshita ya kupoka silfere nangu ifya kufwala nangu mabala ya miolife nangu mabala ya myangashi, nangu impaanga nangu ing’ombe nangu ababomfi abaume nangu ababomfi abanakashi?+ 27 E ico ifibashi+ fya kwa Naamani fikalambatila pali iwe na pa bana bobe umuyayaya.”+ Awe apo pene afumine pali ena, ninshi nabuuta na tuutu ku fibashi.+

6 Kabili abana+ ba bakasesema batendeke ukusosa kuli Elisha abati: “Moneni! Ino ncende+ twaikalamo yalitucepela sana.+ 2 Lekeni tuleya ku Yordani, tuyesenda kulya cila muntu umwalo umo umo no kupanga+ umwa kuti tuleikala kulya.” Na o atile: “Kabiyeni.” 3 E lyo umo atile: “Mukwai kabiyeni pamo na babomfi benu.” Na o atile: “Nalaya.” 4 Awe aile na bo, kabili bafikile ku Yordani no kutendeka ukutema imiti.+ 5 Nomba umuntu umo aletema umuti wakwe, ne sembe+ lyaponene mu menshi. Na o alabilikisha no kusosa ati: “Iye, mwe shikulu,+ lisembe lya kwashima!”+ 6 E lyo umuntu wa kwa Lesa wa cine atile: “Ni pi lyaponena?” Na o amulangile apo lyaponene. Apo pene aputwile icimuti, acipoosele pa menshi no kulenga isembe ukweleela.+ 7 E lyo amwebele ati: “Lyabule.” Na o atambike ukuboko kwakwe ilyo line no kulibuula.

8 Awe imfumu ya ku Siria+ yatendeke ukulwa na Israele. Kabili yapandene amano na babomfi+ ba iko aiti: “Pa ncende pa kuti na pa kuti e po mupangile inkambi pamo na ine.”+ 9 E lyo umuntu wa kwa Lesa+ wa cine atumine ku mfumu ya Israele no kutila: “Ucenjele, wipita ku ncende ilya,+ pantu e ko abena Siria baleya.”+ 10 Kabili imfumu ya Israele yatumineko bamo ku ncende uko umuntu wa kwa Lesa wa cine ayebele.+ Na Elisha ali-isokele+ imiku fye iingi kabili yalitalwikeko.

11 Awe imfumu ya ku Siria yalifulilwe pali ici,+ kabili yaitile ababomfi ba iko no kubeba aiti: “Munjebe, ni nani pali ifwe uwaba ku lubali lwa mfumu ya bena Israele?”+ 12 E lyo umubomfi wakwe umo ayebele ati: “Tapali nangu umo, shikulu mwe mfumu, lelo ni Elisha+ kasesema uwaba muli Israele e weba+ imfumu ya ku Israele ifyo mulanda mu muputule wenu uwa mu kati uwa kusendamamo.”+ 13 E ico yatile: “Kabiyeni, kamoneni uko ali, pa kuti ntume aba kuyamubuula.”+ E lyo yaebelwe ukuti: “Ali ku Dotani.”+ 14 Awe apo pene yatumineko bakabalwe na maceleta ya nkondo ne bumba lya bashilika ilikalamba;+ kabili lyaishile no kushinguluka umusumba.

15 Ilyo umubomfi+ wa muntu wa kwa Lesa wa cine aimine ulucelocelo, no kufumina pa nse, moneni, ibumba lya bashilika ilikalamba lishingulwike umusumba na bakabalwe na maceleta ya nkondo. Kabili umubomfi wakwe ilyo line fye atile: “Iye, mwe shikulu!+ Twalacita shani?” 16 Lelo atile: “Witiina,+ pantu abali kuli ifwe bengi ukucila abali kuli bena.”+ 17 Kabili Elisha apepele+ ati: “Mwe Yehova, isuleni amenso yakwe+ pa kuti amone.” Na o Yehova ilyo line aiswile amenso ya mubomfi, na o alimwene; kabili moneni! mu citungu ca mpili monse mwali bakabalwe na maceleta ya nkondo+ aya mulilo ukushinguluka Elisha.+

18 Kabili ilyo baletentemuka ukuya kuli Elisha, apepele kuli Yehova ati: “Lekeni ulu luko lupofule.”+ Awe apofwishe ulu luko ukulingana na mashiwi ya kwa Elisha. 19 E lyo Elisha atile kuli bena: “Te kuli ino inshila, kabili te kuli uno musumba. Nkonkeni, lekeni imutwale ku muntu uo mulefwaya.” Lelo abatwele ku Samaria.+

20 Nomba cilya fye bafika mu Samaria, Elisha atile: “Mwe Yehova, isuleni amenso ya aba bantu pa kuti bamone.”+ Na o Yehova apo pene ashibwile amenso yabo, na bo baliloleshe; kabili moneni, bali pa kati ka Samaria. 21 E lyo imfumu ya ku Israele yatile kuli Elisha: “Tata,+ bushe mbepaye,+ bushe mbepaye?” 22 Lelo atile: “Wibepaya. Bushe abantu abo waikata bunkole ku lupanga lobe no buta bobe e bo wipaye?+ Bapeele umukate na menshi balye no kunwa+ no kuya kuli shikulwibo.” 23 Awe yabapekanishishe umutebeto uukalamba; na bo baliliile no kunwa, e lyo nomba abalekele baye, kabili baile kuli shikulwibo. Kabili ifipondo fya bena Siria ifyalebelamina+ tafyatalile afisa na kabili mu calo ca bena Israele.

24 Ilyo papitile inshita, Ben-hadadi imfumu ya ku Siria alonganike aba mu nkambi yakwe bonse no kuyashinga+ Samaria. 25 Kabili kwaponene insala iikalamba mu Samaria,+ kabili moneni! abena Siria bashingile Samaria mpaka umutwe wa mpunda+ walashitwa mu ndalama sha silfere amakumi cinekonsekonse (80), ne ndupi shibili isha matotoli ya nkunda+ shalashitwa mu sha silfere shisano. 26 Nomba ilyo imfumu ya ku Israele yalepita pa cibumba, umwanakashi umo abilikishe kuli yena ati: “Mpususheni, shikulu mwe mfumu!”+ 27 Na yo yatile: “Nga Yehova takupuswishe, ni kuli cinshi ine ningakupusushisha?+ bushe ni ku ca kupuminapo ingano nangu ku ca kukaminamo imyangashi nelyo amafuta?” 28 Kabili imfumu yakonkenyepo ukumweba aiti: “Nga cinshi cikucitikile?” Na o atile: “Ni uyu wine umwanakashi e wanjebele ati, ‘Leta umwana obe tumulye lelo, no mwana wandi tukamulya mailo.’+ 29 E fyo twaipike+ umwana wandi no kumulya.+ Nomba ubushiku bwakonkelepo namwebele nati, ‘Leta umwana obe tumulye.’ Lelo alifishile umwana wakwe.”

30 Awe ilyo imfumu yaumfwile fye amashiwi ya mwanakashi, ilyo line yalepwile+ ifya kufwala fya iko; kabili ilyo yalepita pa cibumba, abantu balimwene, kabili, moneni! insamu* e shali pa mubili wa iko. 31 Kabili yatile: “E fyo Lesa ankande, alundenapo, nga ca kuti umutwe wa kwa Elisha mwana Shafati tawaputulwe buno bushiku!”+

32 Kabili Elisha aikele mu ng’anda yakwe, na bakalamba baikele pamo nankwe,+ ilyo imfumu yatumine umuntu. Ilyo inkombe ishilaingila, Elisha aebele abakalamba ukuti: “Bushe namumona ifyo uyu mwana wa kwa kepaya+ atumine ukuti ine mputulwe umutwe? Mucite ifi: inkombe nga yafika fye, mwisaleko iciibi, muititikishe ku ciibi. Bushe inshindo+ sha kwa shikulu wakwe tashili ku numa yakwe?” 33 Ilyo acili alelanda na bo, moneni inkombe yalifikile kuli ena, ne mfumu yatile: “Moneni ububi ubu ubufumine kuli Yehova.+ Nga cinshi ico ndelolelela Yehova na kabili?”+

7 E lyo Elisha atile: “Umfweni amashiwi ya kwa Yehova.+ Yehova atila, ‘Nge nshita ino ine mailo galoni* umo uwa buunga bwapeleka akalashitwa mwi shekele limo, na magaloni yabili aya barle mwi shekele limo, mu mpongolo ya Samaria.’”+ 2 Nomba mushika uo imfumu yashintilemo+ amaka ayaswike umuntu wa kwa Lesa wa cine no kutila: “Nga ca kuti Yehova aleisula ifipunda mu muulu,+ bushe ici cintu kuti cacitika?”+ Na o atile: “Ukumona kwena ukamonako na menso yobe,+ lelo tawakalyeko.”+

3 Awe kwali abantu bane aba fibashi abaikele pa mpongolo;+ kabili balalanshanya abati: “Nga cinshi twikalilile pano tusuke tufwe? 4 Nga twatila, ‘Natwingile mu musumba,’ ilyo icipowe cili mu musumba, tulefwila mulya mwine.+ Nomba nga twaikala pano, na lyo line tulefwa. Kanshi natuleya no kwingila mu nkambi ya bena Siria. Nga balatuleka tube no mweo, ninshi tuleba aba mweo; nomba nga baletwipaya, ninshi tulefwa ifyo fine.”+ 5 Kabili baimine icungulo bushiku pa kuti bayeingila mu nkambi ya bena Siria; kabili bailefika fye na ku mpela ya nkambi ya bena Siria, kabili, moneni! tamwali umuntu nangu umo.

6 Yehova e walengele inkambi ya bena Siria ukumfwa+ icongo ca maceleta ya nkondo, ne congo ca bakabalwe, ne congo ce bumba likalamba ilya bashilika,+ ica kuti abena Siria balasoshanya abati: “Moneni! imfumu ya ku Israele naitoobwela ishamfumu sha bena Hiti+ ne shamfumu sha bena Egupti+ ukwisatulwisha!” 7 Na bo e pa kwima apo pene no kufulumuka icungulo bushiku ninshi nakufiita,+ basha na matenti yabo, na bakabalwe+ babo ne mpunda shabo—mulya mwine fye inkambi yabeleele—kabili balifulumwike pa kuti bapusushe imyeo+ yabo.

8 Ilyo balya aba fibashi bafikile fye na ku mpela ya nkambi, baingile mwi tenti limo no kutendeka ukulya no kunwa, kabili basendelemo silfere na golde ne fya kufwala bayafifisa. Kabili balibwelele baingila mwi tenti na limbi no kusendamo ifintu bayafifisa.+

9 Basukile balalanda abene abati: “Taciweme ico tulecita. Buno bushiku bwa mbila nsuma!+ Nga tuleshingashinga, no kulolela mpaka buce ulucelo, tukaba no mulandu.+ Natuleya twingile no kushimika ku ng’anda ya mfumu.” 10 E ico baile no kwita bakalinda+ ba mpongolo ya musumba, no kubashimikila abati: “Twacingila mu nkambi ya bena Siria, kabili moneni! tamwaciba nangu umo kabili tatwacumfwamo ishiwi lya muntu, kano fye bakabalwe abakakilwe ne mpunda ishikakilwe na matenti yaciba fye umo yabela.”+ 11 Na po pene bakalinda ba mpongolo balibilikishe, kabili baileshimika na mu ng’anda ya mfumu.

12 Awe imfumu na yo yalimine ilyo line ubushiku no kweba ababomfi ba iko aiti:+ “Lekeni mwebe ifyo abena Siria bacitile kuli ifwe.+ Nabeshiba ukuti tuli ne nsala;+ e ico nabafuma mu nkambi no kuyafisama mu mpanga,+ abati, ‘Balefuma mu musumba, kabili tulebekata aba mweo, kabili tuleyaingila na mu musumba.’” 13 E lyo umubomfi wakwe umo ayaswike ati: “Lekeni basende bakabalwe basano abashalapo mu musumba.+ Moneni! Bali fye cimo cine nga bena Israele bonse abashelepo mu musumba. Moneni! Bali fye cimo cine nga bena Israele abaloba.+ Lekeni tutumeko bamo bayemona.” 14 Awe babuulile amaceleta yabili na bakabalwe, ne mfumu yabatumine ku nkambi ya bena Siria aiti: “Kabiyeni mumone.” 15 Na bo balibakonkele ukuyafika fye na ku Yordani; kabili moneni! mu nshila monse mwali ifya kufwala ne fipe+ ifyo abena Siria balepoosa pa kufulumuka.+ Kabili inkombe shalibwelele no kushimikila imfumu.

16 E lyo abantu bafumine no kuyasenda+ ifyali mu nkambi ya bena Siria. E ico galoni umo uwa buunga ubwapeleka aleshitwa mwi shekele limo, na magaloni yabili aya barle mwi shekele limo, ukulingana na mashiwi+ ya kwa Yehova. 17 Kabili imfumu yalisalile mushika uo yashintilemo+ amaka ukula-angalila impongolo; na bantu balimunyantawile+ mu mpongolo, ica kuti alifwile, ukulingana ne fyo umuntu wa kwa Lesa wa cine asosele,+ ilyo alandile pa nshita imfumu yaile kuli ena. 18 E fyo cacitike filya fine umuntu wa kwa Lesa wa cine asosele ku mfumu ati: “Amagaloni yabili aya barle yakalashitwa mwi shekele limo, na galoni umo uwa buunga ubwapeleka akalashitwa mwi shekele limo mu mpongolo ya Samaria, nge nshita ino ine mailo.”+ 19 Lelo mushika ayaswike umuntu wa kwa Lesa wa cine no kutila: “Nangu ca kuti Yehova aleisula ifipunda mu muulu, bushe ici cintu kuti cacitika ukulingana ne fyo wasosa?”+ Na o atile: “Mona, ukumona kwena ukamonako na menso yobe, lelo tawakalyeko.”+ 20 Ifi fine e fyamucitikile,+ ilyo abantu bamunyantawilile+ mu mpongolo, ica kuti alifwile.

8 Kabili Elisha aebele umwanakashi uo abuushiishe umwana+ ati: “Ima, kabiye, iwe na ba mu ng’anda yobe, muye mu kulaikala mu calo cimbi ico mwingayaikalako;+ pantu Yehova aleleta icipowe,+ kabili cikaba mu calo pa myaka cinelubali (7).”+ 2 E ico umwanakashi alimine no kucita ukulingana na mashiwi ya muntu wa kwa Lesa wa cine, kabili aile+ na ba mu ng’anda yakwe,+ ayaikala mu calo ca baPelishiti+ pa myaka cinelubali.

3 Nomba ilyo imyaka cinelubali yapwile, umwanakashi alibwelele ukufuma ku calo ca baPelishiti, no kuyalilila ing’anda yakwe ne bala lyakwe ku mfumu.+ 4 Awe imfumu yalelanda na Gehasi+ umubomfi wa muntu wa kwa Lesa wa cine aiti: “Nshimikilako ifipesha amano fyonse ifyo Elisha acita.”+ 5 Nomba ilyo aleshimikila imfumu ifyo abuushishe uwafwile,+ moneni, umwanakashi uo Elisha abuushiishe umwana alelilila ing’anda yakwe ne bala+ lyakwe ku mfumu. Na o Gehasi ilyo line atile: “Shikulu+ mwe mfumu, e uyu mwanakashi, no yu e mwana wakwe uo Elisha abuushishe.” 6 Ne mfumu yaipwishe umwanakashi, na o ashimikile imfumu ifyacitike.+ E lyo imfumu yamupeele umulashi wa kwi sano,+ no kutila: “Mubwesesheni ifintu fyakwe fyonse ne fisabo fyonse ifya mwi bala ukutula apo afumiine muno calo ukufika na lelo.”+

7 Kabili Elisha aile ku Damaseke;+ na Ben-hadadi+ imfumu ya ku Siria alilwele. Kwaishile na mashiwi kuli ena aya kuti: “Umuntu wa kwa Lesa+ wa cine nafika na kuno.” 8 Imfumu na yo e pa kweba Hasaele+ aiti: “Senda ubupe+ no kuyakumanya umuntu wa kwa Lesa wa cine, kabili umwebe akwipushisheko+ kuli Yehova, ati, ‘Bushe nkapola kuli ubu bulwele?’” 9 Awe Hasaele aile ku kumukumanya, asendele no bupe, ne fisuma fyonse ifya mu Damaseke, ifipe ifyali pa ngamila amakumi yane (40), aileiminina na ku cinso cakwe no kusosa ati: “Umwana+ wenu Ben-hadadi, imfumu ya ku Siria antuma kuli imwe ati, ‘Bushe nkapola kuli ubu bulwele?’” 10 Na o Elisha amwebele ati: “Kabiye umwebe auti, ‘Ukupola ukapola,’ lelo Yehova nananga+ ukuti ukufwa kwena ukafwa.”+ 11 Kabili atontele amenso pali Hasaele no kumulolekesha ica kuti aumfwa ne nsoni. E lyo nomba umuntu wa kwa Lesa wa cine atendeke ukulila.+ 12 Na Hasaele atile: “Cinshi shikulu alelilila?” Na o asosele ati: “Pantu ninjishiba ububi+ ubo ukaleta pa bana ba kwa Israele. Ukoca amalinga yabo ku mulilo, ukepaya na baume babo abene bene ku lupanga, kabili ukaputaula abana babo tupimfya tupimfya,+ no kulepula abanakashi babo abali na mafumo.”+ 13 E lyo Hasaele atile: “Finshi umubomfi wenu ali, imbwa+ fye, uwa kuti acite icintu cakula ifi?” Lelo Elisha atile: “Yehova nananga ukuti iwe ukaba imfumu ya bena Siria.”+

14 Kabili pa numa, alifumine kuli Elisha no kuya kuli shikulu wakwe, na o amwipwishe ati: “Finshi Elisha acikweba?” Na o atile: “Acinjeba ati, ‘Ukupola ukapola.’”+ 15 Nomba ubushiku bwakonkelepo, abuulile ica kwanshika pa busanshi, acitubike na mu menshi no kumufimba pa menso,+ kabili alifwile.+ Na Hasaele+ alimupyene no kutendeka ukuteka.

16 Kabili mu mwaka walenga isano ukutula apo Yehoramu+ mwana Ahabu, abelele imfumu ya Israele, ilyo Yehoshafati ali imfumu ya Yuda, e mo Yehoramu+ mwana Yehoshafati imfumu ya Yuda atendeke ukuteka. 17 Atendeke ukuteka ninshi ali ne myaka amakumi yatatu na ibili (32), kabili atekele mu Yerusalemu pa myaka cinekonsekonse (8).+ 18 Kabili ale-enda mu nshila sha shamfumu sha mu Israele,+ ifyo na ba mu ng’anda ya kwa Ahabu bacitile;+ pantu aupile umwana mwanakashi wa kwa Ahabu,+ kabili alecita ifyabipa mu menso ya kwa Yehova. 19 Lelo Yehova talefwaya ukonaula Yuda+ pa mulandu wa kwa Davidi umubomfi wakwe,+ nge fyo amulaile ukupeela inyali+ kuli ena na ku bana bakwe inshiku shonse.

20 Mu nshiku shakwe, abena Edomu+ bapondokele ubuteko bwa kwa Yuda, no kubikapo+ imfumu ya kubateka. 21 Na o Yehoramu aile ku Sairi, na maceleta yonse pamo nankwe. Kabili aimine ubushiku no kuuma abena Edomu abamushingulwike na bakalamba ba maceleta; na bantu bafulumukile ku matenti yabo. 22 Lelo Edomu alitwalilile ukupondokela Yuda ukufika na lelo. Kabili e lyo na Libna+ atendeke ukupondoka.

23 Ne milandu iyashalako iya kwa Yehoramu na fyonse ifyo acitile, bushe tafyalembwa mwi buuku+ lya milandu ya shamfumu sha kwa Yuda?24 Kabili Yehoramu asukile alaala ukwalaala ifikolwe fyakwe,+ kabili ashiikilwe ukwashiikwa ifikolwe fyakwe mu Musumba wa kwa Davidi.+ Na Ahasia+ umwana wakwe alimupyene no kutendeka ukuteka.

25 Mu mwaka walenga ikumi na ibili (12) ukutula apo Yehoramu mwana Ahabu uwali imfumu ya Israele, atendekele ukuteka, e mo Ahasia mwana Yehoramu imfumu ya Yuda atendeke ukuteka.+ 26 Ahasia ali ne myaka amakumi yabili na ibili (22) ilyo atendeke ukuteka, kabili atekele umwaka umo mu Yerusalemu.+ Ne shina lya kwa nyina ni Atalia+ umwishikulu wa kwa Omri+ imfumu ya kwa Israele. 27 Kabili ale-enda mu nshila ya ba mu ng’anda ya kwa Ahabu+ no kucita ifyabipa mu menso ya kwa Yehova,+ nga ba mu ng’anda ya kwa Ahabu, pantu ali lupwa lwa ba mu ng’anda ya kwa Ahabu pa mulandu wa kuti e mo aupiile.+ 28 Kabili aile na Yehoramu mwana Ahabu ku kulwa na Hasaele+ imfumu ya ku Siria mu Ramote-gileadi,+ lelo abena Siria baumine+ Yehoramu. 29 E ico imfumu Yehoramu+ yabwelelemo ku Yesreele+ pa kuti ifilonda fipole ifyo abena Siria baicenene ku Rama ilyo yalelwa na Hasaele imfumu ya ku Siria. Kabili Ahasia+ mwana Yehoramu imfumu ya kwa Yuda aile ku kupempula Yehoramu mwana Ahabu ku Yesreele, pantu alilwele.

9 Kabili Elisha kasesema aitile umwana+ wa bakasesema umo no kumweba ati: “Ipekanye,*+ senda no musashi+ wa mafuta uyu, kabiye ku Ramote-gileadi.+ 2 Nga wafika kulya, uyefwaya Yehu+ mwana Yehoshafati mwana Nimshi; kabili nga wafika umwimye pa kati ka bamunyina, umwingishe na mu muputule wa mu kati na nkati.+ 3 Ubuule no musashi wa mafuta, uyetulwile na pa mutwe+ wakwe no kusosa ukuti, ‘E fyo Yehova asosa: “Nakusuba+ ukuba imfumu+ ya kwa Israele.”’ Kabili wisuleko iciibi no kufulumuka, wishingashinga.”

4 Awe umubomfi wa kwa kasesema alimine no kuya ku Ramote-gileadi. 5 Ilyo afikile, moneni, asangile abakalamba ba bashilika ninshi nabekala. Na o asosele ukuti: “Ndi na mashiwi ya kukweba,+ we mukalamba wa bashilika.” Na o Yehu amwebele ati: “Nani pali ifwe bonse?” E lyo atile: “Ni we, we mukalamba wa bashilika.” 6 Na o alimine no kwingila mu ng’anda; kabili aitulwilile amafuta pa mutwe wakwe no kumweba ati: “E fyo Yehova Lesa wa kwa Israele asosa, ‘Nakusuba ukuba imfumu+ ya bantu ba kwa Yehova,+ abena Israele. 7 Kabili ukepaye aba mu ng’anda ya kwa Ahabu sokulu, kabili nkalandula+ umulopa wa babomfi bandi bakasesema no mulopa wa babomfi ba kwa Yehova bonse uo Yesebele asuumishe.+ 8 Na ba mu ng’anda ya kwa Ahabu+ bonse bakaloba; kabili nkepaya umwaume+ onse uwa muli Ahabu, uwapelelwa no mulanda onse+ mu Israele. 9 Kabili nkacita aba mu ng’anda ya kwa Ahabu nga ba mu ng’anda ya kwa Yeroboamu+ mwana Nebati kabili nga ba mu ng’anda ya kwa Baasha+ mwana Ahiya. 10 Kabili Yesebele, imbwa shikamulya+ mwi bala lya mu Yesreele, kabili takwakabe uwa kumushiika.’” E lyo aiswileko iciibi no kufulumuka.+

11 Na Yehu abweleele ku babomfi ba kwa shikulu wakwe, na bo bamwipwishe abati: “Bushe kuli umutende?+ Nga cinshi ico ulya cipena+ acishila kuli iwe?” Na o abebele ati: “Mwalishiba ulya muntu ne milandile yakwe.” 12 Lelo bamwebele ukuti: “Bufi! Twebe fye.” E lyo atile: “Ni fi ne fi e fyo acinjeba, ati, ‘Yehova atila: “Nakusuba ukuba imfumu ya kwa Israele.”’”+ 13 E lyo babuulile ifya kufwala+ fyabo cila muntu no kwanshika pa matabo apo anyantile, batendeke no kulisha intandala+ no kusosa abati: “Yehu naba imfumu!”+ 14 Kabili Yehu+ mwana Yehoshafati mwana Nimshi+ atendeke ukupangila+ Yehoramu.

Nomba Yehoramu alelinda Ramote-gileadi,+ ena na bena Israele bonse, pa mulandu wa kwa Hasaele+ imfumu ya ku Siria. 15 E lyo imfumu Yehoramu+ yabweleele ku Yesreele+ pa kuti ifilonda fipole ifyo abena Siria baicenene ilyo yalelwa na Hasaele imfumu ya ku Siria.+

E lyo Yehu atile: “Nga mwasumina,+ mwileka umuntu nangu umo afyuke mu musumba no kuyashimika ku Yesreele.” 16 E lyo Yehu aninine mwi celeta no kuya ku Yesreele; pantu Yehoramu e ko asendeme ninshi nalwala, kabili Ahasia+ imfumu ya Yuda aile ku kupempula Yehoramu. 17 Awe umulinshi+ aiminine pa lupungu+ mu Yesreele,+ kabili amwene abantu ba kwa Yehu abengi ilyo aleisa, na po pene asosele ukuti: “Ndemona abantu abengi baleisa.” Na o Yehoramu atile: “Tuma uwa pali kabalwe ku kuyabakumanya, ayeipusha ati, ‘Bushe kuli umutende?’”+ 18 E lyo uwa pali kabalwe aile ku kumukumanya no kumweba ati: “E fyo imfumu yatila, ‘Bushe kuli umutende?’” Na o Yehu atile: “Bushe finshi waishiba pa ‘mutende’?+ Isa ku numa yandi!”

No mulinshi+ asosele ati: “Inkombe yacifika kuli bena, lelo taibwelele.” 19 E ico atumine uwa pali kabalwe uwalenga bubili, na o ilyo afikile kuli bena asosele ukuti: “E fyo imfumu yatila, ‘Bushe kuli umutende?’” Na o Yehu atile: “Bushe finshi waishiba pa ‘mutende’?+ Isa ku numa yandi!”

20 No mulinshi asosele ati: “Inkombe yacifika kuli bena, lelo taibwelele; kabili ukwensha kuli ngo kwensha kwa kwa Yehu+ umwishikulu wa kwa Nimshi,+ pantu ensha bushilu bushilu.”+ 21 E lyo Yehoramu atile: “Kaka bakabalwe kwi celeta!”+ Kabili bakabalwe balikakilwe kwi celeta lyakwe ilya nkondo, kabili Yehoramu imfumu ya kwa Israele na Ahasia+ imfumu ya Yuda balifumine, cila muntu mwi celeta lyakwe ilya nkondo. Ilyo baile ku kukumanya Yehu, bamusangile mwi bala lya kwa Nabote+ umwina Yesreele.

22 Nomba ilyo Yehoramu amwene fye Yehu, asosele apo pene ati: “Bushe kuli umutende, Yehu?” Lelo atile: “Kuti kwaba shani umutende+ apo kucili ubulalelale bwa kwa noko Yesebele+ ne finjelengwe fyakwe ifingwe ifingi?”+ 23 Awe apo pene Yehoramu ayalwile iceleta ku maboko yakwe pa kuti afulumuke, no kweba Ahasia ati: “Pali ubucenjeshi+ apa, Ahasia!” 24 Na o Yehu abuulile ubuta+ no kulasa Yehoramu pa kati ka maboko, ica kuti umufwi wafumiine pa mutima wakwe, kabili aponene mwi celeta lyakwe ilya nkondo.+ 25 E lyo aebele Bidkari mushika+ wakwe ati: “Mwimye; umupoose mwi bala lya kwa Nabote umwina Yesreele;+ pantu ibukisha ukuti: Ine na iwe twale-ensha bonse amaceleta ya bakabalwe babili ku numa ya kwa Ahabu wishi, kabili Yehova e wamupingwile,+ atile:26 ‘“Mailo namwene umulopa+ wa kwa Nabote no mulopa wa bana bakwe,”+ e fyo Yehova asosa, “kabili nkalandula+ imwe muli ili bala,” e fyo Yehova asosa.’ E ico mwimye; umupoose muli ili line bala ukulingana na mashiwi ya kwa Yehova.”+

27 Kabili Ahasia+ imfumu ya kwa Yuda yalimweneko, yafulumukile na ku nshila ya ku ng’anda ya mwi bala.+ (Lelo Yehu alimukonkele no kutila: “Na o wine mwipayeni!” E ico balimwipeye ilyo ali mwi celeta ninshi aleya ku Guri uwaba mupepi na Ibleamu.+ Awe akonkenyepo ukufulumukila ku Megido,+ kabili e ko afwilile.+ 28 E lyo ababomfi bakwe bamusendele mwi celeta ku Yerusalemu, kabili bamushiikile ukwashiikwa ifikolwe fyakwe mu nshiishi yakwe mu Musumba wa kwa Davidi.+ 29 Kabili mu mwaka walenga ikumi na umo (11) ukutula apo Yehoramu+ mwana Ahabu atendekele ukuteka e mo Ahasia+ atendeke ukuteka Yuda.)

30 Awe Yehu afikile ku Yesreele,+ kabili Yesebele+ na o alyumfwile. Kabili apentele+ inkopyo ne fyafiita, asakula ne mishishi bwino,+ kabili aile pe windo no kulengela pa nse.+ 31 Kabili Yehu aingilile ku mpongolo. Na Yesebele atile: “Bushe ifintu fyalimwendele bwino Simri+ uwaipeye shikulu wakwe?” 32 E lyo Yehu aloleshe kwi windo no kusosa ati: “Nani ali na ine? Nani?”+ Na po pene bacilolo ba kwi sano+ nalimo babili nelyo batatu baloleshe apali Yehu. 33 E ico atile: “Muponesheni pa nshi!”+ Na bo balimuponeshe, no mulopa wakwe wasabukile ku cibumba na kuli bakabalwe; kabili bakabalwe balimunyantawile.+ 34 Pa numa Yehu alingile, alalya no kunwa, kabili asosele ati: “Kamoneni ulya uwatiipwa,+ mumushiike, pantu mwana wa mfumu.”+ 35 Lintu baile ku kumushiika, tabasangile nangu cimo kano fye icipanga na makasa ne fisansa.+ 36 Awe ilyo babwelele no kumweba, atile: “Mashiwi ya kwa Yehova ayo alandile ukupitila+ mu mubomfi wakwe Elisha umwina Tishbe, ati, ‘Imbwa shikalya umubili wa kwa Yesebele mwi bala lya mu Yesreele.+ 37 Ne citumbi ca kwa Yesebele cikaba ngo mufundo+ mwi bala lya mu Yesreele, pa kuti bekatila: “Uyu e Yesebele.”’”+

10 Kabili Ahabu ali na bana baume amakumi cinelubali (70)+ mu Samaria.+ E ico Yehu alembele amakalata no kuyatuma ku Samaria kuli bacilolo+ ba ku Yesreele, ku bakalamba+ na ku balesakamana abana ba kwa Ahabu, ati: 2 “Nga afika fye uno kalata kuli imwe, imwe muli na bana baume aba kwa shikulu, kabili muli na maceleta ya nkondo na bakabalwe+ no musumba we linga ne fyanso. 3 Kabili musale umuntu umusuma kabili uwatambalala mu bana ba kwa shikulwinwe, e o muteke pa cipuna ca bufumu ica kwa wishi.+ E lyo mulwile ing’anda ya kwa shikulwinwe.”

4 Awe balyumfwile umwenso nga nshi, balasosa abati: “Moneni! Ishamfumu shibili+ tashaiminine kuli ena, nomba ifwe kuti twaiminina shani?”+ 5 E ico uwaleangalila ing’anda no waleangalila umusumba na bakalamba na balesakamana abana+ batumine amashiwi kuli Yehu abati: “Ifwe tuli babomfi benu, na fyonse ifyo mukasosa tukacita. Lelo tatwasonte nangu umo ukuba imfumu. Citeni iciweme mu menso yenu.”

6 E lyo abalembeele kalata wa bubili, ati: “Nga muli kuli ine,+ kabili nga muleumfwila ishiwi lyandi, muputule imitwe ya bana+ ba kwa shikulwinwe, kabili mailo ino ine nshita mukese kuli ine ku Yesreele.”+

Nomba abana ba mfumu amakumi cinelubali (70), bali na bashimucindikwa ba mu musumba ababaletele. 7 Kabili ilyo kalata afikile kuli bena, babuulile abana baume aba mfumu abali amakumi cinelubali+ no kubepaya, e lyo babikile imitwe yabo mu miseke no kumutumina ku Yesreele. 8 E lyo inkombe+ yaingile no kumweba aiti: “Baleta imitwe+ ya bana ba mfumu.” Na o atile: “Ibikeni mu miina ibili pa mpongolo mpaka mailo ulucelo.”+ 9 Awe ulucelo alifumine. Kabili aiminine no kweba abantu bonse ati: “Muli balungami.+ Moneni, ine nalipangiile+ shikulu kabili nalimwipeye;+ nomba ni bani bepeye bonse aba? 10 E ico ishibeni ukuti takwakabe amashiwi ya kwa Yehova ayashakafikilishiwe+ ayo Yehova asosele pa ba mu ng’anda ya kwa Ahabu;+ kabili Yehova nacita ifyo asosele ukupitila mu mubomfi wakwe Eliya.”+ 11 Kabili Yehu aipeye bonse abasheleko aba mu ng’anda ya kwa Ahabu ku Yesreele na bashimucindikwa+ bakwe bonse na baishibene nankwe na bashimapepo+ bakwe, kabili talekele umuntu nangu umo uwa kwa Ahabu ukupusuka.+

12 Kabili alimine no kuya ku Samaria. Ne ng’anda ya kukakilapo impaanga sha bakacema yali mu nshila. 13 Kabili Yehu akumenye bamunyina+ Ahasia+ imfumu ya Yuda. Nomba ilyo abepwishe ati, “Ni mwe bani?” batile: “Ni fwe bamunyina Ahasia, kabili tuleya mu kumona nga ca kuti abana ba mfumu na bana ba kwa namfumu bali umutende.” 14 Na o apo pene atile: “Bekateni aba mweo!”+ Na bo babekete aba mweo no kubepaila pa cilindi ca menshi ica ng’anda ya kukakilapo impaanga, abaume amakumi yane na babili (42), kabili talekele nangu umo ukupusuka.+

15 Pa kufuma kulya, akumenye Yehonadabu+ mwana Rekabu+ aleisa ku kumukumanya. Ilyo amupaalile,+ amwebele ati: “Bushe umutima obe untu walungama kuli ine, ifyo umutima wandi uli kuli iwe?”+

Na o Yehonadabu atile: “E mukwai.”

E lyo atile: “Nga e fyo uli, ntambika ukuboko kobe.”

Na o atambike ukuboko kwakwe. Na Yehu amuninike mwi celeta umo ali.+ 16 Kabili atile: “Natuleya bonse, umone ifyo napimpa+ mu kubombela Yehova.” E fyo baile nankwe mwi celeta lyakwe ilya nkondo. 17 Asukile afika na ku Samaria. Kabili aipeye abantu bonse abasheleko aba kwa Ahabu mu Samaria, mpaka abalofya,+ ukulingana na mashiwi ayo Yehova aebele Eliya.+

18 Kabili Yehu alongenye abantu bonse no kubeba ati: “Ahabu alepepa Baali panono.+ Lelo Yehu ena akulamupepa sana. 19 E ico nomba iteni bakasesema+ ba kwa Baali bonse, bonse abamupepa,+ na bashimapepo bakwe+ bonse bese kuli ine. Mwileka nangu umo ashale, pantu ndi ne lambo ilikalamba ilya kupeela Baali. Kabili uulepuswako tabe no mweo.” Lelo Yehu acitile ici mu bucenjeshi,+ pa kuti epaye abalepepa Baali.

20 Kabili Yehu atile: “Teyanyeni ukulongana kwacindama ukwa kwa Baali.” Na bo babilishe uku kulongana. 21 Na pa numa Yehu atumine amashiwi monse muli Israele,+ ica kuti bakapepa ba kwa Baali bonse baliishile. Kabili takwali uwashele nangu umo uushaishile. Kabili baleisa no kwingila mu ng’anda ya kwa Baali,+ ne ng’anda ya kwa Baali yaliswile ukufika na ku mpela. 22 E lyo aebele uwaleangalila umwa kusungila ifya kufwala ati: “Letela bakapepa ba kwa Baali bonse ifya kufwala.” Na o abaletele ifya kufwala. 23 E lyo Yehu aingile na Yehonadabu+ mwana Rekabu mu ng’anda ya kwa Baali. Kabili aebele bakapepa ba kwa Baali ati: “Fwayeni bwino no kushininkisha ukuti tamuli abapepa Yehova muno, kano fye abapepa Baali.”+ 24 E lyo baingile ku kupeela amalambo ne mituulo ya koca, kabili Yehu abikile abaume amakumi cinekonsekonse (80) pa nse no kusosa ukuti: “Umuntu onse uwalapusumuka mu minwe yenu pa bantu abo nalaleta, uo balapusumuka mu minwe yakwe e ulefwilamo.”+

25 Nomba ilyo apwishishe fye ukutuula ilambo lya koca, Yehu apo pene aebele inkombe na bamushika ati: “Ingileni, bepayeni! Mwileka nangu umo afume.”+ E ico inkombe na bamushika+ batendeke ukubepaya ku lupanga no kubapoosa pa nse, kabili baleya fye ukuyafika na ku musumba wa ng’anda ya kwa Baali. 26 E lyo bafumishe ifimuti fyaimikwe+ ifya mu ng’anda ya kwa Baali no kufyoca+ fyonse. 27 Bawishishe ne caimikwa ca kwa Baali+ no konaula ing’anda ya kwa Baali,+ kabili baisangwile icimbusu+ ukufika na buno bushiku.

28 E fyo Yehu alofeshe Baali muli Israele. 29 Ni membu fye sha kwa Yeroboamu+ mwana Nebati isho alengele abena Israele na bo ukubembuka,+ e sho Yehu talekele ukukonka, e kutila, abana ba ng’ombe aba golde,+ umo ali ku Betele na umbi ku Dani.+ 30 E ico Yehova atile kuli Yehu: “Pa mulandu wa kuti wacita bwino pa kucita ifyalungama mu menso yandi,+ kabili conse icali mu mutima wandi naucita ku ba mu ng’anda ya kwa Ahabu,+ abana bobe ukufika na ku nkulo yalenga bune bakekala pa cipuna ca bufumu ica kwa Israele.”+ 31 Lelo Yehu tabikileko amano ukulaenda mu mafunde ya kwa Yehova Lesa wa kwa Israele no mutima wakwe onse.+ Tafumine ku membu sha kwa Yeroboamu isho alengele na Israele ukubembuka.+

32 Mu nshiku shilya, Yehova atendeke ukulofya abena Israele panono panono; kabili Hasaele+ alebepaya monse mu citungu ca kwa Israele, 33 ukutula ku Yordani lwa ku kabanga, mu calo monse ica bena Gileadi,+ abena Gadi+ na bena Rubene+ na bena Manase,+ ukufuma ku Aroere,+ uwaba mupepi no mupokapoka wa Arnone, na Gileadi na Bashani.+

34 Ne milandu iyashala iya kwa Yehu na fyonse ifyo acitile na bumpalume bwakwe bonse, bushe tafyalembwa mwi buuku+ lya milandu ya shamfumu sha kwa Israele?35 Kabili Yehu aleele ukwalaala ifikolwe fyakwe,+ kabili bamushiikile mu Samaria; no mwana wakwe Yehoahasi+ alimupyene no kutendeka ukuteka. 36 Ne myaka iyo Yehu atekele Israele yali amakumi yabili na cinekonsekonse (28) mu Samaria.

11 Nomba Atalia+ nyina wa kwa Ahasia+ alimwene ukuti umwana wakwe nafwa. E ico aliimine no kwipaya bonse abana ba mfumu.+ 2 Lelo Yehosheba+ umwana mwanakashi wa mfumu Yehoramu, nkashi ya kwa Ahasia, asendele Yoashi+ mwana Ahasia no kumufumya pa bana ba mfumu abo bali no kwipaya, kabili atwele uyu mwana pamo no walemusakamana mu muputule wa mu kati umwali ifya kusendamapo, kabili balimufishile+ pa kuti Atalia emumona, kabili tabamwipeye. 3 Na o ali nankwe no kufisama mu ng’anda ya kwa Yehova pa myaka mutanda (6), ninshi Atalia aleteka icalo.+

4 Kabili mu mwaka uwalenga cinelubali (7), Yehoyada+ atumine abakuyabuula abakalamba ba balinshi abena Kari+ abali mu mabumba ya bashilika umwanda umo na baleangalila inkombe+ no kubaleta kuli ena mu ng’anda ya kwa Yehova no kupangana na bo icipangano+ no kuleka balape+ mu ng’anda ya kwa Yehova, e lyo abalangile umwana wa mfumu. 5 Abebele no kuti: “Ifi e fyo mukacite: Mukakanikane mu mabumba yatatu. Ibumba lya kubalilapo likese pe sabata no kulinda ing’anda ya mfumu;+ 6 kabili aba mwi bumba lya bubili bakabe pa mpongolo+ beta ati Umufula, na ba mwi bumba lya butatu bakabe pa mpongolo ku numa ya nkombe; kabili mukalekomboshanya ukulinda ing’anda.+ 7 Kabili amabumba yabili e yakesa pe sabata, kabili yali no kulinda ing’anda ya kwa Yehova pa mulandu wa mfumu. 8 Mukashinguluke ne mfumu, cila muntu ne fyanso fyakwe mu minwe; na onse uukengila mu mitande ya bashilika akepaiwe. Kabili mukaleba ne mfumu ilyo yafuma na lintu yaingila.”

9 Awe abaleangalila abashilika umwanda+ bacitile ukulingana na fyonse ifyo Yehoyada shimapepo asosele. E ico cila muntu asendele abantu bakwe abaleisa pe sabata,+ pamo na balefuma pe sabata, baile na kuli Yehoyada shimapepo. 10 E lyo shimapepo apeele bacilolo ba pa myanda amafumo ne nkwela ifyali fya Mfumu Davidi, ifyali mu ng’anda ya kwa Yehova.+ 11 Ne nkombe+ shaiminine cila muntu ne fyanso fyakwe mu minwe, ukufuma ku kulyo kwa ng’anda ukufika ku kuso kwa ng’anda, mupepi ne ciipailo+ kabili mupepi ne ng’anda, bali fye konse mupepi ne mfumu. 12 E lyo afumishe umwana+ wa mfumu no kubika pali ena icilongwe+ na Mafunde Ikumi;+ kabili bamubikile pa bufumu+ no kumusuba.+ Awe batendeke no kutoota+ abati: “Kalebalika mwe mfumu!”+

13 Ilyo Atalia aumfwile icongo ca bantu abalebutuka, apo pene aishile ku bantu pa ng’anda ya kwa Yehova.+ 14 Kabili aliloleshe no kumona imfumu naiminina pa luceshi+ ukulingana no lutambi, na bacilolo na mapenga+ baiminine mupepi ne mfumu, na bantu bonse aba mu calo balesekelela+ no kulisha amapenga. Ilyo line fye Atalia+ alepwile ifya kufwala fyakwe no kupunda ati: “Nabampondokela! Nabampondokela!”+ 15 Lelo Yehoyada shimapepo aebele bacilolo ba pa myanda,+ abo basontele pe bumba lya bashilika, ati: “Mufumyeni mu mutande wa bantu, kabili onse uwalamukonka, epaiwe ku lupanga!”+ Pantu shimapepo atile: “Mwimwipaila mu ng’anda ya kwa Yehova.” 16 E ico balimwikete, na o apitile ku nshila ya ku mwinshi wa bakabalwe+ ku ng’anda ya mfumu,+ kabili bamwipaile kulya kwine.+

17 E lyo nomba Yehoyada apangene icipangano+ pa kati ka kwa Yehova+ ne mfumu+ na bantu, ukuti bakaba abantu ba kwa Yehova; ne cipangano pa kati ka mfumu na bantu.+ 18 Pa numa abantu bonse mu calo baile ku ng’anda ya kwa Baali no kubongolola ifiipailo fyakwe;+ batobawile ne fimpashanya fyakwe fyonse,+ kabili baipaile Matani+ shimapepo wa kwa Baali pa ntanshi ya fiipailo.+

Kabili shimapepo alaashile bakangalila pa ng’anda ya kwa Yehova.+ 19 Abuulile na bacilolo ba pa myanda na balinshi abena Kari+ ne nkombe+ na bantu ba mu calo bonse, ukuti balete imfumu ukufuma mu ng’anda ya kwa Yehova. Kabili bapitile inshila ya ku mpongolo+ ya nkombe ukuya ku ng’anda ya mfumu; na yo yaikele pa cipuna ca bufumu+ ica shamfumu. 20 Kabili abantu bonse aba mu calo balesekelela;+ na mu musumba tamwali ifimfulunganya, kabili baipeye Atalia ku lupanga pa ng’anda ya mfumu.+

21 Yehoashi+ ali ne myaka cinelubali (7) ilyo atendeke ukuteka.+

12 Mu mwaka walenga cinelubali (7) uwa kwa Yehu,+ Yehoashi+ atendeke ukuteka, kabili atekele imyaka amakumi yane (40) mu Yerusalemu. Kabili ishina lya kwa nyina ni Sibia uwa ku Beere-sheba. 2 Kabili Yehoashi alecita ifisuma mu menso ya kwa Yehova inshiku shakwe shonse isho Yehoyada shimapepo alemusambilisha.+ 3 Lelo ififulo fya kupepelapo fyena tafifumishepo.+ Abantu baali bacili balepeela amalambo pa fifulo fya kupepelapo no kufutumwinapo icushi ca malambo.

4 Kabili Yehoashi aebele bashimapepo+ ati: “Indalama shonse isha mituulo ya mushilo+ ishaletwa ku ng’anda ya kwa Yehova,+ indalama ishalingilwa umuntu umo na umo,+ indalama sha bantu ukulingana no musonko cila muntu ali no kulipila,+ indalama shonse isho umuntu apanga mu mutima ukuti e sho akaleta ku ng’anda ya kwa Yehova,+ 5 lekeni bashimapepo umo na umo bapoke ku bantu babo;+ kabili lekeni bacilike imilale ya ku ng’anda, ponse apali umulale.+

6 Nomba mu mwaka walenga amakumi yabili na itatu (23) uwa kuteka kwa Mfumu Yehoashi, bashimapepo bali tabalacilika imilale yali ku ng’anda.+ 7 E ico Imfumu Yehoashi yaitile shimapepo Yehoyada+ na bashimapepo bambi no kubeba aiti: “Nga cinshi ico mushilecilikila imilale ya ku ng’anda? Nomba mwilabuula indalama ishilefuma ku bantu, lelo muleshitwala ku mulimo wa kucilika imilale ya ku ng’anda.”+ 8 Na bashimapepo balisumine ukukanabuula indalama ishalefuma ku bantu, nangu kucilika imilale ya ku ng’anda.

9 Nomba Yehoyada shimapepo abuulile icipao+ no kutula icipunda pa nkupiko, acibikile mupepi ne ciipailo lwa ku kulyo kwa muntu uuleingila mu ng’anda ya kwa Yehova, kabili mulya e mo bashimapepo, aba pa mwinshi,+ balebika indalama+ shonse ishaleletwa ku ng’anda ya kwa Yehova. 10 Kabili nga bamona ukuti indalama shafula sana mu cipao, kalemba+ wa mfumu na shimapepo mukalamba baleisa, bashibika mu mifuko no kupenda indalama ishasangilwe mu ng’anda ya kwa Yehova.+ 11 Bapeele ne ndalama isho bapendele ku balebomba+ umulimo abalaashikwe pa ng’anda ya kwa Yehova. Na bo baleshipeela kuli bakabasa ba mbao na kuli bakakuula abalebomba pa ng’anda ya kwa Yehova, 12 na ku baishiba ukukuulila na mabwe na ku ba kuputula amabwe,+ pa kuti bashitemo imbao na mabwe ayaputulwa ifya kuti babomfye ku kucilika imilale ya ku ng’anda ya kwa Yehova na kuli fyonse ifyaleshitwa ku kuwamya ing’anda.

13 Lelo ukukuma ku ng’anda ya kwa Yehova kwena, indalama ishaleletwa ku ng’anda ya kwa Yehova+ tashabomfiwe ku kupangilamo ifya kubikamo amenshi aya kusamba ifya silfere, ifya kushimishako umulilo,+ imbale shafonka,+ amapenga,+ nangu icipe conse ica golde atemwa icipe ca silfere;14 pantu balepeela indalama ku baleangalila umulimo, na bo bashibomfeshe ku kuwamya ing’anda ya kwa Yehova.+ 15 Kabili tabalesakamana+ ukumona ifyo abapeelwe indalama balelipila abalebomba umulimo,+ pantu balebomba mu cishinka.+ 16 Kumfwa indalama sha mituulo ya pa mulandu+ ne ndalama sha mituulo ya pa membu, shena tashaletwalwa ku ng’anda ya kwa Yehova. E ico shali sha bashimapepo.+

17 E lyo nomba Hasaele+ imfumu ya ku Siria aile mu kulwisha umusumba wa Gati+ no ku-upoka, na pa numa Hasaele alipamine+ no kuyalwisha Yerusalemu.+ 18 E ico Yehoashi imfumu ya kwa Yuda abuulile imituulo ya mushilo+ yonse iyo Yehoshafati na Yehoramu na Ahasia ifikolwe fyakwe, ishamfumu sha kwa Yuda, bapekenye ne mituulo yakwe iya mushilo na golde onse uwali mu ng’anda ya cipao iya kwa Yehova na mu ng’anda ya mfumu, yafitumine+ na kuli Hasaele imfumu ya ku Siria. Na yo yalekele ukulwisha Yerusalemu.

19 Ne milandu yashala iya kwa Yehoashi na fyonse ifyo acitile, bushe tafyalembwa mwi buuku+ lya milandu ya shamfumu sha kwa Yuda? 20 Lelo ababomfi bakwe baliimine+ no kumupondokela,+ baipeye na Yehoashi pa ng’anda+ iyali apalundumana,+ ku nshila yaya ku Sila. 21 Kabili ababomfi bakwe, Yosakari mwana Shimeati e lyo na Yehosabadi+ mwana Shomere e bamwipeye. Kabili bamushiikile ukwashiikwa ifikolwe fyakwe mu Musumba wa kwa Davidi; kabili Amasia+ umwana wakwe alimupyene no kutendeka ukuteka.

13 Mu mwaka walenga amakumi yabili na itatu (23) uwa kuteka kwa kwa Yehoashi+ mwana Ahasia+ imfumu ya kwa Yuda, Yehoahasi+ mwana Yehu+ atendeke ukuteka mu Israele mu Samaria kabili atekele pa myaka ikumi na cinelubali (17). 2 Kabili alecita ifyabipa mu menso ya kwa Yehova+ no kwenda mu lubembu lwa kwa Yeroboamu+ mwana Nebati, ulo alengele Israele ukubembuka.+ Tafumineko nakalya. 3 No bukali+ bwa kwa Yehova bwaimiine abena Israele, ica kuti abapeele mu minwe ya kwa Hasaele+ imfumu ya Siria na mu minwe ya kwa Ben-hadadi+ mwana Hasaele, inshiku shabo shonse.

4 Umuya inshiku, Yehoahasi anashishe+ umutima wa kwa Yehova, kabili Yehova alimumfwile;+ pantu alimwene ifyo abena Israele balecula,+ pantu imfumu ya ku Siria yalebacusha.+ 5 Awe Yehova apeele Israele umupusushi,+ ica kuti bafumine mu minwe ya bena Siria, na bana ba kwa Israele baikele mu mayanda yabo nga kale.+ 6 (Lelo tabafumine ku lubembu lwa ba mu ng’anda ya kwa Yeroboamu, ulo alengele abena Israele na bo ukubembuka.+ Muli lulya lubembu e mo ale-enda;+ ne cimuti caimikwa+ caiminine mu Samaria.) 7 Pantu tashileko umuntu nangu umo kuli Yehoahasi abantu kano fye aba pali bakabalwe abali amakumi yasano (50) na maceleta ikumi (10) na ba kwenda pa makasa amakana ikumi (10,000),+ pantu imfumu ya ku Siria yalibepeye,+ pa kuti ibacite kwati lukungu lwa pa ca kupuminapo ingano.+

8 Kabili imilandu yashalako iya kwa Yehoahasi na fyonse ifyo acitile na bumpalume bwakwe, bushe tafyalembwa mwi buuku+ lya milandu ya shamfumu sha mu Israele? 9 Awe Yehoahasi aleele ukwalaala ifikolwe fyakwe, bamushiikile na mu Samaria;+ no mwana wakwe Yehoashi+ alimupyene no kutendeka ukuteka.

10 Mu mwaka walenga amakumi yatatu na cinelubali (37) ukutula apo Yehoashi imfumu ya Yuda atendekele ukuteka, e mo Yehoashi+ mwana Yehoahasi atendeke ukuteka Israele mu Samaria, kabili ali mfumu imyaka ikumi na mutanda (16). 11 Kabili alecita ifyabipa mu menso ya kwa Yehova.+ Tafumine ku membu shonse isha kwa Yeroboamu mwana Nebati, isho alengele abena Israele na bo ukubembuka.+ Mu membu shilya e mo ale-enda.

12 Ne milandu yashalako iya kwa Yehoashi na fyonse ifyo acitile na bumpalume bwakwe ne fyo alwile+ na Amasia imfumu ya Yuda, bushe tafyalembwa mwi buuku+ lya milandu ya shamfumu sha mu Israele?13 Kabili Yehoashi aleele ukwalaala ifikolwe fyakwe, na Yeroboamu+ aikele pa cipuna cakwe ica bufumu. Na Yehoashi ashiikilwe mu Samaria ukwashiikwa ishamfumu sha kwa Israele.+

14 Awe Elisha+ alilwele ubulwele ubwali no kumwipaya.+ E ico Yehoashi imfumu ya kwa Israele aile kuli ena, alalilila pa menso yakwe no kusosa ati: “Tata,+ tata, iceleta lya nkondo ilya kwa Israele na ba pali bakabalwe bakwe!”+ 15 Na o Elisha amwebele ati: “Buula ubuta ne mifwi.” E lyo abuulile ubuta ne mifwi. 16 Akonkenyepo no kweba imfumu ya kwa Israele ati: “Ikata ubuta mu minwe yobe.” Na yo yaikete ubuta mu minwe ya iko, na Elisha abikile iminwe yakwe pa minwe+ ya mfumu. 17 E lyo atile: “Isula iwindo lya ku kabanga.” Na yo yaliswile. E lyo Elisha ayebele ati: “Lasa!” Na yo yalilashile. Kabili atile: “Mufwi wa kupususha kwa kwa Yehova, mufwi wa kupususha+ kuli Siria! Kabili ukooma Siria ku Afeke+ no kumupwishishisha.”

18 Akonkenyepo no kusosa ukuti: “Buula imifwi.” Na yo imfumu yabuulile imifwi. E lyo atile ku mfumu ya kwa Israele: “Lasa pa nshi.” E lyo yalashile imiku itatu no kuleka.+ 19 No muntu wa kwa Lesa+ wa cine afuliilwe imfumu; no kutila: “Wacilinga ukulasa imiku isano atemwa mutanda (6)! Aucite fyo nga waumine Siria no kumupwishishisha, nomba miku itatu fye e yo ukooma Siria.”+

20 Pa numa Elisha alifwile kabili balimushiikile.+ Awe kwali ifipondo ifyalebelamina+ abantu ifya bena Moabu+ ifyaleisa lyonse mu calo ku kutendeka kwa mwaka. 21 Nomba ilyo baleshiika umuntu, moneni, bamwene ifipondo ifyalebelamina abantu. Na bo ilyo line bapoosele uyu muntu mu nshiishi ya kwa Elisha no kufumako. Ilyo umuntu wafwa akumishe ku mafupa ya kwa Elisha, alibuukile+ kabili aliminine.+

22 Kabili Hasaele+ imfumu ya ku Siria, alecululusha+ abena Israele inshiku shonse isha kwa Yehoahasi. 23 Lelo Yehova alibalangulukile+ no kubabelela uluse,+ no kwalukila kuli bena pa mulandu wa cipangano+ apangene na Abrahamu,+ Isaki+ na Yakobo;+ kabili talefwaya ukubonaula,+ kabili tabapoosele ukubafumya ku cinso cakwe mpaka na lelo. 24 Awe Hasaele imfumu ya ku Siria alifwile, no mwana wakwe Ben-hadadi alimupyene no kutendeka ukuteka. 25 Kabili Yehoashi mwana Yehoahasi apokolwele kuli Ben-hadadi mwana Hasaele imisumba iyo apokele kuli Yehoahasi wishi mu bulwi. Yehoashi amumine imiku itatu, apokolwele ne misumba ya kwa Israele.+

14 Mu mwaka walenga ibili ukutula apo Yehoashi+ mwana Yehoahasi imfumu ya Israele atendekele ukuteka, e mo Amasia+ mwana Yehoashi imfumu ya kwa Yuda atendeke ukuteka. 2 Ali ne myaka amakumi yabili na isano (25) ilyo atendeke ukuteka, kabili atekele imyaka amakumi yabili na pabula (29) mu Yerusalemu. Ne shina lya kwa nyina ni Yehoadini+ uwa mu Yerusalemu. 3 Kabili alecita ifyalungama mu menso ya kwa Yehova,+ lelo te filya Davidi icikolwe cakwe alecita.+ Acitile fyonse ukulingana fye ne fyo wishi Yehoashi acitile.+ 4 Lelo ififulo fya kupepelapo fye e fyashele.+ Abantu balepeela amalambo pa fifulo fya kupepelapo no kufutumwinapo icushi ca malambo.+ 5 Nomba ilyo ubufumu bwapampamikwe fye mu kuboko kwakwe, aipeye+ ababomfi bakwe abaipeye imfumu wishi.+ 6 Lelo abana ba baipeye wishi tabepeye, ukulingana ne fyalembwa mwi buuku lya mafunde ya kwa Mose ilyo Yehova abakonkomeshe ati:+ “Bashibo tabali no kwipailwa pa mulandu wa bana babo, na bana tabali no kwipailwa pa mulandu wa bashibo; cila muntu ali no kwipailwa pa lubembu lwakwe.”+ 7 Kabili aipeye abena Edomu+ mu Mupokapoka wa Mucele,+ abaume amakana ikumi (10,000), no kupoka umusumba wa Sela mu bulwi, kabili wainikwe ati Yoketeele ukufika na pali buno bushiku.

8 E lyo Amasia atumine inkombe kuli Yehoashi mwana Yehoahasi mwana Yehu imfumu ya ku Israele ati: “Isa. Tulwe inkondo.”+ 9 Awe Yehoashi imfumu ya ku Israele atumine kuli Amasia imfumu ya ku Yuda ati: “Icimenwa ca myunga ica mu Lebanone catumine amashiwi ku mukedari+ wali mu Lebanone aciti, ‘Peela umwana obe umwanakashi abe umukashi wa mwana wandi umwaume.’ Lelo icinama ca mpanga icali mu Lebanone calipitile no kunyantaula icimenwa ca myunga.+ 10 Ukucimfya kwena naucimfya+ Edomu, kabili umutima obe naukutuumika.+ Itashe pa lulumbi+ lobe no kwikala mu ng’anda yobe. Nga kanshi cinshi wingemisha ifyongo+ ilyo taukwete amaka,+ no kucimfiwa, iwe pamo na baYuda?” 11 Lelo Amasia taumfwile iyo.+

E ico Yehoashi imfumu ya bena Israele aliileko, kabili balilwile inkondo,+ ena na Amasia imfumu ya baYuda, ku Bete-shemeshe,+ uwaba mu Yuda. 12 Kabili Israele acimfishe Yuda,+ ica kuti cila muntu afulumukile kwi tenti lyakwe. 13 Kabili Yehoashi imfumu ya Israele aikete Amasia imfumu ya baYuda umwana wa kwa Yehoashi mwana Ahasia ku Bete-shemeshe, kabili pa numa baile ku Yerusalemu, no kutula icipunda mu cibumba ca Yerusalemu pa Mpongolo ya kwa Efraimu+ ukufika na ku Mpongolo ya ku Cifutu,+ kabili cali imikono imyanda ine (400). 14 Kabili abuulile golde yonse na silfere yonse ne fipe fyonse ifyasangilwe mu ng’anda ya kwa Yehova+ na mu cipao ca ng’anda ya mfumu na bantu abo baikete, no kubwelela ku Samaria.

15 Ne milandu yashalako iya kwa Yehoashi, ifyo acitile na bumpalume bwakwe ne fyo alwile na Amasia imfumu ya Yuda, bushe tafyalembwa mwi buuku+ lya milandu ya shamfumu sha kwa Israele?16 Kabili Yehoashi aleele ukwalaala ifikolwe+ fyakwe kabili ashiikilwe mu Samaria+ ukwashiikwa ishamfumu sha kwa Israele, no mwana wakwe Yeroboamu+ alimupyene no kutendeka ukuteka.

17 Pa numa ya mfwa ya kwa Yehoashi+ mwana Yehoahasi imfumu ya Israele, Amasia+ mwana Yehoahasi imfumu ya Yuda aikele uwa mweo imyaka ikumi na isano (15).+ 18 Ne milandu yashalako iya kwa Amasia, bushe tayalembwa mwi buuku+ lya milandu ya shamfumu sha mu Yuda?+ 19 Kabili balipangene+ ukulwisha Amasia mu Yerusalemu, na o afulumukile ku Lakishi;+ lelo batumine aba kumukonka ku Lakishi, kabili bamwipaile kulya kwine.+ 20 E ico bamusendeele pali bakabalwe kabili ashiikilwe+ mu Yerusalemu ukwashiikwa ifikolwe fyakwe mu Musumba wa kwa Davidi.+ 21 E lyo abantu bonse aba mu Yuda babuulile Asaria,+ ninshi ali ne myaka ikumi na mutanda (16),+ no kumubika pa bufumu, ukumupyanika pali wishi Amasia.+ 22 E wakuulile Elati+ no kuibwesesha kuli Yuda ilyo imfumu yaleele ukwalaala ifikolwe fya iko.

23 Mu mwaka walenga ikumi na isano (15) uwa kwa Amasia mwana Yehoashi imfumu ya Yuda, e mo Yeroboamu+ mwana Yehoashi imfumu ya kwa Israele atendeke ukuteka mu Samaria kabili atekele imyaka amakumi yane na umo (41). 24 Kabili alecita ububi mu menso ya kwa Yehova. Tafumine ku membu shonse isha kwa Yeroboamu mwana Nebati, isho alengele Israele ukubembuka.+ 25 E wabweseshe umupaka wa kwa Israele ukutula apa kwingilila ku Hamati+ ukufika na kuli bemba wa Araba,+ ukulingana na mashiwi ya kwa Yehova Lesa wa kwa Israele uwasoseele mu mubomfi wakwe Yona+ mwana Amitai, kasesema wa ku Gati-hefere.+ 26 Pantu Yehova amwene ukucula kwabipisha ukwa bena Israele.+ Takwali uwapelelwa nangu uwa fye, kabili takwali wa kwafwa abena Israele.+ 27 Kabili Yehova alaile ukuti takalofye ishina lya kwa Israele mwi samba lya muulu.+ E ico alibapuswishe+ ku kuboko kwa kwa Yeroboamu mwana Yehoashi.

28 Ne milandu yashalako iya kwa Yeroboamu na fyonse ifyo acitile na bumpalume bwakwe, ifyo alwile ne fyo abweseshe Damaseke+ na Hamati+ kuli Yuda mu Israele, bushe tafyalembwa mwi buuku lya milandu ya shamfumu sha kwa Israele?29 Kabili Yeroboamu aleele ukwalaala ifikolwe fyakwe, ne shamfumu sha mu Israele, no mwana wakwe Sekaria+ alimupyene no kutendeka ukuteka.

15 Mu mwaka walenga amakumi yabili na cinelubali (27) ukutula apo Yeroboamu imfumu ya Israele atendekele ukuteka, e mo Asaria+ mwana Amasia+ imfumu ya kwa Yuda atendeke ukuteka. 2 Ali ne myaka ikumi na mutanda (16) ilyo atendeke ukuteka, kabili atekele imyaka amakumi yasano na ibili (52) mu Yerusalemu.+ Kabili ishina lya kwa nyina ni Yekolia uwa ku Yerusalemu. 3 Kabili alecita ifyalungama mu menso ya kwa Yehova, ukulingana na fyonse ifyo Amasia wishi acitile.+ 4 Lelo ififulo fya kupepelapo fye e fyashele.+ Abantu bali bacili balepeela amalambo pa fifulo fya kupepelapo no kufutumwinapo icushi ca malambo.+ 5 Kabili Yehova apumine imfumu ku bulwele,+ kabili yali ne fibashi+ mpaka no bushiku yafwile, kabili yaleikala mu ng’anda ya iko ukwabula ukubomba imilimo,+ kabili Yotamu+ umwana wa mfumu e waleangalila ing’anda, alepingula+ abantu ba mu calo. 6 Ne milandu yashalako iya kwa Asaria na fyonse ifyo acitile, bushe tafyalembwa mwi buuku+ lya milandu ya shamfumu sha mu Yuda? 7 Kabili Asaria aleele ukwalaala ifikolwe fyakwe, bamushiikile ukwashiikwa ifikolwe+ fyakwe mu Musumba wa kwa Davidi; kabili Yotamu umwana wakwe alimupyene no kutendeka ukuteka.+

8 Mu mwaka walenga amakumi yatatu na cinekonsekonse (38) uwa kwa Asaria+ imfumu ya kwa Yuda, Sekaria+ mwana Yeroboamu atendeke ukuteka Israele mu Samaria kabili atekele imyeshi mutanda (6). 9 Kabili alecita ububi mu menso ya kwa Yehova, ifyo ne fikolwe fyakwe fyacitile.+ Tafumine ku membu sha kwa Yeroboamu+ mwana Nebati, isho alengele na Israele ukubembuka.+ 10 Kabili Shalumu mwana Yabeshe alimupangiile,+ kabili amuumiine+ mu Ibleamu+ no kumwipaya, kabili alimupyene atendeka no kuteka. 11 Ne milandu iyashalako iya kwa Sekaria, moneni, yalembwa mwi buuku+ lya milandu ya shamfumu sha mu Israele. 12 Ici e cebo+ ca kwa Yehova ico asosele kuli Yehu ati:+ “Abana+ bobe ukufika na ku nkulo yalenga shine bakekala pa cipuna ca bufumu ica kwa Israele.” Kabili ifi fine e fyacitike.+

13 Kumfwa Shalumu mwana Yabeshe, atendeke ukuteka mu mwaka walenga amakumi yatatu na pabula (39) uwa kuteka kwa kwa Usia+ imfumu ya Yuda, kabili atekele umweshi uutuntulu mu Samaria.+ 14 E lyo Menahemu+ mwana Gadi afumine ku Tesa+ no kuya ku Samaria, aumine na Shalumu+ mwana Yabeshe mu Samaria no kumwipaya; kabili alimupyene no kutendeka ukuteka. 15 Ne milandu yashalako iya kwa Shalumu na mapange+ yakwe, moneni, fyalembwa mwi buuku lya milandu ya shamfumu sha mu Israele. 16 E lyo Menahemu aonawile incende ya Tafisa na bonse abalimo, ne citungu ca iko ukufuma ku Tesa, pantu tabamwiswilile impongolo, kabili aliucimfishe. Atumbwile na banakashi bonse abali na mafumo.+

17 Mu mwaka walenga amakumi yatatu na pabula (39)+ uwa kuteka kwa kwa Asaria imfumu ya Yuda, e mo Menahemu mwana Gadi ali imfumu ya kwa Israele pa myaka ikumi (10) mu Samaria. 18 Kabili alecita ifyabipa mu menso ya kwa Yehova.+ Tafumine ku membu shonse isha kwa Yeroboamu+ mwana Nebati, isho alengele Israele ukubembuka,+ inshiku shakwe shonse. 19 Na Pulu+ imfumu ya ku Asiria+ aishile mu calo. E ico Menahemu apeele+ Pulu amatalanti ya silfere+ ikana limo (1,000), pa kuti amwafwilishe ukukwatisha amaka pa bufumu.+ 20 E ico Menahemu afumishe silfere ku bena Israele, na ku baume ba maka,+ aba bulamba, no kupeela imfumu ya ku Asiria amashekele ya silfere amakumi yasano (50) ku muntu umo umo. E lyo imfumu ya ku Asiria yapilibwike no kuya, kabili tayaikele mu calo cilya. 21 Ne milandu iyashalako iya kwa Menahemu+ na fyonse ifyo acitile, bushe tafyalembwa mwi buuku+ lya milandu ya shamfumu sha mu Israele?22 Kabili Menahemu aleele ukwalaala ifikolwe fyakwe no mwana wakwe Pekahia+ alimupyene no kutendeka ukuteka.

23 Mu mwaka walenga amakumi yasano (50) ukutula apo Asaria imfumu ya Yuda atendekele ukuteka, e mo Pekahia mwana Menahemu ali mfumu ya Israele mu Samaria pa myaka ibili.+ 24 Kabili alecita ifyabipa mu menso ya kwa Yehova.+ Tafumine ku membu sha kwa Yeroboamu+ mwana Nebati, isho alengele Israele ukubembuka.+ 25 Kabili Peka+ mwana Remalia mushika+ wakwe alimwimiine,+ amwipaile na mu Samaria mu lupungu lwa kwikalamo ulwa ng’anda ya mfumu,+ pamo na Argobe na Ariya, kabili ali pamo na baume aba mu bana ba ku Gileadi amakumi yasano (50). E ico alimwipeye, amupyana atendeka no kuteka. 26 Ne milandu iyashalako iya kwa Pekahia, moneni, yalembwa mwi buuku+ lya milandu ya shamfumu sha mu Israele.

27 Mu mwaka walenga amakumi yasano na ibili (52) uwa kuteka kwa kwa Asaria imfumu ya Yuda, e mo Peka+ mwana Remalia+ ali imfumu ya Israele mu Samaria pa myaka amakumi yabili (20). 28 Kabili alecita ifyabipa mu menso ya kwa Yehova.+ Tafumine ku membu sha kwa Yeroboamu+ mwana Nebati, isho alengele Israele ukubembuka.+ 29 Mu nshiku sha kwa Peka imfumu ya kwa Israele, Tiglati-pilesere+ imfumu ya Asiria+ aishile no kupoka Iyone+ na Abele-bete-maaka+ na Yanoa na Kedeshe+ na Hasore+ na Gileadi+ na Galili,+ icalo conse ica kwa Naftali,+ no kubasenda muli bunkole ku Asiria.+ 30 Awe Hoshea+ mwana Ela aimiine+ Peka mwana Remalia, alimuumine+ no kumwipaya; kabili alimupyene no kutendeka ukuteka mu mwaka walenga amakumi yabili (20) uwa kuteka kwa kwa Yotamu+ mwana Usia. 31 Ne milandu iyashalako iya kwa Peka na fyonse ifyo acitile, moneni, fyalembwa mwi buuku+ lya milandu ya shamfumu sha kwa Israele.

32 Mu mwaka walenga ibili ukutula apo Peka mwana Remalia imfumu ya Israele atendekekele ukuteka, e mo Yotamu+ mwana Usia+ imfumu ya kwa Yuda atendeke ukuteka. 33 Ali ne myaka amakumi yabili na isano (25) ilyo atendeke ukuteka, kabili atekele imyaka ikumi na mutanda (16) mu Yerusalemu. Kabili ishina lya kwa nyina ni Yerusha mwana Sadoke.+ 34 Kabili alecita ifisuma mu menso ya kwa Yehova.+ Ukulingana na fyonse ifyo Amasia wishi acitile, e fyo na o acitile.+ 35 Lelo ififulo fya kupepelapo fyena fyalishele. Abantu bali bacili balepeela amalambo pa fifulo fya kupepelapo no kufutumwinapo icushi ca malambo.+ Yotamu e wapangile impongolo yali pa muulu wa ng’anda ya kwa Yehova.+ 36 Kabili imilandu yashalako iya kwa Yotamu, ifyo acitile, bushe tafyalembwa mwi buuku lya milandu ya shamfumu sha mu Yuda?+ 37 Mu nshiku shilya Yehova atendeke ukutuma+ Resini+ imfumu ya ku Siria na Peka+ mwana Remalia mu kuyalwisha Yuda. 38 Kabili Yotamu aleele ukwalaala ifikolwe fyakwe kabili ashiikilwe ukwashiikwa ifikolwe fyakwe mu Musumba wa kwa Davidi, icikolwe cakwe;+ kabili Ahasi+ umwana wakwe alimupyene no kutendeka ukuteka.

16 Mu mwaka walenga ikumi na cinelubali (17) ukutula apo Peka mwana Remalia atendekele ukuteka, e mo Ahasi+ mwana Yotamu imfumu ya Yuda atendeke ukuteka. 2 Ahasi ali ne myaka amakumi yabili (20) ilyo atendeke ukuteka, kabili atekele imyaka ikumi na mutanda (16) mu Yerusalemu; kabili tacitile ifisuma mu menso ya kwa Yehova Lesa wakwe nge fyo Davidi icikolwe cakwe acitile.+ 3 Kabili ale-enda mu nshila ya shamfumu sha mu Israele,+ aocele no mwana wakwe mu mulilo,+ ukulingana ne fya bunani+ fya nko isho Yehova atamfishe ku cinso ca bana ba kwa Israele. 4 Alepeela na malambo no kufutumwina icushi ca malambo pa fifulo fya kupepelapo+ na pa tupili+ na mwi samba lya muti onse uwalelema.+

5 E lyo Resini+ imfumu ya ku Siria na Peka+ mwana Remalia imfumu ya kwa Israele baninine ku kuyalwisha Yerusalemu no kushinga Ahasi, lelo balifililwe ukulwa.+ 6 E lyo Resini imfumu ya ku Siria abweseeshe umusumba wa Elati+ kuli Edomu, kabili pa numa afumishemo abaYuda mu Elati; na bena Edomu baingile mu Elati, kabili e mo bekala ukufika na lelo. 7 E ico Ahasi atumine inkombe kuli Tiglati-pilesere+ imfumu ya Asiria ku kuyamweba ati: “Ine ndi mubomfi+ wenu kabili ndi mwana wenu. Iseni mumpusushe+ ku mfumu ya ku Siria na ku mfumu ya ku Israele, ishinjimiine.” 8 Awe Ahasi abuulile silfere na golde uwasangilwe mu ng’anda ya kwa Yehova na mu cipao ca ng’anda ya mfumu+ no kutumina imfumu ya Asiria amafisakanwa.+ 9 Ne mfumu ya Asiria yalimumfwilile, kabili imfumu ya Asiria yaninine ukuya ku musumba wa Damaseke+ no ku-upoka+ no kutwala abantu ba uko muli bunkole ku Kiri,+ yaipeye na Resini.+

10 Kabili imfumu Ahasi+ yaile ku kukumanya Tiglati-pilesere+ imfumu ya Asiria mu Damaseke, yamwene ne ciipailo+ icali mu Damaseke. E ico imfumu Ahasi yatumine kuli Uriya shimapepo apo balembele ifyo iciipailo capangilwe ne fyo calemoneka ukulingana ne mipangilwe ya ciko yonse.+ 11 Na o Uriya+ shimapepo apangile iciipailo.+ Ukulingana na fyonse ifyo Imfumu Ahasi yatumine ukufuma ku Damaseke, e fyo Uriya shimapepo acipangile, no kulolela Imfumu Ahasi ukuti ikabwele ukufuma ku Damaseke. 12 Ilyo imfumu yabwelele ukufuma ku Damaseke, yamwene iciipailo; kabili imfumu yapaleme ku ciipailo+ no kwipailapo amalambo.+ 13 Kabili pa ciipailo yalefutumwinapo icushi+ ca mutuulo wa iko uwa koca+ no mutuulo wa iko uwa ngano+ no kupongolwelapo umutuulo wa iko uwa mwangashi+ no kusansapo umulopa wa malambo ya iko aya mutende. 14 Kabili yaletele ne ciipailo ca mukuba+ icali ku cinso ca kwa Yehova ku ntanshi ya ng’anda, yacifumishe pa kati ka ciipailo ca iko ne ng’anda ya kwa Yehova,+ yacibikile na ku kapinda ka kuso aka ciipailo ca mfumu. 15 E lyo Imfumu Ahasi yaebele Uriya+ shimapepo aiti: “Pa ciipailo icikalamba e po ulefutumwina icushi ca mutuulo wa koca uwa lucelo,+ no mutuulo wa ngano uwa cungulo+ no mutuulo wa koca uwa mfumu+ no mutuulo wa iko uwa ngano no mutuulo wa koca uwa bantu bonse aba mu calo no mutuulo wabo uwa ngano no mutuulo wabo uwa mwangashi; no mulopa onse uwa mutuulo wa koca no mulopa onse uwe lambo, ulesansapo. Lelo iciipailo ca mukuba nine nkalacisakamana.” 16 Awe Uriya+ shimapepo acitile fyonse ifyo imfumu Ahasi yasosele.+

17 Kabili Imfumu Ahasi yaputawile+ tupimfya tupimfya ifya mu mbali+ ya fya kusendelapo+ no kufumyapo ifya kubikamo amenshi ya kusamba;+ yafumishe ne cishiba+ pa ng’ombe ishilume isha mukuba+ ishali mwi samba lya ciko, yacibikile na apalambatikwe amabwe. 18 Kabili icikuulwa ico bafimbilepo umutenge umwalebela isabata ico bapangiile mu ng’anda e lyo no mwinshi wa ku nse uwa mfumu, yafumishe ku ng’anda ya kwa Yehova pa mulandu wa mfumu ya Asiria.

19 Kabili imilandu yashalako iya kwa Ahasi, ifyo acitile, bushe tafyalembwa mwi buuku+ lya milandu ya shamfumu sha mu Yuda? 20 Awe Ahasi aleele ukwalaala ifikolwe fyakwe kabili ashiikilwe ukwashiikwa ifikolwe fyakwe mu Musumba wa kwa Davidi;+ kabili Hisekia+ umwana wakwe alimupyene no kutendeka ukuteka.

17 Mu mwaka walenga ikumi na ibili (12) ukutula apo Ahasi imfumu ya Yuda atendekele ukuteka, e mo Hoshea+ mwana Ela ali mfumu ya Israele mu Samaria+ pa myaka pabula (9). 2 Kabili alecita ifyabipa mu menso ya kwa Yehova, lelo te pamo nge shamfumu sha bena Israele ishamutangilile.+ 3 E o Shalmanesere+ imfumu ya Asiria+ aile ku kulwisha, kabili Hoshea aishileba umubomfi wakwe no kulatuula umutuulo+ kuli ena. 4 Lelo imfumu ya Asiria yaishibe ukuti Hoshea aleipangila,+ pantu atumine inkombe kuli So imfumu ya Egupti,+ kabili tatwele umutuulo ku mfumu ya Asiria nge fyo alecita kale. E ico imfumu ya Asiria yalimwisalile no kumukakila mu cifungo.+

5 Kabili imfumu ya Asiria yaile mu kulwisha icalo conse, yaile na ku musumba wa Samaria no ku-ushinga+ pa myaka itatu. 6 Mu mwaka walenga pabula (9) ukutula apo Hoshea atendekele ukuteka, imfumu ya Asiria yapokele Samaria+ no kusenda abena Israele muli bunkole+ ku Asiria, kabili yabalengele ukwikala mu Hala+ na mu Habore ku mumana wa Gosani+ na mu misumba ya bena Madai.+

7 Nomba ici cacitike pa mulandu wa kuti abana ba kwa Israele babembukile+ Yehova Lesa wabo, uwabafumishe mu calo ca Egupti mu kuboko kwa kwa Farao imfumu ya Egupti,+ kabili batendeke ukutiina balesa bambi;+ 8 kabili bale-enda mu fipope+ fya nko isho Yehova atamfishe ku cinso ca bana ba kwa Israele, na mu fipope fya shamfumu sha kwa Israele ifyo shapangile; 9 kabili abana ba kwa Israele baipoosele mu fintu ifishaweme kuli Yehova Lesa wabo+ no kuikuulila ififulo fya kupepelapo+ mu misumba yabo yonse, ukutula ku lupungu+ lwa mulinshi ukufika na ku musumba we linga; 10 no kulaimikila ifyaimikwa ifya mabwe+ ne fya fimuti+ pa kapili+ konse na mwi samba lya muti onse uwalelema;+ 11 kabili kulya e ko balefutumwina icushi ca malambo pa fifulo fya kupepelapo fyonse nge nko+ isho Yehova atwele muli bunkole ukufuma ku cinso cabo, kabili balecita ifyabipa no kukalifya+ Yehova;

19 Na bena Yuda na bo tabakonkele amafunde ya kwa Yehova Lesa wabo,+ lelo bale-enda mu fipope fya bena Israele+ ifyo bapangile. 20 E ico Yehova akeene abana+ bonse aba kwa Israele, no kulabacusha no kubapeela ku balepokolola ifipe, mpaka abatamfishe pa ntanshi yakwe.+ 21 Pantu afumishe Israele ku ng’anda ya kwa Davidi, kabili babikile Yeroboamu mwana Nebati pa bufumu; na Yeroboamu+ afumishe abena Israele mu kukonka Yehova, kabili abalengele ukubembuka ulubembu ulukalamba.+ 22 Na bana ba kwa Israele bale-enda mu membu shonse isho Yeroboamu acitile.+ Tabafuminemo nakalya, 23 mpaka Yehova atamfya Israele ku cinso cakwe,+ filya fine alandiile mu babomfi bakwe bakasesema.+ E ico abena Israele bafumine mu calo cabo no kuya muli bunkole ku Asiria ukufika ne lelo.+

24 E lyo imfumu ya Asiria yafumishe abantu ku Babiloni+ na ku Kutu na ku Aba+ na ku Hamati+ na ku Sefaribaimu,+ no kubaleka ukwikala mu misumba ya Samaria,+ mu cifulo ca bena Israele; kabili balya bantu bapyene Samaria no kwikala mu misumba ya iko. 25 Nomba ilyo batendeke ukwikala mulya, tabaletiina+ Yehova. E ico Yehova atumine inkalamo+ mu kati kabo, na sho shalabepaya. 26 E ico batumine amashiwi ku mfumu ya Asiria abati: “Inko isho mwasendele muli bunkole no kushibika mu misumba ya Samaria tashaishiba imipepele ya kwa Lesa wa cilya calo, ica kuti aletuma inkalamo mu kati kabo;+ kabili, moneni! shilebepaya, pantu tapali nangu umo uwaishiba imipepele ya kwa Lesa wa cilya calo.”

27 E lyo imfumu ya Asiria yasosele aiti: “Lekeni umo pali bashimapepo+ uo mwasendele muli bunkole kulya aleya, ayeikala kulya no kubasambilisha imipepele ya kwa Lesa wa cilya calo.” 28 Awe umo pali bashimapepo uo basendele muli bunkole ukufuma ku Samaria aileikala mu Betele,+ kabili e walebasambilisha ifya kutiina Yehova.+

29 Lelo uluko lumo na lumo lwaipangiile lesa wa luko,+ uo lwabikile mu mayanda ya kupepelamo ayo abena Samaria bapangile, uluko lumo na lumo, mu misumba yabo umo baleikala. 30 Abantu ba ku Babiloni bapangile Sukote-benote, aba ku Kutu+ bapangile Nergali, aba ku Hamati bena bapangile Ashima. 31 Kabili abena Aba+ bapangile Nibhasi na Tartaki; na bena Sefaribaimu+ baleoca abana babo mu mulilo+ kuli Adrameleke na Anameleke, balesa ba kwa Sefaribaimu. 32 Kabili batendeke ukutiina Yehova, kabili basontele na bamo mu bantu babo ukuba bashimapepo+ ba pa fifulo fya kupepalapo, kabili na bo balebombela mu ng’anda ya kupepelamo. 33 Baletiina Yehova,+ lelo balepepa balesa babo+, ukulingana ne mipepele ya mu nko umo babasendele bunkole.+

34 Ukufika na lelo, bacita ukulingana ne mipepele yabo iya kale.+ Takwali abaletiina Yehova+ kabili takwali abalecita ifintu ukulingana ne fipope fyakwe no bupingushi+ na mafunde+ ne fyebo ifyo Yehova aebele abana ba kwa Yakobo,+ uo ayalwile ishina ukuba Israele;+ 35 ilyo Yehova apangene nabo icipangano+ no kubeba ati: “Mwilatiina balesa bambi,+ kabili mwilabakontamina nangu kubabombela nangu kubepaila amalambo.+ 36 Lelo Yehova uwamufumishe mu calo ca Egupti ku maka ayakalamba no kuboko ukwatambalikwa,+ e o muletiina+ kabili e o mulekontamina,+ kabili e o muleipaila amalambo.+ 37 Kabili lyonse mulebika amano ku kukulakonka+ ifipope+ no bupingushi+ na mafunde ayo amulembele;+ kabili mwilatiina balesa bambi. 38 Kabili mwikalaba icipangano ico napangana na imwe;+ kabili mwilatiina balesa bambi.+ 39 Lelo Yehova+ Lesa wenu e o muletiina fye, pantu e ukamupokolola ku balwani benu.”+

40 Kabili tabaumfwilile, lelo balecita ukulingana ne mipepele yabo iya kale.+ 41 Kabili shilya nko shatendeke ukutiina Yehova+, lelo shalebombela ifimpashanya fya shiko ifyabaswa. Kabili abana babo na beshikulu babo, filya fine ifikolwe fyabo fyalecita, e fyo na bo bacita ukufika na buno bushiku.

18 Kabili mu mwaka walenga itatu ukutula apo Hoshea+ mwana Ela imfumu ya Israele atendekele ukuteka, e mo Hisekia+ mwana Ahasi+ imfumu ya Yuda atendeke ukuteka. 2 Ali ne myaka amakumi yabili na isano (25) ilyo atendeke ukuteka, kabili atekele imyaka amakumi yabili na pabula (29) mu Yerusalemu. Kabili ishina lya kwa nyina ni Abi umwana mwanakashi wa kwa Sekaria.+ 3 Kabili alecita ifisuma mu menso ya kwa Yehova,+ ukulingana na fyonse ifyo Davidi icikolwe cakwe acitile.+ 4 E wafumishepo ififulo fya kupepelapo+ fyonse no kutobaula amabwe ayo baimike+ no konaula ifimuti ifyo baimike+ no kushonaula insoka+ ya mukuba iyo Mose apangile;+ pantu ukufika na mu nshiku shilya abana ba kwa Israele balefutumwina icushi ca malambo+ kuli iyi nsoka, kabili baleita, abati, akalubi ka nsoka ya mukuba.+ 5 Hisekia atetekele Yehova Lesa wa kwa Israele;+ kabili pa numa yakwe takwali nangu umo uwalingene nankwe pa shamfumu shonse isha mu Yuda,+ kumo ne shamutangilile.+ 6 Kabili alambatile pe kuli Yehova.+ Talekele ukumukonka, lelo alesunga amafunde yakwe ayo Yehova aebele Mose.+ 7 Kabili Yehova ali nankwe.+ Konse uko aleya, ali uwacenjela;+ apondokele imfumu ya ku Asiria kabili taleibombela.+ 8 E waumine abaPelishiti+ ukufika fye na ku Gasa+ ne fitungu fya uko, ukufuma ku lupungu+ lwa balinshi ukufika fye na ku musumba we linga.

9 Nomba mu mwaka walenga ine uwa kuteka kwa Mfumu Hisekia, na mu mwaka walenga cinelubali (7) uwa kuteka kwa kwa Hoshea+ mwana Ela imfumu ya Israele, e mo Shalmanesere+ imfumu ya Asiria aile ku kulwa na Samaria no ku-ushinga.+ 10 Kabili bapokele+ Samaria pa mpela ya myaka itatu; mu mwaka walenga mutanda (6) uwa kuteka kwa kwa Hisekia, kabili mu mwaka walenga pabula (9) uwa kuteka kwa kwa Hoshea imfumu ya kwa Israele, e mo umusumba wa Samaria wapokelwe.+ 11 E lyo nomba imfumu ya Asiria+ yasendele abena Israele muli bunkole+ ku Asiria no kubabika mu Hala+ na mu Habore+ ku mumana wa Gosani na mu misumba ya bena Madai,+ 12 pa mulandu wa kuti tabaumfwile+ kwi shiwi lya kwa Yehova Lesa wabo, lelo balepula mu cipangano cakwe lyonse,+ na muli fyonse ifyo Mose+ umubomfi wa kwa Yehova abebele.+ Tabaumfwile nangu ukuficita.

13 Kabili mu mwaka walenga ikumi na ine (14) uwa kuteka kwa Mfumu Hisekia, e mo Sankeribu+ imfumu ya Asiria+ aile ku kulwisha imisumba ya malinga iya kwa Yuda kabili ali-ipokele. 14 E ico Hisekia imfumu ya Yuda atumine amashiwi ku mfumu ya Asiria ku Lakishi ati: “Nimembuka. Bwelelamo no kuleka ukundwisha. Conse ico ulenjeba ndecita.”+ E lyo imfumu ya Asiria yaebele Hisekia imfumu ya Yuda ukuleta amatalanti ya silfere+ imyanda itatu (300) na matalanti ya golde amakumi yatatu (30). 15 E ico Hisekia apeele iyi mfumu silfere yonse iyasangilwe mu ng’anda ya kwa Yehova+ na mu cipao ca ng’anda ya mfumu.+ 16 Pa nshita ilya Hisekia asokwele ifiibi fya kwi tempele lya kwa Yehova+ ne nceshi sha pa mwinshi isho Hisekia imfumu ya Yuda yabikileko,+ afipeele na ku mfumu ya Asiria.

17 E lyo imfumu ya Asiria+ yatumine Tartani*+ na Rabsarisi* na Rabsake*+ ukufuma ku Lakishi,+ ukuya ku Mfumu Hisekia, ne bumba lya bashilika ilikalamba ukuti baye ku Yerusalemu. Na bo baliile, baileiminina mupepi no munyangala+ wa cishiba ca pa muulu,+ icaba mu musebo wa mu mpanga ya kwa kacapa wa nsalu.+ 18 Kabili batendeke ukubilikisha ku mfumu, lelo uwafumine ni Eliakimu+ mwana Hilkia, uwaleyangalila aba mu ng’anda, na Shebna+ kalemba na Yoa mwana Asafi kebukisha.

19 Awe Rabsake+ abebele ati: “Ebeni Hisekia amuti, ‘Imfumu nkalamba,+ imfumu ya Asiria yatila: “Nga kanshi cinshi ucetekelemo?+ 20 Iwe usosele amashiwi ya pa kanwa fye auti, ‘Ninjishiba+ ifya kulya kabili ninkwata na maka ya kulwa.’ Nomba nani uo ucetekele,+ pa kuti umpondokele?21 Nomba, mona! wacetekela mu kwafwa kwa ili itete ilyafunika,+ muli Egupti,+ itete lya kuti umuntu nga ashintililapo, kuti lyaingila mu lupi lwakwe no kulutula. E fyo Farao+ imfumu ya Egupti aba kuli bonse abamucetekela. 22 Nomba nga mwanjeba amuti, ‘Ni Yehova+ Lesa wesu e o twacetekela,’+ bushe te o Hisekia+ afumishapo ififulo fya kupepelapo+ ne fiipailo fyakwe, no kweba abaYuda na ba mu Yerusalemu ati, ‘Mulekontamina iciipailo ici mu Yerusalemu’?”’+ 23 E ico nomba upangane+ na shikulu imfumu ya Asiria, kabili leka nkupeele bakabalwe amakana yabili (2,000) tumone nga kuti wabikapo abantu.+ 24 Nomba kuti wacimfya shani kateka uwa mu babomfi bacepesha aba kwa shikulu+, apo iwe ucetekele Egupti ukukupeela amaceleta+ na ba pali bakabalwe?+ 25 Bushe njishile ku kuconaula cino cifulo ukwabula ukusuminishiwa na Yehova? Yehova umwine anjebele ati,+ ‘Kabiye kalwishe ici calo, kabili uconaule.’”

26 E lyo Eliakimu+ mwana Hilkia na Shebna+ na Yoa+ batile kuli Rabsake:+ “Landeni na babomfi benu mu lulimi lwa bena Siria,+ pantu tulomfwa; mwilanda na ifwe mu lulimi lwa baYuda,+ pantu abantu bali pe linga kuti baumfwako.” 27 Lelo Rabsake abebele ati: “Bushe shikulu antumine ukulanda aya mashiwi kuli shikulwinwe na kuli imwe? Bushe te kuli aba bantu abekele pa cibumba antumine, pa kuti balye amafi+ yabo no kunwa imisu yabo pamo na imwe?”+

28 Kabili Rabsake aiminine fye no kubilikisha mu ciYuda;+ no kukonkanyapo ukusosa ati: “Umfweni amashiwi ya mfumu nkalamba,+ imfumu ya Asiria. 29 Imfumu yatila, ‘Mwileka Hisekia amubepe, pantu te kuti amupokolole kuli ine.+ 30 Kabili mwileka Hisekia amulenge ukucetekela Yehova,+ ati: “Nangu cibe shani, Yehova aletupokolola,+ kabili uno musumba tawakapeelwe mu minwe ya mfumu ya Asiria.”+ 31 Mwiumfwa kuli Hisekia; pantu imfumu ya Asiria yatila: “Cimbeni, no kwisa kuli ine, no kulya cila muntu ku muti wakwe uwa mwangashi na cila muntu ku mukunyu+ wakwe no kunwa amenshi cila muntu mu cishima cakwe,+ 32 nkasuke nkese no kumutwala ku calo icaba nge calo cenu,+ icalo ca ngano no mwangashi uupya, icalo ca mukate+ na mabala ya myangashi,+ icalo ica miti ya miolife no buci;+ kabili mube no mweo no kukanafwa. Kabili mwiumfwa kuli Hisekia, pantu alemubeleleka ati, ‘Yehova aletupokolola.’+ 33 Bushe balesa ba nko balipokolwele+ ifyalo fyabo ku mfumu ya Asiria?+ 34 Bushe balesa ba ku Hamati+ na ku Aripadi bali kwi?+ Bali kwi balesa ba kwa Sefaribaimu,+ na Hena+ na Iba?+ Bushe balipokolola Samaria kuli ine?+ 35 Nani pali balesa bonse aba fyalo uwapokolola icalo cakwe kuli ine,+ pa kuti Yehova apokolole Yerusalemu kuli ine?”’”+

36 Awe bantu baikele fye tondolo+ kabili tabamwaswike+ nangu cimo, pantu imfumu yabebele ati: “Mwimwasuka.”+ 37 Lelo Eliakimu+ mwana Hilkia uwaleangalila aba mu ng’anda, na Shebna+ kalemba na Yoa+ mwana Asafi kebukisha baile kuli Hisekia ninshi nabalepula ifya kufwala+ fyabo kabili bamwebele amashiwi ya kwa Rabsake.

19 Nomba ilyo fye Imfumu Hisekia+ yaumfwile, ilyo line yalepwile ifya kufwala+ fya iko no kufwala insamu,*+ yaingile na mu ng’anda ya kwa Yehova.+ 2 Kabili yatumine Eliakimu,+ uwaleangalila aba mu ng’anda, na Shebna+ kalemba na bakalamba pali bashimapepo kuli Esaya+ kasesema, mwana Amose,+ ninshi nabafwala insamu. 3 Kabili bamwebele abati: “Hisekia atila, ‘Buno bushiku, bushiku bwa bulanda+ no kwebaulwa+ no kusaalulwa;+ pantu tuli ngo mwanakashi uuli mupepi no kupaapa,+ nomba takuli amaka ya kupaapa.+ 4 Nalimo Yehova Lesa obe kuti aumfwa+ amashiwi yonse aya kwa Rabsake,* uo shikulu wakwe imfumu ya Asiria atumine ku kusaalula+ Lesa wa mweo, kabili akamukanda pa mashiwi ayo Yehova Lesa obe omfwile.+ Kabili upepeleko+ abashalapo+ abalipo.’”

5 Awe ababomfi ba mfumu Hisekia baile kuli Esaya.+ 6 E lyo Esaya abebele ati: “Mwebe shikulwinwe amuti, ‘Yehova atila:+ “Witiina+ pa mulandu wa mashiwi waumfwa ayo ababomfi ba mfumu ya ku Asiria basosele pa kunsaalula.+ 7 Mona, ndebika umupashi muli yena,+ kabili ikomfwa ilyashi+ no kubwelela ku calo ca iko; kabili nkailenga ukufwa ku lupanga mu calo ca iko.”’”+

8 Awe Rabsake+ alibwelelemo no kuyasanga imfumu ya Asiria ilelwa na Libna;+ pantu alyumfwile ukuti yalifumine ku Lakishi.+ 9 Yaumfwile balesosa pali Tirhaka imfumu ya ku Etiopia ati: “Mona naisa mu kulwa na iwe.” E ico yatumine inkombe+ na kabili kuli Hisekia no kutila: 10 “Mwebe Hisekia imfumu ya Yuda amuti, ‘Wileka Lesa obe uo ucetekele akubepe,+ ati: “Yerusalemu+ takacimfiwe ku mfumu ya Asiria.”+ 11 Mona! Walyumfwa ifyo ishamfumu sha Asiria shacitile ku fyalo fyonse pa kufyonaula;+ kabili bushe iwe ukapokololwa?+ 12 Bushe balesa+ ba nko isho ifikolwe fyandi fyaonawile balipokolwele shilya nko, e kutila Gosani+ na Harani+ na Resefe na bena Edene+ abali mu Telasari?+ 13 Bushe ili kwi imfumu ya Hamati+ ne mfumu ya Aripadi+ ne shamfumu sha misumba ya Sefarivaimu, Hena na Iba?’”+

14 Awe Hisekia apokele bakalata ku nkombe no kubabelenga,+ na pa numa Hisekia aile ku ng’anda ya kwa Yehova no kufungulula bakalata pa ntanshi ya kwa Yehova.+ 15 Kabili Hisekia apepele+ kuli Yehova ati: “Mwe Yehova, Lesa wa kwa Israele,+ mwe baikala pali bakerubi,+ ni mwe mweka Lesa wa cine mu mabufumu+ yonse aya pano isonde.+ Ni mwe mwapangile umuulu+ ne calo.+ 16 Kutikeni mwe Yehova no kuumfwa.+ Isuleni amenso yenu,+ mwe Yehova, no kumona, kabili umfweni amashiwi ya kwa Sankeribu ayo atumine ku kuseebanya+ Lesa wa mweo. 17 Mwe Yehova, ca cine, ishamfumu sha Asiria shalyonaula inko ne fyalo fya shiko.+ 18 Kabili shalyoca balesa ba shiko mu mulilo, pantu tabali balesa iyo,+ lelo bapangilwe ne fimuti na mabwe ku minwe ya bantunse;+ e co baonawiliile balya balesa. 19 E ico nomba, mwe Yehova Lesa wesu,+ tupususheni+ mu minwe yakwe, pa kuti amabufumu yonse aya pano isonde yeshibe ukuti imwe, mwe Yehova ni mwe Lesa mweka.”+

29 “‘Ne ci e cikaba icishibilo kuli iwe:+ Uno mwaka mukalalya ifikamena ku fyashele ilyo mwalelobolola,+ na mu mwaka wa cibili mukalya ifya kuimenena fye; e lyo mu mwaka wa citatu mukabyala imbuto,+ no kuseepa no kulima amabala ya myangashi no kulya ifisabo fya yako.+ 30 Kabili abakapusuka mu ng’anda ya kwa Yuda, abakashalapo,+ bakalimba imishila no kutwala ifisabo.+ 31 Pantu abakashalapo bakafuma mu Yerusalemu,+ na bakapusuka mu Lupili lwa Sione.+ Ukupimpa+ kwa kwa Yehova kukacita ici.

32 “‘E mulandu wine Yehova asosela pa mfumu ya Asiria ati:+ “Tayakengile muli uno musumba+ nangu kulasamo umufwi+ nangu kwisa ne nkwela nangu ukukuula ica kuninapo pa kusansa musumba.+ 33 Mu nshila yaishilemo, e mo ikabwelela, kabili muli uno musumba tayakesemo, e fyasosa Yehova.+ 34 Kabili nkacingilila+ uno musumba pa kuti mpusushe uno musumba pa mulandu wandi+ na pa mulandu wa kwa Davidi umubomfi wandi.”’”+

35 Awe inshita ilya ine iya bushiku malaika wa kwa Yehova alifumine no kuyaipaya abantu abali mu nkambi+ ya bena Asiria+ amakana umwanda umo na makana amakumi cinekonsekonse na yasano (185,000). Ilyo abantu baimine ulucelo, moneni, bonse bali ifitumbi.+ 36 E ico Sankeribu+ imfumu ya Asiria alifumineko no kuya, abwelelamo+ no kuyaikala mu Ninebe.+ 37 Nomba ilyo afukeme alepepa mu ng’anda ya kwa Nisroke+ lesa wakwe,+ Adrameleke na Sharesere, abana bakwe, balimwipeye ku lupanga,+ kabili bafulumukile ku calo ca Ararati.+ Kabili Esari-hadone+ umwana wakwe alimupyene no kutendeka ukuteka.

20 Awe mu nshiku shilya, Hisekia alilwele ubwa kufwa.+ E ico Esaya+ mwana Amose kasesema aile kuli ena no kumweba ati: “Yehova atila, ‘Eba aba mu ng’anda yobe ifya kucita,+ pantu iwe ukufwa kwena ulefwa kabili tawabe no mweo.’”+ 2 Na o apilibukile ku cibumba, +alapepa kuli Yehova,+ ati: 3 “Napapaata, mwe Yehova, ibukisheni+ ifyo naenda+ mu cishinka+ no mutima onse+ ku cinso cenu, kabili nalicita icisuma mu menso yenu.”+ Awe Hisekia alilile nga nshi.+

4 Nomba Esaya ali talafika ku lubansa lwa mu kati ilyo icebo ca kwa Yehova caishile kuli ena,+ no kutila: 5 “Bwelelamo, kebe Hisekia intungulushi+ ya bantu bandi auti, ‘Yehova Lesa+ wa kwa Davidi icikolwe cobe atila: “Ning’umfwa+ ipepo+ lyobe. Nimona ifilamba fyobe.+ Mona, ndekuposha.+ Ukaya ku ng’anda ya kwa Yehova pa bushiku bwalenga shitatu.+ 6 Kabili nkalundako imyaka ikumi na isano (15) ku nshiku shobe, kabili nkapokolola iwe na uno musumba ku mfumu ya Asiria, kabili nkacingilila+ uno musumba pa mulandu wandi na pa mulandu wa kwa Davidi umubomfi wandi.”’”+

7 Na Esaya atile: “Buuleni icimamantwa ca makunyu ayauma.”+ Na bo babuulile icimamantwa no kucibika pa cipute,+ kabili asukile apola.+

8 Nomba Hisekia aipwishe Esaya ati: “Bushe cishibilo+ nshi ica kulanga ukuti Yehova alemposha no kuti nkaya ku ng’anda ya kwa Yehova pa bushiku bwalenga shitatu?” 9 Na o Esaya atile: “Ici e cishibilo+ icafuma kuli Yehova ica kukulanga ukuti Yehova akacita ifyo asosele: Bushe icinshingwa kuti caselela ku ntanshi pa matabo ikumi (10) nelyo ukubwelela ku numa pa matabo ikumi?” 10 E lyo Hisekia atile: “Calyanguka icinshingwa ukuya ku ntanshi pa matabo ikumi (10), lelo calyafya icinshingwa ukubwelela ku numa pa matabo ikumi.”+ 11 Awe Esaya kasesema aliliile kuli Yehova; na o abweseshe pa matabo icinshingwa, e kutila, pa matabo ya kwa Ahasi, kabili cabwelele ku numa pa matabo ikumi (10).+

12 Pa nshita ilya Berodaki-baladani+ mwana Baladani imfumu ya Babiloni+ atumine bakalata+ no bupe kuli Hisekia; pantu aumfwile ukuti Hisekia alilwele. 13 Na o Hisekia akutike kuli bena no kubalanga ing’anda yakwe yonse iya cuma,+ silfere na golde+ na mafuta ya balsamu+ na mafuta yasuma no mwalesungilwa ifyanso fyakwe ne fyuma fyakwe fyonse. Tapali nangu cimo ico Hisekia ashabalangile mu ng’anda yakwe na mu bufumu bwakwe bonse.+

14 Pa numa ya ifi Esaya kasesema aile ku Mfumu Hisekia no kuipusha ati:+ “Finshi aba baume bacisosa? kabili bafumine kwi pa kwisa kuli iwe?”+ Na o Hisekia ayaswike ati: “Bafumine ku calo ca kutali, ku Babiloni.” 15 Na kabili amwipwishe ati: “Finshi bacimona mu ng’anda yobe?” E lyo Hisekia ayaswike ati: “Bacimona fyonse ifyaba mu ng’anda yandi. Tapali nangu cimo pa fyuma fyandi ico nshacibalanga.”+

16 Esaya nomba e pa kweba Hisekia ati: “Umfweni ifyo Yehova asosa,+ 17 ‘“Mona! Inshiku shileisa, kabili fyonse ifyaba mu ng’anda yobe+ na fyonse ifyo ifikolwe fyobe fyalonganike ukufika na pali buno bushiku, fikasendwa ku Babiloni.+ Tapakashale nangu cimo,”+ e fyo Yehova asosa. 18 “Kabili abana bobe bamo abakafuma muli iwe, abana abo ukafyala, bakasendwa+ no kuyaba bacilolo ba kwi sano+ mwi sano lya mfumu ya Babiloni.”’”+

19 E lyo Hisekia atile kuli Esaya: “Icebo ca kwa Yehova ico wasosa cawama.”+ Kabili atile: “Pantu umutende ne cine+ fikatwalilila mu nshiku shandi.”+

20 Ne milandu iyashalako iya kwa Hisekia na bumpalume bwakwe, ne fyo apangile icishiba+ no mufulo+ wa kuleta amenshi mu musumba, bushe tafyalembwa mwi buuku+ lya milandu ya shamfumu sha mu Yuda?21 Awe Hisekia aleele ukwalaala ifikolwe fyakwe;+ kabili Manase+ umwana wakwe alimupyene no kutendeka ukuteka.

21 Manase+ ali ne myaka ikumi na ibili (12) ilyo atendeke ukuteka, kabili atekele imyaka amakumi yasano na isano (55) mu Yerusalemu. Ne shina lya kwa nyina ni Hefsi-ba. 2 Kabili acitile ifyabipa mu menso ya kwa Yehova,+ ukulingana ne fya bunani ifyacitile inko+ isho Yehova atamfishe ku cinso ca bana ba kwa Israele. 3 E ico akuulile cipya cipya ififulo fya kupepelapo ifyo Hisekia wishi aonawile,+ no kukuulila Baali ifiipailo, no kwimika ifimuti, nga filya na Ahabu+ imfumu ya Israele acitile; kabili atendeke ukukontamina+ ifya mu muulu+ fyonse no kufibombela.+ 4 Akuulile ne fiipailo mu ng’anda ya kwa Yehova,+ iyo Yehova alandilepo ati: “Mu Yerusalemu e mo nkabika ishina lyandi.”+ 5 Kabili akuuliile ifya mu muulu+ fyonse ifiipailo mu mansa shibili isha ng’anda ya kwa Yehova.+ 6 Aocele no mwana wakwe mu mulilo,+ kabili alecita ifinjelengwe+ no kubukisha imbuko kabili asontele abaishiba ukwipusha ku mipashi+ na baishiba ukusobela ifintu.+ Acitile ifyabipa ifingi nga nshi mu menso ya kwa Yehova, pa kuti amukalifye.

7 Kabili abikile icimpashanya icabaswa+ ica cimuti caimikwa ico apangile mu ng’anda,+ iyo Yehova alandilepo kuli Davidi na kuli Solomone umwana wakwe ati: “Muli ino ng’anda na mu Yerusalemu, umusumba uo nasala mu mikowa yonse iya kwa Israele, e mo nkabika ishina lyandi umuyayaya.+ 8 Kabili nshakalenge ulukasa lwa bena Israele ukululumba na kabili ukufuma mu calo ico napeele ifikolwe fyabo,+ cikulu fye babika amano ku kucita fyonse ifyo nabebele,+ na ku mafunde yonse ayo Mose umubomfi wandi abebele.” 9 Kabili tabaumfwile,+ lelo Manase alebabeleleka ukucita ifyabipa+ ukucila inko+ isho Yehova alofeshe pa ntanshi ya bana ba kwa Israele.

10 Kabili Yehova alelandila mu babomfi bakwe bakasesema,+ ati:11 “Manase+ imfumu ya Yuda nacita ifya bunani,+ kabili nacita ifyabipa ukucila ifyabipa fyonse ifyo abena Amore+ abamutangilile bacitile, no kulenga Yuda ukubembuka+ ku tulubi twakwe utwa bunani. 12 E mulandu wine Yehova Lesa wa kwa Israele asosele ukuti, ‘Mona, ndeleta ububi pali Yerusalemu+ na Yuda, ububi ubwa kuti umuntu nga aumfwa pali ubu bubi, cikamupesha amano.*+ 13 Kabili nkabika intambo ya kupiminako+ pali Yerusalemu iyabikilwe pali Samaria+ ne ca kulinganishishako icabikilwe pa ba mu ng’anda ya kwa Ahabu;+ kabili nkapukuta+ Yerusalemu ifyo umuntu apukuta imbale yafonka, ifyo aipukuta no kuikupamika.+ 14 Kabili nkalekelesha abakashalapo+ aba bupyani+ bwandi no kubapeela ku balwani babo, kabili bakaba fye nge fipe ifyo abalwani babo bapokolola kabili nge fipe ifyo abalwani babo basenda,+ 15 pa mulandu wa kuti bacitile ifyabipa mu menso yandi kabili balenkalifya ukutula pa bushiku ifikolwe fyabo fyafumine mu Egupti ukufika na lelo.’”+

16 Kabili Manase asumishe umulopa wa kaele uwingi,+ asukile aisusha umulopa mu Yerusalemu monse, ukulunda pa lubembu ulo alengele Yuda ukubembuka pa kucita ifyabipa mu menso ya kwa Yehova.+ 17 Ne milandu yashalako iya kwa Manase na fyonse ifyo acitile no lubembu ulo abembwike, bushe tafyalembwa mwi buuku+ lya milandu ya shamfumu sha mu Yuda? 18 Kabili Manase aleele ukwalaala ifikolwe fyakwe+ kabili bamushiikile mwi bala lya pa ng’anda yakwe, mwi bala lya kwa Usa;+ na Amone umwana wakwe alimupyene no kutendeka ukuteka.

19 Amone+ ali ne myaka amakumi yabili na ibili (22) ilyo atendeke ukuteka, kabili atekele imyaka ibili+ mu Yerusalemu. Ne shina lya kwa nyina ni Meshulamete mwana Harusi uwa ku Yotba. 20 Kabili acitile ifyabipa mu menso ya kwa Yehova, nga filya fine Manase wishi acitile.+ 21 Kabili ale-enda mu nshila shonse isho wishi aendelemo,+ no kubombela utulubi twa bunani+ uto wishi abombeele, kabili aletukontamina. 22 Kabili ashile Yehova+ Lesa wa fikolwe fyakwe, kabili taendele mu nshila sha kwa Yehova.+ 23 Umuya inshiku, ababomfi ba kwa Amone balimupangiile, kabili baipaile+ iyi mfumu mu ng’anda ya iko. 24 Lelo abantu ba mu calo baipeye bonse abapangiile+ Imfumu Amone. E lyo abantu ba mu calo bapyanikepo Yoshia+ umwana wakwe ukuba imfumu. 25 Ne milandu iyashalako iya kwa Amone ne fyo acitile, bushe tafyalembwa mwi buuku+ lya milandu ya shamfumu sha mu Yuda?26 E ico bamushiikile mu nshiishi yakwe mwi bala lya kwa Usa;+ na Yoshia+ umwana wakwe alimupyene no kutendeka ukuteka.

22 Yoshia+ ali ne myaka cinekonsekonse (8) ilyo atendeke ukuteka, kabili atekele mu Yerusalemu imyaka amakumi yatatu na umo (31). Ne shina lya kwa nyina ni Yedida mwana Adaya uwa ku Bosekati.+ 2 Kabili acitile ifyalungama mu menso ya kwa Yehova+ no kwenda mu mibele yonse iya kwa Davidi icikolwe cakwe,+ kabili tayalukile ku kwa kulyo nangu ku kwa kuso.+

3 Nomba mu mwaka walenga ikumi na cinekonsekonse (18) uwa kuteka kwa Mfumu Yoshia, imfumu yatumine Shafani+ mwana Asalia mwana Meshulamu kalemba mu ng’anda ya kwa Yehova, aiti: 4 “Kabiye kuli Hilkia+ shimapepo mukalamba,+ uleke asanshe indalama+ shonse ishileletwa mu ng’anda ya kwa Yehova+ isho abalinshi ba pa mwinshi+ balonganika ukufuma ku bantu; 5 no kupeela abalebomba umulimo+ mu ng’anda ya kwa Yehova, balya abasalwa, pa kuti bashipeele ku balebomba umulimo abali mu ng’anda ya kwa Yehova ukuti bacilike imilale ya ku ng’anda,+ 6 e lyo na ku bacenjela mu fya kupangapanga na kuli bakakuula na ku baishiba ukukuulila na mabwe, no kuti bashitemo imbao na mabwe ayabaswa pa kuti bawamye ing’anda.+ 7 Lelo beipusha abapeelwe indalama ifyo baleshibomfya,+ pantu balebomba ne cishinka.”+

8 E lyo Hilkia+ shimapepo mukalamba atile kuli Shafani+ kalemba:+ “Ninsanga ibuuku lya mafunde+ mu ng’anda ya kwa Yehova.” Kabili Hilkia apeele Shafani ibuuku, na o atendeke ukulibelenga. 9 E lyo Shafani kalemba aile ku mfumu no kweba imfumu ati: “Ababomfi benu nababuula indalama ishasangilwe mu ng’anda, kabili baleshipeela mu minwe ya balebomba umulimo mu ng’anda ya kwa Yehova, balya abasalwa.”+ 10 Kabili Shafani kalemba aebele imfumu ati: “Kuli ibuuku+ ilyo Hilkia shimapepo ampeele.” Awe Shafani atendeke ukubelengamo pa ntanshi ya mfumu.

11 Nomba ilyo fye imfumu yaumfwile amashiwi ayali mwi buuku lya mafunde, apo pene yalepwile ifya kufwala fya iko.+ 12 E lyo imfumu yaebele Hilkia shimapepo na Ahikamu+ mwana Shafani na Akbore mwana Mikaya na Shafani kalemba na Asaya+ umubomfi wa mfumu, aiti: 13 “Kabiyeni kanjipushisheniko+ kuli Yehova no kwipushishako abantu na bena Yuda pa mashiwi yali mwi buuku ili ilisangilwe; pantu ubukali+ bwa kwa Yehova bukalamba pali ifwe pa mulandu wa kuti ifikolwe fyesu+ tafyaumfwilile amashiwi ayaba mwi buuku ili pa kukanacita fyonse ifyalembelwa ifwe.”+

14 Awe Hilkia shimapepo na Ahikamu na Akbore na Shafani na Asaya baile kuli Hulda kasesema umwanakashi+ umukashi wa kwa Shalumu mwana Tikba mwana Hahasi, uwalesunga ifya kufwala,+ pantu aleikala mu Yerusalemu mu citungu icipya ica musumba; kabili balandile nankwe.+ 15 Na o Hulda abebele ati: “Yehova Lesa wa kwa Israele atila,+ ‘Kebeni umuntu uumutumine kuli ine amuti: 16 “Yehova atila, ‘Mona ndeleta ubucushi+ pali cino cifulo na pa baikalamo,+ ndelenga na mashiwi+ yonse ayaba mwi buuku ilyo imfumu ya kwa Yuda ibelengele ukucitika;+ 17 pa mulandu wa kuti balinsha kabili balefutumwina icushi ca malambo kuli balesa bambi+ pa kuti bankalifye ku milimo yonse iya minwe yabo,+ kabili ubukali bwandi bulepya ngo mulilo pali cino cifulo kabili tabwakapwe.’”’+ 18 Kabili imfumu ya kwa Yuda iimutumine ku kwipusha kuli Yehova, muyebe amuti, ‘Yehova Lesa wa kwa Israele atila: “Nomba ukukuma kuli yalya amashiwi umfwile,+ 19 apo umutima+ obe waciba uwanakilila ica kuti waci-icefya+ pa mulandu wa kwa Yehova ilyo wacumfwa ifyo nacilanda pali cino cifulo na pa baikalamo ukuti fikaba ica kupapa kabili icitiipu,+ kabili wacilepula+ ifya kufwala fyobe no kutendeka ukulila pa ntanshi yandi, ine ning’umfwa,” e fyo Yehova asosa.+ 20 “Mona, e mulandu wine nkakutwalila+ ukwaba ifikolwe fyobe, kabili ukatwalwa ku nshiishi yobe mu mutende,+ na menso yobe tayakamone ubucushi bonse ubo ndeleta pali cino cifulo.”’” Na bo baile-eba imfumu amashiwi aya.

23 E lyo imfumu yatumine bamo kabili balonganike kuli yena abakalamba bonse aba mu Yuda na Yerusalemu.+ 2 Kabili pa numa imfumu yaile ku ng’anda ya kwa Yehova, na baume ba mu Yuda bonse na bekashi bonse aba mu Yerusalemu pamo na yo, na bashimapepo+ na bakasesema na bantu bonse, ukutampila pa munono ukufika ku mukalamba;+ kabili yatendeke ukubabelengela+ amashiwi yonse ayali mwi buuku+ lya cipangano+ ilyasangilwe mu ng’anda ya kwa Yehova.+ 3 Kabili yaiminine mupepi no luceshi+ no kucita icipangano+ pa ntanshi ya kwa Yehova, ica kuti bali no kukonka+ Yehova no kusunga amafunde+ yakwe ne fishimiko+ fyakwe ne fipope+ fyakwe no mutima onse+ no mweo onse+ pa kulacita ifyaba muli ici cipangano ifyalembelwe muli ili ibuuku.+ Na bantu bonse basumine ifyali mu cipangano.+

4 E lyo imfumu yaebele Hilkia+ shimapepo mukalamba ne nkonkani sha bashimapepo na ba pa mwinshi+ ukuti bafumye ifipe fyonse mwi tempele lya kwa Yehova ifyapangiilwe Baali+ ne fyapangiilwe icimuti icaimikwa+ ne fyapangiilwe ifya mu muulu.+ Kabili yafyocelele ku nse ya Yerusalemu mu mabala ya Kidrone,+ yatwele ne mito ya fiko ku Betele.+ 5 Kabili yalofeshe bashimapepo ba balesa aba nko shimbi, abo ishamfumu sha mu Yuda shasontele pa kuti balefutumwina icushi ca malambo pa fifulo fya kupepelapo mu misumba ya mu Yuda ne ncende shashingulwike Yerusalemu, e lyo na balefutumwina Baali+ icushi ca malambo, ku kasuba na ku mweshi na ku ntanda na ku fya mu muulu fyonse.+ 6 Kabili yafumishe mu ng’anda ya kwa Yehova icimuti caimikwa+ no kucitwala ku nse ya Yerusalemu, ku mupokapoka wa Kidrone, no kucocela+ mu mupokapoka wa Kidrone no kucishonaula, no kukuba imito ya ciko pa nshiishi+ sha bana ba bantu. 7 Kabili yabongolwele amayanda ya bacilende abaume+ aba mwi tempele abali mu ng’anda ya kwa Yehova, umo abanakashi balepangila amatenti ya kupepelamo icimuti caimikwa.

8 E lyo yafumishe bashimapepo bonse mu misumba ya mu Yuda, pa kuti ilenge ififulo fya kupepelapo ukuba ifishalinga ukupepelapo, apo bashimapepo balefutumwina icushi ca malambo, ukufuma ku Geba+ ukufika na ku Beresheba;+ yabongolwele ne fifulo fya kupepelapo pa mpongolo ifyali pa mwinshi wa kwa Yoshua, umukalamba wa musumba, iyabelele ku kuso ngo muntu aleingila pa mpongolo ya musumba. 9 Lelo bashimapepo+ ba pa fifulo fya kupepelapo e bashaleya ku ciipailo ca kwa Yehova mu Yerusalemu, lelo balelya umukate uushatutumuka+ pamo na bamunyinabo. 10 Kabili alengele Tofete+ uwaba mu mupokapoka wa bana ba kwa Hinomu+ ukukanaba uwalinga ukupepelamo, pa kuti umuntu nangu umo elaoca umwana wakwe umwaume no mwana wakwe umwanakashi mu mulilo+ kuli Moleke.+ 11 Kabili bakabalwe abo ishamfumu sha bena Yuda shapeele ku kasuba alibaleseshe ukwingilila mu ng’anda ya kwa Yehova ku muputule wa kuliilamo+ uwa kwa Natani-meleke umubomfi wa mu lubansa lwa ku lukungu; kabili aocele mu mulilo amaceleta ayapeelwe ku kasuba.+ 12 Ne ciipailo icali pa mutenge wa muputule wa pa muulu+ uwa kwa Ahasi uo ishamfumu sha mu Yuda shapangile, ne fiipailo ifyo+ Manase apangile mu mansa shibili isha ng’anda ya kwa Yehova, imfumu yalifyonawile, na pa numa yafishonawiliile kulya no kukuba imito ya fiko mu mumana wa Kidrone. 13 Kabili imfumu yalengele ififulo fya kupepelapo ifyalungatene+ na Yerusalemu ukukanaba ifyalinga ukupepelapo, ifyali ku kulyo kwa Lupili lwa Boni, ulo Solomone+ imfumu ya Israele akuuliile Astarte+ uwali ica bunani ca bena Sidone, na Kemoshe+ uwali ica bunani ca bena Moabu, na Milkomu+ uwali ica bunani ca bana ba kwa Amone. 14 Yatobawile+ ne fimabwe baimike no konaula ifimuti ifyo baimike ifyo balepepa no kwisusha amafupa ya bantunse umo bafimike. 15 Kabili yaonawile iciipailo icali mu Betele+ ne fifulo fya kupepelapo ifyapangile Yeroboamu+ mwana Nebati, uwalengele Israele ukubembuka.+ E lyo yaocele icifulo ca kupepelapo; yalicishonawile no koca ifimuti fyaimikwa ifyo balepepa.

16 Nomba ilyo Yoshia apilibwike, amwene inshiishi mu mpili. E ico atumine bamo kabili bailebuula amafupa mu nshiishi no kuyocela+ pa ciipailo, pa kuti alenge cibe icishalinga ukupepelapo, ukulingana na mashiwi+ ya kwa Yehova ayo umuntu wa kwa Lesa wa cine abilishe,+ uwabilishe fi fintu. 17 E lyo asosele ati: “Bushe ilibwe lya pa nshiishi ilyo ndemona kulya lya nshi?” Na ba mu musumba batile kuli ena: “Ni nshiishi+ ya muntu wa kwa Lesa wa cine uwafumine ku Yuda+ no kubilisha ifi fintu mwacita ku ciipailo ca mu Betele.”+ 18 E ico atile: “Mulekeni atuushe.+ Mwileka umuntu nangu umo apumfyanye amafupa yakwe.” Na bo balilekele amafupa yakwe pamo na mafupa ya kwa kasesema+ uwafumine ku Samaria.

19 Na mayanda+ yonse aya pa fifulo fya kupepelapo ayali mu mishi+ ya mu Samaria ayo ishamfumu+ sha Israele shakuulile no kukalifya Lesa,+ Yoshia aliyafumishepo, kabili acitile kuli yena fyonse ifyo acitile ku Betele.+ 20 Kabili aipeye bashimapepo+ bonse aba pa fifulo fya kupepelapo abali pa fiipailo, kabili e po aoceelele na mafupa ya bantu.+ E lyo nomba abweleele ku Yerusalemu.

21 Kabili imfumu yaebele abantu bonse aiti: “Citeni ica kucilila+ kuli Yehova Lesa wenu ukulingana ne fyalembwa mwi buuku ili ilya cipangano.”+ 22 Pantu ica kucilila ica musango uyu tacatalile acicitwa mu nshiku shonse isha bapingushi abalepingula Israele,+ nangu mu nshiku shonse isha shamfumu sha mu Israele ne shamfumu sha mu Yuda.+ 23 Lelo mu mwaka walenga ikumi na cinekonsekonse (18) uwa kuteka kwa Mfumu Yoshia, e mo basefeeshe Yehova ica kucilila mu Yerusalemu.+

24 Kabili Yoshia alofeshe aba mipashi+ na balesobela ifintu,+ utulubi,+ no tulubi twa bunani+ ne fya bunani+ fyonse ifyamoneke mu calo ca kwa Yuda na mu Yerusalemu, pa kuti afikilishe ifyebo fyali mu mafunde+ ayalembelwe mwi buuku+ ilyo Hilkia shimapepo asangile mu ng’anda ya kwa Yehova.+ 25 Kabili takwatalile akuba imfumu nga ena iyamutangilile, iyabweleele+ kuli Yehova no mutima onse no mweo onse+ na maka yonse, ukulingana na mafunde yonse aya kwa Mose; kabili takwatala akuba uwaba nga ena.

26 Lelo ukukalipa uko Yehova akalipe nga nshi takwapwile, ubukali bwakwe bwaishile pali Yuda+ pa mulandu wa fyabipa fyonse ifyo Manase abalengele ukucita ukuti bamukalifye.+ 27 Kabili Yehova atile: “Nkafumya na Yuda+ ku cinso candi,+ ifyo nafumya na Israele ku cinso candi;+ kabili nkakaana uyu musumba uo nasala, Yerusalemu, ne ng’anda iyo natile, ‘Ishina lyandi likekala mulya.’”+

28 Ne milandu yashalako iya kwa Yoshia na fyonse ifyo acitile, bushe tafyalembwa mwi buuku+ lya milandu ya shamfumu sha mu Yuda?29 Mu nshiku shakwe Farao Neko+ imfumu ya ku Egupti aile ku mfumu ya Asiria mupepi no mumana wa Yufrate,+ ne Mfumu Yoshia yaile ku kumukumanya;+ lelo Neko aipeye+ Yoshia mu Megido+ ilyo fye amumwene. 30 E ico ababomfi bakwe bamusendele uwafwa mwi celeta ukufuma ku Megido no kumutwala ku Yerusalemu+ no kumushiika mu nshiishi yakwe. Awe abantu ba mu calo babuulile Yehoahasi+ umwana wa kwa Yoshia no kumusuba no kumubika pa bufumu ukupyana wishi.

31 Yehoahasi+ ali ne myaka amakumi yabili na itatu (23) ilyo atendeke ukuteka, kabili atekele imyeshi itatu mu Yerusalemu. Ne shina lya kwa nyina ni Hamutali+ mwana Yeremia uwa ku Libna. 32 Kabili acitile ifyabipa mu menso ya kwa Yehova, ukulingana na fyonse ifyacitile ifikolwe fyakwe.+ 33 Kabili Farao Neko+ amubikile mu cifungo+ mu Ribla+ mu calo ca Hamati, pa kuti amuleshe ukuteka mu Yerusalemu, kabili alipilishe icalo umusonko+ uwa matalanti ya silfere+ umwanda umo (100) ne talanti lya golde+ limo. 34 E lyo Farao Neko apyanike Eliakimu+ umwana uwa kwa Yoshia pali Yoshia wishi no kwalula ishina lyakwe ukuba Yehoyakimu; lelo Yehoahasi alimusendele no kumutwala ku Egupti, uko ailefwila.+ 35 Kabili Yehoyakimu apeele silfere+ na golde kuli Farao. Lelo alipilishe icalo umusonko,+ pa kuti apeele silfere ukulingana ne cipope ca kwa Farao. Ukulingana no musonko+ uo umuntu umo umo ali no kulipila, alepoka silfere na golde ku bantu ba mu calo, no kupeela Farao Neko.

36 Yehoyakimu+ ali ne myaka amakumi yabili na isano (25) ilyo atendeke ukuteka, kabili atekele mu Yerusalemu pa myaka ikumi na umo (11).+ Ne shina lya kwa nyina ni Sebida mwana Pedaya uwa ku Ruma. 37 Kabili alecita ifyabipa+ mu menso ya kwa Yehova, ukulingana na fyonse ifyacitile ifikolwe fyakwe.+

24 Mu nshiku sha kwa Yehoyakimu, Nebukadnesari+ imfumu ya ku Babiloni alishile, kabili Yehoyakimu ali umubomfi+ wakwe pa myaka itatu. Lelo alyalwike no kumupondokela. 2 Kabili Yehova atendeke ukumutumina ifipondo ukufuma ku calo ca bena Kaldi+ ne fipondo ukufuma ku calo ca bena Siria ne fipondo ukufuma ku calo ca bena Moabu+ ne fipondo ukufuma ku calo ca bena Amone, kabili alefituma ku kuyalwisha icalo ca Yuda no kuconaula, ukulingana na mashiwi+ Yehova asoseele mu babomfi bakwe bakasesema. 3 Ni ku cebo ca kwa Yehova e ko ici cacitikiile Yuda, ukuti amufumye+ ku cinso cakwe pa mulandu wa membu sha kwa Manase+ isho acitile; 4 na pa mulandu wa mulopa+ wa kaele uo asuumishe, ica kuti aiswishe umulopa wa kaele mu Yerusalemu, kabili Yehova tasumine ukumubelela uluse.+

5 Imilandu iyashalako iya kwa Yehoyakimu+ na fyonse ifyo acitile, bushe tafyalembwa mwi buuku+ lya milandu ya shamfumu sha mu Yuda? 6 Kabili Yehoyakimu aleele ukwalaala ifikolwe fyakwe,+ na Yehoyakini umwana wakwe alimupyene no kutendeka ukuteka.

7 Kabili imfumu ya Egupti tayabwekeshepo+ ukwisa ukufuma ku calo ca iko,+ pantu imfumu ya ku Babiloni yalipokele incende yonse iyali ya mfumu ya Egupti,+ ukutendekela ku mumana+ wa Egupti no kufika ku mumana wa Yufrate.+

8 Yehoyakini+ ali ne myaka ikumi na cinekonsekonse (18) ilyo atendeke ukuteka, kabili atekele imyeshi itatu mu Yerusalemu.+ Ne shina lya kwa nyina ni Nehushta mwana Elnatani uwa ku Yerusalemu. 9 Kabili alecita ifyabipa mu menso ya kwa Yehova, ukulingana na fyonse ifyo wishi acitile.+ 10 Awe mu nshita ilya ababomfi ba kwa Nebukadnesari imfumu ya ku Babiloni baile ku Yerusalemu, kabili bashingile umusumba.+ 11 Kabili Nebukadnesari imfumu ya ku Babiloni aile ku kulwisha umusumba, ninshi ababomfi bakwe nabaushinga.+

12 Na Yehoyakini imfumu ya Yuda asukile aya ku mfumu ya ku Babiloni,+ ena pamo na nyina+ na babomfi bakwe na bacilolo bakwe na bacilolo ba kwi sano; ne mfumu ya ku Babiloni yalimusendele mu mwaka walenga cinekonsekonse (8)+ uwa kuteka kwakwe. 13 E lyo nomba yasendele fyonse ifyali mu cipao ca ng’anda ya kwa Yehova ne fyali mu cipao ca ng’anda ya mfumu,+ kabili yaputawile ne fipe+ fyonse ifya golde ifyo Solomone imfumu ya kwa Israele apangile mwi tempele lya kwa Yehova, filya fine Yehova asosele. 14 Kabili yasendele muli bunkole+ bonse aba mu Yerusalemu na bacilolo+ bonse na baume bonse aba maka, abakosa,+ bonse pamo abali amakana ikumi (10,000), na baishibisha imilimo+ bonse na baishiba ukukuula impungu. Takwali nangu umo uwashele kano fye abalanda+ ba mu calo. 15 E fyo yasendele Yehoyakini+ muli bunkole ku Babiloni;+ na nyina+ wa mfumu na bakashi ba mfumu na bacilolo ba iko aba kwi sano+ na bakanabesa ba mu calo, yabafumishe mu Yerusalemu no kubatwala muli bunkole ku Babiloni. 16 E lyo bonse abaume aba maka, amakana cinelubali (7,000), na baishibisha imilimo na baishiba ukukuula impungu, ikana limo (1,000), aba bonse bali aba maka kabili balishibe ukulwa inkondo, imfumu yabaletele muli bunkole ku Babiloni.+ 17 Kabili imfumu ya ku Babiloni+ yapyanikepo Matania munyina wa kwa wishi+ ukuti atendeke ukuteka. Kabili ya-alwile ishina lyakwe ukuba Sidekia.+

18 Sidekia+ ali ne myaka amakumi yabili na umo (21) ilyo atendeke ukuteka, kabili atekele mu Yerusalemu pa myaka ikumi na umo (11). Ne shina lya kwa nyina ni Hamutali+ mwana Yeremia uwa ku Libna. 19 Kabili alecita ifyabipa mu menso ya kwa Yehova, ukulingana na fyonse ifyo Yehoyakimu acitile.+ 20 Pantu ni pa mulandu wa bukali+ bwa kwa Yehova ici cacitikile mu Yerusalemu na muli Yuda, mpaka abapoosele ukufuma ku cinso cakwe.+ Na Sidekia apondokele imfumu ya ku Babiloni.+

25 Nomba mu mwaka walenga pabula (9)+ uwa kuteka kwakwe, mu mweshi walenga ikumi (10),+ pa bushiku bwalenga ikumi mu mweshi, Nebukadnesari+ imfumu ya Babiloni aishile,+ pamo ne bumba lya bashilika bakwe bonse, ku kulwisha umusumba wa Yerusalemu, no ku-upangila inkambi no ku-ukuulila icibumba ukushinguluka konse.+ 2 Kabili umusumba walishingilwe ukufika na mu mwaka walenga ikumi na umo (11) uwa kuteka kwa Mfumu Sidekia. 3 Pa bushiku bwalenga pabula (9)+ mu mweshi walenga ine, icipowe+ calibipishe mu musumba, kabili abantu ba mu calo tabakwete ifya kulya.+ 4 No musumba walingililwe,+ na baume ba bulwi bonse balifulumwike ubushiku ukupita inshila ya ku mpongolo iyali pa kati ka fibumba fibili mupepi ne bala lya mfumu,+ ninshi abena Kaldi+ nabashinga umusumba onse; ne mfumu yaile+ ukulola ku Araba.+ 5 Ne bumba lya bashilika abena Kaldi+ lyakonkele imfumu ulubilo, no kuisanga+ mu ciswebebe ca ku Yeriko;+ ne bumba lya bashilika bakwe bonse lyalisalangene ukufuma kuli ena. 6 E lyo baikete imfumu+ no kuitwala ku mfumu ya Babiloni ku Ribla,+ ukuti baipingule. 7 Kabili baipeye abana ba kwa Sidekia pa menso yakwe,+ atonkwele na menso ya kwa Sidekia,+ e lyo amukakile iminyololo+ ya mukuba no kumutwala ku Babiloni.+

8 Kabili mu mweshi walenga busano pa bushiku bwa cinelubali (7) mu mweshi, e kutila mu mwaka walenga ikumi na pabula (19)+ uwa kuteka kwa mfumu Nebukadnesari imfumu ya Babiloni, e lyo Nebusaradani,+ umukalamba wa balinshi, umubomfi wa mfumu ya Babiloni, aishile ku Yerusalemu.+ 9 Kabili aocele ing’anda ya kwa Yehova+ ne ng’anda ya mfumu+ na mayanda yonse aya mu Yerusalemu;+ aocele na mayanda ya bakanabesa bonse.+ 10 Kabili ibumba lya bashilika bonse ilya bena Kaldi ilyali no mukalamba wa balinshi lyabongolwele amalinga ya Yerusalemu ukushinguluka konse.+ 11 Na bantu abashele+ mu musumba na bafulumwike abaitwele ku mfumu ya Babiloni na bambi abashele, Nebusaradani umukalamba wa balinshi alibasendele muli bunkole.+ 12 Na bamo abalanda+ ba mu calo, umukalamba wa balinshi alibalekele ukuti bashale balelima imyangashi no kulabomba umulimo wa kupatikishiwa.+ 13 Kabili inceshi+ sha mukuba ishali mu ng’anda ya kwa Yehova, ne fya kusendelapo+ ne cishiba+ ca mukuba, ifyali mu ng’anda ya kwa Yehova, abena Kaldi balifiputawile no kusenda umukuba fyapangiilweko ku Babiloni.+ 14 Kabili basendele ifya kukushilapo imito na bafosholo ne fya kushimishako umulilo na makapu ne fipe+ fyonse ifya mukuba ifyo balebomfya. 15 Kabili umukalamba wa balinshi asendele ifya kwikatilako umulilo ne mbale shafonka ifyali ifya golde+ iisuma ne fyali ifya silfere iisuma.+ 16 Ne nceshi shibili, icishiba cimo ne fya kusendelapo ifyo Solomone apangiile ing’anda ya kwa Yehova, takwali inshila ya kwishibilamo ukufina kwa mukuba uwali kuli ifi fipe fyonse.+ 17 Uluceshi lumo lumo lwalepele imikono ikumi na cinekonsekonse (18),+ ne citebo+ icali pa muulu wa luceshi cali ica mukuba; kabili icitebo calepele imikono itatu; ne capikulwa na mapomegranate+ ayashingulwike konse ku citebo, conse fye cali ica mukuba; no luceshi lumbi lwakwete fimo fine nge fi pa capikulwa.

18 Kabili umukalamba wa balinshi asendele Seraya+ shimapepo mukalamba na Sefania+ inkonkani ya kwa shimapepo mukalamba na balinshi batatu aba pa mwinshi;+ 19 na mu musumba asendelemo cilolo wa kwi sano umo uwaleangalila abaume ba bulwi, na baume basano ukufuma pa balefika ku mfumu abasangilwe mu musumba; na kalemba wa mukalamba wa bashilika, uwalelonganika abantu ba mu calo, na baume amakumi mutanda (60) aba mu bantu ba mu calo abasangilwe mu musumba;+ 20 kabili Nebusaradani+ umukalamba wa balinshi alibasendele+ no kubatwala ku mfumu ya Babiloni ku Ribla.+ 21 Awe imfumu ya Babiloni yalibakomene+ no kubepaya mu Ribla mu calo ca Hamati.+ E fyo Yuda aile muli bunkole ukufuma mu calo cakwe.+

22 Kumfwa abantu+ abashele mu calo ca ba Yuda, abo Nebukadnesari imfumu ya Babiloni ashile, asalile Gedalia+ mwana Ahikamu+ mwana Shafani ukulabateka.+ 23 Nomba ilyo abakalamba bonse aba bashilika,+ pamo na bashilika babo, baumfwile ukuti imfumu ya Babiloni naisala Gedalia, apo pene baishile kuli Gedalia ku Mispa,+ kabili bali ni Ishmaele mwana Netania na Yohanani mwana Karea na Seraya mwana Tanhumete umwina Netofa na Yaasania mwana Maakati, pamo na bashilika babo. 24 E lyo Gedalia alapile+ kuli bena na bantu babo no kubeba ati: “Mwitiina ukuba ababomfi ba bena Kaldi. Ikaleni mu calo no kubombela imfumu ya Babiloni, kabili mukekala umutende.”+

25 Nomba mu mweshi walenga cinelubali (7),+ Ishmaele+ mwana Netania mwana Elishama uwali mwana wa ku bufumu aile na baume ikumi (10) abali nankwe, kabili bakomene Gedalia,+ na o alifwile, kabili baipeye na baYuda na bena Kaldi abali nankwe ku Mispa.+ 26 E lyo abantu bonse, ukutendekela pa munono ukufika ku mukalamba, na bakalamba ba bashilika balimine no kuya ku Egupti;+ pantu baletiina abena Kaldi.+

27 Kabili mu mwaka walenga amakumi yatatu na cinelubali (37) ukutula apo basendeele Yehoyakini+ imfumu ya kwa Yuda muli bunkole, mu mweshi walenga ikumi na ibili (12), pa bushiku bwalenga amakumi yabili na cinelubali (27) ubwa mweshi uyu, mu mwaka uo Ebili-merodaki+ imfumu ya Babiloni yatendeke ukuteka, e lyo yafumishe+ Yehoyakini imfumu ya Yuda mu cifungo;28 kabili atendeke ukulanda nankwe amashiwi ayasuma, kabili asansabike icipuna cakwe ica bufumu ukucila ifipuna fya bufumu ifya shamfumu ishali nankwe mu Babiloni.+ 29 Awe afuulile ifya kufwala fyakwe ifya mu cifungo;+ kabili alelya nankwe ifya kulya+ lyonse inshiku shonse isha bumi bwakwe. 30 Kumfwa icipimo+ cakwe ica fya kulya, imfumu yalemupeela lyonse ifyo alekabila cila bushiku, inshiku shonse isha bumi bwakwe.