Imbila Nsuma umo Mateo Ailembeele

17 E ico inkulo shonse ukufuma pali Abrahamu ukufika pali Davidi shali ikumi na shine (14), kabili ukufuma pali Davidi ukufika pa nshita balesendwa muli bunkole ku Babiloni shali ikumi na shine, kabili ukufuma pa nshita balesendwa muli bunkole ku Babiloni ukufika pali Kristu shali ikumi na shine.

18 Nomba ukufyalwa kwa kwa Yesu Kristu kwali ifi. Pa nshita ilyo nyina Maria akobekelwe+ kuli Yosefe, asangilwe ne fumo ilyafumine ku mupashi+ wa mushilo ilyo bashilaupana. 19 Nomba Yosefe umulume wakwe, apo ali umulungami kabili talefwaya ukumuseebanya ku bantu,+ apangile ukumuleka+ mu bumfisolo. 20 Lelo pa numa ya kutontonkanya pali ifi fyonse, moneni! malaika wa kwa Yehova amoneke kuli ena mu cilooto, no kusosa ati: “Yosefe, mwana Davidi, witiina ukusenda umukashi obe Maria ku mobe, pantu ifumo emiite lifumine ku mupashi wa mushilo.+ 21 Akafyala umwana umwaume, kabili ukamwinike ati Yesu,+ pantu akapususha+ abantu+ bakwe ku membu shabo.”+ 22 Na kuba fyonse ifi fyacitike pa kuti cifikilishiwe ico Yehova+ asoseele muli kasesema+ wakwe ati: 23 “Moneni! nacisungu+ akemita no kufyala umwana umwaume, kabili bakamwinika ati Imanuele,”+ ishina ilyalola mu kuti “Lesa Aba na Ifwe.”+

24 Ilyo Yosefe ashibwike mu tulo acitile ifyo malaika wa kwa Yehova amwebele, na o asendele umukashi ku mwakwe. 25 Lelo taleele+ nankwe ukufikila afyala umwana umwaume,+ kabili amwinike ati Yesu.+

2 Pa numa ya kufyalwa kwa kwa Yesu mu Betelehemu+ wa mu Yudea mu nshiku sha mfumu Herode,*+ moneni! ababukila ku ntanda+ bafumine ku kabanga no kuya ku Yerusalemu, 2 no kusosa abati: “Ili kwi imfumu+ ya baYuda iyafyalwa? Pantu twamwene ulutanda+ lwakwe ilyo twali ku kabanga, kabili twishile ku kumufukamina.” 3 Ilyo Imfumu Herode yaumfwile ifi, yalisakamikwe, pamo na bonse mu Yerusalemu; 4 kabili ilyo yalonganike intungulushi sha bashimapepo shonse na bakalemba ba bantu, yatendeke ukubepusha ukwali no kufyalilwa Kristu. 5 Bayebele abati: “Mu Betelehemu+ wa mu Yudea; pantu ifi e fyo calembwa ukupitila muli kasesema ati: 6 ‘Na iwe, we Betelehemu+ uwa mu calo ca Yuda, tauli musumba uushacindama pa balashi ba calo ca Yuda; pantu muli iwe e mukafuma kateka,+ uukacema+ abantu bandi, abena Israele.’”

7 E lyo Herode mu bumfisolo aitile ababukila ku ntanda no kubepukisha inshita ulutanda lwamoneke; 8 kabili, pa kubatuma ku Betelehemu, atile: “Kabiyeni kafwayeni bwino bwino uyo umwana, kabili nga mwamusanga, mukesenjeba, pa kuti na ine nkayemufukamina.”+ 9 Ilyo baumfwile ifyalandile imfumu, balimine balaya; kabili, moneni! ulutanda ulo bamwene ilyo bali ku kabanga+ lwalibatangilile, mpaka lwaisaiminina mu muulu apali umwana. 10 Ilyo bamwene ulutanda, balisekelele nga nshi. 11 Kabili ilyo baingile mu ng’anda, bamwene umwana na Maria nyina, kabili, ilyo bawile pa nshi, balimutootele. Awe baiswile umwali ifyuma fyabo no kumupeela ifya bupe ifi: golde ne fyanunkila na muri.*12 Lelo, pa mulandu wa kuti balisokelwe+ kuli Lesa mu cilooto ukuti bebwelela kuli Herode, bapitile inshila imbi pa kubwelela ku calo ca ku mwabo.

13 Ilyo bafumineko, moneni! malaika+ wa kwa Yehova amoneke mu cilooto kuli Yosefe, no kusosa ati: “Ima, senda umwana na nyina no kufulumukila ku Egupti, kabili ukekale kulya mpaka nkakwebe ukufumako; pantu Herode alatendeka ukufwaya umwana pa kuti amwipaye.” 14 Awe alimine no kusenda umwana na nyina ubushiku no kuya ku Egupti, 15 kabili aikele kulya mpaka ne mfwa ya kwa Herode, pa kuti cifikilishiwe+ ico Yehova alandiile muli kasesema wakwe ati: “Naitile umwana wandi ukufuma ku Egupti.”+

16 Awe Herode, pa kumona ukuti ababukila ku ntanda bamupita pa mano, alifulilwe nga nshi, kabili atumine aba kuyaipaya abana baume bonse mu Betelehemu na mu fitungu fya uko fyonse, aba myaka ibili no kucepako, ukulingana ne nshiku afwailishe bwino bwino ku babukila ku ntanda.+ 17 Awe califikilishiwe icalandilwe ukupitila muli kasesema Yeremia ati:18 “Ishiwi nalyumfwika mu Rama,+ ukulila no kuloosha nga nshi; ni Rakele+ e ulelila abana bakwe, kabili talefwaya no kumusansamusha, pantu nabafwa.”

19 Ilyo Herode afwile, moneni! malaika wa kwa Yehova amoneke mu cilooto+ kuli Yosefe mu Egupti 20 no kutila: “Ima, senda umwana na nyina no kuya ku calo ca Israele, pantu abalefwaya ukwipaya umwana balifwa.” 21 Awe alimine no kusenda umwana na nyina no kwingila mu calo ca Israele. 22 Lelo ilyo aumfwile ukuti Arkelao e wapyene Herode wishi pa bufumu mu Yudea, alitiinine ukuyako. Kabili ilyo asokelwe kuli Lesa mu cilooto,+ aile ku citungu ca Galili,+ 23 no kuyaikala mu musumba wa Nasarete,+ pa kuti cifikilishiwe icalandiilwe muli bakasesema ati: “Aketwa umwina Nasarete.”+

3 Mu nshiku shilya Yohane Kabatisha+ aishile alebila mu matololo+ ya mu Yudea, 2 ati: “Lapileni,+ pantu ubufumu bwa mu muulu nabupalama.”+ 3 Na kuba, uyu e o balandapo kuli kasesema Esaya+ mu mashiwi ayatila: “Umfweni! Umuntu alebilikisha mu matololo aleti, ‘Pekanyeni+ inshila ya kwa Yehova! Lungamikeni inshila shakwe.’” 4 Kabili uyu wine Yohane alefwala ica kufwala ca masako+ ya ngamila no mushipi+ wa mpapa mu musana; ne fya kulya alelya ni makanta+ no buci+ bwa mu mpanga. 5 E lyo aba mu Yerusalemu na bonse aba mu Yudea na ba mu mpanga yonse iyashingulwike Yordani baile kuli ena, 6 na o alebatisha abantu mu Mumana wa Yordani+ kabili baleyebelela imembu shabo apabuuta.

7 Ilyo fye amwene abaFarise abengi na baSaduke+ baleisa uko alebatishisha, abebele ati: “Mwe bana ba nsoka mwe,+ nani amusokele ukufulumuka ubukali ubuleisa?+ 8 E ico citeni ifintu ifilelanga ukuti namulapila;*+ 9 kabili mwilatila, ‘Twalikwata shifwe Abrahamu.’+ Pantu ndemweba, nati, Lesa ali na maka ya kwalula aya amabwe ukuba abana ba kwa Abrahamu.+ 10 Kale kale isembe+ lili kwi shinte lya muti; e ico umuti onse uushitwala ifisabo ifisuma bakautema+ no ku-upoosa mu mulilo.+ 11 Ine ndemubatisha mu menshi+ pa mulandu wa kulapila kwenu;+ lelo uuleisa+ pa numa alincila amaka, kabili nshalinga ukumufuula indyato.+ Ulya ena akamubatishisha ku mupashi+ wa mushilo na ku mulilo.+ 12 Ica kwelelako cakwe cili mu minwe yakwe kabili akawamya bwino bwino apa kupumina ingano, no kulonganya ingano no kushibika mu butala,+ lelo imisungu akayoca+ mu mulilo uushingashima.”

13 E lyo Yesu afumine ku Galili+ no kwisa ku Yordani kuli Yohane, pa kuti amubatishe.+ 14 Lelo Yohane aeseshe ukumulesha ati: “Ni we ufwile ukumbatisha, kabili ni we wise kuli ine?” 15 Yesu ayaswike ati: “Leka cibe ifi fine pali ino nshita, pantu nacilinga ifwe ukucita fyonse ifyalungama.”+ E lyo Yohane asumine. 16 Ilyo Yesu abatishiwe, apo pene afumine mu menshi; kabili, moneni! umuulu waliswike,+ kabili amwene umupashi wa kwa Lesa uleika kwati ni nkunda,+ uleisa pali ena.+ 17 Moneni! kabili, kwali ne shiwi+ ukufuma mu muulu aliti: “Uyu e Mwana wandi,+ uwatemwikwa,+ uo nsekelamo.”+

4 E lyo umupashi watungulwile Yesu ku matololo+ pa kuti ayetunkwa+ kuli Satana Kaseebanya. 2 Pa numa ya kuleka ukulya pa nshiku amakumi yane (40) akasuba no bushiku,+ alyumfwile nsala. 3 Kabili Katunka+ alishile no kutila kuli ena: “Nga uli mwana wa kwa Lesa,+ eba aya mabwe yabe imikate.” 4 Lelo ayaswike ati: “Amalembo ya mushilo yatila, ‘Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.’”+

5 E lyo Satana Kaseebanya amutwele mu musumba wa mushilo,+ kabili amwimike pa muulu wa cibumba ce tempele 6 no kumweba ati: “Nga uli mwana wa kwa Lesa, tolokela pa nshi;+ pantu calilembwa ukuti, ‘Akeba bamalaika bakwe ifya kucita pali iwe, kabili bakakusendela pa maboko yabo, pa kuti wikaipununa ulukasa ku libwe.’”+ 7 Yesu atile kuli ena: “Na kabili calilembwa ukuti, ‘Wilaesha Yehova Lesa obe.’”+

8 Kabili Satana Kaseebanya amutwele pa lupili ulutali sana, no kumulanga amabufumu yonse aya pano calo+ no bucindami bwa yako, 9 kabili amwebele ati: “Fyonse ifi ndekupeela+ nga wafukama no kumpepa.”+ 10 E lyo Yesu atile kuli ena: “Fuma apa, we Satana! Pantu calilembwa ukuti, ‘Yehova Lesa obe e o ulepepa,+ kabili eka+ fye e o ulebombela.’”+ 11 Awe Satana Kaseebanya alimushile,+ kabili, moneni! bamalaika balishile no kutendeka ukumwafwa.+

12 Nomba ilyo aumfwile ukuti nabekata Yohane,+ aile ku Galili.+ 13 Kabili ilyo afumine ku Nasarete, aileikala ku Kapernahumu+ mu lulamba lwa bemba mu fitungu fya kwa Sebuluni ne fya kwa Naftali,+ 14 pa kuti cifikilishiwe icalandiilwe muli kasesema Esaya ati:15 “We calo ca bena fyalo ica Galili,+ umwaba icalo ca kwa Sebuluni ne ca kwa Naftali, ifyalo ifyaba mu nshila ya kuli bemba, bushilya bwa Yordani!16 umo abantu abaikele mu mfifi+ bamwene ulubuuto ulukalamba,+ kabili abaikele mu cinshingwa icileta mfwa, ulubuuto+ lwalibabalikile.”+ 17 Ukufuma lilya, Yesu atendeke ukushimikila no kutila: “Lapileni,+ pantu ubufumu+ bwa mu muulu nabupalama.”

18 Ilyo ale-enda mu lulamba lwa bemba wa Galili, amwene aba bwananyina babili, Simone+ uwitwa Petro+ na Andrea munyina, balepoosa amasumbu muli bemba, pantu bali balondo. 19 Kabili abebele ati: “Nkonkeni, na ine nkamulenga ukuba abalondo ba bantu.”+ 20 Apo pene bashile amasumbu,+ no kumukonka. 21 Ilyo aendeleko panono, amwene aba bwananyina na bambi babili,+ Yakobo mwana Sebede+ na Yohane munyina, bali mu bwato pamo na shibo, balelunda amasumbu yabo, kabili alibetile. 22 Apo pene bashile ubwato na shibo, no kumukonka.

23 Kabili ashingulwike+ mu Galili+ monse, alesambilisha mu masunagoge*+ yabo no kubila imbila nsuma ya bufumu no kuposha imisango yonse iya malwele+ ne misango yonse iya ntenda mu bantu. 24 Kabili ululumbi lwakwe lwaile mu Siria+ monse; kabili bamuleteele bonse abalelwala,+ abalecula ku malwele yalekanalekana ne ntenda, abali ne fibanda na balelwala cipumputu+ na ba bulebe, kabili alibondepe. 25 E ico amabumba yakalamba yalimukonkele ukufuma ku Galili+ na Dekapoli na Yerusalemu+ na Yudea no kufuma kwi shilya lya Yordani.

5 Ilyo amwene amabumba, aninine ulupili; kabili ilyo aikele, abasambi bakwe baishile kuli ena; 2 kabili atendeke ukubasambilisha ati:

3 “Balipaalwa abaishiba ukuti balakabila ifya kwa Lesa,+ pantu ubufumu bwa mu muulu bwabo.+

4 “Balipaalwa abaloosha, pantu bakabasansamusha.+

5 “Balipaalwa abafuuka,+ pantu bakapyana isonde.+

6 “Balipaalwa abomfwa insala ne cilaka+ ca bulungami, pantu bakekuta.+

7 “Balipaalwa aba luse,+ pantu bakababelela uluse.

8 “Balipaalwa abatambalala imitima,+ pantu bakamona Lesa.+

9 “Balipaalwa aba mutende,+ pantu baketwa ‘abana+ ba kwa Lesa.’

10 “Balipaalwa abo bacusha+ pa mulandu wa bulungami, pantu ubufumu bwa mu muulu bwabo.

11 “Abantu nga bamupontela+ no kumucusha+ no kumubepesha ubufi bwalekanalekana pa mulandu wandi, ninshi mwalipaalwa. 12 Sekeleleni no kwanga,+ pantu icilambu+ cenu cikalamba mu muulu; pantu e fyo bacushishe na bakasesema+ abamutangilile.

13 “Muli mucele+ wa pano isonde; lelo umucele nga wafumuka, bushe ukalowa shani na kabili? Tapali uko bengaubomfya kano fye uku-upoosa ku nse+ na bantu balaunyantapo.

14 “Muli lubuuto lwa ba muli ici calo.+ Umusumba teti ukaane ukumoneka nga wabela pa muulu wa lupili. 15 Abantu tabasanika inyali no kuikupikapo umuseke,+ lelo baiteka pa ca kutekapo inyali, na yo isanikila bonse abali mu ng’anda. 16 Kanshi na imwe lekeni ulubuuto+ lwenu lubalikile ku bantu, pa kuti bamone imilimo+ yenu iisuma no kucindika+ Shinwe uwaba mu muulu.

17 “Mwilatila naishile ku konaula ifyalembwa mu mabuuku ya Mafunde+ nelyo mu ya Bakasesema. Nshaishile ku konaula iyo, lelo ku kufifikilisha;+ 18 pantu ndemweba icine cine nati, nangu umuulu ne calo fingapita,+ tapakonaike akalilembo nelyo akalitoni ke lembo mu Mafunde, kano fye fikasuke fyonse aficitika.+ 19 E ico, onse uwapula+ muli limo pali aya mafunde ayacepesha no kusambilisha abantu ifyo fine, aketwa ‘uwacepesha’ mu bufumu bwa mu muulu.+ Lelo onse uwayakonka no kuyasambilisha,+ aketwa ‘umukalamba’+ mu bufumu bwa mu muulu. 20 Pantu ndemweba nati, ubulungami bwenu nga tabucilile ubwa bakalemba na baFarise,+ tamwakengile+ mu bufumu bwa mu muulu nakalya.

21 “Mwalyumfwa ifyo aba kale babebele ukuti, ‘Wilaipaya;+ na onse uwaipaya+ akalubulula ku cilye ca milandu.’+ 22 Lelo ndemweba nati, onse uutwalilila ukufulilwa+ munyina, akalubulula+ ku cilye ca milandu; na onse uwaeba munyina amashiwi ayabi aya musaalula, akalubulula ku Cilye Cikalamba; kabili onse uwasosa, ati, ‘We cipumbu ca muntu we!’ akaba no mulandu wa kuya ku Gehena* wa mulilo.+

23 “E ico, nga uletwala ica bupe ku ciipailo,+ kabili palya pene waibukisha ukuti munonko ali na cimo kuli iwe,+ 24 ushe ica bupe cobe pa ntanshi ya ciipailo, no kubwelelamo; utale uyeumfwana na munonko,+ kabili nga wabwela, e lyo utuule ica bupe cobe.+

25 “Uleyangufyanya ukumfwana no ulekutwala ku cilye, ilyo muleya nankwe ku kulubulula, pa kuti uo ulufyenye+ e kutwala kuli kapingula, kapingula na o ekupeela kuli kapaso, pa kuti wipooswa mu cifungo. 26 Ndekweba icine cine nati, tawakafumemo nakalya mpaka ukalipile na ka ndalama akanono akapelekeshako.+

27 “Mwalyumfwa ukuti batile, ‘Wilacita ubucende.’+ 28 Lelo ine ndemweba nati onse uwatwalilila ukulolekesha umwanakashi+ no kumukumbwa, ninshi nacita kale ubucende+ nankwe mu mutima wakwe.+ 29 E ico kanshi ilinso lyobe ilya ku kulyo nga lilekulenga ukulufyanya,* lilobole no kulipoosa.+ Pantu cawamapo ukulufya icilundwa cobe cimo ukucila bapoosa+ umubili obe onse mu Gehena. 30 Na kabili, ukuboko kobe ukwa ku kulyo nga kulekulenga ukulufyanya,* kuputuleko no kukupoosa.+ Pantu cawamapo ukulufya icilundwa cimo ica mubili ukucila bapoosa umubili obe onse mu Gehena.

31 “Kabili batile, ‘Onse uwaleka+ umukashi, amupeele kalata wa kumulekelapo.’+ 32 Lelo ndemweba nati, onse uwaleka umukashi wakwe, ilyo tapali umulandu wa bulalelale,+ kuti amulenga ukucita ubucende,+ na onse uwaupa umwanakashi uwalekwa ninshi acita ubucende.+

33 “Mwalyumfwa na kabili ukuti aba kale babebele ati, ‘Wilalapa+ ukwabula ukufikilisha, lelo ufwile ukufikilisha imilapo yobe kuli Yehova.’+ 34 Lelo ine ndemweba nati: Mwilalapa+ nakalya, nangu kulapa umuulu, pantu e cipuna ca bufumu ica kwa Lesa;+ 35 nangu kulapa isonde, pantu e cipuna+ ca makasa yakwe; nangu Yerusalemu, pantu e musumba+ wa Mfumu nkalamba. 36 Nangu kulapa umutwe obe, pantu te kuti walule umushishi obe umo ukuba uwabuuta nelyo uwafiita. 37 Lekeni Ee wenu abe Ee, na Iyo wenu abe Iyo;+ pantu icacila pali ifi cafuma ku mubifi.+

38 “Mwalyumfwa ukuti batile, ‘Ilinso pa linso ne lino pa lino.’+ 39 Lelo ine ndemweba nati: Mwilakaanya umubifi; lelo onse uwakutoba ulupi pe saya lya ku kulyo,+ umupilibwile ne libiye. 40 Kabili umuntu nga alefwaya ukukutwala ku cilye no kupoka ica kufwala cobe ica mu kati, leka asende ne ca kufwala cobe ica ku nse;+ 41 kabili umulashi nga akweba ukumushindika apalepele kilomita imo, mushindike amakilomita yabili.+ 42 Uwakulomba icintu umupeele, kabili wikaanina uulefwaya ukumukongwesha ukwabula isha kulundapo.+

43 “Mwalyumfwa ukuti batile, ‘Uletemwa umunobe+ no kupata umulwani obe.’+ 44 Lelo, ndemweba nati: Muletemwa abalwani+ benu kabili mulepepelako abamucusha;+ 45 pa kuti mulange ukuti muli bana ba kwa Shinwe uwaba mu muulu,+ pantu alenga akasuba ukubalikila ababifi na basuma kabili alenga imfula ukulokela pa balungama na pa bashalungama.+ 46 Pantu nga mwatemwa fye abamutemwa, cilambu nshi mwingakwata?+ Bushe bakasonkesha ba misonko na bo tabacita cimo cine? 47 Kabili nga muposha bamunyinenwe beka fye, cinshi icaibela ico mwacita? Bushe abena fyalo na bo tabacita cimo cine? 48 E ico na imwe mufwile ukuba abapwililika, ifyo na Shinwe wa mu muulu aba uwapwililika.+

6 “Cenjeleni, mwilacita ifyalungama+ pa menso ya bantu pa kuti fye bamumone; nga mulecita ifyo ninshi Shinwe uwaba mu muulu takamupeele icilambu. 2 E ico ilyo ulepeela ifya bupe,+ wilalisha ipenga,+ nge ficita aba bumbimunda mu masunagoge* na mu misebo, pa kuti fye abantu babacindike. Ndemweba icine cine nati, Nabapokelela kale icilambu cabo conse. 3 Lelo iwe, ilyo ulepeela ifya bupe, wileka ukuboko kobe ukwa ku kuso kwishibe ifyo ukwa kulyo kulecita, 4 pa kuti ifya bupe ifyo wapeela fibe ifya mu bumfisolo; e lyo Wiso uumona umwafisama akakulambula.+

5 “Kabili, ilyo mulepepa, tamufwile ukupashanya aba bumbimunda; pantu bena batemwa ukupepa ubwiminine+ mu masunagoge na pa makoona ya misebo iikalamba pa kuti abantu babamone.+ Ndemweba icine cine nati, Nabapokelela kale icilambu cabo conse. 6 Lelo iwe, ilyo ulepepa, ingila mu muputule obe,+ kabili ilyo waisalako iciibi, pepa kuli Wiso uushimoneka,+ e lyo wiso uumona umwafisama akakulambula. 7 Kabili ilyo ulepepa, wilabwekeshapo ukusosa fimo fine,+ nge ficita abantu ba muli cino calo, pantu bamona kwati kuti babomfwa nga basosa amashiwi ayengi. 8 E ico, mwiba nga bena iyo, pantu Lesa Shinwe alishiba ifyo mukabila+ na lintu fye tamulamulomba.

9 “E ico imwe mufwile ukupepa ifi, amuti:+

“‘Shifwe wa mu muulu, ishina+ lyenu libe ilya mushilo.+ 10 Ubufumu+ bwenu bwise. Ukufwaya+ kwenu kucitwe pano isonde+ nga mu muulu. 11 Tupeeleni lelo ifya kulya ifya buno bushiku;+ 12 kabili tubeleleni uluse pa membu shesu, ifyo na ifwe tubelela uluse abatulufyanya.*+ 13 Kabili mwitutwala mu kutunkwa,+ lelo tupokololeni ku mubifi.’+

14 “Pantu nga mwabelela uluse abamulufyanya, Shinwe wa muulu na o akamubelela uluse;+ 15 nomba nga tamubelela uluse abamulufyanya, na Shinwe wa mu muulu takamubelele uluse ku fyo mulufyanya.+

16 “Ilyo mwaleka ukulya,+ mwiba ne finso fya bulanda nga aba bumbimunda pantu balabifya pa menso pa kuti bamoneke ku bantu ukuti nabaleka ukulya.+ Ndemweba icine cine nati, Nabapokelela kale icilambu cabo conse. 17 Lelo iwe ilyo waleka ukulya, suba amafuta ku mutwe no kusamba ku menso,+ 18 pa kuti abantu bekumona ukuti nauleka ukulya, kano fye Wiso uwaba umwafisama;+ e lyo Wiso uumona umwafisama akakulambula.

19 “Mwilalonganikila ifyuma+ pano isonde, apo icipelebesha ca bushiku ne ndalawa fyonaula, kabili apo abapuupu bengengila no kwiba. 20 Lelo mulelonganikila ifyuma ku muulu,+ uko icipelebesha ca bushiku nangu ni ndalawa tafyonaula,+ kabili uko abapuupu tabengila nangu ukwiba. 21 Pantu ukuli icuma cobe, e kuba no mutima obe.

22 “Ulubuuto lwa mubili menso.+ E ico amenso yobe nga yalolesha fye pa cintu cimo, umubili obe onse ukaba umwabuuta;23 lelo nga amenso yobe yalolesha pa fibi,+ umubili obe onse ukaba umwafiita. Nga cine cine ulubuuto ulwaba muli iwe ni mfifi, ninshi iyo mfifi yaba iikalamba icine cine!+

24 “Takuli uwingabombela bashikulu babili; pantu kuti apatapo umo no kutemwa umbi,+ nalimo kuti aba uwa cishinka kuli umo no kusuula umbi. Te kuti mubombele Lesa ne Fyuma.+

25 “E ico ndemweba nati: Mwilasakamikilwa+ imyeo yenu ifyo mukalya nelyo ifyo mukanwa, nelyo ukusakamikwa pa mibili yenu ifyo mukafwala.+ Bushe ubumi tabwacindama ukucila ifya kulya, no mubili bushe tawacindama ukucila ifya kufwala?+ 26 Lolekesheni ifyuni+ fya mu muulu, pantu tafibyala imbuto nelyo ukulobolola nelyo ukusunga ifya kulya mu matala; na lyo line Shinwe wa mu muulu alafiliisha. Bushe tamwaficila ukucindama?+ 27 Nani pali imwe nga ca kuti alesakamikwa engalundako ubumi bwakwe panono?+ 28 Na kabili, mulandu nshi mulesakamikilwa pa fya kufwala? Sambilileniko ku maluba+ ya mu mpanga fintu yakula; tayacucutika, nelyo ukupikula insalu sha kufwala; 29 nomba ndemweba nati nangu fye ni Solomone+ mu bukata bwakwe bonse tafwelepo nga limo ilya aya maluba. 30 Nomba ifi nga e fyo Lesa afwika ifimenwa fya mu mpanga, ifingabapo lelo kabili mailo fyapooswa mu mulilo, bushe takacilepo ukumufwika, mwe ba citetekelo icinono?+ 31 E ico mwisakamikwa+ amuti, ‘Tulelya nshi?’ nelyo, ‘Tulenwa nshi?’ nelyo, ‘Tulefwala nshi?’32 Pantu fyonse ifi e fyo abena fyalo bafwaisha. Pantu Shinwe wa mu muulu alishiba ukuti mulakabila ifi fyonse.+

33 “E ico, intanshi mulefwaya ubufumu no bulungami bwakwe,+ na fyonse ifi ifyo mukabila akamupeela.+ 34 E ico, mwilasakamikwa pa bushiku bwa mailo,+ pantu ubwa mailo bukaba na masakamika ya buko. Amafya ya mu bushiku bumo yalilinga kuli ubo bwine bushiku.

7 “Mwilapingula+ bambi pa kuti na imwe bemupingula; 2 pantu ifyo mupingula bambi e fyo na imwe bakamupingula;+ kabili ku cipimo ico mupiminako bambi, e ko na imwe bakamupimina.+ 3 Nga kanshi cinshi ulolesesha akacani akali mu linso lya munobe, lelo taulemona umulando uuli mu linso lyobe?+ 4 Kabili kuti waeba shani umunobe ati, ‘Leka nkufumye akacani mu linso lyobe’; lintu iwe uli no mulando mu linso lyobe?+ 5 We wa bumbimunda we! Utale ufumye umulando mu linso lyobe, e lyo walamona bwino ifya kufumya akacani mu linso lya munobe.

6 “Mwipeela ica mushilo ku mbwa,+ nangu ukupoosela bakapoli bamargariti, epali bafinyantaula+ no kumwalukila no kumulepaula.

7 “Mulelomba,+ kabili mukapeelwa; mulefwaya, kabili mukasanga; mulekonkonsha,+ kabili bakamwiswila. 8 Pantu onse uulomba balamupeela,+ na onse uufwaya alasanga, na onse uukonkonsha balamwiswila. 9 Na kuba, muntu nshi pali imwe uo umwana+ wakwe nga alomba umukate, engamupeela ilibwe? 10 Nangu nga alomba isabi, bushe kuti amupeela insoka?11 E ico, imwe nangu ca kutila muli babembu,+ mwalishiba ukupeela abana benu ifya bupe ifisuma, kanshi Shinwe wa mu muulu ena akacilapo nga nshi ukupeela ifisuma+ ku bamulomba!

12 “E ico, fyonse ifyo mufwaya abantu ukuti balemucitila,+ e fyo na imwe mulebacitila; na kuba, umu e mwalola amashiwi yaba mu mabuuku ya Mafunde na ya Bakasesema.+

13 “Ingilileni pa mpongolo iyacepa;+ pantu umusebo uwaya ku bonaushi walipabuka kabili ukalamba, kabili bengi abapitamo;14 lelo impongolo iyacepa, no musebo uwaya ku bumi walicepa nga nshi kabili banono abausanga.+

15 “Cenjeleni kuli bakasesema+ ba bufi abesa kuli imwe nabafwala ifya kufwala fya mpaanga,+ lelo mu kati mimbulu+ iikatila fye ubonaushi. 16 Mukabeshibila+ ku fisabo fyabo. Bushe abantu kuti basaba imyangashi ku myunga nelyo amakunyu kuli bacilasa?+ 17 E ico umuti onse uusuma utwala ifisabo ifisuma, lelo umuti onse uubi utwala ifisabo ifibi;+ 18 umuti uusuma te kuti utwale ifisabo ifibi, nangu umuti uubi ukutwala ifisabo ifisuma. 19 Umuti onse uushitwala ifisabo ifisuma, balautema no ku-upoosa mu mulilo.+ 20 Kanshi, abo bantu mukabeshibila ku fisabo fyabo.+

21 “Te onse uutila kuli ine, “Shikulu, Shikulu akengila mu bufumu bwa mu muulu, kano uucita+ ififwaya Tata uwaba mu muulu e ukengilamo.+ 22 Abengi muli bulya bushiku bakatila kuli ine, ‘Mwe Shikulu, mwe Shikulu,+ bushe tatwasesemene mwi shina lyenu, no kufumisha ifibanda mwi shina lyenu, no kucitila ifipesha amano ifingi mwi shina lyenu?’+ 23 Lelo nkabebelapo nkatila: Nshatalile imwishiba!+ Fumeni apa, mwe bampulamafunde mwe.+

24 “E ico onse uumfwa amashiwi yandi aya no kuyakonka, akaba ngo muntu uwacenjela, uwakuulile ing’anda yakwe pa mwalala.+ 25 Awe imfula yalilokele na mulamba aliishile no mwela walikuukile no kupuma pali ilya ng’anda, lelo tayabongolweke, pantu yakuulilwe pa mwalala. 26 Kabili onse uumfwa amashiwi yandi aya no kukanayakonka,+ akaba ngo muntu umuwelewele,+ uwakuulile ing’anda yakwe pa mucanga. 27 Awe imfula yalilokele na mulamba aliishile no mwela walikuukile no kupuma pali ilya ng’anda+ kabili yalibongolweke, no kuwa icabipisha nga nshi.”+

28 Nomba ilyo Yesu apwile ukulanda aya mashiwi, amabumba yalipapile+ imisambilishishe yakwe;29 pantu alebasambilisha ngo muntu uwaba na maka+ ayafuma kuli Lesa, te pamo nga bakalemba babo.

8 Ilyo atentemwike ulupili amabumba ayakalamba yalimukonkele. 2 Kabili, moneni! umwaume wa fibashi+ aishile kuli ena, afukama no kumweba ati: “Mwe Shikulu, kuti mwamposha nga mulefwaya.” 3 Awe atambalike ukuboko kwakwe, amukumya, e lyo atila: “Ee ndefwaya. Pola.”+ Kabili apo pene fye ifibashi fyalipolele.+ 4 E lyo Yesu amwebele ati: “Te kwesha ukwebako umuntu nangu umo,+ lelo kabiye, kailange kuli shimapepo,+ no kutuula ica bupe+ cintu Mose asosele, pa kuti bashininkishe ukuti naupola.”

5 Ilyo aingile mu Kapernahumu,+ umukalamba wa bashilika aishile kuli ena, alamupapaata 6 ati: “Mukwai, umubomfi wandi umwaume nasendama mu ng’anda alilwala ubulebe, kabili alecula nga nshi.” 7 Na o amwebele ati: “Ndeisamuposha nga nafika.” 8 Umukalamba wa bashilika amwaswike ati: “Mukwai, nshilingile ukuti mwise mwingile mu ng’anda yandi, lelo soseni fye amashiwi no mubomfi wandi alapola. 9 Pantu na ine wine nalikwata abo nakila, kabili ndi na bashilika abang’umfwila, kabili ndeba umo nati, ‘Kabiye!’+ na o aya, na umbi nati, ‘Isa!’ na o aisa, na ku musha wandi ntila, ‘Cita ici!’ na o acita.” 10 Pa kuumfwa ifyo, Yesu alipapile kabili aebele abalemukonka ati: “Ndemweba icine nati, nshatala nsanga uwa citetekelo icikalamba+ nge ci mu Israele. 11 Lelo ndemweba nati, abengi aba ku kabanga na ba ku masamba+ bakesa no kwikala pe tebulo pamo na Abrahamu na Isaki na Yakobo mu bufumu+ bwa mu muulu;+ 12 lelo abana ba bufumu+ bakabapoosa ku nse mu mfifi. E kukaba ukulila no kusumanya ameno.+ 13 E lyo Yesu aebele umukalamba wa bashilika ati: “Kabiye. Nacibe ifyo fine we mwine utetekele.”+ Kabili umubomfi wakwe alipolele mu nshita ilya ine.

14 Kabili ilyo Yesu aingile mu ng’anda ya kwa Petro, amwene nafyala+ Petro nalaala, pantu alilwele impepo.+ 15 E ico amwikete ku kuboko,+ kabili alipolele, aima alamupekanishisha ifya kulya.+ 16 Lelo ilyo cali icungulo, abantu bamuleteele abali ne fibanda abengi; na o afumishe imipashi kwi shiwi fye, no kuundapa bonse abalwele;17 pa kuti cifikilishiwe icalandiilwe muli kasesema Esaya ati: “E wasendele intenda shesu na malwele yesu.”+

18 Ilyo Yesu amwene ibumba nalimushinguluka, abebele ukuti baabukile kwi shilya.+ 19 Kabili kalemba umo alishile no kumweba ati: “Mwe Kasambilisha, ndemukonka konse uko muleya.”+ 20 Lelo Yesu amwebele ati: “Bamumbwe balikwata ifilindi umo bekala ne fyuni fya mu muulu fyalikwata ifisansala, lelo Umwana wa muntu takwata na pa kusaisha umutwe.”+ 21 E lyo na umbi pa basambi bakwe amwebele ati: “Mwe Shikulu, lekeni ntale njeshiika batata.” 22 Yesu atile kuli ena: “Akunkonka, kabili leka abafwa bashiike abafwa babo abene.”+

23 Kabili ilyo aninine mu bwato,+ abasambi bakwe balimukonkele. 24 Kabili, moneni! icikuuku ca maka nga nshi caliimine pali bemba, ica kuti amabimbi yaleingila mu bwato. Lelo ena alisendeme.+ 25 Awe baile kuli Yesu no kumubuusha+ abati: “Shikulu, tupususheni, twalafwa!” 26 Lelo abebele ati: “Cinshi muletiinina, mwe ba citetekelo icinono?”+ Kabili ilyo aimine, akalipile umwela na bemba, kabili kwatalele na tondolo.+ 27 E ico balipapile abati: “Muntu nshi uyu+ uwa kuti nangu fye umwela na bemba filamumfwila?”

28 Ilyo afikile kwi shilya, ku calo ca bena Gadara,+ abaume babili abali ne fibanda+ balimukumenye, ninshi balefuma ku nshiishi, bali abakali nga nshi, ica kuti takwali nangu umo uwashipile ukupita muli ulya musebo. 29 Kabili, moneni! babilikishe abati: “Bushe tulomfwana na iwe, we Mwana wa kwa Lesa?+ Bushe wishile kuno ku kutulungulusha+ ilyo inshita tailafika?”+ 30 Lelo akatalamukila kwali umukuni wa nkumba ishingi ishalelya umulemfwe. 31 E ico ifibanda fyatendeke ukumupapaata, afiti: “Nga mwatufumya, mututamfishe mu mukuni wa nkumba.”+ 32 E ico afyebele ati: “Kabiyeni!” Fyalifumine no kuya mu nkumba; kabili, moneni! inkumba shonse shabutukiile ukwasuluka no kuponena muli bemba no kufwila mu menshi.+ 33 Lelo bakacema balifulumwike kabili ilyo baingile mu musumba, bashimike fyonse, ne fyacitike ku baume babili abali ne fibanda. 34 Kabili, moneni! bonse mu musumba balifumine ku kuyakumanya Yesu; kabili ilyo bamumwene, bamupapaatile ukuti afume mu fitungu fyabo.+

9 E ico, ilyo aingile mu bwato, ayabukile kwi shilya no kuya ku musumba ku mwabo.+ 2 Kabili moneni! bamuleteele uwa bulebe ninshi nalaala pa musengele.+ Ilyo amwene icitetekelo cabo, Yesu aebele uwa bulebe ati: “We mwana wisakamana; imembu shobe shaelelwa.”+ 3 Kabili, moneni! bamo pali bakalemba balalanshanya, abati: “Uyu muntu aleponta.”+ 4 Kabili, Yesu pa mulandu wa kuti alishibe ifyo baletontonkanya,+ atile: “Cinshi ico muletontonkanishisha ifyabipa mu mitima yenu?+ 5 Nga kanshi, icayangukapo ukulanda cinshi, ukutila, Imembu shobe shaelelwa, nelyo ukutila, Ima no kwenda?+ 6 Lelo pa kuti mwishibe ukuti Umwana wa muntu alikwata amaka pano isonde aya kwelela imembu+—” aebele uwa bulebe ati: “Ima, senda umusengele obe, no kuya ku mobe.”+ 7 Awe aliimine no kuya ku mwakwe. 8 Ilyo amabumba yamwene ifi, yaumfwile umwenso, kabili yalumbenye Lesa,+ uwapeele abantu amaka+ ya musango yu.

9 Kabili, ilyo Yesu alefuma kulya, amwene umuntu umo ishina lyakwe ni Mateo naikala apa kusonkesesha imisonko, kabili atile kuli ena: “Nkonka, ube umusambi wandi.”+ Apo pene aliimine no kumukonka.+ 10 Pa numa, ilyo aikele pe tebulo mu ng’anda,+ moneni! bakasonkesha ba misonko abengi na babembu balishile no kutendeka ukulya pamo na Yesu na basambi bakwe. 11 Lelo ilyo abaFarise bamwene ifi, batendeke ukweba abasambi bakwe, abati: “Mulandu nshi kasambilisha wenu aliila pamo na bakasonkesha ba misonko na babembu?”+ 12 Ilyo Yesu aumfwile, atile: “Abatuntulu tabakabila kondapa,+ kano abalwele. 13 Kanshi kabiyeni, kasambilileni umo amashiwi yalola ayatila, ‘Mfwaya uluse, te malambo iyo.’+ Pantu nshaisa ku kwita abalungami, kano ababembu.”

14 E lyo abasambi ba kwa Yohane baishile kuli ena no kwipusha abati: “Mulandu nshi ifwe na baFarise tulekela ukulya lelo abasambi bobe bena tabaleka ukulya?”+ 15 E lyo Yesu abaswike ati: “Bushe abanankwe ba kwa shibwinga bafwile ukuloosha ilyo shibwinga+ acili pamo na bo? Lelo inshiku shileisa ilyo shibwinga bakamusenda,+ e lyo bakaleka ukulya.+ 16 Takuli uubila icikamba ca nsalu iipya pa ca kufwala ca kale; pantu icikamba ca nsalu iipya calikosa, kabili kuti calepula ica kufwala ne cipunda kuti cakulilako.+ 17 Kabili abantu tababika umwangashi uushilakalipa mu nyambi* isha kale; lelo nga babikamo, inyambi shilalepuka no mwangashi uletika ne nyambi shilonaika.+ Lelo abantu babika umwangashi uushilakalipa mu nyambi ishipya, kabili fyonse fibili filasungwa bwino bwino.”+

18 Ilyo alebeba ifi fintu, moneni! intungulushi+ imo yaishile kuli ena no kufukama,+ e lyo yatila: “Ino nshita umwana wandi umwanakashi no kufwa nafwa;+ lelo tuleyeni muyebika iminwe yenu pali ena kabili alaba umumi.”+

19 Awe ilyo Yesu aimine, atendeke ukumukonka; na basambi bakwe na bo balakonka. 20 Kabili, moneni! umwanakashi uwaculile ku kufuma umulopa+ pa myaka ikumi na ibili (12) aishile ku numa no kukumya ku nsenkebele sha ku ca kufwala cakwe;+ 21 pantu mu mutima wakwe aleti: “Nga nakumyako fye ku ca kufwala cakwe, nalapola.”+ 22 Yesu alipilibwike, kabili ilyo amumwene, atile: “Wisakamana, we mwana; icitetekelo cobe nacikuposha.”+ Kabili ukufuma ilya ine nshita umwanakashi alipolele.+

23 Nomba ilyo aingile mu ng’anda+ ya ntungulushi no kumona abalelisha imitolilo ne bumba ilyalekafya icongo,+ 24 Yesu asosele ati: “Fumineni pa nse, pantu akakashana takafwile iyo, lelo kaleele fye utulo.”+ Awe batendeke ukumuseka no kumupumya.+ 25 Cilya fye ibumba lyafumina pa nse, aliingile no kukekata ku kuboko,+ na kakashana kaliimine.+ 26 Awe ili lyashi lyasalangene muli cilya citungu conse.

27 Ilyo Yesu aalepita pa kufuma kulya, impofu shibili+ shalimukonkele, shilebilikisha ashiti: “Tubelele uluse,+ Mwana Davidi.” 28 Ilyo aingile mu ng’anda, impofu shibili shaishile kuli ena, kabili Yesu ashipwishe ati: “Bushe namutetekela+ ukuti ndi na maka ya kucita ici?” Shamwaswike ashiti: “Ee, mwe Shikulu.” 29 E lyo ashikumishe pa menso,+ no kusosa ukuti: “Nacibe ifyo fine mwe bene mutetekele.” 30 Awe amenso ya shiko yatendeke ukumona. Kabili Yesu ashikonkomeshe ati: “Mwileka umuntu nangu umo eshibe ici.”+ 31 Lelo shena ilyo shafumine pa nse shasalangenye ilyashi pali ena muli cilya citungu conse.+

32 Nomba ilyo balefuma kulya, moneni! abantu bamuleteele umwaume cibulu uwali ne cibanda;+ 33 kabili ilyo afumishe icibanda muli ena, uyu cibulu atendeke ukulanda.+ Awe ibumba lyalipapile+ aliti: “Tatwatala atumona ica musango yu mu Israele.” 34 Na baFarise balasosa abati: “Afumisha ifibanda ku maka ya kwa kateka wa fibanda.”+

35 E lyo Yesu aile alepita mu misumba yonse ne mishi, alesambilisha mu masunagoge* yabo no kubila imbila nsuma ya bufumu no kuundapa umusango onse uwa bulwele no musango onse uwa ntenda.+ 36 Ilyo amwene amabumba, abomfwilile uluse+ pantu balebacusha kabili bali abapaswa nge mpaanga ishabula kacema.+ 37 E lyo aebele abasambi bakwe ati: “Cine cine, umulimo wa kulobolola ukalamba, lelo ababomfi bena nabacepa.+ 38 E ico, lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.”+

10 E ico aitile abasambi bakwe ikumi na babili (12) no kubapeela amaka ya kufumya imipashi yakowela,+ pa kuti baleifumya no kuundapa amalwele yonse ne ntenda shalekanalekana.

2 Aya e mashina ya batumwa+ ikumi na babili (12):+ Uwa kubalilapo ni Simone uwitwa Petro,+ na Andrea+ munyina; na Yakobo na Yohane munyina, abana ba kwa Sebede;+ 3 Filipi na Bartolomeo;+ Toma+ na Mateo+ kasonkesha wa misonko; Yakobo mwana Alfeo,+ na Tadeo; 4 Simone uwacincila,+ na Yuda Iskariote, uwaishilemufutuka.+

5 Yesu atumine abe kumi na babili (12), no kubeba ati:+ “Mwiya mu musebo wa bena fyalo, kabili mwi-ingila mu musumba wa bena Samaria;+ 6 lelo muleya ku mpaanga ishaluba isha mu ng’anda ya kwa Israele.+ 7 Ilyo muleya, mulebila amuti, ‘Ubufumu bwa mu muulu nabupalama.’+ 8 Muleposha abalwele,+ mulebuusha abafwa, muleposha aba fibashi, mulefumya ifibanda. Mwapeelwe fye ubupe, na imwe mulepeela fye.+ 9 Mwisenda golde nelyo silfere nelyo umukuba mu fikwama fya mu mishipi,+ 10 nelyo icola ca fya kulya fya pa lwendo, nelyo ifya kufwala fya mu kati fibili, nelyo ni ndyato nelyo inkonto; pantu umubomfi alilinga ukumupeela ifya kulya.+

11 “Mu musumba onse nelyo umushi umo mwaingila, fwayenimo umuntu uulefwaya ukumfwa, kabili e ko mwikale mpaka mukafumemo.+ 12 Ilyo muleingila mu ng’anda, posheni aba muli iyo ng’anda;13 kabili muli iyo ng’anda nga muli abalefwaya ukumfwa, umutende wenu ube pali yena;+ lelo nga tamuli, umutende wenu ubwelele kuli imwe. 14 Konse uko umuntu ashimupokelele nelyo ukukutika ku mashiwi yenu, pa kufuma muli ilya ng’anda nelyo uyo musumba, kunteni ulukungu ku makasa yenu.+ 15 Ndemweba icine cine nati, Cikaba eyefilya ku misumba ya Sodomu+ na Gomora pa Bushiku bwa Bupingushi ukucila uyo musumba.+

16 “Moneni! ndemutuma nge mpaanga mu mimbulu;+ kanshi mufwile ukuba abacenjela nge nsoka+ lelo aba kaele nge nkunda.+ 17 Mulecenjela ku bantu;+ pantu bakamutwala ku filye,+ kabili bakamufopaula+ mu masunagoge* yabo.+ 18 Na kuba, bakamutwala pa ntanshi ya balashi ne shamfumu+ pa mulandu wandi, pa kuti mube inte+ kuli bena e lyo na ku bantu ba mu calo. 19 Lelo ilyo bamutwala, mwikasakamikwa pa nshila mukalandilamo ne co mukalanda; pantu mukapeelwa ifya kusosa muli ilya ine nshita;+ 20 pantu te imwe mukalalanda, lelo mupashi wa kwa Shinwe e ukalalandila muli imwe.+ 21 Kabili, munyina+ akapeela munyina ku kwipaiwa, na wishi akapeela umwana, na bana bakemina abafyashi no kubepaisha.+ 22 Kabili abantu bonse bakamupata pa mulandu we shina lyandi;+ lelo uwashipikisha ukufika na ku mpela, e ukapusuka.+ 23 Ilyo bamucusha mu musumba umo, fulumukileni kuli umbi;+ pantu ndemweba icine cine, nati, tamwakapwishe ukushinguluka+ imisumba ya Israele ninshi Umwana wa muntu aisa.+

24 “Umusambi tacila kasambilisha wakwe, no musha na o tacila shikulu wakwe.+ 25 Calilinga umusambi ukuba nga kasambilisha wakwe, no musha ukuba nga shikulu wakwe.+ Nga abantu beta umwine wa ng’anda abati Beelsebuli,*+ nga aba mu ng’anda yakwe bena bakabeta shani?26 E ico mwilabatiina; pantu takuli icafiswa icishakeshibikwe, nangu inkama iishakasokoloke.+ 27 Ifyo namweba mu mfifi, filandileni apali ulubuuto; kabili ifyo mwaumfwa mu kantepentepe, fibilishisheni pa mitenge.+ 28 Kabili mwilatiina+ abengamwipaya lelo abashingamupoka isubilo lya kuba no mweo; lelo muletiina Lesa+ uwingamulofesha mu Gehena.*+ 29 Bushe tabashita inseba shibili mu kandalama akanono sana?+ Na lyo line takuli nangu lumo ulwingapona pa nshi ukwabula Shinwe ukwishiba.+ 30 Lelo ne mishishi ya ku mitwe yenu yonse yalipendwa.+ 31 E ico mwilatiina: Mwalicindama ukucila inseba ishingi.+

32 “E ico, umuntu onse uwansumina pa menso ya bantu, na ine nkamusumina+ pa menso ya kwa Tata uwaba mu muulu;33 lelo onse uwankaana pa menso ya bantu, na ine nkamukaana+ pa menso ya kwa Tata wa mu muulu. 34 Mwitila naisa ku kuleta umutende pe sonde; nshaisa ku kuleta umutende,+ kano ulupanga. 35 Pantu naisa ku kulekanya umuntu na wishi, no mwana mwanakashi na nyina, no mukashana waupwa na nafyala.+ 36 Cine cine, abalwani ba muntu bakaba aba mu ng’anda yakwe. 37 Uwatemwa wishi nelyo nyina ukucila ine, talingile ukuba umusambi wandi; kabili uwatemwa umwana mwaume nelyo umwana mwanakashi ukucila ine, talingile ukuba umusambi wandi.+ 38 Kabili onse uushisenda icimuti cakwe ica bucushi no kunkonka, talingile ukuba umusambi wandi.+ 39 Uufwaya ukucingilila umweo wakwe akafwa, no wafwila pa mulandu wandi akaba no mweo.+

40 “Uwapokelela imwe, ninshi apokelela na ine, no wapokelela ine, ninshi apokelela no wantumine.+ 41 Uwapokelela kasesema pa mulandu wa kuti ni kasesema, akapokelela icilambu ca kwa kasesema,+ kabili uwapokelela umulungami pa mulandu wa kuti mulungami, akapokelela icilambu ca mulungami.+ 42 Kabili onse uwapeela umo pali aba abanono kapu fye ya menshi ayatalala pantu musambi, ndemweba icine cine nati, takapanye icilambu cakwe.”+

11 Nomba ilyo Yesu apwishishe ukweba abasambi bakwe ikumi na babili (12) ifi fintu, alifumineko no kuya alesambilisha no kushimikila mu misumba yabo.+

2 Nomba ilyo Yohane ali mu cifungo+ aumfwile imilimo iyo Kristu alebomba, kabili atumine abasambi bakwe 3 ukuyamwipusha ati: “Bushe ni we Uuli no Kwisa, nelyo bushe tufwile ukulolela umbi?”+ 4 Yesu abaswike ati: “Bwelelenimo no kuyashimikila Yohane ifyo muleumfwa ne fyo mulemona: 5 Impofu shilemona na kabili,+ na balemana+ bale-enda, aba fibashi+ balepola na bankomamatwi+ baleumfwa, na bafwa+ balebuushiwa, na bapiina balebashimikila imbila nsuma;+ 6 kabili alipaalwa umuntu uushisanga ica kuipununako muli ine.”+

7 Ilyo abasambi ba kwa Yohane baleya, Yesu atendeke ukulanda ku mabumba pali Yohane ati: “Cinshi mwaile mu kumona mu matololo?+ Bushe litete ililepungaila ku mwela?+ 8 Nga cinshi kanshi mwaile mu kumona? Bushe muntu uufwele ifya kufwala ifyanakilila ubusaka? Awe nakalya, pantu abafwala ifya kufwala ifyanakilila ubusaka bekala mu masano ya shamfumu.+ 9 E ico cinshi kanshi mwailiile? Bushe ni mu kumona kasesema? Ee, ndemweba nati, alicila na pali kasesema.+ 10 E o balembelepo ati, ‘Mona! Ndetuma inkombe yandi pa ntanshi yobe, iikakupekanishisha inshila ku ntanshi yobe!”+ 11 Cine cine, ndemweba nati, Pa bafyalwa ku banakashi+ tapatala apamoneka uwacila pali Yohane Kabatisha; lelo uwacepesha mu bufumu+ bwa mu muulu mukalamba ukumucila. 12 Lelo ukufuma mu nshiku sha kwa Yohane Kabatisha ukufika na nomba, ubufumu bwa mu muulu ebo abantu bafwaisha, na babufwaisha balebusanga.+ 13 Pantu fyonse, ifyalembwa mu mabuuku ya bakasesema na mu Mafunde, fyasobele ukufika pa nshita ya kwa Yohane;+ 14 kabili nga mulefwaya ukusumina ici, Ena e ‘Eliya uwali no kwisa.’+ 15 Uuli na matwi omfwe.+

16 “Ni kuli bani nalalinganya iyi nkulo?+ Yaba nga abana banono abekele pa maliketi abalebilikisha ku banabo,+ 17 abati, ‘Natumulishisha imitoolilo, lelo tamucindile; natulila imisowa, lelo tamulooseshe.’+ 18 Pantu ilyo Yohane aishile talelya nangu kunwa,+ lelo abantu batila, ‘Aba ne cibanda’;19 kabili Umwana wa muntu alisa, alalya no kunwa,+ lelo abantu batila, ‘Moneni! Uyu muntu muliili kabili alitemwisha umwangashi, kabili ni cibusa wa bakasonkesha ba misonko na babembu.’+ Lelo ifintu ifyalungama ifyo umuntu acita e filanga ukuti wa mano.”+

20 E lyo atendeke ukukalipila aba mu misumba umo acitile ifipesha amano ifingi, pa mulandu wa kuti tabalapiile:+ 21 “We bulanda kuli iwe, Korasini! We bulanda kuli iwe, Betsaida!+ pantu ifipesha amano ifyacitilwe muli imwe aficitwa mu Turi na mu Sidone, nga kale balapiile no kufwala insamu* no kwikala mu mito.+ 22 E ico ndemweba nati, Pa Bushiku bwa Bupingushi+ cikaba eyefilyako kuli Turi na Sidone ukucila ifyo cikaba kuli imwe.+ 23 Na iwe, we Kapernahumu,+ bushe bakakuninika ukufika na ku muulu? Ku Nshiishi*+ e ko ukaya;+ pantu ifipesha amano ifyacitilwe muli iwe aficitwa mu musumba wa Sodomu, nga ucilipo ukufika kuli buno bushiku. 24 E ico ndemweba nati, Cikaba eyefilyako pa Bushiku bwa Bupingushi ku musumba wa Sodomu ukucila ifyo cikaba kuli iwe.”+

25 Pa nshita ilya, Yesu atile: “Ndemulumbanya, mwe Tata, Mwe bene ba muulu ne sonde, pantu mwalifisa ifi fintu ku ba mano na bacenjela no kufisokolwela ku tunya.+ 26 Ca cine, mwe Tata, pantu ifi e fyo mwalefwaya. 27 Tata alimpeela ifintu fyonse,+ kabili takwaba uwaishiba bwino Umwana kano Wishi,+ kabili takwaba nangu umo uwaishiba bwino Wishi kano Umwana, e lyo na onse uo Umwana afwaya ukumusokolwela.+ 28 Iseni kuli ine imwe bonse mwe balecula kabili abafininwa,+ na ine nalamusansamusha. 29 Sendeni ikoli+ lyandi no kusambilila kuli ine,+ pantu nalifuuka+ kabili nali-icefya,* e lyo mwalasanga ukutuusha.+ 30 Pantu ikoli lyandi talyafina, ne cipe candi calyanguka.”+

12 Pali ilya nshita Yesu alepita mu mabala ya ngano pe sabata.+ Abasambi bakwe baumfwile insala kabili batendeke ukutimpula imitwe ya ngano no kulya.+ 2 Ilyo abaFarise bamwene ifi, bamwebele abati:+ “Mona! Abasambi bobe balecita icishasuminishiwa ukucita pe sabata.”+ 3 Atile kuli bena: “Bushe tamwabelenga ifyacitile Davidi ilyo ena na bali nankwe baumfwile insala?+ 4 Bushe tamwabelenga ifyo aingile mu ng’anda ya kwa Lesa kabili baliile imikate ya kutuula kuli Lesa,+ iyo ena na bali nankwe bashali ne nsambu+ ya kulya, kano fye bashimapepo?+ 5 Nelyo, bushe tamwabelenga mu Mafunde+ ukuti pa masabata bashimapepo mwi tempele tabamona isabata nge lya mushilo kabili tababa na mulandu?+ 6 Awe ndemweba nati, uwacila itempele+ ali pano. 7 Lelo, amumfwikisha umwalola amashiwi ya kuti, ‘Mfwaya uluse,+ te lambo,’+ nga te kuti mupingule ababula umulandu. 8 Pantu Umwana wa muntu+ e Mwine we sabata.”+

9 Ilyo afumine kulya, aingile mwi sunagoge* lyabo; 10 kabili, moneni! kwali umuntu uwalemana ukuboko!+ E ico balimwipwishe abati, “Bushe calisuminishiwa ukuundapa pe sabata?” Balefwaya apa kumupeelela umulandu.+ 11 Na o abebele ati: “Bushe umo pali imwe nga alikwata impaanga imo kabili yaponena mu cilindi+ pe sabata, bushe te kuti aibuule no kuifumyamo?+ 12 Nomba umuntu ena alicindama ukucila impaanga!+ E ico calisuminishiwa ukucita icisuma pe sabata.” 13 E lyo aebele uwalemana ukuboko ati: “Fungulula ukuboko kobe.” Na o alikufungulwile, kabili ukuboko kwakwe kwalipolele no kuba ukutuntulu ngo kubiye.+ 14 Lelo abaFarise balifuminepo no kuya mu kupangana ifya kumwipaya.+ 15 Nomba ico Yesu aishibe amapange yabo, alifumineko. Na bantu abengi balimukonkele, kabili alibondepe bonse,+ 16 lelo alibaleseshe ukuti bemusokolola;+ 17 pa kuti cifikilishiwe icalandiilwe muli kasesema Esaya, uwatile:

18 “Moneni! Umubomfi+ wandi uo nasalile, uwatemwikwa+ wandi, uo natemwa! Nkabika umupashi wandi pali ena,+ kabili akalondolwela inko umwalola umulinganya. 19 Takacite ifikansa,+ nangu kubilikisha, no muntu takomfwe ishiwi lyakwe mu misebo iikalamba. 20 Takafune itete ilyafwantwa, kabili takashimye iciku* icilefuuka icushi,+ mpaka akalenge umulinganya+ ukucimfya. 21 Cine cine, inko shikasubila mwi shina lyakwe.”+

22 E lyo bamuleteele umwaume uwali ne cibanda, uwali impofu kabili cibulu; na o alimuposeshe, ica kuti cibulu atendeke ukulanda no kumona. 23 Awe amabumba yonse yalipeshiwe amano, yalasosa ayati:+ “Bushe uyu nalimo te Mwana Davidi?”+ 24 Ilyo abaFarise baumfwile ifi, batile: “Uyu muntu tafumisha ifibanda ku maka yambi kano ku maka ya kwa Beelsebuli* kateka wa fibanda.”+ 25 Awe apo aishibe ifyo baletontonkanya,+ abebele ati: “Mu bufumu bonse nga mwaba ukupaatukana, bulonaika,+ na mu musumba onse nangu mu ng’anda nga mwaba ukupaatukana, te kuti fitwalilile ukwiminina. 26 E fyo caba na kuli Satana, nga afumya Satana, ninshi aba uwapaatukana umwine; nga kanshi ubufumu bwakwe bukatwalilila shani ukwiminina?27 Kabili, nga mfumisha ifibanda ku maka ya kwa Beelsebuli,*+ ni ku maka ya kwa nani abasambi benu bafifumisha? E mulandu wine abasambi benu bakamupingwila ati mwaliluba. 28 Lelo nga ni ku maka ya mupashi wa kwa Lesa e ko mfumisha ifibanda, ninshi ubufumu bwa kwa Lesa nabwisa pali imwe.+ 29 Kabili umuntu kuti aingila shani mu ng’anda ya muntu wa maka no kupoka ifipe fyakwe? Afwile intanshi akaka uwa maka, e lyo nomba engasenda fyonse ifya mu ng’anda yakwe.+ 30 Uushaba pamo na ine, ninshi alandwisha, no ushilonganya na ine, ninshi alasalanganya.+

31 “E ico ndemweba, nati, Abantu bakababelela uluse pa lubembu lonse ne miponto yonse, lelo uwapontela umupashi tabakamubelele uluse.+ 32 Pantu onse uwapontela Umwana wa muntu, bakamubelela uluse;+ lelo onse uwapontela umupashi wa mushilo, tabakamubelele uluse nakalya, muli cino calo nangu mu calo cipya.+

33 “Mwe bantu ni mwe mulenga umuti ukuba uusuma ne fisabo fya uko ukuba ifisuma nelyo uku-ulenga ukuba uubi ne fisabo fya uko ukuba ifibi; pantu umuti bawishibila ku fisabo fya uko.+ 34 Mwe bana ba nsoka mwe,+ kuti mwalanda shani ifisuma ilyo muli babifi?+ Pantu umuntu alanda ifyaisula mu mutima wakwe.+ 35 Umuntu umusuma afumya ifisuma mu cipao cakwe icisuma,+ lelo umubi afumya ifyabipa mu cipao cakwe icabipa.+ 36 Ndemweba nati, amashiwi yonse aya buwelewele ayo abantu balanda, bakalubulwilapo+ pa Bushiku bwa Bupingushi;37 pantu ku mashiwi yobe e ko bakakupingwila ukuti uli mulungami nangu ukuti tauli mulungami.”+

38 E lyo bakalemba na baFarise bamo bayaswike abati: “Mwe Kasambilisha, tulefwaya ukumona icishibilo kuli imwe.”+ 39 Na o abaswike ati: “Inkulo ya bubifi kabili iishaba na cishinka kuli Lesa*+ lyonse ifwaya icishibilo, lelo tayakapeelwe icishibilo cimbi kano fye icishibilo ca kwa kasesema Yona.+ 40 Pantu filya fine Yona+ ali mu nda ya cisabi inshiku shitatu akasuba no bushiku, e fyo no Mwana wa muntu+ akaba mu kati ka mushili+ inshiku shitatu akasuba no bushiku.+ 41 Abena Ninebe bakabuukila pamo na bantu ba nkulo+ ino mu Bushiku bwa Bupingushi no kubashinina;+ pantu balilapile ilyo Yona+ abilile imbila, lelo, moneni! uwacila pali Yona ali pano. 42 Namfumu wa ku kapinda ka ku kulyo+ akabuukila pamo na bantu ba nkulo ino mu Bushiku bwa Bupingushi kabili akabashinina; pantu afumine ukutali sana ku kwisaumfwa amano ya kwa Solomone, lelo, moneni! uwacila pali Solomone ali pano.+

43 “Ilyo umupashi wakowela wafuma mu muntu, upita umwauma ilyo ulefwaya apa kutuusha, no kupasanga iyo.+ 44 E lyo watila, ‘Ndebwelela ku ng’anda yandi uko nafumine,’ kabili ilyo wafika wasanga tamwaba kantu lelo namupyangwa ubusaka kabili mulemoneka bwino. 45 E lyo waya no kuyasenda imipashi yalekanalekana cinelubali (7) iyabipa uku-ucila;+ kabili ilyo yaingila, yaikala mulya; ne mibele ya kulekelesha iya ulya muntu ilabipa ukucila iya pa kubala.+ E fyo cikaba na kuli ino nkulo yabipa.”+

46 Ilyo acili alelanda na mabumba, moneni! nyina na bamunyina+ baiminine pa nse, balefwaya ukulanda nankwe. 47 Awe umo e pa kumweba ati: “Mona! Banoko na bamunonko nabeminina pa nse, balefwaya ukulanda nobe.” 48 Na o amwaswike ati: “Bushe mayo ni nani, na bamunyinane na bo ni bani?”+ 49 Kabili asontele abasambi bakwe no kutila: “Mona! Aba e mayo na bamunyinane!+ 50 Pantu onse uucita ukufwaya kwa kwa Tata uwaba mu muulu, e munyinane, kabili e nkashi yandi, kabili e mayo.”

13 Pali bulya bushiku, ilyo Yesu afumine ku ng’anda, aileikala mupepi na bemba; 2 kabili amabumba ayakalamba yailelongana uko ali, e ico aingile mu bwato no kwikala,+ ne bumba lyonse lyaiminine mu lulamba. 3 E lyo abebele ifintu ifingi mu filangililo, ati: “Moneni! katanda umo aile ku kutanda imbuto;+ 4 kabili ilyo aletanda, imbuto shimo shaponene mu mbali ya nshila, ne fyuni fyalishile no kushilya.+ 5 Shimbi shaponene pa mabwe apashali umushili uwingi, kabili shalimenene bwangu bwangu pa mulandu wa kuti tapali umushili uwingi.+ 6 Lelo ilyo akasuba kabalike, shalipiile, kabili pa mulandu wa kuti tashakwete imishila shalibonsele no kuuma.+ 7 Shimbi na sho shaponene mu myunga, ne myunga yalikulile no kushitabilila.+ 8 Lelo shimbi shaponene pa mushili uusuma kabili shatendeke ukutwala ifisabo,+ lumo lwatwele umwanda umo (100), lumbi amakumi mutanda (60), lumbi na lo amakumi yatatu (30).+ 9 Uuli na matwi omfwe.”+

10 E ico abasambi baishilemweba abati: “Mulandu nshi mulandila na bo mu filangililo?”+ 11 Na o abaswike ati: “Imwe balimupeela amano ya kumfwikisha inkama+ sha kwa Lesa pa bufumu bwa mu muulu, lelo balya bena tababapeela aya mano.+ 12 Pantu onse uwakwata, bakamupeela na fimbi kabili bakamufushisha;+ lelo onse uushakwata, bakamupoka ne co akwata.+ 13 E mulandu wine nandila na bo mu filangililo, pantu balalolesha lelo tabamona iyo, kabili balomfwa, nomba tabatesha iyo, nangu kwiluka tabeluka;+ 14 kabili ukusesema kwa kwa Esaya kulefikilishiwa kuli bena, ukutila, ‘Ukuumfwa, mukomfwa lelo tamwakeluke nakalya; kabili, ukulolesha mukalolesha, lelo tamwakamone nakalya.+ 15 Pantu imitima ya aba bantu yalikunkuma, kabili balomfwa lelo tapali ico bacitapo, kabili balishibatika amenso yabo; pa kuti amenso yabo yemona kabili amatwi yabo yeumfwa ne mitima yabo i-iluka no kwalukila kuli ine, pa kuti mbaposhe.’+

16 “Lelo yalishuka amenso+ yenu pantu yalamona, na matwi yenu pantu yalomfwa. 17 Pantu ndemweba icine cine nati, Bakasesema+ abengi na balungami balefwaisha ukumona ifyo imwe mulemona, lelo tabafimwene,+ kabili balefwaisha ukuumfwa ifyo imwe muleumfwa, lelo tabafyumfwile.+

18 “Kanshi imwe kutikeni ku cilangililo ca kwa katanda.+ 19 Ulubuto ulwatandilwe mu mbali ya musebo; e muntu uwaumfwa icebo ca pa bufumu ukwabula ukwiluka, no mubifi+ aisasompola icatandilwe mu mutima wakwe. 20 Lelo ulwatandilwe pa mabwe, ulu e muntu uwaumfwa icebo na po pene acitetekela ne nsansa.+ 21 Lelo takwete imishila kabili aikala fye inshita iinono, kabili ilyo kwaisa ubwafya nelyo ubucushi pa mulandu wa cebo ca bufumu, ena apo pene anenuka.+ 22 E lyo ulwatandilwe mu myunga, ulu e muntu uwaumfwa icebo, lelo pa mulandu wa masakamika ya muli cino calo+ na pa mulandu wa kumubeleleka ku fyuma, icebo catusa, kabili afilwa ukutwala ifisabo.+ 23 Lelo ulwatandilwe pa mushili usuma, ulu e muntu uwaumfwa icebo no kwiluka, atwala ne fisabo, umo atwala umwanda (100), umbi amakumi mutanda (60), umbi na o amakumi yatatu (30).”+

24 Abashimikile icilangililo na cimbi ati: “Ubufumu bwa mu muulu bwaba ngo muntu uwatandile imbuto ishisuma mwi bala lyakwe.+ 25 Ilyo abantu bali mu tulo, umulwani wakwe aliishile no kutandamo ifyani* mu ngano, aya no kuya. 26 Nomba ilyo imisonga yamenene no kupakula, e lyo ne fyani na fyo fyamoneke. 27 E ico abasha ba mwine wa ng’anda bailemweba abati, ‘Mwe shikulu, bushe tamwatandile imbuto ishisuma mwi bala lyenu?+ Nga kanshi ifyani fyafuma kwi?’+ 28 Abaswike ati, ‘Umulwani e wacitile ifi.’+ Bamwebele abati, ‘Bushe mulefwaya ukuti tuyefinukula?’29 Na o atile: ‘Iyo; epali ilyo mulenukula ifyani, mwanukwila kumo ne ngano. 30 Lekeni fyonse fibili fikulile pamo mpaka ne nshita ya kulobolola; kabili pa nshita ya kulobolola nkeba aba kulobolola ati, Mubale munukule ifyani no kufilonganya no kufyoca,+ e lyo muyelonganya ingano mu butala bwandi.’”+

31 Abashimikile icilangililo na cimbi+ ati: “Ubufumu bwa mu muulu bwaba ngo luseke ulwa lubanga,+ ulo umuntu abuulile no kubyala mwi bala lyakwe;32 na kuba e luseke ulwacepesha pa nseke shonse, lelo ilyo lwakula no kucila imisalu yonse no kuba umuti, ifyuni fya mu muulu+ filesa no kwikala ku misambo ya uko.”+

33 Abashimikile icilangililo na cimbi ati: “Ubufumu bwa mu muulu bwaba kwati citutumushi,+ ico umwanakashi abuulile no kukashila mu magaloni yatatu aya buunga, mpaka umufuba onse watutumuka.”

34 Yesu alandile ifi fyonse ku mabumba mu filangililo. Kabili talandile kuli bena ukwabula icilangililo;+ 35 pa kuti cifikilishiwe icalandiilwe muli kasesema uwatile: “Nkaasamuna akanwa kandi no kulandila mu filangililo, nkabila ne fintu ifyafiswa ukufuma pa kutendeka kwa calo.”+

36 Awe ilyo asalangenye amabumba, aingile mu ng’anda. E lyo abasambi bakwe baishile kuli ena no kutila: “Tulondolweleni icilangililo ca pa fyani ifyali mwi bala.” 37 Na o ayaswike ati: “Katanda wa mbuto ishisuma Mwana wa muntu;38 ibala ba muli ici calo;+ e lyo imbuto ishisuma, bana ba bufumu; lelo ifyani bana ba mubifi,+ 39 no mulwani uwafitandile ni Satana Kaseebanya.+ Ukulobolola+ ni nshita ya ku mpela ya cino calo,+ na ba kulobolola ni bamalaika. 40 E ico, filya fine balonganya ifyani no kufyoca mu mulilo, e fyo cikaba na ku mpela ya cino calo.+ 41 Umwana wa muntu akatuma bamalaika bakwe, kabili bakalonganika no kufumya mu bufumu bwakwe fyonse ifilenga abantu ukuipununa+ pamo na bampulamafunde, 42 kabili bakabapoosa mwi lungu lya mulilo.+ Mulya e mukaba ukulila no kusumanya ameno.+ 43 Pa nshita ilya abalungama bakabalika+ kwati kasuba+ mu bufumu bwa kwa Shibo. Uuli na matwi omfwe.+

44 “Ubufumu bwa kwa Lesa bwaba kwati cuma ico bafishile mu mpanga, ico umuntu asangile e lyo acifisa; kabili pa mulandu wa kuti ali ne nsansa aileshitisha+ fyonse ifyo akwete no kushitamo ilya mpanga.+

45 “Kabili ubufumu bwa mu muulu bwaba kwati wa makwebo uwalefwaya bamargariti abasuma. 46 Awe ilyo asangile margariti umo uwaumo mutengo,+ aileshitisha bwangu fyonse ifyo akwete no kushitamo margariti.+

47 “Kabili ubufumu bwa mu muulu bwaba kwati mukwau uo bapoosele muli bemba no kwikata isabi lya misango yonse.+ 48 Ilyo umukwau waiswile, baukuliile ku lulamba, kabili, ilyo baikele, babuulile isabi ilisuma+ no kulibika mu fipe, lelo ilibi+ balilipoosele. 49 E fyo cikaba na ku mpela ya cino calo: bamalaika bakapaatulula ababifi+ ukubafumya ku balungama+ 50 no kubapoosa mwi lungu lya mulilo. Mulya e mukaba ukulila no kusumanya ameno.+

51 “Bushe namwiluka fyonse ifi?” Na bo bamwaswike ati: “Ee.” 52 E lyo abebele ati: “Kanshi onse uusambilisha abantu, ilyo bamusambilisha ifya bufumu bwa mu muulu,+ aba ngo muntu, umwine wa ng’anda, uufumya mu cipao cakwe ifintu ifipya ne fya kale.”+

53 Nomba ilyo Yesu apwishishe ukulanda ifi filangililo, alifumineko no kuya. 54 Kabili ilyo aingile mu citungu ca ku mwabo,+ atendeke ukubasambilisha mu masunagoge+ yabo, ica kuti balipapile abati: “Bushe uyu muntu afumishe kwi aya mano ne fipesha amano ifi?55 Bushe uyu te mwana wa kwa kabasa?+ Bushe nyina te ulya batila Maria, na bamunyina te Yakobo na Yosefe na Simone na Yuda?56 Na bankashi yakwe, bushe tatwaba na bo bonse?+ Ni kwi kanshi uyu muntu afumishe fyonse ifi?”+ 57 Awe tabamusumiine.+ Lelo Yesu atile kuli bena: “Kasesema balamucindika kumbi, kano fye ku citungu ca ku mwabo na mu ng’anda mu mwakwe.”+ 58 Kabili tacitile ifya maka ifingi kulya pa mulandu wa kukanatetekela kwabo.+

14 Awe Herode,* kateka wa citungu, aumfwile ululumbi lwa kwa Yesu+ 2 kabili aebele ababomfi bakwe ati: “Uyu ni Yohane Kabatisha. Nabuuka ku bafwa, e mulandu wine alecitila ifipesha amano.”+ 3 Pantu Herode alikete Yohane, amukaka, amupoosa na mu cifungo pa mulandu wa kwa Herodia muka Filipi munyina.+ 4 Pantu Yohane alemweba ati: “Tafwile ukuba umukashi obe.”+ 5 Lelo nangu alefwaya ukumwipaya, aletiina abantu, pantu baleti ni kasesema.+ 6 Lelo ilyo kwali ukusefya ubushiku bwa kufyalwa+ kwa kwa Herode, umwana mwanakashi wa kwa Herodia alicindile kabili asekeshe Herode nga nshi 7 ica kuti amulaile no kulapa ukuti ali no kumupeela conse ico ali no kulomba.+ 8 Awe na o akonkele ifyo nyina amwebele, kabili atile: “Mpeeleni nomba line umutwe wa kwa Yohane Kabatisha pa mbale.”+ 9 Nangu ca kuti imfumu yalyumfwile ubulanda, yalandile ukuti bamupeele umutwe pa mulandu wa milapo yalapile na pa mulandu wa bantu abalelya na yo;+ 10 e lyo yatumine bamo kabili baileputula Yohane umutwe mu cifungo. 11 Awe baletele umutwe wakwe pa mbale no kupeela umukashana, na o autwele kuli nyina.+ 12 E lyo abasambi bakwe baishile no kusenda icitumbi cakwe no kuyashiika,+ kabili baile-eba Yesu. 13 Ilyo Yesu aumfwile ifi, alifumineko no kuya mu bwato ukwali tondolo pa kuti abe eka;+ lelo amabumba ilyo yaumfwile ifi, yalimukonkele pa makasa ukufuma mu misumba.

14 Awe ilyo afikile, amwene ibumba ilikalamba; kabili abomfwilile uluse,+ kabili aposeshe abalwele babo.+ 15 Lelo ilyo cali icungulo, abasambi bakwe baishile kuli ena no kutila: “Pano ni pa mpanga na kasuba nakawa; lekeni amabumba yaleya, pa kuti bayeshita ifya kulya mu mishi.”+ 16 Lelo Yesu abebele ati: “Tabafwile ukuya iyo: Imwe bene bapeeleni ifya kulya.”+ 17 Na bo batile: “Pano tatukwete nangu fimo, kano imikate isano ne sabi libili.”+ 18 Na o atile: “Leteni kuno.” 19 E lyo aebele amabumba ukwikala pa cani kabili abuulile imikate isano ne sabi libili, aloleshe mu muulu, no kupepa.+ Kabili ilyo amokawile imikate, ayakenye abasambi, e lyo abasambi na bo bapeele amabumba.+ 20 Awe bonse baliliile no kwikuta, kabili balongenye ifyashelepo, ica kuti fyaiswile imiseke ikumi na ibili (12).+ 21 Na baliile bali nalimo abaume amakana yasano (5,000), ukufumyako abanakashi na bana banono.+ 22 Kabili, apo pene, acincishe abasambi bakwe ukuti banine mu bwato no kumutangilila kwi shilya, e lyo ena ashala alesalanganya amabumba.+

23 Awe ilyo alekele amabumba yaya, aninine ulupili eka ku kupepa.+ Nangu ca kuti cali cungulo bushiku, aliko eka. 24 Nomba ubwato bwali apatali ukufuma ku mulundu, kabili bwalesunkana ku mabimbi,+ pantu umwela walefuma ku ntanshi yabo. 25 Lelo mu bulinde bwalenga bune* ubwa bushiku aile kuli bena, ale-enda pali bemba.+ 26 Ilyo bamumwene fye ale-enda pali bemba, abasambi balitiinine, balasosa abati: “Moneni, icapala umuntu!”+ Kabili balipundile pa mulandu wa mwenso. 27 Lelo Yesu apo pene alandile kuli bena ati: “Shipeni, ala nine;+ mwitiina.” 28 Petro amwebele ati: “Shikulu, nga ni mwe, njebeni njise kuli imwe pa menshi.” 29 Na o atile: “Isa!” Awe ilyo Petro afumine mu bwato,+ aendele pa menshi no kuya kuli Yesu. 30 Lelo ilyo amwene amabimbi ayaleima pa mulandu wa cikuuku ca mwela, alyumfwile umwenso, kabili ilyo atendeke ukwibila, apundile ati: “Mwe Shikulu mpususheniko!” 31 Kabili ilyo line Yesu atambike ukuboko kwakwe no kumwikata no kumweba ati: “We wa citetekelo cinono, nga cinshi wacitwishikila?”+ 32 Kabili ilyo baninine mu bwato, icikuuku ca mwela calilekele. 33 Awe abali mu bwato balimufukamine balalanda abati: “Cine cine, uli Mwana wa kwa Lesa.”+ 34 Kabili balyabwike no kufika ku mulundu mu Genesarete.+

35 Ilyo abantu ba ku ncende ilya bamwishibe, batumine bamo mu mishi yonse iyali mu mbali, kabili abantu bamuleteele bonse abalwele.+ 36 Na bo baile no kumupaapaata ukuti bakumyeko fye ku nsenkebele sha ku ca kufwala cakwe;+ na bonse abakumisheko balipolelele.

15 E lyo abaFarise na bakalemba baishile kuli Yesu ukufuma ku Yerusalemu,+ abati: 2 “Mulandu nshi abasambi bobe bashikonkela intambi sha ba kale? Pantu tabasamba* ku minwe pa kulya.”+

3 Na o abaswike ati: “Mulandu nshi na imwe mushikonkela amafunde ya kwa Lesa pa mulandu wa ntambi shenu?+ 4 Pantu, Lesa atile, ‘Ulecindika wiso na noko,’+ kabili, ‘Uwatuka wishi nelyo nyina afwile ukufwa.’+ 5 Lelo imwe mutila, ‘Onse uwaeba wishi nelyo nyina ati: “Fyonse ifyo nakwata ifyo ningamwafwilishako, nalifipeela kale kuli Lesa,” 6 ninshi tafwile ukucindika wishi nakalya.’+ E ico namulenga icebo ca kwa Lesa ukuba ica fye pa mulandu wa ntambi shenu.+ 7 Mwe ba bumbimunda mwe,+ Esaya+ aliseseme bwino pali imwe, ilyo atile, 8 ‘Aba bantu bancindika fye pa tunwa twabo, lelo imitima yabo yalitaluka kuli ine.+ 9 Kwa fye ukupepa uko bampepa, pantu ifisambilisho basambilisha mafunde ya bantu.’”+ 10 E ico aitile ibumba ukuti lipalame kuli ena no kubeba ati: “Kutikeni no kwiluka ici:+ 11 Ifyo umuntu alya te fimukowesha; lelo ififuma mu kanwa e fikowesha umuntu.”+

12 Awe abasambi baishile kuli ena abati: “Bushe namwishiba ukuti abaFarise bacikalipa pa kuumfwa ifyo mwacisosa?”+ 13 Na o ayaswike ati: “Icilimwa conse ico Tata wa mu muulu ashabyele bakacinukula.+ 14 Balekeni babe. Ni ntungulushi impofu. E ico impofu nga iletungulula impofu inankwe, shonse shibili shikawila mu cilindi.”+ 15 Na o Petro atile kuli ena: “Tulondolweleni icilangililo ici.”+ 16 Na o alandile ati: “Bushe na imwe mucili tamulailuka?+ 17 Bushe tamwishibe ukuti fyonse ifyo umuntu alya fipita mu mala fyaya na mu cimbusu?18 Lelo, ififuma mu kanwa fifuma mu mutima, kabili ifi e fikowesha umuntu.+ 19 Pantu mu mutima e mufuma amatontonkanyo ayabipa,+ ukwipaya, ubucende, ubulalelale, ukwiba, ubunte bwa bufi, ne miponto.+ 20 Ifi e fikowesha umuntu; lelo ukulya ukwabula ukusamba ku minwe takukowesha umuntu.”+

21 Ilyo afumine kulya, Yesu nomba aile ku fitungu fya ku Turi na Sidone.+ 22 Kabili, moneni! umwanakashi umwina Foinike*+ uwa muli filya fitungu alishile, alabilikisha ati: “Mbeleleni uluse,+ mwe Shikulu, Mwana Davidi. Umwana wandi umwanakashi naikatwa icibi ku cibanda.” 23 Lelo ena tamwaswike nangu cimo. Awe abasambi bakwe balishile, balamulomba abati: “Mwebeni aleya; pantu ekalile fye ukulabilikisha kuli ifwe.” 24 Na o ayaswike ati: “Nshatuminwe ku bantu bambi, kano ku mpaanga ishaluba isha mu ng’anda ya kwa Israele.”+ 25 Ilyo umwanakashi aishile, atendeke ukupapaata kuli ena ati: “Mwe Shikulu, njafweni!”+ 26 Na o atile: “Tacawama ukubuula umukate wa bana no kupoosela utubwa.” 27 Na o atile: “Ca cine ico, mwe Shikulu; lelo no tubwa twine tulalyako ubufungau ubupona kwi tebulo lya bashikulu ba tuko.”+ 28 E lyo Yesu amwaswike ati: “We mwanakashi, icitetekelo cobe cikalamba; nacibe ifyo fine we mwine ulefwaya.” Kabili umwana wakwe alipolele ukutula lilya line.+

29 Ilyo Yesu afumine kulya, aile mupepi na kuli bemba wa Galili.+ Kabili ilyo aninine ulupili,+ aikele palya. 30 E lyo amabumba ayakalamba yaishile kuli ena, nabasenda na bantu abalemana, bamakunkutu, impofu, na bacibulu, na bambi abengi, kabili babatekele ku makasa yakwe, na o alibaposeshe;+ 31 ica kuti ibumba lyalipapile pa kumona bacibulu balalanda na balemana balaenda ne mpofu shalamona, kabili bacindike Lesa wa kwa Israele.+

32 Lelo Yesu aitile abasambi bakwe no kusosa ati:+ “Naumfwila ibumba uluse,+ pantu nomba inshiku shaba shitatu isho baikala na ine kabili tabakwete ifya kulya; kabili nshilefwaya ukubaleka baye ne nsala. Epali bafwa ulushile mu nshila.” 33 Lelo abasambi bakwe bamwebele abati: “Ni kwi twalafumya imikate pano pa mpanga iya kuti ibumba lyakula ifi lilye no kwikuta?”+ 34 E ico Yesu abepwishe ati: “Muli ne mikate inga?” Na bo batile: “Cinelubali (7), no tusabi utunono fye.” 35 Awe ilyo aebele ibumba ukwikala pa nshi, 36 abuulile imikate cinelubali (7) ne sabi, kabili ilyo atashishe kuli Lesa, alimokawile, alapeela abasambi, na bo abasambi bapeele amabumba.+ 37 Awe bonse baliliile no kwikuta, balonganike ne fyasheleko, kabili fyaiswile imiseke cinelubali (7).+ 38 Na baliile bali amakana yane (4,000), ukufumyako abanakashi na bana abanono. 39 Kabili ilyo alekele amabumba yaye, aninine mu bwato no kuya ku fitungu fya Magadani.+

16 Nomba abaFarise+ na baSaduke baishile kuli Yesu, kabili pa kuti bamweshe, bamulombele ukuti abalange icishibilo icafuma ku muulu.+ 2 Na o abaswike ati: “[[Ilyo caba icungulo mutila, ‘Bukaca bwino mailo, pantu umuulu naukashika ce’; 3 kabili ulucelo mutila, ‘Lelo kuleba impepo ne mfula pantu umuulu naukashika ce, kabili kuli icikutuma.’ Mwalishiba ukwiluka imimonekele ya muulu, lelo tamwiluka ifishibilo fya nshita.]]*+ 4 Inkulo iyabipa kabili iishaba na cishinka kuli Lesa lyonse ifwaya icishibilo, lelo tayakapeelwe icishibilo cimbi+ kano icishibilo ca kwa Yona.”+ E ico alifuminepo no kubasha.+

5 Nomba abasambi baile kwi shilya kabili balabile ukusenda imikate.+ 6 Kabili Yesu abebele ati: “Loleni kabili cenjeleni ku citutumushi ca baFarise na baSaduke.”+ 7 E ico balalanshanya abati: “Tatusendele imikate nangu imo.” 8 Na o Yesu, apo alishibe ifyo balelanda, atile: “Mwe ba citetekelo cinono, cinshi ico mulesosela amuti tamukwete imikate? + 9 Bushe na nomba tamulailuka, nelyo bushe tamuleibukisha imikate isano iyo abantu amakana yasano (5,000) baliile ne miseke iyo mwalonganike?+ 10 Nelyo imikate cinelubali (7) iyo abantu amakana yane (4,000) baliile ne miseke iyo mwalonganike?+ 11 Nga cinshi tamwilukile ukuti nshacilamweba pa mikate? Lelo cenjeleni ku citutumushi ca baFarise na baSaduke.”+ 12 E lyo bailwike ukuti tasosele ukuti bacenjele ku citutumushi ca mikate, lelo ku fyo abaFarise na baSaduke basambilisha.+

13 Nomba ilyo aile ku fitungu fya Kaisarea Filipi, Yesu aipwishe abasambi bakwe ati: “Bushe abantu batila Umwana wa muntu nani?”+ 14 Na bo batile: “Bamo batila ni Yohane Kabatisha,+ bambi batila ni Eliya,+ bambi na bo batila ni Yeremia nelyo umo pali bakasesema.” 15 E lyo abepwishe ati: “Nga imwe mutila nine ani?”+ 16 Simone Petro a-aswike ati: “Ni mwe Kristu,+ Umwana wa kwa Lesa wa mweo.”+ 17 Na o atile: “Walipaalwa, Simone mwana Yona, pantu te bantu abasokolwele ici kuli iwe, lelo ni Tata uwaba mu muulu.+ 18 Na ine ndekweba nati, Ni we Petro,+ kabili pali ici cilibwe+ e po nkakuula icilonganino candi, ne mpongolo sha Nshiishi*+ tashakacicimfye.+ 19 Nkakupeela amakii ya bufumu bwa mu muulu, na conse ico wakaka pano isonde, ninshi balicikaka kale mu muulu, na conse ico wakakula pano isonde, ninshi balicikakula kale mu muulu.”+ 20 E lyo akonkomeshe abasambi ukuti be-eba umuntu nangu umo ukuti e Kristu.+

21 Ukufuma lilya Yesu Kristu atendeke ukulondolwela abasambi bakwe ukuti alingile ukuya ku Yerusalemu kabili abakalamba ne ntungulushi sha bashimapepo na bakalemba bakamucusha sana no kumwipaya, na pa bushiku bwalenga shitatu akabuuka.+ 22 E ico Petro amutwele ku mbali, atendeka ukumukalipila ati: “Muyumfwileko uluse mwe Shikulu; ico tacakamucitikile nakalya.”+ 23 Lelo, ilyo apilibwike, aebele Petro ati: “Kabiye ku numa yandi, we Satana we!+ Kuti waleka nalufyanya, pantu tautontonkanya ifya kwa Lesa,+ kano ifya bantu.”

24 E lyo Yesu aebele abasambi bakwe ati: “Umuntu nga alefwaya ukunkonka, aikaane umwine, asende icimuti cakwe ica bucushi, e lyo alenkonka.+ 25 Pantu onse uufwaya ukupususha umweo wakwe akaulofya; lelo onse uwalofya umweo wakwe pa mulandu wandi akausanga.+ 26 Pantu umuntu kuti amwenamo shani nga anonka icalo conse lelo alofya umweo wakwe?+ kabili cinshi ico umuntu engakabushamo umweo wakwe?+ 27 Pantu Umwana wa muntu akesa no bukata bwa kwa Wishi pamo na bamalaika bakwe, kabili akalambula umuntu onse ukulingana ne mibele yakwe.+ 28 Ndemweba icine cine nati, kuli bamo pa beminine pano abashakafwe nakalya mpaka bakamone Umwana wa muntu aleisa mu bufumu bwakwe.”+

17 Ilyo papitile inshiku mutanda (6), Yesu asendele Petro na Yakobo na Yohane munyina no kunina na bo ulupili ulutali ukwa kuti babe beka.+ 2 Kabili alyalwike ninshi balemonako, ne cinso cakwe cabekele nga kasuba,+ ne fya kufwala fyakwe fyalibekele ngo lubuuto.+ 3 Kabili, bamwene Mose na Eliya, balelanda nankwe.+ 4 Petro atile kuli Yesu: “Mwe Shikulu, kuti cawama nga twaikala pano pene. Nga mulefwaya, kuti napangapo insakwe shitatu, imo iyenu, imbi iya kwa Mose, e lyo na imbi ya kwa Eliya.”+ 5 Ilyo acili alelanda, moneni! ikumbi ilyabeka lyalibakupikile, kabili, moneni! ishiwi ukufuma mwi kumbi aliti: “Uyu e Mwana wandi, uo natemwa, uo nsekelamo;+ muumfweni.”+ 6 Awe ilyo abasambi baumfwile ifi, bawile ubukupeme kabili balitiinine nga nshi.+ 7 Awe Yesu alipaleme, kabili ilyo abakumishe, lyatile: “Imeni kabili mwitiina iyo.”+ 8 Ilyo bainwine amenso yabo, tabamwene muntu nangu umo kano fye Yesu eka.+ 9 Kabili ilyo baletentemuka ulupili, Yesu abebele ati: “Mwieba umuntu nangu umo icimonwa ici mpaka Umwana wa muntu akabuuke ku bafwa.”+

10 Lelo abasambi bamwipwishe abati: “Cinshi nomba bakalemba basosela abati Eliya afwile ukubalilapo ukwisa?”+ 11 Na o ayaswike ati: “Eliya ukwisa kwena akesa, kabili akabweseshamo ifintu fyonse.+ 12 Lelo ndemweba nati, Eliya aliisa kale lelo tabamwishibe bwino kabili bamucitile ifyo balefwaya. E fyo bakacusha no Mwana wa muntu.”+ 13 Awe abasambi bakutulwike ukuti alebeba pali Yohane Kabatisha.+

14 Kabili ilyo baile kwi bumba,+ umwaume aile kuli ena, afukama e lyo atila:15 “Mwe Shikulu, beleleni umwana wandi umwaume uluse, pantu alilwala cipumputu kabili alacula sana, pantu ilingi awila mu mulilo na mu menshi;+ 16 nacimuleta ku basambi benu lelo nabafilwa ukumuposha.”+ 17 Na o Yesu ayaswike ati: “Mwe nkulo iyabula icitetekelo kabili iyapondama,+ bushe nkaba na imwe ukufika lilali? Bushe nkashipikisha na imwe ukufika lilali? Muleteni kuno.” 18 Kabili Yesu akalipile icibanda, kabili califumine mu mulumendo,+ na o alipolele apo pene.+ 19 Awe abasambi baishile kuli Yesu ku mbali no kutila: “Cinshi ico ifwe twacifililwa ukucifumya?”+ 20 Abaswike ati: “Ni pa mulandu wa citetekelo cenu icinono. Pantu ndemweba icine cine nati, Nga mwakwata icitetekelo icilingene no luseke lwa lubanga, kuti mwaeba ulu lupili amuti, ‘Fuma pano uye kulya,’ na lo kuti lwafumapo, kabili takuli ico mwingafilwa ukucita.”+ 21 * ——

22 Kabili ilyo balongene pamo ku Galili, Yesu abebele ati: “Umwana wa muntu bali no kumufutuka no kumupeela mu minwe ya bantu,+ 23 kabili bakamwipaya, na pa bushiku ubwalenga shitatu akabuuka.”+ Awe baumfwile ubulanda nga nshi.+

24 Ilyo bafikile ku Kapernahumu, abaume babili abalesonkesha indalama sha musonko we tempele baile kuli Petro no kutila: “Bushe kasambilisha wenu alalipila indalama sha musonko* we tempele?”+ 25 Na o atile: “Alalipila.” Lelo ilyo aingile mu ng’anda, Yesu e wabalilepo ukumusosha ati: “Uletipo shani Simone? Ni kuli bani ishamfumu sha pano isonde shipoka umutuulo nelyo umusonko? Bushe ni ku bana ba shiko nelyo ni ku bantu bambi?” 26 Ilyo atile: “Ni ku bantu bambi,” Yesu amwebele ati: “Kanshi ninshi abana tabafwile ukulipila umusonko. 27 Lelo pa kuti twibakalifya,+ kabiye kuli bemba, upoosemo indobo, no kubuula isabi ilyo ulebalilapo ukuloba, kabili ilyo wa-asamuna akanwa ka liko, ulesangamo indalama ya statere. Uibuule ubapeele, usonkele ine na iwe wine.”+

18 Muli ilya nshita abasambi baile kuli Yesu no kutila: “Nani kanshi umukalamba mu bufumu bwa muulu?”+ 2 Awe aitile umwana umunono ukwisa kuli ena, amwiminike pa kati kabo+ 3 no kutila: “Ndemweba icine cine nati, Nga tamwalwike no kuba nga bana abanono,+ tamwakengile mu bufumu bwa mu muulu.+ 4 E ico onse uuleicefya+ ngo yu mwana umunono, e ukaba umukalamba mu bufumu bwa mu muulu;+ 5 kabili onse uwapokelela umwana umunono umo ngo yu pa mulandu we shina lyandi, ninshi na ine nampokelela.+ 6 Lelo onse uwafumya ku citetekelo* umo pali aba abanono abantetekela, kuti cawama bamukulika mu mukoshi icilibwe cafina ica kupelelako+ nga cilya impunda ipindulula, no kumupoosa muli bemba uwapabuka.+

7 “We bulanda ku ba pano calo pa kulenga abantu ukulufyanya!* Kwena, ifya kulenga abantu ukulufyanya fifwile ukwisa nangu cibe shani,+ lelo we bulanda ku muntu uwalenga bambi ukulufyanya!+ 8 E ico kanshi ngo kuboko kobe nelyo ulukasa lobe filekulenga ukulufyanya, fiputuleko no kufipoosa;+ cawamapo wapusuka uwa makunkutu nelyo uwalemana ukucila ukupooswa na maboko yabili nelyo amakasa yabili mu mulilo wa muyayaya.+ 9 Kabili ilinso lyobe nga lilekulenga ukulufyanya, lilobole, no kulipoosa; cawamapo wapusuka ne linso limo ukucila ukupooswa na menso yabili muli Gehena* wa mulilo.+ 10 Cenjeleni ukuti mwisuula umo pali aba abanono; pantu ndemweba nati bamalaika wabo+ mu muulu balamona lyonse icinso ca kwa Tata uwaba mu muulu.+ 11 *——

12 “Muletipo shani? Umuntu nga akwete impaanga umwanda umo (100) kabili paluba imo,+ bushe takashe amakumi pabula na pabula (99) mu mpili no kuya alefwaya imo iilubile?+ 13 Kabili nga aisanga, ndemweba icine cine nati, alasekelela nga nshi pali imo ukucila pa mpaanga amakumi pabula na pabula (99) ishishaluba.+ 14 Ifyo fine na Tata uwaba mu muulu tafwaya ukuti umo pali aba abanono alobe.+

15 “Kabili nga munonko acita ulubembu, kabiye no kumweba icilubo cakwe ninshi muli fye babili.+ Nga akuumfwa, ninshi wabwesesha munonko mu nshila.+ 16 Lelo nga tomfwile, senda umuntu na umbi nelyo babili pamo nobe, pantu inte shibili nelyo shitatu e shingashininkisha umulandu.+ 17 Nga tomfwile kuli bena, eba icilonganino. Nga tomfwile na ku cilonganino, leka abe kuli iwe ngo mwina fyalo+ kabili nga kasonkesha wa misonko.+

18 “Ndemweba icine cine nati, Fyonse ifyo mwakaka pano isonde ninshi na mu muulu nabafikaka kale, na fyonse ifyo mwakakula pano isonde ninshi na mu muulu nabafikakula kale.+ 19 Kabili ndemweba icine cine nati, Nga babili pali imwe basuminishanya pa cintu cimo icacindama ico bafwile ukulomba, Tata wa mu muulu akabacitila.+ 20 Pantu ukuli babili nelyo batatu abalonganina mwi shina lyandi,+ ninshi na ine ndi pa kati kabo.”+

21 E lyo Petro aishile no kumweba ati: “Mwe Shikulu, miku inga ningabelela munyinane uluse nga andufyanya?+ Bushe miku cinelubali (7)?”+ 22 Yesu atile kuli ena: “Nshilekweba nati, imiku cinelubali (7), lelo imiku amakumi cinelubali na cinelubali (77).+

23 “E mulandu wine ubufumu bwa mu muulu bwabela kwati ni mfumu,+ iyalefwaya abasha ba iko ukubwesha inkongole.+ 24 Ilyo yatendeke ukubalubulwisha, bailetele umuntu uwaikwatile inkongole amatalanti amakana ikumi (10,000) [e kutila amadenari* 60,000,000]. 25 Lelo pa mulandu wa kuti takwete umwa kubwesesha inkongole, shikulu wakwe asosele ukuti bamushitishe no mukashi wakwe na bana bakwe na fyonse ifyo akwete no kubwesha inkongole.+ 26 Awe umusha awile pa nshi, alapapaata ati, ‘Mukwai bandoleleko, nkamubwesesha fyonse.’27 Awe shikulu wakwe amumfwilile uluse, amuleka+ no kusuulako ku nkongole shakwe.+ 28 Lelo ulya musha alifumine no kuyasanga umo pa basha banankwe uwamukwatile inkongole amadenari umwanda umo (100);+ kabili alimufyambete, atendeke ukumukama pa mukoshi, ati, ‘Bwesha inkongole shandi shonse.’29 Awe umusha munankwe awile pa nshi, alamupapaata, ati, ‘Undoleleko,+ nkakubwesesha.’ 30 Lelo alikeene, kabili ailemukakisha mu cifungo mpaka akabweshe inkongole akwete. 31 E ico ilyo abasha banankwe bamwene ifyacitike, baumfwile ubulanda nga nshi, kabili baileshimikila shikulwibo fyonse ifyacitike.+ 32 Awe shikulu wakwe e pa kumwita no kumweba ati, ‘We musha mubi we, nacisuulako ku nkongole shobe shonse ilyo wacimpapaata. 33 Bushe na iwe taufwile ukubelela umusha munobe uluse,+ ifyo na ine nkubelele uluse?’+ 34 E ico shikulu wakwe pa mulandu wa kuti alifulilwe,+ amupeele ku balinshi ba cifungo, mpaka akabwesha inkongole shonse isho akwete. 35 E fyo+ na Tata wa mu muulu akamucita nga tamubelela bamunyinenwe uluse ne mitima yenu yonse.”+

19 Nomba ilyo Yesu apwishishe ukulanda aya mashiwi, afumine ku Galili no kuya ku mipaka ya Yudea kwi shilya lya Yordani.+ 2 Na mabumba ayakalamba yalimukonkele, na o abondapiile kulya kwine.+

3 E lyo abaFarise baishile kuli ena, balefwaya ukumwesha, kabili batile: “Bushe calisuminishiwa umuntu ukuleka umukashi wakwe pa mulandu fye onse?”+ 4 Na o abaswike ati: “Bushe tamwabelenga ukuti uwababumbile pa kutendeka ababumbile umwaume no mwanakashi,+ 5 kabili atile, ‘E mulandu wine umwaume akashiila wishi na nyina+ no kulambatila ku mukashi wakwe, kabili aba babili bakaba umubili umo’?+ 6 E ico tabali babili na kabili iyo, lelo bali umubili umo. Kanshi, ico Lesa alundenye, umuntu e cilekanya.”+ 7 Na bo bamwebele abati: “Nga kanshi cinshi Mose alandile ukuti umulume kuti apeela umukashi kalata wa kumutamfya no kumuleka?”+ 8 Atile kuli bena: “Ni pa mulandu wa kukosa kwa mitima yenu,+ e co Mose amusuminishishe ukuleka abakashi benu, lelo te fyo cali pa kutendeka.+ 9 Ndemweba nati, onse uwaleka umukashi wakwe, apashili umulandu wa bulalelale, aupa na umbi, ninshi acita ubucende.”+

10 Abasambi batile kuli ena: “Kanshi nga e fyo caba ifi ku mwaume no mukashi wakwe, cawamapo ukukanaupa.”+ 11 Na o abebele ati: “Te bantu bonse abengekala ukwabula ukuupa, kano fye abakwata ici cine ica bupe.+ 12 Pantu kwaba abantu abashaba na maka ya kuupa ukufuma fye pa kufyalwa,+ kabili kwaba bamo abatungulwa fye ku bantu, e lyo kwaba na basalapo ukukanaupa pa mulandu wa bufumu bwa mu muulu. Uwingekala ukwabula ukuupa, naekale ifyo fine.”+

13 Awe kwali abaletele abana abanono kuli Yesu, pa kuti abike iminwe yakwe pali bena no kubapepelako; lelo abasambi balibakalipile.+ 14 Lelo, Yesu atile: “Lekeni abana abanono, mwilabalesha ukwisa kuli ine, pantu ubufumu bwa mu muulu bwa bantu ababa kwati ni aba bana.”+ 15 Awe ilyo abikile iminwe yakwe pali bena, alifumineko.+

16 Kabili moneni! umuntu umo aishile kuli ena no kutila: “Mwe Kasambilisha, fintu nshi ifisuma ifyo mfwile ukucita pa kuti nkakwate umweo wa muyayaya?”+ 17 Na o atile kuli ena: “Mulandu nshi ulenjipushisha pa fisuma? Kwaba fye umusuma Umo.+ Lelo nga ulefwaya ukupusuka, ulekonka amafunde.”+ 18 Na o amwipwishe ati: “Mafunde nshi?”+ Yesu atile: “Wilaipaya,+ Wilacita ubucende,+ Wilaiba,+ Wilaba inte ya bufi,+ 19 Ulecindika wiso na noko,+ kabili, Uletemwa umunobe nge fyo waitemwa we mwine.”+ 20 Umulumendo atile kuli ena: “Ndakonka ifi fyonse. Bushe finshi fimbi mfwile ukucita?” 21 Yesu atile kuli ena: “Nga ulefwaya ukuba uwapwililika, kashitishe ifyuma fyobe no kupeela abapiina indalama, kabili ukakwata icuma mu muulu,+ e lyo wise ube umusambi wandi.”+ 22 Ilyo umulumendo aumfwile aya mashiwi, alifuminepo ninshi naikatwa ubulanda, pantu alikwete ifyuma ifingi.+ 23 Lelo Yesu atile ku basambi bakwe: “Ndemweba icine cine nati, cikaba icayafya ku wa fyuma ukwingila mu bufumu bwa mu muulu.+ 24 Kabili ndemweba nati, Cayangukapo ku ngamila ukupula mu linso lya nshindano ukucila uwa fyuma ukwingila mu bufumu bwa kwa Lesa.”+

25 Ilyo abasambi baumfwile ici, balipapile nga nshi abati: “Nga kanshi nani engapusuka?”+ 26 Ilyo Yesu abaloleshe pa menso, abebele ati: “Abantu bena teti bacite ici, lelo Lesa kuti acita ifintu fyonse.”+

27 E lyo Petro amwipwishe ati: “Moneni! Twalisha fyonse no kumukonka; finshi ifwe tukakwata?”+ 28 Yesu atile kuli bena: “Ndemweba icine cine nati, Ilyo ifintu fikabumbwa cipya cipya, ilyo Umwana wa muntu akekala pa cipuna cakwe ica bufumu ica bukata, na imwe bene mwe bankonka mukekala pa fipuna fya bufumu ikumi na fibili (12), no kupingula imikowa ikumi na ibili iya kwa Israele.+ 29 Na onse uwasha amayanda nelyo bamunyina nelyo inkashi nelyo wishi nelyo nyina nelyo abana nelyo amabala pa mulandu we shina lyandi, akapokelela ifingi nga nshi e lyo no mweo wa muyayaya.+

30 “Lelo abengi aba ntanshi bakaba aba kulekelesha, na ba kulekelesha bakaba aba ntanshi.+

20 “Pantu ubufumu bwa mu muulu bwaba kwati mwine we bala, uwafumine kacelocelo ku kufwaya ababomfi aba kubomba mwi bala lyakwe ilya myangashi.+ 2 Ilyo aumfwene na babomfi ukuti ali no kubalipila denari* umo pa bushiku bumo,+ abatumine mwi bala lyakwe ilya myangashi. 3 Kabili ilyo afumine nalimo pe awala lyalenga butatu,+ amwene bambi abashakwete incito nabeminina pa maliketi;+ 4 kabili abebele ati, ‘Na imwe bene kabiyeni mwi bala lya myangashi, kabili ndemupeela amalipilo ayalingile.’ 5 Awe baliile. Alifumine na kabili nalimo pe awala lyalenga mutanda (6)+ ne lyalenga pabula (9)+ no kucita cimo cine. 6 Pa kulekelesha, nalimo pe awala ilyalenga ikumi na limo (11),* alifumine no kusanga na bambi nabeminina, kabili abepwishe ati, ‘Nga cinshi mwiminine pano akasuba konse ukwabula incito?’ 7 Bamwaswike abati, ‘Pantu tapali uwa kutwingisha incito.’ Na o abebele ati, ‘Na imwe bene kabiyeni mwi bala lya myangashi.’+

8 “Ilyo cali icungulo,+ umwine we bala lya myangashi aebele kapitao wakwe ati, ‘Ita ababomfi no kubalipila amalipilo yabo,+ ukutendekela pa ba kulekelesha no kwisafika pa ba ntanshi.’ 9 Ilyo abatendeke ukubomba pe awala lyalenga ikumi na limo (11) baishile, abapeele cila muntu denari umo. 10 E ico ilyo aba ntanshi baishile, baletontonkenya ukuti alabapeela amalipilo ayengi; lelo na bo bene amalipilo abapeele ni denari umo. 11 Awe ilyo bapokelele, batendeke ukuilishanya ku mwine we bala+ 12 abati, ‘Aba abalekelesha babombele fye iawala limo; lelo mwabapeela shimo shine na ifwe, fwe babombeshe akasuba konse no kupya ku kasuba!’13 Lelo ayaswike umo pali bena ati, ‘Mune, nshikulufyenye iyo. Bushe tatwacumfwana ati ndekulipila denari umo?+ 14 Senda denari obe, kabiye. Ndefwaya ukupeela uyu uwa kulekelesha denari umo wine nga iwe.+ 15 Bushe nshikwete insambu sha kucita ifyo ndefwaya ku fintu fyandi? Bushe napamo ni co waba ne linso ilibi+ e co wamfulilwa apo ine ndi muntu umusuma?’+ 16 E fyo na ba kulekelesha bakaba aba ntanshi, na ba ntanshi bakaba aba kulekelesha.”+

17 Ilyo nomba inshita yapaleme iya kuya ku Yerusalemu, Yesu asendele abasambi+ ikumi na babili (12) ku mbali no kubeba mu nshila ati: 18 “Namwishiba, tuleya ku Yerusalemu, kabili bali no kupeela Umwana wa muntu ku ntungulushi sha bashimapepo na bakalemba, kabili bakamupingwila ukufwa,+ 19 no kumupeela ku bena fyalo pa kuti bamupumye no kumufopaula no kumupoopela pa cimuti,+ kabili pa bushiku bwalenga shitatu akabuuka.”+

20 E lyo nyina wa bana ba kwa Sebede+ aile kuli ena na bana bakwe, afukama no kumulomba fimo.+ 21 Na o amwipwishe ati: “Cinshi ulefwaya?” Kabili ayaswike ati: “Soseni ukuti aba bana bandi babili bakekale, umo ku kulyo kwenu na umbi ku kuso kwenu, mu bufumu bwenu.”+ 22 Na o Yesu atile: “Tamwishibe ifyo mulelomba. Bushe kuti mwanwa ifili muli kapu+ iyo nalanwenamo nomba line?” Bamwaswike abati: “Kuti twanwa.” 23 Na o atile kuli bena: “Kwena mukanwa ifili muli kapu+ yandi, nomba ukwikala ku kulyo kwandi na ku kuso kwandi te ine mpeela, lelo abo Tata apekanishisha e bo bakapeela.”+

24 Ilyo abasambi bambi ikumi (10) baumfwile ifi, bafuliilwe aba bwananyina babili.+ 25 Lelo Yesu, ilyo abetile, abebele ati: “Mwalishiba ukuti ishamfumu sha bena fyalo shiteka abantu bashiko kwati basha kabili intungulushi na sho shititikisha abo shitungulula.+ 26 Te fyo cifwile ukuba kuli imwe;+ lelo onse uufwaya ukuba umukalamba pali imwe, afwile ukulamubombela,+ 27 na onse uufwaya ukuba uwa ntanshi pali imwe, afwile ukuba umusha wenu.+ 28 Nge fyo no Mwana wa muntu taishile ukuti balemubombela, lelo aishile mu kubombela+ abantu no kupeela umweo wakwe icilubula pa kuti alubule abengi.”+

29 Nomba ilyo balefuma mu Yeriko,+ ibumba ilikalamba lyalimukonkele. 30 Kabili, moneni! impofu shibili shaikele mu mbali ya musebo. Ilyo shaumfwile ukuti Yesu alepita, shabilikishe ashiti: “Tubeleleniko uluse, mwe Shikulu, Mwana Davidi!”+ 31 Awe ibumba lyalishikalipile ukuti shitalale; lelo e lyo shacilile ukubilikisha ashiti: “Tubeleleniko uluse, mwe Shikulu, Mwana Davidi!”+ 32 E ico Yesu aliminine, ashiita ati: “Cinshi ico mulefwaya ukuti imucitile?” 33 Shatile kuli ena: “Mwe Shikulu, shibuleni amenso yesu.”+ 34 Awe Yesu aumfwile uluse kabili ashikumishe pa menso.+ Na po pene shalitendeke ukumona, kabili shalimukonkele.+

21 Awe ilyo bapaleme ku Yerusalemu no kufika pa Betifage pa Lupili lwa Miolife, Yesu atumine abasambi babili,+ 2 no kutila kuli bena: “Kabiyeni mu mushi ulya pa ntanshi, kabili ilyo mwaingila fye, mwalasanga impunda nabaikaka, pamo no mwana wa iko; mushikakule no kushileta kuli ine.+ 3 No muntu nga amwipusha, mutile, ‘Shikulu aleshifwaya.’ Na o alemupeela ilyo line.”

4 Kabili ici cacitike pa kuti cifikilishiwe icalandilwe muli kasesema ati: 5 “Ebeni umwana mwanakashi Sione amuti, ‘Mona! Imfumu yobe ileisa kuli iwe,+ yalifuuka,+ kabili ininine pa mpunda, pa mwana wa mpunda, umwana wa citekwa icisenda ifipe.’”+

6 E ico abasambi balimine no kuyacita filya fine Yesu abebele. 7 Kabili baletele impunda no mwana wa iko, babikilepo ne fya kufwala fyabo, na o e po aikele.+ 8 Abengi abali mwi bumba bayanshike ifya kufwala+ fyabo mu musebo, e lyo bambi bakontwele imisambo ku miti no kuyanshika mu musebo.+ 9 Na mabumba ya bantu ayali pa ntanshi yakwe, na yalekonka pa numa yalabilikisha ayati: “Pususheni,+ Mwana Davidi!+ Alipaalwa uuleishila mwi shina lya kwa Yehova!+ Tulepepa kuli imwe mwe baikala mu muulu atuti, mupususheni!”+

10 Nomba ilyo aingile mu Yerusalemu,+ mu musumba onse mwakabile na se ku congo, ilyo abantu baletila: “Ngo yu muntu nani?” 11 Na mabumba ya bantu yalasosa ayati: “Uyu e kasesema+ Yesu, uwa ku Nasarete wa mu Galili!”

12 Kabili Yesu aingile mwi tempele no kutamfyamo bonse abaleshitisha na baleshita mwi tempele, kabili apenwine amatebulo ya balekabushanya indalama e lyo ne fipuna fya baleshitisha inkunda.+ 13 Kabili atile kuli bena: “Calembwa ati, ‘Ing’anda yandi iketwa ing’anda ya kupepelamo,’+ lelo imwe muleisangula ulucengo lwa fipondo.”+ 14 Kabili impofu na balemana baishile kuli ena mwi tempele, na o alibondepe.

15 Ilyo intungulushi sha bashimapepo na bakalemba bamwene ifya kupapusha ifyo acitile+ na baice abalebilikisha mwi tempele abati: “Pususheni,+ Mwana Davidi!”+ balifulilwe 16 no kutila kuli ena: “Bushe uleumfwa ifyo aba balesosa?” Yesu abebele ati: “Ee. Bushe tamwabelenga+ ifyo calembwa ati, ‘Mwalenga utunwa twa bana abanono na bonka ukumulumbanya’?”+ 17 Kabili ilyo abashile, afumine ku nse ya musumba no kuya ku Betani kabili e ko asendeme.+

18 Ilyo alebwelela ku musumba lucelocelo, aumfwile insala.+ 19 Awe amwene umukunyu mu mbali ya musebo, no kuyako, lelo tasangileko nangu kamo+ kano fye amabuula yeka yeka, e lyo atile kuli wena: “Wikatala autwala ifisabo na kabili umuyayaya.”+ Kabili umukunyu walyumine apo pene. 20 Lelo ilyo abasambi bamwene ifi, balipapile, abati: “Wauma shani umukunyu apa pene?”+ 21 Na o Yesu abaswike ati: “Ndemweba icine cine nati, Nga mwaba fye ne citetekelo kabili tamuletwishika nakalya,+ tamwakacite fye ico ncitile ku mukunyu uyu, lelo nga mwaeba ulu lupili amuti, ‘Fuma apa no kuipoosa muli bemba,’ cikacitika ifyo fine.+ 22 Na fyonse ifyo mwalomba ilyo mulepepa, nga muli ne citetekelo, mukapokelela.”+

23 Nomba ilyo aingile mwi tempele, intungulushi sha bashimapepo na bakalamba ba bantu baishile kuli ena ilyo alesambilisha no kusosa abati:+ “Ni ku maka nshi ucitila ifi fintu? Kabili nani akupeela aya maka?”+ 24 Na o Yesu abaswike ati: “Na ine nalamwipushako icintu cimo. Nga mwanjeba, na ine nalamweba amaka ayo ncitilako ifi fintu:+ 25 Ulubatisho lwa kwa Yohane, lwafumine kwi? Bushe ni ku muulu nelyo ni ku bantu?”+ Lelo balalanshanya abene beka abati: “Nga twatila, ‘Ni ku muulu,’ alatweba ati, ‘Nge co mushamusuminine cinshi?’+ 26 Lelo nga twatila, ‘Ni ku bantu,’ ibumba talyatuleke,+ pantu bonse baishiba ukuti Yohane ni kasesema.”+ 27 E ico bayaswike Yesu abati: “Tatwishibe.” Na o abebele ati: “Na ine wine nshamwebe amaka ayo ncitilako ifi fintu.+

28 “Muletipo shani? Umuntu ali na bana babili.+ Ilyo aile ku wa ntanshi, amwebele ati, ‘We mwana, kabiye kabombe mwi bala lya myangashi lelo.’ 29 Na o a-aswike ati, ‘Ee mukwai, nalaya,’+ lelo taileko. 30 Aile ku mwana umbi no kumweba fimo fine. Uyu ena ayaswike ati, ‘Nshayeko.’ Nomba pa numa ashele alanguluka,+ kabili alile no kuyabomba. 31 Nani pali aba babili acitile ico wishi alefwaya?”+ Batile: “Uwaile mu kubomba.” Na o Yesu abebele ati: “Ndemweba icine cine nati, bakasonkesha ba misonko na bacilende balemutangilila mu bufumu bwa kwa Lesa. 32 Pantu Yohane aishile kuli imwe mu kumulanga inshila ya bulungami,+ lelo tamwamusumine.+ Nomba bakasonkesha ba misonko na bacilende balimusumine,+ lelo imwe, nangu ca kutila mwalimwene ifi, tamwalangulwike pa numa no kumusumina.

33 “Umfweni icilangililo na cimbi: Kwali umuntu, uwakwete ibala,+ uwalimine mwi bala lyakwe imyangashi no kushingulushako ilinga no kwimbamo umwa kukamina imyangashi, akuulile no lupungu,+ kabili aliseekeshe ku balimi no kuya ku calo ca kutali.+ 34 Ilyo ifisabo fyapile, atumine abasha bakwe ku balimi ku kupoka ifisabo fyakwe. 35 Lelo abalimi baikete abasha bakwe, kabili umo balimupumine, umbi balimwipeye, umbi na o balimupoolele amabwe.+ 36 Atumine kabili abasha na bambi, abengi ukucila aba ntanshi, lelo bacitile cimo cine na kuli aba.+ 37 Pa kulekelesha, atumine umwana wakwe umwaume kuli bena, ati, ‘Umwana wandi ena bakamucindika.’ 38 Ilyo abalimi bamwene umwana balilanshenye abati, ‘Uyu e mpyani,+ natumwipaye pa kuti tupoke ibala!’*+ 39 Awe balimusendele no kumufumisha ku nse ye bala lya myangashi no kumwipaya.+ 40 E ico, ilyo umwine we bala lya myangashi akesa, akabacita shani abo balimi?” 41 Na bo bamwebele abati: “Pa mulandu wa kuti babi, akabonaula+ icabipisha kabili akaseekesha ne bala lya myangashi ku balimi bambi, abakamupeela ifisabo ilyo fyapya.”+

42 E lyo Yesu abepwishe ati: “Bushe tamwabelenga mu Malembo ukuti, ‘Ilibwe ilyo bakakuula bakeene+ e lyaba pa muulu pa koona.+ Yehova e wacita ici cintu, kabili ca kupapa mu menso yesu’? 43 E mulandu wine ndemwebela nati, Bakamupoka ubufumu bwa kwa Lesa no kubupeela ku luko ulutwala ifisabo fya buko.+ 44 Kabili umuntu onse uwaponena pe libwe ili, akafungaika. Na onse uo lyaponenapo, likamushonaula.”+

45 Nomba ilyo intungulushi sha bashimapepo na baFarise baumfwile ifilangililo fyakwe, bailwike ukuti e bo alelandapo.+ 46 Lelo nangu ca kuti balefwaya ukumwikata, balitiinine amabumba ya bantu, pantu abantu baishibe ukuti ni kasesema.+

22 Yesu na kabili alandile kuli bena mu filangililo ati:+ 2 “Ubufumu bwa kwa Lesa bwaba kwati ni mfumu, iyapekanishishe umwana wa iko umwaume umutebeto+ wa bwinga. 3 Kabili yatumine abasha ba iko ku kuyaeba abaitilwe ku mutebeto+ wa bwinga ukuti bese, lelo balikeene ukwisa.+ 4 Atumine na kabili abasha+ bambi ati, ‘Kebeni abo naita amuti: “Moneni! Nimpekanya umutebeto+ wandi, ninjipaya ing’ombe shandi ne nama ishaina, na fyonse nabapekanya. Iseni ku mutebeto wa bwinga.”’+ 5 Lelo tababikileko amano kabili balifuminepo, umo aile kwi bala lyakwe, umbi na o ku bukwebo bwakwe;+ 6 lelo abashala, baikete abasha bakwe, babacusha no kubepaya.+

7 “Lelo imfumu yalikalipe, kabili yatumine abashilika ba iko na bo baipeye balya bakepaya no koca umusumba wabo.+ 8 E lyo yaebele abasha ba iko aiti, ‘Umutebeto wa bwinga wena naupekanishiwa, lelo abetilwe tabalingile.+ 9 E ico kabiyeni mu misebo iyafuma mu musumba, na bonse abo mulesanga mubete bese ku mutebeto wa bwinga.’+ 10 Awe balya basha baile mu misebo no kulonganika bonse abo basangile, ababifi pamo na basuma;+ no muputule wa kusefeshamo ubwinga waiswilemo abaikele+ pe tebulo.

11 “Ilyo imfumu yaingile pa kuti imone abaishile, yamwene umuntu uushafwele ica kufwala ca ku bwinga.+ 12 E ico yamwebele aiti, ‘Mune, bushe wingile shani muno, ukwabula ica kufwala ca ku bwinga?’+ Na o akutumene fye. 13 E lyo imfumu yaebele ababomfi ba iko aiti, ‘Mukakeni amolu na maboko no kumupoosa pa nse mu mfifi. Kulya e kwalaba ukulila no kusumanya ameno.’+

14 “Pantu abaitwa bengi, lelo abasalwa banono.”+

15 E lyo abaFarise baile no kumfwana ukuti bamwikatile mu milandile yakwe.+ 16 E ico batumine abasambi babo kuli Yesu, pamo na ba mu kabungwe ka kwa Herode,+ abati: “Mwe Kasambilisha, twalishiba ukuti mulanda icishinka kabili musambilisha inshila ya kwa Lesa mu cine, kabili tamutiina umuntu nangu umo, pantu tamulolesha pa mimonekele ya bantu.+ 17 Nomba twebeni, Muletipo shani? Bushe calisuminishiwa ukusonka umusonko kuli Kaisare nelyo iyo?”+ 18 Nomba pa mulandu wa kuti alishibe ukuti bali ni mbifi, atile: “Mulandu nshi mulenjesesha, mwe ba bumbimunda?+ 19 Nangeni indalama musonkela umusonko.” Awe bamutwaliile denari imo. 20 Na o abepwishe ati: “Bushe uyu mutwe uuli apa ne fi balembapo fya kwa nani?”+ 21 Batile: “Fya kwa Kaisare.” E lyo abebele ati: “E ico peeleni ifya kwa Kaisare kuli Kaisare, ne fya kwa Lesa kuli Lesa.”+ 22 Awe ilyo baumfwile ifi, balipapile, kabili balimushile no kuya.+

23 Pa bushiku bulya, abaSaduke, abatila takwaba ukubuuka ku bafwa, baishile kuli ena no kumwipusha abati:+ 24 “Mwe Kasambilisha, Mose atile, ‘Umuntu nga afwa ukwabula ukufyala abana, munyina afwile ukuupa umukashi wakwe no kufyalila munyina abana.’+ 25 Nomba kwali aba bwananyina cinelubali (7) abali na ifwe; kabili uwa ntanshi alyupile no kufwa, kabili apo takwete abana, ashilile munyina umukashi wakwe.+ 26 E fyo cali na ku wa bubili e lyo no wa butatu, kabili ifi fine e fyo cali na kuli bonse cinelubali (7).+ 27 Pa kulekelesha, umwanakashi alifwile. 28 Nomba mu kubuuka kwa bafwa, akaba umukashi wa kwa nani pali balya cinelubali (7)? Pantu bonse balimuupilepo.”+

29 Na o Yesu abaswike ati: “Mwaliluba, pantu tamwaishiba Amalembo nelyo amaka ya kwa Lesa;+ 30 pantu mu kubuuka kwa bafwa, abaume taboopa nangu abanakashi ukuupwa,+ lelo baba nga bamalaika mu muulu. 31 Kabili pa mulandu wa kubuuka ku bafwa, bushe tamwabelenga ifyo Lesa alandile kuli imwe ati,+ 32 ‘Nine Lesa wa kwa Abrahamu kabili Lesa wa kwa Isaki kabili Lesa wa kwa Yakobo’?+ Te Lesa wa bafwa iyo, lelo ni Lesa wa ba mweo.”+ 33 Awe ilyo amabumba yaumfwile ifi, yalipapile nga nshi pa misambilishishe yakwe.+

34 Ilyo abaFarise baumfwile ukuti atalalika abaSaduke, baishile capamo ibumba limo. 35 Awe umunabo umo, uwaishibishe Amafunde,+ aipwishe Yesu pa kuti amweshe ati: 36 “Mwe Kasambilisha, lifunde nshi ilikalamba mu Mafunde yonse?”+ 37 Na o amwebele ati: “‘Uletemwa Yehova Lesa obe no mutima obe onse, no mweo obe onse, no kutontonkanya kobe konse.’+ 38 Ili e funde ilikalamba kabili e lya ntanshi. 39 Ilya cibili, ilyapalana ne li, litila, ‘Uletemwa umunobe nge fyo waitemwa we mwine.’+ 40 Pali aya amafunde yabili e pashintilila Amafunde yonse ne fyebo fya Bakasesema.”+

41 Nomba ilyo abaFarise balongene pamo, Yesu abepwishe ati:+ 42 “Muletipo shani pali Kristu? Bushe Mwana wa kwa nani?” Bamwebele abati: “Wa kwa Davidi.”+ 43 Na o abepwishe ati: “Nga cinshi Davidi, ilyo apokelele umupashi wa mushilo+ amwitile ati ‘Shikulu,’ ilyo asosele ati, 44 ‘Yehova aebele Shikulu ati: “Ikala ku kwa kulyo kwandi mpaka nkabike abalwani bobe pe samba lya makasa yobe”’?+ 45 E ico nga Davidi amwitile ati ‘Shikulu,’ kuti aba shani umwana wakwe?”+ 46 Awe tapali nangu umo uwali na maka ya kumwasuka, nangu uwapamine ukumwipusha na kabili ukufuma pali bulya bushiku.+

23 E lyo Yesu aebele amabumba ya bantu na basambi+ bakwe ati: 2 “Bakalemba+ na baFarise baikala pa cipuna ca kwa Mose.+ 3 E ico fyonse ifyo bamweba,+ mulecita kabili mulekonka, lelo mwilapashanya imicitile yabo,+ pantu balanda fye lelo tabacita ifyo balanda. 4 Bakaka ifipe ifyafina no kufitwika pa mabeya ya bantu,+ lelo bena tabafwaya no kufimya nangu fye ku munwe umo.+ 5 Imilimo yonse iyo bacita, bacita pa kuti abantu babamone;+ pantu balakusha sana utubokoshi+ twa malembo uto bafwala ngo bucingo, no kukusha sana insenkebele+ sha ku fya kufwala fyabo. 6 Balitemwa ukwikala apacindama+ pa kulya umulaalilo no kwikala pa fipuna fya ku ntanshi mu masunagoge,*+ 7 kabili balitemwa ukuti abantu balebaposha+ pa maliketi no kubeta ati Bakasambilisha.*+ 8 Lelo imwe, mwileka abantu balemwita ati Bakasambilisha, pantu mwakwata fye kasambilisha umo,+ na imwe bonse muli ba bwananyina. 9 Kabili mwi-ita umuntu nangu umo pano isonde ati shifwe, pantu Shinwe umo,+ Uwa mu muulu. 10 Kabili mwileka abantu balemwita ati ‘intungulushi,’+ pantu Intungulushi yenu imo, Kristu. 11 Lelo umukalamba pali imwe afwile ukuba umubomfi+ wenu. 12 Onse uwaicindamika bakamuceefya,+ na onse uuiceefya bakamucindamika.+

13 “We bulanda kuli imwe, mwe bakalemba na baFarise, mwe ba bumbimunda mwe! pantu mwisalila+ abantu ukuti beingila mu bufumu bwa mu muulu; pantu mwe+ bene tamwingilamo, kabili tamusuminisha abalefwaya ukwingila. 14 * ——

15 “We bulanda kuli imwe, mwe bakalemba na baFarise, mwe ba bumbimunda mwe!+ pantu mwabuka babemba no kupwa imilundu yonse pa kuti mupatikishe umuntu ukusumina imipepele yenu, kabili ilyo asumina mumulenga ukuti abipishe ukucila imwe, wakuya fye ku Gehena.*

16 “We bulanda kuli imwe, mwe ntungulushi mpofu,+ mwe batila, ‘Umuntu nga alapa ati napali itempele, ninshi te mulandu nangu ca kutila tacitile ifyo alapile; lelo uwalapa ati napali golde iyaba mwi tempele, ena ninshi mulandu nga tacitile ukulingana ne fyo alapile.’+ 17 Mwe bawelewele, kabili mwe mpofu mwe! Bushe cinshi cacindamapo? Bushe ni golde nelyo litempele ilyalenga golde ukuba iya mushilo?+ 18 Kabili mutila, ‘Umuntu nga alapa ati napali iciipailo, ninshi te mulandu nangu tacitile ifyo alapile; lelo umuntu nga alapa ati napali ica bupe icilipo, ninshi afwile ukucita ukulingana ne fyo alapa.’ 19 Mwe mpofu mwe! Na kuba, cinshi cakulapo? Bushe ca bupe nelyo ciipailo+ icilenga ica bupe ukuba ica mushilo? 20 E ico uwalapa ati napali iciipailo ninshi alapa iciipailo na fyonse ifilipo; 21 no walapa ati napali itempele ninshi alapa itempele kumo no wikalamo;+ 22 no walapa ati napali umuulu ninshi alapa icipuna ca bufumu ica kwa Lesa+ kumo no waikalapo.

23 “We bulanda kuli imwe, mwe bakalemba na baFarise, mwe ba bumbimunda mwe! pantu mupeela ica pe kumi (10)+ ica minte na dilu na kumini.* Lelo mwalisuula ifyacindama ifyaba mu Mafunde, e kutila, umulinganya+ no luse+ ne cishinka.+ Kwena mufwile ukulacita ifi fintu, lelo tamufwile ukusuula ifintu fimbi iyo. 24 Mwe ntungulushi mpofu,+ mwe bafumya akashiishi+ mu fyo mulenwa lelo mumina ingamila!+

25 “We bulanda kuli imwe, mwe bakalemba na baFarise, mwe ba bumbimunda mwe! pantu muwamya ku nse ya kapu+ ne mbale, lelo mu kati mwaisula ubucenjeshi+ no kukanailama. 26 We muFarise impofu,+ ubale usamfye mu kati ka kapu+ ne mbale, pa kuti na ku nse kuwame.

27 “We bulanda kuli imwe, mwe bakalemba na baFarise, mwe ba bumbimunda mwe!+ pantu mwaba nge nshiishi ishashingulwako impemba,+ ishimoneka ishayemba icine cine ku nse lelo mu kati shaisulamo amafupa ya bafwa no kukowela konse. 28 E fyo na imwe ku nse mumoneka abalungama icine cine ku bantu,+ lelo mu mitima mwaisula ubumbimunda no bubifi.

29 “We bulanda kuli imwe, mwe bakalemba na baFarise, mwe ba bumbimunda mwe!+ pantu mukuula inshiishi sha bakasesema no kuyemfya inshiishi sha balungami,+ 30 kabili mutila, ‘Atubako mu nshiku sha fikolwe fyesu, nga tatwasuumishe na bo umulopa wa bakasesema.’+ 31 E ico muleishinina fye mwe bene ukuti muli bana ba baipeye bakasesema.+ 32 Kanshi pwisheni umulimo ifikolwe fyenu fyatampile.

33 “Mwe nsoka mwe, mwe bana ba mafwafwa mwe,+ mukafulumuka shani ubupingushi bwa ku Gehena?+ 34 E mulandu wine ndemutumina+ bakasesema na ba mano na bakasambilisha ba bantu.+ Mukepayapo+ bamo no kubapoopela pa fimuti, e lyo bambi bena mukabafopaula+ mu masunagoge* yenu no kubacusha mu musumba no musumba;35 pa kuti mukapingulwe pa mulopa onse uwalungama uo basuumya pano isonde,+ ukufuma ku mulopa wa kwa Abele+ umulungami+ ukufika ku mulopa wa kwa Sekaria umwana wa kwa Barakia, untu mwaipaile pa kati ke tempele ne ciipailo.+ 36 Ndemweba icine cine nati, Fyonse ifi fikesa pa nkulo ino.+

37 “We Yerusalemu, we Yerusalemu, we wipaya bakasesema+ no kupoola amabwe+ abo bakutumina!+ Ifyo imiku iingi nafwaile ukulonganika abana bobe, filya nankoko afukatila utwana twakwe mu mapindo yakwe!+ Lelo imwe tamwalefwaya.+ 38 Moneni! Ing’anda*+ yenu yalekeleshiwa kabili yamushalila icibolya.+ 39 Pantu ndemweba nati, ine tamwakaamone na kabili ukutula pali nomba mukasuke amutila, ‘Alipaalwa uuleishila mwi shina lya kwa Yehova!’”+

24 Nomba ilyo Yesu aleya ukufuma mwi tempele, abasambi bakwe baile kuli ena pa kuti bamulange ifikuulwa fya pe tempele.+ 2 Na o abebele ati: “Bushe mwafimona ifi fyonse? Ndemweba icine cine nati, Tapakashalepo ilibwe apa nakalya pa muulu wa libiye ilishakapooswe pa nshi.”+

3 Ilyo aikele pa Lupili lwa Miolife, abasambi baishile kuli ena ku mbali, no kumwipusha abati: “Twebeni, Ni lilali ifi fintu fikabako, kabili cinshi tukeshibilako ukuti e po muli+ no kuti icalo cili ku mpela?”*+

4 Na o Yesu abaswike ati: “Cenjeleni ukuti umuntu nangu umo ekamubepa;+ 5 pantu abengi bakeshila mwi shina lyandi, abati, ‘Nine Kristu,’ kabili bakalufya abengi.+ 6 Mukomfwa pa lwa nkondo mupepi no kutali; cenjeleni ukuti mwikatiina. Pantu ifi fintu fifwile ukucitika, ilyo impela tailaisa.+

7 “Pantu uluko lukemina uluko lubiye+ no buteko bukemina ubuteko bubiye,+ kabili kukaba ifipowe+ ne finkukuma+ mu ncende shimo shimo. 8 Fyonse ifi e kutendeka kwa bucushi ubukaba ngo kucula kwa pa kupaapa.

9 “Kabili abantu bakamucusha+ kabili bakamwipaya,+ kabili abantu ba mu nko shonse bakamupata+ pa mulandu we shina lyandi.+ 10 E lyo abengi bakalufya icitetekelo+ kabili bakalabepeshanya no kupatana.+ 11 Na bakasesema+ ba bufi abengi bakema no kulufya abengi;+ 12 kabili pa mulandu wa kufulisha kwa bubi,+ ukutemwa kwa bengi kukacepa.+ 13 Lelo uwashipikisha+ ukufika na ku mpela, e ukapusuka.+ 14 Ne mbila nsuma+ iyi iya bufumu+ ikabilwa ku bantu bonse aba pe sonde ku kuba ubunte ku nko shonse;+ e lyo impela+ ikesa.

15 “E ico, ilyo mukamona ica bunani+ icileta ubonaushi, icalandilwe muli kasesema Daniele, cili mu ncende ya mushilo,+ (uulebelenga eluke) 16 e lyo abakaba mu Yudea bakatendeke ukufulumukila+ ku mpili. 17 Uukaba pa mutenge ekekila ku kufumya ifipe mu ng’anda yakwe; 18 no ukaba mwi bala ekabwelela ku ng’anda ku kubuula ifya kufwala fyakwe. 19 We bulanda ku bakaba na mafumo na bakalaonsha muli shilya nshiku!+ 20 Mulepepa ukuti mwikafulumuka mu nshita ya mpepo nangu pa bushiku bwe sabata; 21 pantu kukaba ubucushi ubukalamba+ ubushatala abubako ukutula pa ntendekelo ya ba pano calo ukufika nomba,+ kabili tabwakatale abubako na kabili. 22 Isho nshiku nga tashakepifiwe, takuli umuntu nangu umo uukapusuka; lelo pa mulandu wa basalwa,+ isho nshiku bakashipifya.+

23 “E lyo umuntu nga amweba ati, ‘Moneni! Kristu ali kuno,’+ nelyo amweba ati, ‘Ali kulya,’ mwikasumina iyo.+ 24 Pantu baKristu+ ba bufi na bakasesema ba bufi+ bakema no kucita ifishibilo+ fikalamba ne fipapwa ku kulufya abantu ica kuti ni cikanga balufye na basalwa bene.+ 25 Moneni! Namusokela kabela.+ 26 E ico, abantu nga bamweba abati, ‘Moneni! Ali mu matololo,’ mwikayako; nangu nga batila, ‘Moneni! Ali mu kati na nkati ka ng’anda,’ mwikasumina iyo.+ 27 Pantu filya fine inkuba+ itula ku kabanga no kubyatila na ku masamba, e fyo cikaba na lintu Umwana wa muntu akabapo.+ 28 Konse ukuli icitumbi, e ko na bakapumpe+ balongana.+

29 “Ilyo line pa numa ya bucushi bwa nshiku shilya, akasuba kakafiita+ no mweshi+ tawakabalike, kabili intanda shikapona mu muulu, ne fya maka ifya mu muulu fikatenkana.+ 30 E lyo icishibilo ca Mwana wa muntu+ cikamoneka mu muulu, e lyo ne mitundu yonse iya bantu pano isonde ikaloosha nga nshi,+ no kumona Umwana wa muntu aleisa pa makumbi ya mu muulu ali na maka no bukata ubukalamba.+ 31 Kabili akatuma bamalaika bakwe ne ciunda icikalamba ice penga,+ kabili bakalonganika pamo abasalwa+ bakwe ukufuma ku kabanga, ku masamba, ku kapinda ka ku kuso na ku kapinda ka ku kulyo,+ ukufuma ku mpela imo iya mu muulu no kufika ku mpela ibiye.

32 “Nomba sambilileniko ku cilangililo ca mukunyu: Cilya fye imisambo ya uko yaba iiteku kabili amabuula yaleemba, muleshiba ukuti amainsa yali mupepi.+ 33 Ifyo fine na imwe, ilyo mukamona fyonse ifi, mukeshibe ukuti ali mupepi, ali pa mwinshi.+ 34 Ndemweba icine cine nati, abantu ba nkulo+ ino tabakafwe nakalya mpaka fyonse ifi fikacitike. 35 Umuulu na pano isonde fikapita,+ lelo amashiwi yandi tayakapite nakalya.+

36 “Ulwa bushiku bulya ne nshita+ takuli uwaishiba, nangu ni bamalaika ba mu muulu nangu Mwana, kano fye Tata.+ 37 Pantu filya fine inshiku sha kwa Noa+ shali, e fyo cikaba na lintu Umwana wa muntu akabapo.+ 38 Pantu filya balecita mu nshiku shilya ilyo ilyeshi lishilaisa, balelya no kunwa, baleupa no kuupwa, mpaka no bushiku ubo Noa+ aingile mu cibwato;+ 39 kabili tabapooseleko amano nakalya mpaka ilyeshi lyaisa no kubasenda bonse,+ e fyo cikaba na lintu Umwana wa muntu akabapo. 40 Kabili abaume babili bakaba mwi bala: umo bakamusenda e lyo umbi bakamusha;41 pa banakashi babili abalepela pa libwe:+ umo bakamusenda e lyo umbi bakamusha.+ 42 E ico mulelola, pantu tamwaishiba ubushiku ubo Shikulwinwe akesamo.+

43 “Lelo ishibeni ukuti umwine wa ng’anda nga naishiba inshita umupuupu aleishilapo,+ kuti alalola kabili te kuti aleke bamwingilile mu ng’anda. 44 E ico na imwe mube abaiteyanya,+ pantu pa nshita mushenekele, e po Umwana wa muntu akesa.

45 “Nga kanshi nani umusha wa cishinka kabili uwashilimuka*+ uo shikulu wakwe asontele ukuba kangalila pa ba mu ng’anda yakwe, pa kuti alebapeela ifya kulya fyabo pa nshita yalinga?+ 46 Wa nsansa+ uyo musha nga shikulu wakwe pa kwisa amusanga alecita ifyo! 47 Ndemweba icine cine nati, akamusonta ukuba kangalila pa fyuma fyakwe fyonse.+

48 “Lelo umusha mubi nga mu mutima wakwe atila,+ ‘Shikulu akokola,’+ 49 kabili atendeka ukupuma abasha banankwe, no kulya no kunwa pamo na bacakolwa bene bene, 50 shikulu wa ulya musha akesa pa bushiku ubo ashenekele na mu nshita+ iyo ashishibe, 51 kabili akamukanda icine cine+ no kumubika pamo na ba bumbimunda. Kulya e kukaba ukulila no kusumanya ameno.+

25 “Ubufumu bwa mu muulu bukaba kwati ni banacisungu ikumi (10) ababuulile inyali+ shabo no kuya ku kukumanya shibwinga.+ 2 Basano bali abawelewele,+ e lyo basano bali aba mano.+ 3 Pantu abawelewele basendele fye inyali shabo lelo tabasendele amafuta, 4 nomba aba mano bena basendele amafuta mu fya kubikamo amafuta kabili basendele ne nyali shabo. 5 Ilyo shibwinga akokwele ukwisa, bonse batendeke ukushipula, bapona na mu tulo.+ 6 Awe ilyo cali ubushiku pa kati baumfwile balebilikisha+ ati, ‘Shibwinga aisa! Kamusengeleni.’ 7 Awe banacisungu balya bonse balibuukile no kupekanya inyali+ shabo. 8 E lyo abawelewele baebele aba mano abati, ‘Tupeeniko amafuta yenu,+ pantu inyali shesu shalashima.’ 9 Aba mano+ ba-aswike abati, ‘Nalimo tayakumane bonse ifwe na imwe. Lelo kabiyeni ku bashitisha no kuishitila mwe bene.’ 10 Awe ilyo baleya mu kushita, shibwinga alifikile, na banacisungu abaiteyenye baingile nankwe mu mutebeto wa bwinga;+ ne ciibi caliiselwe. 11 Pa numa banacisungu balya bambi baliishile, abati, ‘Mwe shikulu, mwe shikulu, twiswileniko!’+ 12 Na o abaswike ati, ‘Ndemweba icine cine nati, nshamwishiba.’+

13 “E ico mulelola,+ pantu tamwaishiba ubushiku nangu ni nshita.+

14 “Pantu cili kwati muntu+ uwali no kuya ku calo ca kutali,+ uwaitile abasha bakwe no kubaseekesha ifyuma fyakwe.+ 15 Kabili umo amupeele amatalanti yasano, umbi yabili, umbi na o limo, umo umo ukulingana na maka yakwe,+ kabili aile ku calo ca kutali. 16 Awe ilyo line uo bapeele amatalanti yasano aliile no kucitamo amakwebo no kusangilapo na yambi yasano.+ 17 Ifyo fine na ulya bapeele yabili asangiilepo na yambi yabili. 18 Lelo uo bapeele limo fye aileimba icilindi pa nshi no kufisa indalama ya silfere iya kwa shikulu wakwe.

19 “Ilyo papitile inshita ntali,+ shikulu wa balya basha aliishile no kwita abasha bakwe pa kuti balondolole ifyo babomfeshe indalama shakwe.+ 20 E ico uo bapeele amatalanti yasano alishile no kuletelapo amatalanti na yambi yasano no kutila, ‘Mwe shikulu, mwampeele amatalanti yasano; moneni, ninsangilapo na yambi yasano.’+ 21 Shikulu wakwe amwebele ati, ‘Eya, mwabombeni, we musha musuma kabili uwa cishinka!+ Wali uwa cishinka+ pa tunono. Nalakusonta ukuba kangalila pa fingi.+ Ingila mulesansamuka+ pamo na sokulu.’22 Awe uo bapeele amatalanti yabili na o alishile no kutila, ‘Mwe shikulu, mwampeele amatalanti yabili; moneni, ninsangilapo na yambi yabili.’+ 23 Shikulu wakwe amwebele ati, ‘Eya, mwabombeni, we musha musuma kabili uwa cishinka! Wali uwa cishinka pa tunono. Nalakusonta ukuba kangalila pa fingi.+ Ingila mulesansamuka+ pamo na sokulu.’

24 “Na pa kulekelesha, uwapokelele italanti limo na o alishile+ no kutila, ‘Mwe shikulu, naliishibe ukuti mwalyafya, museepa apo mushatandile no kulonganika ifyo mushaelele. 25 E ico nalitiinine,+ kabili nailefisa italanti lyenu pa nshi. Moneni, italanti lyenu ili.’ 26 Na o shikulu wakwe amwaswike ati, ‘We musha mubi kabili umunang’ani, bushe kanshi waliishibe ukuti nseepa apo nshatandile no kulonganika ifyo nshaelele? 27 Kanshi nga wabikile indalama shandi isha silfere ku banki, na ine pa kwisa nga napokelela ishandi pamo ne shalundwapo.+

28 “‘E ico mupokeni italanti no kupeela uukwete amatalanti ikumi (10).+ 29 Pantu onse uwakwata, bakamupeela na fimbi kabili akakwata ifingi; lelo uushakwata bakamupoka ne fyo akwata.+ 30 Kabili pooseni icinangwa ca musha ici ku nse mu mfifi. E mo ca kulalilila no kusumanya ameno.’+

31 “Ilyo Umwana wa muntu+ akesa no bucindami bwakwe, na bamalaika bonse pamo nankwe,+ e lyo akekala pa cipuna cakwe ica bufumu kabili ica bukata.+ 32 Ne nko shonse shikalonganikwa pa ntanshi yakwe,+ kabili akapaatukanya+ abantu,+ filya kacema apaatukanya impaanga ku mbushi. 33 Kabili akabika impaanga ku kulyo,+ ne mbushi ku kuso.+

34 “E lyo imfumu ikeba aba ku kulyo kwa iko aiti, ‘Iseni, mwe bapaalwa na Tata,+ ingileni+ mu bufumu+ ubo bamuteyanishishe ukufuma pa kutendeka kwa calo.+ 35 Pantu nali ne nsala na imwe mwalimpeele ifya kulya;+ nali ne cilaka na imwe mwalimpeele amenshi. Nali umweni na imwe mwalimpokelele bwino;+ 36 nshakwete ifya kufwala+ na imwe mwalimpeele ifya kufwala. Nalilwele na imwe mwalintenseshe. Nali mu cifungo+ na imwe mwalishile ku kumona. 37 E lyo abalungama bakamwasuka abati, ‘Mwe shikulu, ni lilali twamumwene muli ne nsala no kumuliisha, nelyo ilyo mwali ne cilaka,+ no kumupeela amenshi?+ 38 Ni lilali twamumwene muli abeni no kumupokelela bwino, nelyo tamukwete ifya kufwala na ifwe twamupeela ifya kufwala? 39 Ni lilali twamumwene namulwala nelyo muli mu cifungo no kwisamumona?’ 40 Ne mfumu+ ikabaasuka aiti, ‘Ndemweba icine cine nati, Apo mwacitile ifi kuli umo pali aba bamunyinane+ abacepesha,+ ninshi mwacitiile ine.’+

41 “E lyo nomba ikeba aba ku kuso kwa iko aiti, ‘Fumeni apa,+ mwe batiipwa mwe, kabiyeni mu mulilo wa muyayaya+ uo bapekanishisha Satana Kaseebanya na bamalaika bakwe.+ 42 Pantu nali ne nsala, lelo tamwampeele ifya kulya nangu fimo,+ kabili nali ne cilaka,+ lelo tamwampeele amenshi. 43 Nali umweni, lelo tamwampokelele bwino; nshakwete ifya kufwala, na imwe tamwampeele ifya kufwala;+ nalilwele kabili nali mu cifungo,+ lelo tamwansakamene.’ 44 Awe na bo bakaasuka abati, ‘Mwe Shikulu, ni lilali twamumwene muli ne nsala nelyo ne cilaka nelyo muli abeni nelyo tamukwete ifya kufwala nelyo namulwala nelyo muli mu cifungo na ifwe twakaana ukumwafwa? 45 E lyo ikabaasuka aiti, ‘Ndemweba icine cine nati, Apo fye tamwacitile ifi kuli umo pali aba abacepesha,+ tamwacitiile+ ine.’+ 46 Kabili aba bakonaulwa umuyayaya,+ lelo abalungama bakaba no mweo wa muyayaya.”+

26 Nomba ilyo Yesu apwile ukulanda fyonse ifi, aebele abasambi bakwe ati: 2 “Namwishiba ukuti kwashala fye inshiku shibili ninshi umutebeto wa ca kucilila wafika,+ e lyo Umwana wa muntu bakamutwala ku kumupoopela pa cimuti.”+

3 Awe intungulushi sha bashimapepo na bakalamba ba bantu balongene mu lubansa lwa kwa shimapepo mukalamba uo baleita ati Kayafa,+ 4 no kumfwana+ ukuti bekate Yesu mu bucenjeshi no kumwipaya. 5 Kabili basosele abati: “Pa mutebeto te po iyo, epali kwaima icimfulunganya mu bantu.”+

6 Ilyo Yesu ali ku Betani+ mu ng’anda ya kwa Simone, uwa fibashi,+ 7 umwanakashi aishile kuli ena ne botolo lya mafuta+ ayanunkila kabili aya mutengo nga nshi, kabili atendeke ukumwitila pa mutwe ninshi naikala balelya. 8 Awe ilyo abasambi bamwene ifi balikalipe, abati: “Bwa nshi ubu bonaushi?+ 9 Pantu aya mafuta nga bayashitishe pa ndalama ishingi no kupeela abapiina.”+ 10 Yesu ena apo alishibe ifyo balelanda,+ abebele ati: “Nga cinshi mulecushisha uyu umwanakashi? Pantu namombela umulimo uusuma.+ 11 Pantu abapiina+ mwaba na bo lyonse, lelo tamwakabe na ine lyonse.+ 12 Pantu ilyo uyu mwanakashi aciitulwila aya mafuta ayanunkila pa mubili wandi, acicita ici ku kumpekanishisha ukushiikwa.+ 13 Ndemweba icine cine nati, Konse uko bakalabila iyi mbila nsuma ku ba pano calo bonse, ifyo uyu mwanakashi acitile na fyo bakalafilandapo ku kumwibukisha.”+

14 E lyo umo pa basambi ikumi na babili (12) uo baleita ati Yuda Iskariote,+ aile ku ntungulushi sha bashimapepo 15 no kutila: “Cinshi mulempeela nga namufutuka pa kuti mumwikate?”+ Na bo bamwebele ati bali no kumupeela indalama sha silfere amakumi yatatu (30).+ 16 E ico ukutula lilya line, alefwaya inshita iyali no kulinga ukumufutukilapo.+

17 Pa bushiku bwa ntanshi ubwa mutebeto wa mukate+ uushatutumuka, abasambi baishile kuli Yesu, abati: “Ni kwi mulefwaya ukuti tumupekanishishe ukwa kuliila ica kucilila?”+ 18 Na o atile: “Kabiyeni mu musumba kuli Kantwa+ no kumweba amuti, Kasambilisha atila, ‘Inshita yandi naipalama; ndeliila ica kucilila pamo na basambi bandi ku mobe.’”+ 19 Awe abasambi bacitile ifyo Yesu abebele, kabili bapekenye ica kucilila.+

20 Nomba ilyo cali icungulo,+ aliikele alelya na basambi ikumi na babili (12).+ 21 Nomba ilyo balelya, atile: “Ndemweba icine cine nati, umo pali imwe alemfutuka.”+ 22 Awe bonse baumfwile ubulanda pali ici, kabili batendeke ukumwipusha cila muntu abati: “Bushe nine mwe Shikulu?”+ 23 Na o ayaswike ati: “Uuletobela pamo na ine mu mbale e ulemfutuka.+ 24 Ca cine ukuti Umwana wa muntu aleya, filya fine calembwa+ pali ena, lelo we bulanda+ ku muntu ulya uulefutuka Umwana wa muntu!+ Cawamapo ulya muntu nga tafyelwe.” 25 Na Yuda, uwali no kumufutuka, atile: “Bushe nine mwe Kasambilisha?”* Na o amwebele ati: “Nausosa we mwine.”

26 Ilyo balelya, Yesu abuulile umukate,+ kabili ilyo apepele, aliumokawile,+ no kupeela abasambi, ati: “Buuleni mulye. Uyu mukate cimpashanya ca mubili wandi.”+ 27 Kabili abuulile kapu,+ kabili ilyo atashishe kuli Lesa, alibapeele, ati: “Nwenimo bonse;+ 28 pantu uyu+ mwangashi cimpashanya ca ‘mulopa+ wandi uwa cipangano,’+ uulesuumina pa mulandu wa bengi+ pa kuti bakabelelwe uluse pa membu.+ 29 Lelo ndemweba nati, Nshakanwe umwangashi na kabili mpaka ubushiku bulya ilyo nkanwa uupya pamo na imwe mu bufumu bwa kwa Tata.”+ 30 Na pa kulekelesha, ilyo baimbile inyimbo sha malumbo,+ baile ku Lupili lwa Miolife.+

31 E lyo Yesu abebele ukuti: “Bonse mulembutuka buno bushiku, pantu calilembwa ati, ‘Nkepaya kacema, ne mpaanga sha mu mukuni shikasalangana.’+ 32 Lelo ilyo nkabuuka, nkamutangilila ku Galili.”+ 33 Lelo Petro amwaswike ati: “Nangu aba bambi bonse bamubutuke, ine nshamubutuke nakalya!”+ 34 Yesu amwebele ati: “Ndekweba icine cine, nati, Buno bwine ubushiku, ilyo mukolwe talati alile, ulenkaana imiku itatu.”+ 35 Petro amwebele ati: “Nangu ndi no kufwila pamo na imwe, nshamukaane nakalya.” Abasambi bambi na bo basosele cimo cine.+

36 E lyo Yesu aile na bo ku cifulo+ ico beta ati Getsemane, kabili aebele abasambi ati: “Mwikale pano ilyo nalaya palya mu kupepa.”+ 37 Kabili ilyo asendele Petro na bana babili+ aba kwa Sebede, atendeke ukumfwa ubulanda no kusakamikwa nga nshi.+ 38 E lyo abebele ati: “Naumfwa ubulanda nga nshi, ni cikanga fye mfwe.+ Ikaleni pano no kulola pamo na ine.”+ 39 Awe cilya aya akatalamukila, awa ubukupeme, alapepa+ ati: “Tata, nga kuti cacitika, fumyeni pali ine uyu kapu.+ Lelo te fyo ine ndefwaya,+ kano ifyo imwe mulefwaya.”+

40 Kabili aishile ku basambi no kusanga nabalaala, kabili aebele Petro ati: “Bushe kuti mwafilwa ukulola pamo na ine iawala fye limo?+ 41 Loleni+ kabili akupepeni,+ pa kuti mwi-ingila mu matunko.+ Umutima wena ulefwaisha, lelo umubili naunaka.”+ 42 Kabili umuku wa cibili,+ alibwelelemo mu kupepa, ati: “Tata, nga te kuti cicitike ukuti uyu kapu afumepo, kano fye nwemo, lekeni ukufwaya kwenu kucitwe.”+ 43 Na kabili alishile no kubasanga nabalaala, pantu amenso yabo yalifinine ku tulo.+ 44 E ico ilyo abashile, na kabili aliile no kupepa umuku wa citatu,+ abwekeshepo ukulanda fimo fine. 45 E lyo aile ku basambi no kubeba ati: “Pa nshita ya musango uyu, namulaala kabili muletuusha! Moneni! Inshita naipalama iya kuti Umwana wa muntu bamufutuke no kumupeela mu minwe ya babembu.+ 46 Imeni, tuleyeni. Moneni! Uulemfutuka apalama.”+ 47 Awe ilyo acili alelanda, moneni! Yuda,+ uwali pa basambi ikumi na babili (12), aliishile kabili ali pamo ne bumba ilyakwete impanga+ ne nkonto ilyafumine ku ntungulushi sha bashimapepo na bakalamba ba bantu.+

48 Awe uwalemufutuka alibapeele icishibilo ca kuti: “Uo ndetomona, ninshi e o; mumwikate.”+ 49 Kabili alungeme kuli Yesu no kutila “Mwapoleni, mwe Kasambilisha!”+ no kumutomona.+ 50 Lelo Yesu+ amwebele ati: “Mune, cinshi ulefwaya kuno?” Awe baliishile kuli Yesu, bamwikata no kumwikata.+ 51 Lelo moneni! umo pa bali na Yesu afumishe ulupanga lwakwe no kukoma umusha wa kwa shimapepo mukalamba, amuputula no kutwi.+ 52 E lyo Yesu amwebele ati: “Bwesesha ulupanga umo lwikala,+ pantu bonse ababomfya ulupanga bakafwa ku lupanga.+ 53 Bushe nalimo uleti te kuti nombe Tata ukuti ampeele nomba line amabumba* ayacila ikumi na yabili (12) aya bamalaika?+ 54 Nga kanshi Amalembo kuti yafikilishiwa shani ayatila cili no kube fi?” 55 Muli ilya nshita Yesu aebele amabumba ati: “Bushe mwishile ne mpanga ne nkonto ku kunjikata kwati ndi cipondo?+ Cila bushiku naleikala mwi tempele+ ndesambilisha, lelo tamwanjikete. 56 Lelo fyonse ifi fyacitika pa kuti amalembo bakasesema balembele yafikilishiwe.”+ E lyo abasambi bonse bamushiile no kufulumuka.+

57 Awe abaikete Yesu bamutwele kuli Kayafa+ shimapepo mukalamba, uko bakalemba ne ntungulushi balongene pamo.+ 58 Lelo Petro alemukonka akatalamukila, ukufika fye na mu lubansa+ lwa kwa shimapepo mukalamba, kabili ilyo aingile mu kati, aikele na babomfi ba mu ng’anda pa kuti amone ifyali no kucitika.+

59 Pa nshita ilya, intungulushi sha bashimapepo ne cilye ca Sanhedrini conse balefwaya abantu aba kushinina Yesu ifya bufi pa kuti bamwipaye,+ 60 lelo tabasangile nangu umo, nangu ca kuti kwaleisa inte sha bufi ishingi.+ Pa numa kwaishile shibili 61 ashiti, “Uyu muntu aleti, ‘Kuti nabongolola itempele lya kwa Lesa no kulikuula mu nshiku shitatu.’”+ 62 Awe shimapepo mukalamba e pa kwima no kwipusha ati: “Bushe tauleasukapo nangu cimo pa fyo aba balekushinina?”+ 63 Lelo Yesu aikele fye tondolo.+ E ico shimapepo mukalamba atile kuli ena: “Ndekweba nati ulape+ Lesa wa mweo ukuti utwebe nga ni we Kristu+ Umwana wa kwa Lesa!” 64 Yesu amwebele+ ati: “Nausosa we mwine.+ Lelo ndemweba nati, Ukutula pali nomba+ mukamona Umwana wa muntu+ naikala ku kulyo+ kwa Wa Maka Yonse* kabili aleisa pa makumbi ya mu muulu.”+ 65 E lyo shimapepo mukalamba alepwile ifya kufwala fyakwe no kutila: “Aponta!+ Bushe tulekabila inte na shimbi?+ Moneni! Nomba mwayumfwila ifyo aleponta.+ 66 Muletipo shani?” Na bo ba-aswike abati: “Afwile ukufwa.”+ 67 Awe bamufwishile amate pa menso+ no kumuuma+ amakofi. Bambi bamutobele amapi ku menso,+ 68 abati: “Iwe Kristu,+ nga ni we kasesema, twebe, nani uwakuuma?”+

69 Awe Petro aikele pa nse mu lubansa. E lyo umubomfi umukashana aishile kuli ena ati: “Na iwe wine wali pamo na Yesu umwina Galili!”+ 70 Lelo alikeene pa menso ya bonse ati: “Nshishibe ifyo ulelandapo.” 71 Nomba ilyo aile ku nse ku kayanda ka pa mpongolo, umukashana na umbi alimumwene no kweba abalipo ati: “Uyu muntu ali na Yesu umwina Nasarete.”+ 72 Na kabili alikeene, no kulapa ukuti: “Nshimwishibe uyo muntu!”+ 73 Ilyo papitile inshita iinono, abaiminine palya baishile no kweba Petro abati: “Ca cine na iwe wine wali na bo, pantu imilandile yobe e yakushinina.”+ 74 Awe atendeke ukuitiipwila no kulapa ati: “Nshimwishibe uyo muntu!” Kabili ilyo line mukolwe alililile.+ 75 E lyo Petro aibukishe ifyalandile Yesu, ati: “Ilyo mukolwe talalila, ulenkaana imiku itatu.”+ Kabili afumiine pa nse no kulila nga nshi.+

27 Ilyo bwacele, intungulushi sha bashimapepo shonse na bakalamba ba bantu balikumene ku kulanshanya pali Yesu pa kuti bamwipaye.+ 2 Kabili ilyo bamukakile, balimusendele no kumutwala ku mulashi Pilato.+

3 Nomba Yuda, uwamufutwike, ilyo amwene ukuti bamupingula ukufwa, alilangulwike no kubwesesha indalama sha silfere amakumi yatatu (30)+ ku ntungulushi sha bashimapepo na bakalamba, 4 no kutila: “Nalibembwike pa kufutuka umuntu uwalungama.”*+ Na bo batile: “Bushe mulandu wesu? Uyo mulandu obe we mwine!”+ 5 Na o apoosele indalama sha silfere mwi tempele no kuyaikulika.+ 6 Lelo intungulushi sha bashimapepo shabuulile indalama sha silfere no kusosa ati: “Tacasuminishiwa ukupoosa ishi ndalama mu cipao ca mushilo, pantu ni ndalama sha mulopa.” 7 Ilyo balanshenye, bashitilemo impanga ya kwa nakabumba iya kushiikamo abeni. 8 E ico ilya mpanga baita ati “Impanga ya Mulopa”+ ukufika na lelo. 9 E lyo fyafikilishiwe ifyo kasesema Yeremia alandile ati: “Kabili babuulile ne ndalama sha silfere amakumi yatatu (30),+ umutengo uo abana ba kwa Israele bamo basumine ukumushitishishapo, 10 kabili bashipeele pa mpanga ya kwa nakabumba,+ ifyo Yehova anjebele.”

11 Yesu nomba aiminine pa ntanshi ya mulashi; no mulashi amwipwishe ati: “Bushe uli mfumu ya baYuda?”+ Na o Yesu ayaswike ati: “Nausosa we mwine.”+ 12 Lelo, ilyo balemupeela umulandu+ ku ntungulushi sha bashimapepo na bakalamba, tayaswike nangu cimo.+ 13 E lyo Pilato atile kuli ena: “Bushe tauleumfwa ifintu ubwingi ifyo balekushinina?”+ 14 Lelo tamwaswike nangu cimo, ica kuti uyu umulashi alipapile nga nshi.+

15 Awe pali uyu mutebeto, umulashi alekakwila ibumba umufungwa umo uo abene balefwaya.+ 16 Pali iyo nshita kwali umufungwa baleita ati Baraba uo baikete.+ 17 E ico ilyo balongene pamo Pilato abebele ati: “Nani mulefwaya ukuti imukakwile, Baraba nelyo Yesu uo batila Kristu?”+ 18 Pantu alishibe ukuti ni pa mulandu wa mufimbila+ bamutwaliile kuli ena.+ 19 Kabili ilyo ali pa cipuna ca bupingushi, umukashi wakwe alaishe amashiwi ati: “Muleke uyo muntu umulungami,+ pantu lelo nacicula nga nshi mu ciloto+ pa mulandu wakwe.” 20 Lelo intungulushi sha bashimapepo na bakalamba banashishe amabumba ukuti balombe Baraba,+ no kuti baleke Yesu bamwipaye. 21 E lyo umulashi abepwishe ati: “Bushe nani pali aba babili mulefwaya ukuti imukakwile?” Na bo batile: “Baraba.”+ 22 Pilato abebele ati: “Nomba ndecita shani no yu Yesu uo batila Kristu?” Bonse batile: “Napoopelwe!”+ 23 Na o atile: “Nga kanshi cinshi alufyenye?” Na bo e lyo bacililemo ukubilikisha abati: “Napoopelwe!”+

24 Nomba ilyo Pilato amwene ukuti tacalemwafwa kantu, kabili kwaba icimfulunganya, abuulile amenshi+ no kusamba ku minwe pa menso ye bumba, no kusosa ati: “Ndi wa kaele ku mulopa wa muntu uyu. Muleimwena mwe bene.” 25 Lelo abantu bonse bayaswike abati: “Umulopa wakwe ube pali ifwe na pa bana besu.”+ 26 E lyo abakakwilile Baraba, lelo asosele ukuti Yesu afopaulwe+ e lyo abapeele pa kuti bayemupoopela pa cimuti.+

27 Awe abashilika ba mulashi batwele Yesu mwi sano lya mulashi no kulonganya ibumba lyonse ilya bashilika no kumushinguluka.+ 28 Kabili ilyo bamufuulile, bamufwikile insalu iyakashika ce,+ 29 kabili bapangile icisote ca myunga no kumufwika ku mutwe no kumufumbatika itete ku kuboko kwa ku kulyo. Kabili ilyo bamufukamine, balemupumya,+ abati: “Mwapoleni, mwe Mfumu ya baYuda!”+ 30 Kabili bamufwishile amate,+ babuulile ne tete, balamuuma na pa mutwe. 31 Awe ilyo balekele ukumupumya+ bamufuulile insalu no kumufwika ifya kufwala fyakwe no kumutwala mu kupoopelwa.+

32 Lelo ilyo balefuma, abashilika basangile umwina Kurene uo baleita ati Simone.+ Bapatikishe uyu muntu ukuti asende icimuti ca kwa Yesu. 33 Kabili ilyo bafikile pa ncende iyo baleita ati Golgota,+ e mu kutila, Pa Cipanga, 34 bapeele Yesu umwangashi uo basakenyemo ifyalula+ ukuti anwe; lelo ilyo aumfwile ifyo waleumfwika, alikeene ukunwa.+ 35 Ilyo bamupoopele,+ bayakene ifya kufwala+ fyakwe ukupitila mu kupendula,+ 36 kabili baikele kulya kwine balemulinda. 37 Kabili babikile icipampa lwa pa muulu wa mutwe wakwe apo balembele umulandu bamupeele uwa kuti: “Uyu ni Yesu, Imfumu ya baYuda.”+

38 Awe bakobeke ne fipondo fibili pa fimuti, cimo ku kulyo kwakwe na cimbi ku kuso kwakwe.+ 39 Awe abapita nshila batendeke ukulamusaalula,+ kabili balepukunya+ ne mitwe 40 abati: “We wingabongolola itempele+ no kulikuula mu nshiku shitatu, kanshi ipusushe we mwine! Nga uli mwana wa kwa Lesa, ika pa cimuti!”+ 41 Ne ntungulushi sha bashimapepo na bakalemba na bakalamba na bo balamupumya abati:+ 42 “Aalepususha bambi; nomba afilwa ukuipususha umwine! Ni mfumu+ ya kwa Israele, naekile nomba pa cimuti, e lyo twalamusumina.+ 43 Alicetekela Lesa; lekeni amupokolole+ nomba nga alimutemwa, pantu atile, ‘Ndi Mwana wa kwa Lesa.’”+ 44 Ne fipondo ifyo bakobeke pamo nankwe na fyo fine fyalamusaalula.+

45 Ukufuma pe awala lyalenga mutanda (6) imfifi yakupile+ calo conse, ukufika na pe awala lyalenga pabula (9).*+ 46 Ilyo cali nalimo iawala lyalenga pabula (9), Yesu abilikishe ishiwi ilikalamba ati: “Eli, Eli, lama sabaktani?” e kutila, “Lesa wandi, Lesa wandi, cinshi mwandekelesesha?”+ 47 Ilyo baumfwile ifi, bamo abaimininepo balalanda abati: “Uyu muntu aleita Eliya.”+ 48 Awe ilyo line umo pali bena alibutwike no kuyabuula umwepu, autumpika mu mwangashi wakantuka+ no ku-ubika kwi tete, alamupeela ukuti anwe.+ 49 Lelo bambi batile: “Muleke! Lekeni tumone nga Eliya kuti aisa ku kumupususha.”+ [[Umuntu umbi abuulile ifumo no kumulasa mu lubafu, kabili umulopa na menshi fyalifumine.]]+ 50 Yesu na kabili abilikishe ishiwi ilikalamba, no kuleka umweo.+

51 Kabili, moneni! insalu+ ya kucingilako iya mwi tempele yalepwike pa kati, ukufuma pa muulu ukufika pa nshi,+ ne sonde lyalitenkene, ne fimabwe fyalilepwike.+ 52 Ne nshiishi shaliiswike ne mibili iingi iya ba mushilo iyaleele yalishukwike, 53 kabili yamoneke ku bantu abengi (na bantu abafumine ku nshiishi pa numa ya kwima kwakwe ku bafwa baingile mu musumba wa mushilo).+ 54 Lelo umukalamba wa bashilika na bali nankwe abalelinda Yesu, ilyo bamwene icinkukuma ne fyalecitika, balitiinine nga nshi, no kutila: “Cine cine uyu ali Mwana wa kwa Lesa.”+

55 Kabili kwali na banakashi abengi abaletamba akatalamukila,+ abakonkele Yesu ukufuma ku Galili ku kumubombela utumilimo tumo tumo;+ 56 pali aba pali Maria umwina Magadala, na Maria nyina wa kwa Yakobo na Yose, na nyina wa bana ba kwa Sebede.+

57 Nomba icungulo, kwaishile umukankaala wa ku Arimatea, uo baleita ati Yosefe, na o asangwike umusambi wa kwa Yesu.+ 58 Uyu muntu aile kuli Pilato no kulomba umubili wa kwa Yesu.+ Pilato na o asosele ukuti bamupeele.+ 59 Awe Yosefe abuulile umubili, no ku-upomba mu nsalu isuma iya busaka,+ 60 no ku-ubika mu nshiishi+ yakwe iipya, iyo aimbile mu cilibwe. Kabili pa numa ya kukunkulushishapo ilibwe ilikalamba pa mwinshi wa nshiishi, alifumineko.+ 61 Lelo Maria umwina Magadala na Maria umbi bali kulya kwine, baikele apalungatene ne nshiishi.+

62 Ubushiku bwakonkelepo, pa numa fye ya Bushiku bwa Kupekanya,+ intungulushi sha bashimapepo na baFarise balongene pamo pa ntanshi ya kwa Pilato, 63 no kulanda abati: “Mukwai, natwibukisha ukuti ulya kabepa ilyo ali uwa mweo asosele ati, ‘Ilyo pakapita inshiku shitatu,+ nkabuuka.’64 E ico ebeni aba kuyalonda ku nindi mpaka no bushiku bwalenga shitatu, pa kuti abasambi bakwe tabeshilemwiba+ no kweba abantu ati, ‘Nabuuka ku bafwa!’ kabili ubu bufi bwa kulekelesha bukabipa ukucila no bwa ntanshi.” 65 Pilato atile kuli bena: “Mwalikwata aba kulonda.+ Kalondeni ukulingana ne fyo mwaishiba.” 66 E ico baliile, kabili bailelinda inshiishi, bacingileko ilibwe,+ no kubikako aba kulonda.

28 Pa numa ye sabata, ilyo bwaleya buleca pa bushiku bwa ntanshi mu mulungu, Maria umwina Magadala na Maria umbi baile ku kumona inshiishi.+

2 Kabili moneni! kwapitile icinkukuma icikalamba; pantu malaika wa kwa Yehova alikile mu muulu no kwisakunkulushapo ilibwe, no kwikala e po aikala.+ 3 Imimonekele yakwe yali ngo kubyasha kwa nkuba,+ ne fya kufwala fyakwe fyali ifyabuuta tutu.+ 4 Kabili abalelonda balimutiinine, ica kuti balitutwime no kuba kwati nabafwa.

5 Lelo malaika+ aebele abanakashi ati: “Mwitiina, pantu ninjishiba ukuti mulefwaya Yesu+ uo bapoopele pa cimuti. 6 Tali kuno, pantu nabuuka+ nga filya fine asosele. Iseni mumone apo aleele. 7 Kabili kabiyeni bwangu bwangu no kweba abasambi bakwe ukuti nabuuka+ ku bafwa, no kuti, moneni! alemutangilila ku Galili;+ e ko mukamumona. Moneni, ine nimweba.”+

8 Awe bafumine bwangu bwangu ku nshiishi, ninshi bali no mwenso ne nsansa nga nshi, kabili baile ulubilo ku kuyashimikila abasambi bakwe.+ 9 Kabili, moneni! Yesu alibakumenye no kusosa ati: “Mwapoleni!” Balipaleme no kumwikata ku makasa no kumufukamina. 10 E lyo Yesu abebele ati: “Mwitiina! Kabiyeni, kebeni bamunyinane+ ukuti baye ku Galili; kabili e ko tukamonana na bo.”

11 Ilyo baleya, moneni! bamo abalelonda+ baingile mu musumba no kushimikila intungulushi sha bashimapepo fyonse ifyacitike. 12 Na bo ilyo balongene pamo na bakalamba no kupandana amano, bapeele abashilika indalama sha silfere ishingi+ 13 no kubeba ati: “Mulesosa ati, ‘Abasambi+ bakwe baishile ubushiku no kumwiba ninshi ifwe tuli mu tulo.’ 14 Kabili umulashi nga aumfwa ifi, tukalanda nankwe bwino bwino, pa kuti imwe mwikasakamikwa.” 15 Na bo e pa kubuula indalama sha silfere no kucita ifyo babebele; kabili ili e lyashi ilyasalangana mu baYuda ukufika na lelo.

16 Lelo abasambi ikumi na umo (11) baile ku Galili+ ku lupili uko Yesu abapekanishishe, 17 kabili ilyo bamumwene, balimufukamine, lelo bamo balitwishike.+ 18 Nomba ilyo Yesu apaleme uko bali, abebele ati: “Nabampela amaka+ yonse mu muulu na pano isonde. 19 E ico kabiyeni, kalengeni aba nko+ shonse ukuba abasambi,+ mulebabatishisha+ mwi shina lya kwa Tata+ ne lya Mwana+ ne lya mupashi+ wa mushilo, 20 mulebasambilisha+ ukulakonka+ fyonse ifyo namwebele.+ Kabili, moneni! nakulaba na imwe+ inshiku shonse mpaka na ku mpela ya calo.”+