Imbila Nsuma umo Marko Ailembeele

1 Ukutendeka kwa mbila nsuma pali Yesu Kristu: 2 Nga filya kasesema Esaya alembele ati: “(Mona! Ndetuma inkombe yandi pa ntanshi yobe, iikakupekanishisha inshila;)+ 3 umfweni! umuntu alebilikisha mu matololo, aleti, ‘Pekanyeni inshila ya kwa Yehova, lungamikeni inshila shakwe,’”+ 4 Yohane kabatisha aile mu matololo, alebila ku bantu ulubatisho lwa kulanga ukulapila pa kuti belelwe imembu.+ 5 E ico bonse aba mu citungu ca Yudea na bekashi bonse aba mu Yerusalemu baile kuli ena, baleyebelela imembu shabo no kubatishiwa kuli ena mu Mumana wa Yordani.+ 6 Kabili Yohane alefwala ica kufwala ca masako ya ngamila no mushipi wa mpapa mu musana,+ kabili alelya makanta+ no buci+ bwa mu mpanga. 7 Kabili aleshimikila ati: “Uwancila amaka aleisa pa numa yandi; nshalinga ukwinama no kukakula inshinga sha ndyato shakwe.+ 8 Ine ndemubatishisha ku menshi, lelo ena akamubatishisha ku mupashi wa mushilo.”+

9 Mu nshiku shilya Yesu afumine ku Nasarete wa ku Galili kabili abatishiwe kuli Yohane+ mu Mumana wa Yordani. 10 Kabili ilyo afumine fye mu menshi amwene umuulu uleisuka, e lyo no mupashi wa mushilo uleikila pali ena kwati ni nkunda;+ 11 ne shiwi lyafumine mu muulu aliti: “Ni we Mwana wandi uo natemwa; ni we nsekelamo.”+

12 Kabili ilyo line umupashi wa mushilo wamulengele ukuya mu matololo.+ 13 E ico aikele mu matololo inshiku amakumi yane (40),+ aletunkwa kuli Satana,+ kabili ali ne nama sha mu mpanga, lelo bamalaika balemwafwa.+

14 Nomba ilyo baikete Yohane, Yesu aile ku Galili,+ alebila imbila nsuma iya kwa Lesa,+ 15 aleti: “Inshita naifika,+ no bufumu bwa kwa Lesa nabupalama. Lapileni,+ no kutetekela imbila nsuma.”

16 Ilyo ale-enda mu lulamba lwa bemba wa Galili, amwene Simone+ na Andrea munyina Simone baleteya amasumbu yabo muli bemba, pantu bali balondo.+ 17 Na Yesu abebele ati: “Nkonkeni, na ine nkamulenga ukuba abalondo ba bantu.”+ 18 Kabili apo pene bashile amasumbu yabo no kumukonka.+ 19 Kabili ilyo aendeleko pa ntanshi panono, amwene Yakobo mwana Sebede na Yohane munyina, ninshi bali mu bwato bwabo balelunda amasumbu yabo;+ 20 na po pene alibetile. Na bo bashile shibo Sebede mu bwato na babomfi no kumukonka. 21 Baile na ku Kapernahumu.+

Awe ilyo fye isabata lyafikile, aingile mwi sunagoge, no kutampa ukusambilisha. 22 Kabili balipapile imisambilishishe yakwe,+ pantu alebasambilisha ngo wakwata amaka ayafuma kuli Lesa, kabili te pamo nga bakalemba.+ 23 Kabili, lilya line mwi sunagoge lyabo mwali umuntu uwali no mupashi wakowela, kabili abilikishe+ 24 ati: “Bushe tulomfwana na imwe, mwe Yesu, umwina Nasarete?+ Bushe mwishile ku kutonaula? Nimwishiba+ bwino, ni mwe Uwa Mushilo+ uwa kwa Lesa.”+ 25 Lelo Yesu aliukalipile ati: “Talala, kabili fuma muli uyu muntu!”+ 26 No mupashi wakowela, ilyo wamufulansha no kubilikisha ishiwi ilikalamba, wafumine muli ena.+ 27 Awe abantu bonse balipapile ica kuti batendeke ukulalanshanya abati: “E cinshi ici? Lisambilisho ilipya! Ku maka ale-eba ne mipashi yakowela, na yo ilemumfwila.”+ 28 Na po pene ululumbi lwakwe lwaile mpanga yonse ukushinguluka Galili.+

29 Kabili ilyo line bafumine mwi sunagoge no kuya ku mwabo Simone+ na Andrea. Bali pamo na Yakobo na Yohane. 30 Nomba nafyala+ Simone alileele pantu alilwele impepo.+ Kabili bwangu bwangu baebele Yesu. 31 Awe ilyo aile apo ali, amwikete ku kuboko; na o alipolele,+ kabili atendeke ukubapekanishisha ifya kulya.+

32 Ilyo cali icungulo, lintu akasuba kawile, abantu batendeke ukumuletela bonse abalwele+ na bali ne fibanda;+ 33 na ba mu musumba bonse balongene pa mwinshi. 34 Na o aposeshe abengi abalwele amalwele ya misango misango,+ kabili afumishe ne fibanda ifingi, lelo talesuminisha ifibanda ukulanda, pantu fyalimwishibe ukuti ni Kristu.+

35 Kabili ku macaca, ilyo pacili napafiita, aliimine, afumine pa nse no kuya ukushali abantu,+ kabili atendeke ukupepa.+ 36 Lelo Simone na bali nankwe baile balemufwaya 37 kabili balimusangile, no kumweba abati: “Abantu bonse balemufwaya.” 38 Lelo abebele ati: “Tuleyeni kumbi, ku mishi ya mupepi, pa kuti na ko kwine nshimikileko,+ pantu e co naishila.”+ 39 Kabili aile aleshimikila mu masunagoge* yabo mu Galili monse no kufumya ifibanda.+

40 Kwaishile no wa fibashi kuli ena, alamupapaata nafukama no kufukama ati: “Kuti mwamposha, nga mulefwaya.”+ 41 Awe aumfwile uluse,+ kabili atambike ukuboko kwakwe no kumukumya, no kumweba ati: “Ee ndefwaya. Pola.”+ 42 Kabili ilyo line fye ifibashi fyalipwile, na o alipolele.+ 43 E lyo amusokele, kabili ilyo line amulekele aye, 44 no kumweba ati: “Te kwesha ukwebako umuntu nangu umo, lelo kabiye kailange kuli shimapepo+ uyetuula no mutuulo uo Mose alandile+ uwa kulanga ukuti naupola, pa kuti bashininkishe ukuti naupola.”+ 45 Lelo ilyo afuminepo, atendeke ukubila kuli bonse no kusabankanya ilyashi konse konse, ica kuti Yesu afililwe no kulaingila mu musumba pa lwalala, lelo aikele fye ku nse ya musumba ukushali abantu. Na lyo line abantu baleya kuli ena ukufuma fye mpanga yonse.+

2 Nomba ilyo papitile inshiku shimo, Yesu na kabili aingile mu Kapernahumu kabili cashimikwe ukuti ali pa ng’anda.+ 2 E ico abengi balilongene ica kuti tapali ne ncende nangu imo, kumo na pa mwinshi, kabili atendeke ukubila icebo+ ca kwa Lesa kuli bena. 3 Na bantu baletele uwa bulebe uo abantu bane basendele.+ 4 Lelo apo bafililwe ukumufisha kuli Yesu pa mulandu we bumba, bafimbwile umutenge apo abelele, kabili ilyo pashele icipunda, baikishe ubutanda apaleele uwa bulebe.+ 5 Na o Yesu ilyo amwene icitetekelo+ cabo, aebele uwa bulebe ati: “We mwana, imembu shobe shaelelwa.”+ 6 Awe mulya mwali bakalemba bamo, abaikele kabili baletontonkanya mu mitima yabo abati:+ 7 “Cinshi uyu muntu alelandila ifi? Aleponta. Bushe te Lesa e ka uwingelela imembu?”+ 8 Lelo ilyo line fye, Yesu ailwike mu mutima wakwe ukuti e fyo baletontonkanya, kabili abebele ati: “Cinshi muletontonkanishisha ifi fintu mu mitima yenu?+ 9 Nga kanshi, icayangukapo ukulanda cinshi, ukweba uwa bulebe, ati, ‘Imembu shobe shaelelwa,’ nelyo ukutila, ‘Ima, buula ubutanda bobe no kwenda’?+ 10 Lelo pa kuti mwishibe ukuti Umwana wa muntu+ alikwata amaka ya kwelela imembu pano isonde,”+—aebele uwa bulebe ati: 11 “Ndekweba nati, Ima, senda ubutanda bobe, kabiye ku mobe.”+ 12 Awe aliimine, kabili ilyo line abuulile ubutanda bwakwe no kufuma ninshi bonse baletamba,+ ica kuti bonse balipeshiwe amano, kabili balumbenye Lesa, abati: “Tatwatala atumona ica musango yu.”+

13 Na kabili alifumine aile ku lulamba lwa bemba; ne bumba lyonse lyaleya kuli ena, na o atendeke ukubasambilisha. 14 Awe ilyo alepita, amwene Lebi+ mwana Alfeo naikala apa kusonkesesha imisonko, kabili amwebele ati: “Nkonka, ube umusambi wandi.” Na o aliimine no kumukonka.+ 15 Pa numa aikele pe tebulo mu ng’anda yakwe, na bakasonkesha+ ba misonko abengi na babembu balelya pamo na Yesu na basambi bakwe, pantu bali abengi kabili basangwike abasambi bakwe.+ 16 Lelo ilyo bakalemba ba baFarise bamwene aleliila pamo na babembu na bakasonkesha ba misonko, batendeke ukweba abasambi bakwe abati: “Bushe aliila pamo na bakasonkesha na babembu mwa?”+ 17 Na o Yesu ilyo aumfwile ici, abebele ati: “Abatuntulu tabakabila kondapa iyo, kano abalwele. Nshaisa ku kwita abalungami iyo, kano ababembu.”+

18 Awe abasambi ba kwa Yohane na baFarise baleleka ukulya. E ico abasambi ba kwa Yohane balishile no kumweba ati: “Mulandu nshi ifwe na basambi ba baFarise tulekela ukulya, lelo abasambi bobe bena tabaleka ukulya?”+ 19 Na o Yesu abebele ati: “Bushe abanankwe ba kwa shibwinga kuti baleka ukulya+ ilyo shibwinga acili pamo na bo? Ilyo bali pamo na shibwinga, te kuti baleke ukulya.+ 20 Lelo inshiku shikesa ilyo shibwinga bakamusenda, muli ubo bushiku e lyo bakaleka ukulya.+ 21 Takuli uubilila icikamba ca nsalu iipya pa ca kufwala ca kale; nga abililapo, icipya cilalepula ica kale, ne cipunda cilakulilako.+ 22 Kabili takuli uubika umwangashi uushilakalipa mu nyambi* sha kale; nga abikamo, umwangashi ulalepula inyambi, no mwangashi uletika ne nyambi shilonaika.+ Lelo abantu babika umwangashi uushilakalipa mu nyambi ishipya.”+

23 Nomba ilyo alepita mu mabala ya ngano pe sabata, abasambi bakwe na bo batendeke ukulatimpula+ imitwe ya ngano.+ 24 E ico abaFarise bamwebele ati: “Mona! Cinshi balecitila ico bashabasuminisha ukucita pe sabata?”+ 25 Lelo abebele ati: “Bushe tamwabelenga ifyacitile Davidi+ ilyo bashakwete ifya kulya no kwikatwa insala, pamo na bali nankwe?+ 26 Tamwabelenga ifyo aingile mu ng’anda ya kwa Lesa, ilyo Abiatari+ ali shimapepo mukalamba, ne fyo baliile imikate ya kutuula+ kuli Lesa, iyo tabasuminisha+ bonse ukulyako kano fye bashimapepo, ne fyo apeeleko abo ali na bo?”+ 27 Kabili atile kuli bena: “Isabata lyabelapo muntu,+ te muntu uwabelapo isabata iyo;+ 28 e ico Umwana wa muntu e Mwine we sabata.”+

3 Na kabili aingile mwi sunagoge, umwali no muntu uwali no kuboko ukwalemana.+ 2 E ico abaFarise balemulolekesha ukuti bamone nga alamuposha pe sabata, pa kuti bamupeele umulandu.+ 3 Na o aebele umuntu uwali no kuboko ukwalemana ati: “Ima, isa pa kati.” 4 E lyo abebele ati: “Bushe calisuminishiwa ukucita icisuma nelyo icibi pe sabata, ukupususha umuntu nelyo ukumwipaya?”+ Awe baikele fye tondolo. 5 Kabili pa numa ya kubalolesha no bukali, ninshi naumfwa ububi pa mulandu wa kutalama kwa mitima yabo,+ aebele umuntu ati: “Fungulula ukuboko kobe.” Na o alikufungulwile, no kuboko kwalipolele.+ 6 E ico abaFarise bakumene pamo na ba mu kabungwe ka kwa Herode,+ balamupangila pa kuti bamwipaye.+

7 Lelo Yesu pamo na basambi bakwe balifumineko kabili baile kuli bemba; ne bumba ilikalamba ilyafumine ku Galili na ku Yudea lyalimukonkele.+ 8 Awe na ku Yerusalemu na ku Idumea na kwi shilya lya Yordani no kushinguluka Turi+ na Sidone kwafumine ibumba ilikalamba ilyaumfwile ifipesha amano ifyo alecita, kabili lyaishile kuli ena. 9 Na o aebele abasambi bakwe ukuti bamuletele akabwato aka kwikalamo pa kuti ibumba lilamutitikisha. 10 Pantu aliposeshe abengi, ica kuti bonse abali na malwele ayabipisha balelwila ukuti fye bamukumye.+ 11 Ne mipashi yakowela+ yaleti nga yamumona, yawa pa nshi ku ntanshi yakwe no kubilikisha aiti: “Ni we Mwana wa kwa Lesa.”+ 12 Lelo aleikalipila nga nshi ukuti ilamusokolola.+

13 Kabili aninine ulupili no kwita abo alefwaya,+ na bo baile kuli ena.+ 14 Asalile na be kumi na babili (12), abo kabili ainike ati “abatumwa,” ukuti baleba nankwe no kuti abatume ku kushimikila+ 15 no kubapeela amaka ya kufumya ifibanda.+

16 Na be kumi na babili (12) abo asalile bali ni Simone, uo ainike ati Petro,+ 17 na Yakobo mwana Sebede na Yohane munyina Yakobo+ (aba na bo abenike ati Boanerge, ishina ilyalola mu kuti Abana abakalipa kwati kubulukuta kwa mfula), 18 na Andrea na Filipi na Batolomeo na Mateo na Toma na Yakobo mwana Alfeo na Tadeo na Simone uwacincila 19 na Yuda Iskariote, uwaishilemufutuka.+

Kabili aingile mu ng’anda. 20 Na kabili ibumba lyalilongene, ica kuti bafililwe no kulya ifya kulya.+ 21 Lelo ilyo balupwa+ lwakwe baumfwile, baile ku kumwikata, pantu baletila: “Napena.”+ 22 Na bakalemba abafumine ku Yerusalemu baletila: “Ali na Beelsebuli,* kabili afumisha ifibanda ku maka ya kwa kateka wa fibanda.”+ 23 E ico ilyo abetile ukwisa kuli ena, atendeke ukubeba mu filangililo ati: “Satana kuti afumya shani Satana? 24 Pantu mu bufumu nga mwaba ukupaatukana, ubo bufumu te kuti butwalilile ukwiminina;+ 25 kabili mu ng’anda nga mwaba ukupaatukana, iyo ng’anda te kuti itwalilile ukwiminina.+ 26 Kabili Satana nga aimina umwine eka no kupaatukana, te kuti atwalilile ukwiminina, lelo kuti yaba e mpela yakwe.+ 27 Na kuba, takuli uwingengila mu ng’anda ya muntu uwa maka no kupoka+ ifipe fyakwe kano abala akaka uyu muntu uwa maka, e lyo engapoka ifipe mu ng’anda yakwe.+ 28 Ndemweba icine cine, nati, abantu bakababelela uluse te mulandu ne membu bacita ne miponto baponta.+ 29 Lelo onse uwapontela umupashi wa mushilo tabakamubelele uluse umuyayaya, lelo ali no lubembu ulwa muyayaya.”+ 30 Abebele ifi fintu pantu baletila: “Ali no mupashi uwakowela.”+

31 Nomba nyina na bamunyina+ balishile, kabili ilyo baiminine pa nse, batumine aba kuyamwita.+ 32 Awe ibumba lyaikele nalimushinguluka, e ico bamwebele abati: “Moneni! Nyinenwe na bamunyinenwe balemufwaya pa nse.”+ 33 Lelo abaswike ati: “Bushe bamayo na bamunyinane ni bani?”+ 34 Kabili ilyo aloleshe abaikele nabamushinguluka, atile: “Moneni, aba e bamayo na bamunyinane!+ 35 Onse uucita ukufwaya kwa kwa Lesa, e munyinane kabili e nkashi yandi kabili e mayo.”+

4 Awe atendeke na kabili ukusambilisha mu lulamba lwa bemba.+ Ne bumba ilikalamba nga nshi lyalongene kuli ena, kabili aninine mu bwato e mo aikala pali bemba, lelo ibumba lyonse lyali ku lulamba lwa bemba.+ 2 E ico atendeke ukubasambilisha ifintu ifingi mu filangililo,+ na mu kusambilisha kwakwe abebele ati:+ 3 “Umfweni. Moneni! Katanda wa mbuto aile ku kutanda imbuto.+ 4 Kabili ilyo aletanda, imbuto shimo shaponene mu mbali ya musebo, ne fyuni fyaliishile no kushilya.+ 5 Ne mbuto shimbi shaponene pa mabwe, apashali umushili uwingi, na po pene shalikulile bwangu bwangu pa mulandu wa kuti tapali umushili uwingi.+ 6 Lelo ilyo akasuba kabalike, shalipiile, kabili pa mulandu wa kubulwa imishila shalibonsele no kuuma.+ 7 Na shimbi shaponene mu myunga, ne myunga yalikulile no kushitabilila, kabili tashatwele ifisabo.+ 8 Lelo shimbi shaponene pa mushili uusuma,+ kabili ilyo shamenene no kufula, shatendeke ukutwala ifisabo, kabili shatwele amakumi yatatu (30), na makumi mutanda (60), no mwanda umo (100).”+ 9 Kabili atile: “Uuli na matwi ya kuumfwa, naomfwe.”+

10 Nomba ilyo ali eka, abali nankwe pamo na ba basambi ikumi na babili (12) batendeke ukumwipusha pa filangililo.+ 11 Na o abebele ati: “Imwe balimupeela amano ya kumfwikisha inkama*+ ya bufumu bwa kwa Lesa, lelo ku bashala, ifintu fyonse fiba mu filangililo,+ 12 pa kuti nangu ca kuti balelolesha belamona iyo, kabili, nangu ca kuti baleumfwa beiluka iyo, kabili bealuka no kwelelwa.”+ 13 Kabili abebele ati: “Bushe tamwishibe umwalola ici cilangililo? Nga kanshi mukeluka shani ifilangililo fimbi?

14 “Katanda atanda icebo ca kwa Lesa.+ 15 Imbuto ishaponene mu mbali ya musebo, bantu aba kuti cilya fye baumfwa icebo, Satana aisa+ no kusenda icebo icatandilwe muli bena.+ 16 Kabili aba e batandwa pa mabwe: ilyo fye baumfwa icebo, bacitetekela no kusekelela.+ 17 Lelo tabakwete imishila, kabili baikalako fye inshita inono; nomba ilyo fye amafya yabaponena nelyo ilyo abantu babacusha pa mulandu wa cebo, banenuka.+ 18 Kuli na bambi abatandwa mu myunga; aba e balya aba kuti baumfwa icebo,+ 19 lelo amasakamika+ ya muli cino calo no kubeleleka kwa fyuma+ no lunkumbwa+ lwa fintu fimbi, fyaingila muli bena no kutabilila icebo, ica kuti cafilwa ukutwala ifisabo.+ 20 Na pa kulekelesha, abatandilwe pa mushili usuma ni abo abomfwa icebo no kucipokelela bwino no kutwala ifisabo amakumi yatatu (30), na makumi mutanda (60), no mwanda umo (100).”+

21 Kabili atile kuli bena: “Bushe abantu baasha inyali pa kuti baikupikile mu museke nelyo pa kuti baibike mwi samba lya busanshi? Bushe tabayasha pa kuti baibike pa ca kutekapo inyali?+ 22 Pantu takuli icabelama, icishakasokoloke; takuli icafiswa icishakeshibikwe.+ 23 Uuli na matwi ya kuumfwa, naomfwe.”+

24 Kabili atile: “Mulebika amano ku fyo muleumfwa.+ Ifyo mucita ku bantu bambi e fyo na bo bakacita kuli imwe,*+ kabili bakamulundilapo na fimbi.+ 25 Pantu uukwete, bakamupeela na fimbi; lelo uushikwete, bakamupoka ne co akwete.”+

26 E ico akonkenyepo ukusosa ati: “Ubufumu bwa kwa Lesa bwaba kwati ni filya umuntu atanda imbuto mu mushili,+ 27 kabili alaya mu kulaala ubushiku no kubuuka ulucelo, shasuka imbuto shapuuka no kukula, na o teshiba ne fyo shimena.+ 28 Umushili uwine weka e umesha ifisabo panono panono, umusonga e ubalilapo, e lyo pakonka umutwe, na pa kulekelesha inseke ishituntulu mu mutwe. 29 Lelo ilyo fye ifisabo fyapya, alapishamo icikwakwa, pantu ninshi inshita ya kulobolola naifika.”

30 Kabili abebele ati: “Bushe ubufumu bwa kwa Lesa kuti twabupashanya kuli cinshi, nelyo ni ku cilangililo nshi twingabulondolwelamo?+ 31 Bwaba kwati ka luseke ka lubanga, akacepesha pa nseke shonse isha pano isonde ilyo bakabyala mu mushili+—32 nomba cilya bakabyala, kalakula no kuba akakalamba ukucila umusalu onse no kukwata imisambo ikalamba,+ ica kuti ifyuni fya mu muulu+ kuti fyaisa mu kwikala mu cintelelwe ca kako.”+

33 Kanshi Yesu alelanda na bo amashiwi ya kwa Lesa mu filangililo+ ifingi ifya musango yu, ukulingana no mo bengomfwila. 34 Kabili talandile kuli bena ukwabula icilangililo, lelo ilyo bali beka alelondolwela abasambi bakwe fyonse.+

35 Kabili pa bushiku bulya ilyo cali icungulo, aebele abasambi bakwe ati: “Natwabukile kwi shilya.”+ 36 E ico, ilyo basalangenye ibumba, bamusendele mu bwato umo ali, kabili pali amato na yambi.+ 37 Awe kwaimine icikuuku ca mwela icikalamba na mabimbi yalapama mu bwato, ica kuti ubwato bwapene bwisule.+ 38 Lelo ali ku numa ya bwato, nalaala nasaila no mutwe pa musao. Awe balimushibwishe no kumweba abati: “Mwe Kasambilisha, bushe tamuletiina ukuti twalafwa?”+ 39 Awe aliimine no kukalipila umwela no kweba bemba ati: “Talala! Ba tondolo!”+ No mwela walilekele, awe kwatalele na tondolo.+ 40 E lyo abebele ati: “Cinshi muletiinina? Bushe na nomba tamulakwata icitetekelo nangu panono?” 41 Lelo balitiinine nga nshi, kabili baleipushanya abati: “Nga kanshi uyu nani, uwa kuti no mwela na bemba filamuumfwila?”+

5 Awe bafikile kwi shilya lya bemba mu calo ca bena Gerasa.+ 2 Kabili ilyo fye afumine mu bwato, umuntu uwali no mupashi wakowela alimukumenye uwafumine mu nshiishi.+ 3 Uyu muntu aleikala mu nshiishi; kabili ukufika lilya tapali nangu umo uwali na maka ya kumukaka na macheni, 4 pantu ilingi balemukaka amacheni ku maboko na ku makasa, lelo aleputaula amacheni kabili takwali uwali na maka ya kumunasha. 5 Kabili lyonse ubushiku na kasuba alebilikisha mu nshiishi na mu mpili no kuitetaula ku mabwe. 6 Lelo ilyo fye amwene Yesu akatalamukila, alibutukileko no kutoota, 7 kabili ilyo abilikishe,+ atile: “Bushe tulomfwana na iwe, Yesu, we Mwana wa kwa Lesa Uwapulamo?+ Lapa+ Lesa ukuti tawancushe.”+ 8 Pantu Yesu aleweba ati: “Fuma mu muntu, we mupashi wakowela.”+ 9 Kabili alamwipusha ati: “Ni wani ishina?” Na o amwebele ati: “Ishina lyandi nine Cinkupiti,+ pantu twaba abengi.”+ 10 Na o amupapaatile imiku iingi ukuti etamfya imipashi ukufuma muli ilya mpanga.+

11 Awe ku lupili kwali inkumba+ ishingi ishalelya.+ 12 E lyo imipashi yakowela yapapeete kuli Yesu aiti: “Tutamfisheni mu nkumba, e mo tuye twingile.” 13 Na o ali-isuminishe. Awe imipashi yakowela yalifumine no kuyaingila mu nkumba, ne nkumba shonse shabutukiile ukwasuluka no kuponena muli bemba, shanwena no kunwena. Shali nalimo amakana yabili (2,000).+ 14 Lelo abaleshicema balifulumwike no kuyashimika mu musumba na mu mishi; na bantu baile ku kumona ifyacitike.+ 15 Awe baishile kuli Yesu, kabili bamwene umuntu uwali kale na cinkupiti wa fibanda naikala nafwala kabili ali umutuntulu; awe balyumfwile umwenso. 16 Na bamweneko, babashimikile ifyo ici cacitikile umuntu uwali ne fibanda ne cacitike ku nkumba. 17 E ico batendeke ukupapaata Yesu ukuti afume mu fitungu fyabo.+

18 Kabili ilyo alenina mu bwato, umuntu uwali ne fibanda alamupapaata ukuti akonke.+ 19 Lelo tamusuminishe, amwebele ati: “Kabiye ku ng’anda kuli balupwa lobe,+ no kubashimikila fyonse ifyo Yehova+ akucitila ne fyo akubelela uluse.”+ 20 Awe aliile, alabila mu Dekapoli+ fyonse ifyo Yesu amucitiile, na bantu bonse balapapa.+

21 Ilyo Yesu ayabukile na kabili kwi shilya lya bemba mu bwato, ibumba ilikalamba lyalongene kuli ena; ninshi ali ku lulamba lwa bemba.+ 22 Nomba kwaishile umuntu umo umukalamba we sunagoge, ishina lyakwe ni Yairo, kabili ilyo fye amumwene, awile ku makasa yakwe+ 23 no kumupapaata nga nshi ati: “Akamwana kandi akakashana nakalwala sana. Iseni mubikepo iminwe+ yenu pa kuti kapole kabe akatuntulu.”+ 24 Na o aile pamo nankwe. Ne bumba ilikalamba lyalamukonka no kumutitikisha.+

25 Awe kwali umwanakashi uwalefuma umulopa+ pa myaka ikumi na ibili (12),+ 26 kabili aculile nga nshi kuli bakondapa+ abengi abaeseshe ukumuposha kabili alipooselepo icuma cakwe conse lelo tapolele, e lyo alwalileko. 27 Ilyo aumfwile ifyo abantu balelanda pali Yesu, aishile ku numa mwi bumba no kukumya+ ku ca kufwala cakwe; 28 pantu aleti: “Nga nakumya fye ku fya kufwala fyakwe, nalapola.”+ 29 Kabili ilyo line umulopa walikele ukufuma, kabili alyumfwile mu mubili wakwe ukuti ubulwele bwakwe ubwabipisha bwapola.+

30 Na o Yesu ilyo line aumfwile uukuti amaka+ yafuma muli ena, kabili alipilibwike mwi bumba, alasosa ati: “Nani akumya ku fya kufwala fyandi?”+ 31 Lelo abasambi bakwe balamweba ati: “Namumona ukuti ibumba lilemutitikisha,+ nomba kuti mwasosa shani amuti, ‘Nani ankumya?’” 32 Lelo ena alalolesha konse konse pa kuti amone uwamukumishe. 33 Awe umwanakashi alitiinine no kututuma pa mulandu wa kuti alishibe icamucitikile, kabili alishile no kuwa kuli ena no kumulondolwela fye fyonse.+ 34 Na o amwebele ati: “We mwana, icitetekelo cobe nacikuposha. Kabiye umutende,+ kabili upolelele na ku bulwele bobe ubwabipisha.”+

35 Ilyo acili alelanda, abantu bamo abafumine ku ng’anda ya mukalamba we sunagoge balishile no kusosa abati: “Umwana wenu nafwa! Cinshi ico mucili mulepamfisha kasambilisha?”+ 36 Lelo ilyo Yesu aumfwile balelanda aya mashiwi, aebele umukalamba we sunagoge ati: “Witiina, tetekela fye.”+ 37 Kabili tasuminishe bambi ukumukonka kano fye Petro na Yakobo na Yohane munyina Yakobo.+

38 Awe bafikile pa ng’anda ya mukalamba we sunagoge, kabili asangile pali icongo na bantu baleloosha no kulila nga nshi, 39 kabili ilyo aingile, abebele ati: “Mulandu nshi mulekafisha icongo no kuloosha? Umwana tafwile, aleele fye utulo.”+ 40 Awe balamuseka no kumupumya. Lelo ilyo afumiishe bonse pa nse, abuulile wishi wa mwana na nyina na bali nankwe, no kwingila umwali umwana.+ 41 Kabili ilyo abuulile ukuboko kwa mwana, amwebele ati: “Talita kumi,” icalola mu kuti: “We mukashana, ndekweba nati, Ima!”+ 42 Awe ilyo line umukashana alimine alaenda, kabili ali ne myaka ikumi na ibili (12). Na bafyashi bakwe apo pene bapeshiwe amano no kusekelela nga nshi.+ 43 Lelo abakonkomeshe nga nshi ukuti beleka umuntu nangu umo eshibe+ pali ici. Kabili abebele ati bapeele umukashana ifya kulya.

6 Kabili alifumineko no kuya ku citungu ca ku mwabo, na basambi bakwe balimukonkele.+ 2 Ilyo isabata lyafikile, alasambilisha mwi sunagoge; na bengi pa baleumfwa balipapile abati: “Bushe uyu muntu afumishe kwi ifi fintu?+ Kabili mulandu nshi aya amano yapeelelwe kuli uyu muntu, kabili cinshi alecitila ifipesha amano fya musango yu? 3 Bushe uyu te kabasa,+ umwana wa kwa Maria+ kabili munyina Yakobo+ na Yosefe na Yuda na Simone?+ Bushe ne nkashi shakwe tatwaba na sho kuno?” Awe balifililwe ukumusumina.+ 4 Lelo Yesu abebele ati: “Kasesema tasuulwa,+ kano fye mu mushi wakwe, muli balupwa lwakwe na mu ng’anda yakwe.”+ 5 E ico tacitile icipesha amano kulya, lelo abikile fye iminwe yakwe pa bantu abanono abalwele no kubondapa. 6 Awe alipapile pa fyo bakeene ukutetekela. Kabili ashingulwike mu mishi yali mupepi, alesambilisha.+

7 E lyo aitile abe kumi na babili (12), kabili alabatuma babili babili,+ no kubapeela amaka aya kufumya imipashi iyakowela.+ 8 Kabili abebele ukukanasenda nangu cimo pa lwendo kano fye inkonto, alibakenye ukusenda umukate, nangu icola ica fya kulya,+ nangu ni ndalama sha mukuba mu fikwama fya mu mishipi yabo.+ 9 Lelo abebele ati kuti bafwala indyato, nomba te kwesha ukusenda* ifya kufwala fibili.+ 10 Kabili abebele ati: “Konse uko mwaya, mu ng’anda umo mwaingila,+ mukekale umo mwine mpaka mukafume kuli iyo ncende.+ 11 Na konse uko bashakamupokelele nelyo ukumuumfwa, pa kufumako, mulekunta ulukungu ku makasa yenu pa kubashinina.”+ 12 Awe baile baleshimikila pa kuti abantu balapile;+ 13 kabili balefumya ifibanda+ ifingi no kusuba amafuta+ abalwele abengi no kubondapa.+

14 Nomba Imfumu Herode* yalyumfwile pali ici, pantu ishina lya kwa Yesu lyalilumbwike, na bantu baleti: “Yohane kabatisha nabuuka ku bafwa, e mulandu wine akwatile amaka ya kucita ifipesha amano.”+ 15 Lelo bambi baleti: “Ni Eliya.”+ Bambi na bo baleti: “Ni kasesema, kabili ali fye nga bakasesema bambi.”+ 16 Lelo ilyo Herode aumfwile pali ici, alasosa ati: “Ulya Yohane naputwile umutwe, e wabuuka.”+ 17 Pantu Herode e watumine abakuyaikata Yohane no kumukaka mu cifungo pa mulandu wa kwa Herodia muka Filipi munyina, pantu e o aupile.+ 18 Pantu imiku ne miku Yohane akonkomeshe Herode ati: “Calibindwa ukuupa umukashi wa kwa munonko.”+ 19 Awe Herodia afuliilwe+ Yohane kabili alefwaya ukumwipaya, lelo alifililwe.+ 20 Pantu Herode aletiina+ Yohane, ico alishibe ukuti mulungami kabili wa mushilo;+ kabili alimusungile bwino. Kabili ilyo alemuumfwa+ taishibe ica kucita, lelo aletemwa ukumumfwa.

21 Awe bwasuka ubushiku+ bwalinga bwafika ilyo Herode apekanishishe bacilolo bakwe na bakalamba ba bashilika na bakalamba ba mu Galili umutebeto pa bushiku bwa kufyalwa+ kwakwe. 22 No mwana mwanakashi wa kwa Herodia alingilemo no kucinda, kabili Herode na baikele+ pamo nankwe balitemenwe nga nshi. Ne mfumu yaebele umukashana ati: “Lomba conse ico ulefwaya, nalakupeela.” 23 Yalilapile no kulapa aiti: “Conse ico ulenomba, nalakupeela,+ nangu fye ukukwakanyako ubufumu bwandi pa kati.”+ 24 Na o alifumine no kuyaipusha nyina, ati: “Bushe cinshi ningalomba?” Na o amwebele ati: “Lomba umutwe wa kwa Yohane kabatisha.”+ 25 Awe ilyo line ayangufyenye ukuya ku mfumu no kulomba, ati: “Ndefwaya mumpeele umutwe wa kwa Yohane Kabatisha nomba line pa mbale.” 26 Nangu imfumu yaiketwe ubulanda nga nshi, yalifililwe ukumukaanina, pa mulandu wa milapo yalapile na pa mulandu wa balelya na yo.+ 27 E ico imfumu ilyo line yatumine umulinshi wa iko no kumweba ukuti alete umutwe wa kwa Yohane. Na o ailemuputula umutwe mu cifungo+ 28 no ku-uleta pa mbale, no ku-upeela ku mukashana no mukashana aupeele kuli nyina.+ 29 Ilyo abasambi bakwe baumfwile ici, balishile no kusenda icitumbi cakwe no kucibika mu nshiishi.+

30 Na batumwa balongene capamo kuli Yesu no kumushimikila fyonse ifyo bacitile ne fyo basambilishe.+ 31 Na o abebele ati: “Natuleya ukutalele ukwa kuti tube fweka+ tutuusheko panono.”+ Pantu kwali abengi abaleisa na balefumako, kabili tabakwete ne nshita ya kutuushako ukuti balye.+ 32 E ico baile mu bwato ku ncende imo pa kuti babe beka.+ 33 Lelo abantu balibamwene baleya kabili abengi balishibe ici, kabili bafumine mu misumba yonse no kubutukilako capamo pa makasa no kubatangilila.+ 34 Awe, pa kufuma mu bwato, amwene ibumba ilikalamba, kabili aumfwile uluse,+ pantu bali nge mpaanga ishabula kacema.+ Kabili atendeke ukubasambilisha ifintu ifingi.+

35 Ne nshita nomba yalipwile, kabili abasambi bakwe baishile kuli ena balasosa abati: “Pano ni pa mpanga, na kasuba nakawa.+ 36 Lekeni abantu baye, pa kuti baye mu mishi na mu ncende shili mupepi, bashite ifya kulya.”+ 37 Lelo Yesu abebele ati: “Imwe bene bapeeleni ifya kulya.” Na bo bamwebele abati: “Bushe tuyeshita imikate ya badenari* imyanda ibili (200) no kupeela abantu ukuti balye?”+ 38 Na o abebele ati: “Bushe mukwete imikate inga? Kabiyeni, kamoneni!” Ilyo baimwene, batile: “Isano, e lyo ne sabi libili.”+ 39 E lyo aebele abantu bonse ukwikala mu mabumba+ pa cani.+ 40 Kabili baikele mu mabumba umwali abantu umwanda umo (100) na bambi mu mabumba umwali abantu amakumi yasano (50).+ 41 Kabili ilyo abuulile imikate isano ne sabi libili, aloleshe mu muulu no kupepa,+ kabili amokawile+ imikate, alapeela abasambi, ukuti na bo bapeele abantu; kabili ayakenye isabi kuli bonse. 42 Awe bonse baliliile no kwikuta;+ 43 kabili balongenye ifyasheleko, fyaiswile mu miseke ikumi na ibili (12), kwali ne sabi ilyasheleko. 44 Na baliile imikate bali abaume amakana yasano (5,000).+

45 Kabili apo pene, acincishe abasambi bakwe ukunina mu bwato no kutangilako kwi shilya ukulola ku Betsaida, e lyo ena ashala alesalanganya ibumba.+ 46 Kabili ilyo abafishishepo, aile ku lupili ku kupepa.+ 47 Ilyo cali icungulo bushiku, ubwato bwali pa kati ka bemba, lelo ena ali eka ku mulundu.+ 48 Kabili ilyo amwene balecula+ pa koba, pa mulandu wa kuti umwela walefuma uko baleya, aishile kuli bena nalimo pa bulinde bwa bushiku ubwalenga bune,* ale-enda pali bemba; lelo acitile kwati alebapitilila. 49 Ilyo fye bamumwene ale-enda pali bemba, batontonkenye ukuti cintu fye icapala umuntu kabili balipundile.+ 50 Pantu bonse balimumwene kabili balitiinine. Lelo ilyo line alandile kuli bena, kabili abebele ati: “Shipeni, nine; mwitiina.”+ 51 Kabili aninine mu bwato umo bali, no mwela walinakile. Awe balipapile nga nshi mu mitima yabo,+ 52 pantu tabailwike ukuti uwapangile imikate mu cipesha amano, kuti acita ne ci cine icipesha amano pantu calibakosele ukuumfwa.+

53 Kabili ilyo bafikile ku mulundu, baile ku Genesarete no kukaka ubwato lwa mupepi.+ 54 Lelo ilyo bafumine fye mu bwato, abantu balimwishibe, 55 kabili balapitana mu citungu conse cilya, no kulasenda abalwele pa matanda ukubatwala uko baumfwile ukuti e ko ali. 56 Na monse umo aleingila mu mishi nelyo mu misumba nelyo mu mishi iyapalamina ne misumba,+ balebika abalwele pa maliketi, kabili balemupapaata ukuti bakumyeko+ fye ku nsenkebele+ sha ku ca kufwala cakwe. Kabili abengi abakumisheko balipolele.+

7 Nomba abaFarise na bakalemba bamo abafumine ku Yerusalemu balongene ukwali Yesu.+ 2 Kabili ilyo bamwene abasambi bakwe bamo balelya ifya kulya ku minwe ya fiko,* e kutila, iyabula ukusamba+— 3 pantu abaFarise na baYuda bonse tabalya kano basamba iminwe yabo ukufika na mu nkonkoni, bakonka sana intambi sha ba kale, 4 kabili, ilyo babwela ku maliketi, tabalya kano babala basamba; kabili kwaba na shimbi intambi+ ishingi isho bakonka sana, pamo nga ukutubika amakapu ne mitondo ne fipe fya mukuba mu menshi;+— 5 e ico aba abaFarise na bakalemba bamwipwishe abati: “Mulandu nshi abasambi bobe tabakonkela intambi sha ba ku kale, lelo baliila ifya kulya ku minwe ya fiko?”+ 6 Na o abaswike ati: “Esaya aseseme bwino pali imwe, mwe ba bumbimunda, ifyo calembwa ukuti,+ ‘Aba bantu bancindika ku milomo yabo, lelo imitima yabo yalitaluka kuli ine.+ 7 Kwa fye ukupepa uko bampepa, pantu ifisambilisho basambilisha mafunde ya bantu.’+ 8 Mwalisuula amafunde ya kwa Lesa, kabili mukonka intambi sha bantu.”+

9 Abebele no kuti: “Mu bucenjeshi bwenu mwalisuula ifunde+ lya kwa Lesa pa kuti mukonke intambi shenu. 10 Pantu Mose atile, ‘Ulecindika wiso na noko,’+ kabili, ‘Uutuka wishi nelyo nyina ukufwa akafwe.’+ 11 Lelo imwe mutila, ‘Umuntu nga aeba wishi nelyo nyina ati: “Conse ico nakwata ico ningamwafwako ni korbani,+ (e kuti, ubupe ubwapeelwa+ kuli Lesa,)”’— 12 muleka fye uyo muntu ukuti ecitila wishi nelyo nyina icintu nangu cimo,+ 13 e ico mwasangula icebo ca kwa Lesa+ ica fye pa mulandu wa ntambi shenu isho mushiilana.” Kabili mucita ifingi+ ifyaba nge fi. 14 Aitile ibumba ukwisa uko ali na kabili, e lyo alabeba ati: “Kutikeni kuli ine imwe bonse, no kwiluka ifyo ndesosa.+ 15 Takuli nangu cimo icifuma ku nse ya muntu icingila mu nda yakwe no kumukowesha; kano ififuma mu muntu e fikowesha umuntu.”+ 16 * ——

17 Nomba ilyo aingile mu ng’anda no kutaluka kwi bumba, abasambi bakwe balamwipusha pali cilya cilangililo.+ 18 Na o atile kuli bena: “Bushe na imwe tamwilwike?+ Bushe tamwishibe ukuti takuli nangu cimo icifuma ku nse icingila mu muntu icingamukowesha, 19 pantu tacingila mu mutima, lelo cingila mu nda, no kufumina mu cimbusu?”+ E ico kanshi asosele ukuti ifya kulya fyonse fyalisanguluka.+ 20 Kabili asosele ati: “Icifuma mu muntu e cikowesha umuntu;+ 21 pantu mu kati, mu mutima wa bantunse,+ e mufuma amatontonkanyo yabipa: ubulalelale,+ ubupuupu, ukwipaya,+ 22 ubucende, ulunkumbwa,+ ukucita ifyabipa, ubucenjeshi, ifya nsoni,+ ilinso lya mufimbila, imiponto, amatutumuko, ubuwelewele. 23 Fyonse ifi ifyabipa fifuma mu kati no kukowesha umuntu.”+

24 Ukufuma kulya, alimine no kuya ku fitungu fya Turi na Sidone.+ Awe aingile mu ng’anda kabili talefwaya nangu umo ukwishiba. Na lyo line alifililwe ukufisama;+ 25 awe apo pene umwanakashi uwali na kamwana akakashana akali no mupashi uwakowela aumfwile pali Yesu, kabili aishile no kuwa ku makasa yakwe.+ 26 Umwanakashi ali muGriki, uwa ku Foinike iyaba mu Siria; kabili alamulomba ukuti afumye icibanda mu mwana wakwe.+ 27 Lelo Yesu e pa kumweba ati: “Leka abana batale bekute; pantu tacalinga ukubuula umukate wa bana+ no kupoosela utubwa.”+ 28 Lelo umwanakashi amwaswike ati: “Ee, mukwai, lelo, no tubwa twine utuli mwi samba lye tebulo tulalyako ubufungau+ ubulepona ku mukate wa bana.”+ 29 Na o amwebele ati: “Pa mulandu wa fyo wasosa, kabiye; nacifuma icibanda mu mwana obe.”+ 30 Awe aile ku ng’anda yakwe no kusanga+ umwana nalaala pa busanshi ne cibanda nacifumamo.

31 Nomba pa kufuma ku fitungu fyali mu Turi, apitile mu Sidone no kuya kuli bemba wa Galili no kuyapita mu kati ka fitungu fya Dekapoli.+ 32 E ko bamuleteele nkomamatwi uwalebulubusa, kabili bamupapaatile ukuti abike iminwe yakwe pali ena.+ 33 Na o amufumishe pe bumba, amusenda ku mbali, no kubika iminwe yakwe mu matwi ya muntu, kabili ilyo afwishile amate, amukumishe ku lulimi.+ 34 Kabili ilyo aloleshe mu muulu,+ aishishe sana icefu+ no kumweba ati: “Efata,” e kuti, “Komoka.” 35 Awe amatwi yakwe yalikomweke,+ na kalimba akaikete ululimi kaliputwike, kabili atendeke ukulanda fye bwino. 36 E lyo abakonkomeshe ukuti be-ebako nangu umo;+ lelo ilyo abakonkomeshe ukucilamo, e lyo na bo bacililemo ukubilisha.+ 37 Awe balepapa+ nga nshi no kusosa abati: “Nacita ifintu fyonse bwino. Alenga na bankomamatwi ukuumfwa na bacibulu ukulanda.”+

8 Mu nshiku shilya, ilyo na kabili kwali ibumba ilikalamba kabili tabakwete ifya kulya, Yesu aitile abasambi bakwe no kubeba ati:+ 2 “Naumfwila ibumba uluse,+ pantu nomba inshiku shaba shitatu isho baikala na ine kabili tabakwete ifya kulya; 3 kabili nga nabaleka baye ku mwabo ne nsala, kuti bafwa ulushile mu nshila. Na kuba, bamo bafumine ukutali.” 4 Lelo abasambi bakwe bamwaswike abati: “Ni kwi umuntu pano pa mpanga engafumya imikate ya kuti aba bantu balye bekute?”+ 5 Lelo abepwishe ati: “Muli ne mikate inga?” Na bo batile: “Cinelubali (7).”+ 6 E lyo aebele ibumba ukwikala pa nshi, abuulile ne mikate cinelubali (7), atasha+ kuli Lesa, aimokaula, alapeela abasambi bakwe ukuti bapeele abantu, na bo balibapeele.+ 7 Balikwete no tusabi tumo utunono; kabili ilyo atashishe Lesa, abebele ukuti na to twine bapeele abantu.+ 8 Awe baliliile no kwikuta, balonganike ne fyasheleko, kabili fyaiswile imiseke cinelubali (7).+ 9 Kabili abaume bali nalimo amakana yane (4,000). E lyo abalekele baye.+

10 Kabili apo pene aninine mu bwato na basambi bakwe no kuya ku ncende sha ku Dalmanuta.+ 11 E ko abaFarise bafumine, balabikana ifikansa nankwe, balefwaya aciteko icishibilo ukufuma ku muulu, pa kuti bamweshe.+ 12 Na o aishishe icefu nga nshi,+ no kusosa ati: “Mulandu nshi inkulo ino ilefwaila icishibilo? Ndemweba icine cine, nati, Abantu ba nkulo ino tabakamone icishibilo.”+ 13 E ico alibashile, aninine mu bwato na kabili, no kwabukila kwi shilya.

14 Awe abasambi balabile ukusenda imikate, kabili tabasendele nangu kamo mu bwato kano fye umukate umo.+ 15 Na o alabakonkomesha ati: “Loleni, cenjeleni ku citutumushi ca baFarise ne citutumushi ca kwa Herode.”+ 16 Awe balakansana pa mulandu wa kuti tabakwete imikate.+ 17 Na o pa kwishiba ici, abebele ati: “Mulandu nshi mulekansanina pa mulandu wa kuti tamukwete imikate?+ Bushe na nomba tamulailuka no kwishiba? Bushe nacimukosela ukuumfwa?+ 18 ‘Mwalikwata amenso, bushe tamumona? Mwalikwata amatwi, bushe tamuumfwa?’+ Kabili bushe tamuleibukisha? 19 Miseke inga mwaiswishe ku fyasheleko ilyo namokawile imikate+ isano no kuliisha abaume amakana yasano (5,000)?” Na bo bamwaswike ati: “Yali ikumi na ibili (12).”+ 20 “Kabili ilyo namokawile imikate cinelubali (7) no kuliisha abaume amakana yane (4,000), bushe miseke inga iyaiswilemo ifyasheleko?” Na bo bayaswike ati: “Cinelubali.”+ 21 Na o e pa kubeba ati: “Bushe na nomba tamulailuka?”+

22 Nomba bafikile ku Betsaida. E ko abantu bamuleteele impofu, no kumupapaata ukuti aikumye.+ 23 Na o aikete impofu pa kuboko, no kuisenda ku nse ya mushi, kabili ilyo aifwishile+ amate mu menso, abikile iminwe yakwe pali yena no kuipusha, ati: “Bushe wamonapo icili conse?” 24 No yu muntu ainwine amenso no kutila: “Ndemona abantu, pantu ndemona ifilemoneka kwati fimuti, nomba file-enda.” 25 E lyo abikile na kabili iminwe yakwe pa menso ya uyu muntu, awe alipolele, atampa no kulolesha bwino, alamona ne fintu fyonse bwino bwino. 26 Awe amulekele aye ku mwabo, ati: “Lelo wi-ingila mu mushi.”+

27 Awe Yesu na basambi bakwe baile ku mishi ya ku Kaisarea Filipi, kabili mu nshila alaipusha abasambi bakwe ati: “Bushe abantu batila nine ani?”+ 28 Na bo bayaswike ati: “Batila ni mwe Yohane Kabatisha,+ na bambi batila, Eliya,+ e lyo bambi na bo batila, Ni umo pali bakasesema.”+ 29 E lyo abepwishe ati: “Nga imwe mutila nine nani?” Petro a-aswike ati: “Ni mwe Kristu.”+ 30 Awe abakonkomeshe ukuti be-ebako nangu umo ulwa ena.+ 31 Kabili atendeke ukubasambilisha ukuti Umwana wa muntu bali no kumucusha nga nshi kabili abakalamba ne ntungulushi sha bashimapepo na bakalemba bali no kumukaana no kumwipaya+ kabili akabuuka pa numa ya nshiku shitatu.+ 32 Na kuba, tafishilepo nangu cimo pa kulanda aya mashiwi. Lelo Petro amutwele ku mbali, atampa ukumukalipila.+ 33 Na o alipilibwike, alolesha abasambi bakwe no kukalipila Petro ati: “Kabiye ku numa yandi, we Satana we, pantu tautontonkanya ifya kwa Lesa, kano ifya bantu.”+

34 Nomba aitile ibumba na basambi bakwe ukwisa kuli ena no kubeba ati: “Umuntu nga alefwaya ukunkonka, aikaane umwine, asende icimuti cakwe ica bucushi, alenkonka lyonse.+ 35 Pantu onse uufwaya ukupususha umweo wakwe akafwa; lelo onse uwafwila pa mulandu wandi na pa mulandu wa mbila nsuma akaupususha.+ 36 Na kuba, bushe umuntu kuti amwenamo shani nga anonka icalo conse no kulofya umweo wakwe?+ 37 Nga cinshi ico umuntu engapeela icingalinga ukukabushanya no mweo wakwe?+ 38 Pantu onse uwaumfwila insoni ine na mashiwi yandi mu nkulo ino iya bantu abashaba na cishinka kuli Lesa* kabili ababembu, Umwana wa muntu na o akamumfwila insoni+ ilyo akesa no bukata bwa kwa Wishi pamo na bamalaika ba mushilo.”+

9 Kabili, alabeba ati: “Ndemweba icine cine nati, Kuli bamo pa beminine pano abashakafwe nakalya mpaka bakamone ubufumu bwa kwa Lesa bwatendeka ukuteka na maka.”+ 2 Awe ilyo papitile inshiku mutanda (6), Yesu asendele Petro na Yakobo na Yohane no kunina na bo ulupili ulutali pa kuti babe fye beka. Kabili alyalwike ninshi balemonako,+ 3 ne fya kufwala fyakwe fyabeeka ukucila ifyo uucapa ifya kufwala onse pano isonde engafibuutusha.+ 4 Kabili, bamwene Eliya pamo na Mose balelanda na Yesu.+ 5 Awe Petro aebele Yesu ati: “Mwe kasambilisha,* kuti cawama twikale pano pene. Natupangepo insakwe shitatu, imo iyenu, imbi iya kwa Mose e lyo na imbi iya kwa Eliya.”+ 6 Na kuba, taishibe ifya kusosa, pantu balitiinine nga nshi. 7 Awe kwaishile ikumbi, lyabakupa, ne shiwi+ lyafumine mwi kumbi aliti: “Uyu e Mwana wandi,+ uo natemwa; muumfweni.”+ 8 Awe apo pene baliloleshe konse konse lelo tabamwene umuntu nangu umo pamo na bo, kano Yesu eka.+

9 Ilyo baletentemuka ulupili, Yesu abakonkomeshe ukuti beshimikilako+ umuntu nangu umo ifyo bamwene, mpaka ilyo Umwana wa muntu akabuuka ku bafwa.+ 10 Kabili basungile aya mashiwi mu mitima, lelo balanshenye abene beka umwalolele uku kubuuka ku bafwa. 11 Kabili balamwipusha, abati: “Mulandu nshi bakalemba basosela abati Eliya+ afwile ukubalilapo ukwisa?”+ 12 Na o abebele ati: “Eliya e uli no kubalilapo ukwisa no kubweseshamo ifintu fyonse;+ lelo cinshi calembelwa ukuti Umwana wa muntu afwile ukucula+ nga nshi kabili bakamusuula?+ 13 Lelo ndemweba nati, Eliya,+ na kuba, aliisa, kabili bamucitile ifintu ifingi ifyo balefwaya, ifyo calembwa pali ena.”+

14 Nomba, ilyo baile ku basambi bambi, bamwene ibumba ilikalamba nalibashinguluka na bakalemba balekansana na bo.+ 15 Lelo cilya fye abantu bamumona, balipapile e lyo bamubutukila, balamuposha. 16 Na o aipwishe abantu ati: “Cinshi ico mulekansaninapo na bo?” 17 Na umo mwi bumba amwaswike ati: “Mwe Kasambilisha, ndetele umwana wandi umwaume kuli imwe pantu aba no mupashi wa bucibulu;+ 18 kabili lyonse ilyo wamwikata, ulamufuntula pa nshi, kabili alafumya ifulo no kusumanya ameno no kupwa amaka. Kabili njebele abasambi benu ukuti baufumyemo, lelo nabafilwa.”+ 19 Na o abaswike ati: “Mwe nkulo iishaba ne citetekelo,+ bushe nkaba na imwe ukufika lilali? Bushe nkashipikisha na imwe ukufika lilali? Muleteni kuno.”+ 20 Na bo bamutwele kuli Yesu. Lelo umupashi pa kumumona, apo pene wafulansha umwana, awa na pa nshi, alafulukuta, alefumya ne fulo.+ 21 E lyo aipwishe wishi ati: “Bushe ni lilali ici catendeke?” Na o atile: “Ukufuma fye ku bwaice; 22 kabili ilingi ulamupoosa mu mulilo na mu menshi ukuti umwipaye.+ Lelo nga mwingacitapo cimo, mutumfwile uluse no kutwafwa.” 23 Na o Yesu amwebele ati: “Mulandu nshi wasosela auti, ‘Nga mwingacitapo cimo’! Fyonse kuti fyacitwa, ngo muntu ali ne citetekelo.”+ 24 Awe apo pene wishi wa mwana abilikishe ati: “Ndi ne citetekelo! Njafweni ukukosha icitetekelo candi!”+

25 Nomba ilyo Yesu amwene ukuti ibumba lyalebutukila kuli bena, akalipile+ umupashi wakowela, ati: “We mupashi wa bucibulu kabili uwa bunkomamatwi, ndekweba, nati, fuma mu mulumendo e lyo wikengilamo na kabili iyo.” 26 No mupashi walifumine pa numa ya kubilikisha no kufulansha umulumendo na maka;+ kabili ali kwati nafwa, ica kuti abengi baletila: “Nafwa!” 27 Lelo Yesu amwikete ku kuboko no kumwimya, na o aliimine.+ 28 Ilyo aingile mu ng’anda, abasambi bakwe bamwipwishe ku mbali abati: “Mulandu nshi twacifililwa uku-ufumya?”+ 29 Na o abaswike ati: “Umupashi wa musango yu teti mu-utamfyemo kano fye kwi pepo.”+

30 Ilyo bafumine kulya, bailepita mu Galili, lelo talefwaya nangu umo ukwishiba. 31 Pantu alesambilisha abasambi bakwe ati: “Umwana wa muntu bali no kumupeela mu minwe ya bantu, kabili bakamwipaya,+ lelo nangu bakamwipaya, akabuuka ilyo pakapita inshiku shitatu.”+ 32 Lelo tabaumfwikishe aya mashiwi, kabili balitiinine ukumwipusha.+

33 Kabili baile ku Kapernahumu. Nomba ilyo ali mu ng’anda, abepwishe ati: “Cinshi mwacilakansaninapo mu nshila?”+ 34 Baikele fye tondolo, pantu mu nshila balekansana abati, umukalamba nani?+ 35 E ico aliikele no kwita abe kumi na babili (12) no kubeba ati: “Umuntu nga alefwaya ukuba uwa ntanshi, afwile aba uwa kulekelesha pali bonse kabili afwile ukulabombela bonse.”+ 36 E lyo abuulile umwana umunono, amwiminike pa kati kabo no kumufukatila, no kubeba ati:+ 37 “Onse uwapokelela umo pa bana banono ngo yu pa mulandu we shina lyandi, ninshi apokelela ine; na onse uwapokelela ine, ninshi te ine fye apokelela, lelo apokelela no wantumine.”+

38 Yohane amwebele ati: “Mwe Kasambilisha, twamwene umuntu umo aletamfisha ifibanda mwi shina lyenu kabili twalimuleseshe,+ pantu tatukonka.”+ 39 Lelo Yesu atile: “Mwilamulesha, pantu takuli nangu umo uucita icipesha amano mwi shina lyandi kabili apo pene atampa ukulampontela;+ 40 pantu uushitulwisha, ninshi mwina mwesu.+ 41 Pantu onse uwamupeela kapu+ ya menshi aya kunwa pa mulandu wa kuti muli ba kwa Kristu,+ ndemweba icine cine, nati, takabulwe icilambu cakwe nakalya. 42 Lelo onse uwafumya ku citetekelo* umo pali aba abanono abasumina, kuti cawama bamukobeka mu mukoshi icilibwe cafina ica kupelelako nga cilya impunda ipindulula no kumupoosa fye muli bemba.+

43 “Kabili ukuboko kobe nga kulekulenga ukulufyanya, kuputuleko; cawamapo wapusuka uwa makunkutu ukucila ukuya na maboko yabili ku Gehena,* mu mulilo uushingashima.+ 44 *—— 45 Kabili ulukasa lobe nga lulekulenga ukulufyanya, luputuleko; cawamapo wapusuka uwalemana+ ukucila ukupooswa mu Gehena uli na makasa yabili.+ 46 *—— 47 Ne linso lyobe nga lilekulenga ukulufyanya, lipoose;+ cawamapo ukwingila mu bufumu bwa kwa Lesa uli ne linso limo ukucila ukukupoosa uli na menso yabili mu Gehena,+ 48 umo imititi taifwa no mulilo taushima.+

49 “Pantu umuntu onse akalungwamo umucele+ wa mulilo. 50 Umucele usuma; lelo umucele nga wafumuka, ni kuli cinshi mukaulowesha?+ Muleba no mucele+ mu myeo yenu, kabili muleikala umutende+ na banenu.”

10 Ukufuma kulya, alimine no kuya ku mipaka ya Yudea na kwi shilya lya Yordani. Amabumba na kabili yalongene kuli ena, kabili nga fintu alecita lyonse, alabasambilisha na kabili.+ 2 Nomba abaFarise balishile, kabili pa kuti bamweshe, batendeke ukumwipusha nga calisuminishiwa ku muntu ukuleka umukashi wakwe.+ 3 Na o abaswike ati: “Cinshi Mose amwebele?” 4 Na bo batile: “Mose alisuminishe ukuti umulume kuti alemba kalata wa kumutamfya no kumuleka.”+ 5 Lelo Yesu abebele ati: “Ni pa mulandu wa kukosa kwa mitima yenu+ amulembele ili funde. 6 Lelo pa kutendeka kwa kubumba, ‘Ababumbile umwaume no mwanakashi.+ 7 E mulandu wine umwaume akashiila wishi na nyina, 8 kabili aba babili bakaba umubili umo’;+ e ico nomba tabali babili iyo, lelo bali umubili umo. 9 Kanshi, ico Lesa alundenye, umuntu e cilekanya.”+ 10 Ilyo bali na kabili mu ng’anda,+ abasambi bakwe balamwipusha pali uyu mulandu. 11 Na o abebele ati: “Onse uwaleka umukashi wakwe no kuupa umbi, ninshi acita ubucende+ kabili amubembukila. 12 No mwanakashi nga aleka umulume wakwe, aupwa kuli umbi, ninshi acita ubucende.”+

13 Nomba abantu batendeke ukumuletela abana abanono ukuti abakumye; lelo abasambi balibakalipile.+ 14 Ilyo Yesu amwene ifi, alikalipe no kubeba ati: “Lekeni abana banono bese kuli ine; mwibakaanya, pantu ubufumu bwa kwa Lesa bwa bantu ababa kwati ni aba bana.+ 15 Ndemweba icine cine, nati, Onse uushipokelela ubufumu bwa kwa Lesa filya umwana munono apokelela ifintu, takengilemo nakalya.”+ 16 Kabili afukatile abana, alabapaala, abikile ne minwe yakwe pali bena.+

17 Kabili ilyo alefuma kulya aleya mu nshila, umuntu alimubutukile no kumufukamina, alamwipusha ati: “Mwe Kasambilisha musuma, cinshi mfwile ukucita pa kuti nkakwate umweo wa muyayaya?”+ 18 Na o Yesu amwebele ati: “Mulandu nshi wanjitila ati umusuma?+ Takwaba umusuma nangu umo, kano fye Lesa eka.+ 19 Walishiba amafunde ayatila, ‘Wilaipaya,+ Wilacita ubucende,+ Wilaiba,+ Wilaba inte ya bufi,+ Wilacenjesha abanobe,+ Ulecindika wiso na noko.’”+ 20 Na o amwebele ati: “Mwe Kasambilisha, ndakonka ifi fyonse ukufuma fye ku bwaice.” 21 Na o Yesu alimuloleshe, kabili alimutemenwe no kumweba ati: “Kuli icintu cimo ico ufwile ukucita: Kabiye, kashitishe fyonse ifyo wakwata no kupeela abapiina indalama, kabili ukakwata icuma mu muulu, e lyo wise ube umusambi wandi.”+ 22 Lelo aya mashiwi yalimuletele ubulanda, kabili afuminepo ninshi naikatwa ubulanda, pantu alikwete ifyuma ifingi.+

23 E lyo Yesu aloleshe konse konse no kweba abasambi bakwe ati: “Ifyo cikaba icayafya ku ba ndalama+ ukwingila mu bufumu bwa kwa Lesa!”+ 24 Lelo abasambi bakwe balipapile+ pa mashiwi yakwe. Na o Yesu abebele ati: “Mwe bana, ifyo cayafya ukwingila mu bufumu bwa kwa Lesa! 25 Cayangukapo ingamila ukupula mu linso lya nshindano ukucila uwa fyuma ukwingila mu bufumu bwa kwa Lesa.”+ 26 Awe e lyo baciliileko ukupapa abati: “Nga kanshi nani engapusuka?”+ 27 Ilyo Yesu abaloleshe, atile: “Abantu bena teti bacite ici, lelo Lesa ena teti afilwe, pantu Lesa kuti acita ifintu fyonse.”+ 28 Awe Petro alamweba, ati: “Moneni! Ifwe twalisha fyonse no kumukonka.”+ 29 Na o Yesu atile: “Ndemweba icine cine, nati, Takuli uwasha ing’anda nelyo bamunyina nelyo inkashi nelyo nyina nelyo wishi nelyo abana nelyo amabala pa mulandu wa ine na pa mulandu wa mbila nsuma+ 30 uushakapokelele imiku umwanda umo (100)+ pali ino nshita, amayanda na bamunyina ne nkashi na banyina na bana na mabala, e lyo no kumucusha+ pa mulandu wa ine. Na ku ntanshi akapokelela umweo wa muyayaya. 31 Lelo abengi aba ntanshi bakaba aba kulekelesha, na ba kulekelesha bakaba aba ntanshi.”+

32 Awe baleya mu musebo ukulola ku Yerusalemu, na Yesu ali pa ntanshi, kabili balipapile; na balebakonka balitiinine. Asendele na kabili abasambi bakwe ikumi na babili (12) ku mbali, alabeba ifyali no kumuponena ati:+ 33 “Moneni, tuleya ku Yerusalemu, no Mwana wa muntu ali no kupeelwa ku ntungulushi sha bashimapepo na bakalemba, kabili bakamupingwila ukufwa no kumupeela ku bena fyalo,+ 34 kabili bakamupumya no kumufwishila amate no kumufopaula no kumwipaya, lelo pa numa ya nshiku shitatu akabuuka.”+

35 Kabili Yakobo na Yohane, abana baume babili aba kwa Sebede,+ baile kuli ena no kumweba abati: “Mwe Kasambilisha, tulefwaya mutucitile conse ico twingamulomba.”+ 36 Na o abepwishe ati: “Cinshi mulefwaya ukuti imucitile?” 37 Na bo bamwebele abati: “Tusuminisheni ukuti tukekale umo ku kulyo kwenu na umbi ku kuso kwenu, mu bukata bwenu.”+ 38 Lelo Yesu abebele ati: “Tamwishibe ico mulelomba. Bushe kuti mwanwa ifili muli kapu iyo nalanwenamo, nelyo ukubatishiwa ulubatisho ulo ndebatishiwako?”+ 39 Na bo bamwaswike ati: “Kuti twanwa.” E ico Yesu abebele ati: “Ifili muli kapu iyo ine ndenwenamo, na imwe mukanwa, no lubatisho ulo ndebatishiwako, na imwe mukabatishiwako.+ 40 Lelo ukwikala ku kulyo kwandi nelyo ku kuso kwandi te ine mpeela,+ lelo abo bapekanishisha e bo bakapeela.”

41 Awe ilyo abasambi bambi ikumi (10) baumfwile ifi, bafulilwe Yakobo na Yohane.+ 42 Lelo Yesu alibetile, alabeba ati: “Mwalishiba ukuti balya abaishibikwa ukuti e bakateka ba bena fyalo bena bateka abantu babo kwati basha ne ntungulushi* na sho shilatitikisha abo shitungulula.+ 43 Te fyo cifwile ukuba kuli imwe; lelo onse uufwaya ukuba umukalamba pali imwe, afwile ukulamubombela,+ 44 na onse uufwaya ukuba uwa ntanshi pali imwe, afwile ukuba umusha wa bonse.+ 45 Pantu nangu Mwana wa muntu taishile pa kuti balemubombela,+ lelo aishile mu kubombela abantu no kupeela umweo wakwe icilubula+ pa kuti alubule abengi.”+

46 Kabili bafikile ku Yeriko. Nomba ilyo alefuma mu Yeriko pamo na basambi bakwe ne bumba ilikalamba, Bartimeo (umwana wa kwa Timeo), uwali kalombalomba impofu, aikele mu mbali ya musebo.+ 47 Ilyo aumfwile ukuti ni Yesu umwina Nasarete uulepita, alabilikisha ati: “Mwe mwana wa kwa Davidi,+ Yesu, mbeleleniko uluse.”+ 48 Awe abengi balamukalipila ukuti atalale; lelo e lyo acililemo ukubilikisha ati: “Mwe mwana wa kwa Davidi, mbeleleniko uluse!”+ 49 E ico Yesu aliiminine no kusosa ati: “Mwiteni.” Na bo baitile impofu, abati: “Shipa, ima, alekwita.”+ 50 Awe yapoosele ica kufwala ca iko, yalimine bwangu, yaya na kuli Yesu. 51 Na o Yesu aipwishe ati: “Cinshi ulefwaya ukuti nkucitile?”+ Impofu na yo ya-aswike ati: “Mwe kasambilisha,* ndefwaya nshibulwe amenso.”+ 52 Na Yesu ayebele ati: “Kabiye, icitetekelo cobe cakuposha.”+ Na po pene yalishibwilwe amenso,+ kabili yatendeke ukumukonka mu musebo.+

11 Nomba ilyo balepalamina ku Yerusalemu, ku Betfage na ku Betani+ pa Lupili lwa Miolife, atumine abasamb bakwe babili+ 2 no kubeba ati: “Kabiyeni mu mushi ulya uuli pa ntanshi, kabili ilyo mwalafika fye mu mushi, mwalasanga umwana wa mpunda apashatala apekala umuntu nangu umo nabamukaka; mumukakule no kumuleta.+ 3 Kabili umuntu nga amwipusha ati, ‘Mulandu nshi mulecitila ifi?’ mutile, ‘Shikulu alemufwaya, kabili alemubwesesha nomba line.’”+ 4 Awe baliile bayasanga umwana wa mpunda nabamukaka pa mwinshi, pa nse mu kamusebo akanono, kabili balimukakwile.+ 5 Na bamo abaimininepo balabepusha abati: “Cinshi ico mulekakwila umwana wa mpunda?”+ 6 Na bo babebele filya fine Yesu abebele; kabili balibalekele baya.+

7 Na bo baletele umwana wa mpunda+ kuli Yesu, no kubikapo ifya kufwala fyabo, na o alikelepo.+ 8 Awe abengi bayanshike ifya kufwala+ fyabo mu musebo, na bambi bakontwele utumisambo twa mabuula+ mu mpanga.+ 9 Na batangile na balekonka pa numa balabilikisha abati: “Tulepepa kuli imwe atuti, mupususheni!+ Alipaalwa uuleishila mwi shina lya kwa Yehova!+ 10 Bwalipaalwa ubufumu ubuleisa ubwa kwa shifwe Davidi!+ Tulepepa kuli imwe mwe baikala mu muulu atuti, mupususheni!” 11 Kabili aingile mu Yerusalemu, mwi tempele; no kulolesha pa fintu fyonse, kabili apo akasuba kaliwile kale, aile na basambi bakwe ikumi na babili (12) ku Betani.+

12 Ubushiku bwakonkelepo, ilyo bafumine ku Betani, aumfwile insala.+ 13 Awe amwene umukunyu ukutali uwali na mabuula, no kuyamona nga kuti asangako ifisabo. Lelo ilyo afikileko, tasangileko akantu kano fye amabuula yeka yeka, pantu tayali ni nshita amakunyu yatwalilapo.+ 14 E ico awebele ati: “Umuntu nangu umo ekalyako icisabo kuli iwe na kabili umuyayaya.”+ Na basambi bakwe baleumfwako.

15 Awe bafikile ku Yerusalemu. Kulya aingile mwi tempele, alatamfyamo abaleshitisha na baleshita mwi tempele, kabili apenwine amatebulo ya balekabushanya indalama ne fipuna fya baleshitisha inkunda;+ 16 kabili tasuminishe umuntu ukupisha icintu nangu cimo mwi tempele, 17 lelo alesambilisha ati: “Bushe tacalembwa ati, ‘Ing’anda yandi iketwa ing’anda ya kupepelamo+ aba mu nko shonse’?+ Lelo imwe mwaisangula ulucengo lwa fipondo.”+ 18 Awe intungulushi sha bashimapepo na bakalemba balyumfwile ifi, kabili balafwaya umwa kumwipaila;+ pantu balemutiina, pa mulandu wa kuti ibumba lyonse lyalepapa ifyo alesambilisha.+

19 Kabili ilyo caba icungulo, balefuma mu musumba. 20 Lelo ilyo balepita akacelocelo, bamwene umukunyu nauma kale ukufuma ku mishila.+ 21 Awe ilyo Petro aibukishe, amwebele ati: “Mwe kasambilisha, moneni! umukunyu uo mwatiipile nauma.”+ 22 Na o Yesu abaaswike ati: “Tetekeleni Lesa. 23 Ndemweba icine cine, nati, onse uwaeba ulupili ulu ati, ‘Fuma apa no kuipoosa muli bemba,’ kabili taletwishika mu mutima wakwe lelo atetekela ukuti ico asosa cikacitika, ninshi e fyo cikaba.+ 24 E mulandu wine ndemwebela nati, fyonse ifyo mulepepela no kulomba, tetekeleni ukuti namupokelela, kabili mukafikwata.+ 25 Kabili ilyo mwaiminina mulepepa, nga muli na cimo ku mukoshi pa muntu umo, mubeleleni uluse;+ pa kuti na Shinwe uwaba mu muulu amubelele uluse pa fyo mulufyanya.”+ 26 *——

27 Baile na kabili ku Yerusalemu. Awe ilyo ale-enda mwi tempele, intungulushi sha bashimapepo na bakalemba na bakalamba baishile kuli ena+ 28 no kumwipusha ati: “Ni ku maka nshi ucitila ifi fintu? nelyo nani akupeele aya amaka aya kucita ifi fintu?”+ 29 Yesu abebele ati: “Na ine nalamwipusha icipusho cimo. Munjasuke, na ine nalamweba amaka ayo ncitilako ifi ifintu.+ 30 Bushe ulubatisho+ lwa kwa Yohane lwafumine ku muulu nelyo ku bantu? Njasukeni.”+ 31 Awe balapelulushanya abene beka abati: “Nga twatila, ‘Ni ku muulu,’ aletila, ‘Nga kanshi cinshi ico tamwamutetekele?’+ 32 Lelo bushe tupame tutile, ‘Ni ku bantu’?”—Baletiina ibumba, pantu bonse baishibe ukuti Yohane ali ni kasesema.+ 33 Awe na bo bamwaswike ati: “Tatwishibe.” Na o Yesu abebele ati: “Na ine nshamwebe amaka ayo ncitilako ifi ifintu.”+

12 Kabili atendeke ukulanda kuli bena mu filangililo ati: “Umuntu alimine ibala lya myangashi,+ no kushingulushako ilinga, no kwimbamo umwa kukamina imyangashi, akuulilemo no lupungu,+ kabili aliseekeshe ku balimi,+ no kuya ku calo ca kutali.+ 2 Nomba cilya inshita ya kulobolola ifisabo yafika, atumine umusha ku balimi, ukuti ayepokako ifisabo fya mwi bala lya myangashi.+ 3 Lelo balimwikete no kumupuma no kumutamfya, aya fye minwe nkutwa.+ 4 Awe atumine umusha na umbi kuli bena; na o balimumine ku mutwe no kumusaalula.+ 5 Atumineko na umbi, ena balimwipeye; atumineko na bambi abengi, bamo pali bena balibapumine na bamo balibepeye. 6 Ashele na umo, umwana wakwe umwaume uo atemenwe nga nshi.+ Pa kulekelesha e o atumine ati, ‘Bakacindika umwana wandi.’+ 7 Lelo balya balimi balilanshenye, abati, ‘Uyu e mpyani.+ Iseni tumwipaye, kabili ibala* likaba lyesu.’+ 8 E ico balimusendele no kumwipaya,+ no kumupoosa ku nse ye bala lya myangashi.+ 9 Cinshi umwine we bala akacita? Akesalofya balya balimi, no kupeela ibala lya myangashi+ kuli bambi.+ 10 Bushe tamwabelenga ili lembo ilitila, ‘Ilibwe+ ilyo bakakuula bakeene, e lyaisaba ilibwe lya pa muulu pa koona.+ 11 Yehova e wacita ici cintu, kabili ca kupapa mu menso yesu’?”+

12 E ico ilyo bailwike ukuti e bo alelandapo muli ci cilangililo, balafwaya apa kumwikatila, lelo baletiina ibumba. E ico balimushile no kuya.+

13 E lyo bamutumiine abaFarise bamo na ba mu kabungwe ka kwa Herode,+ ukuti bamwikatile mu milandile yakwe.+ 14 Ilyo bafikile, bamwebele ati: “Mwe Kasambilisha, twalishiba ukuti muli ba cine kabili tamutiina umuntu nangu umo, pantu tamulolesha pa mimonekele ya bantu, lelo musambilisha inshila ya kwa Lesa mu cishinka:+ Bushe calisuminishiwa ukusonka umusonko kuli Kaisare nelyo iyo? 15 Bushe tulesonka, nelyo twilasonka?”+ Nomba apo alishibe ubumbimunda bwabo, abebele ati: “Mulandu nshi mulenjesesha? Ndeteleni indalama imo iya denari, imonepo.”+ 16 Na bo baliletele. E lyo abepwishe ati: “Bushe uyu umutwe ne fi balembapo fya kwa nani?” Na bo bayaswike abati: “Fya kwa Kaisare.”+ 17 E lyo Yesu abebele ati: “Kanshi peeleni ifya kwa Kaisare kuli Kaisare,+ ne fya kwa Lesa kuli Lesa.”+ Awe balipapile ifyo a-aswike.+

18 Nomba abaSaduke abatila takwaba ukubuuka ku bafwa baishile kuli ena, kabili bamwipwishe abati:+ 19 “Mwe Kasambilisha, Mose atulembele, ati umuntu nga afwa, asha umukashi lelo tafyelemo umwana, munyina+ afwile ukubuula umukashi wakwe no kufyalila munyina abana.+ 20 Kwali aba bwananyina cinelubali (7); kabili uwa ntanshi aupile umwanakashi, lelo afwile fye ukwabula ukufyalamo abana.+ 21 No walenga bubili alimubuulile, lelo alifwile ukwabula ukufyalamo umwana; no walenga butatu ifyo fine. 22 Uwalenga cinelubali (7) na o alifwile ukwabula ukufyalamo umwana. Pa kulekelesha umwanakashi na o alifwile.+ 23 Bushe mu kubuuka kwa bafwa, akaba umukashi wa kwa nani? Pantu balya cinelubali (7) bonse balimuupilepo.”+ 24 Na o Yesu abebele ati: “Mwaliluba pantu tamwaishiba Amalembo nelyo amaka ya kwa Lesa.+ 25 Pantu ilyo abantu babuuka ku bafwa, taboopa nangu ukuupwa, lelo baba nga bamalaika mu muulu.+ 26 Nomba pa mulandu wa kubuuka ku bafwa, bushe tamwabelenga mwi buuku lya kwa Mose, mu lyashi lya pa cimpusa, ifyo Lesa amwebele ati, ‘Nine Lesa wa kwa Abrahamu kabili Lesa wa kwa Isaki kabili Lesa wa kwa Yakobo’?+ 27 Ni Lesa wa ba mweo, te wa bafwa iyo. Mwaliluba sana.”+

28 Nomba umo pali bakalemba uwaishile no kubomfwa balekansana, ilyo amwene ukuti abasuka bwino, amwipwishe ati: “Lifunde nshi ilya ntanshi pali yonse?”+ 29 Na o Yesu a-aswike ati: “Ilya ntanshi ni li, ‘Umfweni, mwe bana ba kwa Israele, Yehova Lesa wesu ni Yehova umo,+ 30 kabili muletemwa Yehova Lesa wenu no mutima wenu onse, no mweo wenu onse, no kutontonkanya kwenu konse, na maka yenu yonse.’+ 31 Ilya cibili ni li, ‘Uletemwa umunobe nge fyo waitemwa we mwine.’+ Takwaba ifunde limbi ilyacila aya.” 32 Na o kalemba amwebele ati: “Mwe Kasambilisha, mwalanda icine ati, ‘Aba fye Umo, kabili takwaba na umbi’;+ 33 kabili ukumutemwa no mutima onse, na mano yonse, na maka yonse, no kutemwa umunobe nge fyo waitemwa we mwine, kwalicindama ukucila imituulo ya koca yonse na malambo.”+ 34 Awe ilyo Yesu amwene ukuti a-asuka na mano, amwebele ati: “Tauli ukutali no bufumu bwa kwa Lesa.” Awe takwali nangu umo uwali na maka ya kumwipusha na fimbi.+

35 Lelo ilyo Yesu alesambilisha mwi tempele atile: “Nga cinshi bakalemba basosela abati Kristu mwana wa kwa Davidi?+ 36 Davidi umwine ilyo apokelele umupashi+ wa mushilo atile, ‘Yehova aebele Shikulu ati: “Ikala ku kwa kulyo kwandi mpaka nkabike abalwani bobe pe samba lya makasa yobe.”’+ 37 Davidi umwine amwitile ati ‘Shikulu,’ nomba kuti aba shani umwana wakwe?”+

Ne bumba ilikalamba lyali ne nsansa ilyo lyalemumfwa.+ 38 Kabili pa kusambilisha, atile: “Cenjeleni kuli bakalemba+ abafwaya ukwendauka nabafwala ifya kufwala fya mucinshi no kufwaya ukubaposha pa maliketi 39 no kwikala pa fipuna fya ku ntanshi mu masunagoge* no kwikala apacindama sana pa mulaalilo.+ 40 E baliila bamukamfwilwa ifyuma+ fyabo kabili bapepa amapepo ayatali aya kabepekesho; aba bakapokelela ubupingushi ubwacilamo.”+

41 Awe aikele apalungatene ne cipao,+ kabili alelolekesha ifyo abantu balepoosa indalama mu cipao na bakankaala abengi balepoosamo indalama ishingi.+ 42 Nomba mukamfwilwa umupiina ailepoosamo utundalama tubili, utwacepesha.+ 43 Awe aitile abasambi bakwe no kubeba ati: “Ndemweba icine cine nati, uyu mukamfwilwa umupiina apooselemo ukucila bonse abalepoosa indalama mu cipao;+ 44 pantu bonse bapooselemo indalama isho bafumishe pa fyuma fyabo, lelo ena, nangu mupiina, napoosamo shonse isho acikwata isha kuliilamo.”+

13 Ilyo alefuma mwi tempele, umusambi wakwe umo amwebele ati: “Mwe Kasambilisha, moneni! ifimabwe ne fikuulwa!”+ 2 Lelo Yesu amwebele ati: “Bushe wafimona ifi fikuulwa ifikalamba?+ Tapakashalepo ilibwe+ apa nakalya pa muulu wa libiye ilishakapooswe pa nshi.”+

3 Kabili ilyo aikele pa Lupili lwa Miolife apalungatene ne tempele, Petro+ na Yakobo na Yohane na Andrea balamwipusha ku mbali abati:+ 4 “Twebeni, Ni lilali ifi fintu fikabako, kabili cinshi cikaba icishibilo ca kuti ifi fyonse fili mu nshita ya ku mpela?”+ 5 E ico Yesu atendeke ukubeba ati: “Cenjeleni ukuti umuntu nangu umo emulufya.+ 6 Abengi bakeshila mwi shina lyandi, abati, ‘Nine,’ kabili bakalufya abengi.+ 7 Kabili ilyo mukomfwa pa lwa nkondo mupepi no kutali; mwikatiina, ifi fintu fifwile ukucitika, lelo impela icili tailaisa.+

8 “Pantu uluko lukemina uluko lubiye no bufumu bukemina ubufumu bubiye,+ kukaba ifinkukuma+ mumo mumo, kukaba ne fipowe.+ Ifi fintu e kutendeka kwa bucushi ubukaba ngo kucula kwa pa kupaapa.+

9 “Lelo imwe cenjeleni; abantu bakamutwala ku filye,+ kabili bakamupuma mu masunagoge*+ no kumwimika pa ntanshi ya balashi ne shamfumu pa mulandu wandi, pa kuti mube inte kuli bena.+ 10 Kabili imbila nsuma+ ili no kubilwa mu nko shonse ilyo impela ishilaisa.*+ 11 Lelo ilyo balemutwala ku cilye, mwikasakamikwa pa fyo mukalanda;+ lelo conse ico mukapeelwa muli ilya nshita, e co mukalande, pantu te imwe mukalalanda lelo mupashi wa mushilo.+ 12 Kabili munyina akepaisha munyina, na wishi akepaisha umwana,+ na bana bakemina abafyashi no kubepaisha;+ 13 kabili abantu bonse bakamupata pa mulandu we shina lyandi.+ Lelo uwashipikisha ukufika na ku mpela,+ e ukapusuka.+

14 “Lelo, ilyo mukamona ica bunani+ icileta ubonaushi+ naciminina apo cishifwile ukwiminina (uulebelenga eluke),+ e lyo abakaba mu Yudea bakatendeke ukufulumukila ku mpili.+ 15 Uukaba pa mutenge ekekila, nangu ukwingila mu ng’anda yakwe pa kuti abuulemo icintu;+ 16 no ukaba mwi bala ekabwelela mu kubuula ica kufwala cakwe.+ 17 We bulanda ku bakaba na mafumo na bakalaonsha mu nshiku shilya!+ 18 Mulepepa ukuti ifi fintu fiikacitika mu nshita ya mpepo;+ 19 pantu inshiku shilya shikaba ni nshiku sha bucushi+ ubushatala abubako ukutula apo Lesa abumbile icalo ukufika na pa nshita ilya, kabili tabwakabeko na kabili.+ 20 Na kuba, Yehova+ nga takepifye isho nshiku, tapali umuntu nangu umo uukapusuka. Lelo pa mulandu wa basalwa+ abo asala,+ akepifya isho nshiku.+

21 “E lyo, umuntu nga amweba ati, ‘Moneni! Kristu ali pano,’ ‘Moneni! Ali palya,’+ mwikasumina iyo.+ 22 Pantu baKristu ba bufi na bakasesema ba bufi bakema+ no kucita ifipesha amano ne fipapwa+ pa kuti balufye na basalwa, nga cingacitika.+ 23 E ico imwe cenjeleni;+ namwebela kabela fyonse.+

24 “Lelo mu nshiku shilya, pa numa ya bucushi bulya, akasuba kakafita, kabili umweshi tawakabalike, 25 ne ntanda shikapona mu muulu, ne fya maka ifya mu muulu fikatenkana.+ 26 E lyo bakamona Umwana wa muntu+ aleisa mu makumbi ali na maka ayengi no bukata.+ 27 Kabili akatuma bamalaika no kulonganika pamo abasalwa+ bakwe ukufuma ku kabanga, ku masamba, ku kapinda ka ku kuso na ku kapinda ka ku kulyo, ukufuma ku mpela ya pano isonde no kufika ku mpela ya muulu.+

28 “Nomba sambilileniko ku cilangililo ici ica mukunyu: Cilya fye imisambo ya uko yaba iiteku kabili yafumya amabuula, muleshiba ukuti amainsa yali mupepi.+ 29 Ifyo fine na imwe, ilyo mwamona fyonse ifi filecitika, ishibeni ukuti Umwana wa muntu ali mupepi, ali pa mwinshi.+ 30 Ndemweba icine cine nati, inkulo ino tayakapite nakalya mpaka fyonse ifi fikacitike.+ 31 Umuulu+ na pano isonde fikapita, lelo amashiwi+ yandi tayakapite.+

32 “Lelo takuli uwaishiba ubushiku bulya nelyo inshita, nangu fye ni bamalaika mu muulu nangu fye Mwana, kano Tata e waishiba.+ 33 Cenjeleni, mulelola,+ pantu tamwaishiba inshita ifi fikacitika.+ 34 Cili kwati muntu uwaleya ku calo ca kutali+ uwashile ing’anda yakwe no kupeela amaka ku basha bakwe, cila muntu umulimo wa kubomba, kabili aebele umulinshi ukuti alelola. 35 E ico mulelola,+ pantu tamwishibe ilyo umwine wa ng’anda akesa, nampo nga cungulo nelyo ni pa kati ka bushiku nelyo pa kulila kwa kwa mukolwe* nelyo ku macaca;+ 36 pa kuti ilyo apumikisha ukwisa, tamusangile namulaala.+ 37 Lelo ifyo ndemweba, nde-eba na bonse nati, Mulelola.”+

14 Nomba kwashele fye inshiku shibili+ ukuti kube ica kucilila+ no mutebeto+ wa mukate ushatutumuka. Kabili intungulushi sha bashimapepo na bakalemba balefwaya inshila ya kumwikatilamo mu bucenjeshi no kumwipaya;+ 2 pantu imiku ne miku baleti: “Twikamwikatila pa mutebeto iyo, epali abantu baimya icimfulunganya.”+

3 Kabili ilyo ali ku Betani mu ng’anda ya kwa Simone uwa fibashi,+ ninshi naikala alelya, umwanakashi aishile ne botolo* lya mafuta ayanunkila, ayaleitwa ati nardi. Kabili yali ni nardi wine wine, aya mutengo nga nshi. Ilyo aiswile ibotolo lya mafuta, atendeke ukumwitila pa mutwe.+ 4 Awe bamo pali bena balikalipe abati: “Mulandu nshi balaonawila ifi aya mafuta?+ 5 Pantu aya mafuta kuti bayashitisha ukucila pali badenari imyanda itatu (300) no kupeela abapiina!” Kabili balimufulilwe nga nshi.+ 6 Lelo Yesu atile: “Mulekeni umwine. Nga cinshi mulemusakamikila? Mulimo uusuma abombele kuli ine.+ 7 Pantu abapiina+ mwaba na bo lyonse, kabili lyonse ilyo mwafwaya kuti mwabacitila icisuma, lelo tamwakabe na ine lyonse.+ 8 Abombele apapelele amaka yakwe; asubila kabeela umubili wandi amafuta ayanunkila pa ku-upekanya ukushiikwa.+ 9 Ndemweba icine cine nati, Konse uko bakabila iyi mbila nsuma pano calo ponse,+ bakalashimika ne ficitile uyu mwanakashi ku kumwibukisha.”+

10 Na Yuda Iskariote, umo pa basambi ikumi na babili (12), aile ku ntungulushi sha bashimapepo pa kuti amufutuke no kumupeela kuli bena.+ 11 Awe ilyo baumfwile ici, balisekelele, kabili balaile ukumupeela indalama sha silfere.+ E ico alafwaya umwa kumufutukila pa nshita yalinga.+

12 Pa bushiku bwa ntanshi ubwa mutebeto wa mukate ushatutumuka,+ ubo lyonse baletuulilapo ilambo lya mutebeto wa ca kucilila, abasambi+ bakwe bamwipwishe abati: “Ni kwi mulefwaya tumupekanishishe umwa kuliila ica kucilila?”+ 13 Na o atumine abasambi bakwe babili no kubeba ati: “Kabiyeni mu musumba, e mo umuntu uusendele umutondo wa menshi alemukumanya.+ Mumukonke, 14 kabili umo aleingila, mwebe umwine wa ng’anda amuti, ‘Kasambilisha atila: “Uli kwi umuputule wandi uwa beni umo nalaliila ica kucilila+ pamo na basambi bandi?”’+ 15 Na o alemulanga umuputule ukalamba uwa pa muulu, uwateyanishiwa bwino; kabili e mo mutupekanishishe ica kucilila.”+ 16 Awe abasambi baliile, kabili baingile mu musumba no kusanga filya fine abebele; kabili bapekenye ica kucilila.+

17 Ilyo cali icungulo, aishile na basambi bakwe ikumi na babili (12).+ 18 Kabili ilyo baikele pe tebulo balelya, Yesu atile: “Ndemweba icine cine nati, Umo pali imwe uulelya+ na ine alemfutuka.”+ 19 Awe batendeke ukuba no bulanda, na umo umo alamwipusha ati: “Bushe nine?”+ 20 Na o abebele ati: “Ni umo pali imwe ikumi na babili (12), uuletobela na ine mu mbale imo ine.+ 21 Ca cine ukuti Umwana wa muntu aleya, filya fine balemba pali ena, we bulanda ku muntu ulya uulefutuka Umwana wa muntu! Nga caliweme ulya muntu nga tafyelwe.”+

22 Kabili ilyo balelya, abuulile umukate, amokaula no kubapeela, ati: “Buuleeni, uyu mukate cimpashanya ca mubili wandi.”+ 23 Kabili ilyo abuulile kapu umwali umwangashi, alipepele no kubapeela, na bo balinwenemo.+ 24 Kabili abebele ati: “Uyu mwangashi cimpashanya ca ‘mulopa+ wandi uwa cipangano,’+ uuli no kupongolwelwa+ pa mulandu wa bengi.+ 25 Ndemweba icine cine, nati, Nshakanwe umwangashi na kabili mpaka ubushiku bulya ilyo nkanwa uupya mu bufumu bwa kwa Lesa.”+ 26 Na pa kulekelesha, ilyo baimbile inyimbo isha malumbo,+ baile ku Lupili lwa Miolife.+

27 Kabili Yesu abebele ati: “Bonse imwe icitetekelo cenu calanenuka,* pantu calilembwa ati, ‘Nkepaya kacema,+ ne mpaanga shikasalangana.’+ 28 Nomba ilyo nkabuushiwa, nkamutangilila ku Galili.”+ 29 Lelo Petro amwebele ati: “Nangu aba bonse icitetekelo cabo calanenuka, ine tacanenuke iyo!”+ 30 Na o Yesu amwebele ati: “Ndekweba icine cine nati, lelo, buno bushiku, ilyo mukolwe talati alile imiku ibili, ulenkaana imiku itatu.”+ 31 Na o akoselepo fye ukulanda ati: “Nangu ndi no kufwila pamo na imwe, nshamukaane nakalya.” Na bonse balasosa cimo cine.+

32 Awe bafikile apetwa ati Getsemane, kabili aebele abasambi bakwe ati: “Ikaleni pano ilyo ndepepa.”+ 33 E lyo asendele Petro na Yakobo na Yohane+ baya nankwe. Awe atendeke ukulanguluka no kusakamikwa nga nshi.+ 34 E lyo abebele ati: “Naikatwa ubulanda nga nshi,+ ni cikanga fye mfwe. Ikaleni pano, no kulola.”+ 35 Kabili cilya aya akatalamukila, awa pa nshi, alapepa ati, nga cingacitika iyi nshita ipitile ukutali.+ 36 Kabili alasosa ati: “Abba,* Tata,+ imwe kuti mwacita fyonse; fumyeni pali ine iyi kapu.* Lelo te co ndefwaya, kano ico imwe mulefwaya.”+ 37 Kabili alishile abasanga nabalaala, aebele na Petro ati: “Simone, bushe naulaala? Bushe tauli na maka ya kulola iawala limo fye?+ 38 Akuloleni kabili mulepepa,+ pa kuti mwi-ingila mu matunko. Umutima wena naukosa, lelo umubili naunaka.”+ 39 Awe aliile na kabili no kupepa, alasosa amashiwi yamo yene.+ 40 Na kabili aishile no kubasanga nabalaala, ico amenso yabo yalifinine, kabili tabaishibe ne ca kumwasuka.+ 41 Aishile umuku wa citatu no kubeba ati: “Pa nshita yabe fi namulaala kabili muletuusha! Capwa! Inshita naifika!+ Moneni! Umwana wa muntu bamufutuka no kumupeela mu minwe ya babembu.+ 42 Imeni, tuleyeni.+ Moneni! Uulemfutuka apalama.”+

43 Kabili ilyo line, ninshi acili alelanda, Yuda, umo uwa basambi ikumi na babili (12), aishile pamo ne bumba ilyali ne mpanga ne nkonto ilyafumine ku ntungulushi sha bashimapepo na bakalemba na bakalamba.+ 44 Kabili uwalemufutuka ninshi nabapeela icishibilo ico aumfwene na bo, ati: “Uo ndetomona, ninshi e o; mumwikate no kumulonda bwino pa kumusenda.”+ 45 Kabili alimulungeme, apalama kuli ena, no kutila “Mwe Kasambilisha!” no kumutomona.+ 46 Na bo e pa kubika iminwe yabo pali ena no kumwikata.+ 47 Lelo umo pa balipo afumishe ulupanga lwakwe no kukoma umusha wa kwa shimapepo mukalamba no kumuputula ukutwi.+ 48 Lelo Yesu alabeba ati: “Bushe mwishile ne mpanga ne nkonto ku kunjikata kwati ndi cipondo?+ 49 Cila bushiku naleba na imwe mwi tempele no kulasambilisha,+ lelo tamwanjikete. Nomba ni pa kuti Amalembo+ yafikilishiwe.”+

50 Awe basambi bonse balimushile+ no kufulumuka.+ 51 Lelo umulumendo umo uwafwele fye ica kufwala ca nsalu iisuma pa mubili alimukonkele pa numa kabili bafwaile ukumwikata,+ 52 lelo ashile insalu yakwe no kufulumuka ubwamba.

53 Na bo e pa kutwala Yesu kuli shimapepo mukalamba, kabili intungulushi sha bashimapepo shonse na bakalamba na bakalemba balilongene.+ 54 Awe Petro, amukonkele+ akatalamukila ukufika fye na mu lubansa lwa kwa shimapepo mukalamba kabili aikele pamo na babomfi ba mu ng’anda alaonta no mulilo. 55 Pali ilya nshita intungulushi sha bashimapepo ne cilye ca Sanhedrini conse balefwaya abantu aba kushinina Yesu ifya bufi pa kuti bamwipaye,+ lelo tabasangile nangu bamo.+ 56 Pantu abengi, balelanda ifya bufi pa kuti bamushinine,+ lelo ifyo balelanda fyalepusana.+ 57 Kabili na bambi baleima no kushimika ifya bufi ifya kumushinina abati: 58 “Twamumfwile aletila, ‘Nkabongolola ili tempele ilyakuulilwe ku minwe na mu nshiku shitatu nkakuula limbi ilishakakuulwe ku minwe.’”+ 59 Lelo nangu ni pali iyi milandu, ifyo balelanda fyalipusene.

60 Na pa kulekelesha, shimapepo mukalamba alimine no kwipusha Yesu ati: “Bushe tauleasuka nangu cimo pa fyo aba balekushinina?”+ 61 Lelo aikele fye tondolo kabili ta-aswike nangu cimo.+ Na kabili shimapepo mukalamba alamwipusha ati: “Bushe ni we Kristu Umwana wa Wa Mushilo?”+ 62 Na o Yesu atile: “Nine; kabili mukamona Umwana wa muntu+ naikala ku kwa kulyo+ kwa Wa Maka Yonse* kabili aleisa pa makumbi ya mu muulu.”+ 63 Awe shimapepo mukalamba alepwile ifya kufwala fyakwe+ no kutila: “Bushe tulekabila inte na shimbi?+ 64 Mwayumfwila ifyo aleponta.+ Bushe muletipo shani?” Bonse bapingwile ukuti afwile ukufwa. 65 Na bamo batendeke ukumufwishila amate,+ no kumufimba ku menso no kumuuma amakofi, no kumweba abati: “Tulange ukuti ni we kasesema! Twebe uwakuuma!” Kabili ilyo bamutobele amapi ku menso, bakapaso balimusendele.+

66 Nomba ilyo Petro ali mwi samba mu lubansa, kwaishile umubomfi umo umukashana uwa kwa shimapepo mukalamba,+ 67 kabili ilyo amwene Petro aleonta umulilo, alimulolekeshe, e lyo atila: “Na iwe wine wali pamo no yu Yesu, umwina Nasarete.”+ 68 Lelo alikeene, ati: “Ine nshimwishibe kabili nshishibe ifyo ulelandapo.” Awe afumine ku nse aya ku mpongolo.+ 69 Na ko kwine ilyo umubomfi umukashana amumwene fye, atampile na kabili ukweba abaimininepo ati: “Uyu na o ali na bo.”+ 70 Na kabili alikeene. Ilyo kabili papitile inshita, abaiminine mupepi, balaeba Petro abati: “Cine cine na iwe wine wali na bo, pantu, na kuba uli mwina Galili.”+ 71 Lelo atendeke ukuitipwila no kulapa ati:+ “Nshimwishibe uyu muntu mulelandapo.”+ 72 Awe ilyo line mukolwe alililile umuku walenga ibili;+ na Petro aibukishe amashiwi ayo Yesu amwebele, ati: “Ilyo mukolwe talalila imiku ibili, ulenkaana imiku itatu.”+ Kabili alyumfwile ubulanda kabili atampile ukulila.+

15 Kabili apo pene ku maca intungulushi sha bashimapepo pamo na bakalamba na bakalemba, ne cilye conse ica Sanhedrini, bapandene amano,+ kabili bakakile Yesu, balimusendele no kumutwala kuli Pilato.+ 2 Na Pilato amwipwishe ati: “Bushe uli mfumu+ ya baYuda?” Na o a-aswike ati: “Nausosa we mwine.”+ 3 Lelo intungulushi sha bashimapepo balamupeela imilandu iingi.+ 4 Na Pilato alimwipushe kabili ati: “Bushe tauleasuka nangu cimo?+ Mona imilandu ubwingi balekupeela.”+ 5 Lelo Yesu tayaswike na kabili, ica kuti Pilato alipapile.+

6 Kabili pali uyu mutebeto Pilato alebakakwila umufungwa umo, uo abene balefwaya.+ 7 Pali ilya nshita kwali uo baleita ati Baraba uwakakilwe pamo na balelwisha ubuteko, abaipeye abantu pa kulwisha ubuteko.+ 8 E ico ibumba ilyaishile, lyalalomba ukuti acite ifyo alebacitila lyonse. 9 Na o Pilato e pa kubeba ati: “Bushe mulefwaya ukuti imukakwile imfumu ya baYuda?”+ 10 Pantu alishibe ukuti mufimbila+ walengele ukuti intungulushi sha bashimapepo shimutwale kuli ena.+ 11 Lelo intungulushi sha bashimapepo shasongele ibumba ukweba Pilato ukuti abakakwile Baraba.+ 12 Na kabili Pilato abaswike ati: “Nga kanshi nalacita shani no yu muntu uo mutila ni mfumu+ ya baYuda?”+ 13 Na kabili babilikishe abati: “Mupoopeleni!”+ 14 Lelo Pilato abepwishe ati: “Nga kanshi, cinshi alufyenye?” Lelo bena bacilamo ukulabilikisha abati: “Mupoopeleni!”+ 15 Awe Pilato pa kufwaya ukusekesha ibumba,+ abakakwilile Baraba, kabili abebele ukuti bome Yesu ifikoti. E lyo amupeele ku bashilika pa kuti bayemupoopela pa cimuti.+

16 Awe abashilika bamutwele mu lubansa ulwaba mwi sano lya mulashi; no kulonganya ibumba lyonse ilya bashilika,+ 17 bamufwikile ne nsalu yakashikila no kupanga icisote ca myunga no kumufwika.+ 18 Batampile no kumuposha abati: “Mwapoleni,+ mwe Mfumu ya baYuda!” 19 Kabili balemuma pa mutwe kwi tete no kumufwishila amate, kabili balimufukamine no kumutootela.+ 20 Nomba ilyo balekele ukumupumya, bamufuulile insalu yakashikila no kumufwika ifya kufwala fyakwe. E lyo bamutwele ku kumupoopela pa cimuti.+ 21 Kabili bapatikishe umupita nshila umo, Simone uwa ku Kurene, uwalefuma mu mpanga, wishi wa kwa Alekesanda na Rufu, ukuti asende icimuti cakwe.+

22 Awe bamutwele ku ncende iyo beta Golgota, icalola mu kuti, Pa Cipanga.+ 23 Ilyo bali kulya, baeseshe ukumupeela umwangashi umwali muri,+ lelo alikeene ukunwa.+ 24 Bamupoopele na pa cimuti, kabili balipendwile pa kwakana ifya kufwala+ fyakwe pa kuti beshibe ico cila muntu ali no kubuula.+ 25 Nomba ilyo inshita yafikile pe awala ilyalenga butatu,+ bamupoopele pa cimuti. 26 Pa muulu palembelwe no mulandu+ bamupeele uwa kuti, “Imfumu ya baYuda.”+ 27 Kabili bakobeke ifipondo fibili mupepi na apo bapoopele Yesu, cimo ku kulyo kwakwe na cimbi ku kuso kwakwe.+ 28 *—— 29 Na balepita balamusaalula,+ balepukunya imitwe yabo abati: “Awi! We wingabongolola itempele no kulikuula mu nshiku shitatu,+ 30 ika pa cimuti no kuipususha.”+ 31 Awe ifyo fine ne ntungulushi sha bashimapepo shalemupumya capamo na bakalemba abati: “Alepususha bambi; afilwa ukuipususha umwine!+ 32 Lekeni Kristu Imfumu ya kwa Israele nomba eke pa cimuti, pa kuti tumone no kusumina.”+ Ne fipondo ifyakobekwe mupepi nankwe na fyo fyalemusaalula.+

33 Ilyo inshita yafikile pe awala lyalenga mutanda (6),* kwali imfifi pa calo conse ukufika na pe awala lyalenga pabula (9).*+ 34 Kabili pe awala lyalenga pabula (9), Yesu abilikishe ishiwi likalamba ati: “Eli, Eli, lama sabaktani?” icalola mu kuti: “Lesa wandi, Lesa wandi, cinshi mwandekelesesha?”+ 35 Na bamo abaimininepo, ilyo baumfwile, balasosa abati: “Umfweni! Aleita Eliya.”+ 36 Lelo umo alibutwike, ayatumpa umwepu mu mwangashi wakantuka, ausomeka kwi tete, alamunwesha,+ ati: “Mulekeni! Lekeni tumone nga Eliya alaisa ku kumwikisha.”+ 37 Lelo Yesu abilikishe ishiwi ilikalamba, no kuleka umweo.+ 38 Ne nsalu+ ya kucingilako iya mwi tempele yalilepwike pa kati, ukufuma pa muulu ukufika pa nshi.+ 39 Nomba ilyo umukalamba wa bashilika uwaiminine apalungatene nankwe amwene umusango afwililemo, atile: “Cine cine, uyu muntu ali Mwana wa kwa Lesa.”+

40 Kwali na banakashi abaletamba akatalamukila,+ pali aba pali Maria umwina Magadala, pamo na Maria nyina wa kwa Yakobo Munono na Yose, na Salome,+ 41 abalemukonka+ no kumubombela ilyo ali ku Galili, na banakashi bambi abengi abaile nankwe ku Yerusalemu.+

42 Nomba apo cali cungulo, kabili bwali Bushiku bwa Kupekanya, e kutila, ubushiku bwa kuti mailo lisabata, 43 Yosefe uwa ku Arimatea, shimucindikwa wa mu Cilye, na o uwalelolela ubufumu bwa kwa Lesa alishile.+ Alishipile no kuya kuli Pilato no kulomba icitumbi+ ca kwa Yesu. 44 Lelo Pilato alitwishike nga nafwa kale, kabili ilyo aitile umukalamba wa bashilika, amwipwishe nga afwile kale. 45 E ico ilyo aumfwile ku mukalamba wa bashilika ukuti ca cine nafwa, apeele icitumbi kuli Yosefe.+ 46 Na o ashitile insalu iisuma kabili alimwikishe, amupomba mu nsalu iisuma no kumubika+ mu nshiishi+ iyo baimbile mu cilibwe; kabili akunkulushishepo ilibwe ukufika na pa mwinshi wa nshiishi.+ 47 Lelo Maria umwina Magadala na Maria nyina wa kwa Yose balelolesha apo abikilwe.+

16 E ico ilyo isabata+ lyapitile, Maria umwina Magadala,+ na Maria nyina wa kwa Yakobo, na Salome bashitile ifyanunkila pa kuti bayemusuba.+ 2 Kabili ku macaca pa bushiku bwa ntanshi+ mu mulungu, baile ku nshiishi, ilyo akasuba katulile.+ 3 Kabili balelanshanya abati: “Nani alatukunkulushishako ilibwe ukulifumya pa mwinshi wa nshiishi?” 4 Lelo ilyo bainwine amenso, bamwene ukuti ilibwe nabalikunkulushapo, nangu lyali ilikalamba nga nshi.+ 5 Lintu baingile mu nshiishi, bamwene umulumendo naikala lubali ku kulyo nafwala ica kufwala icabuuta, kabili balipapile.+ 6 Na o abebele ati: “Mwipapa. Mulefwaya Yesu, umwina Nasarete, uo bapoopele pa cimuti.+ Nabuuka,+ tali muno. Moneni! Apo bamubikile.+ 7 Nomba kabiyeni, kebeni abasambi bakwe na Petro amuti, ‘Alemutangilila ku Galili;+ e ko mukamumona, nga filya fine amwebele.’”+ 8 E ico ilyo bafumine mu nshiishi, balifulumwike pantu baletutuma fye, nacibapesha amano. Kabili tabaebeleko nangu umo icintu nelyo cimo, pantu bali no mwenso.+

UKUSONDWELELA UKWIPI

Muli bamanyuskripti bamo aba ku kulekelesha na mu maBaibolo yamo mwaba ukusondwelela ukwipi pa numa ya Marko 16:8 ukwakonkapo:

Lelo fyonse ifyo abebele, bashimike patali patali ku bali na Petro. Kabili pa numa ya ifi fintu, Yesu umwine atumine abasambi ukuyabila imbila ya mushilo kabili iye pusukilo ilya muyayaya, ukufuma ku kabanga ukufika ku masamba.

UKUSONDWELELA UKWALEPA

Muli bamanyuskripti bamo (pamo nga Codex Alexandrinus, Codex Ephraemi, Codex Bezae) na maBaibolo yamo (pamo nga Latin Vulgate, Curetonian Syriac, Syriac Peshitta) mwaba no kusondwelela ukwalepa ukwakonkapo, lelo ukushaba muli manyuskripti wa Codex Sinaiticus, Codex Vaticanus, codex ya Sinaitic Syriac, e lyo na Armenian Version:

9 Ilyo abuukile ku maca pa bushiku bwa ntanshi ubwa mu mulungu, amoneke intanshi kuli Maria umwina Magadala, uo afumishemo ifibanda cinelubali (7). 10 Na o aileshimikila abali na Yesu, ilyo baleloosha no kulila. 11 Lelo ilyo baumfwile ukuti ali uwa mweo na kabili no kuti alimoneke kuli ena, tabasumine. 12 Kabili pa numa ya ifi fintu, amoneke mu musango umbi ku basambi babili ilyo bale-enda, baleya mu mishi; 13 kabili balibwelele no kushimikilako abashala. Nangu ni balya bene tababasumine. 14 Lelo pa numa amoneke ku basambi ikumi na umo (11) ilyo bali pa tebulo, kabili alibakalipile pa kukanatetekela no kukosa imitima, pantu tabasumine abamumwene nabuuka ku bafwa. 15 Kabili abebele ati: “Kabiyeni pano calo ponse no kubila imbila nsuma ku bantu bonse. 16 Uwasumina no kubatishiwa akapusuka, lelo uushakasumine, akapingulwa. 17 Kabili abasumina bakalacita ifipesha amano ifi: Mwi shina lyandi, bakafumya ifibanda, bakalandila mu ndimi, 18 bakekata ne nsoka ku minwe, kabili nga banwa conse icingepaya umuntu, tacakabacite nangu cimo nakalya. Bakabika iminwe yabo pa balwele, na bo bakapola.”

19 Awe ilyo Shikulu Yesu apwishishe ukulanda na bo, asendelwe ku muulu no kwikala ku kulyo kwa kwa Lesa. 20 E lyo na bo bailebila konse, na Shikulu alebombela pamo na bo no kutungilila ubukombe ku fipesha amano ifyo balecita.

[Amafutunoti]