Imbila Nsuma umo Luka Ailembeele

1 Nangu ca kutila abengi balyesha ukulemba amashiwi ya cine cine+ ayo ifwe twasumina, 2 nga filya fine balya abo ukufuma pa kutendeka+ abali bansangwapo+ ba ifi ifintu kabili ababilile ubukombe+ batwebele, 3 na ine, apo nalikonka fyonse bwino bwino ukufuma pa kutendeka, natile, nkulembele umo fyakonkanina,+ we Teofile+ kanabesa,+ 4 pa kuti wishibe ukuti ifyo bakusambilisha fya cishinka.+

5 Mu nshiku sha kwa Herode,*+ imfumu ya Yudea, kwali shimapepo ishina lyakwe ni Sekaria uwa mwi bumba lya bashimapepo ilya mu lupwa lwa kwa Abiya,+ kabili ali no mukashi uwafumine mu bana abanakashi aba kwa Aarone,+ ne shina lyakwe ni Elisabete. 6 Bonse babili bali abalungama+ mu menso ya kwa Lesa pantu bale-enda aba kaele+ ukulingana na mafunde+ yonse ne fipope+ fya kwa Yehova.+ 7 Lelo tabakwete umwana, pantu Elisabete ali ni ng’umba,+ kabili bonse babili bali abakote.

8 Awe ilyo alebomba bushimapepo pa ntanshi ya kwa Lesa ilyo cafikiile ibumba+ alimo ukubomba, 9 ukulingana ne fyo bashimapepo balecita lyonse, yalifikile inshita yakwe iya kutuula ifyanunkila+ lintu aingile mwi tempele lya kwa Yehova;+ 10 kabili abantu abengi bali pa nse balepepa pa nshita ya kutuula ifyanunkila.+ 11 Na malaika wa kwa Yehova amoneke kuli ena, naiminina ku mbali ya ciipailo ica fyanunkila.+ 12 Awe Sekaria alisakamikwe pa fyo amwene, no mwenso walimwikete.+ 13 Lelo malaika amwebele ati: “Witiina, Sekaria, pantu ukupapaata kobe nakumfwika,+ no mukashi obe Elisabete akakufyalila umwana umwaume, kabili ukamwinike ati Yohane.+ 14 Kabili ukasekelela no kuba ne nsansa sana, na bengi bakasekelela+ pa kufyalwa kwakwe; 15 pantu akaba umukalamba ku cinso ca kwa Yehova.+ Lelo tafwile ukunwa umwangashi ne fya kunwa ifikola,+ kabili akaba no mupashi wa mushilo ukufuma fye mu nda ya kwa nyina;+ 16 kabili akapilibwila abengi aba mu bana ba kwa Israele kuli Yehova+ Lesa wabo. 17 Kabili akaya pa ntanshi yakwe na maka kwati ni Eliya,+ ku kupilibula imitima+ ya bashibo ica kuti baba abana no kupilibwila ababula icumfwila ku mano yene yene aya balungami, ku kupekanishisha+ Yehova+ abantu.”

18 Na Sekaria atile kuli malaika: “Kuti nashininkisha shani ici? Pantu ine ndi mukote,+ no mukashi wandi na o nakula sana.” 19 Na o malaika amwaswike ati: “Nine Gabriele,+ uwiminina pa ntanshi ya kwa Lesa, kabili ntuminwe ukuti nande+ na iwe no kukushimikila imbila nsuma ya ifi fintu. 20 Lelo, mona! walaba cibulu+ kabili tawakulalanda mpaka no bushiku ifi fintu fikacitika, pantu tausumine amashiwi yandi, ayakafikilishiwa mu nshita ya yako.” 21 Lelo abantu balelolela Sekaria,+ kabili balepapa fye ico akokwelele mwi tempele. 22 Lelo ilyo afumine, afililwe ukulanda na bo, e lyo bailwike ukuti namona icimonwa+ mwi tempele; kabili alelanda na bo ukubomfya iminwe, pantu asangwike cibulu. 23 Nomba ilyo inshiku shakwe isha kubomba shapwile,+ aile ku mwakwe.

24 Lelo ilyo shilya nshiku shapitile, umukashi wakwe Elisabete alimite;+ kabili aitalwishe ku bantu pa myeshi isano, ati: 25 “E fyo Yehova ancita muli shino nshiku. Anangulukilako pa kuti anseebululeko insoni ku bantu.”+

26 Mu mweshi walenga mutanda (6), Lesa atumine malaika Gabriele+ ku musumba wa mu Galili uo beta ati Nasarete. 27 Amutumine kuli nacisungu uwakobekelwe ku mwaume ishina lyakwe Yosefe uwa mu ng’anda ya kwa Davidi; ne shina lya kwa nacisungu+ ni Maria.+ 28 Kabili ilyo aile kuli ena atile: “Mwapoleni,+ we wapaalwa nga nshi, Yehova+ ali nobe.”+ 29 Lelo amashiwi aya yalimusakamike nga nshi, kabili alatontonkanya umo uku kuposha kwalolele. 30 E ico malaika amwebele ati: “Witiina, Maria, pantu Lesa nakupaala;+ 31 kabili mona! ukemita no kufyala umwana umwaume,+ kabili ukamwinike ati Yesu.+ 32 Uyu akaba umukalamba+ kabili aketwa ati Umwana wa Wapulamo;+ kabili Yehova Lesa akamupeela icipuna ca bufumu+ ica kwa Davidi wishi,+ 33 kabili akaba imfumu umuyayaya pa ng’anda ya kwa Yakobo, no bufumu bwakwe tabwakabe ne mpela.”+

34 Lelo Maria atile kuli malaika: “Bushe cikaba shani ici, pantu nshatalakumanapo+ no mwaume?” 35 Na o malaika amwaswike ati: “Umupashi wa mushilo+ ukesa pali iwe, na maka ya Wapulamo yakakufimba. E mulandu wine uukafyalwa aketilwa uwa mushilo,+ Umwana wa kwa Lesa.+ 36 Kabili mona! lupwa lobe Elisabete, uo batila ni ng’umba,+ na o mu bukote bwakwe naimita umwana umwaume, kabili uno e mweshi walenga mutanda (6); 37 pantu takuli ico Lesa alanda ico engafilwa ukucita.”+ 38 Na o Maria atile: “Moneni! Ndi musha mwanakashi uwa kwa Yehova!+ Nacibe ifyo fine ukulingana ne fyo mwasosa.” Awe malaika alifuminepo.

39 E ico mu nshiku shilya Maria aliimine no kwangufyanya ukuya ku citungu ca mpili, ku musumba wa kwa Yuda, 40 aingile na mu ng’anda ya kwa Sekaria no kuposha Elisabete. 41 Awe ilyo Elisabete aumfwile Maria alemuposha, umwana mwi fumo lyakwe alicilwike; kabili umupashi wa mushilo waishile pali Elisabete, 42 kabili abilikishe ishiwi ilikalamba ati: “Walipaalwa pa banakashi bonse, kabili alipaalwa+ umwana uo ukafyala! 43 Nga kanshi nashuka shani ica kuti nyina wa kwa Shikulu+ ese kuli ine? 44 Pantu mona! ilyo nacumfwa fye wamposha, umwana mwi fumo aciciluka no kwanga nga nshi.+ 45 Alishuka umwanakashi uwasumina, pantu fyonse fikacitika+ ifyo bamwebele ifyafumine kuli Yehova.”+

46 Na o Maria atile: “Ndelumbanya Yehova,+ 47 no mutima wandi teti ufilwe ukusansamukila+ nga nshi Lesa Umupusushi wandi;+ 48 pantu nalolesha pa musha wakwe umulanda.+ Pantu, moneni! ukutula nomba abantu ba mu nkulo shonse bakalatila nalishuka;+ 49 pantu uwa maka nancitila ifipapwa, kabili ishina lyakwe lya mushilo;+ 50 no luse lwakwe lwa muyayaya ku bamutiina.+ 51 Alibomba ifipapwa ku kuboko kwakwe,+ alisalanganya abalanga ukuti ba matutumuko mu mapange ya mu mitima yabo.+ 52 Alikisha aba maka+ pa fipuna fya bufumu no kusansabika abalanda;+ 53 aba nsala abalenga ukwikuta ifisuma+ na bali ne fyuma abaleka baya iminwe nkutwa.+ 54 Nayafwa Israele umubomfi wakwe,+ ku kulanga ukuti alebukisha ubulayo bwakwe ubwa kulanga uluse umuyayaya,+ 55 nga filya fine asosele ku fikolwe fyesu, kuli Abrahamu na ku mwana wakwe.”+ 56 Kabili Maria aikele nankwe nalimo imyeshi itatu, e lyo abwelele ku mwakwe.

57 Nomba inshita yalifikile iya kuti Elisabete apaape, kabili afyele umwana umwaume. 58 Awe abena mupalamano na balupwa baumfwile ukuti Yehova alimulangile nga nshi uluse,+ na bo basekelele+ pamo nankwe. 59 Na pa bushiku bwalenga cinekonsekonse (8), baishile ku kusembulula umwana,+ kabili balefwaya bamwinike ishina lya kwa wishi, Sekaria. 60 Lelo nyina ayaswike ati: “Awe iyo, aleinikwa ati Yohane.” 61 Na bo bamwebele abati: “Tapaba pali balupwa lobe uo bainika ili ishina.” 62 E lyo bacebwishe wishi ukuti beshibe ishina alefwaya ukwinika umwana. 63 Na o alombele ica kulembapo no kulemba ati: “Ishina lyakwe ni Yohane.”+ Na bonse balipapile. 64 Awe apo pene akanwa kakwe kaliswike+ no lulimi lwakwe lwalikakwike kabili atendeke ukulanda, alatasha Lesa. 65 No mwenso waikete abena mupalamano bonse abo baleikala na bo; kabili abantu balelanda pali fyonse ifi monse mu citungu ca mpili ica Yudea, 66 na bonse abaumfwile balatontonkanya mu mitima+ yabo abati: “Nga kanshi uyu mwana akaba shani?” Pantu kwena ukuboko+ kwa kwa Yehova kwali nankwe.

67 Kabili umupashi wa mushilo+ waishile pali Sekaria wishi, na o aseseme+ ati: 68 “Acindikwe Yehova Lesa wa kwa Israele,+ pantu napempula abantu bakwe+ no kubalubula.+ 69 Kabili natwimikila ulusengo*+ lwe pusukilo mu ng’anda ya mubomfi wakwe Davidi, 70 nga filya fine alandile ukupitila muli bakasesema ukufuma ku kale+ 71 pa lwa kutupususha ku balwani besu na mu minwe ya bonse abatupata;+ 72 ku kulanga uluse kuli ifwe pa mulandu wa fikolwe fyesu no kwibukisha icipangano+ cakwe ica mushilo, 73 umulapo uo alapile ku cikolwe cesu Abrahamu,+ 74 ukuti ilyo twalubulwa mu minwe ya balwani besu,+ atupeele ishuko lya kubombela Lesa ukwabula umwenso+ 75 kabili mu cishinka na mu bulungami ku menso yakwe inshiku shesu shonse.+ 76 Lelo iwe, we mwana, uketwa kasesema wa Wapulamo, pantu ukatangilila ku cinso ca kwa Yehova ku kupekanya inshila shakwe,+ 77 ku kulenga abantu bakwe beshibe ipusukilo ukupitila mu kubelela imembu shabo,+ 78 pa mulandu wa luse lwa kwa Lesa wesu. Pa mulandu wa ulu luse, tukamona ulubuuto ulwafuma mu muulu+ ulubalika kwati ni lilya akasuba kafuma,+ 79 ku kubalikila abaikala mu mfifi na mu cinshingwa ca mfwa,+ ku kutungulula amakasa yesu bwino bwino mu nshila ya mutende.”

80 Awe umwana alekula+ no kulakosa, kabili aikele mu matololo mpaka no bushiku aisokolwele kuli Israele.

2 Nomba mu nshiku shilya Kaisare Augusti afumishe icipope+ ca kuti abantu bonse aba pe sonde bafwile ukulembwa. 2 (Uku e kulembesha kwa kubalilapo uko acitile ilyo Kwirini ali umulashi wa calo ca Siria.) 3 Kabili abantu bonse baile ku kulembesha,+ cila muntu ku musumba wa ku mwabo. 4 Awe Yosefe na o afumine ku Galili, mu musumba wa Nasarete, no kuya ku Yudea, ku musumba wa kwa Davidi, uo beta ati Betelehemu,+ pantu ali wa mu ng’anda ya kwa Davidi kabili atuntwike muli ulu lwine lupwa.+ 5 Aile mu kulembwa pamo na Maria,+ uo aupile, ukulingana ne fyo bapangene,+ ninshi Maria ifumo nalikula.+ 6 Ilyo bacili kulya, inshiku sha kuti apaape shalifikile. 7 Kabili afyele umwana umwaume, ibeli,+ kabili amupombele mu nsalu no kumulaalika mu ca kuliilamo ifitekwa,+ pantu tabakwete umuputule mu ng’anda ya kulaalamo abeni.

8 Kabili muli cilya calo cimo cine mwali bakacema abali mu mpanga balelonda ifitekwa fyabo ubushiku. 9 Awe apo pene malaika+ wa kwa Yehova aiminine apo bali, no bukata bwa kwa Yehova+ bwalibengeshime ukubashinguluka, na bo balitiinine nga nshi. 10 Lelo malaika atile kuli bena: “Mwitiina, pantu, moneni! Ndebila kuli imwe imbila nsuma iya kusekelela kukalamba ukukaba ku bantu bonse,+ 11 pantu lelo mu musumba wa kwa Davidi+ namufyalwa Umupusushi wenu,+ uyu e Kristu Shikulu.+ 12 Kabili ici e cishibilo muleishibilako: Mulesanga akanya nabakapomba mu nsalu kabili nakalaala mu ca kuliilamo ifitekwa.” 13 Awe apo pene ibumba lya bamalaika ba mu muulu+ lyalongene pamo na malaika, balalumbanya Lesa+ abati: 14 “Natulumbe Lesa mu muulu,+ na pe sonde pabe umutende+ pa bantu abo atemwa.”+

15 Awe ilyo bamalaika babashile no kuya mu muulu, bakacema balalanshanya abati: “Natuleya ku Betelehemu no kumona ici cintu icicitike, ico Yehova+ atusokolwela.” 16 Awe balimine baya bwangu bwangu, bayasanga Maria na Yosefe, na kanya nakasendama mu ca kuliilamo ifitekwa. 17 Ilyo bakamwene, bashimike ifyo malaika abebele pali uyu mwana. 18 Na bonse abaumfwileko aya mashiwi balipapile pa fintu ifyo bakacema babashimikile, 19 lelo Maria ena alisungile aya mashiwi yonse, kabili aletontonkanyapo mu mutima wakwe umo ifi fyalolele.+ 20 Kabili bakacema balibwelelemo, balecindika Lesa no kumulumbanya pali fyonse ifyo baumfwile no kumona, filya fine babebele.

21 Nomba ilyo inshiku cinekonsekonse (8)+ shakumene isha kuti bamusembulule,+ e lyo bamwinike ati Yesu,+ ishina ilyo malaika amwinike ilyo talati emitwe mwi fumo.+

22 Kabili ilyo shakumene inshiku sha kubasangulula+ ukulingana na mafunde ya kwa Mose, bamutwele ku Yerusalemu pa kuti bamupeele kuli Yehova, 23 filya calembwa mwi funde lya kwa Yehova aciti: “Umwana umwaume onse ibeli aketwa uwa mushilo kuli Yehova,”+ 24 kabili batuulile ilambo ukulingana ne casoswa mu mafunde ya kwa Yehova ati: “Ifipele fibili nelyo utwana twa nkunda tubili.”+

25 Kabili moneni! kwali umuntu mu Yerusalemu ishina lyakwe ni Simeone, kabili uyu muntu ali umulungami kabili aletiina Lesa, alelolela inshita abena Israele bali no kubasansamusha,+ no mupashi wa mushilo wali pali ena. 26 Kabili Lesa alimusokolwelele ukupitila mu mupashi wa mushilo ukuti tali no kufwa mpaka akamone Kristu+ uwa kwa Yehova. 27 Awe umupashi walimutungulwile+ ayaingila mwi tempele; kabili ilyo abafyashi baletele umwana Yesu pa kuti bacite ukulingana ne fyalembwa mu mafunde,+ 28 Simeone alimupokelele mu maboko yakwe no kulumbanya Lesa ati: 29 “Nomba mwe Shikulu Mulopwe, lekeni umusha wenu aye umutende+ nge fyo mwasosele; 30 pantu amenso yandi nayamona uwa kupususha+ 31 uo mwapekanishisha abantu bonse,+ 32 ulubuuto+ lwa kufumya imfifi+ pa bena fyalo+ kabili ubukata bwa bantu benu abena Israele.” 33 Awe wishi na nyina balepapa fye ifyalelandwa pali uyu mwana. 34 Kabili Simeone alibapaalile, lelo aebele Maria nyina ati: “Mona! Uyu akalenga ukuti abengi mu Israele+ bakawe+ no kwima kabili bakamupontela+ 35 (cine cine, ulupanga ulutali lukapula muli iwe),+ pa kuti amatontonkanyo ya mitima ya bengi yakasokoloke.”+

36 Awe kwali kasesema mwanakashi, Ana, umwana wa kwa Fanuele, uwa mu mukowa wa kwa Ashere (uyu mwanakashi ali mukote, kabili aikele no mulume wakwe imyaka cinelubali (7) ukutula pali bunacisungu bwakwe. 37 Ali mukamfwilwa+ kabili ali ne myaka amakumi cinekonsekonse na ine [84]), kabili talepuswa pe tempele, alebomba umulimo wa mushilo ubushiku na kasuba+ no kuleka ukulya, kabili alepepa amapepo ya kupapaata. 38 Awe mu nshita ilya ine alishile, alatootela Lesa no kulanda pa mwana kuli bonse abalelolela ukulubuka kwa Yerusalemu.+

39 Kabili ilyo bacitile fyonse ukulingana na mafunde+ ya kwa Yehova, babwelele ku Galili, ku musumba wabo uwa Nasarete.+ 40 No mwana alekula no kukosa,+ na mano yalefulilako, kabili Lesa alemupaala.+

41 Kabili cila mwaka abafyashi bakwe baleya ku Yerusalemu+ ku mutebeto wa ca kucilila. 42 Kabili ilyo ali ne myaka ikumi na ibili (12), baliile ukulingana no lutambi+ lwa mutebeto 43 mpaka ilyo inshiku sha mutebeto shapwile. Nomba ilyo balebwelelamo, umwaice Yesu ashele ku Yerusalemu, na bafyashi bakwe tabaishibe. 44 Ico bena baletila ali mwi bumba ilyale-endela pamo na bo, baendele ulwendo lwa bushiku bumo,+ kabili batendeke ukumufwaya muli balupwa na mu bakaaya. 45 Lelo ilyo bafililwe ukumusanga, babwelele ku Yerusalemu, no kumufwaya sana. 46 Awe lintu papitile inshiku shitatu, bamusangile mwi tempele,+ naikala na bakasambilisha alekutika kuli bena no kubepusha. 47 Na bonse abalekutika kuli ena balipapile amano yakwe ne myasukile yakwe.+ 48 Awe ilyo abafyashi bakwe bamumwene, balipapile, na banyina bamwebele ati: “We mwana, cinshi ico watucushisha ifi? Mona, bawiso na ine natucula ukukufwaya.” 49 Lelo abepwishe ati: “Ico mulemfwaila cinshi? Bushe tamwaishiba ukuti mfwile ukuba mu ng’anda ya kwa Tata?”+ 50 Lelo tabaishibe umwalolele amashiwi ayo abebele.+

51 Kabili aile na bo no kufika ku Nasarete, kabili alebanakila.+ Kabili nyina asungile aya mashiwi yonse mu mutima wakwe.+ 52 Na Yesu alekula mu mano+ na mu mushinku kabili Lesa na bantu balimutemenwe.+

3 Mu mwaka walenga ikumi na isano (15) ukutula apo Tiberi Kaisare atendekele ukuteka, ilyo Ponti Pilato ali umulashi wa ku Yudea, na Herode*+ ali kateka wa ku citungu ca Galili, kabili Filipi munyina ali kateka wa ku citungu ca Iturea na Trakoniti, e lyo Lusani ali kateka wa ku citungu ca Abilene, 2 mu nshiku sha kwa Anasi shimapepo mukalamba na Kayafa,+ amashiwi ya kwa Lesa yaishile kuli Yohane+ mwana Sekaria mu matololo.+

3 Awe aile monse mu mishi yashinguluka Yordani, aleshimikila pa lubatisho lwa kulanga ukulapila pa kwelelwa imembu,+ 4 nga filya calembwa mwi buuku umwaba amashiwi ya kwa kasesema Esaya, ati: “Umfweni! Umuntu alebilikisha mu matololo aleti, ‘Kunguleni inshila ya kwa Yehova, lungamikeni inshila shakwe.+ 5 Umukonko onse ukashiikwa, no lupili lonse na kapili fikapaswa, ne finshoko fikaba inshila ishaololoka no mwalundumana mukaba inshila ishalingana;+ 6 na bantu bonse bakamona ukupususha kwa kwa Lesa.’”+

7 E ico alaeba amabumba ya bantu abaleisa kuli ena ukuti babatishiwe, ati: “Mwe bana ba nsoka mwe,+ nani amusokele ukufulumuka ubukali ubuleisa?+ 8 E ico citeni ifya kulanga ukuti namulapila.*+ Kabili mwitendeka ukusosa mu mitima yenu amuti, ‘Twalikwata shifwe Abrahamu.’ Pantu ndemweba, nati, Lesa alikwata amaka ya kwalula aya amabwe ukuba abana ba kwa Abrahamu. 9 Ne sembe kale kale lili kwi shinte lya miti; e ico umuti onse uushitwala ifisabo fisuma bakautema no ku-upoosa mu mulilo.”+

10 Awe amabumba yalamwipusha ayati: “Nga kanshi tucite shani?”+ 11 Na o alebaasuka ati: “Umuntu uukwete ifya kufwala fibili apeeleko uushikwete, no ukwete ifya kulya na o apeeleko uushikwete.”+ 12 Awe na bakasonkesha ba misonko baishile mu kubatishiwa, no kumweba abati: “Mwe Kasambilisha, tucite shani?”+ 13 Na o abebele ati: “Mwilasonkesha umusonko uwacila pa ndalama abantu bafwile ukusonka.”+ 14 Abashilika na bo balemwipusha abati: “Nga ifwe tucite shani?” Na o abaswike ati: “Mwilacusha umuntu nangu umo nelyo ukufyenga umuntu,+ muleteka fye imitima ku malipilo yenu.”+

15 Nomba apo abantu balelolela Kristu, bonse baletontonkanya pali Yohane mu mitima yabo abati: “Bushe uyu nalimo e Kristu?”+ 16 Na o Yohane abaswike bonse ati: “Ine ndemubatisha ku menshi; lelo uwancila amaka aleisa, uo nshalinga ukukakula inshinga sha ndyato shakwe.+ Ena akamubatisha ku mupashi wa mushilo na ku mulilo.+ 17 Ica kwelulwilako cakwe cili mu minwe yakwe ku kuwamya bwino bwino apa kupumina ingano no kututila+ ingano mu butala, lelo imisungu+ akayoca mu mulilo+ uushingashima.”

18 E ico abakonkomeshe ifingi na fimbi kabili atwalilile ukubila imbila nsuma ku bantu. 19 Kabili Yohane alekalipila Herode, kateka wa citungu, pa mulandu wa kuti aupile Herodia muka munyina na pa fibi fimbi fyonse ifyo Herode acitile.+ 20 Herode acitile na cimbi: apoosele Yohane mu cifungo.+

21 Nomba ilyo abantu bonse babatishiwe, Yesu+ na o alibatishiwe. Kabili ilyo alepepa, umuulu+ waliswike 22 no mupashi wa mushilo uwalemoneka kwati ni nkunda waikile pali ena, ne shiwi lyafumine mu muulu aliti: “Uli Mwana wandi uo natemwa; ni we nsekelelamo.”+

4 Awe Yesu afumine ku Yordani, ninshi ali no mupashi wa mushilo, no mupashi wamutungulwile ku matololo+ 2 uko aileikala inshiku amakumi yane (40),+ kabili Satana Kaseebanya alemutunka.+ Nomba taliile nangu kamo muli shilya nshiku, kabili ilyo shapwile, aumfwile insala. 3 Awe Satana Kaseebanya amwebele ati: “Nga uli mwana wa kwa Lesa, eba ilibwe ili libe umukate.” 4 Lelo Yesu amwaswike ati: “Calilembwa ati, ‘Te ku fya kulya fyeka umuntu engekalila uwa mweo.’”+

5 Kabili amuninike pa lupili no kumulanga mu kashita akanono fye amabufumu yonse aya bantu ba pe sonde; 6 kabili Satana Kaseebanya atile: “Ndekupeela amaka+ pa mabufumu yonse aya no bucindami bwa yako, pantu balimpeela, na ine mpeelako uo ntemenwe.+ 7 E ico iwe nga wampepako fye umuku umo,+ ndekupeela amaka pali ifi fyonse.” 8 Na o Yesu amwaswike ati: “Calilembwa ati, ‘Yehova Lesa+ obe e o ulepepa, kabili eka fye e o ulebombela.’”+

9 Kabili amutwele mu Yerusalemu no kumwimika pa muulu wa cibumba+ ce tempele no kumweba ati: “Nga uli mwana wa kwa Lesa, tolokela pa nshi;+ 10 pantu calilembwa ati, ‘Akeba bamalaika bakwe ifya kucita pali iwe, ukuti bakucingilile,’+ 11 kabili ati, ‘Bakakusendela pa maboko yabo, pa kuti wikaipununa ulukasa ku libwe.’”+ 12 Na o Yesu amwaswike ati: “Calisoswa ukuti, ‘Wilaesha Yehova Lesa obe.’”+ 13 E ico ilyo Satana Kaseebanya apwishishe ukumutunka muli fyonse ifi, alimushile mpaka inshita imbi iyalinga.+

14 Awe Yesu abweleele ku Galili+ ninshi ali na maka ya mupashi wa mushilo. Ne fisuma baleshimika pali ena fyasalangene mu mishi yonse iyali mupepi.+ 15 Awe atendeke ukusambilisha mu masunagoge* yabo, kabili abantu bonse balemucindika.+

16 Kabili aile ku Nasarete,+ uko akuliile; aingile mwi sunagoge nge fyo atemenwe ukucita pa bushiku bwe sabata,+ no kwiminina pa kuti abelenge. 17 Awe bamupeele ibuuku lya kwa kasesema Esaya, kabili afungulwile ili ibuuku no kusanga apalembelwe ati: 18 “Umupashi wa kwa Yehova+ waba pali ine, pantu ansubile ukuti mbile imbila nsuma ku bapiina, antumine mu kubila ukuti abafungwa bakalubulwa no kushibula amenso ya mpofu, no kulubula abanyanyantilwa,+ 19 no kubila umwaka we paalo lya kwa Yehova.”+ 20 Awe afungile ili ibuuku, alibweseshe kuli kapyunga no kwikala; na bonse mwi sunagoge balemulolesha. 21 E lyo atendeke ukubeba ati: “Ili lembo mwaumfwa nalifikilishiwa ubushiku bwa lelo.”+

22 Kabili bonse balashimika ifisuma pali ena no kupapa pa mashiwi ayasuma+ ayo alelanda, abati: “Bushe uyu te mwana wa kwa Yosefe?”+ 23 Na o atile kuli bena: “Nangu cibe shani, mwalalanda iyi nsoselo pali ine iya kuti, ‘Kondapa,+ uyundape,’ kabili mwalalanda ati, ‘Ifyo twaumfwile+ ulecita ku Kapernahumu,+ cita na kuno ku mwenu.’”+ 24 Lelo atile: “Ndemweba icine cine nati, takwaba kasesema uo batemwa ku mwabo. 25 Pantu, ndemweba ica cine nati, Mwali bamukamfwilwa abengi mu Israele mu nshiku sha kwa Eliya, ilyo umuulu wacilikwe pa myaka itatu ne myeshi mutanda (6), ica kuti icipowe icikalamba caponene mu calo conse,+ 26 lelo Eliya tabamutumine kuli umo pali balya banakashi, kano fye ku Sarefati+ mu calo ca Sidone kuli mukamfwilwa. 27 Kabili mwali abengi aba fibashi mu Israele mu nshita ya kwa Elisha kasesema, lelo takwali nangu umo pali bena uo aundepe, kano Naamani umwina Siria.”+ 28 Awe bonse abali mwi sunagoge abaleumfwa ifi fintu balikalipe nga nshi;+ 29 kabili balimine no kumufumya mu musumba, bamutwele na ku cipuma ca lupili apakuulilwe umusumba wabo, pa kuti bamufuntule.+ 30 Lelo apitile mwi bumba, aya no kuya.+

31 Aile na ku Kapernahumu,+ umusumba wa ku Galili. Kabili alebasambilisha pe sabata; 32 na bo balipapile imisambilishishe yakwe,+ pantu alelanda na maka.+ 33 Na mwi sunagoge mwali umwaume uwali no mupashi+ uwakowela, kabili abilikishe ishiwi ilikalamba ati: 34 “Ala! Bushe tulomfwana na imwe,+ mwe Yesu, umwina Nasarete?+ Bushe mwishile ku kutonaula? Nalimwishiba+ bwino, muli Wa Mushilo wa kwa Lesa.”+ 35 Lelo Yesu aliukalipile ati: “Talala, kabili fuma muli uyu muntu!” E ico ilyo icibanda camufuntwile ninshi balemonako, califuminemo ukwabula ukumucena.+ 36 Awe bonse balipapile, kabili balalanshanya abati: “Milandile ya musango nshi iyi, pantu ku maka ale-eba imipashi yakowela, na yo yafumamo?”+ 37 E ico ululumbi lwakwe lwasalanganine mu mishi yonse iyali mupepi.+

38 Ilyo aimine no kufuma mwi sunagoge, aingile mu ng’anda ya kwa Simone. Nomba nafyala wa kwa Simone alilwele sana impepo, na bo baipwishe Yesu ukuti amwafwe.+ 39 Awe aiminine apo ali no kukalipila impepo ukuti ipwe,+ na yo yalipwile. Awe apo pene alimine alabapekanishisha ifya kulya.+

40 Lelo ilyo akasuba kalewa, bonse abali na balwele abalecula ku malwele yalekanalekana, babaletele kuli ena. Na o alibondepe pa kubika iminwe yakwe pali bonse.+ 41 Ifibanda na fyo fyalefuma mu bengi,+ filebilikisha afiti: “Ni we Mwana+ wa kwa Lesa.” Lelo alifikalipile, talefisuminisha ukulanda,+ pantu fyalimwishibe+ ukuti ni Kristu.+

42 Awe ilyo bwacele, alifumine aya ukwa kuti abe eka.+ Lelo amabumba ya bantu yaile yalemufwaya mpaka yamusanga, kabili yaeseshe ukumuteka ukuti eya. 43 Lelo abebele ati: “Na mu misumba imbi ndi no kubila imbila nsuma iya bufumu bwa kwa Lesa, pantu e co natumiinwe.”+ 44 Awe aile aleshimikila mu masunagoge ya mu Yudea.+

5 Awe ilyo ibumba lya bantu lyaleumfwa icebo ca kwa Lesa, lyalemutitikisha ninshi eminine ku lulamba lwa bemba wa Genesarete.+ 2 Kabili amwene amato yabili ayali ku lulamba lwa bemba, lelo abalondo ninshi nabafumamo, balesamfya amasumbu yabo.+ 3 Ilyo aninine mu bwato bumo ubwali ubwa kwa Simone, amwebele ukubutalushako panono ku mulundu. Kabili aliikele, alasambilisha amabumba, ninshi ena ali mu bwato.+ 4 Ilyo alekele ukulanda, aebele Simone ati: “Twala ubwato apashikile, kabili pooseni amasumbu+ yenu pa kuti mwipaye isabi.” 5 Lelo Simone ayaswike ati: “Mwe Kasambilisha, tuculile ubushiku bonse ukwabula ukwipaya nangu limo,+ lelo pa mulandu wa fyo mwasosa, nalapoosamo amasumbu.” 6 Awe ilyo bacitile ifi, baipeye isabi ilingi nga nshi, ica kuti na masumbu yabo yatendeke ukulepuka. 7 E ico bacebwishe abalondo banabo abali mu bwato bumbi ukuti bese babafweko;+ na bo balishile, kabili baiswishe amato yonse yabili, ica kuti yatendeke ukubunda. 8 Ilyo Simone Petro+ amwene ifi, afukeme pa ntanshi ya kwa Yesu, no kutila: “Ntalukeni, mwe Shikulu, pantu ndi muntu umubembu.”+ 9 Pa mulandu we sabi baipeye, alipapile nga nshi na bonse abali nankwe, 10 kumo na Yakobo na Yohane, abana baume ba kwa Sebede,+ abalondo banankwe aba kwa Simone. Lelo Yesu aebele Simone ati: “Wilatiina. Ukufuma pali nomba walaba umulondo wa bantu.”+ 11 E ico babweseshe amato ku mulundu, kabili bashile fyonse no kumukonka.+

12 Inshita imbi ilyo ali mu musumba umo, moneni! kwali umwaume uwalwele ifibashi umubili onse! Ilyo amwene fye Yesu, awile ubukupeme, alamupapaata ati: “Mwe Shikulu, nga mulefwaya, kuti mwamposha.”+ 13 E ico atambalike ukuboko kwakwe amukumya, no kusosa ati: “Ndefwaya. Pola.” Kabili ilyo line fye ifibashi fyalipolele.+ 14 Kabili amwebele ukukanaebako umuntu nangu umo,+ e lyo amweba no kuti: “Kabiye, kailange kuli shimapepo+ uyetuula no mutuulo+ uo Mose alandile uwa kulanga ukuti naupola, pa kuti bashininkishe ukuti naupola.”+ 15 Lelo ululumbi lwakwe lwalesalanganinako fye, na mabumba yakalamba yalelongana ku kumfwa na ku kundapwa amalwele yabo.+ 16 Lelo ena aikele eka mu matololo, alepepa.+

17 Awe ubushiku bumo, alesambilisha, na baFarise na bakasambilisha ba mafunde abafumine mu mishi yonse iya mu Galili na Yudea na Yerusalemu e po bali nabekala; kabili ali na maka ya kwa Yehova aya kuposha abantu.+ 18 Kabili, moneni! abantu balishile ninshi nabasenda umwaume uwali no bulebe pa musengele, kabili balefwaya apa kumwingishisha no kumubika pa ntanshi yakwe.+ 19 Nomba ilyo bafililwe ukusanga apa kumwingishisha pa mulandu we bumba, baninine pa mutenge, no kumupishisha pa cipunda no kumwishisha kumo no musengele pa kati ka bantu abali pa ntanshi ya kwa Yesu.+ 20 Awe ilyo amwene icitetekelo cabo, atile: “We muntu, imembu shobe shaelelwa.”+ 21 E ico bakalemba na baFarise balalanshanya abati: “Bushe uyu nani uwa kuti aleponta?+ Bushe te Lesa eka uwingelela imembu?”+ 22 Lelo Yesu ilyo aishibe ifyo baletontonkanya, abaswike ati: “Cinshi muletontonkanya mu mitima yenu?+ 23 Nga kanshi, icayangukapo ukulanda cinshi, ukutila, ‘Imembu shobe shaelelwa,’ nelyo ukutila, ‘Ima no kwenda’?+ 24 Lelo pa kuti mwishibe ukuti Umwana wa muntu alikwata amaka pano isonde aya kwelela imembu—” aebele uwa bulebe ati: “Ndekweba nati, Ima, senda umusengele obe no kuya ku ng’anda.”+ 25 Na po pene alimine ninshi na bonse balemonako, abuulile ico alelaalapo no kuya ku mwakwe, alecindika Lesa.+ 26 Awe bonse balipapile nga nshi,+ balalumbanya Lesa, kabili balyumfwile umwenso nga nshi no kutila: “Twamona ifipesha amano buno bushiku!”+

27 Nomba pa numa ya ifi, alifumine alaya kabili amwene kasonkesha wa misonko ishina lyakwe ni Lebi naikala apa kusonkesesha imisonko, kabili amwebele ati: “Nkonka, ube umusambi wandi.”+ 28 Na o alishile fyonse,+ kabili aliimine alamukonka. 29 Awe Lebi amupekanishishe umutebeto uukalamba mu ng’anda mu mwakwe; kabili mwali ibumba lya bantu ilikalamba ilya bakasonkesha ba misonko na bambi abali pamo na bo nabekala balelya.+ 30 Awe abaFarise na bakalemba babo balailishanya ku basambi bakwe, abati: “Nga cinshi muliila no kunwena pamo na bakasonkesha ba misonko na babembu?”+ 31 Na o Yesu abaswike ati: “Abatuntulu tabakabila uwa kubondapa,+ kano abalwele.+ 32 Nshaisa ku kwita abalungami iyo, kano ababembu ukuti balapile.”+

33 Na bo batile kuli ena: “Abasambi ba kwa Yohane balaleka ukulya libili libili no kupepa amapepo ya kupapaata kuli Lesa, e ficita na basambi ba baFarise, lelo abasambi bobe balalya no kunwa.”+ 34 Yesu atile kuli bena: “Bushe kuti mwalesha abanankwe ba kwa shibwinga ukulya ilyo shibwinga acili pamo na bo?+ 35 Lelo inshiku shileisa ilyo shibwinga+ bakamusenda;+ e lyo bakaleka ukulya mu nshiku shilya.”+

36 Kabili abomiine ipinda ati: “Takuli nangu umo uulepula icikamba ku ca kufwala icipya no kucibilila pa ca kufwala ica kale; lelo nga abililapo, icikamba icipya kuti calepula insalu no kufumapo, kabili icikamba icipya tacilingana ne nsalu ya kale.+ 37 Kabili takuli uubika umwangashi uushilakalipa mu nyambi* sha kale; lelo nga abikamo, umwangashi uushilakalipa kuti walepula inyambi,+ kabili kuti waitika, ne nyambi shaonaika.+ 38 Lelo umwangashi uushilakalipa ufwile ukubikwa mu nyambi ishipya. 39 Takuli uunwa umwangashi uukali, uufwaya uushilakalipa; pantu atila: ‘Uukali+ e usuma!’”

6 Awe pe sabata, alepita mu mabala ya ngano, na basambi bakwe baletimpula+ imitwe ya ngano, baleifikina mu minwe no kulya.+ 2 Na baFarise bamo batile: “Cinshi mulecitila icishasuminishiwa+ ukucita pe sabata?”+ 3 Lelo Yesu abaswike ati: “Bushe tamwabelenga ico Davidi+ acitile ilyo ena na bali pamo nankwe baumfwile insala?+ 4 Ifyo aingiile mu ng’anda ya kwa Lesa no kupoka imikate ya kutuula+ kuli Lesa no kulya, kabili apeeleko imo abaume abali nankwe, icishasuminishiwa ku muntu nangu umo ukulya kano fye kuli bashimapepo?”+ 5 Kabili abebele ati: “Umwana wa muntu e Mwine we sabata.”+

6 Pe sabata+ na limbi, aingile mwi sunagoge alasambilisha. Kabili mwali umuntu uo ukuboko kwakwe ukwa ku kulyo kwali ukwalemana.+ 7 Awe bakalemba na baFarise balemulolekesha+ ukuti bamone nga alaposha pe sabata, pa kuti basange apa kumupeelela umulandu.+ 8 Lelo alishibe ifyo baletontonkanya,+ kabili aebele umuntu uwa kuboko ukwalemana ati: “Ima, iminina pa kati.” Na o aliimine, aiminina.+ 9 E lyo Yesu atile kuli bena: “Lekeni imwipusheko, Bushe calisuminishiwa pe sabata ukucita icisuma+ nelyo ukucita icabipa, ukupususha umuntu nelyo ukumwipaya?”+ 10 Kabili aloleshe bonse abalipo, aeba umuntu ati: “Fungulula ukuboko kobe.” Na o alikufungulwile, no kuboko kwakwe kwalipolele.+ 11 Lelo balikalipe nga nshi, kabili batendeke ukulanshanya ifyo bengacita kuli Yesu.+

12 Mu nshiku shilya, aile mu lupili mu kupepa,+ kabili aikele ubushiku bonse alepepa kuli Lesa.+ 13 Lelo ilyo bwacele, aitile abasambi bakwe no kusalapo abasambi ikumi na babili (12), abo ainike ati “abatumwa”:+ 14 Simone, uo kabili ainike ishina limbi ati Petro,+ na Andrea munyina, na Yakobo na Yohane,+ na Filipi+ na Batolomeo, 15 na Mateo na Toma,+ na Yakobo mwana Alfeo, na Simone uo baleita ati “uwacincila,”+ 16 na Yuda umwana wa kwa Yakobo, na Yuda Iskariote, uwamufutwike.+

17 Kabili alitentemwike na bo no kwikala apatambalala, kabili pali ibumba ilikalamba ilya basambi bakwe, na cinkupiti+ wa bantu abafumine monse mu Yudea na mu Yerusalemu na mu mishi ya ku lulamba lwa bemba iya Turi na Sidone, abaishile mu kumfwa kuli ena na ku kundapwa amalwele.+ 18 Alyundepe na balya imipashi yakowela yalecusha. 19 Ne bumba lyonse lyalefwaya ukumukumya,+ pantu amaka+ yalefuma muli ena no kuundapa bonse.

20 Kabili ainwine amenso yakwe no kulolesha abasambi bakwe, alabeba ati:+

“Mwalipaalwa mwe bapiina,+ pantu ubufumu bwa kwa Lesa bwenu.

21 “Mwalipaalwa mwe bomfwa insala+ nomba, pantu mukekuta.+

“Mwalipaalwa mwe balila nomba, pantu mukaseka.+

22 “Mwalipaalwa nga abantu bamupata,+ kabili nga bamukaana no kumupontela no kumusaalula+ ukuti muli babi pa mulandu wa Mwana wa muntu. 23 Sekeleleni muli bulya bushiku no kusansamuka nga nshi, pantu, moneni! icilambu cenu cikalamba mu muulu, pantu ifi fine e fyo ne fikolwe fyabo fyalecita kuli bakasesema.+

24 “Lelo we bulanda kuli imwe mwe bakankaala,+ pantu mulepokelela icisansamushi cenu conse.+

25 “We bulanda we kuli imwe mwe bekuta nomba, pantu mukomfwa insala.+

“We bulanda we kuli imwe, mwe baseka nomba, pantu mukaloosha no kulila.+

26 “We bulanda we kuli imwe, nga abantu bonse balelanda ifisuma pali imwe, pantu ifi fine e fyo ne fikolwe fyabo fyalecita kuli bakasesema wa bufi.+

27 “Lelo nde-eba mwe baleumfwa, nati, Muletemwa abalwani benu,+ mulecita ifisuma+ ku bamupata, 28 mulepaala abamutiipwila, mulepepelako abamutuka.+ 29 Uwa kutoba ulupi pe saya limo;+ mupeele ne libiye; no wa kupoka+ ica kufwala cobe ica ku nse, wimukaanya ne ca kufwala ca mu kati. 30 Onse uulekulomba, umupeele,+ no ulekupoka ifintu fyobe wilamupinda.

31 “Kabili ifyo mufwaya abantu bamucitile, e fyo na imwe mulebacitila.+

32 “Kabili nga mwatemwa fye abamutemwa, cinshi abantu bengamutashishapo? Pantu na babembu na bo batemwa fye ababatemwa.+ 33 Kabili nga mwacita ifisuma ku bamucitila ifisuma, cinshi abantu bengamutashishapo? Na babembu na bo e fyo bacita ifyo fine.+ 34 Kabili nga mwakongwesha ukwabula ukufwaya isha kulundapo+ kuli abo mucetekele ukuti bakamubwesesha, ninshi cisuma nshi mwacita? Na babembu balakongwesha ababembu banabo ukwabula ukulomba ukuti babalundilepo pa kuti na bo bababweseshe icipimo cimo cine.+ 35 Lelo muletemwa abalwani benu no kulacita ifisuma kabili mulekongwesha+ ukwabula ukufwaya ica kulundapo, kabili ukwabula ukusubila ukuti bakamubwesesha, ne cilambu cenu cikaba icikalamba, kabili mukaba abana ba Wapulamo,+ pantu wa cikuuku+ ku bashitasha na ku babifi. 36 Muleba no luse, nga filya Shinwe aba uwa luse.+

37 “Kabili mwilapingula bambi, na imwe tabakamupingule nakalya;+ kabili mwilapeela umuntu umulandu, ninshi tabakamupeele umulandu nakalya. Mule-elela, na imwe bakamwelela.+ 38 Mulepeela, na imwe abantu bakulamupeela.+ E lyo bakamupeela muli tumba wenu icipimo icisuma, icashindailwa, ico basunkanya bwino bwino kabili icaisula. Pantu ku cipimo ico mupiminako bambi, e ko na imwe bakamupimina.”+

39 E lyo abomine ne pinda ati: “Bushe impofu kuti yatungulula impofu ibiye? Bushe shonse shibili te kuti shiwile mu cilindi?+ 40 Umusambi tacila kasambilisha wakwe, lelo onse uo basambilisha bwino akaba nga kasambilisha wakwe.+ 41 Nga kanshi cinshi ulolesesha akacani akali mu linso lya munobe, lelo taulemona umulando uuli mu linso lyobe?+ 42 Bushe kuti waeba shani umunobe ati, ‘Munyinane, leka nkufumye akacani mu linso,’ lelo we mwine taulemona umulando uuli mu linso lyobe?+ We wa bumbimunda we! Utale ufumye umulando mu linso lyobe,+ e lyo walamona bwino ifya kufumya akacani akali mu linso lya munobe.+

43 “Pantu takwaba umuti uusuma uutwala ifisabo ifyabipa; kabili takwaba umuti uwabipa uutwala ifisabo ifisuma.+ 44 Pantu umuti onse bawishibila ku fisabo fya uko.+ Na bantu tabasaba amakunyu ku myunga, nangu imyangashi ku cimpusa ca myunga.+ 45 Umuntu umusuma afumya ifisuma mu cipao icisuma+ ica mu mutima wakwe, lelo umubifi afumya ifyabipa mu cipao cakwe ica bubifi; pantu ifyaisula mu mutima wa muntu, no kulanda e fyo alanda.+

46 “E ico cinshi munjitila ati, ‘Shikulu! Shikulu!’ lelo tamucita ifyo nsosa?+ 47 Onse uwaisa kuli ine no kumfwa amashiwi yandi no kulayakonka, nalamulanga uo apala:+ 48 Apala umuntu uwakuulile ing’anda, uwaimbile ukufika pa mwalala no kubikapo umufula. Awe ilyo mulamba+ aishile, umumana wapamine pa ng’anda, lelo tawali na maka ya kuisunkaanya, pa mulandu wa kuti yalikuulilwe bwino.+ 49 Lelo uwaumfwa amashiwi yandi no kukanayakonka,+ apala umuntu uwakuulile ing’anda pa mushili apabula umufula wa kukuulapo. Awe umumana waumine ku ng’anda, na po pene yalibongolweke, no kubongoloka+ kwa ng’anda ilya kwalibipile nga nshi.”+

7 Ilyo apwishishe ukulanda amashiwi yonse aya ku bantu, aingile mu Kapernahumu.+ 2 Awe umusha wa mukalamba wa bashilika uo atemenwe nga nshi, alilwele kabili ali mupepi no kufwa.+ 3 Ilyo umukalamba wa bashilika aumfwile ulwa kwa Yesu, atumine abakalamba ba baYuda ku kumwita ukuti ese aposhe umusha wakwe. 4 Awe baishile kuli Yesu balamupapaata nga nshi abati: “Uyu muntu nalinga ukuti mumwafwilishe, 5 pantu alitemwa uluko+ lwesu kabili e watukuuliile ne sunagoge.” 6 E ico Yesu aile na bo. Lelo ilyo apaleme ku ng’anda, umukalamba wa bashilika ninshi natuma kale ifibusa fyakwe ukuyamweba ati: “Mukwai, mwi-icusha, pantu nshalinga ukuti mwingile mwi samba lya mutenge wandi.+ 7 E mulandu wine natila nshili uwalinga ukwisa kuli imwe. Lelo soseni fye amashiwi, no mubomfi wandi apole. 8 Pantu na ine wine nalikwata abo nakila, kabili ndi na bashilika abang’umfwila, kabili ndeba umo nati, ‘Kabiye!’ na o aya, na umbi ndamweba ati, ‘Isa!’ na o aisa, na ku musha wandi ntila, ‘Cita ici!’ na o acita.”+ 9 Awe lintu Yesu aumfwile ifyo alandile, alipapile, kabili apilibukile kwi bumba lyalemukonka, no kutila: “Ndemweba nati, nshatala nsanga nangu umo uwa citetekelo icikalamba nge ci nangu fye ni mu Israele.”+ 10 Na balya batumine ilyo babwelele ku ng’anda, basangile umusha napola.+

11 Awe pa numa fye ya ifi, aile ku musumba uo beta ati Naini, na basambi bakwe ne bumba ilikalamba baile nankwe. 12 Ilyo alepalamina ku mpongolo ya musumba, moneni! kwali umuntu uwafwa+ uo baletwala ku nse, umwana umwaume umo fye mpo+ uo nyina afyele. Kabili uyu mwanakashi ali ni mukamfwilwa. Ne bumba ilikalamba ilyafumine mu musumba lyali no yu mwanakashi. 13 Awe ilyo Shikulu amumwene fye, amumfwilile uluse,+ kabili amwebele ati: “Leka ukulila.”+ 14 Kabili alipaleme no kukumya ku musengele, na bamupingile baliminine, na o atile: “We mulumendo, Ndekweba nati, Ima!”+ 15 No mulumendo uwafwile alimine aikala, atendeka ukulanda, na Yesu amupeele kuli nyina.+ 16 Awe umwenso+ waikete bonse, kabili balacindika Lesa, abati: “Kasesema+ mukalamba naima muli ifwe,” kabili balandile abati, “Lesa napempula abantu bakwe.”+ 17 No lulumbi lwakwe ulu lwasalangene monse mu Yudea na mu mpanga yonse iyashingulukako.

18 Kabili abasambi ba kwa Yohane bamushimikile fyonse ifi.+ 19 Na o Yohane e pakwita abasambi bakwe babili no kubatuma kuli Shikulu pa kuti bayemwipusha ati: “Bushe ni we Uuleisa nelyo bushe tufwile ukulolela umbi?”+ 20 Ilyo bafikile kuli ena, batile: “Yohane Kabatisha atutuma kuli imwe ati, ‘Bushe ni we Uuleisa nelyo tufwile ukulolela umbi?’” 21 Mu nshita ilya aundepe abengi ku malwele+ ne ntenda no kufumya ifimipashi fyabipa, no kulenga impofu ishingi ukulamona. 22 E lyo ayaswike balya abasambi babili ati: “Kabiyeni,+ kashimikileni Yohane ifyo mwamona no kumfwa: impofu+ shileshibulwa amenso, abalemana bale-enda, aba fibashi baleundapwa na bankomamatwi baleumfwa, abafwa balebuushiwa, abapiina baleshimikilwa+ imbila nsuma.+ 23 Kabili wa nsansa uushitwishika* pali ine.”+

24 Ilyo inkombe sha kwa Yohane shaile, atendeke ukweba amabumba pali Yohane ati: “Cinshi mwaile mu kumona mu matololo? Bushe litete ililetenkana ku mwela?+ 25 Nga cinshi kanshi mwaile mu kumona? Bushe muntu uufwele ifya kufwala ifyanaka bwino?+ Lelo abafwala ifya kufwala fyacindama kabili abailemena bekala mu mayanda ya shamfumu.+ 26 E co kanshi cinshi mwaile mu kumona? Bushe ni kasesema?+ Ee, ndemweba, nati, uwacila pali kasesema.+ 27 Ni pali uyu wine balemba ati, ‘Mona! Ndetuma inkombe yandi pa ntanshi yobe,+ iikakukungwila inshila ku ntanshi yobe.’+ 28 Ndemweba, nati, Mu bafyalwa ku banakashi tapaba uwacila+ pali Yohane; lelo uwacepesha mu bufumu bwa kwa Lesa mukalamba pali ena.”+ 29 (Na bantu bonse na bakasonkesha ba misonko ilyo baumfwile ifi, balandile ukuti Lesa mulungami,+ pantu babatishiwe ulubatisho lwa kwa Yohane.+ 30 Lelo abaFarise na baishibisha Amafunde basuulile amano+ ayo Lesa abapandile, pantu tababatishiwe.)

31 “Ni kuli bani kanshi ndepashanya abantu ba nkulo ino, kabili bapala bani?+ 32 Bapala abana abanono abekele pa maliketi balebilikishanya abati, ‘Natumulishisha imitoolilo, lelo tamucindile; natulila imisowa, lelo tamulilile.’+ 33 E fyo na Yohane Kabatisha alisa, talya umukate nangu ukunwa umwangashi, lelo mutila, ‘Aba ne cibanda.’+ 34 Ilyo Umwana wa muntu aisa, alalya no kunwa, lelo mutila, ‘Moneni! Umuntu umuliili kabili umunwi wa mwangashi, cibusa wa bakasonkesha na babembu!’+ 35 Lelo, ifintu ifyalungama ifyo umuntu acita+ e filanga ukuti wa mano.”+

36 Awe umo umuFarise alemwita ukuti ayelya pamo nankwe ifya kulya. Na o aingile mu ng’anda+ ya muFarise no kwikala balalya. 37 Kabili moneni! umwanakashi uwaishibikwe mu musumba ukuti mubembu aumfwile ukuti ali mu ng’anda ya muFarise alelya, kabili aishile ne botolo+ lya mafuta ayanunkila. 38 Kabili ilyo aiminine lwa ku numa ku makasa yakwe, atendeke ukulila no kubomfya amakasa ya kwa Yesu ku filamba fyakwe kabili aleyakumuna ku mushishi wa ku mutwe wakwe. Kabili atomwene amakasa ya kwa Yesu no kuyasuba amafuta ayanunkila. 39 Awe ilyo umuFarise uwamwitile amwene ifi, asosele mu mutima wakwe ati: “Uyu muntu aba ni kasesema,+ nga naishiba umuntu ulemukumya ifyo aba, no musango wa uyu mwanakashi, ukuti mubembu.”+ 40 Lelo Yesu amwaswike ati: “Simone, pali ifyo ndefwaya ukukweba.” Na o atile: “Mwe Kasambilisha, landeni!”

41 “Abantu babili bali ne nkongole ku washimisha indalama; umo akongwele indalama badenari*+ imyanda isano (500), e lyo umbi amakumi yasano (50). 42 Nomba pa mulandu wa kuti tabakwete ica kumubwesesha, alibabelele uluse+ bonse babili. E ico nani pali aba babili uwingamutemwa sana?” 43 Simone ayaswike ati: “Kuti natila ni ulya abelele sana uluse.” Na o amwebele ati: “Walungika.” 44 E lyo apilibukile ku mwanakashi no kutila kuli Simone: “Bushe wamumona umwanakashi uyu? Njishile mu ng’anda yobe; lelo taumpeele amenshi+ ya kusamba amakasa yandi. Nomba uyu mwanakashi nabomfya amakasa yandi ku filamba fyakwe no kuyakumuna ku mushishi wakwe. 45 Tauntomwene;+ lelo uyu mwanakashi, ukutula apo nyingilile, talekele ukutomona amakasa yandi. 46 Taunsubile amafuta ku mutwe;+ lelo uyu mwanakashi nansuba ku makasa amafuta ayanunkila. 47 Pa mulandu wa ici, ndekweba, nati, imembu shakwe nangu shafula shani, nashelelwa,+ pantu atemenwe sana; lelo uo baelela panono, ninshi ukutemwa kwakwe kunono.” 48 E lyo amwebele ati: “Imembu shobe shaelelwa.”+ 49 Kabili abalelya nankwe pe tebulo balasosa mu mitima yabo, abati: “Bushe uyu muntu nani uwa kuti ale-elela ne membu?”+ 50 Lelo aebele umwanakashi ati: “Icitetekelo cobe nacikupususha;+ kabiye umutende.”+

8 Ilyo papitile inshita inono, aile alepita mu misumba na mu mishi, aleshimikila no kubila imbila nsuma ya bufumu bwa kwa Lesa.+ Na basambi ikumi na babili (12) bali nankwe, 2 na banakashi+ bamo abo afumishemo imipashi iyabipa no kubondapa amalwele, Maria uwitwa umwina Magadala, uo ifibanda cinelubali (7) fyafuminemo,+ 3 na Yoana+ muka Kusa, umubomfi mukalamba uwa kwa Herode, na Susana na banakashi bambi abengi, abalemwafwilisha ukubomfya ifintu fyabo.

4 Nomba ilyo ibumba ilikalamba lyalongene pamo na baishile kuli ena ukufuma mu misumba, abebele icilangililo ati:+ 5 “Katanda aile ku kutanda imbuto shakwe. Awe ilyo aletanda, shimo shaponene mu mbali ya musebo no kunyantaulwa, ne fyuni fya mu muulu fyalishiliile.+ 6 Shimbi na sho shaponene pa mabwe, kabili ilyo shamenene, shalyumine pa mulandu wa kukanakwata umutonshi.+ 7 Shimbi shena shaponene mu myunga, ne myunga yamenene pamo na sho no kushitabilila.+ 8 Shimbi shaponene pa mushili uusuma, kabili ilyo shamenene, shatwele ifisabo umwanda umo (100).”+ Ilyo asosele ifi, aikatishe ishiwi no kusosa ati: “Uuli na matwi ya kuumfwa, naomfwe.”+

9 Awe abasambi bakwe balamwipusha umwalolele ici cilangililo.+ 10 Na o atile: “Imwe balimupeela amano ya kumfwikisha inkama sha fya kwa Lesa pa bufumu bwa kwa Lesa, lelo kuli bambi kuba ukubebela mu filangililo,+ pa kuti ukulolesha baloleshe, lelo bemona iyo, kabili ukuumfwa bomfwe, lelo beiluka iyo.+ 11 Nomba icilangililo+ cilolele umu: Ulubuto cebo ca kwa Lesa.+ 12 Ishaponene mu mbali ya musebo, ni balya abomfwa,+ e lyo nomba Satana Kaseebanya+ aisa no kusenda icebo ca kwa Lesa mu mitima yabo pa kuti besumina no kupusuka.+ 13 Ishaponene pa mabwe ni balya aba kuti, cilya baumfwa icebo, bacitetekela ne nsansa, lelo tabakwate imishila; basumina fye pa nshita inono, lelo pa nshita ya kweshiwa bafutukako.+ 14 Lelo shilya ishaponene mu myunga, ni balya abomfwa, lelo pa mulandu wa kusendwa na masakamika ne fyuma no kwangala+ ifya mikalile ino, balatabililwa konse kabili balafilwa ukutwala ifisabo ifyafikapo.+ 15 Ne shaponene pa mushili uusuma, ni balya aba kuti baliba ne mitima+ iisuma nga nshi, ica kuti nga baumfwa icebo, baciikatisha no kutwala ifisabo ilyo baleshipikisha.+

16 “Takwaba umuntu, uwasha inyali no kukupikapo icipe nelyo ukuibika mwi samba lya busanshi, lelo alaiteka pa ca kutekapo inyali, pa kuti abaleingila bamone ulubuuto.+ 17 Pantu takuli icafisama+ icishakamoneke, nangu icafiswa icishakeshibikwe no kusokoloka.+ 18 E ico mulebikako amano ku fyo mulekutika; pantu onse uwakwata, bakamupeela na fimbi,+ lelo uushakwata, bakamupoka ne co atila alikwata.”+

19 Awe nyina na bamunyina+ balishile, lelo balifililwe ukufika uko ali pa mulandu we bumba lya bantu.+ 20 Kabili bamwebele ati: “Banoko na bamunonko nabeminina pa nse balefwaya ukukumona.”+ 21 Na o abaswike ati: “Bamayo na bamunyinane ni balya abomfwa icebo ca kwa Lesa no kucikonka.”+

22 Bushiku bumo, aninine mu bwato na basambi bakwe, kabili abebele ati: “Natwabukile kwi shilya lya bemba.” Awe balimine.+ 23 Lelo ilyo baleya mu bwato, aponene mu tulo. Awe icimwela calimine pali bemba, na menshi yalaingila mu bwato, kabili ubwato bwalafwaya ukubunda.+ 24 Basukile baya kuli ena, bamushibusha, abati: “Mwe Kasambilisha, mwe Kasambilisha, twalafwa!”+ Ilyo ashibwike, akalipile+ umwela na mabimbi ya menshi, na fyo fyalilekele kabili kwatalele na tondolo. 25 E lyo abepwishe ati: “Cili kwi icitetekelo cenu?” Lelo pa mulandu wa kuti balyumfwile umwenso, balipapile, balaipushanya abati: “Nga kanshi uyu nani, pantu aeba no mwela na menshi, na fyo fyamuumfwila?”+

26 Kabili bafikile ku lulamba ku calo ca bena Gerasa, icalungatana na Galili.+ 27 Lelo ilyo afumine mu bwato aya ku mulundu, umwaume uwali ne fibanda uwafumine mu musumba alimukumenye. Kabili pa nshita ntali talefwala ifya kufwala, kabili taleikala ku ng’anda iyo, lelo aleikala ku nshiishi.+ 28 Ilyo amwene Yesu, apundile no kuwila pa ntanshi yakwe, alebilikisha ishiwi ilikalamba ati: “Bushe tulofwana na iwe,+ Yesu, we Mwana wa kwa Lesa Uwapulamo? Ndekupapaata nati wincusha.”+ 29 (Pantu aebele umupashi wakowela ukufuma mu muntu. Pantu walimwikete pa nshita yalepa,+ kabili imiku iingi balemukakila ku minyololo na ku makusu e lyo no kulamulonda, lelo alefiputaula, ne cibanda calemutwala mu mpanga.) 30 Yesu amwipwishe ati: “Ishina lyobe ni we nani?” Na o atile: “Nine Cinkupiti,” pantu ifibanda ifyaingile muli ena fyali ifingi.+ 31 Kabili fyalamupapaata+ ukuti efyeba ukuya mu muyenge.+ 32 Awe kwali no mukuni wa nkumba+ ishingi ishalelya mu lupili; e co fyamupapaatile ukuti afisuminishe ukwingila mu nkumba.+ Na o alifisuminishe. 33 Ne fibanda fyafumine mu muntu no kwingila mu nkumba, ne nkumba shonse shabutukile ukwasuluka no kuponena muli bemba no kunwena.+ 34 Lelo ilyo bakacema bamwene ifyacitike, balifulumwike no kuyashimika mu musumba na mu mishi ya mu mbali.+

35 Awe abantu balifumine ku kuyamona ifyacitike, baishile na kuli Yesu no kusanga umuntu uo ifibanda fyafuminemo, nafwala ifya kufwala kabili ali umutuntulu, naikala ku makasa ya kwa Yesu; kabili balyumfwile umwenso.+ 36 Abamweneko, babashimikile ifyo baposeshe umuntu uwali ne fibanda.+ 37 E ico cinkupiti onse uwa bantu abafumine mu mishi yali mupepi iya bena Gerasa bamwebele ukuti afume mu calo cabo, pantu balyumfwile umwenso nga nshi.+ Awe aninine mu bwato no kuya. 38 Lelo umuntu uo ifibanda fyafuminemo alemupapaata ukuti abe pamo nankwe; lelo Yesu alimukeenye, no kumweba ati:+ 39 “Bwelela ku ng’anda, uleshimika ifyo Lesa akucitiile.”+ Awe na o aliile, alashimika mu musumba onse ifyo Yesu amucitiile.+

40 Ilyo Yesu abwelele, ibumba lyalimupokelele bwino, pantu bonse balemulolela.+ 41 Lelo, moneni! kwaishile umwaume ishina lyakwe ni Yairo, kabili uyu muntu ali umukalamba we sunagoge. Kabili awile ku makasa ya kwa Yesu, alamupapaata ukuti engile mu ng’anda yakwe,+ 42 pantu ali no mwana mwanakashi umo mpo uwa myaka ikumi na ibili (12) uwali mupepi no kufwa.+

Ilyo aleya, ibumba lyalimushingulwike.+ 43 Kabili umwanakashi uwalefuma umulopa+ pa myaka ikumi na ibili (12), uo bonse bafililwe ukundapa,+ 44 alishile ku numa yakwe no kukumya ku nsenkebele+ sha ku ca kufwala cakwe,+ na po pene umulopa walilekele ukufuma.+ 45 Na Yesu atile: “Nani uwankumya?”+ Ilyo bonse bakeene, Petro atile: “Mwe Kasambilisha, amabumba nayamushinguluka kabili yalemutitikisha.”+ 46 Lelo Yesu atile: “Umuntu umo nankumya, pantu ning’umfwa amaka+ yafuma muli ine.”+ 47 Ilyo umwanakashi amwene ukuti tabeleme, aishile aletutuma no kuwila apali Yesu no kusosa pa menso ya bantu bonse umulandu amukumishe ne fyo apolele apo pene.+ 48 Lelo Yesu amwebele ati: “We mwana, icitetekelo cobe nacikuposha;+ kabiye umutende.”+

49 Ilyo acili alelanda, kwalishile umuntu ukufuma ku ng’anda ya mukalamba we sunagoge kabili atile: “Umwana wenu nafwa; lekeni ukupamfya kasambilisha.”+ 50 Ilyo Yesu aumfwile ifi, amwaswike ati: “Witiina, tetekela fye,+ alepusuka.” 51 Ilyo afikile ku ng’anda, tasuminishe umuntu nangu umo ukwingila nankwe kano fye Petro na Yohane na Yakobo na wishi wa mukashana na nyina.+ 52 Lelo abantu bonse balelila no kumuloosha. Na o e pa kutila: “Lekeni ukulila,+ pantu tafwile iyo lelo aleele fye utulo.”+ 53 Awe balamuseka no kumupumya, pantu baishibe ukuti nafwa.+ 54 Lelo amwikete ku minwe no kubilikisha ati: “We mukashana, buuka!”+ 55 No bumi*+ bwalibwelelemo, kabili aliimine+ apo pene. Na Yesu abebele ukuti bamupeele ifya kulya.+ 56 Awe abafyashi bakwe balipeshiwe amano; lelo abakonkomeshe ukukanaebako umuntu nangu umo ifyacitike.+

9 E lyo aitile capamo abasambi ikumi na babili (12) no kubapeela amaka ya kufumya ifibanda fyonse no kundapa amalwele.+ 2 Kabili abatumine mu kushimikila pa bufumu bwa kwa Lesa no kuposha abalwele, 3 kabili atile kuli bena: “Mwisenda nangu cimo pa lwendo, nangu ni nkonto nangu cola ca fya kulya, nangu mukate nangu ni ndalama sha silfere; nangu kusenda ifya kufwala fya mu kati fibili.+ 4 Kabili konse uko mwaingila mu ng’anda, ikaleni umo mwine, na pa kuya e mo mukafume.+ 5 Na konse uko abantu bashimupokelele, pa kufuma muli ulya musumba,+ kunteni ulukungu ku makasa yenu ku kuba ubunte bwa kubashinina.”+ 6 Awe baile balepita mu mishi, balebila imbila nsuma no kundapa abantu konse.+

7 Awe Herode* kateka wa citungu aumfwile fyonse ifyalecitika, kabili calimupeseshe sana amano pa mulandu wa fyo bamo balelanda ukuti Yohane nabuuka ku bafwa,+ 8 lelo bambi baleti Eliya alimoneka, e lyo bambi na bo baleti umo pali bakasesema ba kale alibuuka ku bafwa. 9 Na o Herode atile: “Yohane nalimuputwile umutwe.+ Nga kanshi nani uulecita ifi ndeumfwa?” E ico alefwaya+ ukumumona.

10 Kabili ilyo abatumwa babwelele, bamushimikile ifyo bacitile.+ E ico abasendele no kuya ku mbali+ mu musumba uo beta ati Betsaida. 11 Lelo amabumba ya bantu ilyo baishibe ifi, balimukonkele. Na o abapokelele bwino, alalanda kuli bena pa bufumu bwa kwa Lesa,+ kabili aposeshe abalekabila ukuundapwa.+ 12 Awe akasuba kaile kalewa. Na be kumi na babili (12) baishile no kumweba ati: “Lekeni ibumba lileya, pa kuti baye mu mishi na mu mitanda ya mupepi no kufwaya umwa kusendama ne fya kulya, pantu pano tuli ni pa mpanga.”+ 13 Lelo abebele ati: “Imwe bene bapeeni ifya kulya.”+ Na bo batile: “Tukwete fye imikate isano ne sabi libili,+ kano ninshi ifwe bene tuyeshitila aba bantu bonse ifya kulya.”+ 14 Na kuba, bali nalimo abaume amakana yasano (5,000).+ Lelo aebele abasambi bakwe ati: “Bekalikeni mu mabumba ya bantu nalimo amakumi yasano (50).”+ 15 Na bo bacitile ifyo fine kabili baikalike bonse. 16 Ilyo abuulile imikate isano ne sabi libili, aloleshe mu muulu, apepa no kufimokaula, apeela abasambi pa kuti na bo bapeele ibumba.+ 17 Awe bonse baliliile no kwikuta, balonganike ne fyo bashilepo mu miseke ikumi na ibili (12).+

18 Nomba ilyo ali eka alepepa, abasambi baishile pamo uko ali, kabili abepwishe ati: “Bushe amabumba yatila nine ani?”+ 19 Na bo bayaswike abati: “Bamo batila ni mwe Yohane Kabatisha; e lyo bambi batila ni mwe Eliya, bambi na bo batila umo pali bakasesema ba kale alibuuka.”+ 20 E lyo abepwishe ati: “Nga imwe mutila nine ani?” Petro ayaswike ati:+ “Ni mwe Kristu+ uwa kwa Lesa.” 21 Kabili abakonkomeshe ukuti be-ebako umuntu nangu umo.+ 22 Kabili atile: “Umwana wa muntu bali no kumucusha nga nshi kabili abakalamba ne ntungulushi sha bashimapepo na bakalemba bali no kumukaana no kumwipaya,+ kabili akabuuka pa bushiku bwalenga shitatu.”+

23 E lyo atile kuli bonse: “Umuntu nga alefwaya ukunkonka, aikaane umwine,+ alesenda icimuti cakwe ica kucushiwilwapo cila bushiku, alenkonka* lyonse.+ 24 Pantu onse uufwaya ukupususha umweo wakwe akaulofya; lelo onse uwalofya umweo wakwe pa mulandu wandi akaupususha.+ 25 Na kuba, busuma nshi umuntu engasangamo nga anonka icalo conse lelo alufya umweo nelyo alufya fyonse ifyo akwata?+ 26 Pantu onse uwaumfwila ine insoni na mashiwi yandi, Umwana wa muntu akamumfwila insoni ilyo akesa no bukata bwakwe no bwa kwa Wishi no bwa bamalaika ba mushilo.+ 27 Lelo ndemweba icine cine, nati, Kuli bamo pa beminine pano abashakafwe nakalya mpaka bakamone ubufumu bwa kwa Lesa.”+

28 Nomba ilyo papitile inshiku nalimo cinekonsekonse (8) ukutula apo alandile aya mashiwi, asendele Petro na Yohane na Yakobo no kunina ulupili ku kupepa.+ 29 Kabili ilyo alepepa, imimonekele+ ya cinso cakwe yalyalwike ne ca kufwala cakwe calibuutile no kubengeshima.+ 30 Kabili moneni! abantu babili balelanda nankwe, bali ni Mose na Eliya.+ 31 Aba balemoneka no bukata, balelanda pa kufumapo kwakwe uko ali no kufikilisha ku Yerusalemu.+ 32 Nomba Petro na bali nankwe baleshipula; kabili ilyo bashibwike, bamwene ubukata+ bwakwe na bantu babili abaiminine nankwe. 33 Kabili ilyo aba balepaatukana nankwe, Petro atile kuli Yesu: “Mwe Kasambilisha, kuti cawama nga twaikala pano pene. E ico natupangepo insakwe shitatu, imo iyenu, imbi iya kwa Mose e lyo na imbi ya kwa Eliya.” Kabili taishibe ifyo alelanda.+ 34 Lelo ilyo alelanda ifi, kwaishile ikumbi no kubafimba. Lintu baingile mwi kumbi, balyumfwile umwenso.+ 35 Ne shiwi+ lyafumine mwi kumbi aliti: “Uyu e Mwana wandi, uo nasala.+ Muumfweni.”+ 36 Kabili ilyo kwaumfwikike ishiwi, Yesu asangilwe ali eka.+ Lelo baikele fye tondolo kabili tabaebeleko umuntu nangu umo mu nshiku shilya ifyo bamwene.+

37 Ubushiku bwakonkelepo, ukutula apo batentemukile ulupili, ibumba ilikalamba lyalimukumenye.+ 38 Kabili moneni! umwaume abilikishe mwi bumba ati: “Mwe Kasambilisha, ndemupapaata ukuti muloleshe pa mwana wandi umwaume, pantu e o nakwata umo fye+ mpo.+ 39 Kabili, moneni! umupashi+ ulamwikata, na po pene alapunda, kabili ulamufulansha, alafumya ne fulo. Kabili pa kuti ufume cilafya mpaka washa wamucenaula. 40 Kabili nacipapaata abasambi benu ukuti baufumyemo, lelo nabafilwa.”+ 41 Na o Yesu ayaswike ati: “Mwe nkulo yabula icitetekelo kabili iyapondama,+ bushe nkaba na imwe ukufika lilali no kushipikisha na imwe? Leta umwana obe kuno.”+ 42 Lelo na lintu fye alepalamina, icibanda camufuntwile pa nshi no kumufulansha nga nshi. Lelo Yesu akalipile umupashi wakowela no kuposha umulumendo no kumupeela kuli wishi.+ 43 Awe bonse balapapa amaka yapulamo+ aya kwa Lesa.

Nomba ilyo bonse bapapile ifintu fyonse ifyo alecita, aebele abasambi bakwe ati: 44 “Imwe umfwikisheni aya mashiwi, pantu Umwana wa muntu bali no kumupeela mu minwe ya bantu.”+ 45 Lelo tabaishibe umo aya mashiwi yalolele. Na kuba, yalifishilwe kuli bena pa kuti beishiba, kabili balitiinine ukumwipusha pali aya mashiwi.+

46 E lyo batendeke ukukansana abene beka ukufwaya ukwishiba uwali no kuba umukalamba pali bena.+ 47 Na o Yesu pa kwishiba ifyo baletontonkanya mu mitima yabo, abuulile umwana umunono, amwimika mupepi na po ali,+ 48 e lyo alabeba ati: “Onse uwapokelela uyu mwana umunono pa mulandu we shina lyandi, ninshi apokelela na ine; na onse uwapokelela ine, ninshi apokelela no wantumine.+ Pantu uwaiceefya+ pali imwe bonse e mukalamba.”+

49 Na o Yohane amwaswike ati: “Mwe Kasambilisha, twamwene umuntu umo alefumisha ifibanda+ mwi shina lyenu kabili twalimuleseshe,+ pantu tatukonka.”+ 50 Lelo Yesu amwebele ati: “Mwimulesha, pantu uushilwisha imwe, ninshi muntu wenu.”+

51 Ilyo inshiku shaile shilepalamina isha kuti asendwe ukuya ku muulu,+ abikile umutima wakwe pa kuya ku Yerusalemu. 52 E ico atumine inkombe sha kumutangilila. Na sho shaileingila mu mushi wa Samaria,+ ku kumupekanishisha; 53 lelo tabamupokelele, pantu abikile umutima wakwe pa kuya ku Yerusalemu.+ 54 Ilyo abasambi Yakobo na Yohane+ bamwene ifi, batile: “Mwe Shikulu, bushe mulefwaya twebe umulilo+ wike ukufuma ku muulu no kuboca?” 55 Lelo alipilibwike no kubakalipila. 56 E ico baile ku mushi umbi.

57 Nomba ilyo baleya mu musebo, umuntu umo amwebele ati: “Ndemukonka konse uko muleya.”+ 58 Na o Yesu amwaswike ati: “Bamumbwe balikwata ifilindi umo bekala ne fyuni fya mu muulu fyalikwata ifisansala, lelo Umwana wa muntu takwata apa kusaisha umutwe.”+ 59 E lyo atile kuli umbi: “Nkonka, ube umusambi wandi.” Na o atile: “Lekeni ntale njeshiika batata.”+ 60 Lelo amwebele ati: “Leka abafwa+ bashiike abafwa babo abene, lelo iwe kabiye ulebila konse konse ubufumu bwa kwa Lesa.”+ 61 Na umbi na o atile: “Nakulamukonka, mwe Shikulu; lelo lekeni ntale njeshalikapo+ aba mu ng’anda yandi.” 62 Yesu amwebele ati: “Takuli uwikata kuli plao+ no kulolesha ku fya ku numa+ uwalinga ukwingila mu bufumu bwa kwa Lesa.”

10 Pa numa ya ifi fintu, Shikulu asalile abasambi na bambi amakumi cinelubali (70)+ no kubatuma babili babili+ ukuti bamutangilile mu misumba yonse na mu ncende shonse umo ali no kuya umwine. 2 Kabili abebele ati: “Cine cine, ukulobolola kukalamba,+ lelo ababomfi+ bena nabacepa. E ico lombeni+ Umwine wa kulobolola ukuti atume ababomfi+ mu kulobolola kwakwe. 3 Kabiyeni. Moneni! Ndemutuma nga bana ba mpaanga+ mu kati ka mimbulu. 4 Mwisenda icikwama, nangu icola ca fya kulya,+ nangu ni ndyato, kabili mwiposha+ umuntu nangu umo mu nshila. 5 Mu ng’anda yonse umo mwaingila, mubale musose amuti, ‘Umutende ube muli ino ng’anda.’+ 6 Kabili ngo muntu uulefwaya umutende e mo ali, umutende wenu ukaba pali ena.+ Lelo nga talimo, ukabwelela kuli imwe.+ 7 E ico ikaleni muli iyo ng’anda,+ mulelya no kunwa ifyo bamupekanishisha,+ pantu umubomfi alilinga ukumupeela amalipilo yakwe.+ Mwilakuukakuuka mu mayanda.+

8 “Kabili mu musumba onse umo mwaingila kabili bamupokelela, lyeni ifyo bamupekanishisha, 9 posheni+ abalwele abalimo, kabili mulebeba amuti, ‘Ubufumu+ bwa kwa Lesa nabupalama kuli imwe.’ 10 Nomba mu musumba onse umo mwaingila nga tabamupokelele,+ kabiyeni mu misebo ya uko iikalamba no kusosa amuti, 11 ‘No lukungu lwine ulwa mu musumba wenu ulukambatile ku makasa yesu, twamukuntila.+ Lelo muleibukisha ukuti, ubufumu bwa kwa Lesa nabupalama.’ 12 Ndemweba, nati, muli bulya bushiku cikaba eyefilya kuli Sodomu+ ukucila kuli ulya musumba.

13 “We bulanda kuli iwe, we Korasini!+ We bulanda kuli iwe, we Betsaida!+ pantu ifipesha amano ifyacitwa muli imwe aficitwa mu Turi na Sidone, nga ni kale balapiile no kwikala mu nsamu* na mu mito.+ 14 E ico mu bupingushi cikaba eyefilya kuli Turi na Sidone ukucila kuli imwe.+ 15 Na iwe, we Kapernahumu, bushe ukasansabikwa ukufika na ku muulu?+ Ukatentemukila ku Nshiishi!*+

16 “Uwaumfwa+ kuli imwe, ninshi aumfwa na kuli ine. No wasuula imwe, ninshi asuula na ine. Kabili uwasuula ine, ninshi asuula+ no wantumine.”

17 E lyo abasambi bakwe amakumi cinelubali (70) babwelele bali ne nsansa, abati: “Mwe Shikulu, ne fibanda na fyo filetunakila+ ilyo twalumbula ishina lyenu.” 18 Na o abebele ati: “Namwene Satana alepona+ nga filya fipona inkuba mu muulu. 19 Moneni! namupeela amaka ya kunyanta pa nsoka+ na pali bakaling’ongo,+ na maka ya kucimfya umulwani,+ kabili takuli icikamucita akabi. 20 Kabili mwisekelela pali ici, ukuti imipashi ilemunakila, lelo sekeleleni pa kuti amashina+ yenu nayalembwa mu muulu.” 21 Muli ilya ine nshita alisekelele+ nga nshi mu mupashi wa mushilo no kusosa ati: “Ndemulumbanya pa cintubwingi, mwe Tata, Shikulu wa muulu ne sonde, pantu mwalifishilisha ifi fintu ku ba mano+ na bacenjela, no kufisokolwela ku tunya. Cine cine, mwe Tata, pantu ici e co imwe mwatemenwe ukucita. 22 Tata alimpeela fyonse,+ kabili takuli uwaishiba Umwana ifyo aba kano Wishi,+ kabili takuli uwaishiba Wishi ifyo aba kano Umwana,+ na untu Umwana afwaya ukusokolwela.”

23 E lyo apilibukile ku basambi beka no kutila: “Yalishuka amenso ayamona ifyo mulemona.+ 24 Pantu ndemweba, nati, Bakasesema abengi ne shamfumu balefwaisha ukumona+ ifintu ifyo mulemona lelo tabafimwene, no kumfwa ifyo muleumfwa lelo tabafyumfwile.”

25 Kabili, moneni! umwaume umo uwaishibisha Amafunde+ alimine, ku kumwesha, ati: “Mwe Kasambilisha, cinshi ningacita pa kuti nkakwate ubumi bwa muyayaya?”+ 26 Na o amwipwishe ati: “Mu Mafunde mwalembwa cinshi?+ Ubelengamo shani?” 27 Na o amwaswike ati: “Uletemwa Yehova Lesa obe no mutima obe onse, no mweo obe onse, na maka yobe yonse, no kutontonkanya kobe konse,’+ kabili ‘uletemwa umunobe nge fyo waitemwa we mwine.’”+ 28 E lyo amwebele ati: “Wayasuka bwino; ‘ulecita ifyo fine kabili ukaba no bumi.’”+

29 Lelo pa kufwaya ukuilungamika, ulya mwaume aebele Yesu ati: “Nga kanshi umunandi nani?”+ 30 Na o Yesu amwaswike ati: “Umuntu umo alefuma ku Yerusalemu aleya ku Yeriko, kabili ifipondo fyalimusanshile, fyamufuulile ifya kufwala no kumupumaula, no kuya, fyamusha impondo. 31 Awe cali nkuma, shimapepo umo alepita mu musebo ulya, lelo ilyo amumwene, apitile ku mbali.+ 32 No mwina Lebi na o wine, ilyo afikile palya no kumumona, apitile ku mbali.+ 33 Lelo umwina Samaria+ umo uwalepita mu musebo ulya afikile apali uyu muntu uo bapumine, kabili ilyo amumwene, amumfwilile uluse. 34 Awe aile apo ali no kukakila ifilonda fyakwe, aitilepo na mafuta no mwangashi.+ Kabili amuninike pa citekwa cakwe cine no kumutwala ku ng’anda ya beni no kumutensha. 35 Kabili ubushiku bwakonkelepo, abuulile badenari babili, apeele no mwine wa ng’anda ya beni, no kutila, ‘Ulemutensha, na shonse isho ukapoosa ukucila pali ishi, nkakubwesesha ilyo nkabwela.’ 36 Bushe iwe uleti nani pali aba batatu uwali umunankwe+ wa wawile mu fipondo?” 37 Atile: “Uwamumfwilile uluse.”+ E lyo Yesu amwebele ati: “Kabiye, ulecita+ ifyo fine na iwe.”

38 Nomba ilyo baleya mu nshila, aingile mu mushi umo. Kabili umwanakashi umo ishina lyakwe Marita+ amupokelele mu mwakwe. 39 Uyu mwanakashi ali ne nkashi nankwe uo beta ati Maria, lelo ena aikele ku makasa+ ya kwa Shikulu kabili alekutika ku mashiwi yakwe. 40 Lelo Marita, alepitana+ fye alebomba imilimo iingi. E ico alishile mupepi no kusosa ati: “Mwe Shikulu, bushe tamusakamene ukuti nkashi nandi andekela ndebomba neka?+ E ico, mwebeni anjafweko.” 41 Na o Shikulu ayaswike ati: “Marita, Marita, nausakamikwa+ no kupamfiwa ku fintu ifingi.+ 42 Lelo finono+ fye e filekabilwa, nelyo cimo fye. Maria ena nasala icintu icisuma,+ kabili tapali uukamupokolola.”

11 Nomba ubushiku bumo ali ku ncende imo alepepa, kabili ilyo alekele, umusambi wakwe umo amwebele ati: “Mwe Shikulu, tusambilisheni ifya kupepa,+ nge fyo na Yohane asambilishe abasambi bakwe.”+

2 E lyo abebele ati: “Lyonse ilyo mulepepa,+ muletila, ‘Mwe Shifwe, ishina lyenu libe ilya mushilo.+ Ubufumu bwenu bwise.+ 3 Tupeeni ifya kulya+ buno bushiku ukulingana ne fyo tulekabila. 4 Kabili tweleleni imembu shesu,+ pantu na ifwe tulelela bonse abatulufyanya;*+ kabili mwitutwala mu kutunkwa.’”+

5 Kabili abebele ati: “Nani pali imwe uwakwata umunankwe kabili uo engayako ubushiku pa kati no kumweba ati, ‘Mune, njashimako imikate itatu, 6 pantu umunandi uuli pa lwendo naisa kabili nshikwete ifya kulya ifya kumupeela’? 7 No uli mu ng’anda ayasuka ati, ‘Wilampamfya.+ Ninkoma ku ciibi, kabili ine na bana bandi natulaala; te kuti njime nkupeele.’ 8 Ndemweba nati, Nangu taciba no kwima no kumupeela pa mulandu wa kuti munankwe, kuti aima no kumupeela ifyo alefwaya pa mulandu fye wa mupampamina+ wakwe. 9 E ico ndemweba nati, Mulelomba,+ kabili bakamupeela; mulefwaya,+ kabili mukasanga; mulekonkonsha, kabili bakamwiswila. 10 Pantu onse uulomba alapokelela,+ na onse uufwaya alasanga, na onse uukonkonsha balamwiswila. 11 Kabili mufyashi nshi pali imwe, uo umwana+ wakwe nga alomba isabi, engamupeela insoka ukucila ukumupeela isabi? 12 Nelyo nga alomba ilini, nani engamupeela kaling’ongo? 13 E ico imwe nga mwalishiba ukupeela abana+ benu ifya bupe ifisuma nangu ca kutila muli babifi, ninshi Shinwe wa mu muulu ena akacishapo ukupeela umupashi wa mushilo+ ku bamulomba!”

14 Ilyo papitile inshita, alefumya icibanda icalengele umuntu ukuba cibulu.+ Ilyo icibanda cafumine, umwaume uwali cibulu atendeke ukulanda. Na mabumba yalipapile. 15 Lelo bamo batile: “Afumisha ifibanda ku maka ya kwa Beelsebuli* kateka wa fibanda.”+ 16 Na bambi pa kumwesha, balefwaya ukuti acite icishibilo+ icafuma ku muulu. 17 Na o apo alishibe amatontonkanyo+ yabo, abebele ati: “Ubufumu bonse ubuleilwisha ubwine bulonaika, ne ng’anda iyapaatukana iine, ilawa.+ 18 E ico na Satana nga ailwisha umwine, ubufumu bwakwe bukeminina shani?+ Pantu mutila mfumisha ifibanda ku maka ya kwa Beelsebuli.* 19 Nga mfumisha ifibanda ku maka ya kwa Beelsebuli,* ninshi ni ku maka ya kwa nani abasambi+ benu bafifumisha? E mulandu wine bakabela bakapingula benu. 20 Lelo nga ni ku munwe*+ wa kwa Lesa e ko mfumisha ifibanda, ubufumu bwa kwa Lesa ninshi nabwisa pali imwe.+ 21 Uwa maka,+ uwaipangasha bwino ne fyanso, nga alelonda isano lyakwe, ninshi tapali ifingacitika ku fyuma fyakwe. 22 Lelo uwamucila amaka+ nga aisa kuli ena no kumucimfya,+ alapoka ne fyanso fyakwe ifyo acetekela, no kwakanya bambi fyonse ifyo amupokolola. 23 Uushaba kuli ine, ninshi alandwisha, kabili uushilonganya na ine, ninshi alasalanganya.+

24 “Lintu umupashi wakowela wafuma mu muntu, upita umwauma ilyo ulefwaya apa kutuushisha. Kabili ilyo wafilwa ukupasanga, utila, ‘Ndebwelela ku ng’anda yandi uko nafumine.’+ 25 Kabili ilyo wafika, wasanga namupyangwa ubusaka no kuyemfiwa. 26 E lyo waya no kuyasenda imipashi imbi cinelubali (7)+ iyabipa uku-ucila; kabili ilyo yaingila muli uyo muntu, ilekala mulya mwine; ne mibele ya uyo muntu nomba ilabipa ukucila ne ya pa kubala.”+

27 Nomba ilyo alelanda ifi fintu, umwanakashi umo mwi bumba asanswile ishiwi lyakwe no kumweba ati: “Lyalipaalwa ifumo+ ilyakusendele na mabele ayo waonkeleko!” 28 Lelo atile: “Awe, Abapaalwa ni abo abomfwa no kukonka icebo ca kwa Lesa!”+

29 Awe ilyo amabumba yalelongana pamo, atendeke ukusosa ati: “Inkulo ino ni nkulo iyabipa; yena ifwaya icishibilo.+ Lelo tayakapeelwe icishibilo cimbi kano icishibilo ca kwa Yona.+ 30 Pantu filya fine Yona+ aishileba icishibilo ku bena Ninebe, e fyo no Mwana wa muntu na o akaba ku nkulo ino. 31 Namfumu+ wa ku kapinda ka ku kulyo akabuuka mu bupingushi pamo na bantu ba ino nkulo kabili akabashinina; pantu afumine ku mpela sha pano isonde ukwisaumfwa amano ya kwa Solomone, lelo moneni! uwacila+ Solomone ali pano. 32 Abena Ninebe bakabuuka mu bupingushi pamo ne nkulo iyi no kuishinina; pantu balilapiile pa fyo Yona ashimikile;+ lelo moneni! uwacila+ Yona ali pano. 33 Ilyo umuntu asanika inyali, taibika umwafisama nangu kuikupikila mu museke, lelo aiteka pa ca kutekapo inyali,+ pa kuti abaleingila bamone ulubuuto. 34 Ulubuuto lwa mubili obe menso. Amenso yobe nga yalolesha fye pa cintu cimo, umubili obe onse ulaba mu lubuuto;+ lelo amenso nga yalolesha pa fibi, umubili obe na o ulaba umwafiita. 35 E ico cenjela ukuti ulubuuto ulwaba muli iwe lwiba imfifi.+ 36 E ico, umubili obe onse nga waba umwabuuta, uwabula imfifi nangu pamo, onse ukaba umwabuuta+ nga filya ciba ilyo inyali yasanika ulubuuto.”

37 Ilyo alandile fi, umuFarise alimwitile pa kuti ayelya nankwe ifya kulya.+ Na o aingile mu ng’anda no kwikala, balalya. 38 Lelo umuFarise alipapile pa kumona ukuti tasambile*+ pa kulya ifya kulya. 39 Lelo Shikulu amwebele ati: “Imwe mwe baFarise, musamfya ku nse ya kapu ne mbale, lelo mu mitima+ yenu mufwaya ukupokolola abantu ifintu no kucita ifyabipa.+ 40 Mwe bawelewele mwe! Bushe uwapangile ku nse+ tapangile na mu kati?41 Lelo peeleni ifya bupe+ ifyaba mu mutima, kabili moneni! ifi fyonse fimbi fyalisanguluka kuli imwe. 42 Lelo we bulanda kuli imwe mwe baFarise, pantu mupeela ica pe kumi+ ica minte na anise* no musalu umbi onse, lelo mwasuula umulinganya no kutemwa Lesa. Ifi fintu mufwile ukuficita, lelo te kusuula filya fimbi.+ 43 We bulanda kuli imwe mwe baFarise, pantu mwatemwa ifipuna fya ku ntanshi mu masunagoge* no kuti abantu balemuposha pa maliketi!+ 44 We bulanda kuli imwe, pantu mwaba nga shilya inshiishi ishishimoneka, ica kuti abantu balendanapo ukwabula ukwishiba!”+

45 Umo pa baishibisha+ Amafunde amwaswike ati: “Mwe Kasambilisha pa kusosa ifi fintu mulesaalwila kumo na ifwe.” 46 Na o atile: “We bulanda na kuli imwe mwe baishibisha Amafunde, pantu mutwika abantu ifisendo ifyayafya ukusenda, lelo imwe mwe bene tamukumyako ku fisendo nelyo munwe wenu umo!+

47 “We bulanda kuli imwe, pantu mukuula inshiishi sha bakasesema, lelo ifikolwe fyenu e fyabepeye!+ 48 Cine cine, mwalishiba ifyo ifikolwe fyenu fyacitile, na lyo line mulabasuminisha,+ pantu e baipeye+ bakasesema lelo imwe mulebakuulila inshiishi. 49 E mulandu wine Lesa mu mano+ yakwe asoseele ati, ‘Nkabatumina bakasesema na batumwa, kabili bakepayapo bamo no kucusha bambi, 50 pa kuti aba nkulo ino bakabalubulwishe+ pa mulopa wa bakasesema+ bonse uwasuuma ukutula pa kutendeka kwa calo, 51 ukufuma ku mulopa wa kwa Abele+ ukufika ku mulopa wa kwa Sekaria,+ uo baipaile pa kati ka ciipailo ne ng’anda ya kwa Lesa.’+ Ndemweba icine cine nati, bakalubulwisha ino nkulo pali uyu mulopa onse.

52 “We bulanda kuli imwe mwe baishibisha Amafunde, pantu mwalipoka amakii aya kwishiba;+ mwe bene tamwaingilemo,* na balefwaya ukwingilamo mwalibaleseshe!”+

53 Awe ilyo afumine kulya, bakalemba na baFarise balimwimine no kumwipusha pa fintu na fimbi, 54 no kumuteya+ fye pa kuti bamwikate+ mu fyo alelanda.

12 Pali ilya nshita, ilyo abantu balongene amakana ayengi ica kuti balanyantana, abalilepo ukusosa ku basambi bakwe ati: “Cenjeleni ku citutumushi+ ca baFarise, e mu kuti ubumbimunda bwabo.+ 2 Lelo takuli icafiswa icishakasokoloke, nangu ica mu bumfisolo icishakeshibikwe.+ 3 E ico, ifyo musosela mu mfifi, fikomfwika mu lubuuto, ne fyo mutepelesha mu miputule yenu bakafishimika pa mitenge.+ 4 Kabili ndemweba, mwe banandi,+ nati, Mwilatiina abepaya umubili kabili pa numa ya ico abashingacita nangu cimo.+ 5 Lelo ndemulanga uwa kutiina: Muletiina+ uyo uwa kuti nga aipaya, alikwata na maka ya kupoosa mu Gehena.*+ Awe, ndemweba, nati, E o muletiina.+ 6 Bushe inseba shisano tabashita mu tundalama tubili utunono sana? Na lyo line Lesa talabapo nangu lumo.+ 7 Lelo ne mishishi+ ya ku mitwe yenu yalipendwa yonse. Mwilatiina; mwalicindama ukucila inseba ishingi.+

8 “E ico, ndemweba nati, Onse uunsumina+ pa menso ya bantu, no Mwana wa muntu akamusumina pa menso ya bamalaika ba kwa Lesa.+ 9 Lelo uwankaana+ pa menso ya bantu nkamukaana pa menso ya bamalaika ba kwa Lesa.+ 10 Na onse uwasosa amashiwi ayabipa pa Mwana wa muntu, bakamwelela; lelo uwapontela umupashi wa mushilo tabakamwelele.+ 11 Lelo ilyo bakamutwala mu kulubulula pa cintubwingi na kuli bashamfumu na ku ba mu buteko, mwikasakamikwa ifyo mukalanda pa kuti muipokolole nangu ico mukasosa;+ 12 pantu umupashi wa mushilo+ ukamusambilisha mu nshita ilya ine ico mufwile ukusosa.”+

13 E lyo umo mwi bumba atile kuli ena: “Mwe Kasambilisha, ebeni munyinane ukuti anjakanyeko ifyuma fya bupyani.” 14 Na o atile kuli ena: “We muntu we, nga nani wansonta ukuba kapingula+ nelyo uwa kwakanya ifintu fyenu?” 15 E lyo abebele ati: “Cenjeleni no kutaluka ku musango onse uwa lunkumbwa,+ pantu umuntu nangu akwate shani ifingi, ubumi bwakwe tabwaba mu fintu akwata.”+ 16 E ico, abebele icilangililo ati: “Ibala lya mukankaala umo lyalitwalishe. 17 Awe alatontonkanya mu mutima ati, ‘Ndecita shani, apo nomba nshikwete umwa kututila ifisabo fyandi?’ 18 E pa kusosa ati, ‘Nkacita ifi:+ Nkakuululula amatala yandi no kukuula ayakulileko, kabili e mo nkabika ingano shandi shonse ne fintu fyandi fyonse ifisuma;+ 19 e lyo nkayeba+ nati: “We mweo wandi, naukwata ifintu ifisuma ifingi ifya kulya pa myaka iingi ileisa; nomba uletuusha fye no kulya no kunwa no kuipakisha.”’+ 20 Lelo Lesa atile kuli ena, ‘We ciwelewele we, lelo ubushiku balakwipaya.+ Nga kanshi ifyo wabika fikaba fya kwa nani?’+ 21 E fyo caba ku muntu uibikila ifyuma lelo uushaba uwacindama kuli Lesa.”+

22 E lyo aebele abasambi bakwe ati: “E ico ndemweba, nati, Mwilasakamikwa pa bumi bwenu ifyo mukalya nangu mibili yenu ifyo mukafwala.+ 23 Pantu umweo walicindama ukucila ifya kulya no mubili walicindama ukucila ifya kufwala. 24 Lolekesheni bamwankole,+ tabatanda imbuto nangu kuseepa, kabili tabakwata umwa kusungila ifya kulya nangu butala, lelo Lesa alabaliisha. Bushe imwe tamwacindama ukucila ifyuni?+ 25 Nani pali imwe uwingalundako ubumi bwakwe panono pa mulandu fye wa kusakamikwa?+ 26 E ico, nga mwafilwa ukucita ici icacepesha, nga cinshi musakamikilwa+ pali fimbi ifyashala? 27 Lolekesheni ifyo amaluba yakula;+ tayacucutika nangu kupikula insalu sha kufwala; lelo ndemweba, nati, Nangu fye ni Solomone mu bucindami bwakwe bonse tafwelepo nge luba limo pali aya.+ 28 Nomba ifi nga e fyo Lesa afwika ifimenwa fya mu mpanga ifibapo lelo na mailo bafipoosa mu mulilo, bushe takacilepo ukufwika imwe, mwe ba citetekelo cinono?+ 29 E ico, mwilasakamikwa ifyo mukalya ne fyo mukanwa. Mwilasakamikwa iyo;+ 30 pantu fyonse ifi e fyo inko sha muli ici calo shifwaisha, lelo Shinwe alishiba ukuti mulakabila ifi fintu.+ 31 Lelo, mulefwaya ubufumu bwakwe, na fyonse ifi akamupeela.+

32 “Mwilatiina,+ mwe mukuni unono,+ pantu Shinwe afwaya ukumupeela ubufumu.+ 33 Shitisheni+ ifyo mwakwata no kupeela abapiina.+ Ipangileni ifikwama ifishingonaika, icuma icishingapwa ica mu muulu,+ uko umupuupu tapalama nelyo icipelebesha ca bushiku taconaula. 34 Pantu ukuli icuma cenu, e kuba ne mitima yenu.+

35 “Ipekanyeni,*+ lekeni na malampi+ yenu yaleaka, 36 kabili mube nga bantu abalelolela shikulwibo+ ilyo abwela ku bwinga,+ pa kuti ilyo afika no kukonkonsha,+ kuti bamwiswila apo pene. 37 Balishuka balya abasha abo shikulwibo pa kwisa asanga balelola!+ Ndemweba icine cine, nati, Akaipekanya*+ no kuleka bekale pe tebulo no kubapekanishisha ifya kulya.+ 38 Kabili nga aisa mu bulinde* bwa bubili, nangu mu bwa butatu, no kubasanga balelola, balipaalwa balya basha!+ 39 Lelo ishibeni ukuti umwine wa ng’anda eshiba inshita umupuupu aleisa, nga ali uwalola kabili nga talekele ing’anda yakwe ukwingililwa.+ 40 Na imwe mube abaiteyanya, pantu pa nshita mushile-enekela, e po Umwana wa muntu akeshila.”+

41 E lyo Petro atile: “Mwe Shikulu, bushe ni kuli ifwe mulelanda ici cilangililo nelyo ni kuli bonse?” 42 Na o Shikulu atile: “Nga kanshi nani kangalila wa cishinka,+ uwashilimuka,+ uo shikulu wakwe akalaashika pa babomfi bakwe ukuti alebapeela ifya kulya pa nshita yalinga?+ 43 Alipaalwa ulya musha, nga shikulu wakwe pa kwisa amusanga alecita ifyo!+ 44 Ndemweba icine cine nati, akamulaashika pa fyuma fyakwe fyonse.+ 45 Lelo umusha ulya nga mu mutima wakwe atila, ‘Shikulu akokola ukwisa,’+ kabili alapuma ababomfi abaume na babomfi abanakashi, alalya no kunwa no kukolwa,+ 46 shikulu wa musha ulya akesa pa bushiku ubo ashilemwenekela ne nshita iyo ashishibe,+ kabili akamukanda icabipisha no kumubika pamo na bashaba na cishinka.+ 47 Kabili umusha ulya uwaishibe bwino ico shikulu wakwe alefwaya lelo uushaipekenye nelyo ukucita ukulingana ne co alefwaya, akalopaulwa ifikoti ifingi.+ 48 Lelo uushaishibe bwino,+ kabili uwacitile ifintu ifyo balingile ukumuminapo ifikoti, bakamuma fye ifikoti ifinono.+ E ico umuntu uo bapeele ifingi, bakafwaya ifingi+ kuli ena no muntu uo abantu balaashike pa fingi, bakafwaya ifingi nga nshi kuli ena.+

49 “Naishile ku kusonteka umulilo+ pano isonde, cinshi cimbi ningafwaya nga walisontekwa kale? 50 Cine cine, kuli ulubatisho ulo mfwile ukubatishiwa, kabili ninsakamikwa ndefwaisha ukuti lupite bwangu!+ 51 Bushe mutila naishile ku kuleta umutende pano isonde? Ndemweba nati, Nshaishile ku kuleta umutende iyo, kano ukupaatukanya.+ 52 Pantu ukufuma pali nomba kukaba basano abakapaatukana mu ng’anda imo, batatu bakapusana na babili, na babili bakapusana na batatu.+ 53 Wishi akapusana no mwana umwaume, kabili umwana umwaume akapusana na wishi, nyina akapusana no mwana umwanakashi, no mwana umwanakashi akapusana na nyina, nyinafyala akapusana na nafyala, na nafyala akapusana na nyinafyala.”+

54 E lyo aebele na mabumba ati: “llyo mwamona ikumbi lileima ku masamba, apo pene mutila, ‘Imfula yalaisa,’ kabili e fyo ciba.+ 55 Kabili ilyo mwamona umwela wa ku kapinda ka ku kulyo ulepuupa, Mutila, ‘Kwalakaba,’ kabili e fyo ciba. 56 Mwe ba bumbimunda mwe, mwalishiba ukubebeta imimonekele ye sonde no muulu ku kwishiba ifyo imiceele yalaba, lelo cinshi mushaishibila ifya kubebeta inshita ino?+ 57 Cinshi ico mushipingwila mwe bene icalungama?+ 58 Pantu ilyo uleya ku ntungulushi pamo no ulekupeela umulandu, umfwana nankwe ilyo mucili mu nshila, pa kuti mupwishe umulandu nankwe, epali akutwala kuli kapingula, na kapingula akutwala kuli kapaso, na kapaso akupoosa mu cifungo.+ 59 Ndekweba nati, Tawakafumemo nakalya mpaka ukalipile na kandalama akanono akalekeleshako.”+

13 Pa nshita ilya ine pali bamo abamwebele pa bena Galili+ abo Pilato asakenye umulopa wabo na malambo yabo. 2 Na o abaswike ati: “Bushe muletila balya abena Galili bali ababembu+ nga nshi ukucila abena Galili bambi bonse, e mulandu ici cabacitikile? 3 Awe iyo; lelo ndemweba nati na imwe nga tamulapile, mukonaulwa bonse filya fine.+ 4 Nelyo balya abantu ikumi na cinekonsekonse (18) abo ulupungu lwawililepo mu Siloamu, no kubepaya, bushe muletila bali ababi* nga nshi ukucila abantu bonse bambi abaikala mu Yerusalemu? 5 Awe iyo; lelo ndemweba nati, na imwe nga tamulapile, mukonaulwa bonse filya fine.”+

6 E lyo abebele ici icilangililo ati: “Umuntu umo ali ne cimuti ica makunyu icalimbilwe mwi bala lyakwe ilya myangashi,+ kabili aile mu kufwayako ifisabo,+ lelo tasangileko nangu cimo.+ 7 Awe aebele uwalebomba mwi bala lyakwe ilya myangashi ati, ‘Mona, imyaka yaba nomba itatu+ iyo njisa ku kufwaya amakunyu kuli ici cimuti, lelo nshisangako nangu cimo. Citeme!+ Nga cinshi cileonawila fye umushili?’ 8 Na o pa kumwasuka atile, ‘Mwe Shikulu, mucileke+ na uno mwaka, pa kuti ndimemo no kubikamo umufundo; 9 kabili nga catwala ifisabo ku ntanshi, awe cikawama; lelo nga tacitwele, mukaciteme.’”+

10 Nomba alesambilisha mwi sunagoge* limo pe sabata. 11 Kabili moneni! kwali umwanakashi uwali no mupashi+ uwakowela uwamulwalike pa myaka ikumi na cinekonsekonse (18), kabili ali uwakongama, alefilwa no kololoka. 12 Ilyo amumwene, Yesu alimwitile, no kumweba ati: “We mwanakashi, wapola+ ku bulwele bobe.” 13 Abikile ne minwe yakwe pali ena; na o ilyo line fye alyololweke,+ alacindika Lesa. 14 Lelo umukalamba we sunagoge, alikalipe pa mulandu wa kuti Yesu aundepe pe sabata, kabili atendeke ukweba ibumba ati: “Kwaba inshiku mutanda (6) isha kubombamo imilimo;+ e ico muleisa mu kundapwa muli ishi inshiku, te pa bushiku bwe sabata iyo.”+ 15 Lelo Shikulu amwaswike ati: “Mwe ba bumbimunda mwe,+ bushe nani pali imwe uushikakula ing’ombe yakwe nelyo impunda yakwe mwi tanga pa bushiku bwe sabata no kuitwala ku kunwa amenshi?+ 16 Bushe kanshi tacilingile ukuti mposhe uyu mwanakashi, umwana wa kwa Abrahamu,+ pa bushiku bwe sabata, uo Satana akakile kuli ubu bulwele, pa myaka ikumi na cinekonsekonse (18)?” 17 Awe ilyo asosele fyonse ifi, bonse abalemukaanya baiketwe insoni;+ lelo ibumba lyonse lyalasekelela pa fya lulumbi ifyo alecita.+

18 E ico atile: “Ubufumu bwa kwa Lesa bwapala cinshi, kabili ndebupashanya kuli cinshi?+ 19 Bwaba nga uluseke lwa lubanga ulo umuntu abuulile no kubyala mwi bala lyakwe, kabili lwalikulile no kuba icimuti, ne fyuni fya mu muulu+ fyalaikala mu misambo ya ciko.”+

20 Na kabili atile: “Ndepashanya ubufumu bwa kwa Lesa kuli cinshi? 21 Bwaba kwati citutumushi,* ico umwanakashi abuulile no kukashila mu magaloni yatatu aya buunga mpaka umufuba onse watutumuka.”+

22 Kabili aendawike ku musumba no musumba na ku mushi no mushi, alesambilisha, kabili akonkenyepo ubulendo ukuya ku Yerusalemu.+ 23 Awe umuntu umo amwipwishe ati: “Mwe Shikulu, bushe abakapusuka banono?”+ Na o atile kuli bena: 24 “Bombesheni+ na maka pa kwingila pa mwinshi wa kamfyemfye,+ pantu ndemweba nati, abengi bakafwaya ukwingila lelo bakafilwa,+ 25 ilyo fye umwine wa ng’anda aima no kukomako ku ciibi, kabili mwaiminina pa nse no kulakonkonsha ku ciibi, amuti, ‘Mukwai, twiswileniko.’+ Na o akamwasuka ati, ‘Nshishibe uko mufumine.’+ 26 E lyo mukatendeka ukusosa amuti, ‘Twalelya no kunwa na imwe, kabili mwalesambilisha mu misebo yesu iikalamba.’+ 27 Lelo akasosa kuli imwe ati, ‘Nshishibe uko mufumine. Fumeni apa, bonse imwe mwe bacita ifyabipa!’+ 28 Uko e kukaba ukulila no kusumanya ameno,+ ilyo mukamona Abrahamu na Isaki na Yakobo na bakasesema bonse mu bufumu bwa kwa Lesa,+ lelo imwe ninshi namupooswa ku nse. 29 Kabili abantu bakafuma ku kabanga na ku masamba, na ku kapinda ka ku kuso na ku kapinda ka ku kulyo,+ bakekala no kulya pe tebulo mu bufumu bwa kwa Lesa.+ 30 Kabili moneni, bamo aba kulekelesha bakaba aba ntanshi, kabili bamo aba ntanshi bakaba aba kulekelesha.”+

31 Mu nshita ilya ine abaFarise bamo balishile no kumweba abati: “Fuma kuno kabiye, pantu Herode* alefwaya ukukwipaya.” 32 Na o abebele ati: “Kebeni ulya muntu uwacenjela nga mumbwe,*+ amuti, ‘Mona! lelo na mailo ndefumya ifibanda no kuposha, kabili pa bushiku bwalenga shitatu e po nkapwisha umulimo wandi.’+ 33 Kabili ndekonkanyapo ubulendo lelo na mailo no bushiku ubukakonkapo, pantu kasesema tafwile ukwipaiwa ku nse ya Yerusalemu.+ 34 We Yerusalemu, We Yerusalemu, we wipaya+ bakasesema kabili we upoola amabwe+ abatumwa kuli iwe,—ifyo imiku iingi nafwaile ukulonganika abana bobe filya nankoko alonganika utwana twakwe mu mapindo yakwe,+ lelo imwe mwalikeene!+ 35 Moneni! Ing’anda+ yenu yashala icibolya. Ndemweba nati, Tamwakamone ine nakalya mpaka mukatile, ‘Alipaalwa uuleishila mwi shina lya kwa Yehova!’”+

14 Kabili inshita imo ilyo aile ku ng’anda ya ntungulushi imo iya baFarise pe sabata ku kulya ifya kulya,+ balemulolekesha.+ 2 Kabili, moneni! kwali umuntu umo pa ntanshi yakwe uwali no lusuku.* 3 E ico Yesu aipwishe abaishibisha Amafunde na baFarise ati: “Bushe calisuminishiwa ukundapa pe sabata nelyo iyo?”+ 4 Lelo baikele fye tondolo. E ico aikete ulya muntu, amuposha no kumuleka aye. 5 Kabili abepwishe ati: “Nani pali imwe uushingafumya umwana wakwe nga awila mu cishima+ nangu ing’ombe yakwe nga yawilamo pa bushiku bwe sabata?”+ 6 Awe balifililwe ukumwasuka pali ifi fintu.+

7 Ilyo amwene ifyo abantu balesala apa kwikala apacindama, alandile icilangililo ku baitilwe, ati:+ 8 “Ilyo umuntu akwita ku mutebeto wa bwinga, wilaikala apacindama.+ Epali umuntu uwacindama ukukucila na o nabamwita, 9 no ukwitile aisa nankwe no kukweba ati, ‘Fumapo, uyu ekalepo.’ E lyo waimapo uli ne nsoni wayaikala apashacindama.+ 10 Lelo ilyo bakwita, ikala apashacindama,+ pa kuti ilyo uukwitile aisa, kuti akweba ati, ‘Mune, kekala palya apacindama.’ Kabili ukacindikwa pa menso ya bonse abetilwe pamo nobe.+ 11 Pantu onse uwaicindamika bakamuceefya, na onse uuiceefya bakamucindamika.”+

12 E lyo nomba atile ku muntu uwamwitile: “Ilyo wapekanya ifya kulya akasuba nelyo umulaalilo, wilaita ifibusa fyobe nangu bamunonko nangu balupwa nangu abena mupalamano abakankaala. Epali inshita imbi na bo bakwita, kabili ico kuti caba e cilambu cobe. 13 Lelo ilyo wapekanya umutebeto, ita abapiina, abalemana, na balemana amolu, e lyo ne mpofu;+ 14 e lyo ukaba ne nsansa, pantu tabakwete ica ku kulambula nangu cimo. Pantu ukalambulwa mu kubuuka+ kwa balungami.”

15 Awe umo pa baitilwe nankwe ilyo aumfwile ifi fintu, atile kuli ena: “Alipaalwa uukalya umukate mu bufumu bwa kwa Lesa.”+

16 Na o Yesu atile kuli ena: “Umuntu umo apekenye umulaalilo uukalamba, kabili aitile abantu abengi.+ 17 Kabili atumine umusha wakwe pa nshita ya mulaalilo ukuti aye-eba abaitilwe ati, ‘Iseni,+ pantu nomba nimpekanya fyonse.’ 18 Lelo bonse batendeke ukutelebwila.+ Uwa ntanshi amwebele ati: ‘Ninshita impanga kabili mfwile ukuyaimona; ndekupapaata nati, Unjeleleko.’+ 19 Na umbi atile, ‘Ninshita ing’ombe ikumi (10) kabili ndeya ku kushiceeceeta; ndekupapaata nati, Unjeleleko.’+ 20 Lelo umbi na o atile, ‘E lyo fye ngupile,+ e co nafililwa ukwisa.’ 21 E ico umusha alishile no kweba shikulu wakwe ifi fintu. Awe umwine wa ng’anda alikalipe no kweba umusha wakwe ati, ‘Kabiye bwangu mu misebo iikalamba na mu nshila sha mu musumba, no kuleta muno abapiina na balemana ne mpofu na balemana amolu.’+ 22 Mu kuya kwa nshita umusha atile, ‘Mwe Shikulu, nacita ifyo musosele, lelo incende e mo icili.’ 23 Na o shikulu atile ku musha, ‘Kabiye ku bali mu misebo+ na mu tushila, no kubapatikisha bese muno, uleke ing’anda yandi isule.+ 24 Pantu ndemweba nati, Pa bantu balya abo njitile tapali nangu umo uulesondapo umulaalilo wandi.’”+

25 Awe amabumba yakalamba yaleya nankwe, kabili alipilibwike no kubeba ati: 26 “Umuntu nga aisa kuli ine kabili tapata wishi na nyina no mukashi na bana na bamunyina ne nkashi, nangu fye umweo wakwe,+ te kuti abe umusambi wandi.+ 27 Onse uushisenda icimuti cakwe ica kucushiwilwapo no kunkonka, te kuti abe umusambi wandi.+ 28 Pantu nani pali imwe nga alefwaya ukukuula ulupungu tabala ekala pa nshi no kupenda ishingapooswapo,+ pa kuti amone nga nakwata isha kulupwishisha? 29 Pantu kuti abika umufula wa luko uwa kukuulapo lelo afilwa ukulupwisha, na bonse abalemonako balamuseka, 30 abati, ‘Uyu muntu atendeke ukukuula lelo afilwa ukupwisha.’31 Nelyo ni mfumu nshi, iileya mu kulwa inkondo ne mfumu imbi, iishibala yaikala pa nshi no kulanshanya ne mpanda mano sha iko pa kuti imone nga kuti yaya na bashilika amakana ikumi (10,000) ku kuyalwa ne mfumu iileisa na bashilika amakana amakumi yabili (20,000)?+ 32 Na kuba, nga te kuti icite co, ninshi ilyo imfumu imbi icili ukutali, kuti yatuma inkombe no kulomba umutende.+ 33 E ico mwishibe ukuti, takuli nangu umo pali imwe uwafilwa ukusha fyonse ifyo akwata+ uwingaba umusambi wandi.

34 “Kwena, umucele waliwama. Lelo umucele nga wafumuka, kuti walowa shani na kabili?+ 35 Te kuti ulinge no ku-ubika mu mushili nangu mu mufundo. Abantu baupoosa fye. Uuli na matwi ya kuumfwa, naomfwe.”+

15 Awe bakasonkesha ba misonko+ bonse na babembu+ balepalamina kuli Yesu, balefwaya ukumumfwa. 2 E ico abaFarise na bakalemba balailishanya abati: “Uyu muntu alapokelela ababembu no kulya na bo.”+ 3 E lyo abebele icilangililo ici ati: 4 “Muntu nshi pali imwe uwakwata impaanga umwanda umo (100), ilyo alufyapo imo, uushakashe impaanga amakumi pabula na pabula (99) mu matololo no kuya ku kufwaya iilubile mpaka aisanga?+ 5 Kabili ilyo aisanga, aibika pa mabeya yakwe no kusekelela.+ 6 Awe ilyo afika ku mwakwe, aita ifibusa fyakwe na bena mupalamano, alabeba ati, ‘Sekeleleni pamo na ine, pantu ninsanga impaanga yandi iyalubile.’+ 7 Ndemweba nati, e fyo kukaba ukusekelela mu muulu pa mubembu umo uwalapila+ ukucila pa balungami amakumi pabula na pabula (99) abashikabila ukulapila.+

8 “Nelyo mwanakashi nshi uukwete indalama sha drakima* ikumi (10), nga alufyapo drakima imo, uushakasanike inyali no kupyanga mu ng’anda no kufwailisha mpaka aisanga? 9 Kabili ilyo aisanga, aita abanakashi abanankwe na bena mupalamano, ati, ‘Sekeleleni pamo na ine, pantu ninsanga indalama ya drakima iyo nacilufya.’ 10 E ico ndemweba nati, bamalaika ba kwa Lesa balasekelela ilyo umubembu umo alapila.”+

11 E lyo atile: “Umuntu umo ali na bana abaume babili.+ 12 Kabili umwaice atile kuli wishi, ‘Tata, mpeeleleni limo ifyuma ifyo nkapyana.’+ Na o abakeenye ifyuma+ fyakwe. 13 Awe tapapitile ne nshiku ishingi, umwaice alonganike fyonse no kwima ubulendo bwa ku calo ica kutali, kabili e ko aileonaula icuma cakwe ku mikalile yabipa.+ 14 Ilyo aonawile icuma conse, kwaponene icipowe icikalamba mu calo cilya conse, na o atampile ukucula. 15 Aileikuminisha fye na ku muntu umo uwa muli cilya calo, na o amutumine mu mabala yakwe ku kucema inkumba.+ 16 Alekumbwa fye no kulya amapaapa ayo inkumba shalelya, kabili takwali no wa kumupeelako akantu.+

17 “Awe ilyo ailwike, atile, ‘Ifyo bafula abantu abo tata aingisha incito abalya umukate uwingi, e lyo ine kuno ndefwa ku nsala! 18 Ndeima, ndeya+ kuli tata no kuyamweba nati: “Tata, nimembukila Lesa* na imwe.+ 19 Nshilingile ukuti mulenjita umwana wenu. Lekeni mbe fye nga umo pa babomfi benu.’” 20 Awe alimine no kuya kuli wishi. Nomba ilyo acili ukutali, wishi alimumwene kabili aumfwile uluse, kabili alimubutukile no kuwila pa mukoshi wakwe no kumutomona. 21 No mwana atile kuli ena, ‘Tata, nimembukila Lesa na imwe.+ Nshilingile ukuti mulenjita umwana wenu. Lekeni mbe fye nga umo pa babomfi benu.’+ 22 Lelo wishi aebele abasha bakwe ati, ‘Endesheni! leteni ica kufwala icisuma sana, no kumufwika,+ kabili mufwikeni inindaminwe+ ku minwe ne ndyato ku makasa. 23 Mulete no mwana wa ng’ombe uwaina,+ mwipaye no kuleka tulye no kusangalala, 24 pantu uyu mwana wandi alifwile nomba ali uwa mweo+ na kabili; alilubile nomba nalondoka.’ Awe batendeke ukusangalala.

25 “Nomba umwana wakwe umukalamba+ ali mwi bala; kabili ilyo aleisa no kupalamina ku ng’anda, aumfwile uko baleimba no kucinda. 26 E pa kwita umubomfi umo no kumwipusha ifyalecitika. 27 Na o amwebele ati, ‘Munonko+ naisa, na bawiso+ nabepaya umwana wa ng’ombe uwaina, pantu bamupokelele umutuntulu.’ 28 Awe alikalipe, akeene no kwingila. Na wishi alifumine alamupapaata.+ 29 Na o ayaswike wishi ati, ‘Moneni imyaka ubwingi namubombela kabili nshatala mpula mwi funde lyenu, lelo ine tamwatala amumpeela nangu mwana wa mbushi ukuti nsansamuke na banandi.+ 30 Lelo cilya fye afika uyu mwana+ wenu uwaliile ifyuma fyenu pamo na bacilende,+ mwamwipaila umwana wa ng’ombe uwaina.’+ 31 Na o amwebele ati, ‘We mwana, lyonse twaba na iwe, ne fintu fyandi fyonse fyobe;+ 32 nomba kwena tufwile fye ukusangalala no kusekelela, pantu uyu munonko alifwile nomba ali uwa mweo na kabili, alilubile nomba nalondoka.’”+

16 E lyo asosele kabili ku basambi ati: “Umuntu umo ali umukankaala kabili alikwete umubomfi mukalamba+ uwa pa ng’anda. Kabili uyu mubomfi balimusoseele ukuti aleonaula ifyuma.+ 2 E ico alimwitile no kumweba ati, ‘Nge fi ndeumfwa pali iwe? Londolola ifyo walebomba incito,+ pantu nomba nakutamfya incito.’ 3 E lyo uyu mubomfi atile, ‘Ndecita shani, apo shikulu+ alempoka umulimo wa kuba umubomfi mukalamba uwa pa ng’anda? Nshakwata amaka ya kulima, kabili ndi ne nsoni sha kulomba. 4 Eya! Naishiba ico nalacita, pa kuti ilyo bantamfya incito, abantu bakampokelele mu mayanda yabo.’+ 5 Kabili aitile bonse abakongwele kuli shikulu wakwe umo umo, atile ku wa ntanshi, ‘Wakwata inkongole shinga kuli shikulu?’ 6 Atile, ‘Imbeketi* sha mafuta ya muolife umwanda umo (100).’ Na o amwebele ati, ‘Buula kalata obe uwa cipangano uyu, ikala apa ulembepo bwangu bwangu ati imbeketi amakumi yasano (50).’ 7 E lyo atile kuli umbi, ‘Nga iwe wakwata inkongole shinga?’ Na o atile, ‘Amadalamu* ya ngano umwanda umo (100). Amwebele ati, ‘Buula kalata obe uwa cipangano uyu, no kulembapo amadalamu amakumi cinekonsekonse (80).’ 8 Kabili shikulu wakwe atashishe uyu mubomfi mukalamba, nangu tali uwalungama, pantu acitile ifintu mano mano;+ pantu abantu ba muli cino calo balishiba ifya kucita ku ba nkulo yabo ukucila abana ba lubuuto.+

9 “Kabili ndemweba nati, Ipangileni ifibusa+ ku fyuma fishalungama,+ pa kuti ilyo ifi fyapwa, bakamupokelele mu fifulo fya muyayaya.+ 10 Uwa cishinka mu finono e wa cishinka na mu fingi, no ushalungama mu finono e ushalungama na mu fingi.+ 11 E ico nga tamwaba aba cishinka ku fyuma fishalungama, nani akaseekesha kuli imwe ifyuma fya cine cine?+ 12 Kabili nga tamwaba aba cishinka ku fya umbi,+ nani akamupeela icenu? 13 Takuli umubomfi wa mu ng’anda uwingabombela bashikulu babili; pantu kuti apatapo umo no kutemwa umbi, nalimo kuti aba uwa cishinka kuli umo no kusuula umbi. Te kuti mubombele Lesa ne Fyuma.”+

14 Nomba abaFarise, abatemenwe indalama baleumfwa fyonse ifi, kabili balamupumya.+ 15 E ico abebele ati: “Imwe mulaiwaminisha pa menso ya bantu kwati muli balungami,+ lelo Lesa alishiba imitima yenu;+ pantu icacindama mu menso ya bantu ca bunani mu menso ya kwa Lesa.+

16 “Ifyalembwa mu mabuuku ya Mafunde na ya Bakasesema e fyo balebilisha ukufika kuli Yohane.+ Ukutula lilya ubufumu bwa kwa Lesa e bo babila nge mbila nsuma, na bantu bonse balabombesha ukuti bengilemo.+ 17 Cine cine, cayangukapo umuulu ne sonde ukupita,+ ukucila akalilembo kamo+ mu Mafunde ukukanafishiwapo.+

18 “Onse uwaleka umukashi wakwe no kuupa umbi ninshi acita ubucende, no waupa umwanakashi uo baleka ku mulume ninshi acita ubucende.+

19 “Kwali umuntu+ umo umukankaala, kabili alefwala insalu ishakashikila ne shisuma, cila bushiku aleipakisha ifya bukankaala.+ 20 E lyo kwali na kalombalomba umo uo baleita ati Lasaro uo balebika pa mpongolo yakwe. Ali ne filonda umubili onse 21 kabili alekumbwa ukulyako ifyalepona kwi tebulo lya mukankaala. Ne mbwa shaleisa mu kumyanga pa filonda fyakwe. 22 Awe mu kuya kwa nshita, uyu kalombalomba alifwile+ kabili bamalaika balimusendele no kumubika pa cifuba+ ca kwa Abrahamu.+

“No mukankaala na o alifwile+ no kushiikwa. 23 Nomba ilyo ali mu Nshiishi* ainwine amenso, ninshi alecula nga nshi,+ kabili amwene Abrahamu apatali ninshi na Lasaro ali pa cifuba cakwe. 24 E lyo abilikishe ati, ‘Mwe tata Abrahamu,+ mbeleleni uluse no kutuma Lasaro ukutumpika impela ya munwe wakwe mu menshi no kutalalika ululimi lwandi,+ pantu ndecula muno mu lubingu lwa mulilo.’+ 25 Lelo Abrahamu atile, ‘We mwana, ibukisha ukuti walipokelele ifisuma fyobe fyonse ilyo wali umumi, lelo Lasaro na o apokelele ifibi. Nomba ena kuno alesansamuka lelo iwe ulecula.+ 26 Na kuba, pa kati ka ifwe na imwe+ balibikapo umuyenge+ uukalamba, ica kuti abalefwaya ukwabukila kuli imwe kuti bafilwa, nangu ababa uko teti babukile kuno tuli.’+ 27 Na o atile, ‘Kanshi nga ni fyo, ndemupapaata, mwe tata, ukuti mumutume ku ng’anda ya kwa tata, 28 pantu nalikwata bamunyinane basano (5), pa kuti aye abalondolwele bwino, ukuti bekesa na bo kuno mu kucula.’ 29 Lelo Abrahamu atile, ‘Bali na mabuuku ya kwa Mose+ na ya Bakasesema;+ eyo baleumfwako.’+ 30 Na o atile, ‘Awe iyo, mwe tata Abrahamu, lelo umuntu uwafuma ku bafwa nga aya kuli bena bakalapila.’ 31 Lelo amwebele ati, ‘Nga tabomfwile kuli Mose+ na Bakasesema, nangu umuntu uwabuuka ku bafwa te kuti abanashe.’”

17 E lyo aebele abasambi bakwe ati: “Ifya kulufya* abantu ukwisa kwena fikesa.+ Lelo we bulanda we ku muntu uo fyaishilamo!+ 2 Kuti cawama nga bamukulike icilibwe cafina ica kupelelako mu mukoshi no kumupoosa muli bemba+ ukucila ukuti alufye umo uwa aba abacepesha.+ 3 E ico cenjeleni. Munonko nga abembuka mukalipile,+ kabili nga alapila, mubelele uluse.+ 4 Nangu fye akubembukila imiku cinelubali (7) mu bushiku bumo no kwisa kuli iwe imiku cinelubali, ati, ‘Nalapila,’ mubelele uluse.”+

5 Nomba abatumwa baebele Shikulu abati: “Tulundileniko icitetekelo.”+ 6 Awe Shikulu atile: “Amukwata icitetekelo icaba ngo luseke lwa lubanga, kuti mwaeba ici cimuti amuti, ‘Nukuka uyeilimba muli bemba!’ na co kuti canukuka cayailimba na muli bemba.+

7 “Nani pali imwe uo umusha wakwe nga alelima nelyo alecema impaanga uwingamweba ilyo abwela ku mabala, ati, ‘Isa kuno nomba line, ikala tulye ifya kulya’? 8 Lelo bushe takamwebe ati, ‘Mpekanishisha umulaalilo, fwala ne nsalu no kulandetela ifyo ndefwaya mpaka mpwishe ukulya no kunwa, e lyo na iwe walalya no kunwa’? 9 Bushe akatasha umusha pa kucita ifyo amwebele? 10 Ni fyo fine na imwe, ilyo mwacita fyonse ifyo bamweba ukucita, mulesosa amuti, ‘Ifwe tuli basha fye.+ Ifyo twacita, e fyo tufwile fye ukucita.’”

11 Kabili ilyo aleya ku Yerusalemu, apitile pa kati ka Samaria na Galili.+ 12 Ilyo aleingila mu mushi umo, abantu ikumi (10) abalwele ifibashi+ balimukumenye, lelo baiminine akatalamukila. 13 Kabili babilikishe abati: “Mwe Yesu, mwe Kasambilisha, tubeleleni uluse!”+ 14 Awe ilyo fye abamwene, abebele ati: “Kabiyeni kailangeni kuli bashimapepo.”+ Awe ilyo baleya, balipolele.+ 15 Umo pali balya ilyo amwene ukuti napola, alibwelulwike, ninshi alecindika+ Lesa ne shiwi ilikalamba. 16 Awile ubukupeme ku makasa ya kwa Yesu,+ alamutootela. Kabili ulya muntu ali mwina Samaria.+ 17 Na o Yesu amwipwishe ati: “Bushe te bantu ikumi (10) abapolele? Nga kanshi bambi pabula (9) bali kwi? 18 Bushe takuli abapolele ababwelulwike no kwisacindika Lesa, kano fye uyu muntu umwina fyalo?” 19 Kabili amwebele ati: “Ima kabiye; icitetekelo cobe nacikuposha.”+

20 Lelo lintu abaFarise bamwipwishe ilyo ubufumu bwa kwa Lesa bwali no kwisa,+ abaswike ati: “Ubufumu bwa kwa Lesa tabwakese mu musango wa kuti bonse bakabumone, 21 na bantu tabakatile, ‘Moneni, buli pano!’ nelyo, ‘Buli palya!’+ Pantu, moneni! ubufumu bwa kwa Lesa buli pa kati kenu.”+

22 E lyo aebele abasambi bakwe ati: “Inshiku shileisa ilyo mukafwaya ukumona ubushiku bumo ubwa Mwana wa muntu lelo tamwakabumone.+ 23 Na bantu bakatila kuli imwe, ‘Moneni, ali palya!’ nelyo, ‘Moneni ali pano!+ Mwikayako nangu kubakonka.+ 24 Pantu filya fine ne nkuba+ pa kubyasha, isanika ukufuma ku lubali lumo ulwa muulu ukufika ku lubali lubiye ulwa muulu, e fyo cikaba na ku Mwana wa muntu.+ 25 Lelo, ali no kubalilapo ukucula nga nshi kabili bakamukaana ku nkulo ino.+ 26 Kabili filya cali mu nshiku sha kwa Noa,+ e fyo cikaba na mu nshiku sha Mwana wa muntu:+ 27 balelya, balenwa, baleupa no kuupwa, mpaka no bushiku ubo Noa aingile mu cibwato; ne lyeshi lyaishile no konaula bonse.+ 28 Kabili nga filya cali mu nshiku sha kwa Lote:+ balelya, balenwa, baleshita, baleshitisha, balebyala, kabili balekuula. 29 Lelo ubushiku ubo Lote afumine mu Sodomu, yalokele iya mulilo na mabwe ya mulilo ukufuma mu muulu no konaula bonse.+ 30 E fyo cikaba na mu bushiku bulya ilyo Umwana wa muntu akasokololwa.+

31 “Mu bushiku bulya umuntu uuli pa mutenge ekekila ku kuyasenda ifipe fyakwe ifili mu ng’anda. Umuntu uuli mwi bala na o ekabwelela ku fyo ashile ku numa. 32 Ibukisheni muka Lote.+ 33 Onse uwafwaya ukucingilila umweo akaulufya, lelo onse uwalufya umweo wakwe e ukausunga.+ 34 Ndemweba nati, Mu bushiku bulya abaume babili bakaba pa busanshi bumo; umo bakamusenda, lelo umbi akashala.+ 35 Kukaba abanakashi babili abakalapela apa kupelela pamo pene; umo bakamusenda lelo umbi bakamusha.”+ 36 *—— 37 Na bo bamwipwishe abati: “Ni kwi, mwe Shikulu?” Na o abaswike ati: “Ukuli icitumbi,+ e kuba na bakapumpe.”+

18 Awe abebele icilangililo ca kuti bafwile ukulapepa lyonse no kukanaleka,+ 2 ati: “Mu musumba umo mwali kapingula umo uushaletiina Lesa kabili uushalecindika abantu. 3 Awe mu musumba ulya wine mwali mukamfwilwa uwaleya+ kuli ena lyonse, ati, ‘Mwikaleka bakamfyenge ku ulentwala ku cilye.’ 4 Awe palipitile inshita na o kapingula alekaana fye. Lelo pa numa asosele mu mutima ati, ‘Nelyo nshitiina Lesa kabili nshacindika umuntu, 5 kwena, pa mulandu wa kumpamfya lyonse kuli uyu mukamfwilwa,+ nshakaleke bakamufyenge, pa kuti elaisa lyonse mu kuncusha.’”+ 6 E lyo Shikulu atile: “Mwaumfwa ifyo kapingula asosa, nangu ca kuti te mulungami? 7 Bushe kanshi Lesa takaleke ukuti kube umulinganya+ ku basalwa bakwe abalilila kuli ena akasuba no bushiku, nangu ca kuti alabatekanishisha?+ 8 Ndemweba, nati, Akaleka ukuti kube umulinganya kuli bena bwangu bwangu.+ Lelo ilyo Umwana wa muntu akesa, bushe akasanga icitetekelo pano isonde?”

9 Awe alandile ne ci cilangililo kuli bamo abaicetekele ukuti balilungama+ no kumona bambi abashala kwati tapali ifyo bali,+ ati: 10 “Abantu babili baile mu kupepa mwi tempele, umo ali muFarise na umbi ali kasonkesha wa misonko. 11 UmuFarise aiminine+ alapepa+ mu mutima ati, ‘Mwe Lesa, ndemutootela ico nshaba nga bantu bambi abashala, abapuupu, abashalungama, abacende, nangu ngo yu kasonkesha wa misonko.+ 12 Ndaleka ukulya imiku ibili mu mulungu, kabili mpeela ica pe kumi ica pali fyonse ifyo nanonka.’+ 13 Lelo kasonkesha wa misonko uwaiminine akatalamukila, talefwaya no kulolesha mu muulu, lelo aleuma fye pa cifuba+ no kulasosa ati: ‘Mwe Lesa, mbeleleni uluse ne mubembu.’+ 14 Ndemweba nati, Uyu kasonkesha wa misonko aile ku ng’anda ku mwakwe uwalungama+ ukucila ulya muFarise; pantu onse uwaicindamika bakamuceefya, lelo onse uwaiceefya bakamucindamika.”+

15 Awe abantu balamuletela no twana twabo ukuti atwikatemo; lelo ilyo abasambi bamwene ifi, batendeke ukubakalipila.+ 16 Lelo Yesu aitile abana abanono ukuya apo ali, ati: “Lekeni abana abanono bese kuli ine, mwibakaanya. Pantu ubufumu bwa kwa Lesa bwa bantu ababa kwati ni aba abana.+ 17 Ndemweba icine cine nati, Onse uushipokelela ubufumu bwa kwa Lesa ngo mwana umunono, takengilemo nakalya.”+

18 Kabili intungulushi imo yamwipwishe, ati: “Mwe Kasambilisha musuma, kuti nacita shani pa kuba no mweo wa muyayaya?”+ 19 Na o Yesu atile: “Mulandu nshi wanjitila ati umusuma? Takwaba umusuma nangu umo, kano fye Lesa eka.+ 20 Walishiba amafunde+ ayatila, ‘Wilacita bucende,+ Wilaipaya,+ Wilaiba,+ Wilaba inte ya bufi,+ Ulecindika wiso na noko.’”+ 21 Na o amwebele ati: “Ndakonka fyonse ifi ukufuma fye ku bwaice.”+ 22 Ilyo Yesu aumfwile ifi, atile kuli ena: “Kuli na cimbi ico ufwile ukucita: Kashitishe fyonse ifyo wakwata no kupeela abapiina indalama, kabili ukakwata icuma mu muulu; e lyo wise ube umusambi wandi.”+ 23 Ilyo aumfwile ifi, aiketwe ubulanda nga nshi, pantu alikwete ifyuma ifingi.+

24 Na o Yesu alimuloleshe, no kutila: “Ifyo cikaba icayafya ku bakwata indalama ukwingila mu bufumu bwa kwa Lesa!+ 25 Cayangukapo ku ngamila ukupula mu linso lya nshindano ukucila uwa fyuma ukwingila mu bufumu bwa kwa Lesa.”+ 26 Awe abaumfwile batile: “Nga kanshi nani engapusuka?” 27 Na o atile: “Ifyo abantu bengafilwa ukucita, Lesa ena kuti aficita.”+ 28 Lelo Petro atile: “Moneni! Twalisha ifintu fyesu no kumukonka.”+ 29 Atile kuli bena: “Ndemweba icine cine nati, Takuli uwasha ing’anda nangu umukashi nangu bamunyina nangu abafyashi nangu abana pa mulandu wa bufumu bwa kwa Lesa+ 30 uushakapokelele ifingi nga nshi mu nshita ino, na ku ntanshi, umweo wa muyayaya.”+

31 E lyo asendele abasambi ikumi na babili (12) ku mbali no kubeba ati: “Moneni! Tuleya ku Yerusalemu, na fyonse ifyalembwa ukupitila muli bakasesema+ pa Mwana wa muntu fikafikilishiwa.+ 32 Pantu ali no kupeelwa ku bena fyalo kabili bali no kumupumya+ no kumusaalula+ no kumufwishila amate;+ 33 na pa numa ya kumufopaula,+ bali no kumwipaya,+ lelo pa bushiku bwalenga shitatu akabuuka.”+ 34 Lelo tabailwike umwalolele ifintu ifi nakalya; kabili aya mashiwi yalifishilwe kuli bena, kabili tabaishibe ne fyo alelanda.+

35 Awe ilyo alepalamina ku Yeriko, impofu imo yaikele mu mbali ya musebo ilelomba.+ 36 Apo yalyumfwile ibumba lilepita, yaipwishe ifyalecitika. 37 Na bo bayebele ati: “Yesu umwina Nasarete alepita.”+ 38 Na yo e pa kubilikisha aiti: “Mwe Yesu, Mwana Davidi, mbeleleniko uluse!”+ 39 Na batangile balaikalipila ukuti italale; e lyo yacililemo ukubilikisha aiti: “Mwe Mwana wa kwa Davidi, mbeleleniko uluse!”+ 40 Awe Yesu aliminine, no kubeba ukuti bailete kuli ena.+ Ilyo yapaleme, Yesu ali-ipwishe ati: 41 “Cinshi ico ulefwaya ukuti nkucitile?”+ Na yo yatile: “Mwe Shikulu, lekeni nshibulwe amenso.”+ 42 Kabili Yesu ayebele ati: “Shibulwa amenso; icitetekelo cobe cakuposha.”+ 43 Awe ilyo line yalishibwilwe amenso,+ kabili yatendeke ukumukonka, ilecindika Lesa+. Na bantu bonse ilyo bamwene ifi, balumbenye Lesa.

19 Kabili aingile mu Yeriko,+ alapita mu musumba. 2 Kabili moneni! mwali umuntu uo baleita ati Sakeo; na o ali ni kasonkesha mukalamba uwa misonko, kabili ali umukankaala. 3 Awe alefwaya ukumona+ uyu wine Yesu ifyo aba, lelo alifililwe pa mulandu we bumba, pantu ali umwipi. 4 E ico abutukile ku ntanshi no kunina ku mukunyu pa kuti amumone, pantu ali no kupita mu nshila ilya ine. 5 Nomba ilyo Yesu afikile palya, aloleshe ku cimuti no kumweba ati: “Sakeo, ikila bwangu, pantu lelo ndeikala ku ng’anda ku mobe.” 6 Awe alikile bwangu, kabili amupokelele ne nsansa ku mwakwe. 7 Lelo ilyo bamwene ifi, bonse balailishanya+ abati: “Ku muntu umubembu e ko ele ku kwikala.” 8 Lelo Sakeo aliminine no kweba Shikulu ati: “Moneni! Mwe Shikulu, hafu wa fyo nakwata, ndepeela abapiina, na conse ico napokele mu bucenjeshi+ ku muntu onse ndebweseshapo imiku ine (4).”+ 9 Na Yesu amwebele ati: “Ipusukilo liishile mu ng’anda ino lelo, pantu no yu muntu na o mwana wa kwa Abrahamu.+ 10 Pantu Umwana wa muntu aishile ku kufwaya no kupususha abaluba.”+

11 Awe ilyo baleumfwa ifi fintu, abebele ne cilangililo pantu alipaleme ku Yerusalemu, kabili baleti ubufumu bwa kwa Lesa bwalamoneka ilyo line.+ 12 E ico atile: “Umuntu umo uwa ku bufumu ali no kuya ku calo ca kutali ku kuyaba imfumu, e lyo no kubwela.+ 13 Awe aitile abasha bakwe ikumi (10), abapeele bamaina* ikumi, no kubeba ati, ‘Mukababomfye ukucita amakwebo mpaka nkabwele.’+ 14 Lelo abekashi ba mu calo cakwe balimupatile,+ batumine inkombe ukumukonka, abati: ‘Tatulefwaya uyu muntu abe mfumu pali ifwe iyo.’+

15 “Awe ilyo abwelele pa numa ya kuba imfumu, atumine abakwita abasha abo apeele indalama sha silfere, ukuti eshibe isho basangiilepo ilyo balecita amakwebo.+ 16 Awe uwa ntanshi alishile no kutila: ‘Mwe Shikulu, pali maina wenu umo nalisangilapo bamaina ikumi (10).’+ 17 Na o atile kuli ena, ‘Eya, mwabombeni, we musha musuma! Pa mulandu wa kuti waba uwa cishinka mu tunono sana, wakulateka pa misumba ikumi (10).’+ 18 No walenga babili alishile no kutila, ‘Mwe Shikulu, pali maina wenu umo nalisangilapo bamaina basano.’+ 19 Atile na kuli ulya, ‘Na iwe wine wakulateka pa misumba isano.’+ 20 Lelo umbi alishile no kutila, ‘Mwe Shikulu, maina wenu uyu, uo nafishile mu nsalu. 21 Mukwai, nalemutiina, pantu muli bakali; mubuula ne co mushabikile kabili mulobolola ne fyo mushatandile.’+ 22 Na o atile kuli ena, ‘Ndekupingwila ku fyafuma mu kanwa kobe,+ we musha mubi. Bushe kanshi walishibe ukuti ndi mukali, mbuula ifyo nshasungishe ku muntu no kulobolola ifyo nshatandile?+ 23 Nomba cinshi ico ushabikiile indalama shandi isha silfere ku banki? Na ine ilyo naisa nga nalishibulile pamo ne shalundwapo.’+

24 “E ico aebele abaiminine mupepi ati, ‘Mupokeni maina no kupeela uukwete bamaina ikumi (10).’+ 25 Lelo batile kuli ena, ‘Mwe Shikulu, uyu nakwata bamaina ikumi (10)!’ — 26 ‘Ndetila kuli imwe, nati, Onse uwakwata, bakamupeela na fimbi; lelo uushakwata bakamupoka ne fyo akwata.+ 27 Kabili abalwani bandi aba abashalefwaya ukuti ine mbe imfumu yabo, baleteni kuno no kubepaila pa menso yandi.’”+

28 Awe ilyo alandile ifi fintu, alikonkenyepo ubulendo bwakwe, alalola ku Yerusalemu.+ 29 Kabili ilyo apaleme ku Betifage na ku Betani pa lupili ulo beta ati Ulupili lwa Miolife,+ atumine abasambi bakwe babili,+ 30 ati: “Kabiyeni mu mushi ulya pa ntanshi yenu, kabili ilyo mwalaingilamo, mwalasanga umwana wa mpunda, uo umuntu ashatala aninapo, nabamukaka. Mumukakule no kumuleta.+ 31 Lelo umuntu nga amwipusha ati, ‘Cinshi ico mulemukakwila?’ Mutile, ‘Shikulu alemufwaya.’”+ 32 Awe abatuminwe balimine baya, bayasanga filya fine abebele.+ 33 Lelo ilyo balekakula umwana wa mpunda, babepwishe ati: “Nga cinshi mulekakwila umwana wa mpunda?”+ 34 Na bo batile: “Shikulu alemufwaya.”+ 35 Kabili bamuletele kuli Yesu, bapoosele ne fya kufwala fyabo pa mwana wa mpunda no kutekapo Yesu.+

36 Awe ilyo aleya,+ balayanshika ifya kufwala fyabo mu musebo.+ 37 Cilya fye apalama ku musebo uwatentemuka ukufuma pa Lupili lwa Miolife, cinkupiti onse uwa basambi balasekelela no kulumbanya Lesa ne shiwi ilikalamba pa fipesha amano fyonse ifyo bamwene,+ 38 abati: “Yalipaalwa Imfumu iileishila mwi shina lya kwa Yehova!+ Kube umutende mu muulu, no bukata ku wa mu muulu!”+ 39 Lelo abaFarise bamo mwi bumba batile kuli ena: “Mwe Kasambilisha, kalipileni abasambi benu.”+ 40 Lelo ayaswike ati: “Ndemweba nati, Aba nga batalala, amabwe+ kuti yabilikisha.”

41 Kabili ilyo apalamine, amwene umusumba, no ku-ulilila ubulanda,+ 42 ati: “Iye, iwe awishiba+ muli buno bushiku ifileta umutende—lelo fyalifiswa ku menso yobe.+ 43 Pantu inshiku shileisa ilyo abalwani bobe bakakuula ilinga+ ilya fimuti ifyasongoka+ ukukushingulusha, kabili bakakushinguluka+ no kukusansa+ konse konse, 44 kabili bakakuwisha pa nshi na bana bobe abali muli iwe,+ kabili tabakashe muli iwe ilibwe limo pa libiye,+ pantu wakene ukwishiba inshita ilyo balekupempula.”+

45 Awe aingile mwi tempele no kutamfyamo abaleshitisha,+ 46 no kubeba ati: “Calembwa ati, ‘Ing’anda yandi iketwa ing’anda ya kupepelamo,’+ lelo imwe mwaisangula ulucengo lwa fipondo.”+

47 Kabili alesambilisha mwi tempele cila bushiku. Lelo intungulushi sha bashimapepo na bakalemba na bakalamba ba bantu balefwaya ukumwipaya;+ 48 lelo tabasangile umwa kucitile co, pantu abantu bonse baleba nankwe pa kuti balemumfwa.+

20 Bushiku bumo ilyo alesambilisha abantu mwi tempele no kubila imbila nsuma, intungulushi sha bashimapepo na bakalemba pamo na bakalamba balishile,+ 2 kabili bamwipwishe abati: “Twebe, bushe ni ku maka nshi ucitila ifi fintu, nelyo nani akupeele aya maka?”+ 3 Na o abaswike ati: “Na ine nalamwipushako cimo, munjebe:+ 4 Bushe ulubatisho lwa kwa Yohane lwafumine ku muulu nelyo ku bantu?”+ 5 Na bo balalanshanya abati: “Nga twatila, ‘Ni ku muulu,’ aletila, ‘Nga kanshi cinshi ico tamwamusuminine?’+ 6 Lelo nga twatila, ‘Ni ku bantu,’ abantu bonse baletupoola amabwe,+ pantu basumina ukuti Yohane+ ali ni kasesema.”+ 7 E ico bayaswike abati tabaishibe uko lwafumine. 8 Na o Yesu abebele ati: “Na ine wine nshamwebe amaka ayo ncitilako ifi fintu.”+

9 Awe atendeke ukweba abantu ici cilangililo ati: “Umuntu alimine ibala lya myangashi+ no kuliseekesha ku balimi, kabili aile ku calo cimbi pa nshita iitali.+ 10 Lelo pa nshita iyalinga, atumine umusha+ ku balimi,+ ukuti bamupeele ifisabo fimo ifya mwi bala lya myangashi.+ Lelo abalimi balimupumine no kumubwesha minwe nkutwa.+ 11 Kabili abatumiine umusha na umbi. Na o balimupumine, bamusaalula no kumubwesha iminwe nkutwa.+ 12 Atumine no walenga butatu;+ uyu na o balimucenene no kumutamfya. 13 Awe umwine we bala lya myangashi atile, ‘Ndecita shani? Ndetuma umwana wandi uo natemwa sana.+ Nalimo ena bakamucindika.’ 14 Na balimi ilyo bamumwene fye, balalanshanya abati, ‘Uyu e mpyani; iseni tumwipaye, pa kuti ibala* libe lyesu.’+ 15 Awe bamupoosele ku nse+ ye bala ilya myangashi no kumwipaya.+ Nga kanshi akabacita shani umwine we bala ilya myangashi?+ 16 Akesaonaula balya balimi no kupeela ibala lya myangashi kuli bambi.”+

Awe pa kumfwa ifi, batile: “Nakalya!” 17 Lelo alibaloleshe no kutila: “Nga kanshi calola mwi ici icalembwa ati, ‘Ilibwe ilyo bakakuula bakeene,+ e lyaisaba ilibwe lya pa muulu pa koona’?+ 18 Onse uwaponena pali ili libwe, akafungaika.+ Na onse uo lyaponenapo,+ likamushonaula.”+

19 Bakalemba ne ntungulushi sha bashimapepo nomba balefwaya ukumwikata pa nshita ilya ine, lelo batiinine abantu; pantu bailwike ukuti e bo alelandapo mu cilangililo.+ 20 Kabili pa numa ya kumulolekesha, batumine inengu isho baingishe incito mu bumfisolo ku kuifungushanya kwati bantu abalungama, pa kuti shimwikate+ mu milandile yakwe no kumutwala ku buteko na ku mulashi.+ 21 Awe shamwipwishe, ashiti: “Mwe Kasambilisha, twaishiba ukuti mulanda no kusambilisha ifyalungama kabili tamwaba na kapaatulula iyo, lelo musambilisha inshila ya kwa Lesa mu cine:+ 22 Bushe calisuminishiwa ukuti tulesonka umusonko kuli Kaisare nelyo iyo?”+ 23 Lelo alishibe ubucenjeshi bwabo kabili abepwishe ati:+ 24 “Nangeni denari.* Bushe uyu mutwe uuli apa ne fi balembelepo fya kwa nani?” Na bo batile: “Fya kwa Kaisare.”+ 25 E lyo abebele ati: “Kanshi peeleni ifya kwa Kaisare kuli Kaisare,+ ne fya kwa Lesa kuli Lesa.”+ 26 Awe bafililwe ukumwikata pali aya mashiwi alandile pa menso ya bantu, lelo balipapile pa fyo ayaswike, ica kuti baikele fye tondolo.+

27 Lelo abaSaduke bamo, abatila takwaba ukubuuka kwa bafwa, balishile+ no kumwipusha 28 abati: “Mwe Kasambilisha, Mose+ atulembeele ati, ‘Umuntu uuli no mukashi nga afwa ukwabula ukufyala abana, munyina+ afwile ukubuula umukashi no kumufyalilako abana.’+ 29 Awe kwali aba bwananyina cinelubali (7); no wa ntanshi aupile umwanakashi lelo afwile ukwabula ukufyala abana.+ 30 Awe uwalenga bubili, 31 no walenga butatu na bo balimubuulile aba umukashi wabo. E fyo cali kuli bonse cinelubali (7): tabashile abana, mpaka bonse bapwa ukufwa.+ 32 Pa kulekelesha, umwanakashi na o alifwile.+ 33 E ico, mu kubuuka kwa bafwa, bushe akaba umukashi wa kwa nani pali balya cinelubali (7)? Pantu bonse cinelubali balimuupilepo.”+

34 Yesu atile kuli bena: “Abantu ba muli cino calo baloopa+ no kuupwa, 35 lelo abalinga+ ukubako muli ilya nshita iikesa+ no kubuuka ku bafwa+ bena tabakaleupa nangu kuupwa. 36 Na kuba, tabakalefwa,+ pantu bakaba nga bamalaika, kabili bakaba abana ba kwa Lesa ilyo bakabuuka.*+ 37 Na Mose alilandilepo pa kubuuka kwa bafwa, ilyo alembele pa lwa cimpusa ca myunga,+ ilyo aita Yehova ati ‘Lesa wa kwa Abrahamu kabili Lesa wa kwa Isaki kabili Lesa wa kwa Yakobo.’+ 38 Te Lesa wa bafwa iyo, lelo wa ba mweo, pantu kuli ena bonse ba mweo.”+ 39 E lyo bakalemba bamo batile: “Mwe Kasambilisha, mwalanda bwino.” 40 Awe tabakwete kabili amaka ya kumwipusha icipusho nangu cimo.

41 Na o atile kuli bena: “Nga cinshi basosela abati Kristu mwana wa kwa Davidi?+ 42 Pantu Davidi umwine mwi buuku lya Malumbo atila, ‘Yehova aebele Shikulu ati: “Ikala ku kwa kulyo kwandi 43 mpaka nkalenge abalwani bobe ukuba nga kapuna ka kunyantapo amakasa yobe.”’+ 44 E ico, Davidi, umwine amwita ati, ‘Shikulu’; nomba kuti aba shani umwana wakwe?”

45 Nomba ilyo abantu bonse baleumfwa, atile ku basambi:+ 46 “Cenjeleni kuli bakalemba abatemwa ukwendauka ninshi nabafwala ifya kufwala fya mucinshi no kutemwa ukubaposha ku bantu pa maliketi no kwikala pa fipuna fya ku ntanshi mu masunagoge* ne fya kwikalapo ifyacindama pa mulaalilo,+ 47 no kulya ifyuma fya bamukamfwilwa,+ kabili mu kabepekesho bapepa amapepo ayatali; aba e bo akakanda sana.”+

21 Nomba ilyo ainwine amenso, amwene abakankaala balepoosa ifya bupe fyabo mu cipao.+ 2 Awe amwene na mukamfwilwa umo umupiina apoosamo utundalama tubili utwacepesha,+ 3 kabili atile: “Ndemweba icine cine nati, Uyu mukamfwilwa, nangu mupiina, napoosamo ishingi ukucila isho bonse bapooselemo.+ 4 Pantu bonse bapooselemo ifya bupe ukufuma pa fyuma fyabo, lelo uyu mwanakashi, nangu mupiina, apooselemo shonse isha kuliilamo isho acikwata.”+

5 Awe ilyo bamo balelanda pe tempele, ifyo baliyemfeshe ku mabwe ayasuma na ku fintu ifyo bapeele ubupe kuli Lesa,+ 6 atile: “Ifi fintu ifyo mulemona nomba, inshiku shileisa ilyo tapakashale ilibwe apa nakalya pa muulu wa libwe ilibiye ilishakaponene pa nshi.”+ 7 E lyo bamwipwishe abati: “Mwe Kasambilisha, ni lilali kanshi ifi fintu fikabako, kabili cinshi icikaba icishibilo ilyo ifi fintu fikabako?”+ 8 Na o atile: “Cenjeleni ukuti bekamulufya;+ pantu abengi bakeshila mwi shina lyandi abati, ‘Nine,’ kabili, ‘Inshita naipalama.’+ Mwikabakonka. 9 Kabili ilyo mwaumfwa inkondo ne fimfulunganya; mwikatiina.+ Pantu ifi fintu fifwile ukubalilapo ukucitika, lelo impela yena tayakese apo pene.”

10 E lyo atile kuli bena: “Uluko lukemina uluko lumbi,+ no buteko bukemina ubuteko bumbi;+ 11 kabili kukaba ifinkukuma ifikalamba, na mu ncende shimo shimo mukaba ifikuko ne fipowe;+ kabili abantu bakamona ifya kutiinya kabili bakamona ifishibilo ifikalamba mu muulu.+

12 “Lelo ilyo ifi fyonse tafilabako, abantu bakamwikata no kumucusha,+ no kumutwala ku masunagoge* na mu fifungo, no kumutwala ku shamfumu na ku balashi pa mulandu we shina lyandi.+ 13 Iyi ikaba e nshita ya kuti mukabashimikile.+ 14 E ico mwikatontonkanishisha kabela ifya kusosa pa kuipokolola,+ 15 pantu nkamupeela amashiwi ya kulanda e lyo na mano,* ayo bonse abalemulwisha tabakabe na maka ya kukaanya nelyo ukucincintila.+ 16 Kabili abafyashi+ benu na bamunyinenwe na balupwa ne fibusa, bakalamutwala ku cilye ca milandu kabili bakepaya bamo pali imwe;+ 17 kabili abantu bonse bakamupata pa mulandu we shina lyandi.+ 18 Lelo umushishi+ wa ku mitwe yenu tawakalobepo nangu umo. 19 Nga mwashipikisha e lyo mukaba aba mweo.+

20 “Kabili ilyo mukamona abashilika bashinguluka+ umusumba wa Yerusalemu, mukeshibe ukuti uli mupepi no konaulwa.+ 21 E lyo abakaba mu Yudea bakatendeke ukufulumukila ku mpili, na bakaba mu kati ka uko bakafumemo, na bakaba mu mpanga iyashingulukako bekengila mu kati ka uko;+ 22 pantu shilya shikaba ni nshiku sha kukanda, pa kuti fyonse ifyalembwa fikacitike.+ 23 We bulanda ku banakashi abakaba na mafumo na bakalaonsha utunya muli shilya nshiku!+ Pantu kukaba ukucula ukukalamba pa calo kabili aba bantu bakakandwa; 24 kabili bakafwa ku lupanga kabili bakabasenda muli bunkole mu nko shonse;+ na bena fyalo bakanyantaula Yerusalemu, ikasuke aikumana inshita+ ya bena fyalo.

25 “Kabili mukaba ifishibilo umu mwaba akasuba+ no mweshi ne ntanda, ne nko sha pano isonde shikaba no bulanda, shikapelelwa pa mulandu wa kululuma kwa bemba+ no kusunkana kwa mabimbi,+ 26 na bantu bakalafwa umutombo pa mulandu wa mwenso+ na pa mulandu wa kulolela ifikacitikila aba pe sonde;+ pantu ifya maka ifya mu muulu fikatenkana.+ 27 E lyo bakamona Umwana wa muntu aleisa+ mwi kumbi ali na maka no bukata ubukalamba.+ 28 Lelo ilyo ifi fintu fikatendeka ukucitika, mukeminine no kwinuna imitwe yenu, pantu ninshi ukulubuka kwenu nakupalama.”

29 Awe abebele icilangililo ati: “Lolekesheni umukunyu ne miti yonse imbi:+ 30 Ilyo icili tailalemba, ilyo mwalolekesha, muleshiba mwe bene ukuti amainsa yali mupepi.+ 31 Ifyo fine na imwe, ilyo mwamona ifi filecitika, mwishibe ukuti ubufumu bwa kwa Lesa buli mupepi.+ 32 Ndemweba icine cine nati, Inkulo ino tayakapite nakalya mpaka fyonse ifi fikacitike.+ 33 Umuulu na pano isonde fikapita,+ lelo amashiwi yandi tayakapite nakalya.+

34 “Lelo mucenjele epali imitima yenu yafinininwa ku buliili na kuli bucakolwa+ na ku masakamika+ ya mikalile, no bushiku bulya bwaisa pali imwe no kupumikisha+ 35 kwati citeyo.+ Pantu bukesa pali bonse abaikala pano isonde ponse.+ 36 E ico, mulelola+ inshita yonse no kulapepa amapepo ya kupapaata+ pa kuti mukapusuke kuli fyonse ifikacitika, no kwiminina pa ntanshi ya Mwana wa muntu.”+

37 Kabili akasuba alesambilisha mwi tempele,+ no bushiku alefumamo, aya ku lupili ulo beta ati Ulupili lwa Miolife.+ 38 Na bantu bonse+ balecelela ukuya kuli ena mwi tempele mu kumumfwa.

22 Awe umutebeto wa mukate uushatutumuka, uo beta ati Ica Kucilila,+ walepalama. 2 Kabili intungulushi sha bashimapepo na bakalemba balefwaya inshila iisuma iya kumwipailamo,+ pantu baletiina abantu.+ 3 Lelo Satana aingile muli Yuda, uo baleita ati Iskariote, uwali pa basambi ikumi na babili (12);+ 4 kabili ailelanda ne ntungulushi sha bashimapepo na bakalamba ba bakalinda ba pe tempele pa nshila ya kumufutukilamo kuli bena.+ 5 Na bo balitemenwe, bapangene no kumupeela indalama sha silfere.+ 6 Awe alisumine, kabili alafwaya inshita yalinga iya kumufutukilamo ilyo kushili abantu.+

7 Nomba ubushiku bwa mukate uushatutumuka bwalifikile, ubushiku ubo balepeelelapo ilambo lya pa ca kucilila;+ 8 kabili atumine Petro na Yohane, no kubeba ati: “Kabiyeni, mutupekanishishe+ umutebeto wa ca kucilila, ukuti tulye.” 9 Na bo bamwipwishe abati: “Ni kwi mulefwaya ukuti tupekanishishe?” 10 Na o abebele ati:+ “Moneni! Nga mwaingila mu musumba, umuntu uusendele umutondo wa menshi alemukumanya. Mumukonke mu ng’anda umo aleingila.+ 11 Kabili mwebe umwine wa ng’anda amuti, ‘Kasambilisha atila kuli iwe: “Uli kwi umuputule wa beni umo nalaliila umutebeto wa ca kucilila pamo na basambi bandi?”’+ 12 Na o alemulanga umuputule uukalamba uwa pa muulu, uo bapekenye bwino bwino. Umo mwine e mo mupekanishishe ica kucilila.”+ 13 Awe baliile, bayasanga filya fine abebele, kabili bapekenye ica kucilila.+

14 Kabili ilyo inshita yafikile, alikele ukuti balye, ninshi ali pamo na batumwa.+ 15 E lyo abebele ati: “Nalefuluka nga nshi ukulya na imwe ica kucilila ici ilyo nshilacula; 16 pantu ndemweba nati, Nshakalyeko na kabili mpaka fyonse ifyo ica kucilila cimininako fikafikilishiwe mu bufumu bwa kwa Lesa.”+ 17 Kabili ilyo abuulile kapu,+ alipepele, no kutila: “Buuleni kapu iyi, pishenimo;18 pantu ndemweba nati, Nshakanwe umwangashi na kabili mpaka ubufumu bwa kwa Lesa bukese.”+

19 Kabili, abuulile umukate,+ apepa, aumokaula, no kubapeela, ati: “Uyu mukate cimpashanya ca mubili+ wandi uulepeelwa pa mulandu wenu.+ Mulecita ici ku kunjibukisha.”+ 20 Kabili acitile ifyo fine na kuli kapu,+ ilyo baliile umulaalilo, atile: “Iyi kapu umuli umwangashi e cipangano+ cipya ica pa mulopa wandi,+ uuli no kusuumina pa mulandu wenu.+

21 “Lelo, moneni! uulemfutuka+ ali na ine pano pe tebulo.+ 22 Pantu Umwana wa muntu aleya, ukulingana ne fyo cifwile ukuba;+ lelo we bulanda ku muntu uulemufutuka!”+ 23 E ico, batendeke ukwipushanya ukuti nani pali bena ali no kucita ici.+

24 Awe kwaimine ne fikansa pa kati kabo ifya kuti nani pali bena ali umukalamba.+ 25 Lelo atile kuli bena: “Ishamfumu sha bena fyalo shilatitikisha abantu, na bakateka babo balabalumbanya ati e bafwilisha abantu.+ 26 Te fyo cifwile ukuba kuli imwe.+ Lelo umukalamba pali imwe abe ngo mwaice,+ no uleteka abe ngo ulebombela imwe.+ 27 Pantu nani umukalamba, uwikele alelya pe tebulo nelyo uulemubombela? Bushe te wikele alelya pe tebulo? Lelo ine ndi mu kati kenu ngo ulemubombela.+

28 “Lelo imwe, ni mwe mwe batwalilila+ na ine mu fya kunjesha;+ 29 kabili ndepangana na imwe icipangano, ifyo na Tata apangana na ine icipangano+ ca bufumu,+ 30 ukuti mukalye+ no kunwa pe tebulo lyandi mu bufumu bwandi,+ no kwikala pa fipuna fya bufumu+ ku kupingula imikowa ikumi na ibili (12) iya kwa Israele.

31 “Simone, Simone, mona! Satana+ alefwaisha ukumwela nga filya bela ingano.+ 32 Lelo ninkupepelako+ ukuti icitetekelo cobe cinenuka; na iwe ilyo ukalapila, ukakoseleshe+ bamunonko.” 33 Na o atile kuli ena: “Mwe Shikulu, ninjipekanya ukuya na imwe ku cifungo na ku mfwa.”+ 34 Lelo atile: “Ndetila kuli iwe Petro, nati, Lelo line ilyo mukolwe talati alile, ulekaana imiku itatu ukuti tawanjishiba.”+

35 Kabili abepwishe ati: “Ilyo namutumine+ ukwabula icikwama ne cola ca fya kulya ne ndyato, bushe pali ico mwabulishe?” Na bo batile: “Awe iyo!” 36 Na o abebele ati: “Lelo nomba uukwete icikwama asende, no ukwete icola ca fya kulya na o wine asende; no ushikwete ulupanga ashitishe ica kufwala cakwe no kushitamo lumo. 37 Pantu ndemweba nati, icalembwa cifwile ukufikilishiwa pali ine icatila, ‘Bamupendele pamo na bampulamafunde.’+ Pantu ifyalandilwe pali ine filefikilishiwa.”+ 38 Na bo batile: “Mwe Shikulu, moneni! pano pali impanga shibili.” Na o atile kuli bena: “Ishi shine nashilinga.”

39 Pa kufuma, aile ku Lupili lwa Miolife, nge fyo alecita lyonse; na basambi balimukonkele.+ 40 Ilyo afikile palya, abebele ati: “Akupepeni pa kuti mwi-ingila mu kweshiwa.”+ 41 Awe afumine apo bali, aya akatalamukila, afukama, alapepa, 42 ati: “Tata, nga mwafwaya, fumyeni pali ine iyi kapu. Lelo ukufwaya kwenu e ko kucitwe,+ te kwandi iyo.”+ 43 Awe malaika wa mu muulu amoneke kuli ena no kumukosha.+ 44 Lelo aliculile nga nshi, kabili atwalilile ukupepa no mukoosha;+ ne libe lyakwe lyalefuma no kutona kwati mulopa uuleponena pa nshi.+ 45 Kabili aliimine ukufuma apo alepepela, aya ku basambi, abasanga baleshipula pa mulandu wa bulanda;+ 46 kabili atile kuli bena: “Nga cinshi mulaalile? Buukeni, akupepeni, pa kuti mwi-ingila mu kweshiwa.”+

47 Ilyo acili alelanda, moneni! Kwaishile ibumba, na Yuda, umo pa basambi ikumi na babili (12), ali pa ntanshi yabo;+ apaleme na kuli Yesu pa kuti amutomone.+ 48 Lelo Yesu amwipwishe ati: “Yuda, bushe ulefutuka Umwana wa muntu pa kumutomona?”+ 49 Abali nankwe ilyo bamwene ifyali no kucitika, batile: “Mwe Shikulu, bushe tubakome ku lupanga?”+ 50 Umo pali bena akomene fye no musha wa kwa shimapepo mukalamba no kumuputula ukutwi kwa ku kulyo.+ 51 Lelo Yesu atile: “Lekeni.” Kabili aikete ku kutwi kwa uyu muntu no kumuposha.+ 52 E lyo Yesu atile ku ntungulushi sha bashimapepo na bakalamba ba balinshi ba pe tempele na bakalamba abaishiile ku kumwikata, ati: “Bushe mwishile ne mpanga ne nkonto kwati ndi cipondo?+ 53 Ilyo naleba na imwe cila bushiku mwi tempele+ tamwanjikete.+ Lelo ino ni nshita+ yenu kabili inshita ya kuti imfifi+ iteke.”+

54 Awe balimwikete, bamusenda+ no kumutwala ku ng’anda ya kwa shimapepo mukalamba;+ lelo Petro alekonka akatalamukila.+ 55 Ilyo bakoseshe umulilo mu lubansa, no kwikala pamo, Petro aikele mu kati kabo.+ 56 Kabili umubomfi umo umukashana alimumwene naikala ku mulilo, alimuloleshe no kulanda ati: “No yu ali nankwe.”+ 57 Lelo alikeene+ ati: “We mwanakashi we, ine uyu muntu nshimwishibe.”+ 58 Pa numa ya nshita iinono, na umbi ilyo amumwene, atile: “Na iwe uli munabo.” Lelo Petro atile: “We mwaume we, ine nshili munabo.”+ 59 Kabili ilyo papitile nalimo iawala limo, umuntu umo akoselepo fye ati: “Ca cine no yu ali nankwe; pantu na kuba mwina Galili!”+ 60 Lelo Petro atile: “We mwaume we, nshishibe ifyo ulesosa.” Awe ilyo line, ilyo acili alelanda, mukolwe alililile.+ 61 Kabili Shikulu alipilibwike no kulolesha Petro, na Petro aibukishe amashiwi ayo Shikulu amwebele ati: “Ilyo mukolwe talalila lelo, ulenkaana imiku itatu.”+ 62 Kabili afumiine pa nse, no kulila nga nshi.+

63 Na bantu abamwikete batendeke ukumupumya,+ no kumuuma;+ 64 kabili pa numa ya kumufimba pa menso, balamwipusha abati: “Sesema. Nani uwakuuma?”+ 65 Balelanda na fimbi ifingi ifya kumupontela.+

66 Awe ilyo bwacele, balilongene+ ibumba lya bakalamba ba bantu, intungulushi sha bashimapepo shonse na bakalemba, kabili bamupoosele mu cikuulwa cabo ica Sanhedrini, abati:+ 67 “Nga ni we Kristu,+ twebe.” Lelo atile kuli bena: “Nangu namweba, tamwasumine nakalya.+ 68 Kabili nga namwipusha, tamwayasuke nakalya.+ 69 Lelo ukufuma pali nomba Umwana wa muntu+ akekala ku kuboko kwa ku kulyo+ ukwa maka ukwa kwa Lesa.”+ 70 Awe bonse batile: “Bushe kanshi uli Mwana wa kwa Lesa?” Na o abaswike ati: “Mwe bene namusosa+ ukuti nine.” 71 Na bo batile: “Bushe tulekabila ubunte na bumbi?+ Pantu fwe bene twayumfwila ifyo asosa.”+

23 Awe ibumba lyonse lyalimine no kumutwala kuli Pilato.+ 2 E lyo batendeke ukumupeela umulandu,+ abati: “Twasangile uyu muntu aletunka aba mu luko lwesu ukuti bemine ubuteko+ kabili alebalesha ukulipila imisonko+ kuli Kaisare, kabili aletila umwine e Kristu imfumu.”+ 3 Nomba Pilato amwipwishe ati: “Bushe uli mfumu ya baYuda?” Na o amwaswike ati: “Nausosa we mwine.”+ 4 E lyo Pilato atile ku ntungulushi sha bashimapepo na ku mabumba: “Nshimusangile no mulandu uyu muntu.”+ 5 Lelo bena bakoselepo fye abati: “Alaleta icimfulunganya mu bantu pa kusambilisha monse mu Yudea, ukutampila fye ku Galili ukufika na kuno.” 6 Ilyo aumfwile ifi, Pilato aipwishe nga uyu muntu mwina Galili, 7 kabili ilyo aishibe ukuti wa ku citungu ca kwa Herode, amutumine kuli Herode,*+ pantu na o ali mu Yerusalemu mu nshiku shilya.

8 Na Herode ilyo amwene Yesu, alitemenwe sana, pantu pa nshita ntali alefwaya ukumumona+ pantu alyumfwile+ pali ena, kabili alesuubila ukuti alacita icipesha amano. 9 Awe alamwipusha amepusho ayengi; lelo tamwaswike nakalya.+ 10 Awe intungulushi sha bashimapepo na bakalemba baleima no bukali balemupeela imilandu.+ 11 Awe Herode na bashilika bakwe balimusaalwile,+ kabili alimupumishe+ ilyo amufwikile insalu iyabuuta tutu, no kumubwesesha kuli Pilato. 12 Kabili Herode na Pilato+ balyalwike no kuba ifibusa bulya bwine bushiku; pantu kale balipatene.

13 E lyo Pilato alongenye intungulushi sha bashimapepo e lyo ne ntungulushi na bantu 14 no kutila kuli bena: “Muletele uyu muntu kuli ine ukuti aletunka abantu ukuti bemine ubuteko. Kabili moneni! ninjipusha uyu muntu pa menso yenu lelo nshimusangile no mulandu+ nangu umo pa milandu iyo mulemupeela. 15 Nangu fye ni Herode tamusangile no mulandu, pantu namubwesesha kuli ifwe; kabili, moneni! tacitile nangu cimo ica kufwilapo. + 16 E ico ndemuma fye ifikoti+ no kumukakula.” 17 * —— 18 Lelo babilikishe ne bumba lyabo lyonse, abati: “Ipayeni uyu muntu,+ lelo tukakwileni Baraba.”+ 19 (Uyu Baraba bamupoosele mu cifungo pa mulandu wa kwimina ubuteko mu musumba, na pa mulandu wa kwipaya.) 20 Pilato alandile na kabili kuli bena, pantu alefwaya ukukakula Yesu.+ 21 Awe balabilikisha abati: “Mupoopeleni! Mupoopeleni!”+ 22 Umuku walenga butatu abebele ati: “Mulandu nshi? Nga kanshi cinshi uyu muntu alufyenye? Nshimusangile no mulandu wa kuti afwilepo; e ico nalamuma fye ifikoti no kumukakula.”+ 23 Awe balamupamfya, no kubilikisha, bakosapo fye ukuti apoopelwe pa cimuti; na mashiwi yabo yatendeke ukumunasha.+ 24 E ico Pilato apingwile ukucita ico balefwaya:+ 25 akakwile+ umuntu uo abene balefwaya, kabili uyu muntu ali mu cifungo pa mulandu wa kwimina ubuteko no kwipaya, lelo abapeele Yesu ukulingana ne fyo abene balefwaya.+

26 Nomba ilyo balemusenda, baikete Simone, umwina Kurene, ninshi aleingila mu musumba, bamutwikile ne cimuti ukuti acisende, no kulakonka Yesu pa numa.+ 27 Lelo ibumba ilikalamba ilya bantu na banakashi balemukonka, balemuloosha no kumulila. 28 Na o Yesu apilibukile ku banakashi no kusosa ati: “Mwe bana banakashi aba mu Yerusalemu, mwilalilila ine. Lelo muleililila mwe bene na bana benu;+ 29 pantu, moneni! inshiku shileisa ilyo abantu bakatila, ‘Shalishuka ing’umba, na mafumo ayashafyele, na mabele ayashaonseshe!’+ 30 E lyo bakalaeba impili abati, ‘Tuponeneni!’ kabili bakalaeba utupili abati, ‘Tufimbeni!’+ 31 Pantu nga ca kutila bacita ifi fintu ku muti ilyo ucili uubishi, cikaba shani nga wauma?”+

32 Lelo abantu babili na bambi, bancitatubi, balebatwala pamo nankwe mu kubepaya.+ 33 Kabili ilyo bafikile pa ncende apo beta ati Pa Cipanga,+ e po bamupopeele pa cimuti na bancitatubi, umo ku kwa kulyo kwakwe na umbi ku kuso.+ 34 [[Lelo Yesu atile: “Mwe Tata, mubabelele uluse,+ pantu tabeshibe ifyo balecita.”]] Kabili pa kwakanya ifya kufwala fyakwe, balipendwile.+ 35 Na bantu baliminine baletamba.+ Lelo intungulushi shalepumya ashiti: “Alepususha bambi; naipusushe+ umwine, nga ni Kristu wa kwa Lesa, Uwasalwa.”+ 36 Nangu fye bashilika balemupumya,+ balipaleme kuli ena no kumupeela umwangashi uwakantuka,+ 37 abati: “Nga uli mfumu ya baYuda, ipusushe we mwine.” 38 Pa muulu wa cimuti balembelepo ati: “Uyu e mfumu ya baYuda.”+

39 Lelo umo pa ncitatubi ishakobekwe alamupontela+ ati: “Bushe te iwe Kristu? Ipusushe we mwine, upusushe na ifwe.” 40 Lelo umunankwe alimwaswike no kumukalipila ati: “Bushe tautiina Lesa, apo batupingwilile ukukandwa mu musango umo wine?+ 41 Nomba ifwe nacilinga ukukandwa, pantu ifwe baletukandila pa fintu twacita; lelo uyu muntu tacitile icabipa nangu cimo.”+ 42 Kabili atile: “Mwe Yesu, mukanjibukishe ilyo mukaba imfumu.”*+ 43 Na o Yesu amwebele ati: “Cine cine ndekweba lelo nati, Uli no kuba na ine+ mu Paradaise.”+

44 Awe nomba cali nalimo iawala ilyalenga mutanda (6),* lelo kwali imfifi pe sonde ponse ukufika na pe awala ilyalenga pabula (9),*+ 45 pantu akasuba kalifiitile; kabili insalu+ ya mu ncende ya mushilo yalilepwike pa kati.+ 46 Na Yesu abilikishe ishiwi ilikalamba, ati: “Mwe Tata, mu minwe yenu e mo natuula umweo wandi.”+ Ilyo alandile ifi, alekele umweo.+ 47 Pa kumona ifyacitike, umukalamba wa bashilika, atendeke ukucindika Lesa, ati: “Cine cine uyu muntu ali mulungami.”+ 48 Na mabumba yonse ayalongene ku kutamba, ilyo bamwene ifyacitike, balabwelelamo, baleyuma pa fifuba. 49 Kabili bonse abamwishibe baiminine akatalamukila.+ Na banakashi abamukonkele ukufuma ku Galili, baliminine baletamba ifi fintu.+

50 Kabili, moneni! umuntu uo baleita ati Yosefe, uwali wa mu Cilye ca Sanhedrini, umuntu umusuma kabili umulungami+— 51 uyu muntu tasuminisheko amapange yabo ne fyo bacitile+—ali wa ku Arimatea, umusumba wa bena Yudea, kabili alelolela ubufumu bwa kwa Lesa;+ 52 uyu muntu aile kuli Pilato no kulomba umubili wa kwa Yesu.+ 53 Kabili aliwikishe,+ aupomba na mu nsalu iisuma, aubikile na mu nshiishi+ iyaimbilwe mu cilibwe, umo umuntu nangu umo ashabalile abikwa.+ 54 Nomba bwali bushiku bwa Kupekanya,+ kabili cali cungulo, ninshi ubushiku bwe sabata+ buli mupepi no kutendeka. 55 Lelo abanakashi abaishile nankwe ukufuma ku Galili, balikonkele, bamwene inshiishi+ ne fyo umubili wakwe wabikilwe;+ 56 kabili babwelele ku kupekanya ifyanunkila na mafuta ayanunkila.+ Lelo pe sabata pena balituushishe+ ukulingana ne funde.

24 Nomba pa bushiku bwa ntanshi mu mulungu, bacelele ku nshiishi, nabasenda ne fyanunkila ifyo bapekenye.+ 2 Lelo basangile ninshi nabakunkulushapo ilibwe pa nshiishi,+ 3 kabili ilyo baingile, tabasangile umubili wa kwa Shikulu Yesu.+ 4 Ilyo bacili nabapeshiwa amano pali ici, moneni! abantu babili abafwele ifyabeeka baiminine apo bali.+ 5 Awe ilyo abanakashi baumfwile umwenso, no kwinamina pa nshi, balya bantu batile kuli bena: “Cinshi ico mulefwaila mu bafwa umuntu Uwa mweo? 6 [[Tali pano, lelo nabuuka.]]+ Ibukisheni ifyo amwebele ilyo ali mu Galili,+ 7 ukuti bali no kupeela Umwana wa muntu mu minwe ya babembu kabili bakamupopela, kabili akabuuka pa bushiku bwalenga shitatu.”+ 8 E lyo baibukishe amashiwi yakwe,+ 9 kabili babwelele ukufuma ku nshiishi no kushimika fyonse ifi ku basambi ikumi na umo (11) na kuli bonse abashala.+ 10 Pali Maria, umwina Magadala, na Yoana,+ na Maria nyina wa kwa Yakobo. Na banakashi+ bambi abali na bo baleshimika ifi fintu ku batumwa. 11 Lelo aya mashiwi yali fye kwati ya bufi ku batumwa kabili tabasumine+ ifyo abanakashi balelanda.

12 [[Lelo Petro alimine, abutukila ku nshiishi, kabili ilyo alengelemo, amwene fye insalu epela. E ico alifumineko, alepapa mu mutima icacitike.]]

13 Lelo, moneni! pa bushiku bulya bwine abasambi bakwe babili bali pa bulendo bwa kuya ku mushi uwatalwike ku Yerusalemu nalimo amakilomita ikumi na imo (11), ne shina lya uko ni Emao, 14 kabili balelanshanya pali ifi fintu+ fyonse ifyacitike.

15 Nomba ilyo balelanshanya no kulanda pa fyacitike, Yesu umwine alipaleme,+ alaendela pamo na bo; 16 lelo tabamwishibe.+ 17 E lyo abepwishe ati: “Nga finshi mulelanshanya ili mule-enda?” Na bo baiminine shilili, no bulanda pa menso. 18 Kabili umo uo ishina lyakwe ni Kleopa, amwaswike ati: “Bushe uli mweni uwikala eka mu Yerusalemu ica kuti tawishibe ne fyacitika mu nshiku shino?” 19 Na o abepwishe ati: “Fintu nshi?” Bamwaswike ati: “Ifya kwa Yesu umwina Nasarete,+ uwali ni kasesema+ wa maka ku fyo alebomba ne fyo alesosa pa ntanshi ya kwa Lesa na bantu bonse; 20 ne fyo intungulushi shesu isha bashimapepo ne ntungulushi sha cilye bamutwele pa kuti bamupingwile ukufwa no kumupoopela pa cimuti.+ 21 Lelo twalesubila ukuti uyu muntu e wali no kulubula Israele;+ kabili buno e bushiku bwalenga shitatu apo ifi fintu fyacitikile. 22 Kabili abanakashi+ bamo aba muli ifwe nabatupapusha, pantu bacicelela ku nshiishi 23 lelo tabasangile umubili wakwe kabili beshiletweba abati bacimona na bamalaika, kabili batile ali uwa mweo. 24 Kabili bamo pali ifwe baciya ku nshiishi;+ no kusanga ukuti ni fyo fine, nge fyo abanakashi bacisosa, lelo tabacimumona.”

25 E lyo atile kuli bena: “Mwe mpelwa mano mwe, kabili abafilwa ukusumina bwangu fyonse ifyo bakasesema basosele!+ 26 Bushe Kristu tali no kucula+ ifi fintu no kwingila mu bukata bwakwe?”+ 27 Kabili alabelwila ifyalembelwe pali ena mu Malembo yonse, ukutendekela pali Mose+ na Bakasesema+ bonse.

28 Awe basukile bapalama ku mushi uko baleya, nomba ena acitile kwati alepitilila. 29 Lelo balimupatikishe abati: “Tuleyeni ku mwesu, pantu akasuba kaya mu kuwa, no kwila bwalaila.” Awe aile ku mwabo. 30 Kabili ilyo aikele na bo ukuti batendeke ukulya, abuulile umukate, aupaala, aumokaula, abapeela.+ 31 Awe amenso yabo yalishibwilwe kabili balimwishibe; apo pene alilubile, baluba no ko aya.+ 32 Kabili balalanda abati: “Bushe imitima yesu tayacilabilima ilyo acilalanda na ifwe mu nshila, ilyo acilatulondolwela Amalembo?” 33 Awe lilya line balimine no kubwelela ku Yerusalemu, basangile abasambi ikumi na umo (11) na bantu abo bali na bo ninshi nabalongana, 34 kabili batile: “Cine cine Shikulu nabuuka kabili namoneka kuli Simone!”+ 35 Na bo bene balondolwele ifyacitike mu nshila ne fyo bamwishibe ilyo amokawile umukate.+

36 Awe ilyo balelanda ifi ifintu, alishile aiminina pa kati kabo, [[no kubeba ati: “Umutende ube na imwe.”]]37 Nomba pa mulandu wa kuti balitiinine nga nshi, kabili bali no mwenso,+ batontonkenye ukuti balemona umupashi. 38 E ico atile kuli bena: “Nga cinshi mwasakamikilwa, kabili cinshi mwatwishikila mu mitima yenu?39 Moneni amaboko yandi na makasa, ukuti nine wine; ntonyeni+ mumone, pantu umupashi tawakwata umunofu na mafupa,+ ifyo mulemona ine nkwete.” 40 [[Kabili ilyo alesosa ifi, abalangile amaboko yakwe na makasa.]] 41 Lelo ilyo bacili tabalasumina+ pa mulandu wa kuba ne nsansa sana, no kupapa, abepwishe ati: “Bushe namukwata ifya kulya muno?”+ 42 Na bo bamupeele isabi ilya koca;+ 43 kabili alibuulile alalya+ pa menso yabo.

44 E lyo atile kuli bena: “Aya e mashiwi ayo nalandile kuli imwe ilyo nali na imwe,+ ukuti fyonse ifyalembelwe pali ine mu mafunde ya kwa Mose na muli Bakasesema+ na mu Malumbo,+ fili no kufikilishiwa.” 45 E lyo abalengele ukuti beshibe bwino bwino umwalola Amalembo,+ 46 kabili atile kuli bena: “E fyo calembwa ukuti Kristu ali no kucula no kwima ku bafwa pa bushiku ubwalenga shitatu,+ 47 no kuti kukaba ukubila mu nko+ shonse ukuti abantu balapile pa kuti belelwe imembu+ mwi shina lyakwe, ukutendekela mu Yerusalemu,+ 48 imwe muli no kuba inte+ sha ifi fintu. 49 Kabili, moneni! nkatuma pali imwe ico Tata alaya. Lelo imwe ikaleni mu musumba, mukasuke amupeelwa amaka ukufuma mu muulu.”+

50 Kabili abatwele mupepi fye na ku Betani, aimishe na maboko no kubapaala.+ 51 Ilyo alebapaala, alekene na bo, alasendwa na mu muulu.+ 52 Awe balimufukamine no kumutootela, babwelele na ku Yerusalemu, ninshi bali ne nsansa sana.+ 53 Kabili lyonse baleba mwi tempele, baletasha Lesa.+