Imbila Nsuma umo Yohane Ailembeele

1 Pa kutendeka+ kwali Cebo,+ kabili Cebo ali pamo na Lesa,+ kabili Cebo ali ni lesa.+ 2 Ena pa kutendeka+ ali pamo na Lesa.+ 3 Ifintu fyonse fyapangilwe ukupitila muli ena,+ kabili takwali nangu cimo icapangilwe ukwabula ena.

4 Ubumi+ bwaishilebako ukupitila muli ena, no bo bumi bwali lubuuto+ lwa bantu. 5 Kabili ulubuuto lulebalika mu mfifi,+ ne mfifi yalifilwa ukulushimya.

6 Kwaishile umuntu uo Lesa atumine:+ ishina lyakwe ni Yohane.+ 7 Uyu muntu aishile ku kuba inte,+ pa kuti ashimikile abantu pa lubuuto,+ pa kuti abantu abalekanalekana basumine ukupitila muli ena.+ 8 Ena tali e lubuuto,+ lelo aishile ku kushimikila+ abantu pali ulu lubuuto.

9 Ulubuuto+ lwa cine cine, ulubalikila+ umuntu onse,+ lwali no kwisa mu calo. 10 Ali mu calo,+ ne calo capangilwe ukupitila muli ena,+ lelo icalo tacamwishibe. 11 Aishile ku mwakwe, lelo aba ku mwakwe tabamupokelele iyo.+ 12 Lelo, abo bene abamupokelele,+ abapeele amaka ya kuba abana ba kwa Lesa,+ pantu baletetekela ishina lyakwe;+ 13 kabili tabafyelwe ku mulopa nelyo ku kufwaya kwa mubili nelyo ku kufwaya kwa muntu, lelo bafyelwe nga bana ba kwa Lesa.+

14 E ico Cebo aishileba umuntunse+ no kwikala na ifwe, kabili twamwene ubukata bwakwe, ubukata akwete bwali ngo bwa mwana uwafyalwa eka+ kuli wishi; kabili lyonse ali ne cikuuku ca kwa Lesa kabili alelanda icine.+ 15 (Yohane ashimike pali ena, kabili alebila. Na kuba, e walandile pali ena ati: “Uulenkonka pa numa, alincila; pantu ilyo ine nshilabako, ninshi ena e ko aba.”)+ 16 Pantu bonse twapokelele sana icikuuku ca kwa Lesa kuli ena,+ pantu alifulisha icikuuku ca kwa Lesa.+ 17 Pantu Amafunde yapeeleelwe muli Mose,+ lelo icikuuku ca kwa Lesa+ ne cine+ fyaishiile muli Yesu Kristu. 18 Takwaba umuntu nangu umo uwatala amona Lesa;+ kano fye lesa uwafyalwa eka,+ uuli pa cifuba+ ca kwa Wishi, e wamulondolwele.+

19 Kabili ifi e fyo Yohane alandile ilyo abaYuda batumine bashimapepo na bena Lebi ukufuma ku Yerusalemu ukuyamwipusha, abati: “Ni we nani?”+ 20 Na o alyaswike, lelo alikeene ati: “Te ine Kristu.”*+ 21 Na bo bamwipwishe, abati: “Nga ni we nani? Bushe ni we Eliya?”+ Na o atile: “Awe te ine.” “Bushe ni we Kasesema?”+ Ayaswike ati: “Awe iyo!” 22 E ico batile: “Ni we nani? pa kuti tuyelondolwela abatutumine. We mwine uleti ni we nani?”+ 23 Na o atile: “Nine ishiwi lya ulebilikisha mu matololo, aliti, ‘Lungamikeni inshila ya kwa Yehova,’ nge fyo kasesema Esaya asosele.”+ 24 Nomba abaFarise e batumine aba bantu. 25 Na kabili balimwipwishe, abati: “Nga kanshi cinshi ico ulebatishisha+ nga te iwe Kristu nangu Eliya nangu Kasesema?” 26 Yohane abaswike, ati: “Ine imubatisha ku menshi. Pa kati kenu+ peminine umo uo imwe mushishibe,+ 27 uulenkonka pa numa, lelo uo nshalinga ukukakula inshinga sha ndyato shakwe.”+ 28 Ifi fintu fyacitike mu Betani kwi shilya lya Yordani, uko Yohane alebatishisha.+

29 Ubushiku bwakonkelepo amwene Yesu aleisa uko ali, kabili atile: “Moneni, Umwana wa mpaanga+ uwa kwa Lesa, uulesenda ulubembu+ lwa ba mu calo!+ 30 Uyu e o nalelandapo ilyo natile, Ku numa yandi kuleisa umuntu uwancila, pantu ilyo ine nshilabako, ninshi ena eko aba.+ 31 Na ine wine nshamwishibe, lelo naishile mu kubatisha mu menshi pa kuti abena Israele bamwishibe.”+ 32 Kabili Yohane ashimikile abantu, ati: “Namwene umupashi uleika mu muulu nge nkunda, kabili waikele pali ena.+ 33 Na ine wine nshamwishibe, lelo ulya Wine uwantumine+ ku kubatisha mu menshi anjebele ati, ‘Nga wamona umupashi waikila no kwikala pa muntu umo, ninshi uyo wine muntu e ukalabatishisha ku mupashi wa mushilo.’+ 34 Kabili nalimwene, no kushininkisha ukuti uyu e Mwana wa kwa Lesa.”+

35 No bushiku bwakonkelepo Yohane aiminine na basambi bakwe babili, 36 kabili ilyo aloleshe no kumona Yesu ale-enda, atile: “Moneni, Umwana wa mpaanga+ uwa kwa Lesa!” 37 Na ba basambi babili balyumfwile uko alelanda, e ico bakonkele Yesu. 38 Awe Yesu alipilibwike, kabili ilyo abamwene balemukonka, abepwishe ati: “Cinshi mulefwaya?” Na bo bamwaswike ati: “Rabi, (icalola mu kuti, Kasambilisha,) ni kwi mwikala?” 39 Abebele ati: “Iseni mumone.”+ Awe baile nankwe bayamona uko aleikala, kabili baikele nankwe bulya bushiku; inshita yali nalimo iawala lyalenga ikumi (10).* 40 Andrea+ munyina wa kwa Simone Petro ali pali balya babili abaumfwile ifyo Yohane alandile no kukonka Yesu. 41 Ica kubalilapo acitile kuyafwaya munyina Simone, no kumweba ati: “Natusanga Mesia”+ (icalola mu kuti, Kristu).*+ 42 Kabili amutwele kuli Yesu. Ilyo Yesu amumwene,+ atile: “Ni we Simone+ mwana Yohane;+ nomba wakulaitwa Kefasi” (ishina ilyalola mu kuti, Petro).+

43 Ubushiku bwakonkelepo alefwaya ukuya ku Galili. Awe Yesu asangile Filipi,+ no kumweba ati: “Nkonka, ube umusambi wandi.”+ 44 Na Filipi afumine ku Betsaida,+ ku musumba ukwafumine Andrea na Petro. 45 Filipi asangile Natanaele,+ no kumweba ati: “Natusanga uo Mose alembelepo mu Mafunde,+ uo na Bakasesema+ balembelepo, ni Yesu, uwa ku Nasarete, umwana wa kwa Yosefe.”+ 46 Lelo Natanaele amwipwishe ati: “Bushe mu Nasarete kuti mwafuma icisuma?”+ Na o Filipi amwebele ati: “Isa umone.” 47 Ilyo Yesu amwene Natanaele aleisa uko ali, alandile pali ena, ati: “Moneni, umwina Israele wine wine, uushaba na bucenjeshi.”+ 48 Natanaele atile: “Nga mwanjishiba shani?” Na o Yesu amwaswike ati: “Ilyo Filipi ashilakwita, ilyo waciba mwi samba lya mukunyu, nacikumona.” 49 Natanaele amwaswike ati: “Rabi, ni mwe Mwana wa kwa Lesa,+ muli Mfumu+ ya kwa Israele.” 50 Yesu na o amwaswike ati: “Pantu nakweba ati nacikumona mwi samba lya mukunyu e co wasuminina? Ukamona ifyacila pali ifi.” 51 Kabili amwebele ati: “Ndemweba icine cine, nati, mukamona umuulu naucenama, na bamalaika+ ba kwa Lesa balenina ukuya ku muulu no kwikila ukwisa ku Mwana wa muntu.”+

2 Nomba pa bushiku bwalenga shitatu, kwali ubwinga ku Kana,+ umusumba wa mu Galili, na nyina+ wa kwa Yesu na o e ko ali. 2 Yesu na basambi bakwe na bo balitilwe kuli ubu bwinga.

3 Awe ilyo umwangashi wapwile, nyina+ wa kwa Yesu amwebele ati: “Tabakwete umwangashi.” 4 Lelo Yesu ayaswike ati: “Nomba ncite shani?+ Inshita yandi icili tailafika.”+ 5 Nyina aebele ababomfi ati: “Conse ico alemweba, mucite.”+ 6 Awe kwali imitondo* ya mabwe mutanda (6) iyo batekele palya ukulingana na mafunde ya baYuda aya kusangulula,+ umo umo uwingengisha imbeketi shibili nangu shitatu isha menshi. 7 Yesu abebele ati: “Isusheni amenshi mu mitondo.” Awe baiswishemo ukufika na pa muulu. 8 E lyo abebele ati: “Nomba tapulenimo, mutwale ku mukalamba wa mutebeto.” Na bo balitwele. 9 Awe ilyo umukalamba wa mutebeto anwenemo amenshi aya-alwike umwangashi+ nangu ca kuti taishibe uko wafumine, lelo ababomfi abatapile amenshi bena balishibe, aitile shibwinga, 10 no kumweba ati: “Umuntu onse intanshi afumya umwangashi uusuma,+ kabili ilyo abantu bakolwa, e lyo afumya umwangashi ushawama. Lelo iwe nausungo mwangashi usuma ukufika na nomba.” 11 Ici icipesha amano ico Yesu acitile ku Kana, umusumba wa mu Galili e ca ntanshi pa fipesha amano fyakwe, kabili alengele ubukata+ bwakwe ukumoneka; na basambi bakwe balimutetekele.

12 Pa numa ya ifi, ena na banyina, na bamunyina+ na basambi bakwe baile ku Kapernahumu,+ lelo tabaikeleko inshiku ishingi.

13 Nomba ica kucilila+ ca baYuda cali mupepi, na Yesu aile ku Yerusalemu.+ 14 Kabili asangile mwi tempele abaleshitisha ing’ombe ne mpaanga ne nkunda+ na balekabula indalama nabekala. 15 Awe apangile ica kufopwelako ica myando, atamfishe na bonse pamo ne mpaanga shabo ne ng’ombe ukufuma mwi tempele, aposaike ne ndalama sha balekabula indalama no kupenuna amatebulo yabo.+ 16 Aebele na baleshitisha inkunda ati: “Fumyeni ifi muno! Mwilacita ing’anda+ ya kwa Tata ing’anda ya makwebo!”+ 17 Na basambi bakwe baibukishe ukuti calilembwa, ati: “Nalitemwisha ing’anda yenu.”+

18 Awe abaYuda batendeke ukumwipusha ati: “Cishibilo+ nshi uletulanga, apo ulecita ifi fintu?” 19 Yesu abaswike ati: “Bongololeni itempele ili,+ kabili nkalimya mu nshiku shitatu.” 20 E ico abaYuda batile: “Itempele ili lyakuulilwe mu myaka amakumi yane na mutanda (46), bushe iwe ukalimya mu nshiku shitatu?” 21 Lelo itempele+ alelandapo mubili wakwe. 22 Kabili ilyo abuukile ku bafwa, abasambi bakwe baibukishe+ ukuti alisosele aya mashiwi; kabili batetekele Amalembo na mashiwi ayo Yesu alandile.

23 Lelo, ilyo ali ku Yerusalemu pa ca kucilila, pa nshita ya mutebeto,+ abantu abengi batetekele ishina lyakwe,+ pa kumona ifipesha amano ifyo alecita.+ 24 Lelo Yesu umwine tabacetekele+ nakalya pa mulandu wa kuti alibeshibe bonse 25 na pa mulandu wa kuti talekabila nangu umo ukumweba ifyo abantu baba, pantu umwine alishibe ifyaba mu mitima ya bantunse.+

3 Awe kwali umuntu umo umuFarise, ishina lyakwe ni Nikodemo,+ intungulushi ya baYuda. 2 Uyu aishile kuli Yesu ubushiku,+ no kumweba ati: “Rabi,+ twalishiba ukuti ni mwe kasambilisha+ uwafuma kuli Lesa;+ pantu takuli umuntu uwingacita ifipesha amano+ ifyo mucita kano Lesa ali nankwe.+” 3 Na o Yesu amwaswike ati:+ “Ndekweba icine cine, nati, Umuntu nga tafyelwe libili,+ te kuti amone ubufumu bwa kwa Lesa.”+ 4 Nikodemo amwipwishe ati: “Umuntu umukalamba kuti afyalwa shani na kabili? Bushe kuti aingila mwi fumo lya kwa nyina na kabili, no kufyalwa?” 5 Yesu ayaswike ati: “Ndekweba icine cine, nati, Umuntu nga tafyelwe ku menshi+ na ku mupashi,+ te kuti engile mu bufumu bwa kwa Lesa. 6 Uwafyalwa ku muntu, muntu, no wafyalwa ku mupashi, mupashi.+ 7 Wipapa ifi nakweba, ati, Mufwile ukufyalwa libili.+ 8 Umwela upuupila+ uko utemenwe, kabili ulomfwa uko ulepuupa, lelo tawishiba uko ulefuma no ko ulelola. E fyo ciba na kuli onse uwafyalwa ku mupashi.”+

9 Na o Nikodemo amwipwishe ati: “Nge ca musango yu kuti cacitika shani?” 10 Yesu ayaswike ati: “Bushe we kasambilisha wa bena Israele, ni we ushaishiba ifi fintu?+ 11 Ndekweba icine cine, nati, Tulanda ifyo twaishiba, kabili tushimika+ ifyo twamona, lelo imwe tamusumina ifyo tushimika.+ 12 Nga namweba ifya pano calo, tamusumina, nga kuti mwasumina shani nga namweba ifya ku muulu?+ 13 Kabili takwaba umuntu uwaya ku muulu,+ lelo kwaba fye uwaishile ukufuma ku muulu,+ Umwana wa muntu.+ 14 Kabili filya Mose aimishe insoka+ mu matololo, e fyo no Mwana wa muntu bakamwimya,+ 15 pa kuti onse uumutetekela akabe no mweo uwa muyayaya.+

16 “Pantu Lesa atemenwe+ nga nshi aba pano calo ica kuti apeele Umwana wakwe uwafyalwa eka,+ ukuti onse uumutetekela+ ekonaika+ lelo akabe no mweo wa muyayaya.+ 17 Pantu Lesa tatumine Umwana wakwe mu calo ku kupingula+ icalo, lelo ni mu kuti aba mu calo bakapusukile+ muli ena. 18 Uumutetekela tapingulwa.+ Uushitetekela napingulwa kale, pantu tatetekele ishina lya Mwana wa kwa Lesa uwafyalwa eka.+ 19 Kabili ne co abantu bapingwilwapo ni ci, ulubuuto+ lwaisa pano calo+ lelo abantu batemwa imfifi ukucila ulubuuto,+ pantu imilimo yabo ibi. 20 Pantu uucita ifyabipa+ apata ulubuuto kabili tesa ku lubuuto, pa kuti ifyo acita fisokoloka.+ 21 Lelo uucita ifisuma esa ku lubuuto,+ pa kuti ifyo acita fimoneke ukuti filomfwana ne fyo Lesa afwaya.”

22 Pa numa ya ifi fintu, Yesu na basambi bakwe baile ku calo ca Yudea, kabili aikeleko na bo inshita iinono, no kulabatisha.+ 23 Lelo Yohane+ na o alebatisha mu Ainone mupepi na ku Salimu, pantu kulya kwali amenshi ayengi,+ na bantu baleisa ku kubatishiwa;+ 24 pantu Yohane ali talapooswa mu cifungo.+

25 E ico abasambi ba kwa Yohane batendeke ukukansana no muYuda pa lwa kusangulula.+ 26 E ico baishile kuli Yohane, no kumweba ati: “Rabi, umuntu uo mwali nankwe kwi shilya lya Yordani, uo mwatushimikilepo,+ moneni, alebatisha, na bonse baleya kuli ena.”+ 27 Na Yohane ayaswike ati: “Umuntu te kuti apokelele nangu cimo, kano bamupeela fye ukufuma ku muulu.+ 28 Imwe muli bakambone pa mashiwi nalandile aya kuti,+ Nshili Kristu, lelo, ine natuminwe ukumutangilila.+ 29 Uuli na nabwinga e shibwinga.+ Lelo cibusa wa kwa shibwinga ilyo aiminina no kumumfwa alelanda, alasekelela nga nshi pa mulandu wa kumfwa ishiwi lya kwa shibwinga. E ico na ine ninsekelela icine cine.+ 30 Ena ali no kulakula, lelo ine ndi no kulacepa.”

31 Uwafuma ku muulu alicila bonse.+ Uwafuma pano isonde wa pano isonde, kabili alanda ifya pano isonde.+ Uwafuma ku muulu alicila bonse.+ 32 Ifyo amona no kumfwa, e fyo ashimika,+ lelo tapali uulesumina ifyo aleshimika.+ 33 Uwasumina ifyo ashimika alifwatikapo icifwati cakwe ukuti Lesa wa cine.+ 34 Pantu uo Lesa atumine alanda amashiwi ya kwa Lesa,+ pantu alamupeela sana umupashi.+ 35 Wishi alitemwa+ Umwana kabili napeela fyonse mu minwe yakwe.+ 36 Uutetekela+ Umwana aba no mweo wa muyayaya;+ uushumfwila Mwana takabe no mweo,+ lelo ubukali bwa kwa Lesa bwaikala pali ena.+

4 Nomba ilyo Yesu aishibe ukuti abaFarise balyumfwile ukuti alelenga abengi ukuba abasambi no kubabatisha+ ukucila Yohane— 2 nangu Yesu umwine talebatisha kano abasambi bakwe— 3 afumine ku Yudea, no kubwelela kabili ku Galili. 4 Lelo ali no kupita mu Samaria.+ 5 Awe aile ku musumba wa ku Samaria uwitwa Sukari mupepi ne mpanga iyo Yakobo apeele umwana wakwe Yosefe.+ 6 E kwali ne cishima+ ca kwa Yakobo. Nomba Yesu ico alinakile pa mulandu wa lwendo, aikele mupepi ne cishima. Inshita yali nalimo iawala lyalenga mutanda (6).*

7 Awe umwanakashi umwina Samaria aishile ku kutapa amenshi. Yesu amwebele ati: “Mpeelako amenshi ya kunwa.” 8 (Pantu abasambi bakwe baile mu musumba ku kushita ifya kulya.) 9 E ico umwanakashi umwina Samaria amwipwishe ati: “Nga cinshi iwe, we muYuda ulenombela amenshi ya kunwa, ne mwanakashi umwina Samaria?” (Pantu abaYuda tabomfwana na bena Samaria.)+ 10 Na o Yesu amwaswike ati: “Awishiba ubupe+ bwa kwa Lesa, no ulekweba+ ati, ‘Mpeelako amenshi ya kunwa,’ nga naumulomba, na o nga nakupeela amenshi ya mweo.”+ 11 Umwanakashi atile kuli ena: “Mukwai, tamukwete ne ca kutapilako amenshi, ne cishima na co citali. Ni kwi kanshi mufumishe ayo menshi ya mweo? 12 Bushe mwalicila+ icikolwe cesu Yakobo, uwatupeele ici cishima, kabili uwalenwamo na bana bakwe abaume ne fitekwa fyakwe?” 13 Na o Yesu amwaswike ati: “Onse uulenwako aya menshi akomfwa icilaka na kabili. 14 Onse uulenwako amenshi ayo ndemupeela, takomfwe icilaka iyo,+ lelo amenshi ayo ndemupeela yakaba muli ena kwati kamfukumfuku ka menshi+ ayalefukaukila ku kupeela umweo wa muyayaya.”+ 15 Umwanakashi atile: “Mukwai, mpeeniko ayo menshi, pa kuti nilaumfwa icilaka kabili nilaisa kuno ku kutapa amenshi.”

16 Yesu amwebele ati: “Kabiye, kete umulume obe, e lyo wise kuno.” 17 Umwanakashi amwaswike ati: “Nshakwata umulume.” Na o Yesu atile kuli ena: “Walanda bwino ati, ‘Nshakwata umulume.’ 18 Pantu waupilwe ku baume basano, no mwaume uo uli nankwe nomba te mulume obe. Ici wasosa ca cine.” 19 Umwanakashi atile: “Mukwai, naishiba nomba ukuti ni mwe kasesema.+ 20 Ifikolwe fyesu fyalepepela mu lupili ulu;+ lelo imwe mutila ni mu Yerusalemu e mo abantu bafwile ukupepela.”+ 21 Yesu amwebele ati: “We mwanakashi, ntetekela, Inshita ileisa ilyo tamwakapepele+ Tata mu lupili ulu nangu mu Yerusalemu.+ 22 Imwe mupepa ico mushaishiba;+ ifwe tupepa ico twaishiba, pantu ipusukilo lishila mu baYuda.+ 23 Lelo inshita ileisa, na kuba e ino ine, ilyo bakapepa bene bene bakapepela Tata mu mupashi+ na mu cine,+ pantu Tata afwaya aba musango yu balemupepa.+ 24 Lesa Mupashi,+ na bamupepa bali no kupepela mu mupashi na mu cine.”+ 25 Umwanakashi atile kuli ena: “Ninjishiba ukuti Mesia+ aleisa, uwitwa Kristu.+ Ulya ilyo akesa akatushimikila fyonse apabuuta.” 26 Yesu amwebele ati: “Nine wine ne ulelanda na iwe.”+

27 Na pa nshita ilya ine abasambi bakwe baliishile, kabili balipapile pantu alelanda no mwanakashi. Lelo takwali uwasosele ati: “Cinshi mulefwaya?” nelyo, ukuti, “Nga cinshi mulelandila nankwe?” 28 Awe umwanakashi ashile umutondo wa menshi, aya na mu musumba no kweba abantu ati: 29 “Iseni kuno, mumone umuntu uunjebele fyonse ifyo nacita. Bushe nalimo uyu e Kristu?”+ 30 Na bo bafumine mu musumba, kabili baile uko ali.

31 Mu nshita ilya, abasambi balemupapaata, abati: “Rabi,+ lyeni.” 32 Lelo abebele ati: “Ninkwata ifya kulya ifyo imwe mushishibe.” 33 E ico abasambi balalanshanya abati: “Bushe kuli uwacimuletela ifya kulya?” 34 Yesu abebele ati: “Ica kulya+ candi kucita ukufwaya+ kwa wantumine no kupwisha umulimo wakwe.+ 35 Bushe tamuleti kwashala imyeshi ine (4) ninshi kwaba ukuseepa? Moneni! ndemweba, nati: Inuneni amenso no kumona amabala, ukuti nayabuuta, ni nshita ya kuseepa.+ Kale kale 36 uwa kuseepa alepoka amalipilo yakwe no kulonganya ifisabo fya ku mweo wa muyayaya,+ pa kuti uwa kubyala+ no wa kuseepa balesansamukila pamo.+ 37 Pantu muli ici insoselo iitila, Uubyala ni umbi, no useepa na o ni umbi, ya cine. 38 Ine namutumine ku kuseepa ifyo mushabombeele. Ni bambi e babombele,+ na imwe mwasekelamo mu milimo yabo.”

39 Awe abengi abena Samaria aba mu musumba ulya balimutetekele+ pa mulandu wa fyalandile umwanakashi uwashimike ati: “Anjebele fyonse ifyo nacita.”+ 40 Nomba ilyo abena Samaria baishile uko ali, bamwebele ati ekale na bo; kabili aikele nabo inshiku shibili.+ 41 E ico na bambi abengi balitetekele pa mulandu wa fyo alandile,+ 42 kabili batendeke ukweba umwanakashi abati: “Nomba tatutetekele pa mulandu wa fyo walandile; pantu natuyumfwila fwe bene+ kabili nomba twaishiba ukuti uyu e mupusushi+ wa calo.”

43 Ilyo papitile inshiku shibili, afumine kulya, aya ku Galili.+ 44 Lelo Yesu umwine alandile ukuti kasesema tabamucindika ku mwabo.+ 45 E ico ilyo afikile mu Galili, abena Galili balimupokelele, pantu bamwene fyonse ifyo acitile pa mutebeto mu Yerusalemu,+ pantu na bo e ko bali ku mutebeto.+

46 Awe abwelele ku Kana,+ umusumba wa mu Galili, uko asangwile amenshi umwangashi.+ Awe kwali umubomfi wa kwi sano, uwali no mwana umwaume umulwele ku Kapernahumu.+ 47 Ilyo uyu muntu aumfwile ukuti Yesu nafuma ku Yudea naisa mu Galili, aile kuli ena, alamupapaata ukuti ayeundapa umwana wakwe, pantu ali mupepi no kufwa. 48 Lelo Yesu amwebele ati: “Te kuti mutetekele iyo, kano mwamona ifishibilo+ ne fipesha amano.”+ 49 Umubomfi wa mfumu atile kuli ena: “Mwe Shikulu, tuleyeni ilyo umwana wandi ashilafwa.” 50 Yesu amwebele ati: “Kabiye;+ umwana obe napola.”+ No yo muntu atetekele amashiwi ayo Yesu amwebele, no kuya aya. 51 Lelo ilyo acili mu nshila, abasha bakwe balimukumenye, bamweba ukuti umwana wakwe napola.+ 52 Na o abepwishe inshita apolele. Na bo bamwebele ati: “Impepo+ yamulekele mailo pe awala lyalenga cinelubali (7).”* 53 E ico wishi aishibe ukuti ni mu nshita ilya ine+ Yesu amwebele ati: “Umwana obe napola.” Kabili alitetekele, pamo na ba mu ng’anda yakwe bonse.+ 54 Kabili ici e cipesha amano icalenga bubili+ ico Yesu acitile ilyo afumine ku Yudea no kuya mu Galili.

5 Pa numa ya ifi fintu, kwali umutebeto+ wa baYuda, kabili Yesu aile ku Yerusalemu. 2 Kabili mu Yerusalemu, mupepi ne mpongolo ya mpaanga,+ kwali icishiba iciitwa mu ciHebere ati Betesida, kabili ku mbali kwali umwa kupita apali no mutenge.* 3 Umu e mwalelaala abengi abalemana, abalwala, impofu, na balemana amolu na maboko. 4 * —— 5 Lelo kwali no muntu umo uwalwele pa myaka amakumi yatatu na cinekonsekonse (38). 6 Ilyo Yesu amwene uyu muntu nalaala, na pa mulandu wa kuti alishibe ukuti alilwala pa nshita iyalepa,+ amwipwishe ati: “Bushe ulefwaya ukupola?”+ 7 Umulwele amwaswike ati: “Mukwai, nshakwata uwa kumbika mu cishiba ilyo amenshi yafundauka; pantu ilyo ndefwaya ukwingilamo, ninshi umbi naingilamo kale.” 8 Yesu amwebele ati: “Ima, senda ubutanda bobe, no kwenda.”+ 9 Awe apo pene umuntu alipolele, asendele no butanda bwakwe, alaenda.

No bushiku bulya bwali lisabata.+ 10 E ico abaYuda baebele uo baposeshe abati: “Lelo bushiku bwe sabata, kabili tacasuminishiwa+ ukusenda ubutanda.” 11 Lelo abaswike ati: “Uumposeshe e unjebele ati, ‘Senda ubutanda bobe, no kwenda.’” 12 Na bo bamwipwishe, abati: “Nani akwebele ati, ‘Senda ubutanda bobe, no kwenda’?” 13 Lelo uo baposeshe tamwishibe, pantu Yesu ninshi nafumako, apo mwali abantu abengi mulya.

14 Pa numa ya ifi fintu Yesu amusangile mwi tempele no kumweba ati: “Mona, naupola. Wibembuka na kabili, epali icacilapo ukubipa cakucitikila.” 15 No yu muntu e pa kuyaeba abaYuda ukuti ni Yesu e wamuposeshe. 16 E ico pali uyu wine mulandu abaYuda batendeke ukucusha+ Yesu, pantu alecita ifi fintu pe sabata. 17 Lelo Yesu abebele ati: “Tata acili alebomba, na ine ncili ndebomba.”+ 18 Awe pa mulandu uyu abaYuda balefwaisha ukumwipaya,+ pantu taletoba fye isabata, lelo alesosa no kuti Lesa e Wishi,+ aleilinganya+ na Lesa.

19 E ico Yesu abaswike ati: “Ndemweba icine cine, nati, Umwana te kuti acite akantu umwine eka, lelo acita fye ifyo amona Wishi alecita.+ Pantu fyonse ifyo Wishi acita, e fyo no Mwana acita. 20 Pantu Wishi alitemwa Umwana,+ amulanga na fyonse ifyo acita, kabili akamulanga imilimo iyacila iyi, pa kuti imwe mupape.+ 21 Pantu ifyo Wishi abuusha abafwa no kubalenga ukuba no mweo,+ e fyo no Mwana alenga abo alefwaya ukuba no mweo.+ 22 Pantu Wishi tapingula umuntu nangu umo, lelo apeela ubupingushi bonse ku Mwana,+ 23 pa kuti bonse bacindike Umwana+ ifyo bacindika na Wishi. Uushicindika Umwana, tacindika na Wishi uwamutumine.+ 24 Ndemweba icine cine, nati, Uwaumfwa amashiwi yandi no kutetekela uwantumine aba no mweo wa muyayaya,+ kabili tapingulwa lelo nafuma mu mfwa no kwingila mu mweo.+

25 “Ndemweba icine cine, nati, Inshita ileisa, na kuba e ino ine, ilyo abafwa+ bakomfwa ishiwi+ lya Mwana wa kwa Lesa, na bakomfwa bakaba no mweo.+ 26 Pantu ifyo Wishi aba no bumi umwine,+ e fyo apeela no Mwana ukuba no bumi umwine.+ 27 Kabili alimupeela amaka ya kupingula,+ pantu Mwana wa muntu.+ 28 Mwipapa pali ici, pantu inshita ileisa ilyo bonse ababa mu nshiishi bakebukishiwa+ kabili bakomfwa ishiwi lyakwe 29 no kufumamo, abalecita ifisuma bakabuukila ku mweo,+ abalecita ifibi bakabuukila ku bupingushi.+ 30 Te kuti ncite akantu neka; ifyo ng’umfwa e fyo mpingula; kabili ubupingushi ubo mpingula bwalilungama,+ pantu te kufwaya kwandi mfwaya, lelo mfwaya ukufwaya+ kwa wantumine.

31 “Nga naikalila ubunte+ ne mwine, ninshi ubunte bwandi te bwa cine.+ 32 Kuli umbi uunshimika ubunte, kabili nalishiba ukuti ubunte ubo anshimika+ bwa cine. 33 Imwe mwatumine abantu kuli Yohane, kabili ashimike icine ubunte.+ 34 Lelo nshikabila bukambone ukufuma ku muntunse, lelo ndesosa ifi fintu pa kuti mukapusuke.+ 35 Ulya muntu ali e nyali iyaleaka no kubalika, kabili imwe pa nshita iinono mwalefwaya ukusekelela nga nshi mu lubuuto lwakwe.+ 36 Lelo ndi no bushininkisho ubwacila ubwa kwa Yohane, pantu ilya ine imilimo Tata ampeele ukubomba, imilimo iyo ine ndebomba,+ e ishininkisha ukuti Tata e wantumine. 37 Kabili Tata uwantumine e nte yandi.+ Tamwatala amuumfwa ishiwi lyakwe nelyo ukumona ifyo amoneka;+ 38 kabili amashiwi yakwe tayekala muli imwe nakalya, pantu ulya wine atumine, tamumutetekela.

39 “Imwe mufwayafwaya mu Malembo,+ pantu mutontonkanyo ukuti e mo mukakwatila umweo wa muyayaya; kabili aya yene e yashimika icine pali ine.+ 40 Lelo tamufwaya ukwisa kuli ine ukuti mube no mweo.+ 41 Nshipokelela umucinshi ku bantu,+ 42 lelo nalishiba ukuti imwe tamwatemwa Lesa.+ 43 Naishila mwi shina lya kwa Tata,+ lelo imwe tamumpokelela; nga umbi aishila mwi shina lyakwe, kuti mwamupokelela. 44 Bushe kuti mwasumina shani ilyo mulepeelana umucinshi,+ no kukanafwaya umucinshi uufuma kuli Lesa eka?+ 45 Mwitila nine nkamupeela umulandu kuli Tata; ni Mose, uo imwe mwatetekela, e umupeela umulandu.+ 46 Na kuba, nga mwalitetekele Mose nga mwalintetekela na ine, pantu ulya alembele pali ine.+ 47 Lelo nga tamutetekele ifyo alembele,+ kuti mwatetekela shani amashiwi yandi?”

6 Pa numa ya ifi fintu Yesu aile kwi shilya lya bemba wa Galili, uo beta no kuti bemba wa Tiberia.+ 2 Lelo ibumba ilikalamba lyalemukonka, pantu balemona ifipesha amano ifyo alecita pa kuposha abalwele.+ 3 E ico Yesu aninine pa lupili,+ kabili epo aikele na basambi bakwe. 4 Awe umutebeto wa baYuda uwa ca kucilila,+ wali mupepi. 5 E ico ilyo Yesu ainwine amenso no kumona ibumba likalamba lileisa kuli ena, atile kuli Filipi: “Ni kwi twalashita imikate ya kuti aba bantu balye?”+ 6 Lelo alelanda ifi ku kumwesha pantu alishibe ico ali no kucita. 7 Filipi amwaswike ati: “Imikate ya madenari imyanda ibili (200) te kuti ibakumane, nangu fye kusuninako cila muntu akanono.”+ 8 Umusambi wakwe umo, Andrea, munyina Simone Petro, atile kuli ena: 9 “Pali akalumendo akakwete imikate+ ya barle isano no tusabi tubili. Lelo bushe ifi e fingakumana abafula ifi?”+

10 Yesu atile: “Ebeni abantu bekale pa nshi.”+ Awe mwali ne cani icingi mu mpanga ilya. E ico abantu balikele pa nshi. Pali nalimo abaume amakana yasano (5,000).+ 11 Na Yesu abuulile imikate, kabili ilyo apepele, ayakenye abaikele pa nshi. Acitile ifyo fine na ku tusabi umo balefwaila.+ 12 Lelo ilyo baikwite,+ atile ku basambi bakwe: “Longanyeni ifisheleko, pa kuti twipoosapo nangu kamo.” 13 E ico balilongenye ifyashele ku mikate isano, ifyo abaliile bashileko, kabili bafiswishe mu miseke ikumi na ibili (12).+

14 Awe ilyo abantu bamwene ifipesha amano ifyo acitile, batile: “Cine cine uyu e kasesema+ uwali no kwisa mu calo.” 15 E ico ilyo Yesu aishibe ukuti bali mupepi no kumwikata pa kuti bamubike pa bufumu, alifumineko+ aile na kabili eka ku lupili.

16 Ilyo cali icungulo, abasambi bakwe baile kuli bemba,+ 17 kabili ilyo baninine mu bwato, bayabwike bemba baya ku Kapernahumu. Kabili pali iyi nshita kwalifiitile, ninshi Yesu talaisa kuli bena. 18 E lyo amabimbi yatampile ukwima pali bemba pa mulandu wa kuti kwali icimwela ca maka.+ 19 Lelo ilyo baobele ubwato nalimo amakilomita yasano nelyo mutanda (6), bamwene Yesu ale-enda pali bemba, aleisa ku bwato, kabili baumfwile umwenso.+ 20 Lelo abebele ati: “Nine; mwitiina!”+ 21 E ico balekele ukuti anine mu bwato, kabili apo pene ubwato bwafikile ku mulundu uko balefwaya ukuya.+

22 Ubushiku bwakonkelepo ibumba ilyaiminine bushilya bwa bemba lyamwene ukuti takwali ubwato bumbi lelo kwali fye akabwato akanono, kabili Yesu taingile mu bwato pamo na basambi bakwe, lelo abasambi bakwe baile beka; 23 kabili amato ayafumine ku Tiberia yafikile apo baliliile umukate, ilyo Shikulu apepele. 24 E ico ilyo ibumba lyamwene ukuti Yesu na basambi bakwe tabaliko, baninine utumato twabo no kuya ku Kapernahumu ku kufwaya+ Yesu.

25 Kabili ilyo bamusangile kwi shilya lya bemba, batile: “Mwe kasambilisha,+ ni lilali mwaishile kuno?” 26 Yesu abaswike ati: “Ndemweba icine cine, nati, Ico mulemfwaila, te pa mulandu wa kuti mwamwene ifipesha amano, lelo ni co mwaliliile imikate no kwikuta.+ 27 Mwibombela ifya kulya ifyonaika,+ lelo mubombele ifya kulya ifibelelela ifingamutwala ku mweo wa muyayaya,+ ifyo Umwana wa muntu akamupeela; pantu e o Wishi, kabili Lesa, alanga ukuti alimutemwa.”+

28 E ico bamwipwishe abati: “Tucite shani kanshi pa kuti tulebomba imilimo iyo Lesa asuminisha?” 29 Na o Yesu pa kwasuka abebele ati: “Uyu e mulimo uo Lesa asuminisha, uwa kuti mutetekele+ uo Atumine.”+ 30 E ico bamwipwishe ati: “Nga kanshi cipesha amano nshi ico walacita,+ pa kuti tumone no kukutetekela? Mulimo nshi walacita? 31 Bashifwe baliile mana+ mu matololo, filya calembwa ati, ‘Abapeele umukate ukufuma ku muulu ukuti balye.’”+ 32 E ico Yesu abebele ati: “Ndemweba icine cine, nati, Mose tamupeele umukate ukufuma ku muulu, lelo Tata e umupeela umukate wine wine uwafuma ku muulu.+ 33 Pantu umukate wa kwa Lesa ni ulya uwafuma ku muulu no kupeela ubumi ku ba mu calo.” 34 Awe batile kuli ena: “Mwe Shikulu, muletupeela lyonse uyu mukate.”+

35 Yesu abebele ati: “Nine mukate wa bumi. Uwaisa kuli ine takomfwe insala iyo, kabili uuntetekela takomfwe icilaka nakalya.+ 36 Lelo nalimweba, nati, Ukumona mwalimona nomba tamusumina.+ 37 Onse uo Tata ampeela akesa kuli ine, kabili uwaisa kuli ine nshakamutamfye iyo;+ 38 pantu ico nafumina ku muulu+ te ku kucita ukufwaya kwandi, lelo ni ku kucita ukufwaya kwa wantumine.+ 39 Uku e kufwaya kwa wantumine, ukuti nilufyapo nangu umo pali bonse abo ampeela lelo ukuti nkababuushe+ bonse pa bushiku bwa kulekelesha. 40 Pantu uku e kufwaya kwa kwa Tata, ukuti onse uwamona Umwana no kumutetekela abe no mweo wa muyayaya,+ kabili nkamubuusha pa bushiku bwa kulekelesha.”+

41 Awe abaYuda balang’winta ico atile: “Ndi mukate uwafuma ku muulu”;+ 42 kabili balasosa ati:+ “Bushe uyu te Yesu, umwana wa kwa Yosefe,+ uo wishi na nyina twaishiba? Nomba alelanda shani ati, ‘Nafuma ku muulu’?” 43 Na o Yesu pa kwasuka atile: “Lekeni ukung’winta. 44 Takuli uwingesa kuli ine kano Tata uwantumine, amukula;+ kabili nkamubuusha mu bushiku bwa kulekelesha.+ 45 Calilembwa mu mashiwi ya Bakasesema ukuti, ‘Kabili bonse bakaba abasambilishiwa kuli Yehova.’+ Onse uwaumfwa kuli Tata no kusambilila kuli ena esa kuli ine.+ 46 Te kutila kwaba umuntu uwamona Tata,+ kano fye uwafuma kuli Lesa; uyu e wamona Tata.+ 47 Ndemweba icine cine, nati, uutetekela aba no mweo wa muyayaya.+

48 “Ine ndi mukate+ wa bumi. 49 Bashinwe baliile mana+ mu matololo lelo balifwile. 50 Uyu e mukate uwafuma ku muulu, ukuti onse alyeko no kukanafwa. 51 Ine ndi mukate wa mweo uwafumine ku muulu; umuntu nga alyako uyu mukate, akekala umuyayaya. Na kuba, umukate uo nkapeela, mubili wandi+ uo nkapeela pa mulandu wa bumi bwa ba pano calo.”+

52 Awe abaYuda balabikana ifikansa, abati: “Uyu muntu kuti atupeela shani umubili wakwe ukuti tulye?” 53 Na o Yesu atile kuli bena: “Ndemweba icine cine, nati, Nga tamuliile umubili+ wa Mwana wa muntu no kunwa umulopa+ wakwe, ninshi muli imwe tamuli ubumi.+ 54 Uulya umubili wandi no kunwa umulopa wandi ali no mweo wa muyayaya, kabili nkamubuusha+ pa bushiku bwa kulekelesha; 55 pantu umubili wandi ca kulya ica cine cine, no mulopa wandi ca kunwa ica cine cine. 56 Uulya umubili wandi no kunwa umulopa wandi aba muli ine, na ine naba muli ena.+ 57 Filya fine Tata wa mweo+ antumine kabili naba no mweo pa mulandu wa kwa Tata, e fyo no wandya, na o akaba no mweo pa mulandu wandi.+ 58 Uyu e mukate uwafumine ku muulu. Tauli nga ulya bashinwe baliile kabili balifwa. Uwalya uyu mukate akekalilila umuyayaya.”+ 59 Ifi fintu alandile ilyo alesambilisha abalongene mu Kapernahumu.

60 E ico abasambi bakwe abengi ilyo baumfwile ifi, batile: “Aya mashiwi yena yayafya; nani uwingayomfwa?”+ 61 Lelo Yesu apo alishibe mu mutima ukuti abasambi bakwe baleng’winta aya mashiwi, atile kuli bena: “Bushe aya mashiwi yamukalifya na imwe?+ 62 Nga kanshi cileba shani nga mwamona Umwana wa muntu alenina ukuya uko ali kale?+ 63 Umupashi e upeela ubumi;+ umubili tauli kantu iyo. Amashiwi ayo nsosele kuli imwe e mupashi+ no bumi.+ 64 Lelo bamo pali imwe tabatetekela.” Pantu ukufuma pa kutendeka Yesu alishibe abashatetekele no wali no kumufutuka.+ 65 E ico atile: “E mulandu wine mwebele, nati, Takuli uwingesa kuli ine kano Tata amusuminisha.”+

66 Pa mulandu wa ifi abasambi bakwe abengi babwelele ku fyo balecita kale,+ kabili balekele ukwenda nankwe.+ 67 E ico Yesu atile ku basambi ikumi na babili (12): “Bushe na imwe mulefwaya ukuya?” 68 Na o Simone Petro+ amwaswike ati: “Mwe Shikulu, ni kuli nani twingaya?+ Ni mwe muli na mashiwi ya mweo wa muyayaya;+ 69 kabili twalitetekela no kwishiba ukuti ni mwe Uwa Mushilo wa kwa Lesa.”+ 70 Yesu abebele ati: “Bushe nshasalile imwe ikumi na babili (12)?+ Lelo umo pali imwe ni kaseebanya.”+ 71 Na kuba, alelanda pali Yuda, mwana Simone Iskariote; pantu ali no kumufutuka,+ nangu ca kutila ali pa basambi ikumi na babili (12).

7 Nomba pa numa ya ifi fintu, Yesu ashele aleshinguluka mu Galili, pantu talefwaya ukuya mu Yudea, ico abaYuda balefwaya ukumwipaya.+ 2 Lelo umutebeto wa baYuda, umutebeto wa nsakwe,+ wali mupepi. 3 E ico bamunyina+ batile kuli ena: “Fuma kuno, kabiye ku Yudea, pa kuti na basambi bobe bamone imilimo iyo ucita. 4 Pantu takwaba umuntu ucita ifintu mu bumfisolo ilyo alefwaya abantu bamwishibe. Apo iwe ulacita ifi fintu, uilange ku ba pano calo.” 5 Na kuba, bamunyina+ tabalemutetekela.+ 6 Na o Yesu abebele ati: “Inshita yandi tailafika,+ lelo imwe kuti mwaya ku mutebeto inshita fye iili yonse. 7 Icalo te kuti cimupate, lelo ine calimpata, pantu ine ndacishinina ukuti imilimo ya ciko yalibipa.+ 8 Kabiyeni ku mutebeto; ine nshileya nomba ku mutebeto, pantu inshita+ yandi tailafika.”+ 9 E ico ilyo abebele ifi fintu, ashele ku Galili.

10 Lelo ilyo bamunyina baile ku mutebeto, e lyo na o aile mu bumfisolo, taile apabuuta iyo.+ 11 Na baYuda batendeke ukumufwaya+ pa mutebeto, abati: “Ali kwi ulya muntu?” 12 Kabili abengi abali mwi bumba baletotoshanya pali ena.+ Bamo baleti: “Muntu umusuma.” Bambi na bo baleti: “Awe te musuma, alalufya abantu.” 13 Lelo takwali uwalelanda pali ena apabuuta pantu baletiina abaYuda.+

14 Ilyo nomba umutebeto wafikile pa kati, Yesu aile mwi tempele, alasambilisha.+ 15 E ico abaYuda balapapa, abati: “Bushe uyu muntu aishiba shani amalembo,+ uushapita na ku sukulu?”+ 16 Na o Yesu abaswike ati: “Ifyo nsambilisha te fyandi iyo, lelo fya wantumine.+ 17 Umuntu nga afwaya ukucita ukufwaya kwa kwa Lesa, akeshiba nga ifyo nsambilisha fyafuma kuli Lesa+ atemwa nanda fye ifyandi ne mwine. 18 Uulanda ifyakwe, ninshi afwaya umucinshi wakwe umwine; lelo uufwaya umucinshi+ wa wamutumine, uyu ena wa cine, kabili muli ena tamwaba ubupondamishi. 19 Bushe Mose tamupeele Amafunde?+ Lelo pali imwe tapaba nangu umo uukonka Amafunde. Nga cinshi mulefwaila ukunjipaya?”+ 20 Ibumba lyamwaswike aliti: “Uli ne cibanda.+ Nani alefwaya ukukwipaya?” 21 Na o Yesu pa kubaasuka atile: “Nacitile fye icipesha amano cimo,+ na imwe bonse mucili mulepapa. 22 Moneni, Mose amupeele ifunde lya kusembululwa,+ te kutila lyafumine kuli Mose, lelo lyafumine ku fikolwe,+ kabili mulasembulula umuntu pe sabata. 23 Mulasembulula umuntu pe sabata pa kuti mwitoba Amafunde ya kwa Mose. Bushe mwamfulilwa pantu naposeshe umuntu pe sabata?+ 24 Mwilapingula ukulingana ne mimonekele ya muntu, lelo mulepingula ubupingushi ubwalungama.”+

25 Awe abekashi bamo aba mu Yerusalemu, balatila: “Bushe te uyu muntu balefwaya ukwipaya?+ 26 Nomba moneni! alelanda pa cintubwingi,+ kabili tabalemweba nangu cimo. Bushe nalimo intungulushi na sho nomba nashishiba ukuti cine cine uyu e Kristu?+ 27 Lelo natwishiba uko uyu muntu afuma;+ nomba ilyo Kristu akesa, takwakabe uukeshiba uko akafuma.”+ 28 E ico ilyo Yesu alesambilisha mwi tempele asanswile ishiwi no kutila: “Mwalinjishiba, kabili mwalishiba no ko nafuma.+ Kabili nshaishila ne mwine neka,+ lelo uwantumine wa cine,+ kabili imwe tamwamwishiba.+ 29 Ine nalimwishiba,+ pantu nafuma kuli ena ico nine uwa kumulandilako, kabili E wantumine.”+ 30 E ico batendeke ukufwaya ukumwikata,+ lelo takwali uwamwikete, pantu inshita+ yakwe yali tailafika. 31 Lelo abengi mwi bumba balimutetekele;+ kabili baletila: “Ilyo Kristu akesa, bushe akacita ifipesha+ amano ifyacila pa fyo uyu muntu acita?”

32 Awe abaFarise baumfwile amabumba yaletotoshanya ifi fintu pali ena, kabili intungulushi sha bashimapepo na baFarise batumine abashilika aba kuyamwikata.+ 33 E ico Yesu atile: “Ncili na imwe inshita iinono ilyo nshilaya ku wantumine.+ 34 Mukamfwaya,+ lelo tamwakansange, kabili uko ine nkaba, imwe te kuti mwiseko.”+ 35 E ico abaYuda balalanshanya, abati: “Bushe ni kwi uyu muntu alepanga ukuya, uko ifwe te kuti tumusange? Bushe alepanga ukuya ku baYuda abasalanganina+ mu baGriki no kubasambilisha pamo na baGriki? 36 Bushe yalola mwi amashiwi ayo asosa ati, ‘Mukamfwaya, lelo tamwakansange, no ko ine nkaba imwe te kuti mwiseko’?”

37 Nomba pa bushiku bwa kulekelesha, ubushiku bukalamba ubwa mutebeto,+ Yesu aliiminine no kubilikisha ati: “Umuntu nga ali ne cilaka,+ ese kuli ine, anwe. 38 Uuntetekela,+ ‘Mu nda yakwe mukalafuma imilonga ya menshi ya mweo,’+ nga filya Amalembo yasosa.” 39 Lelo asosele ifi pa mupashi uo abamutetekele bali no kupokelela; pantu bali tabalapokelela umupashi,+ pantu Yesu ali talacindamikwa.+ 40 E ico bamo aba mwi bumba abaumfwile aya mashiwi, batendeke ukutila: “Cine cine, uyu e Kasesema.”+ 41 Bambi baleti: “Uyu e Kristu.”+ Lelo bamo baleti: “Bushe Kristu+ kuti afuma mu Galili?+ 42 Bushe Amalembo tayasosa ukuti Kristu akafuma mu bana ba kwa Davidi,+ na mu Betelehemu,+ umushi umwaikele Davidi?”+ 43 Awe mukwai kwali amalekano pa bantu pa mulandu wakwe.+ 44 Kabili bamo balefwaya ukumwikata, lelo takwali uwamwikete.

45 E ico abashilika babweleele ku ntungulushi sha bashimapepo na baFarise, kabili babepwishe ati: “Nga cinshi tamumuletele?” 46 Abashilika bayaswike, abati: “Takwatala akuba nangu umo uulanda ngo yu muntu.”+ 47 Na bo abaFarise bayaswike, abati: “Bushe na imwe nabamulufya?48 Bushe kuli bamo pa ntungulushi nelyo abaFarise abamutetekele?+ 49 Lelo ili ibumba ilishaishiba Amafunde lyalitiipwa.”+ 50 Nikodemo, umuFarise munabo, uwaile kuli Yesu, abepwishe ati: 51 “Bushe ukulingana na mafunde yesu tulapingula umuntu ilyo tatulamumfwa+ no kwishiba ifyo alecita?” 52 Bamwaswike, abati: “Bushe na iwe wafuma ku Galili? Fwaya mu Malembo kabili walasanga ukuti ku Galili takufuma kasesema.”*+

*Muli bamanyuskripti bamo (abetwa àBSy^s) tamwaba icipandwa 7 icikomo 53 ukufika ku cipandwa 8, icikomo 11, umwaba amashiwi yakonkapo (kabili yalipusanapusana mu milembelwe ya ciGriki iyalekanalekana na bamanyuskripti):

53 Awe baile umuntu onse ku mwakwe.

⁸ Yesu ena aile ku Lupili lwa Miolife. 2 Lelo ku macaca aile kabili kwi tempele, na bantu bonse batendeke ukwisa kuli ena, na o alikele, alabasambilisha. 3 Awe bakalemba na baFarise baletele umwanakashi uo basangile alecita ubucende, kabili ilyo bamwiminike pa kati, 4 batile kuli Yesu: “Mwe Kasambilisha, uyu mwanakashi bacimusanga alecita ubucende. 5 Kabili mu Mafunde, Mose atwebele ukupoola amabwe abanakashi ba musango yu. Nga kanshi imwe mulelandapo shani?” 6 Lelo balelanda ifi pa kuti bamweshe, pa kuti babe ne ca kumupeelelapo umulandu. Lelo Yesu aliineme, alalemba pa nshi ku munwe. 7 Ilyo batwalilile ukumwipusha, aliinwike, no kubeba ati: “Uushaba na lubembu pali imwe, abalilepo ukumupoola ilibwe.” 8 Awe aliineme na kabili, alalemba pa nshi. 9 Awe abaumfwile ifi, balafumapo umo umo, abakalamba e babalilepo, kabili Yesu ashele eka, no mwanakashi uwali pa kati kabo. 10 Ilyo Yesu ainwike, atile kuli ena: “We mwanakashi, bali kwi? Bushe tapali uukupeele umulandu?” 11 Na o atile: “Awe tapali, mukwai.” Na Yesu atile: “Nangu nine nshilekupeela umulandu. Kabiye; ukufuma lelo wilacita ulubembu.”

12 E ico Yesu abebele na kabili ati: “Ndi lubuuto+ lwa calo. Uunkonka takende mu mfifi nakalya,+ lelo akaba no lubuuto lwa mweo.” 13 Na baFarise bamwebele ati: “Iwe uleikalila ubunte we mwine; te bwa cine ubunte bobe iyo.” 14 Na o Yesu abaswike ati: “Nangu ndeikalila inte ne mwine, ubunte+ bwandi bwa cine, pantu nalishiba uko nafuma no ko nkaya.+ Lelo imwe tamwaishiba uko nafuma no ko nkaya. 15 Imwe mupingula ukulingana no buntunse;+ ine nshipingula umuntu nangu umo.+ 16 Lelo nga napingula, ubupingushi bwandi bwa cine, pantu nshaba neka iyo, lelo Tata uwantumine aba na ine.+ 17 Kabili, mu Mafunde yenu mwalembwa ukuti, ‘Ubunte bwa bantu babili bwa cine.’+ 18 Ine njishimika ubunte ne mwine, na Tata uwantumine anshimika ubunte.”+ 19 E ico bamwipwishe abati: “Wiso ali kwi?” Na o Yesu ayaswike ati: “Tamwaishiba ine nangu ni Tata.+ Amwishiba ine, nga mwaishiba na Tata.”+ 20 Aya mashiwi alandile ninshi ali umwali icipao+ ca ndalama, ilyo alesambilisha mwi tempele. Lelo takwali uwamwikete,+ pantu inshita+ yakwe yali tailafika.

21 E ico atile kabili kuli bena: “Ine ndeya, kabili mukalamfwaya,+ lelo mukafwila mu lubembu lwenu.+ Uko ine ndeya, imwe te kuti mwiseko.” 22 Awe abaYuda balasosa, abati: “Bushe uyu muntu akaipaya? Pantu aleti, ‘Uko ine ndeya, imwe te kuti mwiseko.’”+ 23 E ico abebele ati: “Imwe muli ba pano calo; ine ndi wa ku muulu.+ Imwe muli ba pano calo;+ ine nshili wa pano calo.+ 24 E co ndemwebela nati, Mukafwila mu membu shenu.+ Pantu nga tamutetekele ukuti nine wine, mukafwila mu membu shenu.”+ 25 Awe bamwipwishe, abati: “Ni webo nani?” Na o Yesu atile kuli bena: “Na kuba cinshi ndelandila na imwe? 26 Ndi ne fingi ifya kulanda pali imwe kabili ifya kumupingula. Na kuba, uwantumine wa cine, kabili filya fine naumfwile kuli ena e fyo ndesosa ku calo.”+ 27 Tabailwike ukuti alebeba pali Wishi. 28 E ico Yesu atile: “Ilyo mukemya+ Umwana wa muntu,+ e lyo mukeshiba ukuti nine wine,+ no kuti nshicita kantu nangu kamo neka;+ lelo filya fine Tata ansambilishe, e fyo na ine nanda.+ 29 Kabili uwantumine aba na ine; tandeka neka iyo, pantu lyonse ncita ifya kumusekesha.”+ 30 Awe ilyo alelanda ifi fintu, abengi balimutetekele.+

31 E ico Yesu atile kabili ku baYuda abamutetekele: “Nga mwaikalilila mu fyo nsosa,+ ninshi ca cine muli basambi bandi, 32 kabili mukeshiba icine,+ ne cine cikamulenga ukuba abantungwa.”+ 33 Na bo bamwaswike abati: “Tuli bana ba kwa Abrahamu+ kabili tatwatala atuba abasha ba muntu nangu umo.+ Nga iwe uleti shani, ‘Mukaba abantungwa?” 34 Na o Yesu abaswike ati: “Ndemweba icine cine, nati, Umuntu onse uucita ulubembu, musha wa lubembu.+ 35 Kabili umusha tekalilila mu ng’anda pe; lelo umwana alekalilila pe.+ 36 E ico Umwana nga amulubula, mukalubuka icine cine.+ 37 Nalishiba ukuti muli bana ba kwa Abrahamu; lelo mulefwaya ukunjipaya,+ pantu tamumfwila ifyo nsambilisha nakalya.+ 38 Ifyo namona kuli Tata,+ e fyo nanda;+ e ico na imwe citeni ifyo mwaumfwa kuli shinwe.” 39 Na bo bamwaswike, abati: “Shifwe ni Abrahamu.”+ E lyo Yesu abebele ati: “Nga muli bana ba kwa Abrahamu,+ citeni imilimo ya kwa Abrahamu. 40 Lelo nomba mulefwaya ukunjipaya, ne muntu uwamweba icine ico naumfwile kuli Lesa.+ Abrahamu tacitile ifi iyo.+ 41 Imwe citeni imilimo ya kwa shinwe.” Na bo bamwebele abati: “Tatwafyalilwe mu bulalelale; tuli na Shifwe umo,+ ni Lesa.”

42 Yesu atile kuli bena: “Lesa nga ni Shinwe, nga mwalintemwa,+ pantu nafuma kuli Lesa no kwisa pano calo.+ Nshaitendekele ukwisa, lelo ena E wantumine.+ 43 Nga cinshi mushishibile ifyo ndelanda? Pantu te kuti mumfwe amashiwi yandi.+ 44 Imwe shinwe ni Satana Kaseebanya,+ kabili mufwaya ukucita ifya lunkumbwa fya kwa shinwe.+ Ulya ali ni kepaya wa bantu ilyo atendeke,+ kabili tatwalilile mu cine, pantu tamwaba icine muli ena. Ilyo alanda ubufi, alanda ifya mu mutima wakwe, pantu wa bufi kabili e wishi wa bufi.+ 45 Lelo pantu ine nanda icine, tamuntetekela.+ 46 Nani pali imwe uwinganshinina ukuti nalicita ulubembu?+ Nga ca kuti nanda icine, mulandu nshi tamuntetekela? 47 Uwa kwa Lesa, omfwa amashiwi ya kwa Lesa.+ E mulandu wine tamumfwila, pantu tamuli ba kwa Lesa.”+

48 Na baYuda bamwaswike abati: “Bushe tatulungika ilyo tutila, Iwe uli mwina Samaria,+ kabili uli ne cibanda?”+ 49 Yesu ayaswike ati: “Nshili ne cibanda, lelo ncindika Tata,+ na imwe mulensaalula. 50 Lelo nshileifwaila umucinshi;+ kuli uuleufwaya kabili uulepingula.+ 51 Ndemweba icine cine, nati, Umuntu nga aleumfwila amashiwi yandi, takafwe iyo.”+ 52 Na baYuda batile kuli ena: “Nomba twaishiba ukuti uli ne cibanda.+ Abrahamu alifwa,+ na bakasesema na bo balifwa;+ lelo iwe uletila, ‘Umuntu nga aumfwila amashiwi yandi, takafwe iyo.’+ 53 Bushe uli mukalamba+ pali shifwe Abrahamu uwafwa? Kabili bakasesema balifwa.+ Iwe uleti ni wani?” 54 Yesu ayaswike ati: “Nga naicindamika, ubucindami bwandi bwa fye. Ni Tata e uncindamika,+ uo imwe mutila e Lesa wenu; 55 lelo tamwamwishiba.+ Nomba ine nalimwishiba.+ Kabili nga natila nshamwishiba kuti naba uwa bufi nga imwe. Lelo nalimwishiba kabili ndomfwila amashiwi yakwe.+ 56 Abrahamu shinwe alisekelele nga nshi ukuti amone ubushiku bwandi,+ kabili alibumwene no kusekelela.”+ 57 Na baYuda bamwebele ati: “Iwe ucili taulaba ne myaka amakumi yasano (50), nga wamwene shani Abrahamu?” 58 Yesu abebele ati: “Ndemweba icine cine, nati, Ilyo Abrahamu talabako, ninshi ine e ko naba.”+ 59 E ico batoolele amabwe ukuti bamupoole;+ lelo Yesu alifiseme no kufuma mwi tempele.

9 Nomba ilyo alepita, amwene umuntu uwafyelwe impofu. 2 Na basambi bakwe bamwipwishe abati: “Mwe Kasambilisha,+ nani abembwike+ pa kuti uyu muntu afyalwe impofu, bushe ni uyu wine muntu nelyo bafyashi+ bakwe?” 3 Yesu ayaswike ati: “Uyu muntu tabembwike na bafyashi bakwe bene tababembwike, lelo ni pa kuti imilimo ya kwa Lesa imonekele muli ena.+ 4 Tufwile ukubomba imilimo ya wantumine ilyo kucili akasuba;+ ubushiku+ buleisa ilyo umuntu nangu umo ashingabomba. 5 Ilyo ncili mu calo, nine lubuuto lwa calo.”+ 6 Pa numa ya kulanda ifi, afwishile amate pa nshi, akashile iloba na mate, no kusuba iloba pa menso ya muntu+ 7 no kumweba ati: “Kabiye, kasambe+ mu cishiba ca Siloamu”+ (ili ishiwi lyolola mu kuti ‘Amenshi ayatumwa’). Awe aliile, ayasamba,+ kabili abwelele alemona.+

8 E ico abena mupalamano na balemumona kale ukuti alelomba, balati: “Bushe uyu muntu te waleikala no kulalomba?”+ 9 Bamo baletila: “E o wine.” Bambi na bo baletila: “Awe, bapalana fye.” E lyo umwine atile: “Nine wine.” 10 E ico bamwipwishe abati: “Nga kanshi amenso yobe yashibwilwe shani?”+ 11 Na o ayaswike ati: “Umuntu uwitwa Yesu e wacikasa iloba, anshinga pa menso, no kunjeba ati, ‘Kabiye ku Siloamu,+ usambe.’ E fyo na ine naciyasamba, e pa kutampa ukumona.” 12 E ico bamwipwishe abati: “Ali kwi uyo muntu?” Na o atile: “Nshiishibe.”

13 Awe batwele uyu muntu uwali kale impofu ku baFarise. 14 Nomba bwali bushiku bwe Sabata+ ilyo Yesu akashile iloba no kushibula amenso ya uyu muntu.+ 15 E ico nomba abaFarise na bo batendeke ukumwipusha ifyo ashibwilwe amenso.+ Na o abebele ati: “Acimbika iloba pa menso, na ine nayasamba, no kumona nalamona.” 16 E ico abaFarise bamo baleti: “Uyu muntu tafuma kuli Lesa, pantu tasunga Isabata.”+ Bambi na bo baleti: “Bushe umuntu umubembu kuti acita shani ifipesha amano+ fya musango yu?” Awe pali na malekano+ pa kati kabo. 17 E ico baipwishe impofu na kabili ati: “Ulelandapo shani pali ena, apo nakushibula amenso?” Uyu muntu atile: “Ni kasesema.”+

18 Lelo abaYuda tabasumine ukuti ali ni mpofu no kuti balimushibwile amenso, basuka baita abafyashi ba muntu uo bashibwile amenso. 19 Kabili babepwishe abati: “Bushe uyu e mwana wenu uo mutila afyelwe impofu? Nga kanshi nomba alemona shani?” 20 Abafyashi bakwe bayaswike abati: “Natwishiba ukuti uyu mwana wesu no kuti afyelwe impofu. 21 Lelo tatwishibe ifyo caciba pa kuti nomba alemona, no umushibwile amenso tatumwishibe. Mukulu. Mwipusheni. Afwile ukuilandila umwine.” 22 Abafyashi bakwe balandile aya mashiwi pantu baletiina+ abaYuda, ico abaYuda balyumfwene ukuti ngo muntu asumina ukuti Yesu e Kristu, bali no kumutamfya mwi sunagoge.+ 23 E mulandu wine abafyashi bakwe balandile ati: “Mukulu, mwipusheni.”

24 E ico umuku walenga bubili baitile umuntu uwali impofu, no kumweba ati: “Cindika Lesa;+ ifwe natwishiba ukuti uyu muntu mubembu.” 25 Na o ayaswike ati: “Nampo nga mubembu nelyo iyo, ine nshiishibe. Ico ine njishibe fye ca kuti kale nali impofu, nomba ndemona.” 26 E ico bamwipwishe ati: “Acitile cinshi kuli iwe? Ashibwile shani amenso yobe?” 27 Na o abaswike ati: “Nimweba kale, lelo tamumfwile. Nga cinshi mulefwaila ukumfwa na kabili? Bushe na imwe mulefwaya ukuba abasambi bakwe?” 28 Awe balimusaalwile kabili batile: “Uli musambi wakwe, lelo ifwe tuli basambi ba kwa Mose. 29 Ifwe twaishiba ukuti Lesa alandile kuli Mose;+ lelo uyu muntu, tatwaishiba uko afuma.”+ 30 Na o abaswike ati: “Awe ici cena capesha amano,+ ica kuti tamwishibe uko afuma, lelo e unshibwile amenso. 31 Twalishiba ukuti Lesa tomfwa ku babembu,+ lelo umuntu nga alatiina Lesa no kucita ukufwaya kwakwe, alamumfwa.+ 32 Ukufuma ku kale tacabalile acumfwika ukuti umuntu ashibwile amenso ya wafyelwe impofu. 33 Uyu muntu nga ca kuti tafumine kuli Lesa,+ te kuti acite nangu cimo.” 34 Na bo bamwaswike abati: “Iwe wafyalilwe mu membu,+ bushe ni we uletusambilisha?” Awe bamutamfiishe ku nse!+

35 Awe Yesu alyumfwile ukuti nabamutamfisha ku nse, kabili ilyo amusangile, atile: “Bushe uletetekela Umwana+ wa muntu?” 36 No muntu ayaswike ati: “Mukwai, nani uyo wine ukuti imutetekele?” 37 Yesu atile kuli ena: “Naumumona, kabili e ulelanda na iwe.”+ 38 E lyo atile: “Namutetekela, mwe Shikulu.” Kabili alimufukamine, alatoota.+ 39 Na Yesu atile: “Ni kuli ubu bupingushi+ naishiile pano calo: pa kuti abashimona bamone,+ na bamona babe impofu.”+ 40 Ilyo abaFarise bamo abali nankwe baumfwile ifi fintu, bamwipwishe ati: “Bushe na ifwe+ tuli mpofu?” 41 Yesu abaswike ati: “Nga mwali impofu, nga tamwaba no lubembu. Lelo mutila, ‘Tulamona.’+ Kanshi mucili no lubembu.”+

10 “Ndemweba icine cine, nati, Uushingilila pa mwinshi+ we cinka lya mpaanga lelo aninina pambi, ninshi mupuupu kabili cipondo.+ 2 Lelo uwingilila pa mwinshi+ e kacema+ wa mpaanga.+ 3 Uwa pa mwinshi+ alamwiswila, ne mpaanga+ shilomfwa ishiwi lyakwe, kabili eta impaanga shakwe mu mashina no kushitungulwila pa nse. 4 Ilyo afumya ishakwe shonse pa nse, alashitangilila, ne mpaanga shilamukonka,+ pantu shalishiba ishiwi lyakwe.+ 5 Umuntu umbi tashimukonka lelo kuti shamufulumuka,+ pantu tashaishiba ishiwi lya bantu bambi.”+ 6 Yesu abebele ici cilangililo; lelo tabaishibe umwalolele ifyo alebeba.+

7 E ico Yesu asosele kabili ati: “Ndemweba icine cine, nati, nine mwinshi+ wa mpaanga. 8 Bonse abaitunga ukwishila mwi shina lyandi, bapuupu kabili fipondo;+ lelo impaanga tashibomfwa.+ 9 Nine mwinshi;+ uwaingilila pali ine akapusuka, kabili akengila no kufuma, no kusanga umulemfwe.+ 10 Umupuupu+ teshila icintu cimbi, kano ku kwiba no kwipaya no konaula.+ Ico naishila ni pa kuti impaanga shibe no bumi kabili shikwatishe ubumi. 11 Nine kacema musuma;+ kacema umusuma atuulila impaanga umweo wakwe.+ 12 Uwa ncito,+ uushili kacema kabili uushili umwine wa mpaanga, nga amona umumbulu uleisa, kuti asha impaanga sheka, no kufulumuka, no mumbulu waisashisansa no kushisalanganya,+ 13 pantu wa ncito+ fye kabili tasakamana impaanga.+ 14 Nine kacema musuma, kabili nalishiba impaanga shandi,+ ne mpaanga shandi shalinjishiba,+ 15 filya fine Tata aishiba ine, e fyo na ine naishiba Tata;+ kabili ndetuulila impaanga umweo wandi.+

16 “Kabili ndi ne mpaanga shimbi,+ ishishili sha mwi cinka ili;+ na sho ndi no kushileta, kabili shikomfwa ishiwi lyandi,+ e lyo kukaba umukuni umo, na kacema umo.+ 17 E mulandu wine Tata antemenwa,+ pantu ndetuula umweo wandi,+ pa kuti nkaupokelele na kabili. 18 Takuli uwaupoka kuli ine, lelo ndeutuula ne mwine. Ndi na maka ya ku-utuula kabili ndi na maka ya ku-upokelela na kabili.+ Ifunde+ ili napokelele kuli Tata.”

19 Na kabili kwali amalekano+ mu baYuda pa mulandu wa aya mashiwi. 20 Abengi baletila: “Aba ne cibanda+ kabili alipena. Nga cinshi mumumfwila?” 21 Bambi baletila: “Ifi te filanda umuntu uwakwata icibanda. Bushe icibanda kuti cashibula amenso ya mpofu?”

22 Pa nshita ilya mu Yerusalemu mwali umutebeto wa kusangulula. Yali ni nshita ya mpepo, 23 na Yesu ale-enda mwi tempele umwa kupita apali no mutenge umo baleita ati umwa kwa Solomone.+ 24 Awe abaYuda balimushingulwike, balamwipusha, abati: “Bushe ukaleka lilali ukutusakamika imitima? Nga ni we Kristu,+ twebe apabuuta.”+ 25 Na o Yesu abaswike ati: “Ine nalimwebele, lelo tamutetekela. Imilimo iyo ine ndecita mwi shina lya kwa Tata, e inshimika ubunte.+ 26 Lelo imwe tamutetekela, pantu tamuli mpaanga shandi.+ 27 Impaanga+ shandi shilomfwa ishiwi lyandi, na ine nalishiishiba, na sho shilankonka.+ 28 Na ine ndashipeela umweo wa muyayaya,+ kabili tashakonaulwe nakalya,+ kabili takuli uukashisompola mu minwe yandi.+ 29 Impaanga isho Tata+ ampeela shalicila pali fyonse,+ kabili takuli uwingashisompola mu minwe ya kwa Tata.+ 30 Ine na Tata tuli bamo.”+

31 Na kabili abaYuda batoolele amabwe ukuti bamupoole.+ 32 E lyo Yesu abebele ati: “Namulangile imilimo iingi iisuma iyafuma kuli Tata. Ni pa mulimo nshi mulempoolela amabwe?” 33 AbaYuda bamwaswike abati: “Te pa mulimo uusuma tulekupoolela amabwe, lelo ni pa mulandu wa kuponta,+ na pa mulandu wa kuti iwe nangu uli muntunse, uleipanga ukuba lesa.”+ 34 Yesu abaswike ati: “Bushe mu Mafunde+ yenu tamwalembwa ukuti: ‘Natile: “Imwe muli balesa”’?+ 35 Nga ca kutila aitile abo icebo ca kwa Lesa caishileko ati ‘balesa,’+ kabili Ilembo te kuti lyaluke nakalya,+ 36 bushe mule-eba ine ne o Tata asalile no kutuma mu calo amuti, ‘Uleponta,’ pantu ntile, Ndi Mwana wa kwa Lesa?+ 37 Nga nshilecita imilimo ya kwa Tata, mwintetekela.+ 38 Lelo nga ndecita imilimo yakwe, nangu tamuntetekela, tetekeleni iyi milimo,+ pa kuti mwishibe no kutwalilila ukusumina ukuti Tata aba muli ine, na ine naba Tata.”+ 39 E ico baeseshe kabili ukumwikata;+ lelo afumine pali bena.+

40 Awe aile kabili kwi shilya lya Yordani uko Yohane alebatishisha+ pa kubala, kabili aikele kulya. 41 Na bengi baishile kuli ena, balasosa abati: “Kwena, Yohane taacitile icishibilo nangu cimo, lelo fyonse ifyo Yohane alandile pali uyu muntu fyali fya cine.”+ 42 Na bengi kulya balimutetekele.+

11 Nomba kwali umuntu uwalwele, ishina lyakwe ni Lasaro uwaleikala ku Betani, mu mushi umo Maria na Marita+ nkashi nankwe baleikala. 2 Na kuba, uyu Maria e ulya uwasubile Shikulu amafuta ayanunkila+ no kukuumuna amakasa yakwe ku mushishi wakwe,+ e o ndume yakwe Lasaro alwele. 3 E ico bankashi yakwe balaishe amashiwi kuli Yesu, abati: “Mwe Shikulu, moneni! umuntu mwatemwa+ nalwala.” 4 Lelo ilyo Yesu aumfwile, atile: “Ubu bulwele te bwa kutwala ku mfwa, lelo bwa kucindikilamo Lesa,+ pa kuti Umwana wa kwa Lesa acindikilwemo.”

5 Nomba Yesu alitemenwe Marita na nkashi nankwe na Lasaro. 6 Lelo ilyo aumfwile ukuti Lasaro nalwala, aikele inshiku na shimbi shibili uko ali. 7 Awe pa numa ya ici, atile ku basambi: “Natuleya na kabili ku Yudea.” 8 Abasambi batile kuli ena: “Mwe Kasambilisha,+ ni nomba line aba ku Yudea bafwaile ukumupoola amabwe,+ bushe na kabili e ko mulefwaya ukuya?” 9 Yesu ayaswike ati: “Bushe mu kasuba tamwaba ama-awala ikumi na yabili (12)? Umuntu nga aenda mu kasuba+ taipununa, pantu alamona ulubuuto lwa pano calo. 10 Lelo umuntu nga aenda ubushiku,+ alaipununa, pantu takwete ulubuuto.”

11 Ilyo alandile ifi fintu, abebele ati: “Lasaro umunensu nalaala utulo, lelo ndeya mu kumubuusha.”+ 12 E ico abasambi bamwebele ati: “Mwe Shikulu, nga nalaala utulo, alaba fye bwino.” 13 Lelo ico Yesu alelanda ca kuti Lasaro nafwa. Kabili bena baleti alelanda pa kulaala fye utulo. 14 Na o Yesu e pa kubeba fye icishinka ati: “Lasaro nafwa,+ 15 kabili natemwa pa mulandu wa imwe ukuti nshaliko, pa kuti musumine. Lelo natuleya uko ali.” 16 E ico Toma, uwaleitwa Mpundu, atile ku basambi banankwe: “Natuleya na ifwe, ukuti tuyefwila pamo nankwe.”+

17 Awe ilyo Yesu afikile, asangile ukuti Lasaro ali nomba mu nshiishi inshiku shine.+ 18 Kabili Betani yali mupepi na Yerusalemu, nalimo amakilomita yatatu. 19 Na baYuda abengi baishile kuli Marita na Maria ku kubasansamusha+ pa mfwa ya kwa ndume yabo. 20 E ico ilyo Marita aumfwile ukuti Yesu aleisa, aile mu kumukumanya; lelo Maria+ aikele ku ng’anda. 21 Na Marita atile kuli Yesu: “Mwe Shikulu, nga mwali kuno ndume yandi nga tafwile.+ 22 Lelo ninjishiba ukuti na nomba line fyonse ifyo mwingalomba kuli Lesa,+ kuti amupeela.” 23 Yesu amwebele ati: “Ndume yobe alabuuka.”+ 24 Na o Marita atile: “Ninjishiba ukuti akema ilyo kukaba ukubuuka+ pa bushiku bwa kulekelesha.” 25 Yesu amwebele ati: “Nine kubuuka kabili umweo.+ Uuntetekela, nangu afwa, akaba no mweo na kabili;+ 26 na onse uuli no mweo kabili antetekela, takafwe nakalya.+ Bushe wasumina ifi?” 27 Na o amwaswike ati: “Ee, mwe Shikulu; nasumina ukuti ni mwe Kristu, Umwana wa kwa Lesa, Uo batile ali no kwisa mu calo.”+ 28 Kabili ilyo alandile ifi, aileita Maria nkashi nankwe ku mbali, ati: “Kasambilisha+ naisa, alekwita.” 29 Na o ilyo aumfwile ifi, aimine ulubilo no kuya kuli Yesu.

30 Na kuba, Yesu, ninshi talaingila na mu mushi, lelo ali kulya kwine Marita amukumanishishe. 31 Awe abaYuda abali na Maria mu ng’anda,+ abalemusansamusha, ilyo bamwene aima ulubilo no kufuma, balimukonkele, bena baletila aleya ku nshiishi+ ku kuloosha. 32 Na Maria ilyo afikile uko Yesu ali, no kumumona, awile ku makasa yakwe, alamweba ati: “Mwe Shikulu, nga mwali kuno, ndume yandi nga tafwile.”+ 33 Awe ilyo Yesu amumwene alelila na baYuda abaishile nankwe balelila, aumfwile ubulanda nga nshi, kabili alyumfwile ububi;+ 34 kabili atile: “Mwamubika kwi?” Bamwebele ati: “Mwe Shikulu, iseni mumone.” 35 Awe Yesu aponeshe ifilamba.+ 36 E lyo abaYuda balatila: “Moneni, ifyo amutemenwe!”+ 37 Lelo bamo batile: “Bushe uyu muntu uwashibwile amenso ya mpofu+ taali na maka ya kucilikila imfwa ya kwa uyu?”

38 E ico Yesu, ilyo aumfwile ubulanda nga nshi, aile ku nshiishi.+ Ne nshiishi iyi yali mu lucengo, kabili balicilikepo ilibwe.+ 39 Yesu atile: “Fumyenipo+ ilibwe.” Marita nkashi ya wafwile atile: “Mwe Shikulu, ino nshita alenunka, pantu napapita inshiku shine.” 40 Yesu amwebele ati: “Bushe nshikwebele ukuti nga wasumina, ulemona ubukata bwa kwa Lesa?”+ 41 E ico balifumishepo ilibwe. Na Yesu ainwine amenso mu muulu,+ no kutila: “Tata, ndemutootela ukuti mwang’umfwa.+ 42 Ca cine, nalishiba ukuti lyonse mulang’umfwa; lelo nalanda ifi pa mulandu wa bantu+ bali pano, pa kuti basumine ukuti ni mwe mwantumine.”+ 43 Kabili ilyo alandile ifi fintu, abilikishe ishiwi ilikalamba ati: “We Lasaro, fuma!”+ 44 Uwafwile alifumine ku nse, ninshi napombwa insalu ku makasa na ku maboko.+ E lyo na ku menso na ko kwalipombelwe insalu. Yesu abebele ati: “Mukakuleni, mulekeni aleya.”

45 E ico abaYuda abengi abaishile kuli Maria kabili abamwene ifyo Yesu acitile, balimutetekele;+ 46 lelo bamo baile ku baFarise no kubeba ifyo Yesu acitile.+ 47 E ico intungulushi sha bashimapepo na baFarise batekele icilye ca Sanhedrini,+ balasosa abati: “Tulecita shani, pantu uyu muntu alecita ifipesha amano ifingi?+ 48 Nga twamuleka ifi fine, bonse bakamutetekela,+ na bena Roma+ bakesa no kutupoka itempele+ no luko lwesu.” 49 Lelo umo pali bena, Kayafa, uwali shimapepo mukalamba ulya mwaka,+ abebele ati: “Tamwishibe nangu cimo, 50 kabili tamuletontonkanya ukutila kuti camuwamina umuntu umo nga afwila+ abantu ukucila uluko lonse ukonaulwa.”+ 51 Awe talandile ici umwine eka; lelo pa mulandu wa kuti ali shimapepo mukalamba ulya mwaka, aseseme ukuti Yesu ali no kufwila uluko, 52 kabili te kufwila uluko lweka fye, lelo pa kuti abana ba kwa Lesa abasalangana+ na bo abalonganike pamo.+ 53 Awe ukufuma bulya bushiku bapandene amano ukuti bamwipaye.+

54 E ico Yesu tale-enda apabuuta+ mu baYuda,+ lelo afumine kulya no kuya ku mpanga yali mupepi na matololo, no kwingila mu musumba uo beta ati Efraimu,+ kabili e ko aikele na basambi bakwe. 55 Awe ica kucilila+ ca baYuda cali mupepi, na bengi balifumine mu mishi no kuya ku Yerusalemu ilyo umutebeto wa ca kucilila taulaisa, pa kuti baisangulule ukulingana ne ntambi.+ 56 E ico baile balefwaya Yesu kabili balelanshanya ninshi nabeminina mwi tempele, abati: “Muletipo shani? Bushe ninshi takese ku mutebeto?” 57 Awe intungulushi sha bashimapepo na baFarise balipeele icipope ca kuti umuntu onse nga aishiba uko ali, afwile ukulanda, pa kuti bamwikate.

12 Kabili ilyo kwashele inshiku mutanda (6) pa kuti kube umutebeto wa ca kucilila, Yesu afikile ku Betani,+ ukwali Lasaro+ uo abuushishe ku bafwa. 2 E ico bamupekanishishe umulaalilo kulya, na Marita+ alebomba imilimo,+ kabili Lasaro ali pa baikele, balelya nankwe pe tebulo.+ 3 Na Maria abuulile hafu ya lita ya mafuta ayanunkila, ayaleitwa nardi.+ Kabili yali ni nardi wine wine, aya mutengo nga nshi, asubile amakasa ya kwa Yesu, no kukuumuna amakasa yakwe ku mushishi wakwe.+ Awe mu ng’anda mwaisula icena ca mafuta. 4 Lelo Yuda Iskariote,+ umusambi wakwe umo, uwali no kumufutuka, atile: 5 “Mulandu nshi bashashitishishe aya mafuta ayanunkila+ pa madenari imyanda itatu (300) no kupeela abapiina+ indalama?” 6 Lelo talandile ici pa mulandu wa kuti alesakamana abapiina, lelo ni pa mulandu wa kuti ali mupuupu,+ kabili e wakwete akabokoshi ka ndalama,+ kabili alebuulamo indalama ishalepooswamo. 7 E ico Yesu atile: “Muleke umwine, pantu alecita ici ku kumpekanishisha ubushiku bwa kunshiika.+ 8 Pantu abapiina+ mwakulaba na bo lyonse, lelo tamwakulaba na ine lyonse.”

9 Awe ibumba ilikalamba ilya baYuda baishibe ukuti ali kulya, kabili baliishile, te pa mulandu wa kwa Yesu eka iyo, lelo pa kuti bamone na Lasaro, uo abuushishe ku bafwa.+ 10 Intungulushi sha bashimapepo nomba shapangile ukwipaya na Lasaro wine,+ 11 ico ni pa mulandu wakwe abaYuda abengi baleila kulya no kutetekela Yesu.+

12 Ubushiku bwakonkelepo, ibumba ilikalamba ilyaishile ku mutebeto, ilyo lyaumfwile ukuti Yesu aleisa ku Yerusalemu, 13 babuulile imisambo ya tuncindu,+ no kufuma ku kuyamukumanya. Kabili balabilikisha,+ abati: “Pususheni!+ Alipaalwa uuleishila mwi shina lya kwa Yehova,+ imfumu+ ya kwa Israele!” 14 Lelo ilyo Yesu asangile umwana wa mpunda,+ aikele pali ena, ifyo calembwa, aciti: 15 “Witiina, we mwana mwanakashi Sione. Mona! Imfumu yobe ileisa,+ ikele pa mwana wa mpunda.”+ 16 Abasambi bakwe tabailwike ifi fintu pa kubala,+ lelo ilyo Yesu acindamikwe,+ e lyo baibukishe ukuti ifi fintu fyalilembelwe pali ena no kuti bacitile ifi fintu kuli ena.+

17 Na bantu abali nankwe ilyo aitile Lasaro+ ukufuma mu nshiishi no kumubuusha ku bafwa, baleshimika ifyo bamwene.+ 18 E ico ibumba, pa mulandu wa kuti balyumfwile ukuti acitile ici cipesha amano,+ na bo balimukumenye. 19 Awe abaFarise+ balalanshanya abati: “Mwamona, tapali nangu cimo ico tulecita. Moneni! Aba pano calo bonse balemukonka.”+

20 Nomba kwali abaGriki+ bamo pa baishile ku kupepa pa mutebeto. 21 Awe aba baile kuli Filipi+ uwafumine ku Betsaida wa ku Galili, balamulomba abati: “Mukwai, tulefwaya ukumona Yesu.”+ 22 Filipi aile-eba Andrea. E lyo Andrea na Filipi baile-eba Yesu.

23 Lelo Yesu abaswike ati: “Inshita naisa iya kuti Umwana wa muntu acindamikwe.+ 24 Ndemweba icine cine, nati, Uluseke lwa ngano nga taluponene mu mushili no kufwa, luba fye uluseke lumo; lelo nga lwafwa,+ e lyo lutwala ifisabo ifingi. 25 Uwatemwa umweo wakwe akaulofya, lelo uwapata umweo+ wakwe pano calo akausunga no kuba no mweo wa muyayaya.+ 26 Umuntu onse nga afwaya ukumombela, ankonke, kabili uko ndi e ko no mubomfi wandi akaba.+ Umuntu nga amombela, Tata akamucindika.+ 27 Nomba umweo wandi wasakamikwa,+ nga ndeti shani? Tata mpususheni ku nshita ino.+ Lelo ici e co naishila ku nshita ino. 28 Tata, cindikeni ishina lyenu.” Awe ishiwi+ lyafumine ku muulu aliti: “Nindicindika e lyo nkalicindika na kabili.”+

29 E ico ibumba lya bantu ilyaiminine palya no kumfwa ishiwi lyatile kubulukuta kwa mfula. Bambi balatila: “Ni malaika alandile nankwe.” 30 Na o Yesu atile: “Ishiwi ili talyumfwikike pa mulandu wandi, lelo ni pa mulandu wenu.+ 31 Nomba cino calo cilepingulwa; nomba kateka wa pano calo+ bakamupoosa ku nse.+ 32 Lelo ine ilyo bakanjimya+ ukufuma pano isonde, nkakula abantu ba misango yonse ukwisa kuli ine.”+ 33 Asosele ifi ku kulangilila umusango wa mfwa ali no kufwa.+ 34 Ne bumba lyamwaswike aliti: “Twaumfwile mu Mafunde ukuti Kristu ekalilila pe na pe;+ nga iwe ulesosa shani ukuti Umwana wa muntu bakamwimya?+ Bushe uyu wine Umwana wa muntu e nani?”+ 35 Na o Yesu abebele ati: “Ulubuuto luli no kuba na imwe inshita iinono. Endeni ilyo mucili no lubuuto, pa kuti imfifi+ imunasha; kabili uwenda mu mfifi teshiba uko aleya.+ 36 Ilyo mucili no lubuuto, tetekeleni ulubuuto, ukuti mube abana ba lubuuto.”+

Ilyo Yesu alandile ifi fintu, alifuminepo no kuyabelama. 37 Lelo nangu acitile ifipesha amano ifingi pa menso yabo, tabamutetekele, 38 ica kuti amashiwi ya kwa Esaya yalifikilishiwe aya kuti: “Mwe Yehova, nani atetekela ico twaumfwile?+ Kabili ni kuli nani Yehova asokolwela amaka yakwe?”+ 39 Icalengele ukuti betetekela ni co Esaya asosele no kuti: 40 “Alipofwisha amenso yabo no kuleka imitima yabo ukukunkuma,+ pa kuti amenso yabo yemona ne mitima yabo iyiluka no kwaluka, pa kuti mbaposhe.”+ 41 Esaya asosele ifi fintu pantu amwene ubukata bwakwe,+ kabili alandile pali ena. 42 Lelo abengi, kumo fye ne ntungulushi shimo, balimutetekele,+ lelo pa mulandu wa baFarise, tabalandile, pa kuti bebatamfya mwi sunagoge;+ 43 pantu batemenwe ukucindikwa ku bantu ukucila ukucindikwa kuli Lesa.+

44 Lelo Yesu abilikishe ati: “Uwatetekela ine, ninshi tatetekele ine neka, lelo atetekela no wantumine;+ 45 no wamona ine, ninshi amona no wantumine.+ 46 Ine naisa ngo lubuuto mu calo,+ ukuti onse uwantetekela eikalilila mu mfifi.+ 47 Lelo umuntu nga aumfwa amashiwi yandi lelo afilwa ukuyakonka, ine nshimupingula; pantu nshaishile ku kupingula icalo,+ lelo ku kupususha icalo.+ 48 Uwansuula no kukanapokelela amashiwi yandi ali no wa kumupingula. Amashiwi+ ayo nasosa e yakamupingula mu bushiku bwa kulekelesha; 49 pantu ine nshilanda ifyandi ne mwine, lelo Tata umwine uwantumine alimpeela ifunde lya fyo mfwile ukulanda no kusosa.+ 50 Kabili nalishiba ukuti ifunde lyakwe e mweo wa muyayaya.+ E ico ifyo nsosa, nsosa ukulingana ne fyo Tata anjebele.”+

13 Nomba, pa mulandu wa kuti Yesu alishibe ilyo kushilaba umutebeto wa ca kucilila ukuti inshita yalifikile+ iya kuti afume mu calo no kuya kuli Wishi,+ kabili apo atemenwe abantu bakwe abali mu calo,+ abatemenwe ukufika na ku mpela. 2 Awe ilyo bali pa mulaalilo, ninshi Satana Kaseebanya nabika kale ipange mu mutima wa kwa Yuda Iskariote,+ mwana Simone, ilya ukuti amufutuke,+ 3 kabili apo Yesu alishibe ukuti Wishi napeela fyonse mu minwe yakwe+ no kuti afumine kuli Lesa kabili aleya kuli Lesa,+ 4 aimine pa mulaalilo, afuulile ifya kufwala fyakwe ifya ku nse, no kufibika pa mbali. Kabili abuulile itaulo akaka mu musana.+ 5 E lyo abikile amenshi mu musambilo, atendeka no kusamba amakasa+ ya basambi no kuyakumuna kwi taulo ilyo akakile mu musana. 6 Afikile na pali Simone Petro. Na o amwipwishe ati: “Mwe Shikulu, bushe mulensamba amakasa?”+ 7 Na Yesu amwaswike ati: “Ifyo ndecita iwe tawishibe pali nomba, lelo ukeshiba limbi.”+ 8 Petro atile kuli ena: “Ine tamwansambeko amakasa.” Yesu amwaswike ati: “Nga nshikusambile, te kuti ube na ine.”+ 9 Na o Simone Petro atile kuli ena: “Mwe Shikulu, mwinsamba fye ku makasa, lelo na ku maboko na ku mutwe.” 10 Na Yesu amwebele ati: “Umuntu nga nasamba pa mubili+ takabila ukusamba na kabili, kano fye ku makasa, lelo aba uwasanguluka umubili onse. Kabili imwe mwalisanguluka, lelo te bonse.” 11 Alishibe uwali no kumufutuka.+ E mulandu wine alandile ati: “Tamuli abasanguluka bonse.”

12 Nomba ilyo asambile amakasa yabo, afwala ne fya kufwala fyakwe ifya ku nse, no kwikala pe tebulo na kabili, atile kuli bena: “Bushe namwishiba ifyo nacita kuli imwe? 13 Imwe munjita ati, ‘Kasambilisha,’+ kabili, ‘Shikulu,’+ ico cena mulalungika, pantu e fyo naba.+ 14 E ico ine nangu nine Shikulu kabili Kasambilisha, nga nsambile amakasa yenu,+ na imwe mufwile ukulasambana amakasa.+ 15 Pantu namulanga ifya kucita, ukuti ifyo nacita kuli imwe, e fyo na imwe mulecita.+ 16 Ndemweba icine cine, nati, Umusha tacila pali Shikulu wakwe, no watumwa tacila pa wamutumine.+ 17 Apo mwaishiba ifi fintu, mukaba ne nsansa nga muleficita.+ 18 Nshilelanda pali imwe bonse iyo; nalishiba abo nasala.+ Lelo ni pa kuti Ilembo lifikilishiwe,+ ilitila, ‘Uwalelyako umukate wandi e wanjalukila.’*+ 19 Nomba ndemweba ilyo cishilacitika, pa kuti ilyo cacitika,+ mukatetekele ukuti nine wine. 20 Ndemweba icine cine, nati, Uwapokelela onse uo natuma, ninshi apokelela na ine.+ Kabili uwampokelela, ninshi apokelela no wantumine.”+

21 Pa numa ya kulanda ifi, Yesu alisakamikwe nga nshi, kabili atile: “Ndemweba icine cine, nati, Umo pali imwe alemfutuka.”+ 22 Awe abasambi balaloleshanya, pantu tabaishibe uo alelandapo.+ 23 Pali umo pa basambi bakwe uwaikele mupepi na pa cifuba ca kwa Yesu, kabili Yesu alimutemenwe.+ 24 E ico Simone Petro acebwile ulya musambi, no kutila kuli ena: “Twebe uo alelandapo.” 25 Na o ashintilile pa cifuba ca kwa Yesu, no kumwipusha ati: “Mwe Shikulu, nani?”+ 26 Na o Yesu ayaswike ati: “Ni uyo nalapeela akamokolwa ako nalatobela mu mbale.”+ Awe ilyo atobele akamokolwa, akapeele kuli Yuda, mwana Simone Iskariote. 27 Kabili ilyo apokele akamokolwa, e lyo Satana aingile muli ena.+ E ico Yesu amwebele ati: “Ico ulecita, cita bwangu.” 28 Lelo abali na Yesu pa kulya tabaishibe umulandu amwebele ifi. 29 Na kuba, bamo baleti apo Yuda e walesunga akabokoshi ka ndalama,+ Yesu alemweba ati: “Kashite ifyo tulekabila pa mutebeto,” nelyo ukuti apeeleko abapiina ifintu fimo.+ 30 E ico, pa numa ya kupokelela akamokolwa, afumine pa nse ilyo line. Kabili bwali bushiku.+

31 E ico ilyo Yesu afumine, atile: “Nomba Umwana wa muntu acindamikwa,+ na Lesa acindamikilwa muli ena. 32 Na Lesa akamucindamika,+ kabili alemucindamika nomba line. 33 Mwe bana,+ ndi na imwe inshita iinono. Mukamfwaya; lelo ifyo naebele abaYuda nati, ‘Uko ndeya te kuti mwiseko,’+ e fyo nde-eba na imwe. 34 Ndemupeela ifunde ilipya, ilya kuti muletemwana; ifyo namutemenwe,+ e fyo na imwe muletemwana.+ 35 Nga muletemwana, e lyo bonse bakeshiba ukuti muli basambi bandi.”+

36 Simone Petro amwipwishe ati: “Mwe Shikulu, muleya kwi?” Yesu ayaswike ati: “Uko ndeya te kuti unkonke ino nshita, lelo ukankonka limbi.”+ 37 Petro atile kuli ena: “Mwe Shikulu, cinshi ico nshingamukonkela nomba? Nkapeela umweo wandi pa mulandu wenu.”+ 38 Yesu ayaswike ati: “Bushe kuti wapeela umweo obe pa mulandu wandi? Ndekweba icine cine, nati, ilyo mukolwe talalila, ulenkaana imiku itatu.”+

14 “Mwisakamikwa.+ Tetekeleni Lesa,+ tetekeleni na ine.+ 2 Mu ng’anda ya kwa Tata mwaba apa kwikala apengi.+ Nga tacali ifi, nga nalimwebele, pantu ndeya ku kumupekanishisha apa kwikala.+ 3 Kabili, nga naya no kumupekanishisha apa kwikala, nkesa na kabili,+ no kumupokelela ku mwandi,+ ukuti uko nkaba e ko na imwe mukabe.+ 4 Kabili uko ine ndeya, namwishiba inshila.”

5 Toma+ atile kuli ena: “Mwe Shikulu, tatwishibe uko muleya.+ Kuti twaishiba shani inshila?”

6 Yesu amwaswike ati: “Nine nshila+ ne cine+ no mweo.+ Takuli uwisa kuli Tata kano aishila muli ine.+ 7 Nga mwalinjishiba, nga mwalishiba na Tata; ukufuma pali nomba mwamwishiba, kabili mwamumona.”+

8 Na Filipi atile kuli ena: “Mwe Shikulu, tulangeni Shinwe, pa kuti tupeme.”

9 Yesu atile kuli ena: “Bushe naba pamo na imwe inshita yalepa ifi, kabili Filipi tawanjishiba na nomba? Uwamona ine, ninshi amona na Tata.+ Nga uleti shani, ‘Tulangeni Shinwe’?+ 10 Bushe taulesumina ukuti naba muli Tata, na Tata aba muli ine?+ Ifyo nsosa kuli imwe, nshilanda ifyandi ne mwine; lelo Tata uwaba muli ine, e ubomba imilimo yakwe.+ 11 Tetekeleni ifyo imwebele ukuti ine naba muli Tata, na Tata aba muli ine; nga te ifyo, tetekeleni pa mulandu wa milimo ndebomba.+ 12 Ndemweba icine cine, nati, Uuntetekela, na o akacita imilimo iyo ine ncita; kabili akacita imilimo iyacila+ pali iyi, pantu ine ndeya kuli Tata.+ 13 Kabili conse ico mwalombela mwi shina lyandi, nkacicita, pa kuti Tata acindamikilwe mu Mwana.+ 14 Nga mwalombela icintu conse mwi shina lyandi, nkacicita.

15 “Nga mwalintemwa, mukomfwila amafunde yandi;+ 16 kabili nkalomba Tata na o akamupeela kaafwa na umbi uukaba na imwe umuyayaya,+ 17 umupashi wa cine,+ uo aba muli ici calo bashingapokelela,+ pantu tabaumona kabili tabawishiba. Imwe mwaliwishiba, pantu waikala na imwe kabili waba muli imwe.+ 18 Nshakamushe nga bafwilwa.+ Nkabwela kuli imwe. 19 Kwashala fye inshita iinono, na ba muli ici calo tabakamone na kabili,+ lelo imwe mukamona,+ pantu ine naba uwa mweo, na imwe mukaba aba mweo.+ 20 Muli bulya bushiku mukeshiba ukuti ine naba muli Tata, na imwe mwaba muli ine, na ine naba muli imwe.+ 21 Uwasumina amafunde yandi no kuyakonka, e wantemwa.+ Kabili uwantemwa, Tata akamutemwa, na ine nkamutemwa no kuisokolola apabuuta kuli ena.”

22 E lyo Yuda,+ lelo te Iskariote iyo, aipwishe ati: “Mwe Shikulu, cinshi calenga ukuti mufwaye ukuilanga apabuuta kuli ifwe, no kukanailanga ku ba muli ici calo?”+

23 Na o Yesu ayaswike ati: “Umuntu nga antemwa, akomfwila+ amashiwi yandi, na Tata akamutemwa, kabili tukesa kuli ena no kwikala nankwe.+ 24 Uushantemwa, tomfwila amashiwi yandi; kabili amashiwi ayo muleumfwa te yandi, lelo ya kwa Tata uwantumine.+

25 “Ilyo ncili na imwe, nalanda ifi fintu kuli imwe. 26 Lelo kaafwa, umupashi wa mushilo, uo Tata akatumina mwi shina lyandi, akamusambilisha fyonse no kumwibukisha fyonse ifyo namwebele.+ 27 Namushila umutende, namupeela umutende wandi.+ Nshilemupeela nge fyo aba muli ici calo baupeela. Mwisakamikwa kabili mwitiina. 28 Namumfwa ifyo nandile, nati, ndeya kabili nkabwela kuli imwe. Nga mwalintemwa, nga mwasekelela ukuti ndeya kuli Tata, pantu Tata mukalamba+ pali ine. 29 E ico nomba namweba ilyo cishilacitika,+ pa kuti ilyo cikacitika, mukatetekele. 30 Nshalande na imwe ifingi, pantu kateka+ wa ici calo aleisa. Kabili takwete amaka pali ine,+ 31 lelo pa kuti aba muli ici calo beshibe ukuti nalitemwa Tata, filya fine na Tata ampeela ifunde,+ e fyo na ine ndecita. Imeni, natufume pano.

15 “Nine mwangashi wine wine,+ na Tata e mulimi.+ 2 Umusambo onse uwaba muli ine uushitwala ifisabo,+ alaufumyamo, na onse uutwala ifisabo alautungwila bwino bwino,+ pa kuti utwalishe.+ 3 Imwe mwalisanguluka kale pa mulandu wa mashiwi ayo nalanda kuli imwe.+ 4 Ikaleni muli ine, na ine nakulaikala muli imwe.+ Filya fine umusambo te kuti utwale ifisabo uwine weka, kano uli ku mwangashi, na imwe te kuti mutwale, kano mwaikala muli ine.+ 5 Nine mwangashi, imwe muli misambo. Uwaikala muli ine, na ine naikala muli ena, ena e utwalisha;+ pantu ukwabula ine te kuti mucite nangu cimo. 6 Umuntu nga tekele muli ine, aba ngo musambo uo bapoosa no kuuma wauma; na bantu balonganya iyo misambo, baipoosa na mu mulilo, na yo yapya.+ 7 Nga mwaikala muli ine, na mashiwi yandi yaikala muli imwe, lombeni conse ico mulefwaya kabili cikacitika.+ 8 Muli ici e mo Tata acindamikilwa, nga muletwalisha, no kuba abasambi bandi icine cine.+ 9 Filya fine Tata antemwa,+ kabili filya fine na ine natemwa imwe, ikaleni mu kutemwa kwandi. 10 Nga mwakonka amafunde yandi,+ mukekala mu kutemwa kwandi, ifyo na ine nkonka amafunde ya kwa Tata+ no kwikala mu kutemwa kwakwe.

11 “Namweba ifi fintu pa kuti mube ne nsansa shandi kabili musekelele nga nshi.+ 12 Ili e funde lyandi, ukuti muletemwana ifyo na ine namutemwa.+ 13 Takuli uwaba no kutemwa ukwacila pali uku, ukwa kuti umuntu atuulile abanankwe umweo wakwe.+ 14 Muli banandi nga mulecita ifyo mweba.+ 15 Nomba nshakulamwita ukuti muli basha bandi, pantu umusha teshiba ifyo shikulu wakwe acita. Lelo nakulamwita ati abanandi,+ pantu fyonse ifyo naumfwa kuli Tata nalimwishibisha.+ 16 Te imwe mwansalile, lelo nine namusalile, kabili namusontele ukuti muletwala ifisabo,+ no kuti ifisabo fyenu fikalilile; pa kuti conse ico mwalomba Tata mwi shina lyandi, akamupeela.+

17 “Ifi e fyo ndemweba, ukuti muletemwana.+ 18 Aba muli ici calo nga bamupata, mwishibe ukuti babalilepo ukupata ine ilyo bashilamupata.+ 19 Nga mwali muli ici calo, aba muli ici calo nga balimutemwa pantu ninshi muli babo.+ Nomba apo tamuli ba muli ici calo,+ lelo ine namusala mu ba muli ici calo, e co aba muli ici calo bamupatila.+ 20 Ibukisheni amashiwi ayo namwebele, ukuti, Umusha tacila pali shikulu wakwe. Nga bacushishe ine, na imwe bakamucusha;+ nga bakonkele amashiwi yandi, bakakonka na mashiwi yenu. 21 Lelo bakacita fyonse ifi kuli imwe pa mulandu we shina lyandi, pantu tabaishiba uwantumine.+ 22 Nga nshaishile no kulanda kuli bena, nga tabali no lubembu;+ lelo nomba tabali ne ca kubepeseshamo ulubembu lwabo.+ 23 Uwapata ine, ninshi apata na Tata.+ 24 Nga nshacitile muli bena imilimo iyo umuntu umbi ashacitile,+ nga tabali na lubembu;+ nomba balimona imilimo yandi kabili balimpata, bapatila kumo na Tata.+ 25 Lelo ni pa kuti amashiwi ayalembwa mu Mafunde yabo yafikilishiwe, ayatila, ‘Bampatile apabula umulandu.’+ 26 Kaafwa nga aisa uo nkamutumina ukufuma kuli Tata,+ umupashi wa cine, uufuma kuli Tata, ena akanjikalilako ubunte; + 27 kabili na imwe muli no kulanandilako,+ pantu imwe mwaba na ine ukufuma apo natendekele.

16 “Nalanda ifi fintu kuli imwe pa kuti mwilufya icitetekelo cenu.+ 2 Abantu bakamutamfya mu masunagoge.+ Kabili inshita ileisa ilyo onse uwamwipaya akatila alebombela Lesa.+ 3 Lelo bakacita ifi fintu pantu tabaishiba Tata e lyo na ine tabanjishiba.+ 4 Kabili nalanda ifi fintu kuli imwe, pa kuti ilyo inshita ya ifi fintu ikafika, mukebukishe ukuti nalimwebele.+

“Nshamwebele ifi fintu pa kubala, pantu nali na imwe. 5 Lelo nomba ndeya ku wantumine,+ kabili takuli nangu umo pali imwe uulenjipusha, ati, ‘Muleya kwi?’ 6 Lelo pantu nalanda ifi fintu kuli imwe, imitima yenu ili no bulanda nga nshi.+ 7 Lelo ndemweba icine cine, nati, Ndeya pa kuti cikamuwamine. Pantu nga nshiile, kaafwa+ takese kuli imwe nakalya; lelo nga naya, nkamutuma kuli imwe. 8 Kabili ilyo akesa, akashinina aba mu calo pa lubembu na pa bulungami e lyo na pa bupingushi:+ 9 intanshi, pa lubembu,+ pantu tabantetekela;+ 10 e lyo na pa bulungami,+ pantu ndeya kuli Tata kabili tamwakamone kabili;11 e lyo na pa bupingushi,+ pantu kateka wa pano calo napingulwa.+

12 “Ncili ne fingi ifya kumweba, lelo te kuti mufyumfwe pali nomba.+ 13 Lelo ilyo kaafwa akesa, umupashi wa cine,+ akamutungulula mu cine conse, pantu takalande ifyakwe umwine, lelo ifyo aumfwa e fyo akalanda, kabili akamweba ifileisa.+ 14 Ulya akancindika,+ pantu akapokelela ifyo nkamweba, kabili e fyo akamweba.+ 15 Fyonse ifyo Tata akwata fyandi.+ E mulandu wine nsoseele nati apokelela ifyo imweba, kabili na imwe e fyo amweba. 16 Kwashala inshita iinono, tamwakamone na kabili,+ lelo mu nshita iinono kabili, mukamona.”

17 E ico bamo pa basambi bakwe balaipushanya, abati: “Nga calola mwi ici atweba ati, ‘Kwashala inshita iinono, tamwakamone na kabili, lelo mu nshita iinono mukamona,’ kabili ati no kuti, ‘pantu ndeya kuli Tata’?” 18 E ico batile: “Nga calola mwi ici asosa ati, ‘inshita iinono’? Tatwishibe umo aloseshe.” 19 Yesu alishibe+ ukuti balefwaya ukumwipusha, e ico abebele ati: “Bushe muleipushanya pali ici, pantu ntile, Kwashala inshita iinono, tamwakamone, e lyo no kuti mu nshita iinono mukamona na kabili? 20 Ndemweba icine cine, nati, Mukaloosha no kulila, lelo aba muli ici calo bakasekelela; mukaba no bulanda,+ lelo ubulanda bwenu bukaaluka insansa.+ 21 Ilyo umwanakashi alepaapa, alaba no bulanda, pantu inshita yakwe naifika;+ lelo ilyo umwana afyalwa, tebukisha ubucushi na kabili pa mulandu wa kusekelela ukuti umuntu nafyalwa pano calo. 22 E ico na imwe, muli no bulanda nga nshi; lelo nkamumona na kabili ne mitima yenu ikasekelela,+ kabili tapali uukamupoka ukusekelela kwenu. 23 Na muli bulya bushiku+ tamwakanjipushe icipusho nangu cimo. Ndemweba icine cine, nati, Nga mwalomba icintu conse+ kuli Tata, akamupeela mwi shina lyandi.+ 24 Ukufika na nomba, tamwalombela nangu cimo mwi shina lyandi. Lombeni kabili mukapokelela, ukuti musekelele nga nshi.+

25 “Nalandila ifi fintu kuli imwe mu mapinda.+ Inshita ileisa ilyo nshakalandile kuli imwe kabili mu mapinda, lelo nkamweba pali Tata ukwabula ukupita mu mbali. 26 Muli bulya bushiku mukalombela mwi shina lyandi, kabili nshilemweba nati nkamulombela kuli Tata. 27 Pantu Tata umwine alimutemwa, ico mwalintemwa,+ kabili mwalitetekela ukuti naishile nge ntumi ya kwa Tata.+ 28 Nafumine kuli Tata, no kwisa pano calo. Kabili ndefuma pano calo, no kuya kuli Tata.”+

29 Abasambi bakwe batile: “Moneni! Nomba tamulepita mu mbali pa kulanda, kabili tamulelandila mu mapinda. 30 Nomba twaishiba ukuti mwalishiba fyonse,+ kabili tamukabila umuntu nangu umo ukumwipusha.+ Muli ici twasumina ukuti mwafumine kuli Lesa.”+ 31 Na o Yesu abaswike ati: “Bushe mwasumina nomba? 32 Moneni! Inshita ileisa, kabili naisa, ilyo mukasalangana umo umo ku ng’anda ku mwakwe,+ kabili mukansha neka; lelo nshili neka, pantu Tata ali na ine.+ 33 Nalanda ifi fintu kuli imwe, pa kuti mube no mutende muli ine.+ Pano calo mulacula, lelo shipeni! Ine nincimfya icalo.”+

17 Ilyo Yesu alandile ifi fintu, aloleshe mu muulu,+ kabili atile: “Tata, inshita yafika; cindamikeni umwana wenu, ukuti umwana na o amucindamike,+ 2 pantu mwamupeela amaka pa bantunse bonse,+ ukuti bonse abo mwamupeela,+ abapeele umweo wa muyayaya.+ 3 Nomba pa kuti babe no mweo wa muyayaya,+ kano baishiba*+ imwe mwe Lesa wa cine mweka,+ na Yesu Kristu uo mwatumine.+ 4 Ine nalimucindamika+ pano isonde, pantu nimpwisha umulimo uo mwampeele ukubomba.+ 5 E ico nomba, mwe Tata, ncindamikeni, lekeni mbe pamo na imwe pa kuti nkwate ubukata ubo nakwete lintu nali pamo na imwe ilyo icalo cishilabako.+

6 “Nalenga ishina lyenu ukwishibikwa ku bantu abo mwampeele ukufuma mu ba muli ici calo.+ Bali benu, na imwe mwabapeele kuli ine, kabili nabomfwila icebo cenu. 7 Nomba nabeshiba ukuti fyonse ifyo mwampeele fyafuma kuli imwe; 8 pantu amashiwi ayo mwampeele, nalibapeela,+ kabili baliyatetekela kabili nabeshiba icine cine ukuti nafumine kuli imwe,+ kabili nabasumina no kuti ni mwe mwantumine.+ 9 Ndebalombelako; nshilelombela aba muli ici calo,+ lelo abo mwampeele; pantu benu, 10 kabili ifyandi fyonse fyenu, na fyonse ifyenu fyandi,+ kabili nincindamikwa muli bena.

11 “Ine nomba nshili muli ici calo, lelo bena bali muli ici calo+ kabili ine ndeisa kuli imwe. Mwe Tata wa mushilo, bacingilileni+ pa mulandu we shina lyenu ilyo mwampeela, pa kuti babe umo ifyo na ifwe twaba umo.+ 12 Ilyo nali na bo nalebacingilila+ pa mulandu we shina lyenu ilyo mwampeela; kabili nimbacingilila, kabili tapali nangu umo uwaonaika,+ kano fye uuli no konaulwa,+ pa kuti ilembo lifikilishiwe.+ 13 Lelo nomba ndeisa kuli imwe, kabili ndelanda ifi fintu ilyo ncili pano calo pa kuti babe sana ne nsansa shandi.+ 14 Nabapeela icebo cenu, lelo aba muli ici calo nababapata,+ ico tabali ba muli ici calo, ifyo na ine nshili wa muli ici calo.+

15 “Nshilemulomba ukuti mubafumye muli ici calo, lelo ukuti mulebacingilila ku mubifi.+ 16 Te ba muli ici calo,+ ifyo na ine nshili wa muli ici calo.+ 17 Balengeni ukuba aba mushilo+ ku cine; icebo cenu+ e cine.+ 18 Ifyo mwantumine muli ici calo, e fyo na ine nabatumine muli ici calo.+ 19 Kabili ndeilenga ukuba uwa mushilo pa mulandu wabo, pa kuti na bo babe aba mushilo+ ku cine.

20 “Nshilelombela aba beka, lelo na bakantetekela pa kumfwa amashiwi yabo;+ 21 ukuti bonse babe umo,+ ifyo imwe Tata mwaba muli ine, na ine naba muli imwe,+ ukuti na bo babe muli ifwe,+ pa kuti aba muli ici calo basumine ukuti ni mwe mwantumine.+ 22 Kabili nimbapeela ubukata ubo mwampeela, pa kuti babe umo ifyo na ifwe twaba umo.+ 23 Ine muli bena, na imwe muli ine, pa kuti babe abaikatana icine cine,+ pa kutila aba muli ici calo beshibe ukuti ni mwe mwantumine, no kuti mwalibatemwa filya fine mwantemwa. 24 Mwe Tata, ndefwaya ukuti abo mwampeela tukabe na bo uko nkaba,+ pa kuti bakamone ubukata ubo mwampeela, pantu mwantemenwe ilyo icalo+ tacilabako.+ 25 Mwe Tata uwalungama,+ aba muli ci calo tabamwishiba nakalya;+ lelo ine nalimwishiba, kabili aba nabeshiba ukuti ni mwe mwantumine.+ 26 Kabili nalenga beshibe+ ishina lyenu kabili nkalenga likeshibikwe, pa kuti babe no kutemwa uko mwantemenweko, na ine mbe muli bena.”+

18 Ilyo apwile ukulanda ifi fintu, Yesu na basambi bakwe baile kwi bala ilyali kwi shilya lya mupokapoka wa Kidrone,+ kabili e mo aingile pamo na basambi bakwe.+ 2 Na Yuda uwamufutwike, alishibeko, pantu Yesu aleyako ilingi na basambi bakwe.+ 3 E ico Yuda asendele ibumba lya bashilika na balelonda itempele abo intungulushi sha bashimapepo na baFarise batumine, baile ne myenge ne fisaniko ne fyanso.+ 4 Nomba apo Yesu alishibe ifyali no kumucitikila,+ aile kuli bena no kubepusha ati: “Nani mulefwaya?” 5 Bamwaswike ati: “Yesu umwina Nasarete.”+ Na o abebele ati: “Nine.” Na Yuda uwamufutwike,+ aiminine pamo na bo.

6 Lelo ilyo abebele ati: “Nine,” babwelele cimfutya numa,+ bawa na pa nshi. 7 E ico abepwishe na kabili ati: “Bushe nani mulefwaya?” Batile: “Yesu umwina Nasarete.” 8 Yesu ayaswike ati: “Nimweba nati, nine. E ico nga nine mulefwaya, lekeni aba baleya”; 9 pa kuti amashiwi yafikilishiwe ayo atile: “Pali abo mwampeele, nshalufyapo nangu umo.”+

10 Awe Simone Petro apo alikwete ulupanga, alilusomwene, no kukoma umusha wa kwa shimapepo mukalamba no kumuputula ukutwi kwa ku kulyo.+ Ishina lya ulya musha ni Maliki. 11 Lelo Yesu atile kuli Petro: “Bwesesha ulupanga umo lwikala.+ Bushe nshifwile ukunwena+ muli kapu* Tata ampeela?”

12 E lyo ibumba lya bashilika no mukalamba wa bashilika na balelonda itempele abo abaYuda batumine baikete Yesu no kumukaka, 13 kabili babalile bamutwala kuli Anasi; pantu ali shifyala Kayafa, uwali shimapepo mukalamba ulya mwaka.+ 14 Uyu Kayafa e wapandile abaYuda amano ukuti cawama kuli bena ukuti umuntu umo afwile abantu abengi.+

15 Nomba Simone Petro no musambi umbi balekonka Yesu.+ Awe ulya musambi alishibikwe kuli shimapepo mukalamba, kabili aingile na Yesu mu lubansa lwa kwa shimapepo mukalamba, 16 lelo Petro aiminine pa nse pa mwinshi.+ E ico umusambi umbi, uwaishibikwe kuli shimapepo mukalamba, alifumine, ayalanda no wa pa mwinshi, no kwingisha Petro. 17 E lyo umubomfi umwanakashi uwa pa mwinshi aipwishe Petro ati: “Bushe na iwe tauli musambi wa uyu muntu?” Na o atile: “Awe.”+ 18 Kwali abasha na balelonda itempele abaiminine baleonta umulilo wa malasha,+ pantu bakoseshe umulilo wa malasha, ico kwalitalele. Na Petro aiminine pamo na bo, aleonta.

19 Na shimapepo mukalamba aipwishe Yesu pa basambi bakwe na pa fyo alesambilisha. 20 Yesu amwaswike ati: “Nalandile ku ba pano calo apabuuta. Nalesambilisha lyonse mu masunagoge na mwi tempele,+ umo abaYuda bonse balongana; kabili nshalandile nangu cimo mu bumfisolo. 21 Cinshi ico mulenjipushisha? Ipusheni abaleumfwa ifyo nalebeba. Balishiba ifyo nalandile.” 22 Ilyo asosele ifi, umo pa balelonda itempele uwaiminine mupepi atobele Yesu ulupi+ ku menso, ati: “Bushe ifyo e fya kwasuka shimapepo mukalamba?” 23 Na o Yesu amwaswike ati: “Nga nalufyanya ukulanda, nshinina ico nalufyanya; lelo nga ninungika, cinshi ico wangumina?” 24 E lyo Anasi amutumine kuli Kayafa, shimapepo mukalamba, ninshi nabamukaka.+

25 Na Simone Petro aliminine, aleonta umulilo. E lyo bamwipwishe ati: “Bushe na iwe tauli musambi wa uyu muntu?” Alikeene ati: “Awe nshili musambi wakwe.”+ 26 Umo pa basha ba kwa shimapepo mukalamba, uwali lupwa lwa muntu Petro aputwile ukutwi,+ atile: “Bushe nshacikumona nankwe mwi bala iwe?” 27 Lelo Petro alikeene na kabili; awe ilyo line na mukolwe alililile.+

28 E lyo basendele Yesu ukufuma kuli Kayafa no kumutwala kwi sano lya mulashi.+ Kabili lwali lucelocelo. Lelo bena tabaingile mwi sano lya kwa kateka, pa kuti bekowela+ lelo balye ica kucilila. 29 E ico Pilato afumine pa nse apo bali, no kubepusha ati: “Mulandu nshi mulepeela uyu muntu?”+ 30 Na bo bayaswike ati: “Uyu muntu nga te ncitatubi, nga tatumuletele kuli imwe.” 31 E ico Pilato atile kuli bena: “Musendeni mwe bene no kumupingula ukulingana ne funde lyenu.”+ Na baYuda bamwebele ati: “Tatwasuminishiwa ukwipaya umuntu iyo.”+ 32 Ici cali pa kuti amashiwi Yesu alandile ku kulangilila imfwa ali no kufwa yafikilishiwe.+

33 E ico Pilato aingile na kabili mwi sano lya mulashi, aitile Yesu no kumwipusha ati: “Bushe uli mfumu ya baYuda?”+ 34 Yesu ayaswike ati: “Bushe mwailandila fye ici mwe bene, nelyo pali bambi abamwebele pali ine?”+ 35 Na o Pilato ayaswike ati: “Bushe ine ndi muYuda? Uluko lobe ne ntungulushi sha bashimapepo e bakuletele kuli ine.+ Cinshi wacita?” 36 Yesu ayaswike ati:+ “Ubufumu bwandi te bwa pano calo.+ Ubufumu bwandi abuba bwa pano calo, ababomfi bandi nga balwa+ ukuti nipeelwa ku baYuda. Lelo ubufumu bwandi te bwa pano calo iyo.” 37 E ico Pilato atile: “Bushe kanshi uli mfumu?” Yesu ayaswike ati: “Ni we wasosa ukuti ndi mfumu.+ Ici e co nafyalilwa, kabili ici e co naishila pano calo, pa kuti mbe inte ku cine.+ Onse uwaba ku cine,+ omfwa ishiwi lyandi.”+ 38 Pilato amwipwishe ati: “Icine cinshi?”

Pa numa ya kulanda ifi, afumiine na kabili ku baYuda, no kubeba ati: “Nshimusangile no mulandu nakalya.+ 39 Nomba ukulingana ne fyo mwe bene mucita, mfwile ukumukakwila umuntu umo pa mutebeto wa ca kucilila.+ Bushe mulefwaya ukuti imukakwile imfumu ya baYuda?” 40 E lyo babilikishe kabili, abati: “Mwitukakwila uyu iyo. Tukakwileni Baraba!” Nomba Baraba ali cipondo.+

19 Awe pa nshita ilya, Pilato abuulile Yesu no kumufopaula.+ 2 Kabili abashilika bapangile icisote ca myunga no kumufwika ku mutwe, bamufwikile ne ca kufwala icakashikila;+ 3 balaisa na kuli ena, abati: “Mwapoleni, mwe Mfumu ya baYuda!” Kabili balemutoba amapi ku menso.+ 4 E lyo Pilato afumiine pa nse na kabili, no kutila ku bantu: “Moneni! nafumisha uyu muntu kuli imwe pa kuti mwishibe ukuti nshimusangile no mulandu.”+ 5 Awe Yesu afumiine pa nse, nafwala icisote ca myunga ne ca kufwala icakashikila. Na Pilato atile: “Moneni! Umwaume!” 6 Lelo ilyo intungulushi sha bashimapepo na bamushika bamumwene, babilikishe, abati: “Mupoopeleni! Mupoopeleni!”+ Na o Pilato abebele ati: “Musendeni mwe bene, muyemupoopela, pantu ine nshimusangile no mulandu.”+ 7 AbaYuda bamwaswike abati: “Twalikwata ifunde,+ kabili ukulingana ne funde afwile ukufwa, pantu atile mwana wa kwa Lesa.”+

8 Awe ilyo Pilato aumfwile aya mashiwi, alitiinine nga nshi; 9 e ico aingile na kabili mwi sano lya mulashi, no kwipusha Yesu ati: “Ni kwi wafuma?” Lelo Yesu tamwaswike.+ 10 E ico Pilato amwipwishe ati: “Bushe taulenjasuka?+ Bushe tawishibe ukuti ndi na maka ya kukukakula, kabili ndi na maka ya kukupoopela pa cimuti?” 11 Yesu amwaswike ati: “Tamwingaba na maka nangu yamo pali ine kano yapeelwa kuli imwe ukufuma ku muulu.+ E mulandu wine umuntu uumpeele kuli imwe ali no lubembu ulwacilapo.”

12 Pali ici Pilato alafwaya inshila ya kumukakwilamo. Lelo abaYuda babilikishe, abati: “Nga mwakakula uyu muntu, ninshi tamuli cibusa wa kwa Kaisare. Umuntu onse uwaibika pa bufumu alwisha Kaisare.”+ 13 E ico, Pilato, pa kumfwa aya mashiwi, afumiishe Yesu pa nse, aikele na pa cipuna ca kupingwilapo, mu ncende iitwa Apalambatikwa Amabwe, lelo mu ciHebere petwa ati Gabata. 14 Awe bwali bushiku bwa kupekanya+ ica kucilila; cali nalimo iawala ilyalenga mutanda (6).* Kabili atile ku baYuda: “Moneni! Imfumu yenu!” 15 Lelo babilikishe abati: “Mwipayeni! Mwipayeni! Mupoopeleni!” Pilato atile kuli bena: “Bushe mpoopele imfumu yenu?” Ne ntungulushi sha bashimapepo shamwaswike ashiti: “Ifwe tatwakwata imfumu imbi, kano fye Kaisare.”+ 16 Awe pali ilya nshita, amupeele kuli bena ukuti bayemupoopela pa cimuti.+

E lyo basendele Yesu. 17 Kabili ali-isendele icimuti umwine,+ afuma+ aya na petwa ati Pa Cipanga, mu ciHebere Golgota;+ 18 kabili palya pene e po bamupoopele pa cimuti,+ na bambi babili pamo nankwe, umo uku lubali, na umbi uku lubali, na Yesu ali pa kati.+ 19 Pilato alembele ne cishibilo no kucibika pa cimuti. Palembelwe ati: “Yesu Umwina Nasarete, Imfumu ya baYuda.”+ 20 Na baYuda abengi babelengele ici cishibilo, pantu apo Yesu apoopelwe pali mupepi na ku musumba;+ kabili calembelwe mu ciHebere, mu ciLatini, na mu ciGriki. 21 Lelo intungulushi sha bashimapepo isha baYuda, shalaeba Pilato, ashiti: “Mwilemba amuti, ‘Imfumu ya baYuda,’ lelo lembeni amuti uyu atile, ‘Ndi Mfumu ya baYuda.’” 22 Pilato ayaswike ati: “Ifyo nembele, nacipwa ninemba.”

23 Nomba ilyo abashilika bapoopele Yesu pa cimuti, babuulile ifya kufwala fyakwe ifya ku nse no kufyakanya pane, babulapo na cimo cimo. Babuulile ne ca kufwala ca mu kati. Lelo ica kufwala ca mu kati tacakwete umulundo ukufuma pa muulu no kushinguluka konse.+ 24 E ico balanshenye ati: “Twicilepula iyo, lelo natupendule, tumone uwalacisenda.” Ici calicitike pa kuti ilembo lifikilishiwe ilitila: “Balyakene ifya kufwala fyandi, bapendwilile na pa ca kufwala candi.”+ Kabili ifi fine e fyo abashilika bacitile.

25 Awe mupepi na pa cimuti ico Yesu apoopelwepo, paiminine nyina,+ na nkashi nankwe uwa kwa nyina; Maria+ muka Klopa, na Maria umwina Magadala.+ 26 E ico Yesu ilyo amwene nyina no musambi uo atemenwe+ nabeminina, atile kuli nyina: “Moneni, umwana wenu!” 27 E lyo atile kuli ulya musambi: “Mona, banoko!” Ukufuma ilya nshita, umusambi alimusendele ku mwakwe.

28 Pa numa ya ifi, ilyo Yesu aishibe ukuti nomba fyonse nafipwa, pa kuti ilembo lifikilishiwe, atile: “Naumfwa icilaka.”+ 29 Pali umutondo nawisulamo umwangashi uwakantuka. Awe babuulile umwepu ukwali umwangashi wakantuka no ku-ubika kwi tete, no kumubika ku kanwa.+ 30 Nomba ilyo apokelele umwangashi wakantuka, Yesu atile: “Fyonse nomba fyapwa!”+ kabili ainamike umutwe, aleka no mweo.+

31 Awe abaYuda balombele Pilato ukuti babafune amolu no kufumyapo ifitumbi fyabo, apo bwali bushiku bwa Kupekanya,+ pa kuti ifitumbi fiishala+ pa fimuti pe Sabata, (pantu bwali bushiku bwe Sabata ilikalamba).+ 32 E ico abashilika bailefuna amolu ya wa ntanshi, na ya umbi, uwakobekwe mupepi nankwe. 33 Lelo ilyo bafikile pali Yesu, basangile ukuti nafwa kale, kabili tabafunine amolu yakwe. 34 Lelo umushilika umo amulashile ifumo mu lubafu,+ kabili ilyo line umulopa na menshi fyalifumine. 35 Kabili uwamwene ici, e washimika, kabili ifyo ashimika fya cine, kabili ulya muntu alishiba ukuti alanda ica cine, pa kuti na imwe musumine.+ 36 Ifi fintu fyacitike pa kuti ilembo lifikilishiwe, ilitila: “Takafunwepo ifupa nangu limo.”+ 37 Kabili ilembo limbi litila: “Bakalolesha ku o balashile.”+

38 Nomba pa numa ya ifi, Yosefe uwa ku Arimatea, uwali umusambi wa kwa Yesu lelo uwa mu bumfisolo pa mulandu wa kutiina abaYuda,+ alombele Pilato ukuti asende icitumbi ca kwa Yesu; na Pilato alimusuminishe.+ E ico aishile no kusenda icitumbi cakwe.+ 39 Na Nikodemo, uwaishile ubushiku umuku wa kubalilapo, aletele icasakaniwamo muri na aloye, nalimo amakilogramu 33.+ 40 E ico babuulile icitumbi ca kwa Yesu no kucipomba mu nsalu pamo ne fyanunkila,+ ukulingana ne fyo abaYuda bacita pa kupekanya ukushiika. 41 Awe apo apoopelwe pali ibala, na mwi bala mwali inshiishi iipya,+ umo bashatalile ababika umuntu nangu umo. 42 E ico, pa mulandu wa bushiku bwa kupekanya+ ubwa baYuda, babikile Yesu mulya, pantu inshiishi yali mupepi.

20 Pa bushiku bwa ntanshi+ mu mulungu, Maria umwina Magadala aile ku nshiishi ku macaca, ilyo pacili napafiita, kabili amwene ukuti nabakunkulushapo ilibwe pa nshiishi.+ 2 E ico alibutwike no kuya kuli Simone Petro na ku musambi umbi,+ uo Yesu atemenwe, no kubeba ati: “Nabasenda Shikulu mu nshiishi,+ kabili tatwishibe uko bamubikile.”

3 E ico Petro+ no musambi uyu umbi balifumine, balaya ku nshiishi. 4 Awe balya babili balabutukila pamo; lelo uyu umusambi umbi alibutukishe ukucila Petro, abalilepo no kufika ku nshiishi. 5 Kabili ilyo aineme no kulengelamo, amwene insalu shili pa nshi,+ lelo ukwingila kwena taingilemo. 6 Na Simone Petro aishile alemukonka, aingile na mu nshiishi. Kabili amwene insalu isho bamupombelemo shili pa nshi,+ 7 ne cisalu icakakilwe ku mutwe tacali pamo ne nsalu isho bamupombelemo, lelo cafungilwe ceka. 8 Awe pali ilya nshita, umusambi umbi uwabalilepo ukufika ku nshiishi na o alingilemo, kabili alimwene no kusumina. 9 Pantu bali tabalailuka ilembo lya kuti ali no kwima ku bafwa.+ 10 E ico abasambi babwelele ku mwabo.

11 Lelo Maria ena aiminine ku nse mupepi ne nshiishi, alelila. Kabili ilyo acili alelila, alineme ukuti alengele mu nshiishi 12 kabili amwene bamalaika+ babili nabafwala ifyabuuta, bekele umo ku mutwe na umbi ku ntambalilo, apaleele icitumbi ca kwa Yesu. 13 Na bo bamwipwishe ati: “We mwanakashi, cinshi ulelila?” Na o atile: “Nabasenda Shikulu, kabili nshishibe uko bamubikile.” 14 Pa numa ya kulanda ifi, alipilibwike no kumona Yesu naiminina, lelo taishibe ukuti ni Yesu.+ 15 Yesu amwipwishe ati: “We mwanakashi, cinshi ulelila? Nani ulefwaya?”+ Nomba apo alemona kwati mulimi, atile kuli ena: “Mukwai, nga ni mwe mumusendele, njebeni uko mumubikile, na ine ndeyamusenda.” 16 Na o Yesu atile kuli ena: “Maria!”+ Awe ilyo apilibwike, atile kuli ena mu ciHebere: “Raboni!”+ (e kutila, “Kasambilisha!”) 17 Yesu amwebele ati: “Winjikata. Pantu nshilaya kuli Tata. Lelo kabiye kuli bamunyinane+ no kubeba ati: ‘Ndeya kuli Tata,+ kabili Shinwe, kuli Lesa wandi,+ kabili Lesa wenu.’”+ 18 Awe Maria umwina Magadala aile no kuyashimikila abasambi ati: “Nimona Shikulu!” no kuti e wamwebele ifi fintu.+

19 E ico ilyo cali icungulo, pali bulya bushiku ubwa ntanshi mu mulungu,+ Yesu alimoneke+ no kwiminina pa kati kabo, nangu ca kuti balikomene ifiibi umwali abasambi pa mulandu wa kutiina+ abaYuda, kabili abebele ati: “Umutende ube na imwe.”+ 20 Kabili pa numa ya kulanda ifi, abalangile amaboko yakwe no lubafu.+ Na basambi balisekelele+ pa kumona Shikulu. 21 E ico Yesu na kabili atile kuli bena: “Umutende ube na imwe. Ifyo Tata antumine,+ e fyo na ine ndemutuma.”+ 22 Kabili ilyo alandile ifi, abapuutile umupu, no kutila kuli bena: “Pokeleleni umupashi wa mushilo.+ 23 Nga mwabelela abantu uluse pa membu shabo,+ ninshi babelelwa uluse; kabili nga tamubelele abantu uluse pa membu shabo, ninshi tababelelwe uluse.”+

24 Lelo Toma,+ umo pa basambi ikumi na babili (12), uo baleita ati Mpundu, tali na bo ilyo Yesu aishile. 25 Na basambi bambi balemweba abati: “Natumona Shikulu!” Lelo atile kuli bena: “Nshasumine+ nakalya kano mone mu maboko yakwe ifibala fya misomali, no kubika umunwe wandi mu fibala fya misomali, no kubika iminwe yandi mu lubafu lwakwe.”+

26 Awe ilyo papitile inshiku cinekonsekonse (8), abasambi bakwe bali na kabili mu ng’anda, na Toma ali pamo na bo. Yesu alingile, nangu ca kuti balikomene ifiibi, kabili aiminine pa kati, no kutila: “Umutende ube na imwe.”+ 27 E lyo atile kuli Toma: “Bika umunwe obe apa, mona na maboko yandi. Kabili buula iminwe yobe+ no kubika mu lubafu lwandi, uleke ukutwishika, lelo usumine.” 28 Na o Toma ayaswike ati: “Mwe Shikulu wandi, Lesa wandi!”+ 29 Yesu amwebele ati: “Bushe pantu wamona ine e co wasuminina? Balipaalwa abasumina nangu tabalamona.”+

30 Kwena, Yesu acitile ifishibilo na fimbi ifingi ku menso ya basambi, ifishalembwa muli ili ibuuku.+ 31 Lelo ifi fyalilembwa+ pa kuti musumine ukuti Yesu ni Kristu Umwana wa kwa Lesa, no kuti nga mwasumina,+ mube no mweo ukupitila mwi shina lyakwe.

21 Pa numa ya ifi fintu, Yesu amoneke na kabili ku basambi pali bemba wa Tiberia; kabili ifi e fyo amoneke. 2 Bali pamo Simone Petro na Toma, uo baleita ati Mpundu,+ na Natanaele+ uwa ku Kana wa mu Galili, na bana ba kwa Sebede+ na bambi babili aba mu basambi bakwe. 3 Simone Petro abebele ati: “Ine nalaya ku kwipaya isabi.” Na bo batile: “Na ifwe twalaya nobe.” Awe e fyo bafumine bayanina no bwato, lelo ubushiku bonse tabaipeye nangu limo.+

4 Lelo ilyo bwaile buleca, Yesu aiminine mu lulamba, nomba abasambi tabaishibe ukuti ni Yesu.+ 5 E lyo Yesu abepwishe ati: “Mwe bana, bushe namukwata ifya kulya?” Bamwaswike, abati: “Awe!” 6 Na o abebele ati: “Teyeni isumbu ku kulyo kwa bwato, kabili mulesangako isabi.”+ Awe baliteyele, lelo tabali na maka ya kulikula pantu mwali isabi ilingi nga nshi.+ 7 E ico umusambi uo Yesu atemenwe+ atile kuli Petro:+ “Ni Shikulu!” Awe Simone Petro pa kumfwa ukuti ni Shikulu, afwele ica kufwala cakwe ica ku muulu, pantu alisamwinine, aipoosele na muli bemba. 8 Lelo abasambi bambi baishile mu kabwato, pantu tabali ukutali na ku mulundu, batalwike fye nalimo intampulo umwanda umo (100), ninshi balekula isumbu umwali isabi.

9 Nomba ilyo bafikile ku mulundu, bamwene pali umulilo wa malasha,+ ne sabi nalibikwapo, no mukate. 10 Yesu abebele ati: “Letenipo isabi ilyo mwaipaya nomba line.” 11 E ico Simone Petro aninine mu bwato no kukulila isumbu ku mulundu umwali isabi ilikalamba, ilyali umwanda umo na makumi yasano na litatu (153). Awe nangu lyafulile ifi, isumbu talyalepwike. 12 Yesu abebele ati: “Iseni mulye.”+ Tapali nangu umo pa basambi uwashipile ukumwipusha ati: “Ni mwe bani?” pantu balishibe ukuti ni Shikulu. 13 Yesu abuulile umukate abapeela+ kabili abapeele ne sabi. 14 Uyu nomba e muku walenga itatu+ uo Yesu amoneke ku basambi bakwe ukutula apo abuukiile ku bafwa.

15 Awe ilyo bapwishishe ukulya, Yesu aipwishe Simone Petro ati: “Simone mwana Yohane, bushe walintemwa ukucila isabi ili?”+ Na o amwaswike ati: “Ee, mwe Shikulu, mwalishiba ukuti nalimutemwa.”+ Atile kuli ena: “Liisha utwana twandi utwa mpaanga.”+ 16 Kabili amwipwishe umuku walenga ibili ati: “Simone mwana Yohane, bushe walintemwa?”+ Na o amwaswike ati: “Ee, mwe Shikulu, mwalishiba ukuti nalimutemwa.” Atile kuli ena: “Cema utwana twandi utwa mpaanga.”+ 17 Kabili amwipwishe umuku walenga itatu ati: “Simone mwana Yohane, bushe walintemwa?” Petro aiketwe ubulanda pantu amwipwishe umuku walenga itatu ati: “Bushe walintemwa?” E ico amwaswike ati: “Mwe Shikulu, mwalishiba ifintu fyonse;+ mwalishiba ukuti nalimutemwa.” Na o Yesu amwebele ati: “Liisha utwana twandi utwa mpaanga.+ 18 Ndekweba icine cine, nati, Ilyo wali umwaice, waleifwalila we mwine no kuya uko ulefwaya. Lelo ilyo ukakota, ukalatambalika amaboko yobe no muntu umbi akalakufwika+ no kukutwala uko ushilefwaya.”+ 19 Alandile ici ku kulangilila umusango wa mfwa+ ali no kucindikilamo Lesa.+ Kabili ilyo asosele ifi, amwebele ati: “Ulenkonka.”+

20 Ilyo Petro apilibwike, amwene umusambi uo Yesu atemenwe+ alekonka, ulya pa mulaalilo uwashintilile pa cifuba cakwe kabili uwamwipwishe ati: “Mwe Shikulu, nani alemufutuka?” 21 Awe ilyo amumwene, Petro aipwishe Yesu ati: “Mwe Shikulu, ngo yu ena?” 22 Na o Yesu amwaswike ati: “Nga nafwaya ukuti ekale mpaka nkese,+ bushe mulandu obe? Iwe ulenkonka fye.” 23 Awe aya mashiwi yasalangene mu ba bwananyina, ukuti ulya musambi takafwe. Lelo Yesu tamwebele ukuti takafwe, atile fye: “Nga nafwaya ukuti ekale+ mpaka nkese, bushe mulandu kuli iwe?”

24 Uyu wine e musambi+ uuleshimika ili lyashi kabili e walilembele, kabili twaishiba ukuti ifyo ashimika fya cine.+

25 Na kuba, kwaliba ifintu na fimbi ifingi ifyo Yesu acitile, ifyo nga fyalilembelwe fyonse, ndetila, pano calo tapengakumana amabuuku ayengalembwa.+