Imilimo ya Batumwa

1 We Teofile,+ mwi buuku lya ntanshi e mo nalembele fyonse ifyo Yesu atendeke ukucita ne fyo alesambilisha,+ 2 ukufika fye na pa bushiku asendelwe mu muulu,+ pa numa ya kupeela amafunde ku batumwa abo asalile ukupitila mu mupashi wa mushilo.+ 3 Pa numa ya kucula kwakwe,+ Yesu kabili ailangile uwa mweo ku batumwa bakwe ukupitila mu bushininkisho bwine bwine ubwingi, pa kumoneka kuli bena mu nshiku amakumi yane (40) no kusosa ifya bufumu bwa kwa Lesa.+ 4 Kabili ilyo alelanshanya na bo abebele ati: “Mwifuma mu Yerusalemu,+ lelo mulelolela ico Tata alaya,+ ico mwaumfwile kuli ine; 5 pantu Yohane, ena, alebatishisha mu menshi, lelo tapakapite inshiku ishingi, imwe mukabatishiwa mu mupashi+ wa mushilo.”

6 Nomba, ilyo balongene, bamwipwishe abati: “Mwe Shikulu, bushe ni pali ino nshita mulebwesesha ubufumu+ kuli Israele?” 7 Na o abebele ati: “Te mulimo wenu ukwishiba inshita atemwa imyaka,+ pantu Tata e wakwatapo amaka pali ifyo;+ 8 lelo mukapokelela amaka+ ilyo umupashi wa mushilo ukesa pali imwe, kabili mukaba inte+ shandi mu Yerusalemu+ na mu Yudea monse na mu Samaria,+ na ku mpela ya pano isonde.”+ 9 Cilya fye apwa ukulanda na bo, awe balamulolekesha ilyo alesendwa mu muulu,+ ne kumbi lyalimufimbile ica kuti baleka no kumumona.+ 10 Kabili cilya balelolekesha mu muulu ilyo aleya,+ moneni! kwamoneke abaume babili abafwele ifyabuuta+ beminine mupepi na bo, 11 kabili batile: “Mwe bena Galili, cinshi ico mwiminine pano mulelolesha mu muulu? Uyu Yesu uwasendwa pali imwe ukuya mu muulu akesa mu musango+ umo wine uo mwamumwenamo aleya mu muulu.”

12 E lyo babwelele+ ku Yerusalemu ukufuma ku lupili ulwitwa Ulupili lwa Miolife, ululi mupepi na ku Yerusalemu, apalepa ulwendo lwa bushiku bwe sabata.*+ 13 E ico, ilyo bafikile, baile mu muputule wa pa muulu,+ umo baleikala, Petro na Yohane, Yakobo na Andrea, Filipi na Toma, Bartolomeo na Mateo, Yakobo mwana Alfeo na Simone uwaleitwa ati uwapimpa, na Yuda mwana Yakobo.+ 14 Aba bonse baali no mutima umo uwa kulapepa lyonse,+ balepepela pamo na banakashi+ bamo na Maria nyina wa kwa Yesu pamo pene na bamunyina+ ba kwa Yesu.

15 Nomba mu nshiku shilya shine e mo Petro aimine mu kati ka ba bwananyina (ibumba lya bantu bonse pamo bali nalimo umwanda umo na makumi yabili [120]), no kutila: 16 “Mwe baume, bamunyinane, umupashi+ wa mushilo walandiile libela muli Davidi pali Yuda,+ uwatungulwile abaikete Yesu.+ Calilingile ukuti ili lembo lifikilishiwe+ 17 pantu ali pamo na ifwe,+ kabili alibombeleko uyu mulimo.+ 18 (E ico, uyu wine muntu, ashitile+ impanga mu malipilo ya bubifi,+ kabili ilyo aponene ubukupeeme,+ alepwike pa kati, na mala yakwe yonse yalifumine. 19 Kabili ici caishibikwe ku bekashi bonse aba mu Yerusalemu, e mulandu wine ilya mpanga mu lulimi lwabo bainikile ati, Akeldama, e kutila, Impanga ya Mulopa.) 20 Pantu mwi buuku lya Amalumbo, mwalembwa ati, ‘Ing’anda yakwe ishale icibolya, kabili pebapo umwikashi,’+ mwalembwa no kuti, ‘Lekeni umbi abuule bukangalila bwakwe.’+ 21 E ico nacilinga ukuti pa baume abaleba na ifwe mu nshita yonse iyo Shikulu Yesu aali na ifwe,+ 22 ukufuma fye ilyo abatishiwe kuli Yohane+ ukufika fye ne lyo asendelwe ku muulu,+ pasontwe umo uwali inte pamo na ifwe iya kubuuka kwa kwa Yesu.”+

23 Awe baiminike babili, Yosefe uwitwa Barisaba, kabili uwaleitwa Yusti, na Matia. 24 Kabili bapepele, abati: “Mwe Yehova, mwe baishiba imitima ya bantu bonse,+ sonteni pali aba baume babili uo musalile, 25 alebomba uyu mulimo no kubuula ubutumwa,+ ifyo Yuda ashiile pa kukonka inshila yakwe umwine.” 26 E ico bapendwilile+ pali bena, kabili icipendwilo caponene pali Matia; awe bamusanshishe ku batumwa ikumi na umo (11).+

2 Nomba ilyo ubushiku bwa Pentekoste+ bwali tabulapwa, bonse bali pa ncende imo, 2 kabili mu kupumikisha mu muulu mwaumfwikike icongo kwati cipuupu icikali ica mwela, kabili cakumene ing’anda yonse umo baikele.+ 3 Kabili indimi ishapala umulilo+ shamoneke kuli bena kabili shalisalangene, no kwikala pali umo na umo, 4 e lyo bonse baiswilemo umupashi+ wa mushilo no kutendeka ukulanda indimi shalekanalekana,+ nge fyo umupashi walebeba.

5 Awe mu Yerusalemu mwaikele abaYuda,+ abaume abaletiina Lesa,+ abafumine mu nko shonse isha mwi samba lya muulu. 6 E ico, ilyo ici ciunda caumfwikike, abantu abengi nga nshi balilongene no kupapa, pantu umo na umo aumfwile abasambi balelandila mu lulimi lwakwe. 7 Awe calibapeseshe amano, balapapa, abati: “Moneni, aba bonse abalelanda, bushe te bena Galili?+ 8 Nga nomba caba shani ukuti ifwe bonse umo umo tulebomfwila mu lulimi lwesu? 9 Abena Partia na bena Media+ na bena Elamu,+ na bekashi ba mu Mesopotamia, na mu Yudea+ na mu Kapadokia,+ aba mu Ponte+ na mu Asia,*+ 10 na mu Frugia+ na mu Pamfulia,+ aba mu Egupti na ba mu fitungu fya mu Libya, ifyabela lwa ku Kurene, na balebeshi abafumine ku Roma, abaYuda na basangwike abaYuda,+ 11 abena Krete+ na bena Arabia,+ tulebomfwa balelandila mu ndimi shesu ifikalamba ifya kwa Lesa.” 12 Awe bonse balipapile no kupeshiwa amano, balalanshanya, abati, “Bushe ici calola mwi?” 13 Lelo, bambi balabapumya, abati: “Nabanwesha umwangashi uwalowa.”+

14 Lelo Petro aimine pamo na batumwa banankwe ikumi na umo (11)+ no kwimya ishiwi lyakwe, alabeba, ati: “Mwe baume ba mu Yudea na mwe bekashi bonse aba mu Yerusalemu,+ umfweni, kabili kutikeni ku fyo nalalanda. 15 Aba bantu tabakolelwe iyo,+ nge fyo muletunganya, pantu ino nshita li-awala lyalenga butatu* ilya buno bushiku. 16 Lelo, ici e casoseelwe muli kasesema Yoele ukuti, 17 “‘Kabili mu nshiku sha kulekelesha,” e fyo Lesa atila, “nkapongolwela umupashi+ wandi pa bantunse bonse, kabili abana benu abaume na bana benu abanakashi bakasesema na balumendo bakamona ifimonwa na bakalamba bakalota ifiloto;+ 18 e lyo na pa babomfi bandi abaume na pa babomfi bandi abanakashi nkapongolwelapo umupashi wandi muli shilya nshiku, na bo bakasesema.+ 19 Kabili nkacita ifipesha amano mu muulu ne fishibilo pe sonde, umulopa no mulilo ne cushi icafiitisha;+ 20 akasuba+ kakaaluka imfifi no mweshi ukaaluka umulopa ilyo tabulaisa ubushiku bwa kwa Yehova ubukalamba kabili ubwa lulumbi.+ 21 Kabili onse uwalilila kwi shina lya kwa Yehova akapusuka.’”+

22 “Mwe bena Israele, umfweni aya mashiwi: Yesu umwina Nasarete,+ uo Lesa alangile pa mbilibili kuli imwe mu fya maka na mu fipesha amano+ na mu fishibilo ifyo Lesa acitiile muli ena mu kati ka imwe,+ nge fyo imwe mwe bene mwaishiba, 23 na kuba, Lesa alishibe ukuti uyu Yesu akapeelwa mu minwe yenu no kufwaya e fyo alefwaya.+ Kabili mwamwipeye pa kusuminisha bampulamafunde ukumupoopela pa cimuti.+ 24 Lelo Lesa alimubuushishe+ ilyo akakwile ifikakilo fya mfwa,+ pantu imfwa tayakwete amaka ya kumwikatilila.+ 25 E o Davidi alandilepo ilyo atile: ‘Yehova aaba pe ku cinso candi; pantu aba ku kwa kulyo kwandi ukuti nitelententa.+ 26 E ico umutima wandi walisangalele no lulimi lwandi lwalandile amashiwi ya nsansa nga nshi. Kabili umubili wandi ukekala mwi subilo;+ 27 pantu tamwakanshe mu Nshiishi,* nangu ukuleka uwa cishinka wenu ukubola.+ 28 Namunenga ukwishiba inshila sha ku mweo, kabili icinso cenu cikanenga ukusangalala.’+

29 “Mwe baume, bamunyinane, tulelanda ukwabula umwenso kuli imwe pa cikolwe Davidi, ukuti alifwile+ no kushiikwa ne nshiishi yakwe tuli na yo ukufika na kuli buno bushiku. 30 E ico, apo aali kasesema kabili alishibe ukuti Lesa alapile umulapo kuli ena ukuti akabika umwana uo akafyala pa cipuna cakwe ica bufumu,+ 31 amwenene libela no kulanda pa kubuuka kwa kwa Kristu,* ukuti takashale mu Nshiishi* no mubili wakwe tawakabole.+ 32 Uyu Yesu, Lesa alimubuushishe, na ifwe bonse twalishiba ukuti alibuuka.+ 33 E ico apo Lesa, Wishi, alimusansabika pa kumubika pa cipuna ku kwa kulyo kwakwe+ no kumupeela umupashi wa mushilo uo amulaile,+ na o napongolwela pali ifwe uyu mupashi uo mulemona no kumfwa. 34 Na kuba Davidi taninine mu muulu,+ lelo umwine atile, ‘Yehova aebele Shikulu, ati: “Ikala ku kwa kulyo kwandi,+ 35 mpaka nkalenge abalwani bobe ukuba nga kapuna ka kunyantapo amakasa yobe.’”+ 36 E ico, lekeni bonse aba mu ng’anda ya kwa Israele beshibe ukuti cine cine Lesa amulengele ukuba Shikulu+ kabili Kristu,* uyu Yesu uo mwapoopele pa cimuti.”+

37 Nomba ilyo baumfwile ici, baumfwile ububi mu mitima,+ kabili baebele Petro na batumwa bambi, abati: “Mwe baume, bamunyinefwe, tucite shani?”+ 38 Petro abebele ati: “Lapileni+ no kubatishiwa+ mwi shina+ lya kwa Yesu Kristu pa kuti mwelelwe+ imembu shenu, e lyo mwalapokelela umupashi wa mushilo, uwa bupe+ fye. 39 Pantu balimulaile+ imwe na bana benu na bonse aba kutali,+ bonse abo Yehova Lesa wesu aketa.”+ 40 Kabili abalondolwelele bwino na fimbi ifingi, kabili alebakonkomesha, ati: “Talukeniko kuli iyi nkulo ibifi pa kutila mwionaikila pamo na yo.”+ 41 E ico bonse abatetekele amashiwi yakwe no mutima onse balibatishiwe,+ na pali bulya bushiku kwalundilweko abantu nalimo amakana yatatu (3,000).+ 42 Kabili balebika amano ku fyalesambilisha abatumwa, balepeelana ifyo bakwete,+ baleliila pamo,+ kabili baali no mute wa kupepa.+

43 Awe no mwenso waikete umuntu onse, kabili abatumwa balecita ifipesha amano ifingi ne fishibilo.+ 44 Bonse abasumine baali pamo, kabili fyonse ifyo balekwata fyaleba fya bonse,+ 45 kabili bashitishe impanga+ ne fipe bakwete no kwakanya bonse indalama basangilemo, ukulingana ne fyo onse alekabila.+ 46 Kabili ubushiku no bushiku balesangwa lyonse pe tempele no mutima umo,+ kabili baleliila ifya kulya fyabo mu mayanda yabo kabili balelya ifya kulya no kusekelela ukukalamba,+ ne mitima ya cishinka, 47 balelumbanya Lesa kabili abantu bonse balibatemenwe.+ Na o Yehova cila bushiku atwalilile ukulunda+ kwi bumba lyabo abalepusuka.+

3 Awe Petro na Yohane baleninika ukuya kwi tempele pa nshita ya kupepa, pe awala lyalenga pabula (9),*+ 2 kabili umuntu uwafyelwe+ uwalemana balemusenda fye, kabili balemubika cila bushiku mupepi no mwinshi we tempele uo baleita ati Uwayemba,+ pa kuti alelomba ifya bupe ku baleingila mwi tempele.+ 3 Atile ashimona Petro na Yohane ukuti balaingila mwi tempele atendeke ukulomba ifya bupe.+ 4 E lyo Petro na Yohane, bamulolekeshe,+ no kumweba ati: “Tuloleshe.” 5 Na o alibalolekeshe, no kwenekela ukuti balamupeelako fimo. 6 Lelo, Petro atile: “Silfere na golde nshikwete, lelo ico nkwete e co nalakupeela:+ Mwi shina lya kwa Yesu Kristu umwina Nasarete,+ ndeti enda!”+ 7 E lyo amwikete ku kuboko kwa ku kulyo,+ no kumwimya. Apo pene amakasa yakwe ne nkolokoso fyaba na maka;+ 8 kabili alitolweke,+ aliminine no kutendeka ukwenda, kabili aingile na bo mwi tempele,+ ale-enda no kutolauka no kulumbanya Lesa. 9 Kabili abantu+ bonse bamumwene ale-enda, alelumbanya na Lesa. 10 Awe balimwishibe, ukuti e uyu wine waleikalila ifya bupe pa Mpongolo Yayemba+ iye tempele, kabili balipapile sana no kupeshiwa+ amano pa camucitikile.

11 Awe, ilyo uyu muntu aikatilile Petro na Yohane, abantu bonse babutukiile capamo kuli bena mu lukungu ulo baleti ulwa kwa Solomone,+ balepapa nga nshi. 12 Ilyo Petro amwene ici, aebele abantu, ati: “Mwe baume abena Israele, cinshi mulepapila pali ici, atemwa cinshi muletulolekesesha kwati ni ku maka yesu atemwa ni kuli bukapepa bwesu e ko tulengele uyu muntu ukwenda?+ 13 Lesa wa kwa Abrahamu kabili uwa kwa Isaki kabili uwa kwa Yakobo,+ Lesa wa fikolwe fyesu, nacindamika+ Umubomfi wakwe,+ Yesu, uo imwe, mwapeele+ kuli Pilato no kumukaanina pa cinso cakwe, ilyo apingwile ukumulekako.+ 14 Cine cine, mwakeene uwa mushilo kabili uwalungama,+ no kulomba umuntu, icipondo,+ ukuti apeelwe kuli imwe, 15 kabili mwaipeye uo Lesa asala ukupeela ubumi bwa muyayaya.+ Lelo Lesa alimwimishe ku bafwa, icine ico ifwe twabako inte.+ 16 E ico icitetekelo cesu mwi shina lyakwe, e ciposeshe uyu muntu uo mulemona kabili uo mwaishiba, kabili icitetekelo cesu muli ena, e calenga uyu muntu ukuba umutuntulu pa menso ya imwe bonse. 17 E ico, nomba, mwe bamunyinane, ninjishiba ukuti mwacitile mu kukanaishiba,+ nga filya fine ne ntungulushi+ shenu shacitile. 18 Lelo, ifi e fyo Lesa afikilisha ifyo alandiile muli bakasesema bonse, ukuti Kristu aali no kucula.+

19 “E ico, lapileni,+ no kwalukila+ kuli Lesa pa kuti imembu shenu shifuutwe,+ e lyo Yehova alamupuupuutula+ 20 e lyo na pa kuti atume Kristu uwasonteelwe imwe, e kutila, Yesu, 21 uo umuulu, icine cine, ufwile ukupokelela+ ukufika ku nshita sha kubweseshamo+ fyonse ifyo Lesa alandiile muli bakasesema+ bakwe aba mushilo aba ku kale. 22 Na kuba, Mose, atile, ‘Yehova Lesa akamwimisha muli bamunyinenwe kasesema uwaba nga ine.+ Mufwile ukumfwila fyonse ifyo akamweba.+ 23 Cine cine, umuntu onse uushakomfwile uyo Kasesema akepaiwa.’+ 24 Na kuba, bakasesema bonse, ukufuma pali Samwele na bakonkelepo, bonse abalandile, na bo babilile pali shino nshiku.+ 25 Imwe muli bana+ baume ba bakasesema kabili aba cipangano ico Lesa apangene ne fikolwe fyesu, uwaebele Abrahamu, ati: ‘Kabili mu mwana obe e mo indupwa shonse isha pe sonde shikapaalilwa.’+ 26 Pa kubalilapo,+ ni mwe Lesa abuushiishe Umubomfi wakwe no kumutuma kuli imwe pa kuti amupaale pa kumwalula bonse ku misango yenu iibi.”

4 Nomba ilyo Petro na Yohane balelanda ku bantu, intungulushi sha bashimapepo no mukalamba wa bakalinda ba pe tempele+ na baSaduke+ baishile kuli bena, 2 ninshi nabafulwa pa mulandu wa kuti balesambilisha abantu no kubila pa kubuuka ku bafwa nga filya cali kuli Yesu;+ 3 kabili balibekete no kubabika mu cifungo ukufika ubushiku bwakonkelepo,+ pantu cali cungulo. 4 Lelo, abengi abaumfwile ifyo balandile balitetekele,+ ne mpendwa ya baume yafikile nalimo amakana yasano (5,000).+

5 Ubushiku bwakonkelepo intungulushi sha baYuda na bakalamba na bakalemba+ balongene mu Yerusalemu 6 (pamo na Anasi+ shimapepo mukalamba na Kayafa+ na Yohane na Alekisanda na bonse aba mu lupwa lwa kwa shimapepo mukalamba), 7 kabili babemike pa kati kabo, no kubepusha, abati: “Ni ku maka nshi atemwa ni mwi shina nshi mwacitiile ici?”+ 8 E lyo Petro, pa kwisulamo umupashi wa mushilo,+ abebele ati:

“Mwe ntungulushi sha bantu na bakalamba, 9 nga ca kutila buno bushiku muletulubulwisha pa mulandu wa mulimo uusuma uwacitilwe ku mulwele,+ kabili mulefwaya ukwishiba ifyo uyu muntu apolele, 10 lekeni cishibikwe kuli imwe bonse na ku bena Israele bonse, ukuti mwi shina lya kwa Yesu Kristu umwina Nasarete,+ uo mwapoopele+ lelo uo Lesa aimishe ku bafwa,+ muli uyu wine e mo uyu muntu eminine pano umutuntulu pa ntanshi yenu. 11 Ulya e ‘libwe ilyo mwe bakakuula mwasuulile ilyaisaba pa muulu pa koona.’+ 12 Kabili, tamwaba ipusukilo mu muntu umbi iyo, pantu takwaba ishina+ limbi mwi samba lya muulu ilyapeelwa na Lesa mu bantu, umo tufwile ukupusukila.”+

13 Nomba ilyo bamwene ukuti Petro na Yohane nabashipa pa kulanda, no kwiluka ukuti bantu abashasambilila kabili abantu yaweyawe,+ balipapile. Kabili baishileishiba ukuti baali pamo na Yesu;+ 14 kabili ilyo bamwene uwaundepwe naiminina na bo,+ tabakwete ne ca kusosa.+ 15 E ico babebele ukufumina pa nse ya cilye ca Sanhedrini, e lyo bashala balepandana amano, 16 abati: “Tucite shani kuli aba bantu?+ Pantu cine cine, nabacita icishibilo icikalamba, icimoneke ku bekashi bonse aba mu Yerusalemu;+ kabili te kuti tucikaane. 17 Lelo, pa kuti ici cintu cifika apatali mu bantu, natubatiinye ukuti bekabwekeshapo ukulandila muli ili shina ku muntu nangu umo.”+

18 Awe balibetile no kubakonkomesha ukukanalandila nelyo fye ukusambilishisha mwi shina lya kwa Yesu. 19 Lelo pa kwasuka, Petro na Yohane, babebele abati: “Pinguleni mwe bene, nga nacilungama mu menso ya kwa Lesa ukumfwa kuli imwe atemwa ukumfwa kuli Lesa. 20 Lelo ifwe, te kuti tuleke ukulanda ifyo twamwene ne fyo twaumfwile.”+ 21 E ico, ilyo babatiinishe na kabili, e lyo babalekele, pantu tabasangile umulandu nangu umo uwa kubakandilapo kabili baletiina abantu,+ pantu bonse balecindika Lesa pa cacitike; 22 kabili umuntu uwaposhiwe mu cipesha amano aali ne myaka ukucila amakumi yane (40).

23 Ilyo babalekeleko, baile ku basumina+ banabo no kushimika ifyo intungulushi sha bashimapepo na bakalamba babebele. 24 Na bonse abalipo ilyo baumfwile ifi, bapepele pamo kuli Lesa,+ abati:

“Mwe Shikulu Mulopwe,+ ni mwe mwapangile umuulu ne sonde na bemba na fyonse ifyabamo,+ 25 kabili ni mwe mwasoseele mu mupashi wa mushilo mu kanwa ka cikolwe cesu Davidi,+ umubomfi wenu, amuti, ‘Cinshi ico inko shabela mu cimfulumfulu na bantu ba mu nko balepangila ifya fye?+ 26 Ishamfumu sha pano isonde shaima, intungulushi na sho shalongana pa kuti shimine Yehova no wasubwa wakwe.’+ 27 Na cine, muli uno musumba, Herode* na Ponti Pilato+ pamo na bena fyalo e lyo na bena Israele abengi baimine umubomfi wenu uwa mushilo+ Yesu, uo mwasubile,+ 28 ku kucita ifyo mwapangile ukuti fikacitika ku maka yenu na ku kufwaya kwenu.+ 29 E ico nomba, mwe Yehova, lolekesheni pa fintiinya fyabo,+ no kusuminisha abasha benu ukuti balelanda icebo cenu no kushipa konse,+ 30 ilyo muletambika ukuboko kwenu ku kundapa abalwele kabili ilyo ifishibilo ne fipesha amano+ filecitilwa mwi shina+ lya mubomfi+ wenu uwa mushilo Yesu.”

31 Kabili ilyo bapwile ukupepa, umo balongene mwalitenkene;+ na bonse baiswilemo umupashi+ wa mushilo kabili balelanda icebo ca kwa Lesa no kushipa.+

32 Kabili, abengi abasumine bali no mutima umo,+ kabili tapali uwalelanda ukuti conse ico akwete cali cakwe; lelo fyonse fyali fya bonse.+ 33 Na kabili, abatumwa batwalilile ukubomba bwino umulimo wa kushimika ubunte pa kubuuka kwa kwa Shikulu Yesu;+ kabili Lesa aali sana ne cikuuku kuli aba bonse. 34 Na kuba, pali bena tapali uwabulilwe;+ pantu bonse abakwete amabala atemwa amayanda baleyashitisha no kutwala indalama balesangamo 35 no kushibika ku makasa ya batumwa.+ Na bo baleshakanya+ kuli umo na umo, ukulingana ne fyo alekabila. 36 E ico Yosefe, uo abatumwa baleita ati Barnaba,+ icalola mu kuti, Umwana wa Cisansamushi, umwina Lebi, uwa ku Kupro, 37 ashitishe ibala lyakwe no kutwala indalama ku batumwa no kushibika ku makasa yabo.+

5 Lelo, umuntu umo, uo ishina lyakwe ni Anania, pamo no mukashi wakwe Safira, bashitishe ibala lyabo 2 no kufisapo indalama shimo, umukashi na o alishibe, kabili atweleko fye shimo no kushibika ku makasa ya batumwa.+ 3 Lelo Petro atile: “Anania, cinshi ico Satana+ atalamikile umutima obe ku kubepa+ umupashi+ wa mushilo no kufisapo indalama she bala ilyo washitishe? 4 Ilyo wali ne bala, bushe talyali lyobe, kabili ilyo walishitishe, bushe indalama tashali shobe? Cinshi wapangiile ukucita ica musango yu mu mutima obe? Te bantu ubepele+ iyo, ubepele Lesa.”+ 5 Pa kumfwa aya mashiwi Anania awile pa nshi no kuleka umweo.+ Kabili bonse abaumfwileko baiketwe umwenso+ uukalamba. 6 E fyo abalumendo baimine, bamupomba mu nsalu,+ no kumutwala ku nse bayamushiika.

7 Nomba ilyo papita nalimo ama-awala yatatu umukashi wakwe na o aingila, ninshi teshibe ne ficitike. 8 Petro e pa kumwipusha ati: “Njebako, bushe e ndalama fye ishi shine imwe babili mwashitishemo ibala?” Na o ati: “Ee, e isho shine.” 9 E lyo Petro amweba ati: “Nga cinshi ico imwe babili mwaumfwanine ukwesha+ umupashi wa kwa Yehova? Mona! Amakasa ya bashiikile umulume obe yali pa mwinshi, na iwe wine balakutwala ku nse.” 10 Apo pene fye awa pa nshi mupepi na makasa ya kwa Petro no kuleka umweo.+ Ilyo abalumendo baingile basangile nafwa, kabili bamutwele ku nse no kumushiika mupepi no mulume. 11 Awe aba mu cilonganino bonse na bonse abaumfwileko baiketwe umwenso uukalamba.

12 Kabili, abatumwa balecita ifishibilo ifingi ne fipesha amano mu bantu;+ kabili bonse bali mu lukungu lwa kwa Solomone+ no mutima umo. 13 Na kuba, takwali nangu umo uwapamine ukuilunda kuli bena;+ na lyo line, abantu balebacindika.+ 14 Awe, abaume na banakashi abengi nga nshi abalesumina muli Shikulu balelundwako fye;+ 15 ica kuti abantu baletwala abalwele mu misebo iikalamba no kubabika pa misengele na pa matanda, pa kuti Petro nga alepita, kusuka icinshingwa cakwe fye capita pali bamo.+ 16 Na kabili, abantu abengi ukufuma mu misumba yashinguluka Yerusalemu baleisa, baleleta abalwele na bonse abalecushiwa ku mipashi yakowela, kabili bonse baleundapwa.

17 Awe pa mulandu wa mufimbila,+ shimapepo mukalamba na bonse abali nankwe, aba mu mipepele ya baSaduke, baliimine, 18 kabili baikete abatumwa no kubabika mu cifungo+ ca bantu bonse. 19 Lelo ubushiku malaika+ wa kwa Yehova aiswile ifiibi fya cifungo no kubafumya,+ e lyo abeba ati: 20 “Kabiyeni, keminineni mwi tempele, twalilileni ukweba abantu fyonse pali ubu bumi.”+ 21 Ilyo baumfwile ifi, baingile mwi tempele ku macaca no kutendeka ukusambilisha.

Nomba ilyo shimapepo mukalamba na bonse abali nankwe baishile, balongenye aba mu cilye ca Sanhedrini ne bumba lyonse ilya bakalamba mu bena Israele,+ kabili batumine aba kuya ku cifungo no kubaleta. 22 Lelo ilyo abalinshi bafikile kulya tababasangile mu cifungo. E ico balibwelele no kushimika, 23 abati: “Twacisanga icifungo nacikomwa bwino bwino na balinshi nabeminina pa minshi, lelo cilya twaisulako twasanga tamuli nangu umo.” 24 Awe, ilyo umukalamba wa bakalinda ba pe tempele ne ntungulushi sha bashimapepo baumfwile ifi, balipeshiwe amano pali ifi fintu ne fyali no kutumbukamo.+ 25 Lelo umuntu umo aishile no kubeba, ati: “Moneni! Abaume mwabikile mu cifungo bali mwi tempele, nabeminina balesambilisha abantu.”+ 26 E lyo umukalamba wa bakalinda aile pamo na balinshi bakwe no kubaleta, lelo ukwabula ukubasunkasunka, pantu baletiina+ ukupoolwa amabwe ku bantu.

27 E lyo babaletele no kubemika mu cilye ca Sanhedrini. Na shimapepo mukalamba alibepwishe 28 no kutila: “Ukweba twamwebele+ ukuti mwilasambilishisha mwi shina ili, nomba, moneni! namusalanganya isambilisho+ lyenu mu Yerusalemu monse, kabili mulefwaya ukuleta umulopa+ wa uyu muntu pali ifwe.” 29 Pa kwasuka, Petro na batumwa bambi batile: “Tufwile ukunakila Lesa ukucila ukunakila abantu.+ 30 Lesa wa fikolwe fyesu aimishe+ Yesu, uo imwe mwaipeye, pa kumupoopela pa cimuti.+ 31 Lesa alimusansabike no kumuteka ku kwa kulyo+ kwakwe, ukuba Intungulushi+ kabili Umupusushi,+ pa kutila abena Israele balapile+ no kwelelwa imembu.+ 32 Kabili tuli nte sha ifi fintu,+ ifwe pamo no mupashi wa mushilo,+ uo Lesa apeela ku bamunakila.”

33 Ilyo baumfwile aya mashiwi, balikalipe icine cine, kabili balefwaya fye ukubepaya.+ 34 Lelo umuntu umo, umuFarise, alimine mu cilye ca Sanhedrini, ishina lyakwe ni Gamaliele,+ kasambilisha wa Mafunde uo abantu bonse bacindike, kabili asosele ukuti bafumye aba bantu pa nse inshita inono.+ 35 Kabili abebele ati: “Mwe bena Israele,+ cenjeleni ku fyo mulepanga ukucita kuli aba bantu. 36 Moneni, ilyo shino nshiku tashilaisa kwaimine Teuda, uwaleimona ukubapo cimo,+ kabili abantu abengi, nalimo imyanda ine (400), bailundile kwi bumba lyakwe.+ Lelo aliipaiwe, na bonse abalemumfwila balisalangene no kuloba. 37 Pakonkele Yuda umwina Galili uwaimine mu nshiku sha kulembesha abantu,+ kabili aleongola abantu ukuti bamukonke. Lelo na o wine alifwile, na bonse abalemumfwila basalanganine ukutali. 38 E ico, nomba, ndemweba nati, Talukeniko kuli aba bantu, balekeni babe; (pantu, ili pange atemwa uyu mulimo nga wafuma ku bantu, ukawa;+ 39 lelo nga wafuma kuli Lesa,+ mukafilwa ukubawisha;)+ epali mwasangwa mulelwa na Lesa.”+ 40 Awe balimumfwile, kabili baitile abatumwa, no kubafopaula,+ no kubalesha ukulandila mwi shina lya kwa Yesu,+ e lyo babalekele baye.

41 E ico, bafumine pa ntanshi ya cilye ca Sanhedrini, baya balesekelela+ pantu basangilwe abawamina ukuculila ishina lyakwe.+ 42 Kabili balesambilisha+ no kubila imbila nsuma pali Kristu Yesu+ ukwabula ukuleka cila bushiku mwi tempele na ku ng’anda ne ng’anda.+

6 Nomba muli ishi nshiku, ilyo abasambi balefulilako, abaYuda abalelanda iciGriki+ batendeke ukuilishanya pa fyalecita abaYuda abalelanda iciHebere, pantu bamukamfwilwa babo tabalebakanyako ifyalepeelwa cila bushiku.+ 2 E ico abe kumi na babili (12) balongenye ibumba lya basambi no kutila: “Te kuti ciwame ukuti tuleke ukusambilisha icebo ca kwa Lesa no kula-akanya ifya kulya pa matebulo.+ 3 E ico, bamunyinefwe, fwayeni+ mwi bumba lyenu abaume abacetekelwa cinelubali (7), abaisulamo umupashi na mano,+ pa kuti tubasonte ukubomba uyu mulimo uulekabilwa; 4 lelo ifwe twakulabika amano ku kupepa na ku kusambilisha icebo ca kwa Lesa.”+ 5 Kabili aya mashiwi yaweme kwi bumba lyonse, kabili basalile Stefani, umwaume uwakwatishe icitetekelo no mupashi wa mushilo,+ na Filipi+ na Prokore na Nikanore na Timone na Parmena na Nikola, umwina Antioke, uwasangwike umuYuda; 6 kabili babatwele ku batumwa, na bo ilyo bapepele, babikile iminwe+ yabo pali bena.

7 E ico icebo ca kwa Lesa calelunduluka,+ kabili abasambi balefulilako nga nshi mu Yerusalemu;+ na bashimapepo+ abengi balitetekele.

8 Nomba Stefani, uwali uwa mutembo nga nshi kabili uwakwatishe amaka, alecita ifipesha amano ifikalamba ne fishibilo+ mu bantu. 9 Lelo kwaimine abantu bamo aba mwi Sunagoge ilitwa ilya Balubulwa, e lyo na bamo aba mu bena Kurene na ba mu bena Alekisandria,+ na ba mu bena Kilikia+ na ba mu bena Asia, ku kukansana na Stefani; 10 lelo tabali na maka ya kulesha amano+ no mupashi alelandilamo.+ 11 Kabili mu bumfisolo batunkile abantu ukusosa, abati:+ “Twaumfwile alelanda amashiwi ya kupontela+ Mose na Lesa.” 12 Kabili bafundawile abantu na bakalamba na bakalemba, awe na bo e pakumufukukila, bamufyambata no kumutwala ku cilye ca Sanhedrini.+ 13 Kabili baletele inte isha bufi,+ ishatile: “Uyu muntu taleka ukupontela itempele na Mafunde.+ 14 Pantu twamumfwile aleti uyu Yesu umwina Nasarete akawisha lino itempele no kwalula intambi isho Mose atushilile.”

15 Kabili ilyo bonse abaikele mu cilye ca Sanhedrini bamulolekeshe,+ bamwene icinso cakwe cilemoneka nge ca kwa malaika.+

7 Lelo shimapepo mukalamba atile: “Bushe ca cine e fyo usosa?” 2 Stefani atile: “Mwe baume, bamunyinane na batata, umfweni. Lesa wa bukata+ amoneke kuli Abrahamu icikolwe cesu ilyo aali mu Mesopotamia, ninshi talakuukila ku Harani,+ 3 no kumweba ati, ‘Fuma mu calo cobe, ushe na balupwa lobe no kuya ku calo ico nkakulanga.’+ 4 Awe afumine mu calo ca bena Kaldi no kukuukila ku Harani. Kabili ilyo wishi afwile,+ Lesa amwebele ukukuukila muli cino calo umo imwe nomba mwaikala.+ 5 Lelo tamupeelemo impanga, nangu apa kunyanta ulukasa;+ lelo ilyo aali acili talakwata no mwana Lesa amulaile ukumupeela ino mpanga ukuti ikabe yakwe,+ pamo na bana+ bakwe abali no kumukonkapo.+ 6 Kabili Lesa alandile pali ici, ukuti abana bakwe bakaba abalebeshi+ mu calo ca bene+ kabili bakabateka ubusha no kubacusha imyaka imyanda ine (400).+ 7 Lesa atile: ‘Uluko ulukabateka ubusha nkalupingula,+ na pa numa bakafumako no kwisamombela muli cino cifulo.’+

8 “Amupeele ne cipangano ca kusembulula;+ na cine ilyo afyele Isaki+ alimusembulwile pa bushiku bwalenga cinekonsekonse (8),+ na Isaki afyele Yakobo, Yakobo na o afyele abana ikumi na babili (12) abaishileba ifikolwe.+ 9 Kabili ifi fikolwe fyali no bufuba+ kuli Yosefe no kumushitisha ku bena Egupti.+ Lelo Lesa aali pamo nankwe,+ 10 kabili amupokolwele mu macushi yakwe yonse no kulenga Farao imfumu ya ku Egupti ukumutemwa no kulamumona uwa mano. Kabili yamusontele ukuba cilolo pa calo ca Egupti na pa ba mu ng’anda yakwe yonse.+ 11 Lelo kwaponene ubucushi bukalamba ubwa cipowe mu Egupti monse na mu Kanaani; ne fikolwe fyesu tafyakwete ifya kulya.+ 12 Nomba Yakobo aumfwile ukuti kwali ifya kulya ku Egupti+ kabili atumine ifikolwe fyesu umuku wa kubalilapo.+ 13 Ilyo babweleleko umuku walenga ibili, Yosefe aisokolwele kuli bamunyina;+ e lyo Farao aishibe ukuti Yosefe alikwete ulupwa.+ 14 E ico Yosefe atumine aba kuyaita wishi Yakobo no lupwa lwakwe,+ bonse pamo baali amakumi cinelubali na basano (75).*+ 15 Yakobo atentemukile ku Egupti.+ Kabili alifwile;+ ne fikolwe fyesu na fyo fyalifwile, + 16 kabili fyatwelwe ku Shekemu+ no kushiikwa mu nshiishi+ iyo Abrahamu ashitile mu ndalama sha silfere ku bana baume ba kwa Hamore mu Shekemu.+

17 “Ilyo inshita yalepalama iya kuti ubulayo Lesa alaile Abrahamu bufikilishiwe, abantu balifulile no kusanda mu Egupti,+ 18 kwasukile kwaima imfumu imbi mu Egupti, iishaishibe Yosefe.+ 19 Iyi mfumu yacitile ubucenjeshi ku mushobo+ wesu no kupatikisha bashifwe ukupoosa utunya twabo, ukuti twiba utwa mweo.+ 20 Mu nshita ilya ine Mose alifyelwe,+ kabili aali uwayemba nga nshi na kuli Lesa.+ Kabili alelelwe imyeshi itatu mu ng’anda ya kwa wishi. 21 Lelo ilyo apooselwe, umwana mwanakashi wa kwa Farao alimutoolele no kumukusha kwati mwana wakwe.+ 22 E ico Mose asambilishiwe amano+ yonse aya bena Egupti. Na kuba, aali uwa maka mu fyo alelanda+ na mu fyo alecita.

23 “Nomba ilyo aali ne myaka amakumi yane (40), afwaile ukuyapempula bamunyina, abana ba kwa Israele.+ 24 Kabili ilyo Mose amwene umwina Egupti alecusha umwina Israele, apokolweleko munyina no kulandwilako uo balecusha pa kuuma umwina Egupti.+ 25 Amwene kwati bamunyina balailuka ukuti Lesa alebapusushisha muli ena,+ lelo tabailwike. 26 No bushiku bwakonkelepo amoneke kuli bena ilyo balelwa, kabili aeseshe ukubawikishanya mu mutende,+ ati, ‘Mwe baume mwe, muli ba bwananyina. Mulandu nshi mulelwila?’+ 27 Lelo uwalecita umunankwe ububi akaanine Mose, ati, ‘Nani akusontele ukuba intungulushi kabili kapingula pali ifwe babili?+ 28 Bushe ulefwaya ukunjipaya filya waipeye Umwina Egupti mailo?’+ 29 Aya mashiwi yalengele Mose afulumuke no kuyaba umulebeshi ku calo ca Midiani,+ uko afyele abana abaume babili.+

30 “Kabili ilyo imyaka amakumi yane (40) yakumene, malaika amoneke kuli ena mu lubingu lwa mulilo ulwa cimpusa ilyo aali mu matololo yaba mupepi no Lupili lwa Sinai.+ 31 Nomba ilyo Mose amwene ici, alipapile.+ Lelo ilyo alepalamina pa kuti alolekeshe, aumfwile ishiwi lya kwa Yehova, lileti, 32 ‘Nine Lesa wa fikolwe fyobe, Lesa wa kwa Abrahamu kabili uwa kwa Isaki kabili uwa kwa Yakobo.’+ Awe Mose alitiinine nga nshi, kabili tapamine ukuloleshako na kabili. 33 Yehova amwebele ati, ‘Fuula indyato shobe, pantu pano wiminine pa mushilo.+ 34 Ukumona nimona ifyo abantu bandi balebacusha mu Egupti,+ kabili ning’umfwa ne fyo baleteta+ kabili naisa ku kubapokolola.+ Nomba umfwa, kabiye ku Egupti.’+ 35 Uyu Mose, uo bakeene, abati, ‘Nani akusontele ukuba intungulushi kabili kapingula?’+ e o Lesa atumine+ ku kuyaba intungulushi kabili kalubula, no walemwafwako ni ulya wine malaika uwamoneke kuli ena mu cimpusa. 36 Uyu wine e wabafumishe+ pa numa ya kucita ifipesha amano ne fishibilo mu Egupti+ na muli Bemba Wakashika+ na mu matololo imyaka amakumi yane (40).+

37 “Uyu e Mose uwaebele abana ba kwa Israele, ati, ‘Lesa akamwimisha kasesema uwaba nga ine ukufuma pali bamunyinenwe.’+ 38 Uyu wine+ e wali pamo no lukuta+ mu matololo. Kabili aali pamo na malaika+ uwalandile nankwe mu Lupili lwa Sinai, kabili aali ne fikolwe fyesu. Mose apokelele amashiwi+ ya kwa Lesa aya muyayaya aya kumupeela. 39 E o ifikolwe fyesu fyakeene ukumfwila, kabili fyalimusuulile,+ na mu mitima ya fiko fyalefwaisha ukubwelela ku Egupti,+ 40 fyaebele Aarone, afiti: ‘Tupangile balesa aba kututangilila. Pantu uyu Mose, uwatufumishe mu calo ca Egupti, tatwishibe icamucitikila.’+ 41 Awe muli shilya nshiku bapangile umwana wa ng’ombe+ no kutuula amalambo ku kalubi no kutendeka ukusefya apakalamba pa kalubi ako abene bapangile ne minwe yabo.+ 42 E ico Lesa alibashile no kuleka+ balepepa ifya mu muulu, filya calembwa mwi buuku lya bakasesema,+ aciti, ‘Mwe ba mu ng’anda ya kwa Israele, bushe ni kuli ine mwaletuula inama mwaleipaya na malambo pa myaka amakumi yane (40) mu matololo?+ 43 Lelo litenti lya kwa Moloke*+ no lutanda+ lwa kwa lesa Refani e fyo mwasendele, ifimpashanya mwapangile pa kuti mulefipepa. E ico nkamutamfisha+ ukutali ukucila ku Babiloni.’

44 “Ifikolwe fyesu fyali ne cikuulwa ca mushilo* mu matololo, nga fintu akonkomeshe ilyo aebele Mose ukucipanga ukulingana ne cimpashanya ico amwene.+ 45 Na bashifwe abaali pamo na Yoshua+ bapyene icikuulwa ca mushilo no kucingisha mu calo ca nko shimbi,+ shilya Lesa atamfishe ku cinso ca fikolwe fyesu.+ E mo caikele ukufika ku nshiku sha kwa Davidi. 46 Lesa atemenwe+ Davidi kabili Davidi alombele ukukuulila Lesa wa kwa Yakobo umwa kwikala.+ 47 Lelo, Solomone e wamukuulile ing’anda.+ 48 Na lyo line, Uwapulamo tekala mu mayanda ayakuulwa ku minwe;+ filya kasesema, atila, 49 ‘Umuulu e cipuna candi ica bufumu,+ ne calo e cipuna ca makasa yandi.+ Ni ng’anda ya musango nshi mwingankuulila? e fyasosa Yehova. Atemwa cifulo nshi apo ningatuushisha?+ 50 Bushe te kuboko kwandi kwalengele ifi fyonse?’+

51 “Mwe batalama kabili abashasembululwa imitima+ na matwi, imwe lyonse mulakaanya umupashi wa mushilo; ifyo ifikolwe fyenu fyacitile, e fyo na imwe mucita.+ 52 Nani uwa muli bakasesema uo ifikolwe fyenu fishacushishe?+ Na cine, fyaipeye+ ababilile kabela ukwisa kwa Walungama,+ uo imwe nomba mwafutwike no kumwipaya,+ 53 imwe mwe bapokelele Amafunde ayapeelwe ukupitila muli bamalaika,+ lelo tamuyakonka.”

54 Awe, pa kumfwa ifi fintu balikalifiwe imitima,+ balamusumanisha+ na meno. 55 Lelo Stefani, ilyo aiswilemo umupashi wa mushilo, alolekeshe mu muulu no kumona ubukata bwa kwa Lesa no bwa kwa Yesu ninshi Yesu eminine ku kwa kulyo kwa kwa Lesa,+ 56 no kutila: “Moneni! Ndemona umuulu nawisuka+ no Mwana wa muntu+ naiminina ku kwa kulyo kwa kwa Lesa.”+ 57 E lyo babilikishe ishiwi ilikalamba no kucilika mu matwi yabo,+ e lyo bonse pamo bamufukukila. 58 Kabili ilyo bamupoosele ku nse ya musumba,+ batendeke ukumupoola amabwe.+ Kabili inte+ shabikile amalaya ya shiko ku makasa ya mulumendo uwaleitwa ati Sauli.+ 59 Kabili ilyo balemupoola amabwe Stefani ena aalepapaata fye, ati: “Mwe Shikulu Yesu, pokeleleni umupashi wandi.”+ 60 E lyo afukeme no kubilikisha ishiwi ilikalamba, ati; “Mwe Yehova, mwibapeela umulandu pali ulu lubembu.”+ Awe ilyo asosele ifi aponene mu tulo twa mfwa.

8 Sauli alisuminishe ukwipaya Stefani.+

Pali ubo bushiku abaYuda batampile ukucusha+ nga nshi aba mu cilonganino cali mu Yerusalemu; kabili bonse basalanganine+ mu Yudea na mu Samaria, ukufumyako fye abatumwa. 2 Lelo abaume abatiina Lesa basendele Stefani no kumushiika,+ kabili bamulooseshe+ nga nshi. 3 Lelo, Sauli atendeke ukusansa icilonganino. Aleingila mu ng’anda ne ng’anda no kukululamo abaume na banakashi, no kubatwala ku cifungo.+

4 Lelo, abasambi abo basalangenye baile balebila imbila nsuma ya cebo ca kwa Lesa.+ 5 Filipi ena, atentemukile ku musumba wa Samaria+ no kutendeka ukubashimikila pali Kristu. 6 Bonse balekutikisha ifyalesosa Filipi, ilyo balemumfwa no kumona ifishibilo ifyo alecita. 7 Pantu kwali abengi abali ne mipashi iyakowela,+ kabili yalebilikisha ishiwi ilikalamba no kufumamo. Na bengi aba bulebe+ na balemana balipolele. 8 E ico kwali ukusekelela ukukalamba muli ulya musumba.+

9 Awe mu musumba mwali umuntu umo ishina lyakwe ni Simone, uyo kale, alecita ifinjelengwe+ no kupapusha abena Samaria, uwalesosa ukuti aali muntu uwacindama.+ 10 Kabili bonse fye, abalanda na bashimucindikwa, balemukutikisha, kabili baleti: “Uyu muntu Maka ya kwa Lesa, Amaka Ayakalamba.” 11 E ico balemukutikisha pantu alibapapwishe pa nshita ntali ku finjelengwe fyakwe. 12 Lelo ilyo abaume na banakashi basumine ifyo Filipi alandile, uwalebila imbila nsuma iya bufumu bwa kwa Lesa+ ne shina lya kwa Yesu Kristu, balibatishiwe.+ 13 Simone na o alisumine, kabili, ilyo abatishiwe, alesangwa lyonse na Filipi;+ kabili alipapile pa kumona ifishibilo ne milimo ya maka iikalamba iyalecitwa.

14 llyo abatumwa mu Yerusalemu baumfwile ukuti abena Samaria balitetekele icebo ca kwa Lesa,+ batumineko Petro na Yohane;15 na aba baile ku bena Samaria no kubapepelako pa kuti bapokelele umupashi wa mushilo.+ 16 Pantu wali taulawilapo nangu umo pali bena, lelo babatishiwe fye mwi shina lya kwa Shikulu Yesu.+ 17 Awe babikile iminwe yabo pali bena,+ na bo batendeke ukupokelela umupashi wa mushilo.

18 Nomba ilyo Simone amona ukuti abatumwa balepeela umupashi wa mushilo pa kubika iminwe yabo pa bantu, abatambike indalama,+ 19 ati: “Na ine mpeeniko aya maka, ukuti onse uo nabikapo iminwe engapokelela umupashi wa mushilo.” 20 Lelo Petro amwebele ati: “Indalama shobe isha silfere shilobele pamo nobe, pantu wacilatontonkanya ukuti ni mu ndalama wingapokelela ica bupe ca kwa Lesa.+ 21 Taukwete insambu nangu panono muli uyu mulimo, pantu Lesa namona ukuti umutima obe taulungeme.+ 22 E ico, ulapile pali ubu ububi bobe, no kupapaata Yehova,+ pa kuti napamo, kuti akwelela pa fyo ulepanga mu mutima obe; 23 pantu nimona ukuti ububi bobe cimo fye na sumu iyalula+ kabili muli iwe mwaisula ifyabipa.”+ 24 Pa kwasuka Simone atile: “Mwe bantu, mpapaatileniko+ kuli Yehova ukuti fyonse ifyo mwasosa fimponena.”

25 Awe, ilyo bashimikile ubunte mu ncende yonse ilya no kulanda icebo ca kwa Yehova, babwelele ku Yerusalemu, kabili baile balebila imbila nsuma ku mishi iingi iya bena Samaria.+

26 Lelo, malaika+ wa kwa Yehova alandile kuli Filipi, ati: “Ima, kabiye ku kapinda ka ku kulyo mu musebo wafuma ku Yerusalemu no kutentemukila ku Gasa.” (Uyu musebo wa mu ciswebebe.) 27 Awe alimine no kuya, kabili, amwene cilolo+ umwina Etiopia,+ umulashi wa kwa namfumu Kandake* uwa bena Etiopia, uwalesunga icuma ca kwa namfumu conse. Aile ku Yerusalemu ku kupepa Lesa,+ 28 nomba alebwelelamo ku mwabo kabili ekele mwi celeta lyakwe alebelenga mwi buuku lya kwa kasesema Esaya.+ 29 E ico umupashi waebele+ Filipi, auti: “Sanga iceleta ilyo no kwendela pamo na lyo.” 30 Filipi abutukile ku mbali no kumumfwa alebelenga mwi buuku lya kwa kasesema Esaya, e lyo atile: “Bushe cine cine nawishiba ifyo ulebelenga?” 31 Na o atile: “Bushe kuti naishiba shani, apabula uwa kuntungulula?” Awe apapaatile Filipi ukuti anine no kwikala nankwe. 32 Ne ciputulwa ca Malembo ico alebelenga ni ci: “Asendelwe nge mpaanga ku kwipaiwa, kabili filya umwana wa mpaanga aba tondolo ilyo balemubeya amasako, e fyo na o ekala tondolo.+ 33 Balimucushishe babikapo no kumufyenga.+ Nani uukalondolola fyonse ifya nkulo yakwe? Pantu ali no kufwa.”+

34 E lyo cilolo aipwishe Filipi ati: “Shi unjebe, Nani uo kasesema alelandapo? Bushe mwine atemwa muntu umbi?” 35 Filipi ayasamwine akanwa+ kakwe, kabili ukutendeka pe lembo+ ili, amushimikile ilyashi ilisuma pali Yesu. 36 Nomba ilyo bale-enda mu musebo, bafikile apali amenshi, na cilolo, atile: “Mona amenshi aya; cinshi cilendesha ukubatishiwa?”+ 37 *—— 38 E lyo aebele ukuti iceleta liminine, na bonse babili Filipi na cilolo batentemukile mu menshi, kabili alimubatishe. 39 Ilyo bafumine mu menshi, umupashi wa kwa Yehova wasendele+ Filipi bwangu bwangu, na cilolo tamumwene na kabili, pantu aile pa lwendo lwakwe alesekelela. 40 Lelo Filipi asangilwe mu Ashidode, kabili alipitilemo no kuya aleshimikila+ abantu ilyashi ilisuma ku misumba yonse kabili asukile afika ku Kaisarea.+

9 Lelo Sauli, uwali acili aletiinya abasambi+ ba kwa Shikulu kabili uwalefwaisha ukubepaya,+ aile kuli shimapepo mukalamba 2 no kumulomba bakalata ba kutwala ku masunagoge* aya ku Damaseke, pa kuti bonse Aba Nshila,*+ abaume na banakashi, abo engasanga akabalete nabakakwa ku Yerusalemu.

3 Nomba ilyo aleya, cilya apalama ku Damaseke, e lyo mu kupumikisha ulubuuto ukufuma mu muulu lwabyatile no kumushinguluka,+ 4 kabili awile pa nshi no kumfwa ishiwi lilemweba, aliti: “Sauli, Sauli, ninshi ulencushisha?”+ 5 Atile: “Ni mwe bani, mwe Shikulu?” Na o atile: “Nine Yesu, uo ulecusha.+ 6 Nomba ima,+ ingila mu musumba, kabili ukebwa ico ufwile ukucita.” 7 Awe abaume abale-enda nankwe+ baiminine fye tondolo,+ ukuba kwena baleumfwa iciunda ce shiwi,+ lelo tabamwene umuntu nangu umo. 8 Awe Sauli aimine pa nshi, nelyo ashibatwile amenso, talemona kantu.+ E ico bamwikete ku kuboko no kumutungulula ku Damaseke. 9 Kabili pa nshiku shitatu talemona,+ kabili talelya nangu ukunwa.

10 Mu Damaseke mwalimo umusambi, ishina lyakwe ni Anania,+ kabili Shikulu amwitile mu cimonwa ati: “Anania!” Na o atile: “E po ndi, mwe Shikulu.” 11 Shikulu amwebele ati: “Ima, kabiye no musebo uwitwa Uwaololoka, na pa ng’anda ya kwa Yuda ufwayepo umwina Tarsi,+ ishina lyakwe ni Sauli. Pantu, mona! alepepa, 12 kabili mu cimonwa namona umuntu uwitwa Anania aingila no kumubikapo iminwe ukuti ashibulwe amenso.”+ 13 Lelo Anania ayaswike ati: “Mwe Shikulu, nalyumfwa ku bengi pali uyu muntu, no bubi ubwingi acitile ku ba mushilo benu ku Yerusalemu. 14 Kabili nomba intungulushi sha bashimapepo shalimupeela amaka ya kukaka bonse abalilila kwi shina lyenu.”+ 15 Lelo Shikulu amwebele ati: “Kabiye, pantu uyu muntu cipe+ ico nasala ku kutwala ishina lyandi ku bena fyalo+ na ku shamfumu+ na ku bana ba kwa Israele. 16 Pantu nkamulanga apabuuta ifingi ifyo akaculila ishina lyandi.”+

17 Awe Anania aliile no kuyaingila mu ng’anda, kabili amubikilepo iminwe no kutila: “Sauli, munyinane, Shikulu Yesu ulya uwamoneke kuli iwe mu musebo waleisamo, nantuma, pa kuti ushibulwe amenso no kwisulamo umupashi wa mushilo.”+ 18 Kabili ilyo line mu menso yakwe mwaponene ifyamoneke kwati mamba ye sabi, na menso yakwe yalishibwilwe; e lyo aimine no kubatishiwa, 19 kabili aliliile ifya kulya no kukwata amaka.+

Aikele na basambi inshiku shimo mu Damaseke,+ 20 kabili ilyo line fye atendeke ukushimika pali Yesu+ mu masunagoge, ukuti Mwana wa kwa Lesa. 21 Lelo bonse abalemumfwa balepapa, abati: “Bushe uyu te walesansa+ aba mu Yerusalemu abalilila kwi shina ili, kabili bushe te uyu wine mulandu aishiile na kuno kwine pa kuti abakake no kubatwala ku ntungulushi sha bashimapepo?”+ 22 Lelo Sauli alekoselako fye mu mulimo wakwe kabili alepapusha abaYuda abaikele mu Damaseke ilyo alebalondolwela bwino ukuti uyu e Kristu.+

23 Nomba ilyo inshiku ishingi shapitilepo, abaYuda bapangene ukumwipaya.+ 24 Lelo, ipange lyabo lyaishileishibikwa kuli Sauli. Awe bena balelinda ne mpongolo akasuba no bushiku pa kuti bamwipaye.+ 25 E ico abasambi bakwe balimubuulile ubushiku no kumupushisha pa cipunda mu cibumba, ukumwikishisha mu museke.+

26 Ilyo afikile ku Yerusalemu,+ aeseshe ukuilunda ku basambi; lelo bonse balemutiina, pantu tabasumine ukuti musambi. 27 Lelo Barnaba alimwafwile+ no kumutungulula ku batumwa, e lyo alabalondolwela fyonse ifyo amwene Shikulu+ ne fyo alandile nankwe+ mu musebo, ne fyo mu Damaseke+ alandile no kushipa mwi shina lya kwa Yesu. 28 Kabili atwalilile ukuba pamo na bo, alepitana mu Yerusalemu, alelanda no kushipa mwi shina lya kwa Shikulu;+ 29 kabili alelanda na baYuda abalelanda iciGriki no kubashinina. Lelo aba balapanga ukumwipaya.+ 30 Ilyo aba bwananyina baishibe ici, bamutwele ku Kaisarea no kumutuma ku Tarsi.+

31 Kabili abasumina+ bonse mu Yudea na mu Galili na mu Samaria baikele mu mutende, balekoshiwa; kabili ilyo batwalilile ukuba na katiina kuli Yehova+ no kusansamushiwa no mupashi+ wa mushilo, balefulilako.

32 Nomba ilyo Petro alepita mu fitungu fyonse atentemukile na ku ba mushilo abaikele mu Luda.+ 33 E ko asangile umuntu umo, ishina lyakwe ni Enea, uushaleima pa busanshi bwakwe pa myaka cinekonsekonse (8), ico aali no bulebe. 34 Na Petro amwebele ati:+ “Enea, Yesu Kristu akuposha.+ Ima no kwanshika ubusanshi bobe.” Na o aliimine ilyo line. 35 Kabili bonse abaikele mu Luda na mwi lungu lya Sharone+ balimumwene, kabili basumine muli Shikulu.+

36 Lelo mu Yopa+ mwalimo umusambi, ishina lyakwe ni Tabita, mu ciGriki ni Dorka.* Alebomba imilimo+ isuma iingi nga nshi kabili aali kapekape. 37 Lelo muli shilya nshiku alilwele no kufwa. E ico balimusambile no kumubika mu muputule wa pa muulu. 38 Apo ku Luda kwali mupepi na ku Yopa,+ ilyo abasambi baumfwile ukuti Petro ali muli ulya musumba batumineko abaume babili ukuyamupapaata, ati: “Wikokola ukwisa kuli ifwe.” 39 Na o Petro aliimine no kuya na bo. Kabili ilyo afikile, bamutwele ku muputule wa pa muulu; na bamukamfwilwa bonse baishile kuli ena balelila no kumulanga ifya kufwala ifingi e lyo na malaya ayengi,+ ifyo Dorka alebabilila ilyo aali na bo.+ 40 Lelo Petro afumishe bonse pa nse,+ kabili ilyo afukeme, alipepele, kabili ilyo apilibukile ku citumbi atile: “Tabita, ima!” Na o aliloleshe, kabili ilyo amwene Petro, aliikele.+ 41 Petro amutambike ukuboko, no kumwimya,+ kabili aitile aba mushilo na bamukamfwilwa no kumulanga kuli bena uwa mweo.+ 42 Ici caishibikwe monse mu Yopa, na bengi balisumine muli Shikulu.+ 43 Petro aikele inshiku ishingi mu Yopa+ pamo na Simone, kanyuka+ wa mpapa.

10 Awe mu Kaisarea mwali umuntu umo ishina lyakwe ni Korneli, umukalamba+ we bumba+ lya bashilika ilyo baleita ati ilya bena Italia, 2 aali ni kapepa,+ umuntu uwali na katiina+ kuli Lesa pamo na ba mu ng’anda yakwe bonse, alepeela ne fya bupe ifingi ku bantu+ no kupapaata lyonse kuli Lesa.+ 3 Pe awala nalimo ilyalenga pabula (9)*+ ilya kasuba amwene mu cimonwa+ malaika+ wa kwa Lesa aingila umo ali, no kumweba ati: “Korneli!” 4 Korneli alimulolekeshe, kabili pa kwikatwa umwenso, atile: “Cinshi, mwe Shikulu?” Na o amwebele ati: “Lesa naumfwa amapepo+ yobe kabili namona ifya bupe ifyo upeela kabili pali fi alekwibukishishapo.+ 5 E ico nomba tuma abantu ku Yopa ku kwita Simone uwitwa Petro. 6 Uyu muntu mweni wa kwa Simone, kanyuka wa mpapa, uwakwatila ing’anda mu lulamba lwa bemba.”+ 7 Ilyo malaika uwalandile nankwe afuminepo fye, Korneli aitile ababomfi bakwe babili aba mu ng’anda, aita no mushilika kapepa, uwali pali balya abalemubombela lyonse,+ 8 e lyo alabashimikila fye fyonse, awe abatuma na ku Yopa.+

9 Pa bushiku bwakonkelepo ilyo baleya pa lwendo lwabo kabili ilyo balepalamina ku musumba, Petro aninine pa mutenge+ pe awala nalimo ilyalenga mutanda (6)* ku kupepa.+ 10 Lelo insala yalimwikete nga nshi kabili afwaile ukulya. Ilyo balepekanya ifya kulya, ali ngo ulemona icimonwa+ 11 kabili amwene umuulu nawisuka+ ne cipe icali nge nsalu iikalamba cileika pano isonde ku fisempe fine; 12 kabili mu kati mwali imisango yonse iya fya molu yane ne fikulika fya pano isonde ne fyuni fya mu muulu.+ 13 Kabili aumfwile ishiwi lileti: “Petro, ima, ipaya ulye!”+ 14 Lelo Petro atile: “Awe iyo, mwe Shikulu, pantu nshatalalyapo icakowela kabili icishasanguluka.”+ 15 Awe ishiwi lyalandile kuli ena na kabili, umuku wa cibili, aliti: “Ifyo Lesa asangulwile, witila fyalikowela.”+ 16 Ishiwi lyalandile kuli ine umuku wa citatu, na po pene icipe casendelwe mu muulu.+

17 Nomba cilya Petro acili napeshiwa amano, aletontonkanya umulolele icimonwa ico acimona, moneni! abantu abo Korneli atumine baipwishe ukwabela ing’anda ya kwa Simone kabili beminine pa mpongolo.+ 18 Kabili babilikishe no kwipusha nga Simone uwitwa Petro e po afikila. 19 Ilyo Petro aletontonkanya pa cimonwa, umupashi+ watile: “Mona! Abantu batatu balekufwaya. 20 Lelo, ima, ika no kuya na bo, witwishika nangu panono, pantu nimbatuma.”+ 21 E ico Petro alikile no kuya kuli aba bantu no kutila: “Moneni! Nine wine mulefwaya. Cinshi mwaishila?” 22 Batile: “Korneli, umukalamba wa bashilika, umuntu uwalungama kabili uwaba na katiina kuli Lesa+ kabili uwashimikwa+ icisuma ku luko lonse ulwa baYuda, aebelwe amashiwi ya kwa Lesa kuli malaika wa mushilo, ukumwita ukuti mwise ku ng’anda yakwe pa kutila omfwe amashiwi yenu.” 23 E ico, alibengishe no kubatangata.

Pa bushiku bwakonkapo aliimine no kuya na bo, na ba bwananyina bamo abafumine ku Yopa baile nankwe. 24 Kabili pa bwakonkapo aingile mu Kaisarea. Korneli na o, alebapembela kabili alilongenye na balupwa lwakwe ne fibusa fyakwe ifya pa mutima. 25 Ilyo Petro aingile, Korneli alimusengele, awila pa makasa yakwe no kumutootela. 26 Lelo Petro alimwimishe, ati: “Ima, na ine wine ndi muntu fye.”+ 27 Kabili ilyo alelanda nankwe, alingile no kusanga abantu abengi nabalongana, 28 kabili abebele ati: “Mwalishiba ukuti ifunde talisuminisha umuYuda ukupalamina ku muntu uwa mushobo+ umbi atemwa ukulanda nankwe; lelo Lesa nananga, ukukanaeba umuntu ati alikowela nangu ati tasanguluka.+ 29 E co nshakaanine ilyo naitilwe. Nomba kuti natemwa ukwishiba ico munjitile.”

30 E lyo Korneli atile: “Napapita inshiku shine ukufuma pali lino iawala ilyo nalepepa mu ng’anda yandi pe awala lyalenga pabula (9),+ kabili moneni! umuntu uwafwele+ ifyabuuta aiminine ku cinso candi 31 no kutila, ‘Korneli, ipepo lyobe nalyumfwika na Lesa nakwibukisha pa fya bupe fyobe.+ 32 E ico, tuma ku Yopa, aba kuyaita Simone, uwitwa Petro.+ Uyu muntu aleikala mu ng’anda ya kwa Simone, kanyuka wa mpapa, iyabela mu lulamba lwa bemba.’+ 33 E ico ilyo line natumine abantu kuli imwe, kabili mwacita bwino pa kwisa. Nomba ifwe bonse kanshi tuli pano ku cinso ca kwa Lesa ku kumfwa fyonse ifyo Yehova amwebele ukusosa.”+

34 Awe Petro atile: “Cine cine nomba nashininkisha ukuti Lesa taba na kapaatulula,+ 35 lelo umuntu uwa mu luko lonse uutiina Lesa no kucita icalungama alapokelelwa kuli ena.+ 36 Lesa atumine amashiwi+ ku bana ba kwa Israele ku kubila kuli bena imbila nsuma iya mutende+ uukeshila muli Yesu Kristu—imbila ya kuti uyu e Shikulu wa bonse.+ 37 Mwalishiba ilyashi ilyalandilwepo monse mu Yudea, ilyatendeke ku Galili pa numa ya lubatisho ulo Yohane alelandapo,+ 38 ilya kwa Yesu uwafumine ku Nasarete, ifyo Lesa amusubile umupashi+ wa mushilo na maka, kabili aendawike monse alecita icisuma no kuposha bonse abatitikishiwe na Satana Kaseebanya;+ pantu Lesa ali nankwe.+ 39 Kabili tuli nte pali fyonse ifyo acitile mu calo ca baYuda na mu Yerusalemu; lelo na o balimwipeye, pa kumupoopela pa cimuti.+ 40 Lesa aimishe uyu wine pa bushiku bwalenga shitatu no kumulenga ukumoneka ku bantu,+ 41 te ku bantu bonse iyo, lelo ku nte ishasontelwe kabela kuli Lesa,+ kuli ifwe, fwe baliile no kunwa nankwe+ ilyo aimine ku bafwa. 42 Kabili, atwebele ukushimikila+ abantu no kushimikisha ubunte ukuti E wasontelwe kuli Lesa ukuba kapingula wa ba mweo na bafwa.+ 43 E o bakasesema bonse balandapo,+ ukuti onse uumutetekela kuti aelelwa imembu mwi shina lyakwe.”+

44 Ilyo Petro acili alelanda pali ifi fintu, umupashi wa mushilo waishile pali bonse abaleumfwa aya mashiwi.+ 45 Kabili abatetekela abaishile na Petro abali abasembululwa balipapile, pa mulandu wa kuti umupashi wa mushilo—ica bupe ca kwa Lesa—walepongololwa na pa bena fyalo.+ 46 Pantu babomfwile balelanda indimi shimbi no kucindika Lesa.+ E lyo Petro aipwishe ati: 47 “Bushe nani uwingakaanya aba bantu ukubatishiwa+ mu menshi abapokelele umupashi wa mushilo nga ifwe?” 48 E ico abebele ukubatishiwa mwi shina lya kwa Yesu Kristu.+ Na bo bamulombele ukwikala na bo inshiku shimo.

11 Awe abatumwa na ba bwananyina abali mu Yudea baumfwile ukuti abena fyalo+ na bo balipokelele icebo ca kwa Lesa. 2 E ico ilyo Petro ailefika ku Yerusalemu, abena kusembululwa+ batendeke ukukansana nankwe, 3 abati, aingile mu ng’anda ya bantu abashasembululwa no kulya na bo. 4 Lelo Petro atendeke ukubalondolwela ifyo cali, ati:

5 “Nali mu musumba wa Yopa ndepepa, kabili namwene mu cimonwa, icipe icalemoneka nge nsalu iikalamba balecikishisha pa nshi ku fisempe fya ciko fine ukufuma mu muulu, kabili caishile kuli ine. 6 Ilyo nacilolekeshe, namwenemo ifya molu yane ifya pano isonde ne nama mpanga ne fikulika ne fyuni fya mu muulu.+ 7 Kabili naumfwile ishiwi lilesosa kuli ine, aliti, ‘Petro, ima, ipaya ulye!’+ 8 Lelo natile, ‘Nakalya, mwe Shikulu, pantu icakowela kabili icishasanguluka tacatala acingila mu kanwa kandi.’+ 9 Ishiwi ukufuma mu muulu lyalandile umuku wa cibili, aliti, ‘Ifyo Lesa asangulwile, witila fyalikowela.’+ 10 Ilyo ishiwi lyalandile kuli ine umuku wa citatu, e lyo fyonse fyatintilwe mu muulu na kabili.+ 11 Kabili, moneni! ilyo line fye abaume batatu balifikile pa ng’anda apo twali, batuminwe kuli ine ukufuma ku Kaisarea.+ 12 E ico umupashi+ wanjebele ukuya na bo, ukwabula ukutwishika. Lelo aba, aba bwananyina mutanda (6) twaile pamo na bo, kabili twaingile mu ng’anda ya muntu ulya.+

13 “Atushimikile ifyo amwene malaika naiminina mu ng’anda yakwe no kumweba ati, ‘Tuma abantu ku Yopa no kwita Simone uwitwa Petro,+ 14 kabili akakweba ifintu ifikapususha+ iwe na bonse aba mu ng’anda yobe.’ 15 Lelo ilyo natendeke ukulanda, umupashi wa mushilo waishile pali bena filya fine waishile na pali ifwe pa kutendeka.+ 16 E lyo naibukishe amashiwi ya kwa Shikulu, ifyo alesosa, ati, ‘Yohane, ena, abatishe mu menshi,+ lelo imwe mukabatishiwa mu mupashi wa mushilo.’+ 17 E ico, nga Lesa abapeele ica bupe cimo cine filya fine acitile na kuli ifwe fwe basumina muli Shikulu Yesu Kristu,+ bushe ine nine ningalesha Lesa?”+

18 Awe ilyo baumfwile ifi fintu, balisumine,+ no kucindika Lesa,+ abati: “Kanshi Lesa nalenga abena fyalo ukulapila pa kuti na bo bene bakwate umweo.”+

19 E ico ilyo baipeye Stefani, abasambi e pa kusalangana,+ ico abaYuda balebacusha nga nshi. Baendele ukufika ku Foinike+ na ku Kupro+ na ku Antioke, lelo tabalelanda ku muntu umbi kano fye ku baYuda.+ 20 Lelo, pali aba pali abantu bamo aba ku Kupro na ku Kurene abaishile ku Antioke no kutendeka ukulanda ku ba ciGriki,+ balebila imbila nsuma iya kwa Shikulu Yesu.+ 21 Kabili Yehova+ alebafwa, ne bumba ilikalamba lyalitetekele no kupilibukila kuli Shikulu.+

22 Ululumbi lwabo lwafikile mu matwi ya ba mu cilonganino cali mu Yerusalemu, na bo batumine Barnaba+ ku Antioke. 23 Ilyo afikile no kumona icikuuku+ ca kwa Lesa, alisekelele+ no kutendeka ukukoselesha bonse ukutwalilila aba cishinka kuli Shikulu no mutima umo;+ 24 pantu aali muntu umusuma kabili uwaisulamo umupashi wa mushilo ne citetekelo. Kabili ibumba ilikalamba lyatetekele Shikulu.+ 25 E ico aile ku Tarsi+ ku kufwayafwaya Sauli+ 26 kabili, ilyo amusangile, amuletele ku Antioke. E ico umwaka onse uutuntulu balelongana na bo mu cilonganino no kusambilisha ibumba ilikalamba, kabili ni mu Antioke e mo abasambi pa kutungululwa na Lesa babalilepo ukwitwa Abena Kristu.+

27 Awe muli shilya nshiku e mo bakasesema+ bafumine ku Yerusalemu no kutentemukila ku Antioke. 28 Umo pali aba ishina lyakwe Agabu+ aimine no kutendeka ukusesema ati icipowe icikalamba cali mupepi no kupona mu fyalo fyonse pano isonde;+ ico, na kuba, caponene mu nshita ya kwa Klaudi. 29 E ico umusambi umo na umo atumine ifya kukumbusuka+ ku ba bwananyina abaikele mu Yudea ukulingana na po akwatile;+ 30 kabili e fyo bonse bacitile, bapeele Barnaba na Sauli pa kuti bafitume ku bakalamba.+

12 Pali ilya ine nshita, imfumu Herode* yatampile ukucusha+ bamo aba mu cilonganino. 2 Yaipeye Yakobo munyina Yohane+ ku lupanga.+ 3 Kabili ilyo yamwene ukuti abaYuda+ batemwa, yakonkeshepo ukwikata na Petro. (Awe, shilya shali ni nshiku sha mukate uushatutumuka.)+ 4 Ilyo yamwikete, yamubikile mu cifungo,+ no kumupeela ku bashilika ba kumulinda abali mu fipani fine umwaleba abashilika bane mu cipani cimo cimo, pantu yalepanga ukumufumisha ku bantu pa numa ya ca kucilila.+ 5 E ico Petro alelindwa mu cifungo; lelo icilonganino calemupepelako+ no mukoosha kuli Lesa.

6 Nomba ilyo Herode aali mupepi no kumufumya, ubo bushiku Petro aleele pa kati ka bashilika babili nakakwa iminyololo ibili, na balinshi bali pa mwinshi balelinda icifungo. 7 Lelo, moneni! malaika wa kwa Yehova aliiminine+ pa mwinshi, no lubuuto lwasanikile mu cifungo. Ilyo asunkile Petro mu lubafu, alimushibwishe+ no kumweba ati: “Ima bwangu!” Ne minyololo iyali ku maboko yakwe yaliponene.+ 8 Malaika+ amwebele ati: “Kaka umushipi no kufwala indyato shobe.” Na o acitile ifyo fine. Kabili amwebele ati: “Fwala ne laya+ lyobe, unkonke.” 9 Awe alifumine, alamukonka, lelo taishibe ukuti icalecita malaika cali ca cine cine. Ena aletila cimonwa alemona.+ 10 Ilyo bapitile pa balinshi ba ntanshi na ba cibili bafikile pa mpongolo ya cela iyalola ku musumba, na yo yaisukile fye iine.+ Kabili ilyo bafumine bapitile mu musebo umo, na po pene malaika alekene nankwe. 11 E lyo Petro nomba akutuluka, alasosa ati: “Nomba naishiba ukuti Yehova atumine malaika wakwe+ no kumpokolola+ mu minwe ya kwa Herode na kuli fyonse ifyo abaYuda bale-enekela ukuti e fyalancitikila.”

12 Kabili cilya atontonkanyapo, aya ku ng’anda ya kwa Maria nyina wa kwa Yohane uwitwa Marko,+ uko abengi balongene ku kupepa. 13 Cilya akonkonsha pa ciibi ca pa mpongolo, umubomfi umukashana ishina lyakwe Roda aishile ku kwasuka, 14 kabili ilyo aishibe ishiwi lya kwa Petro, taiswile impongolo pa mulandu wa kusekelela, lelo abutukiile mu kati no kushimika ukuti Petro naiminina pa mpongolo. 15 Bamwebele abati: “Bushe naupena?” Lelo akoselepo fye ukusosa ukuti ca cine. Na bo balasosa, abati: “Ni malaika wakwe.”+ 16 Lelo Petro ashele alekonkonsha. Ilyo baiswileko, balimumwene kabili balipapile. 17 Lelo abakapishe+ ukuboko ukuti batalale kabili abebele fyonse pa fyo Yehova amufumishe mu cifungo, kabili atile: “Kashimikeni ifi fintu kuli Yakobo+ na ku ba bwananyina.” E fyo afuminepo no kuya kumbi.

18 Awe, ilyo bwacele,+ abashilika balisakamene sana pa cacitike kuli Petro. 19 Herode+ alimufwaile sana, na pa kukanamusanga, alubulwishe abalinshi no kusosa ukuti babakande;+ kabili afumine ku Yudea no kutentemukila ku Kaisarea no kwikalako akashita kanono.

20 Awe alefwaisha ukulwa na bena Turi na bena Sidone. E ico baishile kuli ena no mutima umo, kabili ilyo banashanasha Blasti, uwaleangalila ing’anda ya mfumu, baile kuli Herode ukuti bomfwane nankwe pa lwa mutende, pantu icalo cabo calefumya ifya kulya+ ku calo ca mfumu. 21 Lelo pa bushiku bwasalilwe, Herode afwele ifya kufwala fya bufumu no kwikala pa cipuna ca kupingwilapo no kutendeka ukulanda ku bantu. 22 Na bantu abalongene batendeke ukupunda abati: “Ilyo lishiwi lya kwa lesa, te lya muntu iyo!”+ 23 Apo pene malaika wa kwa Yehova alimuumine,+ pa mulandu wa kuti tacindike Lesa;+ kabili imititi yalimuliile, asuka afwa.

24 Lelo icebo+ ca kwa Yehova calelunduluka no kusalangana.+

25 Nomba Barnaba+ na Sauli, ilyo bafishishe ifya kukumbusuka+ mu Yerusalemu, balibwelulwike, basenda na Yohane,+ uwitwa Marko.

13 Awe mu cilonganino ca mu Antioke mwali bakasesema+ na bakasambilisha, mwali na Barnaba pamo na Sumeone uwaleitwa ati Nigere, na Luki+ umwina Kurene, na Manaene uwasambilishiwe pamo na Herode kateka wa citungu ca mu Roma, na Sauli. 2 Ilyo balebombela+ Yehova no kuleka ukulya, umupashi wa mushilo watile: “Pa bantu bonse mpaatwileniko Barnaba na Sauli+ ku kubomba umulimo uo nabetila.” 3 E lyo balekele ukulya, bapepa kabili bababikilepo iminwe+ no kubaleka baye.

4 E ico na bo, pa kutumwa no mupashi wa mushilo, batentemukile ku Selukia, kabili ilyo bafumineko baile mu bwato ku Kupro. 5 Kabili ilyo bafikile mu Salami batendeke ukusabankanya icebo ca kwa Lesa mu masunagoge* ya baYuda. Bali na Yohane+ uwa kubabombela.

6 Ilyo balalenye icishi ukufika ku Pafu, bakumenye umuntu umo, uwa finjelengwe, kasesema wa bufi,+ umuYuda ishina lyakwe ni Bar-Yesu, 7 kabili ali no mulashi Sergi Pauli, umuntu uwacenjela. Ilyo aitile Barnaba na Sauli, uyu muntu alefwaisha ukumfwa icebo ca kwa Lesa. 8 Lelo Eluma uwa finjelengwe (na kuba, e mwalola ishina lyakwe) atendeke ukubakaanya,+ alefwaya ukufumya umulashi ku citetekelo. 9 Sauli, uwitwa kabili Paulo, pa kwisulamo umupashi wa mushilo, alimulolekeshe 10 no kutila: “We ncenjeshi yakamamo na menshi kabili kabepa, we mwana wa kwa Satana Kaseebanya,+ we mulwani wa fintu fyonse ifyalungama, bushe tawakaleke ukupondamika inshila shalungama isha kwa Yehova? 11 Lelo, mona! ukuboko kwa kwa Yehova kuli pali iwe, kabili walapofula, tawamone akasuba pa nshita imo.” Apo pene kwaponene akafiifi pali ena, kabili alepulumpunta fye alefwaya aba kumwikata ku kuboko ukuti bamutungululeko.+ 12 Awe umulashi,+ pa kumona icacitike, alisumine, pantu alipapile pe sambilisho lya kwa Yehova.

13 Nomba Paulo na banankwe, baninine ubwato ku Pafu no kuya ku Perga mu Pamfulia.+ Na Yohane+ afumine kuli bena no kubwelela+ ku Yerusalemu. 14 Lelo bena bafumine ku Perga, baile ku Antioke mu Pisidia, kabili, ilyo baingile mwi sunagoge+ pa bushiku bwe sabata, baliikele. 15 Pa numa ya kubelengela abantu Amafunde+ na mabuuku ya Bakasesema, abakalamba+ be sunagoge babatumiine inkombe, abati: “Mwe baume, bamunyinefwe, nga muli na mashiwi ya kukoselesha abantu, soseni.” 16 E ico Paulo aliimine, kabili, ilyo abakapishe+ ukuboko, atile:

“Mwe baume, abena Israele na bambi abatiina Lesa, umfweni.+ 17 Lesa wa aba bantu abena Israele asalile ifikolwe fyesu, kabili asansabike abantu ilyo bali abalebeshi mu calo ca Egupti no kubafumyamo ku maka yakwe.*+ 18 Kabili pa myaka nalimo amakumi yane (40)+ aleshipikisha fye pa mulandu wa mibele yabo mu matololo. 19 Ilyo aonawile inko cinelubali (7) mu calo ca Kanaani, abakenye impanga ya muli cilya calo:+ 20 fyonse ifyo fyacitike mu myaka nalimo imyanda ine na makumi yasano (450).

“Kabili pa numa ya ifi fintu abapeele abapingushi, ukufika na kuli kasesema Samwele.+ 21 Lelo ukutula ilyo balombele imfumu,+ na Lesa abapeele Shauli umwana wa kwa Kishi, uwa mu mukowa wa kwa Benjamini,+ uwabatekele pa myaka amakumi yane (40). 22 Kabili ilyo amufumishepo,+ abapeele Davidi ukuba imfumu,+ uo ashimikepo ubunte, ati, ‘Ninsanga Davidi umwana wa kwa Yese,+ umuntu uo umutima+ wandi watemwa, uukacita fyonse ifyo mfwaya.’+ 23 Mu bufyashi+ bwa uyu muntu, e mo Lesa afumishe umupusushi+ wa bena Israele, Yesu, ukulingana no bulayo bwakwe. 24 Ilyo Yesu+ talati ese Yohane+ ashimikile ku bena Israele bonse ulubatisho lwa kulangilila ukulapila. 25 Lelo ilyo Yohane aleya alepwisha ulwendo lwakwe, aleti, ‘Bushe muletila nine nani? Te ine ulya. Lelo, moneni! kuleisa umo pa numa yandi uo nshilingile fye no kukakula indyato shakwe.’+

26 “Mwe baume, bamunyinane, mwe bana abaume aba mu bana ba kwa Abrahamu na bonse pali imwe abatiina Lesa, aya mashiwi ye pusukilo lyesu nayatumwa kuli ifwe.+ 27 Pantu abekashi ba mu Yerusalemu na bakateka babo tabamwishibe,+ lelo, ku co bacitile, bafikilishe ifintu ifyalandile Bakasesema,+ ifibelengwa pa Masabata yonse, 28 kabili, nangu tabasangile umulandu wa kumwipailapo,+ baebele Pilato ukuti epaiwe.+ 29 Nomba ilyo bafikilishe fyonse ifyalembelwe pali ena,+ bamwikishe pa cimuti+ no kumubika mu nshiishi.+ 30 Lelo Lesa amwimishe ku bafwa;+ 31 kabili inshiku ishingi amoneke ku baninine nankwe ukufuma ku Galili ukuya ku Yerusalemu, abo nomba baleshimikila abantu pali ena.+

32 “E ico tulebila kuli imwe imbila nsuma iya bulayo ubwalaiwe ku fikolwe fyesu,+ 33 ukuti Lesa nafikilisha ubu bulayo kuli ifwe fwe bana babo pantu abuushishe Yesu;+ ifyo calembwa mwi lumbo lyalenga bubili, aciti, ‘Uli mwana wandi, ine, buno bushiku nimba wiso.’+ 34 Kabili pa mulandu wa kuti Lesa amubuushishe ku bafwa no kukanamulenga ukubwelela kabili ku kubola, e co alandiile, ati, ‘Ni mwe nkalanga icikuuku cine cine ico nalaile Davidi.’+ 35 E ico kabili asosa mwi lumbo limbi, ati, ‘Tamwakaleke uwa cishinka wenu ukubola.’+ 36 Pantu Davidi,+ ena, abombele ico Lesa umwine alefwaya mu nkulo yakwe kabili aponene mu tulo twa mfwa kabili abikilwe pamo ne fikolwe fyakwe no kubola alibola.+ 37 Lelo, uo Lesa aimishe tabolele.+

38 “E ico, lekeni cishibikwe kuli imwe, bamunyinane, ukuti muli Yesu e mo tulebilila ukutila kuti mwaelelwa imembu;+ 39 no kuti muli fyonse umo mushalungamikilwe mu mafunde ya kwa Mose,+ onse uwasumina alalungamikwa muli Yesu.+ 40 E ico cenjeleni ukuti icasoselwe muli Bakasesema tacimuponene, 41 ‘Moneni, mwe ba misuula, kabili papeni, no konaika, pantu ine ndebomba umulimo mu nshiku shenu, umulimo uo tamwakasumine nakalya nangu umuntu engamushimikila fyonse.’”+

42 Nomba ilyo balefuma, abantu balapapaata ukuti bakesebashimikilako aya yene amashiwi pe sabata ilyakonkapo.+ 43 E ico ilyo abantu bafumine mwi sunagoge, abengi aba mu baYuda na basangwike fye abaYuda abalepepa Lesa bakonkele Paulo na Barnaba,+ na bo pa kulanda kuli bena balabacincisha+ ukutwalilila ukuba abalinga ukupokelela icikuuku ca kwa Lesa.+

44 Pe sabata ilyakonkapo ni cikanga umusumba onse ulongane ku kumfwa icebo ca kwa Yehova.+ 45 AbaYuda batile bashimona amabumba, baiswilemo akalumwa+ kabili batendeke ukukaanya no kupontela ifyalelanda Paulo.+ 46 Lelo Paulo na Barnaba balandile ukwabula umwenso, abati: “Calilingile ukuti icebo ca kwa Lesa cibalilepo ukulandwa kuli imwe.+ Apo mulecikaana,+ kabili tamuleilinga abawamina umweo wa muyayaya, moneni! tulealukila ku bena fyalo.+ 47 Na kuba, Yehova atwebele amashiwi ya kuti, ‘Nimusala ukuba ulubuuto ku bena fyalo,+ ku kuba ipusukilo ku mpela ye sonde.’”+

48 Ilyo aba mu bena fyalo baumfwile ici, batendeke ukusekelela no kucindika icebo ca kwa Yehova,+ na bonse abali no mutima uusuma uwalefwaya umweo wa muyayaya balitetekele.+ 49 Kabili, icebo ca kwa Yehova calesalangana muli cilya calo conse.+ 50 Lelo abaYuda+ basongele abanakashi abacindikwa abalepepa Lesa na bakalamba ba mu musumba, kabili batampile ukucusha+ Paulo na Barnaba no kubatamfisha ku nse ya musumba. 51 Na bo babakuntiile ulukungu ku makasa yabo+ no kuya ku Ikonia. 52 Kabili abasambi balisekelele+ nga nshi no kwisulamo umupashi wa mushilo.

14 Ilyo Paulo na Barnaba bali mu Ikonia+ baingile pamo mwi sunagoge+ ilya baYuda no kulanda bwino sana ica kuti ibumba ilikalamba ilya baYuda na baGriki+ lyalitetekele. 2 Lelo abaYuda abashatetekele bafundawile+ abena fyalo no kubalenga ukwimina aba bwananyina.+ 3 E ico bapoosele inshita iikalamba ukulanda ukwabula umwenso pantu Yehova alibapeele amaka, pa kubalenga ukucita ifishibilo ne fipesha amano pa kuti abantu bashininkishe ukuti amashiwi balesosa pa cikuuku ca kwa Lesa ya cine.+ 4 Lelo, ibumba lya mu musumba lyalyakanikene, bamo baikuminishe ku baYuda lelo bambi ku batumwa. 5 Nomba ilyo abena fyalo pamo na baYuda ne ntungulushi shabo basakatuka, bapene babasaalule no kubapoola amabwe,+ 6 na bo, ilyo baebelwe ici, bafulumukile+ ku misumba ya Lukaonia, Lustra na Derbe na ku calo ca mu mbali; 7 kabili kulya e ko bakonkenyepo ukubila imbila nsuma.+

8 Awe mu Lustra mwali umwaume uwalemene amakasa, uwafyelwe icilema,+ kabili tatalile enda. 9 Uyu muntu alekutika ilyo Paulo alelanda, na o, pa kumulolekesha no kumona ukuti nacetekela+ ukutila kuti apola, 10 Paulo asosele ishiwi ilikalamba ati: “Iminina.” Na o alitolweke no kutendeka ukwenda.+ 11 Na mabumba, pa kumona ifyo Paulo acitile, basanswile amashiwi yabo, no kusosa mu cina Lukaonia, abati: “Balesa+ baba nga bantunse no kutentemukila kuli ifwe!” 12 Kabili Barnaba balamwita ati Seu, na Paulo balamwita ati Herme, ico e walebalilapo ukulanda. 13 Kabili shimapepo wa kwa Seu, uo itempele lyakwe lyaloshenye no musumba, aletele ing’ombe ishilume ne ng’ana sha maluba ku mpongolo kabili ena na mabumba balefwaisha ukutuula amalambo.+

14 Lelo, ilyo abatumwa, e kutila Barnaba na Paulo, baumfwile ici, balepwile amalaya yabo no kutolokela mwi bumba, balebilikisha 15 abati: “Mwe baume mwe, cinshi mulecitila ifi? Na ifwe bene tuli bantu+ fye nga imwe,+ kabili tulemubilila imbila nsuma, pa kuti mutaluke kuli ifi fintu ifya fye+ no kupilibukila kuli Lesa wa mweo,+ uwapangile umuulu+ na pano isonde na bemba na fyonse ifyabamo. 16 Mu nkulo ishapita asuminishe inko shonse ukuya mu nshila sha shiko,+ 17 nelyo tailekele fye ukwabula ubushininkisho pantu acitile icisuma,+ pa kumupeela imfula+ ukufuma mu muulu ne nshita sha kutwala ifisabo, ukumupeela ifya kulya ifingi no kulenga imitima yenu ukusangalala.”+ 18 Nangu basosele ifi tacayangwike ukulesha amabumba ukubatuulila amalambo.

19 Lelo abaYuda abafumine ku Antioke na ku Ikonia baishilenashanasha amabumba,+ kabili bapoolele Paulo amabwe no kumukulila ku nse ya musumba, pantu bamwene kwati nafwa.+ 20 Lelo, ilyo abasambi bamushingulwike, aliimine no kwingila mu musumba. Na pa bushiku bwakonkelepo aile na Barnaba ku Derbe.+ 21 Kabili ilyo babilile imbila nsuma kuli ulya musumba no kulenga abantu abengi ukuba abasambi,+ babweleele ku Lustra na ku Ikonia na ku Antioke, 22 balekosha imitima ya basambi,+ ukubakoselesha ukwikalilila mu citetekelo, abati: “Pa kwingila mu bufumu bwa kwa Lesa, tuli no kupita mu macushi ayengi.”+ 23 Kabili, babasonteele abakalamba+ mu cilonganino cimo na cimo kabili, ilyo bapepele no kuleka ukulya,+ babapeele kuli Yehova+ uo batetekele.

24 Kabili bapitile mu Pisidia no kwisa mu Pamfulia,+ 25 kabili, ilyo bashimikile mu Perga, batentemukile ku Atalia. 26 Kabili ilyo bafumineko baile mu bwato ku Antioke,+ uko bapeelwe umulimo wa kubomba pa mulandu wa cikuuku ca kwa Lesa umulimo uo bapwishishe ukubomba.+

27 Ilyo bafikile no kulonganika aba mu cilonganino, batendeke ukushimika+ ifingi ifyo Lesa acitile muli bena, no kuti alengele abena fyalo ukutetekela.+ 28 E ico baikele inshita iikalamba na basambi.

15 Kabili abantu bamo bafumine ku Yudea+ no kutendeka ukusambilisha aba bwananyina abati: “Nga tamusembulwilwe+ ukulingana no lutambi lwa kwa Mose,+ te kuti mupusuke nakalya.” 2 Lelo ilyo Paulo na Barnaba na balya bantu, bapusene no kukansana nga nshi, bateyenye ukuti Paulo na Barnaba na bambi baye ku batumwa na ku bakalamba mu Yerusalemu+ pa mulandu wa ifi fikansa.

3 E ico, ilyo icilonganino cabashindike,+ aba bantu batwalilile pa lwendo lwabo ukupita mu Foinike na mu Samaria, baleshimika ne fyo abena fyalo bapilibukile kuli Lesa,+ kabili balelenga aba bwananyina bonse ukusekelela nga nshi.+ 4 Ilyo bafikile mu Yerusalemu balibapokelele+ bwino ku cilonganino na ku batumwa na ku bakalamba, kabili balondolwele ifingi ifyo Lesa acitile muli bena.+ 5 Lelo, bamo aba mwi bumba lya mapepo ilya baFarise abatetekela baimine apo baikele no kutila: “Aba bantu balingile ukusembululwa+ no kubakonkomesha ukukonka amafunde ya kwa Mose.”+

6 Kabili abatumwa na bakalamba balilongene pa kuti bomfwe uyu mulandu.+ 7 Awe ilyo kwali ukukansana+ kukalamba, Petro aliimine no kubeba ati: “Mwe baume, bamunyinane, mwalishiba bwino ukuti ku nshiku sha kale Lesa ansalile muli imwe pa kuti abena fyalo bomfwe imbila nsuma no kutetekela;+ 8 kabili Lesa, uwaishiba imitima+ ya bantu, alilanga ukuti alibapokelela pa kubapeela umupashi+ wa mushilo, filya fine acitile na kuli ifwe. 9 Kabili tacitile akapaatulula iyo pa kati ka ifwe na bena,+ lelo asangulwile imitima yabo ku citetekelo.+ 10 E ico, nomba, cinshi mule-esesha Lesa pa kubika ikoli+ pa mikoshi ya basambi ilyo ifikolwe fyesu nangu ni fwe tushali na maka aya kulisenda?+ 11 Awe, ifwe pamo pene na balya bantu+ tulecetekela ukupusukila mu cikuuku+ ca kwa Shikulu Yesu.”

12 Awe ibumba lyonse lyatalele tondolo, lyalakutika uko Barnaba na Paulo baleshimika ifishibilo ifingi ne fipesha amano ifyo Lesa acitile muli bena ku bena fyalo.+ 13 Ilyo balekele ukulanda, Yakobo ayaswike ati: “Mwe baume, bamunyinane, ng’umfweni.+ 14 Sumeone*+ nalondolola bwino bwino ifyo Lesa pa muku wa kubalilapo apilibukile ku bena fyalo ku kubuulamo abantu abe shina lyakwe.+ 15 Kabili ici cileumfwana na mashiwi ya Bakasesema, nga filya calembwa aciti, 16 ‘Pa numa ya ifi fintu nkabwela no kukuula cipya cipya insakwe ya kwa Davidi iyawa; kabili nkakuula cipya cipya ifitantaala fya iko no kuimika na kabili,+ 17 pa kuti abantu abashalapo, capamo na bena fyalo bonse, e kutila abantu abetilwa kwi shina lyandi, bakafwaye Yehova, e fyasosa Yehova uulecita ifi fintu,+ 18 ifyaishibikwa ukufuma ku kale.’+ 19 E ico ine ndetila twicusha abena fyalo abalepilibukila kuli Lesa,+ 20 lelo tubalembele fye ukutaluka ku fyakoweshiwa ku tulubi,+ ku bulalelale,+ ku fyatitilwa,+ na ku mulopa.+ 21 Pantu ukufuma fye na ku kale Mose balamulandapo mu misumba yonse, pantu balabelenga pali ena mu masunagoge* pe sabata lyonse.”+

22 Kabili abatumwa na bakalamba pamo ne cilonganino conse bapingushenye ukuti batume abaume bamo aba mwi bumba lyabo ku Antioke pamo na Paulo na Barnaba, e kutila Yuda uwaleitwa ati Barisaba+ na Sila, abali intungulushi pa ba bwananyina; 23 kabili aba bene e bo balaishe kalata uwaleti:

“Kuli bamunyinefwe abena fyalo aba mu Antioke,+ aba mu Siria, na ba mu Kilikia,+ ifwe fwe bamunyinenwe, fwe batumwa na bakalamba, tuleti: Mwapoleni! 24 Apo twalyumfwa ukuti bamo muli ifwe nabamufundaula ku fyo balesosa,+ no kwesha ukumufulunganya imitima, nangu ca kutila tatwabebele ukucita ifyo,+ 25 bonse twapingula no mutima umo+ no kusala abaume no kubatuma kuli imwe capamo na batemwikwa besu, Barnaba na Paulo,+ 26 abantu abapeela imyeo yabo pa mulandu we shina lya kwa Shikulu Yesu Kristu.+ 27 E ico twatuma Yuda na Sila,+ ukuti na bo bakashimike fimo fine pa kanwa.+ 28 Pantu umupashi+ wa mushilo na ifwe, twasalapo ukukanamutwika icisendo+ na cimbi, lelo ifyo mufwile ukulakonka ni fi, 29 muletaluka ku fyaipailwa utulubi,+ ku mulopa,+ ku fyatitilwa,+ na ku bulalelale.+ Nga muletalukililako fye kuli ifi fintu,+ mukabomba bwino. Umutende ube na imwe!”

30 E ico, ilyo aba bantu babalekele baye, batentemukile ku Antioke, kabili balonganike aba bwananyina no kubapeela kalata.+ 31 Ilyo babelengele, balisekelele pantu balibakoseleshe.+ 32 Kabili Yuda na Sila, apo na bo bali bakasesema,+ balandile amashiwi ayengi aya kukoselesha aba bwananyina no kubakosha.+ 33 E ico, ilyo baikeleko inshita iilingile, aba bwananyina babalekele baye umutende+ ku babatumine. 34 * —— 35 Lelo, Paulo na Barnaba batwalilile ukwikala mu Antioke+ balesambilisha no kubila imbila nsuma ya cebo ca kwa Yehova, pamo na bantu bambi abengi.+

36 Awe ilyo papitile inshiku shimo Paulo aebele Barnaba ati: “Natutale tubwelelemo, tuyepempula aba bwananyina mu misumba yonse umo twasabankenye icebo ca kwa Yehova tumone ifyo bali.”+ 37 Barnaba ena, alefwaisha ukusenda Yohane, uwaleitwa Marko.+ 38 Lelo Paulo alikeene ukumusenda, pantu alibashile ku Pamfulia+ kabili taile na bo ku mulimo. 39 Awe bakansene nga nshi pali uyu mulandu, ica kutila bapaatukana no kupaatukana; na Barnaba+ asendele Marko no kuya mu bwato ku Kupro,+ 40 Paulo asalile Sila+ kabili ilyo aba bwananyina bashile Paulo mu maboko ya kwa Yehova pa kuti amulange icikuuku cakwe, aliimine no kuya.+ 41 Lelo apitile mu Siria na mu Kilikia, alekosha ifilonganino.+

16 Awe afikile ku Derbe na ku Lustra.+ Kabili, moneni! e kwali umusambi umo ishina lyakwe Timote,+ umwana mwaume wa mwanakashi umuYuda uwatetekela lelo wishi aali umuGriki, 2 kabili Timote aleshimikwa icisuma ku ba bwananyina mu Lustra na mu Ikonia. 3 Paulo alefwaisha ukuti aye nankwe, lelo abalile amusembulula+ e lyo amubuula pa mulandu wa baYuda abali kulya, pantu bonse fye balishibe ukuti wishi aali muGriki. 4 Nomba ilyo balepita mu misumba balepeela abantu ifipope ifyo abatumwa na bakalamba abali mu Yerusalemu+ bapingwile ukuti e fyo balekonka. 5 E ico, ifilonganino fyalekoshiwa mu citetekelo+ na ba mu filonganino balefulilako cila bushiku.

6 Kabili, bapitile mu Frugia na mu calo ca Galatia,+ pa mulandu wa kuti umupashi wa mushilo walibaleseshe ukushimikila mu citungu ca Asia. 7 Na kabili, ilyo bafikile mu Musia baeseshe ukuya ku Bitunia,+ lelo umupashi wa kwa Yesu walibakeenye. 8 E ico bapitile mu mbali ya Musia no kutentemukila ku Troa.+ 9 Kabili ubushiku kwamoneke icimonwa+ kuli Paulo: Umwina Makedonia umo aliminine alemupapaata ati: “Abukileni ku Makedonia mwise mutwafwe.” 10 Awe ilyo fye amwene icimonwa, twafwaile ukuya ku Makedonia,+ ico twatile Lesa alitwitile ukuyabila kuli bena imbila nsuma.

11 E ico twafumine pa Troa no kulungama ku Samotrake mu bwato, lelo pa bwakonkapo twaile ku Neapoli, 12 kabili ilyo twafumineko twaile ku Filipi,+ umusumba uwaletungululwa ne calo ca Roma, uwali e musumba uukalamba mu citungu ca Makedonia.+ Umu mwine e mo twaikele, inshiku shimo. 13 Kabili pa bushiku bwe sabata twafumine ku nse ya mpongolo ku lulamba lwa mumana, uko twatile e kwali icifulo ca mapepo; e ko twaikele kabili twalalanda ku banakashi abalongene. 14 Kabili umwanakashi umo ishina lyakwe Lidia, kashitisha wa nsalu shakashikila, uwa mu musumba wa Tuatira+ kabili kapepa wa kwa Lesa, alekutika, kabili Yehova aiswile nga nshi umutima+ wakwe ku kubika amano ku fyalelanda Paulo. 15 Awe ilyo ena na ba mu ng’anda yakwe babatishiwe,+ apapeete ati: “Nga namumona ukuti ndi wa cishinka kuli Yehova, ingileni mu ng’anda yandi no kwikala.”+ Awe e fyo akoselepo mpaka twaikala.+

16 Kabili lintu twaleya ku cifulo ca mapepo, umukashana umo umubomfi, uwali no mupashi+ wa kubuka,+ alitukumenye. Aleletela bashikulu wakwe ifyuma+ ifingi mu kubuka. 17 Uyu mukashana alekonka Paulo pamo na ifwe no kulabilikisha,+ ati: “Aba e babomfi ba kwa Lesa Uwapulamo, abalesabankanya kuli imwe inshila ye pusukilo.” 18 Alecita ifi pa nshiku ishingi. Paulo asukile akalipa,+ apilibuka no kweba umupashi uubifi ati: “Ndekwebela mwi shina lya kwa Yesu Kristu ukuti fumamo+ mu mukashana.” Ilyo line fye walifumine.+

19 Awe, ilyo bashikulu wakwe bamwene ukuti nomba capwa tabakulamwenamo ifyuma,+ baikete Paulo na Sila no kubakulila mu lubansa lwa maliketi ku ntungulushi,+ 20 kabili, ilyo babatwele kuli bamafumu, batile: “Aba bantu, abaYuda, balefulunganya+ sana aba mu musumba wesu, 21 kabili balesambilisha intambi+ isho tushasuminishiwa ukupokelela atemwa ukucita, apo tuli bena Roma.” 22 Kabili ibumba lyabemine capamo; na bamafumu, ilyo babalepwilile amalaya, baebele ukuti babome ifikoti ku nkonto.+ 23 Ilyo babomine nga nshi,+ babapoosele mu cifungo, no kukonkomesha kalinda wa cifungo ukubasopa sana.+ 24 Na o, pa kukonkomeshiwa muli uyu musango, abapoosele mu cifungo+ ca mu kati no kukakisha amakasa yabo mu makusu.+

25 Lelo lwa pa kati ka bushiku+ Paulo na Sila balepepa no kulumbanya Lesa mu nyimbo;+ na bafungwa balebomfwa. 26 Apo pene kwapitile ne cinkukuma icikalamba, no mufula apo icifungo cakuulilwe walitenkene. Kabili, apo pene ifiibi fyonse fyaliiswike, ne fikakilo fyabo fyalikakwike.+ 27 Ilyo kalinda wa cifungo ashibwike mu tulo no kumona ifiibi fya cifungo nafisuka, asomwene ulupanga lwakwe ukuti aipaye,+ pantu aleti abafungwa nabafyuka.+ 28 Lelo Paulo abilikishe ishiwi ilikalamba, ati: “Wi-ipaya,+ pantu bonse e mo tuli!” 29 Awe kalinda wa cifungo alombele ifyengelo no kuyamo ulubilo, kabili pa kwikatwa umwenso no kututuma, awilile+ pa makasa ya kwa Paulo na Sila. 30 Kabili abafumishe pa nse no kutila: “Mukwai, cinshi ningacita+ pa kuti mpusuke?” 31 Na bo batile: “Nga watetekela Shikulu Yesu e lyo ukapusuka,+ iwe na ba mu ng’anda yobe.”+ 32 Kabili balandile icebo ca kwa Yehova kuli ena na ku ba mu ng’anda yakwe bonse.+ 33 Kabili alibabuulile mu nshita ilya ine iya bushiku no kubasambila ifilonda; kabili, ilyo line, bonse fye, ena na bantu bakwe balibatishiwe.+ 34 Kabili abengishe mu ng’anda yakwe no kubapekanishisha ifya kulya, kabili asekelele apakalamba pamo na bonse aba mu ng’anda yakwe apo alitetekele Lesa.

35 Cilya bwaca ulucelo, bamafumu+ batuma bakapaso, abati: “Kakuleni balya bantu.” 36 E ico kalinda wa cifungo afishishe amashiwi yabo kuli Paulo ati: “Bamafumu nabatuma abantu ukuti imwe babili mukakulwe. E ico, nomba fumeni, kabiyeni umutende.” 37 Lelo Paulo abebele ati: “Batufopawilile pa bantu ukwabula ukutupingula, fwe bena Roma,+ no kutupoosa mu cifungo; kabili bushe nomba baletutamfya mu bumfisolo mwa? Awe iyo! Lelo abene kabese, batufumyemo.” 38 E ico bakapaso bailefisha aya mashiwi kuli bamafumu. Na bo balitiinine ilyo baumfwile ukuti bena Roma.+ 39 E ico baileko no kubapapaata, kabili ilyo babafumishe, babalombele ukuti bafume mu musumba. 40 Lelo bafumine mu cifungo no kuya ku ng’anda ya kwa Lidia, kabili ilyo bamwene aba bwananyina balibakoseleshe,+ e lyo bafumineko baya no kuya.

17 Awe bapitile mu Amfipoli na Apolonia no kufika ku Tesalonika,+ ukwali isunagoge lya baYuda. 2 E ico Paulo, ukulingana ne fyo alecita lyonse,+ aingile mu kati umo baali, kabili pa masabata yatatu alelanshanya na bo Amalembo,+ 3 alelondolola no kubapeela ubushininkisho bwa mu malembo ukuti Kristu ali no kucula+ no kwima ku bafwa,+ no kuti: “Uyu e Kristu,+ uyu Yesu uo ine ndesabankanya kuli imwe.” 4 E ico bamo pali bena balitetekele+ no kuilunda kuli Paulo na Sila.+ Ibumba ilikalamba ilya baGriki abalepepa Lesa na banakashi abalumbuka abengi na bo balitetekele.

5 Lelo abaYuda, pa kwikatwa akalumwa,+ babuulile abantu bamo ababifi amalofwa aba pa maliketi kabili balonganike ibungwe no kucita icimfundawila+ mu musumba. Kabili basanshile ing’anda ya kwa Yasone+ no kufwaya ukufumisha abatumwa kwi bungwe. 6 Ilyo bafililwe ukubasanga, bakulile Yasone na ba bwananyina bamo no kubatwala ku ntungulushi sha mu musumba, balebilikisha abati: “Aba bantu mumfwa abasongelekanya+ abantu mpanga yonse e beshile na kuno, 7 na Yasone nabapokelela. Kabili aba bonse balekaanya ifipope+ fya kwa Kaisare, baletila kuli imfumu+ imbi, Yesu.” 8 Na cine bafulungenye ibumba ne ntungulushi sha mu musumba lintu shaumfwile ifi fintu; 9 kabili ilyo bapokele indalama sha cikatila mulandu kuli Yasone na bambi babalekele baye.

10 Ilyo fye bwailile+ aba bwananyina batumine Paulo na Sila ku Berea, na bo, ilyo bafikile, baile mwi sunagoge lya baYuda. 11 Awe aba bali no mutima wa kusambilila ukucila aba mu Tesalonika, pantu bena imitima yabo yafwaishe nga nshi ukupokelela amashiwi ya kwa Lesa. Balefwailisha+ mu Malembo+ cila bushiku pa kuti bashininkishe nga ca kutila ifi fintu fya cine.+ 12 E ico abengi pa baYuda balitetekele, na pa baGriki bene na po abanakashi abengi abacindikwa+ na baume balitetekele. 13 Lelo ilyo abaYuda ba ku Tesalonika baumfwile ukuti Paulo alisabankenye icebo ca kwa Lesa na mu Berea, balileko na ko ku kutunka+ no kufulunganya+ amabumba. 14 Kabili apo pene aba bwananyina batumine Paulo ukuya kuli bemba;+ lelo Sila na Timote bashele kulya. 15 Lelo, abaleshindika Paulo bamufishishe ku Atena, kabili ilyo bapokelele amashiwi ya kuti Sila na Timote+ bakese bwangu bwangu kuli ena, baliile no kuya.

16 Nomba ilyo Paulo alebalolela mu Atena, alikalifiwe+ pa kumona ukuti umusumba waiswilemo utulubi. 17 E ico atendeke ukulanshanya na baYuda+ mwi sunagoge na bambi abalepepa Lesa kabili cila bushiku pa maliketi+ alelanshanya na balesangwapo. 18 Lelo bamo aba mano ya bantunse+ abena Epikuri na bena Stoiki batendeke ukupilikana nankwe, kabili bamo baletila: “Cinshi ico uyu cilandelande alesosa?”+ Bambi batile: “Alemoneka kwati alesambilisha pali balesa bambi bambi.” Pantu alebila imbila nsuma iya kwa Yesu no kubuuka kwakwe.+ 19 E ico balimwikete no kumutwala ku Areopagi,* abati: “Tulefwaya ukwishiba ifi fintu ifipya ifyo ulesambilisha.+ 20 Pantu uleleta ifintu ifyeni mu matwi yesu. E ico tulefwaisha ukwishiba umo ifi fintu filolele.”+ 21 Na kuba, abena Atena bonse na balebeshi bonse abaleikalamo tabalepoosa inshita ku kucita cimbi kano ukushimika atemwa ukukutika icipya. 22 Awe Paulo aiminine mu kati ka Areopagi+ no kutila:

“Mwe bena Atena, nimona ukuti muli fyonse imwe mulemoneka nga batiina sana balesa+ ukucila abantu bambi. 23 Pantu, ilyo nalepita no kulolekesha ifyo mupepa, nasangile ne ciipailo apalembwa ukuti ‘Kuli Lesa Uushaishibikwa.’ E ico uo mupepa untu mushaishiba e o ndebila kuli imwe. 24 Lesa uwapangile cino calo na fyonse ifyabapo, Ena, pa kuba Shikulu wa muulu na pano isonde,+ tekala mu matempele ayakuulwa na bantu,+ 25 kabili takabila+ ukuti abantu bamubombele, pantu e upeela abantu bonse umweo+ no mupu+ na fyonse. 26 Kabili mu muntu+ umo e mo alengeele inko+ shonse isha bantunse, ukwikala pano isonde ponse,+ kabili abikile inshita+ no kupakula imipaka ya bwikalo bwa bantunse,+ 27 pa kuti shifwaye Lesa,+ nalimo shingamupampanta no kumusanga,+ nangu line kwena taba kutali kuli ifwe umo umo. 28 Pantu e walenga ukuti tube no mweo, ukuti tule-enda no kuti tubeko,+ nga filya bakalemba wa mishikakulo+ bamo muli imwe batila, ‘Pantu na ifwe tuli bana bakwe.’

29 “E ico, apo tuli bana ba kwa Lesa,+ tatufwile ukumona ukuti Lesa+ aba nga golde atemwa silfere atemwa ilibwe, nge cabaswa ku bantu abacenjela mu fya kupangapanga kabili ku mano ya bantunse.+ 30 Na cine, Lesa alisuulako ishi nshita sha kukanaishiba,+ lelo nomba ale-eba abantu bonse mpanga yonse ukulapila.+ 31 Pa mulandu wa kuti alibika ubushiku umo akapingwila+ abantu ba pano isonde mu bulungami ku muntu uo asonta, kabili alipeela no bushininkisho ku bantu bonse pa kumubuusha+ ku bafwa.”

32 Awe, ilyo baumfwile Paulo alanda pa kubuuka kwa bafwa, bamo batendeke ukumupumya,+ e lyo bambi batile: “Tukesaumfwako limbi pali ci.” 33 E fyo Paulo afumine mu kati kabo, 34 lelo abantu bamo bailundile kuli ena kabili balitetekele, pali abo pali na Dionusi, kapingula wa mu cilye ca Areopagi,+ no mwanakashi ishina lyakwe Damari, na bambipo.

18 Pa numa ya ifi afumine ku Atena no kuya ku Korinti. 2 E ko asangile umuYuda umo ishina lyakwe ni Akula,+ umwina Ponte, na o ninshi e lyo fye afumine ku Italia,+ no mukashi wakwe Prisila,* pantu Klaudi+ aebele abaYuda bonse ukufuma mu Roma. Awe aile kuli bena 3 kabili apo bonse balebomba umulimo umo wine, aikele ku mwabo, no kubombela+ pamo na bo, pantu ukupanga amatenti e mulimo balebomba. 4 Lyonse pe sabata, aleshimikila abaYuda na baGriki mwi sunagoge+ no kubanashanasha.

5 Nomba, ilyo Sila+ na Timote+ babwelele ukufuma ku Makedonia, Paulo abikile amano yonse ku kushimikila icebo ca kwa Lesa, alebila imbila nsuma ku baYuda ukubapeela ubushinkisho bwa kuti Yesu e Kristu.+ 6 Lelo ilyo batwalilile ukumukaanya no kumusaalula,+ akuntile ifya kufwala+ fyakwe no kubeba ati: “Umulopa+ wenu ube pa mitwe yenu. Ine ndi wa kaele.+ Ukufuma nomba nakulaya ku bena fyalo.”+ 7 E ico alifumineko no kuya mu ng’anda ya muntu we shina lya Tito Yusti, kapepa wa kwa Lesa, uo ing’anda yakwe yashintene ne sunagoge. 8 Lelo Krispi+ umukalamba we sunagoge alitetekele Shikulu, pamo na bonse aba mu ng’anda yakwe. Na bena Korinti abengi abaumfwile balitetekele no kubatishiwa. 9 Kabili, ilyo bwailile Shikulu aebele Paulo+ mu cimonwa, ati: “Witiina, lelo konkanyapo fye ukushimikila, 10 pantu ine ndi nobe,+ kabili takuli uukakusansa no kukucita icabipa; pantu ndi na bantu abengi muli uno musumba.” 11 E ico aikeleko umwaka umo ne myeshi mutanda (6), alesambilisha icebo ca kwa Lesa pa kati kabo.

12 Awe ilyo Galio aali umulashi+ wa ku Akaya, abaYuda baimiine Paulo no mutima umo no kumutwala ku cipuna ca kupingwilapo,+ 13 abati: “Uyu muntu alenashanasha+ abantu ukupepa Lesa mu musango uwapusana na mafunde yesu.” 14 Lelo cilya Paulo ati alande, Galio aebele abaYuda, ati: “Mwe baYuda, kwena, aciba cilubo atemwa imicitile yabipa, nga nacumfwa ifyo mulefwaya ukulanda. 15 Lelo nga mulekansanina amashiwi na mashina+ na mafunde+ yenu, mufwile ukuimwena mwe bene. Nshilefwaya ukuba kapingula wa ifi fintu.” 16 E lyo abatamfishe ku cipuna ca kupingwilapo. 17 Awe bonse baikete Sostene+ umukalamba we sunagoge, balamuma mupepi ne cipuna ca kupingwilapo. Lelo Galio tabikileko na mano kuli ifi fintu.

18 Lelo, ilyo Paulo aikele kulya inshiku ishingi, ashalikepo aba bwananyina no kuya mu bwato ku Siria, kabili Prisila* na Akula bali pamo nankwe, e lyo abeyele+ umushishi wakwe mu Kenkrea,+ ico alilapile umulapo. 19 Awe bafikile ku Efese, kabili e ko abashile; lelo ena aingile mwi sunagoge,+ alalanshanya na baYuda. 20 Nangu bamupapaatile ukwikala inshita iitaliko, tasumine 21 lelo alibashalikepo+ no kubeba ati: “Nkabwela kabili kuli imwe, nga Yehova atemwa.”+ Kabili aile mu bwato ukufuma ku Efese 22 no kufika ku Kaisarea. Awe aliile* no kushalikapo icilonganino, aya na ku Antioke.

23 Kabili ilyo aikeleko inshita imo, alifumineko no kuya mu misumba yalekanalekana mu calo ca Galatia+ ne ca Frugia,+ alekosha+ abasambi bonse.

24 Awe umuYuda umo ishina lyakwe Apolo,+ umwina Alekesandria, uwacenjela ukulanda, afikile mu Efese; kabili alishibishe Amalembo.+ 25 Uyu muntu asambilishiwe amafunde ya kwa Yehova, kabili ico umupashi+ wamulengele ukucincila, alelanda no kusambilisha bwino bwino ifya kwa Yesu, lelo aishibe fye ulubatisho+ lwa kwa Yohane. 26 Kabili uyu muntu atendeke ukulanda ukwabula umwenso mwi sunagoge. Ilyo Prisila* na Akula+ bamumfwile, balimubuulile no kumulondolwela bwino bwino amafunde ya kwa Lesa. 27 Kabili, apo alefwaisha ukwabukila ku Akaya, aba bwananyina balembele kalata ku basambi, ukubakonkomesha ukuti bamupokelele bwino. E ico ilyo afikile kulya, ayafwile+ nga nshi abatetekele pa mulandu wa cikuuku ca kwa Lesa;+ 28 pa mulandu wa kushipa kwakwe mu milandile ashinine nga nshi abaYuda ukuti baliluba, ilyo abomfeshe Amalembo+ ukulanga ukuti Yesu ali e Kristu.+

19 Ilyo Apolo+ ali mu Korinti, Paulo apitile ku mulundu no kutentemukila ku Efese,+ e ko asangile abasambi bamo; 2 kabili abebele ati: “Bushe mwalipokelele umupashi+ wa mushilo ilyo mwatetekele?” Na bo bamwebele ati: “Tatwaishiba ifya kucita pa kupokelela umupashi wa mushilo.”+ 3 Na o atile: “Kanshi, ni mu lubatisho nshi mwabatishiwe? Na bo batile: “Mu lubatisho lwa kwa Yohane.”+ 4 Paulo atile: “Yohane alebatisha ulubatisho lwa kulanga ukulapila,+ pa kweba abantu ukutetekela uwaleisa pa numa yakwe,+ e kutila, Yesu.” 5 Pa kumfwa ici, balibatishiwe mwi shina lya kwa Shikulu Yesu.+ 6 Kabili ilyo Paulo ababikilepo iminwe,+ umupashi wa mushilo waishile pali bena, kabili batendeke ukulandila mu ndimi no kusesema.+ 7 Bonse pamo, bali abaume nalimo ikumi limo na babili (12).

8 Pa myeshi itatu Paulo aleya mwi sunagoge+ no kulanda na bantu ukwabula umwenso, kabili alenashanasha abantu pa kulanda pa bufumu+ bwa kwa Lesa. 9 Lelo ilyo bamo bali abakosa imitima no kukanatetekela,+ kabili ilyo balepontela aba Nshila+ pa cintubwingi, afumine kuli bena,+ asenda na basambi,+ kabili cila bushiku alelanda amalyashi mu muputule uukalamba uwa pe sukulu lya kwa Turani. 10 Alecita ifyo fine pa myaka ibili,+ ica kuti bonse abaikele mu citungu ca Asia+ baumfwile amashiwi ya kwa Shikulu, abaYuda na baGriki.

11 Kabili Lesa alecitila ifipesha amano muli Paulo,+ 12 ica kuti abantu balasenda ifitambala ne nsalu balakumya Paulo, bafitwala na ku balwele,+ abalwele balapola, na baali ne mipashi ibifi yalibafuminemo.+ 13 Lelo abaYuda bamo abaleseuluka kabili abalefumya ifibanda+ na bo baeseshe ukulumbula ishina lya kwa Shikulu Yesu+ pa bali ne mipashi ibifi, abati: “Ndekwebela+ muli Yesu uo Paulo ashimika ati fumamo.” 14 Awe kwali abana baume cinelubali (7) aba muntu umo uwitwa Skefa, shimapepo mukalamba umuYuda, abalecita ifi. 15 Lelo umupashi ubifi wabaswike ati: “Yesu+ nalimwishiba na Paulo+ nalimwishiba, lelo imwe ni mwe bani?” 16 Awe umuntu uwali no mupashi ubifi alibafukukile,+ anashishe bonse, no kubacimfya, ica kuti bafulumwike mu ng’anda ilya ubwamba kabili abacenwa. 17 Ici caishileishibikwa kuli bonse, abaYuda na baGriki abaikele mu Efese; no mwenso+ waikete bonse, kabili ishina lya kwa Shikulu Yesu lyatwalilile ukucindikwa.+ 18 Na bengi abatetekele baleyako no kuyebelela+ ifibi ifyo balecita. 19 Awe, abengi abalecita ifinjelengwe+ balonganike amabuuku yabo no kuyoca pa menso ya bonse. Kabili bapendele umutengo wa yako, basanga ukuti yalingene ne ndalama sha silfere amakana amakumi yasano (50,000). 20 Kabili e fyo icebo ca kwa Yehova caleya cilelunduluka no kukoselako fye.+

21 Nomba ilyo ifi fintu fyapitile, Paulo apangile mu mutima wakwe ukuti, pa numa ya kupita mu Makedonia+ na Akaya, ali no kuya ku Yerusalemu,+ ati: “Nga nafika kulya, mfwile no kuya na ku Roma.”+ 22 E ico pa balemwafwako, atuminepo babili, Timote+ na Erasti,+ ukuya ku Makedonia, lelo ena alindile inshita imo mu citungu ca Asia.

23 Pa nshita ilya ine kwaimine icimfulunganya+ icikalamba pa mulandu wa ba Nshila.+ 24 Pantu umuntu umo ishina lyakwe Demetri, kafula wa fyela fya silfere, alepanga utumatempele twa silfere utwa kwa Artemi, umo ababomfi bakwe abacenjela mu fya kupangapanga balemwena nga nshi indalama;+ 25 kabili alonganike utumatempele pamo na baletupanga+ no kutila: “Mwe baume, mwalishiba bwino ukuti muli uyu mulimo e mo tumwena indalama.+ 26 Na kabili, mulamona no kumfwa mulomfwa ukuti uyu Paulo alasosa ku bantu ati, ifyo abantu bapanga ku minwe+ te balesa iyo. Kabili Paulo wine uyu nanashanasha ibumba ilikalamba muno Efese+ no kubapilibwila ku mano yambi, ni cikanga fye anashe ne citungu conse ica Asia. 27 Kabili, icabipako fye ca kuti uyu mulimo wesu ukasaalulwa ne tempele lya kwa lesa mwanakashi umukalamba Artemi+ na lyo line likasuulwa no mucinshi uo aba mu citungu conse ca Asia na untu abantu bonse aba pe sonde bapeela uyu lesa ukapwa.” 28 Ilyo baumfwile aya mashiwi baiketwe icipyu, e lyo balabilikisha, abati: “Artemi wa bena Efese, mukalamba icine cine!”

29 E ico umusumba waiswilemo icimfulumfulu, kabili bonse babutukile umwa kutambila ifyangalo, no kutintanya Gai na Alistaaki,+ abena Makedonia, abalendo banankwe aba kwa Paulo. 30 Paulo ena alefwaya ukuya mu kati ku bantu, lelo abasambi balimukeenye. 31 Na bakalamba bamo aba mitebeto ne fyangalo, abali ifibusa fyakwe, batumine amashiwi kuli ena no kumupapaata ukuti eitwala mu kapoosa mweo umwa kutambila ifyangalo. 32 Pa balongene pali fye icimfulumfulu, pantu bamo balepunda ifi e lyo bambi na bo balebilikisha fimbi;+ na bengi tabaishibe umulandu balonganine. 33 Awe bamo bafumishe Alekisanda mwi bumba, ninshi abaYuda balemusunkila ku ntanshi; na Alekisanda aimishe ukuboko pantu alefwaya ukuisosela ku bantu. 34 Lelo ilyo baishibe ukuti ali muYuda, bonse babilikishe ishiwi limo pa ma-awala nalimo yabili, abati: “Artemi wa bena Efese, mukalamba+ icine cine!”

35 Ilyo kalemba wa musumba asukile atalalika+ ibumba, atile: “Mwe bena Efese, bushe cine cine muntu nshi uushaishiba ukuti mu musumba wa Efese e mwaba itempele lya kwa Artemi umukalamba ne cimpashanya icaponene mu muulu? 36 E ico apo ifi fintu fya cine, mulingile ukwikala tondolo no kutekanya.+ 37 Pantu namuleta aba bantu abashili fipondo fya matempele kabili abashipontela lesa wesu umwanakashi. 38 E ico nga Demetri+ na babomfi bakwe abacenjela mu fya kupangapanga nabapusana no muntu, inshiku sha kulubulwisha+ e ko shaba na balashi+ na bo e ko baba; lekeni bakaishinine. 39 Nga mulefwaya icacila apa, cifwile ukupingulwa mu cilye ca bena musumba. 40 Pantu pali ifi ifyacitika lelo, kuti batupeela umulandu wa kucita icimfulunganya. Tapali umulandu wa kupangila ici congo conse. Te kuti pabe na ca kusosa mu kuipokololako.” 41 Kabili ilyo alandile ifi fintu,+ asalangenye abalongene.+

20 Awe ilyo icimfulunganya capwile, Paulo atumine amashiwi ya kuti abasambi bese, kabili ilyo abakoseleshe no kubashalikapo,+ aimine ubulendo bwa kuya ku Makedonia.+ 2 Kabili ilyo apitile muli filya fifulo no kukoselesha nga nshi+ abasambi, afikile ku Grisi. 3 Kabili ilyo aikeleko imyeshi itatu, pa mulandu wa kuti abaYuda balimupangiile+ ilyo apene aye mu bwato ku Siria, apingwilepo ukubweluluka ukupita mu Makedonia. 4 Abaile nankwe ni Sopatere+ mwana Puri umwina Berea, Alistaaki+ na Sekundi abena Tesalonika, na Gai umwina Derbe, na Timote,+ kabili abaile nankwe ukufuma ku citungu ca Asia ni Tukiki+ na Trofimu.+ 5 Bena balitangile kabili baletulolela mu Troa;+ 6 lelo twaile mu bwato ukufuma mu Filipi pa numa ya nshiku sha mukate uushatutumuka,+ kabili twafikile mu Troa+ mu nshiku shisano; e ko twaikele inshiku cinelubali (7).

7 Pa bushiku+ bwa ntanshi mu mulungu, ilyo twalongene ku kulya ifya kulya, Paulo atendeke ukulanda na balongene ku kulya ifya kulya, pantu ali no kufumapo ubushiku bwakonkelepo; kabili alandile pa nshita ntali ukufika ubushiku pa kati. 8 Kabili mu muputule+ wa pa muulu umo twalongene mwali inyali ishingi. 9 Pa windo paikele umulumendo umo ishina lyakwe Yutuki uwaponene mu tulo tukalamba ilyo Paulo alelanda, kabili pa kuba mu tulo, aponene pa nshi ukufuma pa ntunti iyalenga shitatu kabili atoolelwe nafwa. 10 Lelo Paulo alikiile, ainamine pali ena+ no kumufukatila, e lyo atila: “Talaleni, pantu nomba ali uwa mweo.”+ 11 Awe aninine pa muulu, alateyanya ifya kulya no kutampa ukulya, kabili pa kulanda inshita iitali, ukufika ku macaca, alifuminepo. 12 Awe basendele umulumendo umutuntulu kabili balisansamwike apakalamba.

13 Nomba ifwe twaile ku bwato no kuya ku Aso, uko twalepanga ukusenda Paulo, pantu e fyo umwine atile e ko mukese, pantu alefwaya ukwenda na makasa. 14 Nomba ilyo atusangile mu Aso, twamusendele mu bwato no kuya ku Mitulene; 15 kabili, pa kufumako mu bwato pa bushiku bwakonkelepo, twafikile apalungatene na Kio, lelo ubushiku bwakonkelepo twafikile ku Samo, kabili pa bwakonkapo twafikile ku Milete. 16 Pantu Paulo apingwile ukuya mu bwato ukukanapita mu Efese,+ pa kuti ekokolamo mu citungu ca Asia; ico aleyangufyanya ukuti engafika ku Yerusalemu+ napamo pa bushiku bwa mutebeto wa Pentekoste.

17 Lelo, ilyo afikile pa Milete atumine aba kuya ku Efese ku kwita abakalamba+ ba cilonganino. 18 Ilyo baishile kuli ena abebele ati: “Ukufuma pa bushiku bwa ntanshi ubo naingile mu citungu ca Asia,+ mwalishiba bwino ifyo naikele na imwe inshita yonse,+ 19 nalebombela+ Shikulwifwe mu kuicefya+ konse na mu kulila ifilamba, na mu macushi ayalemponena pa mulandu wa mapange+ ya baYuda ayo balempangila; 20 kabili nshashimunwike ukumweba conse ica kumwafwa nangu ukumusambilisha+ pa bantu na ku ng’anda+ ne ng’anda. 21 Lelo naleshimikila sana+ abaYuda na baGriki ukubakonkomesha ukuti balapile+ kuli Lesa no kutetekela Shikulwifwe Yesu. 22 Kabili, nomba moneni! ukulingana ne fyo umupashi+ ulefwaya, ndeya ku Yerusalemu, nangu ca kuti nshishibe ifikamponena kulya. 23 Ico njishibe fye ca kuti mu misumba yonse umo mpitana, umupashi+ wa mushilo ulananga ukuti icifungo na macushi filendolela.+ 24 Lelo umweo wandi nshiumona ukuti walicindama,+ ine kulila fye napwisha ulubilo+ lwandi no mulimo+ uo napeelwe+ kuli Shikulu Yesu, uwa kubila sana imbila nsuma iya cikuuku ca kwa Lesa.+

25 “Kabili nomba, moneni! ninjishiba ukuti imwe bonse mwe bo nashimikile ubufumu tamwakamone na kabili. 26 E ico ndemwita ku kuba inte buno bushiku ukuti ndi wa kaele ku mulopa+ wa bantu bonse, 27 pantu nshashimunwike ukulanda kuli imwe ukupanga+ konse ukwa kwa Lesa. 28 Muleisakamana+ mwe bene,+ kabili mulesakamana no mukuni+ onse, uo umupashi wa mushilo wamubikapo ukuba bakangalila,+ ku kucema icilonganino ca kwa Lesa,+ ico ashitile mu mulopa+ wa Mwana wakwe. 29 Ninjishiba ukuti ilyo nkafumapo imimbulu+ iikali ikengila muli imwe kabili tayakasunge bwino umukuni, 30 kabili muli imwe mukema abantu abakalasambilisha ifyanyongana+ pa kuti bongole abasambi, balebakonka.+

31 “E ico mulelola, no kwibukisha ukuti pa myaka itatu,+ ubushiku na kasuba, nshalekele ukukonkomesha+ umo na umo kabili nalelililapo ne filamba. 32 Kabili nomba ndemutuula kuli Lesa+ na ku mashiwi ya cikuuku cakwe, amashiwi ayengamwafwa+ no kumupeela ubupyani muli bonse abasanguluka.+ 33 Nshakumbilwe silfere atemwa golde atemwa ifya kufwala ifya muntu.+ 34 Mwe bene mwalishiba ukuti naleibombela ne mwine+ ku maboko yandi aya no kuisangila ifyo nalekabila ne fyalekabila abaali pamo na ine. 35 Nalimulangile muli fyonse ukuti mu kubombesha+ e mo mufwile ukwafwila abanaka,+ kabili mufwile ukwibukisha amashiwi ya kwa Shikulu Yesu, uwasosele umwine ati, ‘Mwaba insansa ishingi mu kupeela+ ukucila ishaba mu kupokelela.’”

36 Kabili ilyo alandile ifi fintu, alifukeme+ pamo na bo no kupepa. 37 Awe, bonse balilile nga nshi, kabili bakumbatile+ Paulo no kumutomona,+ 38 ico bali no bulanda pa mashiwi alandile aya kuti tabakamumone+ na kabili. E lyo bamushindike+ ku bwato.

21 Nangu ca kuti calyafishe ukulekana, twasukile twapaatukana na bo no kuya mu bwato, kabili twalyabwike bemba, twafika na ku cishi ca Kosi, lelo pa bushiku bwakonkelepo twafikile ku Rode, kabili ukufuma kulya twafikile ku Patara. 2 Kabili ilyo twasangile ubwato ubwaleabukila ku Foinike, e bo twaninine no kuya twaya. 3 Ilyo twamwene icishi ca Kupro+ twacishile lubali ku kuso no kulola ku Siria,+ no kufika ku Turi, pantu kulya e ko bali no kufumya ifipe mu bwato.+ 4 Mu kufwailisha twasangile abasambi no kwikalako inshiku cinelubali (7). Lelo ukulingana ne fyabebele umupashi+ bakonkomeshe Paulo ukuti enyantamo ulukasa mu Yerusalemu. 5 Nomba ilyo inshita ya kufumako yafikile, twalifumineko no kwima ubulendo; lelo bonse capamo na banakashi na bana, balitushindike batufishishe na ku nse ya musumba. Kabili ilyo twafukeme+ mu lulamba twalipepele 6 no kulayana,+ kabili twaninine ubwato lelo bena babweleele ku mwabo.

7 Kabili ulwendo lwesu ulwa mu bwato ukufuma pa Turi lwapwile ilyo twafikile ku Tolemai, kabili twaposeshe aba bwananyina no kwikala na bo ubushiku bumo. 8 Ubushiku bwakonkelepo twaliimine twayafika na ku Kaisarea,+ kabili twaingile mu ng’anda ya kwa Filipi kabila wa mbila nsuma.* Uyu Filipi aali pali balya abaume cinelubali (7)+ abasalilwe mu Yerusalemu, kabili twaikele nankwe. 9 Uyu muntu ali na bana banakashi bane, banacisungu, abalesesema.+ 10 Lelo ilyo twaikele kulya inshiku ishingi, kasesema umo ishina lyakwe Agabu+ alishile ukufuma ku Yudea, 11 kabili aishile kuli ifwe no kubuula umushipi wa kwa Paulo, no kuikaka amakasa na maboko no kutila: “Umupashi wa mushilo wasosa auti, ‘Umwine wa uyu mushipi akakakwa+ ifi fine ku baYuda mu Yerusalemu no kupeelwa+ mu minwe ya bena fyalo.’” 12 Nomba ilyo twaumfwile ici, ifwe pamo na bali kuli cilya cifulo twatendeke ukupapaata Paulo ukuti eya+ ku Yerusalemu. 13 E lyo Paulo ayaswike ati: “Cinshi mulelilila+ no kuntompola umutima?+ Mwisakamana, ine ndi uwaiteyanya ukukakwa no kufwila+ ishina lya kwa Shikulu Yesu ku Yerusalemu.” 14 Pa kufilwa ukumunasha, twalisumine no kutila: “Lekeni ukufwaya+ kwa kwa Yehova kucitwe.”

15 Awe ilyo ishi nshiku shapitile twapekanye ubulendo no kuya ku Yerusalemu.+ 16 Na basambi bamo ukufuma ku Kaisarea+ baile pamo na ifwe, batutwele kuli Minasone umwina Kupro, umusambi wa kale, uko bali no kututangata. 17 Ilyo twafikile ku Yerusalemu,+ aba bwananyina batupokelele ne nsansa.+ 18 Lelo pa bwakonkapo Paulo aingile na ifwe mu ng’anda ya kwa Yakobo;+ na bakalamba bonse e mo bali. 19 Kabili alibaposeshe, alabalondolwela+ fyonse ifyo Lesa acitile mu bena fyalo ukupitila mu mulimo wakwe.+

20 Ilyo baumfwile ici, batendeke ukucindika Lesa, no kutila kuli Paulo: “We munyinefwe, mona, abantu abengi nga nshi pa baYuda balitetekela; kabili bonse balipimpa mu kukonka amafunde.+ 21 Lelo balyumfwa ukuti walesambilisha abaYuda bonse abali mu bena fyalo ukusangukila Mose,+ pa kubeba ukuti belasembulula+ abana babo nangu ukukonka intambi ishacindikwa. 22 Nga kanshi, twalacita shani? Ukuba kwena balaumfwa ukuti nawisa. 23 E ico cita ifyo twalakweba: Natukwata abaume bane abalaya icilayo kuli Lesa. 24 Ubabuule+ muyesangululwa pamo na bo ukulingana no lutambi, ubalipilileko no kubalipilila+ pa kuti bababeye umushishi.+ E lyo bonse bakeshiba ukuti ifyo baumfwile pali iwe te fya cine, lelo ukuti ifyo ucita tafyapusanako, na iwe wine ulakonka amafunde.+ 25 Lelo abena fyalo bena abatetekela, twalibatumina kalata umo twapingwile ukuti baletalukako ku fyaipailwa utulubi,+ ku mulopa,+ ku fyatitilwa,+ na ku bulalelale.”+

26 Awe Paulo abuulile balya baume ubushiku bwakonkelepo no kuisangulula pamo na bo+ ukulingana no lutambi kabili aingile mwi tempele, alaishibisha abantu ilyo ukusangululwa kukapwa+ ukulingana no lutambi, ukufika ilyo baali no kubatuulilako+ umutuulo.+

27 Nomba ilyo inshiku cinelubali (7)+ shaile shilepwa, ilyo abaYuda aba ku Asia bamwene Paulo mwi tempele, bafulunganye+ ibumba lyonse, kabili balimwikete, 28 balabilikisha abati: “Mwe baume abena Israele, twafweni! Uyu e muntu uusambilisha abantu+ besu bonse ukusuula abantu na mafunde na cino cifulo, na kabili, aingishe na baGriki mwi tempele kabili nakowesha cino cifulo ica mushilo.”+ 29 Ni co bamwene Trofimu+ umwina Efese ali pamo nankwe mu musumba, lelo bena baletila Paulo alimwingishe mwi tempele. 30 Kabili mu musumba onse mwali icimfulunganya,+ na bantu bonse babutukile kwi tempele; no kwikata Paulo no kumukulila ku nse ye tempele.+ Na po pene impongolo shaliselwe. 31 Kabili ilyo balefwaya ukumwipaya, amashiwi yafikile ku mukalamba wa bashilika ukuti mu Yerusalemu monse muli icimfulunganya;+ 32 na o bwangu bwangu asendele abashilika na bakalamba ba bashilika no kuya kuli bena.+ Ilyo fye bamwene umukalamba+ wa bashilika pamo na bashilika, balekele no kupuma Paulo.

33 Kabili umukalamba wa bashilika alipalame no kumwikata no kubeba ukuti bamukake iminyololo ibili;+ e lyo aipusha ati, “Uyu ni nani? Kabili cinshi acitile?” 34 Lelo bamo mwi bumba balapunda ifi, bambi na bo balabilikisha fimbi.+ Na o, pa kufilwa ukwishibapo icishinka pa mulandu wa cimfulunganya, aebele abashilika ukuti batwale Paulo mu nkambi ya bashilika.+ 35 Lelo ilyo aninine pa matabo, abashilika balimusendele pa mulandu wa kuti ibumba lyalicililemo ukukalipa; 36 pantu amabumba ya bantu yalemukonka, balebilikisha, abati: “Mwipayeni!”+

37 Kabili ilyo ali mupepi no kutwalwa mu nkambi ya bashilika, Paulo aipwishe umukalamba wa bashilika ati: “Bushe kuti mwansuminisha ukumwebako fimo?” Na o atile: “Bushe ulalanda iciGriki? 38 Bushe te iwe mwina Egupti uwacitile icimfulunganya+ nomba line no kuya ne fipondo amakana yane (4,000) mu matololo? 39 E lyo Paulo atile: “Mukwai, ine ndi muYuda,+ umwina Tarsi+ wa mu Kilikia, umwikashi wa mu musumba uwaishibikwa. E ico ndemupapaata, nsuminisheni ukulanda ku bantu.” 40 Ilyo amusuminishe, Paulo, pa kwiminina pa matabo, aimishe+ ukuboko kwakwe ku bantu. Ilyo patalele tondolo, alandile kuli bena mu ciHebere,+ ati:

22 “Mwe baume, bamunyinane+ na bashifwe, kutikeni ku fyo nalamweba ukuti ine nshili no mulandu.”+ 2 (Awe, ilyo baumfwile alelanda kuli bena mu ciHebere,+ batalele tondolo, kabili atile:) 3 “Ine ndi muYuda,+ uwafyalilwe mu Tarsi mu calo ca Kilikia,+ lelo ukusambilila kwena nasambilile muli uno wine musumba no wansambilishe ni Gamaliele,+ kabili nafundilwe ukukonka sana+ amafunde ya fikolwe, nali uwapimpa+ mu kubombela Lesa nge fi fine na imwe bonse muli lelo. 4 Kabili nacushishe nga nshi aba iyi Nshila no kubepaya,+ nalekaka abaume pamo na banakashi no kubatwala ku fifungo,+ 5 na shimapepo mukalamba ne cilye conse ica bakalamba+ e nte shandi kuli uyu mulandu. E bampeele na bakalata+ ba kutwala ku baYuda banensu mu Damaseke, kabili naleyako ku kusenda balya bantu ukubaleta ku Yerusalemu nabakakwa pa kuti bakandwe.

6 “Lelo ilyo naleya ndepalamina ku Damaseke, mu nshita ya kasuba pa kati, apo pene fye ulubuuto ulukalamba ukufuma mu muulu lwabyatile ukunshinguluka,+ 7 kabili nawile pa nshi no kumfwa ishiwi lilenjeba ati, ‘Sauli, Sauli, cinshi ico ulencushisha?’+ 8 Nayaswike nati, ‘Ni mwe bani, mwe Shikulu?’ Na o anjebele ati, ‘Nine Yesu umwina Nasarete, uo ulecusha.’+ 9 Na kuba abantu nali+ na bo balimwene ulubuuto lelo tabaumfwile ishiwi lya walelanda na ine.+ 10 Awe natile, ‘Ncite shani+ mwe Shikulu?’ Na o Shikulu anjebele ati, ‘Ima, kabiye ku Damaseke, e ko ukebwa fyonse ifyo ufwile ukucita.’+ 11 Lelo apo nshalemona nangu cimo pa mulandu wa kuti ulubuuto lwalisanikishe, abo nali na bo e banjikete ku maboko no kuntungulula mpaka nafika ku Damaseke.+

12 “Awe Anania, umuntu uutiina Lesa ukulingana na mafunde, kabili uwaleshimikwa+ icisuma ku baYuda bonse abaleikala kulya, 13 aishile kuli ine, kabili cilya aiminina apo ndi, anjeba ati, ‘Sauli, munyinane, lolesha!’+ Na ine ilya ine nshita naliloleshe no kumumona. 14 Atile, ‘Lesa wa fikolwe+ fyesu nakusala+ ukuti wishibe ukufwaya kwakwe no kumona+ Uwalungama+ no kumfwa ishiwi lyakwe,+ 15 pa kuti ukabe inte yakwe ku bantu bonse pa fintu wamona no kumfwa.+ 16 Nomba mulandu nshi ulekokwela? Ima, ubatishiwe+ no kusamba+ imembu shobe pa kulilila kwi shina lyakwe.’+

17 “Lelo ilyo nabwelele ku Yerusalemu+ kabili ilyo nalepepa mwi tempele, naponene mu tulo utukalamba+ 18 no kumona Shikulu alenjeba ati, ‘Angufyanya, ufume bwangu mu Yerusalemu, pantu tabakasumine+ ubunte bobe pali ine.’ 19 Na ine natile, ‘Mwe Shikulu, balishiba ukuti nine nalepoosa abatetekela muli imwe mu cifungo+ no kubomina ifikoti mu masunagoge yonse;+ 20 kabili ilyo baleipaya Stefani+ inte yenu, na ine e po nali no kusuminishako+ kabili nine nasungile ifya kufwala fya balemwipaya.’ 21 Lelo anjebele ati, ‘Kabiye, pantu nkakutuma ukutali ku bena fyalo.”+

22 Awe balekutika fye ukufika ne lyo Paulo asosa aya mashiwi, e lyo basansula amashiwi yabo, abati: “Ipayeni umuntu wa musango yu, pantu talingile ukuba uwa mweo!”+ 23 Kabili pa mulandu wa kuti balebilikisha no kupoosaika ifya kufwala fyabo no kukuba ulukungu mu mwela,+ 24 umukalamba wa bashilika asosele ukuti batwale Paulo mu nkambi ya bashilika no kumuuma ifikoti pa kuti asaale, pa kutila eshibe umulandu balepangila icongo+ ca musango uyo pali ena. 25 Lelo ilyo bamukakile pa kuti bamuume ifikoti, Paulo aebele umukalamba wa bashilika uwaiminine mupepi, ati: “Bushe imwe mwalisuminishiwa ukuuma umwina Roma+ ifikoti uushilapingulwa?” 26 Awe, ilyo umukalamba wa bashilika aumfwile ici, aile ku mukalamba wabo no kumweba, ati: “Bushe namwishiba ico mulefwaya ukucita? Uyu muntu mwina Roma.” 27 E ico umukalamba wa bashilika apaleme no kumwipusha ati: “Njeba, bushe uli mwina Roma?”+ Na o atile: “Ee.” 28 Umukalamba wa bashilika ayaswike ati: “Nashitile ishi nsambu sha kuba umwikashi pa mutengo uukalamba.” Paulo atile: “Lelo ine nafyelwe+ fye na sho.”

29 E ico, apo pene, abapene bamuume ifikoti balimutalwike; no mukalamba wa bashilika alitiinine pa kwishiba ukuti mwina Roma+ no kuti e o akakile.

30 E ico, ubushiku bwakonkelepo, apo alefwaisha ukushininkisha ico abaYuda bamupeelele umulandu, alimukakwile no kweba intungulushi sha bashimapepo ne cilye conse ica Sanhedrini ukulongana. E lyo aletele Paulo no kumwiminika mu kati kabo.+

23 Ilyo Paulo alolekeshe bashicilye ba Sanhedrini, atile: “Mwe baume, bamunyinane, ukufika kuli buno bushiku ine naba na kampingu+ umusuma nga nshi kuli Lesa.” 2 Awe shimapepo mukalamba Anania aebele abaiminine mupepi ukumuuma+ pa kanwa. 3 E lyo Paulo amwebele ati: “Lesa alakuuma, we cibumba cashingulwako impemba we.+ Ulempingula ukulingana na mafunde+ lelo kabili ulepula mu mafunde+ yene aya, pa kweba aba ukuti bangume.” 4 Abaiminine mupepi batile: “Bushe uletuka shimapepo mukalamba uwa kwa Lesa?” 5 Na o Paulo atile: “Bamunyinane, nshacishiba ukuti ni shimapepo mukalamba. Pantu calilembwa ukuti, ‘Wilapontela intungulushi ya bantu bobe.’”+

6 Nomba ilyo Paulo amwene ukuti pali amabumba yabili, abaSaduke+ na baFarise, abilikishe mu Sanhedrini ati: “Mwe baume, bamunyinane, ine ndi muFarise,+ umwana wa baFarise. Pe subilo lya kubuuka+ kwa bafwa e po balempingwila.”+ 7 Pa mulandu wa kuti alandile ici, kwaimine ukukansana+ pa kati ka baFarise na baSaduke, ne bumba lyalipaatukene. 8 Pantu abaSaduke+ batila takwaba ukubuuka,+ takwaba bamalaika, kabili takwaba no mupashi, lelo abaFarise basumina ukuti ifi fyonse e ko fyaba. 9 E ico kwabukile icongo icikalamba,+ na bakalemba bamo aba mu kabungwe ka baFarise baliimine, balalanda bukali bukali, abati: “Tatusangile icibi muli uyu muntu;+ lelo nga ca kutila mupashi atemwa ni malaika e walandile kuli ena,+—.” 10 Awe ilyo ukukansana kwakosele, umukalamba uwa bashilika alitiinine ukuti Paulo balamusantaula, kabili aebele ibumba lya bashilika+ ukuti litentemukileko no kumupokolola mu kati kabo no kumutwala mu nkambi ya bashilika.+

11 Lelo pa bushiku bwakonkelepo, inshita ya bushiku, Shikulu aishile kuli ena+ no kutila: “Shipa!+ Pantu filya fine wabilile+ sana imbila nsuma pali ine mu Yerusalemu, e fyo ufwile no kubila na ku Roma.”+

12 Awe ilyo bwacele, abaYuda balipangene+ no kulapa umulapo,+ ukuti, tabalye nangu ukunwa kano fye bepaye Paulo.+ 13 Abalapile uyu mulapo kabili abapangene balicilile pa makumi yane (40);14 kabili baile ku ntungulushi+ sha bashimapepo na ku bakalamba, abati: “Natulapa ukukanalya ica kulya kano fye twipaye Paulo. 15 E ico nomba, imwe pamo ne cilye ca Sanhedrini mwebeko umukalamba wa bashilika umulandu alingile ukumuletela kuli imwe, cibe kwati mulefwaya ukwishiba bwino na fimbi pali ena.+ Lelo ilyo ashilafika kuli imwe, ifwe twalamwipaya.”+

16 Lelo, umwipwa wa kwa Paulo alyumfwile ukuti balepanga ukumubelamina,+ kabili aile no kwingila mu nkambi ya bashilika no kushimikilako Paulo. 17 Awe Paulo aitilepo umushilika umo no kutila: “Twala uyu mulumendo ku mukalamba wa bashilika, pantu pali ifyo alefwaya ukumweba.” 18 Na o alimusendele no kumutwala ku mukalamba wa bashilika no kutila: “Umufungwa Paulo acinjita no kunomba ukuleta uyu mulumendo kuli imwe, pantu pali ifyo alefwaya ukumweba.” 19 Umukalamba wa bashilika amwikete+ ku minwe no kuya nankwe e lyo alamwipusha ku mbali ati: “Finshi ulefwaya ukunjeba?” 20 Na o atile: “AbaYuda nabapangana ukumulomba ukuti mukalete Paulo ku cilye ca Sanhedrini mailo, cikabe kwati balefwaya ukwishiba na fimbi pali ena.+ 21 Lelo, mwikaleka bakamunashe, pantu abantu ukucila pa makumi yane (40) bakabelamina+ Paulo, kabili nabalapa umulapo wa kukanalya nangu ukunwa mpaka fye bakamwipaye;+ kabili nomba nabaiteyanya, balelolela fye ukusuminisha kwenu.” 22 E ico umukalamba wa bashilika aebele umulumendo ukuya, ninshi namweba ukuti: “Te ca kwesha ukwebako umuntu nangu umo ukuti naunjebako ifi fintu.”

23 Kabili aitile abashilika babili no kubeba ukuti: “Teyanyeni abashilika imyanda ibili (200) ukuti baye ku Kaisarea, na ba pali bakabalwe amakumi cinelubali (70) na basenda amafumo imyanda ibili, beme pe awala lyalenga butatu ubushiku. 24 Mupekanye ne fitekwa ifisenda ifipe ukuti baninikepo Paulo no kumufisha umutende kuli Felikisi umulashi.” 25 Kabili alembele kalata uwali ifi:

26 “Ine ne Klaudi Lusia, natuma kalata kuli imwe kanabesa, mwe balashi baFelikisi:+ Mwapoleni mukwai!27 Uyu muntu aiketwe ku baYuda kabili bafwaile bamwipaye, lelo naileko bwangu ne bumba lya bashilika no kumupususha,+ pantu naumfwile ukuti mwina Roma.+ 28 Kabili pa kufwaya ukwishiba icalengele ukuti bamupeele umulandu, namutwele mu cilye cabo ica Sanhedrini.+ 29 Nasangile ukuti umulandu apeelwe wakumine ifikansa pa mafunde yabo abene,+ lelo tabamushinine ukuti nakwata umulandu wa kufwilapo atemwa uwa kukakilwapo.+ 30 Nomba apo ipange+ ilyo bapangiile uyu muntu nalisokololwa kuli ine, ili line fye namutuma kuli imwe, no kweba abalemupeela umulandu ukuti bamushinine pa menso yenu.”+

31 E ico aba bashilika+ babuulile Paulo nga filya fine baebelwe no kumutwala ku Antipatri ubushiku. 32 Ubushiku bwakonkelepo basuminishe aba pali bakabalwe ukuti baye nankwe, lelo bena babwelele mu nkambi ya bashilika. 33 Aba pali bakabalwe baingile mu Kaisarea+ no kupeela kalata ku mulashi kabili batwele na Paulo kuli ena. 34 Na o alibelengele no kwipusha icitungu afumineko, kabili asangile+ ukuti wa ku Kilikia.+ 35 Atile: “Nkomfwikisha umulandu obe ilyo bakesa abalekupeela umulandu.”+ Kabili asosele ukuti bamusungile mwi sano lya kwa Herode.

24 Ilyo papitile inshiku shisano shimapepo mukalamba Anania+ aile pamo na bakalamba bamo e lyo no waishiba ukulanda bwino bwino ku cintubwingi, uwitwa Tertuli, no kusosela umulandu+ wa kwa Paulo ku mulashi.+ 2 Ilyo aitilwe, Tertuli atendeke ukumupeela umulandu pa menso ya kwa Felikisi, ati:

“Pa mulandu wenu, tuleikala umutende+ kabili pa mulandu wa mano yenu, muli luno luko muli ukwaluka ukukalamba, 3 e ico mu ncende shonse umo twaikala kabili inshita fye yonse tulatootela nga nshi mwe Kanabesa+ baFelikisi. 4 Lelo nshilefwaya ukumupoosela inshita, e ico ndelomba ukuti mutumfweko panono. 5 Pantu natusanga ukuti uyu muntu lisakamika+ kabili e uleta ubusangu+ mu baYuda bonse konse uko bekala pano isonde kabili e ntungulushi ya mipepele ya bena Nasarete,+ 6 uwaeseshe no kukowesha itempele+ kabili twalimwikete. 7 —— 8 Mwe bene kuti mwamwipukisha pali fyonse ifyo tulemupeelelapo umulandu.”

9 Awe abaYuda na bo balisuminisheko ukuti ni fyo fine. 10 Kabili ilyo umulashi acebwile Paulo ukuti alandepo, na o ayaswike ati:

“Ninjishiba bwino ukuti imyaka naifula apo mwabela kapingula wa luno luko, e ico ndi ne nsansa ukuisosela+ umulandu wandi, 11 pantu na mwe bene kuti mwafwailisha ukuti inshiku tashilacila na pe kumi limo na shibili (12) apo nailile ku Yerusalemu ku kuyapepa;+ 12 kabili tabansangile mwi tempele+ ndekansana no muntu nangu umo nelyo ukulenga ibumba+ ukubutauka, mu masunagoge* atemwa monse mu musumba. 13 Kabili te kuti banshinine+ imilandu iyo balempeela nomba. 14 Lelo ndesumina ici kuli imwe, ukuti, muli iyi ine mipepele e mo mombela Lesa wa fikolwe fyandi,+ apo nalisumina fyonse ifyaba mu mafunde+ ne fyalembwa mu mabuuku ya Bakasesema;15 kabili nalicetekela+ Lesa, ifyo na bo bene bacetekela, ukuti kukaba ukubuuka+ kwa balungama+ na bashalungama.+ 16 Awe, muli ici, na ine ndaibikilishako lyonse ukukanacita icabipa kuli Lesa na ku bantu pa kutila mbe na kampingu+ uwa kaele. 17 E ico ilyo papitile imyaka iingi naishile ku kuleta ifya bupe ku bantu bandi no mutuulo kuli Lesa.+ 18 Ilyo nalecita ifi fintu bansangile mwi tempele+ ninsangululwa ukulingana no lutambi, lelo takwali ibumba nangu icimfulunganya. Kwali fye abaYuda bamo aba ku citungu ca Asia, 19 abafwile ukubapo pano ku cinso cenu no kumpeela umulandu nga nabankwatilapo kamo.+ 20 Nangu aba bene abali pano kabasose abene icibi ico basangile ilyo naiminine mu cilye ca Sanhedrini, 21 kano fye amashiwi nabilikishe ilyo naiminine mu kati kabo, aya kuti, ‘Pa kubuushiwa kwa bafwa e po ndepingwilwa!’”+

22 E ico, Felikisi,+ pa kwishiba bwino bwino iyi Mipepele,+ aebele abantu ukuti balolele, ati: “Ilyo Lusia+ umukalamba wa bashilika akesa, e lyo nkapingula umulandu wenu.” 23 Kabili aebele umushilika ukuti balinde Paulo no kuleka aleyendela icilingile, kabili ekaanya nangu umo uwa mu bantu bakwe ukumubombela.+

24 Ilyo papitile inshiku shimo Felikisi+ aishile na Drusila umukashi wakwe, uwali muYuda,+ kabili atumine aba kuyaita Paulo pa kuti omfwe ifyo atetekela pali Kristu Yesu.+ 25 Lelo ilyo alelanda pa bulungami,+ pa fya kuilama+ na pa bupingushi+ ubuli no kwisa, Felikisi aiketwe umwenso no kwasuka ati: “Pali nomba kuti waya, lelo ilyo nkaba ne nshita nkakwita kabili.” 26 Awe pa nshita imo ine Felikisi alesubila ukuti Paulo alamupeelako indalama.+ E ico aletuma libili libili aba kumwita pa kuti alelanda nankwe.+ 27 Lelo, ilyo papitile imyaka ibili, Porki Feste apyene Felikisi; kabili pa mulandu wa kuti Felikisi alefwaya ukuti abaYuda bamutemwe,+ ashile Paulo mu cifungo.

25 E ico ilyo Feste aingile+ mu citungu ca Yudea, pa numa ya nshiku shitatu aile ku Yerusalemu ukufuma ku Kaisarea;+ 2 ne ntungulushi sha bashimapepo na bakalamba ba baYuda batwele umulandu+ wa kwa Paulo kuli ena. Awe batendeke ukumupapaata, 3 ukuti abafweko, abaletele Paulo ku Yerusalemu pantu balepekanya ukumubelamina+ no kumwipaya ilyo alepita mu nshila. 4 Lelo, Feste ayaswike ukuti Paulo uku kwine ali ku cifungo ca ku Kaisarea e ko afwile ukuba kabili e ko ali mupepi no kubwelela. 5 Atile: “Kanshi lekeni twile pamo ne ntungulushi shenu shimo bayemupeela umulandu,+ nga ca cine kuli icalubana ico uyu muntu acita.”

6 Feste aikeleko fye inshiku cinekonsekonse (8) nangu ikumi (10), e lyo aya ku Kaisarea, no bushiku bwakonkelepo aikele pa cipuna+ ca kupingwilapo no kubeba ukuti balete Paulo. 7 Ilyo afikile, abaYuda abaileko ukufuma ku Yerusalemu baiminine nabamushinguluka, balemupeela imilandu+ iingi kabili iikalamba iyo bafililwe ukushininkisha.

8 Lelo Paulo asosele ati: “Nshabembukila amafunde ya baYuda nangu litempele+ nangu ni Kaisare.”+ 9 E ico Feste, pa kufwaisha ukuti abaYuda bamutemwe,+ ayaswike Paulo ati: “Bushe ulefwaya ukuya ku Yerusalemu no kuyapingulwa kuli ine pali fi fintu?”+ 10 Lelo Paulo atile: “Ine njiminine ku cipuna ca kupingwilapo ica kwa Kaisare,+ e ko mfwile ukupingulwa. Nshacita icabipa ku baYuda,+ ifyo na imwe mwishibe. 11 Lelo nga cine cine ndi ncitatubi+ kabili nga nalicita umulandu wa kufwilapo,+ nshilekaana ukufwa; lelo nga imilandu iyo aba bantu balempeela ya bufi, takuli uwingampeela mu minwe yabo ukuti fye abomfwisheko bwino. Ndetwala umulandu kuli Kaisare!”+ 12 E ico ilyo Feste alanshenye ne cilye ca bakabilo, ayaswike ati: “Apo ulefwaya ukutwala umulandu kuli Kaisare; kuli Kaisare e ko ukaya.”

13 Nomba ilyo papitile inshiku shimo, imfumu Agripa* na Berenike bafikile mu Kaisarea ku kuposha Feste. 14 E ico, ilyo baikeleko inshiku ishingi, Feste atuulile umulandu wa kwa Paulo ku mfumu, ati:

“Kuli umuntu umo uo Felikisi ashile mu cifungo, 15 kabili ilyo nali ku Yerusalemu intungulushi sha bashimapepo na bakalamba ba baYuda baletele umulandu+ wakwe kuli ine, kabili balelomba ukuti apingulwe. 16 Lelo nabaswike nati te lutambi lwa bena Roma ukufumya umuntu mu cifungo, ilyo uyo muntu ashilamonana na bamupeele umulandu+ pa kuti umwine aipokolole. 17 E ico ilyo balongene pano, nshakokwele, lelo ubushiku bwakonkelepo naikele pa cipuna ca kupingwilapo no kusosa ukuti uyu muntu aletwe. 18 Ilyo abalemupeela umulandu baimine, tabamushinine umulandu+ wa fyabipa ifyo ine naletunganya. 19 Balekansana fye pa fya kupepa+ lesa wabo na pa muntu umo uwitwa ati Yesu, uwafwa, lelo uo Paulo aletunga ukuti wa mweo.+ 20 E ico, apo nshaishibe ifya kucita pali ifi fikansa, namwipwishe nga kuti atemwa ukuya ku Yerusalemu no kuyapingwilwa kulya.+ 21 Lelo ilyo Paulo alombele+ ukubikwa mu cifungo ukulolela ukuyapingulwa kuli Kanabesa, natile nacibe ifyo fine nkasuke nkamutume kuli Kaisare.”

22 Awe Agripa aebele Feste ati: “Na ine wine kuti natemwa ukumfwa kuli uyu muntu.”+ Na o atile: “Mailo mukamumfwa.” 23 E ico, pa bushiku bwakonkelepo, Agripa na Berenike baishile bale-enda cilumba cilumba+ no kwingila mu muputule wa kumfwilamo imilandu, pamo na bakalamba ba bashilika na bashimucindikwa ba mu musumba, kabili ilyo Feste abebele ukuti balete Paulo, balimuletele. 24 Na o Feste atile: “Mwe mfumu Agripa na bantu bonse abali pano na ifwe, uyu muntu mulemona e o ibumba lyonse ilya baYuda lyanombele ku Yerusalemu na kuno kwine, ninshi lilebilikisha ati afwile fye ukufwa.+ 25 Lelo namwene ukuti tacitile umulandu wa kufwilapo.+ E ico ilyo umwine alombele ukutwala umulandu+ kuli Kanabesa, natile cili fye bwino. 26 Lelo nshikwetepo icishinka ca kulembela Shikulu Kanabesa pali uyu muntu. E co namuleta kuli imwe bonse, maka maka kuli imwe, mwe Mfumu Agripa, pa kuti, nga kwaba ukulubulula umulandu,+ na ine napamo e lyo nkakwata ifya kulemba. 27 Pantu ndemona kwati te ca mano ukutuma umufungwa ukwabula ukulondolola bwino imilandu apeelwe.”

26 Agripa+ aebele Paulo ati: “Ale, sosa tumfwe.” E lyo Paulo atambalike ukuboko kwakwe+ no kutendeka ukusosa ati:+

2 “Mwe Mfumu Agripa, natemwa sana ubwa lelo ukuti njilandile kuli imwe pa milandu yonse iyo abaYuda bampeele,+ 3 pantu imwe mwalishibisha intambi+ shonse isha baYuda no kukansana kwabo. E ico ndemupapaata ukuti munteekele umutima pa kumfwa ifyo nalalanda.

4 “Na cine, imikalile+ yandi ukufuma ku bwaice, ilyo naleikala na bantu bandi na lintu naikele mu Yerusalemu, abaYuda bonse 5 abanjishibe ukufuma ku kale balishiba, nga balefwaya kuti bailandila abene, ukuti nali umuFarise+ umwine wine ukulingana ne mipepele+ yesu iikonka sana amafunde. 6 Lelo nomba pa kusubila+ fye ubulayo+ ubo Lesa alaile ifikolwe fyesu e po balempingwila; 7 lelo imikowa yesu ikumi na ibili (12) ilelolela ukufikilishiwa kwa ubu bulayo pa kubombela Lesa mu kupimpa akasuba no bushiku.+ Pali ili subilo e po abaYuda bampeelele umulandu,+ mwe mfumu.

8 “Cinshi kanshi mushingasuminina ukuti Lesa alabuusha abafwa?+ 9 Ine pano ndi, napangile mu mutima wandi ukucita ifintu ifingi pa kuti fye ishina lya kwa Yesu umwina Nasarete lilumbuka; 10 na kuba, e fyo nacitile mu Yerusalemu, na ba mushilo abengi nabesalile mu fifungo,+ ilyo napokelele amaka ku ntungulushi sha bashimapepo;+ kabili ilyo aba mushilo baleipaiwa, nalesuminishako. 11 Kabili pa kubakanda imiku iingi mu masunagoge*+ yonse nale-esha ukubapatikisha ukusuula ubuKristu bwabo; kabili apo nalicililemo ukubalwisha, naile ku kubacusha na ku misumba imbi.

12 “Pa mulandu wa aya matukuto intungulushi sha bashimapepo shampele ulusa na maka ya kuya ku Damaseke,+ kabili ilyo naleya, 13 cilya akasuba kaba pa kati, mwe mfumu, namwene mu musebo ulubuuto ulwabengeshima ukucila akasuba ulwabyatile ukufuma mu muulu ukushinguluka ine na bale-enda na ine.+ 14 Awe ilyo bonse twawile pa nshi naumfwile ishiwi lilenjeba mu ciHebere aliti, ‘Sauli, Sauli, mulandu nshi ulencushisha? Ifi ulepanta pa fya kusonkwelako uleicusha fye.’+ 15 Lelo natile, ‘Ni mwe bani, mwe Shikulu?’ E lyo Shikulu atile, ‘Nine Yesu, uo ulecusha.+ 16 Lelo, ima no kwiminina.+ Pantu e co namonekela kuli iwe, pa kuti nkusale ukuba umubomfi wandi kabili inte+ ya fintu wamona ne fyo nkalenga ukamone pali ine, 17 ilyo nakulakupokolola kuli aba bantu na ku bena fyalo, abo ndekutumako,+ 18 ku kushibula amenso yabo,+ ukubafumya mu mfifi+ no kubaleta mu lubuuto,+ kabili ukubafumya ku maka ya kwa Satana+ no kubaleta kuli Lesa, pa kuti babeleele imembu+ shabo no kupokelela ubupyani+ pamo na ba mushilo+ pa mulandu wa citetekelo cabo muli ine.’

19 “E ico, mwe Mfumu Agripa, nalifililwe ukusuulako fye ku cimonwa ca mu muulu,+ 20 lelo nabalilepo ukubila imbila nsuma mu Damaseke+ na mu Yerusalemu,+ na mu calo conse ica Yudea, na ku bena fyalo+ pa kuti balapile no kwalukila kuli Lesa pa kucita ifintu ifilelanga ukuti nabalapila.+ 21 E co abaYuda banjikatile mwi tempele kabili bapene banjipaye.+ 22 Lelo, pa mulandu wa kuti Lesa alingafwile,+ na lelo line ncili ndebila imbila nsuma ku bapiina na ku bakankaala. Nshisosa icintu cimbi kano fye ifyo Bakasesema+ na Mose+ balandile ukuti fyali no kucitika, 23 ukuti Kristu ali no kucula+ kabili, pamo ngo wa ntanshi ukubuuka+ ku bafwa, ali no kusabankanya ulubuuto+ kuli aba bantu na ku bena fyalo.”+

24 Awe ilyo alelanda, Feste asosele ishiwi ilikalamba ati: “Naupena+ Paulo! Ukusambilila sana nakukupenya!” 25 Lelo Paulo atile: “Nshipenene, mwe balashi baFeste, lelo ndesosa amashiwi ya cine kabili aya mano. 26 Na kabushe, imfumu iyo ndelandako ukwabula umwenso naishiba bwino ifi fintu; pantu ninshininwa ukuti tailubilepo nangu cimo pali ifi fintu, pantu ifi fintu tafyacitilwe mu bumfisolo.+ 27 Mwe Mfumu Agripa, bushe mwalisumina mu fyalemba Bakasesema? Ninjishiba ukuti mwalisuminamo.”+ 28 Lelo Agripa aebele Paulo ati: “Muli iyi ine nshita inono kwempe fye nga wanjalula ukuba Umwina Kristu.” 29 Na o Paulo atile: “Kuti nafwaya Lesa ukuti nangu ni mu nshita iinono atemwa mu nshita iikalamba alenge imwe na bonse abaleng’umfwa babe nga fino ndi, ukufumyako fye iyi minyololo.”

30 Awe imfumu e pa kwima pamo no mulashi na Berenike na bantu abaikele pamo na bo. 31 Lelo ilyo bafumine batendeke ukulanshanya, abati: “Uyu muntu tacita umulandu wa kufwilapo+ atemwa uwa kukakilwapo.” 32 E lyo, Agripa aebele Feste ati: “Uyu muntu abula kutwala+ umulandu kuli Kaisare nga acikakulwa.”

27 Awe ilyo batwebele ukuti tuye ku Italia,+ bapeele Paulo na bafungwa bambi ku mukalamba wa bashilika ishina lyakwe Yuli, uwa mwi bumba lya bashilika ilya kwa Augusti. 2 Ilyo twaninine mu bwato bwa ku Adramuti ubwali mupepi no kuya ku ncende sha mu lulamba lwa citungu ca Asia,* twaimine ubulendo no kuya, twali pamo na Alistaaki+ umwina Makedonia uwa ku Tesalonika. 3 Na pa bushiku bwakonkelepo twafikile ku Sidone, kabili Yuli aumfwilile Paulo uluse+ no kumusuminisha ukuya ku fibusa fyakwe, pa kuti fimusakamane.+

4 Ilyo twaimine kulya pali bemba, twakonkele fye ululamba lwa Kupro, pantu umwela walefumina uko twaleya; 5 kabili twapitile muli bemba mupepi na Kilikia na Pamfulia no kufika pa cabu ca ku Mura mu Lukia. 6 Lelo kulya e ko umukalamba wa bashilika asangile ubwato ubwa ku Alekesandria+ ubwaleya ku Italia, no kutuninikamo. 7 Kabili ilyo twaendele panono panono inshiku ishingi twafikile ku Kinidi pa numa ya kucula nga nshi, pantu umwela walikosele ica kuti twafililwe no kulungama intunga twaleyamo. Kanshi e pa kukonka fye ululamba lwa Krete pa Salumone, 8 kabili ilyo twakonkele ululamba na lyo line twaliculile pa kuti fye tufike pa ncende apetwa Ifyabu Ifisuma, mupepi no musumba wa Lasea.

9 Apo inshita iikalamba yalipitilepo kabili pali iyo nshita ulwendo lwali ulwa busanso pantu ne nshita ya kuleka ukulya iya mu lusuba ninshi naipita kale, Paulo abapandile amano, 10 ati: “Mwe baume mwe, ndemona ukuti ulwendo lukaba ulwa busanso kabili ifipe ifingi fikonaika pamo no bwato ukubikako na ifwe bene.”+ 11 Lelo, umukalamba wa bashilika alaumfwila kensha wa bwato no mwine wa bwato ukucila ifyasosele Paulo. 12 Awe tacaweme ukwikala pa cabu mu nshita ya mpepo, abengi balefwaya ukuti bafumepo, kabili batile natweshe ukumona nga kuti twafika ku Fenikisi pa kuti e ko twikale pa nshita ya mpepo. Fenikisi e cabu ca mu Krete icapabukila ku kabanga ka ku kuso no kulola ku kabanga ka ku kulyo.

13 Awe, ilyo umwela wa ku kapinda ka ku kulyo wapeepeleshe, batontonkenye ukuti ico bapangile calacitika, e lyo baimishe inanga no kutendeka ukukonka ululamba lwa Krete. 14 Lelo tapapitile ne nshita iikalamba, umwela wa cipuupu+ uwitwa Yuroakwilo walipuupilepo. 15 Awe ubwato bwaiketwe icibi ica kuti bwafilwa no kulola ukwalefuma umwela. E fyo na ifwe twalekele fye, twalasendwa fye no mwela. 16 E fyo twaobele ubwato ukulungama ukwaleya umwela no kukonka ululamba lwa cishi cinono iciitwa Kauda, lelo twapene tufilwe ukubuula akabwato+ akali ku numa ya bwato. 17 Lelo ilyo twakatintiile mu kati batendeke ukubomfya imyando ku kukaka mwi samba lya bwato; kabili pa kutiina ukushiika ubwato mu musensenga pa Suriti, banenwine intambo ishali ku ca kwensesha ubwato, balasendwa fye ku mwela. 18 Lelo pa mulandu wa kuti twalesunkanishiwa icibi ku cipuupu, ubushiku bwakonkelepo batendeke ukupoosa ifyali mu bwato pa kuti bwanguke;+ 19 na pa bushiku bwalenga shitatu, abene bapoosele ifibombelo fya mu bwato pali bemba.

20 Awe, pa nshiku ishingi akasuba ne ntanda tafyamoneke, kwali fye icipuupu icikalamba ne mfula.+ E fyo ne subilo lyesu lyonse ilya kupusuka lyaile lilepwa. 21 Kabili ilyo papitile inshita iitali ukwabula ukulya, Paulo aimine mu kati kabo+ no kutila: “Mwe baume mwe, amumfwila ico namwebele no kukanafuma ku Krete nga tatwaponenwe no bu busanso no kulufya ifipe.+ 22 Lelo nomba ndetila sansamukeni, pantu tapakafwe nangu umo pali imwe, lelo ubwato e bukonaika fye. 23 Pantu buno bushiku Lesa wandi uo mombela+ acituma malaika+ wakwe ukwisamoneka kuli ine, 24 no kunjeba ati, ‘Witiina, Paulo. Ukeminina ku cinso ca kwa Kaisare,+ kabili, mona! Lesa alepususha bonse abali nobe mu bwato.’25 E ico sansamukeni, mwe baume; pantu nincetekela Lesa+ ukuti cikaba nga filya fine malaika acinjeba. 26 Lelo, tukapooswa ku lulamba pa cishi cimo.”+

27 Awe ilyo ubushiku bwalenga ikumi na shine (14) bwafikile, twalesensenunwa pali bemba wa Adria, ubushiku pa kati bakensha wa bwato balatunga ukuti balepalama ku mulundu. 28 E lyo bapooselemo ica kupiminako ukushika kwa menshi no kusanga ukuti palepele bamita amakumi yatatu na mutanda (36); ilyo baendele intamfu iinono, na kabili bapooselemo ica kupiminako ukushika no kusanga ukuti palepele bamita amakumi yabili na cinelubali (27). 29 Kabili pa mulandu wa kutiina ukuti twalapooswa pa mabwe, bapoosele inanga shine ku numa ya bwato, no kulapepelela fye ukuti buce bwangu. 30 Lelo cilya bakensha wa bwato balefwaya ukufulumuka mu bwato, ilyo baleikisha akabwato muli bemba pa kubepekesha kwati balefwaya ukwikisha inanga ku ntanshi ya bwato, 31 e lyo Paulo aeba umukalamba wa bashilika na bashilika ati: “Aba bantu nga bafuma mu bwato baya, ninshi calala capwa imwe tamwapusuke.”+ 32 Abashilika e pa kuputulako imyando ya kabwato,+ no kukaleka kapona.

33 Awe cilya capalama ku kuca, Paulo alakoselesha bonse ukuti balye, ati: “Inshiku nomba shaba ikumi na shine (14) mwikala fye ukwabula ukuti mulyepo nangu kamo. 34 E ico ndemukoselesha ukuti mulye, pa kuti cimuwamine; pantu tapakalobe umushishi+ wa ku mitwe yenu nangu umo.” 35 Ilyo asosele ifi, abuulile no mukate, atootela+ kuli Lesa pa menso ya bonse, e lyo aumokaula atendeka no kulya. 36 Awe bonse balisansamwike, na bo batendeka no kulya. 37 Bonse fwe bali mu bwato twali imyanda ibili na makumi cinelubali na mutanda (276). 38 Ilyo baikwite, batendeke ukwangushako+ ubwato, pa kupoosa ingano muli bemba.

39 Ilyo bwacele, abaleoba ubwato balubile uyu mulundu lelo bamwene apo bemba aingilako mu mulundu, kabili apaba ululamba lwa mucanga, e po balelwisha ukushiika+ ubwato. 40 E ico, ilyo baputwileko inanga, balekele shiponene muli bemba, na po pene bakakwile imyando ya banaosa kabili, ilyo baimishe itanga lya ku ntanshi ukulilosha ukwalefumina umwela, balolele ku lulamba. 41 Ilyo bafikile apo amenshi yashashikile pa makumanino ya babemba babili, ubwato bwashiikile mu mucanga, na ku ntanshi ya bwato kwaliketwe, kwakosele na ndi, lelo ku numa ya bwato kwalalepauka icibi.+ 42 Awe abashilika bafwaile ukwipaya abafungwa, pa kuti beowa no kufyuka. 43 Lelo umukalamba wa bashilika pa kufwaisha ukupususha Paulo, abaleseshe ukucita amapange yabo. Kabili aebele bonse abaishiba ukowa ukuti baipoose muli bemba, babalilepo ukufika ku mulundu, 44 e lyo abashala bakonkepo, bamo pa fipampa na bambi pa fipimfya fya bwato. Awe bonse bafikile abatuntulu ku mulundu.+

28 Kabili ilyo twapuswike, e lyo twaishibe ukuti e cishi iciitwa Melita.+ 2 Na bantu abalanda ululimi lumbi lumbi balitutangete+ icine cine pa kukosha umulilo no kutupokelela bwino ifwe bonse pantu imfula yaleloka kabili kwali ne mpepo.+ 3 Lelo ilyo Paulo ateebele icifinga ca nkuni no kucibika pa mulilo, insoka ya busungu yalifuminemo pa mulandu wa kukaba kabili yamusumine ku minwe no kukakatilako. 4 Abantu abalanda ululimi lumbi lumbi batile bashimona insoka ilepeleela ku minwe yakwe, e lyo balalanshanya abati: “Cine cine uyu muntu cipondo icipaya abantu, nangu line apuswike muli bemba, nacilungama fye ukuti afwe.” 5 Awe, akuntiile insoka mu mulilo, lelo tapali icabipa nangu cimo icacitike kuli ena.+ 6 Nomba bena bale-enekela ukuti alafiimba atemwa alawa pa nshi no kufwa. Ilyo balolele inshita iitali no kumona ukuti tapali icabipa icicitike kuli ena, balyalwike balasosa abati ni lesa.+

7 Awe mupepi na kuli ilya ncende kwali umulashi wa pali ici cishi, ishina lyakwe ni Popli, uwali na mabala; kabili uwatupokelele bwino no kutusunga bwino nga nshi pa nshiku shitatu. 8 Lelo wishi wa kwa Popli alilwele ubulwele bwa mpepo no bwa kupolomya umulopa, na o Paulo aingile umo ali kabili alipepele, alimwikete+ no kumuposha.+ 9 Ilyo ici cacitike, na bambi aba mu cishi abali na malwele na bo bene batendeke ukwisa kuli ena no kundapwa.+ 10 Kabili batucindikile ku fya bupe ifingi kabili, ilyo twaimine ulwendo, batulongeleshe ifyo twalekabila.

11 Ilyo papitile imyeshi itatu twaile mu bwato bwa ku Alekesandria+ ubwali pa cishi ukupembelela ukupwa kwa nshita ya mpepo kabili ubwali ne cishibilo caleti “Abana Baume ba kwa Seu.” 12 Kabili ilyo twafikile ku Surakuse twaikeleko inshiku shitatu, 13 cilya twafumako twakonka ululamba no kufika ku Regi. Kabili ilyo papitile ubushiku bumo umwela wa ku kapinda ka ku kulyo waliimine kabili twafikile ku Puteoli pa bushiku bwalenga shibili. 14 E ko twasangile aba bwananyina kabili batupapeete ukuti twikale na bo inshiku cinelubali (7); kabili e fyo twaile ukulola ku Roma. 15 Kabili pa kufumako, ilyo aba bwananyina baumfwile ukuti tuli mu nshila tuleisa, baishile baletukonkela ukufika na pa Maliketi ya Api na palya paba Amayanda ya Beni Yatatu, na o, Paulo, ilyo fye abamwene, atootele Lesa kabili alikoshiwe.+ 16 Ilyo twafikile mu Roma, Paulo asuminishiwe+ ukwikala eka, pamo no mushilika uwalemulonda.

17 Lelo, pa numa ya nshiku shitatu Paulo alongenye abakalamba ba baYuda. Ilyo balongene, alabeba ati: “Mwe baume, bamunyinane, nangu nshacitile nangu cimo ku kukaanya abantu atemwa intambi sha fikolwe fyesu,+ napeelwe mu minwe ya bena Roma ngo mufungwa ukufuma ku Yerusalemu.+ 18 Na bo bene, ilyo banjipukishe,+ balefwaisha ukunkakula,+ pantu nshali na mulandu wa kwipailwapo.+ 19 Lelo ilyo abaYuda bakoselepo fye ukuti nikakulwa, na ine e pa kutwala+ umulandu kuli Kaisare, lelo te kukufwaya ukupeela abantu bandi umulandu. 20 E ico, nalombele ukuti tumonane no kulanda na imwe, pantu ni pe subilo+ lya kwa Israele nakakilwa uyu munyololo.”+ 21 Na bo bamwebele abati: “Na ifwe tatwapokelelapo bakalata pali iwe ukufuma ku Yudea, kabili takwaisapo uwa bwananyina nangu umo uwatushimikila atemwa ukulanda icabipa pali iwe. 22 Lelo tuletila cawama ukumfwa kuli iwe ifyo uletontonkanya, pantu cine cine twalishiba ukuti bonse fye balalanda ifyabipa+ pali iyi mipepele.”+

23 Awe baumfwene nankwe ubushiku bwa kulongana, kabili abengi nga nshi baishile kuli ena mu ng’anda umo aletubilisha. Kabili ukufuma ulucelo ukufika icungulo, alabapitilamo mu mulandu pa kubalondolwela bwino bwino pa bufumu bwa kwa Lesa+ no kubanashanasha pali Yesu ukufuma mu mafunde ya kwa Mose+ na muli Bakasesema.+ 24 Bamo bena balitetekele+ ifyo Paulo alesosa; lelo bambi tabatetekele.+ 25 E ico, pa mulandu wa kukanasuminishanya, batendeke ukuya, ilyo Paulo alandile aya mashiwi ati:

“Umupashi wa mushilo walandile bwino bwino muli Esaya kasesema ku fikolwe fyenu, 26 auti, ‘Kabiye kuli aba bantu no kutila: “Ukumfwa mukomfwa, lelo tamwakeluke iyo; kabili, ukulolesha mukalolesha, lelo tamwakamone iyo.+ 27 Pantu imitima ya aba bantu yalikunkuma, na matwi yabo yalomfwa lelo tabankulako iyo, kabili nabashibata; pa kuti amenso yabo yekatala ayamona na matwi yabo yekatala ayomfwa ne mitima yabo ikatala ailuka no kwaluka, pa kuti mbaposhe.’”+ 28 E ico ishibeni ukuti, amashiwi ya fyo Lesa akapususha abantu, yatuminwe ku bena fyalo;+ bena bakayomfwa.”+ 29 ——

30 Awe Paulo aikele imyaka ibili iituntulu mu ng’anda+ yakwe iya kusonkela, na bonse abaleisa kuli ena alebapokelela bwino, 31 alebashimikila ubufumu bwa kwa Lesa no kubasambilisha pali Shikulu Yesu Kristu ukwabula umwenso nangu panono,+ kabili ukwabula no wa kumulesha.