UBWINA LEBI

1 Kabili Yehova aitile Mose no kulanda nankwe mwi tenti lya kukumaninamo na Lesa.+ Amwebele ati: 2 “Eba abena Israele* auti, ‘Umuntu nga alefwaya ukutuula icitekwa cakwe kuli Yehova, afwile ukubuula pa ng’ombe shakwe nangu pa mpaanga shakwe nelyo pa mbushi shakwe.+

3 “‘Nga ca kutila ing’ombe eyo atuula umutuulo wa koca, iyo ing’ombe ifwile ukuba iilume kabili iyabula akalema.+ Akaitemenwe ukuleta+ iyo ing’ombe ku cinso ca kwa Yehova pa mwinshi we tenti lya kukumaninamo na Lesa. 4 Alingile ukubika iminwe pa mutwe wa nama iyo aletuula umutuulo wa koca, kabili umutuulo wakwe ukapokelelwa pa kuti ukabe icifuta mulandu.

5 “‘Lyena afwile ukwipaya ing’ombe iinono iilume ku cinso ca kwa Yehova, kabili abana ba kwa Aarone bashimapepo+ bakalete umulopa kuli Lesa kabili bakausanse mu mbali shonse isha ciipailo+ icabela mupepi no mwinshi we tenti lya kukumaninamo na Lesa. 6 Inama iyo aletuula umutuulo wa koca bakaifunde no kuiputaula.+ 7 Abana ba kwa Aarone bashimapepo, bafwile ukubika umulilo pa ciipailo+ no kutantika inkuni pa mulilo. 8 Abana ba kwa Aarone bashimapepo, bakatantike inama isho baputawile+ pa nkuni ishili pa mulilo wa pa ciipailo, bakatantike kumo no mutwe na mafuta.* 9 Amala na molu bakafisamfye mu menshi, kabili shimapepo akafyoce pa ciipailo fikabe umutuulo wa koca, kabili uwakuleta akacena kasuma* kuli Yehova.+

10 “‘Umutuulo wakwe uwa koca nga ni mpaanga nelyo imbushi,+ alingile ukutuula iilume iinono iyabula akalema.+ 11 Afwile ukuipaila ku kapinda ka ku kuso aka ciipailo ku cinso ca kwa Yehova, kabili abana ba kwa Aarone bashimapepo bakasanse umulopa waiko mu mbali shonse isha ciipailo.+ 12 Akaiputaule kabili shimapepo akatantike iyo inama pa nkuni ishili pa mulilo wa pa ciipailo kumo no mutwe na mafuta.* 13 Akasamfye amala na molu mu menshi, kabili shimapepo akafyoce pa ciipailo fikabe umutuulo wa koca, kabili uwakuleta akacena kasuma* kuli Yehova.

14 “‘Lelo nga ca kuti ifyuni e fyo atuula umutuulo wa koca kuli Yehova, akatuule ifipele nangu utwana twa nkunda.+ 15 Shimapepo akabike ico cuni pa ciipailo kabili akaciputule umutwe e lyo akacoce pa ciipailo, lelo ilyo ashilacita fyonse ifi, afwile ukupongolwela umulopa waciko ku lubali lwa ciipailo. 16 Akafumyeko icibukulo* na masako no kufipoosa pa mbali ya ciipailo ku kabanga, uko betila imito.*+ 17 Akapanse icuni lelo ekaciputula. Lyena shimapepo akacoce pa ciipailo pa nkuni ishili pa mulilo. Mutuulo wa koca, kabili uwakuleta akacena akasuma* kuli Yehova.

2 “‘Nomba umuntu nga alefwaya* ukutuula umutuulo wa ngano+ kuli Yehova, ingano shifwile ukuba ishapeleka. Afwile ukwitulwilapo amafuta kabili alingile ukubikapo+ no bubani bwabuuta.* 2 Lyena akautwale ku bana ba kwa Aarone bashimapepo, kabili shimapepo akabuulepo ulupi lumo ulwa buunga ubwapeleka na mafuta no bubani bwabuuta, kabili akafyocele pa ciipailo pa kuti fikeminineko umutuulo onse,*+ umutuulo wa kuleta akacena akasuma* kuli Yehova. 3 Ifikalashalapo pa mutuulo wa ngano fya kwa Aarone na bana bakwe,+ fintu fya mushilo nga nshi+ ifikalashala pa mituulo ya pa mulilo iya kwa Yehova.

4 “‘Nga watuula umutuulo wa ngano uo bapangila mu citofu, ufwile ukuba uwa buunga bwapeleka, imikate ifwile ukuba iishatutumuka iyasakanamo amafuta nangu imikate iyapaapaatala iishatutumuka kabili iyasubwako amafuta.+

5 “‘Umutuulo obe nga mutuulo wa ngano uwa pa ca kocelapo,+ ufwile ukuba wa buunga bwapeleka ubwabulamo icitutumushi kabili ubwasakanamo amafuta. 6 Ukaumokaule no kwitulwilapo+ amafuta. Uyu, mutuulo wa ngano.

7 “‘Umutuulo obe nga mutuulo wa ngano uwa pa ca kusalwilapo, ufwile ukuba wa buunga bwapeleka ubwasakanamo amafuta. 8 Ukalete umutuulo wa ngano uwapangilwe ne fi fintu kuli Yehova, ukautwale kuli shimapepo kabili akaupalamike ku ciipailo. 9 Kabili shimapepo akabuulepo fimo pa mutuulo wa ngano pa kuti fikeminineko umutuulo onse*+ kabili akafyocele pa ciipailo pa kuti fikabe umutuulo wa kuletela Yehova+ akacena akasuma.* 10 Ifikashalapo pa mutuulo wa ngano fya kwa Aarone na bana bakwe, fintu fya mushilo nga nshi ifikashala pa mituulo ya pa mulilo+ iya kwa Yehova.

11 “‘Umutuulo wa ngano onse uo mwatuula kuli Yehova wikabamo icitutumushi,+ pantu tamufwile ukoca umufuba umuli icitutumushi nelyo ubuci pa kuti fibe umutuulo wa pa mulilo uwa kwa Yehova.

12 “‘Kuti mwafituula kuli Yehova ngo mutuulo wa fisabo fyabalilapo ukupya,+ lelo tafifwile ukubikwa pa ciipailo pa kuti fifumye akacena akasuma.*

13 “‘Mu mutuulo onse uwa ngano mukalelungamo umucele; kabili mwikatala amulaba ukulunga umucele wa cipangano ca kwa Lesa wenu mu mutuulo wenu uwa ngano. Umutuulo onse uo mukalatuula, mukalelungamo umucele.+

14 “‘Nga ulefwaya ukutuula umutuulo wa ngano uwa fisabo fyabalilapo ukupya kuli Yehova, ufwile ukutuula imitwe ya ngano iishilakosa iyasalulwa pa mulilo, ifisense fya ngano ishipya, e fyo ufwile ukutuula umutuulo wa ngano uwa fisabo ifyabalilapo ukupya.+ 15 Ukabikepo amafuta e lyo no bubani bwabuuta. Uyu, mutuulo wa ngano. 16 Shimapepo akafyoce pa kuti fikeminineko umutuulo onse,*+ e kutila ifisense fimo na mafuta, no bubani bwabuuta bonse. Uyu, mutuulo wa pa mulilo uwa kwa Yehova.

3 “‘Umutuulo wakwe nga lilambo lya mutende,+ kabili nga aletuula ing’ombe iilume nelyo iikota, afwile ukutuula iyabula akalema kuli Yehova. 2 Alingile ukubika iminwe pa mutwe wa ng’ombe iyo aletuula, kabili bakaipaile pa mwinshi we tenti lya kukumaninamo na Lesa; kabili abana ba kwa Aarone bashimapepo, bakasanse umulopa mu mbali shonse isha ciipailo. 3 Akatuulepo fimo pa mutuulo wakwe uwa mutende, fikabe umutuulo wa pa mulilo uwa kwa Yehova:+ amafuta+ ayafimba amala, amafuta yonse aya ku mala, 4 ne mfyo shibili na mafuta ya shiko ayabela mupepi no musana. Akafumye na mafuta ya kwi libu kumo ne mfyo.+ 5 Abana ba kwa Aarone bakafyocele pa ciipailo, ukulunda pa mutuulo wa koca uuli pa nkuni ishili pa mulilo;+ mutuulo wa pa mulilo uwakuletela Yehova+ akacena akasuma.*

6 “‘Nga aletuula impaanga nelyo imbushi kuli Yehova pa kuti ibe ilambo lya mutende, afwile ukutuula iilume nelyo iikota,+ iyabula akalema. 7 Nga mwana wa mpaanga aletuula, akalete uyo umutuulo ku cinso ca kwa Yehova. 8 Akabike iminwe pa mutwe wa nama, kabili bakaipaile pa ntanshi ye tenti lya kukumaninamo na Lesa. Abana ba kwa Aarone bakasanse umulopa mu mbali shonse isha ciipailo. 9 Akatuule amafuta ayo akafumya kwi lambo lya mutende pa kuti yakabe umutuulo wa kwa Yehova+ uwa pa mulilo. Akaputule umucila onse uwanona apo walundanina no mungololo, akafumye amafuta ayafimba amala, amafuta fye yonse aya ku mala, 10 ne mfyo shibili na mafuta ya shiko ayaba mupepi no musana. Akafumye na mafuta ya kwi libu kumo ne mfyo.+ 11 Kabili shimapepo akafyocele pa ciipailo kwati fya kulya,* mutuulo wa kwa Yehova+ uwa pa mulilo.

12 “‘Nga ca kuti aletuula imbushi, akailete ku cinso ca kwa Yehova. 13 Akabike iminwe yakwe pa mutwe waiko, kabili bakaipaile pa ntanshi ye tenti lya kukumaninamo na Lesa, kabili abana ba kwa Aarone bakasanse umulopa waiko mu mbali shonse isha ciipailo. 14 Ifyo alingile ukutuula umutuulo wa pa mulilo kuli Yehova, mafuta ayafimba amala, amafuta yonse aya ku mala,+ 15 ne mfyo shibili na mafuta ya shiko ayabela mupepi no musana. Akafumye na mafuta ya kwi libu kumo ne mfyo 16 Shimapepo akafyocele pa ciipailo kwati fya kulya,* mutuulo wa pa mulilo uwakuleta akacena akasuma.* Amafuta yonse ya kwa Yehova.+

17 “‘Ili ifunde lya muyayaya ku nkulo shenu, konse uko mukalaikala: Tamufwile ukulya amafuta no mulopa.’”+

4 Kabili Yehova aebele Mose ati: 2 “Eba abena Israele auti, ‘Nga ca kuti umuntu* abembuka mu kukanaishiba,+ acita cimo pa fyo Yehova akaanya, ifi e fyo mufwile ukucita:

3 “‘Shimapepo uwasubwa+ nga abembuka+ kabili aletelela abantu, akalete kuli Yehova ing’ombe iilume iinono iyabula akalema ikabe umutuulo wa pa lubembu ulo acitile.+ 4 Akalete ing’ombe iilume pa mwinshi we tenti lya kukumaninamo+ pa cinso ca kwa Yehova, kabili akabike iminwe yakwe pa mutwe wa ng’ombe, kabili akepaile iyo ing’ombe pa cinso ca kwa Yehova.+ 5 Lyena shimapepo uwasubwa+ akabuulepo umulopa wa iyo ing’ombe iilume kabili akautwale mwi tenti lya kukumaninamo na Lesa; 6 kabili shimapepo akatumpike umunwe wakwe mu mulopa,+ kabili akausanse imiku 7+ pa cinso ca kwa Yehova pa ntanshi ya nsalu iyacingilila umuputule wa mushilo. 7 Shimapepo akashinge umulopa umo ku nsengo sha ciipailo ca kocelapo ububani bwanunkila+ icaba pa cinso ca kwa Yehova, mwi tenti lya kukumaninamo na Lesa, kabili umulopa uwa ng’ombe iilume uwashalapo akaupongolwele pe samba lya ciipailo ca mutuulo wa koca,+ icabela mupepi no mwinshi we tenti lya kukumaninamo na Lesa.

8 “‘Lyena kuli iyi ing’ombe iya mutuulo wa pa lubembu akafumyeko amafuta yonse kumo na mafuta ayafimba amala, na mafuta yonse aya ku mala, 9 ne mfyo shibili na mafuta ya shiko ayabela mupepi no musana. Akafumye na mafuta ya kwi libu kumo ne mfyo.+ 10 Akacite nga filya fine acita ku ng’ombe iilume iye lambo lya mutende.+ Kabili shimapepo akafyoce pa ciipailo ca mutuulo wa koca.

11 “‘Lelo umukupo wa ng’ombe no munofu waiko onse pamo no mutwe, amolu, amala na mafi,+ 12 e kutila ing’ombe fye yonse, akaitwale kunse ya nkambi pa ncende ya busaka apo betila imito,* kabili akayoce pa nkuni.+ Apo betila imito e po akocele ing’ombe.

13 “‘Nomba ulukuta lonse ulwa kwa Israele nga lwabembuka mu kukanaishiba+ kabili ulukuta* talwishibe ukuti ifyo lwacita fintu Yehova abakeenye ukucita,+ 14 kabili ulubembu ulo bacitile nga lwaishibikwa, ulukuta* lukalete ing’ombe iilume iinono pa ntanshi ye tenti lya kukumaninamo na Lesa pa kuti ikabe umutuulo wa pa lubembu. 15 Abakalamba ba lukuta bakabike iminwe yabo pa mutwe wa ng’ombe pa cinso ca kwa Yehova, kabili ing’ombe bakaipaile pa cinso ca kwa Yehova.

16 “‘Lyena shimapepo uwasubwa akatwale umulopa wa ng’ombe iilume mwi tenti lya kukumaninamo na Lesa. 17 Shimapepo akatumpike umunwe wakwe mu mulopa kabili akausanse imiku 7 pa cinso ca kwa Yehova pa ntanshi ya nsalu+ iyacingilila umuputule wa mushilo. 18 Lyena shimapepo akashinge umulopa umo ku nsengo sha ciipailo+ icaba pa ntanshi ya kwa Yehova, mwi tenti lya kukumaninamo na Lesa; kabili umulopa uukashalapo akaupongolwele pe samba lya ciipailo ca mutuulo wa koca, icabela mupepi no mwinshi we tenti lya kukumaninamo na Lesa.+ 19 Akafumyemo amafuta yonse no kuyocela pa ciipailo.+ 20 Akacite kuli iyi ng’ombe iilume nga filya fine acitile ku ya mutuulo wa pa lubembu. E fyo akacite kuli yena, kabili shimapepo akabafutileko ulubembu lwabo,+ lyena bakelelwa. 21 Akafumishe ing’ombe kunse ya nkambi kabili akayoce nga filya fine aocele iya pa kubala.+ Uyu ukaba mutuulo wa pa lubembu uwa lukuta.+

22 “‘Umukalamba wa mukowa+ nga abembuka mu kukanaishiba kabili aba no mulandu wa kucita cimo pa fyo Yehova Lesa abakeenye, 23 nelyo nga aishiba ukuti nabembuka, akalete akana ka mbushi akalume akabula akalema pa kuti kakabe umutuulo wakwe. 24 Akabike iminwe pa mutwe wa kana ka mbushi kabili bakakepaile apo bepaila umutuulo wa koca pa cinso ca kwa Yehova.+ Ukaba mutuulo wa pa lubembu. 25 Shimapepo akatumpike umunwe wakwe mu mulopa wa mutuulo wa pa lubembu kabili akaushinge ku nsengo+ sha ku ciipailo ca mutuulo wa koca, kabili umulopa uukashalapo akaupongolwele pe samba lya ciipailo ca mutuulo wa koca.+ 26 Akoce amafuta ya mutuulo yonse pa ciipailo nga filya fine oca amafuta ye lambo lya mutende;+ kabili shimapepo akamufutileko ulubembu lwakwe, lyena akelelwa.

27 “‘Nga ca kutila umo* pa bena Israele abembuka mu kukanaishiba kabili aba no mulandu wa kucita cimo pa fyo Yehova akaanya,+ 28 nelyo nga aishiba ukuti nabembuka, akalete akana ka mbushi akakota akabula akalema pa kuti kakabe umutuulo wakwe uwa pa lubembu acitile. 29 Akabike iminwe pa mutwe wa nama ya mutuulo wa pa lubembu kabili bakaipaile apo bepaila umutuulo wa koca.+ 30 Shimapepo akatumpike umunwe wakwe mu mulopa wa mutuulo wa pa lubembu kabili akaushinge ku nsengo sha ku ciipailo ca mutuulo wa koca, kabili umulopa uukashalapo akaupongolwele pe samba lya ciipailo.+ 31 Akafumyemo amafuta yonse+ nga filya fine afumya amafuta mu nama ye lambo lya mutende,+ kabili shimapepo akayoce pa ciipailo pa kuti yakabe akacena akasuma* kuli Yehova; kabili shimapepo akamufutileko ulubembu lwakwe, lyena akelelwa.

32 “‘Lelo nga aleta akana ka mpaanga pa kuti kakabe umutuulo wakwe uwa pa lubembu, afwile ukuleta akakota kabili akabula akalema. 33 Akabike iminwe yakwe pa mutwe wa nama ya mutuulo wa pa lubembu, kabili bakaipaile apo bepaila lyonse umutuulo wa koca pa kuti ikabe umutuulo wa pa lubembu.+ 34 Shimapepo akatumpike umunwe wakwe mu mulopa wa mutuulo wa pa lubembu kabili akaushinge ku nsengo sha ku ciipailo ca mutuulo wa koca,+ kabili umulopa uukashalapo akaupongolwele pe samba lya ciipailo. 35 Akafumyemo amafuta yonse nga filya fine afumya amafuta mu kana ka mpaanga akalume ake lambo lya mutende, kabili shimapepo akayoce pa ciipailo ukulunda pa mutuulo wa koca+ uwa kwa Yehova; kabili shimapepo akamufutileko pa lubembu lwakwe ulo acitile, lyena akelelwa.+

5 “‘Umuntu* nga amona umuntu umbi alebembuka nelyo naishibapo fimo kabili ilyo aumfwa imbila ya kuti ashinine*+ uwabembwike, lelo akana ukulanda ulubembu ulo uyo muntu acitile, ninshi nabembuka kabili akaba no mulandu pa cilubo cakwe.

2 “‘Nelyo umuntu* nga akumya icakowela icili conse, nampo nga citumbi ca nama mpanga iyakowela, nangu citumbi ca citekwa icakowela,+ nelyo citumbi ca fisenya ifyakowela, ninshi akowela kabili aba uwa mulandu nangu ca kuti teshibe. 3 Nelyo nga ca kuti umuntu mu kukanaishiba akumya conse icakowela+ icingamukowesha, kabili aisaishiba pa numa, ninshi nakowela.

4 “‘Nelyo umuntu* mu kukanaishiba asuswa ukulapa ukuti akacita fimo, nampo nga fibi nelyo fisuma, lelo aisaishiba pa numa ukuti alisuswa ukulapa, ninshi ali no mulandu.*+

5 “‘Nga ca kuti ali no mulandu muli cimo pali ifi, akayebelele ulubembu+ acitile. 6 Afwile ukuleta no mutuulo wa pa mulandu kuli Yehova pa lubembu ulo acitile.+ Alingile ukuleta akana ka mpaanga akakota nangu akana ka mbushi akakota, pa kuti kabe umutuulo wa pa lubembu. Lyena shimapepo akamufutileko pa lubembu lwakwe.

7 “‘Nomba nga takwete impaanga, akalete kuli Yehova ifipele fibili nelyo utwana twa nkunda tubili+ pa kuti fikabe umutuulo wa pa mulandu, icuni cimo cikabe umutuulo wa pa lubembu e lyo cimbi cikabe umutuulo wa koca.+ 8 Akafilete kuli shimapepo, na o akabalilepo ukutuula ica pa lubembu kabili akaceke pa mukoshi wa ciko, lelo tafwile ukuputulako umutwe. 9 Akasanse umulopa umo uwa mutuulo wa pa lubembu ku lubali lwa ciipailo, lelo umulopa uukashala akawitulwiile mwi samba lya ciipailo.+ Uyu, mutuulo wa kufuta pa lubembu. 10 Ifi fine e fyo akacite+ na pa kutuula icuni ca bubili pa kuti cikabe umutuulo wa koca; kabili shimapepo akamufutileko ulubembu ulo acitile, lyena akelelwa.+

11 “‘Lelo nga takwete ifipele fibili nelyo utwana twa nkunda tubili, akalete oma imo*+ iya buunga bwapeleka pa kuti bukabe umutuulo wa pa lubembu. Tafwile ukubikamo amafuta nelyo ukubikamo ububani bwabuuta, pantu mutuulo wa pa lubembu. 12 Akatwale kuli shimapepo, na shimapepo akabuulepo ulupi lumo pa kuti bukeminineko umutuulo onse* kabili akabufutumwine pa ciipailo ukulunda pa mutuulo wa kwa Yehova uwa pa mulilo. Uyu, mutuulo wa pa lubembu. 13 Nga nacita ulubembu lumo pali ishi, shimapepo akamufutileko ulubembu lwakwe, lyena akelelwa.+ Ubuunga ubukashalapo bukaba bwa kwa shimapepo+ nga filya fine ciba ku mutuulo wa ngano.’”+

14 Kabili Yehova aebele Mose ati: 15 “Umuntu* nga tali ne cishinka kabili akowesha ifya mushilo fya kwa Yehova+ mu kukanaishiba, akalete kuli Yehova akana ka mpaanga akabula akalema pa kuti kakabe umutuulo wa pa mulandu;+ ukulingana no mutengo wapimwa uwa mashekele* ya silfere kabili ukulingana ne cipimo ce shekele ilya pa cifulo ca kupepelapo.*+ 16 Kabili akalipile icifuta mulandu ica lubembu lwakwe ulwa kubembukila icifulo ca mushilo, kabili pali cila mutengo wa pa fili 5 ifya cifuta mulandu akalundepo cimo.+ Akapeele shimapepo pa kuti shimapepo akatuule akana ka mpaanga kakabe umutuulo wa pa mulandu pa kuti akamufutileko ulubembu,+ lyena akelelwa.+

17 “Umuntu* nga abembuka, e kutila acita cimo pa fyo Yehova akaanya, nangu teshibe, umulandu wena ninshi nakwata kabili akakandilwa pa cilubo cakwe.+ 18 Akalete akana ka mpaanga akabula akalema kuli shimapepo ukulingana no mutengo wa mutuulo wa pa mulandu.+ Lyena shimapepo akamufutileko icilubo cakwe ico acitile mu kukanaishiba, e lyo akelelwa. 19 Uyu, mutuulo wa pa mulandu. Pantu cine cine ali no mulandu kuli Yehova.”

6 Yehova akonkenyepo ukweba Mose ati: 2 “Umuntu* nga abembuka kabili akaana ukuba uwa cishinka kuli Yehova+ pa mulandu wa kuti abepa umuntu umbi pa cintu ico uyo muntu aseekesha kuli ena,+ nangu amwibila nangu acenjesha umunankwe, 3 nelyo asanga icaluba lelo abepa, kabili alapa ubufi pa lubembu lwa musango uyu ulo nalimo acitile,+ ifi e fyo afwile ukucita: 4 Nga nacita cimo pali ifi kabili ali no mulandu, afwile ukubwesha ico aibile, ico acenjeshe umunankwe, ico aseekeshiwe nangu icalubile ico asangile, 5 nelyo conse ico alapilepo ubufi, kabili afwile ukulipila icifuta mulandu icakumanina,+ kabili pali cila mutengo wa pa fili 5 ifya cifuta mulandu akalundepo cimo. Akapeele umwine pa bushiku cikeshibikwa ukuti ali no mulandu. 6 Kabili akalete kuli shimapepo akana ka mpaanga akabula akalema ukulingana no mutengo wapimwa, e lyo shimapepo akakatuule kuli Yehova pa kuti kakabe umutuulo wa pa mulandu.+ 7 Shimapepo akamufutileko umulandu ku cinso ca kwa Yehova, lyena akelelwa pali fyonse ifyo nalimo acitile ifyalengele abe no mulandu.”+

8 Na kabili Yehova aebele Mose ati: 9 “Eba Aarone na bana bakwe auti, ‘Ili e funde lya mutuulo wa koca:+ Umutuulo wa koca ukalaba pe shiko pa ciipailo ubushiku bonse ukufika ulucelo, kabili umulilo wa pa ciipailo taulingile ukushima. 10 Shimapepo akafwale ica kufwala cakwe+ ica bushimapepo, akafwale na ka kaputula ka mu kati+ aka kufimba umubili wakwe. E lyo akakuse imito*+ ya mutuulo wa koca iyo umulilo ocele pa ciipailo, kabili akaibike ku mbali ya ciipailo. 11 Lyena akafuule ifya kufwala fyakwe,+ akafwale fimbi kabili akafumishe imito pa ncende iya busaka kunse ya nkambi.+ 12 Umulilo ufwile ukutwalilila ukwaka pa ciipailo. Taufwile ukushima. Shimapepo akalebikapo inkuni+ cila lucelo, kabili akaletantikapo no mutuulo wa koca, akaleocelapo+ na mafuta ya malambo ya mutende. 13 Umulilo ukaletwalilila ukwaka pa ciipailo. Taufwile ukushima.

14 “‘Nomba ili e funde lya mutuulo wa ngano:+ Imwe mwe bana ba kwa Aarone, muleutuula ku cinso ca kwa Yehova pa ntanshi ya ciipailo. 15 Umo pa bana ba kwa Aarone akabuulepo ubuunga ubwapeleka mu lupi lwakwe ubwa mutuulo wa ngano na mafuta yamo no bubani bwabuuta* bonse ubuli pa mutuulo wa ngano, kabili akafyocele pa ciipailo pa kuti fikaleleta akacena akasuma* kuli Yehova kabili fikaleimininako umutuulo onse.*+ 16 Aarone na bana bakwe bakalye ifikashalapo.+ Bakaliile pa cifulo ca mushilo pantu mukate uushatutumuka. Bakaliile mu lubansa lwe tenti lya kukumaninamo na Lesa.+ 17 Tekwesha ukubikamo icitutumushi+ pa kupanga umukate. Umutuulo wa ngano e o nabapeelako pa mituulo yandi iya pa mulilo.+ Fya mushilo nga nshi,+ filya fine umutuulo wa pa lubembu no mutuulo wa pa mulandu waba. 18 Abana ba kwa Aarone bonse abaume bakalelya.+ Ici e cakaniko cabo umuyayaya ku nkulo shenu ica pa mituulo ya kwa Yehova iya pa mulilo.+ Conse icakumya kuli iyi mituulo cikaba ica mushilo.’”

19 Yehova aebele Mose no kuti: 20 “Uyu e mutuulo uo Aarone na bana bakwe abaume bakalatuula kuli Yehova pa bushiku ubo shimapepo alesubwa:+ oma imo*+ iya buunga bwapeleka e mutuulo wa ngano+ uo bakalatuula, hafu bakaletuula ulucelo na hafu imbi bakaletuula icungulo. 21 Mukalesakanyamo amafuta bwino bwino no kupangamo utupaapaatu pa ca kocelapo.+ Mukalemokaula utupaapaatu twa mutuulo wa ngano e lyo mwatutuula pa kuti tuleletela Yehova akacena akasuma.* 22 Shimapepo uwasubwa uwamupyana pa bana bakwe,+ e o akatuule. Ili lifunde lya muyayaya. Ukaleba umutuulo uutuntulu uwa kocela Yehova. 23 Umutuulo onse uwa ngano uwa kwa shimapepo ufwile ukuba uutuntulu. Tekwesha uku-ulya.”

24 Kabili Yehova aebele Mose ati: 25 “Eba Aarone na bana bakwe auti, ‘Ili e funde lya mutuulo wa pa lubembu:+ Mukepaile Yehova ica kutuula umutuulo wa pa lubembu pa ncende apo bepaila+ ica kutuula umutuulo wa koca. Uyu mutuulo wa mushilo nga nshi. 26 Shimapepo uwatuula uyu umutuulo wa pa lubembu e ukaulya.+ Akauliile pa cifulo ca mushilo, mu lubansa lwe tenti lya kukumaninamo na Lesa.+

27 “‘Conse icakumya umunofu wa mutuulo cikaba ica mushilo, kabili umulopa nga wasabukila ku ca kufwala ca muntu, mukacapile ico ica kufwala umwa mushilo. 28 Nga mwacipikila mu cipe ce bumba mukacitobaule. Lelo nga mwacipikila mu cipe ca mukuba, mukacikuuse no kucisamfya mu menshi.

29 “‘Shimapepo onse umwaume, akalyeko.+ Uyu, mutuulo wa mushilo nga nshi.+ 30 Lelo, tabafwile ukulya umulopa wa co baletuula umutuulo wa pa lubembu ico batwele umulopa wa ciko mwi tenti lya kukumaninamo na Lesa.+ Bafwile ukoca uyu mutuulo mu mulilo.

7 “‘Ili e funde lya mutuulo wa pa mulandu:+ Uyu mutuulo wa mushilo nga nshi. 2 Bakaleipaila inama ya kutuula umutuulo wa pa mulandu apo bepaila inama ya kutuula umutuulo wa koca, kabili umulopa waiko+ bakausanse mu mbali shonse isha ciipailo.+ 3 Shimapepo* akafumye amafuta yaiko yonse,+ kumo na ya ku mucila, ayafimba amala, 4 ne mfyo shibili na mafuta yashiko ayaba mupepi no musana. Akafumye na mafuta ya kwi libu kumo ne mfyo.+ 5 Shimapepo akafyocele pa ciipailo pa kuti fikabe umutuulo wa kwa Yehova uwa pa mulilo.+ Mutuulo wa pa mulandu. 6 Shimapepo onse umwaume akalyeko.+ Umwa mushilo e mo bakaliile. Uyu mutuulo wa mushilo nga nshi.+ 7 Ifunde lya kukonka pa kutuula umutuulo wa pa lubembu, e lya kukonka na pa kutuula umutuulo wa pa mulandu; shimapepo uwatuula icifuta mulandu,+ e ukaba umwine wa nama.

8 “‘Shimapepo nga atuulila umuntu umutuulo wa koca, umukupo wa nama+ ya mutuulo wa koca iyo atwele kuli shimapepo ukaba wakwe.

9 “‘Umutuulo onse uwa ngano uo bapangila mu citofu nelyo uo bapangila mu cakusalwilamo, nangu pa ca kocelapo,+ wa kwa shimapepo uwatuula uyo mutuulo. Ukaba wakwe.+ 10 Lelo umutuulo onse uwa buunga bwa ngano ubwasakanamo amafuta,+ nelyo ubushasakanamo+ amafuta ukaba wa bana baume bonse aba kwa Aarone; bonse bakapoke ifyalingana.

11 “‘Nomba ili e funde lye lambo lya mutende+ ilyo umuntu engatuula kuli Yehova: 12 Nga atwala ilambo lya kutootela,+ akatwale no mukate uushatutumuka uwasakanamo amafuta, utumikate twayanguka utushatutumuka utwasubwako amafuta, no mukate uwasakanamo amafuta uo bapangila ubuunga bwapeleka ubo bakashile bwino. 13 Akatwale umutuulo wakwe pamo no mukate uwatutumuka e lyo na malambo yakwe aya mutende aya kutootela. 14 Pali ifi akatwalepo cimo cimo ica pa mutuulo wakwe pa kuti cikabe ica mushilo ica kwa Yehova; cikaba ca kwa shimapepo uwasansa umulopa wa malambo ya mutende.+ 15 Umunofu we lambo lya kutootela ilya malambo yakwe aya mutende bakaulye pa bushiku bwine autuula. Ekashapo nangu cimo ukufika ulucelo.+

16 “‘Nga ca kuti ilambo ilyo aletuula mutuulo wa mulapo+ nelyo uwa kuitemenwa,+ ninshi bafwile ukulilya pa bushiku alituula, kabili ifyashalapo kuti bafilya ubushiku bukonkelepo. 17 Lelo ifyashalapo pe lambo nga fyafika na pa bushiku bwalenga shitatu, bakafyoce mu mulilo.+ 18 Nomba nga balya ilambo lyakwe ilya mutende pa bushiku bwalenga shitatu, uwatuula ilyo ilambo takapokelelwe. Ilambo lyakwe tabakalipende; likaba ica bunani, kabili umuntu* uwalyako akaba no mulandu.+ 19 Umunofu uo bakumya ku cakowela conse tabalingile uku-ulya. Bakaoce fye mu mulilo. Lelo umuntu uwasanguluka kuti alya umunofu uwasanguluka.

20 “‘Nomba umuntu* uwakowela nga alyako ilambo lya mutende ilya kwa Yehova, uyo muntu* afwile ukwipaiwa.+ 21 Umuntu* nga akumya kuli conse icakowela, nampo nga muntu uwakowela,+ nelyo inama iyakowela,+ nangu conse ica bunani icakowela,+ kabili alyako ilambo lya mutende ilya kwa Yehova, uyo muntu* afwile ukwipaiwa.’”

22 Yehova aebele Mose no kuti: 23 “Eba abena Israele auti, ‘Mwilalya amafuta yonse+ aya ng’ombe iilume nelyo aya kana ka mpaanga akalume nangu aya mbushi. 24 Amafuta ya nama iyo mwasanga naifwa na mafuta ya nama baipaya ku nama ibiye kuti mwayabomfya ku mulimo onse uo mulefwaya, lelo tekwesha ukulya ayo amafuta.+ 25 Pantu onse uwalya amafuta aya nama iyo atwele pa kuti ibe umutuulo wa kwa Yehova uwa pa mulilo, afwile ukwipaiwa.

26 “‘Tamufwile ukulya umulopa+ wa cuni nelyo uwa nama, konse uko mukalaikala. 27 Umuntu* onse uwalya umulopa afwile ukwipaiwa.’”+

28 Kabili Yehova aebele Mose ati: 29 “Eba abena Israele auti, ‘Onse uuletwala ilambo lya mutende kuli Yehova e katwala ilambo lyonse kuli Yehova.+ 30 Akatwale mu minwe amafuta+ pamo ne cisao* pa kuti fikabe umutuulo wa kwa Yehova uwa pa mulilo, kabili akausunshe uku no ku, pa kuti ukabe umutuulo wa kusunsha+ ku cinso ca kwa Yehova. 31 Shimapepo akocele amafuta pa ciipailo,+ lelo icisao cikabe ca kwa Aarone na bana bakwe abaume.+

32 “‘Mukalepeela shimapepo ukuulu kwa ku kulyo pa kuti kukaleba icipande ca mushilo ica pa malambo yenu aya mutende.+ 33 Umwana mwaume uwa kwa Aarone uwatuula umulopa wa malambo ya mutende na mafuta, e ulingile ukusenda+ ukuulu kwa ku kulyo. 34 Pantu icisao ica mutuulo wa kusunsha no kuulu kwa cipande ca mushilo nimpoka ku bena Israele, pa malambo yabo aya mutende, kabili napeela shimapepo Aarone na bana bakwe abaume. Ili lifunde lya muyayaya ilyo abena Israele+ balingile ukulakonka.

35 “‘Ici e cipande ca mushilo icafumine pa mutuulo wa kwa Yehova uwa pa mulilo icifwile ukuba ica bashimapepo, e kutila Aarone na bana bakwe abaume, pa bushiku babapeele umulimo wa kuba bashimapepo ba kwa Yehova.+ 36 Yehova apeele abena Israele ifunde lya kuti balingile ukupeela bashimapepo ici icipande ca mushilo pa bushiku abasubile.+ Ili e funde bafwile ukulakonka mu nkulo shabo shonse.’”

37 Ili e funde lya mutuulo wa koca,+ umutuulo wa ngano,+ umutuulo wa pa lubembu,+ umutuulo wa pa mulandu,+ ilambo lya pa kupeela bamo bushimapepo+ ne lambo lya mutende,+ 38 nga filya fine Yehova aebele Mose pa Lupili lwa Sinai+ pa bushiku aebele abena Israele ukutwala imituulo yabo kuli Yehova mu matololo ya Sinai.+

8 Yehova akonkenyepo ukweba Mose ati: 2 “Senda Aarone na bana bakwe abaume,+ ifya kufwala,+ amafuta ya kusubilako,+ ing’ombe iilume iya kutuula umutuulo wa pa lubembu, impaanga ishilume shibili no museke wa mikate iishatutumuka,+ 3 kabili webe no lukuta lonse lulongane pa mwinshi we tenti lya kukumaninamo na Lesa.”

4 Lyena Mose acitile ifyo Yehova amwebele, kabili ulukuta lwalilongene pa mwinshi we tenti lya kukumaninamo na Lesa. 5 Nomba Mose aebele ulukuta ati: “Ifi e fyo Yehova atwebele ukucita.” 6 E ico Mose apalamike Aarone na bana bakwe abaume kabili alibasambile mu menshi.+ 7 Pa numa afwikile Aarone umwingila,+ amukaka umushipi wa nsalu uukalamba+ mu musana, amufwika ica kufwala cabula amaboko,+ kabili amufwika efode+ no kumukakisha umushipi uukalamba uwapikulwa+ uwa pali efode mu musana. 8 E lyo amufwikile itumba lya pa cifuba+ kabili abikilemo Urimu na Tumimu.+ 9 Lyena amupombele insalu ku mutwe,+ kabili abikile pa ntanshi ya iyi insalu akalilata akabeeka aka golde, akaali icishibilo ca mushilo ica kuipeela,+ nga filya fine Yehova amwebele.

10 E lyo Mose abuulile amafuta ya kusubilako no kusuba itenti lya mushilo na fyonse ifyalimo+ kabili alifisangulwile. 11 Pa numa asanshile amafuta yamo pa ciipailo imiku 7 kabili asubile ne ciipailo ne fipe fya ciko fyonse ne ca kubikamo amenshi ya kusamba ne ca kucitekapo pa kuti afisangulule. 12 Na pa kulekelesha aitulwilile amafuta ya kusubilako yamo pa mutwe wa kwa Aarone pa kuti alebomba umulimo wa mushilo.+

13 Lyena Mose apalamike abana ba kwa Aarone kabili abafwikile imingila, abakaka imishipi mu misana abapomba ne nsalu* ku mutwe,+ ukulingana ne fyo Yehova amwebele.

14 E lyo aletele ing’ombe iilume iya mutuulo wa pa lubembu kabili Aarone na bana bakwe abaume babikile iminwe yabo pa mutwe wa ng’ombe ya mutuulo wa pa lubembu.+ 15 Mose aipeye ing’ombe, kabili atumpiike umunwe wakwe mu mulopa+ e lyo aushinga ku nsengo sha ku ciipailo mu mbali shonse kabili alisangulwile iciipailo ku lubembu. Lelo umulopa uwashelepo awitiile mwi samba lya ciipailo pa kuti acisangulule kabili atuulilepo ilambo lya cifuta mulandu. 16 Kabili Mose abuulile amafuta yonse ayali ku mala, amafuta ya kwi libu, ne mfyo shibili na mafuta ya shiko no kufyocela pa ciipailo.+ 17 Lyena ing’ombe iilume, kumo no mukupo waiko no munofu waiko na mafi yaiko afyocelele kunse ya nkambi,+ nga filya fine Yehova amwebele.

18 Nomba Mose aletele impaanga iilume iya kutuula umutuulo wa koca. Kabili Aarone na bana bakwe abaume babikile iminwe pa mutwe wa mpaanga.+ 19 Lyena Mose aipeye impaanga iilume kabili asanshile umulopa mu mbali shonse isha ciipailo. 20 Aputawile impaanga mu fipimfya fipimfya, kabili Mose aocele umutwe ne fipimfya na mafuta.* 21 Asamfishe amala na molu, kabili Mose aocele impaanga iilume yonse pa ciipailo. Wali mutuulo wa koca uwa kuleta akacena kasuma.* Wali mutuulo wa kwa Yehova uwa pa mulilo, nga filya fine Yehova amwebele.

22 Lyena aletele impaanga iilume iyalenga bubili iya kutuula pa kubika Aarone na bana bakwe pali bushimapepo.+ Kabili Aarone na bana bakwe abaume babikile iminwe pa mutwe wa mpaanga.+ 23 Mose aipeye impaanga iilume kabili abuulilepo umulopa aushinga pa kalebelebe ka kutwi kwa kwa Aarone ukwa ku kulyo na pa cikumo ca ku kulyo na pa cikondo icikalamba ica ku kulyo. 24 Lyena Mose apalamike abana ba kwa Aarone kabili ashingile umulopa umo pa tulebelebe twa matwi yabo aya ku kulyo na pa fikumo fya ku kulyo na pa fikondo ifikalamba ifya ku kulyo; lelo umulopa washelepo Mose ausanshile mu mbali shonse isha ciipailo.+

25 E lyo abuulile amafuta, e kutila amafuta ya ku mucila, amafuta yonse ayafimba amala, amafuta ya kwi libu, imfyo shibili na mafuta ya shiko no mwendo wa ku kulyo.+ 26 Mu museke wa mukate uushatutumuka uwali pa cinso ca kwa Yehova, abuulilemo umukate umo uwabulungana uushatutumuka+ no mukate umo uwasakanamo amafuta+ no mukate umo uwapaapaatala. Lyena aubikile pa mafuta na pa mwendo wa ku kulyo. 27 Pa numa fyonse afibikile mu minwe ya kwa Aarone na mu minwe ya bana bakwe abaume e lyo alafisunsha uku no ku pa kuti fibe umutuulo wa kwa Yehova uwa kusunsha. 28 Lyena Mose afibuulile mu minwe yabo no kufyocela pa ciipailo pa muulu wa mutuulo wa koca. Fyali e lambo lya kuleta akacena kasuma* ilya pa kubika Aarone na bana bakwe pali bushimapepo. Uyu, mutuulo wa pa mulilo uwa kwa Yehova.

29 Mose abuulile icisao* ca mpaanga iilume kabili alicisunshishe uku no ku pa kuti cibe umutuulo wa kusunsha kuli Yehova.+ Ici icisao ca mpaanga iyo batuulile pa kubika Aarone na bana bakwe pali bushimapepo, e cali ica kwa Mose nga filya fine Yehova amwebele.+

30 Kabili Mose abuulile amafuta yamo aya kusubilako+ no mulopa umo uwali pa ciipailo, kabili asanshile Aarone ne fya kufwala fyakwe na bana bakwe abaume ne fya kufwala fyabo. E fyo asangulwile Aarone ne fya kufwala fyakwe na bana bakwe+ ne fya kufwala fyabo.+

31 Lyena Mose aebele Aarone na bana bakwe abaume ati: “Ipikileni+ inama pa mwinshi we tenti lya kukumaninamo na Lesa, kabili e po muiliile no mukate uuli mu museke,* nga filya fine Lesa anjebele ukuti, ‘Aarone na bana bakwe abaume e bo bakalye.’+ 32 Nga kwashala inama no mukate, mukafyoce.+ 33 Pa nshiku 7 mwikafuma pa mwinshi we tenti lya kukumaninamo na Lesa, mpaka inshiku sha kumubika pali bushimapepo shikapwe, pantu pa kumupeela amaka ya kuba bashimapepo+ cikasenda inshiku 7. 34 Ifi twacita lelo, e fyo Yehova anjebele ukuti tukacite pa kumufutilako imembu.+ 35 Pa nshiku 7+ akasuba no bushiku, muleikala pa mwinshi we tenti lya kukumaninamo na Lesa, kabili mulekonka fyonse ifyo Yehova amweba+ pa kuti mwifwa; pantu e fyo anjebele.”

36 Kabili Aarone na bana bakwe abaume bacitile fyonse ifyo Yehova abebele ukupitila muli Mose.

9 Pa bushiku bwalenga 8,+ Mose aitile Aarone na bana bakwe na bakalamba ba bena Israele. 2 Aebele Aarone ati: “Buula ing’ombe iilume iinono ibe umutuulo wa pa lubembu+ ne mpaanga iilume ibe umutuulo wa koca, shonse ishabula akalema, kabili ushituule kuli Yehova. 3 Lelo webe abena Israele auti, ‘Buuleni imbushi iilume ibe umutuulo wa pa lubembu ne ng’ombe iyana ne mpaanga iilume, shonse isha mwaka umo, ishabula akalema, shibe umutuulo wa koca, 4 kabili ing’ombe iilume ne mpaanga iilume shibe amalambo ya mutende+ aya kutuulila Yehova, no mutuulo wa buunga bwa ngano+ uwasakanamo amafuta, pantu buno bushiku Yehova alemoneka kuli imwe.’”+

5 E ico batwele ifyo Mose abebele pa ntanshi ye tenti lya kukumaninamo na Lesa. Lyena ulukuta lonse lwalipaleme no kwiminina pa cinso ca kwa Yehova. 6 Kabili Mose abebele ati: “Ifi e fyo Yehova alefwaya mucite pa kuti mumone ubukata bwa kwa Yehova.”+ 7 Lyena Mose aebele Aarone ati: “Palama ku ciipailo no kutuula umutuulo obe uwa pa lubembu+ no mutuulo obe uwa koca, no kuifutila umulandu we mwine+ kabili ufutileko na ba mu ng’anda yobe; e lyo utuule umutuulo wa bantu,+ kabili ubafutileko,+ nga filya fine Yehova alandile.”

8 Ilyo line fye Aarone apaleme ku ciipailo no kwipaya umwana wa ng’ombe uwa mutuulo wa pa lubembu lwakwe.+ 9 Lyena abana baume aba kwa Aarone bamuleteele umulopa+ e lyo atumpikamo umunwe wakwe, aushinga na ku nsengo sha ku ciipailo, kabili umulopa uwashelepo aupongolwelele mwi samba lya ciipailo.+ 10 Aocele amafuta pa ciipailo ne mfyo na mafuta ya kwi libu aya mutuulo wa pa lubembu, nga filya fine Yehova aebele Mose.+ 11 Kabili aileocela inama ya mutuulo no mukupo kunse ya nkambi.+

12 Lyena Aarone aipeye inama ya mutuulo wa koca, kabili abana bakwe bamupeele umulopa e lyo ausansa mu mbali shonse isha ciipailo.+ 13 Bamupeele ifipimfya fya mutuulo wa koca kumo no mutwe, kabili afyocele pa ciipailo. 14 Kabili asamfishe amala ne myendo no kufyocela kumo no mutuulo wa koca pa ciipailo.

15 Lyena atuuliile abantu umutuulo. Abuulile imbushi ya mutuulo wa pa lubembu lwa bantu no kuipaya kabili ali-ituulile pa kuti ibe umutuulo wa pa lubembu nga filya fine acitile ku mutuulo wa ntanshi. 16 Kabili atuulile umutuulo wa koca ukulingana ne fyo alingile ukucita pa kutuula umutuulo wa koca.+

17 Lyena atuulile umutuulo wa ngano,+ abuulilepo ulupi no kuocela pa ciipailo, ukulunda pa mutuulo wa koca uwa lucelo.+

18 Pa numa Aarone aipeye ing’ombe iilume ne mpaanga iilume pa kuti shibe ilambo lya mutende ilya bantu. Lyena abana bakwe bamupeele umulopa e lyo ausansa mu mbali shonse isha ciipailo.+ 19 Lelo ifipimfya fya mafuta ifya ng’ombe iilume,+ umucila uwanona uwa mpaanga iilume, amafuta ayafimba ifya mu mala, imfyo na mafuta ya kwi libu,+ 20 abana ba kwa Aarone babikile ifipimfya fya mafuta pa fisao,* e lyo aocela ifipimfya fya mafuta pa ciipailo.+ 21 Lelo Aarone asunshishe ifisao no mwendo wa ku kulyo uku no ku, pa cinso ca kwa Yehova, nga filya fine Mose alandile.+

22 Lyena Aarone aimishe amaboko ayalosha ku bantu e lyo abapaala,+ kabili afumine pa ciipailo pa numa ya kutuula umutuulo wa pa lubembu no mutuulo wa koca na malambo ya mutende. 23 Na mukulekelesha Mose na Aarone baingile mwi tenti lya kukumaninamo na Lesa kabili ilyo bafumine bapaalile abantu.+

E lyo abantu bonse bamwene ubukata bwa kwa Yehova,+ 24 kabili umulilo wafumine kuli Yehova+ no koca umutuulo wa koca ne fipimfya fya mafuta ifyali pa ciipailo. Ilyo abantu bamwene ifi fyonse, batampile ukupunda pa mulandu wa kuti balipapile kabili bawile ubukupeme.+

10 Pa numa abana ba kwa Aarone, Nadabu na Abihu,+ cila muntu abulile ica kubikamo umulilo abikamo no mulilo no bubani.+ Lyena batampile ukutuulila Yehova umutuulo wa pa mulilo uo bashalingile ukutuula,+ uo ashabebele. 2 Ilyo line, umulilo wafumine kuli Yehova no kuboca,+ kabili bafwilile pa cinso ca kwa Yehova.+ 3 Lyena Mose aebele Aarone ati: “Yehova alandile ati, ‘Abapalama kuli ine+ bafwile ukulaibukisha ukuti ndi wa mushilo, kabili nkacindikwa pa menso ya bantu bonse.’” Awe Aarone aikele fye tondolo.

4 E ico Mose aitile Mishaele na Elsafani, abana baume ba kwa Usiele,+ wishi mukalamba wa kwa Aarone, no kubeba ati: “Iseni kuno, fumyeni balupwa lwenu pa ncende ya mushilo, batwaleni kunse ya nkambi.” 5 Awe baliile no kubafumyapo ninshi nabafwala ne mingila, babatwala na kunse ya nkambi, nga fintu Mose abebele.

6 Lyena Mose aebele Aarone na bana bakwe bambi, Eleasari na Itamari ati: “Mwilekelesha umushishi wenu, kabili mwilepula ifya kufwala fyenu,+ pa kuti mwifwa na pa kuti Lesa e fulilwa ulukuta lonse. Bamunyinenwe aba mu ng’anda ya kwa Israele e balaloosha abo Yehova epeye ku mulilo. 7 Tamufwile ukufuma pa mwinshi we tenti lya kukumaninamo na Lesa. Nga mwafumapo mulefwa, pantu Yehova alimusuba.”+ E ico bacitile nga fintu Mose abebele.

8 Lyena Yehova aebele Aarone ati: 9 “Ilyo ushilaingila mwi tenti lya kukumaninamo na Lesa,+ wilanwa umwangashi nangu ubwalwa, iwe na bana bobe abaume abali pamo na iwe, pa kuti mwikafwa. Ili lifunde ilyo iwe na bakatuntuka muli iwe mulingile ukulakonka. 10 E pa kuti mulelekanya ica mushilo ne cishili ca mushilo, icakowela ne casanguluka,+ 11 na pa kuti mulesambilisha abena Israele fyonse ifyo Yehova abebele ukupitila muli Mose.”+

12 Lyena Mose aebele Aarone na bana bakwe abaume abashelepo, Eleasari na Itamari ati: “Buuleni umutuulo wa ngano uwashele pa mituulo ya pa mulilo iya kwa Yehova, mu-uliile mupepi ne ciipailo,+ kabili mu-ulye uushatutumuka pantu wa mushilo nga nshi.+ 13 Mufwile uku-uliila pa cifulo ca mushilo,+ pantu mutuulo wa kwa Yehova uwa pa mulilo uo akupeela kabili uo apeela abana bobe, ifi e fyo anjebele. 14 Kabili iwe na bana bobe abaume na bana bobe abanakashi+ mukaleliila icisao ca mutuulo wa kusunsha no kuulu kwa cipande ca mushilo+ umwa busaka, pantu niwe na bana bobe abaume apeela ifi fipande fya malambo ya mutende aya bena Israele. 15 Bakulaletela pamo ukuulu kwa ca mushilo ne cisao ca mutuulo wa kusunsha no mutuulo wa pa mulilo uwa fipimfya fya mafuta, pa kuti fibe umutuulo wa kusunsha uku no ku, pa cinso ca kwa Yehova; kabili ici e cipande ico iwe na bana bobe abaume abo uli nabo+ mukalapeelwa, nga filya fine Yehova alandile.”

16 Kabili Mose alifwaile sana imbushi ya mutuulo wa pa lubembu,+ lelo asangile ukuti baliyocele kale. E ico akalipiile Eleasari na Itamari, abana baume ba kwa Aarone abashelepo ati: 17 “Cinshi ico mushaciliila umutuulo wa pa lubembu pa cifulo ca mushilo,+ apo uyu mutuulo wa mushilo nga nshi kabili nimwe apeele pa kuti mufumyepo ulubembu lwa lukuta kabili mubafutileko umulandu pa cinso ca kwa Yehova? 18 Moneni! Umulopa wa uko tabauletele mu kati ka cifulo ca mushilo.+ Mwacilinga ukuliila umutuulo pa cifulo ca mushilo, nga filya fine Lesa anjebele.” 19 Aarone aebele Mose ati: “Moneni! Lelo nabatuula umutuulo wabo uwa pa lubembu no mutuulo wabo uwa koca pa cinso ca kwa Yehova,+ lelo ifi fyacicitikila ine. Bushe nga nacilya umutuulo wa pa lubembu lelo, Yehova nga acitemwa?” 20 Ilyo Mose aumfwile ifyo Aarone amwebele, alishibe icalengele bacite ifi.

11 Lyena Yehova aebele Mose na Aarone ati: 2 “Ebeni abena Israele amuti, ‘Pa fya mweo fyonse ifya pano isonde,* ifi e fyo mwingalya:+ 3 Inama yonse iya mabondo ayalepuka pabili kabili iibukula insaku, e yo mulelya.

4 “‘Lelo inama ishibukula insaku nelyo isha mabondo isho mushifwile ukulalya ni shi: ingamila, pantu ilabukula insaku lelo tayalepuka amabondo pabili. Muleimona ukuti yalikowela.+ 5 Pati+ na o mwilalya, pantu nangu ca kuti alabukula insaku, talepuka amabondo. Mulemumona ukuti alikowela. 6 Na kalulu mwilalya, pantu nangu ca kuti alabukula insaku, talepuka amabondo. Mulemumona ukuti alikowela. 7 Inkumba+ nayo mwilalya, pantu nangu ca kuti yalilepuka amabondo pabili, taibukula insaku. Muleimona ukuti yalikowela. 8 Ishi nama mwilalya, ne fitumbi fya shiko mwilakumyako. Muleshimona ukuti shalikowela.+

9 “‘Pa fya mu menshi fyonse, ifyo mwingalya ni fi: Conse icakwata utulebelebe na mamba, nampo nga ca muli babemba nelyo nga ca mu mimana, kuti mwalya.+ 10 Lelo conse ica muli babemba na mu mimana icishakwata utulebelebe na mamba, fyonse ifisenya mu menshi, kabili fyonse ifya mweo ifya mu menshi, mulefimona ukuti fya bunani. 11 Mulefimona ukuti fya bunani, kabili mwilalya,+ kabili ifyafwa mulefimona ukuti fya bunani. 12 Conse ica mu menshi icishakwata utulebelebe na mamba mulecimona ukuti ca bunani.

13 “‘Ifyuni ifyo mufwile ukulamona ukuti fya bunani kabili ifyo mushifwile ukulalya ni fi: kapumpe,+ inkwashi, ikubi+ lyafiita, 14 pungwa wakashika na bapungwa bafiita aba misango yonse, 15 bamwankole ba misango yonse, 16 mwakatala, icipululu, katotwe, inkoshi sha misango yonse, 17 akapululu, inondo, icipululu ca matwi ayatali, 18 ishipi, mukanga, ikubi, 19 kabaso, imisango yonse iya nkooba, puupuute na kasusu. 20 Ifisenya* fyonse ifyakwata amapindo ifyendela ku molu 4 mulefimona ukuti fya bunani.

21 “‘Pali fyonse ifisenya ifyakwata amapindo ifyendela ku molu 4, ifyo mwingalya fye fintu fyakwata amolu ya kutolaukilako ayalepa ukucila aya kwendelako. 22 Ifyo mwingalya ni fi: makanta iyalekanalekana,+ inyense ne nshonkonono. 23 Ifisenya fimbi ifyakwata amapindo, ifya molu 4, mulefimona ukuti fya bunani. 24 Ifi kuti fyamukowesha. Onse uwakumya ku cifwile pali ifi, akaba uwakowela ukufika icungulo.+ 25 Onse uwasenda icafwa pali ifi akawashe ifya kufwala fyakwe,+ kabili akaba uwakowela ukufika icungulo.

26 “‘Inama yonse iyalepuka panono amabondo kabili iishibukula insaku, muleimona ukuti yalikowela. Onse uwaikumya akaba uwakowela.+ 27 Ica mweo conse ica mabutu* pa fya mweo fyonse ifyendela ku molu 4, mulecimona ukuti calikowela. Onse uwakumya icitumbi ca ifi ifya mweo akaba uwakowela ukufika icungulo. 28 Uwasenda icitumbi ca ifi ifya mweo akawashe ifya kufwala fyakwe,+ kabili akaba uwakowela ukufika icungulo.+ Mulefimona ukuti fyalikowela.

29 “‘Pa fya mweo fyonse ifisenya pano isonde, ifi e fyo mufwile ukulamona ukuti fyalikowela: imfuko, impuku,+ imisango yonse iya bamulinso, 30 kolyokolyo, imbulu, insamba, inkulumushi na fulunyemba. 31 Ifi ifya mweo ifisenya mulefimona ukuti fyalikowela.+ Onse uwakumya icafwa pali ifi akaba uwakowela ukufika icungulo.+

32 “‘Nga cafwa, ponse apo caponena ninshi pakowela, nampo nga ni pa cipe ca cimuti, pa ca kufwala, pa mukupo nangu pa nsamu. Icipe conse ico mubomfya apo caponena, mufwile ukucabika mu menshi, kabili cikaba icakowela ukufika icungulo; lyena cikaba icasanguluka. 33 Nga caponena mu cipe ce bumba mukacitobaule, kabili fyonse ifyacibamo fikaba ifyakowela.+ 34 Ifya kulya fyonse ifyo amenshi ya muli ico icipe yatonenako ninshi fyakowela, kabili ifya kunwa fyonse ifili muli ico cipe fikaba ifyakowela. 35 Ponse apo icafwa caponena ninshi pakowela. Nampo nga ni pa citofu nelyo nga ni pa cakutekapo inongo, ico caponenapo mukacitobaule. Ninshi nacikowela, kabili mukalecimona ukuti calikowela. 36 Nomba nga caponena mu kamfukumfuku nelyo mu cilindi umo basungila amenshi, ico caponenamo cikatwalilila ukuba icasanguluka, lelo onse uwacifumyamo akaba uwakowela. 37 Icafwa nga caponena pa mbuto sha kubyala, isho imbuto shikatwalilila ukuba ishasanguluka. 38 Lelo nga ca kuti icilundwa ca ciko caponena pa mbuto isho mwabike mu menshi, isho imbuto mukashimone ukuti nashikowela.

39 “‘Nomba nga ca kuti inama iyo mulya yafwa, uwakumya icitumbi caiko akaba uwakowela ukufika icungulo.+ 40 Onse uwalya iyo inama iyafwa akawashe ifya kufwala fyakwe kabili akaba uwakowela ukufika icungulo.+ Onse uwasenda icitumbi caiko akawashe ifya kufwala fyakwe, kabili akaba uwakowela ukufika icungulo. 41 Tekwesha ukulya conse icisenya pano isonde pantu ca bunani.+ 42 Mwilalya conse icendela pa lufumo, conse icendela ku molu 4, conse icakwata amolu ayengi nelyo conse icisenya pano isonde, pantu fya bunani.+ 43 Mwilaleka ifisenya filelenga mwaba aba bunani kabili abakowela, ica kuti mwaba abashasanguluka.+ 44 Pantu nine Yehova Lesa wenu,+ kabili mufwile ukulaisangulula no kulaba aba mushilo,+ pantu ndi wa mushilo.+ E ico mwilaleka conse icisenya pano isonde cilemukowesha. 45 Pantu nine Yehova uwamufumishe mu calo ca Egupti pa kuti mbe Lesa wenu,+ kabili mulingile ukuba aba mushilo,+ pantu ndi wa mushilo.+

46 “‘Aya e mafunde ya pa nama, pa fyuni, pa fya mweo fyonse ifya mu menshi na pali fyonse ifisenya pano isonde, 47 pa kuti mulelekanya icakowela ne casanguluka kabili mulelekanya ica mweo ico mwingalya ne co mushingalya.’”+

12 Na kabili Yehova aebele Mose ati: 2 “Eba abena Israele auti, ‘Umwanakashi nga aimita kabili apaapa umwana umwaume, akaba uwakowela pa nshiku 7, nga filya fine aba uwakowela ilyo ali ku mweshi.+ 3 Pa bushiku bwalenga 8 umwana akasembululwe.+ 4 Nyina akatwalilile ukuisangulula ku mulopa wakwe pa nshiku 33. Tafwile ukwikata ica mushilo nangu cimo, kabili tafwile ukwingila mu ncende ya mushilo mpaka inshiku sha kusanguluka kwakwe shikakumane.

5 “‘Nga apaapa umwana umwanakashi, ninshi akaba uwakowela pa nshiku 14, nga filya fine aba uwakowela ilyo ali ku mweshi. Akatwalilile ukuisangulula ku mulopa wakwe pa nshiku 66. 6 Ilyo inshiku sha kuisangulula pa mulandu wa kufyala umwana umwaume nangu umwana umwanakashi shikapwa, e lyo akalete akana ka mpaanga aka mwaka umo pa kuti kakabe umutuulo wakwe uwa koca.+ Akalete na kana ka nkunda nelyo icipele ica mutuulo wa pa lubembu kuli shimapepo pa mwinshi we tenti lya kukumaninamo na Lesa. 7 Shimapepo akatuule uyu umutuulo kuli Yehova no kufutilako umwanakashi pa kukowela kwakwe, e lyo akaba uwasanguluka ku mulopa wakwe uwalefuma. Ili e funde ilyo umwanakashi uwapaapa umwana umwaume nelyo umwana umwanakashi alingile ukulakonka. 8 Lelo nga takwete impaanga, akalete ifipele fibili nelyo utwana twa nkunda tubili,+ kamo ka mutuulo wa koca kambi nako ka mutuulo wa pa lubembu, na shimapepo akamufutileko, lyena akaba uwasanguluka.’”

13 Kabili Yehova aebele Mose na Aarone ati: 2 “Pa nkanda* ya muntu nga pafimba, paba icilemoneka nge cikokotolo ca pa cilonda nelyo nga palemoneka nga ubulwele bwa cisongo kabili icili pa nkanda kuti casanguka ubulwele bwa fibashi,*+ ninshi uyo muntu bakamutwale kuli Aarone shimapepo, nangu kuli umo pa bana bakwe bashimapepo.+ 3 Shimapepo akalolekeshe ifili pa nkanda. Ubupipi ubulipo nga nabubuuta kabili nga nafingila sana mu nkanda, ninshi fibashi. Shimapepo akafilolekeshe, e lyo akabilishe ukuti nakowela. 4 Lelo ifyapala ubulwele bwa cisongo nga filemoneka ifyabuuta pa nkanda kabili filemoneka ukuti tafingile sana mu nkanda no bupipi tabubuutile, ninshi shimapepo akamubike eka pa nshiku 7.+ 5 Lyena shimapepo akamuceeceete pa bushiku bwalenga 7, kabili nga amona ukuti ubulwele tabulelunduluka kabili tabusalangene pa nkanda, akamubike eka pa nshiku na shimbi 7.

6 “Shimapepo akamuceeceete na kabili pa bushiku bwalenga 7, kabili ubulwele nga nabucepako kabili tabusalangene pa nkanda, shimapepo akabilishe ukuti nasanguluka.+ Cali fye cikokotolo nge ca pa cilonda. Lyena umulwele akawashe ifya kufwala fyakwe, kabili akaba uwasanguluka. 7 Lelo ilyo shimapepo alemuceeceeta nga amona ukuti ubulwele nabusalangana pa nkanda, umulwele afwile ukuyamona shimapepo na kabili.* 8 Shimapepo akaceeceeta umulwele, kabili nga amona ukuti ubulwele nabusalangana pa nkanda, akabilisha ukuti nakowela. Ninshi nalwala ifibashi.+

9 “Umuntu nga alwala ifibashi, bafwile ukumutwala kuli shimapepo, 10 kabili shimapepo akamuceeceete.+ Nga ca kuti pa nkanda yakwe napafuluma ifyabuuta, kabili nafilenga ubupipi bwabuuta, kabili ififulwime nga nafitulika,+ 11 ninshi fibashi ifya mutatakuya ifili pa nkanda yakwe, kabili shimapepo akabilishe ukuti nakowela. Ekamubika eka,+ pantu nakowela. 12 Nomba ifibashi nga fyasalangana pa nkanda, kabili fyaba fye umubili onse ukufuma ku mutwe ukufika ku makasa, ponse apo shimapepo engamona, 13 kabili shimapepo nga amuceeceeta e lyo asanga ukuti ifibashi fili fye umubili onse, akabilishe ukuti uyu muntu tali uwakowela.* Inkanda yonse naibuuta kabili nasanguluka. 14 Lelo nga fyatulika, akaba uwakowela. 15 Shimapepo nga amona ukuti nafitulika, akabilisha ukuti nakowela.+ Uuli ne fitulike pa nkanda alikowela. Ninshi ali ne fibashi.+ 16 Lelo ifitulike nga fyabuuta, ninshi umulwele akaye kuli shimapepo. 17 Shimapepo akamuceeceete,+ kabili nga amona ukuti ififulwime nafibuuta, ninshi shimapepo akabilishe ukuti umulwele nasanguluka.

18 “Icipute nga catumba umuntu pa nkanda kabili capola, 19 lelo apaali icipute pafuluma ifyabuuta nelyo paba ifyapala ubulwele bwa cisongo ifyakashikila, alingile ukuya kuli shimapepo. 20 Shimapepo akamuceeceete,+ kabili nga amona ukuti nafingila sana mu nkanda, kabili ubupipi nabubuuta, lyena shimapepo akabilishe ukuti nakowela. Ninshi fibashi fyafuma apali icipute. 21 Lelo shimapepo nga amuceeceeta kabili asanga ukuti tapali ubupipi bwabuuta kabili tafingile sana mu nkanda kabili fileya filepwa, lyena shimapepo akamubike eka pa nshiku 7.+ 22 Kabili nga asanga ukuti nafisalangana pa nkanda, shimapepo akabilishe ukuti nakowela. Ninshi nalwala ifibashi. 23 Lelo ifyapala ubulwele bwa cisongo nga fili fye pamo pene, tafisalangene, ninshi cipute fye cikulile, kabili shimapepo akabilishe ukuti nasanguluka.+

24 “Nangu umuntu nga apya ku mulilo, kabili icilonda cilemoneka icakashikila nelyo icabuuta, 25 lyena shimapepo akamuceeceete. Nga ca kuti ubupipi ubulipo nabubuuta kabili nga palemoneka ukuti napengila sana, ninshi fibashi fifumine pa cilonda, kabili shimapepo akabilishe ukuti uyo muntu nakowela. Ninshi nalwala ifibashi. 26 Lelo shimapepo nga amuceeceeta kabili asanga ukuti tapali ubupipi ubwabuuta kabili tapengile sana kabili nga cileya cilepola, lyena shimapepo akamubike eka pa nshiku 7.+ 27 Shimapepo akamuceeceete pa bushiku bwalenga 7 kabili ififumine pa cilonda nga nafisalangana pa nkanda, lyena shimapepo akabilishe ukuti nakowela. Ninshi nalwala ifibashi. 28 Lelo nga fili fye pamo pene, tafisalangene pa nkanda, kabili nga fileya filepwa, ninshi cilonda cifimbile fye, kabili shimapepo akabilishe ukuti nasanguluka, pantu cilonda cifimbile fye.

29 “Umwaume nangu umwanakashi nga aba no bulwele mu mutwe nelyo ku kalefulefu, 30 lyena shimapepo akamuceeceete.+ Nga asanga ukuti ubulwele nabwingila sana mu nkanda, no mushishi uli uwa mutuntula kabili uwa patali patali, e lyo shimapepo akabilishe ukuti nakowela. Bulwele bwa mu mutwe nelyo ubwa ku kalefulefu. Ninshi nalwala ifibashi fya ku mutwe nangu ifya ku kalefulefu. 31 Lelo nga ca kuti shimapepo amona ukuti ubulwele tabwingile sana mu nkanda kabili apali ubulwele tapali umushishi uwafiita, shimapepo afwile ukubika umulwele eka pa nshiku 7.+ 32 Shimapepo akaceeceete umulwele pa bushiku bwalenga 7, kabili ubulwele nga tabulundulwike, kabili apali ubulwele nga tapali umushishi wa mutuntula kabili tabwingile sana mu nkanda, 33 umulwele akabeye umushishi, lelo apali ubulwele pena ekabeyapo. Lyena shimapepo akabike umulwele eka pa nshiku 7.

34 “Pa bushiku bwalenga 7 shimapepo akaceeceeta umulwele na kabili. Nga ca kuti ubulwele bwa mu mutwe no bwa ku kalefulefu tabulundulwike kabili tabwingile sana mu nkanda, lyena shimapepo akabilishe ukuti nasanguluka, e lyo umulwele akawashe ifya kufwala fyakwe kabili akaba uwasanguluka. 35 Lelo nga ca kuti ubulwele bwasalangana pa nkanda pa numa ya kumweba ukuti nasanguluka, 36 shimapepo akamuceeceeta, kabili nga amona ukuti ubulwele nabusalangana pa nkanda, shimapepo tafwile no kumona nga pali umushishi wa mutuntula; uyo muntu ninshi nakowela. 37 Nomba pa numa ya kumuceeceeta nga asanga ukuti ubulwele tabusalangene, na pa nkanda napamena umushishi uwafiita, ninshi ubulwele nabupwa. Nasanguluka, kabili shimapepo akabilisha ukuti nasanguluka.+

38 “Nga ca kuti pa nkanda ya mwaume nangu iya mwanakashi pafuluma ifyabuuta, 39 shimapepo akaficeeceete.+ Nga ca kuti ififulwime filemoneka ifyabuutulukila, ninshi fya kufuluma fye pa nkanda. Uo fifulwime ali uwasanguluka.

40 “Umuntu nga aseba ipala, lipala fye. Ninshi ali uwasanguluka. 41 Nga asebela pa ntanshi, ninshi lipala fye ilya pa ntanshi. Ninshi ali uwasanguluka. 42 Lelo mwi pala lya pa kati ka mutwe nelyo ilya pa ntanshi nga mwafuluma ifyakashikila, ninshi fibashi filefuluma mwi pala lyakwe ilya pa kati ka mutwe nangu ilya pa ntanshi. 43 Shimapepo akamuceeceete, kabili mwi pala lyakwe ilya pa kati ka mutwe nelyo ilya pa ntanshi nga muli ififimbile ifyakashikila kabili filemoneka kwati fibashi pa nkanda yakwe, 44 ninshi fibashi alwele. Ali uwakowela kabili shimapepo akabilishe ukuti nakowela pantu mu mutwe wakwe muli ubulwele. 45 Uulwele ifibashi akalefwala ifya kufwala ifyalepauka, kabili umushishi wakwe ukaleba fye uwasakalala, akalefimba na pa mwefu wa pa muulu wa kanwa kakwe kabili akalebilikisha ati, ‘Ninkowela, ninkowela!’ 46 Inshiku shonse isho akaba uwa fibashi, akaba uwakowela. Apo alikowela afwile ukulaikala eka. Akaleikala kunse ya nkambi.+

47 “Nga ca kuti mu ca kufwala mwaba ifibashi, nampo nga ca kufwala ca kupikula nelyo ca nsalu iya kolokondwe, 48 nampo nga ni mu bushishi bwa ca kufwala nangu mu mpapa nelyo muli conse icapangilwa ne mpapa, 49 kabili mu ca kufwala, mu mpapa, mu ca kufwala icapikulwa no bushishi nangu muli conse ica mpapa nga mwamoneka ifyafiitulukila nangu ifyakashikila, ninshi fibashi, kabili mukalange shimapepo. 50 Shimapepo akaficeeceete, kabili akafibike fyeka pa nshiku 7.+ 51 Nga aceeceeta ubulwele pa bushiku bwalenga 7, kabili asanga ukuti nabusalangana mu ca kufwala nelyo mu capikulwa no bushishi, nangu mu mpapa (te mulandu ne fyo iyo impapa baibomfya), ninshi ubo bulwele fibashi ifyabipisha, kabili ninshi ica kufwala nelyo impapa nafikowela.+ 52 Akoce ica kufwala nelyo icapikulwa no bushishi, nangu conse ica mpapa umuli ubulwele, pantu ninshi muli ifibashi ifyabipisha. Bakacoce.

53 “Nomba shimapepo nga aficeeceeta kabili asanga ukuti ubulwele tabusalangene mu ca kufwala nangu mu capikulwa no bushishi nelyo muli conse ica mpapa, 54 shimapepo akabeba ukuti bawashe sana ico ica kufwala, kabili akacibike ceka pa nshiku na shimbi 7. 55 Lyena pa numa ya ishi nshiku 7, shimapepo akaciceeceete. Nga filemoneka fye cimo cine kabili ubulwele tabusalangene, ninshi nacikowela. Mukacoce pantu ninshi naconaika kunse nelyo mu kati.

56 “Lelo shimapepo nga aciceeceeta kabili pa numa ya kuciwasha sana amona ukuti fyacepako, lyena akasembulule apo fili pa ca kufwala nelyo pa mpapa nangu pa capikulwa no bushishi. 57 Lelo nga ficili filemoneka ku lubali lumo ulwa ca kufwala nangu ulwa capikulwa no bushishi nelyo ulwa conse ica mpapa, ninshi filesalangana kabili afwile ukoca+ conse icikwete ubulwele. 58 Nomba nga ca kuti fyaleka ukumoneka mu ca kufwala, nangu mu capikulwa no bushishi nelyo muli conse ica mpapa ico wawasha, lyena mufwile ukuciwasha na kabili, e lyo cikasanguluka.

59 “Aya e mafunde ya pa bulwele bwa fibashi fya mu ca kufwala icapikulwa no bushishi nelyo ica nsalu ya kolokondwe nangu muli conse ica mpapa, pa kuti mulemona nga nacisanguluka nelyo nacikowela.”

14 Yehova aebele Mose no kuti: 2 “Ifi e fyo mulekonka pa bushiku muletwala umulwele wa fibashi kuli shimapepo+ pa kuti eshibe nga ca kuti nasanguluka. 3 Shimapepo akaye kunse ya nkambi, e ko akamuceeceetele. Umulwele wa fibashi nga napola, 4 shimapepo akamwebe ukuleta ifyuni fibili ifya mweo ifyasanguluka, akamuti ka mukedari, ubushishi ubwakashika ce na husope ifya kumusangulwilako.+ 5 Shimapepo akalanda ukuti icuni cimo bacipaile mu cipe ce bumba umuli amenshi aya pa kamfukumfuku. 6 Lelo akabuule icuni ca mweo na kamuti ka mukedari, ubushishi ubwakashika ce na husope, kabili akafitumpike mu mulopa wa cuni ico bacipaila mu menshi ya pa kamfukumfuku. 7 Lyena akasanse uo alesangulula ku fibashi imiku 7 kabili akabilishe ukuti nasangululwa, e lyo akaleke icuni ca mweo cikaye.+

8 “Uuleisangulula akawashe ifya kufwala fyakwe no kubeya umushishi wakwe onse, akasambe umubili onse e lyo akasanguluka. Pa numa kuti abwelela mu nkambi, lelo akekale kunse ye tenti lyakwe pa nshiku 7. 9 Pa bushiku bwalenga 7, akabeye umushishi wakwe onse ku mutwe no mwefu wa ku kalefulefu ne fikumbi fya pa menso. Nga abeya umushishi wakwe onse, akawashe ifya kufwala fyakwe no kusamba umubili onse, lyena akaba uwasanguluka.

10 “Pa bushiku bwalenga 8, akabuule impaanga shibili ishilume ishinono ishabula akalema, akana ka mpaanga akakota akabula akalema+ aka mwaka umo, ama oma yatatu* aya buunga bwapeleka bwino ubwasakanamo amafuta pa kuti bukabe umutuulo wa ngano,+ na kapu imo* iya mafuta;+ 11 kabili shimapepo uwamubilisha ukuti nasanguluka akalete umuntu uuleisangulula ku cinso ca kwa Yehova pa mwinshi we tenti lya kukumaninamo na Lesa kumo ne mituulo. 12 Shimapepo akabuule akana ka mpaanga kabili akakatuule umutuulo wa pa mulandu+ kumo na kapu imo iya mafuta, kabili akafisunshe uku no ku pantu mutuulo wa kusunsha pa cinso ca kwa Yehova.+ 13 Lyena akepaile akana ka mpaanga apo bepaila inama+ ya mutuulo wa pa lubembu ne ya mutuulo wa koca, pa cifulo ca mushilo, pantu nga filya fine umutuulo wa pa lubembu waba, umutuulo wa pa mulandu na o wine wa kwa shimapepo.+ Uyu mutuulo wa mushilo nga nshi.+

14 “Lyena shimapepo akabuulepo umulopa wa mutuulo wa pa mulandu, kabili akaushinge ku kalebelebe ka kutwi kwa ku kulyo ukwa muntu uuleisangulula, na pa cikumo cakwe ica ku kulyo na pa cikondo icikalamba ica lukasa lwakwe ulwa ku kulyo. 15 Kabili shimapepo akabuule kapu ya mafuta,+ aketulwile yamo pa lupi lwakwe ulwa ku kuso. 16 Shimapepo akatumpike umunwe wakwe uwa ku kulyo mu mafuta ayali mu lupi lwakwe ulwa ku kuso, kabili akasanse amafuta yamo panshi imiku 7 pa cinso ca kwa Yehova. 17 Lyena shimapepo akashinge amafuta yamo pa yashele mu lupi lwakwe ku kalebelebe ka kutwi kwa ku kulyo ukwa muntu uuleisangulula. Akamushinge na pa cikumo cakwe ica ku kulyo, na pa cikondo icikalamba ica lukasa lwakwe ulwa ku kulyo apo acishinga umulopa wa mutuulo wa pa lubembu. 18 Shimapepo aketulwile amafuta ayashele mu lupi lwakwe pa mutwe wa uleisangulula, kabili akamufutileko umulandu pa cinso ca kwa Yehova.+

19 “Shimapepo akatuule umutuulo wa pa lubembu+ kabili akafutileko uuleisangulula, lyena akepaye inama ya mutuulo wa koca. 20 Kabili shimapepo akatuule umutuulo wa koca no mutuulo wa ngano+ pa ciipailo, kabili akamufutileko umulandu,+ lyena akaba uwasanguluka.+

21 “Lelo nga mupiina, kabili takwete ifi fyonse, ninshi akalete akana ka mpaanga pa kuti kakabe umutuulo wa pa mulandu uwa kusunsha, pa kuti akaifutile umulandu. Akaletele pamo na oma imo* iya buunga bwapeleka ubwasakanamo amafuta pa kuti bukabe umutuulo wa ngano, e lyo na kapu imo iya mafuta, 22 ne fipele fibili nangu utwana twa nkunda tubili, ukulingana ne fyo engakwata. Cimo cikabe umutuulo wa pa lubembu e lyo cimbi cikabe umutuulo wa koca.+ 23 Pa bushiku bwalenga 8+ akafilete pa cinso ca kwa Yehova pa mwinshi we tenti lya kukumaninamo na Lesa+ pa kuti shimapepo akamone nga nasanguluka.

24 “Shimapepo akabuule akana ka mpaanga aka mutuulo wa pa mulandu+ na kapu imo iya mafuta, kabili akafisunshe uku no ku pantu mutuulo wa kusunsha pa cinso ca kwa Yehova.+ 25 Lyena akepaye akana ka mpaanga aka mutuulo wa pa mulandu, kabili shimapepo akabuulepo umulopa umo uwa mutuulo wa pa mulandu kabili akaushinge ku kalebelebe ka kutwi kwa ku kulyo ukwa muntu uuleisangulula, na pa cikumo ca kuboko kwakwe ukwa ku kulyo na pa cikondo icikalamba ica lukasa lwakwe ulwa ku kulyo.+ 26 Shimapepo aketulwile amafuta yamo mu lupi lwakwe ulwa ku kuso,+ 27 kabili shimapepo akatumpike umunwe wakwe uwa ku kulyo mu mafuta ayali mu lupi lwakwe ulwa ku kuso kabili akasanse amafuta yamo panshi imiku 7 pa cinso ca kwa Yehova. 28 Kabili shimapepo akashinge amafuta yamo pa yashele mu lupi lwakwe ku kalebelebe ka kutwi kwa ku kulyo ukwa muntu uuleisangulula. Akamushinge na pa cikumo cakwe ica ku kulyo, na pa cikondo icikalamba ica lukasa lwakwe ulwa ku kulyo apo acishinga umulopa wa mutuulo wa pa lubembu. 29 Lyena shimapepo aketulwile amafuta ayashele mu lupi lwakwe pa mutwe wa uleisangulula, pa kuti amufutileko umulandu pa cinso ca kwa Yehova.

30 “Shimapepo akatuule icipele cimo nelyo akana ka nkunda ukulingana ne fyo uuleisangulula akwete,+ 31 cimo cikabe umutuulo wa pa lubembu e lyo cimbi cikabe umutuulo wa koca+ pamo pene no mutuulo wa ngano; kabili shimapepo akafutileko uuleisangulula pa cinso ca kwa Yehova.+

32 “Ifi e fyo mulekonka pa kusangulula umuntu uwalwele ifibashi uushingakumanisha ukuleta umutuulo uufwaikwa pa kuti abe uwasanguluka.”

33 Lyena Yehova aebele Mose na Aarone ati: 34 “Ilyo mukafika mu calo ca Kanaani+ ico ndemupeela,+ kabili nga naleka ubulwele bwa fibashi+ bwaba mu ng’anda imo muli ici icalo, 35 umwine wa ng’anda akese-eba shimapepo ati, ‘Nimona ifyapala ifibashi mu ng’anda yandi.’ 36 Shimapepo akalande ukuti bafumye ifili mu ng’anda ilyo ashilaingilamo pa kuti aceeceete ifilemoneka nge fibashi, pantu nga tabafumishemo kuti alanda ukuti fyonse ifili mu ng’anda nafikowela. Nga bafumyamo, shimapepo akengile mu ng’anda mu kuiceeceeta. 37 Akaceeceeta apali ifyapala ifibashi, kabili nga ca kuti ku fibumba fya ng’anda kuli ifyafiitulukila nelyo ifyakashikila, kabili mu fibumba nga muli umwatobonkela, 38 lyena shimapepo akafume mu ng’anda kabili akesale ing’anda pa nshiku 7.+

39 “Lyena shimapepo akabwelele kuli iyo ng’anda pa bushiku bwalenga 7, kabili akaiceeceete. Nga ca kuti ifyapala ifibashi nafisalanganina ku fibumba fya iyo ng’anda, 40 e lyo shimapepo akabebe ukuti bafumye amabwe umuli ifyapala ifibashi, kabili bayapoose kunse ya musumba ukwakowela. 41 Lyena bakakoole sana iyo ng’anda mu kati monse, kabili iloba ilyo bakakoola bakayelitila kunse ya musumba ukwakowela. 42 Lyena bakabuule amabwe yambi no kuyengisha mu fibumba umo bafumishe amabwe, kabili akabuule indaka imbi no kushingula ing’anda.

43 “Lelo nga ca kutila ifyapala ifibashi fyabwela mu ng’anda pa numa ya kufumya amabwe na pa numa ya kukoola ing’anda no kuishingula cipya cipya, 44 shimapepo akengilemo kabili akaiceeceete. Ifyapala ifibashi nga nafisalangana mu ng’anda, ninshi fibashi ifyabipisha+ filimo. Iyo ing’anda ninshi naikowela. 45 Lyena akebe aba kubongolola ing’anda. Amabwe yaiko, ifimuti fyaiko ne loba lyonse ilya ng’anda bakafifumishe kunse ya musumba ukwakowela.+ 46 Nomba onse uwaingila mu ng’anda iyo shimapepo aisala+ akaba uwakowela ukufika icungulo;+ 47 kabili onse uwasendama muli iyo ng’anda akawashe ifya kufwala fyakwe, na onse uwaliila muli iyo ng’anda akawashe ifya kufwala fyakwe.

48 “Lelo shimapepo nga aisa kabili amona ukuti ifyapala ifibashi tafisalangene mu ng’anda pa numa ya kushingula ing’anda cipya cipya, lyena akabilisha ukuti ing’anda naisanguluka, pantu ifyapala ifibashi nafipwa. 49 Pa kusangulula ing’anda iyakowela,* akabuule ifyuni fibili, akamuti ka mukedari, ubushishi ubwakashika ce ne cimenwa ca husope.+ 50 Akepaile icuni cimo mu cipe ce bumba umuli amenshi ya pa kamfukumfuku. 51 Lyena akabuule akamuti ka mukedari, husope, ubushishi ubwakashika ce ne cuni ca mweo no kufitumpika mu mulopa wa cuni ico bacipaila mu menshi ya pa kamfukumfuku, kabili akasanse ing’anda imiku 7.+ 52 Kabili akasangulwile ing’anda iyakowela* ku mulopa wa cuni, ku menshi ya pa kamfukumfuku, ku cuni ca mweo, ku kamuti ka mukedari, kuli husope na ku bushishi ubwakashika ce. 53 Lyena akaleka icuni ca mweo cikaye kunse ya musumba kabili akafutileko ing’anda, kabili ikaba iyasanguluka.

54 “Ifi e fya kukonka pa bulwele bonse ubwa fibashi fya mu mutwe nelyo ifya ku kalefulefu,+ 55 ifibashi fya mu ca kufwala+ nelyo ifya mu ng’anda,+ 56 na pa fifulwime, pa fyapala icikokotolo ca pa cilonda na pa fyapala ubulwele bwa cisongo,+ 57 pa kuti muleishiba nga ca kuti cimo nacikowela nelyo nacisanguluka.+ Aya e mafunde ya kukonka pa bulwele bwa fibashi.”+

15 Yehova aebele Mose na Aarone ati: 2 “Eba abena Israele auti, ‘Umwaume nga aletonya fimo ku bwaume* ninshi nakowela.+ 3 Nakowela pa mulandu ne fyo aletonya, nampo nga nafitwalilila ukufuma ku bwaume nelyo naficilika ubwaume, ninshi acili nakowela.

4 “‘Ubusanshi bonse ubo uuletonya fimo asendamapo bukaba ubwakowela, na conse ico aikalapo cikaba icakowela. 5 Uwakumya ku busanshi bwakwe akawashe ifya kufwala fyakwe no kusamba umubili onse. Akaba uwakowela ukufika icungulo.+ 6 Onse uwaikala apacikala uuletonya fimo akawashe ifya kufwala fyakwe no kusamba umubili onse. Akaba uwakowela ukufika icungulo. 7 Onse uwakumya uuletonya fimo akawashe ifya kufwala fyakwe no kusamba umubili onse. Akaba uwakowela ukufika icungulo. 8 Uuletonya fimo nga afwishila umuntu uwasanguluka amate, uo afwishila alingile ukuwasha ifya kufwala fyakwe no kusamba umubili onse. Akaba uwakowela ukufika icungulo. 9 Conse ica kwikalapo ico babika pa nama ico uuletonya fimo aikalapo pa lwendo cikaba icakowela. 10 Onse uwakumya kuli conse ico acikalapo akaba uwakowela ukufika icungulo, na onse uwasenda ifyo acikalapo akawashe ifya kufwala fyakwe no kusamba umubili onse. Akaba uwakowela ukufika icungulo. 11 Nga ca kuti uuletonya fimo+ tasambile ku minwe e lyo aikata umuntu, uo aikata alingile ukuwasha ifya kufwala fyakwe kabili alingile ukusamba umubili onse. Akaba uwakowela ukufika icungulo. 12 Icipe conse ice bumba ico uuletonya fimo aikatako mufwile ukucitobaula, ne cipe conse ica cimuti mukacisamfye.+

13 “‘Uuletonya fimo nga apola kabili ifyaletona fyaleka, pa numa ya nshiku 7 akawashe ifya kufwala fyakwe kabili akasambe mu menshi ya pa kamfukumfuku, e lyo akaba uwasanguluka.+ 14 Pa bushiku bwalenga 8 akasende ifipele fibili nangu utwana twa nkunda tubili,+ akayepeela shimapepo pa mwinshi we tenti lya kukumaninamo na Lesa pa cinso ca kwa Yehova. 15 Kabili shimapepo akafituule, cimo cikabe umutuulo wa pa lubembu e lyo cimbi cikabe umutuulo wa koca, kabili shimapepo akamufutileko pa cinso ca kwa Yehova pa mulandu ne fyo aletonya.

16 “‘Nomba umwaume nga afumya amenshi ya bwaume, afwile ukusamba umubili onse. Akaba uwakowela ukufika icungulo.+ 17 Afwile ukuwasha ica kufwala conse ne mpapa yonse apo amenshi ya bwaume yatonena. Fikaba ifyakowela ukufika icungulo.

18 “‘Umwaume nga alaala no mwanakashi kabili afumisha amenshi ya bwaume mu mwanakashi, bonse babili balingile ukusamba umubili onse. Bakaba abakowela ukufika icungulo.+

19 “‘Umwanakashi nga alefuma umulopa pa mulandu wa kuti ali ku mweshi, akatwalilila ukuba uwakowela pa nshiku 7.+ Onse uwamukumya akaba uwakowela ukufika icungulo.+ 20 Conse ico asendamapo ilyo ali ku mweshi cikaba icakowela, na conse ico aikalapo cikaba icakowela.+ 21 Onse uwakumya ubusanshi bwakwe akawashe ifya kufwala fyakwe no kusamba umubili onse. Akaba uwakowela ukufika icungulo. 22 Onse uwakumya conse ico acikalapo akawashe ifya kufwala fyakwe, kabili akasambe umubili onse. Akaba uwakowela ukufika icungulo. 23 Nga acikala pa busanshi nangu pa cintu cimbi, umuntu uwafikumya akaba uwakowela ukufika icungulo.+ 24 Kabili umwaume nga alaala nankwe, no mulopa wa mwanakashi wamutonena,+ akaba uwakowela inshiku 7, kabili ubusanshi bonse ubo asendamapo bukaba ubwakowela.

25 “‘Nga ca kuti umulopa wa mwanakashi wafuma pa nshiku ishingi+ e lyo ninshi te nshita ailapo ku mweshi,+ nelyo nga ca kuti umulopa wafuma pa nshiku ishingi ukucila ifyo ufuma ilyo ali ku mweshi, ninshi pali ishi inshiku shonse akaba uwakowela nga filya fine aba uwakowela ilyo ali ku mweshi. 26 Ubusanshi bonse ubo asendamapo inshiku shonse isho umulopa ulefuma bukaba ubwakowela nga filya fine bukowela ilyo ali ku mweshi,+ kabili conse ico aikalapo cikaba icakowela nga filya fine ciba ilyo ali ku mweshi. 27 Onse uwafikumya akaba uwakowela, akawashe ifya kufwala fyakwe no kusamba umubili onse. Akaba uwakowela ukufika icungulo.+

28 “‘Lelo nga ca kuti umulopa waleka ukufuma, akaba uwasanguluka+ pa numa ya nshiku 7. 29 Pa bushiku bwalenga 8, akatwale ifipele fibili nangu utwana twa nkunda tubili+ kuli shimapepo pa mwinshi we tenti lya kukumaninamo na Lesa.+ 30 Shimapepo akafituule, cimo cikabe umutuulo wa pa lubembu e lyo cimbi cikabe umutuulo wa koca, kabili shimapepo akamufutileko pa cinso ca kwa Yehova pa mulandu wa kukowela kwakwe ukwa mulopa uwalefuma.+

31 “‘E fyo mukatalushe abena Israele ku kukowela, pa kuti bakaleba abasanguluka kabili bekafwa pa mulandu wa kukowesha itenti lyandi ilya mushilo ilili mu kati kabo.+

32 “‘Umwaume uuletonya fimo, umwaume uwakowela pa mulandu wa kufumya amenshi ya bwaume,+ 33 umwanakashi uuli ku mweshi,+ umwaume nelyo umwanakashi uulefumya fimo,+ e lyo no mwaume uwalaala no mwanakashi uwakowela, bonse bafwile ukulakonka aya amafunde.’”

16 Pa numa ya mfwa ya bana abaume babili aba kwa Aarone abafwile pa mulandu wa kuti balipaleme ku cinso ca kwa Yehova,+ Yehova alilandile na Mose. 2 Yehova aebele Mose ati: “Eba Aarone munonko auti elaisa fye apo alefwaila mu Muputule wa Mushilo Nga Nshi+ uuli ku numa ya nsalu ya kucingilako,+ pa ntanshi ya nkupiko ya pa Cipao, pa kuti ekafwa,+ pantu nakulamonekela mwi kumbi+ pa muulu wa nkupiko+ ya cipao.

3 “Ilyo Aarone ashilaingila mu Muputule wa Mushilo Nga Nshi afwile ukutuula ing’ombe iilume iinono iya mutuulo wa pa lubembu,+ ne mpaanga iilume iya mutuulo wa koca.+ 4 Alingile ukufwala umwingila wa mushilo+ no tuputula twa mu kati+ tulingile ukufimba umubili wakwe, kabili aleikaka umushipi wa nsalu uukalamba+ no kuipomba insalu ku mutwe.+ Ifi fya kufwala fya mushilo.+ Alesamba+ umubili onse ilyo ashilafifwala.

5 “Alepoka utwana twa mbushi utulume tubili ku lukuta lwa bena Israele+ utwa kutuula umutuulo wa pa lubembu, na kana ka mpaanga akalume aka kutuula umutuulo wa koca.

6 “Lyena Aarone alingile ukuleta ing’ombe iilume iya mutuulo wa pa lubembu lwakwe, kabili akaifutile umulandu umwine,+ akafutileko na ba mu ng’anda yakwe.

7 “Kabili akabuule utu utwana twa mbushi tubili no kutuleta pa cinso ca kwa Yehova pa mwinshi we tenti lya kukumaninamo na Lesa. 8 Aarone akapendule pali utu utwana twa mbushi tubili, akabushi kamo kakabe ka kwa Yehova e lyo kambi kakabe ka Asasele.* 9 Aarone nga apendula,+ akana ka mbushi akakaba ka kwa Yehova, akakatuule umutuulo wa pa lubembu. 10 Lelo akana ka mbushi akakaba ka Asasele pa numa ya kupendula, alingile ukukemika aka mweo pa cinso ca kwa Yehova pa kuti Lesa engabelela abantu uluse, kabili akakaleke kakaye ku Asasele mu matololo.+

11 “Aarone akalete ing’ombe iilume iya kutuula umutuulo wa pa lubembu lwakwe, kabili akaifutile umulandu, akafutileko na ba mu ng’anda yakwe. Pa numa akepaye ing’ombe iilume ikabe umutuulo wa pa lubembu lwakwe.+

12 “Lyena akabuule icifutumwino+ umuli amalaka ya mulilo aya pa ciipailo+ icaba pa cinso ca kwa Yehova ne ndupi shibili isha bubani bwanunkila,+ kabili akafingishe mu Muputule wa Mushilo Nga Nshi ku numa ya nsalu ya kucingilako.+ 13 Akabike no bubani pa mulilo pa cinso ca kwa Yehova,+ ne cushi ca bubani cikakupe inkupiko ya Cipao ca Cipangano,+ e pa kuti ekafwa.

14 “Akabuulepo umulopa wa ng’ombe iilume,+ akatumpikemo umunwe wakwe e lyo akausanse pa ntanshi ya nkupiko lwa ku kabanga, kabili umulopa umo akausanse pa ntanshi ya nkupiko+ imiku 7.

15 “Lyena akepaye imbushi ya mutuulo wa pa lubembu lwa bantu,+ kabili akalete umulopa waiko mu Muputule wa Mushilo Nga Nshi ku numa ya nsalu ya kucingilako.+ Pa kusansa umulopa wa mbushi+ akacite nga filya fine acitile pa kusansa umulopa wa ng’ombe iilume; akausanse pa ntanshi ya nkupiko.

16 “Aarone afwile ukusangulula Umuputule wa Mushilo Nga Nshi pa mulandu wa fyakowela ifyo abena Israele bacita na pa mulandu wa bumpulamafunde bwabo na pa membu shabo,+ kabili ifi fine e fyo akacite na kwi tenti lya kukumaninamo na Lesa, ilyaba mu kati ka aba bantu abacita ifyakowela.

17 “Ilyo shimapepo aingila mu Muputule wa Mushilo Nga Nshi mu kutuula ilambo lya cifuta mulandu, mwi tenti lya kukumaninamo na Lesa tamufwile ukuba umuntu umbi mpaka afumamo. Shimapepo akaifutile umulandu, akafutileko aba mu ng’anda yakwe+ e lyo no lukuta lonse ulwa kwa Israele.+

18 “Akafume no kuya ku ciipailo+ icili pa cinso ca kwa Yehova, kabili akacifutileko. Lyena akabuulepo umulopa wa ng’ombe iilume no wa mbushi kabili akaushinge ku nsengo sha ciipailo mu mbali shonse. 19 Kabili akatumpike umunwe mu mulopa e lyo akausanse pa ciipailo imiku 7 pa kuti akacisangulule ku fyakowela ifyo abena Israele bacita.

20 “Nga apwisha ukusangulula+ Umuputule wa Mushilo Nga Nshi ne tenti lya kukumaninamo na Lesa ne ciipailo,+ e lyo akapalamike imbushi ya mweo.+ 21 Lyena Aarone akabike amaboko yakwe yabili pa mutwe wa mbushi ya mweo kabili akasokolole ifilubo fyonse ifya bena Israele na bumpulamafunde bwabo bonse ne membu shabo shonse. Nga acita ifi, cikaba kwati abika ifi fyonse pa mutwe wa mbushi+ kabili akaleke umwaume uukasontwa akaitwale mu matololo. 22 Imbushi ikasenda imembu shabo shonse+ no kushitwala mu ciswebebe,+ kabili akaleka iyo imbushi ikaye mu matololo.+

23 “Lyena Aarone akengile mwi tenti lya kukumaninamo na Lesa kabili akafuule ifya kufwala fyabuuta ifyo acifwala ilyo acingila mu Muputule wa Mushilo Nga Nshi, kabili akafibike panshi mwi tenti mwine. 24 Mu cifulo ca mushilo e mo akasambile+ umubili onse kabili akafwale ifya kufwala fyakwe.+ Lyena akafumemo no kutuula umutuulo wakwe uwa koca+ no mutuulo wa koca uwa bantu,+ kabili akaifutile umulandu e lyo akafutileko na abantu.+ 25 Akoce amafuta ya mutuulo wa pa lubembu pa ciipailo.

26 “Uwacileka imbushi yaya ku Asasele,+ akawashe ifya kufwala fyakwe no kusamba umubili onse, e lyo akengile mu nkambi.

27 “Kabili ing’ombe iilume iya mutuulo wa pa lubembu ne mbushi iya mutuulo wa pa lubembu isho shimapepo aletele umulopa wa shiko mu Muputule wa Mushilo Nga Nshi pa kuti afutileko umulandu, bakashifumishe kunse ya nkambi, kabili bakoce imikupo yashiko ne minofu na mafi yashiko.+ 28 Uwafyoca akawashe ifya kufwala fyakwe no kusamba umubili onse, e lyo akengile mu nkambi.

29 “Ifi e fyo mukalekonka lyonse: Mu mweshi walenga 7, pa bushiku bwalenga 10 ubwa mweshi, mukalepusula imyeo yenu,* kabili mwikalabomba umulimo nangu umo,+ nampo nga mwana calo nelyo nga mulebeshi uo mwikala nankwe, bonse tamulingile ukulabomba. 30 Pali ubu bushiku e po bakalamutuulila ilambo lya cifuta mulandu+ pa kuti mukalesanguluka. Mukalasanguluka ku membu shenu shonse pa cinso ca kwa Yehova.+ 31 Ubu bushiku bukaba lisabata ilya kutuushamo ku milimo yenu yonse, kabili mukalepusula imyeo yenu.+ Ifi e fyo mukalekonka lyonse.

32 “Shimapepo uwasubwa+ kabili uwapyana wishi+ pali bushimapepo+ akatuule ilambo lya cifuta mulandu ninshi nafwala ifya kufwala fyabuuta,+ ifya kufwala fya mushilo.+ 33 Akafutileko Umuputule wa Mushilo Nga Nshi,+ itenti lya kukumaninamo na Lesa+ ne ciipailo;+ kabili akafutileko bashimapepo na bantu bonse mu lukuta.+ 34 Ifi e fyo mukalekonka lyonse,+ pa kufutilako abena Israele pa kubasangulula ku membu shabo shonse, umuku umo mu mwaka.”+

E ico Aarone acitile nga fintu Yehova aebele Mose.

17 Kabili Yehova aebele Mose ati: 2 “Eba Aarone na bana bakwe abaume na bena Israele bonse auti, ‘Yehova alandile ati:

3 “‘“Onse uwa mu ng’anda ya kwa Israele nga aipaila ing’ombe iilume nangu akana ka mpaanga nelyo imbushi mu nkambi nangu kunse ya nkambi, 4 lelo taletele iyo inama pa mwinshi we tenti lya kukumaninamo na Lesa pa kuti aituule umutuulo kuli Yehova pa ntanshi ye tenti lya mushilo ilya kwa Yehova, uyo muntu akaba no mulandu wa mulopa. Nasuumya umulopa, kabili uyo muntu akepaiwe. 5 E pa kuti abena Israele belaipaila amalambo yabo mu mpanga, lelo baleyaleta kuli Yehova pa mwinshi we tenti lya kukumaninamo na Lesa, kuli shimapepo. Balingile ukulatuula aya amalambo kuli Yehova+ pa kuti yaleba amalambo ya mutende. 6 Kabili shimapepo akasanse umulopa pa ciipailo ca kwa Yehova pa mwinshi we tenti lya kukumaninamo na Lesa, kabili akoce amafuta aya kuletela Yehova akacena akasuma.*+ 7 E ico baleke ukutuula amalambo ku fibanda* ifimoneka nge mbushi+ ifyo bacita na fyo ubucende.+ Ili e funde ilyo mulingile ukulakonka mu nkulo shenu shonse.’”

8 “Ubebe auti, ‘Onse uwa mu ng’anda ya kwa Israele nelyo umulebeshi uo mwikala nankwe uwatuula umutuulo wa koca nelyo ilambo 9 lelo taliletele pa mwinshi we tenti lya kukumaninamo na Lesa pa kuti alituule kuli Yehova, uyo muntu akepaiwe.+

10 “‘Nga ca kuti uwa mu ng’anda ya kwa Israele nelyo umulebeshi uo mwikala nankwe alya umulopa wa ca mweo conse,+ nkamufulilwa kabili nkamwipaya. 11 Pantu umweo wa ca mweo conse waba mu mulopa wa ciko,+ kabili nalimupeela pa kuti muleifutilako* pa ciipailo,+ pantu umulopa e ufutilako+ pantu umweo waba mu mulopa. 12 E co naebela abena Israele nati: “Takuli* uufwile ukulya umulopa, nangu mulebeshi uo mwikala nankwe+ tafwile ukulya umulopa.”+

13 “‘Nga ca kuti umwina Israele nelyo umulebeshi uo mwikala nankwe aipaya inama nelyo icuni ico engalya, afwile ukupongololamo umulopa wa ciko+ no kushiikapo iloba. 14 Pantu umweo wa ca mweo conse mulopa wa ciko pantu umweo waba mu mulopa. E co naebele abena Israele nati: “Mwilalya umulopa wa ca mweo conse, pantu umweo wa ca mweo conse mulopa wa ciko. Onse uwalya umulopa akepaiwa.”+ 15 Onse* uwalya inama iyaifwila nelyo iyo iciswango caipaya,+ nampo nga mwina Israele nelyo nga mulebeshi, akawashe ifya kufwala fyakwe kabili afwile ukusamba umubili onse. Akaba uwakowela ukufika icungulo;+ lyena akaba uwasanguluka. 16 Lelo nga tawashishe ifya kufwala fyakwe no kusamba umubili onse, akakandwa pa membu shakwe.’”+

18 Yehova aebele Mose no kuti: 2 “Eba abena Israele auti, ‘Nine Yehova Lesa wenu.+ 3 Mwilacita ifyo aba mu calo ca Egupti umo mwaleikala bacita, kabili mwilacita ifyo aba mu calo ca Kanaani umo ndemutwala bacita.+ Kabili mwilakonka amafunde yabo. 4 Mulekonka ubupingushi bwandi na mafunde yandi.+ Nine Yehova Lesa wenu. 5 Mulesunga amafunde yandi kabili mulekonka ubupingushi bwandi. Onse uwakulacita ifi, akaba no mweo.+ Nine Yehova.

6 “‘Takuli umwaume uufwile ukupalama kuli lupwa lwakwe pa kuti alaale nankwe.*+ Nine Yehova. 7 Taufwile ukulaala na wiso kabili taufwile ukulaala na noko. Apo ni noko, taufwile ukulaala nankwe.

8 “‘Taulingile ukulaala na muka wiso.+ Pantu ninshi waseebanya wiso.*

9 “‘Taufwile ukulaala na nkashi yobe, umwana mwanakashi wa kwa wiso nelyo umwana mwanakashi wa kwa noko, nampo nga wafyalwa nankwe inda imo nelyo iyo.+

10 “‘Taufwile ukulaala no mwishikulu obe uo umwana obe umwaume afyala nelyo uo umwana obe umwanakashi afyala, pantu ninshi waiseebanya.

11 “‘Taufwile ukulaala no mwana mwanakashi wa kwa muka wiso, uo wiso afyala pantu ni nkashi yobe.

12 “‘Taulingile ukulaala na nokosenge. Ni nkashi ya kwa wiso.+

13 “‘Taulingile ukulaala na nkashi nankwe wa kwa noko, pantu mulopa umo wine na noko.

14 “‘Taufwile ukulaala no mukashi wa kwa ndume nankwe wa kwa wiso pa kuti wimuseebanya,* pantu ni noko.+

15 “‘Taufwile ukulaala na nokofyala.+ Mukashi wa mwana obe. Wilalaala nankwe.

16 “‘Taulingile ukulaala na muka munonko,+ pantu ninshi waseebanya* munonko.

17 “‘Taufwile ukulaala no mwana mwanakashi wa mukashi obe.+ Taulingile ukulaala no mwishikulu uo umwana wakwe umwaume nelyo uo umwana wakwe umwanakashi afyala. Mulopa wa mukashi obe; ukucita ifi lishiku.

18 “‘Taufwile ukuupa nkashi nankwe ya mukashi obe pa kuti abe umukashi munankwe+ kabili taufwile ukulaala nankwe ilyo nkashi nankwe acili no mweo.

19 “‘Taufwile ukupalama ku mwanakashi uuli ku mweshi pa kuti ulaale nankwe.+

20 “‘Taufwile ukulaala no mukashi wa munobe,* pa kuti wiikowesha.+

21 “‘Wilatuula abana bobe kuli Moleke.+ Wilacita ifi pa kuti wilasaalula ishina lya kwa Lesa obe.+ Nine Yehova.

22 “‘Taufwile ukulaala no mwaume munobe nga filya ulaala no mwanakashi,+ pantu ca bunani.

23 “‘Umwaume tafwile ukulaala ne nama pantu kuti akowela; kabili umwanakashi tafwile ukulaala ne nama.+ Ukucita ifi te ca cifyalilwa.

24 “‘Mwilaikowesha kuli ifi fyonse, pantu e co ndetamfisha ne nko shonse ishi pa mulandu wa kuti shali-ikowesha.+ 25 E ico ici calo calikowela, kabili ndi no kukanda abekalamo pa membu shabo, kabili icalo cikabaluka.+ 26 Lelo imwe mulekonka amafunde yandi no bupingushi bwandi,+ kabili nampo nga mwina Israele nelyo nga mulebeshi uo mwikala nankwe,+ bonse tamulingile ukulacita ifi ifya bunani. 27 Pantu fyonse ifi ifya bunani e fyo abaleikala muli cino calo balecita,+ kabili nomba icalo calikowela. 28 Nga mwakulakonka amafunde yandi no bupingushi bwandi, icalo tacakamuluke nge fyo cikaluka inko ishaba muli ici icalo. 29 Onse uwacita cimo pali ifi ifya bunani, afwile ukwipaiwa. 30 Mulingile ukulasunga amafunde yandi pa kuti mwilakonka intambi sha bunani isho inko shalekonka ilyo tamulaisa,+ pantu kuti shamukowesha. Nine Yehova Lesa wenu.’”

19 Yehova aebele Mose no kuti: 2 “Eba ulukuta lonse ulwa bena Israele auti, ‘Muleba aba mushilo pantu ine ne Yehova Lesa wenu, ndi wa mushilo.+

3 “‘Umuntu onse alecindika* nyina na wishi,+ kabili mulesunga amasabata yandi.+ Nine Yehova Lesa wenu. 4 Mwilapepa balesa ba fye,+ kabili mwilapanga balesa bakwenga.+ Nine Yehova Lesa wenu.

5 “‘Nomba nga mwatuulila Yehova ilambo lya mutende,+ mukalituule mu musango wa kuti akalipokelele.+ 6 Mufwile ukulya ili ilambo pa bushiku mwalituula na pa bwakonkapo, lelo nga lyashalapo lyafika na pa bushiku bwalenga shitatu mulingile ukulyoca.+ 7 Nomba nga mwalya ilyafika pa bushiku bwalenga shitatu, ninshi mwalufyanya. Nshakalipokelele. 8 Uwalyako akaba no mulandu pantu ninshi nasaalula ica mushilo ca kwa Yehova, kabili uyo muntu* afwile ukwipaiwa.

9 “‘Ilyo mukalasombola ifilimwa ifya mu calo cenu, mwikalasombola fye fyonse kumo na mu mbali ya mabala yenu, kabili mwikalatolelesha fye tonse.*+ 10 Kabili mwikalalonganika imyangashi iikalashala mu mabala yenu, kabili mwikalatoola imyangashi iikalaponaila mu mabala yenu. Mukaleshiila abapiina*+ na balebeshi. Nine Yehova Lesa wenu.

11 “‘Mwilaiba,+ mwilabepa,+ kabili mwilacenjesha abanenu. 12 Mwilalapa ubufi mwi shina lyandi,+ pantu nga mwacita ifi ninshi mwasaalula ishina lya kwa Lesa wenu. Nine Yehova. 13 Mwilacenjesha abanenu,+ kabili mwilapokolola ifya bene.+ Mwilasunga amalipilo ya mubomfi ubushiku bonse ukufika ulucelo.+

14 “‘Mwilalapisha* nkomamatwi, kabili mwilabikila impofu ifya kuti iipununeko,+ lelo muletiina Lesa wenu.+ Nine Yehova.

15 “‘Mulepingula bwino imilandu. Mwilawila ku mupiina kabili mwilawila ku mukankaala.+ Muleba no mulinganya ilyo mulepingula umunenu.

16 “‘Wilapitana mu bantu bobe mu kucita ulwambo.+ Wilacita nangu cimo icingalenga umunobe afwa.+ Nine Yehova.

17 “‘Wilapata munonko mu mutima obe.+ Ulelungika umunobe+ pa kuti ulubembu lwakwe lwikukuma.

18 “‘Wilalandula+ kabili wilaenda ne cintu ku mukoshi pa fyo abantu bobe bakulufyanya, lelo uletemwa umunobe nge fyo waitemwa we mwine.+ Nine Yehova.

19 “‘Mulingile ukulakonka amafunde yandi: Mwilaleka ifitekwa fyenu ifya misango ibili filetamfyanya. Mwilatanda imbuto sha misango ibili mwi bala limo,+ kabili mwilafwala ica kufwala ica bushishi bwa misango ibili ubwatobenkana.+

20 “‘Nomba umwaume nga alaala no mwanakashi kabili uyo mwanakashi mubomfi uo shikulu wakwe afwaya ukuufya ku mwaume umbi, lelo talalubulwa nangu tabalamupeela ubuntungwa, bonse babili bafwile ukukandwa. Lelo tabafwile ukwipaiwa pantu ninshi uyo mubomfi talalubuka. 21 Umwaume alingile ukuleta umutuulo wakwe uwa pa mulandu kuli Yehova pa mwinshi we tenti lya kukumaninamo na Lesa. Akalete impaanga iilume iya mutuulo wa pa mulandu.+ 22 Shimapepo akatuule iyi impaanga pa cinso ca kwa Yehova pa kuti akamufutileko umulandu. Lyena ulubembu ulo acitile lukelelwa.

23 “‘Nga mwafika mu calo kabili mwalimba ifimuti fya kulyako ifitwalo, mukalemona ifitwalo fya fiko ukuti fyalikowela kabili tamufwile ukulafilya. Pa myaka itatu tamufwile ukulaikatako. Tamulingile ukulafilya. 24 Lelo mu mwaka walenga 4 ifitwalo fya iko fyonse fikaba ifya mushilo kabili iyi ikaba ni nshita ya kusekelela pa cinso ca kwa Yehova.+ 25 Lyena mu mwaka walenga 5 kuti mwalyako ifitwalo fya iko pa kuti fikabe pa fisabo fimbi ifyo mukasombola. Nine Yehova Lesa wenu.

26 “‘Tamufwile ukulya icintu nangu cimo umuli umulopa.+

“‘Mwilabuka, kabili mwilacita ifinjelengwe.+

27 “‘Mwilabeya* umushishi wa mu mbali ya mitwe yenu, kabili mwilabeya umwefu wenu pa mpela.+

28 “‘Mwilaitetaula pa mubili nga ca kuti umuntu* afwa,+ kabili mwilaikoma inembo pa mubili wenu. Nine Yehova.

29 “‘Mwilalenga abana benu abanakashi baleba bacilende+ pantu kuti mwabaseebanya. Nga baba bacilende abantu mu calo kuti balacita ubucende kabili kuti baba ne mibele yabipa.+

30 “‘Mulesunga amasabata yandi,+ kabili mulecindika* ne cifulo candi ica mushilo. Nine Yehova.

31 “‘Mwilaya ku bomfwana ne mipashi,+ kabili mwilaya ku basobela ifintu+ pantu kuti bamukowesha. Nine Yehova Lesa wenu.

32 “‘Pa wa mfwi uleima,+ kabili ulecindika umukote,+ kabili uletiina Lesa obe.+ Nine Yehova.

33 “‘Nga ca kuti umulebeshi aleikala na imwe mu calo cenu, mwilamucusha.+ 34 Umulebeshi uuleikala na imwe mulemumona ngo mwina Israele munenu;+ kabili mulemutemwa nge fyo mwaitemwa, pantu mwali abalebeshi mu calo ca Egupti.+ Nine Yehova Lesa wenu.

35 “‘Mwilaba na bucenjeshi ilyo mulepima ubutali bwa fintu, ukufina kwa fiko nelyo ilyo mulepima ifintu fimbi.+ 36 Mulebomfya ifipimo ifya cine, amabwe ya kupiminako ukufina aya cine, icipimo ca ngano* ica cine na galoni* ya cine.+ Nine Yehova Lesa wenu, uwamufumishe mu calo ca Egupti. 37 E ico mulekonka amafunde yandi yonse no bupingushi bwandi bonse, kabili mulecita ifi fine.+ Nine Yehova.’”

20 Kabili Yehova aebele Mose ati: 2 “Ufwile ukweba abena Israele auti, ‘Umwina Israele onse no mulebeshi onse uwikala mu Israele uwapeela Moleke umwana wakwe, mufwile ukumwipaya.+ Abantu ba mu calo bakamupoole amabwe mpaka akafwe. 3 Ine nkafulilwa uyo muntu kabili nkamwipaya, pantu ninshi napeela Moleke umwana wakwe kabili nakowesha icifulo candi ica mushilo+ no kusaalula ishina lyandi ilya mushilo. 4 Nga ca kuti umuntu apeela Moleke umwana wakwe, kabili abantu ba mu calo ku mufulo fye basuulako fye kabili bakaana no kumwipaya,+ 5 ine nkafulilwa uyo muntu no lupwa lwakwe.+ Nkamwipaya kabili nkepaya na bonse abo acita nabo bucilende na Moleke.

6 “‘Umuntu* uwakaana ukuba uwa cishinka kuli ine* pa mulandu wa kuti aya ku bomfwana ne mipashi+ na ku basobela ifintu,+ nkamufulilwa kabili nkamwipaya.+

7 “‘Muleisangulula kabili muleba aba mushilo,+ pantu nine Yehova Lesa wenu. 8 Mulesunga amafunde yandi kabili muleyakonka.+ Nine Yehova uulemusangulula.+

9 “‘Nga ca kuti umuntu atuka* wishi nelyo nyina, mufwile ukumwipaya.+ Apo natuka wishi nelyo nyina, umulopa wakwe ukaba pali ena.

10 “‘Nomba nga ca kuti umwaume acita ubucende no mukashi wa mwaume umbi, ifyo mufwile ukucita ni fi: Umwaume uwacita ubucende no mukashi wa munankwe mufwile ukumwipaya, kabili umwanakashi uo acitile nankwe ubucende+ na o wine mufwile ukumwipaya. 11 Umwaume uwalaala na muka wishi ninshi naseebanya wishi.*+ Bonse babili mufwile ukubepaya. Umulopa wabo ukaba pali bena. 12 Umwaume nga alaala no mukashi wa mwana wakwe, bonse babili mufwile ukubepaya. Nabacita icishili ca cifyalilwa. Umulopa wabo ukaba pali bena.+

13 “‘Nga ca kuti umwaume alaala no mwaume munankwe nga filya umwaume alaala no mwanakashi, bonse babili nabacita ica bunani.+ Mufwile ukubepaya. Umulopa wabo ukaba pali bena.

14 “‘Nga ca kuti umwaume uwaupa alaala na nyina wa mukashi wakwe, ninshi acita ice shiku.+ Bonse babili mukaboce,+ pa kuti abantu bekatwalilila ukucita ifye shiku.

15 “‘Nga ca kuti umwaume alaala ne nama, mufwile ukumwipaya, ne nama nayo mulingile ukuipaya.+ 16 Nga ca kuti umwanakashi aya ku nama pa kuti alaale nayo,+ uyo umwanakashi mulingile ukumwipaya, ne nama nayo mufwile ukuipaya. Umulopa wakwe ukaba pali ena, kabili umulopa wa nama ukaba pali yena.

17 “‘Umwaume nga alaala na nkashi yakwe, nampo nga afyalwa nankwe inda imo nelyo iyo, ca nsoni.+ Mulingile ukubepaila pa menso ya bantu bonse, pantu ninshi naseebanya* nkashi yakwe. Akafwila pa lubembu lwakwe.

18 “‘Umwaume nga alaala no mwanakashi uuli ku mweshi ninshi tacindike umulopa wa mwanakashi, umwanakashi na o ninshi tacindike umulopa wakwe.+ Bonse babili mufwile ukubepaya.

19 “‘Taufwile ukulaala na nkashi nankwe wa kwa noko nelyo nokosenge, pantu ninshi waseebanya lupwa lobe.+ Abacita ifi bakakandilwa pa membu shabo. 20 Umwaume uwalaala na muka nalume ninshi aseebanya* nalume.+ Bonse babili bakakandilwa pa lubembu lwabo, kabili bakafwa ukwabula abana. 21 Umwaume nga alaala na muka munyina, ninshi acita ica bunani.+ Naseebanya* munyina. Uyu mwaume na muka munyina bakafwa ukwabula abana.

22 “‘Mulesunga amafunde yandi yonse kabili mulekonka+ ubupingushi bwandi bonse,+ pa kuti icalo ico ndemutwalako cikamuluka.+ 23 Mwikalakonka amafunde ya nko isho nkatamfya;+ pantu bena balacita ifi fyonse kabili nalibapata.+ 24 E co namwebeele ukuti: “Mukapoka icalo cabo, kabili nkamupeela cikabe cenu. Muli ici icalo mwaliba umukaka no buci.+ Nine Yehova Lesa wenu, uwamupaatula ku nko shonse.”+ 25 Mulelekanya inama iyasanguluka ne yakowela, icuni icakowela ne casanguluka;+ mwilaleka inama nelyo icuni nangu conse icisenya panshi ico namweba ukuti calikowela, cilemukowesha.*+ 26 Muleba aba mushilo kuli ine, pantu ine ne Yehova ndi wa mushilo,+ kabili ndemupaatula ku nko shonse pa kuti mube abantu abandi.+

27 “‘Umwaume onse nelyo umwanakashi uumfwana ne mipashi nangu uusobela ifintu, mufwile ukumwipaya.+ Abantu bafwile ukumupoola amabwe mpaka afwa. Umulopa wakwe ukaba pali ena.’”

21 Yehova aebele Mose no kuti: “Eba bashimapepo, abana ba kwa Aarone auti, ‘Shimapepo talingile ukupalama ku muntu* uwafwa pantu kuti aikowesha.+ 2 Lelo lupwa wakwe ena kuti amupalama, e kutila nyina, wishi, umwana wakwe umwaume, umwana wakwe umwanakashi, ndume nankwe, 3 kabili kuti apalama* na kuli nkashi yakwe, nga ca kuti ali ni nacisungu. 4 Tafwile ukupalama ku citumbi ca kwa lupwa wakwe umwanakashi uwaupilwe pantu kuti aikowesha. 5 Tabalingile ukulabeya amapala+ nelyo ukubeya umwefu wabo mu mbali, kabili belaikoma inembo.+ 6 Bafwile baleba aba mushilo kuli Lesa wabo,+ kabili tabalingile ukulasaalula ishina lya kwa Lesa wabo,+ pantu e batuulila Yehova imituulo ya pa mulilo, umukate* wa kwa Lesa wabo, kabili bafwile ukuba aba mushilo.+ 7 Tabafwile ukuupa cilende,+ umwanakashi uo balya icisungu, nelyo umwanakashi uo baleka ku mulume wakwe,+ pantu Lesa amona shimapepo ukuti wa mushilo. 8 Mufwile ukulamumona ukuti wa mushilo+ pantu e utuula umukate kuli Lesa wenu. Mulemumona ukuti wa mushilo pantu ine ne Yehova neulenga mwaba aba mushilo, ndi wa mushilo.+

9 “‘Nomba umwana mwanakashi wa kwa shimapepo nga aba cilende ninshi aiseebanya kabili ninshi aseebanya na wishi. Mufwile ukumoca.+

10 “‘Shimapepo mukalamba pali bashimapepo* uo baitulwila amafuta ya kusubilako pa mutwe+ kabili uo bapeela insambu sha kufwala ifya kufwala fya bushimapepo,+ talingile ukulekelesha umushishi wakwe, kabili tafwile ukulepaula ifya kufwala fyakwe.+ 11 Talingile ukupalama ku muntu* uwafwa;+ nangu fye ni ku citumbi ca kwa wishi nelyo ica kwa nyina pantu ninshi aikowesha. 12 Elafuma pa cifulo ca mushilo kabili tafwile ukukowesha icifulo ca mushilo ica kwa Lesa wakwe,+ pantu icishibilo ca kuipeela, e kutila amafuta ya kusubilako aya kwa Lesa wakwe,+ cili pali ena. Nine Yehova.

13 “‘Afwile ukuupa umwanakashi nacisungu.+ 14 Talingile ukuupa mukamfwilwa, umwanakashi ou baleka, uo balya icisungu nangu cilende; lelo afwile ukuupa nacisungu uwa mu bantu bakwe. 15 Talingile ukukowesha abana bakwe+ pantu nine Yehova uulemusangulula.’”

16 Yehova aebele Mose no kuti: 17 “Eba Aarone auti, ‘Umwaume onse uwalemana uwatuntuka mu bana* bobe mu nkulo shabo shonse talingile ukulatuula umukate wa kwa Lesa wakwe. 18 Umwaume onse uwalemana elapalama ku ciipailo: uwapofula nangu uwalemana amolu nelyo uwalemana icinso* nangu uwaba no kulu kumo ukutali e lyo kumbi ukwipi, 19 umwaume uucenekwe ku lukasa nelyo ku kuboko, 20 uwa ng’ongo nangu uwatusa, nelyo uwalemana ilinso, nangu uuli ne fifulwime pa nkanda yakwe nelyo uuli ne fiseseya nangu uwaonaika ifya mfwalo.+ 21 Umwaume onse uwalemana uwatuntuka mu bana* ba kwa Aarone shimapepo, talingile ukutuulila Yehova imituulo ya pa mulilo. Apo alilemana, tafwile ukutuula umukate wa kwa Lesa wakwe. 22 Kuti alya umukate wa kwa Lesa wakwe uwa pa fya mushilo nga nshi+ e lyo na pa fya mushilo.+ 23 Lelo tafwile ukupalama ku nsalu iyacinga+ Umuputule wa Mushilo Nga Nshi, kabili tafwile ukupalama ku ciipailo+ pantu alilemana; kabili talingile ukukowesha icifulo candi ica mushilo+ pantu nine Yehova uulebasangulula.’”+

24 E ico Mose aile-eba Aarone na bana bakwe e lyo na bena Israele bonse.

22 Kabili Yehova aebele Mose ati: 2 “Eba Aarone na bana bakwe ukuti bafwile ukuba abacenjela ilyo baleikata* ifya mushilo ifyo abena Israele balempaatwila+ pa kuti belasaalula ishina lyandi ilya mushilo.+ Nine Yehova. 3 Ubebe auti, ‘Mu nkulo shenu shonse onse uukatuntuka muli imwe uukapalama ku fya mushilo ifyo abena Israele bakapaatwila Yehova, ilyo ali uwakowela, uyo muntu* akepaiwe pa kuti ekeminina pa cinso candi na kabili.+ Nine Yehova. 4 Umwaume onse uwatuntuka mu bana ba kwa Aarone uwalwala ifibashi+ nangu uuletonya fimo ku fya mfwalo+ tafwile ukulyako ifya mushilo mpaka asanguluka,+ nangu mwaume uwaikata umuntu uwaikowesha pa mulandu wa kwikata umuntu* uwafwa,+ nangu umuntu uulefumya amenshi ya bwaume,+ 5 nangu uwaikata icisenya+ conse icakowela nelyo uwaikata umuntu uwakowela.+ 6 Umuntu* uwaikata cimo pali ifi akaba uwakowela ukufika icungulo kabili tafwile ukulyako ifya mushilo fyonse, lelo afwile ukusamba umubili onse.+ 7 Ilyo akasuba kawa, e lyo akasanguluka, na pa numa kuti alyako fimo pa fya mushilo pantu fya kulya fyakwe.+ 8 Kabili talingile ukulya inama yonse iyaifwila nelyo inama iyo baipaya ku nama mpanga pantu kuti akowela.+ Nine Yehova.

9 “‘Bafwile ukulakonka ifyo nandile, pa kuti bekabembuka pa mulandu wa kukaanakonka ifyo nandile no kufwilapo pa mulandu wa kusaalula ifya mushilo. Nine Yehova uulebasangulula.

10 “‘Uushili wa mu lupwa lwa kwa Aarone tafwile ukulyako ifya mushilo fyonse.+ Uwa ku calo cimbi uwikala na shimapepo nangu umubomfi talingile ukulyako ifya mushilo fyonse. 11 Lelo shimapepo nga alishita umuntu* mu ndalama shakwe, uyo muntu kuti alyako. Abasha abafyalilwa mu ng’anda yakwe nabo kuti balyako ifya kulya fyakwe.+ 12 Umwana mwanakashi wa kwa shimapepo nga aupwa ku mwaume uushili shimapepo,* talingile ukulyako umusangulo wa mushilo. 13 Lelo umwana mwanakashi wa kwa shimapepo nga aba mukamfwilwa nelyo bamuleka ninshi talakwatapo umwana, kabili abwelela ku ng’anda ya kwa wishi nga filya cali ilyo ali umukashana, kuti alyako ifya kulya fya kwa wishi;+ lelo uushili wa mu lupwa lwa kwa Aarone ena tafwile ukulyako.

14 “‘Nomba umuntu nga alyako ica mushilo mu kukanaishiba, alingile ukulundapo cimo pali cila mutengo wa fili 5 uwa ifi ifya mushilo, kabili afwile ukupeela ici ica mushilo kuli shimapepo.+ 15 E ico bashimapepo tabafwile ukulasaalula ifya mushilo ifyo abena Israele basangwila Yehova+ 16 pa kuti tabalengele abantu bakandwa pa lubembu lwabo ulwa kulya ifya mushilo; pantu nine Yehova uulebasangulula.’”

17 Yehova na kabili aebele Mose ati: 18 “Eba Aarone na bana bakwe na bena Israele auti, ‘Nga ca kuti umwina Israele nangu umulebeshi wa mu Israele atuulila Yehova umutuulo wa koca+ pa kuti afikilishe umulapo, nelyo pa kuti ube umutuulo wa kuitemenwa,+ 19 alingile ukutuula ing’ombe iilume iyabula akalema,+ utwana twa mpaanga utulume nangu imbushi pa kuti Lesa apokelele umutuulo wakwe. 20 Tamufwile ukutuula inama iili na kalema,+ pantu Lesa takaipokelele.

21 “‘Umuntu nga aleta ing’ombe nelyo impaanga nangu imbushi pa kuti ibe ilambo lya mutende+ kuli Yehova ilya kufikilisha umulapo nelyo ilya mutuulo wa kuitemenwa, ifwile ukuba iyabula akalema pa kuti Lesa aipokelele. Inama aleta taifwile ukuba na kalema nangu panono. 22 Inama ya kuleta kuli Yehova tailingile ukuba iyapofula, iyafunika, iyacenwa, iya nsundu, iya filonda nelyo iya fiseseya. Mwilatuulila Yehova inama sha musango uyu pa ciipailo. 23 Kuti mwaleta ing’ombe iilume nelyo impaanga iyalepapo icilundwa cimo nelyo iyaipipapo icilundwa cimo pa kuti ibe umutuulo wa kuitemenwa, lelo Lesa takaipokelele nga mwaituula pa kuti ibe umutuulo wa mulapo. 24 Tamufwile ukulatuulila Yehova inama iyo batoba intoyo* nelyo iyo batina intoyo nangu iyo batiinta intoyo nelyo iyo baputula intoyo, kabili mwilatuula inama sha musango uyu mu calo cenu. 25 Umulebeshi nga aleta inama ya musango uyu, mwilaituula pa kuti ibe umutuulo wa kwa Lesa wenu, pantu ninshi iyi inama yaliba na kalema. Lesa takaipokelele.’”

26 Yehova aebele Mose no kuti: 27 “Ing’ombe iilume nelyo impaanga nelyo imbushi nga yafyalwa, ikabe na nyina pa nshiku 7,+ lelo ukutendekela pa bushiku bwalenga 8 kuti mwaituula kuli Yehova umutuulo wa pa mulilo kabili kuti aipokelela. 28 Lelo tamufwile ukwipaya ing’ombe iilume nelyo impaanga no mwana wa iko pa bushiku bumo bwine.+

29 “Nga mwatuulila Yehova ilambo lya kutootela,+ mulingile ukulalituula mu musango wa kuti alipokelele. 30 Mufwile ukulilya pa bushiku mwalituula. Tamulingile ukushapo nangu cimo ukufika ulucelo.+ Nine Yehova.

31 “Mufwile ukulasunga amafunde yandi no kulayakonka.+ Nine Yehova. 32 Tamulingile ukusaalula ishina lyandi ilya mushilo,+ kabili abena Israele+ balingile ukulamona ukuti ndi wa mushilo. Nine Yehova uulemusangulula,+ 33 uulemufumya mu calo ca Egupti pa kuti imulange ukuti nine Lesa wenu.+ Nine Yehova.”

23 Yehova aebele Mose no kuti: 2 “Eba abena Israele auti, ‘Inshita ya mitebeto+ ya kwa Yehova iyo mufwile ukulabilisha,+ ni nshita ya kulongana kwa mushilo. Mukalekwata iyi mitebeto pali ishi nshita:

3 “‘Mu nshiku 6 kuti mwabombamo imilimo, lelo ubushiku bwalenga 7 lisabata lya kutuushamo+ ku milimo yonse. Bushiku bwa kulongana kwa mushilo. Tamufwile ukubomba umulimo nangu umo pali ubu bushiku. Lisabata lya kwa Yehova konse uko mukekala.+

4 “‘Iyi e nshita ya mitebeto ya kwa Yehova, iya kulongana kwa mushilo iyo mufwile ukubilisha ilyo inshita ya kulongana yafika: 5 Mu mweshi wa ntanshi, pa bushiku bwalenga 14 ubwa mweshi,+ ilyo fye akasuba kawa,* e lyo kukalaba Icakucilila+ ca kwa Yehova.

6 “‘Pa bushiku bwalenga 15 ubwa uyu wine mweshi e lyo kukalaba umutebeto wa kwa Yehova,+ Umutebeto wa Mukate Ushatutumuka. Pa nshiku 7 mukalelya umukate ushatutumuka.+ 7 Pa bushiku bwa kubalilapo epo mukalelongana ukulongana kwa mushilo.+ Tamufwile ukubombapo umulimo uwakosa. 8 Lelo mukaletuulila Yehova umutuulo wa pa mulilo pa nshiku 7. Pa bushiku bwalenga 7 mukalelongana ukulongana kwa mushilo. Tekwesha ukubombapo umulimo uwakosa.’”

9 Yehova akonkenyepo ukweba Mose ati: 10 “Eba abena Israele auti, ‘Ilyo mukengila mu calo ico ndemupeela, nga mwasombola ifilimwa, mukaletwala umwanshi* wa fyo mwabalilapo ukusombola+ kuli shimapepo.+ 11 Na o akalesunsha umwanshi uku no ku, pa cinso ca kwa Yehova pa kuti mukalepokelelwa. Pa bushiku ubwakonkapo pa numa ye sabata e lyo shimapepo akaleusunsha. 12 Pa bushiku mukalasunsha umwanshi, mukaletuula akana ka mpaanga akabula akalema kabili aka mwaka umo, pa kuti kakaleba umutuulo wa kwa Yehova uwa koca. 13 Umutuulo wa ngano ukabe ama oma yabili* aya buunga bwapeleka ubwasakanamo amafuta, pa kuti ukabe umutuulo wa kwa Yehova uwa pa mulilo, uwa kuleta akacena akasuma.* Umutuulo wa mwangashi ukabe amakapu yatatu aya hini.* 14 Mwikalalya ingano shasalulwa, ingano ishipya nelyo umukate uo bapangila ne ngano ishipya mpaka ubu bushiku bukafike, mpaka mukalete umutuulo wa kwa Lesa wenu. Ifi e fyo mukalekonka mu nkulo shenu shonse konse uko mukalaikala.

15 “‘Mukalependa amasabata 7 ukutula pa bushiku ubwakonka pe Sabata, ukutendekela pa bushiku ubo mwaletele umwanshi wa mutuulo wa kusunsha.+ Mukalependa imilungu iituntulu. 16 Mukapende inshiku 50,+ ukufika pa bushiku ubwakonka pe Sabata lyalenga 7, e lyo mukatuulile Yehova umutuulo wa ngano ishipya.+ 17 Mufwile ukuleta imikate ibili iya mutuulo wa kusunsha ukufuma uko mukalaikala. Mukaipangile no buunga ubwapeleka ubwa mu ma oma yabili.* Mulingile ukubikamo icitutumushi.+ Iyi ikaba mikate ya fisabo fyabalilapo ukupya ifya kwa Yehova.+ 18 Kabili mufwile ukuleta iyi imikate pamo no twana twa mpaanga utulume utuli 7 kabili utwabula akalema, utwa mwaka umo, ne ng’ombe iilume iyana ne mpaanga ishilume shibili.+ Fikaba mutuulo wa kwa Yehova uwa koca pamo no mutuulo wa ngano no mutuulo wa mwangashi pa kuti ukabe umutuulo wa pa mulilo, uwa kuletela Yehova akacena akasuma.* 19 Kabili mulingile ukutuula akana ka mbushi kamo pa kuti kakabe umutuulo wa pa lubembu+ no twana twa mpaanga tubili utulume, utwa mwaka umo, pa kuti tukabe ilambo lya mutende.+ 20 Shimapepo akafisunshe uku no ku pamo ne mikate ya fisabo fyabalilapo ukupya. Fikaba mutuulo wa kusunsha pa cinso ca kwa Yehova, pamo no twana twa mpaanga tubili utulume. Yehova akalafimona ukuti fya mushilo kabili fifwile ukuba fya kwa shimapepo.+ 21 Pali ubu bushiku mukabilishe+ ukuti kukaba ukulongana kwa mushilo. Tamufwile ukubombapo umulimo uwakosa. Ifi e fyo mukalekonka mu nkulo shenu shonse konse uko mukalaikala.

22 “‘Ilyo mukalasombola ifisabo mu calo cenu, mwikalasombola ukufika na mu mbali ya mabala yenu, kabili mwikalatolelesha fyonse.+ Mukaleshamo fimo pa kuti fikaleba fya bapiina*+ na bafuma ku fyalo fimbi.+ Nine Yehova Lesa wenu.’”

23 Yehova aebele Mose no kuti: 24 “Eba abena Israele auti, ‘Mu mweshi walenga 7, pa bushiku bwa kubalilapo ubwa uyo mweshi, mulingile ukulatuusha kuli fyonse. Ubu ubushiku bukalatendekela no kulila kwe penga,+ pa kuti mukaleibukisha ukuti bushiku bwa kulongana kwa mushilo. 25 Tamufwile ukubomba umulimo onse uwakosa, kabili mukaleletela Yehova umutuulo wa pa mulilo.’”

26 Kabili Yehova aebele Mose ati: 27 “Lelo ubushiku bwalenga 10 muli uyu wine mweshi walenga 7, Bushiku bwa Cifuta Mulandu.+ Mukalelongana ukulongana kwa mushilo, kabili mukalepusula imyeo yenu*+ no kutuulila Yehova umutuulo wa pa mulilo. 28 Tamulingile ukubomba umulimo nangu umo muli ubu bushiku, pantu bushiku bwa kumufutilako imembu+ shenu pa cinso ca kwa Yehova Lesa wenu. 29 Umuntu* onse uushakaipusule pali ubu bushiku akepaiwa.+ 30 Kabili umuntu* onse uukabomba umulimo pali ubu bushiku, nkamwipaya. 31 Tamufwile ukubomba umulimo nangu umo pali ubu bushiku. Ifi e fyo mukalekonka mu nkulo shenu shonse konse uko mukalaikala. 32 Mukaletuusha kuli fyonse pantu lisabata kabili mukalepusula imyeo yenu+ icungulo pa bushiku bwalenga 9 ubwa uyu mweshi. Mukalesunga isabata ukutula icungulo ukufika icungulo cimbi.”

33 Yehova aebele Mose no kuti: 34 “Eba abena Israele auti, ‘Pa bushiku bwalenga 15 muli uyu mweshi walenga 7, kukalaba Umutebeto wa Nsakwe uwa kwa Yehova+ pa nshiku 7. 35 Pa bushiku bwa ntanshi mukalelongana ukulongana kwa mushilo. Tamufwile ukulabomba umulimo onse uwakosa muli ubu bushiku. 36 Pa nshiku 7 mukaletuulila Yehova umutuulo wa pa mulilo. Pa bushiku bwalenga 8 mukalelongana ukulongana kwa mushilo,+ kabili mukaletuulila Yehova umutuulo wa pa mulilo. Uku, kulongana kwacindamisha. Tamulingile ukubomba umulimo uwakosa nangu umo.

37 “‘Iyi e mitebeto ya kwa Yehova iyo mukalakwata mu mwaka,+ iyo mukalabilisha ukuti kulongana kwa mushilo+ pa kuti mukaletuulila Yehova umutuulo wa pa mulilo: umutuulo wa koca+ no mutuulo wa ngano+ uo mufwile ukulatuulila pamo ne lambo lya nama ne mituulo ya mwangashi+ ukulingana ne fyo mulingile ukulatuula cila bushiku. 38 Iyi mitebeto ya kulunda pa fyo mutuula pa masabata ya kwa Yehova,+ pa fya bupe fyenu,+ pa milapo yenu+ na pa mituulo yenu yonse iya kuitemenwa,+ iyo mufwile ukupeela Yehova. 39 Lelo pa bushiku bwalenga 15 mu mweshi walenga 7, ilyo mwapwisha ukusombola ifisabo fya mu calo, mufwile ukusefya umutebeto wa kwa Yehova pa nshiku 7.+ Pa bushiku bwa ntanshi mukaletuusha kuli fyonse, na pa bushiku bwalenga 8 napo mukaletuusha kuli fyonse.+ 40 Pa bushiku bwa ntanshi mukasabe ifitwalo ku fimuti ifyawamisha, mukateme imisambo ya tuncindu,+ imisambo ya fimuti ifyafumba no muarabimu wa mu mikonko, kabili mukasekelele+ pa cinso ca kwa Yehova Lesa wenu pa nshiku 7.+ 41 Mukalesefya umutebeto wa kwa Yehova pa nshiku 7 cila mwaka.+ Ifi e fyo mukalecita mu nkulo shenu shonse. Mukalesefya mu mweshi walenga 7. 42 Mukaleikala mu nsakwe pa nshiku 7.+ Abekala calo bonse aba mu Israele bakaleikala mu nsakwe, 43 pa kuti aba mu nkulo shenu ishikakonkapo bakeshibe+ ukuti nalengele abena Israele baikala mu nsakwe ilyo nabafumishe mu calo ca Egupti.+ Nine Yehova Lesa wenu.’”

44 E ico Mose aebele abena Israele pa nshita balingile ukukwatilapo imitebeto ya kwa Yehova.

24 Kabili Yehova aebele Mose ati: 2 “Eba abena Israele ukuti bakuletele amafuta ya muolife ayasuma nga nshi, aya kusanikila pa kuti inyali shileaka lyonse.+ 3 Kunse ya nsalu ya kucingilako icipao ca Cipangano, mwi tenti lya kukumaninamo na Lesa, e mo Aarone aleteyanya inyali pa kuti shileaka lyonse ukutula icungulo ukufika ulucelo pa cinso ca kwa Yehova. Ifi e fyo mulecita mu nkulo shenu shonse. 4 Lyonse akaleteyanya inyali pa ca kutekapo inyali+ ica golde iyalopololwa, pa cinso ca kwa Yehova.

5 “Ukalebuula ubuunga ubwapeleka kabili ukalepangamo imikate 12. Mu buunga bwa mu ma oma yabili,* mukalepangamo umukate umo. 6 Ukapampikanye imikate mu miina ibili pe tebulo lya golde iyalopololwa pa cinso ca kwa Yehova.+ Pa mwina umo,+ pakabe imikate 6 na pa mwina umbi imikate 6. 7 Ulingile ukubika ububani bwabuuta ubusuma nga nshi pa muulu wa mwina umo na umo, pa kuti bukabe ngo mukate wa kwimininako umutuulo onse,*+ umutuulo wa kwa Yehova uwa pa mulilo. 8 Lyonse pe Sabata akaleteyanya umukate pa cinso ca kwa Yehova.+ Ici cipangano ca muyayaya ico napangana na bena Israele. 9 Umukate ukabe wa kwa Aarone na bana bakwe abaume,+ kabili bakaleuliila pa cifulo ca mushilo.+ Pantu uyu, mutulo wa mushilo nga nshi uwa kwa shimapepo uwa pa mituulo ya kwa Yehova iya pa mulilo. Ili lifunde lya muyayaya.”

10 Nomba kwali umwana mwaume uo nyina ali mwina Israele, lelo wishi ali mwina Egupti.+ Uyu mwana atampile ukulwa no mwaume umwina Israele mu nkambi. 11 Umwana mwaume uo nyina ali mwina Israele aponteele Ishina lya kwa Lesa* kabili alilisaalwile.*+ E ico bamutwele kuli Mose.+ Ishina lya kwa nyina ali ni Shelomiti, umwana mwanakashi wa kwa Dibri uwa mu mukowa wa kwa Dani. 12 Balimulindike mpaka Yehova abeba ifya kucita.+

13 Lyena Yehova aebele Mose ati: 14 “Fumisha uwasaalwile ishina lyandi kunse ya nkambi, kabili bonse abamumfwile bafwile ukubika iminwe yabo pa mutwe wakwe, kabili ulukuta lonse lufwile ukumupoola amabwe.+ 15 Kabili webe abena Israele auti, ‘Umuntu onse uwasaalula Lesa, akafwila pa lubembu lwakwe. 16 E ico uwasaalula ishina lya kuti Yehova afwile ukwipaiwa.+ Ulukuta lonse lukamupoole amabwe. Uwasaalula ishina lya kwa Lesa nampo nga mulebeshi nelyo mwina Israele, afwile ukwipaiwa.

17 “‘Umuntu nga aipaya umuntu munankwe,* na o wine bafwile ukumwipaya.+ 18 Onse uwaipaya icitekwa* akapyanikishepo cimbi, icitekwa pa citekwa.* 19 Umuntu nga acena umuntu munankwe, na o wine bafwile ukumucena.+ 20 Ukufuna pa kufuna, ilinso pa linso, ilino pa lino, ifyo acenene umunankwe e fyo na o bafwile ukumucena.+ 21 Uwaipaya icitekwa akapyanikishepo cimbi,+ lelo uwaipaya umuntu, akepaiwe.+

22 “‘Ubupingushi bukalaba fye bumo bwine. Umulebeshi no mwina Israele+ mukalebapingula fye cimo cine, pantu nine Yehova Lesa wenu.’”

23 Lyena Mose aebele abena Israele ukuti bafumishe uwasaalwile ishina lya kwa Lesa kunse ya nkambi, kabili balimupoolele amabwe.+ E ico abena Israele bacitile filya fine fye Yehova aebele Mose.

25 Yehova na kabili aebele Mose pa Lupili lwa Sinai ati: 2 “Eba abena Israele auti, ‘Ilyo mukafika mu calo ico nkamupeela, mukalekonka ifunde lya kwa Yehova ilya kusunga isabata+ kabili mukaleleka impanga ikaletuusha.+ 3 Mu myaka 6 mukalebyala imbuto mu mabala yenu, kabili muli iyi yine myaka mukaletungwila imyangashi ya mu mabala yenu, kabili mukalesombola ifisabo fya mu calo.+ 4 Lelo umwaka walenga 7 ufwile ukuba isabata pa kuti umushili ukaletuusha, lisabata lya kwa Yehova. Mwikalabyala imbuto mu mabala yenu, kabili mwikalatungwila imyangashi. 5 Tamufwile ukusombola ifikalamena ku fikalashala ilyo mukalasombola, kabili mwikalasombola imyangashi ku fimuti ifyo mushatungwila. Muli uyu mwaka mukaleleka umushili ukaletuusha. 6 Lelo ifikalaimenena fye ifiine mu mwaka we sabata mukalelya; imwe na basha benu abaume na banakashi, ababomfi benu na balebeshi abo mwikala nabo, 7 ifitekwa fyenu ne nama sha mpanga ishikaba mu calo cenu. Fyonse ifyo umushili ukalamesha kuti mwalya.

8 “‘Mukapende amasabata 7 aya myaka, imyaka 7 ukuifusha imiku 7, kabili amasabata 7 aya myaka yakaba imyaka 49. 9 Lyena mukalishe sana intandala mu mweshi walenga 7, pa bushiku bwalenga 10; pa Bushiku bwa Cifuta Mulandu.+ Mukalelisha sana intandala pa kuti ikaleumfwika mu calo cenu conse. 10 Umwaka walenga 50 mwaka wa mushilo, kabili mukalebilisha ku baikala mu calo conse+ ukuti uyu mwaka wa kulubuka. Ukaba mwaka wa Buntungwa kuli imwe, kabili umuntu onse akabwelele ku mpanga yakwe kabili umuntu onse akabwelele ku lupwa lwakwe.+ 11 Umwaka walenga 50 ukalaba mwaka wa Buntungwa. Tamwakalebyala imbuto nelyo ukusombola ifikalamena ku fikalashala ilyo mukalasombola, kabili tamwakalesombola imyangashi ku fimuti ifyo mushatungwila.+ 12 Pantu mwaka wa Buntungwa. Mukaleumona ukuti mwaka wa mushilo. Mukalelya fye ifikalaimenena+ mu mabala.

13 “‘Muli uyu mwaka wa Buntungwa, cila muntu akalebwelela ku mpanga yakwe.+ 14 Nga mwashitisha umunenu fimo nelyo nga mwashita fimo ku munenu, tamufwile ukuba no bucenjeshi.+ 15 Mufwile ukushita icintu ku munenu ukulingana ne myaka ipitilepo ukutula apo kwabelele umwaka wa Buntungwa; kabili uuleshitisha na o afwile ukushitisha ukulingana ne myaka isheleko pa kuti kube umwaka wa Buntungwa.+ 16 Imyaka iisheleko nga ingi kuti alundako umutengo, kabili imyaka iisheleko nga iinono, kuti abweshako umutengo, pantu ninshi alekushitisha ifisabo ifyo ukasombola mu myaka iisheleko. 17 Mwilacenjeshanya,+ lelo muletiina Lesa wenu,+ pantu nine Yehova Lesa wenu.+ 18 Nga mulekonka amafunde yandi no bupingushi bwandi, mukalaikala umutelelwe mu calo.+ 19 Mu calo mukalaba ifisabo,+ kabili mukalalya no kwikuta kabili mukalaikala umutende.+

20 “‘Lelo nga mwatila: “Bushe tukalalya finshi mu mwaka walenga 7 apo tatwakalebyala imbuto no kusombola ifisabo?”+ 21 Nkamupaala mu mwaka walenga 6, ica kuti mu calo mukaba ifisabo ifyo mwingalya pa myaka itatu.+ 22 Lyena mukalebyala imbuto mu mwaka walenga 8, kabili mukalelya ifisabo fya kale mpaka mu mwaka walenga 9. Mukalelya ifya kale mpaka ifisabo fya mwaka walenga 9 fikapye.

23 “‘Tamufwile ukushitisha impanga ica kuti uwaishita yaba yakwe umuyayaya,+ pantu ni mpanga yandi.+ Pantu ine imumona ukuti muli balebeshi.+ 24 Konse uko mukekala, uwashitisha impanga akakwata insambu sha kwisaishita pa kuti ikabe yakwe na kabili.

25 “‘Umwina Israele munenu nga aba umupiina kabili ashitishako impanga yakwe imo, lupwa wakwe afwile ukushita iyo mpanga pa kuti ikabwelele ku mwine uwaishitishe.+ 26 Umuntu nga takwete uwa kumulubwilako impanga, lelo akwata indalama ishingalinga ukushita iyo mpanga, 27 akabike umutengo wa mpanga ukulingana ne myaka iyapitapo ukutula apo aishitishishe kabili akabweseshe uo ashitishe impanga ukulingana ne myaka iisheleko pa kuti umwaka wa Buntungwa ufike. Lyena kuti abwelela ku mpanga yakwe.+

28 “‘Lelo nga takwete indalama ishingalinga ukulubwilamo impanga yakwe, ninshi uwaishitile e ukatwalilila ukuba umwine wa iyo mpanga mpaka umwaka wa Buntungwa+ ukafike. Muli uyu mwaka e lyo impanga ikaba yakwe na kabili, lyena kuti abwelela ku mpanga yakwe.+

29 “‘Nomba umuntu nga ashitisha ing’anda iyaba mu musumba we linga, akaba ne nsambu sha kulubula iyo ing’anda ukutula pa bushiku akaishitishishapo ukufika apo umwaka ukapwila. Akaba fye ne nsambu sha kulubula+ iyo ng’anda pa mwaka umo. 30 Lelo nga ca kuti umwaka umo wapwa tailubwile, ing’anda ya mu musumba we linga ikaba ya muntu uwaishitile mu nkulo shakwe shonse. Umwaka wa Buntungwa nga wafika tafwile ukumubwesesha. 31 Lelo amayanda ya mu mishi iyabula amalinga yakaba fye kwati mabala ya mu calo. Umwine wa ng’anda akatwalilila ukuba ne nsambu sha kulubula ing’anda yakwe, kabili mu mwaka wa Buntungwa uwaishitile akabwesesha uo ashitileko.

32 “‘Lelo abena Lebi bakatwalilila ukuba ne nsambu sha kulubula amayanda yabo ayaba mu misumba yabo.+ 33 Nga ca kuti ing’anda ya bena Lebi tabailubwile, ing’anda iyo bashitisha mu musumba wabo ikabwelela kuli bena mu mwaka wa Buntungwa,+ pantu amayanda ya mu misumba ya bena Lebi, eyo Lesa abapeela mu bena Israele.+ 34 Kabili impanga ya mulemfwe+ iyaba mupepi ne misumba yabo tabalingile ukuishitisha, pantu eyo Lesa abapeela umuyayaya.

35 “‘Nga ca kuti umwina Israele munenu uo mwikala nankwe aba umupiina kabili takwete apakuuma ukuboko, mukamwafwe+ nga filya fine mwingafwa umulebeshi.+ 36 Tamufwile ukumukongwesha kaloba.+ Muletiina Lesa wenu,+ lyena umwina Israele munenu akatwalilila ukuba no mweo pamo na imwe. 37 Mwikamukongwesha indalama pa kuti akalundepo shimbi pa kumubwesesha,+ kabili mwikamupeela ifya kulya pa kuti akalundepo pa kumubwesesha. 38 Nine Yehova Lesa wenu, uwamufumishe mu calo ca Egupti+ pa kuti nkamupeele icalo ca Kanaani, kabili nkamulange ukuti nine Lesa wenu.+

39 “‘Umwina Israele munenu uwikala mupepi na imwe nga aba umupiina kabili aishitisha kuli imwe,+ tamufwile ukulamubomfya kwati musha.+ 40 Mukalemumona ngo mubomfi uubombela amalipilo,+ ngo mulebeshi. Akamubombele mpaka umwaka wa Buntungwa ukafike. 41 Lyena akaleka ukumubombela, ena na bana bakwe,* bakabwelela ku lupwa lwabo. Balingile ukubwelela ku mpanga ya fikolwe fyabo.+ 42 Pantu bena basha bandi abo nafumishe mu calo ca Egupti.+ Tabafwile ukuishitisha nge fyo bashitisha umusha. 43 Mwikalamusunga buluku buluku,+ kabili mufwile ukulatiina Lesa wenu.+ 44 Abafwile ukuba abasha benu abaume na banakashi bantu mukalashita ku nko ishikaba mupepi na imwe. 45 Na kumbi uko mwingashita abasha ni ku balebeshi abo mwikala nabo+ na ku ndupwa shabo ishafyalilwa mu calo cenu, kabili bakaba abasha benu. 46 Nga mwafwa kuti batwalilila ukuba abasha ba bana benu. Aba kuti baba abasha benu, lelo umwina Israele munenu tamufwile ukulamusunga buluku buluku.+

47 “‘Lelo nga ca kuti umulebeshi nelyo uwafuma ku calo cimbi uo mwikala nankwe aba umukankaala, kabili umwina Israele munenu uo ekala nankwe aba umupiina kabili aishitisha ku mulebeshi nelyo ku wafuma ku calo cimbi uo mwikala nankwe mu calo, nangu aishitisha kuli lupwa wa mulebeshi, 48 akatwalilila ukuba ne nsambu sha kulubuka pa numa ya kuishitisha. Umo pali bamunyina kuti amulubula,+ 49 nangu wishi mukalamba nelyo wishi mwaice nangu ndume nankwe uwa muli wishi mukalamba nelyo muli wishi mwaice kuti amulubula, nangu lupwa wakwe umbi kuti amulubula.

“‘Nangu nga ca kuti umwine anonka, kuti ailubula.+ 50 Ena no wamushita bafwile ukupenda imyaka yapitapo ukutula apo aishitishishe kuli ena ukufika ilyo umwaka wa Buntungwa+ ukafika, kabili indalama isho aishitishishepo shifwile ukulingana ne mpendwa ya iyi myaka.+ Bakapende inshiku isho ali no kubomba nge fyo bapenda inshiku sha mubomfi uubombela amalipilo.+ 51 Nga kucili imyaka iingi, ninshi alingile ukulipila indalama sha kuilubwilapo ukulingana ne myaka iisheleko. 52 Lelo nga kushele fye imyaka iinono pa kuti umwaka wa Buntungwa ufike, akapende umwine, kabili akalipile isha kuilubwilapo ukulingana ne myaka iisheleko. 53 Akalemubombela cila mwaka nga filya fine umubomfi uubombela amalipilo abomba. Mufwile ukushininkisha ukuti talemusunga buluku buluku.+ 54 Nomba nga te kuti ailubule muli ishi inshila, ninshi akalubuka mu mwaka wa Buntungwa,+ pamo na bana bakwe.*

55 “‘Pantu abena Israele basha bandi. Basha bandi abo nafumishe mu calo ca Egupti.+ Nine Yehova Lesa wenu.

26 “‘Tamulingile ukuipangila tulesa twa fye,+ kabili tamufwile ukuipangila icimpashanya+ nangu ukuimikila amabwe aya kupepa, kabili mu calo cenu tamulingile ukuba ilibwe ilyo mwalengapo fimo+ pa kuti mulelikontamina;+ pantu nine Yehova Lesa wenu. 2 Mukalesunga amasabata yandi, kabili mukalecindika* icifulo candi ica mushilo. Nine Yehova.

3 “‘Nga mwakulacita ifyo nakulamweba kabili nga mwakulakonka amafunde yandi,+ 4 nkalamupeela imfula pa nshita ya iko,+ kabili mu calo mukalaba ifisabo,+ ifimuti fya mu mabala yenu na fyo fikalatwala ifitwalo. 5 Mukalakwata inshita ya kusombola ingano iikalamba ica kuti ikalafika na ku nshita ya kusombola imyangashi, kabili inshita ya kusombola imyangashi ikalafika na ku nshita ya kubyala imbuto shimbi. Mukalalya ifya kulya fyenu kabili mukalaikuta, kabili mukalaikala umutelelwe mu calo cenu.+ 6 Nkalenga mu calo mukabe umutende,+ kabili mukalasendama ukwabula uwa kumutiinya.+ Nkalenga ne fiswango fya mu mpanga fikapwe mu calo, kabili ulupanga talwakapite mu calo cenu. 7 Mukafulumuna abalwani benu, kabili mukabacimfisha ku lupanga. 8 Abantu benu 5 bakafulumuna abantu 100, na bantu benu 100 bakafulumuna abantu 10,000, kabili abalwani benu mukabacimfisha ku lupanga.+

9 “‘Nkamupaala,* nkalenga mukakwate na bana abengi kabili nkalenga mukafule.+ Nkasunga ne cipangano ico napangana na imwe.+ 10 Ilyo mushilapwisha ukulya ifya kulya fya mwaka wafumineko, mukalafumya ifya kale mu matala yenu pa kuti mukalekwata incende ya kubikapo ifipya. 11 Kabili nkabika itenti lyandi ilya mushilo mu kati kenu,+ kabili nshakamupate.* 12 Nkaba na imwe kabili nkaba Lesa wenu,+ kabili na imwe mukaba abantu bandi.+ 13 Nine Yehova Lesa wenu, uwamufumishe mu calo ca Egupti pa kuti muleke ukuba abasha ba bena Egupti, kabili naliputwile ikoli lyenu ilya busha pa kuti mulubuke.*

14 “‘Lelo nga tamwakaleng’umfwila, nangu nga tamwakalekonka amafunde yonse+ aya, 15 kabili nga tamwakalecita ifyo nakulamweba,+ kabili nga tamwakalekonka ubupingushi bwandi ica kuti mwaleka no kulakonka amafunde yandi yonse, kabili nga tamwakalesunga icipangano candi,+ 16 ifi e fyo nkamucita: nkalenga mukasakamikwe ilyo nkamuletela ubulwele bwa cifuba ca ntanda-bwanga* no bulwele bwa kukaba umubili, ubukalenga amenso yenu yakaleke ukumona bwino kabili ubukalenga mwikalakwata amaka mu mibili yenu. Nga mwabyala imbuto, mukalaicusha fye pantu abalwani benu e bakalalya ifisabo.+ 17 Nkamufulilwa, abalwani benu+ bakamucimfya; kabili abamupata bakalamucusha,+ kabili mukalafulumuka ninshi tapali no uulemufulumuna.+

18 “‘Lelo ifi nga tafyakalenge mukatampe ukung’umfwila, ninshi nkalundapo ukumukanda imiku 7 pa membu shenu. 19 Nkamupwisha icilumba kabili nkalenga umuulu wenu ukabe nge cela,*+ ne calo cenu cikabe ngo mukuba.* 20 Mukalaonaula fye amaka yenu, pantu mu calo cenu tamwakaleba ifisabo,+ kabili ifimuti fya mu calo tafyakaletwala ifitwalo.

21 “‘Lelo nga tamwakalecita ifyo nakulamweba kabili nga tamwakaleng’umfwila, nkalundapo ukumukanda imiku 7 pa membu shenu. 22 Nkamutumina ifiswango+ ifikamwipaila abana,+ fikamulofesha ne fitekwa kabili fikalenga mukacepe, kabili mu misebo yenu tamwakaleba abantu.+

23 “‘Lelo ifi nga tafyakalenge mukaaluke+ kabili nga mukatwalilila fye ukukanang’umfwila, 24 lyena nkamwalukila, kabili nkamukanda imiku 7 pa membu shenu. 25 Nkamuletela ulupanga lwa cilandushi pa mulandu wa kukanasunga icipangano.+ Nga mukafulumukila mu misumba yenu, nkamutumina ubulwele,+ kabili abalwani benu bakamucimfya.+ 26 Ilyo nkonaula uko mufumya* imikate,*+ abanakashi 10 bakalamupangila umukate mu citofu cimo fye kabili bakalapima umukate+ e lyo bamupeela uunono. Mukalalya lelo tamwakaleikuta.+

27 “‘Lelo ifi nga tafyakalenge mukaaluke kabili nga mukatwalilila fye ukukanang’umfwila, 28 nkamwalukila icine cine,+ kabili nkamukanda imiku 7 pa membu shenu. 29 E ico mukalalya abana benu abaume na bana benu abanakashi.+ 30 Nkonaula apasansuka apo mukalapepela+ kabili nkonaula ifyo mukalaocelapo ububani, kabili nkatuulika ifitumbi fyenu pa tulubi twenu utwa bunani*+ uto nkonaula, kabili nkamwalukila pantu mukaba aba bunani.+ 31 Nkonaula imisumba yenu ku lupanga+ kabili nkonaula ififulo mukalapepelapo. Akacena akasuma* aka malambo mukalantuulila takakalelenga nkalesekelela. 32 Nkonaula icalo cenu,+ kabili abalwani benu abekalamo bakalapapa nga nshi pa fyo cikonaulwa.+ 33 Kabili nkamusalanganishisha mu nko,+ nkalenga abalwani benu bakesemulwisha no lupanga;+ kabili icalo cenu cikashala icibolya,+ ne misumba yenu ikonaulwa.

34 “‘Mu nshiku shonse isho icalo cikashala icibolya, cikalasunga amasabata ya ciko. Iyo nshita mukaba mu calo ca balwani benu. Pali iyi nshita icalo cikatuusha pa kuti cikasunge amasabata+ ayo cishasungile. 35 Inshiku shonse isho cikashala icibolya cikatuusha, pantu tacaletuusha mu masabata yenu ilyo mwaikelemo.

36 “‘Abakapusuka+ bena nkalenga bakabe no mwenso mu mitima yabo mu fyalo fya balwani babo; kabili ukulila kwe buula ilileululuka kukalenga bakafulumuke, kabili bakafulumuka kwati balefulumuka uuli no lupanga kabili bakawa e lyo ninshi tapali no ulebabutusha.+ 37 Bakalapunkana kwati balefulumuka uuli no lupanga e lyo ninshi tapali no ulebabutusha. Tamwakabe na maka ya kulwisha abalwani benu.+ 38 Mukafwila mu nko;+ mukafwila mu calo ca balwani benu. 39 Abakashalapo pali imwe bakalacula pa mulandu wa membu shabo mpaka bakafwe mu calo ca balwani benu.+ Bakalacula pa mulandu wa membu sha bashibo.+ 40 Lyena bakasokolola imembu shabo+ ne membu sha bashibo abashali aba cishinka kuli ine kabili bakasumina ukuti tabali aba cishinka pantu tabaleng’umfwila.+ 41 Na ine nkabalukiila,+ kabili nkabatwala mu calo ca balwani babo.+

“‘Nalimo pali iyo nshita imitima yabo iyakosa* ikanaka,+ lyena bakafuta pa membu shabo. 42 Kabili nkebukisha icipangano ico napangene na Yakobo,+ ne co napangene na Isaki+ e lyo ne co napangene na Abrahamu,+ kabili nkebukisha ne calo. 43 Pali iyi nshita yonse, icalo cikashala fye umwabula umwikashi, kabili ilyo cikashala icibolya cikalasunga amasabata+ ayo cishalesunga. Apo tabakalekonka ubupingushi bwandi kabili bakapata amafunde yandi,+ bakakandilwa pa membu shabo. 44 Nangu cikaba ifi, ilyo bakaba mu calo ca balwani babo, nshakabakaaninine+ fye kabili nshakabalekeleshe ica kuti nkabalofye, pantu nga nacita ifi ninshi natoba icipangano ico napangene nabo,+ pantu nine Yehova Lesa wabo. 45 Nkabebukishisha pa mulandu ne cipangano napangene ne fikolwe+ fyabo ifyo nafumishe mu calo ca Egupti pa menso ya nko,+ pa kuti mbalange ukuti nine Lesa wabo. Nine Yehova.’”

46 Aya e mafunde no bupingushi ifyo Yehova apeele abena Israele pa Lupili lwa Sinai ukupitila muli Mose.+

27 Yehova aebele Mose no kuti: 2 “Eba abena Israele auti, ‘Umuntu nga alapa umulapo waibela+ uwa kutuulila Yehova indalama ishingalingana no mutengo wa kushitishishapo umuntu,* 3 umutengo wa mwaume uukwete imyaka 20 ukufika ku wa myaka 60 ufwile ukuba amashekele* 50 aya silfere ukulingana ne cipimo ce shekele ilya pa cifulo ca kupepelapo.* 4 Nomba nga mwanakashi, umutengo ufwile ukuba amashekele 30. 5 Nga mwaume uwa myaka 5 ukufika ku wa myaka 20, umutengo ufwile ukuba amashekele 20, lelo nga mwanakashi, umutengo ufwile ukuba amashekele 10. 6 Nga mwaume uuli no mweshi umo ukufika ku wa myaka 5, umutengo ufwile ukuba amashekele ya silfere 5, lelo nga mwanakashi umutengo ufwile ukuba amashekele ya silfere yatatu.

7 “‘Nga mwaume uuli ne myaka 60 no kuya pa muulu, umutengo ufwile ukuba amashekele 15, lelo nga mwanakashi umutengo ufwile ukuba amashekele 10. 8 Nomba nga mupiina sana ica kutila te kuti alipile indalama ishingalingana no mutengo wa kushitishishapo umuntu,+ akatwale umuntu kuli shimapepo kabili shimapepo akabike umutengo bengamushitishishapo. Shimapepo akabike umutengo ukulingana ne sho uwalapile umulapo engakumanisha ukulipila.+

9 “‘Nga alapile umulapo wa kutuula icitekwa icingalinga ukutuulila Yehova, conse ico umuntu engapeela Yehova cikaba ica mushilo. 10 Ekapyanikishapo cimbi kabili ekakaabula icitekwa icisuma ne citekwa icibi, nangu icitekwa icibi ne citekwa icisuma. Lelo nga alefwaya ukukaabula icitekwa ne citekwa cimbi, ninshi ico citekwa ne co alekaabulamo fikaba fya mushilo. 11 Nga citekwa icakowela+ ico umuntu ashingapeela Yehova, akatwale ico citekwa kuli shimapepo. 12 Lyena shimapepo akabike umutengo wa ciko ukulingana ne fyo cilemoneka, nampo nga cisuma nelyo cibi. Umutengo shimapepo akabika, e ukaba umutengo wa ciko. 13 Nomba nga alefwaya ukucilubula, ninshi pa mutengo wa ico citekwa akalundepo indalama imo pali cila ndalama 5.+

14 “‘Nomba umuntu nga apeela Yehova ing’anda yakwe, shimapepo akabike umutengo wa iko ukulingana ne fyo ilemoneka, nampo nga isuma nelyo ibi. Umutengo shimapepo akabika e ukaba umutengo wa iko.+ 15 Lelo uwapeele Lesa ing’anda nga alefwaya ukuilubula, ninshi pa mutengo wa iyo ing’anda afwile ukulundapo indalama imo pali cila ndalama 5, lyena ikaba yakwe.

16 “‘Umuntu nga apeela Yehova ibala limo pa mabala ayo akwata, umutengo we bala ukabe ukulingana ne mbuto ishingabyalwamo: nga ni homa* imo iya barle ninshi umutengo we bala ukabe amashekele ya silfere 50. 17 Nga apeela Lesa ibala lyakwe mu mwaka wa Buntungwa,+ umutengo wa liko ukaba umo wine. 18 Lelo nga apeela ibala lyakwe pa numa ya mwaka wa Buntungwa, ninshi shimapepo akacefyeko umutengo ukulingana ne myaka isheleko+ pa kuti umwaka wa Buntungwa umbi ufike. 19 Lelo uwapeele ibala lyakwe nga alefwaya ukulilubula, ninshi pa mutengo wa ilyo ibala afwile ukulundapo indalama imo pali cila ndalama 5, lyena likaba lyakwe. 20 Nomba nga talubwile ibala kabili balishitisha ku muntu umbi, ninshi te kuti alilubule. 21 Ibala nga lyalubulwa mu mwaka wa Buntungwa, Yehova akalalimona ukuti lya mushilo kabili lyakwe. Likaba libala lya bashimapepo.+

22 “‘Umuntu nga apeela Yehova ibala ilyo ashitile ilishaba pa mabala ayo apyana,+ 23 shimapepo akabike umutengo ukulingana ne myaka isheleko pa kuti umwaka wa Buntungwa ufike, kabili akamwebe umutengo pali ubo bwine bushiku.+ Yehova akalamona ishi indalama ukuti sha mushilo. 24 Mu mwaka wa Buntungwa, ibala likabwelela ku mwine uo alishitileko.+

25 “‘Umutengo onse ukabe ukulingana ne cipimo ce shekele ilya pa cifulo ca kupepelapo. Ishekele limo lifwile ukulingana na magera* 20.

26 “‘Lelo takuli nangu umo uufwile ukupeela Lesa ibeli lya fitekwa, pantu ibeli lyonse nga lyafyalwa fye liba lya kwa Yehova.+ Nampo ilyo ibeli nga ni ng’ombe iilume nelyo ni mpaanga, liba lya kwa Yehova.+ 27 Lelo nga libeli lya fitekwa ifyakowela kabili nga alilubula ukulingana no mutengo wa liko, ninshi pa mutengo wa liko afwile ukulundapo indalama imo pali cila ndalama 5.+ Lelo nga talilubwile, bakalishitishe ukulingana no mutengo wa liko.

28 “‘Lelo conse ico umuntu apeela Yehova pa kuti balecibomfya mu mulimo wa mushilo umuyayaya, nampo nga muntu nangu ni nama nangu libala lyakwe, te kuti bacishitishe kabili te kuti bacilubule. Yehova acimona ukuti ca mushilo nga nshi.+ 29 Na kabili umuntu onse uo bapingula ukuti alingile ukwipaiwa te kuti bamulubule.+ Afwile fye ukwipaiwa.+

30 “‘Conse icalenga 10+ pa fyo mukalalima, nampo nga cisabo nelyo nga citwalo, ca kwa Yehova. Yehova akalafimona ukuti fya mushilo. 31 Umuntu nga alefwaya ukulubula icalenga 10, ninshi pa mutengo wa ciko afwile ukulundapo indalama imo pali cila ndalama 5. 32 Nomba pa ng’ombe shonse na pa mpaanga shonse ne mbushi, inama yonse iyalenga ikumi iyapita mwi samba lya nkonto ya kwa kacema, ya kwa Yehova kabili ikaba ya mushilo. 33 Tafwile ukuibebeta pa kuti amone nampo nga isuma nelyo ibi, kabili tafwile ukuikaabulamo na imbi. Lelo nga aikaabulamo na imbi, ninshi iyo nama ne yo aikaabulamo shikaba sha mushilo.+ Te kuti ashilubule.’”

34 Aya e mafunde ayo Yehova apeele Mose pa Lupili lwa Sinai+ ayo abena Israele balingile ukulakonka.