ESEKIELE

1 Mu mwaka walenga 30, pa bushiku bwalenga 5 mu mweshi walenga 4, ilyo nali pali bankole+ mupepi no mumana wa Kebari,+ imyulu yaliswike kabili natampile ukumona ifimonwa ifyafumine kuli Lesa. 2 Pa bushiku bwalenga 5 muli uyo mweshi—e kutila, mu mwaka walenga 5 ukutula apo Imfumu Yehoyakini baisendeele bunkole+— 3 Yehova alandile na Esekiele* umwana wa kwa shimapepo Busi mu calo ca bena Kaldi,+ mupepi no mumana wa Kebari. Kulya kwine e ko ukuboko kwa kwa Yehova kwaishile pali bena.+

4 Ilyo nalelolesha, namwene icimwela icikalamba+ icaleisa ukufuma ku kapinda ka ku kuso ne kumbi ilikalamba no mulilo uwalebilima,*+ ifyo ulubuuto ulwabeeka lwashingulwike, kabili pa kati ka mulilo pali icalemoneka nge cela icasakanamo silfere na golde.+ 5 Mu kati ka mulilo mwali ifyalemoneka nge fya mweo 4,+ kabili ifi ifya mweo fyalemoneka nga abantu. 6 Cimo na cimo cakwete ifinso 4 na mapindo 4.+ 7 Amakasa ya fiko yali ayaololoka na mabondo ya fiko yali nga ya mwana wa ng’ombe, kabili yalebengeshima ngo mukuba uwatelela.+ 8 Ifi ifya mweo fyalikwete amaboko kwati maboko ya bantu mu mbali shonse 4, kabili fyonse 4 fyalikwete ifinso na mapindo. 9 Amapindo ya fiko yalekumyanya. Tafyalealuka nga fileya; cimo na cimo caleya uko cilungeme ukwabula ukuti caluke.+

10 Ifi e fyo ifinso fya fiko fyalemoneka: Cimo na cimo cakwete icinso ca muntu ne cinso ca nkalamo+ ku kulyo, fyonse 4 fyalikwete icinso ca ng’ombe iilume+ ku kuso kabili fyonse 4 fyalikwete icinso+ ca kwa kapumpe.+ 11 Ifi e fyo ifinso fya fiko fyali. Amapindo ya fiko yafungulukiile mu muulu. Cimo na cimo cakwete amapindo yabili ayalekumyanya, na yambi yabili ayalefimba pa mibili ya fiko.+

12 Cimo na cimo caleya uko cilungeme. Konse uko umupashi wafyeba ukuti fiye, e ko fyaleya.+ Tafyalealuka ilyo fyaleya. 13 Kabili ifi ifya mweo fyalemoneka nga malasha ayaleaka. Ifyapala ifyenge fyaleselasela pa kati ka ifi ifya mweo, kabili ku mulilo+ kwalefuma inkuba. 14 Kabili ilyo ifi ifya mweo fyaleya uku no ku fyalemoneka ngo kubyasha kwa nkuba.

15 Ilyo nalelolesha ifi ifya mweo, namwene imipeto* panshi lubali lwa ca mweo cimo na cimo, ifyakwete ifinso 4.+ 16 Imipeto* yalemoneka iyabeeka kwati libwe lya krusoliti, kabili yonse 4 yali iyapalana. Ifyo yapangilwe fyalemoneka kwati umupeto umo uli mu mupeto ubiye.* 17 Ilyo yale-enda yaleya ku mbali shonse 4 ukwabula ukuti yaluke. 18 Iyi imipeto yalisanseme ica kuti yaletiinya, kabili kunse ya iyi imipeto kwaiswile amenso ayaishingulwike.+ 19 Konse uko ifya mweo fyaleya, imipeto nayo yaleya uko kwine pamo nafyo, kabili nga fyaima ukufuma panshi, imipeto nayo yaleima.+ 20 Konse uko umupashi wafwaya ukuti fiye, e ko fyaleya, konse uko umupashi waleya. Imipeto* yaleimina pamo nafyo, pantu umupashi uwalebombela mu fya mweo,* na mu mipeto namo mwine e mo wali. 21 Nga fyaya, nayo yaleya; kabili nga fyaiminina shilili, nayo yaleiminina; kabili nga fyaima ukufuma panshi, imipeto* nayo yaleimina pamo nafyo, pantu umupashi uwali mu fya mweo, na mu mipeto namo mwine e mo wali.

22 Pa muulu wa mitwe ya fya mweo pali icapala icintamba icalebeeka nge glasi* kabili cali ica kutiinya. Ici cali pa muulu wa mitwe ya fiko.+ 23 Mwi samba lya capala icintamba, amapindo yafiko yalifungulwilwe ukulola mu muulu* kabili yalekumyanya. Ica mweo cimo na cimo calikwete amapindo yabili ayalefimba ulubali lumo ulwa mibili ya fiko, na yambi yabili ayalefimba ulubali lumbi. 24 Ilyo naumfwile iciunda ca mapindo ya fiko, caleumfwika nge ciunda ca menshi ayalepooma, nge ciunda ca Wa Maka Yonse.+ Nga fileya, fyalepanga iciunda icaleumfwika nge ciunda ce bumba lya bashilika. Nga fyaiminina, fyalebwesesha amapindo ya fiko panshi.

25 Kwali ishiwi ilyafumine pa capala icintamba icali pa mitwe ya fiko. (Nga fyaiminina, fyalebwesesha amapindo ya fiko panshi.) 26 Pa muulu wa capala icintamba icali pa muulu wa mitwe ya fiko, pali icapala icipuna ca Bufumu+ icalemoneka nge libwe lya safiri.+ Pa cipuna ca Bufumu icali pa muulu paikele uwalemoneka ngo muntu.+ 27 Namwene icalebeeka nge cela icasakanamo silfere na golde,+ icalemoneka ngo mulilo uwalefuma mu musana wakwe ukuya mu muulu; kabili ukufuma mu musana ukwisa mwi samba, namwene icalemoneka ngo mulilo.+ Kwali ulubuuto ulwalebengeshima ukumushinguluka 28 kwati mukolamfula+ mu makumbi uubako pa bushiku bwa mfula. Ifi e fyo ulubuuto ulwamushingulwike lwalemoneka. Lwalemoneka ngo bukata bwa kwa Yehova.+ Ilyo namwene ifi nalifukeme nafisha ne mpumi panshi, kabili natendeke ukumfwa ishiwi lya walelanda.

2 Lyena anjebele ati: “We mwana wa muntu,* iminina pa kuti nande na iwe.”+ 2 Ilyo alandile na ine, umupashi waingile muli ine, kabili wanengele ukwiminina+ pa kuti ng’umfwe uwalelanda na ine.

3 Lyena anjebele ati: “We mwana wa muntu, ndekutuma ku bena Israele,+ ku nko sha bacipondoka ishampondokela.+ Bena ne fikolwe fyabo balamembukila ukufika na lelo.+ 4 Ndekutuma ku bana abatalama* kabili abakosa imitima.+ Ufwile ukuyabeba auti, ‘Ifi e fyo Shikulu Mulopwe Yehova alanda.’ 5 Nabo, nampo nga bakomfwa nelyo nga bakakaana ukuumfwa—pantu ni ng’anda ya bacipondoka+—bakeshiba ukuti cine cine kasesema ali nabo.+

6 “Lelo iwe we mwana wa muntu wibatiina,+ kabili witiina ifyo balelanda, nangu ca kuti ficilasa ne myunga nafikushinguluka*+ kabili uleikala na bakaling’ongo. Witiina ifyo balelanda,+ kabili wileka ifinso fyabo fikutiinye,+ pantu ni ng’anda ya bacipondoka. 7 Ufwile ukubeba amashiwi yandi, nampo nga bakomfwa nelyo nga bakakaana ukumfwa, pantu ni bacipondoka.+

8 “Lelo iwe, we mwana wa muntu, umfwa ifyo ndekweba. Wipondoka nga aba muli iyi ng’anda ya bucipondoka. Asamuna akanwa kobe no kulya ico ndekupeela.”+

9 Ilyo naloleshe, namwene nabantambika ukuboko,+ kabili namwene uku kuboko nakwikata icimfungwa+ icalembwapo. 10 Ilyo acifungulwile pa ntanshi yandi, calilembelwepo pa ntanshi na ku numa.+ Palembelwe inyimbo sha bulanda,* ukuloosha e lyo no kulila.+

3 Lyena anjebele ati: “We mwana wa muntu, lya icili pa ntanshi yobe.* Lya ici icimfungwa, e lyo uleya ulande na ba mu ng’anda ya kwa Israele.”+

2 E ico nalyasamwine akanwa, na o alengele nalya ici icimfungwa. 3 Kabili anjebele ati: “We mwana wa muntu, lya ici icimfungwa ico ndekupeela, pa kuti cisule mu nda yobe.” E ico nalitendeke ukucilya, kabili calowele ngo buci mu kanwa kandi.+

4 Anjebele ati: “We mwana wa muntu, kabiye ku ba mu ng’anda ya kwa Israele, kabili ubebe amashiwi yandi. 5 Pantu nshilekutuma ku bantu abalanda ululimi ulwakosa ukumfwa nelyo abalanda ululimi ulushaishibikwa, lelo ni ku ba mu ng’anda ya kwa Israele. 6 Nshilekutuma ku nko ishingi abalanda ululimi ulwakosa ukumfwa nelyo ulushaishibikwa, abalanda ifyo ushingomfwa umo filolele. Nga e bo nakutumako, kuti bakumfwa.+ 7 Lelo aba mu ng’anda ya kwa Israele bakakaana ukukumfwa, pantu tabafwaya ukumfwa kuli ine.+ Bonse aba mu ng’anda ya kwa Israele ni bankosamitwe kabili balikosa imitima.+ 8 Mona! Ninenga icinso cobe caba icakosa nge fyakosa ifinso fyabo ne mpumi yobe yaba iyakosa nge fyakosa impumi shabo.+ 9 Ninenga impumi yobe ukuba iyakosa nga daimondi, ukuba iyakosa ukucila ilibwe lyakosa nga nshi.+ Wibatiina nelyo ukutiina ifinso fyabo,+ pantu bena ni ng’anda ya bacipondoka.”

10 Kabili anjebele ati: “We mwana wa muntu, umfwa amashiwi yonse ayo ndekweba kabili uyasunge mu mutima obe. 11 Kabiye mu bantu bobe* bankole+ kabili ulande nabo. Ubebe auti, ‘Ifi e fyo Shikulu Mulopwe Yehova alanda,’ nampo nga balakumfwa nelyo balakaana ukukumfwa.”+

12 Lyena umupashi walinsendele+ kabili naumfwile icongo icikalamba ku numa yandi pamo ne shiwi ilyaleti: “Yehova nacindikwe pa bukata bwakwe ku cifulo cakwe.” 13 Kwali icongo ca mapindo ya fya mweo ayalekumyanya,+ ne congo ca mipeto* iyali mupepi nafyo,+ naumfwile ne congo icikalamba na kabili. 14 Kabili umupashi walinjimishe no kunsenda, na ine nalile ninshi nimfulwa kabili ninshi ninkalipa nga nshi. No kuboko kwa kwa Yehova ukwa maka kwali pali ine. 15 E ico nalile kuli bankole abali mu Tel-abibi, abaleikala mupepi no mumana wa Kebari,+ natendeke ukwikala nabo; kabili naikele nabo pa nshiku 7 ninshi nacimpesha amano.+

16 Pa numa ya nshiku 7, Yehova anjebele ati:

17 “We mwana wa muntu, nakusonta ukuba kalinda wa ba mu ng’anda ya kwa Israele,+ kabili ilyo ukomfwa amashiwi ayakafuma mu kanwa kandi, ufwile ukubasoka ukulingana ne fyo nkakweba.+ 18 Nga naeba umubifi nati, ‘Ukufwa ukafwa,’ lelo iwe wakaana ukulanda nankwe no kumusoka pa kuti aleke ukucita ifyabipa pa kuti abe no mweo,+ apo mubifi, akafwa pa mulandu wa filubo fyakwe,+ lelo umulopa wakwe nkaufwaya kuli iwe.*+ 19 Lelo nga wasoka umubifi na o tafumine mu nshila shakwe ishabipa kabili talekele ukucita ifyabipa, akafwa pa mulandu wa filubo fyakwe, lelo iwe ukapususha umweo obe.+ 20 Lelo uwalungama nga aleka ukucita ifyalungama kabili atendeka ukucita ifyabipa,* nkabika ica kuipununako pa ntanshi yakwe kabili akafwa.+ Nga ca kuti tawamusokele, akafwila pa lubembu lwakwe kabili ifyalungama ifyo alecita nshakafibukishe, lelo umulopa wakwe nkaufwaya kuli iwe.*+ 21 Lelo nga wasoka uwalungama ukuti tafwile ukucita ulubembu, na o tacitile ulubembu, akatwalilila ukuba no mweo pantu walimusokele,+ na iwe ukapususha umweo obe.”

22 Ilyo nali kulya ukuboko kwa kwa Yehova kwaishile pali ine, kabili anjebele ati: “Ima, kabiye ku mpanga iyabatama, kabili kulya kwine e ko nkalandila na iwe.” 23 E ico nalimine no kuya ku mpanga iyabatama, kabili moneni! kwali ubukata bwa kwa Yehova+ nga bulya namwene ku mumana wa Kebari,+ kabili nalifukeme nafisha ne mpumi panshi. 24 Lyena umupashi walingiile muli ine no kunenga ukwiminina,+ kabili alilandile na ine no kunjeba ati:

“Kabiye, uisalile mu ng’anda yobe. 25 Nomba iwe we mwana wa muntu, bakabuula intambo no kukukaka pa kuti wikalafuma no kuya kuli bena. 26 Kabili nkalenga ululimi lobe lukakambatile mu kanwa kobe, kabili ukaleka ukulanda, tawakalebakalipila pantu bena ni ng’anda ya bacipondoka. 27 Lelo ilyo nkalanda na iwe nkasamuna akanwa kobe, kabili ukabebe auti,+ ‘Ifi e fyo Shikulu Mulopwe Yehova alanda.’ Lekeni uulefwaya ukukutika akutike,+ kabili lekeni uushilefwaya ukukutika, ekutika, pantu bena ni ng’anda ya bacipondoka.+

4 “Kabili iwe we mwana wa muntu, buula injelwa uibike pa ntanshi yobe. Ushilepo umusumba, umusumba wa Yerusalemu. 2 Ushinge umusumba,+ ukuule icibumba uku-ushinguluka,+ upange ica kuninapo pa ku-usansa,+ ubikepo inkambi ya ku-ulwisha kabili mu mbali shonse ubikemo ifya kuwishishako amalinga ne mpongolo.+ 3 Bula icela icapaapaatala, ucimike pa kati kobe no musumba, pa kuti cibe nge cibumba. Lyena uloshe icinso cobe ku musumba kabili umusumba walashingwa; niwe ufwile uku-ushinga. Ici e cishibilo ca ba mu ng’anda ya kwa Israele.+

4 “Lyena ufwile ukulaala kabafu, kabili icilubo ca ba mu ng’anda ya kwa Israele cikaba pali iwe.+ Icilubo cabo cikaba pali iwe pa nshiku shonse isho ukalaala kabafu. 5 Kabili nkafwaya ukuti ukacite ifi pa nshiku 390, ukulingana ne myaka ya cilubo cabo,+ kabili icilubo ca ba mu ng’anda ya kwa Israele cikaba pali iwe. 6 Kabili ukacite ifi mpaka inshiku shikapwe.

“Lyena pa muku walenga bubili ukalaale kabafu ku kulyo, kabili imembu sha ba mu ng’anda ya kwa Yuda+ shikaba pali iwe pa nshiku 40. Ubushiku bumo pa mwaka umo, ubushiku bumo pa mwaka umo, e funde nakupeela. 7 Kabili ukaloshe icinso cobe ku musumba wa Yerusalemu uushingilwe,+ ninshi naupeta ne ca kufwala ku kuboko kobe, kabili ukaseseme pa fyabipa ifili no ku-ucitikila.

8 “Mona! Nkakukaka ne ntambo pa kuti wikalapilibuka ukufuma ku lubali lumo ukuya ku lubali lumbi, mpaka inshiku sha kushinga umusumba shikapwe.

9 “Kabili ufwile ukubula ingano, barle, cilemba, ilanda, amale ne ngano ishimoneka nge shapapa no kufibika mu cipe cimo kabili upangemo umukate wa kuti ukalelya. Pantu pa nshiku 390 isho ukalalaala kabafu uyu wine e mukate ukalalya.+ 10 Ukalaipimina ifya kulya, cila bushiku ukalalya ifilingene ukufina na mashekele 20.* Wakulalya pa nshita iyapimwa cila bushiku.

11 “Kabili ukalanwa icipimo cimo ica menshi pa fipimo 6 ifingila muli hini imo.* Ukalanwa pa nshita iyapimwa cila bushiku.

12 “Ukalalya uyu mukate nga filya wingalya umukate wa barle uwabulungana; ukalaupanga ninshi nabo balemonako, ukalaupangila pa mulilo uo ukoseeshe na mafi ya bantu ayauma.” 13 Yehova alandile no kuti: “Ifi e fyo abena Israele bakulalya umukate wabo—uwakowela—mu fyalo umo nkabasalanganishisha.”+

14 Lyena natile: “Mwinjeba ukucita ifi Mwe Shikulu Mulopwe Yehova! Ukutula ku bwaice bwandi ukushinta na lelo nshatala ikoweshapo,* ukupitila mu kulya inama iyaifwila nelyo iyo batakanya,+ kabili inama iyakowela tayatala aingilapo mu kanwa kandi.”+

15 E ico anjebele ati: “Cisuma, nalakusuminisha ukupangila umukate obe pa mafi ya ng’ombe ukucila uku-upangila pa mafi ya bantu.” 16 Lyena anjebele ati: “We mwana wa muntu, ndi no kulenga ifya kulya fikaleke ukwisa mu Yerusalemu,*+ kabili bakalalya umukate wa kubapimina ninshi nabasakamana icine cine,+ bakalanwa na menshi ya kubapimina ninshi bali no mwenso.+ 17 Ifi fikacitika pa kuti ilyo bashakakwate umukate na menshi, bakaleloleshanya ninshi balepapa fye kabili bakonde pa mulandu wa cilubo cabo.

5 “Nomba iwe we mwana wa muntu, ubuule ulupanga ulwatwa ulubomfye nga ica kubeyelako. Ubeye umushishi obe no mwefu obe. E lyo ubuule amasekelo upime umushishi obe no kuwakanya patatu. 2 Iciputulwa ca kubalilapo ukacoce mu mulilo mu kati ka musumba ilyo inshiku sha kushinga umusumba shikapwa.+ Lyena ukabuule iciputulwa na cimbi ukaciputaule no lupanga mu musumba monse,+ kabili ukabuule iciputulwa ca kulekeleshako ukaculwile mu mwela, kabili nkasomona ulupanga no kufipepeka.+

3 “Ku ciputulwa calenga butatu ufwile ukubulako umushishi umo no ku-ufungila mu ca kufwala cobe. 4 Kabili ukabuule umushishi na umbi ukaupoose mu mulilo pa kuti ukapye. Uyu mulilo ukasalanganina mu ng’anda yonse iya kwa Israele.+

5 “Shikulu Mulopwe Yehova atila: ‘Uyu e Yerusalemu. Namubika pa kati ka nko, kabili ifyalo fyonse fyalimushinguluka. 6 Lelo alileka ukukonka ubupingushi bwandi na mafunde yandi kabili acita ifyabipa ukucila ifyo inko shicita, ne fyo aba mu fyalo fyonse ifyamushinguluka bacita.+ Pantu abantu bakwe balikaana ubupingushi bwandi, kabili tabakonka amafunde yandi.’

7 “E ico Shikulu Mulopwe Yehova atila, ‘Pa mulandu wa kuti mwalicita ifyabipa ukucila inko shonse ishamushinguluka, kabili tamukonka amafunde yandi nelyo ubupingushi bwandi, lelo mukonka ubupingushi bwa nko shonse ishamushinguluka,+ 8 Shikulu Mulopwe Yehova alanda ati: “Mona, ninkwalukila we musumba,+ kabili nkakupingula ninshi ne nko shonse shilemonako.+ 9 Pa mulandu wa fya bunani fyonse ifyo ucita, ifyo nkakucita fintu ifyo nshatalacitapo kabili ifyo nshakacitepo.+

10 “‘“E ico bashibo bakalya abana babo abaume,+ na bana baume nabo bakalya bashibo, kabili nkakupingula na bakashalapo pali iwe nkabasalanganishisha mu ntunga shonse.”’*+

11 “‘E ico, na pali ne mwine,’ e fyo Shikulu Mulopwe Yehova alanda, ‘pa mulandu wa kuti wakoweseshe icifulo candi ica mushilo ku tulubi utwa bunani ne fya bunani fyonse ifyo walecita,+ na ine wine nkakukaana;* nshakakumfwile uluse kabili nshakakulangulukileko.+ 12 Abantu bobe bakakanikana patatu. Ibumba lya kubalilapo likafwa ku cikuko,* nelyo icipowe cikabalofya. Ibumba lyalenga bubili likafwa ku lupanga+ kabili abakaba mwi bumba lyalenga butatu nkabasalanganishisha mu ntunga shonse,* kabili nkasomona ulupanga no kubapepeka.+ 13 Lyena ubukali bwandi bukapwa kabili nkacefyako ukubafulilwa, e lyo umutima wandi ukekala.+ Kabili ilyo nkaleka ukubafulilwa, e lyo bakeshiba ukuti ine ne Yehova ninanda pa mulandu wa kuti mfwaya ukupepwa fye neka.+

14 “‘Nkalenga ukabe icibolya kabili nkakuseebanya mu nko ishakushinguluka na mu menso ya bapitanshila bonse.+ 15 Ukaseebana kabili ukasaalulwa.+ Ukaba icilangililo ca kusokelako kabili ica kupapusha inko ishakushinguluka, ilyo nkakupingula mu bukali bwandi kabili ninshi nimfulwa nga nshi. Nkakukanda ninshi ninkalipa nga nshi. Ine ne Yehova ninanda.

16 “‘Nkatuma imifwi iikali iya cipowe pa kuti ikabonaule. Imifwi iyo nkatuma ikabalofya,+ nkalenga icipowe cikabipe sana pantu nkalenga ifya kulya fikaleke ukwisa mu musumba.*+ 17 Nkamuponesha icipowe, nkamutumina ne nama mpanga ishikali+ kabili shikamwipaila abana. Icikuko no kusumya umulopa fikamupesha amano, kabili nkamuletela ulupanga.+ Ine ne Yehova ninanda.’”

6 Na kabili Yehova anjebele ati: 2 “We mwana wa muntu, losha icinso cobe ku mpili sha mu Israele no kusesema ifyabipa ifikashicitikila. 3 Ufwile ukulanda auti, ‘Mwe mpili sha mu Israele, umfweni amashiwi ya kwa Shikulu Mulopwe Yehova: Shikulu Mulopwe Yehova ale-eba impili, utupili, imilonga ne mipokapoka aleti: “Moneni! nkaleta ulupanga pali imwe, kabili nkonaula ififulo fyenu ifya kupepelapo. 4 Ifiipailo fyenu fikonaulwa, ifyo mufutumwinapo ububani fikatobaulwa,+ kabili abakafwa nkabapoosa pa ntanshi ya tulubi twenu utwa bunani.*+ 5 Nkapoosa ifitumbi fya bena Israele pa ntanshi ya tulubi twabo utwa bunani, kabili nkasalanganya amafupa yenu pa fiipailo fyenu fyonse.+ 6 Mu ncende shonse isho mukalaikalamo, imisumba ikaluka ifibolya+ kabili ififulo fya kupepelapo fikabongololwa, kabili tafyakakuulwe.+ Ifiipalo fyenu fikabongololwa kabili fikonaika, utulubi twenu utwa bunani tukaloba, ifyo mufutumwinapo ububani fikaputaulwa kabili fyonse ifyo mwacita fikaloba. 7 Kabili abengi pali imwe bakabepaya,+ lyena mukeshiba ukuti nine Yehova.+

8 “‘“Lelo nkashako bamo, pantu bamo pali imwe mukapusuka ku lupanga mu nko isho mukasalanganinamo mu fyalo fyonse.+ 9 Kabili abakapusuka bakanjibukisha mu nko umo bakabasenda bunkole.+ Bakeluka ukuti balinkalifye umutima pa mulandu wa kuti balitalwike kuli ine, tabali ne cishinka mu mitima yabo*+ na pa fyo amenso yabo yalekonkelela utulubi twabo utwa bunani.+ Bakomfwa insoni kabili bakapata fyonse ifyabipa ne fya bunani ifyo bacita.+ 10 Bakeshiba ukuti nine Yehova kabili bakeshiba ukuti filya nabebele ukuti nkabaletela ubucushi, tayali fye malandakanwa iyo.”’+

11 “Shikulu Mulopwe Yehova alanda ati: ‘Toota amapi, ulishe no lushindo kabili ulooshe pa fyabipa fyonse ne fya bunani ifyo aba mu ng’anda ya kwa Israele bacita, pantu bakafwa ku lupanga, ku cipowe na ku cikuko.+ 12 Aba kutali bakafwa ku cikuko, aba mupepi bakafwa ku lupanga, kabili onse uukapusuka ifi, uushakafwe icipowe cikamwipaya; kabili nkaleka ubukali bwandi bonse bukese pali bena.+ 13 Kabili mukeshiba ukuti nine Yehova,+ ilyo abo bakepaya bakalaala mu tulubi twabo utwa bunani, pa fiipailo fyabo fyonse,+ pa muulu wa tupili tonse ututali, pa muulu wa mpili shonse, mwi samba lya cimuti conse icafumba na mwi samba lya fimuti ifikalamba umo batuulila ifyanunkila pa kusekesha utulubi twabo utwa bunani.+ 14 Nkatambalika ukuboko kwandi pa kubalwisha kabili nkalenga icalo cikabe icibolya, na mu ncende shonse isho bekalamo mukashala ifibolya ukucila ifyo amatololo ayaba mupepi na Dibla yaba. Kabili bakeshiba ukuti nine Yehova.’”

7 Na kabili Yehova anjebele ati: 2 “Nomba iwe we mwana wa muntu, ifi e fyo Shikulu Mulopwe Yehova alanda pa calo ca Israele: ‘Impela! Impela naisa pa tupinda 4 utwa calo. 3 Nomba impela naisa pali imwe, nkaleka no bukali bwandi bonse bukese pali imwe, kabili nkamupingula ukulingana ne mibele yenu. Nkamupeela no mulandu pa fya bunani fyonse ifyo mucita. 4 Nshakamumfwile uluse;* kabili nshakamulangulukileko,+ ifyo nkamucita fikalingana ne fyo mucita, kabili mukacula pa mulandu wa fya bunani ifyo mucita.+ Lyena mukeshiba ukuti nine Yehova.’+

5 “Shikulu Mulopwe Yehova atila: ‘Moneni! Ubucushi, ubucushi ubwaibela buleisa.+ 6 Impela ileisa; impela ili no kwisa; ikakupumikisha.* Mona! Ileisa. 7 Inshita yobe naifika* iwe we wikala mu calo. Inshita ileisa, ubushiku nabupalama.+ Kuli icimfulunganya kabili ukuwelesha ukuli mu mpili, te kwa nsansa.

8 “‘Nomba line ndi no kukufulilwa nga nshi+ kabili ndi no kuleka ubukali bwandi bonse bukese pali iwe,+ nkakupingula ukulingana ne fyo ucita kabili nkakupeela umulandu pa fya bunani fyonse ifyo ucita. 9 Nshakakumfwile uluse; kabili nshakakulangulukile.+ Ifyo nkakucita fikalingana ne fyo ucita kabili ukacula pa mulandu wa fya bunani ifyo ucita. Lyena ukeshiba ukuti ine ne Yehova, nine ndekukanda.+

10 “‘Mona, ubushiku! Mona, buleisa!+ Inshita yobe naifika;* inkonto naibalula kabili ukuituntumba nakukula. 11 Ubunkalwe nabukula ica kuti nabwaluka inkonto ya kukandilako abacita ifyabipa.+ Bena tabakapusuke nangu fye fyuma fyabo, nangu mabumba yabo, nangu bucindami bwabo, tafyakapusuke. 12 Inshita ikafika, ubushiku bukafika. Lekeni uushita esekelela, no uushitisha na o eloosha, pantu kuli ubukali ubukesa pe bumba lyabo lyonse.*+ 13 Uushitisha takabwelele ku mpanga iyo ashitishe nangu engapusuka, pantu icimonwa cikeshila ibumba lyonse. Takuli uukabwela kabili takuli uukapususha umweo wakwe, pa mulandu wa cilubo cakwe.

14 “‘Nabalisha ipenga+ kabili bonse nabaipekanya, lelo tapali nangu umo uuleya ku nkondo, pantu ubukali bwandi buli pe bumba lyonse.+ 15 Kunse kuli ulupanga,+ mu kati muli icikuko ne cipowe. Onse uuli mu mpanga akafwa ku lupanga, e lyo icipowe ne cikuko e fikepaya abakaba mu musumba.+ 16 Abakapusuka pali bena bakafulumukila ku mpili, kabili cila muntu akalaloosha pa filubo fyakwe nga filya inkunda sha mu mipokapoka shiloosha.+ 17 Amaboko yabo yonse yakatompoka, na mu makufi yabo monse mukalakonkoloka amenshi.*+ 18 Balifwala insamu+ kabili balatutuma. Bonse bakekatwa insoni kabili bonse bakaba na mapala.*+

19 “‘Bakapoosaika silfere yabo mu misebo, kabili golde yabo bakaipata. Silfere yabo na golde yabo tafyakabapusushe mu bushiku bwa bukali bwa kwa Yehova.+ Tabakekute* kabili tabakalenge mu nda shabo mukesule, pantu e filenga* baleipununa kabili balebembuka. 20 Baliba ne cilumba pa mulandu wa fibekobeko fyabo ifisuma, ifyo bapangamo* ifimpashanya fyabo ifya bunani, ifilubi fyabo ifya bunani.+ E mulandu wine nkalengela bakafipate. 21 Nkafipeela* ku bena fyalo pa kuti bakafisampe na kubacita ifyabipa aba pe sonde pa kuti bakafipokolole kabili bakafikoweshe.

22 “‘Nkafumya icinso candi pali bena,+ nabo bakakowesha icifulo candi icafisama,* kabili ifipondo fikengilamo no kucikowesha.+

23 “‘Pangeni ceni,*+ pantu mu calo mwaisula ubupingushi bwa kwipaisha abantu+ kabili mu musumba mwaisula ulukakaala.+ 24 Ababipisha pa nko shonse e bo nkaleta,+ kabili e bakesa mu kwikala mu mayanda yabo,+ nkapwisha ne cilumba ca bakosa, kabili ififulo fyabo ifya mushilo bakafikowesha.+ 25 Ilyo bakacula sana, bakalafwaya umutende lelo tabakausange.+ 26 Amacushi yakalakonkana fye na malyashi ya bulanda nayo yakalakonkana fye, kabili abantu bakafwaya kasesema abebeko icimonwa,+ lelo shimapepo takakwate amafunde* kabili abakalamba nabo tabakapande abantu amano.+ 27 Imfumu ikalaloosha,+ na cilolo akaba no bulanda, kabili amaboko ya bantu ba mu calo yakalatutuma pa mulandu wa kuti bakasakamikwa. Ifyo nkabacita fikalingana ne fyo bacita, kabili nkabapingula ukulingana ne fyo bapingula. Lyena bakeshiba ukuti nine Yehova.’”+

8 Kabili mu mwaka walenga 6, pa bushiku bwalenga 5 ubwa mweshi uwalenga 6, ilyo naikele mu ng’anda yandi ninshi na bakalamba ba mu Yuda nabekala pa ntanshi yandi, ukuboko kwa kwa Shikulu Mulopwe Yehova kwalinjikete. 2 Ilyo naloleshe, namwene icali ngo muntu uwalemoneka ngo mulilo; ukutendekela mu musana ukuya kwi samba alemoneka ngo mulilo,+ e lyo ukutendekela mu musana ukuya ku muulu alebeeka kwati cela icabeeka icasakanamo silfere na golde.+ 3 Lyena afungulwile icalemoneka ngo kuboko kabili anjimiishe ku mushishi wa ku mutwe wandi. Lyena mu cimonwa icafumine kuli Lesa, umupashi walinsendele pa kati ka calo no muulu wantwala na ku Yerusalemu pa mpongolo iyabelele ku kapinda ka ku kuso,+ apali akalubi ka kalumwa* akalenga Lesa aba na kalumwa.+ 4 Kabili moneni! kulya e kwali ubukata bwa kwa Lesa wa kwa Israele,+ ubwalemoneka nga ubukata bulya namwene mu mpanga iyabatama.+

5 Lyena anjebele ati: “We mwana wa muntu, inwina amenso yobe ku kapinda ka ku kuso.” E ico nainwinine amenso yandi ku kapinda ka ku kuso, kabili lubali lwa ku kapinda ka ku kuso aka mpongolo ya ku ciipailo, apa kwingilila pali akalubi ka kalumwa.* 6 Kabili anjebele ati: “We mwana wa muntu, bushe wamona ifya bunani ifyabipa nga nshi, ifyo aba mu ng’anda ya kwa Israele balecita pano,+ ifilenga ndetaluka sana icifulo candi ica mushilo?+ Walamona ifya bunani na fimbi ifyabipa ukucila pali ifi.”

7 Lyena antwele apa kwingilila mu lubansa, kabili ilyo naloleshe, namwene icipunda mu cibumba. 8 E lyo anjeba ati: “We mwana wa muntu, tula icipunda icikalamba mu cibumba.” E ico nalitulile icipunda icikalamba mu cibumba, kabili namwene apa kwingilila. 9 Kabili anjebele ati: “Ingila mu kati no kumona ifyabipa kabili ifya bunani ifyo balecita pano.” 10 E ico nalingiile kabili ilyo naloleshe, namwene ifipashanya fya fikulika ifya misango yonse, ne finama fya bunani+ e lyo no tulubi twa bunani tonse* utwa mu ng’anda ya kwa Israele,+ ifyo balenga ukushinguluka icibumba conse. 11 Kabili kwali abakalamba 70 aba mu ng’anda ya kwa Israele abaiminine pa ntanshi ya fiko. Pali aba pali na Yaasania umwana wa kwa Shafani.+ Cila muntu alikete ica kufutumwinako ububani, kabili icushi ca bubani calefutumuka ukuya mu muulu.+ 12 Lyena anjebele ati: “We mwana wa muntu, bushe naumona ifyo abakalamba ba mu ng’anda ya kwa Israele balecita mu mfifi, ilyo cila muntu ali mu muputule wakwe uwa mu kati umwaba ifilubi fyakwe? Pantu baletila, ‘Yehova tatumona. Yehova alisha icalo.’”+

13 Kabili anjebele ati: “Walamona ifya bunani na fimbi ifyo balecita ifyabipa ukucila na pali ifi.” 14 E ico antwele apa kwingilila pa mpongolo ya ku kapinda ka ku kuso iya ng’anda ya kwa Yehova, kabili kulya e ko namwene abanakashi nabekala kabili baleloosha lesa Tamusi.

15 Anjebele no kuti: “Bushe wamona ifi we mwana wa muntu? Walamona ifya bunani na fimbi ifyabipa ukucila na pali ifi.”+ 16 E ico antwele mu lubansa lwa mu kati ulwa ng’anda ya kwa Yehova,+ pa mwinshi we tempele lya kwa Yehova. Pa kati ka muputule wa kwingililapo ne ciipailo, pali abaume nalimo 25 abafutatiile itempele lya kwa Yehova kabili baloseshe ifinso fyabo ku kabanga; balefukamina akasuba ku kabanga balefisha ne mpumi panshi.+

17 Anjebele ati: “Bushe wamona ifi we mwana wa muntu? Bushe mulandu uunono ifi aba mu ng’anda ya kwa Yuda balecita ifya bunani pano, ifi balelenga mu calo mwaba sana ulukakaala+ ne fi balenkalifya? Nomba balesunkila umusambo* ku myona yandi. 18 E ico nkakalipa nga nshi. Nshakabomfwile uluse;* kabili nshakabalangulukileko.+ Nangu bakalile ne shiwi ilikalamba mu matwi yandi, nshakabomfwe.”+

9 Lyena ambilikishe mwi shiwi ilikalamba ati: “Ita abakonaula umusumba, cila muntu ese ne canso ca konawilako mu minwe yakwe!”

2 Namwene abaume 6 abaleisa ukufuma ku nshila ya ku mpongolo ya pa muulu+ iyabela ku kapinda ka ku kuso. Cila muntu ali ne canso ca kutobawilako mu minwe yakwe; kabili pali bena pali no muntu uwafwele insalu iisuma, uo mu musana wakwe mwali ako kalemba abikamo inki, kabili balingiile, baiminina na lubali lwa ciipailo ca mukuba.+

3 Lyena ubukata bwa kwa Lesa wa kwa Israele,+ bwaimine ukufuma pa muulu wa bakerubi apo bwali no kuya ku mwinshi wa ng’anda,+ kabili atendeke ukubilikisha uwafwele insalu iisuma, uwakwete ako kalemba abikamo inki mu musana. 4 Yehova amwebele ati: “Kabiye upite mu musumba, mu Yerusalemu, kabili ushile akashilwa pa mpumi sha bantu abateta no kuliliishika+ pa fya bunani ifilecitika mu musumba.”+

5 Kabili aebele aba bambi ninshi ndeumfwako ati: “Piteni mu musumba mulemukonka kabili mwipayaule abantu. Mwibomfwila uluse* kabili mwibalangulukilako.+ 6 Mwipaye no kulofya abaume abakote, abalumendo, abakashana, abana abanono na banakashi.+ Lelo mwipalama pa muntu uuli onse uushililwe akashilwa.+ Mufwile ukutampila pa cifulo candi ica mushilo.”+ E ico batampiile pa bakalamba abali pa ntanshi ya ng’anda.+ 7 Lyena abebele ati: “Kowesheni ing’anda kabili mu mansa sha iko mwisushemo ifitumbi.+ Kabiyeni!” E ico balile kabili balipeye abantu mu musumba.

8 Ilyo baleipaya abantu, nine fye nashelepo kabili nalifukeme nafisha ne mpumi panshi, e lyo nalila nati: “Iye, mwe Shikulu Mulopwe Yehova! Bushe mwalalofya bonse abashalapo aba mu bena Israele ilyo mulepongolwela ubukali bwenu pali Yerusalemu?”+

9 E ico anjebele ati: “Imembu sha ba mu ng’anda ya kwa Israele na Yuda nashibipisha icine cine.+ Icalo ciswilemo ukusuumya umulopa+ kabili mu musumba mwiswile amafisakanwa.+ Batila, Yehova alisha icalo kabili Yehova talemona.’+ 10 Lelo ine nshakabomfwile uluse nelyo ukubalangulukilako.+ Ifikafuma mu fyabipa ifyo bacita nkafibika pa mitwe yabo.”

11 Lyena namwene ulya umwaume uwafwele insalu iisuma uo mu musana wakwe mwali aka kubikamo inki abwesha amashiwi, ati: “Nincita filya fine mwacinjeba.”

10 Ilyo natwalilile ukulolesha, namwene pa capala icintamba icali pa mitwe ya bakerubi pali icapala ilibwe lya safiri, icalemoneka nge cipuna ca Bufumu.+ 2 Lyena aebele umuntu uwafwele insalu iisuma+ ati: “Ingila pa kati ka mipeto,*+ mwi samba lya bakerubi, kabili wisushe mu minwe yobe amalasha ayaleaka+ ayali pa kati ka bakerubi no kuyapoosa pa musumba.”+ Na o alingiile ninshi na ine ndemonako.

3 Ilyo uyu muntu aingile ninshi bakerubi beminine ku kulyo kwa ng’anda kabili ikumbi lyaiswile mu lubansa lwa mu kati. 4 Kabili ubukata bwa kwa Yehova+ bwalimine ukufuma pali bakerubi apo bwali no kuya ku mwinshi wa ng’anda, kabili panono panono ikumbi lyaiswile mu ng’anda,+ na mu lubansa mwaiswile ulubuuto lwa bukata bwa kwa Yehova. 5 Kabili icongo ca mapindo ya bakerubi caleumfwika ukufika na ku lubansa lwa kunse. Caleumfwika nge ciunda ce shiwi lya kwa Lesa Wa Maka Yonse.+

6 Lyena aebele umwaume uwafwele insalu iisuma ati: “Buula umulilo uuli pa kati ka mipeto,* pa kati ka bakerubi,” na o alingiile no kwiminina mupepi no mupeto. 7 Lyena umo pali bakerubi afungulwile ukuboko kwakwe ukulola ku mulilo uwali pa kati kabo.+ Alapwilepo umulilo no ku-ubika mu ndupi sha mwaume uwafwele insalu iisuma,+ na o aliusendele kabili alifumine aya no kuya. 8 Bakerubi balikwete ifyalemoneka nga maboko ya bantunse mwi samba lya mapindo yabo.+

9 Ilyo natwalilile ukulolesha, namwene imipeto* 4 ku mbali ya bakerubi, cila kerubi ali mupepi no mupeto umo, kabili imipeto yalemoneka iyabeeka kwati libwe lya krusoliti.+ 10 Yonse 4 yalemoneka iyapalana, kabili yalemoneka kwati umupeto* umo uli mu mupeto ubiye. 11 Ilyo yale-enda, yaleya ku mbali shonse 4 ukwabula ukuti yaluke, pantu yaleya ukuli konse ukwalola umutwe ukwabula ukuti yaluke. 12 Imibili yabo yonse, inuma shabo, amaboko yabo, amapindo yabo ne mipeto* yonse 4 iyali mupepi nabo fyaiswile fye amenso yeka yeka.+ 13 Lyena naumfwile ishiwi lilebilikisha imipeto* aliti, “Mwe mipeto, akwendeni!”

14 Umo umo* akwete ifinso 4. Icinso ca kubalilapo cali cinso ca kwa kerubi, icinso calenga bubili cali cinso ca muntunse, icinso calenga butatu cali cinso ca nkalamo, ne cinso calenga 4 cali cinso ca kwa kapumpe.+

15 Kabili bakerubi baleima—aba bakerubi e filya ifya mweo ifyo namwene* ilyo nali ku mumana wa Kebari+— 16 kabili bakerubi nga basela, imipeto nayo yaleselela pamo nabo; bakerubi nga baimya amapindo yabo, pa kuti beme babe pa muulu we sonde, imipeto tayalealuka nelyo ukufuma ku lubali lwabo.+ 17 Nga baiminina shilili, nayo yaleiminina; nga baya mu muulu nayo yaleila pamo nabo, pantu nayo yalikwete umupashi uwalebombela mu fya mweo.*

18 Lyena ubukata bwa kwa Yehova+ bwalifumine pa mwinshi wa ng’anda, kabili bwaileiminina pa muulu wa bakerubi.+ 19 Nomba bakerubi balifungulwile amapindo yabo no kwima ukufuma pa mushili ninshi na ine ndemonako. Ilyo baimine, imipeto nayo yaimine pamo nabo. Ilyo bafikile pa mwinshi wa mpongolo iyabelele ku kabanga ka ng’anda ya kwa Yehova, baliminine kabili ubukata bwa kwa Lesa wa kwa Israele bwali pa muulu wabo.+

20 Ifi e filya fine ifya mweo namwene* ifyali mwi samba lya kwa Lesa wa kwa Israele ilyo nali ku mumana wa Kebari.+ Ici calengele naishiba ukuti ni bakerubi. 21 Bonse 4 balikwete ifinso 4, amapindo 4 ne fyalemoneka nga maboko ya bantu mwi samba lya mapindo.+ 22 Kabili ifinso fyabo fyalemoneka nga filya fine ifinso namwene ilyo nali ku mumana wa Kebari.+ Umo na umo aleya uko alungeme.+

11 Kabili umupashi walinjimishe no kuntwala ku mpongolo ya ku kabanga iya ng’anda ya kwa Yehova, impongolo iyalosha ku kabanga.+ Namwene abaume 25 pa mwinshi wa mpongolo kabili pali aba baume pali na Yaasania umwana wa kwa Asuri e lyo na Pelatia umwana wa kwa Benaya, bacilolo ba bantu.+ 2 Lyena anjebele ati: “We mwana wa muntu, aba e bantu abalepanga ukucita ifyabipa kabili e balepanda abantu amano yabipa muli uno musumba.* 3 Balelanda abati, ‘Bushe ino te nshita ya kukuula amayanda?+ Uno musumba* ni mpoto ya kwipikilamo,*+ e lyo ifwe tuli munofu.’

4 “E ico sesema pa fyabipa ifikabacitikila. Sesema, we mwana wa muntu.”+

5 Lyena umupashi wa kwa Yehova waishile pali ine,+ kabili anjebele ati: “Landa auti, ‘Ifi e fyo Yehova alanda: “Ifyo mulandile fya cine, mwe ba mu ng’anda ya kwa Israele, kabili ninjishiba ifyo muletontonkanya.* 6 Mwalilenga abantu abengi bafwa muli uno musumba, kabili mwalisusha ifitumbi mu misebo ya uko.”’”+ 7 “E ico Shikulu Mulopwe Yehova atila: ‘Ifitumbi fya bantu ifyo mwapoosaika mu musumba e munofu e lyo umusumba e mpoto,+ lelo imwe nkamufumyamo.’”

8 “‘Mulatiina ulupanga,+ kabili nkaleta ulupanga pali imwe,’ e fyo Shikulu Mulopwe Yehova alanda. 9 ‘Imwe nkamufumya mu kati ka uko kabili nkamupeela mu minwe ya bena fyalo, kabili nkamupingula.+ 10 Mukafwa ku lupanga.+ Nkamupingwila pa mupaka wa Israele+ kabili mukeshiba ukuti nine Yehova.+ 11 Kuli imwe umusumba tawakabe impoto ya kwipikilamo, na imwe tamwakabe umunofu mu kati ka iko; nkamupingwila pa mupaka wa Israele, 12 kabili mukeshiba ukuti nine Yehova. Pantu tamwaendele mu fipope fyandi kabili tamwakonkele ubupingushi bwandi,+ lelo mwakonkele ubupingushi bwa nko ishamushinguluka.’”+

13 Ilyo napwishishe fye ukusesema, Pelatia umwana wa kwa Benaya alifwile, e ico nalifukeme nafisha ne mpumi panshi e lyo nalila mwi shiwi ilikalamba nati: “Iye, mwe Shikulu Mulopwe Yehova! Bushe mwalalofya bonse abashalapo aba mu ng’anda ya kwa Israele?”+

14 Na kabili Yehova anjebele ati: 15 “We mwana wa muntu, bamunonko, aba muli balupwa lobe abakwata insambu sha kulubula ubupyani na bonse aba mu ng’anda ya kwa Israele, abo abekala mu Yerusalemu baeba abati, ‘Talukeni kuli Yehova. Icalo cesu; nifwe bapeela pa kuti cibe cesu.’ 16 E ico landa auti, ‘Shikulu Mulopwe Yehova atila: “Nangu ca kuti nalibatalushisha mu nko ishaba ukutali, kabili nangu ca kuti nalibasalanganishisha mu fyalo,+ nkaba icifulo cabo ica mushilo mu fyalo umo baya.”’+

17 “E ico landa auti, ‘Shikulu Mulopwe Yehova atila: “Nkamulonganika ukufuma mu bantu aba mishobo iyalekanalekana, kabili nkamulonganika ukufuma mu fyalo umo mwasalanganina, kabili nkamupeela icalo ca Israele.+ 18 Kabili bakesa mu calo no kufumyamo ifya muselu fyonse ne fya bunani fyonse ifyo bacita.+ 19 Kabili nkalenga bakabe no mutima umo,+ nkabika no mupashi uupya pali bena;+ mu mibili yabo nkafumyamo imitima iyakosa nge libwe+ no kubikamo imitima iyanaka ngo munofu,*+ 20 pa kuti bakale-enda mu fipope fyandi kabili bakalekonka ubupingushi bwandi. Lyena bakaba abantu bandi na ine nkaba Lesa wabo.”’

21 “‘“Lelo abatwalilila ukubika imitima yabo pa fya bunani na pa fya muselu ifyo bacita, nkabika ifikafuma mu fyabipa ifyo bacita pa mitwe yabo,” e fyo Shikulu Mulopwe Yehova alanda.’”

22 Bakerubi bafungulwile amapindo, kabili imipeto* yali mupepi nabo,+ no bukata bwa kwa Lesa wa kwa Israele bwali pa muulu wabo.+ 23 Lyena ubukata bwa kwa Yehova+ bwalimine ukufuma pa musumba, kabili ilyo bwafikile pa muulu wa lupili ulwabela ku kabanga ka musumba,+ bwaliminine. 24 Lyena mu cimonwa umupashi wa kwa Lesa walinjimishe no kuntwala kuli bankole abali mu Kaldi. Pa numa icimonwa ico nalemona calipwile. 25 Kabili natendeke ukweba bankole fyonse ifyo Yehova anangile.

12 Na kabili Yehova anjebele ati: 2 “We mwana wa muntu, wikala mu ng’anda ya bacipondoka. Balikwata amenso lelo tabamona, balikwata amatwi lelo tabomfwa,+ pantu bena ni ng’anda ya bacipondoka.+ 3 Lelo iwe we mwana wa muntu, uipekanishishe ifipe fya kusenda kwati uleya muli bunkole. Lyena mu nshita ya kasuba ufwile ukuya muli bunkole ninshi balemonako. Ukafume mu calo cobe ukaye muli bunkole ku calo cimbi ninshi balemonako. Nalimo kuti batontonkanyapo, nangu ca kuti ni ng’anda ya bacipondoka. 4 Mu nshita ya kasuba, ufumye ifipe fyobe ifyo walonga kwati uleya muli bunkole, ninshi nabo balemonako. Lyena mu nshita ya cungulo ufwile ukuya kwati muntu uo basenda bunkole,+ ninshi nabo balemonako.

5 “Utule icipunda mu ng’anda yobe ninshi balemonako, e po ufifumishe.+ 6 Ufisendele pa kubeya ninshi balemonako. Kabili ufifumye ninshi nakufiita. Uifimbe pa menso pa kuti wimona umushili, pantu ndelenga ube icishibilo ca ba mu ng’anda ya kwa Israele.”+

7 Nalicitile filya fine banjebele. Mu nshita ya kasuba nalifumishe ifipe fyandi, nge fipe fya kusenda muli bunkole, kabili mu nshita ya bushiku natulile icibumba ku minwe yandi. Kabili ilyo kwafiitile nalifumishe ifipe fyandi no kufisendela pa kubeya, ninshi balemonako.

8 Mu nshita ya lucelo na kabili Yehova anjebele ati: 9 “We mwana wa muntu, bushe aba mu ng’anda ya kwa Israele, ing’anda ya bacipondoka, tabakwipwishe abati, ‘Cinshi ulecita?’ 10 Ubebe auti, ‘Shikulu Mulopwe Yehova aleti: “Aya amashiwi yakumine intungulushi+ sha mu Yerusalemu na bonse aba mu ng’anda ya kwa Israele abali mu musumba.”’

11 “Landa auti, ‘Ndi cishibilo cenu.+ Ifyo nacita, nabo e fyo bakabacita. Bakabasenda bunkole, bakabasenda.+ 12 Intungulushi iili pali bena ikasendela ifipe fya iko pa kubeya kabili ikaya ninshi napafiita. Ikatula icibumba no kupushishapo ifipe fya iko.+ Ikaifimba pa menso pa kuti ikamona umushili.’ 13 Nkapoosa isumbu lyandi pali iyi intungulushi, kabili ikekatwa muli ili isumbu.+ Lyena nkaitwala ku Babiloni, ku calo ca bena Kaldi, lelo tayakacimone; kabili kulya kwine e ko ikafwila.+ 14 Kabili bonse abo yaba nabo, abayafwa na bashilika, nkabasalanganishisha mu ntunga shonse;+ kabili nkasomona ulupanga no kubapepeka.+ 15 Kabili ilyo nkabasalanganishisha mu nko na mu fyalo, e lyo bakeshiba ukuti nine Yehova. 16 Lelo nkalenga abantu abanono fye e bo bakapusuke ku lupanga, ku cipowe na ku cikuko, pa kuti mu nko isho bakayamo, bakalelondolola ifya bunani fyonse ifyo balecita; kabili bakeshiba ukuti nine Yehova.”

17 Na kabili Yehova anjebele ati: 18 “We mwana wa muntu, ufwile ukulalya umukate ninshi uletutuma no kulanwa amenshi mwenso mwenso kabili ninshi nausakamikwa.+ 19 Eba abantu ba mu calo auti, ‘Shikulu Mulopwe Yehova ale-eba abekala mu Yerusalemu, mu calo ca Israele aleti: “Bakalalya umukate wabo ninshi nabasakamikwa, kabili bakulanwa amenshi yabo mwenso mwenso pantu icalo cabo cikaba icibolya+ pa mulandu wa kuti bonse abekalamo balecita ulukakaala.+ 20 Imisumba iyo abantu bekalamo ikonaulwa, kabili icalo cikashala icibolya;+ e lyo mukeshiba ukuti nine Yehova.”’”+

21 Yehova anjebele na kabili ati: 22 “We mwana wa muntu, inga iyi insoselo mwakwata mu Israele, iitila ‘Napapita inshiku ishingi, lelo ifyaba mu cimonwa tafyacitika’?+ 23 E ico ubebe auti, ‘Shikulu Mulopwe Yehova aleti: “Nkalenga iyi insoselo ikapwe, kabili tabakatwalilile ukuilanda mu Israele.”’ Lelo ubebe auti, ‘Inshiku nashipalama,+ kabili fyonse ifyaba mu fimonwa fikacitika.’ 24 Pantu mu ng’anda ya kwa Israele tamwakatwalilile ukuba ifimonwa fya bufi nelyo ukubuka kwa bucenjeshi.+ 25 ‘“Pantu ine ne Yehova nkalanda, conse ico nkalanda cikacitika ukwabula ukushingashinga.+ Mu nshiku shenu+ mwe ba mu ng’anda ya bacipondoka nkalanda icebo kabili nkacita ifyo nkalanda,” e fyo Shikulu Mulopwe Yehova alanda.’”

26 Na kabili Yehova anjebele ati: 27 “We mwana wa muntu, aba mu Israele* baleti, ‘Ifyo alemona mu cimonwa fikacitika ku ntanshi, kabili ifyo alesesemenapo fikacitika ku ntanshi sana.’+ 28 E ico ubebe auti, ‘Shikulu Mulopwe Yehova aleti: “‘Fyonse ifyo nanda tafyakashingashinge; fyonse ifyo nalanda fikacitika,’ e fyo Shikulu Mulopwe Yehova alanda.”’”

13 Na kabili Yehova anjebele ati: 2 “We mwana wa muntu, sesema ifyabipa ifikacitikila bakasesema ba kwa Israele,+ kabili webe abasesema ifyebo*+ auti, ‘Umfweni icebo ca kwa Yehova. 3 Shikulu Mulopwe Yehova atila: “We bulanda kuli bakasesema abatumpa, abakonka ifya mu mitima yabo, e lyo ninshi tapali ico bamwene!+ 4 We Israele, bakasesema bobe bali kwati ni bamumbwe abali mu fibolya. 5 Tamwakaye uko ifibumba fya mabwe fyatobeka pa kuti mukuulile aba mu ng’anda ya kwa Israele+ ifi fibumba cipya cipya, pa kuti Israele akapusuke inkondo mu bushiku bwa kwa Yehova.”+ 6 “Bamona ifimonwa fya bufi kabili basobela ifya bufi, abatila, ‘Aya e mashiwi ya kwa Yehova,’ e lyo ninshi Yehova umwine tabatumine, kabili balolela ukuti ifyo basobela fifikilishiwe.+ 7 Bushe te cimonwa ca bufi mwamona, kabili bushe te fya bufi musobela ilyo mutila, ‘Aya e mashiwi ya kwa Yehova,’ e lyo ninshi nshalanda nangu cimo?”

8 “‘E ico Shikulu Mulopwe Yehova atila: “‘Apo mulanda ifya bufi kabili ifimonwa fyenu fya bufi, ndemulwisha,’ e fyo Shikulu Mulopwe Yehova alanda.”+ 9 Nkabomfya ukuboko kwandi ukwa maka pa kukanda bakasesema abamona ifimonwa fya bufi+ kabili abasobela ifya bufi. Pe bumba lya fibusa fyandi tabakabepo; kabili amashina yabo tayakabe mu fyalembwa fya bena Israele; tabakabwekele na ku calo ca Israele; kabili mukeshiba ukuti nine Shikulu Mulopwe Yehova.+ 10 Icikalenga fyonse ifi ni co balilufya abantu bandi pantu babeba abati, “Kuli umutende!” e lyo ninshi takuli umutende.+ Ilyo bakuula icibumba icishakosa, bakupawilako impemba.’*+

11 “Eba abalekupawila impemba ku cibumba auti cikawa. Imfula iikalamba ikesa, imfula ya mabwe ikaloka* kabili icimwela icikalamba ica maka cikaciwisha.+ 12 Kabili ilyo icibumba cikawa, bakamwipusha abati: ‘Inga impemba mwashingwilileko ili kwi?’+

13 “E ico Shikulu Mulopwe Yehova atila: ‘Nkalenga kukabe icimwela icikalamba ica maka pa mulandu wa bukali bwandi, kabili nkalenga kukabe imfula iikalamba ninshi nimfulwa nga nshi, nkalosha ne mfula ya mabwe iikaconaula ninshi ninkalipa nga nshi. 14 Nkabongolola icibumba ico mwakupawilako impemba kabili nkaciwisha panshi, no mufula wa ciko ukashala pa mbilibili. Ilyo umusumba ukawa, mukafwila mu musumba wine uyu; kabili mukeshiba ukuti nine Yehova.’

15 “‘Ilyo nkaleka ubukali bwandi bonse bukese pa cibumba na pa balekupawilako impemba nkamweba nati: “Icibumba naciwa kabili abalekupawilako impemba nabaloba.+ 16 Bakasesema ba kwa Israele abalesesemena mu musumba wa Yerusalemu kabili abalemona ifimonwa fya mutende e lyo ninshi tamwali umutende,+ nabaloba.”’ E fyo Shikulu Mulopwe Yehova alanda.

17 “Nomba iwe we mwana wa muntu, losha icinso cobe pa bana banakashi ba bantu abasesema ifyabo abene, kabili useseme pa fyabipa ifikabacitikila. 18 Bebe auti, ‘Shikulu Mulopwe Yehova atila: “We bulanda ku banakashi abalebilila abantu insalu sha kufwala ku maboko* kabili abalepanga ififimbo fya ku mitwe iyapusanapusana ubukulu, pa kuti mulelunga* abantu kwati fyuni! Bushe mulelunga abantu bandi* kwati fyuni e lyo ninshi imwe mulefwaya mutwalilile ukuba abomi?* 19 Bushe mukampontela pa bantu bandi pa mulandu fye wa barle ya mu lupi na pa mulandu wa bufungau bwa mikate?+ Bushe mwipaya abantu abashifwile ukufwa* e lyo mwaleka abantu abafwile ukufwa* baba no mweo ilyo mubepa abantu bandi abakutika ifya bufi ifyo mubeba?”’+

20 “E ico Shikulu Mulopwe Yehova atila: ‘Moneni nalipata impimpi shenu mwe banakashi isho mubomfya pa kulunga abantu* bandi kwati mulelunga ifyuni. Nkashiputaula ku maboko yenu kabili nkaleka abantu abo mulelunga kwati fyuni bakaye. 21 Nkaputaula ififimbo fyenu, nkapokolola na bantu bandi mu minwe yenu kabili tamwakatwalilile ukubalunga kwati fyuni; lyena mukeshiba ukuti nine Yehova.+ 22 Pantu mwalifuupula umutima wa walungama pa mulandu wa bufi bwenu+ e lyo ninshi ne mwine nshalenga aba no bulanda,* kabili mwalikosha amaboko ya mubifi+ pa kuti eleka ukucita ifyabipa, kabili engatwalilila ukuba no mweo.+ 23 E ico imwe mwe banakashi tamwakatwalilile ukumona ifimonwa fya bufi, kabili tamwakatwalilile ukubuka;+ kabili nkapokolola abantu bandi mu minwe yenu. Lyena mukeshiba ukuti nine Yehova.’”

14 Kabili abakalamba bamo aba mu Israele balishile baikala na pa ntanshi yandi.+ 2 Lyena Yehova anjebele ati: 3 “We mwana wa muntu, aba baume balafwaisha ukulakonka utulubi twabo utwa bunani,* kabili balipanga ica kuipununako icilenga abantu balebembuka. Bushe mbaleke balenjipusha?+ 4 Nomba landa nabo kabili ubebe auti, ‘Shikulu Mulopwe Yehova alanda ati: “Nga ca kuti umwina Israele alefwaisha ukulakonka utulubi twakwe utwa bunani kabili abikako ica kuipununako icilenga abantu balabembuka, lyena aisa mu kwipusha kasesema, ine ne Yehova nkamwasuka ukulingana no bwingi bwa tulubi twakwe utwa bunani. 5 Pantu nkalenga aba mu ng’anda ya kwa Israele bakabe no mwenso,* pa mulandu wa kuti bonse balinsha kabili bakonkelela utulubi twabo utwa bunani.”’+

6 “E ico eba aba mu ng’anda ya kwa Israele auti, ‘Shikulu Mulopwe Yehova aleti: “Bweleni kabili sheni utulubi twenu utwa bunani, mufumye ne finso fyenu ku fya bunani fyonse ifyo mucita.+ 7 Pantu nga ca kuti umwina Israele nelyo umulebeshi uwikala mu Israele, aitalusha kuli ine kabili alafwaisha ukukonka utulubi twakwe utwa bunani, abika ne ca kuipununako icilenga abantu ukubembuka e lyo aisa mu kwipusha kuli kasesema wandi,+ ine ne Yehova, nine nkamwasuka. 8 Nkalosha icinso candi pali uyo muntu no kumulenga akabe ica kusokelako abantu, kabili nkalenga akabe insoselo, nkamufumya na pa bantu bandi;+ e lyo mukeshiba ukuti nine Yehova.”’

9 “‘Nomba nga ca kuti uyo kasesema abepwa kabili amwasuka, ninshi nine ne Yehova nabepa uyo kasesema.+ Lyena nkafungulwila ukuboko kwandi pali ena kabili nkamulofya, nkamufumya na pa bantu bandi abena Israele. 10 Bakaba no mulandu; umulandu wa muntu uwile mu kwipusha ukaba fye umo wine no mulandu uo kasesema akakwata, 11 pa kuti aba mu ng’anda ya kwa Israele bakaleke ukuitalusha kuli ine, kabili bakaleke ukuikowesha ne fyabipa fyonse ifyo bacita. Lyena bakaba abantu bandi na ine nkaba Lesa wabo,’+ e fyo Shikulu Mulopwe Yehova alanda.”

12 Yehova anjebele na kabili ati: 13 “We mwana wa muntu, nga ca kuti icalo camembukila pa mulandu wa kuti tacili ne cishinka kuli ine, nkafungulwila ukuboko kwandi pali cena kabili nkalenga ifya kulya fikaleke ukwisamo,*+ nkaletamo ne cipowe+ kabili nkalofya abantu ne nama muli ico calo.”+ 14 “‘Nangu aba abaume batatu bengaba muli ico calo,—Noa,+ Daniele+ na Yobo,+—kuti baipususha fye abene beka* pa mulandu wa bulungami bwabo,’+ e fyo Shikulu Mulopwe Yehova alanda.”

15 “‘Nelyo nga nalenga mu calo mwapita inama mpanga ishikali kabili shalenga mu calo tamushele umuntu nangu umo,* shalenga ne calo cashala icibolya ica kuti tapali nangu umo uulepitamo pa mulandu wa kutiina inama mpanga,+ 16 na pali ne mwine,’ e fyo Shikulu Mulopwe Yehova alanda, ‘nangu mwingaba aba abaume batatu, te kuti bapusushe abana babo abaume nangu abana babo abanakashi, kuti baipususha fye abene beka, kabili icalo kuti cashala icibolya.’”

17 “‘Nelyo tutile naleta ulupanga pali ico calo,+ kabili natila: “Ulupanga nalupite muli ico calo,” nalo lwaipaya abantu ne nama,+ 18 nangu mwingaba aba baume batatu, na pali ne mwine,’ e fyo Shikulu Mulopwe Yehova alanda, ‘te kuti bapusushe abana babo abaume nangu abana babo abanakashi, lelo kuti baipususha fye abene.’”

19 “‘Nelyo tutile natuma icikuko muli ico calo+ kabili mu bukali bwandi nasuumya umulopa, no kwipaya abantu ne nama, 20 nangu mwingaba Noa,+ Daniele+ na Yobo,+ na pali ne mwine,’ e fyo Shikulu Mulopwe Yehova alanda, ‘te kuti bapusushe umwana wabo umwaume nangu umwana wabo umwanakashi; kuti baipususha* fye abene beka pa mulandu wa bulungami bwabo.’”+

21 “Pantu Shikulu Mulopwe Yehova atila: ‘Ifi fine e fyo cikaba ilyo nkatuma ifintu 4 ifyo nkakandilako+ Yerusalemu*—ulupanga, icipowe, inama mpanga ishikali ne cikuko+—pa kulofya abantu ne nama mu Yerusalemu.+ 22 Na lyo line abakapusuka bakafulumuka kabili bakafuma+ mu musumba pamo na bana babo abaume na bana babo abanakashi. Bakesa kuli imwe, kabili ilyo mukamona imibele yabo iyabipa ne fyabipa ifyo bacita, mukasansamushiwa pa mulandu ne fyabipa ifyo nkaleta pali Yerusalemu, pali fyonse ifyo nkacita uyu musumba.’”

23 “‘Mukasansamushiwa ilyo mukamona imibele yabo iyabipa ne fyabipa ifyo bacita, kabili mukeshiba ukuti kwali icalengele ncite ico nacitile kuli uyu musumba,’+ e fyo Shikulu Mulopwe Yehova alanda.”

15 Na kabili Yehova anjebele ati: 2 “We mwana wa muntu, bupusano nshi bwaba pa cimuti ca mwangashi ne fimuti fimbi, nelyo umusambo wa ciko ne fimuti fimbi ifya mu mpanga? 3 Bushe kuti babuulako icimuti ca kubomfya ilyo balebomba imilimo? Nelyo bushe abantu kuti bapangako utwa kukobekako ifipe? 4 Mona! Ciba ni nkuni isho babika pa mulilo, kabili umulilo uloca impela sha ciko shonse shibili ne ca pa kati cishala fye icishishi. Bushe nomba kuti bacibomfya ku mulimo uuli onse? 5 Nangu ni lintu cili icituntulu tabacibomfya ku mulimo nangu umo. Pali bufi umulilo nga wacoca kabili cashala fye icishishi, bushe kuti bacibomfya ku mulimo uuli onse?”

6 “E ico Shikulu Mulopwe Yehova aleti: ‘Filya fine icimuti ca mwangashi icaba pa fimuti fya mu mpanga caba, ico natila cifwile fye ukuba inkuni sha kukosesha umulilo, e fyo nkacita abekala mu Yerusalemu.+ 7 Nindosha icinso candi pali bena. Balifulumuka mu mulilo, lelo umulilo wine e ukabalofya. Kabili mukeshiba ukuti nine Yehova ilyo nkalosha icinso candi pali bena.’”+

8 “‘Kabili nkalenga icalo cikabe icibolya,+ pantu tababa ne cishinka kuli ine,’+ e fyo Shikulu Mulopwe Yehova alanda.”

16 Na kabili Yehova anjebele ati: 2 “We mwana wa muntu, eba Yerusalemu ifya bunani ifyo acita.+ 3 Ufwile ukulanda auti, ‘Ifi e fyo Shikulu Mulopwe Yehova ale-eba Yerusalemu: “Mu calo ca mwina Kanaani e mo watuntwike kabili e mo wafyalilwe. Wiso ali mwina Amore+ e lyo noko ali mwina Hiti.+ 4 Pa bushiku wafyelwe tabakuputwile umutoto, tabakusambile mu menshi pa kuti bakuwamye, tabakusubile umucele, kabili tabakupombele mu nsalu. 5 Takwali uwakumfwilile uluse no kukucitilako cimo pali ifi. Takwali uwakulangulukileko. Lelo bakupoosele mu mpanga pa mulandu wa kuti balikupatile* pa bushiku wafyelwe.

6 “‘“Ilyo nalepita, nalikumwene ninshi ulealangana fye mu mulopa obe, kabili nakwebele ninshi uli mu mulopa obe nati: ‘Wifwa!’ awe nakwebele ninshi uli mu mulopa obe nati: ‘Wifwa!’ 7 Nakulengele ukufula nge fimenwa fya mwi bala kabili walikulile walepa no kulepa, watendeke no kufwala ifibekobeko ifisuma nga nshi. Amabele yobe yalituntumene, no mushishi obe walikulile; lelo ninshi ucili ubwamba kabili ubusokwa.”’

8 “‘Ilyo nakumwene ninshi ndepita, nalimwene ukuti walikulile ica kutila kuti waba mu citemwiko. E ico nalifungulwile ica kufwala candi+ no kukufimba pa kuti wiba ubwamba. Nalilapile umulapo kabili nalipangene nobe icipangano,’ e fyo Shikulu Mulopwe Yehova alanda, ‘na iwe waishileba uwandi. 9 Na kabili, nalikusambile mu menshi kabili nalikusambile umulopa, nakusuba na mafuta.+ 10 Lyena nakufwikile ica kufwala ico bayemfya, nakupeela ne ndyato isha mpapa iisuma,* kabili nalikupombele insalu iisuma ku mutwe nakufwika ne fya kufwala ifya mutengo nga nshi. 11 Nalikuyemfeshe ne fibekobeko, kabili nalikufwikile amakosa ku maboko na kacheni mu mukoshi. 12 Nalikubikile na akalisikiyo pa moona, nakufwika na masikiyo ku matwi e lyo ne cilongwe* icisuma pa mutwe obe. 13 Walitwalilile ukuiyemfya na golde na silfere, kabili ifya kufwala fyobe fyali ifya nsalu ishisuma kabili isha mutengo nga nshi, walefwala ne ca kufwala ico bayemfya. Walelya ubunga bwapeleka bwino, ubuci na mafuta, kabili waishileba uwayemba icine cine.+ E ico walifikilepo ukuba namfumu.’”*

14 “‘Ukulumbuka kobe* kwatendeke ukusalanganina mu nko+ pa mulandu wa kuyemba kobe, wali uwayemba icine cine pa mulandu wa fyo nakuyemfeshe,’+ e fyo Shikulu Mulopwe Yehova alanda.”

15 “‘Lelo watendeke ukucetekela ukuyemba kobe+ kabili waishileba cilende pa mulandu no kulumbuka kobe.+ Walecita bucilende no mupitanshila onse,+ kabili ukuyemba kobe kwaishileba kwa bapitanshila. 16 Wabuulile ifya kufwala fyobe kabili e fyo waemfeesheko ififulo fya kupepelapo apo ucitila bucilende+—ifintu fya musango uyu tafifwile ukucitika, kabili fikatala aficitikapo. 17 Wabuulile ne fibekobeko fyobe ifyayemba ifyo bapangila na golde na silfere iyo nakupeele no kupangamo ifimpashanya fya baume kabili walecita nafyo bucilende.+ 18 Wabuulile ne fya kufwala fyobe ifyo bayemfya no kufimba pa fimpashanya, kabili walefituula amafuta yandi no bubani bwandi.+ 19 No mukate uo nakupeele—uo bapangila no bunga ubwapeleka bwino, amafuta no buci, uo nakupeele ukuti ulye—na o wautuulile ngo mutuulo wa kacena akasuma* kuli ifi ifimpashanya.+ Ifi fine e fyo cali,’ e fyo Shikulu Mulopwe Yehova alanda.”

20 “‘Wabuulile abana bobe abaume na bana bobe abanakashi abo wamfyaliile,+ kabili wabatuulile amalambo kuli ifi ifilubi+—bushe ifya bucilende fyobe tafyafula? 21 Walipeye abana bandi abaume, kabili walibocele ilyo wabatuulile kuli ifi ifilubi.+ 22 Ilyo walecita ifya bunani fyobe fyonse ne fya bucilende, tawaibukishe inshiku wali umwaice ilyo wali ubwamba kabili ubusokwa, ilyo walealangana mu mulopa obe. 23 Pa mulandu wa fyabipa fyonse ifyo wacita cikakubipila, cikakubipila,’+ e fyo Shikulu Mulopwe Yehova alanda 24 ‘Waipangiile icifulo ca kupepelapo balesa babufi, waipangiile ne fifulo fya kupepelapo mu mansa shonse. 25 Waikuulile ififulo fya kupepelapo pa fifulo ifyalumbuka mu misebo yonse kabili wayalwile ukuyemba kobe kwaba ica bunani ilyo waleipeela* ku mupitanshila onse+ kabili walecita sana bucilende.+ 26 Wacitile bucilende na bana baume ba ku Egupti,+ abena mupalamano bobe abacita sana bucilende,* kabili walinkalifye umutima pantu walecita sana bucilende. 27 Nomba nkafungulwila ukuboko kwandi pali iwe, kabili nkacefya ifya kulya fyobe,+ nkalenga na banakashi abakupata bakakucite ifyo balefwaya,+ abana banakashi ba baPelishiti, abo waseebenye pa mulandu ne fya nsoni ifyo walecita.+

28 “‘Pa mulandu wa kuti umutima obe tawaikele, wacitile bucilende na bana baume ba ku Asiria,+ lelo na pa numa ya kucita nabo bucilende umutima obe tawaikele. 29 E ico walicitile sana bucilende mu calo ca bashimakwebo na mu calo* ca bena Kaldi,+ nomba na lyo line umutima obe tawaikele. 30 Umutima obe walyonaike,’* e fyo Shikulu Mulopwe Yehova alanda, ‘ilyo walecita ifi fyonse, ilyo walecita ificita cilende uwapama!+ 31 Lelo ilyo wakuulile ififulo fya kupepelapo balesa babufi mu ncende ishacindama nga nshi mu misebo yonse, wakuula ne fifulo fya kupepelapo mu mansa shonse, tawali nga cilende pantu walekaana amalipilo yonse. 32 Uli mwanakashi uwaupwa uusha umulume wakwe no kuya mu kucita ubucende na baume bambi bambi!+ 33 Abantu e bapeela bacilende bonse ifya bupe,+ lelo iwe niwe upeela abantu bonse abo ucita nabo bucilende ifya bupe+ kabili ulabalipila pa kuti bafume mu ncende ishalekanalekana bese mu kucita nobe bucilende.+ 34 Iwe ucita ifyapusana ne ficita abanakashi bambi abacita bucilende. Takwaba uucita bucilende nge fyo iwe ucita, iwe ulalipila abo ucita nabo bucilende, lelo bena tabakulipila. Ifyo iwe ucita fyalipusana ne ficita bacilende bambi.’

35 “E ico iwe cilende,+ umfwa icebo ca kwa Yehova. 36 Shikulu Mulopwe Yehova atila: ‘Pa mulandu wa kuti ulwinso lobe nalucilamo kabili ifya mfwalo fyobe balifimona ku batemwikwa bobe ilyo mucita nabo bucilende na ku tulubi tobe tonse utwa bunani,* utwa muselu,+ uto watuulako umulopa wa bana bobe abaume,+ 37 ndelonganika bonse aba kutemwa abo walesekesha, bonse abo watemenwe na bonse abo wapatile, nkabalonganika ukufuma mu ncende shonse isho babamo pa kuti bakakwimine, kabili nkakufuula pa menso yabo nabo bakamona ifya mfwalo fyobe fyonse.+

38 “‘Kabili nkakukanda ukulingana ne fyo abanakashi abacende+ na banakashi abasuumya umulopa+ bafwile ukukandwa, no mulopa obe ukalasuuma pa mulandu wa bukali bwandi no bufuba.+ 39 Nkakupeela mu minwe yabo, nabo bakabongolola ififulo fyobe ifya kupepelapo balesa ba bufi, kabili ififulo fyobe ifya kupepelapo nafyo bakafibongolola;+ bakakufuula ne fya kufwala+ bakasende ne fibekobeko fyobe ifisuma+ e lyo bakakushe ubwamba kabili ubusokwa. 40 Bakaleta ibumba ilikakwimina,+ kabili likakupoola amabwe,+ likakwipaile na ku lupanga.+ 41 Bakoca amayanda yobe ku mulilo+ kabili bakakukandila pa menso ya banakashi abengi; nkalenga ukaleke no kucita bucilende,+ ukaleke no kulipila abaume abo ucita nabo bucilende. 42 Nkapwishisha ubukali bwandi pali iwe,+ kabili nkaleka ukukumfwila uluse;+ lyena umutima wandi ukekala kabili nshakatwalilile ukumfwa ububi pa fyo wancita.’

43 “‘Pa mulandu wa kuti tawaibukishe inshiku sha bwaice bobe+ kabili walinkalifya pa mulandu wa fyo ucita, nkabika ifyabipa ifikafuma mu fyo ucita pa mutwe obe,’ e fyo Shikulu Mulopwe Yehova alanda, ‘kabili tawakatwalilile ukucita ifya nsoni pamo ne fya bunani fyobe fyonse.

44 “‘Mona! Onse uulanda amapinda akalanda ili ipinda pali iwe ilya kuti: “Ifyaba nyina e fyaba no mwana wakwe umwanakashi!”+ 45 Uli mwana mwanakashi wa kwa noko uwasuulile umulume wakwe na bana bakwe. Uli nkashi ya ba nkashi nobe, abasuulile abalume babo na bana babo. Noko ali mwina Hiti, e lyo wiso ali mwina Amore.’”+

46 “‘Nkashi nobe umukalamba uwaikala ku kapinda ka ku kuso* ni Samaria+ na bana bakwe abanakashi,+ kabili nkashi nobe umwaice, uwaikala ku kapinda ka ku kulyo* ni Sodomu+ na bana bakwe abanakashi.*+ 47 Tawaendele fye mu nshila shabo no kucitako ifya bunani ifyo balecita, lelo mu nshita fye iinono walicitile ne fyabipa ifingi ukucila ifyo balecita.+ 48 Na pali ne mwine,’ e fyo Shikulu Mulopwe Yehova alanda, ‘Sodomu nkashi nobe, na bana bakwe abanakashi, tabacitapo ifyo iwe na bana bobe abanakashi mwacita. 49 Mona! Ifi e filubo fya kwa Sodomu nkashi nobe: Ena na bana bakwe abanakashi+ bali ne cilumba,+ balikwete ifya kulya ifingi+ kabili baleikala ubwanalale;+ nomba tabaleafwa abo abantu batitikishe na bapiina.+ 50 Balitwalilile ukuba na matutumuko+ kabili balecita ifya bunani pa cinso candi,+ e ico namwene ukuti calilingile ukubalofya.+

51 “‘Kabili Samaria+ na o imembu isho acita tashafika na pa kati nga kushilinganya ku membu isho wacita, walitwalilila ukucita ifya bunani ifingi ukucila ifyo bena bacita, ica kuti bankashi nobe bamoneke abalungama pa mulandu wa fya bunani fyonse ifyo ucita.+ 52 Nomba ufwile ukuseebana pa mulandu wa kuti ulatungilila* ifyabipa ifyo bankashi nobe bacita. Apo imembu shobe shalibipa ukucila isho bankashi nobe bacita, bena balilungama ukukucila. E ico nomba umfwa insoni kabili seebana pa kulenga bankashi nobe bamoneke ukuti balilungama.’

53 “‘Kabili nkalonganya bankole babo, bankole ba kwa Sodomu na bana bakwe abanakashi, na bankole ba kwa Samaria na bana bakwe abanakashi; nkalonganya na bankole bobe pamo na bankole babo,+ 54 pa kuti ukaseebane; kabili ukaseebana pali fyonse ifyo wacita pa kubasansamusha. 55 Bankashi nobe, e kutila Sodomu na bana bakwe abanakashi bakaba ifyo bali kale, na Samaria na bana bakwe abanakashi bakaba ifyo bali kale, na iwe wine na bana bobe abanakashi mukaba ifyo mwali kale.+ 56 Nkashi nobe Sodomu talingile no kuti ulemulumbula mu bushiku wali ne cilumba, 57 ninshi ifyabipa ifyo ucita tafilasokololwa.+ Nomba abana banakashi ba kwa Siria na bena mupalamano bakwe balakusaalula, kabili abana banakashi ba baPelishiti+ na bonse abakushinguluka, balakupumya. 58 Ifyabipa ifikafuma mu mibele yobe iya nsoni na mu fyabipa ifyo ucita fikakukuma,’ e fyo Yehova alanda.”

59 “Pantu Shikulu Mulopwe Yehova atila: ‘Ifyo nkakucita fikalingana ne fyo wacita,+ pantu walisuulile umulapo ilyo watobele icipangano candi.+ 60 Lelo ine nkebukisha icipangano ico napangene nobe ilyo wali umwaice, kabili nkapangana nobe icipangano ca muyayaya.+ 61 Ukebukisha ifyo ucita kabili ukaseebana+ ilyo ukapokelela bankashi nobe, abakalamba pali iwe na baice pali iwe, kabili nkakupeela aba bankashi nobe, bakabe nga bana bobe abanakashi, lelo te pa mulandu wa cipangano napangene na iwe.’

62 “‘Kabili ine nkapangana nobe icipangano; e lyo ukeshiba ukuti nine Yehova. 63 Lyena ukebukisha kabili ukomfwa insoni pa fyabipa ifyo ucita pa mulandu wa fyo ukaseebana,+ ilyo nkafuuta ifyabipa ifyo ucita nangu ca kuti walicita ifyabipa ifingi,’+ e fyo Shikulu Mulopwe Yehova alanda.”

17 Na kabili Yehova anjebele ati: 2 “We mwana wa muntu, pikila aba mu ng’anda ya kwa Israele ubwile kabili bomine ipinda.+ 3 Ulande auti, ‘Shikulu Mulopwe Yehova atila: “Kapumpe umukalamba,+ uwa mapindo ayakalamba na masako ayatali, uwa masako ayengi ayabalabata, aile ku Lebanone+ no kutimpula akantongolilo ka mukedari e lyo akasenda.+ 4 Atimpwile akantongolilo ka uyu mukedari akalepuuka e lyo akatwala ku calo ca ba makwebo,* kabili aile kalimba mu musumba wa ba makwebo.+ 5 Lyena abuulilepo imbuto shimo isha mu calo+ e lyo ayashibyala mwi bala ilyakwata umushili wa mufundo. Ailefibyala nge fimuti fya muwilo mu ncende umwaba sana amenshi. 6 E ico ulubuto lwalimenene kabili lwaishileba umwangashi uwipi uwaandalile,+ ne misambo ya uko yalekula ukulola mu kati, e lyo imishila ya uko yaleya panshi. E ico waishileba umwangashi kabili walikwete imisambo.+

7 “‘“Kwaishile kapumpe na umbi umukalamba,+ uwa mapindo ayakulu, na masako ayatali.+ Lyena uyu mwangashi watwele imishila ya uko kuli uyu kapumpe, ukufuma mu luputa umo baulimbile, kabili watwele imisambo ya uko kuli ena pa kuti aleutapilila.+ 8 Baulimbile mwi bala ilisuma mu ncende umwaba sana amenshi, pa kuti wingakwata imisambo, wingatwala ifisabo kabili wingaba umwangashi uukalamba.”’+

9 “Landa auti, ‘Shikulu Mulopwe Yehova atila: “Bushe ukakula fye bwino? Bushe takwakabe uukanukula imishila ya uko+ ica kuti ifisabo fya uko fikabole no lulembelya lwa uko lukome?+ Ukoma sana ica kuti takwakalefwaikwa ukuboko ukwa maka nelyo abantu abengi pa kuunukwila kumo ne mishila. 10 Nangu ca kuti bakaulimbula no kuulimba pambi, bushe ukakula? Bushe tawakome fye onse ilyo umwela wa ku kabanga ukapuupapo? Ukomina mu luputa umo wapukiile.”’”

11 Na kabili Yehova anjebele ati: 12 “Shi eba aba mu ng’anda ya bacipondoka auti, ‘Bushe tamwishibe umo ifi fintu filolele?’ Landa auti, ‘Moneni! Imfumu ya ku Babiloni yaishile ku musumba wa Yerusalemu no kusenda imfumu ya uko na bacilolo ba muli uyu musumba e lyo yabwelelamo nabo ku Babiloni.+ 13 Kabili yabuulile uwa ku bufumu* umo+ no kupangana nankwe icipangano e lyo yamulapisha umulapo.+ Lyena yasendele intungulushi sha mu calo,+ 14 pa kuti ubufumu bucepelwe amaka ica kuti te kuti bwime, ica kutila kuti bwatwalilila fye ukubako nga ca kuti asunga icipangano.+ 15 Lelo iyi imfumu yasukile yamupondokela+ pantu yalitumine inkombe ku Egupti, pa kuti shingayasenda bakabalwe+ ne bumba lya bashilika ilikalamba.+ Bushe ikatunguluka? Bushe uulecita ifi kuti apusuka? Bushe nga yatoba icipangano kuti yapusuka?’+

16 “‘“Na pali ne mwine,” e fyo Shikulu Mulopwe Yehova alanda, “akafwila ku Babiloni ku cifulo ukwikala imfumu* iyamubikile pa bufumu,* iyo asuulile umulapo wa iko kabili iyo atobele icipangano ca iko.+ 17 Kabili ibumba lya bashilika ilikalamba na bashilika abengi aba kwa Farao tabakamwafwe mu nkondo,+ ilyo bakapanga ifya kusanshilapo kabili ilyo bakakuula amalinga ya kushingilako umusumba pa kuti balofye abantu abengi.* 18 Alisuulile umulapo kabili alitobele icipangano. Nangu ca kuti alilaile,* alicita ifi fyonse, kabili takapusuke.”

19 “‘E ico Shikulu Mulopwe Yehova atila: “Na pali ne mwine, ifikafuma muli filya asuulile umulapo wandi+ na filya atobele icipangano candi, nkafibika pa mutwe wakwe. 20 Nkafungulwila isumbu lyandi pali ena, kabili akekatwa mwi sumbu lyandi.+ Nkamutwala ku Babiloni kabili kulya e ko nkamupingwila pa mulandu wa kuti tali ne cishinka kuli ine.+ 21 Pa bashilika bakwe, abakafulumukapo bakafwa ku lupanga, kabili abakashalapo bakasalanganina mu ntunga shonse.*+ Lyena mukeshiba ukuti ine ne Yehova ninanda.”’+

22 “‘Shikulu Mulopwe Yehova atila: “Nkatimpula akantongolilo ka mukedari+ no kukalimba, kabili pa mpela ya tumisambo twa uko nkatimpulapo akamusambo akateku+ no kukalimba pa lupili ulutali kabili ulwasansuka.+ 23 Nkakalimba pa lupili ulutali ulwa mu Israele nako kakalimbuka; kabili kakakwata imisambo, kakatwale ne fisabo. Kabili kakaba umukedari uukalamba, mwi samba lya uko mukekala ifyuni fya misango yonse. Kabili fikalaikala mu cintelelwe ca mabula ya uko. 24 Kabili ifimuti fyonse ifya mu mpanga fikeshiba ukuti ine ne Yehova, nine nseebenye icimuti icitali, kabili nine nsansabike icimuti icipi;+ ninenga icimuti icibishi cauma kabili ninenga icimuti icauma cabalula.+ Ine ne Yehova ninanda kabili nincita.”’”

18 Na kabili Yehova anjebele ati: 2 “Bushe ili ipinda ilyo mulanda mu calo ca Israele lyalola mwi? Mutila, ‘Bashibo e balya imyangashi iyakantuka, lelo ameno ya bana e yawa.’+

3 Shikulu Mulopwe Yehova atila, “‘Na pali ne mwine, tamwakatwalilile ukulanda ili ipinda mu Israele. 4 Moneni! Imyeo yonse yandi. Umweo* wa kwa wishi no mweo wa mwana—yonse yandi. Umweo uubembuka e ukafwa.

5 “‘Tutile umuntu alilungama, alikwata umulinganya kabili alacita ifyalungama. 6 Talya amalambo ya tulubi pa mpili;+ tenwina amenso ku tulubi twa bunani* utwa ba mu ng’anda ya kwa Israele; talaala no mukashi wa munankwe,+ kabili talaala no mwanakashi uuli ku mweshi;+ 7 tacusha umuntu nangu umo,+ lelo alabwesha iciikatilo ico asendele ku wa nkongole;+ tapoka umuntu nangu umo ifintu ku maka,+ lelo alapeelako uuli ne nsala ifya kulya+ kabili uwasapula alamupeelako ica kufwala;+ 8 nga akongwesha tapoka nsonsela kabili takongwesha kaloba,+ lelo takwata ulufyengo;+ alakwata umulinganya ilyo alepingula abantu babili;+ 9 kabili alakonka amafunde yandi no bupingushi bwandi pa kuti abe uwa cishinka. Umuntu wa musango yu alilungama. Kabili nangu cibe shani akatwalilila ukuba no mweo,’+ e fyo Shikulu Mulopwe Yehova alanda.

10 “‘Nomba tutile uyu muntu akwata umwana umwaume uupoka abantu ifintu ku maka,+ uwipaya*+ nelyo uucita ifyapala ifi 11 (nangu ca kuti wishi tacitapo nangu cimo pali ifi)—nga alalya amalambo ya tulubi pa mpili, nga alalaala no mukashi wa munankwe, 12 alacusha abalecula na bapiina,+ alapoka abantu ifintu ku maka, tabwesha iciikatilo ico asendele ku wa nkongole, alenwina amenso ku tulubi utwa bunani,+ alacita ifya muselu,+ 13 alakongwesha kaloba kabili nga akongwesha alapoka nsonsela+—lyena uyu mwana takatwalilile ukuba no mweo. Pa mulandu ne fya bunani fyonse ifi ifyo acita, nangu cikabe shani akafwa. Umulopa wakwe ukaba pali ena.

14 “‘Nomba tutile umuntu alifyala umwana umwaume uumona imembu shonse isho wishi acita, lelo nangu ca kuti alashimona, ena tashicita. 15 Talya amalambo ya tulubi pa mpili; tenwina amenso yakwe ku tulubi twa bunani utwa ba mu ng’anda ya kwa Israele; talaala no mukashi wa munankwe; 16 tacusha umuntu nangu umo; tapoka iciikatilo ku wa nkongole; tapoka abantu ifintu ku maka; alapeelako uuli ne nsala ifya kulya kabili uwasapula alamupeelako ica kufwala; 17 tacusha umupiina; takongwesha kaloba nelyo ukupoka nsonsela nga akongwesha indalama; alakonka ubupingushi bwandi kabili alakonka amafunde yandi. Umuntu wa musango uyu takafwile pa membu sha kwa wishi. Nangu cibe shani akatwalilila ukuba no mweo. 18 Lelo wishi ena, pa mulandu wa kuti alecita ubucenjeshi, alepoka munyina ifintu ku maka kabili alicitile ifyabipa pa bantu bakwe, akafwila pa membu shakwe.

19 “‘Lelo imwe mukatila: “Inga cinshi umwana ashikandilwa pa membu sha kwa wishi?” Ni co umwana aliba no mulinganya, alacita ifyalungama, kabili alakonka amafunde yandi yonse. Nangu cibe shani akatwalilila ukuba no mweo.+ 20 Umweo uubembuka e ukafwa.+ Umwana takakwatile umulandu pa membu sha kwa wishi, wishi na o takakwatile umulandu pa membu sha mwana. Uwalungama e o bakalambula pa fyalungama ifyo acita, e lyo umubifi e o bakakanda pa mulandu ne fyabipa ifyo acita.+

21 “‘Lelo umubifi nga aleka ukucita imembu shonse isho alecita, atwalilila ukukonka amafunde yandi, aba no mulinganya kabili alacita ifyalungama, nangu cibe shani akatwalilila ukuba no mweo. Takafwe.+ 22 Tabakamupingwile* pa fyabipa nangu fimo ifyo alecita.+ Akatwalilila ukuba no mweo pa mulandu wa kuti alacita ifyalungama.’+

23 “‘Bushe ndasekelela umubifi nga afwa?’+ e fyo Shikulu Mulopwe Yehova alanda. ‘Bushe nshifwaya ayaluka pa kuti engatwalilila ukuba no mweo?’+

24 “‘Lelo uwalungama nga aleka ukucita ifyalungama kabili atendeka ukucita ifyabipa,* alacita fyonse ifya bunani ifyo abacita ifyabipa bacita, bushe akatwalilila ukuba no mweo? Tapali nangu cimo pa fyalungama ifyo acitile icikebukishiwa+ pantu akafwila pa kukanaba ne cishinka na pa membu isho acita.+

25 “‘Lelo imwe mukatila: “Mu fyo Yehova acita tamwaba umulinganya.”+ Shi umfweni mwe ba mu ng’anda ya kwa Israele! Bushe mu fyo ncita e mushaba umulinganya?+ Bushe te mu fyo mucita umushaba umulinganya?+

26 “‘Ilyo uwalungama aleka ukucita ifyalungama kabili atendeka ukucita ifyabipa ica kuti afwilanapo, ifyabipa ifyo acita e fyo akafwilapo.

27 “‘Kabili umubifi nga aleka ukucita ifyabipa ifyo alecita, atendeka ukuba no mulinganya kabili alacita ifyalungama, akatwalilila ukuba no mweo.*+ 28 Nga ailuka ukuti alecita ifyabipa kabili aleka ukucita ifyabipa fyonse ifyo alecita, nangu cibe shani akatwalilila ukuba no mweo. Takafwe.

29 “‘Lelo aba mu ng’anda ya kwa Israele bakalanda abati: “Mu fyo Yehova acita tamwaba umulinganya.” Mwe bana ba kwa Israele, bushe mu fyo ncita e mushaba umulinganya?+ Bushe te mu fyo mucita umushaba umulinganya?’

30 “‘E ico nkapingula umuntu onse ukulingana ne fyo acita,+ mwe ba mu ng’anda ya kwa Israele,’ e fyo Shikulu Mulopwe Yehova alanda. ‘Lekeni ukucita ifyabipa, ala lekeni ukucita ifyabipa fyonse ifyo mucita, pa kuti mwikwata ica kuipununako icingalenga mwaba no mulandu. 31 Lekeni ukucita ifyabipa fyonse ifyo mucita+ kabili kwateni umutima uupya no mupashi uupya,+ pa kuti mwikafwa+ mwe ba mu ng’anda ya kwa Israele.’

32 “‘Pantu nshitemwa umuntu uuli onse nga afwa,’+ e fyo Shikulu Mulopwe Yehova alanda. ‘E ico pilibukeni pa kuti mube no mweo.’”+

Alelaala pamo ne nkalamo ishana,* kabili alekusha abana bakwe.

 3 “‘Alikushishepo akana kamo, kabili kaishileba inkalamo iyana iya maka.+

 5 “‘Alilolelele asuka amona ukuti umwana tali no kubwela.

E ico abuulile akana kambi no kukatuma nge nkalamo iyana iya maka.

 6 Nayo yale-endauka pamo ne nkalamo shimbi kabili yaishileba inkalamo iyana iya maka.

Yalisambilile ifya kusantaula ico yaikata kabili yalelya abantu.+

 9 Babomfeshe ifya kukobelako no kuibika muli kasalanga kabili baitwele ku mfumu ya ku Babiloni.

Ilyo bafikile kulya, bali-isaliile pa kuti ukubuluma kwa iko kwitwalilila ukumfwika pa mpili sha mu Israele.

10 “‘Noko ali nge cimuti ca mwangashi+ mu mulopa obe,* uo balimba mupepi na menshi.

Waletwala ifisabo kabili walikwete imisambo iingi pa mulandu wa menshi ayengi.

11 Waishilekwata imisambo* iyakosa ica kuti yalilingile ukuba inkonto sha bakateka.

Imisambo yakwe iyakosa bali-iputawile, yalyumine+ kabili yalipile mu mulilo.+

“‘Ulu lwimbo lwa bulanda, kabili lukaba lwimbo lwa bulanda.’”

20 Nomba mu mwaka walenga 7, mu mweshi walenga 5, pa bushiku bwalenga 10 ubwa uyu mweshi, abakalamba bamo aba mu Israele baishileikala pa ntanshi yandi pa kuti bepushe Yehova. 2 Lyena Yehova anjebele ati: 3 “We mwana wa muntu, landa na bakalamba ba mu Israele, kabili ubebe auti, ‘Shikulu Mulopwe Yehova atila: “Bushe mwishile mu kwipusha ine? ‘Na pali ne mwine, nshamusuminishe ukunjipusha,’+ e fyo Shikulu Mulopwe Yehova alanda.”’

4 “Bushe nauipekanya ukubapingula?* Bushe nauipekanya ukubapingula, we mwana wa muntu? Lenga beshibe ifya bunani ifyo ifikolwe fyabo fyalecita.+ 5 Ubebe auti, ‘Shikulu Mulopwe Yehova atila: “Mu bushiku nasalile Israele,+ nalilapile* ku bana* ba mu ng’anda ya kwa Yakobo kabili nalilengele banjishiba mu calo ca Egupti.+ Cine cine nalilapile kabili nabebele nati, ‘Nine Yehova Lesa wenu.’ 6 Muli bulya bushiku nalilapile ukuti nali no kubafumya mu calo ca Egupti no kubatwala ku calo ico nabalengwilile, umwaba sana umukaka no buci.+ Icalo icawamishe* pa fyalo fyonse. 7 Lyena nabebele nati, ‘Cila muntu apoose ifya bunani ifyo aloleshapo; lekeni ukuikowesha ku tulubi twa bunani* utwa mu Egupti.+ Nine Yehova Lesa wenu.’+

8 “‘“Lelo balimpondokele, kabili tabalefwaya ukumfwa ifyo nalebeba. Tabapoosele ifya bunani ifyali pa ntanshi yabo, kabili tabashile utulubi twa bunani utwa ku Egupti.+ E ico nabebele nati, nkabapongolwela ubukali bwandi, kabili nkaleka ubukali bwandi bonse bukese pali bena mu calo ca Egupti. 9 Lelo nalicitilepo cimo pa mulandu we shina lyandi, pa kuti abantu ba mu nko abo abena Israele baleikala nabo+ bepontela ishina lyandi. Pantu nalengele banjishiba* pa menso ya ishi nko ilyo nabafumishe* mu calo ca Egupti.+ 10 E ico nabafumishe mu calo ca Egupti no kubatwala mu matololo.+

11 “‘“Lyena nabapeele amafunde yandi no bupingushi bwandi ifya kuti umuntu nga alefikonka,+ kuti aba no mweo.+ 12 Nabapeele na masabata yandi,+ aya kuba icishibilo pa kati kabo na ine,+ pa kuti baleibukisha ukuti ine ne Yehova nine ndelenga babe aba mushilo.

13 “‘“Lelo aba mu ng’anda ya kwa Israele balimpondokele ilyo bali mu matololo.+ Tabalekonka amafunde yandi kabili balikeene ukukonka ubupingushi bwandi, ifya kuti umuntu nga alefikonka kuti aba no mweo. Balisaalwile sana amasabata yandi. E ico nalandile ukuti nkapongolwela ubukali bwandi pali bena mu matololo pa kuti nkabalofye.+ 14 Nalicitilepo cimo pa mulandu we shina lyandi pa kuti abantu ba mu nko abamweneko ilyo nabafumishe* mu calo ca Egupti bepontela ishina lyandi.+ 15 Kabili nalilapile ukuti nshakabengishe mu calo ico nabapeele+—icalo umwaba sana umukaka no buci,+ icalo icawamisha* pa fyalo fyonse— 16 pa mulandu wa kuti balikeene ubupingushi bwandi, tabalekonka amafunde yandi kabili balisaalwile amasabata yandi pantu imitima yabo yalefwaya utulubi twabo utwa bunani.+

17 “‘“Lelo nalebomfwila uluse,* kabili nshabonawile; nshabalofeshe ilyo bali mu matololo. 18 Naebele abana babo mu matololo+ nati, ‘Mwilakonka amafunde ya fikolwe fyenu+ nelyo ubupingushi bwabo nelyo ukulaikowesha ku tulubi twabo utwa bunani. 19 Nine Yehova Lesa wenu. Mulekonka amafunde yandi kabili mulekonka ubupingushi bwandi.+ 20 Kabili muleleka amasabata yandi yaleba aya mushilo,+ kabili yaleba icishibilo pa kati kenu na ine, ica kumwibukishako ukuti nine Yehova Lesa wenu.’+

21 “‘“Lelo abana babo batendeke ukumpondokela.+ Tabalekonka amafunde yandi, kabili tabalekonka ubupingushi bwandi, ifya kuti umuntu nga alefikonka kuti aba no mweo. Balesaalula amasabata yandi. E ico natile nali no kubapongolwela ubukali bwandi, kabili nali no kuleta ubukali bwandi bonse pali bena mu matololo.+ 22 Lelo nali-ilamine+ kabili nalicitilepo cimo pa mulandu we shina lyandi,+ pa kuti abantu ba mu nko abalemonako ilyo nalebafumya* mu calo ca Egupti bepontela ishina lyandi. 23 Na kabili, nalilapile pali bena mu matololo ukuti nali no kubasalanganishisha mu nko na mu fyalo ifyalekanalekana,+ 24 pa mulandu wa kuti tabakonkele ubupingushi bwandi kabili balikeene amafunde yandi,+ balisaalwile amasabata yandi, kabili balekonka* utulubi twa bunani utwa fikolwe fyabo.+ 25 Kabili nalekele balakonka amafunde ayashaweme no bupingushi ubushali no kulenga baba no mweo.+ 26 Nalibalekele balaikowesha ku malambo yabo—ilyo baleoca amabeli yabo yonse mu mulilo+—pa kuti mbalofye na pa kuti beshibe ukuti nine Yehova.”’

27 “E ico we mwana wa muntu eba aba mu ng’anda ya kwa Israele auti, ‘Shikulu Mulopwe Yehova atila: “Ifi fine e fyo ne fikolwe fyenu fyamponteele pantu tafyali ne cishinka kuli ine. 28 Nabaletele mu calo ico nalapile ukuti nali no kubapeela.+ Ilyo bamwene utupili tonse utwasansuka ne fimuti fyonse ifya fumba,+ batampile ukutuula amalambo yabo ne mituulo ya kunkalifya. Baletuula imituulo yabo iya kacena akasuma,* kabili mu calo cine ici, e mo baleitulwila imituulo yabo iya myangashi. 29 E ico nabepwishe nati, ‘Cinshi muila kuli ici icifulo ca kupepelapo? (Ukufika na lelo citwa ukuti Icifulo ca Kupepelapo.)’”’+

30 “Nomba eba aba mu ng’anda ya kwa Israele auti, ‘Shikulu Mulopwe Yehova atila: “Bushe muleikowesha nge fyaikoweseshe ifikolwe fyenu, ilyo fyalekonkelela utulubi twa fiko utwa bunani, pa kuti ficite nato bucilende?+ 31 Kabili bushe mucili muleikowesha ukufika na buno bushiku ukupitila mu kutuula imituulo yenu ku tulubi twenu tonse utwa bunani, na mu kupitila mu koca abana benu mu mulilo?+ Bushe mulefwaya ndemwasuka nga mwaisa mu kunjipusha, nangu ca kuti mucili mulecita ifi mwe ba mu ng’anda ya kwa Israele?”’+

“‘Na pali ne mwine,’ e fyo Shikulu Mulopwe Yehova alanda, ‘nshakalemwasuka.+ 32 Kabili ifyo mutontonkanya ilyo mutila, “Na ifwe bene natube nge nko shimbi, nge nko sha mu fyalo fimbi, ishipepa* ifimuti na mabwe,”+ tafyakacitike.’”

33 “‘Na pali ne mwine,’ e fyo Shikulu Mulopwe Yehova alanda, ‘nkaba imfumu pali imwe kabili nkamutekela ku kuboko ukwa maka, ku kuboko ukwatambalikwa kabili nkapongolwela ubukali bwandi pali imwe.+ 34 Nkamufumya mu nko, kabili nkamulonganya ukufuma mu fyalo umo mwasalanganina ku kuboko kwandi ukwa maka, ku kuboko ukwatambalikwa e lyo na ku bukali ubo nkapongolola.+ 35 Nkamutwala mu matololo ya nko, kabili mulya mwine e mo nkalubulula nenu ninshi natuloshanya ne finso.+

36 “‘Nga filya fine nalubulwile ne fikolwe fyenu mu matololo ya calo ca Egupti, e fyo nkalubulula na imwe,’ e fyo Shikulu Mulopwe Yehova alanda. 37 ‘Nkalenga mukapite mwi samba lya nkonto ya kwa kacema+ kabili nkalenga mukasunge icipangano. 38 Lelo nkafumya pali imwe bacipondoka na bamembukila.+ Pantu nkabafumya mu calo icishili cabo, lelo mu calo ca Israele tabakengilemo;+ kabili mukeshiba ukuti nine Yehova.’

39 “Nomba imwe mwe ba mu ng’anda ya kwa Israele, ifi e fyo Shikulu Mulopwe Yehova alanda, atila: ‘Cila muntu aleya mu kubombela utulubi twakwe utwa bunani.+ Lelo pa numa nga ca kuti tamwakulang’umfwila, tamwakatwalilile ukusaalula ishina lyandi ilya mushilo ukupitila mu malambo yenu na mu tulubi twenu utwa bunani.’+

40 “Shikulu Mulopwe Yehova alanda ati, ‘Pantu mu lupili lwandi ulwa mushilo, ulupili ulutali ulwa mu Israele,+ e mo aba mu ng’anda ya kwa Israele bonse, bonse fye mu calo, bakamombela.+ Mulya mwine e mo nkasekelela pali bena, kabili nkafwaya imisangulo yenu ne mituulo yenu iya fisabo ifyabalilapo ukupya, ifintu fyenu fyonse ifya mushilo.+ 41 Nkasekelela pali imwe pa mulandu wa mituulo ya kacena akasuma,* ilyo nkamufumya mu nko kabili ilyo nkamulonganika ukufuma mu fyalo umo mwasalanganina;+ kabili nkalenga mukamone ukuti ndi wa mushilo ne nko nasho shikamona ifi.’+

42 “‘Kabili mukeshiba ukuti nine Yehova,+ ilyo nkamutwala mu calo ca Israele,+ mu calo ico nalapile ukuti nkapeela ifikolwe fyenu. 43 Kabili mulya mwine e mo mukebukishisha imibele yenu iyabipa na fyonse ifyo mwalecita ifyalengele muikoweshe,+ kabili mukomfwa insoni* pa fyabipa fyonse ifyo mwacitile.+ 44 Lyena mukeshiba ukuti nine Yehova ilyo nkamucita ifi pa mulandu we shina lyandi,+ te kulingana ne mibele yenu iyabipa nangu ifyabipa ifyo mucita mwe ba mu ng’anda ya kwa Israele,’ e fyo Shikulu Mulopwe Yehova alanda.”

45 Na kabili Yehova anjebele ati: 46 “We mwana wa muntu, losha icinso cobe ku kapinda ka ku kulyo kabili sesema ifyabipa ifikacitikila akapinda ka ku kulyo, sesema ne fikacitikila umutengo wa ku kapinda ka ku kulyo. 47 Eba umutengo wa ku kapinda ka ku kulyo auti, ‘Umfwa icebo ca kwa Yehova. Shikulu Mulopwe Yehova atila: “Mona, ndesonteka umulilo muli iwe,+ kabili ukoca icimuti conse icibishi ne cimuti conse icauma. Ulubingu lwa uyu mulilo talwakashime,+ kabili lukoca ifinso fyonse ukufuma ku kapinda ka ku kulyo ukufika ku kapinda ka ku kuso. 48 Kabili abantu bonse bakamona ukuti ine ne Yehova, nine ngusonteke pa kuti wikashima.”’”+

49 Kabili natile: “Iye mwe Shikulu Mulopwe Yehova! Balanda pali ine abati, ‘Bushe talepika fye ubwile?’”*

21 Na kabili Yehova anjebele ati: 2 “We mwana wa muntu, pilibuka no kulosha icinso cobe ku Yerusalemu, kabili ulande ifyabipa ifikacitikila ififulo fya mushilo, useseme ne fyabipa ifikacitikila icalo ca Israele. 3 Eba icalo ca Israele auti, ‘Ifi e fyo Yehova alanda: “Mona nkakulwisha, kabili nkasomona ulupanga mu cikwama ca luko+ no kulofya abalungama na bacita ifyabipa ababa muli iwe. 4 Apo nkepaya abalungama na bacita ifyabipa ababa muli iwe, ulupanga lwandi lukasomonwa mu cikwama ca luko pa kuti lukepaye abantu bonse, ukufuma ku kapinda ka ku kulyo ukuyafika ku kapinda ka ku kuso. 5 Abantu bonse bakeshiba ukuti ine ne Yehova, ninsomona ulupanga lwandi mu cikwama ca luko. Talwakabwelelemo.”’+

6 “Na iwe we mwana wa muntu, teta uku ninshi uletutuma,* utete sana pa menso yabo.+ 7 Kabili nga bakwipusha abati, ‘Cinshi uletetela?’ ukabasuke auti, ‘Ni pa mulandu wa fyo ng’umfwile.’ Pantu nangu cibe shani fikacitika, no mutima onse ukasunguluka pa mulandu wa mwenso kabili amaboko yonse yakatompoka na bantu bonse bakomfwa umwenso kabili mu makufi yonse mukalakonkoloka amenshi.*+ ‘Moneni! Nangu cibe shani fikacitika—fikacitika,’ e fyo Shikulu Mulopwe Yehova alanda.”

8 Na kabili Yehova anjebele ati: 9 “We mwana wa muntu, sesema, kabili landa auti, ‘Yehova atila: “Landa auti, ‘Ulupanga! Ulupanga+ balunoona, kabili balupukuta lwabeeka. 10 Nabalunoona pa kuti lwipaye abantu abengi; nabalupukuta pa kuti lulebeeka nge nkuba.’”’”

“Bushe tatufwile ukusekelela?”

“‘Bushe lukakaana* inkonto ya bufumu iya mwana wandi,+ nge fyo lukaana icimuti conse?

11 “‘Nindupeela pa kuti balupukute kabili balubomfye. Ulu ulupanga nabalunoona kabili nabalupukuta, pa kuti bapeele uwa kwipaya.+

12 “‘Punda kabili lila umusowa,+ we mwana wa muntu, pantu ulupanga nalwisa pa bantu bandi; lulelwisha intungulushi shonse isha mu Israele.+ Aba ebo ulupanga lukepaya pamo na bantu bandi. E ico uma pe tanta pa mulandu wa bulanda. 13 Pantu abantu bandi nabaceeceetwa,+ kabili cinshi cikacitika nga ca kuti ulupanga lwakaana inkonto ya bukateka? Iyi inkonto tayakatwalilile ukubako,’+ e fyo Shikulu Mulopwe Yehova alanda.

14 “Kabili iwe we mwana wa muntu, sesema kabili utoote amapi e lyo ulande ukuti ‘Ulupanga!’ imiku itatu. Ulupanga ulwipaya, ulupanga ulwipaya abantu abengi, e lwabashinguluka.+ 15 Imitima yabo ikasunguluka ku mwenso+ kabili abengi bakawa pa mpongolo sha musumba wabo; nkepaila abengi ku lupanga. Cine cine lulebeeka nge nkuba kabili nabalupukuta pa kuti lwipaye abantu! 16 Komena ku kulyo! Sunshisha ulupanga ku kuso! Kabiye konse uko ulupanga lulelola! 17 Na ine wine nkatoota amapi kabili nkapwisha ubukali bwandi.+ Ine ne Yehova, ninanda.”

18 Yehova anjebele na kabili ati: 19 “Lelo iwe we mwana wa muntu, langilila inshila shibili umo ulupanga lwa mfumu ya Babiloni lukesapita ilyo lukesa. Shonse ishi inshila shibili shifwile ukufuma mu calo cimo cine, kabili ufwile ukubika icipampa* apo ishi nshila shibili shalekanina ukwingila mu misumba ibili. 20 Ufwile ukulangilila inshila imo umo ulupanga lufwile ukupita pa kuya ku musumba wa Raba+ uwa bena Amone, ne nshila na imbi iya kulangilila umo lukapita pa kuya ku Yuda mu musumba wa Yerusalemu+ uwe linga ilyakosa. 21 Pantu imfumu ya ku Babiloni ikeminina pa masansa, apalekaanina ishi inshila shibili, pa kuti ikabuke imbuko. Ikasunkanya imifwi. Ikepusha utulubi twa iko;* ikaceeceeta ilibu. 22 Ulubuko ululi mu kuboko kwa iko ukwa ku kulyo lulelangilila ukuti bafwile ukuya ku Yerusalemu mu kubika ifya kubongolwelako amalinga, mu kubilisha ukuti bali no kwipaya abantu, mu kuyawelesha ukuwelesha kwa nkondo, mu kupanga ifya konawilako impongolo, mu kupanga ica kuninapo pa kusansa na mu kukuula ilinga lya kushingilako umusumba.+ 23 Lelo abalapile* imilapo kuli bena+ bakamona kwati ifili mu lubuko fya bufi. Lelo ikebukisha ifilubo fyabo kabili ikabekata.+

24 “E ico Shikulu Mulopwe Yehova atila: ‘Namulenga ifilubo fyenu fyaibukishiwa pantu namulenga ifyabipa ifyo mucita ne membu isho mucita fyaishibikwa kabili fyamoneka pa mulandu na fyonse ifyo mucita. Apo nomba nabamwibukisha, bakamusenda ku maka.’*

25 “Nomba ubushiku bobe nabufika, inshita ya kukukanda pa muku wa kulekeleshako we ntungulushi ya Israele+ iyo bacena sana kabili iyabipa. 26 Shikulu Mulopwe Yehova atila: ‘Fumyako icitambala, kabili fuula icilongwe.*+ Ifi tafyakatwalilile ukuba ifi fine.+ Imya uwaba panshi,+ kabili uwaba pa muulu mubweshe.+ 27 Nkaconaula, nkaconaula, nkaconaula. Kabili tacakakwate umwine mpaka uwakwata insambu sha kucikwata akese,+ kabili e o nkapeela.’+

28 “Nomba iwe, we mwana wa muntu, sesema, kabili landa auti, ‘Ifi e fyo Shikulu Mulopwe Yehova alanda pa bana ba kwa Amone na pa musaalula wabo.’ Landa auti, ‘Ulupanga! Ulupanga nalusomonwa pa kuti lwipaye; nabalupukuta pa kuti lwipaye na pa kuti lubeeke kwati ni nkuba. 29 Nangu ca kuti balamona ifimonwa fya bufi, kabili balabuka imbuko sha bufi pali iwe, abantu bobe abo bakepaya bakaba umwina umo,* abacita ifyabipa, abo ubushiku bwabo bukafika kabili abo inshita yabo ikafika iya kubakanda pa muku wakulekeleshako. 30 Lubweseshe mu cikwama ca luko. Nkakupingwila kulya kwine wabumbilwe, mu calo ico watuntwikemo. 31 Nkapongolwela ubukali bwandi pali iwe. Nkakupuutila umulilo wa bukali bwandi, kabili nkakupeela mu minwe ya bantu abakaluka, kabili abaishiba sana ukonaula.+ 32 Ukaba inkuni sha kubika pa mulilo;+ umulopa obe ukasuuma mu calo, kabili tawakebukishiwe, pantu ine ne Yehova, ninanda.’”

22 Na kabili Yehova anjebele ati: 2 “Lelo iwe, we mwana wa muntu, bushe nauipekanya ukweba umusumba* uusuumya umulopa ifyo upingwilwe+ no kuweba ifya bunani fyonse ifyo ucita?+ 3 Ufwile ukulanda auti, ‘Shikulu Mulopwe Yehova atila: “We musumba uusuumya umulopa+ mu kati kobe, we o inshita yobe ileisa,+ we upanga utulubi twa bunani* uto uikoweshako,+ 4 uli no mulandu pantu walisuumya umulopa,+ kabili utulubi tobe utwa bunani twalilenga waba uwakowela.+ Nawipifya inshiku shobe, kabili naulenga imyaka yobe yapwa. E co nkakuseebanishisha ku nko kabili e co nkalengela ifyalo fyonse fikalekuwela.+ 5 Ifyalo fya mupepi ne fyalo fya kutali fikakuwela,+ we o ishina lyakowela kabili we wakwata sana icimfulumfulu. 6 Mona! Intungulushi shonse isha mu Israele, cila muntu abomfya amaka yakwe mu kusuumya umulopa.+ 7 Abantu ababa muli iwe balasaalula bashibo na banyinabo.+ Balacenjesha umulebeshi kabili balacusha abana abashakwata bashibo* na bamukamfwilwa.”’”+

8 “‘Ulasuula ififulo fyandi ifya mushilo, kabili ulasaalula amasabata yandi.+ 9 Muli iwe mwaliba aba lwambo kabili abafwaya ukusuumya umulopa.+ Muli iwe mwaliba abaliila amalambo pa mpili kabili abacita ifya nsoni mu kati kobe.+ 10 Muli iwe mwaliba abasaalula amasanshi ya bashibo,*+ kabili balaala no mwanakashi wakowela uuli ku mweshi.+ 11 Muli iwe mwaliba abaume abacita ifyakowela ku bakashi ba banabo,+ mwaliba na baume abakowesha banafyalebo ilyo bacita nabo ifya nsoni,+ na bambi bakowesha bankashi yabo abana banakashi aba bashibo.+ 12 Muli iwe mwaliba abapoka amafisakanwa pa kuti basuumye umulopa.+ Ulakongwesha indalama pa kuti bakubikilepo nsonsela+ nelyo pa kuti upange indalama ishingi,* kabili ulafinsha abanobe indalama.+ Cine cine walindabilila fye,’ e fyo Shikulu Mulopwe Yehova alanda.

13 “‘Mona! Ifyo wanonka mu bucenjeshi ne fyo usuumya umulopa mu kati kobe nafinselausha. 14 Bushe ukatwalilila ukuba uwashipa* kabili bushe amaboko yobe yakatwalilila ukuba ayakosa mu nshiku nkakucita akantu?+ Ine ne Yehova ninanda, kabili nkacita ifyo nandile. 15 Nkakusalanganishisha mu nko kabili nkakusalanganishisha mu fyalo,+ nkapwisha no kukowela kobe.+ 16 Kabili ukaseebana pa menso ya nko, lyena ukeshiba ukuti nine Yehova.’”+

17 Na kabili Yehova anjebele ati: 18 “We mwana wa muntu, aba mu ng’anda ya kwa Israele nomba mbamona fye kwati ni fimunyela ifishakwata incito. Bonse baba fye ngo mukuba, nga kapotwe, nge cela kabili ngo mutofwe mwi lungu lya mulilo. Baisaba nga fimunyela fya silfere.+

19 “E ico Shikulu Mulopwe Yehova atila, ‘Pa mulandu wa kuti bonse mwaisaba nga fimunyela ifishakwata incito,+ ndemulonganika mu kati ka musumba wa Yerusalemu. 20 Nga filya fine abantu balonganya silfere, umukuba, icela, umutofwe na kapotwe mu kati ke lungu lya mulilo pa kuti nga bapuutapo umulilo fisunguluke, e fyo nkamulonganya ninshi ninkalipa kabili ninshi nimfulwa. Lyena nkamupuutapo pa kuti mukasunguluke.+ 21 Nkamulonganya pamo no kumupuutila umulilo wa bukali bwandi,+ pa kuti mukasungulukile mu musumba wenu.+ 22 Nga filya fine silfere isunguluka mwi lungu lya mulilo, e fyo na imwe mukasungulukila mu kati ka musumba wenu; kabili mukeshiba ukuti ine ne Yehova nimpongolwela ubukali bwandi pali imwe.’”

23 Na kabili Yehova anjebele ati: 24 “We mwana wa muntu, mwebe auti, ‘Uli calo icishakasanguluke nelyo icishakalokwepo imfula mu bushiku nkakalipa. 25 Bakasesema bakwe balapangana ukucita ifyabipa,+ nge nkalamo iilebuluma ilyo ilesantaula ico ikete.+ Balepaya abantu.* Balapoka abantu ifyuma ne fintu ifisuma. Balilenga bamukamfwilwa bafula mu musumba. 26 Bashimapepo bakwe balisuula amafunde yandi,+ kabili balasaalula ififulo fyandi ifya mushilo.+ Tabalekanya ica mushilo ne cishili ca mushilo,+ kabili tabalenga abantu baishiba icishasanguluka ne casanguluka,+ balakaana no kukonka amasabata yandi, kabili balansaalula. 27 Bacilolo bakwe ababa muli ena baba kwati mimbulu iisantaula ico ikete; balasuumya umulopa kabili balepaya abantu* pa kuti banonke ifya mu bucenjeshi.+ 28 Lelo bakasesema bakwe balafisa imembu shabo, nga filya abantu bashingula impemba ku cibumba. Balamona ifimonwa fya bufi, balabuka imbuko sha bufi+ kabili batila: “Ifi e fyo Shikulu Mulopwe Yehova alanda,” e lyo ninshi Yehova umwine talandile nangu cimo. 29 Abantu ba mu calo balacita ubucenjeshi kabili balapoka abantu ifintu ku maka,+ balacusha abalanda na bapiina, kabili balacenjesha abalebeshi no kubafyenga.’

30 “‘Pa bantu bakwe nalefwayapo umuntu uwingawamya icibumba ca musumba nelyo uwingeminina pa cipunda pa cinso candi ukwimininako aba mu calo pa kuti niconaula,+ lelo nshasangilepo nangu umo. 31 E ico nkapongolwela ubukali bwandi pali bena. Kabili nkabalofya ku bukali bwandi ubwaba ngo mulilo. Ifikafuma mu fyabipa ifyo bacita nkafibika pa mitwe yabo,’ e fyo Shikulu Mulopwe Yehova alanda.”

23 Na kabili Yehova anjebele ati: 2 “We mwana wa muntu, kwali abanakashi babili, abana banakashi abafyelwe inda imo.+ 3 Baishileba bacilende mu Egupti;+ batendeke ukucita bucilende ninshi bakashana. Ilyo bali kulya balebatonya amabele, kabili balebekataula pa fifuba ilyo bali banacisungu. 4 Amashina yabo yali ni Ohola,* e mukalamba na Oholiba* nkashi nankwe. Baishileba abandi kabili bafyele abana abaume na bana abanakashi. Ifi e fyo amashina yabo yaleimininako, Ohola lyaleimininako Samaria,+ e lyo Oholiba lyaleimininako Yerusalemu.

5 “Ohola atendeke ukucita bucilende,+ nangu ca kuti ali uwandi. Alitemenwe sana abena Asiria,+ abo alecita nabo ubucende,+ abali abena mupalamano bakwe. 6 Bali balashi abalefwala ifya bluu, ne nkonkani sha bakateka—abalumendo bonse abasuma abalenina pali bakabalwe. 7 Alecita fye bucilende na bana baume bonse aba ku Asiria abawamishe, kabili ali-ikoweseshe+ ku tulubi twa bunani* utwa baume abo atemenwe sana. 8 Talekele ukucita bucilende ubo alecita ilyo ali ku Egupti, pantu ilyo ali umukashana balileele nankwe, kabili balemwikataula pa cifuba ilyo ali nacisungu. Na kabili, balicitile nankwe sana bucilende.+ 9 E ico namupeele mu minwe ya bantu abo alecita nabo bucilende, abana baume ba ku Asiria,+ abo atemenwe sana. 10 Balimufuulile+ kabili balimupokele abana bakwe abaume na bana bakwe abanakashi,+ bamwipaila na ku lupanga. Alishibikwe sana pa banakashi pa mulandu ne fyabipa ifyo alecita, kabili balimupingwile.

11 “Ilyo nkashi nankwe Oholiba amwene ifi fyonse, e lyo ulunkumbwa lwakwe lwacililemo kabili e lyo acililemo sana ukucita bucilende ukucila nkashi nankwe.+ 12 Alitemenwe sana abana baume ba ku Asiria+ abali abena mupalamano wakwe, abalashi ne nkonkani sha bakateka, abalefwala ifya kufwala ifisuma sana, kabili abalenina pali bakabalwe—bonse aba bali balumendo abasuma. 13 Ilyo aikoweseshe, nalimwene ukuti bonse babili bali ne mibele imo ine.+ 14 Lelo alicililemo ukucita bucilende. Alimwene abaume abo balenga pa cibumba, ifimpashanya fya bena Kaldi ifyakashika, 15 ifyafwala imishipi mu misana ne fitambala ifitali, ifimoneka kwati baume abaishiba sana ukulwa, fyonse fyalelangilila abena Babiloni, abafyalilwe mu calo ca bena Kaldi. 16 Ilyo afimwene fye atendeke ukufikumbwa kabili afitumiine inkombe ku Kaldi.+ 17 E ico abana baume aba ku Babiloni baleisa fye mu kulaala nankwe pa busanshi bwakwe, kabili balimukoweseshe ilyo balecita nankwe bucilende. Ilyo bamukoweseshe alibatalwike,* pantu balemuselausha.

18 “Ilyo atwalilile ukucita bucilende ukwabula ne nsoni no kulanga ifya mfwalo fyakwe,+ nalimutalwike pantu alenselausha, nga filya fine natalwike* nkashi nankwe pantu na o wine alenselausha.+ 19 Kabili alicililemo ukucita bucilende+ ica kuti aibukiishe inshiku sha bukashana bwakwe, ilyo alecita bucilende mu calo ca Egupti.+ 20 Alitemenwe sana ukulaala na baume nga filya fyaba bakanakashi ba baume abakwata ifya mfwalo kwati bwamba bwa mpunda, kabili abakwata ifya mfwalo kwati bwamba bwa kwa kabalwe. 21 Walefuluka ifya nsoni ifyo walecita ilyo wali umukashana mu Egupti,+ ilyo balekwikataula pa cifuba, ilyo balekutonya amabele ninshi uli mukashana.+

22 “E ico Oholiba umfwa, Shikulu Mulopwe Yehova atila: ‘Mona, ndelenga abo walecita nabo bucilende+ abo waitalwisheko* pa mulandu wa kuti balekuselausha bakwimine, kabili nkalenga bakakwishile ukufuma mu ntunga shonse,+ 23 abana baume aba ku Babiloni+ na bena Kaldi bonse,+ abaume ba ku Pekode,+ ku Shoa na ku Koa, kumo na bana baume bonse aba ku Asiria. Bonse aba balumendo abasuma, abalashi ne nkonkani sha bakateka, abaume abaishiba sana ukulwa na bo basalile.* Bonse aba balenina pali bakabalwe. 24 Bakakusansa na maceleta ya mipeto* ayengi ne bumba lya bashilika ilikalamba ne nkwela ishikalamba ne shinono* ne fisote ifyakosa. Bakakushinguluka, kabili nkabasuminisha ukukupingula, nabo bakakupingula ukulingana ne fyo bakamona ukuti e filingile.+ 25 Nkaleta ubukali bwandi pali iwe, kabili bakakucita akantu ninshi nabakalipa. Bakakutetako umona na matwi, kabili abakashala pa bantu bobe bakafwa ku lupanga. Bakasenda abana bobe abaume na bana bobe abanakashi, kabili abakashalapo, umulilo ukaboca.+ 26 Bakakufuula ifya kufwala,+ bakakupoke ne fibekobeko fyobe ifisuma.+ 27 Nkapwisha ifya nsoni ifyo ucita na bucilende,+ ifyo watampile ukucita mu calo ca Egupti.+ Ukaleka ukufiloleshapo kabili tawakatale awibukishapo Egupti.’

28 “Pantu Shikulu Mulopwe Yehova atila: ‘Mona, ndekupeela mu minwe ya bantu abo wapata, abo watalwikeko* pa mulandu wa kuti balekuselausha.+ 29 Bakakucita akantu pa mulandu wa kuti balikupata kabili bakasenda fyonse ifyo waculila,+ e lyo bakakushe ubwamba kabili ubusokwa. Ukaseebana ilyo ukushala ubwamba pa mulandu wa fya nsoni ifyo ucita na pa mulandu wa bucilende bobe.+ 30 Ifi fintu fikakucitikila pa mulandu wa kuti walekonka inko kwati ni cilende,+ na pa mulandu wa kuti wali-ikoweseshe ku tulubi twa shiko utwa bunani.+ 31 Ucita ifyo nkashi nobe acita,+ e ico nkabika kapu yakwe mu minwe yobe.’+

32 “Shikulu Mulopwe Yehova atila:

“Pantu ine ninanda,” e fyo Shikulu Mulopwe Yehova alanda.’

35 “E ico Shikulu Mulopwe Yehova atila: ‘Pa mulandu wa kuti walindaba kabili tawancindika nangu panono,+ ukakandwa pa fya nsoni ifyo ucita na pali bucilende bobe.’”

36 Lyena Yehova anjebele ati: “We mwana wa muntu, bushe ukeba Ohola na Oholiba+ ubupingushi bwabo no kubeba pa fya bunani ifyo bacita? 37 Balicita ubucende+ kabili umulopa uli mu minwe yabo. Tabapelela fye pa kucita ubucende no tulubi twabo utwa bunani, lelo na bana abaume abo bamfyalile baliboca mu mulilo pa kuti babe ifya kulya fya tulubi twabo.+ 38 Na kabili, ifi e fyo bancita: Balikoweseshe icifulo candi ica mushilo pali bulya bushiku, kabili balisaalwile na masabata yandi. 39 Ilyo baipaile utulubi twabo utwa bunani abana babo abaume,+ baingile mu cifulo candi ica mushilo pa kuti bacikoweshe+ muli bulya bwine bushiku. Ifi fine e fyo bacitile mu ng’anda yandi. 40 Balitumine na bakuyaita abaume aba kutali.+ Ilyo baleisa walisambile, wali-ipentele mu menso kabili waiyemfeshe ne fibekobeko.+ 41 Kabili waikele pa cipuna icisuma nga nshi,+ na ku ntanshi ya ici cipuna babikileko itebulo+ apo wabikile ububani bwandi+ na mafuta yandi.+ 42 Icongo ca baume abali ne nsansa calyumfwikike kulya kabili pali aba baume pali bacakolwa abo bafumishe ku matololo. Bafwikile abanakashi amakosa ku maboko ne filongwe* ifisuma ku mitwe.

43 “Lyena nalandile pali uyu mwanakashi uwafunshike pa mulandu wa bucende nati: ‘Nomba ali no kukonkanyapo ukucita bucilende.’ 44 E ico batwalilile ukuya kuli ena, nga filya fine abantu baya kuli cilende. E fyo baleya kuli Ohola na kuli Oholiba, abanakashi abacita ifya nsoni. 45 Lelo abaume abalungama, bakamupingula ubupingushi ubwalinga pa mulandu wa bucende+ na pa mulandu wa kusuumya umulopa;+ pantu banakashi abacende, kabili mu minwe yabo mwaliba umulopa.+

46 “Pantu Shikulu Mulopwe Yehova atila: ‘Nkatuma ibumba lya bashilika ilikabonaula ica kuti abantu bakulabapapa kabili likabapoka ifipe.+ 47 Ibumba lya bashilika likabapoola amabwe,+ kabili likabakomawila ku lupanga. Likepaya abana babo abaume na bana babo abanakashi,+ kabili likoca amayanda yabo.+ 48 Nkalenga ifya nsoni fikapwe mu calo, kabili abanakashi bonse bakasambililako, pa kuti belacita ifya nsoni ifyo mucita.+ 49 Bakamukanda pa mulandu ne fya nsoni ifyo mucita, na pa mulandu wa membu isho mucita no tulubi twenu utwa bunani; kabili mukeshiba ukuti nine Shikulu Mulopwe Yehova.’”+

24 Mu mwaka walenga 9 pa bushiku bwalenga 10 ubwa mweshi walenga 10, na kabili Yehova anjebele ati: 2 “We mwana wa muntu, lemba buno bushiku,* buno bwine ubushiku. Imfumu ya ku Babiloni naitampa ukusansa umusumba wa Yerusalemu buno bwine bushiku.+ 3 Kabili uumine aba mu ng’anda ya bacipondoka umulumbe* e lyo ulande pali bena auti:

“‘Shikulu Mulopwe Yehova atila:

“Teka impoto* pa mulilo; itekepo witulwilemo na menshi.+

 5 Pa mukuni ubulepo impaanga iyawamisha,+ kabili utuulike inkuni mwi samba lya mpoto.

Ubilaushe imipusa kabili wipike amafupa ayali mu mpoto.”’

6 “E ico Shikulu Mulopwe Yehova atila:

‘We bulanda ku musumba umwaba abasuumya umulopa,+ impoto iyakwata indalawa iyo bashafumyamo indalawa!

Fumyamo imipusa yonse, ulefumyamo umo umo;+ kabili wipendula pa kuifumya.

 7 Pantu umulopa wa muli uyu musumba waba mu kati ka uko;+ aupongolwelele pa cilibwe apashaba nangu kamo.

Taupongolwelele panshi, pa kuti ashiikepo iloba.+

9 “E ico Shikulu Mulopwe Yehova atila:

‘We bulanda ku musumba umwaba abasuumya umulopa!+

Nkatuulika umwina wa nkuni uukalamba.

Ifiko ifili mu kati ka iko fisunguluke+ kabili indalawa sha iko shipwililile.

Ipoose mu mulilo ne ndalawa sha iko!’

13 “‘Ifya nsoni ifyo walecita+ e fyalengele ube uwakowela. Nalyeseshe ukukusangulula, lelo tawasangulwike. Tawakasangululwe mpaka ubukali bwandi pali iwe bukacepeko.+ 14 Ine ne Yehova ninanda. Ifyo nalanda fikacitika. Nshakalekepo fye. Nshakomfwe ubulanda, nshakalanguluke.+ Bakakupingula ukulingana ne mibele yobe kabili ukulingana ne fyo ucita,’ e fyo Shikulu Mulopwe Yehova alanda.”

15 Na kabili Yehova anjebele ati: 16 “We mwana wa muntu, nalalenga uo watemwa afwe mu kupumikisha.+ Taufwile ukumuloosha;* nelyo ukumulila nangu ukulukusha ifilamba. 17 Ukashinshimukile fye mu mutalalila, taufwile ukucita ifyo mucita pa kuloosha.+ Ukafwale icitambala,+ ukafwale ne ndyato shobe.+ Taufwile ukufimba pa mwefu obe uwa pa muulu,*+ kabili taufwile ukulya umukate uo abantu bakakuletela.”*+

18 Kabili nalilandile na bantu ulucelo, icungulo umukashi wandi alifwile. E ico ulucelo lwakonkelepo nalicitile ifyo Lesa anjebele. 19 Abantu balenjipusha abati: “Bushe tawatwebe ifyo ifi ulecita fitukumine?” 20 Nabaswike nati: “Yehova anjebele ati, 21 ‘Eba aba mu ng’anda ya kwa Israele auti: “Shikulu Mulopwe Yehova atila, ‘Ndi no kusaalula icifulo candi ica mushilo,+ ico mumfwilapo icilumba, ico mwatemwa sana kabili ico mwabikapo imitima. Abana benu abaume na bana benu abanakashi abo mwasha bakafwa ku lupanga.+ 22 Lyena ifyo ncitile e fyo na imwe mukacita. Tamwakafimbe pa mwefu wenu uwa pa muulu, kabili tamwakalye umukate uo bakamuletela.+ 23 Ifitambala fyenu fikaba ku mitwe yenu kabili indyato shenu shikaba ku makasa yenu. Tamwakalooshe nelyo ukulila. Lelo mukacula pa mulandu wa filubo fyenu+ kabili mukalashinshimukila fye uku ninshi muleloleshanya. 24 Esekiele e cilangililo cenu.+ Ifyo acitile na imwe e fyo mukacita. Ilyo ifi fikacitika, e lyo mukeshiba ukuti nine Shikulu Mulopwe Yehova.’”’”

25 “Lelo iwe we mwana wa muntu, pa bushiku nkabapoka icibacingilila—icintu icisuma icilenga balesekelela, ico batemwa sana, ico babikapo imitima—pamo na bana babo abaume na bana babo abanakashi,+ 26 abakapusuka bakesakweba ifikacitika.+ 27 Pali bulya bushiku ukaasamuna akanwa kabili ukulanda na bakapusuka, tawakatwalilile ukuba tondolo.+ Ukaba icilangililo cabo kabili bakeshiba ukuti nine Yehova.”

25 Na kabili Yehova anjebele ati: 2 “We mwana wa muntu, losha icinso cobe ku bena Amone+ no kusesema ifyabipa ifikabacitikila.+ 3 Kabili ufwile ukweba abena Amone auti, ‘Umfweni amashiwi ya kwa Shikulu Mulopwe Yehova. Ifi e fyo Shikulu Mulopwe Yehova alanda: “Apo walandile ati ‘Eya!’ ilyo bakoweseshe icifulo candi ica mushilo, ilyo icalo ca Israele cashele icibolya, na lintu aba mu ng’anda ya kwa Yuda babasendele bunkole, 4 ndekupeela ku bena Kabanga. Bakapanga inkambi* muli iwe kabili bakatanika amatenti muli iwe. Bakalya ifisabo fyobe, bakanwe no mukaka obe. 5 Nkalenga Raba+ ikabe impanga ya mulemfwe umwa kuti ingamila shikalelya, kabili nkalenga icalo ca bena Amone cikabe umwa kutuushisha impaanga; e lyo mukeshiba ukuti nine Yehova.”’”

6 “Pantu Shikulu Mulopwe Yehova atila: ‘Pa mulandu wa kuti walitootele+ no kulisha inshindo kabili walisekelele* pa calo ca Israele no kucitumfya,+ 7 nkafungulwila ukuboko kwandi pali iwe pa kuti nkakupeele ku nko, nasho shikakupoka ifipe. Nkakufumya pa nko kabili nkonaula icalo cobe.+ Nkakulofya, kabili ukeshiba ukuti nine Yehova.’

8 “Shikulu Mulopwe Yehova atila: ‘Apo Moabu+ na Seiri+ balanda ati, “Moneni! Aba mu ng’anda ya kwa Yuda baba fye nge nko shonse,” 9 ndelenga abalwani ukusansa* imisumba ya kwa Moabu iyabela ku mipaka, imisumba iisuma* iya calo cakwe, Bete-yeshimote, Baali-meone, ukuyafika fye na ku Kiriataimu.+ 10 Nkapeela Moabu pamo na bena Amone ku bena Kabanga,+ pa kuti abena Amone bekabala abebukishiwa mu nko.+ 11 Kabili nkapingula aba mu Moabu,+ kabii bakeshiba ukuti nine Yehova.’

12 “Shikulu Mulopwe Yehova atila: ‘Edomu nalandula aba mu ng’anda ya kwa Yuda kabili nakwata umulandu uukalamba pali ifi alandwile;+ 13 e ico Shikulu Mulopwe Yehova atila: “Na kabili nkafungulwila ukuboko kwandi pa calo ca Edomu no kwipaya abantu ne fitekwa, kabili icalo ca Edomu cikashala icibolya.+ Abantu bakafwa ku lupanga ukufuma ku Temani ukufika ku Dedani.+ 14 ‘Nkalandula Edomu ukubomfya abantu bandi abena Israele.+ Bakakanda Edomu ukulingana no bukali bwandi kabili ukulingana ne fyo nkafulwa, pa kuti abena Edomu bakamone icilandushi candi,’+ e fyo Shikulu Mulopwe Yehova alanda.”’

15 “Shikulu Mulopwe Yehova atila: ‘Pa mulandu wa kuti abaPelishiti baba ne mpatila, balilandwile kabili balyonawile abena Israele ku mufulo fye.+ 16 E ico Shikulu Mulopwe Yehova atila: “Moneni, ndefungulwila ukuboko kwandi pa baPelishiti,+ kabili nkalofya abena Kerete,+ nkonaula na bashalapo aba ku lulamba lwa bemba.+ 17 Nkabaletela icilandushi ilyo nkabakanda ninshi nimfulwa, kabili bakeshiba ukuti nine Yehova ilyo nkabaletela icilandushi.”’”

26 Mu mwaka walenga 11, pa bushiku bwa kubalilapo ubwa mweshi, Yehova anjebele ati: 2 “We mwana wa muntu, pa mulandu wa kuti Turi alesekelela pali Yerusalemu+ ati, ‘Eya! Impongolo sha nko nashitobaulwa!+ Fyonse fikaba fyandi kabili nkaba umukankaala apo nomba naonaulwa’; 3 Shikulu Mulopwe Yehova atila: ‘Mona we Turi, nkakulwisha, kabili nkakwimisha inko ishingi, nga filya bemba emya amabimbi. 4 Shikonaula ifibumba fya kwa Turi kabili shikabongolola impungu shakwe,+ nkakungulula iloba kabili nkalenga akashale icilibwe icabeeka apashaba nangu kamo. 5 Akaba apa kwanika imikwau mu kati ka bemba.’+

“‘Pantu ine ninanda,’ e fyo Shikulu Mulopwe Yehova alanda, ‘kabili inko shikamupoka ifipe. 6 Kabili abekala mu mishi yakwe iyabela ukutali* bakabepaya ku lupanga, e lyo abantu bakeshiba ukuti nine Yehova.’

7 “Pantu Shikulu Mulopwe Yehova atila: ‘Moneni, nkaleta Imfumu Nebukadnesari* iya ku Babiloni ukufuma ku kapinda ka ku kuso+ pa kuti ikalwishe Turi; ni mfumu ya shamfumu,+ iyakwata bakabalwe,+ amaceleta+ ya nkondo, abanina pali bakabalwe, ne bumba lya bashilika abengi.* 8 Ikonaula imishi yobe iyabela ukutali ku lupanga, kabili ikakuula ilinga ilya kushingilako umusumba, ikapanga ne ca kuninapo pa kukusansa kabili ikakwimisha inkwela iikalamba. 9 Ikatobaula ifibumba fyonse ku fya kubongolwelako impongolo, kabili ikabongolola impungu shobe ku masembe.* 10 Bakabalwe ba iko bakaba abengi sana ica kuti bakakufutumwina ulukungu ulwingi, kabili icongo ca banina pali bakabalwe, ica mipeto* ne ca maceleta cikalenga ifibumba fyobe fikatente ilyo ikengila pa mpongolo shobe kwati ni filya ciba abaume nga baingila mu musumba uwa kuti ifibumba fyalibongoloka. 11 Amabondo ya bakabalwe ba iko yakanyantaula mu misebo yobe yonse;+ ikepaya abantu bobe ku lupanga kabili ikabongolola inceshi shobe ishakosa. 12 Bakasenda ifyuma fyobe, bakakupoka ifipe fya makwebo,+ bakabongolola ifibumba kabili bakatobaula amayanda yobe ayasuma; lyena bakapoosa amabwe yobe, ifipe fyobe ifyo bapangila ne fimuti ne loba lyobe mu menshi.’

13 “‘Nkalenga icongo ca nyimbo shobe cikapwe kabili nkalenga iciunda ca nsango shobe ciikatala acumfwikapo.+ 14 Kabili nkalenga ukabe icilibwe icabeeka apashaba nangu kamo. Kabili ukaba apa kwanika imikwau.+ Tawakabale aukuulwa cipya cipya, pantu ine ne Yehova ninanda,’ e fyo Shikulu Mulopwe Yehova alanda.

15 “Shikulu Mulopwe Yehova aeba Turi ati: ‘Ilyo icongo ca kubongoloka kobe cikomfwika, ilyo abo bakulaipaya bakulateta, kabili ilyo bakalaipaya abantu muli iwe, bushe ifishi tafyakatente?+ 16 Bacilolo* bonse aba kuli bemba, bakema pa fipuna fyabo ifya bufumu, bakafuula imingila* yabo kabili bakafuula ifya kufwala fyabo ifyo bayemfya, kabili bakalatutuma fye. Bakekala panshi, bakalatutuma fye, bakalakulolesha ninshi nabapapa.+ 17 Kabili bakakwimbila ulwimbo lwa bulanda,*+ bakalakwimbila ati:

19 “Pantu Shikulu Mulopwe Yehova atila: ‘Ilyo nkakonaula nge misumba umushikala abantu, ilyo nkakuletela amenshi ayengi ica kuti ukebile na muli bemba,+ 20 iwe pamo na bo uleya nabo mu cilindi nkamuleta ku bantu ba kale; nkalenga ukekale ku cifulo ica panshi sana icaba nge fifulo fya kale ifyaonaika, ukekale pamo na baleya mu cilindi*+ pa kuti muli iwe mwikatala amwikala abantu. Lyena nkacindika* icalo ca ba mweo.

21 “‘Nkaleta ubonaushi pali iwe mu kupumikisha, kabili tawatwalilile ukubako.+ Bakakufwaya, lelo tabakatale abakusanga,’ e fyo Shikulu Mulopwe Yehova alanda.”

“We Turi, we mwine utila, ‘Naliyemba icine cine.’+

 8 Abaleikala mu Sidone na mu Aavadi+ e bali bacooba bobe.

Abaume bobe abaishibisha ukwensha amato e balekwensha+ we Turi.

 9 Abaume ba ku Gebali+ abaishibe* sana ifya kucilika imilale e balecilika imilale yobe.+

Amato yonse aya pali bemba na bale-ensha aya mato balishile kuli iwe no kucita nobe amakwebo.

10 Abaume ba ku Persia, aba ku Ludimu na ba ku Puti+ bali mwi bumba lyobe ilya bashilika, e balekulwila inkondo.

Balekobeka inkwela shabo ne fisote fyabo muli iwe, kabili balengele wacindama.

12 “‘“Walecita amakwebo na ba ku Tarshishi+ pa mulandu wa kuti walikwete sana icuma.+ Wakabushenye nabo ifipe fyobe na silfere, ifyela, kapotwe no mutofwe.+ 13 Aba ku Yabani, aba ku Tubali,+ na ba ku Mesheke+ walecita nabo amakwebo. Bena balekupeela abasha+ ne fipe fya mukuba, e lyo iwe walebapeela ifipe fyobe. 14 Aba mu ng’anda ya kwa Togarma+ bakupeele bakabalwe, bakabalwe ba nkondo ne mfalashi, e lyo iwe wabapeele ifipe fyobe. 15 Abena Dedani+ walecita nabo amakwebo; walingishe bashimakwebo aba mu fishi ifingi incito; balekutuula ameno ya nsofu+ ne fimuti ifya fiita ifya mutengo. 16 Edomu alecita nobe amakwebo pa mulandu wa kuti walepanga ifintu ifingi. Balekupeela amabwe ya Tokwasi, amasako ya mpaanga ayakashikila, ifya kufwala ifisuma ifyo bayemfya, insalu ishisuma, amakorali na mabwe ya rubi, e lyo iwe walebapeela ifipe fyobe.

17 “‘“Yuda na ba ku calo ca kwa Israele balecita nobe amakwebo. Balekupeela ingano sha ku Miniti,+ ifya kulya ifisuma, ubuci,+ amafuta na balsamu,+ e lyo iwe walebapeela ifipe fyobe.+

18 “‘“Damaseke+ alecita na iwe amakwebo pa mulandu wa kuti walepanga ifipe ifingi, na pa mulandu wa fyuma fyonse ifyo wakwete. Alekushitisha umwangashi wa ku Helboni na masako ya mpaanga aya ku Sahari.* 19 Abena Vedani na bena Yabani aba ku Usali bakupeele ifipe fya fyela, kasia* ne fimenwa ifya kacena akasuma,* e lyo iwe wabapeele ifipe fyobe. 20 Abena Dedani+ balekushitisha insalu sha kubika apa kwikala* pa nama sha kwendelapo. 21 Abena Arabia ne ntungulushi sha ku Kedari+ abaleshitisha utwana twa mpaanga, impaanga ishilume ne mbushi,+ e bo waingishe incito. 22 Bashimakwebo ba ku Sheba na ba ku Raama+ balecita nobe amakwebo; balekupeela ifyanunkila fyonse ifisuma nga nshi, amabwe ya mutengo sana na golde, e lyo iwe walebapeela ifipe fyobe.+ 23 Abena Harani,+ abena Kane, abena Edene,+ bashimakwebo ba ku Sheba,+ ku Ashuri+ na ku Kilmadi balecita nobe amakwebo. 24 Pa cifulo cobe ica makwebo e po balekushitishisha ifya kufwala ifisuma, ifya kufwala fya mu mpepo ifya bluu, ne fya kufwala ifisuma ifyo bayemfya ne fya kwanshika panshi ifyabalabata. Fyonse ifi balefikakapo intambo.

28 “‘“Ilyo abakwensha bakapunda, ifyalo fya mu lulamba lwa bemba fikatenta.

32 Ilyo bakalakuloosha bakalaimba ulwimbo lwa bulanda kabili bakalalanda pali iwe abati:

‘Nani uwaba nga Turi? Nomba nabamonaula* mu kati na nkati ka bemba.+

33 Ilyo ifipe fyobe fyaishile ukufuma pali bemba, walengele abantu abengi baba ne nsansa.+

Ifyuma fyobe ifingi ne fipe fyobe ifya makwebo fyalengele imfumu sha pe sonde shaba ishikankaala.+

36 Bashimakwebo ba mu nko bakalalisha iminsooli pa fikakucitikila.

28 Na kabili Yehova anjebele ati: 2 “We mwana wa muntu, eba intungulushi ya ku Turi auti, ‘Shikulu Mulopwe Yehova atila:

“Apo umutima obe wa cilumba,+ kabili utila, ‘Nine lesa.

Naikala pa cipuna ca bufumu ica kwa lesa pa kati na nkati ka bemba.’+

 3 Mona! Uli wa mano ukucila Daniele.+

Takuli ifya nkaama ifyo wingafilwa ukwilula.

6 “‘E ico Shikulu Mulopwe Yehova atila:

 9 Bushe na pali iyi nshita ukeba uukalakwipaya auti, ‘nine lesa?’

Mu minwe ya bakalakukowesha ukaba fye umuntunse, tawakabe lesa.”’

11 Na kabili Yehova anjebele ati: 12 “We mwana wa muntu, imbila imfumu ya ku Turi ulwimbo lwa bulanda,* kabili uyebe auti, ‘Shikulu Mulopwe Yehova atila:

13 Wali mu Edeni, mwi bala lya kwa Lesa.

Fyapekanishiwe pa bushiku wabumbilwe.

14 Nalikusubile kabili nakupeele umulimo wa kuba kerubi uucingilila.

Wali pa lupili lwa kwa Lesa+ ulwa mushilo, kabili wale-endauka pa mabwe ya mulilo.

17 Waishileba ne cilumba mu mutima obe pa mulandu wa kuti wali uwayemba.+

Waonawile amano yobe pa mulandu wa kuti wali uwacindama.+

Nkakupoosa pe sonde.+

Nkalenga ishamfumu shikalekutamba.

18 Pa mulandu wa kufula kwa filubo fyobe, na pa mulandu wa kuti ulacita ubucenjeshi mu makwebo yobe, ulasaalula ififulo fyobe ifya mushilo.

Nkalenga umulilo ukaake muli iwe, kabili ukakoca.+

Nkalenga ukashale imito pe sonde pa menso ya bonse abakalakutamba.

19 Abantu bonse aba mu nko abakwishiba, bakakulolekesha ninshi balepapa fye.+

20 Na kabili Yehova anjebele ati: 21 “We mwana wa muntu, losha icinso cobe kuli Sidone,+ no kusesema ifyabipa ifikamucitikila. 22 Ufwile ukulanda auti, ‘Shikulu Mulopwe Yehova atila:

23 Nkatuma icikuko muli ena kabili umulopa ukalakonkoloka mu misebo yakwe.

24 “‘“Lyena ing’anda ya kwa Israele tayakashingulukwe na ficilasa ifyabipa ne myunga iikali,+ e kuti bonse ababasaalula; kabili abantu bakeshiba ukuti nine Shikulu Mulopwe Yehova.”’

25 “‘Shikulu Mulopwe Yehova atila: “Ilyo nkalonganika aba mu ng’anda ya kwa Israele ukufuma mu nko umo basalanganina,+ nkalenga inko shikamone ukuti ndi wa mushilo.+ Kabili bakekala mu calo cabo+ ico napeele umubomfi wandi Yakobo.+ 26 Bakekalamo umutende+ kabili bakakuula amayanda no kulima amabala ya myangashi,+ kabili bakekala umutende ilyo nkapingula bonse ababashinguluka ababasaalula;+ kabili bakeshiba ukuti nine Yehova Lesa wabo.”’”

29 Mu mwaka walenga 10, pa bushiku bwalenga 12, ubwa mweshi uwalenga 10, Yehova anjebele ati: 2 “We mwana wa muntu, losha icinso cobe kuli Farao imfumu ya ku Egupti, kabili useseme ifyabipa ifikamucitikila ne fikacitikila icalo ca Egupti conse.+ 3 Ulande amashiwi ya kuti: ‘Shikulu Mulopwe Yehova atila:

Ico naupangiile ni pa kuti ube uwandi.’+

 4 Lelo nkabika ifya kulobelako mu mibango yobe, nkalenga ne sabi ilya mu mumana obe uwa Naelo likekate ku mamba yobe.

Nkakufumya mu mumana wa Naelo pamo ne sabi lyonse ilya mu mumana wa Naelo ilikekata ku mamba yobe.

 5 Nkakusha mu ciswebebe, iwe pamo ne sabi lyonse ilya mu mumana obe uwa Naelo.

Ukaponena mu mpanga umushaba nangu cimo kabili takuli uukakusenda no kukushiika.+

Nkakupeela ku nama sha mu mpanga na ku fyuni fya mulwelele pa kuti fikakulye.+

8 “‘E ico Shikulu Mulopwe Yehova atila: “Mona, nkaleta ulupanga pali iwe,+ kabili nkepaya abantunse ababa muli iwe ne nama ishaba muli iwe. 9 Icalo ca Egupti cikashala icibolya kabili tamwakabe akantu nangu kamo;+ lyena bakeshiba ukuti nine Yehova, pantu utila, ‘Umumana wa Naelo wandi; nine naupangile.’+ 10 E ico ndekulwisha pamo no mumana obe uwa Naelo, kabili nkalenga icalo ca Egupti cikashale icibolya, kabili icauma, umushaba akantu nangu kamo+ ukufuma ku Migdole+ ukufika na ku Syene,+ ukuyafika fye na ku mupaka wa Etiopia. 11 Tamwakapite umuntunse nangu inama pa makasa,+ kabili tacakekalwemo pa myaka 40. 12 Pa myaka 40 nkalenga icalo ca Egupti cikabe sana icibolya ukucila ifyalo fyonse ifyaba ifibolya, ne misumba ya ciko ikaba sana ifibolya ukucila imisumba yonse iyaba ifibolya;+ kabili nkasalanganishisha abena Egupti mu nko no kubapashila mu fyalo.”+

13 “‘Pantu Shikulu Mulopwe Yehova atila: “Pa numa ya myaka 40 nkalonganya abena Egupti ukubafumya mu nko umo nabasalanganishishe;+ 14 nkabwesesha bankole abena Egupti ku calo ca Patrose,+ ku calo uko batuntwike, kabili kulya kwine e ko bakayaba ubufumu ubushacindama. 15 Egupti ikacepa pa mabufumu yambi kabili tayakatwalilile ukukwata amaka pa nko shimbi.+ Nkalenga abena Egupti bakacepe ica kuti tabakabe na maka ya kucimfya inko shimbi.+ 16 Aba mu ng’anda ya kwa Israele tabakabale abacetekela muli ena na kabili,+ lelo akalabebukisha fye ifyo balufyenye ilyo baile ku bena Egupti pa kuti babafwe. Kabili bakeshiba ukuti nine Shikulu Mulopwe Yehova.”’”

17 Nomba mu mwaka walenga 27, pa bushiku bwa kubalilapo ubwa mweshi wa kubalilapo, Yehova anjebele ati: 18 “We mwana wa muntu, Imfumu Nebukadnesari*+ iya ku Babiloni, yalengele abashilika ba iko babomba umulimo uukalamba uwa kulwisha Turi.+ Imitwe yabo yonse yasebeke amapala, na mabeya yabo yonse yalisukwilwe. Lelo yena na bashilika ba iko tabapokele amalipilo pa fyo babombeshe pa kuti balwishe Turi.

19 “E ico Shikulu Mulopwe Yehova atila, ‘Mona, nkapeela Imfumu Nebukadnesari* iya ku Babiloni+ icalo ca Egupti, nayo ikasenda ifyuma fya ciko kabili ikapoka ifyuma ifingi ifyabamo; kabili fikaba malipilo ya bashilika ba iko.’

20 “‘Pa kuilambula pa mulimo yabombele pali Turi, nkaipeela icalo ca Egupti, pa mulandu wa kuti nine yabombeele,’+ e fyo Shikulu Mulopwe Yehova alanda.

21 “Muli ubo bushiku nkalenga ulusengo lukamene mu ng’anda ya kwa Israele,*+ kabili nkakupeela insambu sha kulanda nabo; kabili bakeshiba ukuti nine Yehova.”

30 Na kabili Yehova anjebele ati: 2 “We mwana wa muntu, sesema kabili landa auti, ‘Shikulu Mulopwe Yehova atila:

“Loosheni amuti, ‘Iye ubushiku buleisa!’

 3 Pantu ubushiku nabupalama, ubushiku bwa kwa Yehova nabupalama.+

Bukaba bushiku bwa makumbi,+ kabili ikaba ni nshita ya kupingula abena fyalo.+

 6 Yehova atila:

“‘Akafwa ku lupanga ukutula ku Migdole+ ukufika ku Syene,’+ e fyo Shikulu Mulopwe Yehova alanda. 7 ‘Icalo cikaba sana icibolya ukucila ifyalo fyonse ifyaba ifibolya, kabili imisumba ya ciko ikonaulwa sana ukucila ifyo imisumba imbi yaonaulwa.+ 8 Kabili bakeshiba ukuti nine Yehova ilyo nkasonteka umulilo mu Egupti kabili ilyo abamutungilila bonse bakonaulwa. 9 Muli ubo bushiku, nkatuma inkombe mu mato pa kuti shikayelenga Etiopia uwacilamo ukuicetekela akatutume; bakomfwa umwenso muli bulya bushiku ubukeshila Egupti, pantu nangu cibe shani, bukesa.’

10 “Shikulu Mulopwe Yehova atila: ‘Nkalenga Imfumu Nebukadnesari* iya ku Babiloni+ ikalofye amabumba ya bantu ayakalamba aya mu Egupti. 11 Yena na bashilika ba iko, abakalukisha pa nko shonse+ bakesa no kwisaonaula ici calo. Bakasomwena Egupti ulupanga, kabili icalo conse cikesulamo abantu abo bakepaya.+ 12 Nkalenga imifoolo ya mu mumana wa Naelo+ ikakame, kabili icalo nkacipeela* mu minwe ya baume abacita ifyabipa. Nkalenga aba ku calo cimbi+ bakonaule icalo na fyonse ifyabamo. Ine ne Yehova ninanda.’

13 “Shikulu Mulopwe Yehova atila: ‘Nkonaula utulubi twabo utwa bunani* kabili nkalofya tulesa twa fye utwa ku Nofu.*+ Mu calo ca Egupti tamwakatale amufuma cilolo,* kabili nkalenga icalo ca Egupti cikabe no mwenso.+ 14 Nkonaula Patrose,+ nkasonteka umulilo mu Soani kabili nkapingula No.*+ 15 Nkapongolwela ubukali bwandi pali Sini, umusumba uo Egupti ashintililamo, kabili nkalofya abantu ba mu musumba wa No. 16 Nkasonteka umulilo mu Egupti; kabili Sini akekatwa umwenso sana, umusumba wa No bakausansa e lyo Nofu* bakamusansa mu kasuba akatanda imono! 17 Abalumendo ba ku One* na ku Pibesete, bakafwa ku lupanga, kabili aba muli iyi misumba bakabasenda bunkole. 18 Ilyo nkafunaula amakoli ya ku Egupti,+ mu Tafne mukafiita. Amaka yakwe ayo ayumfwilapo yakapwa,+ amakumbi yakamufimba, kabili aba mu misumba yakwe bakabasenda bunkole.+ 19 Nkapingula Egupti, kabili bakeshiba ukuti nine Yehova.’”

20 Nomba mu mwaka walenga 11, pa bushiku bwalenga 7 mu mweshi wa kubalilapo, Yehova anjebele ati: 21 “We mwana wa muntu, nimfuna ukuboko kwa kwa Farao imfumu ya ku Egupti; tabakakukake pa kuti kupole nelyo ukukakako icisalu pa kuti kukose ica kutila kuti kwaikata no lupanga.”

22 “E ico Shikulu Mulopwe Yehova atila: ‘Mona ndelwisha Farao imfumu ya ku Egupti,+ kabili nkafuna amaboko yakwe, ukutuntulu no kwafunika,+ kabili nkalenga ulupanga lukapone mu minwe yakwe.+ 23 Lyena nkasalanganishisha abena Egupti mu nko kabili nkabasalanganishisha mu fyalo.+ 24 Nkakosha amaboko* ya mfumu ya ku Babiloni,+ nkabika no lupanga lwandi mu minwe ya iko,+ kabili nkafuna amaboko ya kwa Farao. Lyena akateta nga nshi pa cinso ca iyi mfumu kwati mwaume uulefwa. 25 Nkakosha amaboko ya mfumu ya ku Babiloni, lelo amaboko ya kwa Farao yena yakatompoka; kabili bakeshiba ukuti nine Yehova ilyo nkabika ulupanga lwandi mu minwe ya mfumu ya ku Babiloni kabili ilyo ikabomfya ulu ulupanga pa kusansa icalo ca Egupti.+ 26 Nkasalanganishisha abena Egupti mu nko kabili nkabasalanganishisha mu fyalo,+ e lyo bakeshiba ukuti nine Yehova.’”

 4 Amenshi e yalengele ukuti ukule sana, imilonga ya menshi yalengele ulepe sana.

 5 E mulandu wine ici cimuti calepeele ukucila ifimuti fyonse mu mpanga.

 8 Mwi bala lya kwa Lesa+ tamwali umukedari nangu umo uwalingene naco.

Mwi bala lya kwa Lesa tamwali icimuti nangu cimo icalingene naco ubusuma.

10 “E ico Shikulu Mulopwe Yehova atila: ‘Pa mulandu wa kuti calilepele* ica kuti na kantongolilo ka ciko kafikile mu makumbi, kabili pa mulandu wa kuti caishileba ne cilumba mu mutima wa ciko pa mulandu wa kuti calilepele, 11 nkacipeela kuli kateka wa nko uwa maka.+ Nangu cibe shani akacicita akantu, kabili nkacikaana pa mulandu ne fyabipa ifyo cicita. 12 Kabili abalebeshi abakalukisha pa nko shonse bakacitema, kabili bakacisha pa mpili, na mabula ya ciko yakaponena mu mipokapoka yonse, kabili imisambo ya ciko bakaiputaula mu tumilonga tonse utwa mu calo.+ Abantu ba mu nko sha pe sonde bonse bakafuma mu cintelelwe ca ciko kabili bakacisha. 13 Ifyuni fya mulwelele fyonse fikalaikala kuli ici cimuti ninshi caliwa, kabili inama sha mu mpanga shonse shikalaikala pa misambo ya ciko.+ 14 Ico cikabela ifi ni pa kuti kwikaba icimuti nangu cimo pa fimuti ifyaba mupepi na menshi icikalepa sana nelyo icikafisha akantongolilo ka ciko mu makumbi. Na pa kuti kwikaba icimuti nangu cimo icitapililwa bwino icikalepa nge fi fimuti, pantu fyonse fikafwa, fikaya ku calo ca panshi pamo na bana ba bantu abaleya ku nindi.’*

15 “Shikulu Mulopwe Yehova atila: ‘Pa bushiku cikaya ku Nshiishi* nkalenga kukabe ukuloosha. E ico nkacilika utumilonga twa menshi, kabili nkalenga utumilonga twikalafumya amenshi pa kuti amenshi ayengi yakaleke ukufuma. Nkalenga Lebanone akafiite pa mulandu wa ici cimuti kabili ifimuti fya mu mapanga fyonse fikoma. 16 Ilyo icongo ca kuwa kwa ciko cikomfwika, nkalenga inko shikatente ilyo nkalenga cikaye ku Nshiishi* pamo na bonse abaleya ku nindi,* kabili ifimuti fyonse ifya mu Edeni,+ fyonse ifyawamisha ne fimuti ifisuma nga nshi pa fimuti fya mu Lebanone, fyonse ifyo batapilila bwino fikasansamushiwa mu calo ca panshi. 17 Nafiya ku Nshiishi* pamo nankwe, abo baipaila ku lupanga,+ pamo na balemutungilila* abaleikala mu cintelelwe cakwe mu nko.’+

18 “‘Cimuti nshi pa fimuti fya mu Edeni icalingene na iwe ubukata no bukulu?+ Lelo nangu cibe shani bakakwipaila pamo ne fimuti fya mu Edeni kabili mukaya ku calo ca panshi. Ukalaala pamo nabashasembululwa abo bakepaila ku lupanga. Ifi fikacitikila Farao na mabumba yakwe yonse ayakalamba,’ e fyo Shikulu Mulopwe Yehova alanda.”

 3 “Shikulu Mulopwe Yehova atila:

 7 “‘Kabili ilyo nkakushimya nkafimba imyulu kabili nkalenga intanda shikafiite.

11 Pantu Shikulu Mulopwe Yehova atila:

‘Ulupanga lwa mfumu ya ku Babiloni lukesa pali iwe.+

Bakapwisha icilumba ca kwa Egupti, kabili amabumba yakwe yonse ayakalamba bakayalofya.+

Bakembila Egupti na mabumba yakwe ayakalamba,’ e fyo Shikulu Mulopwe Yehova alanda.”

17 Lyena mu mwaka walenga 12 pa bushiku bwalenga 15 ubwa uyu mweshi, Yehova anjebele ati: 18 “We mwana wa muntu, loosha pa mabumba ayakalamba aya kwa Egupti kabili umubweseshe ku calo ca panshi, ena na bana bwakwe abanakashi aba mu nko isha maka pamo na baleya ku nindi.*

19 “‘Nani uo wacila ukuyemba? Kabiye ku nshiishi kabili uye ulaale pamo na bashasembululwa!’

20 “‘Bakafwila pamo na bo bakepaila ku lupanga.+ Nabamwipaya ku lupanga; mukulileni pamo na mabumba yakwe yonse ayakalamba.

21 “‘Abaishibisha ukulwa bakalanda nankwe mu kati ka Nshiishi,* ena e lyo na balemwafwa. Nangu cibe shani bakaya ku nshiishi kabili bakalaala nga filya fine abashasembululwa abo baipaila ku lupanga balaala. 22 Asiria aba kulya pamo ne bumba lyakwe. Inshiishi shabo shalishinguluka imfumu shabo, bonse balipaiwa ku lupanga.+ 23 Inshiishi shakwe shaba mu kati ka nindi,* kabili ibumba lyakwe lyonse lyashinguluka inshiishi yakwe, bonse balipaiwa ku lupanga pantu balilengele abantu ba mu calo ca ba mweo baba no mwenso.

24 “‘Elamu+ ali kulya pamo na mabumba yakwe yonse ayakalamba, kabili nayashinguluka inshiishi yakwe, bonse abo baipaya ku lupanga, abalelenga abantu ba mu calo ca ba mweo baba no mwenso nabaya ku calo ca panshi ukwabula ukusembululwa. Nomba bakaseebanina pamo na baleya ku nindi.* 25 Nabamupangila ubusanshi pa bo baipaya pamo na mabumba yakwe yonse ayakalamba ayashinguluka inshiishi shakwe. Bonse tabasembululwa, balibepaya ku lupanga pa mulandu wa kuti balengele abantu ba mu calo ca ba mweo baba no mwenso; kabili bakaseebanina pamo na baleya ku nindi.* Nabamubika pamo na bo baipaya.

26 “‘Kulya kwine e kwaba Mesheke na Tubali+ pamo na mabumba yabo yonse* ayakalamba. Inshiishi shabo shalimushinguluka. Bonse tabasembululwa, balibalasa no lupanga pa mulandu wa kuti balilengele abantu ba mu calo ca ba mweo baba no mwenso. 27 Bushe tabakalaale pamo na baume abashasembululwa abaishiba sana ukulwa, abafwa, abaya ku Nshiishi* pamo ne fyanso fya nkondo? Kabili bakababikila impanga shabo ku mitwe yabo,* bakabika ne membu shabo pa mafupa yabo pantu aba abaume aba maka abaishibe sana ukulwa balecusha abantu ba mu calo ca ba mweo. 28 Lelo iwe bakakushonawila pamo na bashasembululwa kabili mukalaala pamo na bo baipaila ku lupanga.

29 “‘Edomu+ aba kulya, imfumu shakwe, ne ntungulushi shakwe shonse abalaala pamo na bo baipaile ku lupanga; nangu ca kuti balikwete amaka na bo bene bakalaala pamo na bashasembululwa+ e lyo na baleya ku nindi.*

30 “‘Kulya e kwaba bacilolo* bonse aba ku kapinda ka ku kuso, pamo na bena Sidone bonse,+ abaya ku nshiishi ninshi baliseebana, pamo na bo baipaya nangu ca kuti baletiinya abantu pa mulandu na maka ayo bakwete. Bakalaala abashasembululwa pamo na bo baipaila ku lupanga kabili bakaseebanina pamo na baleya ku nindi.*

31 “‘Farao akamona fyonse ifi kabili akasansamuka pa fyacitikiile amabumba yakwe yonse ayakalamba;+ Farao na bashilika bakwe bonse bakabepaila ku lupanga,’ e fyo Shikulu Mulopwe Yehova alanda.

32 “‘Pa mulandu wa kuti Farao alilengele aba ku calo ca ba mweo baba no mwenso, ena pamo na mabumba yakwe yonse ayakalamba, bakalaala pamo na bashasembululwa, abo baipaila ku lupanga,’ e fyo Shikulu Mulopwe Yehova alanda.”

6 “‘Lelo nga ca kuti kalinda amona ulupanga luleisa, kabili talishishe intandala+ no kusoka abantu no lupanga lwaisa lwaipayapo na umo, ulya muntu akafwila pa filubo fyakwe, lelo umulopa wakwe nkaufwaya kuli kalinda.’*+

7 “Nomba iwe we mwana wa muntu, nakusonta ukuba kalinda wa ba mu ng’anda ya kwa Israele, kabili ilyo ukomfwa amashiwi ayakafuma mu kanwa kandi, ufwile ukubasoka ukulingana ne fyo nkakweba.+ 8 Ilyo naeba umubifi nati, ‘We mubifi, nangu cibe shani ukafwa!’+ lelo iwe tausokele umubifi pa kuti aluke, uyo mubifi akafwa pa mulandu wa cilubo cakwe,+ lelo umulopa wakwe nkaufwaya kuli iwe. 9 Lelo nga wasoka umubifi na o tafumine mu nshila shakwe ishabipa kabili akaana ukwaluka, akafwa pa mulandu wa cilubo cakwe,+ lelo iwe ukapususha umweo obe.+

10 “Nomba iwe we mwana wa muntu, eba aba mu ng’anda ya kwa Israele auti, ‘Imwe mulanda amuti: “Bucipondoka bwesu ne membu shesu fyaba kwati cisendo icilenga tulefunshikilako fye,+ e ico kuti twatwalilila shani ukuba no mweo?”’+ 11 Ubebe auti, Shikulu Mulopwe Yehova atila, ‘“Na pali ne mwine. Nshisekelela umubifi nga afwa,+ lelo mfwaya ukuti umubifi aleka ifyabipa ifyo acita+ pa kuti atwalilile ukuba no mweo.+ Pilibukeni, pilibukeni no kuleka ifyabipa ifyo mucita,+ pa kuti mwikafwa mwe ba mu ng’anda ya kwa Israele.”’+

12 “Nomba iwe we mwana wa muntu, eba abana ba bantu bobe auti, ‘Ubulungami bwa walungama tabwakamupusushe nga ca kuti apondoka;+ kabili ifyabipa ifyo umubifi acita, tafyakalenge akaipunune nga ca kuti apilibuka aleka no kuficita;+ kabili uwalungama takatwalilile ukuba no mweo pa mulandu wa bulungami bwakwe mu bushiku akabembuka.+ 13 Ilyo naeba uwalungama nati: “Nangu cibe shani ukaba no mweo,” na o acetekela ubulungami bwakwe kabili alacita ne fyabipa,*+ tapali nangu cimo pa fyalungama ifyo acita ico nkebukisha, lelo akafwa pa mulandu wa fyabipa ifyo acita.+

14 “‘Kabili ilyo naeba umubifi nati: “Nangu cibe shani ukafwa,” na o apilibuka aleka no kubembuka kabili aba no mulinganya atampa no kucita ifyalungama,+ 15 abwekeshamo iciikatilo,+ kabili abwekeshamo ne fyo apokele ku maka,+ alakonka na mafunde yandi ayalenga umuntu aba no mweo kabili aleka ukucita ifyabipa, nangu cibe shani akatwalilila ukuba no mweo.+ Takafwe. 16 Tapali ulubembu nangu lumo pa membu acitile ulo bakamupeelelapo umulandu,*+ pantu aliba no mulinganya kabili alacita ifyalungama. Nangu cibe shani akatwalilila ukuba no mweo.’+

17 “Lelo abantu bobe batila, ‘Mu fyo Yehova acita tamwaba umulinganya,’ e lyo ninshi mu fyo bacita e mushaba umulinganya.

18 “Nga ca kuti uwalungama aleka ukucita ifyalungama kabili atendeka ukucita ifyabipa, afwile ukufwila pa fyabipa ifyo acita.+ 19 Lelo umubifi nga aleka ukucita ifyabipa ifyo alecita kabili aba no mulinganya alacita ne fyalungama, akatwalilila ukuba no mweo.+

20 “Lelo imwe mutila, ‘Mu fyo Yehova acita tamwaba umulinganya.’+ Nkapingula cila muntu ukulingana ne fyo acita, mwe ba mu ng’anda ya kwa Israele.”

21 Nomba mu mwaka walenga 12, pa bushiku bwalenga 5 ubwa mweshi uwalenga 10, ukutula apo batusendele bunkole, umwaume uwafulumwike ku Yerusalemu aishile kuli ine,+ kabili anjebele ati: “Nabapoka umusumba wa Yerusalemu!”+

22 Nomba mu nshita ya cungulo ilyo umwaume uwafulumwike ku Yerusalemu ashilaisa, ukuboko kwa kwa Yehova kwaishile pali ine, kabili aliswile akanwa kandi ilyo ulya mwaume ashilaisa kuli ine ulucelo. E ico aliswile akanwa kandi, kabili natendeke ukulanda.+

23 Lyena Yehova anjebele ati: 24 “We mwana wa muntu, abekala muli ifi fibolya+ balanda pa calo ca Israele abati, ‘Abrahamu ali fye muntu umo, lelo ici calo caishileba cakwe.+ Nomba ifwe tuli bengi; ukwabula no kutwishika balitupeela ici calo pa kuti cibe cesu.’

25 “E ico ubebe auti, ‘Shikulu Mulopwe Yehova atila: “Mulya inama no mulopamo,+ mwinwina na menso yenu ku tulubi twa bunani,* kabili mulasuumya umulopa.+ E ico mulandu nshi icalo cingabela icenu? 26 Mwacetekela ulupanga lwenu.+ Mulacita ifya bunani, kabili cila muntu alaala no mukashi wa munankwe.+ E ico mulandu nshi icalo cingabela icenu?”’+

27 “Ufwile ukubeba auti, ‘Shikulu Mulopwe Yehova atila: “Na pali ne mwine, abekala mu fibolya bakafwa ku lupanga; abekala mu mpanga nkabapeela ku finama pa kuti fikabalye, kabili abekala mu ncende ishacingililwa na mu ncengo ubulwele bukabepaya.+ 28 Nkalenga icalo cikashale icibolya umushaba akantu nangu kamo,+ nkalenga ne cilumba ca ciko cikapwe kabili impili sha mu Israele shikashala ifibolya+ ica kuti tamwakalepita umuntu nangu umo. 29 Kabili bakeshiba ukuti nine Yehova ilyo nkalenga icalo cikashale icibolya umwabula akantu nangu kamo+ pa mulandu wa fya bunani fyonse ifyo bacita.”’+

30 “Nomba iwe we mwana wa muntu, abantu bobe balelanda pali iwe mupepi ne fibumba na pa minshi ya mayanda,+ balelanshanya, cila muntu alelanshanya na munyina ati, ‘Iseni, lekeni tumfwe amashiwi ayalefuma kuli Yehova.’ 31 Bakesa abengi kuli iwe no kwikala pa ntanshi yobe nge fyo abantu bandi bengacita; kabili bakomfwa ifyo ukabeba lelo tabakaficite.+ Pantu bakutasha ifya bufi* ku tunwa twabo, lelo mu mitima yabo bafwaya ukunonka ifya mu bucenjeshi. 32 Mona! bakumona nga kemba wa lwimbo lwa citemwiko, uwakwata ishiwi ilisuma kabili uwaishiba sana ukulisha icilimba ca nsale. Bakomfwa ifyo ukabeba, lelo tapakabe nangu umo uukaficita. 33 Kabili ilyo cikafikilishiwa—pantu na kuba cikafikilishiwa—e lyo bakeshiba ukuti pali bena pali kasesema.”+

34 Na kabili Yehova anjebele ati: 2 “We mwana wa muntu, sesema pa fyabipa ifikacitikila bakacema ba mu Israele. Sesema, kabili ubebe auti, ‘Shikulu Mulopwe Yehova atila: “We bulanda kuli bakacema ba mu Israele,+ abailiisha abene! Bushe te mpaanga bakacema bafwile ukulaliisha?+ 3 Imwe mulalya amafuta ya nama, mufwala ifya kufwala fya masako ya mpaanga kabili mwipaya inama ishainisha,+ lelo tamuliisha umukuni.+ 4 Ishanaka tamwashikosha, ishalwala tamwashundapa, ishacenwa tamwashikakila ifilonda, ishafuma pa mukuni tamwashibwesha kabili ishaluba tamwashifwaya,+ lelo mwashitekela mu bukali kabili mu bunkalwe.+ 5 E ico shalisalangana pantu takwali kacema wa kushicema;+ shalisalangene kabili shaishileba ifya kulya fya nama mpanga shonse. 6 Impaanga shandi shalelulumba fye pa mpili shonse na pa tupili tonse; impaanga shandi shalisalanganine pe sonde ponse, ukwabula no wa kushifwaya nelyo uwa kushisokota.

7 “‘“E ico mwe bakacema, umfweni icebo ca kwa Yehova: 8 Shikulu Mulopwe Yehova atila, ‘“Na pali ne mwine, apo impaanga shandi shasangwike ifya kulya fya nama, ifya kulya fya nama mpanga shonse, pa mulandu wa kuti takwali kacema uwa kushicingilila, kabili pa mulandu wa kuti bakacema bandi tabafwaile impaanga shandi, lelo baleiliisha fye abene kabili tabaleliisha impaanga shandi,”’ 9 mwe bakacema, umfweni icebo ca kwa Yehova. 10 Shikulu Mulopwe Yehova atila: ‘Nkalwisha bakacema kabili nkabalubulwisha pa mpaanga shandi,* nkabalesha no kuliisha impaanga shandi+ kabili bakacema tabakatwalilile ukuiliisha* abene. Nkapokolola impaanga shandi ku tunwa twabo, kabili tashakatwalilile ukuba ifya kulya fyabo.’”

11 “‘Pantu Shikulu Mulopwe Yehova alanda ati: “Moneni, ine ndi no kufwaya impaanga shandi kabili nkalashisakamana ne mwine.+ 12 Nkasakamana impaanga shandi nga filya kacema uwasanga impaanga shakwe ishasalangana ashiliisha.+ Nkashipususha ukufuma mu ncende monse umo shasalanganine mu bushiku bwa makumbi kabili ubwafiita sana.+ 13 Nkashifumya mu nko kabili nkashilonganya ukufuma mu fyalo no kushileta mu calo ca shiko, kabili nkashiliishisha pa mpili sha mu Israele,+ mupepi no tumilonga kabili mupepi ne ncende shonse isha kwikalamo isha mu calo. 14 Nkashiliishisha mu ncende umwaba umulemfwe uusuma, kabili shikaliila pa mpili ishitali+ isha mu calo ca Israele. Kulya e ko shikalayolwela mu ncende ya mulemfwe uusuma,+ kabili shikalalya umulemfwe uusuma pa mpili sha mu Israele.”

15 “‘“Ine ne mwine nkaliisha impaanga shandi,+ kabili ine ne mwine nkalenga shikayolole,”+ e fyo Shikulu Mulopwe Yehova alanda. 16 “Iyaluba nkaifwaya,+ iyafuma pa mukuni nkaibwesha, iyacenekwa nkaikakila ifilonda kabili iyanaka nkaikosha; lelo nkalofya iyaina ne yakosa. Nkalenga ubupingushi bukabe ifya kulya fya iko.”

17 Shikulu Mulopwe Yehova atila: “Nomba imwe mwe mpaanga shandi, ndi no kupingula impaanga shonse kabili ndi no kupingula impaanga ishilume ne mbushi ishilume.+ 18 Bushe mumona ukuti cintu icinono ifi mulya umulemfwe uwawamisha? Bushe mufwile no kunyantaula uwashalapo? Kabili pa numa ya kunwa amenshi ayalengama sana, bushe mufwile ukunyantaulamo pa kuti yafundauke? 19 Bushe nomba impaanga shandi shifwile ukulalya umulemfwe uo mwanyantaulapo no kunwa amenshi ayo mwafundaula na makasa yenu?”

20 “‘E ico Shikulu Mulopwe Yehova alebeba ati: “Moneni, ine ne mwine nkapingula impaanga iyaina ne mpaanga iyaonda, 21 pantu ku mbafu shenu na ku mabeya yenu e ko mwaleshisunkila, kabili ku nsengo shenu e ko mwaletunkwila shonse ishalwele mpaka mwashisalanganishisha mu fyalo fimbi. 22 Kabili nkapususha impaanga shandi, ica kuti tashakatwalilile ukuba ifya kulya fya nama mpanga;+ kabili nkapingula ukuti iyi impaanga ya kaele e lyo imbi te ya kaele. 23 Nkemya kacema umo,+ umubomfi wandi Davidi,+ kabili akalashiliisha. Ena akalashiliisha kabili akaba kacema wa shiko.+ 24 Kabili ine ne Yehova, nkaba Lesa wa shiko,+ no mubomfi wandi Davidi akaba intungulushi pali shena.+ Ine ne Yehova, ninanda.

25 “‘“Kabili nkapangana nasho icipangano ca mutende,+ nkalofya ne nama mpanga ishikali+ mu calo, pa kuti impaanga shandi shikaleikala umutende mu matololo kabili shikalelaala mu mitengo.+ 26 Nkalenga shikabe ipaalo, nkalenga ne ncende iyashinguluka akapili kandi ikabe ipaalo,+ kabili nkalenga imfula ikaloke pa nshita iyalinga. Amapaalo yakalaloka fye nge mfula.+ 27 Ifimuti fya mu mpanga fikatwala ifisabo, umushili na o ukamesha ifimenwa,+ kabili abantu bandi bakekala mu calo ukwabula nangu cimo ica kubatiinya. Kabili bakeshiba ukuti nine Yehova ilyo nkafunaula ifimuti fya makoli yabo,+ na lintu nkabapususha ku bantu ababatekele ubusha. 28 Inko tashakatwalilile ukulya impaanga shandi, kabili inama mpanga isha mwi sonde tashakashilye, shikalaikala umutende ukwabula nangu umo uwa kushitiinya.+

29 “‘“Nkashilimbila ifilimwa fya lulumbi, tashakatwalilile ukufwa ku cipowe mu calo,+ kabili inko tashakatwalilile ukushiseebanya.+ 30 ‘Lyena bakeshiba ukuti, ine ne Yehova Lesa wabo, naba nabo no kuti aba mu ng’anda ya kwa Israele, bantu bandi,’+ e fyo Shikulu Mulopwe Yehova alanda.”’

31 “‘Nomba imwe mwe mpaanga shandi,+ mwe mpaanga isho nsakamana, muli bantunse fye, kabili ine nine Lesa wenu,’ e fyo Shikulu mulopwe Yehova alanda.”

35 Na kabili Yehova anjebele ati: 2 “We mwana wa muntu, losha icinso cobe ku calo ca mpili ica Seiri+ no kusesema ifyabipa ifikacitikila ici calo.+ 3 Ucebe auti, ‘Shikulu Mulopwe Yehova atila: “Mona nkakulwisha we calo ca mpili ica Seiri, nkafungulwila no kuboko kwandi pali iwe kabili nkalenga ukabe icibolya umushaba akantu nangu kamo.+ 4 Nkalenga imisumba yobe ikabe ifibolya, na iwe ukaba fye icibolya;+ e lyo ukeshiba ukuti nine Yehova. 5 Pantu tawalekele ukuba umulwani,+ kabili walekele abena Israele babepaila ku lupanga pa nshita bali no bucushi, pa nshita babapingwile ubupingushi bwa kulekeleshako.”’+

6 Shikulu Mulopwe Yehova atila, “‘E ico na pali ne mwine, nkakupekanya pa kuti bakakusuumye umulopa, kabili umulopa ukakukonka.+ Apo walipatile umulopa, umulopa wine ukakukonka.+ 7 Nkalenga icalo ca mpili ica Seiri cikabe icibolya umushaba akantu nangu kamo,+ kabili nkepaya onse uukapitamo nelyo uukabwelelamo. 8 Mu mpili nkesushamo abakepaiwa kabili abo bakepaila ku lupanga bakalaala mu tupili tobe, mu mipokapoka yobe na mu tumilonga tobe tonse. 9 Nkalenga ukabe icibolya umuyayaya, kabili mu misumba yobe tamwakekale abantu;+ lyena mukeshiba ukuti nine Yehova.’

10 “Pa mulandu wa kuti watile, ‘Ishi nko shibili ne fi fyalo fibili fikaba fyandi, kabili nkafipoka fyonse fibili fikabe fyandi,’+ nangu ca kuti ine ne Yehova e po nali, 11 ‘e ico na pali ne mwine,’ e fyo Shikulu Mulopwe Yehova alanda, ‘ifyo nkakucita fikalingana ne fyo wabafulilwe ne fyo wali na kalumwa kuli bena pa mulandu wa kuti walibapatile;+ kabili nkalenga bakanjishibe ilyo nkakupingula. 12 Lyena ukeshiba ukuti ine ne Yehova nalyumfwa ifya musaalula fyonse ifyo walandile pa mpili sha mu Israele ilyo watile: “Nashishala icibolya kabili nabatupeela pa kuti tushonaule.”* 13 Kabili mwalelanda pali ine cilumba cilumba, mwalilandile na mashiwi ayengi pali ine.+ Nalyumfwa fyonse.’

14 “Shikulu Mulopwe Yehova atila: ‘Aba pe sonde bonse bakasekelela ilyo nkalenga ukabe icibolya umushaba akantu nangu kamo. 15 Nga filya fine wasekelele ilyo icalo ca ba mu ng’anda ya kwa Israele cashele icibolya, e fyo na iwe nkakucita.+ Ukashala fye icibolya, we citungu ca mpili ica Seiri, Edomu yonse,+ kabili bakeshiba ukuti nine Yehova.’”

36 “Nomba iwe we mwana wa muntu, sesema pa lwa mpili sha kwa Israele, kabili utile, ‘Mwe mpili sha kwa Israele, umfweni icebo ca kwa Yehova. 2 Shikulu Mulopwe Yehova atila: “Umulwani alandile pali imwe ati, ‘Eya! Ne fifulo fya kupepelapo ifya kale na kale nomba fyaba fyesu!’”’+

3 “E ico sesema auti, ‘Shikulu Mulopwe Yehova atila: “Pa mulandu wa kuti nabakusha icibolya kabili nabakusansa ukufuma mu ntunga shonse, pa kuti ukabe uwa bantu abakapusuka* mu bantu ba mu nko, pantu abantu balakulandapo kabili balakwamba,+ 4 mwe mpili sha kwa Israele, umfweni ifyo Shikulu Mulopwe Yehova alanda! Shikulu Mulopwe Yehova ale-eba impili no tupili, imilonga, imipokapoka, incende ishashala ifibolya+ ne misumba umushaba abantu iyo abapuswike mu nko ishabashingulwike bapoka ifipe kabili iyo bapumya;+ 5 Shikulu Mulopwe Yehova aleti, ‘Pa mulandu no kucincila kwandi ukwaba ngo mulilo,+ nkalanda na bakapusuka mu nko na bena Edomu bonse, abasekelela sana kabili abalanda musaalula musaalula+ ukuti icalo candi calo cabo pa kuti bapoke impanga sha mulemfwe kabili bapoke ifipe ifyabamo.’”’+

6 “E ico sesema pa calo ca Israele, kabili webe impili no tupili, imilonga ne mipokapoka auti, ‘Shikulu Mulopwe Yehova atila: “Moneni! Nalalanda pa mulandu no kucincila kwandi kabili mu bukali bwandi, pantu inko shalimuseebanya.”’+

7 “E ico Shikulu Mulopwe Yehova atila: ‘Ine naimya ukuboko kwandi no kulapa ukuti inko isha kushinguluka shikaseebana pa fyo shakuseebenye.+ 8 Lelo imwe mwe mpili sha kwa Israele mukakwata imisambo kabili mukatwala ifisabo fya kuti abantu bandi abena Israele+ bakalelya, pantu bali no kubwela nomba line. 9 Pantu ndi na imwe, nkapilibukila kuli imwe kabili mukalimwa no kubyalwamo imbuto. 10 Nkafusha abantu benu—aba mu ng’anda ya kwa Israele yonse, bonse fye—kabili mu misumba mukekala abantu+ ne ncende ishashala ifibolya shikakuulwa cipya cipya.+ 11 Cine cine, nkafusha abantu benu ne fitekwa fyenu,+ abantu bobe bakafyalana ne fitekwa fyobe fikasandana; kabili nkalenga ukekalwemo nga fintu cali kale,+ nkalenga ukatunguluke ukucila ifyo wali kale;+ kabili mukeshiba ukuti nine Yehova.+ 12 Nkalenga abantu—abantu bandi abena Israele—bakende muli imwe, kabili mukaba ababo.+ Mukaba ubupyani bwabo, kabili tamwakatale amulenga bakafwilwe abana.’”+

13 “Shikulu Mulopwe Yehova atila, ‘Pa mulandu wa kuti bamweba abati: “Muli calo icipaya abantu kabili mulenga inko shilefwilwa abana,”’ 14 ‘tamwakatwalilile ukwipaya abantu nelyo ukulenga inko shenu shikalefwilwa abana,’ e fyo Shikulu Mulopwe Yehova alanda. 15 ‘Nshakaleke inko shikatwalilile ukumusaalula nelyo ukuleka abantu bakalemupontela,+ kabili nshakalenge inko shenu shikaleipununa,’ e fyo Shikulu Mulopwe Yehova alanda.”

16 Na kabili Yehova anjebele ati: 17 “We mwana wa muntu, ilyo aba mu ng’anda ya kwa Israele baleikala mu calo cabo, balicikoweseshe pa mulandu ne mibele yabo e lyo ne fyo balecita.+ Imibele yabo naleimona kwati makowesha ya mwanakashi uuli ku mweshi.+ 18 E ico nalibapongwelele ubukali bwandi pa mulandu wa mulopa uo basuumishe mu calo,+ na pa mulandu wa kuti balikoweseshe icalo ku tulubi twabo utwa bunani.*+ 19 E ico nabasalanganishishe mu nko kabili nabapashiile mu fyalo.+ Nabapingwile ukulingana ne mibele yabo kabili ukulingana ne fyo balecita. 20 Lelo ilyo bafikile kuli isho inko, abantu baliseebenye ishina lyandi ilya mushilo+ pantu balelanda pali bena abati, ‘Aba bantu ba kwa Yehova, nomba balifuma mu calo cakwe.’ 21 E ico nkalanga ukuti nalibika amano kwi shina lyandi ilya mushilo, ilyo aba mu ng’anda ya kwa Israele baseebanya mu nko isho bayamo.”+

22 “E ico eba aba mu ng’anda ya kwa Israele auti, ‘Shikulu Mulopwe Yehova atila: “Te pa mulandu wenu ndecitila ici, mwe ba mu ng’anda ya kwa Israele, lelo ni pa mulandu we shina lyandi ilya mushilo ilyo mwaseebanya mu nko isho mwayamo.”’+ 23 ‘Nkalenga ishina lyandi ilikalamba+ likabe ilya mushilo, ishina ilyaseebana mu nko, ilyo imwe mwaseebanya mu nko kabili inko shikeshiba ukuti nine Yehova,’+ e fyo Shikulu Mulopwe Yehova alanda, ‘ilyo nkalenga ishina lyandi likabe ilya mushilo pa menso ya shiko. 24 Nkamufumya mu nko no kumulonganika ukufuma mu fyalo fyonse kabili nkamubwesesha mu calo cenu.+ 25 Nkamusansa amenshi ayasuma kabili mukaba ababusaka,+ nkamusangulula ku kukowela kwenu konse+ na ku tulubi twenu utwa bunani tonse.+ 26 Nkamupeela umutima uupya,+ kabili nkabika umupashi uupya muli imwe.+ Nkafumya umutima uwaba nge libwe+ mu mibili yenu kabili nkamupeela umutima uwanaka ngo munofu.* 27 Nkabika umupashi wandi muli imwe, nkalenga mukalekonka amafunde yandi,+ kabili mukalakonka no bupingushi bwandi. 28 Lyena mukalaikala mu calo ico napeele ifikolwe fyenu, kabili mukaba abantu bandi na ine nkaba Lesa wenu.’+

29 “‘Nkamulubula ku fyakowela fyenu fyonse, nkeba ingano ukuti shikafule, kabili nshakamuletele icipowe.+ 30 Nkalenga ifisabo fya ku fimuti fikafule, kabili nkalenga ifisabo fya mu mabala yenu fikafule, pa kuti mwikaseebana na kabili mu nko pa mulandu wa cipowe.+ 31 Lyena mukebukisha imibele yenu iyabipa ne fishaweme ifyo mwalecita, kabili mukaipata mwe bene pa mulandu wa membu shenu ne fyabipa ifyo mwalecita.+ 32 Nomba ishibeni ukuti: Te pa mulandu wenu ndecitila ifi,’+ e fyo Shikulu Mulopwe Yehova alanda. ‘Lelo mufwile ukumfwa insoni kabili mumfwile ukumfwa ukuti na museebana pa mulandu wa mibele yenu, mwe ba mu ng’anda ya kwa Israele.’

33 “Shikulu Mulopwe Yehova atila: ‘Mu bushiku nkamusangulula ku membu shenu shonse, nkalenga imisumba ikekalwemo,+ ne ncende isho baonala shikakuulwe cipya cipya.+ 34 Icalo icashele icibolya ico umupita nshila onse alemona ukuti cashala icibolya, cikalimwamo. 35 Kabili abantu bakalalanda abati: “Icalo icali icibolya caba nge bala lya Edeni,+ kabili imisumba iyaonaike, iyashele ifibolya kabili iyo babongolwele nomba yakwata amalinga ayakosa kabili mwalaikala abantu.”+ 36 Kabili inko ishikashalako pa nko ishamushinguluka shikeshiba ukuti ine ne Yehova, ninkuula ifyabongolweke, kabili mu calo icashele icibolya ninimbamo fimo. Ine ne Yehova ninanda, kabili nincita.’+

37 “Shikulu Mulopwe Yehova atila, ‘Nkaleka na ba mu ng’anda ya kwa Israele bakanombe ukubacitila ici: Nkafusha abantu babo ica kuti bakaba kwati mukuni. 38 Bakaba ngo mukuni wa bantu ba mushilo, ngo mukuni wa kwa Yerusalemu* mu nshita ya mitebeto yakwe,+ mu misumba iyaonaike mukesula amabumba ya bantu;+ kabili bakeshiba ukuti nine Yehova.’”

37 Ukuboko kwa kwa Yehova kwali pali ine, kabili mu mupashi wakwe Yehova antwele pa kati ka mpanga iyabatama,+ kabili muli iyi mpanga mwali fye amafupa yeka yeka. 2 Alimpishishe monse umwali amafupa, kabili nalimwene ukuti muli iyi mpanga iyabatama mwali amafupa ayengi nga nshi kabili yali ayauma icine cine.+ 3 Anjipwishe ati: “We mwana wa muntu, bushe aya amafupa kuti yaba no mweo?” Na-aswike nati: “Mwe Shikulu Mulopwe Yehova, nimwe mwishibe.”+ 4 E ico anjebele ati: “Sesema pali aya mafupa kabili uyebe auti, ‘Mwe mafupa ayauma, umfweni icebo ca kwa Yehova:

5 “‘Shikulu Mulopwe Yehova ale-eba aya mafupa ati: “Nkalenga umupu ukengile muli imwe, kabili mukaba no mweo.+ 6 Nkamubikako imishipa ne minofu, nkamubikeko ne nkanda kabili nkamupuutamo umupu. Lyena mukaba no mweo; e lyo mukeshiba ukuti nine Yehova.”’”

7 Lyena naliseseme nga filya fine anjebele. Ilyo naseseme fye, kwaumfwikike icongo, ukukolonkonta, kabili amafupa yatampile ukulundana, ifupa kwi fupa linankwe. 8 Lyena namwene amafupa yakwata imishipa ne minofu kabili yakwata ne nkanda. Lelo tayakwete umupu.

9 Lyena anjebele ati: “Sesemena umwela. Sesema we mwana wa muntu kabili eba umwela auti, ‘Shikulu Mulopwe Yehova atila: “We mwela,* isa ukufuma ku ntunga shonse 4 kabili upuupe pali aba abantu abo baipeye pa kuti babe no mweo.”’”

10 E ico naliseseme nga filya fine anjebele, kabili umupu* waingile muli bena. Baishileba no mweo, baiminina no kwiminina.+ Bali libumba lya bashilika ilikalamba nga nshi.

11 Lyena anjebele ati: “We mwana wa muntu, aya mafupa ba mu ng’anda ya kwa Israele bonse.+ Umfwa, balanda abati, ‘Amafupa yesu yalyuma kabili isubilo lyesu lyalipwa.+ Twashala fye fweka.’ 12 E ico sesema, kabili ubebe auti, ‘Shikulu Mulopwe Yehova atila: “Nkesula inshiishi shenu,+ kabili nkamwimya ukufuma mu nshiishi shenu mwe bantu bandi, e lyo nkamulete mu calo ca Israele.+ 13 Kabili mukeshiba ukuti nine Yehova ilyo nkesula inshiishi shenu, no kumwimya mu nshiishi shenu, mwe bantu bandi.”’+ 14 ‘Nkabika umupashi wandi muli imwe kabili mukaba no mweo.+ Nkalenga mukekale mu calo cenu; kabili mukeshiba ukuti ine, ne Yehova ninanda, kabili nine ncitile ifi,’ e fyo Yehova alanda.”

15 Na kabili Yehova anjebele ati: 16 “Na iwe we mwana wa muntu, buula akamuti ulembepo auti, ‘Aka kwa Yuda na bana ba kwa Israele abo ali nabo.’*+ Lyena ubuule akamuti na kambi ulembepo auti, ‘Aka kwa Yosefe, akamuti ka kwa Efraimu, na ba mu ng’anda ya kwa Israele bonse abo ali nabo.’*+ 17 Lyena tubike pamo pa kuti tube akamuti kamo mu minwe yobe.+ 18 Abantu bobe* nga bakwipusha abati, ‘Bushe tawatwebe umo ifi wacita filolele?’ 19 ubebe auti, ‘Shikulu Mulopwe Yehova atila: “Nkabuula akamuti ka kwa Yosefe, akali mu minwe ya kwa Efraimu, ne mikowa ya bena Israele iyo ali nayo, kabili nkakabika pamo na kamuti ka kwa Yuda. Nkalenga tukabe akamuti kamo,+ kabili tukabe akamuti kamo mu minwe yandi.”’ 20 Utumuti uto ukalembapo ukatwikate mu minwe pa kuti bakaletumona.

21 “Lyena ubebe auti, ‘Shikulu Mulopwe Yehova atila: “Nkafumya abena Israele mu nko umo baya, kabili nkabalonganika ukufuma mu ntunga shonse e lyo nkabalete mu calo cabo.+ 22 Nkalenga bakabe uluko lumo mu calo,+ pa mpili sha mu Israele, kabili imfumu imo e ikalabateka bonse,+ tabakatwalilile ukuba inko shibili nelyo ukutwalilila ukuba amabufumu yabili.+ 23 Tabakatwalilile ukuikowesha ku tulubi twabo utwa bunani,* ku fya bunani ifyo bacita na ku membu shabo shonse.+ Nkabafwa pa kuti bakaleke ukucita fyonse ifilenga belaba ne cishinka kabili nkabasangulula. Bakaba abantu bandi, na ine nkaba Lesa wabo.+

24 “‘“Umubomfi wandi Davidi e ukaba imfumu yabo,+ kabili bonse bakakwata kacema umo.+ Bakalakonka ubupingushi bwandi kabili bakalakonka bwino bwino amafunde yandi.+ 25 Bakekala mu calo ico napeele umubomfi wandi Yakobo. Icalo umwaleikala ifikolwe fyenu,+ kabili bakekalamo umuyayaya,+ bena, abana babo* na bakatuntuka mu bana babo;+ kabili Davidi umubomfi wandi akaba intungulushi yabo* umuyayaya.+

26 “‘“Kabili nkapangana nabo icipangano ca mutende;+ ici cikaba cipangano ca muyayaya. Nkabapeela icalo, nkabafusha+ kabili nkabika icifulo candi ica mushilo pali bena umuyayaya. 27 Itenti lyandi* likaba pali bena, kabili nkaba Lesa wabo, nabo bakaba abantu bandi.+ 28 Kabili inko shikeshiba ukuti ine ne Yehova, ndelenga Israele ibe iya mushilo ilyo icifulo candi ica mushilo cili pali bena umuyayaya.”’”+

38 Na kabili Yehova anjebele ati: 2 “We mwana wa muntu, losha icinso cobe pali Goge wa mu calo ca Magoge,+ intungulushi iikalamba* iya kwa Mesheke na Tubali,+ kabili useseme ifyabipa ifikamucitikila.+ 3 Ulande auti, ‘Shikulu Mulopwe Yehova atila: “Mona nkakulwisha we Goge, we ntungulushi iikalamba* iya kwa Mesheke na Tubali. 4 Nkakwalulula kabili nkabika ifya kukobelako mu mibango yobe+ e lyo nkakuleka ukaye mu kulwa pamo na bashilika bobe bonse,+ bakabalwe na abanina pali bakabalwe, ninshi nabafwala ifya kufwala ifisuma nga nshi. Ibumba ilikalamba ninshi nalikwata inkwela ishikalamba ne shinono.* Bonse aba balabomfya ulupanga; 5 bakaba pamo na Persia, Etiopia na Puti,+ bonse bakakwata inkwela ishinono ne fisote ifyakosa; 6 Gomere na bashilika bakwe bonse, aba mu ng’anda ya kwa Togarma,+ aba ku ncende ya kutali sana iya ku kapinda ka ku kuso na bashilika babo bonse—inko ishingi shikaba na iwe.+

7 “‘“Iteyanyeni, kabili ipekanyeni, iwe pamo na mabumba yobe yonse aya bashilika ayo uli nayo, kabili niwe ukaba umukalamba wabo.*

8 “‘“Pa numa ya nshiku ishingi, nkaalukila kuli iwe. Kabili mu myaka ya kulekeleshako, ukasansa icalo ca bantu abapusuka ku lupanga, abo balonganika ukufuma mu nko ishingi pa mpili sha mu Israele ishashele ifibolya pa myaka iingi. Abekala muli ici icalo bababweseshe ukufuma mu nko, kabili bonse bekala umutende.+ 9 Ukabasansa kwati cimwela icikalamba, kabili ukakupa icalo kwati makumbi, iwe na mabumba yobe yonse aya bashilika pamo ne nko ishingi ishikaba na iwe.”’

10 “Shikulu Mulopwe Yehova atila, ‘Muli ubo bushiku kukaba ifikesa mu mutima obe, kabili ukapanga amapange ayabipa. 11 Ukatila: “Nalayasansa abaikala mu mishi iishacingililwa.+ Nkayasansa abaikala mu mutende, abashakwata icintu nangu cimo ica kubapumfyanya, bonse abaikala mu mishi iishacingililwa na malinga, imipindo nelyo impongolo.” 12 Ukaba na mapange ya kupoka ifintu ifingi kabili aya kusampa ifipe ifingi, aya kusansa incende sha kuti nomba mulekala abantu+ kabili abantu abo babwesha ukufuma mu nko,+ abalelonganika ifyuma ne fipe,+ abaleikala pa kati ke sonde.

13 “‘Sheba+ na Dedani,+ bashimakwebo ba ku Tarshishi+ na bantu babo bonse abaishibisha ukulwa* bakakweba abati: “Bushe ico ulesanshila ni pa kuti upoke ifintu ifingi kabili usampe ifintu ifingi? Bushe ico ulonganikile abashilika bobe ni pa kuti usende silfere na golde, pa kuti usende ifyuma ne fipe, pa kuti upoke ifintu ifingi nga nshi?”’

14 “E ico sesema, we mwana wa muntu, kabili webe Goge auti, ‘Shikulu Mulopwe Yehova atila: “Pali bulya bushiku ilyo abantu bandi abena Israele bakekala umutende, bushe tawakeshibe?+ 15 Ukesa ukufuma ku cifulo cobe, ku cifulo ca kutali sana ica ku kapinda ka ku kuso,+ iwe pamo ne nko ishingi, bonse bakanina pali bakabalwe, bakaba ibumba ilikalamba, ibumba lya bashilika ilikalamba.+ 16 Ukasansa abantu bandi abena Israele nga filya ikumbi likupa icalo. Mu nshiku sha ku mpela nkalenga ukasanse icalo candi,+ pa kuti aba mu nko benganjishiba ilyo nkailenga ukuba uwa mushilo pa menso yabo ukupitila muli iwe, we Goge.”’+

17 “Shikulu Mulopwe Yehova atila, ‘Bushe te iwe nalandilepo mu nshiku sha kale ukupitila mu babomfi bandi bakasesema ba mu Israele, abaseseme pa myaka iingi ukuti nkalenga ukasanse abantu bandi?’

18 “‘Shikulu Mulopwe Yehova atila, Pa bushiku Goge akasansa icalo ca Israele, nkakalipa nga nshi.’+ 19 Pa mulandu wa kucincila kwandi na pa mulandu wa bukali bwandi ubwaba ngo mulilo, nkalanda; kabili pali bulya bushiku mu calo ca Israele mukapita icinkukuma icikalamba. 20 Pa mulandu wandi ifintu fyonse fikatutuma, isabi lya muli bemba, ifyuni fya mulwelele, inama sha mu mpanga, fyonse ifikulika pe sonde na bantunse bonse aba pe sonde, kabili impili shikabongoloka,+ ifimabwe fikapona ne fibumba fyonse fikabongoloka.’

21 “‘Nkalenga ulupanga lukese pali ena pa mpili shandi shonse,’ e fyo Shikulu Mulopwe Yehova alanda. ‘Cila muntu akabomfya ulupanga lwakwe pa kusansa munyina.+ 22 Nkamupingula,* nkaleta icikuko pali ena+ kabili nkasuumya umulopa; nkalenga ne mfula iikalamba ikamuloke ne mfula ya mabwe,+ kabili nkalenga umulilo+ na mabwe ya mingu+ fikamuloke, fikaloke na bashilika bakwe e lyo ne nko ishingi ishikaba nankwe.+ 23 Kabili nangu cibe shani nkalanga ubukulu bwandi, nkailenga ukuba uwa mushilo kabili nkalenga inko ishingi shikanjishibe; e lyo bakeshiba ukuti nine Yehova.’

39 “Kabili iwe we mwana wa muntu, sesema ifyabipa ifikacitikila Goge,+ kabili umwebe auti, ‘Shikulu Mulopwe Yehova atila: “Nkakulwisha we Goge, we ntungulushi iikalamba* iya kwa Mesheke na Tubali.+ 2 Nkakwalulula kabili nkakutungulula e lyo nkakufumye ku ncende ya kutali sana iya ku kapinda ka ku kuso,+ nkakulete na pa mpili sha mu Israele. 3 Nkoma ubuta bobe ubwa ku kuboko kobe ukwa ku kuso, kabili nkalenga imifwi ikapone ku kuboko kobe ukwa ku kulyo. 4 Pa mpili sha mu Israele e po ukafwila,+ iwe na mabumba yobe yonse aya bashilika e lyo ne nko isho ukaba nasho. Nkalenga ifyuni ne finama fya mpanga fikakulye.”’+

5 “‘Ukafwila mu mpanga umushaba akantu nangu kamo,+ pantu ine ninanda,’ e fyo Shikulu Mulopwe Yehova alanda.

6 “‘Nkatuma umulilo pa calo ca Magoge na pa bekala umutende pa fishi;+ kabili abantu bakeshiba ukuti nine Yehova. 7 Nkalenga abantu bandi abena Israele bakeshibe ishina lyandi ilya mushilo kabili nshakaleke bakatwalilile ukuseebanya ishina lyandi ilya mushilo; kabili inko shikeshiba ukuti nine Yehova,+ Uwa Mushilo wa mu Israele.’+

8 “‘Moneni! Ici cikacitika kabili cikafikilishiwa,’ e fyo Shikulu Mulopwe Yehova alanda. ‘Ubu e bushiku nalandilepo. 9 Abekala mu misumba ya mu Israele bakafuma, kabili ifyanso e fyo bakalakosesha umulilo; inkwela ishinono* ne nkwela ishikalamba, amata ne mifwi, inkonto* na mafumo. Kabili ifi e fyo bakalakosesha umulilo+ pa myaka 7. 10 Tabakaleteba inkuni mu mpanga, nelyo ukutema inkuni mu mitengo, pantu ku fyanso e ko bakalakosesha umulilo.’

“‘Bakapoka ifipe fya bantu abalebapoka ifipe, kabili bakasampa ifipe fya bantu abalesampa ifipe fyabo,’ e fyo Shikulu Mulopwe Yehova alanda.

11 “‘Pali ubo bushiku nkapeela Goge+ incende ya kumushiikamo mu Israele, mu mupokapoka umupita abaya ku kabanga ka bemba, kabili ikacilikila abapitamo. Kulya e ko bakashiika Goge na mabumba yakwe ayakalamba, kabili bakalaita iyi incende ukuti Umupokapoka wa Hamone-Goge.*+ 12 Aba mu ng’anda ya kwa Israele bakalashiika aba pa myeshi 7 pa kuti bakasangulule icalo.+ 13 Abantu bonse aba mu calo e bakalabashiika, kabili ici cikalenga bakalumbuke mu bushiku nkaicindamika,’+ e fyo Shikulu Mulopwe Yehova alanda.

14 “‘Abaume bakabapeela umulimo wa kupita mu calo libili libili, pa kuti bakaleshiika ifitumbi ifyashala pa mbilibili, pa kuti bakasangulule icalo. Bakatwalilila ukufwaya ifitumbi pa myeshi 7. 15 Abakalapita mu calo nga bamona ifupa lya muntu, bakalabikapo icishibilo. Lyena abo bakapeela umulimo wa kushiika amafupa, bakalayashiika mu Mupokapoka wa Hamone-Goge.+ 16 Kabili kulya kukaba no musumba uo bakalaita ukuti Hamona.* Kabili bakasangulula icalo.’+

17 “Nomba iwe we mwana wa muntu, Shikulu Mulopwe Yehova atila, ‘eba ifyuni fya misango yonse ne nama sha mpanga shonse auti: “Longaneni kabili mwise. Longaneni kwi lambo ilyo ndemupekanishisha, ilambo ilikalamba pa mpili sha mu Israele.+ Mukalya iminofu kabili mukanwa umulopa.+ 18 Mukalya iminofu ya baume aba maka, kabili mukanwa umulopa wa ntungulushi sha pe sonde—impaanga ishilume, utwana twa mpaanga, imbushi, ne ng’ombe ishilume—shonse ni nama ishaina isha ku Bashani. 19 Mukalya ifyanona mpaka mukekute, kabili mukanwa umulopa mpaka mukakolwe, pa mulandu ne lambo ilyo nkamupekanishisha.”’

20 “‘Pe tebulo lyandi, mukekuta bakabalwe na bendela mu maceleta, abaume aba maka, na baishiba sana ukulwa aba misango yonse,’+ e fyo Shikulu Mulopwe Yehova alanda.

21 “‘Nkalenga inko shikamone ubukata bwandi; kabili shikamona ubupingushi ubo nkapingula na maka ayo nkashilanga.*+ 22 Ukutendekela pali bulya bushiku aba mu ng’anda ya kwa Israele bakeshiba ukuti nine Yehova Lesa wabo. 23 Kabili inko shikeshiba ukuti aba mu ng’anda ya kwa Israele balibasendele bunkole pa mulandu wa cilubo cabo, pa mulandu wa kuti tabali ne cishinka kuli ine.+ E ico nalifishile icinso candi kuli bena+ nabapeela na ku balwani babo,+ kabili bonse babepaile ku lupanga. 24 Ifyo nabacitile fyalingene no kukowela kwabo ne membu shabo, kabili nalifishile icinso candi kuli bena.’

25 “E ico Shikulu Mulopwe Yehova atila: ‘Nkabwesha bankole ba kwa Yakobo+ kabili bonse aba mu ng’anda ya kwa Israele+ nkabomfwila uluse; kabili nkaba uwacincila pa kucingilila ishina lyandi* ilya mushilo.+ 26 Pa numa ya kuseebana pa mulandu wa kukanaba ne cishinka kuli ine,+ bakekala umutende mu calo cabo, ukwabula nangu umo uwa kubatiinya.+ 27 Ilyo nkababwesha ukufuma mu nko kabili ilyo nkabalonganya ukufuma mu fyalo fya balwani babo,+ nkailanga ukuti ndi wa mushilo pa menso ya nko ishingi.’+

28 “‘Bakeshiba ukuti nine Yehova Lesa wabo, ilyo nkalenga inko shikabasende bunkole. Lyena pa numa nkabalonganika mu calo cabo, ukwabula ukushako nangu umo.+ 29 Nshakatwalilile ukufisa icinso candi kuli bena,+ pantu nkapongolwela umupashi wandi pa ba mu ng’anda ya kwa Israele,’+ e fyo Shikulu Mulopwe Yehova alanda.”

40 Ku kutampa kwa mwaka walenga 25 ukutula apo batusendele bunkole,+ pa bushiku bwalenga 10 ubwa mweshi, mu mwaka walenga 14 ukutula apo umusumba baonawilile,+ pali bulya bwine bushiku, ukuboko kwa kwa Yehova kwali pali ine, kabili antwele ku musumba.+ 2 Mu fimonwa fya kwa Lesa, antwele ku calo ca Israele kabili antekele pa lupili ulutali sana,+ apali icalemoneka kwati musumba lwa ku kapinda ka ku kulyo.

3 Ilyo antwele kulya, namwene umwaume uwalemoneka kwati apangilwa no mukuba.+ Aikete intambo ya nsalu, ne tete lya kupiminako,*+ kabili aiminine pa mpongolo. 4 Uyu mwaume anjebele ati: “We mwana wa muntu, ulolekeshe, umfwikishe, kabili ubikeko sana amano* kuli fyonse ifyo nalakulanga, pantu e co bakuleteele kuno. Webe aba mu ng’anda ya kwa Israele fyonse ifyo walamona.”+

5 Namwene icibumba icashingulwike itempele.* Uyu mwaume aikete itete lya kupiminako ilyalepele imikono 6 (ku mukono umo na umo alilundileko ulupi lumo).* Kabili umutika wa ciko walingene no butali bwe tete limo, kabili casanseme ukulingana no butali bwe tete limo.

6 Lyena aishile ku mpongolo iyaloseshe ku kabanga+ kabili aninine pa matabo ya iko. Ilyo apimine umwinshi wa mpongolo, mu bwipi yalepele itete limo, kabili umwinshi umbi na o walepele itete limo mu bwipi. 7 Cila muputule wa bakalinda walepele itete limo mu butali kabili itete limo mu bwipi, kabili incende iyali pa kati ka iyi miputule+ yalepele imikono 5. Umwinshi wa mpongolo uwali mupepi no muputule wa kwingililapo uwaloseshe mu kati walepele itete limo.

8 Apimine umuputule wa kwingililapo uwa mpongolo uwalolele mu kati, kabili walepele itete limo. 9 Lyena apimine umuputule wa kwingililapo pa mpongolo, uwalepele imikono 8; apimine ne nceshi sha uko, ishalepele imikono ibili; kabili uyu muputule waloseshe mu kati.

10 Ku lubali lumo na lumo ulwa mpongolo ya ku kabanga kwali imiputule ya bakalinda itatu. Iyi miputule yalilingene ubukulu, ne nceshi ishali ku mbali shonse isha iyi miputule shalilingene ubukulu.

11 Lyena apimine umwinshi wa mpongolo, mu bwipi wali imikono 10; kabili mu butali, impongolo yali imikono 13.

12 Pa ntanshi ya miputule ya bakalinda iyali uku no ku pali icibumba, kabili iyo ici icibumba calekenye yali umukono umo. Imiputule ya bakalinda iyali ku mbali shonse shibili, cila muputule walepele imikono 6.

13 Lyena apimine impongolo ukufuma pa mutenge wa muputule wa bakalinda* umo ukufika ku mutenge wa muputule wa bakalinda umbi, kabili pali imikono 25; iminshi ya miputule ya bakalinda yaliloshenye.+ 14 Lyena apimine inceshi shonse isha mu mbali kabili shalepele imikono 60, apimine ne nceshi shonse isha mu mbali ya mpongolo sha lubansa lonse. 15 Ukufuma pa ntanshi ya mwinshi wa kwingilila pa mpongolo ukufika pa mpela ya muputule wa kwingililapo uwali mu kati ka mpongolo pali imikono 50.

16 Ku miputule ya bakalinda na ku nceshi sha iyi miputule kwali amawindo ayakuliile mu kati.+ Aya amawindo yali ku mbali shonse mu kati ka miputule. Mu kati ka miputule ya kwingililapo namo mwali amawindo ku mbali shonse, kabili pa nceshi sha mu mbali balilengelepo utuncindu.+

17 Lyena antwele mu lubansa lwa kunse, kabili namwene imiputule ya kuliilamo,+ namwene na po bakubatile na mabwe ukushingulusha ulubansa lwa kunse. Apo bakubatile na mabwe pali imiputule ya kuliilamo 30. 18 Apo bakubatile na mabwe ku mbali ya mpongolo palingene ubutali ne mpongolo—apa apo bakubatile na mabwe pabelele mwi samba.

19 Lyena apimine incende* ukufuma pa ntanshi ya mpongolo ya mwi samba ukufika apatampiile ulubansa lwa mu kati. Ku kabanga na ku kapinda ka ku kuso iyi ncende yalepele imikono 100.

20 Ulubansa lwa kunse lwalikwete impongolo iyaloseshe ku kapinda ka ku kuso, kabili ali-ipimine mu butali na mu bwipi. 21 Yalikwete imiputule ya bakalinda itatu uku no ku. Inceshi sha iko no muputule wa kwingililapo fyalingene fye ne mpongolo ya kubalilapo. Iyi mpongolo yalepele imikono 50 mu butali, ne mikono 25 mu bwipi. 22 Amawindo ya iyi mpongolo, umuputule wa kwingililapo no tuncindu uto balengele pa fibumba+ fyalingene fye ne fyali ku mpongolo ya ku kabanga. Umuntu pa kuti afike kuli iyi impongolo alenina amatabo 7, kabili umuputule wa kwingililapo uwa iyi mpongolo wali pa ntanshi ya matabo.

23 Ulubansa lwa mu kati lwalikwete impongolo iyaloshenye ne mpongolo ya ku kapinda ka ku kuso ne yaloshenye ne mpongolo ya ku kabanga. Alipimine ukufuma ku mpongolo imo ukufika ku mpongolo imbi, kabili pali imikono 100.

24 Lyena antwele ku kapinda ka ku kulyo, kabili namwene impongolo iyali ku lubali lwa ku kapinda ka ku kulyo.+ Apimine inceshi sha mu mbali no muputule wa kwingililapo, kabili fyalingene fye ne fyali ku mpongolo shimbi. 25 Iyi mpongolo yalikwete amawindo mu mbali shonse shibili na mu muputule wa kwingililapo ayali fye nga mawindo yambi. Iyi mpongolo yali imikono 50 mu butali, ne mikono 25 mu bwipi. 26 Pa kufika pali iyi impongolo pali amatabo 7,+ kabili umuputule wa kwingililapo uwa iyi mpongolo wali pa ntanshi ya matabo. Kabili pali cila luceshi balilengelepo akancindu kamo.

27 Ulubansa lwa mu kati lwalikwete impongolo iyaloseshe ku kapinda ka ku kulyo; apimine ukufuma pa mpongolo ukuya ku kapinda ka ku kulyo ukufika pa mpongolo iyo yaloshenye nayo, kabili pali imikono 100. 28 Lyena antwele ku lubansa lwa mu kati ukupitila pa mpongolo ya ku kapinda ka ku kulyo; ilyo apimine iyi mpongolo ya ku kapinda ka ku kulyo, yalingene fye ubukulu ne mpongolo shimbi. 29 Imiputule ya bakalinda iyali muli iyi mpongolo, inceshi sha iko, no muputule wa kwingililapo fyalingene fye ubukulu nge fyali mu mpongolo shimbi. Impongolo yalikwete amawindo mu mbali shonse shibili na mu muputule wa kwingililapo. Yalepele imikono 50 mu butali ne mikono 25 mu bwipi.+ 30 Konse fye kwali imiputule ya kwingililapo; mu butali yalepele imikono 25, na mu bwipi yali imikono 5. 31 Umuputule wa kwingililapo uwa iyi mpongolo waloseshe ku lubansa lwa kunse, kabili kwali utuncindu uto balengele pa nceshi ishali mu mbali shonse shibili,+ kwali na matabo 8 aya kuninapo pa kuya kuli iyi mpongolo.+

32 Ilyo andetele mu lubansa lwa mu kati ukufumina ku kabanga, alipimine impongolo, kabili yalingene fye ubukulu ne mpongolo shimbi. 33 Imiputule ya bakalinda iyali muli iyi mpongolo, inceshi ishali mu mbali shonse shibili, no muputule wa kwingililapo fyalingene fye ubukulu ne mpongolo shimbi. Yalikwete amawindo mu mbali shonse shibili na mu muputule uwa kwingililapo. Walepele imikono 50 mu butali ne mikono 25 mu bwipi. 34 Umuputule wa kwingililapo uwa iyi mpongolo waloseshe ku lubansa lwa kunse, kabili pa nceshi shibili isha iko ishali ku mbali shonse balengelepo utuncindu, pali na matabo 8 aya kunininapo pa kuya kuli iyi mpongolo.

35 Lyena antwele ku mpongolo ya ku kapinda ka ku kuso+ kabili ilyo aipimine; yalingene fye ubukulu ne mpongolo shimbi. 36 Imiputule ya bakalinda iyali muli iyi mpongolo, inceshi sha iko ishali ku mbali shonse shibili no muputule wa kwingililapo fyalingene fye ubukulu ne fyali ku mpongolo shimbi. Yalikwete amawindo ku mbali shonse. Yalepele mu butali imikono 50 na mu bwipi imikono 25. 37 Inceshi sha iyi mpongolo ishali ku mbali shonse shibili shaloseshe ku lubansa lwa kunse, kabili pali ishi nceshi shonse shibili balengelepo utuncindu, kwali na matabo 8 aya kuninapo pa kuya kuli iyi mpongolo.

38 Umuputule wa kuliilamo uwakwete umwinshi, wabelele mupepi ne nceshi sha mpongolo, uko balesamfisha+ ifyo baletuula imituulo ya koca.

39 Kwali amatebulo yabili mu mbali shonse shibili isha muputule wa kwingililapo uwa mpongolo apo baleipaila inama sha kutuula imituulo ya koca,+ imituulo ya pa lubembu,+ ne mituulo ya pa mulandu.+ 40 Mupepi no mwinshi wa mpongolo ya ku kapinda ka ku kuso, pali amatebulo yabili ayali panse. Kwali amatebulo na yambi yabili, ku lubali lumbi ulwa muputule wa kwingililapo uwa mpongolo. 41 Ku mbali shonse shibili isha mpongolo kwali amatebulo 4—yonse pamo yali 8—e po baleipaila inama sha kutuula. 42 Amatebulo yonse 4 apo balepekanishisha imituulo ya koca, bayapangiile na mabwe ayaputulwa bwino. Yali umukono umo na hafu mu butali, umukono umo na hafu mu bwipi, kabili yasanseme umukono umo. Pali aya amatebulo e po balebika ifyo balebomfya pa kwipaya inama sha kutuula imituulo ya koca na malambo. 43 Mu miputule ya mu kati balipopelemo utumashelufu utwalepele ulupi lumo mu bwipi; kabili pa matebulo balebikapo iminofu ya mituulo.

44 Panse ya mpongolo ya mu kati pali imiputule iyo bakemba+ baleliilamo; iyi yali mu kati ka lubansa lwa mu kati, kabili yaloseshe ku kapinda ka ku kulyo. Kwali umuputule wa kuliilamo na umbi mupepi ne mpongolo ya ku kabanga, uwaloseshe ku kapinda ka ku kuso.

45 Anjebele ati: “Uyu umuputule wa kuliilamo uwalosha ku kapinda ka ku kulyo, wa bashimapepo ababombela pe tempele.+ 46 Umuputule wa kuliilamo uwalosha ku kapinda ka ku kuso wa bashimapepo ababombela pa ciipailo.+ Bana ba kwa Sadoke+ abaume, aba mu mukowa wa kwa Lebi abo bapeela umulimo wa kupalama kuli Yehova pa kuti balemubombela.”+

47 Lyena apimine ulubansa lwa mu kati. Lwali imikono 100 mu butali ne mikono 100 mu bwipi. Imbali shonse 4 shali ishalingana. Iciipailo cali pa ntanshi ye tempele.

48 Lyena antwele ku muputule wa kwingililapo uwe tempele,+ kabili apimine uluceshi lwa ku mbali ya muputule wa kwingililapo, lwali mikono 5 ulubali lumo ne mikono 5 ulubali lumbi. Impongolo yali imikono itatu mu bwipi ku lubali luno ne mikono itatu ku lubali lumbi.

49 Umuputule wa kwingililapo wali imikono 20 mu butali, ne mikono 11* mu bwipi. Abantu balenina amatabo ukufika pali uyu muputule. Mupepi ne nceshi kwali inceshi na shimbi, lumo uku lumbi nalo uku.+

41 Lyena antwele ku cifulo ca mushilo,* kabili apimine inceshi sha ku mbali; shali imikono 6* mu bwipi ku lubali lumo, ne mikono 6 mu bwipi ku lubali lumbi. 2 Umwinshi wali imikono 10 mu bwipi, kabili ifibumba ifyali ku mbali ya mwinshi fyali imikono 5 ku lubali lumo ne mikono 5 ku lubali lumbi. Ilyo apimine icifulo ca mushilo ice tempele, calepele imikono 40 mu butali, ne mikono 20 mu bwipi.

3 Lyena aingile mu kati,* e lyo apima uluceshi lwa pa mwinshi,* lwatikeme imikono ibili, kabili umwinshi wali imikono 6 mu bwipi. Ifibumba fya pa mwinshi fyalepele imikono 7. 4 Lyena apimine umuputule uwaloseshe ku cifulo ca mushilo ice tempele, kabili walepele imikono 20 mu butali ne mikono 20 mu bwipi.+ Kabili anjebele ati: “Uyu e muputule wa Mushilo Nga Nshi.”+

5 Lyena apimine icibumba ce tempele, kabili catikeme imikono 6. Imiputule ya mu mbali ye tempele yali imikono 4 mu bwipi.+ 6 Imiputule ya mu mbali ye tempele yali mu ntunti shitatu, kabili intunti imo na imo yalekwata imiputule ya mu mbali 30. Kwali uto bapangile apa kushintilila imbao isho iyi imiputule ya mu mbali yaikelepo, pa kuti ishi imbao tashingiile mu cibumba ce tempele.+ 7 Ku mbali shonse shibili ishe tempele kwali amatabo ayaleya yalekula nga muleya ku miputule ya mu mbali iyabelele pa muulu.+ Aya amatabo yaleya yalekulilako nga mulefuma pa ntunti ya panshi muleya pa ntunti yalenga butatu, ukupita pa ntunti ya pa kati.

8 Namwene icibumbili apo bakuulile itempele, kabili imifula ya miputule ya mu mbali ukufika pa koona, yali imikono 6. 9 Icibumba ca kunse ya miputule ya mu mbali ye tempele catikeme imikono 5. Kwali incende apashali akantu nangu kamo* ukufuma pa mpela ya cibumbili ukufika pa cibumba ca miputule ya mu mbali. Iyi incende nayo yali lubali lwe tempele.

10 Pa kati ke tempele ne miputule ya kuliilamo+ ku mbali shonse shibili kwali incende iyakulile imikono 20. 11 Kwali umwinshi pa kati ka miputule ya mu mbali ne ncende apashali kantu nangu kamo ku lubali lwa ku kapinda ka ku kuso, no mwinshi na umbi ku lubali lwa ku kapinda ka ku kulyo. Incende apashali akantu nangu kamo yali imikono 5 mu bwipi konse konse.

12 Icikuulwa icabelele ku masamba icaloseshe pa ncende apashali akantu nangu kamo, cali imikono 70 mu bwipi ne mikono 90 mu butali; icibumba ca ici icikuulwa catikeme imikono 5 ukushinguluka konse.

13 Apimine itempele, kabili lyalepele imikono 100. Incende apashali akantu nangu kamo, icikuulwa* ne fibumba fya ciko fyonse pamo nafyo fyalepele imikono 100. 14 Incende ya ku ntanshi ye tempele ku kabanga, ukubikako ne ncende apashali akantu nangu kamo, yali imikono 100.

15 Apimine ne cikuulwa icaloseshe pa ncende apashali akantu nangu kamo ku numa, pamo no mwa kupita ku mbali shonse shibili, kabili calepele imikono 100.

Apimine ne cifulo ca mushilo ica kunse ne cifulo ca mushilo ica mu kati,+ kumo ne miputule ya kwingililapo iya mu lubansa, 16 ukubikako ne minshi, amawindo ayakuliile mu kati+ no mwa kupita, ifyali muli ishi incende shitatu. Mupepi no mwinshi pali imbao+ ishafumine panshi ukufika pa mawindo; kabili amawindo baliyafimbile. 17 Alipimine fyonse ifyali pa muulu wa mwinshi, ifyali mu kati ke tempele, ifyali kunse e lyo ne cibumba conse. 18 Kuli ici icibumba kwali bakerubi+ no tuncindu ifyo balengeleko,+ kabili pa kati ka bakerubi babili paleba akancindu, kabili cila kerubi akwete ifinso fibili. 19 Icinso ca muntu caloseshe ku kancindu ku lubali lumo, e lyo icinso ca nkalamo* caloseshe ku kancindu ku lubali lumbi.+ Ifi fine e fyo bafilengele mwi tempele lyonse. 20 Ukufuma panshi ukufika pa muulu wa mwinshi, pa cibumba ca cifulo ca mushilo balilengelepo bakerubi no tuncindu.

21 Inceshi* sha cikuulwa ca mushilo shakwete imbali 4 ishalingana.+ Ku ntanshi ya cifulo ca mushilo* kwali icalemoneka nga 22 iciipailo ca cimuti+ icasanseme imikono itatu kabili icalepele imikono ibili. Calikwete amakoona, kabili panshi ya ciko* na mu mbali bacipangiile ne mbao. Lyena anjebele ati: “Ili e tebulo ilyaba pa ntanshi ya kwa Yehova.”+

23 Icifulo ca mushilo ica kunse ne cifulo ca mushilo ica mu kati fyakwete ifiibi fibili fibili.+ 24 Cila ciibi cakwete ifipandwa fibili, kabili fyaleisukila uku no ku. 25 Pa fiibi fya cifulo ca mushilo balilengelepo bakerubi no tuncindu, nga filya balengele pa fibumba.+ Kunse kwali na kamutenge ka mbao pa ntanshi ya muputule wa kwingililapo. 26 Kwali amawindo ayakwete amafulemu ayakuliile mu kati+ no tuncindu uto balengele ku mbali shonse shibili isha muputule wa kwingililapo ne sha muputule wa mu mbali ye tempele na ku tumitenge.

42 Lyena antwele ku lubansa lwa kunse ulwa ku kapinda ka ku kuso.+ Kabili antwele ku cikuulwa icalimo umuputule wa kuliilamo icali mupepi ne ncende apashali akantu nangu kamo,+ icali ku kapinda ka ku kuso aka cikuulwa icali mupepi naco.+ 2 Ukufuma pa mwinshi wa ku kapinda ka ku kuso calepele imikono 100* mu butali ne mikono 50 mu bwipi. 3 Kabili pa kati ka lubansa lwa kunse, ulwali imikono 20 mu bwipi,+ ne ncende bakubatile na mabwe iya ku lubansa lwa kunse yalikwete incende sha kupitamo ishaloshenye kabili shali mu ntunti shitatu. 4 Pa ntanshi ya miputule ya kuliilamo pali incende ya kwendamo+ iyali imikono 10 mu bwipi ne mikono 100* mu butali, kabili iminshi ya iyi imiputule ya kuliilamo yabelele ku kapinda ka ku kuso. 5 Imiputule ya kuliilamo iya pa muulu yalicepele ukucila iyali panshi ne yali pa ntunti ya pa kati, pantu incende sha kwendamo shalisendele incende iikalamba iya iyi miputule. 6 Pantu iyi miputule yali mu ntunti shitatu, lelo tayakwete inceshi nge nceshi sha mu mansa. E mulandu wine iyi miputule yakwatiile incende iinono ukucila incende iyali panshi ne ncende iyali pa ntunti ya pa kati.

7 Icibumba ca mabwe icali mupepi ne miputule ya kuliilamo iyabelele ku lubansa iyaloshenye ne miputule imbi iya kuliilamo calepele imikono 50. 8 Pantu imiputule ya kuliilamo iyabelele ku lubansa lwa kunse yali imikono 50 mu butali, lelo iyaloseshe ku cikuulwa ca mushilo, yena yali imikono 100. 9 Imiputule ya kuliilamo yakwatiile iminshi ku kabanga iya kwingililapo umuntu nga alefumina mu lubansa lwa kunse.

10 Kwali imiputule ya kuliilamo na imbi ku kapinda ka ku kulyo, icibumba ca mabwe ica lubansa cabelele ku kabanga. Iyi miputule yali mupepi ne ncende apashali akantu nangu kamo e lyo ne cikuulwa.+ 11 Pa ntanshi ya iyi miputule pali incende ya kupitamo nga ilya iyali pa ntanshi ya miputule ya kuliilamo+ iyabelele ku kapinda ka ku kuso. Mu butali na mu bwipi yalilingene, iminshi ya iko yalilingene kabili imiputule baikuulile fye cimo cine. Iminshi ya iyi miputule ya kuliilamo 12 yali nge minshi ya miputule ya kuliilamo iyabelele ku kapinda ka ku kulyo. Kwali umwinshi wa kwingililako uwali apatendekele incende ya kwendamo, e lyo ne cibumba ca mabwe icabelele ku kabanga, apo abantu baleingilila.+

13 Lyena anjebele ati: “Imiputule ya kuliilamo iyabela ku kapinda ka ku kuso ne miputule ya kuliilamo iyabela ku kapinda ka ku kulyo mupepi ne ncende apashaba kantu nangu kamo,+ miputule ya mushilo iya kuliilamo umo bashimapepo abapalama kuli Yehova baliila imituulo ya mushilo nga nshi.+ Mulya e mo babika imituulo ya mushilo nga nshi, umutuulo wa ngano, umutuulo wa pa lubembu no mutuulo wa pa mulandu, pantu ici cifulo ca mushilo.+ 14 Bashimapepo nga baingila, tabafwile ukufuma mu cifulo ca mushilo no kuya ku lubansa lwa kunse ukwabula ukufuula ifya kufwala ifyo babombelamo,+ pantu ifi ifya kufwala fya mushilo. Bafwile ukufwala ifya kufwala fimbi ilyo bashilaya ku ncende uko basuminisha abantu bambi.”

15 Ilyo apwishishe ukupima mu kati ke tempele,* amfumiishe panse ukupita pa mpongolo iyalosha ku kabanga,+ kabili apimine incende yonse ilya.

16 Apimine incende ya ku kabanga ne tete lya kupiminako.* Ukulingana ne tete lya kupiminako, iyi ncende yalepele amatete 500, ukufuma ku lubali lumo ukufika ku lubali lumbi.

17 Apimine incende ya ku kapinda ka ku kuso, kabili ukulingana ne tete lya kupiminako, iyi ncende yali amatete 500.

18 Apimine incende ya ku kapinda ka ku kulyo, kabili ukulingana ne tete lya kupiminako, iyi ncende yali amatete 500.

19 Ashingulukiile ku lubali lwa ku masamba. Apimine amatete 500, kwi tete lya kupiminako.

20 Apimine imbali 4. Ici icikuulwa calikwete icibumba uku no ku,+ ici icibumba calepele amatete 500 mu butali, amatete 500 mu bwipi,+ kabili calekenye incende ya mushilo ne ncende iishili ya mushilo.+

43 Lyena antwele ku mpongolo iyalosha ku kabanga.+ 2 Ilyo nali kulya namwene ubukata bwa kwa Lesa wa kwa Israele bulefumina ku kabanga,+ kabili ishiwi lyakwe lyaleumfwika kwati congo ca menshi ayalepooma;+ kabili isonde lyalibuutile pa mulandu wa bukata bwakwe.+ 3 Ifyo namwene fyali nge fyo namwene mu cimonwa ico namwene ilyo naishile* mu konaula umusumba, kabili fyalemoneka nge fyo namwene mupepi no mumana wa Kebari;+ kabili nalifukeme nafisha ne mpumi panshi.

4 Lyena ubukata bwa kwa Yehova bwaingile mwi tempele* ukupitila mu mpongolo iyalosha ku kabanga.+ 5 Lyena umupashi walinjimishe no kuntwala mu lubansa lwa mu kati, kabili namwene ukuti mwi tempele mwaiswile ubukata bwa kwa Yehova.+ 6 Lyena naumfwile umuntu mwi tempele alelanda na ine, kabili uyu mwaume aishileiminina mupepi na po nali.+ 7 Anjebele ati:

“We mwana wa muntu, cino e cifulo ca cipuna candi ica bufumu+ kabili e cifulo ca makasa yandi,+ umo nkalaikala mu kati ka bena Israele umuyayaya.+ Aba mu ng’anda ya kwa Israele tabakatwalilile ukukowesha ishina lyandi ilya mushilo,+ bena ne mfumu shabo, pa mulandu wa bulalelale bwabo ubwa ku mupashi na pa mulandu wa fitumbi fya shamfumu shabo. 8 Pa mulandu wa kuti babikile umwinshi wabo mupepi no mwinshi wandi kabili babikile uluceshi lwa ciibi cabo mupepi no luceshi lwa ciibi candi, pa kuti pa kati kabo na ine+ pa be fye icibumba, balikoweseshe ishina lyandi ilya mushilo pa mulandu ne fya bunani ifyo balecita. E ico nalibalofeshe pa mulandu wa bukali bwandi.+ 9 Nomba leka batalushe bucilende bwabo ubwa ku mupashi ne fitumbi fya mfumu shabo kuli ine, na ine nkekala nabo umuyayaya.+

10 “Lelo iwe we mwana wa muntu, londolwela aba mu ng’anda ya kwa Israele+ ili itempele, pa kuti bomfwe insoni pa filubo fyabo,+ kabili bafwile ukusambilila pulani ya ili tempele. 11 Nga baumfwa insoni pa mulandu na fyonse ifyo bacita, ubalondolwele pulani ye tempele, ifyo likakuulwa, iminshi ya liko iya kufuminapo ne minshi yaliko iya kwingililapo.+ Ubalange pulani ya fyo likalamoneka na mafunde ya liko, pulani ya fyo likalamoneka na mafunde yaliko kabili ufilembe ninshi balemonako pa kuti bamone pulani ya fyo likalamoneka kabili balekonka amafunde yaliko.+ 12 Ili e funde lye tempele. Incende yonse iya pa muulu wa lupili ya mushilo nga nshi.+ Mona! Ili e funde lye tempele.

13 “Ifi e fipimo fya ciipailo mu mikono+ (ku mukono umo na umo balelundapo ulupi).* Panshi, ici ciipalo cali umukono umo mu butali no mukono umo mu bwipi. Kunshi ya ciipalo balibikileko kamo ukucishingulusha akaali icisansa* cimo mu bwipi. Ifi e fyo iciipailo cali kunshi. 14 Ukufuma panshi ya ciipalo ukufika pa kanono ako bapishishe mu ciipalo ukucishingulusha pali imikono ibili, kabili kali umukono umo mu bwipi. Ukufuma pali aka akanono ako bashingulwishe ku ciipalo ukufika pa cikalamba ico bashingulwishe ku ciipalo pali imikono 4, kabili cali umukono umo mu bwipi. 15 Ica kubikamo umulilo ica ciipailo casanseme imikono 4, kabili calikwete insengo 4 pa makoona ya ciko+ pa muulu. 16 Ica kubikamo umulilo ica ciipalo cakwete imbali 4 ishalingana, imikono 12 mu butali, ne mikono 12 mu bwipi.+ 17 Imbali 4 isha co bashingulwishe ku ciipailo shali imikono 14 mu butali ne mikono 14 mu bwipi; ako babikile kuli ici ico bashingulwishe ku ciipalo kali hafu ya mukono, kabili panshi ya aka kene pali umukono umo mu mbali shonse.

“Kabili amatabo ya ciipalo yaloseshe ku kabanga.”

18 Lyena anjebele ati, “We mwana wa muntu, Shikulu Mulopwe Yehova atila: ‘Ifi e fya kukonka ilyo iciipailo cikapangwa, pa kuti mukaletuulapo amalambo ya koca kabili mukalesansapo umulopa.’+

19 “‘Ufwile ukupeela bashimapepo abena Lebi, abatuntuka muli Sadoke,+ abapalama kuli ine pa kuti balemombela, ing’ombe iilume iyana ukufuma pa mukuni pa kuti ikabe umutuulo wa pa lubembu,’+ e fyo Shikulu Mulopwe Yehova alanda. 20 ‘Pa mulopa wa iko ufwile ukubulapo umo no ku-ushinga ku nsengo 4 isha ciipalo, ku makoona 4 aya co bashingulusha ku ciipailo na ku kantu ako babika ku co bashingulusha ku ciipalo, pa kuti usangulule iciipalo ku lubembu na pa kuti ucifutileko.+ 21 Lyena ufwile ukubula ing’ombe iyana iilume, umutuulo wa pa lubembu, pa kuti muyocele pa ncende iyasalwa iya pe tempele, kunse ya cikuulwa ca mushilo.+ 22 Pa bushiku bwalenga shibili ukatuule imbushi iilume iyabula akalema pa kuti ikabe umutuulo wa pa lubembu; kabili bakasangulule iciipailo ku lubembu nga filya fine bacisangulwile ilyo batuulile ing’ombe iyana iilume.’

23 “‘Nga wapwisha ukucisangulula ku lubembu, ukatuule ing’ombe iilume iyana iyabula akalema ukufuma pa mukuni ne mpaanga iilume iyabula akalema ukufuma pa mukuni. 24 Ufwile ukushileta kuli Yehova, kabili bashimapepo bafwile ukubikapo umucele+ e lyo bakashituule kuli Yehova ngo mutuulo wa koca. 25 Pa nshiku 7 ukalatuula imbushi iilume ngo mutuulo wa pa lubembu+ uwa cila bushiku, ukalatuula ne ng’ombe iyana iilume ukufuma pa mukuni ne mpaanga iilume ukufuma pa mukuni; ukaletuula inama ishabula akalema. 26 Pa nshiku 7 bafwile ukulatuula amalambo ya kufutilako iciipailo, kabili bafwile ukucisangulula no kucipekanya pa kuti bakacibomfye. 27 Inshiku 7 nga shapwa, ukutendekela pa bushiku bwalenga 8,+ bashimapepo bakalatuula amalambo yenu* aya koca na malambo ya mutende pa ciipailo; kabili mukalalenga ndesekelela,’+ e fyo Shikulu Mulopwe Yehova alanda.”

44 Alimbweseshe ukupita pa mpongolo ya kunse iya cifulo ca mushilo, iyalosha ku kabanga,+ kabili yali iyaisalwa.+ 2 Lyena Yehova anjebele ati: “Iyi mpongolo ikatwalilila fye ukuba iyaisalwa. Tayakesulwe, kabili takwakabe umuntunse nangu umo uukengililapo; pantu Yehova, Lesa wa kwa Israele e po aingilile,+ e ico ikatwalilila ukuba iyaisalwa. 3 Lelo, intungulushi e mo ikalaikala pa kulya umukate pa cinso ca kwa Yehova,+ pantu ni ntungulushi. Yakulaingilila mu muputule wa pa mpongolo, kabili yakulafumina pali iyi ine impongolo.”+

4 Lyena andetele ku ntanshi ye tempele ukupita mu mpongolo ya ku kapinda ka ku kuso. Ilyo naloleshe, namwene ukuti mwi tempele lya kwa Yehova mwaiswile ubukata bwa kwa Yehova.+ E ico nalifukeme nafisha ne mpumi panshi.+ 5 Lyena Yehova anjebele ati: “We mwana wa muntu, ubikeko sana amano,* ulolekeshe, kabili umfwikishe ifyo ndekweba pa mafunde ye tempele lya kwa Yehova. Ubike sana amano ku fikumine apa kwingilila mwi tempele na ku fikumine iminshi ya cikuulwa ca mushilo.+ 6 Ufwile ukweba bacipondoka aba mu ng’anda ya kwa Israele auti, ‘Shikulu Mulopwe Yehova atila: “Mwacita ifya bunani pafula, mwe ba mu ng’anda ya kwa Israele. 7 Ilyo muleta abena fyalo abashasembululwa imitima ne mibili ku cifulo candi ica mushilo, balakowesha itempele lyandi. Mutuula umukate, amafuta, no mulopa, uku ninshi muletoba icipangano candi pa mulandu ne fya bunani ifyo mucita. 8 Tamubika amano ku fya mushilo fyandi.+ Lelo mupeela abantu bambi imilimo ya kubomba pa cifulo candi ica mushilo.”’

9 “‘Shikulu Mulopwe Yehova atila: “Takuli umwina fyalo uwikala mu Israele uushasembululwa umutima no mubili, uwingengila mu cifulo candi ica mushilo.”’

10 “‘Lelo abena Lebi abatalwike sana kuli ine+ ilyo abena Israele batalwike kuli ine pa kuti balekonka utulubi twabo,* bakakandwa pa filubo fyabo. 11 Kabili bakaba ababomfi ba kubombela pa cifulo candi ica mushilo, pa kuti bakaleangalila impongolo she tempele+ kabili bakalebombela pe tempele. Bakalaipaya inama sha kutuula umutuulo wa koca ne lambo lya bantu, kabili bakalaiminina pa ntanshi ya bantu pa kuti balebabombela. 12 Pa mulandu wa kuti balebabombela pa ntanshi ya tulubi twabo utwa bunani kabili baishileba ica kupunwisha icalelenga aba mu ng’anda ya kwa Israele balebembuka,+ ninjimya ukuboko kwandi no kulapa ukuti bakakandwa pa filubo fyabo,’ e fyo Shikulu Mulopwe Yehova alanda. 13 ‘Tabakapalame kuli ine pa kuti bengamombela imilimo ya bushimapepo nelyo ukupalama ku fya mushilo fyandi, nelyo ifya mushilo nga nshi, kabili bakaseebana pa mulandu ne fya bunani ifyo bacitile. 14 Lelo nkabasonta pa kuti bakalebomba imilimo ya pe tempele, pa kuti bakalebomba imilimo yonse kabili bakalecita fyonse ifilingile ukucitwapo.’+

15 “‘Lelo bashimapepo abena Lebi, abana ba kwa Sadoke,+ abalebomba imilimo pa cifulo candi ica mushilo ilyo abena Israele batalwike kuli ine,+ bakalapalama kuli ine pa kuti bakalemombela, bakalaiminina pa ntanshi yandi pa kuti bakalentuula amafuta+ no mulopa,’+ e fyo Shikulu Mulopwe Yehova alanda. 16 ‘Bena e bakalaingila mu cifulo candi ica mushilo, kabili bakalapalama kwi tebulo lyandi pa kuti balemombela,+ kabili bakalabomba imilimo nabapeela.+

17 “‘Ilyo baisa mu kati ka mpongolo sha lubansa lwa mu kati, bafwile ukufwala ifya kufwala fya nsalu ishisuma.+ Tabafwile ukufwala ifya kufwala fya masako ya mpaanga ilyo balebombela mu mpongolo sha mu lubansa lwa mu kati nelyo ilyo balebombela mu kati. 18 Bafwile ukufwala ifitambala ifya nsalu ishisuma ku mitwe, kabili bafwile ukufwala utuputula ututali.+ Tabafwile ukufwala nangu cimo icingalenga bapiba. 19 Ilyo bashilafumina mu lubansa lwa kunse—ulubansa lwa kunse umuba abantu—bafwile ukufuula ifya kufwala ifyo bacilabombelamo,+ no kufisha mu miputule ya kuliilamo iya mushilo.+ Lyena bafwile ukufwala ifya kufwala fimbi pa kuti belenga abantu babe aba mushilo pa mulandu ne fya kufwala fyabo. 20 Tabafwile ukulabeya umushishi onse ku mitwe+ nelyo uku-uleka wakula sana. Bafwile ukulauputula bwino bwino. 21 Bashimapepo tabafwile ukulanwa umwangashi nga baingila mu lubansa lwa mu kati.+ 22 Tabafwile ukuupa mukamfwilwa nelyo umwanakashi uo baleka;+ lelo bafwile ukuupa nacisungu uwa mu bana ba kwa Israele nelyo mukamfwilwa wa kwa shimapepo.’+

23 “‘Bafwile ukusambilisha abantu bandi ubupusano bwaba pa fya mushilo ne fishili fya mushilo; kabili bafwile ukubasambilisha ubupusano bwaba pa fyakowela ne fyasanguluka.+ 24 Bafwile ukulapingula nga kwaba imilandu;+ bafwile ukulapingula ukulingana no bupingushi bwandi.+ Bafwile ukulakonka amafunde yandi na malango yandi pa lwa mitebeto yandi yonse+ kabili bafwile ukulalenga amasabata yandi yaleba aya mushilo. 25 Tabafwile ukupalama icitumbi, pantu nga bapalamako kuti bakowela. Lelo kuti baikowesha nga ca kuti abafwile ni bashibo, banyinabo, umwana wabo umwaume, umwana wabo umwanakashi, munyinabo nelyo nkashi yabo uushaupwa.+ 26 Kabili pa numa ya kuti shimapepo asangululwa, bafwile ukumupendela inshiku 7. 27 Pa bushiku aingila mu cifulo ca mushilo, mu lubansa lwa mu kati, pa kuti abombele mu cifulo ca mushilo, afwile ukutuula umutuulo wa pa lubembu,’+ e fyo Shikulu Mulopwe Yehova alanda.

28 “‘Kabili ubupyani bwabo bukaba ni ubu: Ine wine nine nkaba ubupyani bwabo.+ Tamufwile ukubapeela impanga mu Israele, ine wine nine ubupyani bwabo. 29 E bakalalya umutuulo wa ngano,+ umutuulo wa pa lubembu no mutuulo wa pa mulandu,+ kabili fyonse ifyo abena Israele bakulapeela fyakulaba fyabo.+ 30 Ifisabo ifyawamisha pa fisabo fyonse ifyabalilapo ukupya ne misangulo iyawamisha pa misangulo iyo mukalasangula fikalaba fya bashimapepo.+ Mufwile ukulapeela shimapepo ubuunga ubwa kubalilapo.+ Nga mulecita ifi mukalapaalwa mu mayanda yenu.+ 31 Bashimapepo tabafwile ukulya icuni icaifwila nelyo inama iyaifwila nangu ico inama imbi yasantaula.’+

45 “‘Nga mwa-akanya impanga pa kuti ibe impanga ya bupyani,+ mufwile ukupeelako Yehova impanga imo pa kuti ikabe impanga ya mushilo.+ Mu butali ifwile ukuba imikono* 25,000, na mu bwipi imikono 10,000.+ Iyi mpanga yonse* ikaba iya mushilo. 2 Muli iyi mpanga mukaba icifulo ca mushilo icikaba imikono 500 mu mbali shonse 4,+ kabili cikakwata impanga ya mulemfwe iikaba imikono 50 mu mbali shonse.+ 3 Muli iyi ncende mukaputulemo incende iikaba imikono 25,000 mu butali ne mikono 10,000 mu bwipi, kabili muli iyi ncende e mukaba icifulo ca mushilo, icifulo ca mushilo nga nshi. 4 Ikaba ni ncende ya mushilo iya bashimapepo mu calo,+ ababombela pa cifulo ca mushilo, abapalama kuli Yehova pa kuti balemubombela.+ E mo bakakuula amayanda yabo, kabili ikaba incende ya mushilo apakaba itempele.

5 “‘Kukaba impanga ya bena Lebi ababombela pe tempele. Iyi mpanga ikaba imikono 25,000 mu butali ne mikono 10,000 mu bwipi,+ kabili bakakwata imiputule ya kuliilamo 20.+

6 “‘Mufwile mukaputule impanga ya musumba iikaba imikono 25,000 mu butali (ukulingana ne mpanga ya mushilo iyo mukapeela) ne mikono 5,000 mu bwipi.+ Iyi ikaba ni mpanga ya ba mu ng’anda ya kwa Israele bonse.

7 “‘Kukaba impanga iya ntungulushi mu mbali shonse shibili isha mpanga ya mushilo iya musumba. Ikaba mupepi ne mpanga ya mushilo iya musumba. Ikabela ku masamba na ku kabanga. Ubutali bwa iko ukufuma ku masamba ukufika ku kabanga ikalingana ne mpanga iyo bakaputwila umukowa umo.+ 8 Iyi e ikaba impanga ya iko mu Israele. Intungulushi shandi tashakatwalilile ukucusha abantu bandi,+ kabili shikakanya abantu impanga mu Israele ukulingana ne mikowa yabo.’+

9 “Shikulu Mulopwe Yehova atila: ‘Mwalufyanya pafula, mwe ntungulushi sha mu Israele!’

“‘Lekeni ukucita ubunkalwe no kutitikisha abantu, muleba no mulinganya kabili mulecita ifyalungama.+ Lekeni ukupoka abantu bandi ifintu,’+ e fyo Shikulu Mulopwe Yehova alanda. 10 ‘Mufwile ukulabomfya ifya kupiminako ifya cine, itepe* ilya cine no mutondo* uwa cine.+ 11 Itepe no mutondo fifwile ukulingana ubukulu. Imitondo 10 e ifwile ukwingila muli homa,* kabili amatepe 10 e yafwile ukwingila muli homa. Homa e yo mukalapiminako. 12 Ishekele* limo+ lifwile ukulingana na magera* 20. Kabili amashekele 20 ukubikapo amashekele 25, ukubikapo na mashekele 15 e fifwile ukulingana na mane* imo.’

13 “‘Uyu e mutuulo mukalatuula: muli homa imo iya ngano, mukalefumyamo icipimo cimo pa fipimo 6 ifye tepe, kabili muli homa imo iya barle mukalefumyamo icipimo cimo pa fipimo 6 ifye tepe. 14 Mufwile ukulapimina umutuulo wa mafuta mu mutondo. Mwi dalamu limo mwingila imitondo 10 kabili imitondo 10 e ifwile ukwingila muli homa, pantu imitondo 10 yalingana na homa imo. 15 Pa mukuni wa mpaanga isha mu Israele, mufwile ukulabulapo impaanga imo pa mpaanga 200. Ifi fyonse e fyo mwa kulabomfya pa kutuula umutuulo wa ngano,+ umutuulo wa koca,+ ne mituulo ya mutende,+ pa kuti mukalefutilako abantu imembu,’+ e fyo Shikulu Mulopwe Yehova alanda.

16 “‘Abantu bonse aba mu calo bakulasangula uyu musangulo+ ku ntungulushi ya mu Israele. 17 Lelo intungulushi e ikalasakamana imituulo ya koca,+ imituulo ya ngano,+ ne mituulo ya mwangashi ilyo kuli imitebeto,+ ilyo kuli ukusefya umweshi uupya, ilyo balesunga Amasabata,+ na lintu kuli imitebeto yonse iyo aba mu ng’anda ya kwa Israele basefya.+ E ikalatwala umutuulo wa pa lubembu, umutuulo wa ngano, umutuulo wa koca ne mituulo ya mu mutende, pa kuti imembu sha ba mu ng’anda ya kwa Israele shilefutwa.’

18 “Shikulu Mulopwe Yehova atila: ‘Mu mweshi wa kubalilapo, pa bushiku bwa kubalilapo ubwa uyo mweshi, ufwile ukubuula umwana wa ng’ombe umulume uwabula akalema pa mukuni, kabili ufwile ukusangulula icifulo ca mushilo ku lubembu.+ 19 Shimapepo akabuula umulopa umo pa mutuulo wa lubembu kabili akaushinge ku nceshi she tempele,+ ku makoona 4 aya co bashingulusha ku ciipailo, na ku nceshi sha mpongolo sha mu lubansa lwa mu kati. 20 Ukacite ifi pa bushiku bwalenga 7 ubwa mweshi pa mulandu no muntu uushibembukile ku mufulo nelyo uubembwike mu kukanaishiba;+ kabili ukafutileko itempele.+

21 “‘Mu mweshi wa kubalilapo, pa bushiku bwalenga 14 ubwa uyo mweshi, mukalekwata umutebeto wa Cakucilila.+ Mukalelya umukate uushatutumuka pa nshiku 7.+ 22 Pali ubo bushiku, intungulushi ikaleta ing’ombe iilume iyana iikaba umutuulo wa pa lubembu lwa iko na pa lubembu lwa bantu bonse mu calo.+ 23 Pa nshiku 7 isha mutebeto, intungulushi ikalaleta ing’ombe iyana iilume iyabula akalema ne mpaanga iyana iilume iyabula akalema. Ishi shikalaba umutuulo wa koca uwa kwa Yehova cila bushiku pa nshiku 7.+ Ikalaleta ne mbushi iilume cila bushiku iikalaba umutuulo wa pa lubembu. 24 Ifwile no kupekanya umutuulo wa ngano, itepe limo pa ng’ombe iilume iyana ne tepe limo pa mpaanga iilume, e lyo na hini* imo iya mafuta pe tepe limo.

25 “‘Mu mweshi walenga 7, pa bushiku bwalenga 15 ubwa uyo mweshi, pa nshiku 7 isha mutebeto,+ intungulushi ifwile ukulapekanya fimo fine, umutuulo wa pa lubembu, umutuulo wa koca, umutuulo wa ngano na mafuta.’”

46 “Shikulu Mulopwe Yehova atila: ‘Impongolo ya ku lubansa lwa mu kati iyalosha ku kabanga,+ ikaleba iyaisalwa+ pa nshiku 6 isha kubombamo imilimo,+ lelo pa bushiku bwe Sabata na pa bushiku umweshi uupya wamoneka, ifwile ukulaisulwa. 2 Intungulushi ikengilila pa muputule wa kwingilila pa mpongolo+ ukufuma ku lubansa lwa kunse, kabili ikeminina pa luceshi lwa pa mpongolo. Bashimapepo bakatuule umutuulo wa iko uwa koca ne mituulo ya iko iya mutende, kabili ikakontama pa mwinshi wa mpongolo e lyo ikafume. Lelo impongolo taifwile ukwisalwa mpaka icungulo. 3 Abantu ba mu calo nabo bakalakontama pa ntanshi ya kwa Yehova pa mwinshi wa mpongolo mu nshiku sha masabata na lintu umweshi upya wamoneka.+

4 “‘Umutuulo wa koca uo intungulushi ikaleta kuli Yehova pa bushiku bwe Sabata ufwile ukuba, utwana twa mpaanga 6 utwabula akalema ne mpaanga iilume iyabula akalema.+ 5 Umutuulo wa ngano ukaba litepe* limo pa mpaanga imo iilume, na fyonse ifyo engakumanisha ukutuulila pamo no twana twa mpaanga utulume pamo na hini* imo iya mafuta pe tepe limo.+ 6 Pa bushiku umweshi uupya wamoneka umutuulo ufwile ukuba, umwana wa ng’ombe umo umulume uwabula akalema ukufuma pa mukuni, utwana twa mpaanga utulume utuli 6 ne mpaanga iilume imo; tashifwile ukuba na kalema.+ 7 Ifwile ukutuula umutuulo wa ngano itepe limo pa mwana wa ng’ombe umulume, itepe limo pa mpaanga iilume, na fyonse ifyo engakumanisha ukutuulila pamo no twana twa mpaanga utulume. Kabili pe tepe limo na limo, afwile ukutuulilapo hini imo iya mafuta.

8 “‘Ilyo intungulushi ileingila, ifwile ukwingilila pa muputule wa kwingilila pa mpongolo, kabili e po ifwile ukufumina.+ 9 Kabili ilyo abantu ba mu calo baisa pa ntanshi ya kwa Yehova mu nshita ya mitebeto,+ abaingilila pa mpongolo ya ku kapinda ka ku kuso+ ilyo baisa mu kupepa bafwile ukufumina pa mpongolo ya ku kapinda ka ku kulyo,+ kabili abaingilila pa mpongolo ya ku kapinda ka ku kulyo bafwile ukufumina pa mpongolo ya ku kapinda ka ku kuso. Takuli uufwile ukufumina pa mpongolo apo acingilila, pantu bafwile ukufumina pa mpongolo iibelele uko baloleshe. 10 Lelo intungulushi iyo bakaba nayo, yena ifwile ukwingila ilyo baingila, kabili ifwile ukufuma ilyo bafuma. 11 Ilyo kuli imitebeto na mu nshita ya mitebeto, umutuulo wa ngano ufwile ukuba itepe limo pa mwana wa ng’ombe umulume umo, itepe limo pa mpanga iilume imo, na fyonse ifyo engakumanisha ukutuulila pamo no twana twa mpaanga utulume; e lyo na hini imo iya mafuta, pe tepe limo na limo.+

12 “‘Nga ca kuti intungulushi yaleta umutuulo wa koca+ nelyo imituulo ya mutende ukuti e mutuulo wa kuitemenwa uwa kwa Yehova, bakaiswileko impongolo iyalosha ku kabanga, kabili ikalete umutuulo wa koca ne mituulo ya mutende nga filya fine icita pa bushiku bwe Sabata.+ Nga yafuma bafwile ukwisala impongolo.+

13 “‘Cila bushiku ufwile ukulaleta akana ka mpaanga kamo akalume akabula akalema aka mwaka umo aka kulaba umutuulo wa koca uwa kwa Yehova.+ Mufwile ukulacita ifi cila lucelo. 14 Ilyo ulecita ifi cila lucelo, ufwile no kuleta icipimo cimo pa fipimo 6 ifye tepe icikalaba umutuulo wa ngano pamo ne cipimo cimo ica mafuta pa fipimo fitatu ifya hini, aya kusansa pa bunga ubwapeleka bwino uukalaba umutuulo wa ngano uwa lyonse uwa kwa Yehova. Ili lifunde lya muyayaya. 15 Cila lucelo bafwile ukulaleta akana ka mpaanga akalume, umutuulo wa ngano na mafuta ifikalaba umutuulo wa koca uwa lyonse.’

16 “Shikulu Mulopwe Yehova atila: ‘Intungulushi nga yapeela cila mwana umwaume ubupe pa kuti bube ubupyani bwakwe, bukaba bupyani bwa bana ba iko abaume. Bupyani bwabo. 17 Lelo nga ca kuti yapeela bamo pa babomfi ba iko ubupyani bwa iko, bukaba bupyani bwakwe mpaka umwaka wa buntungwa;+ lyena bukabwelela ku ntungulushi. Kano fye ubupyani ubo yapeela abana ba iko, e bukatwalilila ukuba ubupyani bwabo. 18 Intungulushi taifwile ukutamfya abantu pa mpanga yabo pa kuti ibapoke ubupyani. Ifwile ukupeela abana ba iko ubupyani ukufuma pa mpanga ya iko, pa kuti pa bantu bandi pekaba umuntu nangu umo uo bakatamfya pa mpanga yakwe.’”

19 Lyena alinyingishe ukupitila pa mwinshi+ wabela mupepi ne mpongolo iyaya ku miputule ya kuliilamo iya mushilo iya bashimapepo, iyalosha ku kapinda ka ku kuso,+ kabili kulya e ko namwene incende ku numa ku lubali lwa ku masamba. 20 Anjebele ati: “Apa e po bashimapepo bakulabilaushisha umutuulo wa pa mulandu no mutuulo wa pa lubembu, kabili e po bakulapangila umukate wa mutuulo wa ngano+ pa kuti tabatwele icintu nangu cimo ku lubansa lwa kunse, pantu nga bacita ifi kuti balenga abantu nabo baba aba mushilo.”+

21 Alimfumishe no kundeta ku lubansa lwa kunse kabili ampishishe pa makoona 4 aya ulu lubansa, kabili nalimwene ulubansa lonse ulwali mupepi na makoona 4 aya mu lubansa lwa kunse. 22 Pa makoona 4 aya ulu lubansa pali imansa ishinono, ishali imikono* 40 mu butali, ne mikono 30 mu bwipi. Ishi imansa shonse shalilingene ubukulu.* 23 Pa makoona yonse 4 balikuulilepo ifibumba kabili mwi samba lya ifi ifibumba balipangilemo apa kubilaushisha imituulo. 24 Lyena anjebele ati: “Aya e mayanda ayo ababombela pe tempele babilaushishamo amalambo ayo abantu batuula.”+

47 Lyena ambweseeshe ku mwinshi we tempele,+ kabili ilyo nali kulya namwene amenshi yalekonkolokela ku kabanga ukufuma panshi ya mwinshi we tempele,+ pantu itempele lyaloseshe ku kabanga. Amenshi yalefuma panshi, lwa ku kulyo kwe tempele, ku kapinda ka ku kulyo aka ciipailo.

2 Lyena alinsendele no kumfumisha pa mpongolo ya ku kapinda ka ku kuso+ kabili alinsendele panse e lyo antwala ku mpongolo ya kunse iyalosha ku kabanga,+ kabili nalimwene amenshi yalepita ukufumina lwa ku kulyo.

3 Ilyo uyu mwaume aile ku lubali lwa ku kabanga ninshi naikata ne ntambo ya kupiminako,+ apimine imikono* 1,000 kabili alengele napita mu menshi; amenshi yamfikile mu nkolokoso.

4 Lyena apimine imikono na imbi 1,000 kabili alengele napita mu menshi, kabili amenshi yamfikile mu makufi.

Apimine imikono na imbi 1,000, kabili alengele napita mu menshi, kabili amenshi yamfikile mu musana.

5 Ilyo apimine imikono na imbi 1,000, amenshi yaishileba umumana uwa kuti nafilwa no kwabuka na makasa, pantu amenshi yalifulile sana ica kuti umuntu kuti aowamo. Waishileba umumana uwa kuti umuntu te kuti abuke na makasa.

6 Lyena anjipwishe ati: “We mwana wa muntu, bushe naufimona ifi?”

Lyena alengele naenda e lyo nabwelela ku lulamba lwa kamana. 7 Ilyo nabwelele, nalimwene ukuti ku mbali shonse shibili isha kamana kwali ifimuti ifingi.+ 8 Lyena anjebele ati: “Aya amenshi yalekonkolokela ku citungu ca ku kabanga kabili yaleyafika na ku Araba,+ e lyo yayepoosa muli bemba. Nga yayaipoosa muli bemba,+ amenshi ya muli bemba yalawama. 9 Ifibumbwa fyonse ifya mweo fikaba no mweo konse uko amenshi yakaya.* Kulya kukaba isabi ilingi, pantu amenshi yakalayako. Amenshi ya muli bemba yakawama, kabili fyonse fikaba no mweo konse uko akamana kakaya.

10 “Abalondo bakalaiminina ku lulamba lwa kako ukufuma ku En-gedi+ ukuyafika ku En-eglaimu ukwabela apa kwanika imikwau. Kukaba isabi lya misango misango ilingi, kwati lisabi lya muli Bemba Mukalamba.*+

11 “Kukaba fye amanika ne ncende sha matipa matipa, kabili ishi ncende shena tashakawame. Mukaba fye umucele.+

12 “Ku mbali shonse shibili isha mumana kukaba ifimuti ifikatwala ifisabo fya kulya. Amabula ya ifi fimuti tayakome; kabili ifisabo fya fiko tafyakapwe. Cila mweshi fyakulatwala ifisabo, pantu amenshi ayakulafitapilila yakulafuma mu cifulo ca mushilo.+ Ifisabo fya fiko fikaba fya kulya kabili amabula ya fiko yakaba aya kuundapilako.”+

13 Shikulu Mulopwe Yehova atila: “Iyi e mpanga ya bupyani iyo mukakanya imikowa 12 iya kwa Israele, kabili Yosefe akakwata ifiputulwa fibili.+ 14 Mukapyana ici calo kabili bakamwakanya ifiputulwa ifyalingana.* Nalilapile ukuti nkapeela ifikolwe fyenu ici calo+ kabili nomba nimupeela pa kuti cibe ubupyani bwenu.

15 “Uyu e mupaka wa ici calo uwa ku lubali lwa kapinda ka ku kuso: Watampila pali Bemba Mukalamba ukuya ku Heteloni+ ukulola lwa ku Sebati,+ 16 ku Hamati,+ ku Berota,+ na ku Sibraimu, iyakwata incende ya Damaseke ne ncende ya Hamati; ukuyafika ku Hasere-hatikoni, iyaba mupepi no mupaka wa Haurani.+ 17 E ico umupaka ukafuma pali bemba ukaye ku Hasari-enani,+ ukupita ku mupaka wa Damaseke ku kapinda ka ku kuso, na ku mupaka wa ku Hamati.+ Uyu e ukaba umupaka wa ku kapinda ka ku kuso.

18 “Umupaka wa ku kabanga wapita pa kati ka Haurani na Damaseke ukukonka Yordani pa kati ka Gileadi+ ne calo ca Israele. Mufwile ukupima ukufuma pa mupaka wa ku kapinda ka ku kuso ukuya kuli bemba wa ku kabanga.* Uyu e mupaka wa ku kabanga.

19 “Umupaka wa ku kapinda ka ku kulyo, ukatampila pa Tamari ukufika ku menshi ya Meribati-kadeshe,+ lyena ukaya ku Mupokapoka* e lyo ukafike kuli Bemba Mukalamba.+ Uyu e mupaka wa ku kapinda ka ku kulyo.

20 “Ku masamba kwaba Bemba Mukalamba, ukufuma pa mupaka wa ku kapinda ka ku kulyo ukufika pa ncende iyaloshanya na Lebo-hamati.*+ Uyu e mupaka wa ku masamba.”

21 “Mukaakane ici calo, mukaakanye imikowa 12 iya kwa Israele. 22 Mufwile ukwakanya ici icalo pa kuti cikabe ubupyani bwenu kabili mufwile ukwakanyako na balebeshi abo mwikala nabo, abakwata abana ninshi bekala na imwe; kabili mukalebamona fye nga bena Israele abafyalilwa mu calo. Bakapokelela ubupyani nge fyo imikowa ya kwa Israele ikapokelela pamo na imwe. 23 Mufwile ukupeela umulebeshi impanga ya bupyani mu mpanga ya mukowa uo ekala na o,” e fyo Shikulu Mulopwe Yehova alanda.

48 “Ifi e fiputulwa ifyo bainike amashina ya mikowa, ukutendekela ku mpela ya ku kapinda ka ku kuso: Iciputulwa ca kwa Dani+ cikapita ku Hetelone, ku Lebo-hamati,*+ ku Hasar-enoni, ku mupaka wa ku Damaseke ku kapinda ka ku kuso, mupepi na Hamati;+ kabili cikafuma ku kabanga ukuyafika ku mupaka wa ku masamba. 2 Iciputulwa ca kwa Ashere+ cikapakana ne ciputulwa ca kwa Dani, cikafuma ku mupaka wa ku kabanga ukufika ku mupaka wa ku masamba. 3 Iciputulwa ca kwa Naftali+ cikapakana ne ciputula ca kwa Ashere, cikafuma ku mupaka wa ku kabanga ukufika ku mupaka wa ku masamba. 4 Iciputulwa ca kwa Manase+ cikapakana ne ciputulwa ca kwa Naftali, cikafuma ku mupaka wa ku kabanga ukufika ku mupaka wa ku masamba. 5 Iciputulwa ca kwa Efraimu cikapakana ne ciputulwa ca kwa Manase,+ cikafuma ku mupaka wa ku kabanga ukufika ku mupaka wa ku masamba. 6 Iciputulwa ca kwa Rubene cikapakana ne ciputulwa ca kwa Efraimu,+ cikafuma ku mupaka wa ku kabanga ukufika ku mupaka wa ku masamba. 7 Iciputulwa ca kwa Yuda cikapakana ne ciputulwa ca kwa Rubene,+ cikafuma ku mupaka wa ku kabanga ukufika ku mupaka wa ku masamba. 8 Pa mupaka wa kwa Yuda, ukufuma ku mupaka wa ku kabanga ukufika ku mupaka wa ku masamba, mukapaatulepo impanga iifwile ukuba imikono 25,000 mu bwipi,+ kabili mu butali ifwile ukulingana ne mpanga iyo mukapeela imikowa imbi ukufuma ku mupaka wa ku kabanga ukufika ku mupaka wa ku masamba. Icifulo ca mushilo cikaba pa kati ka iyi mpanga.

9 “Impanga iyo mukapeela Yehova, ikabe imikono* 25,000 mu butali, na 10,000 mu bwipi. 10 Iyi e mpanga iyo mukapeela bashimapepo.+ Ikaba imikono 25,000 ku lubali lwa ku kapinda ka ku kuso, imikono 10,000 ku masamba, imikono 10,000 ku kabanga ne mikono 25,000 ku kapinda ka ku kulyo. Icifulo ca mushilo ica kwa Yehova cikaba pa kati ka iyi mpanga. 11 Ikaba ya bashimapepo, abasalwa aba mu ng’anda ya kwa Sadoke,+ abamombele imilimo kabili abashatalwike kuli ine ilyo abena Israele na bena Lebi batalwike kuli ine.+ 12 Bakakwata iciputulwa ca mpanga pa mpanga iyo mukapeela pa kuti ikabe iya mushilo nga nshi, mu mpanga ya bena Lebi.

13 “Abena Lebi bakakwata ici iciputulwa ca mpanga mupepi ne mpanga ya bashimapepo, ici iciputulwa cikaba imikono 25,000 mu butali, ne mikono 10,000 mu bwipi. (Ici iciputulwa conse cikaba imikono 25,000 mu butali na 10,000 mu bwipi.) 14 Tabafwile ukushitisha, ukukaabula, nelyo ukupeela umuntu umbi iciputulwa ca iyi mpanga iyawamisha, pantu Yehova aimona ukuti ni mpanga ya mushilo.

15 “Impanga iikashalako iikaba imikono 5,000 mu bwipi pamo ne mpanga iikaba imikono 25,000 ikaba ni mpanga ya musumba iyo bakalabomfya ku fintu fimbi,+ bakalakuulamo amayanda kabili ikaba ni mpanga ya mulemfwe. Umusumba ukaba pa kati ka iyi mpanga.+ 16 Ifi e fyo umusumba ukakula: Umupaka wa ku kapinda ka ku kuso imikono 4,500, umupaka wa ku kapinda ka ku kulyo imikono 4,500, umupaka wa ku kabanga imikono 4,500 no mupaka wa ku masamba imikono 4,500. 17 Umusumba ukakwata impanga ya mulemfwe iikaba imikono 250 ku kapinda ka ku kuso, imikono 250 ku kapinda ka ku kulyo, imikono 250 ku kabanga ne mikono 250 ku masamba.

18 “Iciputulwa icikashalapo cikalingana ubutali ne mpanga ya mushilo iyo mukapeela,+ cikaba imikono 10,000 ku kabanga, ne mikono 10,000 ku masamba. Cikalingana ne mpanga ya mushilo iyo mukapeela, kabili abakalabombela mu musumba e bakalalya ifya kulya ifikalalimwamo. 19 Abakalabombela mu musumba aba mu mikowa yonse iya kwa Israele e bakalalimamo.+

20 “Impanga yonse iya mushilo iyo mukapeela ifwile ukuba imikono 25,000 mu mbali shonse 4. Mufwile ukupeela iyi mpanga pa kuti ikabe iya mushilo pamo ne mpanga ya musumba.

21 “Impanga iikashalako mu mbali shonse shibili isha mpanga ya mushilo iyo mukapeela ne mpanga ya musumba, ikaba ya ntungulushi.+ Ikabe mupepi ne mipaka iikalepa imikono 25,000 ku kabanga na ku masamba ka mpanga iyo mukapeela. Ikalingana ne fiputulwa fimbi ifyo ikapakana nafyo kabili ikaba ya ntungulushi. Impanga ya mushilo iyo mukapeela ne cifulo ca mushilo ice tempele fikaba pa kati ka iyi mpanga.

22 “Impanga ya bena Lebi ne mpanga ya musumba, shikaba pa kati ka mpanga ya ntungulushi. Impanga ya ntungulushi ikaba pa kati ka mpanga ya kwa Yuda+ ne mpanga ya kwa Benjamini.

23 “Nomba imikowa iyashalako, iciputulwa ca kwa Benjamini cikafuma ku mupaka wa ku kabanga ukufika ku mupaka wa ku masamba.+ 24 Iciputulwa ca kwa Simeone cikapakana ne ciputulwa ca kwa Benjamini,+ cikafuma ku mupaka wa ku kabanga ukufika ku mupaka wa ku masamba. 25 Iciputulwa ca kwa Isakari+ cikapakana ne ciputulwa ca kwa Simeone, cikafuma ku mupaka wa ku kabanga ukufika ku mupaka wa ku masamba. 26 Iciputulwa ca kwa Sebuluni cikapakana ne ciputulwa ca kwa Isakari,+ cikafuma ku mupaka wa ku kabanga ukufika ku mupaka wa ku masamba.+ 27 Iciputulwa ca kwa Gadi cikapakana ne ciputulwa ca kwa Sebuluni,+ cikafuma ku mupaka wa ku kabanga ukufika ku mupaka wa ku masamba. 28 Umupaka wa ku kapinda ka ku kulyo mupepi no mupaka wa kwa Gadi ukafuma pa Tamari+ ukapite ku menshi ya Meribati-kadeshe,+ ukaye ku mupokapoka*+ e lyo ukayefika kuli Bemba Mukalamba.*

29 “Iyi e mpanga iyo mufwile ukwakanya imikowa ya kwa Israele+ pa kuti ikabe ubupyani, kabili ifi e fikaba ifiputulwa fya iyi imikowa,”+ e fyo Shikulu Mulopwe Yehova alanda.

30 “Ifi e fikaba impongolo sha musumba: Ulubali lwa ku kapinda ka ku kuso, lukaba imikono 4,500.+

31 “Impongolo sha musumba shikenikwa amashina ya mikowa ya kwa Israele. Pa mpongolo shitatu ishikaba ku kapinda ka ku kuso, pakaba impongolo ya kwa Rubene, impongolo ya kwa Yuda ne mpongolo ya kwa Lebi.

32 “Ulubali lwa ku kabanga lukalepa imikono 4,500, kabili lukakwata impongolo shitatu: impongolo ya kwa Yosefe, impongolo ya kwa Benjamini ne mpongolo ya kwa Dani.

33 “Ulubali lwa ku kapinda ka ku kulyo lukaba imikono 4,500, kabili lukakwata impongolo shitatu: impongolo ya kwa Simeone; impongolo ya kwa Isakari ne mpongolo ya kwa Sebuluni.

34 “Ulubali lwa ku masamba lukalepa imikono 4,500, kabili lukakwata impongolo shitatu: impongolo ya kwa Gadi, impongolo ya kwa Ashere ne mpongolo ya kwa Naftali.

35 “Umusumba ukaba imikono 18,000 ukushinguluka. Kabili ukufuma pali bulya bushiku uyu umusumba bakalawita ukuti Yehova E mo Aba.”+