Finshi Fikaaluka?

“Uluko talwakemishe uluko lunankwe ulupanga, nangu ukusambilila inkondo na kabili.”

“Takuli umwikashi uukatila: ‘Nindwala.’”

“Imfwa tayakabeko na kabili.”

AMASHIWI yali pa muulu yaleumfwika kwati kusabaila fye. Lelo te ya kwelenganya fye iyo. Mulandu nshi? Pantu aya mashiwi te malayo ya bufi aya bapolitishani abashakwata amaka ya kwalula icalo cesu. Lelo, amalayo yali pa muulu yasangwa muli Baibolo.a

Abengi bamona kwati Baibolo libuuku fye lya kale ilishibomba pali ino nshita. Bushe na imwe e fyo mwasumina? Nga e fyo mwasumina, tulemukoselesha ukubelengesha ifyaba mu Baibolo. Icishinka ca kuti, Baibolo e buuku fye lyeka ililanda pa bantu ukufuma fye pa kutendeka. Ilalondolola ifyakonkapo:

● Ifyo abantunse baishileba mu bwafya babamo.—Abena Roma 5:12.

● Ifyo Lesa apekanya ukupwisha ubwafya.—Yohane 3:16.

● Ico amabuteko yashingalwila icalo cesu.—Yeremia 10:23.

● Umulandu twingacetekela ubulayo bwa kwa Lesa ubwa kuti akawamya icalo.—Yoshua 23:14.

Bushe cine cine Lesa akafumyapo ifipowe, inkondo, amalwele, ne mfwa pa bantunse? Kuti camwangukila ukusumina ubulayo bwa musango yo nga mwaumfwikisha ifyakonkapo:

1. Lesa e watubumbile.

2. Alitubikako amano.

3. Alikwata amaka ya kuwamya icalo.

4. Alafwaya ukuwamya icalo.

Bushe kwaliba ifingalenga mwacetekela ifi fishinka 4? Inte sha kwa Yehova, abalemba ino magazini, balemukoselesha ukuisangila mwe bene ifyo fintu ukupitila mu kusambilila Baibolo.

Nalimo mwalikwata Baibolo lelo tamuibelenga sana nangu limbi no kuibelenga tamuibelenga. Na bantu fye abengi aba kuti balabelenga Baibolo lyonse batila yalyafya ukumfwa. Nga ca kuti e fyo na imwe mumona, tulemukoselesha ukuyamona Inte sha kwa Yehova pa kuti bakalesambilila nenu Baibolo ukwabula ukumulipilisha. Abengi sana pano calo balesambilila Baibolo muli iyi ine nshila. Bacita shani pa kusambilila?

Cila mulungu, ukwabula ukulipilisha, Inte sha kwa Yehova kuti baleisa ku ng’anda ku mwenu nangu kumbi ukwingalinga ukulanshanishishako Baibolo nenu. Aya masambililo ya Baibolo yakamwafwa ukwasuka ifipusho pamo nge fi, Mulandu nshi tuculila? Mulandu nshi amabuteko ya bantunse yashakwatila amaka ya kuwamya icalo? Ubufumu bwa kwa Lesa ni cinshi, kabili bukawamya shani icalo ico amabuteko ya bantunse yafilwa ukuwamya?

Nga mulefwaya ukwishiba na fimbi pa fyo mwingacita pa kuti mulesambilila Baibolo pa ng’anda, moneni Inte sha kwa Yehova ababela lwa ku mwenu nangu kuti mwamona pa Intaneti pa adresi iya www.pr418.com. Nelyo kuti mwalemba kalata no kutuma ku keyala kalinga akalesangwa pe bula 5 muli ino magazini.

[Futunoti]