February

Bamunyinefwe abakwata imibele iyo Abena Kristu balingile ukukwata, balafwa sana aba mu cilonganino. Umuntu “uushipampamina fye pa cintu cimo,” alomfwana na bantu kabili alalenga na bantu balaumfwana. Umuntu uushipampamina fye pa cintu cimo alakutika abanankwe nga balelanda kabili alafwaya ukumfwa ifyo balelanda. Ku ca kumwenako, nga namukumana na baeluda banenu e lyo baeluda bonse basalapo ukucita cimo icilingene na mashinte ya mafunde ya mu Baibo, bushe kuti mwaitemenwa ukukonka ico basalapo nangu ca kutila kuti capusana ne co imwe mwingasalapo? Eluda talingile ukupampamina fye pa co alefwaya. Eluda afwile ukwishiba ukuti calicindama ukumfwa ifyo baeluda bambi balelanda. (Ukute. 13:​8, 9; Amapi. 15:22) Eluda alingile ukulacindika abantu kabili tafwile ukulaumana nabo, lelo alingile ukuba ne cikuuku kuli bena. Apo eluda alingile ukuba uwa mutende, afwile ukuitendekelako ukuba no mutende na bantu nangu ifintu nafikosa. (Yako. 3:​17, 18) Nga muli ne cikuuku ilyo mulelanshanya na bantu, kuti mwanasha imitima yabo. Na kuba, kuti mwanasha fye ne mitima ya bantu abasuusha sana ifyo mwasuminamo.—Abapi. 8:​1-3; Amapi. 25:15; Mat. 5:​23, 24. w24.11 ibu. 23 para. 13

Nangu ca kuti Kristu “afwilile fye umuku walimo,” acili ali-ipeelesha ukutwafwilisha na muno nshiku. (Rom. 6:10) Atwafwilisha shani? Alitwalilila ukubomba pa kuti aletupeela ifintu ifisuma ifyo tukwata pali ino nshita pa mulandu wa cilubula. Tontonkanyeni pa milimo ubwingi iyo alebomba! Pali ino nshita ni Mfumu yesu, ni Shimapepo Mukalamba, kabili e mutwe wa cilonganino. (1 Kor. 15:25; Efes. 5:23; Heb. 2:17) E utungulula umulimo wa kulonganika abasubwa na ba mwi bumba likalamba. Uyu mulimo wa kulonganika ukapwa ilyo ubucushi bukalamba bushilapwa. (Mat. 25:32) Kabili alashininkisha ukuti ababomfi bakwe aba cishinka nabakwata ifya kulya fya ku mupashi muli shino nshiku sha kulekelesha. (Mat. 24:45) Na lintu akalateka pa myaka 1,000, akatwalilila ukutwafwilisha. Yehova tatupeele fye Umwana wakwe ukuti atufwile, lelo atupeele no kuti aletucitila ne fintu ifingi! w25.01 ibu. 24 para. 12

Yehova alatubelela uluse umupwilapo kabili takatukandilepo ku ntanshi. Ici cilenga tuleba ifibusa ifisuma na Shifwe uwaba ku muulu. Lelo tufwile ukulaibukisha ukuti ifi Yehova atubelela uluse, bupe atupeela. Icilenga aletubelela uluse ni co alitutemwa kabili wa cikuuku kuli fwe bantunse ababembu. Yehova tatubelela uluse pa mulandu wa kuti twalilinga ukutubelela uluse. Ala tulatasha nga nshi pali ifi Yehova ‘atwelela icine cine’! (Amalu. 130:4; Rom. 4:8) Nomba pa kuti Yehova atubelele uluse, tufwile ukucita icintu cimo icacindama. Yesu alondolwele ati: “Nga tamubelela uluse abamulufyanya, na Shinwe wa mu muulu takulamubelela uluse pa fyo mulufyanya.” (Mat. 6:​14, 15) Kanshi tufwile ukulapashanya Yehova uutubelela uluse. w25.02 ibu. 13 amapara. 18-19

Tontonkanyeni pa bantu abo Yehova aonawile mu Sodomu na mu Gomora. Loti uwali uwalungama, aleikala na ba bantu mu Sodomu. Nomba bushe twalishiba nga ca kuti Loti alibashimikile bonse aba? Awe tatwaishiba. Kwena balecita ifyabipa, nomba bushe balishibe icisuma ne cibi? Ibukisheni ukuti aba baume ba mu musumba balefwaya ukulaala na beni ba kwa Loti. Baibo itila pali aba pali abaume “abalumendo na baume abakote.” (Ukute. 19:4; 2 Pet. 2:7) Bushe twalishiba nga ca kuti Lesa uwa luse, Yehova alipingula ukuti bonse aba tabakabuushiwe? Yehova aebele Abrahamu ukuti muli ulya musumba tamwali abalungama nangu fye 10. (Ukute. 18:32) E ico bali abashalungama. Kanshi Yehova alicitile fye bwino filya abonawilile pa fyabipa ifyo balecita. Nomba bushe kuti twatila tapali nangu umo pali aba uukabuushiwa, mu kubuuka kwa “bashalungama”? Awe, te kuti tulande ifyo! w24.05 ibu. 2 para. 3; ibu. 3 para. 8

Pa mulandu no kukanakwata indalama, bamo balisalapo ukusha ulupwa no kuya mu kubombela ukutali. Lelo baliluka ukuti ifi bacita tafyawama. Ilyo mushilaingila incito, mwilatontonkanya fye pa ndalama mukalafola nga mwaingila, lelo mulebikako sana mano pa kuti mulemona nga ca kuti iyo ncito ikalenga bonse mu lupwa lwenu mukatwalilile ukuba ifibusa fya kwa Yehova. (Luka 14:28) Muleyipusha amuti: ‘Bushe icupo cesu cikaba shani nga ca kuti nasha umwina mwandi eka? Nga naingila iyi ncito, bushe nkalakwata inshita ya kulalongana lyonse, inshita ya kulabila imbila nsuma ne nshita ya kulaba pamo na ba bwananyina?’ Nga ca kuti mwalikwata abana, mulingile ukuyipusha ne ci cipusho icacindama: ‘Nga nayaingila incito ukutali, bushe abana bandi nkalabasalapula kabili nkalabakonkomesha “ukulingana ne fyo Yehova afwaya?” (Efes. 6:4) Ilyo mulesalapo ifya kucita, mwilakonka ifyo balupwa lwenu nelyo ifibusa fyenu abashikonka ifyo Baibo ilanda balemweba, lelo mulekonka ifyo Yehova atontonkanya. w25.03 ibu. 29 para. 12

Umuntu uushakula mu fya kwa Lesa, abantu ababa no bucenjeshi, na mapange yalubana kuti bamulufya bwangu. Kuti alasumina amalyashi balanda pa milabasa na pa Intaneti, nelyo abasangu kuti bamulufya. Kuti alaumfwila abantu banankwe akalumwa, kuti alapusana nabo nelyo kuti alafulwa bwangu. Kabili nga atunkwa kuti acita ifyabipa. (1 Kor. 3:3) Amalembo yalinganya ukukula mu fya kwa Lesa ku fyo umuntu akula, aba no mukalamba. (Efes. 4:15) Umwaice teshiba ifingi, alafwaikwa ukumutungulula. Natulangilile: Umufyashi umwanakashi kuti aeba umwana wakwe umukashana ukuti amwikate ku kuboko ilyo baleciluka umusebo. Umwana nga akulako, umufyashi kuti amuleka alaciluka umusebo eka, lelo kuti alamwibukishako ukulalolesha uku no ku pa kuti alemona nga ca kuti kuli imyotoka shileisa. Umwana nga akula aleshiba ifya kutaluka amasanso ya musango uyu. Ifi fine efyo caba na ku Bena Kristu abakalamba mu fya kwa Lesa, bena lyonse ilyo balesalapo ifya kucita balakonka amashinte ya mafunde ya mu Baibo, pa kuti beshibe ifyo Yehova amona ifyo balesalapo. Lyena balasalapo ukulingana ne fyo amashinte ya mu Baibo yalanda. w24.04 ibu. 3 amapara. 5-6

Pa myaka iingi, abali fye abeni ba kwa Lesa ni bamalaika abo aleikala nabo ku muulu. Lyena aishilebumba abantu kabili nabo bene baishileba abeni bakwe. Mu kupita kwa nshita, bamo abaishileba abeni ba kwa Yehova ni Enoke, Noa, Abrahamu, na Yobo. Baibo ita aba ababomfi ba kwa Lesa ukuti ifibusa fya kwa Lesa, nelyo abale-enda “na Lesa wa cine.” (Ukute. 5:24; 6:9; Yobo 29:4; Esa. 41:8) Pa myaka iingi, Yehova alitwalilila ukwita ifibusa fyakwe pa kuti babe abeni bakwe. (Esek. 37:​26, 27) Ku ca kumwenako, ku mashiwi yaba mu busesemo bwa kwa Esekiele, tusambililako ukuti Yehova alafwaisha ababomfi bakwe aba cishinka baba ifibusa sana na ena. Alilaya ukuti ‘akapangana nabo icipangano ca mutende.’ Ubu ubusesemo bulanda pa nshita ilyo abakwata isubilo lya kwikala ku muulu na abakwata isubilo lya kwikala pe sonde bali no kuba mwi tenti lyakwe ilya mampalanya ngo “mukuni umo.” (Yoh. 10:16) Ifi fine e filecitika muno nshiku! w24.06 ibu. 2 amapara. 2, 4; ibu. 3 para. 5

Fwe bantu ba kwa Yehova tulatungilila Ubufumu bwa kwa Lesa no mutima wesu onse. Na lyo line tulakabila ukuba abashipa pa kuti tulebutungilila. (Mat. 6:33) Ku ca kumwenako, muli cino calo cabipa tufwile ukuba abashipa pa kuti tuleikala ukulingana na mafunde ya kwa Yehova na pa kuti tulebila imbila nsuma ya Bufumu bwa kwa Lesa. Na kabili tulingile ukuba abashipa pa kuti twilaitumpa mu fikansa fya calo ifilelenga abantu belaba abaikatana. (Yoh. 18:36) Abantu ba kwa Yehova abengi, imikalile naishupa, balaboma nelyo ukubabika mu fifungo pa mulandu fye wa kuti balakaana ukuitumpa mu fikansa fya calo nelyo ukwingila ubushilika. Tulaba abakosa kabili abashipa nga twatontonkanya pa bantu abaliko kale abali abashipa pa kuti batungilile imitekele ya kwa Yehova. Imfumu yesu, Kristu Yesu talefwaya nangu panono ukuitumpa mu mitekele ya cino calo iya kwa Satana. (Mat. 4:​8-11; Yoh. 6:​14, 15) Lyonse aleshintilila pali Yehova pa kuti engaba uwashipa. w24.07 ibu. 3 para. 4; ibu. 4 para. 7

Yehova alilenga ili ilyashi balilemba mu Baibo pa kuti twingasambililako. Ili ilyashi lilalenga twaishiba ico apatila sana ulubembu. Ulubembu lulatufumya kuli Shifwe kabili lulalenga tulefwa. (Esa. 59:2) Ici e calenga Satana, malaika uwapondokeele Lesa kabili uwalengele Adamu na Efa bacite ifyabipa, atemwe ulubembu kabili aletunka abantu pa kuti balebembuka. Ilyo Adamu na Efa babembwike, nalimo Satana atontonkenye ukuti ifyo Lesa alefwaya ukuti abantu baleikala tafyakacitike. Lelo taishibe ukuti Yehova alitemwa sana abantu. Lesa ta-alwile ifyo alefwaya abatuntwike muli Adamu na Efa baleikala. Yehova alitemwa abantu, e ico ilyo line fye alicitilepo cimo icali no kulenga abantu bonse baba ne subilo. (Rom. 8:​20, 21) Yehova alishibe ukuti bamo abali no kutuntuka muli Adamu na Efa bali no kumutemwa, kabili bali no kulafwaisha ukuti alebafwa ukulwisha ulubembu. Apo ni Shibo kabili e wababumbile, ali no kulenga balubuka ku lubembu ne mfwa, kabili ali no kulenga bapalama kuli ena. w24.08 ibu. 3 amapara. 3-4

Abantu ba kwa Yehova abengi balikwata ifya kucita ifingi. Tulabomba pa kuti tuleisakamana, tulesakamana ne ndupwa shesu. (1 Tim. 5:8) Abena Kristu abengi balasakamana balupwa lwabo abalwala nelyo abakote. Na kabili bonse tulingile ukulaisakamana, e lyo pa kuisakamana, tulapoosapo inshita. Ukulunda pali ifi twalandapo, twalikwata imilimo na imbi mu cilonganino. Umulimo umo uwacindama, kuba abacincila mu kubila imbila nsuma ya Bufumu. Kuli fwe Bena Kristu, ukubelenga Baibo kwaba pa fintu “ifyacilapo ukucindama.” E ico tufwile fye ukulaibelenga. Baibo ilanda pa muntu uwa nsansa aiti: “Alitemwa sana amafunde ya kwa Yehova, kabili alabelenga amafunde yakwe mwi shiwi ilinono akasuba no bushiku.” (Amalu. 1:​1, 2) Aya amashiwi yalangilila fye apabuuta tuutu ukuti tufwile ukulakwatako inshita ya kubelenga Baibo. Bushe ni nshita nshi ingalinga sana ukubelenga Baibo? Umuntu umwine e ulingile ukumona inshita iingalinga sana ukubelenga Baibo. Lelo kwena icacindama kusala inshita iyo cingatwangukila ukulabelenga Baibo lyonse. w24.09 ibu. 3 amapara. 5-6

Bushe Umwina Kristu umukalamba mu fya kwa Lesa nao alakabila aba kumwafwa? Ee. Abena Kristu abakalamba mu fya kwa Lesa nabo inshita shimo balingile ukulomba bamo ukuti babafwe. Umwina Kristu uulekula mu fya kwa Lesa nalimo kuti alafwaya abantu bambi e bo balemweba ifya kucita, nelyo e bo balemusalila ifya kucita. Nomba umukalamba mu fya kwa Lesa ena nga alomba bamo abaishiba ifingi ukumucila ukuti bamupandeko amano, aleshiba ukuti umwine e ufwile ukuisalilapo ifya kucita, kabili afwile “ukuisendela icipe cakwe umwine.” Nga filya fine abakalamba bapusana mu fyo bamoneka, na Bena Kristu abakalamba mu fya kwa Lesa nabo balapusana mu mibele iyo Abena Kristu balingile ukukwata pamo nga, amano, ukushipa, bukapekape, na mu fyo balangulukilako abantu banabo. Na kabili ifyo Abena Kristu abakalamba mu fya kwa Lesa bengasalapo ukucita pa cintu cimo cine kuti fyapusana. Lelo fyonse fibili kuti fyalingana na mashinte ya mafunde ya mu Baibo. Ilingi line, ifi ficitika nga ca kuti Abena Kristu balesalapo ukucita ifintu ifikuma kampingu. Apo balishiba ifi, tabapingula abanabo nga ca kuti basalapo ifipusene ne fyo bena bengasalapo. Lelo babika amano ku fingalenga batwalilila ukuba abaikatana.—Rom. 14:10; 1 Kor. 1:10. w24.04 ibu. 4 amapara. 7-8

Finshi mwingacita nga ca kuti mumfwa kwati tamwacindama? Mulebelenga Amalembo ayalanga ukuti Yehova amumona ukuti mwalicindama, muletontonkanya sana pali aya Amalembo. Nga ca kuti mwalifilwa ukufikilisha ifyo mwapangile ukucita nelyo mwalifuupuka pa mulandu wa kuti tamubombela Yehova nge fyo aba bwananyina bambi bamubombela, mwilaumfwa ububi. Yehova tamwenekela ukucita ukucila pa fyo mwingakumanisha. (Amalu. 103:​13, 14) Nga balimucushapo, mwilamona ukuti nimwe mwalengele ukuti bamucushe! Muleibukisha ukuti Yehova alapingula abacusha abantu kabili alafwa nabo bacusha. (1 Pet. 3:12) Mwilatwishika ukutila Yehova kuti ayafwa umuntu ukupitila muli imwe. Alimucindamika pa kumusuminisha ukulabomba nankwe umulimo wa kubila imbila nsuma. (1 Kor. 3:9) Pa mulandu na mafya ayo mwakwatapo, kuti camwangukila ukwishiba ifyo abakwete amafya baleumfwa. Kuti mwabafwa sana. w24.10 amabu. 7-8 amapara. 6-7

Yehova tafwaya abantu baletufyenga kabili alamona nga ca kuti batufyenga. Baibo itila, “Yehova atemwa umulinganya.” (Amalu. 37:28) Yesu atile inshita nga yafika, Yehova akalenga “bakapingulwe no mulinganya bwangu bwangu.” Nomba line, ali no kufumyapo fyonse ifilenga tulecula kabili akalenga ulufyengo lonse lukapwe. (Amalu. 72:​1, 2) Ilyo tulelolela isonde umukaba ubulungami, Yehova alatwafwa pa kuti tuleshipikisha nga batufyenga. (2 Pet. 3:13) Ku ca kumwenako, alatusambilisha ifyo twingacita nga ca kuti batufyenga pa kuti tatulengele ifintu fyabipilako. Inshila imo iyo atusambilishishamo, fintu atweba mu Cebo cakwe ukuti e fyo Umwana wakwe acitile ilyo bamufyengele. Na kabili Yehova alabomfya Baibo pa kutusambilisha ifyo twingacita nga ca kuti batufyenga. w24.11 amabu. 2-3 amapara. 3-4

Ifi Yesu abebele ukuti bapeele abantu ifya kulya fyali no kubakosela pantu pe bumba pali abaume nalimo 5,000. Kabili nga kubikako abana na banakashi, abantu bonse abo bali no kuliisha nalimo balifikile 15,000. (Mat. 14:21) Andrea atile: “Kuli aka akalumendo akakwete imikate ya barle 5 no tusabi tubili. Lelo bushe ifyacepa ifi e fingakumana abantu bafula ifi?” (Yoh. 6:9) Ilingi line abapiina e balelya imikate ya barle, kabili utu utusabi utunono bafwile balitubikileko umucele e lyo batuumika. Lelo imikate no tusabi ifyo aka kalumendo kakwete fyalicepele sana ica kuti tafyali no kukumana abantu bonse. Yesu alefwaya ukupeela abantu ifya kulya. E ico abebele ukuti bekale pa cani mu mabumba. (Marko 6:​39, 40; Yoh. 6:​11-13) Tubelenga ukuti Yesu alitootele Wishi pa mukate na pe sabi. Filya Yesu atootele Wishi, alangile ukuti Lesa e walengele ukuti bakwate ifya kulya. Kabili alangile no kuti Yesu aletasha pa fya kulya. Nga tulepepa ilyo tushilatampa ukulya ninshi tulepashanya Yesu. Lyena Yesu aebele abasambi bwakwe ukuti bapeele abantu ifya kulya. E ico abantu bonse baliliile mpaka baikuta, ica kuti ne fya kulya fyashalapo fye. w24.12 amabu. 2-3 amapara. 3-4

Ilyo Yesu ali pano isonde, alepeela Wishi ubukata ilyo alelanda ukuti e walemupeela amaka ya kucita ifipesha mano. (Marko 5:​18-20) Yesu na kabili alepeela Yehova ubukata mu fyo alelanda pali Yehova e lyo ne fyo alecitila abantu. Bushiku bumo, Yesu ali mwi sunagoge alesambilisha abantu. Pa bantu abalekutika ifyo alesambilisha, pali no mwanakashi uwali ne cibanda icamucushishe pa myaka 18. Icibanda calengele uyu mwanakashi abe uwakongama kabili alefilwa no kololoka. Ala uyu mwanakashi aliculile! Ilyo Yesu amumwene, alimumfwilile uluse kabili amwebele cikuuku cikuuku ati: “We mwanakashi, wapola ubulwele bobe.” Lyena abikile iminwe yakwe pali ena kabili apo pene fye alyololweke “alacindika na Lesa.” Alitashishe sana Yehova pantu alimundepe! (Luka 13:​10-13) Filya Yehova acitiile uyu mwanakashi fyalengele apeele Yehova ubukata. Na ifwe bene, kwaliba ifingi ifyo Yehova acita ifilenga tulemupeela ubukata. w25.01 amabu. 2-3 amapara. 3-4

Ku maka yesu te kuti tukwate ifyo Adamu na Efa bapanishe. (Amalu. 49:​7-9) Yehova nga tatwafwile, te kuti tukwate isubilo lya kuba no mweo nelyo ilya kubuushiwa. Na kuba nga tufwa fye nga filya fine inama ishishakwata ne subilo lya kubuushiwa shifwa. (Luk. Mil. 3:19; 2 Pet. 2:12) Shifwe Yehova uwatutemwa alitupeela ubupe ubwalenga tubweshe inkongole sha lubembu ulo twapyana kuli Adamu. Yesu alandile pali ubu bupe ati: “Pantu Lesa atemenwe nga nshi aba pano calo ica kuti apeele Umwana wakwe uwafyalwa eka, pa kuti onse uumutetekela ekonaika, lelo akabe no mweo wa muyayaya.” (Yoh. 3:16) Na kabili ubu bupe bwalilenga tuleba ifibusa na Yehova. Kuti twanonkelamo muli ubu bupe ubusuma nga nshi ubwalenga Yehova aletubelela uluse pa membu shesu. w25.02 ibu. 3 amapara. 3-6

Finshi Sauli acitile pa kuti abatishiwe? Ilyo Shikulu Yesu alandile na Sauli ukufuma ku muulu, Sauli alilekele ukumona. (Imil. 9:​3-9) Pa nshiku shitatu talelya kabili ukwabula no kutwishika, aletontonkanya sana pa fyamucitikile. Cine cine, Sauli alishininkishe ukuti Yesu e wali Mesia no kuti abasambi bakwe e balepepa Lesa ukulingana ne fyo afwaya. Kuli ifyo twingasambilila kuli Sauli. Alafwaya, nga alitwalilile ukuba ne cilumba nelyo ukutiina sana abantu ica kuti afilwa no kubatishiwa. Sauli ali-itemenwe ukuba Umwina Kristu nangu ca kuti alishibe ukuti abantu bali no kulamucusha. (Imil. 9:​15, 16; 20:​22, 23) Na pa numa ya kubatishiwa, Sauli alitwalilile ukushintilila pali Yehova uwali no kulamwafwa pa kuti aleshipikisha amafya. (2 Kor. 4:​7-10) Na imwe bene nga mwabatishiwa pa kuti mube Inte ya kwa Yehova, mukalakwata amafya nelyo amesho, lelo Yehova akalamwafwa. Kuti mwacetekela ukuti Lesa na Kristu bakalamwafwa.—Fil. 4:13. w25.03 ibu. 4 amapara. 8-9

Caliba fye bwino ukupanga ifyo twakulabelenga Baibo. Kwaliba ifyo tufwile ukulacita pa kuti tulenonkelamo sana mu kubelenga Icebo ca kwa Lesa. Tontonkanyeni pali ici: Pa kuti ifimenwa fikule bwino, filakabila amenshi, maka maka amenshi ya mfula. Nomba nga ca kuti imfula yalokesha mu kashita akanono, umushili ulakwata sana amenshi. Amenshi nga yafulisha, ifimenwa tafikula bwino. Imfula ifwaikwa ileloka panono panono pa kuti amenshi yengile bwino mu mushili. Lyena ifimenwa kuti fyakula bwino. Na ifwe bene tatufwile ukulabelenga Baibo lubilo lubilo ica kuti twafilwa no kumfwa ifyo twabelenga, twalafilwa ukufibukisha no kulafikonka. (Yako. 1:24) Bushe limo mulasanga fye ukuti mulebelenga Baibo lubilo lubilo? Finshi mulingile ukucita? Mufwile ukulabelenga panono panono. Mulingile ukuibikilishako pa kuti muletontonkanya sana pa fyo mulebelenga nelyo pa fyo mwabelenga. Kuti mwasalapo ukulabelenga Baibo pa nshita iyalepako pa kuti mwakwatako ne nshita yakutontonkanya pa fyo mulebelenga. w24.09 ibu. 4 amapara. 7-9

Icilonganino nga cabeba fimo ifya kucita, bafwile ukubelenga bwino ifyo icilonganino cabeba kabili balingile ukukonka ifyo fine cibebele. Balabeba ifyo balingile ukulalanda amalyashi ilyo balelongana ne fyo bafwile ukulapepa amapepo mu cilonganino. Na kabili balabeba ifyo balingile ukulacita pa kusakamana impaanga sha kwa Kristu. Nga ca kuti baeluda balekonka ifyo icilonganino ca kwa Yehova cilebeba, bamunyinefwe na bankashi balomfwa ukuti Yehova alibatemwa kabili alabasakamana. Baeluda nga batweba ifya kucita, tulingile ukuitemenwa ukucita ifyo batweba. Nga tulecita ifi, abatutungulula cikabangukila ukubomba umulimo wabo. Baibo itweba ukuti tulingile ukulaumfwila no kulanakila abatutungulula. (AbaHebere 13:​7, 17) Kwena inshita shimo cilakosa ukucita ifi. Mulandu nshi cikosela? Ni co aba bamunyinefwe abatutungulula tabapwililika. Nomba nga ca kuti tulebika fye amano ku fyo bashicita bwino, mu cifulo ca kulabika amano ku mibele yabo iisuma, ninshi tuleafwilisha abalwani besu. Cinshi twalandila ifi? Abalwani besu bafwaya twalatwishika icilonganino ico Lesa abomfya pa kututungulula. E ico nga tuletontonkanya ifyabipa pali baeluda, kuti twalatontonkanya ifyabipa na pa cilonganino cine. w24.04 ibu. 10 amapara. 11-12

Bushe abantu bonse abakafwa mu bucushi bukalamba tabakakwate ishuko lya kubuushiwa? Amalembo yalilanda bwino bwino ukuti bonse abalwisha Yehova abo akepaya na abo abashilika bakwe bakepaya ilyo kukaba inkondo ya Armagedone, tabakabuushiwe. (2 Tes. 1:​6-10) Nomba cikaba shani ku bantu aba kuti bakafwa mu bucushi bukalamba pa mulandu wa kulwala, ukukota, abakafwa mu busanso, nelyo abo abantu banabo bakepaya? (Luk. Mil. 9:11; Seka. 14:13) Bushe bamo pali aba bakaba pa “bashalungama” abakabuushiwa mu calo cipya? (Imil. 24:15) Tatwaishiba! Lelo twalishiba ifingi pa fikacitika ku ntanshi. Ku ca kumwenako, twalishiba ukuti ilyo kukaba inkondo ya Armagedone, Yehova akapingula abantu ukulingana ne fyo balecitila bamunyina ba kwa Kristu. (Mat. 25:40) Kabili bonse abo bakapingula ukuti ni mpaanga bantu abalanga ukuti balatungilila abasubwa e lyo na Kristu.—Ukus. 12:17. w24.05 amabu. 10-11 amapara. 9-11

Baibo itila inshiku tuleikalamo ni “nshita ishayafya nga nshi.” (2 Tim. 3:1) Fwe bantu ba kwa Yehova tulakwata amafya ayo abantu bonse muli cino calo cabipa ica kwa Satana bakwata. Lelo abantu balatucusha no kutucusha pa mulandu wa kuti tulabombela Yehova. Cinshi cilenga tuletwalilila ukubombela Yehova nangu ca kuti tulakwata aya mafya? Icikalamba icalenga tutwalilile ni co twalishiba ukuti Yehova ni “Lesa wa mweo.” (Yer. 10:10; 2 Tim. 1:12) Yehova alamona amafya yonse ayo tukwata kabili lyonse alafwaya ukutwafwa. (2 Imila. 16:9; Amalu. 23:4) Nga tuleibukisha ukuti Lesa wesu alatusakamana kabili lyonse alafwaya ukutwafwa, tukalakwata amaka ya kushipikisha amafya yonse ayo twingakwata. w24.06 ibu. 20 amapara. 1-2

Tufwile ukutwalilila ukucetekela icilonganino ca kwa Yehova. Nga ca kuti abaletungulula bamona ukuti tulingile ukwalukako mu fyo twaishibe icine cimo ica mu Baibo nelyo mu fyo tubombela Lesa, tabashingashinga ukwalula. Icilenga balecita ifi, ni co bafwaya ukulalenga Yehova alesekelela. Na kabili, lyonse ilyo balesalapo ifya kucita, balakonka ifyaba mu Cebo ca kwa Lesa kabili ifyaba mu Cebo ca kwa Lesa e fyo abantu ba kwa Lesa bonse bafwile ukulakonka. Umutumwa Paulo atukoseleshe ukuti: ‘Tuleikatisha ifya kukonka ifyaba mu mashiwi ayasuma.’ (2 Tim. 1:13) ‘Ifya kukonka ifyaba mu mashiwi ayasuma,’ fintu ifyo fwe Bena Kristu tusambilila ifyaba mu Baibo. (Yoh. 17:17) Fyonse ifyo twasuminamo fifuma muli ifi ifyo tusambilila mu Cebo ca kwa Lesa. Icilonganino ca kwa Yehova citusambilisha ukuti ifi fine e fyo tufwile ukulakonka. Nga tulecita ifi, Yehova akalatupaala. w24.07 amabu. 11-12 amapara. 12-13

Apo umutumwa Petro alishibe ifyo cumfwika nga ba kubelela uluse pa mulandu wa kuti walapila, alisambilisheko bambi pa kulapila na pa kubelela uluse. Ilyo papitile inshita ukutula apo bakwatiile umutebeto pa Pentekoste, Petro alilandile ilyashi kwi bumba lya baYuda abashali bena Kristu kabili alibalondolwelele ukuti e baipeye Mesia. Na lyo line, alibakoseleshe ilyo abebele ati: “E ico lapileni no kwalukila kuli Lesa pa kuti imembu shenu shifuutwe, e lyo Yehova alamupuupuutula.” (Imil. 3:​14, 15, 17, 19) Kanshi Petro asambilishe ukutila pa kuti umuntu alapile afwile ukwaluka, e kutila afwile ukuleka ukutontonkanya ifyalubana, ukuleka ukucita ifyabipa no kutendeka ukucita ifilenga Lesa alasekelela. Petro alandile no kuti Yehova ali no kufuuta imembu shabo. Ukwishiba ukuti Yehova alatwelela nga twalapila pa membu isho tucita, ukubikako fye ne membu ishikalamba, kulatusansamusha! w24.08 ibu. 12 para. 14

Nga natucetekela sana ukuti impela ya cino calo naipalama icine cine, tatwakulafwaisha ukukwata icuma. Abantu “bakapoosaika silfere yabo mu misebo,” pantu bakeshiba ukuti “Silfere yabo na golde yabo tafyakabapusushe mu bushiku bwa bukali bwa kwa Yehova.” (Esek. 7:19) Mu cifulo ca kulabika amano ku kukwata indalama ishingi, tulingile ukusalapo ukucita ifintu ifingalenga twalaisakamana, twalasakamana ne ndupwa shesu, kabili twatwalilila no kubombela Yehova. Ici cilolele mu kuti tatulingile ukulakongola indalama icikongolekongole nelyo ukulapoosa inshita iikalamba ukulasakamana ifipe fyesu pantu fyalifulisha. Na kabili tufwile ukuba abacenjela sana pa kuti tatutemenwe sana ifyo twakwata. (Mat. 6:​19, 24) Ilyo impela ya cino calo ile ilepalama, tulingile ukusalapo nampo nga kucetekela Yehova nelyo ifyuma. w24.09 ibu. 11 amapara. 13-14

Kwaliba imibele imo iyo twingaleka umupwilapo. Lelo kuti twasanga ukuti imibele imbi yena yalikosa ukuileka umupwilapo. Natulande pa mutumwa Petro. Pa mulandu wa kuti aletiina abantu, alikeene Yesu imiku itatu. (Mat. 26:​69-75) Camoneke kwati Petro alilekele ukutiina abantu ilyo abilile mu cilye ca Sanhedrini ukwabula umwenso. (Imil. 5:​27-29) Nomba ilyo papitile imyaka imo, inshita imo alilekele ukulya na Bena Kristu abashali abaYuda “pantu aletiina abasembululwa.” (Gal. 2:​11, 12) Petro alitampile ukutiina abantu na kabili. Nalimo talekele ukutiina abantu umupwilapo. Nalimo na ifwe bene kuti twaba nga Petro. Nalyo line, kuti twacimfya amatunko nga tulekonka ifyo Yesu atufundile ukuti tufwile ukuba abalola. (Mat. 26:41) Kabili lyonse tatufwile ukulacita ifingalenga twatunkwa ukucita ifyabipa. Muletwalilila ukucita ifilenga mulecimfya amatunko.—2 Pet. 3:14. w24.07 amabu. 18-19 amapara. 17-19

Takwaba umuntunse uwaba na bukapekape ukucila Yesu. Ilyo ali pano isonde, ilingi line alecita ifipesha amano pa kwafwa abantu. (Luka 9:​12-17) Ubupe ubwacila pa bupe bonse ubo atupeela, kututuulila umweo wakwe. (Yoh. 15:13) Ukutula fye ilyo Yesu abuushiwe, alitwalilila ukutwafwa. Nga filya fine atulaile, alilomba Yehova ukuti engatupongolwela umupashi wakwe uwa mushilo pa kuti uletusambilisha kabili uletusansamusha. (Yoh. 14:​16, 17, futunoti; 16:13) Ukupitila mu fyo tusambilila nga tulelongana pa cilonganino, Yesu alatusambilisha ifya kucita pa kuti tulelenga abantu mwi sonde lyonse baleba abasambi. (Mat. 28:​18-20) Umutumwa Paulo alembele ati ilyo Yesu abwelelemo ku muulu, “apeele na bantu ukuba ifya bupe.” (Abena Efese 4:​7, 8) Paulo alondolwele ukuti ico Yesu apeelele aba bantu ukuba ifya bupe, ni pa kuti baletungilila icilonganino mu nshila ishalekanalekana. (Efes. 1:​22, 23; 4:​11-13) Kwena aba baume tabapwililika, e ico balalufyanya. (Yako. 3:2) Lelo Shikulwifwe Yesu Kristu alatwafwa ukupitila muli aba abaume. Bupe atupeela. w24.10 ibu. 18 amapara. 1-2

Davidi aebele umwana wakwe Solomone ukuti ifintu fyali no kulamwendela fye bwino nga ca kuti aleumfwila Yehova Lesa. Ku ca bulanda ilyo Solomone akotele, atampile ukulapepa tulesa twa bufi. Yehova tatemenwe ifi Solomone acitile, kabili alilekele ukumupeela amano aya kulatungulula bwino abantu mu mulinganya. (1 Isha. 11:​9, 10; 12:4) Finshi tulesambililako? Nga tuleumfwila Yehova ifintu filatuwamina. (Amalu. 1:​1-3) Kwena Yehova tatulaya ukuti akatupeela icuma no bucindami nga filya cali kuli Solomone. Lelo nga tuleumfwila Lesa wesu, akulatupeela amano ayakulalenga tulesala bwino ifya kucita. (Amapi. 2:​6, 7; Yako. 1:5) Amashinte ya mafunde yakwe yalatutungulula ilyo tulesalapo incito iyo tufwile ukwingila, amasambililo ayo tulingile ukukwata, ifyo tufwile ukulaleseshamo icitendwe ne fyo tulingile ukulamona indalama. Nga tulekonka amano ayo Lesa atupanda, tukaicingilila ku fintu ifingalenga bucibusa bwesu na Yehova bwapwa kabili tukekala umuyayaya. (Amapi. 2:​10, 11) Na kabili kuti twakwata ifibusa ifisuma kabili tukalakonka ifikalalenga mu lupwa lwesu muleba insansa. w24.11 amabu. 10-11 amapara. 11-12

Mulekwatako inshita ya kulanshanya na bana benu pa fyaba mu Baibo na pa fyo bengatetekela Lesa. Kuti mwasambilisha umwana wenu pa fyaba mu Baibo na pa fyo engatetekela Lesa nga mwaya mu kutandalila ifikuulwa umo basungila ifya kale. Nalimo kuti mwalanga umwana wenu icintu cimo ico Baibo yalandapo. Nga mwacita ifi, umwana wenu kuti ashininkisha ukuti ifyo Baibo ilanda fya cine. Na kabili, kuti mwasambilisha umwana wenu pe Libwe lya ku Moabu. Ili ilibwe lyalikala pa myaka 3,000 kabili pali ili ilibwe palilembwa ishina lya kuti Yehova. Ililwe limbi ilyo bapanga kwati Libwe lya ku Moabu, balisungila mu muputule umo balangila ifya kale uo beta ukuti “The Bible and the Divine Name” uwaba pa Maofesi ya Kalamba aya Nte sha kwa Yehova mu Warwick, ku New York. Ifyaba pali ili ilibwe filangilila ukuti Imfumu Mesha yalipondokeele abena Israele. Ifi fine e fyo na Baibo ilanda. (2 Isha. 3:​4, 5) Nga ca kuti umwana wenu aishininkishisha ukuti ifyo Baibo ilanda fya cine, icitetekelo cakwe cikakoselako. w24.12 ibu. 14 para. 4; ibu. 15 para. 6