April

Pa kuti tukabe no mweo wa muyayaya kano twatetekela ilambo lyakwe. (Efes. 1:7) Abo Yesu aitile ukuti “impaanga shimbi,” tabafwile ukulyako umukate no kunwako umwangashi ilyo kuli Umulaalilo wa kwa Shikulu uubako cila mwaka. (Yoh. 10:16) Na lyo line, balanonkelamo mu mubili wakwe na mu mulopa wakwe. Bacita ifi ukupitila mu kutetekela icilubula ca kwa Yesu na mu kutetekela ifintu ifingi ifyo icilubula calenga fyabako. (Yoh. 6:53) Nomba abalyako balanga ukuti baba mu cipangano icalenga bakwata isubilo lya kuyateka ku muulu. Nampo nga twalisubwa nelyo twaba mu mpaanga shimbi, tufwile ukutetekela icilubula pa kuti tukakwate umweo wa muyayaya. w24.12 ibu. 13 amapara. 14, 16

Ilyo Yesu atendeke Umulaalilo wa kwa Shikulu, apeele abatumwa bakwe umukate uushatutumuka, kabili abebele ukuti ulya mukate waleimininako umubili wakwe. Lyena abebele ukuti umwangashi waleimininako ‘umulopa wa cipangano.’ (Marko 14:​22-25; Luka 22:20; 1 Kor. 11:24) Muli ici cipangano mwaba “aba mu ng’anda ya kwa Israele” abakalateka mu “Bufumu bwa kwa Lesa.” (Heb. 8:​6, 10; 9:15) Ilyo Yesu atendeke Umulaalilo wa kwa Shikulu, ifyo alandile fyakumine “umukuni unono.” Abatumwa bakwe aba cishinka abo ali nabo muli ulya muputule, e babalilepo ukuba muli uyu mukuni unono. Ababa muli ili bumba e bakaba pamo na Yesu ku muulu. w24.12 ibu. 11 amapara. 9-10

Yesu balimufutwike, balimwikete, balimusaalwile, balimubepeeshe, balimupeele imilandu ya bufi kabili balimucushishe nga nshi. Abashilika balimutwele ku cifulo ca kumwipailako kabili balimupoopeele pa cimuti. Ilyo aleshipikisha ifi fyonse, kwali Umo uwaleumfwa sana ububi, e kutila Yehova Lesa. Yehova alikwete amaka aya kucingilila Umwana wakwe lelo tacitilepo nangu cimo. Cinshi calengele e cingilila Umwana wakwe uo atemwa sana? Ni co Yehova alitutemwa. Ilambo lya kwa Yesu e nshila iikalamba sana iyo Yehova alangilamo ifyo amutemwa sana ngo muntu umo umo. Alituulile Umwana wakwe uo atemwa ilambo, kabili alishipikishe ilyo ali sana no bulanda pa kuti fye amulubule ku lubembu ne mfwa. (1 Yoh. 4:​9, 10) Yehova afwaya ukwafwa umuntu umo umo ukulwisha ulubembu no kulucimfya! w24.08 ibu. 6 amapara. 13-14

Kuti twaumfwikisha ifyo Yehova atutemwa nga twatontonkanya pa fyo aumfwile sana ububi ilyo amwene Umwana wakwe alecula. Satana atila ababomfi ba kwa Yehova te kuti batwalilile ukuba ne cishinka kuli ena nga nabakwata amafya. Pa kuti Yehova alange ukuti ifi Satana alanda fya bufi, alilekele Umwana wakwe ukucula ilyo ashilafwa. (Yobo 2:​1-5) Yehova alemonako uko Umwana wakwe balemupumya kuli bashimapepo, uko balemuuma ku bashilika no kumupoopela pa cimuti. Kabili Yehova alimweneko uko Umwana wakwe uo atemwa afwile imfwa iibi. (Mat. 27:​28-31, 39) Yehova alikwete amaka aya kulesha ifi fyalecitika. (Mat. 27:​42, 43) Lelo Lesa nga alileseshe Umwana wakwe ukuti afwe, nga tatwakwete icilubula kabili nga tatwakwata ne subilo. E ico Yehova alilekele Umwana wakwe ukuti ashipikishe ilyo alecula mpaka no kufwa. w25.01 ibu. 22 para. 7

Cali ni pa Nisani 16, mu mwaka wa 33 ninshi Yesu acili pano isonde. Icacitike calengele abasambi ba kwa Yesu baba no bulanda sana kabili baba no mwenso. Abasambi babili balimine ukufuma ku Yerusalemu, balaya ku mushi wa Emao.. Umwaume uo bashaishibe atendeke ukwendela pamo nabo. Aba basambi batendeke ukumulondolwela ifyabipa ifyacitikile Yesu. Lyena uyu mwaume atampile ukubashimikila ifintu ifyo bashali no kulaba. Alibalondolwelele ico Mesia alingile ukuculila no kufwa, “ukutendekela pa fyo Mose alembele ne fyo Bakasesema bonse balembele.” Ilyo aba bonse batatu bafikile ku Emao, uyu mwaume uo bashaishibe ali-isokolwele ukuti ali ni Yesu uo Lesa abuushishe! (Luka 24:​13-35) Mu nshiku 40 isho Yesu aikele pano isonde pa numa ya kubuushiwa, alimoneke ku basambi bakwe imiku iingi. Muli ishi nshiku, Yesu alikoseleshe abasambi bakwe abali no bulanda kabili abali no mwenso. E ico baishileba ne nsansa kabili abashipa ilyo balebila imbila nsuma na lintu balesambilisha abantu pa Bufumu. w24.10 ibu. 12 amapara. 1-3

Mu kupita kwa nshita umuntu alakula aba no mukalamba, lelo ukuba umukalamba mu fya kwa Lesa kwena takwisa nga ameno ya mu kanwa. Ku ca kumwenako, aba bwananyina mu Korinti balisumine imbila nsuma, balibatishiwe, balipokelele umupashi wa mushilo, kabili balisambilile ifintu ifingi ku fyo umutumwa Paulo alebasambilisha. (Imil. 18:​8-11) Nomba na lintu papitile imyaka ukutula apo babatishiwilwe, abengi tabakulile mu fya kwa Lesa. (1 Kor. 3:2) Pa kuti tube abakalamba mu fya kwa Lesa, tufwile ukuitemenwa ukufwaya ukuba abakalamba mu fya kwa Lesa. ‘Abatemwa ukubulwa amano’ basalapo ukukanaba abakalamba mu fya kwa Lesa kabili tabakatale ababa abakalamba mu fya kwa Lesa. (Amapi. 1:22) Tatulefwaya ukuba ngo muntu umukalamba uwa kuti alolela fye ukuti abafyashi e bo balemusalilapo ifya kucita. Lelo fwe bene ni fwe tulingile ukushininkisha ukuti bucibusa bwesu na Yehova bwatwalilila ukuba ubwakosa. Nga ca kuti mucili mulebombesha pa kuti mube abakalamba mu fya kwa Lesa, mulepepa kuli Yehova pa kuti alenge “mulefwaya e lyo no kucitapo cimo.”—Fil. 2:13. w24.04 ibu. 4 amapara. 9-10

Yehova alitweba ifyo omfwa nga alepingula abantu. (Esek. 33:11) Yehova tafwaya ukulofya umuntu nangu umo, kano nga pali umulandu wine wine uwakumulofeshapo. Wa luse sana kabili alabelela abantu uluse ilyo calinga. Finshi twaishiba pa bantu abashakabuushiwe? Baibo yalumbula fye abantu abanono abashakabuushiwe. Yesu atile Yuda Iskariote takabuushiwe. (Marko 14:21; moneni na Yohane 17:12) Yuda alishibe ukuti ifyo alefwaya ukucita fyali no kukalifya Yehova no Mwana wakwe, lelo ifyo fine e fyo acitile. (Moneni Marko 3:29) Yesu alandile no kuti intungulushi sha mapepo shimo ishalemulwisha tashakabuushiwe. (Mat. 23:33) Umutumwa Paulo na o atile abasangu abashifwaya ukulapila tabakabuushiwe.—Heb. 6:​4-8; 10:29. w24.05 ibu. 4 amapara. 10-11

Nga twatwalilila ukuba ifibusa fya kwa Yehova, Satana te kuti acite nangu cimo icingalenga bucibusa bwesu na Yehova bwapwa. (1 Yoh. 3:8) Mu calo cipya, Yehova takalecingilila fye ababomfi bakwe ku fingalenga bucibusa bwabo na ena bwapwa lelo akalabacingilila na ku mfwa. (Ukus. 21:4) Ala Yehova alitucindamika ifi atwita pa kuti tube abeni mwi tenti lyakwe, kuti twaba ifibusa fyakwe umuyayaya. (Esek. 37:27) Finshi tufwile ukucita pa kuti tutwalilile ukuba abeni mwi tenti lya kwa Yehova? Nga ca kuti bamo balimwitile ku mwabo kuti mwafwaya ukwishiba ifyo balemwenekela ukulacita. Ifi fine e fyo caba, kuti twafwaya ukwishiba ifyo Yehova enekela abafwaya ukutwalilila ukuba abeni bakwe ukulacita. Pa mulandu wa kuti twalitemwa Yehova, tulacita “ifya kumusekesha.” (Kol. 1:10) Tufwile ukulamucindika inshita yonse. Nga tulemucindika sana tatwakulafwaya ukulacita nangu fimo ifingamukalifya. Ukwabula no kutwishika tufwaya ‘ukulaenda bufuuke bufuuke’ na Lesa wesu.—Mika 6:8. w24.06 ibu. 4 amapara. 8-9

Yehova aebele Abrahamu ukutuula umwana wakwe Isaki ilambo. Ukwabula no kutwishika, ifi baebele Abrahamu ukucita fyalilengele aba sana no bulanda. Na lyo line, alicitile ifyo Yehova amwebele. Lelo ilyo Abrahamu ali mu kwipaya umwana wakwe, Lesa alimuleseshe. Ifyo Abrahamu acitile filalenga twaishiba ifyo Yehova ali no kucita ku ntanshi. Yehova ali no kuitemenwa ukutuula Umwana wakwe uo atemwa ilambo. Yehova alitemwa nga nshi abantu. (Ukute. 22:​1-18) Ilyo papitile imyaka iingi sana, Yehova alipeele abena Israele amafunde. Abebele ukulatuula amalambo ya nama pa kuti ale-elela imembu shabo. (Lebi. 4:​27-29; 17:11) Yalya amalambo baletuula yaleimininako ilambo limo fye ilikalamba ilyali no kulubula abantu ku lubembu. Lesa alengele bakasesema bakwe balalondolola ukuti umwana uwalaiwe, uwaishileba Umwana wa kwa Lesa uwaibela, ali no kucula kabili bali no kumwipaya pa kuti akapusushe abantu ku lubembu ne mfwa, ukubikako fye na imwe bene!—Esa. 53:​1-12. w24.08 ibu. 4 amapara. 7-8

Ilyo mulebelenga Baibo, icacindama kumona ifyo mwingalacita ifyo mulebelenga. Ilyo mulebelenga iciputulwa cimo ica Cebo ca kwa Lesa, muleyipusha amuti, ‘Kuti nabomfya shani ifi fyebo pali ino nshita nelyo kuti nafibomfya shani ku ntanshi?’ Tutile mulebelenga 1 Abena Tesalonika 5:​17, 18. Pa numa ya kubelenga ifi fikomo kuti mwaimininako e lyo mwalatontonkanya pa miku mupepa na pa fyo amapepo yenu yaba. Na kabili kuti mwatontonkanyako na pa fintu ifyo mutashishapo Yehova. Nalimo kuti mwafwaya ukutasha Yehova pa fintu fitatu. Nangu mwakwata fye inshita iinono iya kutontonkanya sana pa fyo mwasambilila mu Baibo, mukomfwikisha ifyaba mu Cebo ca kwa Lesa kabili mukalacita ifyo cilanda. Tontonkanyeni pa fyo mwinganonkelamo nga ca kuti mulecita ifi fine ilyo mulebelenga ifiputulwa fimbi ifya mu Baibo! Cine cine, nga mulecita ifi, ninshi mulecita ifyo Icebo ca kwa Lesa cilanda. w24.09 amabu. 4-5 amapara. 9-10

Yehova atubumbile mu musango wa kuti tuleba ne nsansa sana nga twapeela, ukucila isho tukwata nga twapokelela. Tulatemwa nga twacitila aba bwananyina ifisuma. Kabili tulaba ne nsansa nga ca kuti batutashisha pa fyo twabacitila. Lelo nampo abo tucitile icisuma batutasha nelyo tabatutashishe, tulaba ne nsansa pantu tuleshiba ukuti natucita icintu icisuma. Muleibukisha ukuti Yehova kuti amupeela ifingi ukucila na pa fyo mucitiile abanenu. (2 Imila. 25:9) Yehova kuti atupeela ifingi ukucila na pa fyo twingapeela abantu. Kabili takwaba nangu cimo icingalenga twaba ne nsansa ukucila pa fyo Yehova engatulambula. E ico bonse natutwalilile ukulapashanya Shifwe wa ku muulu uwaba na bukapekape. w24.09 ibu. 31 amapara. 20-21

Yehova wa luse nga nshi. (Amalu. 103:13; Esa. 49:15) Nga tulecula, na o alomfwa ububi. (Seka. 2:8) Alalenga catwangukila ukupalama kuli ena pa kuti tube ifibusa fyakwe. (Amalu. 25:14; Imil. 17:27) Ali-icefya. “Alakontama pa kuti aloleshe pa myulu na pe sonde, emya uushakwata wa kumwafwa mu lukungu.” (Amalu. 113:​6, 7) Nani uushingafwaya ukupeela Lesa wesu ubukata? Tulapeela Yehova ubukata pantu tulafwaya abantu bambi bamwishiba. Abantu abengi tabaishiba icine pali Yehova. Cinshi calenga? Pantu Satana alipofwisha amatontonkanyo yabo pa kubepa ubufi pali Yehova. (2 Kor. 4:4) Satana alilenga abantu abengi basumina ukuti Yehova alikalipa, tatubikako amano, kabili e ulenga tulecula. Nomba ifwe twalishiba icine pali Lesa wesu. Kanshi tufwile ukwebako abantu icine pali Yehova pa kuti nabo bamwishibe no kumona ukuti musuma pa kuti balemupeela ubukata.—Esa. 43:10. w25.01 ibu. 3 amapara. 6-7

Ilyo Yesu ali pano isonde abantu ba kwa Satana balebepa ubufi ubwalekanalekana pa Mwana wa kwa Lesa uwapwililika kabili uwalecita ifipesha mano. Ku ca kumwenako, intungulushi sha mapepo shale-eba abantu ukuti amaka ayo Yesu alefumishako ifibanda ni “kateka wa fibanda” amupeele. (Marko 3:22) Ilyo Yesu balemulubulwisha, bamupeele umulandu wa kuti alesaalula Lesa kabili intungulushi sha mapepo shatunkile abantu ukuti bamwipaye. (Mat. 27:20) Ilyo abasambi ba kwa Kristu balebila imbila nsuma, abalwani babo “bafundawile abena fyalo” pa kuti balecusha Abena Kristu. (Imil. 14:​2, 19) Ulupungu lwa kwa Kalinda ulwa December 1, 1998, lwalandile pe lembo lya Imilimo 14:2 ukuti: “AbaYuda abalekaano kuumfwa babalamwine Abena fyalo no kubakalifya imitima ukuti bemine Abena Kristu.” Na muno nshiku mwine Satana acili alelufya “aba pano isonde bonse.” w24.04 ibu. 11 amapara. 15-16

Icikalenga umuntu akabuushiwe nelyo ekabuushiwa, te nshita akafwilapo! Yehova ni Kapingula uwapwililika, lyonse alapingula abantu mu bulungami na mu mulinganya. (Amalu. 33:​4, 5) Tatutwishika ukuti “Kapingula wa pano isonde ponse” akacita icalungama. Na kabili icifulo uko umuntu ekala te cingalenga aisakwata umweo wa muyayaya. Yehova te kuti apingule abantu abengi ati ni mbushi pa mulandu fye wa kuti bekala mu fyalo umo bashakwata ishuko lya kukutika imbila nsuma. (Mat. 25:46) Kapingula wa pano isonde ponse uwalungama alibika sana amano ku bantu ba musango uyu, ukucila ne fyo twababikako amano. Tatwaishiba ifyo Yehova akalenga ifintu fikabe ilyo kukaba ubucushi bukalamba. Nalimo bamo pali aba bantu bakasambilila pali Yehova, bakamutetekela, bakasalapo ukuba ku lubali lwakwe nga bamona ifyo akalenga abantu bonse pano isonde bamwishiba.—Esek. 38:16. w24.05 ibu. 12 amapara. 14-15

Abantu ba kwa Yehova balitemwa ukwafwana. (2 Kor. 8:4) Nomba limo tulingile ukuba abashipa pa kuti twafwane. Ku ca kumwenako, nga kwaba inkondo, baeluda baleshiba ukuti aba bwananyina balekabila ukubakoselesha, ukubatungilila, ukubapeelako amaBaibo ne mpapulo, ifya kulya, ifya kufwala e lyo no mwa kwikala. Pa mulandu wa kuti baeluda balitemwa aba bwananyina, balaibika mu kapoosa mweo pa kuti fye babapeele ifyo balekabila. Nga kuli amafya calicindama ukuba ne cumfwila pa kuti tutwalilile ukuba abaikatana. Mulekonka ifyo aba ku Bethel balemweba. (Heb. 13:17) Baeluda balingile ukulapituluka mu fyo balingile ukucita pa kuipekanishisha ku masanso ayakalamba e lyo ne fyo balingile ukucita nga kwacitika ubusanso ubukalamba. (1 Kor. 14: 33, 40) Muleba abashipa lelo abacenjela. (Amapi. 22: 3) Muletontonkanyapo ilyo mushilacita nangu cimo. Mwilaibika mu kapoosa mweo napashilingile. Muleshintilila pali Yehova. Muleibukisha ukuti Yehova afwaya imwe na ba bwananyina mwaba abacingililwa. w24.07 ibu. 4 para. 8; ibu. 5 para. 11

Imfumu Davidi alishibe Yehova kabili alimucetekele sana. Ilyo Imfumu Shauli na bantu bambi balefwaya ukwipaya Davidi, Davidi alipepele kuli Yehova ukuti amwafwe. Ilyo Lesa ayaswike ipepo lya kwa Davidi kabili amupususha no kumupususha, Davidi alandile ati: “Yehova wa mweo!” (Amalu. 18:46) Aya mashiwi Davidi alandile tayalepilibula fye ukuti alisumine ukuti Lesa e ko aba. Icitabo cimo citila, aya amashiwi Davidi alandile yalangilila ukuti alicetekele sana Yehova ukuti “ni Lesa wa mweo uwafwa abantu bakwe lyonse.” Davidi alishibe ukuti Lesa alemona amafya yonse ayo alekwata kabili ali no kulamwafwa, ici calengele Davidi atwalilile ukubombela Yehova no kumulumbanya. (Amalu. 18:​28, 29, 49) Nga twashininkisha ukuti Yehova ni Lesa wa mweo kuti twaba abacincila ilyo tulemubombela. Tukalakwata amaka ya kushipikisha amesho kabili tukalafwaisha ukutwalilila ukubombesha mu mulimo wa kwa Lesa. Na kabili tukalafwaisha ukutwalilila ukuba ifibusa fya kwa Yehova. w24.06 amabu. 20-21 amapara. 3-4

Finshi twingasambilila ku mashiwi umutumwa Paulo aebele abena Tesalonika? Nga ca kuti twaumfwa fimo ifipusene ne fyo twasambilila mu Baibo nelyo ilyashi limo ilyatupapusha, tufwile ukwiluka. Mu fyalo ifyaletekwa na Soviet Union, abalwani besu bapeele aba bwananyina kalata imo iyo batile yafumine ku maofesi yakalamba. Muli iyi kalata, bamunyinefwe babebele ukuti nabo bapange icilonganino cabo beka. Iyi kalata yalemoneka fye kwati yafumine ku maofesi yakalamba. Lelo aba bwananyina abali aba cishinka tababepelwe ne fyali muli iyi kalata. Balilwike ukuti ifyali muli iyi kalata fyalipusene ne fyo basambilile mu Cebo ca kwa Lesa. Muno nshiku, abalwani besu balabomfya Intaneti ne nshila shimbi isha kulanshanishishamo pa kuti batufulunganye na pa kuti batupaatukanye. Mu cifulo ca kuleka ‘amatontonkanyo yesu yafulungana bwangu,’ kuti twaicingilila nga ca kuti twatontonkanya sana pa fyo twaumfwa nelyo ifyo twabelenga nga nafilingana ne cine ico twasambilila.—2 Tes. 2:2; 1 Yoh. 4:1. w24.07 ibu. 12 amapara. 14-15

Cila bushiku mulabomfya ishi insambu ilyo musalapo ifya kucita. Icacindamisha ico umuntu onse engasalapo ukucita, kuipeela kuli Yehova no kuba mu lupwa lwa bantu bakwe abamupepa. Yehova afwaya umuntu onse aipeela kuli ena. Cinshi Yehova afwaila abantu bonse baipeela kuli ena? Afwaya baba ifibusa fyakwe kabili bakabe no mweo wa muyayaya. (Amala. 30:​19, 20; Gal. 6:​7, 8) Na lyo line, Yehova tapatikisha umuntu uuli onse ukuti alemubombela. Alaleka umuntu onse aisalilapo ifya kucita. Nomba inga ca kuti Umwina Kristu uwabatishiwa acita ulubembu ulukalamba? Nga talapiile bafwile ukumufumya mu cilonganino. (1 Kor. 5:13) Na lyo line, Yehova alafwaisha ukuti uucitile ulubembu ulukalamba abwelela kuli ena. Na kuba, ici e calengele sana ukuti atupeele icilubula pa kuti aletwelela imembu nga twalapila. Lesa wesu uwatutemwa alapaapaata abacita imembu ukuti balapile.—Seka. 1:3; Rom. 2:4; Yako. 4:8. w24.08 ibu. 14 amapara. 1-2

Pa nshita umutumwa Yohane alelemba kalata yalenga butatu, abantu bamo balesambilisha ifya bufi kabili balelenga mu cilonganino muleba amalekano. Lelo bamo balitwalilile ‘ukulaenda mu cine.’ Baleumfwila Yehova kabili balecita ifintu “ukulingana na mafunde yakwe.” (2 Yoh. 4, 6) Aba Abena Kristu aba cishinka balilengele Yohane na Yehova baba ne nsansa sana. (Amapi. 27:11) Finshi tulesambililako? Nga tuli aba cishinka kuli Yehova, tulaba ne nsansa. (1 Yoh. 5:3) Ku ca kumwenako, tulasekelela pantu tuleshiba ukuti tulelenga Yehova aleba ne nsansa. Yehova alasekelela nga tatulecita ifyabipa kabili nga tulekonka amafunde yakwe. Bamalaika mu muulu nabo balasekelela. (Luka 15:10) Na ifwe bene tulaba ne nsansa nga twamona bamunyinefwe na bankashi baletwalilila aba cishinka. (2 Tes. 1:4) Kabili na lintu cino calo ca kwa Satana cikonaulwa, tukaba ne nsansa pantu ninshi twalitwalilila ukuba aba cishinka kuli Yehova. w24.11 ibu. 12 amapara. 17-18

Bushe pafwile ukukokola shani ilyo mushilaeba umuntu ukuti namumutemwa? Nga mwa-angufyanya ukweba umuntu ukuti namumutemwa, kuti amona ukuti tamwatekanya. (Amapi. 29:20) E lyo nga mwakokola ukweba umuntu ukuti mwalimutemwa, kuti amona kwati mulawayawaya sana ukucita ifintu, maka maka nga ca kuti alishiba ukuti mwalimutemwa. (Luk. Mil. 11:4) Ilyo mushilaeba umuntu, muleibukisha ukuti tamulingile ukushininkisha ukuti muli no kuupana. Lelo mulingile ukushininkisha ukuti namuipekanya ukuupa nelyo ukuupwa. Mufwile no kushininkisha ukuti uo mulefwaya ukwishishanya nankwe kuti alinga ukuupana nankwe. Nomba kuti mwacita shani nga ca kuti mwaishiba ukuti umo namutemwa? Nga ca kuti tamulefwaya ukutendeka ukwishishanya nankwe, mufwile ukulanga mu fyo mucita ukuti imwe tamulefwaya. Te kuti ciwame mwalenga umuntu atendeka ukulamona ukutila kuti mwatendeka ukwishishanya e lyo ninshi imwe namwishiba ukuti te kuti mwishishanye nankwe.—Efes. 4:25. w24.05 amabu. 22-23 amapara. 9-10

Abasubwa kabili abacishinka, ebo Yesu akasenda mu bufumu bwa mu muulu. Abena Kristu abasubwa abashakatwalilile ukuba abalola tabakalonganikilwe pamo na “abasalwa.” (Mat. 24:31) Lelo kwena abantu ba kwa Lesa bonse fye, nampo nga bakwata isubilo lya kuyaikala ku muulu nelyo nga bakwata isubilo lya kulaikala pano isonde, bafwile ukulabika amano kuli ifi Yesu atusokele ukuti tufwile ukutwalilila ukuba abalola kabili aba cishinka. Twalishiba bwino Yehova. E ico twalicetekela ukuti fyonse ifyo acita fyalilungama. Tacitusakamika nga ca kuti Yehova asalapo ukusuba Abena Kristu bamo aba cishinka muno nshiku. Tulebukisha ifyo Yesu alandile pa babomfi abatampile ukubomba pe awala lyalenga 11 ilyo alelanda pa cilangililo ce bala lya myangashi. (Mat. 20:​1-16) Abatendeke ukubomba mwi bala lya myangashi ninshi bambi nabatendeka kale, babapeele amalipilo yamo yene na batendeke akale. Ifi fine e fyo caba na muno nshiku. Nampo nga e lyo Yehova asalile abasubwa nelyo ni kale abasala, bonse bakapokelela icilambu ca kuya ku muulu nga batwalilila ukuba aba cishinka. w24.09 ibu. 24 amapara. 15-17

Yesu alitulangile bwino bwino ifyo tulingile ukucita nga batufyenga. Abantu abengi balemufyenga sana ukubikako na balupwa lwakwe. Balupwa lwakwe baleti napena. Intungulushi sha mapepo shalelanda ukuti alefumya amaka ku fibanda. Kabili abashilika abena Roma balemutumfya, balimuumine mpaka basuka bamwipaya. (Marko 3:​21, 22; 14:55; 15:​16-20, 35-37) Lelo Yesu alishipikishe ifi fyonse ukwabula ukulandula. Finshi twingasambilila ku fyo acitile? (1 Pet. 2:​21-23) Yesu alitushilile icilangililo pa fyo tulingile ukulacita nga batufyenga. Alishibe inshita iyo alingile ukuba tondolo e lyo ne nshita alingile ukulanda. (Mat. 26:​62-64) Limo abantu nga bamubepesha ubufi, aleikala fye tondolo. (Mat. 11:19) Nga alanda, talesaalula abalemucusha nelyo ukubatiinya. w24.11 amabu. 4-5 amapara. 9-10

Elenganyeni ukuti mwapeela umuntu icintu icisuma sana ica kuti alebomfya. Ala kuti mwaumfwa ububi sana nga ca kuti uyu muntu asunga fye ico mumupeele mu cibokoshi ukwabula ukuti alecibomfya! Lelo kuti mwatemwa nga ca kuti alebomfya bwino ico mwamupeele kabili alelanga no kuti alatasha. Cinshi tulelandapo? Yehova alitupeela Umwana wakwe uwaishiletufwila. Ala Yehova alatemwa icine cine nga ca kuti tulelanga ukuti tulatasha pali ubu ubupe ubusuma nga nshi ubo atupeela, kabili nga tulelanga ukuti tulatasha na pa fyo atutemwa. Pantu na kuba, icalengele atupeele icilubula ni co alitutemwa! (Yoh. 3:16; Rom. 5:​7, 8) Nomba mu kupita kwa nshita, kuti twaleka ukulatasha Yehova pa cilubula. Kuti caba kwati twasungila ubupe ubo Lesa atupeela mu cibokoshi umo tushingalabumona. Pa kuti tatucitile ica musango uyu, lyonse tulingile ukulatontonkanya pa fyo Lesa na Kristu batucitila. w25.01 ibu. 26 amapara. 1-2

Pa kuti munyinefwe afikepo ukuba eluda, tafwile ukuba muntu uushilakokola ukutula apo abelele umusambi. Nangu ca kuti pa kuti mufikepo ukuba baeluda tapafwile ukupita imyaka iingi sana, mulingile ukuba Umwina Kristu uwakosa mu fya kwa Lesa. Ilyo bashilamusonta ukuba baeluda, mufwile ukulanga ukuti mwali-icefya nga filya fine Yesu ali kabili mulalolela mpaka Yehova amona ukuti nacilinga ukumupeelelapo imilimo na imbi. (Mat. 20:23; Fil. 2:​5-8) Kuti mwalanga ukuti muli ba cishinka kuli Yehova nga mulekonka amafunde yakwe kabili nga mulekonka ifyo icilonganino cakwe citweba. Amalembo yalalanda bwino bwino ukuti kangalila afwile ukuba uwafikapo ukusambilisha. Bushe aya mashiwi yapilibula ukuti mufwile ukulalanda bwino sana amalyashi ya cintubwingi? Awe. Baeluda bamo tabalanda bwino sana amalyashi ya cintubwingi, lelo balasambilisha bwino sana nga balebila imbila nsuma, kabili balacita bwino ne fipempu fya bucemi. w24.11 amabu. 23-24 amapara. 14-15

Nga mwabelenga fimo mu Baibo ifyo mushumfwikishe, mulefwailapo ifyebo na fimbi. Lyena akasuba konse, muletontonkanya pa fyo musambilile, ifyo musambilile pali Yehova, pa Mwana wakwe, na pa fyo bamutemwa. (Amalu. 119:​97, futunoti) Nga ca kuti ilyo muleisambilisha nelyo ilyo mulefwailapo ifyebo tamusangilepo ifipya, tamulingile ukufuupuka. Mule-elenganya ukuti muli ngo muntu uulefwaya golde. Ilingi line pa kuti umuntu uulefwaya golde aisange, palapita ama-awala ayengi nelyo inshiku pa kuti fye aisange. Lelo alatwalilila ukufwaya pantu aleshiba ukuti golde iili yonse iyo engasanga nangu icepe shani, yalicindama. Nomba ifipya ifyo tusambilila mu Baibo fyalicindama sana ukucila na golde! (Amapi. 8:10) Kanshi tekwesha ukuleka ukubelenga Baibo no kulafwailapo ifyebo.—Amalu. 1:2. w25.01 ibu. 25 amapara. 14-15

Yehova afwaya tuleiteyanya ukwelela abatulufyanya. (Amalu. 86:5; Luka 17:4; Efes. 4:32) Kuti twaumfwa ububi sana nga ca kuti umo alanda fimo nelyo acita fimo ifyatukalifya, maka maka nga ca kuti uyo muntu ni cibusa wesu nelyo ni lupwa lwesu. (Amalu. 55:​12-14) Inshita shimo kuti twaumfwa ububi sana kwati ni filya uo balasa ulupanga omfwa. (Amapi. 12:18) Nalimo kuti twacita kwati tacitukalipe nelyo ukusuulako fye ku fyo tuleumfwa. Nomba nga twacita ifi, kuti caba kwati muntu uo balashile umwele lelo alefwaya ushale ifyo fine mu mubili ukwabula uku-ufumya. Ifi fine e fyo caba, te kuti twenekele ukuti twalaleka ukumfwa ubukali nga ca kuti twasuulako fye ku fyo tuleumfwa. Umuntu nga atukalifya, nalimo ico twingabalilapo ukucita, kukalipa. Baibo yalilanda ukuti limo kuti twakalipa. Lelo yalitusoka no kuti tatufwile ukutwalilila fye ukuba abakalipa. (Amalu. 4:4; Efes. 4:26) Cinshi yatusokela ifi? Ni co ilingi line umuntu nga nakalipa alacita ifyabipa. (Yako. 1:20) Tuleibukisha ukuti mu cifyalilwa fye tulakalipa nga ca kuti umo atukalifya, lelo nifwe bene tufwile ukusalapo nga twalatwalilila ukuba abakalipa ifyo fine nelyo iyo. w25.02 ibu. 15 amapara. 4-6

Mu lyashi limo ilyo Yesu ashimike, alangilile ukuti umuntu uubika fye amano ku kukwata indalama, lelo “uushacindama mu menso ya kwa Lesa,” muwelewele. (Luka 12:​16-21) Takwaba uwishiba ifikacitika mu bushiku bwa mailo. (Amapi. 23:​4, 5; Yako. 4:​13-15) Fwe basambi ba kwa Kristu tulakwata ubwafya ubo abantu bambi bashikwata. Bwafya nshi tukwata? Yesu alandile ukuti pa kuti tube abasambi bakwe, tufwile ukuitemenwa ‘ukusha fyonse ifyo twakwata.’ (Luka 14:33) Ifi fine e fyo Abena Kristu aba mu nshita ya batumwa abaleikala mu Yudea bacitile. Bali-itemenwe ukusha fyonse ifyo bakwete. (Heb. 10:34) Na muno nshiku mwine aba bwananyina abengi balaitemenwa ukuleka incito pa kuti betungilila akabungwe ka fikansa fya calo. (Ukus. 13:​16, 17) Cinshi calenga baleitemenwa? Ni co balishininkisha ifyo Yehova abalaya ukuti: “Nshakakushe nakalya kabili nshakakulekeleshe nakalya.” (AbaHebere 13:5) E ico tulabombesha pa kuti tukwate indalama sha kubomfya nga twakota, kabili tulacetekela ukuti Yehova akalatwafwa nga ca kuti ifintu ifyo tushile-enekela fyacitika. w25.03 ibu. 29 amapara. 13-14

Yehova tatwenekela ukuba abakalamba mu fya kwa Lesa pa lwesu. Alitupeela bakacema na bakasambilisha abatwafwa pa kuti tube abakalamba mu fya kwa Lesa, e kutila pa kuti tube “nga bakalamba ukufika ku ciimo ca kwa Kristu.” (Abena Efese 4:​11-13) Na kabili Yehova alatupeela umupashi wa mushilo uulenga ‘tuletontonkanya nge fyo Kristu atontonkanya.’ (1 Kor. 2:​14-16) Lesa alilenga na mabuuku 4 aya Mbila Nsuma yalembwa, umo tusambilila ifyo Yesu aletontonkanya, ifyo alelanda ne fyo alecita ilyo alebomba umulimo wakwe pano isonde. Nga muletontonkanya nge fyo Yesu aletontonkanya, nga mulecita ifintu nge fyo alecita, kuti mwaba abakalamba mu fya kwa Lesa. Lelo pa kuti tube abakalamba mu fya kwa Lesa, tatufwile ukupelela fye pa kwishiba “amasambililo ya kutendekelako pali Kristu.” w24.04 amabu. 4-5 amapara. 11-12

Cila bushiku tulasalapo ifya kucita. Fimo ifyo tusalapo tafyakosa, pamo nga ifyo twalalya ulucelo nelyo inshita twalaya mu kulaala. Nomba fimbi fyena fyalikosa ukusalapo. Fimo ifyo twingasalapo kuti fyakuma ubumi bwesu, ifyo twingaba ne nsansa pamo no lupwa lwesu, e lyo ne fyo twingalabombela Yehova. Tulingile ukusalapo ukucita ifingalenga bonse mu lupwa twaba ne nsansa. Kabili icacindamisha, tulingile ukusalapo ifingalenga Yehova alasekelela. (Rom. 12:​1, 2) Icacindama ico mulingile ukucita pa kuti musalepo bwino ica kucita, kwishiba ifishinka fyonse. Mulandu nshi ici cacindamina? Elenganyeni ukuti umuntu aya mu kumona dokota pa mulandu wa kuti alilwala ubulwele ubukalamba. Bushe dokota kuti atampa fye ukumundapa ukwabula ukubalilapo ukumupima nelyo ukumwipushako amepusho? Awe nakalya. Nga filya fine dokota umusuma acita, na imwe bene mukalasalapo ukucita ifisuma nga ca kuti mulebalilapo ukufwailisha ifishinka fyonse ilyo mushilasalapo ica kucita. w25.01 ibu. 14 amapara. 1-3

Finshi twaishibapo pa luse lwa kwa Yehova? Bushe alanga shani ukuti “tafwaya umuntu nangu umo ukonaika”? Natulande pali bamo abacitile imembu ishikalamba abo abelele uluse. Imfumu Davidi yalicitile imembu ishikalamba ishingi, pamo nga ubucende no kwipaya. Lelo Davidi alilapiile. E ico Yehova alimubelele uluse. (2 Sam. 12:​1-12) Imfumu Manase yalicitile ifintu ifyabipa ifingi. Nangu cali ifi, Yehova alibelele Manase uluse pantu alilapiile. (2 Imila. 33:​9-16) Ifi ifyacitike fitulangilila ukuti Yehova alabelela abantu uluse nga amona ukuti nacilinga ukubabelela uluse. Akabuusha abantu ba musango uyu pantu balishibe ukuti balilufyenye kabili balilapiile. w24.05 ibu. 4 para. 12