August

Tulapepa ukuti abantu abengi baleumfwa imbila ya kusoka iyo tubila no kwisa mu kupepa ukwa sanguluka. Nomba finshi fikacitikila bonse abakaana ukukutika iyi mbila pali ino nshita? Nalimo Yehova kuti afwaya ukupususha abantu abakaaluka nga bamona ifyo Babiloni Mukalamba akonaulwa. Ifi nga e fyo cikaba ninshi nacicindama ukuti tutwalilile ukusoka abantu. Ifyo tweba abantu pali ino nshita kuti baisafibukisha pali iyo nshita. (Linganyeniko Esekiele 33:33) Nalimo bakebukisha ifyo twalebasoka kabili bakafwaya ukutendeka ukulabombela Yehova pamo na ifwe ilyo kucili inshita. Nga filya fine fyacitile uwalelinda icifungo mu Filipi uwa-alwike ilyo kwapitile “icinkukuma icikalamba,” bamo abo tusoka pali ino nshita nalimo bakaaluka nga bamona ifyo Babiloni Mukalamba akonaulwa.—Imil. 16:​25-34. w24.05 ibu. 17 amapara. 9-10

Ku fyo umutumwa Paulo alembeele abena Korinti tulasambililako isambililo na limbi ilyacindama. Bamo balilekele ukukula mu fya kwa Lesa ica kuti na kabili balekabila “umukaka, te fya kulya ifyakosa iyo.” (Heb. 5:12) Tabalesambilila ifipya ifyo Yehova alebasambilisha ukupitila mu cilonganino cakwe. (Amapi. 4:18) Ku ca kumwenako, Abena Kristu abaYuda abengi balefwaya abantu batwalilile ukukonka Amafunde ya kwa Mose, nangu ca kuti palipitile imyaka nalimo 30 ukutula apo aya Amafunde yalekele ukubomba ilyo Kristu aituulile icilubula. (Tito 1:10) Onse uwabelengapo ili ibuuku ilyo Lesa alengele ukuti Paulo alembe, kuti amona ukuti muli ili ibuku mwaliba ifya kulya fya ku mupashi ifyakosa. Iyi kalata yalilengele bamona ukuti inshila iipya iya kupepelamo Lesa iyo Yesu abikileko, yaliwemepo. Kabili iyi kalata yalengele baba abashipa pa kuti batwalilile ukubila imbila nsuma.—Heb. 10:​19-23. w24.04 ibu. 6 para. 15

Ukutula fye apo Adamu na Efa basalilepo ukuba ku lubali lwa kwa Satana, bapondokela na Yehova Lesa, abantu abengi nga nshi balifwa. Finshi fikacitika kuli bonse abafwa? Abantu abali 144,000, e kutila abasambi ba kwa Kristu aba cishinka bakabuushiwa no kuya ku muulu kabili bakabapeela umweo uushingafwa. (Ukus. 14:1) Kabili abaume na banakashi abengi nga nshi aba cishinka abatemenwe Yehova bakaba pa “abalungama” abakabuushiwa. Lyena nga batwalilila aba cishinka mu myaka 1,000 ilyo Kristu akalateka na lintu bakeshiwa pa muku wa kulekeleshako, bakekala umuyayaya pano pene pe sonde. (Dan. 12:13; Heb. 12:1) Na kabili muli iyi imyaka 1,000 “abashalungama” e kutila abantu abashalebombela Yehova kabili “abalecita ifyabipa,” bakakwata ishuko lya kwalula imibele yabo pa kuti bengaba ababomfi ba kwa Yehova aba cishinka. (Yoh. 5:29; Luka 23:​42, 43) Lelo abantu bamo ilyo bashilafwa balecita ifyabipa sana ica kuti Yehova asalapo fye ukuti takababuushe.—Luka 12:​4, 5. w24.05 ibu. 2 para. 3; ibu. 5 para. 15; ibu. 6 para. 17

Onse uulefwaya ukuba cibusa wa kwa Yehova afwile ‘ukulalanda icine mu mutima wakwe.’ (Amalu. 15:2) Ici tacipilibula fye ukuti tafwile ukulabepa. Yehova afwaya tuleba aba cishinka mu fyo tulanda na mu fyo tucita. (Heb. 13:18) Ici calicindama “pantu Yehova amona uwa bucenjeshi ukuti wa bunani, lelo abalungama e baba sana ifibusa fyakwe.” (Amapi. 3:32) ‘Abalanda icine mu mitima yabo’ tabacita kwati balakonka amafunde ya kwa Lesa nga bali na bantu, e lyo balapula mu mafunde ya kwa Lesa nga ca kuti bali beka. Te ncenjeshi. Umuntu incenjeshi kuti atampa ukutontonkanya ukuti amafunde ya kwa Yehova yamo tayawama. (Yako. 1:​5-8) Te kuti aleumfwila Yehova mu fintu ifyo umwine alemona ukuti tafyacindama sana. Lyena, nga ca kuti mu fyo alecita tamufumine ifyabipa, kuti atampa no kucita ifyabipisha. Umuntu wa musango uyo nangu ca kutila kuti alamona kwati alebombela Lesa, Lesa te kuti atemwe ifyo amubombela. (Luk. Mil. 8:11) Lelo ifwe tufwaya ukuba aba cishinka muli fyonse. w24.06 ibu. 10 amapara. 7-8

Abantu ba kwa Yehova balitemwa icine icaba mu Cebo ca kwa Lesa. Icine e calenga tukwate icitetekelo. (Rom. 10:17) Twalishininkisha ukuti Yehova e wabikako icilonganino ca Bena Kristu pa kuti cibe ‘uluceshi kabili ciletungilila icine.’ (1 Tim. 3:15) Ico Satana afwaisha ca kuti twaleka ukucetekela Baibo nelyo twaleka ukucetekela ifyo icilonganino ca kwa Lesa citweba. (Efes. 4:14) Nomba line, Satana Kaseebanya ali no kubepa inko shonse ubufi pa kuti shikemine Yehova. (Ukus. 16:​13, 14) Twalishiba no kuti Satana ali no kwesha na maka yonse ukulufya abantu ba kwa Yehova. (Ukus. 12:9) E mulandu wine tulingile ukwishibila ubupusano bwaba pa cine no bufi e lyo no mulandu tulingile ukulakonkela icine. (Rom. 6:17; 1 Pet. 1:22) Pa kuti tukapusuke ubucushi bukalamba, tukakabila ukulakonka icine. w24.07 ibu. 8 amapara. 1-3

Ilyo Yehova alengele abena Israele baba uluko, alipangene nabo icipangano. Yehova abalaile ukuti, nga bakalakonka amafunde yakwe ali no kulabacingilila no kulabapaala. Lelo nga bamupondokela, ku ca kumwenako batendeka ukupepa balesa bambi, ali no kuleka ukubapaala kabili bali no kulacula. Lelo ici tacilolele mu kuti Lesa ali no kubalabako, alibasuminishe ukubwelela kuli ena no kulamumfwila. (Amala. 30:​1-3, 17-20) Mu nshila imbi kuti twatila, bali no kulapila. Nga ca kuti balapila, Yehova ali no kupalama kuli bena kabili ali no kubapaala na kabili. Libili libili abantu ba kwa Yehova balemupondokela. Ifi fyalengele balecula. Lelo Yehova alitwalilile fye ukwafwa abantu bakwe pa kuti batendeke ukumubombela na kabili. Pa miku iingi aletuma bakasesema ukuya mukweba abantu bakwe ukuti balapile kabili babwelele kuli ena.—2 Isha. 17:​13, 14. w24.08 ibu. 9 para. 4-5

Abena Kristu abaHebere abaleikala mu Yerusalemu na mu Yudea balikwete amafya ayengi pa numa ya mfwa ya kwa Yesu. Ilyo icilonganino ca Bena Kristu capangilwe fye, Abena Kristu balitendeke ukubacusha sana. Lyene ilyo papitile imyaka nalimo 20, abasambi ba kwa Kristu baliculile sana pa mulandu wa cipowe no bupiina ifyali mu calo. (Imil. 11:​27-30) Na lyo line, nalimo mu 61 ninshi Yesu alibwelelamo ku muulu, Abena Kristu tabalebacusha sana nga kulinganya ku fyo bali no kulabacusha ku ntanshi. Pali iyi ine nshita, Yehova alengele umutumwa Paulo abalembela kalata. Ifyali muli iyi kalata fyalengele baipekanye ku mafya ayo bali no kukwata ku ntanshi. Kalata umutumwa Paulo alembeele abaHebere yalilingile pantu tapali no kukokola bali no kutendeka ukubacusha. Ifyo Paulo afundile Abena Kristu fyali no kulenga bashipikishe amacushi bali no kukwata. w24.09 ibu. 8 amapara. 1-2

Nga tulecula, aba bwananyina balatusansamusha nga ca kuti batutandalila kabili nga ca kuti balekutika ilyo tulebalondolwela ifyo tuleumfwa. Nga baisa, kuti batubelengelako ilembo ilingatukoselesha nelyo batupepelako. (Rom. 15:4) Inshita shimo, munyinefwe nelyo nkashi kuti atwibukishako ifyo Yehova alemona ubwafya tukwete, kabili ici kuti calenga twatwalilila ukushipikisha. Aba bwananyina balatwafwa mu nshila na shimbi, pamo nga ukutupeelako ifya kulya nga natukwata amafya. Pa kuti aba bwananyina batwafwe, inshita shimo tufwile ukubeba amafya tukwete. (Amapi. 17:17) Nga tatubebele, te kuti beshibe ifyo tuleumfwa nelyo ifyo tulekabila. (Amapi. 14:10) Kuti mwaebako ifibusa fyenu ifyo muleumfwa. Bebeni ifyo mulefwaya ukuti bamwafwe. Kuti mwaebako eluda umo nelyo babili abo cingamwangukila ukwebako. Bankashi bamo basanga ukuti balasansamuka nga ca kuti balandako na nkashi umukalamba mu fya kwa Lesa. w24.10 ibu. 10 amapara. 15-16

Abantu abengi balalya ifya kulya ifisuma kabili balatukushako imibili pa kuti bengekalako imyaka iingi. Lelo kwena balishiba ukuti te kuti bekale umuyayaya. Balishiba ukuti takwaba umuntu uwingekala umuyayaya pantu umuntu nga akota alakwata amafya. Lelo pali Yohane 3:16 na Yohane 5:​24, Yesu atile abantu kuti baikala “umuyayaya.” Bushiku bumo Yesu alicitile icipesha amano pa kuti aliishe abantu abengi umukate ne sabi. Lelo ifyo alandile ubushiku bwakonkelepo fyalipeseshe sana abantu amano. Abantu abengi balimukonkele ku Kapernahumu mupepi no lulamba lwa bemba wa Galili, kabili kulya abebele ukuti abantu bali no kubuushiwa kabili bali no kukwata umweo wa muyayaya. (Yoh. 6:​39, 40) Amashiwi ayo Yesu alandile yalangilila ukuti abantu abengi kuti babuushiwa kabili yalangilila no kuti imwe na bantu benu kuti mwakwata umweo wa muyayaya. w24.12 ibu. 8 amapara. 1-2

Lipoti ya nomba line iya kabungwe ka World Health Organization yalandile ukuti abalume abengi balapuma abena mwabo, balabasaalula kabili balabacusha. Umwaume uucita ifi, kuti alelanga kwati alacindika umukashi nga bali pa bantu, lelo ilyo bali ku ng’anda alamucusha. Cinshi cilenga abalume bamo ukulacusha abena mwabo? Bamo nalimo ni co bashibo bali bankalwe. Kanshi bamona ukuti caliba fye bwino ukucusha abena mwabo. Bambi icilenga balecusha abena mwabo mulandu wa ntambi isho bakonka. Bamona ukuti nga balecusha abena mwabo ninshi e baume bene bene. Abaume bambi tababasambilishe ifya kulama ubukali. Bamo balatamba sana ifye shiku. Ifi bacita filenga balemona abanakashi kwati bakupwishishako fye insuuna. Na kabili amalipoti yalanga ukuti ubulwele bwa COVID-19 bwalilenga aya mafya ukukulilako. Na lyo line, ifi tafilenga umwaume akwata insambu sha kulacusha umwina mwakwe. w25.01 ibu. 8 amapara. 2-3

“Uletemwa Yehova Lesa obe no mutima obe onse, no mweo obe onse, na maka yobe yonse, no kutontonkanya kobe konse.” (Luka 10:27) Yesu alilandile ukuti ili lyali e funde ilyacindamishe pa Mafunde yonse aya kwa Mose. Aya mashiwi yapilibula ukuti tulingile ukutemwa Yehova no mutima wesu onse, e kutila, ifyo tufwaya ne fyo tumfwa. Na kabili nga twalitemwa Yehova no mutima wesu onse, ninshi tulingile ukumubombela no mutima wesu onse na maka yesu yonse. Lelo tulingile ukutemwa Yehova na mu fyo tutontonkanya, e kutila, ifyo tumona ifintu. Kwena te kuti twishibe fyonse ifyo Yehova atontonkanya. Lelo kuti twaishiba bwino ifyo Lesa atontonkanya nga tulesambilila pa fyo “Kristu atontonkanya” pantu Yesu atontonkanya sana nge fyo Wishi atontonkanya.—1 Kor. 2:16. w25.03 ibu. 8 para. 1

Yesu ali mwaume uwapwililika, nga filya fine umwaume wa kubalilapo Adamu ali ilyo ashilabembuka. (1 Kor. 15:45) E ico pa mulandu wa kuti Yesu alitufwilile, alilipiile amalipilo yalekabilwa pa kuti ubumi ubo Adamu na Efa bapanishe bubwele. (Rom. 5:19) E ico Yesu aishileba “Adamu wa kulekelesha.” Fwe bantunse tatukabila umuntu na umbi uwapwililika uwa kutulipililako icilubula na kabili pa bumi ubo Adamu apanishe. Yesu afwilile “umuku wa limo.” (Heb. 7:27; 10:12) Nomba bushe bupusano nshi bwaba pa cifuta mulandu ne cilubula? Icifuta mulandu fintu Lesa acita pa kuti fwe bantunse twingaba ifibusa fyakwe na kabili. Icilubula malipilo ayo Lesa alipiile pa kufutilako fwe bantunse imembu. Umulopa wa kwa Yesu uo atuulile umwine pa mulandu wesu, e wimininako amalipilo ayo Lesa alipiile.—Heb. 9:14. w25.02 ibu. 5 amapara. 12-13

Nga tuleibukisha ukuti Yehova e ko aba tukeshiba ifyo tulingile ukulamona amesho ayo tukwata. Nga twakwata amesho tulingile ukubika amano ku cintu icacindama pali fyonse. Satana atila nga twakwata amafya kuti twaleka ukubombela Yehova. Kanshi ifyo tucita nga twakwata amesho filakuma ifyo Yehova omfwa. (Yobo 1:​10, 11; Amapi. 27:11) Lelo nga twatwalilila aba cishinka kuli Yehova na lintu tukwete amafya, tulanga ukuti twalitemwa Yehova kabili tulenga caishibikwa ukuti Satana Kaseebanya wa bufi. Bushe ubuteko bulamucusha pa mulandu wa kuti muli Nte ya kwa Yehova? Bushe tamulekwata indalama? Bushe abo mubilako imbila nsuma tabakutika, nelyo bushe namukwata ubwafya bumbi? Nga ca kuti ifi twalandapo e fyo cili, muleibukisha ukuti amafya ya musango uyu, yalalenga mwakwata inshita ya kulenga Yehova alasekelela. Muleibukisha no kuti, Yehova takaleke mukakwate ubwesho ubo mushingashipikisha. Akamupeela amaka ya kushipikisha amesho. w24.06 ibu. 22 para. 9

Bushe mwalishiba ifintu ifyo mutunkwamo sana? Tacawama ukulaibepa ukuti tatwakwata ubunake nelyo ukulamona ukuti te kuti tucite ulubembu. (1 Yoh. 1:8) Na kuba, na Paulo alilandile ukuti, na “bafikapo ukulingana na maka ayo umupashi upeela,” kuti batunkwa ukucita ifyabipa nga tabacenjele. (Gal. 6:1) Tufwile ukusumina ukuti kwaliba fimo ifyo twingatunkwamo. (2 Kor. 13:5) Finshi tufwile ukucita nga twaishiba ifintu ifyo tutunkwamo sana? Tufwile ukuibikilishako pa kuti twingalacimfya amatunko! Natulangilile: Mu nshita balelemba Baibo, pa mpongolo ya musumba e po caleangukila sana abalwani ukwingila mu musumba. E co pa mpongolo balebikilapo aba kulinda umusumba abengi. Na ifwe tulingile ukubika sana amano ku fintu ifyo twaishiba ukuti e fyo twingatunkwamo sana.—1 Kor. 9:27. w24.07 ibu. 15 amapara. 5-7

Mu mulimo onse uusuma, uo balandilepo mwi lembo lya bushiku bwa lelo, mwaba no kulabila imbila nsuma. E ico nga tulebelenga Icebo ca kwa Lesa kabili tuletontonkanya pa fyo tulebelenga, tulacetekela sana Yehova kabili tulamona ukuti ukubila imbila ya Bufumu kwalicindama sana. Pa kuti tulenonkelamo sana mu kubelenga Icebo ca kwa Lesa, tufwile ukuteka umutima ilyo tulecibelenga, ilyo tuleisambilisha, na lintu tuletontonkanyapo sana pa fyo tulebelenga. Tulingile ukutekanya ilyo tulecita ifi fyonse. Nga ca kuti mwabelenga ilembo ilyo mushumfwikishe tamufwile ukupitapo fye. Lelo mufwile ukufwailapo ifyebo mu Icisontelelo ca Mpapulo sha Watch Tower nelyo mu Icitabo ca Kwafwa Inte sha kwa Yehova Ukusanga Ifyebo pa kuti mwishibe ifyo balondolola ilyo ilembo. Nga namuteka umutima ilyo muleisambilisha mukashininkisha sana ukuti ifyo Icebo ca kwa Lesa cilanda fya cine. (1 Tes. 5:21) Nga namushininkisha ukuti ifyo Icebo ca kwa Lesa cilanda fya cine, mukalafwaisha ukulaebako abantu. w24.04 ibu. 15 amapara. 4-5

Davidi alandile ati: “Mwe Yehova muli basuma kabili mwali-iteyanya ukwelela.” (Amalu. 86:5) Mika alembele ati: “Ni Lesa nshi uwaba nga imwe, uusuula ku filubo kabili uwelela imembu?” (Mika 7:18) Esaya na o alandile ati: “Umubifi naleke ukucita ifyabipa kabili uucita ifyabipa, naleke ukutontonkanya ifyabipa; nabwelele kuli Yehova, uukamubelela uluse, nabwelele kuli Lesa wesu pantu akamwelela nga nshi.” (Esa. 55:7) Pa kuti aba mu cilonganino ca mu Korinti bapashanye Yehova, balingile ukupokelela umwaume uwalapiile mu cilonganino no kumulanga ukuti balimutemenwe. Filya aba mu cilonganino bakonkele ifyo babebele, balangile ukuti “ba cumfwila mu fintu fyonse.” Kwena papitile fye imyeshi iinono ukutula apo bamufumishe mu cilonganino, lelo filya bamufumishe mu cilonganino fyalengele alapila. Kanshi apo alilapiile, tabalingile ukukokola ukumubwesha mu cilonganino. w24.08 amabu. 17-18 amapara. 12-13

Tuleikala mu nshita umo ifintu ifikalamba fili no kucitika! Nomba line Yesu ali no kupingula abantu bonse pano isonde. Yesu alyebele abasambi bakwe icishibilo ca fintu ifyali no kulacitika ilyo ashilapingula abantu bonse pano isonde. Alibebele ifintu ifyo bali no kwishibilako ukuti ‘e po ali’ no kuti “icalo cili ku mpela.” (Mat. 24:3) Ifi abebele fyaba muli Mateo icipandwa 24 ne cipandwa 25 kabili fyaba na muli Marko icipandwa 13 na muli Luka icipandwa 21. Yesu abomfeshe ifilangililo fitatu pa kuti twingaipekanya kabili cali kwati aletusoka muli ifi filangililo. Muli ifi filangililo, Yesu alandile pa mpaanga ne mbushi, pali banacisungu aba mano na bawelewele, e lyo na pa matalanti. Cila cilangililo cilenga twaishiba ukuti Yesu akapingwila umuntu pa fyo acita. w24.09 ibu. 20 amapara. 1-2

Tontonkanyeni pali Yesu uo tufwile ukulapashanya sana. Icalelenga alecita fyonse ifyo alecita, ni co alitemenwe Wishi na bantu. Ukutemwa atemenwe Wishi na bantu kwalengele alebombesha kabili alebomba ne milimo iyo abantu bamona ukuti ya panshi. (Mat. 20:28; Yoh. 13:​5, 14, 15) Bamunyinefwe, nga ca kuti ukutemwa e kwalenga mufwaye ukuba umubomfi utumikila, Yehova akamwafwa pa kuti mukafikepo ukubombako imilimo mu cilonganino ca kwa Yehova, pamo nga ukuba umubomfi utumikila. (1 Pet. 5:5) Muli cino calo, abantu balakumbwa abantu abaimona ukuti balicindama. Lelo ifi te fyo caba mu cilonganino ca kwa Yehova. Uwa bwananyina uwatemwa abantu nge fyo Yesu abatemenwe, tamona ukuti afwile ukukwata icifulo ca pa muulu nelyo abantu balemumona ukuti alicindama. Nga ca kuti umuntu uufwaya ukuti abantu balemumona ukuti alicindama ukucila bambi bamusonta ukuba umubomfi utumikila mu cilonganino, nalimo kuti alakaana ukubombela abantu ba kwa Yehova imilimo iimoneka ukuti ya panshi. Kuti alamona ukuti alicindama sana tafwile ukubomba imilimo ya musango uyu.—Yoh. 10:12. w24.11 ibu. 15 amapara. 6-7

Mwi sonde lyonse tulekabila bamunyinefwe abengi aba kubomba imilimo mu cilonganino. (Efes. 4:8) Nga mwalibatishiwa, bushe kuti mwaitemenwa ukubombako? (Amapi. 3:27) Bushe kuti mwaitemenwa ukuba umubomfi utumikila? Bushe kuti mwaipeelesha ukuba eluda? Bushe kuti mwa-alulako fimo pa kuti mukepushe nga kuti mwaya kwi Sukulu lya Bakabila ba Bufumu? Muli ili sukulu mukasambilila ifikalenga Yesu akamupeelelepo imilimo na imbi. Nga mulemona ukuti tamufikilepo, pepeni kuli Yehova. Mulemulomba umupashi wakwe uwa mushilo pa kuti ulemwafwa, mulebomba bwino imilimo yonse iyo bamupeela. (Luka 11:13) Ifyo bamunyinefwe abo Yesu asonta ukuba “ifya bupe” babombesha filangilila fye ukuti Yesu alatutungulula muli shino nshiku sha kulekelesha. (Mat. 28:20) Bushe tatutasha pa kukwata Imfumu iyaba no kutemwa, iyaba na bukapekape, iyatubikako amano, kabili iyatupeela bamunyinefwe abatwafwa? w24.10 ibu. 23 amapara. 16-17

Nomba finshi twingalanda pa fintu ifilenga abantu ba kwa Lesa balecula kabili balekalipwa? Mu kulekelesha ifi fyonse ‘fikalabwa kabili fikafiswa ku menso ya kwa Lesa.’ (Esa. 65:16) Yehova akafumyapo amafya yonse ayo tukwata kabili tukasuka tukalabe ifyo twaleumfwa pa mulandu wa aya amafya. Na pali ino ine nshita, nga tulelongana na Bena Kristu banensu tatusakamana nangu cimo kabili tatubika amano ku fintu fya muli cino calo cabipa ifilenga tulesakamikwa. Tulalenga bamunyinefwe na bankashi bateka imitima nga ca kuti tulelanga imibele iyaba pa fisabo fya mupashi wa mushilo e kutila, ukutemwa, ukusekelela, umutende, icikuuku, no kufuuka. (Gal. 5:​22, 23) Tulatasha sana ifi twaba mu cilonganino ca kwa Lesa! Bonse abatwalilila ukuba muli paradaise ya ku mupashi bakamonako ilyo Lesa akaleta “imyulu ipya ne sonde lipya” ifyo atulaya. w24.04 ibu. 22 amapara. 9-10

Nangu ca kuti abaleishishanya balaba ne nsansa, balingile ukwishiba ukuti ukwishishanya kwalicindama pantu kuti kwalenga basalapo ukuupana. Pa bushiku bwa bwinga, abaleupana balalapa pa menso ya kwa Yehova ukuti bakatwalilila ukutemwana no kucindikana mpaka ne mfwa. Tulingile ukutontonkanyapo sana ilyo tushilalapa umulapo uuli onse. Ifi fine e fyo caba na ku mulapo wa cupo. Ukwishishanya kulalenga abalefwaya ukuupana baishibana bwino ilyo bashilasalapo nampo nga kuupana nelyo iyo. Inshita shimo kuti basalapo ukuupana nelyo kuti basalapo ukuleka ukwishishanya. Abaleishishanya nga basalapo ukuleka ukwishishanya, tacipilibula ukuti pali ifyo balufyenye. Lelo cipilibula fye kuti ukwishishanya kwalilenga baishiba nampo nga kuti baupana nelyo iyo. Mulandu nshi cacindamina ukwishiba ico kwabela ukwishishanya? Abashimbe nga baishiba ico kwabela ukwishishanya, te kuti batendeke ukwishishanya no muntu uo bashilefwaya ukuupa nelyo ukuupwako. w24.05 amabu. 26-27 amapara. 3-4

Abena Kristu bacaice nalimo kuti cabakosela ukulondolwela abantu ifyo basuminamo. Nalimo kuti balatiina ukulanda ukuti tabasumina mu cisambilisho ca kuti ifintu fyonse fyasangwike fye. Cinshi cingalenga balatiina? Bakafundisha wabo kuti babeba ukuti ici cisambilisho ca cine. Nga ca kuti muli bafyashi, kuti mwacita shani pa kuti umwana wenu ashininkishe ukuti ico asuminamo e cine? Mulemwafwa ukwishiba ukuti talingile ukulaumfwa insoni pa mulandu wa kuti alishiba ukuti kwaliba uwabumbile ifintu fyonse. Mulandu nshi ashilingile ukulaumfwila insoni? Icishinka ca kuti, na basayantisti abengi balisumina ukuti ifintu tafyasangwike fye. Aba basayantisti balimona ubushininkisho bwa kuti kwaliba uwa mano sana uwabumbile ifintu fyonse ifipeema ifyapikana. Ifi baishiba, fyalenga besumina mu cisambilisho ca kuti ifintu fyonse fyasangwike fye. Cimo icingalenga umwana wenu ashininkisha ukuti ifyo asuminamo e cine, kwishiba icalengele bamunyinefwe na bankashi basumina ukuti kwaliba uwabumbile ifintu fyonse. w24.12 ibu. 18 amapara. 14-15

Yesu alicetekele ukuti abantu bamo abo alebilako imbila nsuma bali no kulakutika. Ici calengele atwalilile ukuba uwacincila ilyo alebila imbila nsuma. Ku ca kumwenako, ku kupwa kwa mwaka wa 30, Yesu alimwene ukuti abantu abengi balefwaya ukumfwa imbila nsuma, kabili abalingenye ku fisabo ifipiile mwi bala. (Yoh. 4:35) Ilyo papitile nalimo umwaka umo, aebele abatumwa bakwe ukuti “umulimo wa kulobolola ukalamba.” (Mat. 9:​37, 38) Inshita imbi alandile ati: “Umulimo wa kulobolola ukalamba. . . . Lombeni Umwine wa mulimo wa kulobolola ukuti atume ababomfi mu mulimo wakwe.” (Luka 10:2) Yesu alitwalilile ukucetekela ukuti abantu bamo bali no kumfwa imbila nsuma kabili alesekelela nga basumina ukukutika. Yesu asambilishe abasambi bakwe ukuti balingile ukucetekela ukuti abantu kuti bafwaya ukumfwa imbila nsuma, kabili ifi abasambilishe fyali no kulenga batwalilila ukuba abacincila. w25.03 amabu. 18-19 amapara. 15-16

Yehova cubo. Nga kuli imfula iikalamba umuntu kuti acingililwa nga ca kuti ali mu lucengo, ifi fine e fyo Yehova atucingilila nga ca kuti natukwata amafya. Alatwafwa pa kuti twingacingilila bucibusa bwesu na ena. Kabili alitulaya ukuti amafya ayo tukwata pali ino nshita yakapwa. Alitulaya no kuti ali no kufumyapo fyonse ifilenga twilaba no mutende ne filenga twilaba abacingililwa. (Esek. 34:​25, 26) Cimo ico twingacita pa kuti Yehova abe Icubo cesu kulapepa kuli ena. Nga twapepa, Yehova alatupeela “umutende wa kwa Lesa” uulinda imitima yesu na matontonkanyo yesu. (Fil. 4:​6, 7) Yehova takabale atusha. Kuti twamucetekela pantu “Cilibwe ca muyayaya.” (Esa. 26:​3, 4) Nangu cibe shani akafikilisha ifyo atulaya, akalakutika amapepo yesu, kabili akalatwafwilisha ilyo tulekabila ubwafwilisho. Kabili kuti twacetekela Yehova pantu wa cishinka ku babomfi bakwe. (2 Sam. 22:26) Takalabe ifyo tumubombela kabili akatulambula.—Heb. 6:10; 11:6. w24.06 ibu. 27 amapara. 4-6

Ifya kuleseshamo icitendwe ifyabipa ne fibusa ifyabipa, kuti fyalenga twafilwa ukubombela Yehova no mutima wesu onse. Na kabili tulingile ukuba abacenjela pa kuti tatulemona ukuti indalama e cintu icacindamisha. Nga twamona ukuti kuli ifilelenga twaleka ukutemwa Yehova nge fyo twamutemenwe pa kubala, tulingile ukucitapo cimo ilyo line fye. (Mat. 5:​29, 30) Tatufwile ukuleka icintu nangu cimo calenga twafilwa ukubombela Yehova no mutima wesu onse. Kuti twalatontonkanya ukuti takuli nangu cimo icingalenga twacita ifyabipa pa mulandu wa kuti tulabombesha mu mulimo wa kwa Lesa. Natulangilile, nga ca kuti tulepyanga mu ng’anda, bushe kuti twaisula ifiibi na mawindo ica kuti ifiko fyaingilamo na kabili? Awe. Cinshi tulelandapo? Tatulingile ukupelela fye pa kulya ifya kulya fya ku mupashi ifilenga twatwalilila ukuba ifibusa fya kwa Yehova. Nga filya fine tushingafwaya ifiko fyaingila mu ng’anda umo tulepyanga, e fyo tushilingile ukuleka icintu nangu cimo icabipa caingila mu mutima wesu ica kuti twaleka no kubombela Yehova no mutima wesu onse.—Efes. 2:2. w24.07 ibu. 21 amapara. 6-7

Kuti twafilwa no kwelenganya ubukali aleumfwa, ifyo aseebene e lyo ne fyo bamufyengele. Nalyo line, alitwalilile ukuba ne cishinka kuli Yehova nangu ca kuti balimufyengele sana. Yesu tapepele kuli Wishi ukuti akande abashilika abalemupoopela pa cimuti, lelo atile: “Mwe Tata, mubabelele uluse, pantu tabeshibe ifyo balecita.” (Luka 23:34) Nga twapepelako abatucusha, tukaba abatekanya, tatwakakalipe sana kabili tatwakatwalilile ukubafulilwa. Apo tuleikala muli cino calo cabipa, kuti batufyenga inshita iili yonse. Lelo nangu batufyenge shani, twikaleka ukulomba Yehova ukuti atwafwe. Na kabili tulingile ukulacita ifyo Yesu alecita ilyo balemucusha. Tulingile no kulakonka ifyo tusambilila mu Cebo ca kwa Lesa. Nga tulecita ifi, Yehova akalatupaala.—1 Pet. 3:​8, 9. w24.11 ibu. 6 para. 16; ibu. 7 amapara. 17, 19

Yehova tafwaya abantu balecita ifyabipa; alipata ulubembu. (Amalu. 5:​4-6) Afwaya ukuti tulekonka amafunde yakwe ayalungama ayaba mu Cebo cakwe. Kwena Yehova tenekela abantu abashapwililika ukulamumfwila nge fyo bengamumfwila nga bali abapwililika. (Amalu. 130:​3, 4) Na lyo line, tatekelesha ‘abantu abashimutiina, abasangula icikuuku cakwe ukuba akabepekesho ka kucitilamo ifya nsoni.’ (Yuda 4) Na kuba Baibo itila Lesa “akonaula abantu abashipepa” mu nkondo yakwe iya armagedone. (2 Pet. 3:7; Ukus. 16:16) Na lyo line, Yehova tafwaya umuntu nangu umo akonaike. Baibo ilanda ukwabula ukupita na mu mbali ukuti Lesa “afwaya ukuti bonse bakalapile.” (2 Pet. 3:9) Baeluda balaba abatekanya nga filya Yehova aba ilyo baleafwa uwacitile ulubembu pa kuti aaluke, abwelele na kuli Yehova. w24.08 ibu. 26 amapara. 1-2

Nga filya fine Yehova acita, na ifwe bene kuti tulepeelako abantu ifyo balekabila pa mulandu wa kuti twalibatemwa. Ku ca kumwenako, bushe mwalishibako munyinefwe nelyo nkashi uulekabila ifya kulya nelyo ifya kufwala? Yehova kuti ayafwa uyo uwa bwananyina ukupitila muli imwe. Na kabili abantu ba kwa Yehova balangufyanya ukwafwa abantu nga kwacitika amasanso ayakalamba. Ku ca kumwenako, ilyo kwali icikuko ca COVID-19, bamunyinefwe na bankashi balepeela abantu abalekabila ifya kulya, ifya kufwala, ne fintu fimbi. Aba bwananyina abengi balesangwila na ku mulimo wa mwi sonde lyonse. Ifyo balesangula, fyaleafwilisha aba bwananyina icalo conse ilyo kwali icikuko. Balekonka ifyo Baibo ilanda pa AbaHebere 13:​16, apatila: “Mwilalaba ukucita ifisuma kabili mulepeelako abanenu ifyo mukwete, pantu amalambo ya musango uyu yalalenga Lesa asekelela.” w24.09 ibu. 27 amapara. 6-7

Natulande pa ca kumwenako cimo. Tutile mulefwaya incito pa kuti mwingalasakamana ulupwa lwenu. Nomba kwamoneka incito shibili. Mwatontonkanya pa fishinka fyonse, pamo nga ifyo incito yaba, ifyo imibombele yaba, inshita mukalapoosapo pa kufika pa ncito e lyo ne fishinka fimbi. Mwasanga ukuti ishi ncito shonse shibili, Umwina Kristu kuti abomba. Nalimo kuti mwasalapo incito imo pantu namuitemwa nelyo pantu mukalafola indalama ishingipo. Lelo kwaliba na fimbi ifyo mulingile ukutontonkanyapo ilyo mushilasalapo incito mwingalabomba. Ku ca kumwenako, bushe iyi incito ikalalenga mulefilwa ukulaya mu kulongana? Bushe ikalalenga mwikalakwata inshita ya kuba pamo na ba mu lupwa lwenu pa kuti baleumfwa ukuti balicingililwa, baliba ne nsansa, kabili fibusa fya kwa Yehova? Nga mwalayipusha amepusho ya musango uyu, mukalabika sana amano ku “fyacilapo ukucindama” e kutila, bucibusa bwenu na Yehova na ku fyo ulupwa lwenu lukabila, ukucila ukulabika fye amano ku kukwata indalama ishingi. Lyena kuti mwasalapo incito iingalenga Yehova amupaala. w25.01 ibu. 17 amapara. 11-13

Nangu ca kuti bamo balamucusha, kuti mwacetekela ukuti Yehova alimutemwa kabili amumona ukuti mwalicindama. Nga muli no bulanda, muleibukisha ukuti Yehova alimona ifisuma ifyaba mu mutima wenu kabili alilenga mwapalama kuli ena. (Yoh. 6:44) Lyonse ali-ipekanya ukumwafwa pa mulandu wa kuti alimutemwa. Kuti twaishiba ifyo Yehova omfwa nga ca kuti twaishiba ifyo Yesu alecita. Ilyo Yesu ali pano isonde, ali ne cikuuku sana ku bantu abaleumfwa ukuti tabacindeme pa mulandu ne fyo abantu balebamona. (Mat. 9:​9-12) Ilyo umwanakashi uwalwele ubulwele ubwabipisha aikete ica kufwala cakwe, pantu alemona ukuti ali no kupola, Yesu alimusansamwishe kabili alimutashishe pa citetekelo cakwe. (Marko 5:​25-34) Yesu alepashanya sana Wishi. (Yoh. 14:9) Kanshi kuti mwacetekela ukuti Yehova amumona ukuti mwalicindama, alamona imibele yenu iisuma, ukubikako fye ne citetekelo cenu ne fyo mwamutemwa. w24.10 ibu. 7 amapara. 4-5

Davidi alekwata amafya ayengi ayalelenga alelila. Abantu abengi balimupatile kabili na bantu abo acetekele balimupondokele. (1 Sam. 19:​10, 11; 2 Sam. 15:​10-14, 30) Inshita imo alembele ati: “Ninaka pa mulandu wa kuteta kwandi; ubushiku bonse ifilamba fyandi filabomfya apo ndaala; pa cipuna apo njikala paba fye ifilamba fyeka fyeka.” (Amalu. 6:6) Nangu ca kuti Davidi alekwata amafya ayakalamba, alishininkishe ukuti Yehova alimutemenwe. Alembele ati: “Yehova akomfwa ishiwi lya kulila kwandi.” (Amalu. 6:8) Amashiwi yali mwi lembo lyesu yalalangilila bwino bwino ukuti Yehova alitutemwa sana kabili alabika amano ku fyo tumfwa. Davidi aleumfwa kwati Yehova alebula ifilamba fyakwe, alefibika mwi botolo nelyo kwati alefipenda, e lyo alefilemba mwi buuku. Davidi alishininkishe ukuti Yehova alemona ifyo alecula kabili talabile ifyo alekalipwa. Na kabili alishininkishe ukuti Wishi wa ku muulu alishibe amafya ayo alekwata kabili alishibe ne fyo aya mafya yalelenga aleumfwa. w24.12 ibu. 22 amapara. 11-12