Bakabilisha ba Bufumu Bacita Lipoti

Uwacaice Uwatemwo Kwenda na Mashitima Asambilila Icine

NGA ca kuti umutima wa muntu wakongamina ukulola ku bulungami, lyene Yehova Lesa, ukubomfya Kristu Yesu na bamalaika ba ku muulu, bakamona kuli cene ukuti umuntu wa musango yo uwapale mpaanga mu kupelako akumanishiwa ne mbila nsuma iya Bufumu. Mu nshita yalinga uyo muntu kuti pambi aisa ku kuboko kwa kwa Yesu kwa kulyo ukwa kusenamina. (Mateo 25:31-33) Ici e fyo cali ku wacaice uwatemwo kwenda na mashitima mu Austria uwaishilebeleshanya ne cine mu nshila yaibela.

Ulubali lwacilishapo kucincimusha ulwa cangalo ca uyu mulumendo lwali kunina mu ncende ya kwa kensha we shitima, mu kuba no kusuminisha kwa balashi ba mashitima. Akopele ulwendo lumo na lumo pali kamera wakwe uwa video pa kuti engatamba lwene na kabili mu ŋanda mu mwakwe. Pa bulendo aimine ukufuma ku Vienna ukuya ku Salzburg, kensha we shitima aali ni umo wa Nte sha kwa Yehova. Abomfeshe ishuko ukulanda pa lwa Bufumu kuli uyu watemwo kwenda na mashitima. Pa kutendeka umulumendo alipapile ukumfwa kensha we shitima alelanda pa lwa kwa Lesa na Baibolo, lelo mu kati ka bulendo, abikishe amano pa kumoneka kwa mpanga ukucila pa cintu kensha we shitima alesosa kuli wene.

Ilyo abwelele ku ŋanda, uyu wacaice watemwe nyendo atambile ifyo akopele pali video wakwe te limo fye lelo imiku ikumi, apantu aali uwasekelela nga nshi muli ubu bulendo. Apo ali nakopesha na mashiwi nayo, aleumfwa libili libili cintu Nte amwebele. Ilyo atambile video imiku yafulilako, aishilebeleshanya mu kucililako na cintu aebelwe. Atendeke nomba ukutontonkanya pa lwa cene, kabili mu kupelako abele uwacincimuka pa lwa fyebo fya kusungusha fyapeelwe ukufuma muli Baibolo. Afwaile ukwishiba ifyafulilako.

Aibukishe ishina lya kwa kensha we shitima kabili alishibe ukuti aleikala mu cifulo cimo mu Vienna. E co aile ku post office no kutendeka ukutinika amanambala yalekanalekana aya telefoni ayatantikwa pe samba lya ilyo ishina mu citabo ca kulangilila. Icipusho cakwe kuli abo baleasuka foni cali ca kuti: “Bushe uli kensha we shitima?” Nga icasuko cali ni iyo, aali no kufwaya inambala imbi. Mu kupelako, alisangile kensha we shitima. Amwebele lyashi lyakwe no kuti ali uwasekelela mu bukombe bwa Baibolo ubo aumfwile muli video.

Nte acitile ukutantika ukupitila mwi ofesi lya musambo pa kuti ukutandala kwingacitwa na umo uwaikele mupepi no mulumendo. Caile nkuma ukuti mu cilonganino ca cikaya, mwalimo Nte na umbi uwali na o ni kensha we shitima. Uyu kensha we shitima uwa cibili atandalile umulumendo watemwo kwenda na mashitima, kabili isambililo lya Baibolo lyalitendekwe. Mu lusuba lwa 1991, umulumendo alibatishiwe.

Yehova, uufwayafwaya mu mitima yonse, afwile alimwene ukuti uyu muntu alikwete ukutemwa kwafumaluka ukwa bulungami. Muli fyo, amulengele ukukumanya icine ca Baibolo—nangu cingatila cali ni mu nshila yaibela.—1 Imilandu 28:9; Yohane 10:27.

[Abatusuminishe Ukubomfya Icikope pe bula 9]

Ukusuminisha kwa Austrian Railways