Bakabilisha ba Bufumu Bacita Lipoti
Abantu ba kwa Lesa Balaipeela Abene mu Kuitemenwa
ISHINA lyakwe aali ni Yosefe, kabili aali mwikashi wa pa cishi ca Kupro. Aali pa kati ka Bena Kristu ba mu mwanda wa myaka uwa kubalilapo abashitishe ifilime na mayanda pa kuti bengasangwilako mu fya ndalama ku kutwala pa ntanshi ubuKristu. Pa mulandu wa mutima wakwe uwa cikabilila na bukapekape, aishileishibikwa pamo nga Barnaba, icipilibula “Umwana wa cisansamushi.”—Imilimo 4:34-37.
Ubuseko bwa musango yo ubwa cine cine muli bambi lyonse bwaliba ca kwishibikilwako ca bakapepa ba cine aba kwa Yehova. Inte sha kwa Yehova ilelo tabapusanako, nga fintu cilelangililwa ku ca kukumanya cakonkapo ukufuma ku Solomon Islands.
Ibumba lya Nte shacila 60 ukufuma ku Australia na New Zealand lyaendele ukuya ku Honiara, umusumba ukalamba uwa Solomon Islands ukupita iya Guadalcanal. Baishile mu kwaafwa ubukuule bwa Ciyanda ca Kulonganinamo ukulongana kukalamba ukwa Bwina Kristu. Cabasendele fye mupepi ne milungu ibili ukukuula icikuulwa mu kuba ne fipuna mupepi na 1,200!
Mupepi ne nshita fye imo ine, amabulashi ya cikaya aya mwi tauni linono ilya Munda, pa cishi ca New Georgia, yapeele icilonganino ca Nte sha kwa Yehova incende pa kati fye ke tauni. Balefwaya ukukuula Iŋanda ya Bufumu, icifulo ca kupepelamo. Kabili mu cine cine baleikabila. Balelonganina mu muputule wa kutuushishamo uwa kayanda kanono aka fyani, kabili tabakwete ubukumu bwa kukuulila Iŋanda ya Bufumu.a Icilonganino capangilwe ukucilisha na bakoloci na balwele e lyo na bana, kabili takwaliko uwabeleshe mu fya makuule.
Ukutalukako bakilomita 380, pa cishi ca Guadalcanal, Inte sha mu musumba wa Honiara shaipeele ishine mu kuitemenwa. (Ilumbo 110:3) Bapelulwile ukuti: “Nga ca kuti bamunyinefwe mu fyalo fimbi baliitemenwe ukutukuulila Iciyanda ca Kulonganinamo ukulongana kukalamba mu milungu ibili, lyene mu kushininkisha kuti twaafwilisha bamunyinefwe mu Munda no kubakuulila Iŋanda ya Bufumu mu milungu ibili.”
Ico e cacitike. Bushiku bumo ubwato bwabusha abantu ubwaisulamo Inte sha nsansa isha kuitemenwa kabili ishaswatuka bwafikile mu Munda. Abaume na banakashi, abakalamba na baice, bonse balifulumbene ukupatula ifipe fyabo kabili baliiteyenye ukutampa ukukuula mu kuba ne mbao, shamende, amalata ya kufimbila umutenge, ne fipe fimbi ifyafikile ku Munda ilyo bashilafika.
Mu kwangufyanya fye pa numa umulimo ube nautampa, inkuba yakulisha yalengele ukuti amenshi yaye. Nangu cibe fyo, ici tacali ni mpika ishingacimfiwa. Inte shaimbile icishima ico capayenye amenshi mu kati ka mibombele yonse iya bukuule. Ni shani pa lwa fya kulya fya babomfi bonse? Ico na co tacali ni mpika nakalya. Aba kuitemenwa ukufuma ku Honiara balituminwe ukutwala ifya kulya ifingi ukufuma ku filonganino fya ku Honiara. Baletele fye na bakepika babo abene!
Abena mupalamano batambile ubukuule mu kusunguka nga nshi. Umo uwa bene atile: “Kuno ifikuulwa tafipwa mu nshiku. Fisenda imyaka.” Umwina mupalamano na umbi, intungulushi ya butotelo, asumine ukuti icalici lyakwe lyalikuulwa pa myaka yapitapo 20 no kuti licili talilapwa. Mu kupusanako, Iŋanda ya Bufumu iipya iya Nte sha kwa Yehova mu Munda yapwishishiwe mu nshiku fye ikumi!
[Futunoti]
a Iŋanda ya fyani ipangwa ku fintu fya mu mpanga. Icimpangilile cipangilwa ne fimuti ne milando, kabili umutenge ne fibumba filafimbwa ku mabula ya tuncindu ayapikulwa mu fimuti no kubilililwa no mukunyu.
[Amamapu pe bula 24]
(Nga mulefwaya ukumona amamapu, moneni muli magazini)
Bemba wa South Pacific
SOLOMON ISLANDS
Munda
GUADALCANAL
Honiara
[Mapu]
AUSTRALIA
NEW ZEALAND