Mulandu Nshi Balonganina?

CILA mwaka Inte sha kwa Yehova isonde lyonse balalongana amakana na makana pa mabungano. Palya, balaipakisha ukubishanya no kukutika ku malyashi yashaiwamina ayashimpwa pali Baibolo. Bamo balapita mu fingi pa kusangwa kuli aya mabungano. Ku ca kumwenako, umwaka wapwile, ku Malawi abaupana babili abali ne myaka muli ba60, no mwana wabo uwali no mukashi na kanya, bacofele ncinga bakilomita 80 ku kuyasangwa kwi bungano. Bafumine pa mushi pa 6:00 hrs no kuyafika pe bungano pa numa ya maawala 15.

Ku Mozambique, ibumba limo lyacofele ncinga inshiku shitatu pa kuya kwi bungano. Pa cungulo bushiku cimo, ilyo basakile nsakwe pa nse, baumfwile inkalamo shilelila lwa mupepi. Nangu cingati batendeke ukusukusa ifishishi fya mulilo ukwabelele ifiswango, shilya nkalamo tashaile ukufikila bwaca. Nte umbi na o uwaleya kwi bungano limo line aishilefikisha fye amenso yakwe mu nkalamo pa musebo. Aiminine fye shilili ukwabula ukusunkana ukufikila ne fyo inkalamo yaile. Pe bungano aba baNte mu kucincimuka bashimike ifyo ‘bapokolwelwe ku kanwa ka nkalamo.’—2 Timote 4:17.

Inte sha kwa Yehova ishingi shilapita mu fingi pa kusangwa ku mabungano nelyo fye ku kulongana kwa cila mulungu ku kupepa. Mulandu nshi? Ifipande fikonkelepo fyalamwaafwa ukumfwikisha umulandu ukulongana capamo kwacindamina.