Tatwalekeleshiwe Ilyo Icitetekelo Cesu Caeshiwe

Vicky ali mwana umwanakashi umusuma—uwali no bumi busuma, uwayemba kabili uwa mapiki. Ilyo afyelwe muli shinde wa 1993, twali ne nsansa nga nshi. Twaleikala mu musumba unono uwa ku kapinda ka kulyo aka Sweden, kabili imikalile yali iisuma.

LELO, ilyo Vicky ali no mwaka umo ne myeshi 6, camoneke kwati ifintu nomba fyatubipila. Pa nshita iikalamba ubumi bwakwe tabwali bwino, e co twamutwele ku cipatala. Tatwakalabe ilya nshita lintu dokota atwebele ukuti umwana wesu alwele acute lymphoblastic leukemia, umusango wa kansa abana balwala ilwisha insandesande shabuuta.

Cali icakosa ukusumina ukuti umwana wesu akwete ubulwele bwabipishe fi. E lyo fye atendeke ukwishiba ifintu, kabili nomba kuti afwa. Mu kwesha ukutusansamusha, dokota atile kuti aundapwa, kabili inshila ya kundapa bengabomfya ya kusanshamo ukubomfya imiti ku kwipaya insandesande ishilwani pamo no kumubikamo umulopa uwingi. Ici cali ica bubili ukutupesha amano.

Icitetekelo Cesu Caeshiwa

Twalitemenwe umwana wesu icine cine kabili twalefwaya inshila ya kumundapilamo iyawamisha. Nalyo line ukubikwamo umulopa cali cintu tushingasumina. Twalisumina sana mu Cebo ca kwa Lesa, Baibolo, icilondolola bwino ukuti Abena Kristu bafwile ‘ukutaluka ku mulopa.’ (Imilimo 15:28, 29) Na kabili twalishibe ukuti ukubikwamo umulopa kulaletelela. Iminshipendwa balyambula amalwele no kufwa pa mulandu wa kubikwamo umulopa. Inshila fye iya kusengulwilamo yali ni nshila ya kundapilamo iisuma nga nshi iyo ishisanshamo ukubikwamo umulopa. E co, ubulwi bwesu ubwa kulwila icitetekelo bwalitendeke.

Cinshi twali no kucita? Twalanshenye na Dipartimenti Upeela Ifyebo pa fya Fipatala pe ofeshi linono ilya Nte sha kwa Yehova ilya ku Sweden ku kulomba ubwafwilisho.a Ilyo line, amafax yalituminwe ku fipatala fyalekanalekana ku Bulaya ku kufwaya icipatala na dokota uwingaitemenwa ukubomfya ukundapa kwa kubomfya imiti ku kwipaya insandesande ishilwani ukwabula ukubika umulopa. Ukupimpa no kutemwa bamunyina ba Bwina Kristu balangile mu kutwafwa fyalitukoseshe nga nshi. Tatwalekeleshiwe mu kulwila icitetekelo.

Mu nshita fye inono, balisangile icipatala na dokota mu Homburg/Saar, ku Germany. Kwali amapekanyo ya kuti twingaya ne ndeke kulya ubushiku bwali no kukonkapo pa kuti Vicky engayapimwa. Ilyo twafikile, bamunyinefwe Abena Kristu mu cilonganino ca Nte sha kwa Yehova ica mu Homburg, pamo na balupwa wesu bamo, balitupokelele. Kabili umwiminishi wa Komiti wa Kumfwaninamo ne Fipatala uwa kuli ilya ncende alitupokelele bwino. Twaile nankwe ku cipatala kabili alitwafwile nga nshi. Twalisansamushiwe ukumona ukuti na mu calo icilendo, bamunyina ba ku mupashi baletwafwa.

Ilyo twamonene na Dokota Graf pa cipatala, twalisansamushiwe na kabili. Ali bwino sana kabili atulaile ukuti ali no kubombesha ku kundapa Vicky ukwabula ukumubikamo umulopa. Nangu hemoglobin yakwe ingabwela ukufika kuli 5 g/dl, ali uwaitemenwa ukutwalilila ukumundapa ukwabula ukubomfya umulopa. Asosele no kuti apo ubu bulwele bwalisangilwe bwangu kabili twatwele Vicky bwangu ku cipatala, uku kundapa kuti kwabomba. Atile uyu wali no kuba e muku wa kubalilapo ukubomfya ukundapa kwa kubomfya imiti ku kwipaya insandesande ishilwani ukwabula ukubika umulopa nge fyo cali kuli Vicky. Twalitashishe nga nshi kabili twatemenwe ukushipa kwa kwa Dokota Graf no mupampamina wakwe uwa bwafwilisho.

Amafya ya Ndalama

Nomba icalipo ca kuti, Twali no kulipila shani indalama shalekabilwa ku kundapa kwa kwa Vicky? Twalipapile ilyo batwebele ukuti imyaka ibili iya kundapa kuti yaba pa mutengo wa ndalama sha ku Germany 150,000 deutsche marks. Tatwakwete indalama shafule fyo, lelo calekabila ukuti Vicky atendeka ukundapwa ilyo line. Apo twafumine ku Sweden no kuya ku Germany ku cipatala, tatwali na kupeelwa indalama sha inshuwalansi wa butuntulu bwa bumi. E co nomba twali no mwana uulwalishe na badokota abali abaipekanya ukutwafwa, lelo tatwakwete indalama shakumanina.

Icipatala calitwafwile no kutweba ukuti batendeka ukumundapa ilyo line nga ca kuti twalipilako 20,000 marks no kusaina ukuti tukalipila ishashalako. Twalisungileko indalama shimo, kabili ku bwafwilisho bwa fibusa na balupwa batutemwa, twalilipile iyo 20,000 marks, lelo nge shashala shali no kufuma kwi?

Na kabili twalicinkwilweko ukuti tabatulekeleshe mu kulwila icitetekelo. Munyina wa ku mupashi, uyo tushaishibe pali ilya nshita, ali uwaitemenwa ukulipila ishasheleko. Lelo, tatwalekabila ukubomfya isho ndalama aipekenye ukulipila, pantu twalicitile amapekanyo yambi.

Badokota Batendeka Ukubomba

Ukundapa kwa kubomfya imiti ku kwipaya insandesande ishilwani kwalitendeke. Palipitile inshiku ne milungu iingi. Inshita shimo, twalenaka kabili caleafya ku mwana wesu na kuli ifwe. Lubali lumbi, twalesansamuka nga nshi no kutasha lyonse nga amoneka ukuti alebako bwino. Uku kundapa kwa kubomfya imiti ku kwipaya insandesande ishilwani kwasendele imyeshi 8. Kuli Vicky ilyo hemoglobin yabwelele sana yafikile pali 6 g/dl, na Dokota Graf acitile nge fyo alaile.

Imyaka ukucila pali 6 naipita nomba, kabili ukupimwa kwa kulekelesha ukwa menshi ya mu moongololo wa kwa Vicky kulangilila ukuti takwata iyi kansa ya mu mulopa. Nomba mukashana wa nsansa uwabula ifishibilo fya ubu bulwele. Cine cine, cimoneka kwati cipesha mano ukuti Vicky alipolelela. Twalishiba ukuti abana abengi abakwata ubu bulwele balafwa te mulandu no kundapa kwa kubomfya imiti ku kwipaya insandesande ishilwani no kubikwamo umulopa.

Twalicimfya mu kulwila icitetekelo, lelo ni pa kwafwilishiwa na balupwa, bamunyina na bankashi ba Bwina Kristu, na badokota bene. Dipartimenti Upeela Ifyebo pa fya Fipatala aletwafwa lyonse. Dokota Graf pamo na bo alebomba nabo babomfeshe ukulamuka kwabo ku kwafwa Vicky ukupola. Pali fyonse ifi, tulatasha icine cine.

Icitetekelo Cesu Calikoshiwa

Lelo, icacilishapo ca kuti tulatasha Lesa wesu, Yehova, pa kutusakamana no kutemwa ne nkosho twafumishe mu Cebo cakwe, Baibolo. Ilyo twaibukisha, tumona ubwingi bwa fyo twasambilila kuli ici cintu cayafya icatucitikila mu bumi ne fyo cakosha icitetekelo cesu.

Nomba ico tufwaisha kusungilila bucibusa bwesu ubwakosa na Yehova Lesa no kusambilisha umwana wesu ubucindami bwa kuba ne mikalile yumfwana ne fyo afwaya. Cine cine, tulefwaya ukupeela umwana wesu ubupyani bwa ku mupashi ubusuma ubwa mweo wa muyayaya muli Paradise wa pe sonde uuleisa.—Ca Kusangwilako.

[Futunoti]