Ni Shani Fintu Ningacebusha Bakomfwa?

¹ Mu musumba wa Filipi, ‘umwanakashi ishina lyakwe Ludia, kashisha wa shakashika, . . . alaumfwa: untu Shikulu aiswile umutima ku kwangwe fyalelanda Paulo.’ (Imil. 16:14) Cinshi cintu ubu bulondoloshi buletusambilisha? Ukumfwa e kwiswila umuntu inshila ya kusambilila icine. Ukutunguluka kwesu mu kushimikila ubukombe bwa Bufumu maka maka kwashintilila pali mwine ŋanda nga ali uwaitemenwa ukumfwa, Ilintu fye umuntu alaumfwa, cilaba icayanguka nga nshi ukushimikila ubukombe bwesu. Lelo ukucebusha umuntu umo ku kumfwa kuti kwaba ukwayafya. Cinshi cintu twingacita?

² Ilyo tatulafumina mu mulimo, tulingile ukubebeta imimonekele yesu ne fibombelo ifyo twalaya mu kubomfya. Mulandu nshi? Abantu bakongamina nga nshi ku kumfwa ku muntu uulemoneka uwa mucinshi. Bushe tulafwala ubusaka lelo mu kukanacishamo? Nangu cingati ubusanku pambi kuti bwaba ubwaseeka mu calo, tulasengauka ukuilekelesha kwa musango yo pa mulandu wa kuti tuli batumikishi abaleimininako Ubufumu bwa kwa Lesa. Imimonekele yesu iya busaka kabili iyapempenkana ilalunda ku bunte busuma ubwa bukombe bwa Bufumu ubo tushimikila.

³ Ba uwa Bucibusa Kabili uwa Mucinshi: Te mulandu ne mibele ileyaluka iya lelo, abantu abengi bacili balicindika Baibolo kabili bakankulako bwino ku milandile ya mucinshi kabili iya bucibusa pa lwa cintu Baibolo yakwata. Ukumwentula kwa cikabilila, ukwa cine cine kuti kwalenga mwine ŋanda ukwangukililwa no kukwata inshita ya kulanshanya kusuma. Ukufumaluka kwesu ne mibele isuma na fyo fine filingile ukuba ifyamonekesha mu milandile yesu ne myendele, icilesanshamo ukukutika kwesu ukwa mucinshi ku fintu mwine ŋanda alelanda.

⁴ Imifwaile yesu ya kwakana isubilo lya Baibolo na bambi. Mu kuba ne ci mu muntontonkanya, tulingile ukushininkisha ukuti ukulanshanya kwesu kulecebusha, te kwa bulwani nelyo ukwa kusonsomba. Tacakabilwa ukupoosa inshita ukulapaashanya no muntu uyo twishibe bwino ukuti alekaanya. (2 Tim. 2:23-25) Mu mipeelele yalekanalekana iya mu Butumikishi Bwesu Ubwa Bufumu ne ya mu citabo ca Ukupelulula iyapayanishiwilwa ifwe, kuti twasalamo imo imo. Kwena, tulekabila ukupekanya iyi mipeelele bwino pa kuti twingalanda mu nshila yabamo icikabilila kabili iya kushinina.—1 Pet. 3:15.

⁵ Pa numa ya kupwisha ukutandala kwesu, banono fye abene mayanda baba na maka ya kwibukisha ico twalandilepo. Nangu cibe fyo, mupepi na bonse kuti baibukisha inshila calandilwemo. Tatulingile ukucefya amaka ya busuma ne cikuuku. Mu kushininkisha kuliko abantu bapale mpaanga abengi mu cifulo cesu ica kubombelamo abakomfwa icine nga fintu fye Ludia aumfwile mu mwanda wa myaka uwa kubalilapo. Ukwangwa imimonekele yesu ne milandile kuti fyakoselesha abafumaluka ukumfwa ku Cebo ca kwa Lesa no kucipokelela bwino.—Marko 4:20.