Ukupekanya—E Makii ku Kutunguluka

¹ Ukupekanishisha libela ubutumikishi kukatwaafwa ukucimfya ukushimunuka ukuli konse uko umo engaba na ko ukukuma ku kwakana mu mulimo wa mwi bala. Ilyo uleya pa mayanda, ukeshiba ifya kulanda ku bene mayanda. Tawakabe uwasakamikwa pa lwa kusonsomba uko nakalimo wingalolenkana na ko. Lintu wabwelela ku ŋanda ukufuma mu mulimo, ukakoseleshiwa, ukwishiba ukuti wacibombesha mu butumikishi. Ee, ukupekanya mu kufishapo e makii ya kunona ukulamuka kwesu ukwa kushimikila no kusambilisha.

² Paulo akomaile pa kuba abaipekanya pa kutucincisha ‘ukufwala ku makasa ukupekaniwa kwa mbila nsuma iya mutende.’ (Efes. 6:15) Ici cisanshamo ukupekanya umuntontonkanya wesu no mutima capamo no kukwata imimwene isuma ne mibele ya mutima iya kuitemenwa. Lintu tuli abaipekanya ukushimikila icine kuli bambi, ukubombesha kwesu kukalambulwa ne fisabo fya Bufumu, ukutulenga ukuba aba nsansa.—Imil. 20:35.

³ Ifya kupekanishisha Umulimo wa Kushimikila: Tulingile ukusala imipeelele iyo twingangukililwa ukubomfya, nakalimo ukufuma pali iyo yatubululwa mu citabo ca Ukupelulula nelyo iyo isangwa pe bula lya kulekelesha ilya Ubutumikishi Bwesu Ubwa Bufumu. Tontonkanya mu kusakamanishisha pe lembo ulepanga ukubomfya, ukwishiba amashiwi ayo walayakomailapo pa kulondolola icishinka cobe icikalamba. Tacilekabilwa ukusungila ku mutwe imipeelele; mu cifulo ca ico, caliwamisha ukulaibukisha fye imfundo, ukuibika mu mashiwi yobe we mwine, no kuilumbula mu nshila iyo uletontonkanya ikacebusha kakutika obe.

⁴ Bebeta ulupapulo ulepanga ukutambika, kabili sala ifishinka fikalamba fimo ifya buseko. Sala icintu cimo ico ulemona cikaba ica buseko ku bantu mu cifulo cenu ica kubombelamo. Tontonkanya pa lwa fintu pambi wingateulula imipeelele yobe ukulingana na bene mayanda bapusanapusana—umwaume, umwanakashi, umukalamba, nelyo umusepela.

⁵ Bushe walyeshapo ukukwata utushita twa kupitulukamo? Longaneni capamo ne filundwa fya lupwa nelyo bakasabankanya bambi ku kulanshanya imipeelele iyo ingabomba bwino, kabili lyene pitulukenimo mu kupongomoka pa kuti bonse bakaleibukisha yene. Esheni ukupashanya ifintu fya cine cine ifyo tusanga mwi bala ne fikansa ifyo napamo twingasanga mu cifulo cesu ica kubombelamo. Ukupitulukamo kwa musango yo kukawamyako ukulongoloka kwenu mu kulanda, ukwingilishako ukufumamo cimo kwenu mu kushimikila, no kukuula ukucetekela kwenu.

⁶ Mu kulunda pa kupekanya no kupituluka mu mipeelele yobe, na kabili kuti waipusha auti, ‘Bushe ifya kufwala ndepanga ukufwala fili ifyalinga ku butumikishi? Bushe ninkwata ifyo ndekabila mu cola candi ica fitabo, ukusanshako impapulo isho ndepanga ukubomfya? Bushe filemoneka bwino? Bushe ninkwata icitabo candi ica Ukupelulula, amatrakiti, ifyalembwa fya ku ŋanda ne ŋanda, na pensulo?’ Ukupekanishisha libela ukwasakamanishisha kukalenga ubushiku waya mu mulimo ukuba ubwa kusandulula nga nshi.

⁷ Pa numa ya kubombesha ukufika apo twingapesha ku kuipekanya, tulingile ukupepela umupashi wa kwa Yehova ukutwaafwa ukutunguluka. (1 Yoh. 5:14, 15) Ukutontonkanya pa kupekanya mu kusakamanishisha kukalenga tukasange ubuseko bwakulilako mu mulimo wesu, lintu ‘tulefishapo ubutumikishi bwesu.’—2 Tim. 4:5.