Ukupekanishisha Kabela Kulaleta Ubuseko
1 Ukubombako mu butumikishi bwa mwi bala kutulenga ukusekelela nga nshi. (Amalu. 89:15, 16) Kwena, ukupekanya e cintu cikalamba pa kuti tulesekelela mu kufikapo. Nga twapekanya bwino, tulapwishishisha ifingi, kabili nga twapwishishisha ifingi, tulasekelela nga nshi.
2 Bomfyeni Ifisolobelo Fipayanishiwa: Tendekeni ukupekanya ukupitila mu kubelenga no kubebeta ifyebo mu Ubutumikishi Bwesu Ubwa Bufumu. Ilingi bupayanya inshila sha kulandilamo ishisuma ishilembelwa ku kumwafwa ukushimikila ubukombe bwa Bufumu mu kwanguka kabili mu nshila isuma. Mukasanga ifya kumwenako pa lwa fya kucimfya inshila abengi bakaaninamo ukumfwa ku cine. Imfundo sha mu kulungatika shilapayanishiwa pa lwa fya kuyalanda ilyo mwabwelelako nga ca kuti mulefwaya ukutendeka isambililo lya Baibolo. Kuti mwabomfya iyi mitubululo nga mwamona ifyo kuti camwangukila ukuibomfya. Ukulunda pali ci, mwalikwata icitabo ca Ukupelulula, icakwata inshila sha kulandilamo ishalekanalekana pamo ne fya kwasuka abashilefwaya ukushimikilwa, na muli fyo ukumwafwa ukubomba bwino mu mibele iingi iyo mwingapitamo.
3 Piteni mu lupapulo mukalatambika no kubulamo icishinka cikalamba icicebusha cimo nelyo fibili ifyo mwingalanshanyapo na mwine ng’anda. Ilyashi mwaumfwile nelyo ukubelenga ilingalenga umo ukutontonkanya kuti lyamupeela ishuko lya kutendekelapo ukulanshanya. Muleenekela ukuti abantu kuti bakaana ukumfwa ku cine ukupitila mu nshila babomfya ilingi pa kukaana, kabili muletontonkanya pa fyo mwingankulako. Lyene pa maminiti yanono pitulukeni mu fyo mukayalanda na mwine ng’anda.
4 Sangweni ku Kulongana kwa Mulimo Lyonse: Mulekutikisha mu Kulongana kwa Mulimo ilyo kuli ukulanshanya, ukupitulukamo, ne filangililo fya mitubululo ya mu Ubutumikishi Bwesu Ubwa Bufumu. Mulelemba imfundo muletontonkanya ifyo kuti mwashibomfya ilyo muleshimikila. Muleibukisha ifyo mwapitamo ilingi mu butumikishi, kabili muletontonkanya pa lwa nshila shingabomba bwino ilyo muleshimikila. Landeni pa lwa ifi fintu na bakasabankanya bambi ilyo mushilatendeka ukulongana na pa numa.
5 Kuti mwacetekela ukuti nga ‘mwapekanishisha ku kubomba umulimo onse uusuma,’ mukalasekelela nga nshi kabili mukalabomba bwino mu kwaafwa bambi ukusanga inshila ya ku mweo.—2 Tim. 2:21.