Umukululo wa Fipusho

◼ Ni nshila nshi iyalinga iya kubomfeshamo amashiwi “munyina” na “nkashi”?

Lintu yabomfiwa ukulingana ne fyo yapilibula, amashiwi “munyina” na “nkashi” yalosha ku bantu umo umo abakwata abafyashi bamo bene. Uku kwampana kwa cifyalilwa ilingi line kulapanga icikakilo ca cikabilila, kabili ukupalamisha kwaba pa kati ka aba bantu kulalundwako ku cikakilo ca mu bwikashi, ca mu ncende, ne ca mu nkuntu.

Yesu asambilishe abasambi bakwe ukwita Yehova mwi pepo nga “Shifwe.” Ukubomfya kwa iyo numbwilo kupilibula ukuti pamo nga Abena Kristu, bonse twaba ulubali lwa lupwa lumo ulwapalamisha umo tuipakisha ukwampana kwa ku mupashi ukwafumba. Ici calikomailwepo mu kulundapo na Yesu lintu aebele abakonshi bakwe ukuti “imwe muli ba bwananyina.”—Mat. 6:9; 23:8.

Pa mulandu wa cikakilo cesu ica ku mupashi icapalamisha mu kati na nkati ka ŋanda ya kwa Lesa, tuita ukuti “Munyina” na “Nkashi,” ukucilisha pa kulongana kwa cilonganino. Muli utu tushita twa ku mupashi, uuletungulula ukulongana eta abantu babatishiwa pa kubomfya amashiwi “munyina” nelyo “nkashi” ukukonkwapo ne shina lya kulekelesha ilya uyo muntu.

Ni shani nga ca kuti umuntu ushabatishiwa afwaya ukulandapo pa kulongana? Nga ca kuti uyo muntu abishanya na bantu ba kwa Yehova pa nshita yalepa kabili alepalamina ku kuipeela, ukuitontonkanya umwine nga umo uwa Nte sha kwa Yehova, te kuti kubeko icingalesha ukutendeka ukumulumbula ukuti “Munyina” nelyo “Nkashi” ukukonkanyapo ishina lya kulekelesha. Ici kuti caba ica cine ukucilisha nga ca kuti umuntu ali kasabankanya ushabatishiwa.

Lubali lumbi, abalesekelela abo batendeke fye ukusangwa ku kulongana kwesu nomba line tabalati babombele pa cingabeshibisha nga ulubali lwa ŋanda ya kwa Lesa. Aba bantu te kuti betwe “Munyina” nelyo “Nkashi,” apantu tabalakwata ukwampana kwa ku mupashi ukwa lupwa lwa kwa Lesa. E co mu kati ka kulongana, kuti twabeta fye mu cinkumbawile, ukubomfya mashina yabo aya kulekelesha.

Ukubomfya ishiwi “munyina” na “nkashi” pa kulongana kwesu ukwa pa cilonganino cilangilila icikakilo ico capalamisha nga nshi kabili icaumo mutengo ukucila icili conse icilangililwa pa kubomfya amashina ya kubalilapo. Citwibukisha ukwampana kwine ukwapaalwa uko tuipakisha pamo nga ulupwa lwa ku mupashi ulwakwata Shibo umo, Yehova Lesa. Na kabili tulacinkulwako ulwa kutemwa kwashika ne citemwishi ifyo twakwatila umo no munankwe.—Efes. 2:19; 1 Pet. 3:8.