Bapainiya Baleafwa Bambi
1 Yesu atile: “Ukulobolola kwena nakukula, lelo ababomfi nabacepa; e ico lombeni Umwine kulobolola ukuti atume ababomfi ku kulobolola kwakwe.” Apo bakabomba mu mwanda wa myaka uwa kubalilapo bali abanono kabili kwali icifulo ca kubombelamo icikalamba nga nshi, Yesu nga atontonkenye ukubatuma umo umo pa kuti basalanganine mu ncende ishingi ku kushimikile mbila nsuma. Mu cifulo ca kucite fyo, abatumine “babili babili.” (Luka 10:1, 2) Mulandu nshi abatumine babili babili?
2 Pantu balya basambi baali bapya kabili tababeleshe. Pa kubombela pamo kuti balesambilishanya no kukoseleshanya pamo fye nge fyalandile Solomone ati, “ukuba babili kwawamo kucila ukuba weka.” (Luk. Mil. 4:9, 10) Nangu fye ni pa numa ya kuti umupashi walipongolwelwa pali bene pa Pentekoste wa 33 C.E., Paulo na Barnaba na bambi abengi baleendela pamo na basumina banabo mu butumikishi. (Imil. 15:35) Fintu cali lishuko kuli bamo pali balya ukukanshiwa na balya baume bafikapo!
3 Programu Umusuma Nga Nshi uwa Kukansha: Pamo nge fyali icilonganino ca mu mwanda wa myaka uwa kubalilapo, e fyaba ne cilonganino ca Bwina Kristu ica muno nshiku ku kuteyanya ukushimikila. Kabili cilatupayanishisha no kukansha. Ico tulingile ukulafwaisha sana pa lwesu ca kutila tukabe bakashimikila abafikapo nga nshi. Pa kuti bakasabankanya bafulilako bakafikepo nga nshi mu butumikishi, ukwaafwa nakupayanishiwa.
4 Ku Sukulu lya Butumikishi bwa Bufumu ilyaliko nomba line, Sosaite yalibilishe programu wa kuti bapainiya bakulaafwa bambi mu butumikishi. Bushe ici cilekabilwa? Cine cine, cilekabilwa. Ukucila pali bakasabankanya 1,000,000 balibatishiwa mu myaka fye itatu iyapita, abengi pali bene balekabila ukukanshiwa ifya kuba bakashimikila bafikapo. Bushe ni bani bengaafwa ukubombela pali uku kukabila?
5 Bapainiya ba nshita yonse kuti baafwilisha. Ukuteyanya kwa kwa Yehova kulabapayanishisha ukufunda no kukansha ukwingi nga nshi. Bapainiya balakanshiwa lintu basangwa kwi Sukulu lya Mulimo wa Bupainiya pa milungu ibili. Kabili balamwenamo na lintu bakumana na bakangalila ba miputule na ba fitungu, e lyo na mu butungulushi bwa baeluda. Nangu ca kutila te bonse bapainiya ababelesha nge fyali Paulo na Barnaba, balisambilila imitubululo iibomba bwino iyo bengatemwa nga nshi ukuti na bambi baleibomfyako.
6 Bushe Abakamwenamo ni Bani? Bushe abakaba muli uyu programu ni beka fye bakasabankanya abapya nelyo ababatishiwe fye nomba line? Awe iyo! Kuli abakalamba na bacaice abakokolako mu cine nomba abengatasha ukubaafwa mu mbali sha butumikishi shimo shimo. Bamo balacita bwino mu kushalika impapulo lelo tabalamuka sana mu kuya ku fipempu nelyo mu kutampa amasambililo ya Baibolo. Bamo na bo balatendeka amasambililo ya Baibolo ukwabulo bwafya, nomba balasango kuti abo balesambilila na bo tabalunduluka. Bushe ni pi pabela ubwafya mu mibombele yabo? Bapainiya ababelesha bakepushiwa ukwaafwa aba musango yo, umo bashilebomba bwino. Bapainiya bamo balifikapo bwino mu kulundulula ubuseko, ukutampa amasambililo ya Baibolo, na mu kutungulula bapya ku kuteyanya. Ukubelesha kwabo kukaba ukwa kwaafwa muli uyu programu mupya.
7 Bushe mwalisange fyo ukutantika kwenu ukwa mibombele kulamulenga ukufilwa ukubombela pamo ne cilonganino mu nshiku batantika isha kukumana kwa kuya mu mulimo wa mwi bala? Painiya limbi akulabomba na imwe mu nshiku isho bakasabankanya bambi bashifumina mwi bala.
8 Ukubombela Sana Capamo Kulekabilwa: Mu mwaka umo libili, baeluda bakalatantika bakasabankanya abalefwaisha ukubomba na bapainiya muli uyu programu wa kuti Bapainiya Baleafwa Bambi. Nga mwasumina ukubamo muli uyu programu, mufwile ukukumana na painiya bakamutantikila ukubomba nankwe. Mukatantikile capamo ifyo imibombele yenu ikaba, kabili mwikaipumfyanya. Lyonse mulekonka inshita mukalapangana ukukumana. Lintu mulebomba capamo, mulelolekesha inshila shafikapo isha kubomfya pa kushimikile mbila nsuma. Pitulukenimo ukumona umulandu imitununukile imo ibelele iisuma ukuibomfya. Konkeni imitubululo intu painiya amwebele ukumona ifyo mwingawamyako imilandile yenu. Lintu mukalabomfya ifyo mulesambilila, ukulunduluka kwenu mu butumikishi kukamoneka, kuli mwe bene na kuli bambi. (Moneni 1 Timote 4:15.) Bombeleni pamo imiku iingi, ukubombako imbali shonse isha butumikishi, no bunte bwa mu lyashi bwine, lelo kwena mukatontomeshe pa mbali umo mulekabila ukumwaafwa ukuwamyako.
9 Kangalila wa mulimo akafwaisha ukwishiba fintu mukalalunduluka. Mu nshita mu nshita, akulalanshanya na katungulula wenu uwe Sambililo lya Citabo pa Cilonganino ukwishiba fintu mulenonkelamo muli programu. Kangalila wa muputule na o akamwafwilishako ilyo akabombele cilonganino.
10 Yehova afwaya abantu bakwe ukukanshiwa ku kuba ‘abaiteyanya ku kubombo mulimo onse usuma.’ (2 Tim. 3:17) Mufwile ukutesekesha ukuti programu wa kuti Bapainiya Baleafwa Bambi ali kupayanya ukusuma ku kwaafwa abalefwaya ukulundulula amaka yabo aya kubile cebo. Nga tukaba pa bakatantikwa muli uyu programu, shi natukabombe mu kutasha, ukuicefya no kusekelela.