Twalinonkelemo mu Mabungano ya “Imikalile ya Bukapepa”
1 Imyeshi fye inono iyapitapo, twalepekanya ukusangwa ku Mabungano ya Citungu na ya pa Kati ka Fyalo aya “Imikalile ya Bukapepa.” Pali ino nshita aya mabungano yasangwike cintu tushakabale atulaba mu kuteyanya kwa teokrasi. Twaliipakishe nga nshi ifya kulya fyanona ifya ku mupashi fintu twapokelele pali kulya kubungana kwaibela.
2 Ibungano lya uno mwaka lyalitucincimwishe nga nshi no lubali lwa kutushimikila ifyo umulimo uleenda mu fyalo fyonse. Te mulandu kwi bungano twali takwasangilwe bamishonari nelyo amakombe ya ku fyalo fimbi, bonse twalyumfwile ifya kukumanya fisuma nga nshi mu cungulo kasuba pa bushiku bwa kubalilapo mu lyashi lyaleti “Imibombele ya Bumishonari.” Twalikoseleshiwe nga nshi ne lyashi lyalebako cila bushiku ilya kuti “Amalipoti ya Kulunduluka kwa Mulimo wa Kulobolola.”
3 Impapulo Shipya Ishishaiwamina: Ilyashi lya kupelako pa bushiku bwa kubalilapo lyayaswike cipusho ico iminshipendwa ya bantu abashaishibe cine bepusha, ica kuti: “Bushe Kulaba Ubumi pa Numa ya Mfwa?” Pa kupwa kwa lilya lyashi lyawamisha kwali ukufumya broshuwa mupya uwa mutwe wa kuti, Cinshi Cicitika Nga Twafwa? Pali ino nshita tufwile twalipwa ukubelenga uyu broshuwa, kanshi natumona fintu akabomba bwino ukulondolwela abantu ifyo ciba ku muntu lintu afwa, ne fyo abaleloosha bengasansamushiwa ukuti isubilo lya kubuuka e ko lyaba.
4 Icungulo pa bushiku bwa cibili twasondolwelele ne lyashi lya kuti “Kalenga—Imibele Yakwe ne Nshila Shakwe.” Ili lyashi lyalikolobondelemo bwino bwino ukutufisha pa nsondwelelo ya mano iya kuti Kalenga e ko aba. Pa kuti tulebomba bwino mu mulimo wa kwaafwa bambi ukutesekesha ukubako kwa kwa Kalenga, icitabo cipya calikakwilwe mu ciNgeleshi ica mutwe wa kuti: Is There a Creator Who Cares About You? Ilintu ici citabo cilekosha icitetekelo cesu muli Yehova, ukutesekesha imibele yakwe ne nshila shakwe, calembelwa ukucilisha abantu balya aba kuti, balisoma nga nshi amano ya mu calo mu masukulu ya pa muulu, lelo tabasumina ukuti Lesa e ko aba.
5 Ukusuminishanya kwa Kufuma ku Mutima: Ilyashi lya kupelako pe bungano ilyaleti: “Akwendeni mu Nshila ya kwa Yehova,” lyakomaile pa kuti ifwe bonse tufwile ukutwalilila ukwenda mu nshila ya kwa Yehova. Fintu cali icalinga kanshi ifwe bonse ukusuminishanya pa lwa mupampamina wesu uwa kuti lyonse, tukalabombesha, ukutwala pa ntanshi imikalile ya bukapepa iyasumbuka! (Esa. 30:21) Pali nomba tufwile ukupampamina pa kukonka cintu twasuminishenye. Kwena twalikoseleshiwe nga nshi lwa ku mupashi pa kusangwa kwi bungano lya “Imikalile ya Bukapepa”!