Ukutendeka Amasambililo Muli Broshuwa wa Cintu Lesa Afwaya
1 Amalipoti mwi sonde lyonse yalelanga ukuti broshuwa wa Cinshi Cintu Lesa Afwaya Kuli Ifwe? cibombelo ca maka nga nshi ku kusambilisha abantu icine. Kuleba ukutendeka amasambililo ya Baibolo ayengi nga nshi cila mulungu muli uyu broshuwa. Bushe mwalitendekapo no kutwalilila ukutungulula isambililo lya Baibolo muli broshuwa wa Cintu Lesa Afwaya?
2 Nangu line abengi cilabangukila ukushalika broshuwa, lelo bamo cilabafya ukwishiba ifya kusosa pa kuti batendeke isambililo. Ni nshila nshi shimo isho bamo basanga shibomba bwino ku kutendeka amasambililo ya Baibolo ukubomfya broshuwa wa Cintu Lesa Afwaya? Imitubululo ili muno kuti yatwaafwa.
3 Bepusheni Ukuti Mubalange Fintu Ciba pa Kusambilila: Ilyo twatandala umuku wa kubalilapo nelyo ilyo twabwelelako, ukucila ukupelela fye pa kubeba ukuti kwaliba isambililo lya Baibolo, kuti twabalangilila fintu litungululwa. Ici cikalenga ukufumyapo ukutwishika no kusakamikwa kuntu abengi baba na ko ilyo bomfwa umuntu alanda pa “kusambilila.” Kulila twasambilila ifya kubalangilila, tukasanga ukuti ukulanda na bo mu nshila fye iyayanguka, kuti twatendeka isambililo.
4 Ukupekanya E Makii: Ukufwaisha kwesu ukwa kutendeka amasambililo ya Baibolo kwashintilila pa fintu tuipekanya. Ukupekanishisha kabela kukatwaafwa ukucimfya ukushimunuka konse kuntu napamo twingaba na ko pa lwa mulimo wa kutungulula amasambililo ya Baibolo. Nga twapitulukamo imiku iingi mu milandile yesu, tukatendeka ukulanda bwino, ukuilandila fye mu mashiwi yesu. Ici cikatulenga ukufumyapo umwenso kabili no muntu wine tulelanda nankwe akulaumfwa bwino.
5 Lintu mulepitulukamo, kuti cawama ukumona inshita mulepoosa pa kupwa, pa kuti mukebe mwine ng’anda amaminiti mwalapoosa pa kumulanga fintu isambililo litungululwa. Pa numa ya kulumbula ishina lyakwe, munyina umo atila: “Napitapo fye nati mulange programu tubomfya pa kusambilila Baibolo. Kuti namulanga muli baminiti fye basano. Bushe cili bwino ukuti tulanshanye pali baminiti basano?” Kuti mwalanga umuntu ifya kusambilila Isambililo 1 muli broshuwa wa Cintu Lesa Afwaya napamo muli baminiti basano. Lelo kwena, amalembo yamo yantu mwapekenye kuti mwayasha pa mulandu wa kucepa kwa nshita, lelo apo fye mwapwa Isambililo 1, ninshi mwine ng’anda aba ne shuko lya kusambilila umuku wa kubalilapo. Lyene mulondolweleni ukutila mukabwelelako ku kusambilila Isambililo 2 pali baminiti fye 15.
6 Ukulanda ifi Kulabomba bwino Nga nshi:
◼ “Kuti natemwa ukumulanga ifya kusambilila muli uyu broshuwa wa Cinshi Cintu Lesa Afwaya Kuli Ifwe? Isambililo lyalyanguka kabili talipoosa na nshita sana. Abengi balisanga ukuti ukusambilila fye pali baminiti 15 cila mulungu pa milungu 16, balomfwikisha fintu Amalembo yalanda pali aya mepusho yacindama pa lwa Baibolo.” Ukwabula ukukokolapo sana, mulangeni umutande wa ifilimo. Lyene kuti mwaya pa Isambililo 1 no kusosa amuti: “Nga mwasumina kuti twalanshanya fye pali baminiti basano imulange fintu ciba pa kusambilila. Isambililo 1 litila: ‘Ifyo Wingeshiba Cintu Lesa Afwaya.’ Lyene belengeni amepusho yatatu, no kulondolola umwalola amanambala yaba ku mpela ya cila bwipusho mu fyaisalilwa. Belengeni paragrafu 1 no kulanga mwine ng’anda ifya kusanga icasuko. Napamo kuti mwaipusha mwine ng’anda ukubelenga paragrafu 2. Lyene soseni amuti: “Ukulingana na fintu twaumfwa pano, kuti mwayasuka shani ici cipusho? [Ipusheni icipusho no kuleka mwine ng’anda asuke.] Moneni muli na malembo mu maparagrafu. Aya e yatulangilila cintu Baibolo ilandapo pali aya mepusho. Ku ca kumwenako, natubelenge 2 Timote 3:16, 17 tumone nga lilelanda pali cilya cishinka mwacasuka pa lwa kwa Katendeka wa Baibolo.” Pa numa ya kubelenga paragrafu 3, ipusheni icipusho, lyene belengeni Yohane 17:3, kabili langeni mwine ng’anda ifishinka fintu asambilila pa kupituluka mu Isambililo 1. Nomba kuti mwaisula pa Isambililo 2 no kubelenga icipusho ca kuti: “Ni mu nshila nshi shibili twingeshibilamo Lesa?” Lyene ipusheni amuti: “Ni lilali mukabako na baminiti napamo 15 pa kuti tukasambilile Isambililo 2 tukasange icasuko?”
7 Calicindama ukwangusha ifyebo pa kulanshanya no kutasha mwine ng’anda lyonse lintu ayasuka bwino. Lintu mulefwaya ukweba mwine ng’anda ukuti mukabwela, mu cifulo ca kumwipusha nga alefwaya mukabwele, mukoselesheni fye ukutila mukacita cimo ciine pa kusambilila Isambililo likonkelepo. Lekeni eshibe ukuti mulefwaisha ukubwela. Bakasabankanya bamo balyeba abene mayanda ukusambilila na bo pali lamya nga bamona inshita ya kubasanga yabula. Napamo kuti mwakoselesha mwine ng’anda ukubika broshuwa apasuma apo engamumona bwangu ilyo mukabwela.
8 Beni aba Mupampamina: Nangu line ukupekanya e kwacilishapo ukucindama, tufwile ukuba no mupampamina wa kubwelelako. Ukusambilisha muli baminiti banono kwena kuti kwayafya, kanshi pooseniko nga nshi amano ukupitulukamo bwino mu milandile, pa kuti mulelondolola fintu abantu bengomfwa pa kubalangilila ifitungululwa amasambililo. Esheni ukulangilila fintu isambililo litungululwa kuli bonse bantu mwalanda na bo, pa mayanda, mu bunte bwa mu lyashi, na lintu muleshimikila pa lamya. Nga cilemwafya ukutendeka isambililo lya Baibolo, mwifuupulwa. Ukutunguluka mu kutendeka amasambililo ya Baibolo kufwaya umupampamina no kufwaisha kwine kwine ukwa kusambilisha abantu icine.—Gal. 6:9.
9 Pa kubomfya iyi mitubululo, na imwe bene kuti lyaba lishuko lyenu ukwaafwa umuntu ukwenda mu nshila ya ku mweo, pa kutendeka no kutungulula isambililo lya Baibolo muli broshuwa wa Cintu Lesa Afwaya.—Mat. 7:14.