Bushe Mulebomfya Broshuwa wa Cintu Lesa Afwaya ku Kutendeka Amasambililo?
1 Bushe mwalishiba ukuti nga mulelanshanya lyonse kabili bwino bwino ifya mu Baibolo, nangu fye ifinono, no muntu uulefwaya ukusambilila kabili mwalanshanya na o mu lupapulo lwasuminishiwa ukusambililamo, ninshi muletungulula isambililo lya Baibolo? Ca cine, ili lisambililo lya Baibolo nangu line mulelanshanishisha pa mwinshi wa ng’anda nelyo pa lamya. Mulandu nshi mushingabombesha mu May na mu June ukutendeka isambililo muli broshuwa wa Cintu Lesa Afwaya?
2 Pekanyeni pa Kubomba Bwino: Ilyo muletambika broshuwa wa Cintu Lesa Afwaya, ishibeni bwino ico mulefwaya ukulanda. Nga muku wa kubwelelako, tontonkanyeni pa fyo mwalanshenye pa kubala. Ipusheni mwe bene amuti: ‘Ni paragrafu nshi muli broshuwa iyo ningalandapo pa kuti ntwalilile ukulanshanya no kutendeka isambililo lya Baibolo?’ Nga muleshimikila ku ng’anda ne ng’anda, tontonkanyeni pa lyashi lingatemwa umusepela, umukalamba, umwaume, nelyo umwanakashi. Pitulukeni mu mitwe ya malyashi yaba muli broshuwa, kabili salenipo ilyashi lingatemwikwa. Ilyo mwasala inshila ya kubomfya mu kutununuka umuntu, pitulukenimo imiku iingi. Iyi e nshila imo mwingabombelamo bwino.
3 Ica mu kati ca Ubutumikishi Bwesu Ubwa Bufumu ubwa January 2002 cakwata “Imitubululo ya Kushalikilamo Broshuwa wa Cintu Lesa Afwaya” 8. Umukululo utila “Ifya Kulanda pa Kutendeka Isambililo apo Pene” ulanga ifya kutendeka amasambililo muli broshuwa. Kuti mwabomfya imitubululo ya kubalilapo pa kusosa nge ifi:
◼ “Bushe mwalishiba ukuti mu nshita inono, kuti mwasanga ifyasuko ku cipusho cacindama ica mu Baibolo? Ku ca kumwenako, mulandu nshi kwabela imipepele iingi iitila ya Bwina Kristu? Bushe mwalitontonkanyapo pali uyu mulandu?” Pa numa ya kwasuka, kabiyeni pe sambililo 13 no kulanshanya amaparagrafu yabili aya kubalilapo. Nga kuli inshita belengeni no kulanda pe lembo limo nelyo yabili. Lyene belengeni icipusho ca kulekelesha icili pa muulu we bula, kabili soseni amuti: “Icipande conse icashalako cilelanda pa fishinka fisano ifya kwishibilako ukupepa kwa cine. Kuti natemwa ukubwela no kwisalanshanya ifi na imwe.”
4 Beni no Mukoosha: Ponse apo mwaba ne shuko langeni ifya kusambilila Baibolo muli broshuwa wa Cintu Lesa Afwaya. Lombeni ipaalo lya kwa Yehova. (Mat. 21:22) Ukuba no mukoosha mu mibombele yenu, kukamulenga ukusonda insansa shaba mu kwafwa umuntu ukukutika ku mbila nsuma!