Ukulanda Sana Ifya mu Baibolo!
1. Mu kutendekelako, ni bani Ulupungu lwa kwa Kalinda lwalelembelwa, kabili ni bani Loleni! alelembelwa?
1 Pa October 1, 1919, magazini wa kubalilapo uwa The Golden Age alifumine. Aali cibombelo ca maka sana mu mulimo wa kushimikila. Mulandu nshi? Pantu apangilwe maka maka ukuti abantu bonse balebelengako. Magazini wa Ulupungu lwa kwa Kalinda ena tali wa bantu bonse. Pa myaka iingi alemonwa ukuti wa “mukuni unono.” (Luka 12:32) Bakasabankanya ba Bufumu balicincimwike sana pali ulu lupapulo lupya ica kuti pa myaka iingi bamagazini ba The Golden Age baleshalikwa abengi sana ukucila Ulupungu lwa kwa Kalinda.
2. Bushe magazini waleitwa ati The Golden Age etwa ishina nshi lelo, kabili ukutula pa kutendeka bufwayo nshi aimininapo?
2 Ico uyu magazini wa The Golden Age alelembelwa, kulanga abantu ukuti Ukuteka kwa kwa Yesu Ukwa Myaka Ikana e kuli no kupwisha amafya yonse aya bantunse, no kuletela abantunse inshita yawamisha icine cine. Mu kupita kwa myaka kwali ukwalula-alula ifya muli uyu magazini pa kuti alelanda pa filekabila abantu ukulingana ne nshita. Mu 1937 ishina lyalyalwilwe kabili yatendeke ukwitwa ati Consolation. Mu 1946 yaishileba Loleni! ukufika na pali lelo.
3. Bushe Loleni! aba cibombelo ca maka ku kufishapo ukusesema nshi?
3 Ukutula fye apo uyu magazini atendekele, alilundako sana ku bunte bukalamba ubwacitwa ukutula mu 1919. (Mat. 24:14) Nomba, apo inshita tuleikalamo naipamfya, kwalabako ukwaluka kumo kumo kuli Loleni!
4. (a) Cinshi umuntu alingile ukucita nga alefwaya ukubelama mu “bushiku bwa cipyu ca kwa Yehova”? (b) Ukulingana no Ukusokolola 14:6, 7, cinshi “malaika . . . alepupuka mu kati ka muulu” eba bonse ukucita?
4 Abantu abengi nga nshi balaipakisha ukubelenga Loleni! pantu ilanda pa fintu fyapusanapusana ifishakuma ku fya mapepo kabili ifilandila mu nshila isuma. Takuli kutwishika ukuti abengi abasangwa ku Cibukisho cila mwaka bantu babelengako Loleni! lyonse. Lelo, nga ca kuti umo alesubila ukucingililwa mu “bushiku bwa cipyu ca kwa Yehova,” alekabila ukwafwiwa ukuti acite na fimbi, te kubelenga fye impapulo shesu lyonse.—Sefa. 2:3; Ukus.14:6, 7.
5. (a) Ukutampa na Loleni! wa mu January 2006, cinshi cikapulamo sana? (b) Ici cikalenga abengi ukucita nshi, kabili ico cikaba kufishiwapo kwa kusesema nshi?
5 E ico, ukufuma mu January 2006, Loleni! akalalanda sana pa Bufumu bwa kwa Lesa. Akalakoselesha bakabelenga ukwabula ukupita na mu mbali ukusubila muli Baibolo ukuti kuti yapikulula amafya yabo kabili akalalanda sana pa fyo Baibolo ilandapo pa filecitika nomba. Ici cikalenga bakabelenga ukumfwikisha bwino umwalola ifilecitika pali lelo kabili napamo ifyo balebelenga kuti fyabalenga bafwaya ukusambilila na fimbi pali Yehova.—Seka. 8:23.
6, 7. (a) Bushe Loleni! akalalembwa shani ukuti akaleyafwa abengi ukubomfya ifyaba pali 1 Abena Tesalonika 2:13? (b) Bushe Loleni! akalafuma imiku inga, kabili ni ndimi shinga shikakumwako kuli uku kwaluka?
6 Loleni! akatwalilila ukubamo amalyashi yamo ayashakuma ifya mapepo. Lelo, Baibolo e ikalalandwapo sana. (1 Tes. 2:13) Apo Ulupungu lwa kwa Kalinda lwabamo ifyebo fya mu Baibolo ifyashika, e lyo Loleni! na o akalabamo sana ifyebo fya mu Baibolo, tacilemoneka ukuti cilekabilwa ukutwalilila ukufumya Loleni! ubili cila mweshi. Kanshi ukutendeka mu January 2006, Loleni! akalafuma fye umo pa mweshi mu ndimi umo alefuma ubili pa mweshi. Ici cikangushako imipekanishishe ya fyebo, ukupilibula, no kutuma impapulo shesu.
7 Ici cili no kukuma indimi ishingi ishakwata Loleni! Mu ndimi ishingi, Loleni! kale kale afuma fye umo pa mweshi nangu umuku umo mu myeshi itatu. Ulupungu lwa kwa Kalinda lwena lukatwalilila ukufuma lubili pa mweshi.
8. Bushe bakasabankanya kuti babomfya shani Loleni! capamo no Ulupungu lwa kwa Kalinda?
8 Bakasabankanya kuti batambika Loleni! no Ulupungu lwa kwa Kalinda ululi lonse ulwa uyo mweshi. Loleni! wa kutambika muli uyo mweshi onse akatambikwa ukwabula ukwalula ifya kulanda pali uyo magazini nga fintu caba pali ino nshita.
9. Mulimo nshi Loleni! akatwalilila ukubomba?
9 Ukutula pali magazini wa kubalilapo mu 1919, uyu magazini pa kubala uwaishibikwe ati The Golden Age, lyena ati Consolation, e lyo pali nomba ni Loleni!, alyafwilisha sana mu mulimo wa kushimikila. Tulepepa ukuti Yehova akatwalilile ukupaala ukwananishiwa kwa uyu magazini ilyo akalulwa no kuti akaafwe abantu na bambi abengi “ukufuma mu nko shonse ne mitundu na bantu na bantu ne ndimi” ukusubila Ubufumu bwa kwa Lesa ukuti e subilo lyabo lyeka fye.—Ukus. 7:9.