Ukushimikila Imbila Nsuma Iyawamisha
1 Pa myaka 117 Ulupungu lwa kwa Kalinda lwalibomba nga ulwa kucingilila icine ca Baibolo. Pali ndakai, amakope 18,950,000 aya magazini umo umo yalapulintwa mu ndimi 125. Loleni! na o wine pa nshita yalepa aliba ndubulwila wa Cebo ca kwa Lesa, kabili nomba amakope 15,730,000 yalananishiwa mu ndimi 80.—Linganyeniko Abena Kolose 1:23.
2 Bamagazini Balekusha Ukukabila kwa ku Mupashi: Bamagazini ba Ulupungu lwa kwa Kalinda na Loleni! balinonsha amamilioni ya bantu ba mitima ya bufumacumi ukupitila mu kwaafwa ukwikusha ukukabila kwabo ukwa ku mupashi. Ifipande fikuulilila icitetekelo filasabankanishiwa. Ku ca kumwenako, mu Ulupungu lwa kwa Kalinda ulwa February 1, 1996, twasambililemo ifyebo fyalelanda pa lwa kukabila kwa kucetekela Yehova ne Cebo cakwe. Ulupungu lwa kwa Kalinda ulwa March 1, 1996, lwatukoseleshe ukutwalilila ukuba abapamfiwa mu mulimo wa kwa Yehova no kutwalilila ukumulinda. Fintu kwali ukwa kucincimusha ukulanshanya ifyebo fya kulonsha ifya mu busesemo bwa kwa Sefania! Lyene kwaliko ukulanshanya kwa kukosha icitetekelo pali bucishinka bwa Bwina Kristu mu Ulupungu lwa kwa Kalinda ulwa March 15, 1996. Ulupungu lwa kwa Kalinda ulwa May 15, 1996, lwakomaile pa bucindami bwa kubelenga no kusambilila Icebo ca kwa Lesa lyonse. Ifi fipande fyalengele ukumfwikisha kwesu ukwa Cebo ca kwa Lesa ukushikilako, kabili ukutesekesha kwesu Ubufumu bwakwe kwalingilishiwako.
3 Mu kulundapo, aba bamagazini bakwatamo ifipande fya pa nshita yalinga, ifilanda pa lwa myendele ya bukapepa, imibele ya Bwina Kristu, na malyashi yambi ayakatama. Filalondolola mu kulonsha imilandu ine ine iileambukila ubumi bwesu. Pa mulandu wa ico, tulaipakisha ubumi bwawamisha nomba ilintu tulepembelela ukufikilishiwa kwa malayo ya kwa Lesa aya fyawamisha napo ku nshita ya ku ntanshi.—Esa. 48:17; 1 Tim. 6:19.
4 Ukupitulukamo mu kwipifya mu fyalondololwa pe bula 4 ilya Loleni! umo umo kuti kwatupeela umulandu usuma uwa kutashisha uyu magazini ukuti abamo ifyebo ifyawamisha ifya kubelenga abantu ukuli konse, abaice na bakalamba capamo. Palya magazini alondolola ukuti: “Loleni! abelako ku kubuutusha ulupwa lonse. Alangilila ifya kubomba ne mpika sha lelo. Acita lipoti amalyashi, alanda pa lwa bantu mu fyalo ifingi, abebeta imipepele na sayansi. Lelo acita ifyacilapo. Asokota ifyashika no kulondolola ubupilibulo bwine bwine ubwa fya kucitika fya ndakai, lelo takanamo mu mapolitiki kabili taninikisha uluko lumo ngo lwacila ulunankwe. Icacilapo ukucindama, uyu magazini akuula ukucetekela mu malayo ya kwa Kabumba aya calo cipya ica mutende no mutelelwe icili mupepi no kupyana pa micitile ya ndakai iibifi, iya bupulumushi.”
5 Tambikeniko Bamagazini Kuli Bambi: Beni abape mu kwananya Ulupungu lwa kwa Kalinda na Loleni! (Linganyeniko 1 Timote 6:18.) Muleendako na bamagazini bafulilako pa kuti mwingabatambika ku uuli onse uyo mwakumanya. (Luk. Mil. 11:6) Ifwe bonse, ukusanshako na bakasabankanya bacaice na bakasabankanya bapya, kuti twabombako mu kukumanina ukwananya bamagazini uno mweshi pa kubomfya imipeelele iipi iyashimpwa pa fipande fya pa nshita yalinga ifili muli bamagazini ba nomba line. Beleshanyeni ne filimo, kabili tambikeni bene mu kufumaluka no kushininwa.
6 Bamagazini ba Ulupungu lwa kwa Kalinda na Loleni! bakwatamo ifyebo ifyo umuntu uuli onse akabila. Ukubananya kwaba ni imo iya nshila shawamisha twingafwilamo bambi ukusambilila imbila nsuma iya kuti icintu cawamisha cili no kwisa nomba line!