Bushe Mulabelenga Bamagazini?
1 Bamishonari babili abaupana ababombela muno Afrika balandile pali bamagazini besu ukuti: “Ulupungu lwa kwa Kalinda lulatwaafwa ukuba abalola lwa ku mupashi mu cifulo tubombela. Magazini umo na umo alatucincisha no kutukoselesha.” Bushe e fyo na imwe mutesekesha aba bamagazini? Bushe mulafwaisha ukubabelenga?
2 Kulaba ukupoosapo inshita iikalamba pa kupayanya icipande ca muli magazini cimo ico mwingabelenga fye mu maminiti yanono. Nga mwalanguluka pa nshita ipooswapo, bushe kuti mulepitamo fye ulubilo ukumonamo fye ifyo imitwe ya fipande ili, ukutambamo ifikope, nelyo ukubelengako fye limo limo ifipande ifyamusekesha sana? Kuti cawama nga twacite ficilile pali co. Tufwile ukulaikalako pa nshi pa kuti tulebelenga no kumfwa ifipande fyonse muli bamagazini besu bonse. Ulupungu lwa kwa Kalinda e magazini umukalamba umuba ica kulya ca ku mupashi icalingana ne nshiku twikelemo. Muli Loleni! mulaba ifipande ifyabamo mulyo kabili ifya kufunda pa malyashi yalekanalekana. Ifyo tubelenga muli aba bamagazini, filatukosha lwa ku mupashi, no kutupangasha ku kulalondolola bwino ifyebo lintu tuleshimikila. Nga twaba bakabelenga ba lyonse fwe bene, tukaba abacincila ukutambika aba bamagazini na kuli bambi.
3 Ifya Kucita pa Kuwamyako Imibelengele: Bushe kuliko ifyo mwingacita pa kuti mulepwisha ukubelenga bamagazini bonse abesa? Pano pali imitubululo ibili iibomba bwino ku bengi. (1) Tantikeni programu wa lyonse uwa kubelenga. Nga mwatantika ukulabelenga pa maminiti 10 nelyo 15 cila bushiku, mukasunguka pa fyebo ubwingi mukabelenga mu mulungu umo. (2) Bomfyeniko inshila imo iyo mwingalaishibilamo apo mupelele ukubelenga. Limbi kuti mulelembapo akeshibilo pa kutendeka kwa cipande conse ico mwapwisha ukubelenga. Nga tamuleishiba apo mupelele, kuti muleshako ifipande fimo nelyo ukukanabelenga fye na magazini onse. Calicindama ukupanga programu wa kubelenga uo mwingalakumanisha ukukonka lyonse.—Linganyeniko Abena Filipi 3:16.
4 “Umusha wa cishinka kabili uwashilimuka” alibukila nga nshi ifyo inshita yesu ilebipilako ubwaca no bwaila kabili alapayanya ifipande ifilanda pa mafya ayo abantu balekumanya. (Mat. 24:45) Cine Cine bamagazini balanda pa filetuponena mu bwikalo bwesu. Ukulunduluka kwesu lwa ku mupashi, kwashintilila maka maka pa mibelengele yesu iya mpapulo sha teokrasi. Amapaalo ya ku mupashi ayengi yalelolela bonse ababelenga bamagazini bonse abesa.