Umukululo Wa Mepusho

◼ Bushe finshi bonse twingacita pa kuti tulelongana bwino sana pa cilonganino cesu? (Amala. 31:12)

Pa mulandu wa kuti twalicindika sana Yehova e lyo no kulongana atupekanishisha, bonse batukoselesha ukuti tulefika ninshi kucili inshita pa kuti tuipekanye ukusambilishiwa kuli ena. Caliwama sana ukwikala ku fipuna fya ku ntanshi ya Ng’anda ya Bufumu pa kuti tushiile ifipuna fya ku numa balya abakwata abana banono na ba kuti inshita shimo balacelwa. Ilyo ukulongana kushilatendeka, mulingile ukubika amafoni ne fintu fimbi mu musango wa kuti tafilepumfyanya abali mwi bumba. Ifya kupumfyanya fikacepa nga ca kuti bonse mwi bumba tuletontonkanya pa kucindika Lesa ilyo tulelongana.—Luk. Mil. 5:1; Fil. 2:4.

Abapya nga batendeka ukusangwa ku kulongana, uwa mu cilonganino uubeshibe bwino kuti abeta ukuti bekale capamo. Ukucita ifi kuti kwaba bwino sana nga ca kuti abapya bali na bana abanono abalekabila ukukanshiwa. Limbi ukulasangwa ku kulongana kuti kwaba cintu icipya kuli ulu lupwa. Nga ca kuti e fyo cili, ninshi kuti batemwa sana ukulaikala mupepi na ku numa pa kuti belapumfyanya abengi lintu balefwaya ukufumina pa nse ku kusakamana abana. (Amapi. 22:6, 15) Ulupwa ulwakwata abana abanono talulingile ukwikala mu muputule umbi uunono pantu ici kuti calenga abana abanono ukulamona kwati mwena cili fye bwino ukulapanga icongo. Cilawama sana ukuti abafyashi e basalapula abana nelyo ukusakamana ifintu fimbi ifilekabilwa lyena pa numa babwelela mu kati ka Ng’anda ya Bufumu.

Bakapyunga babomba umulimo uulenga tulelongana bwino pa cikuulwa ca mapepo. Balafwilisha indupwa no kulanga balya bonse aba kuti inshita shimo balacelwa, apa kwikala apasuma. Bakapyunga balishiba ukuti balingile ukubomba mano mano pa kulanga abantu apa kwikala apasuma pa kuti belapumfyanishiwa. Baleshiba bwino ifya kucita nga kwacitika cimo icingapumfyanya ukulongana mu kupumikisha. Nga ca kuti umwana alepumfyanya abantu bambi, bakapyunga kuti ba-afwa abafyashi mu kunakilila.

Bonse abasangilwe ku kulongana kuti bacitapo fimo pa kuti ukulongana kwesu kuleba ukusuma ilyo tulesambilila pali Yehova na pa fintu afwaya ukucita pa kuti cino calo cikabe icipya ica mutende kabili icalungama.—Heb. 10:24, 25.