Tesheni Ifyebo Fyashila
1 Ifilanda umuntu te fyonse fyalinga ukutesha. Lelo ilyo Lesa alanda, kwaliba umulandu wakatama uwa kukutikila. (Amala. 28:1, 2) Ku ca kutasha, bakalemba bapuutwamo balilembele “ifyebo fya kwa Lesa” pa kuti tumwenemo. (Rom. 3:2) Ibungano lya citungu ilileisa lili no kutupeela amashuko yawamisha aya kumfwa ifi fyebo ilyo fikabelengwa no kulandwapo. Kuti mwacita shani pa kuti mukatesekeshe?
2 Bangilileni Cila Lucelo: Elenganyeni ifyo abena Israele basaminwe ilyo baebelwe ukukumana na Yehova pa Lupili lwa Sinai ku kumfwa Amalango yakwe! (Ukufu. 19:10, 11, 16-19) Nga mukwete imibele yapalako pa lwa kupokelela ukufunda kwa kwa Yehova pe bungano lya citungu, mukapekanya ukuti mukalebangilila cila bushiku. Te kuti tukutike kuli programu onse nga ca kuti tulecelwa no kupumfyanya bambi ilyo tulepitana ukufwaya apa kwikala. Cila bushiku programu akalatendeka na 8:45 hrs.
3 Nangu fye ni bamo ababangilila balacelwa ukwikala mu fipuna. Mulandu nshi? Pantu balapembelela mpaka ceyamani abilisha ulwimbo lwa kwiswila e lyo baleka ukwambaula ne fibusa baya ku kwikala. Tufwile ukwishiba ukuti ilyo kucili amaminiti yafulilako pa ntanshi ya lwimbo lwa kwiswila iciputulwa ca kulongana cimo na cimo, ceyamani akulaikala pa cisebele ilyo inyimbo sha Bufumu shilelila. Ici e cishibisho ca kuti ni nshita ya kwikala! Lyene, lintu ulwimbo lwa kwiswila lwabilishiwa, tukaba natuipekanya ukwimbilako Yehova amalumbo.
4 Kutikeni Ngo Lupwa Lwaikatana: Ilyo ifyebo fyashila fyalebelengelwa abena Israele balongene, indupwa, ukusanshako “abaice,” bali no kumfwa no kusambilila. (Amala. 31:12) Pa mabungano yesu, abana tabalingile ‘ukulekeleshiwa.’ (Amapi. 29:15) Mwe bafyashi, teyanyeni ukuti ulupwa lwenu lwikale capamo—ukusanshako na bapungwe. Abafyashi bamo balapembelela, cilya ulwimbo lwa kwiswila lwatendeka, e lyo batwala abana ku cimbusu. Lelo ici te kuti cisambilishe abana ubucindami bwa nyimbo na mapepo mu kupepa kwesu. Kuti cawama sana ukusakamana ifintu fya musango yo ilyo iciputulwa ca kulongana cimo na cimo cishilatendeka!
5 Cikatwafwilisha sana ukukutika nga ca kuti twatuusha bwino ubushiku no kukanalya sana mu kasuba. Kutikisheni ifyo kalanda alesosa. Mwileka umuntontonkanya wenu ulelulumba. Konkenimo ilyo amalembo ya mu Baibolo yalebelengwa. Lembeni ifyebo ifipi. Ilyo ilyashi limo na limo lilelandwa, pitulukenimo mu muntontonkanya ifyo kalanda asosa, kabili langulukeni pa fyo muli no kubomfya ifyo fyebo. Mu cungulo, lanshanyeni ifya muli programu no lupwa. Fishinka nshi umo umo aciipakishamo? Ni shani ifyo ulupwa lwenu lwingabomfya bwino ifyo fyebo?
6 Cindikeni Icebo ca kwa Lesa: Amabungano yalenga twakwata amashuko ya kulanda na ba bwananyina no kuipakisha ukubishanya kwa kukuulilila. Nga tulebangilila, twakulaba ne nshita ya kulanda na bo ilyo programu ashilatendeka. Lelo bamo, balanda na lintu amalyashi yalelandwa, bena batila tabapumfyanya pantu ibumba likalamba. Nangu ni lintu ukulongana kuli ukukalamba, iba ni nshita ya kukutika, kwati fye fintu ciba pa kulongana ku Ng’anda ya Bufumu. Tatufwile ukuleka amafoni ya kwenda nayo, ifya kukopelako vidio, na makamera ukupumfyanya ilyo amalyashi yalelandwa.
7 Ilyo Mose alepokelela Amalango kuli Yehova, “icilyo talelya na menshi talenwa.” (Ukufu. 34:28) Te kuti ciwame na ifwe ukulalya nelyo ukunwa ilyo programu aletwalilila. Pembeleni ukufikila “inshita yalingwa” iya kulya, kano fye nga ni ku mulandu wa bulwele.—Luk. Mil. 3:1.
8 Pa mabungano yamo, kucili kwaliba ubwafya bwa kuti bamunyina abengi na bankashi na bana fye abanono balapitana ilyo amalyashi yalelandwa. Bakapyunga bakebwa ukweba abo bantu ukubwelela mu cibansa ce bungano. Bakabomba ba kuitemenwa aba mu madipartimenti yalekanalekana balingile ukwikala mwi bumba lintu fye umulimo wapwa. Bakabomba ba kuitemenwa bafwile ukwikala mwi bumba balekutika kuli programu kano nga ca kuti bapeelwa umulimo umbi uulekabilwa ukubombwa. Tabalingile ukwikalilila fye mu maofeshi, baleambaula ilyo amalyashi yalelandwa.
9 Tatwingafwaya ukuba “abafine mitima pa kuumfwa” ilyo tulekutika ku Cebo ca kwa Lesa. (Heb. 5:11) Lekeni kanshi tupampamine pa kulanga umucinshi ukupitila mu kutesha ilyo ifyebo fyashila ifya kwa Yehova filelandwa pe bungano lyesu ilya citungu ilileisa.