‘Umfweni no Kulundako Ukusambilila’
1 Ibuuku lya Amapinda lilanda ukuti amano yabilikisha ayati: “Umfweni, pantu ndesose fya bucilongoshi, ne fyasamune milomo yandi fintu fyatambalala. Ninkwato kupanda amano, na mano yene. . . . Umfweni kuli ine; balishuka ababake mibele yandi. Pantu uwansanga, asango mweo, no kumono kubishiwa kuli Yehova.” (Amapi. 8:6, 14, 32, 35) Ayo mashiwi yalelondolola bwino amafundisho tulelolela ukuyaumfwa kwi Bungano lya Citungu ilya “Bakasambilisha wa Cebo ca kwa Lesa.”
2 Kwali ukubebeta ifyo bamunyinefwe mwi sonde lyonse balekabila lwa ku mupashi kabili amalyashi ya pe bungano yakalanda pali fyo fine. Nga ca kutila umuntu acita umwabela amafundisho ya ku mupashi ne mitubululo ibomba ifikalandwapo, kuti fyalenga aba ne nsansa, kuti aba cibusa mwine mwine uwa kwa Yehova, kabili kuti atwalilila ukwenda mu nshila ya ku mweo wa muyayaya. Cine cine kanshi e mulandu wine tufwile ‘ukumfwila no kulundako ukusambilila.’—Amapi. 1:5.
3 Ilyo Amalyashi Yashilatendeka: Pa kuti tumwenemo sana mu filelandwa, tufwile ukwikala pa fipuna fyesu no kupekanya umuntontonkanya wesu ku kutendeka ukukutika ilyo amalyashi yatendeka. Pa kucite co tufwile ukuipekanya bwino. Icikalamba kubangilila ukutampa ukuipekanya. Sendameni bwangu ilyo mwishibe ukuti mailo kuya ku kulongana. Bukeni bwangu akacelo pa kuti bonse aba mu lupwa lwenu bakwate inshita yalinga iya kuipekanya no kulyako tumo. Fikeni bwangu pa cifulo ca kulonganinapo pa kuti mufwaye bwino apa kwikala no kucita ifintu fimbi ilyo amalyashi tayalatendeka. Programu akalatendeka ne nshita ya 8:45 hrs cila bushiku.
4 Apo icikalamba ico tubunganina caba kulumbanya Yehova “mu nkuta,” ulubali lonse ulwe bungano lufwile ukutendeka mu musango uucindika Lesa wesu. (Amalu. 26:12) Pa kuti cibe fyo, bonse balekoseleshiwa ukuti bafwile ukwikala pa fipuna ilyo ceyamani talalanda ulwimbo lwa kwiswila. Ukucite co e kukonka ifyo Amalembo yatukonkomesha ukuti: “Fyonse ficitwe busaka busaka kabili mu kukonkana.” (1 Kor. 14:40) Cinshi umo umo uwa ifwe afwile ukucita? Nga twamona ceyamani naikala pa cisebele ilyo inyimbo sha kubalilapo shilelila, ilyo line tufwile ukwikala. Nga twacite co tukalaimbako no mutima onse ulwimbo lwa kulumbanya Yehova ulukembwa pa kutendeka kwa cila ciputulwa ca programu.—Amalu. 149:1.
5 Ilyo Amalyashi Yalelandwa: Esra “ateyenye umutima wakwe ku kwetetula amalango ya kwa Yehova, kabili ku kuyacita.” (Esra 7:10) Kuti twateyanya shani imitima yesu ku kumfwa amafundisho ya kwa Yehova? Ilyo mulemona imitwe ya malyashi yapusanapusana ayali pali programu, ipusheni ukuti, ‘Cinshi Yehova alenjeba muli aya malyashi? Kuti nabomfya shani ifi fyebo pa kuti ine pamo no lupwa lwandi tumwenemo?’ (Esa. 30:21; Efes. 5:17) Muleipusha ifi fine fipusho inshiku shonse ishe bungano. Lembeniko ifishinka mulefwaya ukubomfya. Pekanyeniko inshita ya kulanshanya ifyo fishinka pa numa ya malyashi ya ubo bushiku. Ukucite co kukamwafwa ukwibukisha no kucita ifyo muleumfwa.
6 Kwena calyafya ukwikala ulekutika fye akasuba konse. Cinshi cingatwafwa ukuti twilatontonkanya pali fimbi? Bomfyeni bwino amaka ya linso. Ilingi line, ico tulolesha e co tutendeka ukutontonkanyapo. (Mat. 6:22) E co esheni ukucefyanyako ukulolesha konse fye uko mwaumfwa akacongo nelyo ukulepita umuntu. Tonteni amenso kuli kalanda. Kupukuleni Baibolo wenu no kubelenga Amalembo pamo na kalanda, kabili mwikupika Baibolo wenu ilyo kalanda alelondolola ilembo.
7 Ukutemwa kwa Bwina Kristu kukalenga twilapumfyanya abanensu ilyo amalyashi yalelandwa. (1 Kor. 13:5) Iyi ni “nshita ya kutalala” no kukutika. (Luk. Mil. 3:7) E co, cefyanyeniko ukulanda no kwendauka. Cefyanyeniko ukuya ku cimbusu pa kuipekanishisha libela. Mwilalya ifya kulya nelyo ukunwa ifya kunwa ilyo inshita ishilakumana, kano fye nga mwalilwala ubulwele bufwaya ukucite co. Abakwata amafoni ya kwenda na yo, amapeja, bakamera bakukopa amavidio, na bakamera bambi, tabafwile ukubomfya ifi fipe ica kuti fyapumfyanya abanabo. Abafyashi bafwile ukupekanya ukuti ulupwa lwabo lonse, kumo na bapungwe, baikala pamo pa kuti balesopa bwino abana babo.—Amapi. 29:15.
8 Uyu mwaka wapwile eluda umo uwasangwa ku mabungano pa myaka iingi atile: “Kwali icintu cimo ico namwene ukuti e capulilemo pali lino ibungano. Abengi nga nshi mwi bumba balelemba ifishinka, kumo na bana banono. Ico mwandini caliweme ukumona. Lyonse fye abantu balekupukula ba Baibolo babo ilyo kalanda abeba ukubelenga Ilembo.” Tulatasha nga nshi abantu abakutikisha muli uyo musango. Ukucite co kulenga twamwenamo fwe bene na bonse abo tuli na bo pe bungano, ne cacindamisha kulumbanya Kasambilisha wesu Umukalamba, Yehova Lesa.—Esa. 30:20.