Mukalekutika no Kusambilila
1. Mulandu nshi tukakabila ukubikilako sana amano pa kulongana kwa citungu pa kuti tukakutike no kusambilila?
1 Ukulongana kwa citungu ukwa mu 2013 kuli no kutendeka nomba line. Bamunyinefwe nababombesha sana ukupekanya ukulongana ukukakuma ababwananyina isonde lyonse. Bushe muleipekanya ukuti mukasangweko inshiku shonse shitatu? Fingi ficitika pa kulongana kukalamba ifingatupumfyanya, kanshi tulingile ukubika sana amano kuli programu. Apo uku kulongana kulasenda inshita iikalamba ukucila ukwa pa cilonganino, tulingile ukuipekanya ukukutika pa nshita iikalamba. Na kabili, ukwenda ukuya uko tukalalonganina kuti kwa tunasha ica kuti twafilwa ukukutikisha kuli programu. Cinshi cikatwafwa ukubika amano ku kulongana pa kuti tukalekutikisha no kusambilila bwino?—Amala. 31:12.
2. Kuti twapekanya shani imitima yesu pa kuti tukakutike bwino kuli programu ya kulongana kwa citungu?
2 Ilyo Ukulongana Kushilafika: Pa adresi yesu iya www.pr418.com, palaba programu ya kulongana kwa citungu iikwata imitwe ya malyashi yonse, kabili pa lyashi limo na limo palaba ne lembo limo nelyo yabili ayo bakalandapo sana. Nga ca kuti twalikwata Intaneti, kuti cawama twamwenapo limo pa kuti twapekanya bwino umutima wesu ku kuya kutika ifyebo. (Esra 7:10) Bushe te kuti ciwame ukulanshanya ifyebo fya mu programu pa Mapepo ya Lupwa?
3. Finshi fikatwafwa ukulakutikisha?
3 Pa Kulongana: Nga cingacitika, kuti cawama ukwila calimo ku ng’anda nkalamba ilyo programu ishilatendeka. E lyo kabili kuti cawama ukushimya foni pa kuti tailemipumfyanya nga kwaisa foni nelyo meseji nelyo pa kuti tamuletumina bambi amameseji. Nga ca kutila kuli fimo ifilengele ukuti mwishimya foni, kuti cawama mwaibika mu musango wa kuti tailepumfyanya bambi. Nga mulekopa fimo ukubomfya kakompyuta akanono, mulingile ukushininkisha ukuti tamulepumfyanya bambi. Mwilalya nelyo ukunwa ilyo ukulongana kulecitika. (Luk. Mil. 3:1) Mulelolesha kalanda, e lyo nga atendeka ukubelenga ilembo, na imwe mulebelenga muli Baibolo yenu. Mulelembako ne fyebo fimo.
4. Bushe abafyashi kuti ba-afwa shani abana ukulakutika no kusambililla?
4 Tufwaya abana besu nabo ukulakutika no kusambilila. Pa Amapinda 29:15 patila: “Kalume uo balekelesha alenga nyina insoni.” Kanshi, kuti cawama abafyashi ukwikala na bana no kulabasopa pa kuti babika amano ku kukutika mu nshita ya kulalanda fye amalyashi, ukutumishanya amameseji, nelyo ukula-endauka fye. Nangula abana banono sana ica kuti te kuti bomfwikishe fyonse ifyo balelandapo, mufwile ukubasambilisha ukukanalashipula no kupanga icongo.
5. Busuma nshi bwaba mu kupituluka mu fyo twacisambilila pa kulongana, kabili kuti twacita shani?
5 Ifya Kucita Pa Numa ya Kulongana: Tulemukoselesha ukuti mukalelala bwangu. E lyo nga mulepituluka mu fyo mwacisambilila mu kulongana tamwakafilabe bwangu. Kanshi mukalesangako inshita icungulo iya kulanshanya ifyo mwacumfwa ku kulongana. Kuti cawama nga mwasenda apo mwacilemba ifyebo ilyo muleya ukwa kuliila ifya kulya pa kuti mulelanshanya ifishinka mwacilemba. Ukulongana nga kwapwa, mukakwateko inshita pa Mapepo ya Lupwa iya kulanshanya ifyo mwingabomfya ifyebo mwasambilile pa kulongana. Kabili cila mulungu kuti mulepituluka mu mpapulo ishafumine pa kulongana.
6. Bushe ukusangwa fye ku kulongana kwa citungu e cacindama fye pa kuti tukanonkelemo sana? Londololeni.
6 Ifya kulya te kuti fimwafwe nga mulefilolesha fye, mufwile ukufilya, fyasunguluka, e lyo fyamupeela na maka. Ifi fine e fyo cikaba na ku fyo tukasambilila ku kulongana kwa citungu. Kanshi nga tulefwaya ukunonkelamo sana, tulingile ukusangwa ku malyashi yonse, ukukutikisha, no kubomfya ifyo twasambilila.