‘Longanyeni Abantu’

1. Bushe ukulongana kwa citungu no kulongana kwa bakafuma mu fyalo ifyalekanalekana kwapalana shani no kulongana kwacindama uko abena Israele bakwete ilyo bafumine fye mu Egupti?

¹ Pa numa fye ya kufuma mu Egupti, Yehova aebele Mose ‘ukulonganya abantu’ pa Lupili lwa Sinai ku kumfwa ifyebo fya kwa Lesa pa kuti balemutiina no kulafunda abana babo inshila shakwe. (Amala. 4:10-13) Ala icacitike cifwile calikoseshe icitetekelo cabo kabili tababalile abalaba nakalya! Mu myeshi inono iili no kukonkapo, abantu ba kwa Yehova bakatendeka ukulongana kwa citungu no kulongana kwa bakafuma mu fyalo ifyalekanalekana pa kuti Yehova akabasambilishe. Finshi tulingile ukucita pa kuti tukanonkelemo nga nshi?

2. Finshi twingacita pa kuipekanya ukuya mu kulongana kwa citungu?

² ‘Mukaipekanye’: Yehova aebele abena Israele ukuipekanya ilyo bashilaya mu kulongana pa lupili lwa Sinai. (Ukufu. 19:10, 11) Kanshi na ifwe bene ilyo tushilaya mu kulongana kwa citungu tulingile ukuipekanya bwino, nampo nga natukwata amalyashi pa kulongana nelyo iyo. Ku ca kumwenako, bamunyinefwe abengi balingile ukulombela limo ku ncito ukuti bakatuushe pa kuti bakaye ku kulongana inshiku shonse shitatu. Napamo kuti mwakwata ubwafya ngo bwakwete Nehemia. Nehemia alebomba umulimo uwa kupeela Imfumu Artakishashete umwangashi. Lelo inshita imo alefwaya ukuya ku Yerusalemu ku kuyakuula ifibumba fya musumba. Na lyo line, alishibe ukuti napamo imfumu te kuti imusuminishe. E ico alipepele no kweba imfumu amashiwi ayo apekenye bwino. Imfumu yalisumine yamupeela no bupe bwa kumwafwa ukukuula. (Nehe. 2:1-9) Na kabili, mulingile ukupekanya ifyo mukenda no ko mukalaikala. Baeluda bakaipelesha ukwafwilisha bonse abalekabila ubwafwilisho. Mukalefika bwangu lyonse pa kuti ‘mukalebika sana amano ku fyo mukalaumfwa.’—Heb. 2:1.

3. Cinshi cingatwafwa ukupekanya umutima?

³ Cimbi icingatwafwa, kupekanya umutima pa kuti tukayekutika no kusambilila. (Esra 7:10) Programu ya kulongana ikabikilwa limo pa Webu saiti ya jw.org. Pali iyi programu pakaba imitwe ya malyashi e lyo ne lembo limo nelyo yabili ayo bakalandapo sana muli ilyo lyashi. Kanshi kuti mwalanshanya pali aya malyashi pa Mapepo ya Lupwa. Bakasabankanya bamo balapulinta programu iiba pa jw.org no kupanga ibuuku lya kulembamo ifishinka pa kulongana.

4. Bushe abafyashi kuti babomfya shani inshita ya kulongana kwa citungu ku kusambilisha abana?

⁴ ‘Sambilisheni Abana’: Cimo ico kwabelele ukulongana pa Lupili lwa Sinai ni pa kuti abena Israele ‘bengasambilisha abana babo.’ (Amala. 4:10) Na muno nshiku mwine, pa kulongana kwa citungu abafyashi balakwata ishuko lya kusambilisha abana babo. Kanshi balingile ukulaikala na bana pa kulongana pa kuti balekutikisha. Lyena cila bushiku pa numa ya kulongana kuti cawama nga mulelanshanya pa fyo mwasambilila pa kulongana. Kabili pa numa ya kulongana, kuti mwapitulukamo mu fyo mwasambilile ku kulongana pa mapepo ya lupwa.

5. Bushe tukanonkelamo shani mu kusangwa ku kulongana kwa citungu ukuleisa?

⁵ Ukulongana uko abena Israele bakwete pa Lupili lwa Sinai kwalibafwile ukulatasha pe shuko bakwete ilya kuba abantu bakwa Lesa abasalwa. (Amala. 4:7, 8) Ukulongana tukakwata nako kukatwafwa ukulatontonkanya pe shuko twakwata ilya kuba ababomfi ba kwa Lesa. Pa nshiku shitatu, tukaipakisha ukuba capamo na babwananyina e lyo no kusambilila ifya kwa Lesa. (Esa. 35:7-9) Apo ubushiku bwa kwa Yehova bulepalama, natulesangwa lyonse ku kulongana kwa musango uyu pa kuti tulekoseleshanya!—Heb. 10:24, 25.