Ukulongana Pamo ku Kulumbanya Yehova
1. Bushe umutwe we bungano uleti shani, kabili mulandu nshi Yehova awaminwa ukulumbanishiwa?
1 Yehova wa maka yonse, amano yakwe te kuti yapenengwemo, alipwililika mu bupingushi, kabili e kutemwa kwine. Apo e Kabumba, Uupeelo Bumi, Mulopwe wa Kubumbwa konse, wene eka e wawaminwa ukupepwa. (Amalu. 36:9; Ukus. 4:11; 15:3, 4) Ibungano lya Citungu ilya uno mwaka ilya “Peeleni Lesa Ubukata” likakosha umupampamina wesu uwa kumulumbanya nga Lesa umo fye eka uwa cine.—Amalu. 86:8-10.
2, 3. Bushe ukupekanishisha limo kukatwafwa shani ukunonkelamo sana?
2 Ukupekanya Bwino Kulakabilwa: Pa kuti tunonkelemo sana mu mutebeto wa ku mupashi uo Yehova atupekanishishe, tufwile ukupekanya bwino. (Efes. 5:15, 16) Bushe mwalipekanya ukwa kuyaikala, imyendele, no kupoka cuti ku ncito nelyo ku sukulu? Mwikalaalikisha mpaka ne nshita ikapwe. Nga muleshingashinga ukupoka ulusa, napamo kuti mwapuswa ku lubali lumo ulwa iyi nshita ya nsansa. Bonse tufwile ukusangwako ku kulongana konse.
3 Pangeni ukufika mu nshita pa cifulo ca kulonganinapo cila bushiku. Ico cikamwafwa ukwikala mu fipuna ilyo ulwimbo lwa kwiswila talulatampa kabili cikamwafwa ukuipekanishisha ukuumfwa amafundisho yakapeelwa.
4. Mulandu nshi twaebelwa ukuiletela ifya kulya fya kasuba kwi bungano?
4 Bonse tulemulomba ukwisa ne fya kulya fyenu ifya pa nshita ya kasuba ukucila ukuya ku kushita ifya kulya pa nshita ya kutuusha. Nga mwakonka ifi kuti mwasangwila ku mutende kabili mukaba ne nshita ya kubishanya na basumina banenu. (Amalu. 133:1-3) Twapaapaata ishibeni ukuti ubwalwa tabusuminishiwa pa cifulo ca kulonganinapo.
5. Bushe kuti twatendeka shani ukuteyanya imitima kwi bungano?
5 Kutikeni no Kusambilila: Esra aiteyenye ukupokelela ifyebo fya kwa Lesa ne pepo. (Esra 7:10) Apeepeke ukutwi kwakwe ku masambilisho ya kwa Yehova. (Amapi. 2:2) Kuti twatendeka ukuteyanya imitima ku kulongana na lintu tatulafuma pa ng’anda ukupitila mu kwetetula pa mutwe we bungano no kulanshanyapo no lupwa.
6. Cinshi cingatwafwa ukukanapumbulwa pa kulongana? (Moneni umukululo.)
6 Pe bungano ilikalamba, kuti paba ifingi ifya kumonamona kabili kuti paba ifingi ifya kutupumfyanya. Ifya kupumfyanya fya musango yo kuti fyatupumbula kuli kalanda. Nga ca kuti ico cacitika, te kuti tunonke ifyebo fyacindama. Imitubululo ili mu mukululo kuti yatwafwa ukuwamyako imikutikile yesu.
7, 8. Ni shani twingalangulukilako bambi?
7 Langulukileniko Bambi: Amakamera ne fya kukopelako vidio kuti fyabomfiwa ilyo ukulongana kulecitika, lelo pa kuti mwipufyanya abantu bambi, kopeleni apo mwikalile. Mwileka amafoni ya kwenda na yo na mapeja yapumfyanye bambi. Tamufwile ukukulikila ifipe fyenu ku malaiti yalebomfiwa pa cifulo ce bungano nelyo ku fisoselo.
8 Cine cine tulefuluka ukulongana capamo ku kulumbanya Yehova! Shi natupampamine pa kupeelo bukata ukupitila mu kusangwa ku kulongana konse, ukupeepeka amatwi, no kukonka ifikasambililwa.—Amala. 31:12.
[Akabokoshi pe bula 3]
Ukukutika pa Mabungano
▪ Etetuleni pa mitwe ya malyashi
▪ Konkenimo ilyo amalembo yalebelengwa
▪ Lembeni ifyebo ifipi
▪ Soobolenimo ifishinka mulefwaya ukubaka
▪ Pitulukeni mu fyo musambilile