‘Natutondele Pamo Ishina Lyakwe’
1. Lishuko nshi tukakwata ilya kutondela ishina lya kwa Lesa pamo, kabili cinshi twingacita nomba pa kuipekanya?
1 Kemba wa malumbo aimbile ati: “Aleni na ine tutashe Yehova, no kutondela pamo ishina lyakwe.” (Amalu. 34:3) Ukulongana kwa Citungu tukalongana ukuleti “Endeni na Lesa” kukatupeela ishuko lya kutondela ishina lya kwa Yehova pamo na bamunyinefwe na bankashi abakafuma ku filonganino ifingi. Bushe mwaliteyanya uko mukekala, ifyo mukenda, no kulomba ulusa ku ncito? Kuti cawama ukucitila calimo ifi.—Amapi. 21:5.
2. Cinshi cacindamina ukupekanya ukufika bwangu pa kulongana kwa citungu?
2 Ukufika Apa Kulonganina: Kuli ifingi tufwile ukucita ilyo twalongana. Nga twaima bwangu te kuti tucelwe na lintu kwaba ifyatupumfyanya kabili kuti kwalenga twaikala bwangu ilyo kucili inshita pa kuti twimbe no mutima onse ulwimbo lwa kubalilapo no kukutika kwi pepo. (Amalu. 69:30) Ilyo kwashala amaminiti yanono pa kuti ukulongana kutendeke, ceyamani akekala pa cisebele ilyo ulwimbo lwa Bufumu lulelila. Bonse tufwile ukwikala pali iyo nshita pa kuti ukulongana kutendeke mu muyano.—1 Kor. 14:33, 40.
3. Kuti twalangulukila shani bambi ilyo tulefwaya apa kwikala?
3 Icebo ca kwa Lesa citukonkomesha ‘ukuleka fyonse ifyo tulecita ukucitilwa mu kutemwa.’ (1 Kor. 16:14) Ukulangulukilako bambi kukatulenga ukukanabutuka nelyo ukusunka bambi pa kuti tusange ifipuna nelyo tusange apo twingatemwa ukwikala ilyo bambi bashilapasanga. Ifipuna ne ncende kuti fyasungilwa fye abo muleenda na bo muli motoka imo ine nelyo abo mwikala na bo mu ng’anda imo ine.—1 Kor. 13:5; Fili. 2:4.
4. Cinshi tufwile ukucita akasuba ilyo tuletuusha, kabili busuma shi bukabamo?
4 Mukwai mukese ne fya kulya fyenu ukucila ukufuma apabelele ukulongana no kuya ku kushita ifya kulya lilya tuletuusha. Nga twaisa ne fya kulya, tukalanshanya bwino na bamunyinefwe no kusangwako lilya ukulongana kwatendeka akasuba. Nga mulefwaya kuti mwasendela ifya kulya fyenu mu cipe ca kubikamo ifya kulya icishingamwafya ukusenda. Ifipe fikalamba ifya kusendelamo ifya kulya, ifya makalashi, nelyo ubwalwa tafisuminishiwa pa kulongana.
5. Bushe kuti twateyanya shani umutima wesu ukuumfwa ifyebo tukasambilila?
5 Tuli no Mutebeto wa ku Mupashi ku Ntanshi: Imfumu Yehoshafati ‘yateyenye umutima wa iko ukufwaya Lesa.’ (2 Imilandu 19:3) Bushe kuti twateyanya shani umutima wesu ilyo ukulongana kwa citungu kushilatendeka? Fwayeniko inshita ya kutontonkanya pa mutwe wa kulongana kwa citungu no kwelenganya ifyo Yehova atuteyanishishe. Kabili pa kuteyanya umutima, tufwile no kulomba Yehova ukutwafwa ukumfwikisha ubusuma bwa fyo tukasambilila no kukonka ifyo tukasambilila.—Amalu. 25:4, 5.
6. Cinshi bonse tufwaisha, kabili cinshi tufwaila ukucitila ico cine?
6 Bonse tulafwaisha ukusambilila na fimbi mu Cebo ca kwa Lesa, pantu twalishiba ukuti kuti catwafwa ukupusuka. (1 Pet. 2:2) Kanshi natukasangwe ku Kulongana kwa Citungu ukuleti “Endeni na Lesa” no ‘kutondela pamo ishina lya kwa Yehova.’—Amalu. 34:3.
[Akabokoshi pe bula 3]
Inshila sha Kutondelamo Ishina lya kwa Lesa
◼ Ukupekanishisha kabela
◼ Ukutemwa bambi
◼ Ukuteyanya umutima wenu