Utupepala twa Kwitilapo Abantu Bonse ku Cibukisho!
1. Bushe ni kampeni nshi iikabako mwi sonde lyonse ilyo Icibukisho cishilafika?
1 “Mulecita ici ku kunjibukisha.” (Luka 22:19) Pa mulandu wa kuti balomfwila ili ifunde Yesu abapeele, bakapepa ba kwa Yehova bakalongana pamo na bo basambilila nabo Baibolo pa March 30, 2010, ku kusefya imfwa ya kwa Yesu. Ukutendeka pa March 13 ukufika pa March 30, tukalapeela abantu ba mwi sonde lyonse utupepala twaibela utwa kubetilapo ukwisasangwa ku Cibukisho.
2. Kuti twacita shani pa kupeela abantu utupepala twa kubetilapo ku Cibukisho?
2 Ifyo Tukalacita pa Kubapeela: Kuti mwapeela abo mulelanda na bo akapepala pa kuti bamone icikope cili pa ntanshi, lyena kuti mwatila: “Pa bushiku bwa March 30 icungulo, abantu abengi mwi sonde lyonse bakalongana pamo ku kusefya imfwa ya kwa Yesu. Namuletelako aka kapepala pa kuti imwe no lupwa lwenu, mukesesangwako. Kuti mwaitako ne fibusa fyenu.” Mulingile no kubeba inshita ne ncende ukukabela Icibukisho. Nga ca kuti tabapamfiwe sana, kuti mwababelengelako Ilembo lya kwa Luka 22:19 apaba ili ifunde lya kuti tulingile ukusefya imfwa yakwa Yesu. Muleibukisha no kutila tamulingile ukulanda ifyebo ifingi pantu inshita ya kampeni naicepa ica kuti limbi kuti mwafilwa ukupeela bonse ababa mu ncende mushimikila.
3. Ni bani mwingeta ku Cibukisho?
3 Nga ca kuti icilonganino cenu calikwata icifulo ca kushimikilamo icikalamba, baeluda napamo kuti bamweba ukulasha utupepala pa mayanda apashili bantu ilyo fye mwatandala umuku wa kubalilapo. Kuti mwamona nga cili fye bwino ukushiila abantu magazini pa numa ya kubapeela utupepala twa kubetilapo ku Cibukisho. Mwilalabako no kwita abo mubwelelako ku kuyabashimikila, abo musambilila na bo Baibolo, abo mubomba na bo, abo musambilila na bo ku sukulu, balupwa, abena mupalamano, na bantu fye bambi abo mwaishiba.
4. Ukutasha Yehova pa fyo aatulanga ukuti alitutemwa ukupitila mu kutupeela icilubula, kukalenga tukacite cinshi?
4 Ipekanyeni pa Kuti Mukesebombesha: Imyeshi iitangilila Icibukisho e lyo ne ikonkapo, e yalinga ukubombeshamo. Bushe kuti mwa-alulako imibombele yenu pa kuti mukabombeko bupainiya bwa kwafwilisha? Bushe mwalikwata abana nelyo abo musambilila na bo Baibolo abalelunduluka? Nga mwalikwata, ebeni baeluda pa kuti bamone nga ca kuti aba bapya nabafikapo ukuba bakasabankanya abashabatishiwa pa kuti na bo bene bakabombeko muli iyi kampeni. Ukutasha Yehova pa fyo aatulanga ukuti alitutemwa ukupitila mu kutupeela icilubula, kukalenga tukasangweko ku Cibukisho no kwitako abengi pa kuti na bo bakasangweko.—Yoh. 3:16.