“Ifintu Ifyalungama Ifyo Umuntu Acita E Filanga Ukuti wa Mano”
1. Bushe abantu bamo bamona shani umulimo wesu?
1 Inshita shimo kuti twasanga abantu abashifwaya ukukutika ku cebo pa mulandu wa kuti tabatwishiba bwino nelyo abantu bamo balibabepa ubufi pa Nte sha kwa Yehova. Nakalimo icilenga bamo ukube fi, ni co balyumfwa ubufi pa milabasa na mu manyushipepala. Mu ncende shimo abantu baishiba ukuti imipepele yesu kuti yaonaula abantu. Nomba finshi tulingile ukucita nga twasanga abantu abashatutemwa?
2. Cinshi cingatwaafwa ukukanafupulwa nga ca kuti baletulengulula?
2 Mwifuupulwa: Abantu ba kale bamo tabaishibe bwino Yesu, na babomfi ba kwa Yehova bambi abaliko mu nshita ya batumwa kabili balebabepesha ifya bufi. (Imil. 28:22) Na lyo line, nangu ca kuti balebalengulula tabaleumfwa insoni pa kushimikila. Yesu atile: “Ifintu ifyalungama ifyo umuntu acita e filanga ukuti wa mano.” (Mat. 11:18, 19) Ena atwalilile ukuba uwacincila mu kucita ifyo Wishi alefwaya kabili acetekele ukuti abalefwaisha ukwishiba icine e bali no kumona ifyo imbila nsuma yacindeme. Na ifwe bene tatwakafuupulwe nga tuleibukisha ukuti Umwana wa kwa Lesa na o wine balemulengulula.
3. Mulandu nshi tushilingile ukupapila nga baletubepesha ubufi no kulesha umulimo wesu?
3 Yesu atile aba mu calo bakapata abatumwa bakwe nga filya fine bamupatile. (Yoh. 15:18-20) Eco filya abantu batubepesha ubufi no kulalesha umulimo wesu, tafilingile ukutupapusha. Na kuba tulingile ukwenekela ifintu fya musango uyu ukucilamo nga nshi ilyo inshiku sha kulekelesha shileya shilepwa kabili no bukali ba kwa Satana ilyo bulekulilako. (Ukus. 12:12) Tulingile ukusekelela pantu ifi filecitika filelangilila ukuti nomba line fye icalo ca kwa Satana calaonaulwa.
4. Nga ca kuti twakumanya abantu abashifwaya ukukutika ku mbila nsuma, kuti twabasuka shani?
4 Asukeni mu Bufuuke: Nga twakumanya abantu abashifwaya ukukutika ku cebo, tulingile ukubaasuka mu bufuuke kabili mu kutekanya. (Amapi. 15:1; Kol. 4:5, 6) Uo tulelandako nga atusuminisha, kuti twamulondolwela ukuti abantu abengi tabaishiba bwino bwino ifyo Inte sha kwa Yehova baba nelyo kuti twamwipusha alande umulandu ashifwaila baNte. Ukwasuka kwesu ukwafuuka kuti kwamulenga ukutwishika ifyo aumfwa pali baNte kabili kuti aisafwaya ukukutika ilyo baNte bamutandalila umuku wakonkapo. Nomba, nga ca kuti abo tuleshimikilako nabakalipa icine cine, kuti cawama twafumapo mu mucinshi. Kuti twacetekela ukuti nangu ca kuti abantu bambi tabatufwaya, Yehova ena alicindika umulimo tubomba uwa kushimikila.—Esa. 52:7.