Tukatendeka Ukushalika Utupepala Twa Kwitilapo Abantu ku Cibukisho pa 2 April
1. Ni lilali tukatendeka ukushalika utupepala twa kwitilapo abantu ku Cibukisho uno mwaka, kabili bucindami nshi ubwa iyi kampeni?
1 Ukutendeka pa 2 April ukufika pa 17 April, tukalashalika utupepala twa kwitilapo abantu ku bushiku ubwacindamisha mu mwaka, e kutila ubushiku bwa kwibukisha imfwa ya kwa Kristu. Ukutula na kale, abantu abengi abalefwaya ukusambilila Baibolo balisangwako ku Cibukisho. Ku ca kumwenako, pa bushiku bwa Cibukisho umwanakashi atumine foni kwi ofeshi lya Nte sha kwa Yehova no kutila: “Ilyo nacifika fye pa ng’anda, nacisanga akapepala pa mwinshi aka kunjitilapo ukusangwa ku Cibukisho. Ndefwaya ukusangwako, nomba nshishibe inshita.” Munyinefwe alilondolwele apo uyu mwanakashi engasanga inshita pali kalya kene kapepala. Uyu mwanakashi alaile munyinefwe ukuti, “Nalayasangwako ku Cibukisho cino cungulo!”
2. Finshi twingalanda ilyo tulepeela abantu utupepala twa kubetilapo ku Cibukisho?
2 Ifyo Tukalacita: Apo tukwete fye inshita iinono iya kupwisha ukubomba mu cifulo tushimikilamo, tufwile ukwipifya ilyo tuleshimikila. Nalimo kuti twatila: “Mwapoleni mukwai. Tulefwaya ukupeela abekala pano pa ng’anda aka kapepala ka kwitilapo abantu ukusangwa ku cintu cacindama icicitika umuku umo pa mwaka icikabako mwi sonde lyonse pa Mulungu, pa 17 April. [Peeleni abo mulelanda nabo akapepala.] Pali ubu bushiku epo tukebukisha imfwa ya kwa Yesu. Kukaba ilyashi lya Baibolo umo bakalondolola ifyo twingamwenamo mu cilubula ca kwa Kristu. Pali aka kene akapepala nabalangilila inshita no kukabela Icibukisho kuli ino ncende twikala.”
3. Kuti twacita shani pa kuti tukete abantu abengi ku Cibukisho?
3 Nga ca kuti icifulo mushimikilamo cikalamba, baeluda kuti bamweba ukusha akapepala ka kwitilapo abantu ku Cibukisho pa mayanda apashili abantu cikulu fye mwakasunkila mu kati mwi samba lya ciibi. Mwilaba ukulaalikako abo mwashimikile, balupwa, abo mubomba nabo, abana be sukulu banenu, na bantu bambi abo mwaishiba. Ilyo muleshalika akapepala ka kwitilapo abantu ku Cibukisho pa mpela ya Mulungu, muleshalika na magazini nga mwakwata ishuko. Bushe kuti mwabombako bupainiya bwa kwafwilisha mu April pa kuti mukabombeshe muli uyu mulimo uuleta insansa?
4. Mulandu nshi tulefwaila ukuti abalefwaya ukusambilila Baibolo bakesesangwa ku Cibukisho?
4 Ala mwandini abakasangwa ku Cibukisho bakayumfwila abene! Bakomfwa ifyo Yehova atemwisha abantunse pa kupekanya icilubula. (Yoh. 3:16) Bakasambilila ifyo Ubufumu bwa kwa Lesa bukacitila abantunse. (Esa. 65:21-23) Abakasangwa ku Cibukisho bakamonana na bakapyunga no kubeba ukuti balefwaya ukusambilila Baibolo pa kuti beshibilepo ifintu na fimbi. Tulepepa fye ukuti abantu abengi abalefwaya ukusambilila Baibolo bakomfwe ubu bwite kabili bakesesangwa pamo na ifwe ku Cibukisho!