Bushe Mwalibombelepo Bupainiya bwa Nshita Yonse?
1. Mulimo nshi uusuma uo abengi babombako, kabili finshi bamo pali ino nshita batontonkanyapo?
1 Pa myaka iingi iyapita, abantu abengi nga nshi baliipakisha ukubombako umulimo uusuma uwa ‘kusambilisha no kubila imbila nsuma’ inshita yonse. (Imil. 5:42) Lelo kwena, bamo balileka ukubomba umulimo wa bupainiya pa mulandu wa fintu fyalekanalekana. Nga ca kuti kale mwali bapainiya, bushe mwalitontonkanyapo pa fyo ifintu fili nomba pa kuti mumone nga kuti mwatendeka ukubomba na kabili?
2. Mulandu nshi ababombelepo bupainiya kale balingile ukutontonkanishisha pa fyo ifintu fili pali ino nshita?
2 Ifintu Filaaluka: Limbi pali ino nshita ubwafya ubwalengele ukuti muleke ukubomba bupainiya bwalipwa. Ku ca kumwenako, nga ca kuti mwalekele bupainiya pa mulandu wa kuti mwalefilwa ukukwanisha ama-awala 90 cila mweshi, bushe kuti mwatendeka bupainiya na kabili ifi bacefyako ama-awala ukufika kuli 70 cila mweshi? Bushe imilimo mwakwata ku ncito na pa lupwa naicepanako ukutula apo mwalekeele bupainiya? Nkashi umo uwalekele ukubomba bupainiya pa mulandu wa kulwala alitendeke ukubomba na kabili ilyo ali ne myaka 89. Tabamutekelepo mu cipatala umwaka umo uutuntulu kabili amwene ukutila kuti abomba bupainiya na kabili!
3. Bushe aba mu lupwa kuti babombela shani capamo pa kuti baafwe umo mu lupwa lwabo ukutendeka bupainiya?
3 Napamo tamwatala amubombapo bupainiya bwa nshita yonse, lelo bamo mu lupwa lwenu kuti limbi balilekele bupainiya pa mulandu wa kuti balesakamana bamo mu lupwa pamo nga bafyashi abakoloci. (1 Tim. 5:4, 8) Nge fyo caba, bushe imwe nelyo bambi mu lupwa kuti mwayafwako ababombeleko bupainiya? Bushe te kuti mulanshanye capamo no lupwa lwenu? (Amapi. 15:22) Nga ca kuti aba mu lupwa babombela capamo pa kuti umo mu lupwa lwabo atendeke ukubombako bupainiya, bonse kuti baumfwa kwati balebombako uyu mulimo.
4. Finshi mwingacita nga ca kuti pali ino nshita te kuti mutendeke bupainiya bwa nshita yonse?
4 Mwifuupuka nga ca kutila pali ino nshita te kuti mutendeke ukubomba bupainiya na kabili. Ifi mufwaisha ukutampa bupainiya mulalenga Yehova ukusansamuka. (2 Kor. 8:12) Ilyo muleshimikila pali ino nshita, bomfyeni ifyo mwasambilile ilyo mwalebomba bupainiya. Pepeni kuli Lesa no kumweba ifyo mulefwaisha ukucita, kabili mulebika amano ku kumona inshila mwinga-alwilamo ifintu. (1 Yoh. 5:14) Napamo ku ntanshi Yehova akamupeela ‘ishuko ilikalamba ilya kuti mubombeshe’ pa kuti na kabili mukatendeke ukulaipakisha ifisuma ifyaba muli bupainiya bwa nshita yonse!—1 Kor. 16:9.