“Ifya Kucita pa Kushalika Magazini mu . . .”

Mu Kulongana kwa Mulimo cila mweshi, tulakwata ilyashi lya kulanshanya pa fya kushalika magazini. Ico tukwatila ili lyashi te kulanda pali fyonse fye ifili muli magazini iyo. Lelo ico kubela ili lyashi, kuleka abali mwi bumba balanda ifyo bapekenye ukucita pa kushalika magazini. Kanshi munyinefwe uulelanda ili lyashi afwile ukulandapo fye panono pa kuti alenge abali mwi bumba ukumona ubusuma bwa fyebo ifili muli magazini. Lyena kuti asala icipande cimo (nelyo ifipande ifilelanda pa lyashi limo line) no kwipusha abali mwi bumba ukuti balande ifyo bapekenye ukulanda pa kushalika magazini ukubomfya ifyo fipande pa kuti bambi bengasambililako ifya kucita. Mu nshita ya kuleka umuntu umo ukulanda fyonse ifyo engacita pa kushalika magazini, kalanda kuti aleka abali mwi bumba baipusha ifipusho ifyo abantu ababa mu cifulo tushimikila bengatemwa ukulanshanyapo. Pa numa kuti aipusha abali mwi bumba ukulanda amalembo bengabelengela abo balelanda nabo. E lyo mu kulekelesha, kufwile ukuba ifilangililo pa fyo twingashalika magazini imo na imo. Tulekoseleshiwa ukulabelengela limo magazini ilyo tushilaisa ku kulongana pa kuti twaisalandapo pa fyo twingacita pa kushalika magazini. Bonse nga twapekanya bwino, ili lyashi ililanda pa fyo twingacita pa kushalika magazini likatwafwa ukunoona icinso ca banensu.—Amapi. 27:17.