Ifingatwafwa Ukulashimikila Bwino—Ukulemba Ifyebo Pabo Twalanshanya Nabo

Baibolo itila, “Lyonse uleisakamana we mwine, ulesakamana ne fyo ulesambilisha.” (1 Tim. 4:16) Aya amashiwi umutumwa Paulo aebele Timote yatulangilila fye ukuti nampo nga e lyo tutendeke ukushimikila nelyo kale, tufwile ukulaya tulewamyako ifyo tushimikila. Pa kuti tuleshimikila bwino, nomba twakulakwata icipande mu Ubutumikishi Bwesu Ubwa Bufumu ica kulati, “Ifingatwafwa Ukulashimikila Bwino.” Icipande cimo na cimo cakulalanda pa cishinka cimo icacindama icingatwafwa ukuwamyako mu fyo tushimikila. Tulekoselesha bonse ukuti cila mweshi tulekonka sana icishinka twasambilila muli uyo mweshi. Pa mpela ya mweshi, tukalakwata ilyashi mu Kulongana kwa Mulimo umo bakasabankanya bonse bakalanda ifyo banonkelemo mu kukonka icishinka twasambilile muli uyo mweshi. Uno mweshi ici cipande ciletukoselesha ukulalemba ifyebo pa bantu twasanga abalefwaya ukusambilila Baibolo.

Ico Ukulemba Kwacindamina: Pa kuti tubombe bwino umulimo twapeelwa, icacindama te kulashimikila fye iyo. Lelo tufwile no kulabwelela ku balefwaya ukusambilila pa kuti tutwalilile ukutapilila imbuto sha cine isho twatanda. (Mat. 28:19, 20; 1 Kor. 3:6-9) Pa kuti tucite ifyo, tulakabila ukubwelela kubo tushimikila, ukulanshanya nabo pa fibasakamika, e lyo no kutwalilila ukulanshanya nabo pali Baibolo. Kanshi calicindama ukulalemba nga twasanga umuntu uwatemwa ifyo twalanshanya nankwe.

Ifyo Mwingacita:

• Lyonse mufwile ukulakwata apa kulemba ifyebo e lyo ne ca kulembelako abalefwaya ukumfwilapo ifyebo na fimbi. Mulelemba bwino pa kuti mwilacula ilyo mulefwaya ukubomfya ifyo fyebo. Mulelemba lilya line fye mwapwisha ukulanda no muntu.

• Pa fyebo mufwile ukulemba pa mwine wa ng’anda kuti paba ishina lyakwe e lyo ne fyebo ifingamwafwa ukusanga uyo muntu pamo nga inambala ya ng’anda, inambala ya foni nelyo adresi yakwe iya pa Intaneti. Kuti mwalemba ne fyo mwacimona pa ng’anda ifingamwafwa ukwishiba ifyo bengatemwa ukulanshanyapo.

• Kuti mwalemba ne fishinka mwacilanshanyapo, amalembo mwacibabelengela, ifyo bacilanda pa fisumino fyabo e lyo ne mpapulo mwacibashiila. Na kabili, mufwile ukulemba inshita no bushiku mwabatandalila.

• Mulelemba ne fyo mulepanga ukuyacita ilyo mukabwelelako, ifyo mwaumfwana ukuyalanshanyapo, e lyo no bushiku mwapangana ukubwelelako.

• Lyonse nga mwabwelelako mufwile ukulalemba. Kuti mwalemba ifili fyonse ifyo mulefwaya.

Uno Mweshi Citeniko Ifi:

• Ilyo mulelemba, mule-ebako abo mulebomba nabo ifyo mulelemba.