Bweleleni Kuli Bonse Abamoneke Ukutila Kwena Kuti Baumfwa
1 Fwe bengi lelo twasambilile icine pa mulandu wa kuti umuntu umo alimwene ukuti twalefwaisha ukumfwa imbila nsuma ya Bufumu ica kutila mu mutima nteka alebwela na kabili ku kutweba na fimbi, nalimo aletutandalila imiku ingi. Na ifwe tulingile ukubikako amano, ukulabwelela kuli bonse abamoneke ukutila kwena kuti baumfwa. Cishinka, ukubwelela kuli bonse abo twalandile nabo mwi bala nako kwaba mulimo wesu uwa ‘kulenga abantu ukuba abasambi.’—Mat. 28:19, 20.
2 Ilukeni Nga Kuti Baumfwa: Nangu ca kutila umuntu tapokele ulupapulo, kuti twailuka nga kuti atemwa ukumfwa imbila nsuma ya Bufumu nga twamona ifyo pa menso palemoneka, twaumfwa ishiwi lyakwe, nangu amashiwi alelanda. Nga twamona ifya musango yu kuti twamutandalila na kabili. Munyina umo aletandalila umwaume umo pa milungu isano ukwabula ukutila ulya mwaume apoke ulupapulo. Ilyo amutandalile pa muku walenga mutanda, alipokele ulupapulo, kabili ne sambililo lya Baibolo lyalitendeke.
3 Nga ca kutila mwailuka ukuti kuti baumfwa, bwangu bwangu bweleleniko, nalimo pa numa fye ya nshiku ishinono. Mwileka “umubifi” asompole imbuto shatandilwe mu mutima wa uyo muntu. (Mat. 13:19) Esheni na maka ukukonka inshita mwapangene ukumutandalila na kabili.—Mat. 5:37.
4 Ukushimikila mu Musebo: Bushe mulebukisha ukubwelela kuli bonse abo mwalandile nabo ilyo mwalebomba ubunte bwa mu lyashi nelyo abo mwakumenye mu musebo abamoneke ukutila kwena kuti baumfwa? Ilyo mwapwa ukulanshanya, kuti mwasosa amuti: “Natemwa nga nshi ukulanda nenu. Bushe ni kwi ningamusanga pa kutila tukalande pali ili lyashi na kabili?” Nga calinga, bakasabankanya bamo kuti basalapo ukupeela uyo muntu nambala ya foni yabo nelyo ukumwipusha na o nga kuti amupeela inambala yakwe. Nga ca kuti abantu balamimona lyonse mu musebo muleshimikila pa cifulo cimo cine, teti bashimunuke ukumupeela inambala ya foni yabo nelyo adresi. Nelyo nga bakaana ukumupeela nambala ya foni nelyo adresi, na lyo line kuti mwaesha ukulanda nabo inshita imbi iyo mukakumana mu musebo.
5 Ilyo twamona imiti twabyele kabili iyo twaletapilila lyonse yatendeka ukutemfuma, tulatemwa nga nshi. E fyo cingaba nga ca kuti tulebwelela kuli bonse abamoneke ukutila kwena kuti baumfwa imbila nsuma. Tulasansamuka nga nshi nga twamona bakosa mu kupepa. (1 Kor. 3:6) Muleibukisha lyonse ukubwelela kuli bonse abamoneke ukutila kwena kuti baumfwa.