Mwe Bacaice Muleba “Abapimpa Ukubomba Imilimo Isuma”

Ilyo Paulo alembeele Tito kalata, atile abalumendo ukubikako fye na Tito wine, balingile ‘ukuba icilangililo kuli bambi ica milimo iisuma.’ (Tito 2:6, 7) Na kabili mu cipandwa cimo cine Paulo atile Yesu ali no kusangulula abantu ba kwa Yehova pa kuti babe “abapimpa ukubomba imilimo isuma.” (Tito 2:14) Finshi fyaba pa milimo iisuma? Pa milimo iisuma paba no mulimo wa kubila no kusambilisha pa Bufumu bwa kwa Lesa. Nga ca kuti muli bacaice kuti mwabombako bupainiya bakwafwilisha nelyo ubwa nshita yonse. Finshi mufwile ukucita pa kuti mukabombeko?—Amapi. 20:29.

Mufwile ukupekanya bwino ifintu pa kuti mukabombeko bupainiya. (Luka 14:28-30) Ku ca kumwenako kuti mwayipusha amepusho pamo nga: Bushe nkalafumya kwisa indalama sha kubomfya ilyo ndebomba umulimo wa nshita yonse? Nkalabomba shani pa kuti nkalekumanisha amaawala yakabilwa? Mulingile no kweba Yehova mwi pepo ifyo mulepanga ukucita. (Amalu. 37:5) Na kabili kuti mwalanshanya na bafyashi benu e lyo na bapainiya pa fyo mulepanga ukucita. Lyena mufwile no kubombesha pa kuti mukafishepo ifyo mwapanga ukucita. Yehova akamupaala pa fyo mubombesha mu mulimo wakwe!

TAMBENI VIDIO ITILA MWE BACAICE MULECINDIKA YEHOVA, LYENA ASUKENI AMEPUSHO YAKONKAPO:

• Mafya nshi abacaice bamo bacimfishe pa kuti babombeko bupainiya, kabili bayacimfishe shani?

• Bushe abafyashi kuti bayafwa shani abana babo ukubombako bupainiya?

• Mulandu nshi cacindamina ukupekanya bwino ifya kubomba umulimo wa kubila imbila nsuma?

• Bushe aba mu cilonganino kuti bakoselesha shani bapainiya, kabili kuti babafwa shani?

• Mapaalo nshi bapainiya bakwata?